Te puai o te parau mau no te faatitiaifaro i te haerea
“Ua rave te hoê taata eiâ, tei tuuhia iho nei, e 500 eiâraa i roto e hitu avaˈe. Ua hamani ino te hoê taata haru vahine tei tuuhia e maha matahiti hou ta ˈna utua titauhia hoê ahuru matahiti e hope ai, e ua haapohe roa o ˈna i te hoê vahine. Ua tomo te hoê taparahi taata tei tuuhia i rapae, i roto e piti fare e ua taparahi oia e toru taata.”—Reader’s Digest, Novema 1990.
“Fatata e 63 % o te mau taata mau auri tei tuuhia i rapae i te mau fare tapearaa rahi, o tei tapeahia no te hoê hapa ino mau i roto e toru matahiti, ia au i ta te Haavaraa i parau i roto i te hoê maimiraa i piahia i teie mahana.”—The New York Times, 3 no eperera 1989.
“Mea hape roa ia manaˈo e ua riro te fare tapearaa ei vahi i reira te feia rave ohipa ino e nehenehe ai e faatitiaifaro i to ratou haerea. E nehenehe te mau fare tapearaa e faaauhia i te hoê anoiraa o te mau vahi ‘haaputuraa’ e te mau ‘fare haapiiraa i te ohipa ino.’”—Sunday Star no Toronto, 20 no mati 1988.
Te na ô ra te hoê tiai no te fare auri Rikers Island i New York e: “E haere mai te hoê taurearea e 19 matahiti i ǒ nei, no te mea o ˈna te taata tamoemoe i roto i te hoê eiâraa. Ia haere atu o ˈna i rapae, eita ïa o ˈna e tamoemoe faahou. I te taime i muri iho, na ˈna ïa e tapea i te pupuhi.”—Vea New York, 23 no eperera 1990.
“Ua riro te mau uputa o te fare tapearaa ei mau opani o te ohu noa: fatata e piti mau auri i nia i te toru o te tapea-faahou-hia i roto i na matahiti e toru i muri aˈe i to ratou tuuraahia i rapae.”—Vea Time, 29 no me 1989.
E ERE te mau parau i nia nei i te parau apî. E aamu tahito hoi: Eita te mau fare tapearaa e faatitiaifaro i te haerea. Area te parau mau ra, oia ïa. Teie te hoê hiˈoraa: o Ron Pryor.
E haamata o Ron i te mahana tataitahi na roto i te taioraa i te hoê irava no roto mai i te Bibilia e to ˈna utuafare. Te fanaˈo ra o ˈna i te hau e te here i roto i to ˈna faaipoiporaa. Mea nahonaho maitai e mea mâ to ˈna fare. E mau taurearea haere haapiiraa maitatai ta raua na tamaiti e piti—aita e raau taero, aita e ava, aita e peapea. I teie nei, ua haere raua i to raua haereraa e te rave nei raua i te mau ohipa kerisetiano. Mea itoito roa o Ron raua ta ˈna vahine o Arlynn i te raveraa i te ohipa ma te tamoni ore ei mau kerisetiano i roto i to raua oire. Te haafaufaa nei raua i to raua oraraa no te tavini ia vetahi ê.
I te matahiti 1970 râ, ua tuuhia o Ron Pryor i roto i te fare auri a tiai noa ˈtu ai e ia haavahia o ˈna no to ˈna taparahiraa i te hoê taata. Ua faahapahia o ˈna, ua faautuahia, e ua haamata ˈtura o ˈna i ta ˈna tau tapearaa i roto i te hoê fare tapearaa a te hau. Tera ïa te hopea o te hoê oraraa ohipa ino o tei aratai pinepine ia ˈna i te fare tapearaa. E vaiiho na râ ia Ron ia faatia mai i to ˈna aamu.
“Te ‘tapearaa’ matamua o ta ˈu e haamanaˈo ra, o te hoê ïa taura i taamuhia i nia i te niuniu tarairaa ahu. E toru aore ra e maha matahiti to ˈu i reira e e au ra e ua mau roa teie peu i roto ia ˈu nei. E horo vau, e moe au e i muri iho e haru mai te mau mutoi ia ˈu e e hoˈi atu vau i te fare. I te pae hopea, ua parau maira to ˈu metua vahine e ahani e eita vau e faaea, e taniuniu o ˈna i te hoê fare vairaa tamarii otare e e haere mai ratou e haru ia ˈu no te opani ia ˈu. Ua parahi noa ˈtura vau i roto i te aua ma te taˈi, a tiai noa ˈtu ai ia ratou. Aita râ ratou i haere mai. Ua taamu atu râ to ˈu metua vahine ia ˈu i nia i te niuniu tarairaa ahu.
