APOKALUPO A IOANE

1 E heheuraa* na Iesu Mesia, ta te Atua i horoa ˈtu ia ˈna+ no te faaite i ta ˈna mau tavini+ i te mau mea e fatata i te tupu. Ua tono mai Iesu i ta ˈna melahi e ua faaite mai na roto ia ˈna i taua mau mea ra ei taipe i ta ˈna ra tavini o Ioane,+ 2 tei faaite papu i te parau ta te Atua i horoa e te parau ta Iesu Mesia i faaite, oia hoi te mau mea atoa ta ˈna i ite. 3 E oaoa te taata e taio haapuai e te feia e faaroo i teie parau tohu e e haapao i tei papaihia i roto,+ ua fatata hoi te tau faataahia.

4 O Ioane i na amuiraa e hitu+ i te fenua Asia:

Ei ia outou ra te hamani maitai rahi e te hau no ǒ mai i “te Atua e vai nei e i vai na e e haere mai ra,”+ e no ǒ mai i na varua moˈa* e hitu+ e vai ra i mua i to ˈna terono, 5 e no ǒ mai ia Iesu Mesia, “te Ite haapao maitai,”+ “te matahiapo tei faatiahia mai te pohe mai,”+ e “te Arii o te mau arii o te fenua.”+

O ˈna e here nei ia tatou+ e tei faatiamâ ia tatou i ta tatou mau hara i to ˈna iho toto,+ 6 e tei faariro ia tatou ei faatereraa arii,*+ ei tahuˈa+ na to ˈna Atua e Metua, ei ia ˈna te hanahana e te mana e a muri noa ˈtu. Amene.

7 Inaha, e haere mai o ˈna na nia i te mau ata,+ e e ite te mau mata atoa ia ˈna, te feia atoa tei patia ia ˈna. E tupaipai hoi te mau opu atoa o te fenua nei i to ratou ouma ma te oto no ˈna.+ E tupu iho â te reira. Amene.

8 “O vau te Alepha e te Omega,”*+ ta te Atua ra o Iehova* ïa e parau ra, “te Atua e vai nei e i vai na e e haere mai ra, te Manahope.”+

9 O vau o Ioane, to outou taeae, hoê â hoi to tatou hamani-ino-raahia+ e faaoromai-tamau-raa+ e o Iesu+ atoa e hoê â atoa hoi to tatou apitiraa i roto i te faatereraa arii,+ tei te motu o Patamo vau no to ˈu paraparauraa no nia i te Atua e to ˈu faaiteraa i te parau no Iesu. 10 Arataihia ihora vau e te varua moˈa i te mahana o te Fatu ra, e faaroo atura vau i muri mai ia ˈu i te hoê reo puai mai te oto o te pu, 11 e na ô ra: “Ta oe e ite, a papai ïa i roto i te hoê otaro, a hapono atu ai i na amuiraa e hitu: i Ephesia,+ i Semurina,+ i Peregamo,+ i Tuatira,+ i Saradi,+ i Philadelephia+ e i Laodikea.”+

12 Fariu aˈera vau no te ite o vai te paraparau mai ra ia ˈu, e i to ˈu fariuraa, ite ihora vau e hitu mori auro,*+ 13 e i ropu i na mori, te hoê ïa mai te tamaiti a te taata nei te huru.+ E ahu roa to ˈna e tae roa i te avae e ua hatuahia to ˈna ouma i te hatua auro. 14 To ˈna upoo e to ˈna rouru, mea uouo mai te huruhuru mamoe uouo e mai te hiona. To ˈna mata, mai te ura auahi.+ 15 To ˈna avae, mai te veo anaana+ i roto i te umu. E to ˈna reo, mai te haruru pape e rave rahi. 16 E hitu fetia i roto i to ˈna rima atau,+ e ˈoˈe mea oi na pae e piti e te roa te faura mai ra mai roto mai i to ˈna vaha,+ e to ˈna hohoˈa mata,* mai te mahana ïa te anaana i te avatea.+ 17 I to ˈu iteraa ˈtu ia ˈna, topa ihora vau i to ˈna pae avae mai te huru ra e ua pohe au.

Tuu ihora o ˈna i to ˈna rima atau i nia iho ia ˈu e na ô maira: “Eiaha e mǎtaˈu. O vau te Matamua+ e te Hopea,+ 18 o vau teie e ora nei.+ I pohe na vau,+ inaha râ, te ora nei au e a muri noa ˈtu,+ e tei ia ˈu nei na taviri o te pohe e o te Apoo.*+ 19 No reira, a papai i te mau mea ta oe i ite, e te mau mea e tupu nei, e te mau mea e tupu i muri aˈe i teie. 20 Teie te auraa o te parau huna moˈa o na fetia e hitu ta oe i ite i roto i to ˈu rima atau e o na mori auro e hitu: Na fetia e hitu, o te mau melahi* ïa o na amuiraa e hitu. E na mori e hitu, o na amuiraa ïa e hitu.+

2 “Teie ta oe e papai i te melahi+ o te amuiraa i Ephesia:+ Te na ô mai ra o ˈna e tapea ra i na fetia e hitu i roto i to ˈna rima atau e e haere ra na ropu i na mori auro* e hitu:+ 2 ‘Ua ite au i ta oe mau ohipa e ta oe tutavaraa e to oe faaoromai tamau, e eita oe e farii i te feia ino, e ua tamata oe i te feia e parau ra e e aposetolo+ ratou e ere râ, e ua itehia ia oe e e haavare ratou. 3 Te faaite atoa ra oe i te faaoromai tamau e ua faaruru noa oe i te fifi no to ˈu nei iˈoa+ e aita oe i toaruaru.+ 4 Teie râ ta ˈu faahaparaa ia oe, ua ere oe i to oe here matamua.

5 “‘No reira, a haamanaˈo i to oe huru na mua ˈˈe oe a hiˈa ˈi, e a tatarahapa+ e a rave i te mau ohipa ta oe i rave na. Ia ore oe e tatarahapa,+ e haere mai au ia oe ra, a tatara ˈtu ai i ta oe mori*+ i to ˈna vairaa. 6 Teie râ te tahi ohipa maitai ta oe e rave nei: mea au ore roa na oe i te mau ohipa a te mau pǐpǐ a Nikola,+ o ta ˈu atoa e au ore roa nei. 7 Te taata e tariˈa to ˈna, ia faaroo ïa i ta te varua moˈa e parau ra i te mau amuiraa:+ E faatia vau i te taata e upootia+ ia amu i te maa o te tumu raau o te ora+ e vai ra i roto i te paradaiso a te Atua.’

8 “Teie ta oe e papai i te melahi o te amuiraa i Semurina: Te na ô mai ra o ˈna, ‘te Matamua e te Hopea,’+ tei pohe na e tei ora faahou mai:+ 9 ‘Ua ite au i to oe hamani-ino-raahia e to oe veve, tera râ, e taoˈa rahi ta oe.+ Ua ite atoa vau i to oe faainoraahia e te feia e parau ra e e ati Iuda ratou e ere hoi. E pǔpǔ* râ ratou na Satani.+ 10 Eiaha oe e mǎtaˈu i ta oe e fatata i te faaruru.+ Inaha, e tamau te Diabolo i te huri vetahi o outou i roto i te tapearaa ia tamata-roa-hia outou, e e hamani-ino-hia outou ahuru mahana. A tapea i to oe haapao maitai e tae noa ˈtu i te pohe, e e horoa ˈtu vau i te hei upoo o te ora no oe.+ 11 Te taata e tariˈa to ˈna, ia faaroo+ ïa i ta te varua moˈa e parau ra i te mau amuiraa: E ore roa te taata o te upootia+ e roohia i te piti o te pohe.’+

12 “Teie ta oe e papai i te melahi o te amuiraa i Peregamo: Te na ô mai ra o ˈna, e ˈoˈe mea oi na pae e piti e te roa ta ˈna:+ 13 ‘Ua ite au ihea oe e parahi ai, oia hoi i te vahi to reira te terono o Satani. Te mau maite noa nei râ oe i to ˈu iˈoa,+ e te tapea maite ra oe i to oe faaroo ia ˈu+ i te mau mahana atoa o Anitipa, to ˈu ite haapao maitai,+ tei haapohehia+ i te vahi ta oe e faaea ra, te vahi ta Satani e parahi ra.

14 “‘Teie râ te tahi faahaparaa ta ˈu ia oe, te vai ra i ǒ oe te feia e turu ra i te haapiiraa a Balaama,+ tei haapii ia Balaka+ ia faahema i te mau tamarii Iseraela ia rave i te hara, ia amu i te mau mea pûpûhia ei tusia na te idolo e ia rave i te mau peu taotoraa tia ore.*+ 15 Te vai atoa ra i ǒ oe te feia e turu ra i te haapiiraa a te mau pǐpǐ a Nikola.+ 16 No reira, a tatarahapa. Ia ore oe e tatarahapa, te haere oioi atu nei au ia oe ra, e e aro atu vau ia ratou i te ˈoˈe roa o to ˈu vaha.+

17 “‘Te taata e tariˈa to ˈna, ia faaroo ïa i ta te varua moˈa e parau ra i te mau amuiraa:+ E horoa vau maa mâna hunahia+ na te taata e upootia,+ a horoa ˈtu ai na ˈna i te hoê ofai uouo ua papaihia i nia iho te hoê iˈoa apî aita hoê aˈe taata i ite, o te taata anaˈe râ i topahia i taua iˈoa ra.’

18 “Teie ta oe e papai i te melahi o te amuiraa i Tuatira:+ Te na ô mai ra te Tamaiti a te Atua, mai te ura auahi+ to ˈna mata e mai te veo anaana to ˈna avae:+ 19 ‘Ua ite au i ta oe mau ohipa, e to oe here e to oe faaroo e ta oe taviniraa e to oe faaoromai tamau, e mea rahi aˈe ta oe mau ohipa i rave iho nei i ta oe i rave na i te omuaraa.

20 “‘Teie râ ta ˈu faahaparaa ia oe, te farii ra oe i tera Iezebela+ o te parau ra e e peropheta vahine o ˈna, e te haapii ra e te faahema ra o ˈna i ta ˈu mau tavini ia rave i te mau peu taotoraa tia ore*+ e ia amu i te mau mea pûpûhia ei tusia na te idolo. 21 Ua horoa hoi au i te taime ia tatarahapa o ˈna, aita râ o ˈna i hinaaro e tatarahapa i ta ˈna mau peu taotoraa tia ore.* 22 Inaha, e tairi au ia ˈna i te maˈi rahi e e faautua vau i te feia e faaturi ra ia ˈna ia ore ratou e tatarahapa i ta ˈna mau raveraa. 23 E haapohe au i ta ˈna mau tamarii i te maˈi pohe, ia ite hoi te mau amuiraa atoa e o vau te hiˈopoa i te mau manaˈo hohonu roa* e te aau, e e horoa ˈtu vau na outou tataitahi ia au i ta outou mau ohipa.+

24 “‘Teie râ ta ˈu e parau i te tahi pae o outou i Tuatira, te feia atoa aita e pee ra i te haapiiraa a Iezebela, te feia aita i ite i tei parauhia “te mau mea hohonu a Satani”:+ Aita ˈtu ta ˈu e hopoia e horoa na outou. 25 Teie noa râ, a tapea papu i tei noaa ia outou e ia tae roa mai au.+ 26 Te taata e upootia e e haapao i ta ˈu i faaue atu e tae roa i te hopea, e horoa vau ia ˈna i te mana i nia i te mau nunaa,+ 27 mai ia ˈu nei tei horoahia mai te mana e to ˈu Metua, e e faatere oia ia ratou ma te sepeta auri+ ia huˈahuˈa roa hoi ratou mai te farii araea ra. 28 E e horoa vau na ˈna i te fetia poipoi.+ 29 Te taata e tariˈa to ˈna, ia faaroo ïa i ta te varua moˈa e parau ra i te mau amuiraa.’

