Te hoê huru pâmuraa maere mau

Te hinaaro atoa nei te mau rauere i nia i te omou o te hoê tumu raau, i te mau taoˈa ei maa na ratou e i te pape. Mea nafea râ te pape e haere ai i nia i roto i te hoê tumu raau?

Ia au i te vea Compressed Air Magazine, “e haamata teie ohipa pâmuraa maere mau e te faahiahia, i roto i te repo, i reira tau mirioni huruhuru nainai roa o te mau aˈa e rave mai ai i te pape e te tahi mau taoˈa parauhia sels minéraux, to roto hoi i te repo. Ia pau te pape na roto i te mau rauere, e pâmuhia ˈtu ïa te pape e e rahi atu â ta te mau aˈa e huti i roto i te repo. Eita roa ˈtu ta te hoê pâmu hamanihia e te taata e nehenehe e faahaere i te pape i nia hau atu i te 10 metera”. Eaha ˈtura ïa no te huru pâmuraa a te hoê tumu raau?

Mea faahiahia roa ïa e inaha, te parauhia ra e e nehenehe ta ˈna, mai te peu e e titauhia te reira, e faahaere i te pape i roto i te hoê tumu raau e 3 000 metera te teitei! Eita ˈtura ïa e maerehia ia faahiti te hoê parau faatianiani a te hoê taata hamani pâmu i “te huru pâmuraa faahiahia mau” a te tumu raau parauhia érable e ia faˈi atoa oia e: “Eita roa ta tatou e nehenehe e faaite i te faaoromai e te aravihi mai to te natura ra te huru.”