Te toto: Te pape faufaa roa ˈˈe i roto i te ao nei

Noa ˈtu e e faaore-roa-hia te pâmuraa toto no te mea e ravea rapaauraa atâata mau e te faufaa ore e faaitoitohia nei e te hoê pu nounou moni, eita te reira e faataa e no te aha râ te mau Ite no Iehova e patoi ai i teie ravea. Inaha, e ere no te tahi mau tumu i te pae rapaauraa ratou e na reira ˈi, mea hohonu roa ˈturâ. Eaha ïa teie mau tumu?

Te hoê topata toto, mea haihai roa ïa. Mea ohie roa hoi ia tamǎrô i teie puu rii huˈa roa uteute e tahe mai ia motu anaˈe aore ia puta anaˈe tatou i te pine.

Teie râ, ahiri e e nehenehe ta tatou e faanainai roa ia tatou e ia hiˈo atu tatou i teie puu, ua naeahia ïa i te faito o te hoê mouˈa, e ite ïa tatou i roto i to ˈna mau hohonuraa ura te hoê ao maere mau, te nahonaho maitai e te fifi roa ia faataa. I roto i te hoê noa topata toto, te haa nei te hoê nuu puea iti o te tahoê ra e 250 mirioni toropuru ura, e 400 000 toropuru uouo e 15 mirioni puea iti o te toto parauhia plaquettes e te vai aturâ. Ia titau-anaˈe-hia i te tahi ohipa i roto i te tereraa o te toto, tera pǔpǔ tataitahi o teie nuu ta ˈna hopoia e haapao.

E tere te mau toropuru ura ma te vitiviti na roto i te faanahoraa fifi roa o te faanahoraa o te mau uaua, ma te faauta i te mataˈi ora mai roto mai i te mau mahaha e tae atu i roto i te mau puea iti tataitahi o te tino e ma te hopoi ê atu i te mataˈi ino. Mea huˈa roa ratou e e titauhia e 500 o ratou ia naeahia te hoê meumeuraa hoê noa milimetera. Teie râ, ia tuu-anaˈe-hia ratou te tahi i nia i te tahi, e naeahia ïa te mau toropuru ura taatoa i te meumeuraa e 50 000 kilometera! I muri aˈe i to ˈna haaatiraa i te tino i roto e 120 mahana e e 1 440 taime i te mahana, e faaea te toropuru ura i to ˈna tere. E faaohipa-apî-hia to ˈna mafatu î roa i te taoˈa auri area te toea ra, e faaorehia ïa. I te mau tetoni atoa, e tatarahia e toru mirioni toropuru ura e i te hoê â taime, e hamanihia te hoê â faito i roto i te puo ivi. Nafea te tino e ite ai e ua naeahia te hoê toropuru i te otia o to ˈna ora? Aita te mau aivanaa e taa ra e nafea ia pahono i teie uiraa. Noa ˈtu râ eaha te huru, ia au i te parau a te hoê taata tuatapapa i te huru o te mau taoˈa, ahiri e aita teie ravea faaapîraa, “i roto noa i tau hebedoma, e meumeu roa to tatou toto mai te tima ra te huru”.

I roto i taua area taime ra, e hiˈopoa haere te mau toropuru uouo no te maimi e no te taparahi i te mau taoˈa ino atoa. Area te mau plaquettes ra, e haapue oioi noa ratou ia motu anaˈe te hoê vahi, ma te faatere i te ravea o te haapaariraa i te toto e te faaoraraa i te pepe. Te tautau noa ra teie mau puea iti atoa ra i roto i te hoê pape teatea peni uouo, oia hoi te pape toto, tei roto atoa ia ˈna te mau hanere huru vaehaa taa ê, e rave rahi hoi tei titauhia e te toto no te rave i ta ˈna mau ohipa atoa.

Noa ˈtu e e tahoê ratou i to ratou maramarama, mea fifi roa na te mau aivanaa ia taa maitai i te huru o te toto. Eaha ˈtu pai ïa no te hamani faahou i te toto... E nehenehe anei e tiaturi e e ere na te hoê Taata hamani rahi i hamani i teie pape fifi roa ia faataa e te nehenehe e faaauhia i te hoê semeio? Ahiri e mai te reira mau â, eita anei e tia i teie Poiete tei hau aˈe i te taata nei ia faaohipa i to ˈna mana teitei roa ˈˈe no te haamau i te mau ture no te faaohipa i te mea o ta ˈna iho i hamani?