3 “Teie ta oe e papai i te melahi o te amuiraa i Saradi: Te na ô mai ra o ˈna tei ia ˈna ra na varua e hitu o te Atua+ e na fetia e hitu:+ ‘Ua ite au i ta oe mau ohipa, e au ra e mea ora oe, tera râ, mea pohe oe.+ 2 A ara,+ e a faaitoito i tei fatata i te pohe, aita hoi oe i faaoti i te ohipa ta to ˈu Atua e hinaaro ia rave oe. 3 No reira, a haamanaˈo noa i tei noaa mai ia oe e ta oe i faaroo, e a haapao noa i te reira e a tatarahapa.+ Ia ore oe e ara mai, e haere atu vau mai te eiâ,+ e e ore roa oe e ite eaha te hora e haere ai au ia oe ra.+

4 “‘Tera râ, te vai ra i ǒ oe te tahi mau taata* i Saradi aita i haaviivii i to ratou ahu,+ e e apee mai ratou ia ˈu ma te ahu uouo,+ mea tano hoi ia fanaˈo ratou i tera haamaitairaa. 5 E oomo ïa te taata o te upootia+ i te ahu uouo,+ e e ore roa vau e faaore* i to ˈna iˈoa i roto i te buka o te ora,+ e faaite râ vau e ua ite au ia ˈna i mua i to ˈu Metua e i mua i ta ˈna mau melahi.+ 6 Te taata e tariˈa to ˈna, ia faaroo ïa i ta te varua moˈa e parau ra i te mau amuiraa.’

7 “Teie ta oe e papai i te melahi o te amuiraa i Philadelephia: Te na ô mai ra tei moˈa,+ te parau mau,+ tei ia ˈna ra te taviri a Davida,+ o te iriti e aita roa e taata e tapiri e o te tapiri e aita roa e taata e iriti: 8 ‘Ua ite au i ta oe mau ohipa. Inaha, ua tuu vau i mua ia oe i te hoê uputa matara noa,+ aita roa e taata e tia ia tapiri. E ua ite au e maa puai iti to oe, e ua haapao oe i ta ˈu parau e aita oe i huna i to ˈu iˈoa. 9 A hiˈo na i te pǔpǔ* a Satani e parau ra e e ati Iuda ratou e ere hoi,+ tera râ, te haavare ra ratou. E faahaere mai au ia ratou a faatuturi* atu ai i to oe na pae avae e e faaite au ia ratou e ua here au ia oe. 10 No te mea ua haapao oe i te parau o to ˈu faaoromai tamau,*+ e haapao atoa ïa vau ia oe i te hora tamataraa+ e tae mai i nia i te fenua taatoa no te tamata i te feia e parahi ra i reira. 11 Te haere oioi atu nei au.+ A tapea papu noa i tei noaa ia oe, ia ore to oe hei upoo e riro ia vetahi ê.+

12 “‘Te taata o te upootia, e faariro ïa vau ia ˈna ei pou i roto i te hiero o to ˈu Atua, e ore roa o ˈna e haere faahou i rapae, e e papai au i nia iho ia ˈna i te iˈoa o to ˈu Atua+ e i te iˈoa o te oire o to ˈu Atua, te Ierusalema apî+ o te pou mai te raˈi mai no ǒ mai i to ˈu Atua, e i to ˈu iho iˈoa apî.+ 13 Te taata e tariˈa to ˈna, ia faaroo ïa i ta te varua moˈa e parau ra i te mau amuiraa.’

14 “Teie ta oe e papai i te melahi o te amuiraa i Laodikea:+ Te na ô mai ra te Amene,+ te ite haapao maitai e te parau mau,+ te matamua ta te Atua i poiete:+ 15 ‘Ua ite au i ta oe mau ohipa, aita oe i toˈetoˈe, aita atoa oe i veavea. E hinaaro hoi au ia toˈetoˈe aore ra ia veavea oe. 16 No te mea râ mea pumahana oe, oia hoi aita i veavea,+ aita atoa i toˈetoˈe,+ e pihaˈe au ia oe i rapae i to ˈu nei vaha. 17 Te parau ra hoi oe: “E taoˈa rahi ta ˈu+ e mea rahi te taoˈa i noaa mai ia ˈu e aita vau e ere ra i te tahi mea,” tera râ, aita oe i ite e mea aroha roa oe e te veve e te matapo e te vai tahaa, 18 te aˈo atu nei au ia hoo mai oe ia ˈu nei i te auro tamâhia i te auahi ia taoˈahia oe, e i te ahu uouo ia oomo oe a ore atu ai e itehia te haama o to oe vai-tahaa-raa,+ e i te raau mata no te parai i to oe mata+ ia ite oe.+

19 “‘Te feia atoa mea here na ˈu, e faaite au i ta ratou hapa e e aˈo vau ia ratou.+ No reira, a haa ma te itoito rahi e a tatarahapa.+ 20 Inaha, te tia nei au i te pae uputa e te patoto nei. Ia faaroo mai te hoê taata i to ˈu reo e ia iriti mai i te uputa, e tomo vau i roto i to ˈna fare e e tamaa mâua. 21 E faatia vau i te taata e upootia+ ia parahi e o vau atoa i nia i to ˈu terono,+ mai ia ˈu tei upootia e tei parahi+ e to ˈu Metua i nia i to ˈna terono. 22 Te taata e tariˈa to ˈna, ia faaroo ïa i ta te varua moˈa e parau ra i te mau amuiraa.’”

4 I muri iho, ite atura vau, e inaha, te hoê uputa matara noa i nia i te raˈi, e na ô maira te reo matamua ta ˈu i faaroo mai te hoê pu: “Pauma mai i ǒ nei, e faaite atu hoi au i te mau mea e tupu e tia ˈi.” 2 Ohipa ihora te puai o te varua moˈa i nia ia ˈu, e inaha, ite atura vau i te hoê terono i nia i te raˈi e te parahi ra te hoê i nia iho.+ 3 Te anaana ra te Atua e parahi ra mai te ofai ieloma*+ e te ofai adama,* e ua haaatihia te terono i te hoê anuanua e hohoˈa i te semaradino.*+

4 E ati aˈe te terono, e 24 terono e i nia iho i taua mau terono ra, ite atura vau e 24 matahiapo+ ma te ahu uouo e te hei auro i nia iho i to ratou upoo. 5 Na roto mai i te terono, e uira+ e te reo e te patiri.+ E i mua i taua terono ra, e hitu mori auahi e ura noa ra, oia hoi na varua moˈa e hitu o te Atua.+ 6 I mua i te terono, te hoê ïa mea e hohoˈa i te miti+ e e au i te hiˈo aore ra te kerehe.*

I ropu tei reira te terono, e ati aˈe te terono, e maha ïa melahi+ ua î roa i te mata na mua e na muri. 7 Te melahi matamua, mai te liona.+ Te piti o te melahi, mai te puaatoro oni apî.+ Te toru o te melahi,+ mai to te taata to ˈna hohoˈa mata, e te maha o te melahi,+ mai te aeto e rere ra.+ 8 E ono pererau to na melahi tataitahi e maha, e mata anaˈe to nia iho i to ratou mau pererau atoa.+ E i te po e te ao, e tamau ratou i te parau: “E moˈa, e moˈa, e moˈa te Atua ra o Iehova,*+ te Manahope, e vai nei e i vai na e e haere mai ra.”+

9 I te mau taime atoa e faahanahana ˈi e e faateitei ai e e haamauruuru ai na melahi i te Atua e parahi ra i nia i te terono, te Atua e ora e a muri noa ˈtu,+ 10 e tuturi na matahiapo e 24+ i mua i te Atua e parahi ra i nia i te terono e e haamori ratou i te Atua o te ora e a muri noa ˈtu, a taora ˈtu ai i to ratou hei upoo i mua i te terono, a na ô ai: 11 “E au roa ia oe Iehova* to matou Atua te hanahana,+ te teitei+ e te puai,+ no te mea na oe i poiete i te mau mea atoa+ e no to hinaaro i vai ai e i poietehia ˈi te reira.”

5 E ite atura vau i roto i te rima atau o Tei parahi ra i nia i te terono+ i te hoê otaro ua papaihia na pae e piti* e ua taatihia e hitu tapao taati. 2 E ite atura vau i te hoê melahi puai i te parauraa ma te reo puai: “O vai te tia ia ofati i na tapao taati, a hohora ˈtu ai i te otaro?” 3 Aita râ hoê aˈe i nia i te raˈi, aita atoa i nia i te fenua e aita atoa i raro aˈe i te fenua e tia ia hohora i te otaro aore ra ia hiˈo i roto. 4 Taˈi roa ˈtura vau no te mea aita hoê aˈe e tia ia hohora i te otaro aore ra ia hiˈo i roto. 5 Na ô maira râ hoê o te mau matahiapo: “A faaea na i te taˈi. Inaha, ua upootia+ te Liona o te opu o Iuda,+ te aˈa+ o Davida,+ a nehenehe atu ai o ˈna e ofati i na tapao taati e hitu, a hohora ˈtu ai i te otaro.”

6 E ite atura vau i pihai iho roa i te terono, i ropu atoa i na melahi e maha e i te mau matahiapo,+ i te hoê arenio*+ e tia ra e au ra e ua haapohehia.+ E hitu tara to ˈna e e hitu mata. E na mata, o na varua moˈa ïa e hitu o te Atua+ tei tonohia e ati aˈe te fenua. 7 Haere ihora te Arenio e rave maira i te otaro i roto i te rima atau o Tei parahi ra i nia i te terono.+ 8 I to ˈna raveraa mai i te otaro, tuturi ihora na melahi e maha e na matahiapo e 24+ i mua i te Arenio. E kinura e e auˈa auro î i te mea noˈanoˈa ta te matahiapo tataitahi. (Te mea noˈanoˈa, o te mau pure ïa a te feia moˈa.)+ 9 E te himene ra ratou i te hoê himene apî,+ a na ô ai: “Mea tia e na oe e rave i te otaro, a ofati atu ai i na tapao taati, ua haapohehia hoi oe ei tusia e i to oe toto ua hoo mai oe i te taata no te Atua+ no te mau opu e reo e nunaa atoa,+ 10 e ua faariro oe ia ratou ei faatereraa arii*+ e ei tahuˈa na to tatou Atua,+ e ia faatere mai ratou ei arii+ i te fenua e tia ˈi.”

11 E ite atura vau e rave rahi melahi e ati aˈe te terono e na melahi e maha e te mau matahiapo, e faaroo atoa ˈtura vau i to ratou reo. To ratou numera, ua ahuru tausani i te ahuru tausaniraa ïa e ua tausani i te tausaniraa,+ 12 e te na ô ra ratou ma te reo puai: “E au roa ia noaa i te Arenio tei haapohehia+ ei tusia te mana e te faufaa e te paari e te puai e te tura e te hanahana e te haamaitairaa.”+

13 Faaroo atura vau i to te raˈi e to nia i te fenua e to raro aˈe i te fenua+ e to nia iho i te miti, ratou paatoa, i te na ôraa: “Ei te Atua ra e parahi ra i nia i te terono+ e ei te Arenio+ te haamaitairaa e te tura+ e te hanahana e te mana e a muri noa ˈtu.”+ 14 Na ô aˈera na melahi e maha: “Amene!” e tuturi ihora te mau matahiapo e haamori atura i te Atua.

