Mai te fanauraa mai e tae atu i te pohe, mea faufaa mau te here no tatou

Te here: tera te mea e hinaaro-rahi-mau-hia e tatou. Aita anaˈe e here, e pohe ïa te mau aiû, e pohe mǎrû rii noa ïa te feia paari e ite atoa ïa te feia maˈi i to ratou huru i te ino-roa-raa. Ua riro te here ei tumu parau no te mau buka e rave rahi. No te imiraa i te here, e amuimui ïa te mau taata no te horomiri e te tauahi te tahi i te tahi. Te horoa nei te hohoˈa teata e te hauti teata taata ora i te hoê hohoˈa au ore e te viivii no te here. No te tahi pae, te taatiraa pae tino “e herehere ïa” te reira no ratou, na te reira e faaite mai e mea hape to ratou manaˈo no nia i te here. Te parau nei to tatou ao viivii e te ino rahi e eita e tupu te huru here o te nehenehe e faaora ia ˈna. Tera râ, teie te here o ta tatou e hinaaro rahi mau nei.

I ROTO i te hoê tauaparauraa no nia i te mau taairaa i rotopu i te mau taata nei, te faaite ra te hoê taata orero parau i te huru o te mau aiû otare tei vaiihohia i roto i te hoê piha no te fare maˈi. I nia i te mau roi tei anaihia, e maˈihia te mau aiû, e te tahi pae ra e pohe roa ˈtu ïa ratou. Mea taa ê râ te huru o te aiû i nia i te roi hopea. Mea maitai roa o ˈna. Ua maere roa te taote. Mea faaamu-maitai-hia teie mau tamarii atoa, faahapuhia, haamahanahanahia; mea haapao-maitai-hia ratou paatoa. Tera râ, hoê anaˈe aiû maitai roa ˈˈe maoti râ te aiû i tuuhia i nia i te roi hopea roa. A hope noa ˈi te mau avae e ia afaihia mai â te mau tamarii i te fare maˈi, mai te reira noa iho â te huru: te aiû anaˈe i nia i te roi hopea te mea maitai roa ˈˈe.

I te pae hopea, i te hoê ahiahi ua tapuni te taote i roto i te piha, ma te tiaturi e e itehia ia ˈna taua ohipa maere ra. I te tuiraa po, ua tomo mai te hoê vahine tamâ i te piha e ua taahu oia i te piha mai te hamataraa mai e tae atu i te hopea. I te otiraa ta ˈna ohipa, ua tia aˈera oia, faaetaeta aˈera oia e taurumi atura i to ˈna tua. E haere atura oia i te roi hopea. Ua rave aˈera oia i te aiû e hahaere atura na roto i te piha e te aiû ma te hôˈihôˈi ia ˈna, ma te aparau ia ˈna e ma te faataueue ia ˈna i roto i to ˈna rima. I muri iho ua faataoto atura ia ˈna i nia i te roi e ua haere atura oia i rapae. Ua hiˈopoa faahou â te taote i te po i muri iho e te po i muri iho faahou: i te mau po atoa e na reira noa oia. O te aiû iho â o te roi hopea ta taua vahine ra e hii e e hôˈihôˈi, ma te aparau atu e ma te faaite atu i to ˈna here ia ˈna. E ia tae anaˈe mai te hoê pupu aiû apî, o te aiû iho â o te roi hopea te mea maitai roa ˈˈe, area te tahi pae râ e maˈihia ïa ratou e pohe atu te tahi pae.

Te faataa ra te vea Psychology Today e “i roto i te taime no te tupuraa o te roro, e riro te tahi mau huru oia hoi ia ore anaˈe te metua vahine e hôˈihôˈi e e amoamo rahi i to ˈna aiû, i te faatupu i te inoino aore ra te faataere i te tupuraa o te taatoaraa o te mau neurones o te horoa mai i te mau manaˈo hohonu”. E ite te hoê aiû i te here o te hoê metua vahine o te faaite atoa ˈtu hoi i to ˈna here ia ˈna. I te mau minuti hopea o te fanauraa, e tupu ïa te hoê taairaa i rotopu i te metua vahine e to ˈna aiû. I muri aˈe, e rahi roa ˈtu ïa te reira na roto i te faaiteraa i te here, mai tei faataahia i roto i te api 99 o te buka Comment s’assurer une vie de famille heureusea:

“Ia piˈo anaˈe oia na nia iho i te roi o to ˈna aiû, ia tuu anaˈe oia i to ˈna rima i nia i te ouma o te tamarii e a faataueue marû noa ˈi, ma te haafatata roa ˈtu to ˈna mata i nia i to ˈna e ma te parau atu i te tahi mau parau mǎrû, eita iho â ïa te aiû e taa mai i ta ˈna mau parau (aita hoê e auraa aˈe), e hauti mai râ e e ataata mai oia, no te mea e faaite mai te rima e te taˈiraa reo o to ˈna metua vahine e te here ra oia ia ˈna. E papu ïa ia ˈna e te paruruhia ra oia. Mea au roa na te mau aiû e te mau tamarii ia faaitehia e te herehia ra ratou, e na te reira e turai ia ratou ia na reira atoa. Ia tapea mai ratou i te arapoa o te mama e a apa atu ai ia ˈna, e oaoa roa ïa ratou i te huru o ta ˈna fariiraa mai i to ratou here. Te haamata ra ïa ratou i te ite i te hoê haapiiraa rahi, oia hoi mea oaoa aˈe ia horoa i te here i te rave mai e ia ueue anaˈe i te here e ooti ïa i te here. — Ohipa 20:35; Luka 6:38.”

I roto i te roaraa o te mau matahiti, e rave rahi te mau maimiraa tei faaite mai e te hinaaro mau nei te mau aiû i te here. Ua nenei te vea Scientific American i teie parau faataa e: “Ua tuatapapa o René Spitz e to ˈna hoa ohipa o Katherine Wolf, no te Pû maimiraa no te psychanalyse no New York, e 91 tamarii i itehia mai i te pae hitia o te râ no te Fenua Marite e i Canada. Ua itehia ia ratou e te vai ra te mau tapao no te mehameha e te mata oto i nia i te taatoa o taua mau tamarii ra. Mea taere roa to ratou tupuraa e eita to ratou kilo e maraa maitai, mai te peu e eita e topa. E araara tamau noa ratou e e paruparu roa hoi. Te faaite ra o René Spitz e o Katherine Wolf e i roto i teie e 91 tamarii e 34 tei pohe ‘noa ˈtu e ua faaamu-maitai-hia ratou e ua haapao-maitai-hia ratou i te pae rapaauraa’.

Ua parau te hoê psychiatre no Floride e: “E nehenehe te aiû aita i herehere-rahi-hia aore ra i hiihia, e moemoe e eita o ˈna e amuimui e faaea noa râ o ˈna o ˈna anaˈe iho. (...) Te tapeapearaa i rotopu i te mau metua e te tamarii, o te ohipa faufaa roa ˈˈe ïa i te pae no te haapaoraa i te tamarii, ua itehia hoi te tahi mau tupuraa i reira ua pohe te mau tamarii i raro mai i te hoê matahiti no te mea aita ratou i tapeapeahia aore ra i hereherehia.”

No nia i te mau ohipa i itehia mai e James Prescott, no te Pû maimiraa marite no te pae o te oraora-maitai-raa, teie ta te hoê parau faaite i parau e: “Mai te fanauraahia mai â, e rave rahi te mau Marite tei erehia i te hoê mea o te nehenehe e opani ia ratou ia riro mai ei mau taparahi taata, mau taata tei roohia i te maˈi i te pae feruriraa aore ra mau taata paari iino. Taua mea ra, o te mau tapeapearaa ïa e te mau faaiteraa i te tapao no te here — oia hoi te hoê huru ‘oaoaraa hohonu’ ta te mau taata ïa e hinaaro nei mai ta ratou e hinaaro atoa ra i te maa.” Hoê â teie huru manaˈo e to te vea ra Psychology Today. No nia i te hinaaro o te mau aiû ia horomirihia e ia tapeapeahia ratou, te na ô ra oia e: “I te mea hoi e hoê â huru ohipa e tupu i nia i te mau tuhaa o te roro tei taaihia i te haerea iino, (...) te tamarii tei erehia i te mau tapeapearaa, e riro mai ïa oia ei taata eita ta ˈna e nehenehe e tapea i to ˈna mau hinaaro iino.”