“I to ˈu paariraa mai, aita vau i faaea i te topa i roto i te fifi, e riro mai nei te hamani-ino-raa ei pahonoraa i to ˈu mau fifi atoa. Ua feaa piti roa to ˈu manaˈo, ua inoino roa vau e ua faaruehia mai au. Aita vau i ite i te taa-ê-raa i rotopu i te maitai e te ino. Ua vaiiho noa vau i to ˈu mau hinaaro, eiaha râ to ˈu haava manaˈo, ia aratai ia ˈu. I te fare haapiiraa, ua faahaere-noa-hia vau i roto i te piha haapiiraa i nia ˈtu no te mea eita te mau orometua haapii e hinaaro faahou e ite ia ˈu. Ua faarue au i te fare haapiiraa i te piha haapiiraa 6ème e ua faarue atoa ˈtura vau i te fare. Ua pee atura vau i te mau amuimuiraa iino, e ia au i te faaararaa a te mau Papai, ua aratai te reira ia ˈu i roto i te fifi ino roa ˈtu â.—Korinetia 1, 15:33.
“Ua mono aˈera te mau fare aˈoraa i te taura i nia i te niuniu tarairaa ahu. Aita râ te reira i faataui ia ˈu. E horo faahou vau e e haru-faahou-hia mai au. I to ˈu tapuniraa i te hoê fare aˈoraa i Virginie, ua eiâ ˈtura vau i te hoê pereoo e ua haruhia vau. I to ˈu tiaraa ˈtu i mua i te haava o Jenkins te iˈoa ma te parihia e ua eiâ vau i te pereoo, ua ite atura vau e o te pereoo o te haava Jenkins o ta ˈu i eiâ! E 16 matahiti noa to ˈu i reira, tera râ, ua faaotihia e e taurearea etaeta vau e ua haavahia ˈtura vau mai te hoê taata paari. Ua tapeahia ˈtura vau e piti matahiti.
“I to ˈu haereraa i rapae i te fare tapearaa, i te 20raa o to ˈu matahiti, ua noaa maira to ˈu pereoo e piti huira. Mea au roa na ˈu te navenave o te puai tei noaa mai ia ˈu, aita râ i navai. Ua faaô atura vau ia ˈu i roto i te mau Pagans [Etene]—te hoê pǔpǔ na nia i te pereoo e piti huira, e pǔpǔ faatupu peapea teie o tei ineine noa i te taputô. Tera ïa to ˈu puairaa.
“I muri iho, ua faahoro vau i te mau pereoo rahi e ua faauta vau i te mau taoˈa i rapae i te hau no Floride. Aita vau i amui faahou e te mau Pagans, tera râ, i to ˈu haereraa ˈtu na roto i te hau no Virgine i taua tau ra, i te matahiti 1969, ua farerei faahou vau i te tahi o to ˈu mau hoa Pagan tahito. Ua haamata ˈtura matou i te arearea—ma te inu i te uaina e te rave i te raau taero puai. Ua tupu atura te hoê peapea, ua rahi roa ˈtura, e i roto i te huenaneraa i tupu i muri iho tei faaitoitohia e te ava e te raau taero, ua pupuhi au i te hoê taata e ua pohe roa o ˈna. Teie â te hotu no te mau amuimuiraa iino! I muri iho, ua uiui maira e piti mutoi ia ˈu, e ua faˈi atura vau e ua taparahi au i teie taata. O te matahiti 1970 ïa i reira.