Mai te reira te manaˈo a te mau Ite no Iehova. Te faariro nei ratou i te Bibilia mai te hoê rata i reira to te Poiete faaiteraa mai i te taata nafea e noaa mai ai ia ratou i te hoê oraraa oaoa. Inaha, te faahiti nei teie rata i te parau no te toto. Te taiohia ra hoi i roto i te Levitiko 17:14 e “tei te toto hoi te ora [nephe] o te mau mea atoa nei”. Eita iho â ïa e tia ia rave i teie parau i roto i to ˈna auraa mau, no te mea te parau atoa ra te Bibilia e ua riro te tino ora iho ei nephe. Teie râ, te matara ra ia tatou e ua taaihia te ora o teie mau nephe atoa i te toto e tahe ra na roto ia ratou, e taoˈa faufaa roa hoi, no reira ˈtura, e faarirohia teie toto mai te hoê pape moˈa e faataipe ra i te ora.

Mea fifi roa na vetahi mau taata ia taa i teie parau. Te ora nei tatou i roto i te hoê ao mea iti roa te mau ohipa o te faarirohia nei ei mea moˈa. Aita hoi te ora iho e haapaohia nei mai te hoê mea faufaa roa. No reira, e maere anei tatou mai te peu e e faaohipahia te toto mai te hoê taoˈa hoo faufaa ore? Teie râ, eita roa ˈtu te feia e faatura nei i te hinaaro o te Poiete e pee nei i teie haerea. ‘Eiaha outou e amu i te toto’, mea maramarama maitai teie faaueraa ta te Atua i horoa ˈtu ia Noa ra e ta ˈna mau huaai — oia hoi te huitaata atoa nei (Genese 9:4). E vau senekele i muri iho, ua tuu atoa ˈtura te Atua i teie faaueraa i roto i te Ture o ta ˈna i horoa ˈtu na te mau ati Iseraela. Hoê ahuru ma pae senekele i muri aˈe, ua haapapu faahou oia i teie parau i te amuiraa kerisetiano: ‘Eiaha e rave i te toto.’ — Ohipa 15:20.

Te tuu nei te mau Ite no Iehova i teie ture na mua ˈˈe i te mau mea atoa no te mea te hinaaro nei ratou e auraro i te Poiete. Maoti te pohe tusia o ta ˈna Tamaiti herehia, ua horoa ê na mai Iehova i te hoê toto faaora na te huitaata nei, e nehenehe hoi teie toto e faaroa ˈtu â i te ora, eiaha no te tahi noa tau avae aore ra tau matahiti, tera râ, e a muri noa ˈtu. — Ioane 3:16; Ephesia 1:7.

Hau atu, ua paruru te patoiraa ˈtu i te mau pâmuraa toto i te mau Ite no Iehova i te mau ati e rave rahi. I teie nei, te rahi noa ˈtura te mau taata maˈi e ere i te Ite no Iehova teie e patoi nei i te mau pâmuraa toto. I roto i te roaraa o te tau, te taui atoa nei te pǔpǔ feia rapaau i ta ratou huru raveraa e mea iti aˈe te toto o ta ratou e faaohipa nei. “Oia mau, te pâmuraa papu roa ˈˈe, o te pâmuraa ïa o te ore e pâmuhia”, o ta te vea Surgery Annual ïa e papai ra. Ua faaite te vea Pathologist e ua tamau noa na te mau Ite no Iehova i te faataa e e ere roa ˈtu te pâmuraa toto i te mea maitai, e te na ô ra oia e: “Noa ˈtu e te patoi nei te mau pu vairaa toto i te reira, e rave rahi mau haapapuraa o te turu nei i ta ratou parau.”

Mea au aˈe na outou ia tiaturi ia vai? I te Poiete paari mau o tei hamani i te toto? Aore ra i te mau taata o tei faariro i te reira ei imiraa moni rahi?

[Hohoˈa i te api 29]

Hohoˈa o te faanahoraa uaua o te tino, mea huˈa roa hoi te mau uaua iti (faarahihia) no reira, hoê noa ïa anairaa puea iti toto o te nehenehe e tere atu na roto i teie eˈa.