6 E ite atura vau i to te Arenio*+ ofatiraa hoê o na tapao taati e hitu,+ e faaroo atura vau hoê o na melahi+ i te parauraa ma te reo e au i te patiri: “A horo!” 2 Ite atura vau e inaha, te hoê puaahorofenua uouo,+ e e fana ta tei parahi ra i nia iho. E hei upoo arii tei horoahia no ˈna+ e ua horo oia ia pau to ˈna mau enemi ia ˈna, a upootia roa ˈtu ai oia.+

3 I to te Arenio ofatiraa i te piti o te tapao taati, faaroo atura vau i te piti o te melahi+ i te parauraa: “A horo!” 4 Ite atura vau i te tahi atu puaahorofenua, mea uteute, e ua faatiahia tei parahi ra i nia iho ia faaore i te hau i nia i te fenua, ia haapohe hoi te taata te tahi i te tahi. E ˈoˈe rahi tei horoahia na ˈna.+

5 I to te Arenio ofatiraa i te toru o te tapao taati,+ faaroo atura vau i te toru o te melahi+ i te parauraa: “A horo!” Ite atura vau e inaha, te hoê puaahorofenua ereere, e e faito tei te rima o tei parahi ra i nia iho. 6 Faaroo atura vau mai te hoê reo i ropu i na melahi e maha i te parauraa: “Hoê kilo sitona, hoê ïa denari.*+ E toru kilo kerite, hoê ïa denari, e eiaha e hauti i te hinu olive e te uaina.”+

7 I to te Arenio ofatiraa i te maha o te tapao taati, faaroo atura vau i te maha o te melahi+ i te parauraa: “A horo!” 8 Ite atura vau e inaha, te hoê puaahorofenua maheˈaheˈa, e o Pohe te iˈoa o tei parahi ra i nia iho. Te na muri noa mai ra te Apoo* ia ˈna. Ua horoahia ia raua te mana i nia i te maha o te tuhaa o te fenua, e haapohe i te taata i te ˈoˈe roa e i te oˈe+ e i te maˈi pohe e i te animara oviri.+

9 I to te Arenio ofatiraa i te pae o te tapao taati, ite atura vau i raro i te fata+ i te toto*+ o te feia tei haapohehia no to ratou haapaoraa i te poroi a te Atua e no to ratou pororaa.+ 10 Tuô aˈera ratou a na ô ai: “To matou Arii hau ê e Fatu moˈa e te parau mau,+ afea oe e haava ˈi i te feia e parahi ra i te fenua nei, a tahoo atu ai i to matou toto?”+ 11 Horoahia ˈtura te hoê ahu roa uouo no ratou tataitahi,+ e parauhia ˈtura ia tiai rii â e ia tia roa te numera o to ratou mau hoa tavini e o to ratou mau taeae ua fatata i te haapohehia mai ia ratou atoa.+

12 E ite atura vau i to te Arenio ofatiraa i te ono o te tapao taati, e tupu ihora te hoê aueueraa fenua puai, e ereere aˈera te mahana mai te ahu oto huruhuru,* e uteute atura te avaˈe taatoa mai te toto ra,+ 13 e topa maira te mau fetia o te raˈi i nia i te fenua mai te suke pî ra ia ueuehia te tumu e te mataˈi rahi. 14 E otarohia ˈtura te raˈi mai te tahi otaro ra e moˈe atura,+ e tatarahia ˈtura te mau mouˈa atoa e te mau motu atoa i to ratou vairaa.+ 15 E tapuni atura te mau arii o te fenua, te feia tiaraa teitei, te mau raatira o te nuu, te feia taoˈa rahi, te feia mana, te mau tîtî atoa e te feia tiamâ atoa, i roto i te mau ana e na roto i te mau mato o te mau mouˈa.+ 16 E te tamau ra ratou i te parau i te mau mouˈa e te mau mato: “A topa mai i nia ia matou+ e ia moˈe matou i te aro o te Atua e parahi ra i nia i te terono+ e i te riri rahi tahoo o te Arenio,+ 17 no te mea ua tae mai te mahana rahi o to raua riri rahi tahoo,+ e o vai te ora ˈtu?”+

7 I muri iho, ite atura vau e maha melahi e tia noa ra i na poro e maha o te fenua, a tapea noa ˈi i na mataˈi e maha o te fenua, ia ore te mataˈi e farara i nia i te fenua e i nia i te miti e i nia i te mau tumu raau atoa. 2 E ite atura vau i te tahi atu melahi e haere mai ra na te hitiraa mai o te mahana,* tei ia ˈna ra te tapao a te Atua ora. Tuô ihora oia i na melahi e maha tei faatiahia ia rave ino i te fenua e te miti a na ô ai: 3 “Eiaha e rave ino i te fenua, eiaha atoa te miti e eiaha atoa te mau tumu raau e ia oti roa i te tapaohia+ e matou te rae o te mau tavini a to tatou Atua.”+

4 E faaroo atura vau i te numera o te feia i tapaohia, 144 000+ no te mau opu atoa o te mau tamaiti a Iseraela:+

9 I muri iho, ite atura vau e inaha, te hoê nahoa rahi, eita e noaa ia taio, no roto mai i te mau nunaa e opu e reo atoa,+ o te tia noa ra i mua i te terono e i mua i te Arenio,* ma te ahu roa uouo+ e ma te amaa tamara i to ratou rima.+ 10 E te tuô noa ra ratou a na ô ai: “No ǒ mai te faaoraraa i to tatou Atua e parahi ra i nia i te terono,+ e i te Arenio.”+

11 E ati aˈe te terono, te tia noa ra te mau melahi atoa e te mau matahiapo+ e na melahi e maha. Tipapa ihora ratou i mua i te terono e haamori atura i te Atua, 12 a na ô ai: “Amene! Ei to tatou Atua te arueraa e te hanahana e te paari e te haamauruururaa e te tura e te mana e te puai e a muri noa ˈtu.+ Amene.”

13 Parau maira hoê o te mau matahiapo ia ˈu: “O vai teie nei feia e ahu roa uouo to ratou,+ e nohea mai ratou?” 14 Na ô ihora vau ia ˈna: “To ˈu fatu, o oe tei ite.” Parau maira o ˈna: “Mea na roto mai teie nei feia i te ati rahi,+ e ua horoi e ua faauouo ratou i to ratou ahu roa i te toto o te Arenio.+ 15 No reira ratou e tia noa ˈi i mua i te terono o te Atua, e te pûpû nei ratou i te hoê taviniraa moˈa ia ˈna i te po e te ao i roto i to ˈna hiero. E hohora mai te Atua e parahi ra i nia i te terono+ i to ˈna tiahapa i nia ia ratou.+ 16 E ore roa ratou e poia e e poihâ faahou, e ore atoa ratou e paapaa i te mahana e te veavea,+ 17 no te mea na te Arenio+ i pihai iho* i te terono e aupuru+ e e aratai ia ratou i te mau pape pihaa o te ora.+ E na te Atua e tamǎrô i te roimata atoa o to ratou mata.”+

8 I to te Arenio*+ ofatiraa i te hitu o te tapao taati,+ mamû aˈera to te raˈi afa hora. 2 E ite atura vau i na melahi e hitu+ e tia noa ra i mua i te Atua e e hitu pu tei horoahia na ratou.

3 Tae maira te tahi atu melahi e tia noa ihora i pihai iho i te fata,+ e farii auro mea noˈanoˈa* ta ˈna.+ Horoahia maira ia ˈna e rave rahi mea noˈanoˈa no te pûpû i nia i te fata auro+ e vai ra i mua i te terono, a pûpû ai te feia moˈa atoa i ta ratou mau pure. 4 Pee aˈera te au auahi o te mea noˈanoˈa mai roto atu i te rima o te melahi, e te mau pure+ a te feia moˈa i mua i te Atua. 5 Rave ihora râ te melahi i te farii mea noˈanoˈa, faaî ihora i taua farii ra maa auahi no nia mai i te fata, e taora ˈtura i taua auahi ra i nia i te fenua. Haruru maira te patiri e te reo atoa e anapa maira te uira+ e aueue ihora te fenua. 6 Faaineine aˈera na melahi e hitu i te faaoto i ta ratou na pu e hitu.+

7 Faaoto ihora te melahi matamua i ta ˈna pu. Topa maira te ûa paari e te auahi, anoihia i te toto, i nia i te fenua.+ Paapaa roa aˈera te toru o te tuhaa o te fenua e te toru o te tuhaa o te mau tumu raau e pauroa te aihere.+

8 Faaoto ihora te piti o te melahi i ta ˈna pu. Taorahia maira te tahi mea e au i te hoê mouˈa rahi e ura ra i te auahi i roto i te miti.+ Riro atura te toru o te tuhaa o te miti ei toto,+ 9 e pohe aˈera te toru o te tuhaa o te mau animara* i roto i te miti,+ e tuino-roa-hia ˈtura te toru o te tuhaa o te mau pahi.

10 Faaoto ihora te toru o te melahi i ta ˈna pu. Topa maira te hoê fetia rahi anaana mai te mori mai te raˈi mai i nia i te toru o te tuhaa o te mau anavai e i nia i te mau pape pihaa.+ 11 O Apesineto* te iˈoa o taua fetia ra. Avaava roa ihora te toru o te tuhaa o te mau pape e mea rahi te taata tei pohe i taua mau pape ra, no te mea ua avaavahia.+

12 Faaoto ihora te maha o te melahi i ta ˈna pu. Tairihia aˈera te toru o te tuhaa o te mahana+ e te toru o te tuhaa o te avaˈe e te toru o te tuhaa o te mau fetia, ia poiri hoi te toru o te tuhaa o te reira,+ e ia ore te toru o te tuhaa o te ao e maramarama mai, e to te po atoa.

13 E ite e faaroo atura vau i te hoê aeto e rere ra na te raˈi i te parauraa ma te reo puai: “Ua ati, ua ati, ua ati+ te feia e parahi ra i te fenua no te faaotoraa pu a na melahi e toru e toe ra tei fatata i te faaoto i ta ratou pu!”+

9 Faaoto ihora te pae o te melahi i ta ˈna pu.+ E ite atura vau i te hoê fetia tei topa i nia i te fenua mai te raˈi mai, e ua horoahia ia ˈna te taviri o te uputa o te abuso.+ 2 Tatara aˈera oia i te uputa o te abuso e pee maira te au auahi mai to te umu rahi ra, e poiri aˈera te mahana,+ oia atoa te raˈi, i taua au auahi ra. 3 E haere maira te vivi no roto mai i te au auahi i nia iho i te fenua,+ e ua horoahia ia ratou te mana, hoê â mana e to te mau pata patia o te fenua. 4 E ua parauhia ratou eiaha e rave ino noa ˈˈe i te mau aihere o te fenua e te mau raau tupu e te mau tumu raau, i te feia noa râ aita te tapao a te Atua i nia iho i to ratou rae.+

5 E ua faatiahia te mau vivi ia haamauiui i taua feia ra e pae avaˈe, eiaha râ ia haapohe ia ratou. E ia haamauiui ratou, mai ta te pata patia+ ïa ia tairi i te taata. 6 I taua mau mahana ra, e imi te taata i te pohe, e ore râ e itehia e ratou, e e hinaaro ratou e pohe, e maue ê râ te pohe ia ratou.