“Te tiai noa ra vau i te haavaraa i roto i te fare auri e e taata faatupu peapea noâ vau. Ei hiˈoraa, i te hoê poipoi, ua haere mai te hoê mau auri tei horoahia na ˈna te tahi mau hopoia, e te taofe. E horoa mai iho â ratou i te tahi atu aˈua no muri iho. I taua poipoi ra, ua tuu atura vau i ta ˈu aˈua i raro aˈe i te tipaoti, tera ra, ua parau mai o ˈna, ‘Aita ˈtu ai.’ Ua manaˈo atura vau e te hinaaro ra o ˈna e horoa ˈtu i ta ˈu aua taofe no te tahi atu taata. No reira, ua na ô atura vau, ‘Eaha hoi, ua pau ta oe taofe i teie poipoi?’ Ua parau maira o ˈna, ‘E.’ ‘Tera mai ïa ta oe.’ Ua taora ˈtura vau i ta ˈu taofe i nia i to ˈna mata. Ua opanihia ˈtura vau i roto i te piha poiri.
“Ua faaohu noa ˈtura vau i roto i te piha e 2,5 metera i nia i te 3 metera e aita e haamaramarama. No te taime matamua i roto i to ˈu oraraa, ua haamata ˈtura vau i te feruri maitai. Mea rahi roa te mau uiraa o tei puta mai. ‘No te aha to ˈu oraraa e nane noa ˈi mai te reira? No te aha vau e haere ai i rapae e e ô faahou mai ai i roto i te fare auri? No te aha vau i tuuhia ˈi i roto i teie apoo? No te aha vau e ora ˈi? No te aha? No te aha? No te aha?’ Ua haere noa mai te mau uiraa No te aha, tera râ, aita e pahonoraa. Ua parau atura vau ia ˈu iho e: ‘Ua tapae oe i te hopea o te purumu. Aita ˈtu vahi o ta oe e nehenehe e haere. Ahiri e—te vai ra te hoê Atua—te hoê Atua e ite maira ia ˈu, o tei ite e tei ǒ nei au, o te taa maira ia ˈu—aita hoi au i ite! E te Atua e, ahiri e te vai mau ra oe, ahiri e te haapao maira oe ia ˈu, ahiri e te vai ra te hoê mea o ta ˈu e nehenehe e rave—a parau noa mai oe, noa ˈtu eaha te mea!’
“Te vai ra te hoê Bibilia i reira. Ua manaˈo atura vau, ‘Tera te haamataraa.’ Ua haamata ˈtura vau i te taio. Aita vau e haamanaˈo ra i te mea o ta ˈu i taio. Te haamanaˈo noa ra vau e ua taio vau aita râ vau i taa i te auraa. Hoê hebedoma i muri aˈe, ua faahoˈihia ˈtura vau i roto i te hoê piha. Ua matara hoê, e piti roi aita e taata to roto. Ua tuu aˈera ratou ia ˈu i reira, e e piti mahana i muri iho, ua tuu maira ratou i te tahi atu mau taata mau auri i roto i to ˈu piha. Te taio noa ra vau i te Bibilia i taua taime ra, ma te tamata i te taa i te auraa. Ua ite maira o ˈna ia ˈu i te taioraa e ua ani maira: ‘E hinaaro anei oe e taa i te auraa o te Bibilia?’ ‘E!’ ‘E ani au i te hoê buka o te tauturu ia oe.’ Ua titau atura o ˈna i te hoê Ite no Iehova—i te hoê taime ua haapii ratou na muri ia ˈna—e ua horoa maira o ˈna i te buka Te parau mau e aratai i te ora mure ore ra. O te avaˈe tiurai 1970 ïa i reira.
“Ua haamata ˈtura vau i te taio i teie buka e ua hope roa. Aita vau i taa i te mau mea atoa, tera râ, e au ra e mea papu maitai. I to te mau Ite no Iehova haereraa mai e haapii ia ˈu, ua haamata ˈtura te mau uiraa atoa o ta ˈu i uiui noa na i roto i te piha poiri i te pahonohia. No te taime matamua i roto i to ˈu oraraa, ua noaa maira ia ˈu i te tahi maramarama no nia i te auraa o te maitai e te ino. Rahi noa ˈtu to ˈu raveraa mai i teie maa i te pae varua, rahi noa atoa ˈtu to ˈu riroraa mai ‘mai te feia no te mataro i ite ai to ratou feruriraa i te maitai e te ino.’ (Hebera 5:14) Te araara maira to ˈu haava manaˈo, te oraora maira!