Teie te faataaraa a te Vea no te oraraa i te mau mahana atoa (beretane) e: “I roto i to ratou aro-uˈana-raa i te mau maˈi o te feruriraa, ua itehia i te mau psychiatres te faahopearaa e, te fifi rahi o te feia tei roohia i te maˈi o te feruriraa, oia ïa te ereraa i te here. I muri aˈe i to ratou aparauraa no te faaamuraa i te hora taotiahia aore ra eita, no te tairi aore ra eita, ua ite te mau psychologues no te mau tamarii e, ia here-anaˈe-hia te tamarii, e ere ïa te reira i te mea faufaa. Ua riro te here, no te mau sociologues, ei ravea ia ore te ohipa iino, no te mau crimilogues, ei ravea ia ore te taparahi taata, e no te mau politicologues, ei ravea ia ore te tamaˈi.”

Ua itehia i taua mau taata aravihi ra te ravea, aita râ e faaohipahia nei. Ua faaara te taote o Claude Frazier e: Mai te peu e eita te here e faahoˈi mai i te huru taata i roto i to tatou nei totaiete tei haere i mua i te pae faanavairaa faufaa, “e vai noa mai ïa, mai ta tatou paha e ite nei i teie mahana, i te hoê fenua i reira te mau oire e riro ai ei tahua aroraa tei î roa i te taehae, i reira te mau utuafare fetii e taa ê ai na roto i te mau amahamaharaa ino mau, i reira te mau taurearea e imi ai i te ravea ia matara ratou i taua huru oraraa ra na roto i te raau taero e te pohe, ei haapoto-noa-raa, te hoê ao tei fatata roa i te haapoheraa ia ˈna iho”.

Te parau faahou ra o Claude Frazier e: “I nia i to ˈu tiaraa taote, te ite nei au e te tuhaa rahi o te feia maˈi o ta ˈu e hiˈopoa nei i te mau mahana atoa, te roohia ra ïa ratou i te mau maˈi tei faatupuhia e taua ereraa i te pae o te here ra. (...) E faahiti anaˈe na i rotopu i te mau maˈi e parau-pinepine-hia nei no taua tuhaa ra i te mauiui upoo, te mauiui tua, te mau ulcères e te mau maˈi mafatu. Teie râ, te amui atoa nei te tahi mau taote maimi i te mau maˈi riaria roa mai te mariri aˈi taata i roto i taua tabula ra.”

Mai te peu e e haamaitai te mau taairaa mahanahana i rotopu i te mau taata e te here i to tatou oraora-maitai-raa, e nehenehe atoa te ereraa i te faahoaraa e faaino ia tatou. Te mau fifi o te oraraa o teie nei tau, te mau utuafare amahamaha, te mau utuafare hoê anaˈe metua, te mau tamarii tâuˈa-ore-hia i te pae no te here, te tapaparaa i te mau faufaa materia, te toparaa i te pae morare, te faarueraa i te mau ohipa faufaa mau... e faarahi roa taua mau mea ra i te papu-ore-raa e te moemoe e faaino nei i te oraora-maitai-raa. Te tuatapapa rahi nei o James Lynch i teie manaˈo i roto i ta ˈna buka Te mafatu peapea — faahopearaa o te moemoe i te pae rapaauraa (beretane). Te parau ra oia e: “Te mea o ta tatou e horoa no te oreraa tatou i taa e no te ora e hinaaro ïa tatou i te here e te faahoaraa i to tatou mau taata-tupu, e nehenehe e titauhia te reira i to tatou mafatu e to tatou mau uaua. (...) Te faaite nei to tatou mafatu i te hinaaro i te here no te ora, hinaaro ta tatou e ore e haamaha nei, no to tatou ïa ino.”