7 E ua hohoˈa te mau vivi i te mau puaahorofenua tei faaineinehia no te tamaˈi.+ Mai te hei auro to nia iho i to ratou upoo. E to ratou hohoˈa mata, mai to te taata. 8 Area to ratou rouru, mai to te vahine. E to ratou niho, mai to te liona.+ 9 E tapoˈi ouma atoa to ratou mai te mau tapoˈi ouma auri. E te haruru ia tahiri to ratou mau pererau, mai te haruru ïa o te mau pereoo hutihia e e rave rahi puaahorofenua e horo ra i te tamaˈi.+ 10 E aero e e patia atoa to ratou mai to te pata patia, e to roto i to ratou aero to ratou mana no te haamauiui i te taata e pae avaˈe.+ 11 E arii to ratou, te melahi o te abuso.+ O Abadadona* to ˈna iˈoa na roto i te reo Hebera, o Apoluona* râ na roto i te reo Heleni.

12 Hoê noa ati tei mairi. Inaha, teie â e piti ati+ e na muri mai nei i teie.

13 Faaoto ihora te ono o te melahi+ i ta ˈna pu.+ E faaroo atura vau i te hoê reo no ǒ mai i na tara o te fata auro+ e vai ra i mua i te aro o te Atua, 14 i te parauraa i te ono o te melahi e tapea ra i te pu: “A tuu i na melahi e maha tei taamuhia i te anavai rahi o Eupharate.”+ 15 E tuuhia aˈera na melahi e maha tei faaineinehia no te hora e no te mahana e no te avaˈe e no te matahiti e haapohe ai ratou i te toru o te tuhaa o te taata.

16 Te numera o te mau nuu o te feia faahoro puaahorofenua, e 20 ïa tausaniraa i te ahuru tausani.* Ua faaroo vau i to ratou numera. 17 E mai teie to ˈu ite-orama-raa i te mau puaahorofenua e te feia e parahi ra i nia iho: E tapoˈi ouma uteute mai te auahi e te ninamu paˈo e te rearea to taua feia ra. Te afii o te mau puaahorofenua, mai to te liona ïa.+ E na roto mai i to ratou vaha te auahi e te au auahi e te mâhu taero. 18 Pohe aˈera te toru o te tuhaa o te taata i teie na ati e toru, te auahi e te au auahi e te mâhu taero no roto mai i te vaha o te mau puaahorofenua. 19 To roto hoi te mana o te mau puaahorofenua i to ratou vaha e to ratou aero. Mai te ophi hoi to ratou aero e e afii to taua mau aero ra. E faaohipa ratou i to ratou aero no te haamauiui i te taata.

20 Aita râ te toea o te mau taata tei ore i pohe i teie mau ati i tatarahapa i te mau ohipa a to ratou rima. Aita ratou i faaea i te haamori i te mau demoni e i te mau idolo hamanihia i te auro e te ario e te veo e te ofai e te raau, o te ore hoi e ite, e faaroo e e haere.+ 21 Aita atoa ratou i tatarahapa i ta ratou mau taparahiraa taata e ta ratou mau peu tahutahu e ta ratou mau peu taotoraa tia ore* e ta ratou mau eiâraa.

10 Ite atura vau i te tahi atu melahi puai i te pouraa mai te raˈi mai, ua vehîhia* i te hoê ata. E anuanua to nia i to ˈna upoo, e to ˈna hohoˈa mata, mai te mahana,+ e to ˈna avae, mai te pou auahi. 2 E otaro nainai hohorahia tei to ˈna rima. Tei nia iho to ˈna avae atau i te miti, to ˈna râ avae aui tei nia iho ïa i te fenua, 3 e ua tuô oia mai te uuru o te liona.+ E i to ˈna tuôraa, haruru maira te reo o na patiri e hitu.+

4 I te harururaa mai te reo o na patiri e hitu, te haamata ra vau i te papai, faaroo atura râ vau i te hoê reo no te raˈi mai+ i te na ôraa: “A tapea huna noa i te mau parau a na patiri e hitu, eiaha e papai i te reira.” 5 Toro aˈera te melahi i to ˈna rima atau i nia i te raˈi, te melahi hoi ta ˈu i ite i te tiaraa i nia iho i te miti e i nia iho i te fenua, 6 e horeo atura i te ora o te Atua o te ora e a muri noa ˈtu,+ tei poiete i te raˈi e to reira, i te fenua e to reira, e i te miti e to reira:+ “Eita te Atua e tiai faahou. 7 I te mau mahana râ e haamata ˈi te hitu o te melahi+ i te faaoto i ta ˈna pu,+ e tupu mau â te parau huna moˈa+ ta te Atua i faaite ei parau apî oaoa i ta ˈna mau tavini te mau peropheta.”+

8 E faaroo ihora vau i te reo no te raˈi mai+ i te parau-faahou-raa mai ia ˈu: “A haere, a rave i te otaro tei hohorahia, i roto i te rima o te melahi e tia ra i nia iho i te miti e i nia iho i te fenua.”+ 9 Haere atura vau i te melahi ra e parau atura ia horoa mai i te otaro nainai. Parau maira oia: “A rave, a amu,+ e toavaava to oe opu, i roto râ i to oe vaha e momona ïa mai te meri.” 10 Rave maira vau i te otaro nainai i roto i te rima o te melahi e amu ihora,+ e ua momona i roto i to ˈu nei vaha,+ ua toavaava râ to ˈu opu. 11 E parauhia maira ia ˈu: “Ia tohu â oe e tia ˈi no nia i te mau nunaa e te mau reo e te arii e rave rahi.”

11 E horoahia maira ia ˈu te hoê aeho mai te raau faito+ ra te hohoˈa a na ôhia mai ai: “A tia, a faito i te nao* o te hiero o te Atua e te fata e a taio i te feia e haamori ra i roto. 2 Area te aua i rapaeau i te nao o te hiero, vaiiho noa ïa, eiaha e faito atu, ua horoahia hoi te reira i te mau nunaa, e e taataahi ratou i te oire moˈa+ e 42 avaˈe.+ 3 E poroi atu vau i ta ˈu na ite e piti ia tohu 1 260 mahana ma te ahuhia i te ahu oto.” 4 O na tumu olive e piti+ e na mori* e piti+ na ite e piti, e te tia ra raua i mua i te Fatu o te fenua.+

5 Ia hinaaro te tahi taata e rave ino ia raua, e na roto mai te auahi i to raua vaha e e mou to raua mau enemi i taua auahi ra. Ia hinaaro noa ˈtu te tahi taata e rave ino ia raua, mea na reira ïa oia e haapohehia ˈi. 6 E mana to raua no te opani i te raˈi+ ia ore te ûa ia topa+ i te mau mahana e tohu ai raua, e e mana to raua no te faariro i te pape ei toto+ e no te tairi i te fenua i te mau ati e rave rau atoa i te mau taime atoa e hinaaro ai raua.

7 Ia oti ta raua pororaa, e tamaˈi te puaa taehae tei na roto mai i te abuso ia raua e e upootia i nia ia raua, e e taparahi pohe ia raua.+ 8 E vai noa to raua tino i te aroâ o te oire rahi parau-taipe-hia Sodoma e Aiphiti, i reira atoa to raua Fatu i te haapoheraahia i nia i te pou. 9 E e hiˈo noa to te mau opu e reo e nunaa atoa i to raua tino e toru mahana e te afa,+ e eita ratou e faatia ia hunahia to raua tino. 10 E e oaoa te feia e parahi ra i nia i te fenua e e arearea ratou. E hapono atoa ratou i te ô te tahi i te tahi, no te mea ua haamauiui teie na peropheta e piti ia ratou.

11 Hope aˈera na mahana e toru e te afa, e ô atura te aho* ora no ǒ mai i te Atua i roto ia raua,+ e tia aˈera raua i nia, e mǎtaˈu roa aˈera te feia i ite ia raua. 12 Faaroo aˈera raua i te hoê reo puai no te raˈi mai i te na ôraa ia raua: “Haere mai i nia nei.” Haere aˈera raua i nia i te raˈi na roto i te ata e ite atura* to raua mau enemi ia raua. 13 Tupu ihora te hoê aueueraa fenua rahi i taua hora ra, e topa ˈtura te ahuru o te tuhaa o te oire. E 7 000 taata tei pohe i taua aueueraa fenua ra. Mehameha ihora te feia e toe ra e faahanahana ˈtura ratou i te Atua o te raˈi.

14 Ua mairi te piti o te ati.+ Inaha, te haere oioi mai ra te toru o te ati.

15 Faaoto maira te hitu o te melahi i ta ˈna pu.+ Faaroohia aˈera te tahi mau reo puai no te raˈi mai i te na ôraa: “Ua riro te faatereraa o te ao i te Faatereraa arii a* to tatou Fatu+ e a ta ˈna Mesia,+ e e faatere oia ei Arii e a muri noa ˈtu.”+

16 Tipapa ihora na matahiapo e 24+ o te parahi ra i nia i to ratou terono i mua i te aro o te Atua e haamori atura i te Atua, 17 a na ô ai: “Te haamauruuru nei matou ia oe te Atua ra o Iehova,* te Manahope, o te vai nei+ e o tei vai na, no te mea ua faaohipa oe i to oe mana rahi e ua haamata i te faatere ei Arii.+ 18 Ua riri râ te mau nunaa atoa, e ua faaite mai oe i to oe riri rahi tahoo, e ua tae mai te tau faataahia no te haava i tei pohe e no te haamaitai+ i ta oe mau tavini te mau peropheta+ e te feia moˈa, te feia riirii e te feia tiaraa teitei e mǎtaˈu ra i to oe iˈoa, e no te haamou i te feia e tuino ra i te fenua.”+

19 Ua matara te nao o te hiero o te Atua i nia i te raˈi, e ua itehia te afata o ta ˈna faufaa i roto i te nao o to ˈna hiero.+ Anapa maira te uira e haruru maira te patiri e te reo atoa e aueue ihora te fenua e topa maira te ûa paari rahi.

12 Itehia ˈtura te hoê ohipa taipe faahiahia roa i nia i te raˈi: te hoê vahine+ tei vehîhia* i te mahana, e to raro aˈe te avaˈe i to ˈna avae, e e hei 12 fetia to nia i to ˈna upoo, 2 e ua hapû oia. E te auê ra oia no to ˈna mauiui e te mauiui rahi fanau.

3 Itehia ˈtura te tahi atu ohipa taipe i nia i te raˈi. Inaha, te hoê teni rahi uteute+ mai te auahi. E hitu afii e e ahuru tara to ˈna. E hitu atoa hei* to ˈna, hoê i nia i te afii tataitahi. 4 E te arato ra to ˈna aero i te toru o te tuhaa o te mau fetia+ o te raˈi, e huri maira i raro i te fenua.+ E te tia noa ra te teni i mua i te vahine+ o te fatata i te fanau, ia nehenehe oia e horomii i ta ˈna tamarii ia fanau oia.

