Taata ta ˈna anuanua

UA hamani aˈenei anei outou i te hoê anuanua? Aita outou i pî aˈenei i te pape i nia i te vahi mahana, e inaha, tupu mai nei ma to outou hoi oaoa rahi, te tahi maa anuanua iti? Noa ˈtu e ere mai te reira te huru, papu maitai e e faahiahia roa outou ia parau mai te hoê taata e: “A hiˈo na i te anuanua!” Eita tatou e fiu ia hiˈo noa ˈtu i taua anuanua nehenehe mau ra? Eaha râ hoi to muri mai i te anuanua? Nafea hoi te reira ia tupu mai?

Ia nehenehe outou e ite i te hoê anuanua, e tia ïa ia haaputuputuhia e toru huru: i mua ia outou te ûa, e i muri mai i to outou tua, te mahana, eita hoi e taeahia hau atu i te 40 degre i nia i te iriatai. E mai te peu e tanotano maitai, e piti ïa anuanua ta outou e ite atu, — te hoê anuanua mea puai roa te peni, e te tahi atu, mea maramarama roa te peni, e vai ra i nia noa ˈˈe i taua anuanua matamua ra. E hia hoi rahiraa peni ta outou e ite atu? Mai te huru ra ïa e ia hiˈohia ˈtu, e hitu ïa — te vareau, te nimanu pao roa, te ninamu, te matie, te marearea, te anani e te uteute — noa ˈtu â ïa e aita vetahi mau taata aravihi e haapao ra i te peni ninamu pao roa. I te mea hoi e e tahoê maite taua peni ra, e ite atura ïa te rahiraa o te taata e maha aore ra e pae anaˈe peni.

No hea mai hoi taua mau peni ra? A tahi, e ohipa te mau topatapata pape mai te mau prismes, ma te faahuru ê i te maramarama o te mahana, e i te tahi aˈe pae, mai te mau hiˈo ra te huru, e puta ˈtu hoi te hohoˈa o taua mau peni ra i roto e o ta tatou ïa e ite mai. E ite te taata tataitahi e hiˈo atura i te hoê anuanua i te hoê anuanua taa ê te tahi e te tahi. No te aha? No te mea, ia au i te vahi e tiahia ra e te taata e hiˈo atura i te anuana, e ere hoê â te faito i rotopu i te mau topatapata ûa e te mau hihi o te mahana. Hau atu, eita te taata e hiˈo atu hoê â mau topatapata e topa maira. No reira, ia mataitai outou i te hoê anuanua, te ite ra ïa outou i te ohipa taa ê mau: ta outou anuanua!