Ua taaihia te faito cholestérol, eiaha noa i nia i te huru maa e amuhia ra, i nia atoa râ i te mau fifi i te pae no te here. E nehenehe atoa taua mau fifi ra e faatupu mai i te maˈi hypertension. Te haapohe nei te mau maˈi mafatu 55 i nia i te hanere mau taata i te fenua Marite, e e haapohe iho â teie mau maˈi i te feia o ratou anaˈe i to ratou oraraa. Te parau ra te taote Lynch e: “Mea maere mau ia hiˈohia te mau numera o te feia i pohe na roto i te mau maˈi mafatu i rotopu i te mau Marite faaipoipo-ore-hia — te faaite ra taua mau numera ra e te faito o te feia tei pohe na roto i te maˈi mafatu, e tatai piti e tae atu i te pae te hauraa i rotopu i te mau Marite faaipoipo-ore-hia (oia hoi tei faataa, ivi e faaipoipo-ore-hia) i te feia faaipoipohia.” Te faaite nei te maimiraa apî a te aivanaa e e nehenehe te moemoe e haaparuparu i te faanahoraa o te tino no te paruru ia ˈna i te mau maˈi, e no reira e ohie noa ïa o ˈna i te roohia i te maˈi. Mea ino te moemoe no to tatou oraora-maitai-raa. Ua ite atoa o Adamu i te moemoe i roto i te paradaiso. Ua ite te Atua e e ere i te mea maitai ia faaea noa te taata o ˈna anaˈe iho e no reira oia i horoa ˈtu ai ia Eva na ˈna. — Genese 2:18, 20-23.

Te taata atoa e faaea o ˈna anaˈe iho i roto i te hoê vahi poiri e te maniania ore, e nehenehe hoi to ˈna upoo e inohia. E tia ia faaohipahia to tatou mau huru ia vai maitai noa tatou. Ia au i to tatou natura, e tia iho â ia tatou ia amuimui e te tahi mau taata, e e hinaaro iho â tatou i te farerei i te tahi, no to tatou maitai. E hinaaro iho â tatou ia vai ratou i pihai iho ia tatou, noa ˈtu eita tatou e aparau atu ia ratou. E hinaaro iho â tatou e faaite i te here te tahi e te tahi. Oia mau, e faatupu te mau parau tamahanahana i te maitai, area te hoê aparauraa toetoe, eita ïa oia e faaore i te moemoe. Te aparauraa mau, o te hoê ïa ohipa hohonu roa ˈˈe i te paraparauraa noa.

Te haapapuraa i te reira, o te hiˈoraa ïa o teie vahine e hiˈo nei ma te here i te mata o ta ˈna tane ia peapea oia, e na te reira e tamǎrû ia ˈna. Aore ra te hiˈoraa o teie taata 75 matahiti, fariihia i roto i te piha rapaauraa i te fare maˈi, tei ite e ua fatata roa oia i te pohe e o tei ani i te hoê noa mea: ia faaea ta ˈna vahine i pihai iho ia ˈna, inaha a 48 matahiti to raua faaipoiporaahia. E tae noa ˈtura i te hopea, ua horomiri noa ta ˈna vahine i to ˈna rima, na te reira i horoa no ˈna i te hoê hau puai aˈe i te parau. Aore ra te hiˈoraa o teie vahine tuati o tei tamǎrû i te tupaipairaa o te mafatu e tei faaiti i te tension artérielle o te hoê taata tei moe to ˈna hiroa e e mahaha haavare hoi to ˈna, na roto i te tapearaa ma te maitai i to ˈna rima. E tauturu mai teie hiˈoraa ia tatou ia papu maitai i te puai o te mau tapeapearaa.