5 Fanau maira te vahine i te hoê tamaiti,+ te hoê tamaroa, o te faatere i te mau nunaa atoa ma te sepeta auri.+ Afai-oioi-hia ˈtura ta ˈna tamarii i te Atua ra e i to ˈna terono. 6 Horo ê atura te vahine i te medebara, i reira to te Atua faaineineraa i te hoê vahi no ˈna e i reira oia e faatamaahia ˈi 1 260 mahana.+

7 Tupu ihora te tamaˈi i nia i te raˈi: aro atura Mihaela*+ e ta ˈna mau melahi i te teni, aro atoa maira te teni e ta ˈna mau melahi, 8 aita râ ratou i upootia.* Aita ˈtura e parahiraa faahou to ratou i te raˈi. 9 Hurihia ihora i raro te teni rahi,+ te ophi i tahito ra+ tei piihia te Diabolo+ e Satani,+ o te haavare nei i to te ao atoa nei,+ ua hurihia mai ïa i raro i te fenua,+ e ua hurihia mai ta ˈna mau melahi i raro na muri ia ˈna. 10 Faaroo ihora vau i te hoê reo puai i te raˈi i te na ôraa:

“Teie mai nei te faaoraraa+ e te puai e te Faatereraa arii a* to tatou Atua+ e te mana o ta ˈna Mesia, no te mea ua hurihia mai i raro tei pari i to tatou mau taeae, o te pari ra ia ratou i te po e te ao i mua i te aro o to tatou Atua!+ 11 E ua upootia ratou i nia ia ˈna+ maoti te toto o te Arenio*+ e maoti te poroi ta ratou i faaite,+ e aita ratou i nounou i to ratou ora*+ noa ˈtu e e pohe ratou. 12 No reira, a oaoa outou e ora ra i nia i te raˈi! Ua ati râ to te fenua e to te miti,+ no te mea ua pou te Diabolo ia outou ra ma te riri rahi, ua ite hoi o ˈna e e taime poto to ˈna e toe ra.”+

13 I to te teni râ iteraa e ua hurihia mai oia i raro i te fenua,+ hamani ino atura oia i te vahine+ tei fanau i te tamarii tamaroa. 14 Tera râ, horoahia maira na pererau e piti o te aeto rahi+ i te vahine ia nehenehe oia e maue ê i te medebara i to ˈna ra vahi, i reira oia e faatamaahia ˈi hoê tau e e piti tau e e afa tau,*+ i te atea ê i te ophi.+

15 Pihaˈe atura te ophi i te pape mai te anavai ra te huru mai roto mai i to ˈna vaha, ia raea te vahine i taua anavai ra e ia paremo oia. 16 Tauturu maira râ te fenua i te vahine e hamǎmǎ ihora te fenua i to ˈna vaha a horomii atu ai i te anavai ta te teni i pihaˈe mai roto mai i to ˈna vaha. 17 Hae roa ihora te teni i te vahine, e haere atura e faatupu i te tamaˈi i te toea o te huaai o te vahine,+ o te haapao ra i te mau faaueraa a te Atua e tei ia ratou ra te ohipa faaiteraa i te parau o Iesu.+

13 E te tia noa ra oia* i nia i te one tahatai.

Ite atura vau i te hoê puaa taehae+ mai roto mai i te miti i te fauraraa mai,+ hoê ahuru tara e e hitu afii to ˈna, e i nia iho i to ˈna mau tara, hoê ahuru ïa hei,* hoê i nia i te tara tataitahi. I nia iho râ i to ˈna mau afii, e iˈoa faaino ïa. 2 Mai te nemera te puaa taehae ta ˈu i ite. To ˈna râ avae, mai to te daba ïa, e to ˈna vaha mai to te liona. Horoa maira te teni+ i to ˈna puai e to ˈna terono e te mana rahi no te puaa.+

3 Ite atura vau, mai te mea ra e ua pepe roa hoê afii to ˈna, ua ora râ taua pepe ra.+ Pee atura to te fenua atoa i te puaa taehae no to ratou faahiahia ia ˈna. 4 Haamori atura ratou i te teni, no te mea ua horoa oia i te mana no te puaa taehae, e haamori atura ratou i te puaa taehae a na ô ai: “O vai tei au i te puaa taehae ra, e o vai te nehenehe e aro ia ˈna?” 5 Ua horoahia no te puaa taehae te hoê vaha o te parau i te mau parau teoteo e te faaino, e ua horoahia ia ˈna te mana no te ohipa e 42 avaˈe.+ 6 Hamǎmǎ ˈtura te puaa taehae i to ˈna vaha no te faaino+ i te Atua, to ˈna iˈoa e to ˈna nohoraa, e oia atoa i tei ora ra i nia i te raˈi.+ 7 Vaiihohia ihora oia ia tamaˈi i te feia moˈa e ia upootia i nia ia ratou,+ e horoa-atoa-hia ˈtura no ˈna te mana i nia i te mau opu e reo e nunaa atoa. 8 E te feia atoa e parahi ra i nia i te fenua, e haamori ïa ia ˈna. Mai te omuaraa mai â o teie nei ao, aita hoê aˈe o to ratou iˈoa i papaihia i roto i te otaro o te ora+ a te Arenio* tei haapohehia ei tusia.+

9 Te taata e tariˈa to ˈna ra, ia faaroo ïa.+ 10 Ia hopoi-tîtî-hia hoê o outou, e hopoi-tîtî-hia oia. Ia haapohe oia i te taata i te ˈoˈe,* ia pohe oia i te ˈoˈe e tia ˈi.+ O te faaoromai tamau+ e te faaroo+ te titauhia i te feia moˈa.+

11 Ite atura vau i te tahi atu puaa taehae mai roto mai i te fenua i te fauraraa mai. E piti tara to ˈna mai to te fanauˈa mamoe, paraparau ihora râ mai te hoê teni.+ 12 E faaohipa taua puaa taehae ra i te mana atoa o te puaa taehae matamua+ i mua ia ˈna. E turai oia i to te fenua ia haamori i te puaa taehae matamua, no ˈna hoi te hoê afii tei pepe roa e tei ora râ.+ 13 E e faatupu oia i te tahi mau ohipa maere rahi, oia atoa te faatoparaa i te auahi mai te raˈi mai i te fenua nei i mua i te huitaata.

14 Na roto i te mau ohipa maere rahi tei vaiihohia ia ˈna ia faatupu i mua i te puaa taehae matamua, te haavare ra oia i te feia e parahi ra i te fenua, a parau atoa ˈi ia ratou ia hamani i te tii+ o te puaa taehae tei tairihia i te ˈoˈe e tei ora faahou mai râ.+ 15 Vaiihohia ˈtura te piti o te puaa taehae ia horoa i te aho* i te tii o te puaa taehae matamua, a nehenehe atu ai teie tii e paraparau e e faaue ia haapohehia te feia atoa aita e haamori ra i taua tii ra.

16 Te faahepo ra oia i te mau taata atoa, te feia riirii e te feia tiaraa teitei, te feia taoˈa rahi e te feia veve, te feia tiamâ e te mau tîtî, ia tapaohia ratou i nia i to ratou rima atau aore ra to ratou rae,+ 17 e ia ore roa te hoê taata ia hoo mai aore ra ia hoo atu, te taata anaˈe râ ua tapaohia te iˈoa+ aore ra te numera o te iˈoa o te puaa taehae i nia i to ˈna rima atau aore ra to ˈna rae.+ 18 I ǒ nei e titauhia ˈi te paari: Ia numera te taata maramarama i te numera o te puaa taehae, e numera taata hoi, 666 ïa to ˈna numera.+

14 Ite atura vau, e inaha, te Arenio*+ e tia ra i te mouˈa Ziona,+ e 144 000+ tei papaihia to ˈna iˈoa e te iˈoa o to ˈna Metua+ i nia i to ratou rae. 2 Faaroo ihora vau i te hoê haruru no roto mai i te raˈi, mai te haruru pape ra e te haruru puai o te patiri. E te haruru ta ˈu i faaroo, mai te reo ïa o te tahi mau taata himene e faataˈi ra i ta ratou kinura. 3 Mai te mea ra e e himene apî+ ta ratou e himene ra i mua i te terono e i mua i na melahi+ e maha e na matahiapo,+ e aita hoê i tia ia himene i tera himene, na 144 000+ anaˈe râ o tei hoohia mai te fenua mai. 4 O te feia teie aita i viivii i te vahine, inaha, aita ratou i taoto i te hoê apiti.+ O te feia teie e pee tamau ra i te Arenio i te mau vahi atoa ta ˈna e haere.+ Ua hoohia mai ratou+ no roto mai i te huitaata ei hotu matamua+ pûpûhia i te Atua e i te Arenio. 5 Aita atoa e haavare i roto i to ratou vaha. Mea hapa ore ratou.+

6 Ite atura vau i te tahi atu melahi e rere ra na te reva, e e parau apî oaoa e te mure ore ta ˈna no te faaite atu i te feia e parahi ra i te fenua, i te mau nunaa e opu e reo atoa.+ 7 Te parau ra oia ma te reo puai: “A mǎtaˈu i te Atua e a faahanahana ia ˈna, no te mea ua tae mai te hora o ta ˈna haavaraa.+ No reira, a haamori i te Atua tei hamani i te raˈi e te fenua e te miti+ e te mau pape pihaa.”

8 Na muri maira te tahi atu melahi, o te piti ïa, e na ô ihora: “Ua topa oia! Ua topa o Babulonia rahi,+ oia tei faainu i te mau nunaa atoa i ta ˈna uaina o te faatupu i te hinaaro rahi e rave i* te mau peu taotoraa tia ore!”*+

9 Na muri maira te tahi atu melahi ia raua, o te toru ïa, e na ô ihora ma te reo puai: “Ia haamori noa ˈtu te tahi taata i te puaa taehae+ e to ˈna tii e ia tapaohia oia i te tapao o te puaa taehae i nia i to ˈna rae aore ra to ˈna rima,+ 10 e inu atoa oia i te uaina anoi-ore-hia o te riri o te Atua, tei niniihia i roto i te auˈa o te riri rahi tahoo o te Atua.+ E haamauiui-atoa-hia oia i te auahi e te ofai ura+ i mua i te mau melahi moˈa e i mua i te Arenio. 11 E pee te au auahi o te haamauiui ia ratou i nia e a muri noa ˈtu.+ I te po e te ao aita e faaearaa, e haamauiuihia te feia e haamori ra i te puaa taehae e to ˈna tii e te taata atoa ua tapaohia te iˈoa o te puaa taehae i nia i to ˈna rae aore ra to ˈna rima.+ 12 E titauhia ïa ia faaoromai tamau te feia moˈa,+ oia hoi te feia e haapao ra i te mau faaueraa a te Atua e e pee ra i te faaroo+ o Iesu.”

13 Faaroo ihora vau i te hoê reo no roto mai i te raˈi i te parauraa mai: “A papai: Mai teie atu nei, e oaoa te feia tei pohe a vai hoê noa ˈi e te Fatu.+ Oia mau, ta te varua moˈa ïa e parau, ia faaea ratou i ta ratou mau ohipa e tia ˈi, e apee hoi ta ratou i rave ia ratou.”

14 Ite atura vau, e inaha, te hoê ata uouo, e i nia iho i taua ata ra te parahi ra te hoê mai te tamaiti a te taata nei te huru,+ e hei auro to nia i to ˈna upoo e e tipi fefe oi tei to ˈna rima.

15 Na roto maira te tahi atu melahi i te nao* o te hiero, a pii atu ai i tei parahi ra i nia iho i te ata ma te reo puai, a na ô ai: “A rave i ta oe tipi fefe e a ooti, no te mea ua tae te hora no te ooti, ua paari roa hoi te maa o te fenua.”+ 16 Ooti atura tei parahi ra i nia iho i te ata i te maa o te fenua i ta ˈna tipi fefe, e ootihia ihora te fenua.