“Ua faatupu mau â teie ite i noaa taue mai ia ˈu no nia i te parau mau o te Bibilia i te hoê tauiraa rahi i roto i to ˈu huru feruriraa. Ua taio vau i te buka i roto e 24 hora. I roto noa i te hoê po, ua taui roa vau. Ua opua ˈtura vau e faaite atu i te tahi atu mau taata mau auri i te mau parau mau o ta ˈu e haapii ra. I to ˈu manaˈoraa, e oaoa roa te mau taata atoa mai ia ˈu iho nei. Aita râ ratou i oaoa. Ua haafifi noa na vau i te tahi atu mau taata mau auri i mutaa ihora; i teie nei râ, ua rahi atu ïa to ratou riri—mai tei ore roa ˈtu hoi i manaˈohia! Ua haere noa mai râ te mau Ite i te fare auri no te haapii ia ˈu, e ua mǎrû rii mai ta ˈu huru pororaa ia vetahi ê.
“E rave rahi mau tauiraa o ta ˈu i rave, e i roto e piti avaˈe, ua horoahia maira vetahi mau hopoia na ˈu. Ua vaiiho atoa ratou ia ˈu ia haere i rapae, eita roa hoi te reira e manaˈohia ia hiˈohia ta ˈu mau ohipa i rave i mutaa ihora e te tumu no reira vau i tapeahia ˈi i ǒ nei. Te faaohipa ra hoi te mau faaueraa tumu o ta ˈu e haapii ra i roto i te Bibilia i to ratou mana i nia ia ˈu. Te haamata ra te mau pape o te parau mau no roto mai i te Parau a te Atua i te tamâ ia ˈu, mai ta ratou i rave na i te tau o te mau aposetolo. Ua tapaohia to ratou puai no te faatitiaifaro i te haerea i roto i te Korinetia 1, 6:9-11 e na ô ra e:
“‘Eaha! aita outou i ite e e ore te feia parau-tia ore e parahi i te basileia o te Atua? Eiaha e vare; e ore hoi te taiata, e te haamori idolo, e te faaturi, e te mahu, e te paia, e te eiâ, e te nounou taoˈa, e te taero ava, e te faaino, e te haru e ore anaˈe ïa e parahi i te basileia o te Atua. Mai te reira hoi te hoê pae o outou na, ua horoihia râ outou.’
“I te pae hopea, ua haavahia ˈtura vau. Ua faaoti aˈera ratou i te utua e 20 matahiti tapearaa no te ohipa taparahi taata. I te matahiti 1971, ua afaihia ˈtura vau i roto i te hoê fare tapearaa tiai-etaeta-hia. I reira ta ˈu haapiiraa bibilia e te mau Ite i te haereraa i mua. Ua taui roa to ˈu haerea. Aita i maoro roa i roto i teie fare tapearaa apî, ua horoa maira ratou i te tahi hopoia na ˈu e ua haamata ˈtura ratou i te vaiiho ia ˈu ia haere i rapae. I to ˈu haereraa i rapae i te hoê taime, ua ani atura vau i te Ite i ǒna to ˈu faaearaa e: ‘Eaha te tapea ra ia ˈu ia bapetizo?’ Ua ani atura o ˈna i te amuiraa no taua vahi ra e ua pahonohia maira e: ‘Aita hoê aˈe mea.’ I te matahiti 1973, i te avatea, ua bapetizohia vau i roto i te hoê apoo pape na te puaatoro i te hoê fare faaapu i pihai iho mai. Ua pure au i to ˈu haereraa ˈtu i roto i te pape, inaha, o ta Iesu hoi i rave i to ˈna faahopuraahia i raro i te pape no Ioridana e Ioane Bapetizo.
“I muri iho, ua haere oioi noa ˈtura vau i mua i te pae varua. Ua apiti atu vau i roto i te Haapiiraa no te taviniraa teotaratia e arataihia ra i roto i te amuiraa no taua vahi ra—noa ˈtu iho â ïa e eita vau e tia tino roa mai i mua i te amuiraa. E faataehia mai ta ˈu mau tuhaa a te haapiiraa e e haruharu vau i ta ˈu mau tumu parau i nia i te ripene, e e hauti ïa ratou i te ripene i roto i te amuiraa. E faahoˈi mai te tiaau no te haapiiraa i te aˈoraa no te tauturu ia ˈu ia haere â i mua. E faatupu na matou i te mau putuputuraa i te mau hebedoma atoa i roto i te fare tapearaa i reira e titau manihini na matou i te tahi atu mau taata mau auri ia haere mai.