Ua parau mai hoi o Iesu ei faahitiraa i te ture a Mose e “e aroha ˈtu oe i to taata-tupu mai to aroha ia oe iho na” (Mareko 12:31; Levitiko 19:18). Aita oia e faaitoito maira i te here ia ˈna iho aore ra te haapao-noa-raa ia ˈna anaˈe ra. Ia farii anaˈe râ tatou i ta tatou mau hapa, e ia tatarahapa tatou, ia faaitoito ïa i te rave e ia faaorehia mai ta tatou mau hara e e tamata ˈtu ai i te haere â i mua, inaha, ia na reira tatou, te faatura ra ïa tatou ia tatou iho e e riro atoa te Atua i te faaore mai i ta tatou mau hara. Ma “te manaˈo e e repo tatou nei”, e faaore mai oia i ta tatou hara ma te aroha, e e faatiamâ mai oia ia tatou i te manaˈo faahapa o ta tatou hoi e nehenehe e tuu atu i nia i te tahi pae, e e riro hoi te reira i te faaino i to tatou mau auraa e o ratou (Salamo 103:14; Ioane 1, 1:9). Ia na reira anaˈe tatou, e nehenehe ïa tatou e farii ia tatou iho, e here ia tatou iho, e oia hoi e here atoa atu i te tahi mai ia tatou iho. A here mau ïa outou ia outou iho ma te ore e titau i te huru tia roa; a here i te tahi pae ma te ore e titau i te huru maitai roa.

E nehenehe â tatou e faataa maitai i teie huru here na roto i te mea o ta ˈna e rave e o ta ˈna e ore e rave. Teie ta tatou e taio: “E faaoromairaa roa to te aroha, e te hamani maitai; e ore te aroha e feii: e ore te aroha e faarahi, e ore hoi e faaahaaha. Eita e rave i te mea au ore, eita e imi i te maitai no ˈna iho, eita e riri vave, eita e manaˈo ino ia vetahi ê; eita e oaoa i te parau-tia ore, e oaoa râ i te parau mau; e tapoˈi i te mau mea atoa ra, e faaroo i te mau mea atoa ra, e tiai i te mau mea atoa ra, e haamahu i te mau mea atoa ra. E ore te aroha e mou.” — Korinetia 1, 13:4-8.

E hinaaro anei outou ia herehia mai outou mai teie huru? No reira, a ueue i taua huru here nei mai te peu e e hinaaro outou e ooti mai. A faaohipa i te reira mai ta outou e faaohipa i te hoê melo i roto i to outou tino. A faarahi ia ˈna, a vaiiho ia ˈna ia tupu, ia î maitai outou i te reira, ia riro mai ei tuhaa no outou iho. E ia oti, a faaite e te ora mau ra oia, na roto i te raveraa i te mau ohipa tei î i te here. Ua parau maira hoi Iesu e “e horoa, e e noaa hoi ta outou; e î te faito, e neneihia, e ueuehia, e manii noa ˈtu, na te taata e ninii i roto i to outou ahu. O taua faito hoi ta outou e faito ra, e faito-faahou-hia mai ïa ta outou.” (Luka 6:38). Ia horoa anaˈe outou, te faaitoito ra ïa outou i te tahi pae ia riro atoa ratou iho ei taata horoa maitai, e e oaoa paatoa ïa outou. Teie â ta Iesu i parau: “E mea maitai i te horoa ˈtu i te rave mai.” (Ohipa 20:35). Te huru horoa maitai roa ˈˈe, te horoaraa ïa outou ia outou iho: to outou taime, to outou haapao maitai, to outou huru au maitai, te iteraa outou i te auraa o te mau mea. “E te mau mea atoa ta outou i hinaaro ia vetahi ê ra, e na reira atoa ˈtu outou ia ratou.” (Mataio 7:12). A paraparau atu i to outou mau taata-tupu. Ia ite atoa outou eaha mau na ta ratou e hinaaro ra, ta ratou e oaoa ra e to ratou atoa mau peapea. E hau atu â i te mau mea atoa, a horoa ia outou iho no te Atua. — Salamo 40:7, 8; Hebera 10:8, 9.