17 Na roto maira te tahi atu melahi i te nao o te hiero e vai ra i nia i te raˈi, e e tipi fefe oi atoa ta ˈna.

18 E na roto maira te tahi atu melahi i te fata, e e mana to ˈna i nia i te auahi. Pii atura oia i te melahi e tipi fefe oi ta ˈna ma te reo puai, a na ô ai: “A rave i ta oe tipi fefe oi e a haaputu i te mau pupa vine o te fenua, ua para hoi te vine.”+ 19 Ooti atura te melahi i te fenua i ta ˈna tipi fefe, e haaputu maira i te vine o te fenua, e huri atura i roto i te apoo taataahiraa vine rahi o te riri o te Atua.+ 20 Ua taataahihia te vine i rapae i te oire, e tahe maira te toto no roto mai i taua apoo ra e raea roa aˈera te tavaha o te mau puaahorofenua no te hoê atearaa 1 600 setadia.*

15 Ite atura vau i te tahi atu ohipa taipe faahiahia roa e te maere i nia i te raˈi: e hitu melahi+ tei ia ratou ra e hitu ati. Na ati hopea ïa teie, no te mea na roto i te reira e hope ai te riri o te Atua i te tupu.+

2 Ite atura vau i te hoê mea e hohoˈa i te miti e e au i te hiˈo,+ e auahi atoa to reira. E te tia ra i pihai iho i taua miti ra te feia tei upootia+ i nia i te puaa taehae e to ˈna tii+ e te numera o to ˈna iˈoa,+ a tapea noa ˈi i te mau kinura a te Atua. 3 Te himene ra ratou i te himene a Mose+ te tavini a te Atua e te himene a te Arenio,*+ a na ô ai:

“E ohipa faahiahia roa e te maere+ ta oe te Atua ra o Iehova,* te Manahope.+ E haerea parau-tia e te parau mau to oe,+ te Arii mure ore.+ 4 O vai mau te ore e mǎtaˈu ia oe Iehova,* e e faahanahana i to oe iˈoa, o oe anaˈe hoi te Atua haapao maitai?+ E haere mai hoi te mau nunaa atoa i mua i to oe aro+ no te haamori ia oe, no te mea ua faaitehia ta oe mau haavaraa tia.”

5 I muri iho, ite atura vau i nia i te raˈi e ua matara te nao*+ o te tiahapa o te Faaiteraa,+ 6 e na roto maira i te nao na melahi e hitu tei ia ratou ra na ati e hitu,+ tei ahuhia i te ahu lino mâ e te anaana e ua taamuhia to ratou ouma i te hatua auro. 7 Horoa ˈtura hoê o na melahi e maha e hitu auˈa auro i na melahi e hitu, e ua î na auˈa i te riri o te Atua,+ o te ora hoi e a muri noa ˈtu. 8 Î aˈera te nao i te au auahi no to te Atua hanahana+ e no to ˈna puai, e aita hoê i tia ia tomo i roto i te nao e a hope roa ˈi na ati e hitu+ a na melahi e hitu i te tupu.

16 Faaroo atura vau i te hoê reo puai mai roto mai i te nao*+ i te na ôraa i na melahi e hitu: “A haere, a manii i na auˈa e hitu o te riri o te Atua i nia i te fenua.”+

2 Reva ˈtura te melahi matamua e manii ihora i ta ˈna auˈa i nia i te fenua.+ E te feia tei tapaohia i te tapao o te puaa taehae+ e o te haamori ra i to ˈna tii,+ roohia ihora ïa i te taupo ino roa.+

3 Manii atura te piti o te melahi i ta ˈna auˈa i roto i te miti,+ e riro maira te reira ei toto+ mai to te taata pohe ra. E pohe aˈera te mau animara* atoa i roto i te miti.+

4 Manii atura te toru o te melahi i ta ˈna auˈa i roto i te mau anavai e te mau pape pihaa,+ e riro maira te reira ei toto.+ 5 Faaroo ihora vau i te melahi e mana to ˈna i nia i te pape i te na ôraa: “O oe e vai nei e i vai na,+ te Atua haapao maitai,+ e Atua parau-tia oe, ua faatupu hoi oe i teie mau haavaraa,+ 6 no te mea ua haamanii ratou i te toto o te feia moˈa e o te mau peropheta.+ Ua faainu oe ia ratou i te toto+ e ua tano roa.”+ 7 Faaroo ihora vau i te fata i te na ôraa: “Oia mau, te Atua ra o Iehova,* te Manahope,+ e haavaraa* parau mau e te parau-tia ta oe.”+

8 Manii atura te maha o te melahi i ta ˈna auˈa i nia i te mahana,+ e ua faatiahia i te mahana ia paapaa te taata i te auahi. 9 Paapaa aˈera te taata i te veavea rahi, tera râ, faaino aˈera ratou i te iˈoa o te Atua, tei ia ˈna ra hoi te mana i nia i teie mau ati, e aita ratou i tatarahapa e i faahanahana ia ˈna.

10 Manii atura te pae o te melahi i ta ˈna auˈa i nia i te terono o te puaa taehae. Poirihia ihora te faatereraa+ a te puaa taehae, e haamata ˈtura te niho o te taata i te mauu no to ratou mauiui, 11 tera râ, faaino aˈera ratou i te Atua o te raˈi no to ratou mauiui e no te taupo i nia ia ratou, e aita ratou i tatarahapa i ta ratou mau ohipa.

12 Manii atura te ono o te melahi i ta ˈna auˈa i nia i te anavai rahi o Eupharate.+ Mǎrô aˈera te anavai+ no te faaineine i te eˈa no na arii+ no te hitiraa mai o te mahana.*

13 Ite atura vau e toru poroi viivii* mai te rana ra i te na rotoraa mai i te vaha o te teni+ e te vaha o te puaa taehae e te vaha o te peropheta haavare. 14 No ǒ mai teie mau poroi i te mau demoni e e faaroo te mau arii o te ao atoa i te reira. E faatupu teie mau poroi i te mau ohipa maere+ no te haaputu mai i te mau arii atoa o te fenua nei no te tamaˈi+ o te mahana rahi o te Atua Manahope.+

15 “A ara! Te haere mai nei au mai te hoê eiâ.+ E oaoa te taata e vai ara noa+ e aita i tatarahia to ˈna mau ahu, ia ore oia ia haere tahaa noa a itehia ˈi to ˈna haama.”+

16 Haaputuputu maira ratou i te mau arii i te vahi parauhia Aramagedo* na roto i te reo Hebera.+

17 Manii atura te hitu o te melahi i ta ˈna auˈa i roto i te raˈi. Faaroohia ihora te hoê reo puai no roto mai i te nao+ e mai te terono mai i te na ôraa: “Ua tupu te reira!” 18 Anapa maira te uira, haruru ihora te patiri e te reo atoa, e tupu atura te hoê aueueraa fenua rahi aita i tupu aˈenei mai te hamaniraahia mai te taata i nia i te fenua,+ e aueueraa fenua rahi mau â e te puai. 19 Amaha ˈtura te oire rahi+ ei toru tuhaa, e huˈahuˈa aˈera te mau oire o te mau nunaa. Haamanaˈo atura te Atua ia Babulonia rahi+ no te horoa ia ˈna i te auˈa uaina o to ˈna riri rahi tahoo.+ 20 E mou atura te mau motu atoa, e aita e mouˈa faahou.+ 21 E mai te raˈi mai, topa maira i nia i te taata te ûa paari rahi, hoê taleni* to te ofai tataitahi.+ Faaino atura te taata i te Atua no te ati o te ûa paari,+ e ati ino mau hoi.

17 Haere maira hoê o na hitu melahi e hitu auˈa ta ratou,+ e parau maira ia ˈu: “A haere mai, e faaite atu vau ia oe i te faautuaraa o te vahine taiata rahi e parahi ra i nia iho i te pape e rave rahi,+ 2 ua taiata hoi o ˈna i te mau arii o te fenua,+ e ua taero to te fenua i te uaina o ta ˈna mau peu taotoraa tia ore.”*+

3 Afai atura te melahi ia ˈu i te medebara maoti te puai o te varua moˈa. Ite atura vau i te hoê vahine e parahi ra i nia i te hoê puaa taehae uteute e hitu afii e e ahuru tara to ˈna e mea rahi roa te iˈoa faaino na nia iho ia ˈna. 4 E ahu vareau e te uteute to te vahine,+ e ua faanehenehe o ˈna ia ˈna i te auro e te mau ofai maitai roa e te poe.+ E i roto i to ˈna rima, e auˈa auro ïa î i te mau mea faufau e te viivii o ta ˈna mau peu taotoraa tia ore.* 5 I nia iho i to ˈna rae, ua papaihia te hoê iˈoa, te hoê parau huna: “Babulonia rahi, te metua vahine o te mau vahine taiata+ e o te mau mea faufau o te fenua.”+ 6 Ite atura vau e ua taero te vahine i te toto o te feia moˈa e te toto o te mau ite no Iesu.+

Ua maere roa vau i to ˈu iteraa ia ˈna. 7 Parau maira te melahi ia ˈu: “Eaha oe i maere ai? E faaite atu vau ia oe i te parau huna no nia i te vahine+ e te puaa taehae e hitu afii e e ahuru tara to ˈna o te uta ra i te vahine:+ 8 I vai na te puaa taehae ta oe i ite, aita faahou nei râ. Ua fatata râ oia i te na roto mai i te abuso,+ e e haamouhia oia. E te feia e parahi ra i te fenua, oia hoi te feia aita te iˈoa i papaihia i roto i te otaro o te ora+ mai te omuaraa mai â o teie nei ao, e maere ïa ia ite ratou i te puaa taehae tei vai na, e aita faahou nei, o te hoˈi faahou mai râ.

9 “I ǒ nei e titauhia ˈi te maramarama e te paari: Na afii e hitu,+ e hitu ïa mouˈa i reira te vahine i te parahiraa, 10 e hitu atoa ïa arii: ua taahuri e pae, te tia noa ra hoê, aita â te tahi atu i tae mai atura. Ia tae anaˈe mai râ, e vai ïa oia no te hoê tau poto. 11 E te puaa taehae tei vai na, aita faahou nei râ,+ o te vaˈu ïa o te arii, no roto mai râ i na arii e hitu, e e haamouhia oia.

12 “Na tara hoê ahuru ta oe i ite, e ahuru ïa arii, tera râ, aita â i horoahia ˈtura te hoê faatereraa na ratou, e horoahia râ no ratou te mana ei arii no te hoê noa hora e te puaa taehae. 13 No te mea hoê â manaˈo to ratou, e horoa ïa ratou i to ratou puai e to ratou mana no te puaa taehae. 14 E tamaˈi ratou e te Arenio,*+ no te mea râ e Fatu o ˈna o te mau fatu e e Arii o te mau arii,+ e upootia te Arenio.+ E upootia atoa tei to ˈna ra pae o tei titau-manihini-hia e tei maitihia e te taiva ore.”+

15 Parau maira oia ia ˈu: “Te mau pape ta oe i ite i reira te vahine taiata i te parahiraa, e nahoa taata ïa e e nunaa e e reo atoa.+ 16 E na tara hoê ahuru+ ta oe i ite e te puaa taehae,+ e hae ïa i te vahine taiata.+ E haru ratou i ta ˈna mau taoˈa e to ˈna ahu e te mau faaneheneheraa i nia ia ˈna. E amu atoa ratou i to ˈna iˈo e e tanina roa ia ˈna.+ 17 E tuu hoi te Atua i te manaˈo i roto i to ratou aau e rave i to ˈna hinaaro,+ oia hoi e faatupu i to ratou manaˈo hoê roa e horoa i ta ratou faatereraa na te puaa taehae+ e ia tupu roa ˈtu te mau poroi a te Atua. 18 E te vahine+ ta oe i ite, o te oire rahi ïa e faatere ra i te mau arii o te fenua.”