“A mairi noa ˈi te taime, ua apiti mai au e rave rahi mau irava i to ˈu ite no nia i te Bibilia. Ua riro ratou mai te mau ofai tapao o te aratai ia ˈu i rapae i te huenaneraa i te pae morare i reira to ˈu ora-noa-raa i roto i te rahiraa o to ˈu oraraa, e tae roa ˈtu i te taime i fanaˈo ai au i te tauiraa ta te aposetolo Paulo i faahiti i roto i te Kolosa 3:9, 10: ‘A haapae i te huru taata tahito e ta ˈna atoa ra mau peu; e a ahu ia outou i te huru taata apî, o tei faahouhia i te ite papu ra, ia au i te hohoˈa o Tei hamani ia ˈna ra.’
“I te matahiti 1978 ra, ua titauhia vau e tia ˈtu no te toru o te taime i mua i te pǔpǔ e faaoti e faatiamâ i te mau taata mau auri. E piti taime to ˈu patoiraahia no te ino o ta ˈu mau hara. I teie taime, ua faatae atu te mau Ite e te tahi atu mau taata o tei haapapu i te mau tauiraa o ta ˈu i rave, e 300 rata i te pǔpǔ haava.
“I te mea e e au ra e e tuuhia vau i rapae, ua manaˈo atura vau e e nehenehe paha ta ˈu e faaipoipo. E Ite no Iehova o Arlynn, te hoê vahine ivi e piti tamarii ta ˈna, e ua papai mai o ˈna ia ˈu i to ˈu tapearaahia i roto i te fare tapearaa. Ua haere mai o ˈna e hiˈo ia ˈu e ta ˈna nau tamaiti. E ua here roa mâua. Ua tuuhia vau i te 1 no febuare 1978. Ua faaipoipo mâua i te 25 no febuare 1978. I teie nei, 13 matahiti i muri iho, mea oaoa roa mâua. Ua faaipoipo hoê o ta mâua tamaiti e e Ite no Iehova itoito mau oia. Te rave ra te tahi tamaiti i te ohipa ma te taime taatoa i te pu rahi a te mau Ite no Iehova i Brooklyn, New York.
“Ua pahonohia mai ta ˈu mau pure. Te haamauruuru nei au i te mau taeae e te mau tuahine o tei tauturu mai ia ˈu. Inaha, e tia ia ˈu ia haamauruuru atu i te Atua oaoa ra o Iehova, no to ˈu oaoa rahi.—Timoteo 1, 1:11.
“Tera râ, te tatarahapa nei au no ta ˈu mau hara i rave. Ia hiˈo vau i to ˈu haerea ino no mutaa ihora, e faufau-roa-hia vau. Ua pure au e rave rahi taime ia Iehova ia faaore mai oia i ta ˈu hara, e te manaˈo nei au e ua faaore mai oia. Te tiaturi atoa nei au e e nehenehe ta te feia o ta ˈu i hamani ino na mua ˈˈe e faaore i ta ˈu hapa. E i te pae hopea, te tiaturi nei au e e faatia faahou mai Iehova i te taata o ta ˈu i taparahi ia noaa atoa ia ˈna i te ravea no te ora e a muri noa ˈtu i roto i te paradaiso a te Atua i nia i te fenua. I reira ïa vau e oaoa roa ˈi!”
Ua manuïa te parau mau a te Bibilia i te vahi aore roa te mau paruru auri o te fare tapearaa e te mau piha poiri i manuïa. Ua tauturu oia ia Ron Pryor ia haapae i te huru taata ino tahito e ia ahu i te huru taata kerisetiano apî. No te aha? No te mea “mea ora hoi te parau a te Atua, e te puai rahi,” oia hoi te puai no te faatitiaifaro i te haerea.—Hebera 4:12.
[Parau iti faaôhia i te api 26]
O te pereoo o te haava Jenkins o ta ˈu i eiâ!
[Parau iti faaôhia i te api 27]
Te vai ra te hoê Bibilia i roto i te piha poiri. Ua haamata ˈtura vau i te taio
[Parau iti faaôhia i te api 27]
Ua faaoti ratou i te utua e 20 matahiti tapearaa no te ohipa taparahi taata
[Hohoˈa i te api 28]
O Ron Pryor e ta ˈna vahine o Arlynn, i teie mahana