Te parau nei te Bibilia e “e aroha te Atua”. (Ioane 1, 4:8.) Te na ô mai nei râ te tahi pae e: ‘Ahiri e e aroha te Atua, no te aha ïa o ˈna e faatia noa ˈi i te ino?’ Ta ˈna opuaraa, o te faaore-roa-raa ïa i te ino, eita râ o ˈna e faaoioi mai no to ˈna here ia tatou: “Aore te Fatu i faaroaroa i ta ˈna i parau maira, mai ta te tahi pae i parau ra e, e faaroaroa; e faaoromai rahi râ to ˈna ia tatou, aita roa i hinaaro e ia pohe atu te hoê, ia noaa paatoa râ te tatarahapa.” (Petero 2, 3:9). I roto i to ˈna aroha, ua faatia noa oia i te ino ia nehenehe i te feia e tatarahapa ia faarue i to ratou haerea ino e e ora ˈtu ai (Ezekiela 33:14-16). Ia tae râ i te taime ta ˈna i faataa oia e faaore roa ˈi i te ino na roto i te haamouraa i te feia e tamau noa ra i te rave i te ohipa ino. E faaore roa oia i te tamaˈi na roto i te haamouraa i te feia orure hau, i te taparahiraa taata na roto i te haamouraa i te feia taparahi taata, i te haaviiviiraa na roto i te haamouraa i te feia haaviivii, i te mau peu tiaa aore ra taiata, i te haru, i te taotoraa i te fetii iho e i te mau ohipa faufau i te pae no te taatiraa pae tino na roto i te haamouraa i te feia e tamau noa nei â i te rave i taua mau ohipa ra. E mou te mau mea iino atoa ia haamou te Atua i te feia atoa e haˈa nei i te rave i te ohipa ino. Ia na reira oia, te faaite ra ïa oia i to ˈna here i te feia e hinaaro ra i te ora i roto i te hau e te parau-tia (Salamo 37:10, 11; Maseli 2:21, 22). Mai ta te taata tanu tiare i ite, e tia ia huhutihia te mau aihere iino ia nehenehe te mau tiare ia tupu maitai.

Na roto i to ˈna aroha, ua poiete aˈera te Atua i te fenua e ua tuu maira i te taata i nia iho; hau atu, te horoa mai nei oia i to ˈna mau maitai atoa no te taatoaraa, no te feia maitai e te feia ino atoa: “Te faahiti nei oia hoi i to ˈna mahana i nia i te ino e te maitai e te haamairi mai nei oia i te ûa i nia te parau-tia e te parau-tia ore.” (Mataio 5:45). No te mea hoi e e aroha te Atua, e faaore roa oia i te maˈi e te pohe. Ua faaineine aˈena oia i te hoê ravea no te faaora i te huitaata atoa nei: “I aroha mai te Atua i to te ao e ua tae roa i te horoa mai i ta ˈna Tamaiti fanau tahi ia ore ia pohe te faaroo ia ˈna ra, ia roaa râ te ora mure ore.” (Ioane 3:16). No te mea hoi e e aroha te Atua, “ua faarahi râ [oia] i to ˈna aroha ia tatou nei, i te mea te vai taata hara noa nei â tatou i pohe ai te Mesia no tatou nei”. (Roma 5:8) E rave rahi mau taata teie e parau nei e te farii noa nei te Atua i te ino e inaha hoi, te oaoa nei ratou i te rave i te ino. Te feia râ i ite i te huru o to ˈna aroha, eita ïa ratou e na reira i te manaˈo: “Te hinaaro nei tatou ia ˈna, no te mea oia na tei hinaaro mai ia tatou nei.” — Ioane 1, 4:19.

I roto i teie nei ao, aita te aroha no te Atua e no te taata-tupu e itehia ra, te itehia ra râ to te Atua aroha no te taata. E o taua aroha nei hoi ta tatou e hinaaro rahi nei.

[Nota i raro i te api]

[Parau iti faaôhia i te api 4]

“Ia ueue tatou i te here, o ta tatou â ïa e ooti.”

[Parau iti faaôhia i te api 5]

“Te fifi rahi o te feia maˈi i te pae feruriraa o te ereraa ïa i te here.”

[Parau iti faaôhia i te api 6]

E tia ia faaohipahia to tatou mau huru ia vai maitai noa tatou.

[Parau iti faaôhia i te api 7]

Ia ite atoa outou eaha mau na ta ratou e hinaaro ra, ta ratou e oaoa ra e to ratou atoa mau peapea.