18 I muri iho, ite atura vau i te tahi atu melahi i te pouraa mai te raˈi mai ma te mana rahi, e maramarama ihora te fenua i to ˈna hanahana. 2 Tuô ihora oia a na ô ai: “Ua topa oia! Ua topa o Babulonia rahi,+ e ua riro oia ei parahiraa no te mau demoni e ei vairaa no te mau varua* viivii atoa e te mau manu viivii au-ore-roa-hia atoa!+ 3 No ta ˈna hoi uaina o te faatupu i te hinaaro rahi e rave i* te mau peu taotoraa tia ore,* ua taero te mau nunaa atoa,+ e ua taiata te mau arii o te fenua ia ˈna,+ e ua taoˈa-rahi-hia te mau ona* o te fenua no to ˈna oraraa fanaˈo roa ino.”

4 Faaroo atura vau i te tahi atu reo mai te raˈi mai i te na ôraa: “A haere ê mai i rapae ia ˈna, to ˈu nunaa,+ ia ore outou ia apiti i ta ˈna mau hara a roohia ˈtu ai outou i to ˈna mau ati.+ 5 Ua pue hoi ta ˈna mau hara e ua tae roa i te raˈi,+ e ua haamanaˈo te Atua i ta ˈna mau ohipa parau-tia ore.*+ 6 A faahoˈi atu i ta ˈna mai ta ˈna i rave i nia ia vetahi ê,+ ia tataipiti hoi ia faahoˈihia ˈtu no te mau ohipa ta ˈna i rave.+ Te inu ta ˈna i faaineine i roto i te auˈa,+ ia tataipitihia ïa no ˈna.+ 7 Ua faatietie rahi oia ia ˈna e ua ora i te hoê oraraa fanaˈo roa ino, mai te reira atoa ïa te mauiui e te oto ia faahoˈihia ˈtu. Te parau noa ra hoi oia i roto i to ˈna aau: ‘Te parahi nei au ei arii vahine, e e ere au i te vahine ivi, e eita roa ˈtu vau e roohia i te oto.’+ 8 No reira, i te hoê noa mahana e tae mai ai to ˈna mau ati, oia hoi te pohe e te oto e te oˈe. E e tanina-roa-hia oia,+ no te mea e Atua puai o Iehova* tei haava ia ˈna.+

9 “E te mau arii o te fenua tei taiata ia ˈna e tei apiti i to ˈna oraraa fanaˈo roa ino, e taˈi ïa e e tupaipai i to ratou ouma no to ratou oto ia ˈna ia ite ratou i te au auahi o to ˈna taninaraahia. 10 E tia noa ratou i te atea no to ratou riaria i to ˈna mauiui e e parau ratou: ‘Auê, auê oe te oire rahi+ o Babulonia, te oire taoˈa rahi, no te mea i te hoê noa hora to oe faautuaraahia!’

11 “E taˈi e e oto atoa te mau ona o te fenua ia ˈna, no te mea aita e taata faahou no te hoo mai i ta ratou mau taoˈa atoa, 12 ta ratou auro, ario, ofai maitai roa, poe, ahu lino maitai roa, ahu vareau, ahu tirita, ahu uteute, e te mau mea atoa i hamanihia i te raau noˈanoˈa, e te taihaa atoa i hamanihia i te ivori e te raau maitatai ra, e te veo, e te auri, e te maremora, 13 oia atoa te kinamo, te faanoˈanoˈa maa no Initia, te mea noˈanoˈa, te monoˈi noˈanoˈa, te libano, te uaina, te hinu olive, te faraoa ota oro-maitai-hia, te sitona, te puaatoro, te mamoe, te puaahorofenua, te pereoo, te tîtî e te taata.* 14 Oia mau, aita faahou te maa hotu maitai roa ta oe* i hiaai, e ua ore roa te mau maa maitai atoa e te mau mea faahiahia atoa.

15 “E te mau ona i hoo atu i teie mau taoˈa e tei taoˈa-rahi-hia ia ˈna, e tia noa ïa i te atea no to ratou riaria i to ˈna ati. E e taˈi e e oto ratou, 16 a na ô ai: ‘Auê, auê te oire rahi, tei ahuhia i te ahu lino maitai roa, te ahu vareau e te uteute, e tei faanehenehe-rahi-hia i te taoˈa auro, te ofai maitai roa e te poe,+ 17 no te mea i te hoê noa hora i pau roa ˈi taua mau taoˈa rahi ra!’

“E te mau raatira pahi atoa e te mau horopatete atoa e te mau mataro atoa e te feia hoo atoa na te moana, e tia noa ïa i te atea 18 e e tuô ratou a hiˈo noa ˈi i te au auahi o to ˈna taninaraahia, a parau ai: ‘O vai ïa oire mai te oire rahi ra?’ 19 E ueue ratou i te repo i nia i to ratou upoo, a taˈi ai e a oto ai, e e parau ratou: ‘Auê, auê te oire rahi, i reira hoi te mau fatu pahi atoa i te taoˈaraahia i ta ˈna faufaa, no te mea i te hoê noa hora i mou ai oia!’+

20 “Outou to te raˈi,+ e outou te feia moˈa+ e te mau aposetolo e te mau peropheta, a oaoa ïa no te mea ua haava te Atua ia ˈna no ta ˈna i rave i nia ia outou!”+

21 Amo aˈera te hoê melahi puai i te hoê ofai mai te ofai oro rahi ra te hohoˈa, e taora ihora i raro i te miti, a parau ai: “Mea na reira Babulonia te oire rahi e taorahia ˈi i raro, e eita oia e ite-faahou-hia.+ 22 Eita e faaroo-faahou-hia i roto ia oe te hoê taata e himene ra e e faataˈi ra i te kinura, aore ra te hoê taata e faataˈi ra i te upaupa, te vivo, aore ra e faaoto ra i te pu. Eita e ite-faahou-hia i roto ia oe te mau rimaî atoa, e eita e faaroo-faahou-hia te ofai oro. 23 Eita te maramarama o te mori e ama faahou i roto ia oe, e eita te reo o te tane faaipoipo e ta ˈna vahine e faaroo-faahou-hia i roto ia oe, no te mea ta oe mau ona na mua ˈˈe, o te feia tiaraa teitei ïa o te fenua, e ua vare te mau nunaa atoa i ta oe ra mau peu tahutahu.+ 24 Oia mau, ua itehia i roto ia ˈna te toto o te mau peropheta e to te feia moˈa+ e to te feia atoa i haapohehia i nia i te fenua.”+

19 I muri iho, faaroo ihora vau i nia i te raˈi te hoê reo puai mai to te hoê nahoa rahi, o tei na ô hoi: “Ia aruehia Ia!*+ Tei to tatou Atua te faaoraraa e te hanahana e te puai, 2 no te mea e haavaraa parau mau ta ˈna e te parau-tia.+ Ua faautua hoi te Atua i te vahine taiata rahi tei haaviivii i te fenua i ta ˈna mau peu taotoraa tia ore,* e ua tahoo oia i te toto o ta ˈna mau tavini ta taua vahine ra i haamanii.”*+ 3 I reira iho, parau aˈera ratou no te piti o te taime: “Ia aruehia Ia!*+ E te pee noa ra te au auahi o to ˈna taninaraahia i nia e a muri noa ˈtu.”+

4 Tipapa ihora na matahiapo e 24+ e na melahi e maha,+ haamori atura i te Atua e parahi ra i nia i te terono, e parau atura: “Amene! Ia aruehia Ia!”*+

5 Na ô atoa maira te hoê reo no roto mai i te terono: “Arue i to tatou Atua, outou paatoa ta ˈna mau tavini+ e mǎtaˈu ra ia ˈna, te feia riirii e te feia tiaraa teitei.”+

6 E faaroo atura vau i te hoê reo mai to te hoê nahoa rahi, e te haruru mai to te pape e rave rahi e mai to te patiri puai. Te na ô ra ratou: “Ia aruehia Ia,*+ no te mea ua haamata Iehova* to tatou Atua, te Manahope,+ i te faatere ei Arii!+ 7 E oaoa e e oaoa ˈtu â e e faahanahana anaˈe ia ˈna, no te mea ua tae mai te oroa faaipoiporaa o te Arenio* e ua ineine ta ˈna vahine no te faaipoiporaa. 8 Oia mau, ua faatiahia i te vahine a te Arenio ia ahu i te ahu lino maitai roa e te mâ e te anaana, no te mea o te mau ohipa parau-tia a te feia moˈa taua ahu lino maitai roa ra.”+

9 Parau maira te melahi ia ˈu: “A papai: E oaoa te mau manihini o te tamaaraa o te faaipoiporaa a te Arenio.”+ Na ô atoa maira oia: “Teie mau parau, e parau mau ïa no ǒ mai i te Atua.” 10 Tipapa ihora vau i to ˈna pae avae no te haamori ia ˈna. Parau maira râ oia: “A haapao maitai! Eiaha roa e na reira!+ E tavini noa vau mai ia oe e mai to oe mau taeae, tei ia ratou ra te ohipa faaiteraa i te parau mau no nia ia Iesu.+ A haamori i te Atua!+ No te faaite hoi i te parau o Iesu te mau parau tohu.”+

11 Ite atura vau e ua matara te raˈi, e a hiˈo na, te hoê puaahorofenua uouo.+ E tei parahi ra i nia iho, o Haapao maitai+ ïa e o Parau mau+ te iˈoa, e te haava ra oia e te tamaˈi ra ma te parau-tia.+ 12 To ˈna mata, e auahi ura ïa,+ e mea rahi te hei* i nia i to ˈna upoo. E iˈoa tei papaihia i nia iho ia ˈna aita hoê i ite i te reira o ˈna anaˈe râ, 13 e ua ahuhia oia i te hoê ahu tapoˈi tei tafetafeta i te toto, e o Te Parau+ a te Atua to ˈna iˈoa. 14 Apee atoa maira te mau nuu o te raˈi ia ˈna na nia i te mau puaahorofenua uouo, e ua ahuhia ratou i te ahu lino maitai roa e te mâ e te uouo. 15 E na roto maira i to ˈna vaha te hoê ˈoˈe roa e te oi+ no te tairi i te mau nunaa, e e faatere oia ia ratou ma te sepeta auri.+ Te taataahi atoa ra oia i te apoo taataahiraa vine o te riri rahi tahoo o te Atua, te Manahope.+ 16 E iˈoa tei papaihia i nia iho i to ˈna ahu tapoˈi, oia hoi i to ˈna huha: Arii o te mau arii e Fatu o te mau fatu.+

17 Ite atoa ˈtura vau i te hoê melahi i te tia-noa-raa i mua i te mahana, e tuô ihora oia e na ô atura i te mau manu atoa e rere ra na te reva: “A rere mai i ǒ nei, a putuputu mai no te tamaaraa rahi a te Atua,+ 18 ia amu outou i te iˈo o te mau arii e te iˈo o te mau raatira o te nuu e te iˈo o te feia pautuutu+ e te iˈo o te mau puaahorofenua e to tei parahi i nia iho,+ e te iˈo o te mau taata atoa, to te feia tiamâ e oia atoa to te mau tîtî, e to te feia riirii e to te feia tiaraa teitei.”

19 E ite atura vau i te puaa taehae e te mau arii o te fenua e ta ratou mau nuu i te tahoêraa no te tamaˈi i tei parahi ra i nia i te puaahorofenua e i ta ˈna nuu.+ 20 Haruhia ˈtura te puaa taehae e oia atoa te peropheta haavare+ tei faatupu i te mau ohipa maere i mua ia ˈna, i vare ai te feia tei tapaohia i te tapao o te puaa taehae+ e te feia e haamori ra i to ˈna tii.+ Huri-ora-noa-hia ˈtura raua e piti atoa i raro i te roto auahi e ura puai noa ra.+ 21 Area te toea o te taata, ua pohe ïa i te ˈoˈe roa no roto mai i te vaha o tei parahi ra i nia iho i te puaahorofenua.+ Paia aˈera te mau manu atoa i to ratou iˈo.+

20 Ite atura vau i te hoê melahi i te pouraa mai te raˈi mai, e fifi auri rahi e te taviri o te abuso+ tei to ˈna rima. 2 Haru ihora oia i te teni,+ te ophi i tahito ra,+ oia hoi te Diabolo+ ra o Satani,+ e taamu ihora ia ˈna i te fifi 1 000 matahiti. 3 Huri atura oia ia ˈna i roto i te abuso+ e opani atura e tamau ihora i te reira i te tapao taati, ia ore o ˈna ia haavare faahou i te mau nunaa e ia hope roa ˈtu na 1 000 matahiti. I muri aˈe i te reira, e tuuhia mai o ˈna no te hoê taime poto noa.+

4 E ite atura vau i te tahi mau terono, e i tei parahi ra i nia iho, ua horoahia ïa ia ratou te mana e haava. Oia mau, ua ite au i te feia* tei haapohehia* no to ratou faaiteraa i te parau o Iesu e no to ratou pororaa no nia i te Atua, aita ratou i haamori i te puaa taehae e to ˈna tii e aita to ratou rae e to ratou rima i tapaohia i to ˈna tapao.+ Ua ora faahou mai ratou e ua faatere ei arii e te Mesia+ 1 000 matahiti. 5 (Aita te toea o tei pohe+ i hoˈi mai i te ora e ia hope roa ˈtu na 1 000 matahiti.) O te tia-faahou-raa matamua teie.+ 6 E oaoa ratou o tei fanaˈo i te tia-faahou-raa matamua+ e mea moˈa ratou. Aita to te piti o te pohe+ e mana i nia ia ratou,+ e riro râ ratou ei tahuˈa+ na te Atua e na te Mesia, e e faatere ratou ei arii e te Mesia i na 1 000 matahiti.+

7 I te hoperaa iho â na 1 000 matahiti, e tuuhia mai Satani, 8 e e haere o ˈna e haavare i te mau nunaa i na poro e maha o te fenua, oia hoi ia Goga e ia Magoga, no te haaputuputu ia ratou no te tamaˈi. To ratou numera, mai to te one tahatai ïa. 9 E haere ratou na te fenua taatoa e e haaati ratou i te puhapa o te feia moˈa e te oire herehia e te Atua. E topa mai râ te auahi mai te raˈi mai, a mou atu ai ratou.+ 10 E hurihia te Diabolo, tei haavare na ia ratou, i raro i te roto auahi e ura puai noa ra, to reira aˈena te puaa taehae+ raua te peropheta haavare.+ E haamauiuihia* ratou i te po e te ao e a muri noa ˈtu.

11 Ite atura vau i te hoê terono rahi uouo e te parahi ra te Atua i nia iho.+ Mou aˈera te fenua e te raˈi mai mua ia ˈna,+ e aita ˈtura i ite-faahou-hia. 12 Ite atura vau i tei pohe, te feia riirii e te feia tiaraa teitei, i te tia-noa-raa i mua i te terono, e hohorahia ˈtura te tahi mau otaro. Hohorahia ˈtura râ te tahi atu otaro, te otaro o te ora.+ Haavahia ihora te feia pohe ia au i tei papaihia i roto i te mau otaro, ia au i ta ratou mau ohipa.+ 13 Faahoˈi maira te miti i te feia pohe i roto ia ˈna, e faahoˈi atoa maira te pohe e te Apoo* i te feia pohe i roto ia raua, e haavahia ˈtura ratou tataitahi ia au i ta ratou mau ohipa.+ 14 Hurihia ˈtura te pohe raua te Apoo* i raro i te roto auahi.+ O te piti o te pohe+ te roto auahi.+ 15 Oia atoa te taata aita i itehia to ˈna iˈoa i roto i te buka o te ora,+ ua hurihia ïa i raro i te roto auahi.+

21 E ite atura vau i te hoê raˈi apî e te hoê fenua apî,+ ua mou hoi te raˈi tahito e te fenua tahito,+ e aita faahou te miti.+ 2 Ua ite atoa vau i te oire moˈa, o Ierusalema apî, i te pouraa mai te raˈi mai no ǒ i te Atua,+ e tei faaineinehia mai te hoê vahine i faanehenehehia no te tane ta ˈna e faaipoipo.+ 3 Faaroo atura vau i te hoê reo puai no roto mai i te terono i te na ôraa: “Inaha, tei te huitaata ra te tiahapa o te Atua, e e faaea oia ia ratou ra, e e riro ratou ei nunaa no ˈna. Ei pihai iho te Atua ia ratou.+ 4 E tamǎrô oia i te mau roimata atoa o to ratou mata.+ E ore roa te pohe,+ e ore atoa te oto e te auê e te mauiui.+ Ua mou hoi te mau mea tahito.”

5 Parau atura te Atua o te parahi ra i nia i te terono:+ “Inaha, te faaapî nei au i te mau mea atoa.”+ Na ô atoa maira oia: “A papai, e parau papu* hoi teie e te parau mau.” 6 Na ô maira oia ia ˈu: “Ua tupu te reira! O vau te Alepha e te Omega,* te haamataraa e te hopea.+ I tei poihâ ra e horoa noa ˈtu vau* i te pape o te ora no roto i te pape pihaa.+ 7 E fatu te taata e upootia i teie mau mea, e e riro vau ei Atua no ˈna, e e riro oia ei tamaiti na ˈu. 8 Area te feia mǎtaˈu hanoa e te feia tiaturi ore i te Atua+ e te feia viivii e te faufau e te taparahi taata+ e te rave i te mau peu taotoraa tia ore*+ e te feia e rave i te mau peu tahutahu e te haamori idolo e te mau taata haavare atoa,+ e hurihia ïa i raro i te roto auahi e ura puai noa ra.+ O te piti o te pohe teie.”+

9 Haere maira hoê o na melahi e hitu tei ia ratou ra na auˈa e hitu tei î i na ati hopea e hitu,+ e parau maira: “A haere mai, e faaite atu vau ia oe i te vahine o te riro mai ei vahine faaipoipo na te Arenio.”*+ 10 Afai atura oia ia ˈu maoti te puai o te varua moˈa i nia te hoê mouˈa rahi teitei, e faaite maira i te oire moˈa o Ierusalema i te pouraa mai te raˈi mai no ǒ i te Atua+ 11 e ma te hanahana o te Atua.+ To ˈna anaana, mai to te hoê ïa ofai maitai roa, mai te hoê ofai ieloma e anaana ra mai te kerehe.+ 12 E patu rahi teitei e 12 uputa to taua oire ra, 12 hoi melahi i te uputa tataitahi. E ua papaihia te iˈoa o na opu 12 o na tamaiti a Iseraela i nia mai i te mau uputa. 13 I hitia o te râ, e toru uputa, i apatoerau, e toru uputa, i apatoa, e toru uputa, i tooa o te râ, e toru uputa.+ 14 Oia atoa, 12 ofai niu to te patu o taua oire ra, e i nia iho i te reira na iˈoa 12 ïa o na aposetolo 12+ a te Arenio.

15 Te tapea ra te melahi e paraparau ra ia ˈu i te hoê aeho auro no te faito i te oire e te mau uputa e te patu o taua oire ra.+ 16 E maha pae to te oire, hoê â roa e hoê â aano. Faito atura oia i te oire i te aeho, 12 000 ïa setadia,* ua aifaito hoi te roa e te aano e te teitei. 17 Faito atoa ˈtura oia i te patu o taua oire ra, 144 ïa kubiti* ia au i te faito a te taata, ta te melahi atoa ïa i faaohipa. 18 Ua hamanihia te patu i te ieloma,+ e te oire e auro tamâhia ïa mai te hiˈo e itehia na roto. 19 Ua faaunaunahia te niu o te patu o te oire i te mau ofai maitai roa e rave rau: te ofai niu matamua e ieloma, te piti e saphira, te toru e halekedoni, te maha e semaradino, 20 te pae e saredonu, te ono e adama, te hitu e tarisisa, te vaˈu e sema, te iva e phetade, te ahuru e herusoparasa, te ahuru ma hoê e huakineto, te ahuru ma piti e aheleme.* 21 E na uputa 12, 12 ïa poe, e poe te uputa tataitahi. E te aroâ o te oire, e auro tamâhia ïa mai te hiˈo e itehia na roto.

22 Aita vau i ite i te hoê hiero i roto, o Iehova* hoi te Atua Manahope+ te hiero o taua oire ra, e te Arenio atoa. 23 Aita e faufaa ia turama te mahana e te avaˈe i te oire, na te hanahana hoi o te Atua e turama,+ e o te Arenio te maramarama o taua oire ra.+ 24 E haere te mau nunaa ma te turamahia e te maramarama o taua oire ra,+ e e afai te mau arii o te fenua i to ratou hanahana i roto. 25 Eita roa ˈtu te mau uputa o te oire e tapirihia ia ao, e eita roa ˈtu e po i reira.+ 26 E afaihia mai i roto te hanahana e te tura o te mau nunaa.+ 27 Eita roa râ te mea viivii e te taata e rave ra i te mea faufau e te mea haavare e ô atu i roto,+ o te feia noa râ ua papaihia to ratou iˈoa i roto i te otaro o te ora a te Arenio.+

22 Faaite maira te melahi ia ˈu i te hoê anavai pape o te ora,+ mea marama mai te kerehe, o te tahe ra no roto mai i te terono o te Atua e to te Arenio*+ 2 e na ropu atu i te aroâ o te oire. I na pae e piti o te anavai, te vai ra te mau tumu raau o te ora o te horoa mai i te maa 12 taime i te matahiti, hoê ïa hoturaa i te avaˈe. E te rauere o te mau tumu raau, no te faaora ïa i te maˈi o te mau nunaa.+

3 Aita faahou e faaino i reira. E vai râ te terono o te Atua e to te Arenio+ i roto i te oire, e e pûpû te mau tavini a te Atua i te hoê taviniraa moˈa ia ˈna. 4 E ite ratou i to ˈna aro+ e e papaihia to ˈna iˈoa i nia iho i to ratou rae.+ 5 Eita atoa e po faahou,+ e eita ratou e hinaaro faahou i te maramarama o te mori aore ra o te mahana, na te Atua ra hoi o Iehova* e turama ia ratou+ e e faatere ratou ei arii e a muri noa ˈtu.+

6 Na ô maira te melahi ia ˈu: “E parau papu* teie e te parau mau.+ Ua tono mai hoi Iehova,* te Atua tei paraparau na roto i te mau peropheta,+ i ta ˈna melahi e faaite i ta ˈna mau tavini i te mau mea e fatata i te tupu. 7 Inaha, te haere oioi atu nei au.+ E oaoa te taata e haapao ra i te mau taˈo o te parau tohu o teie otaro.”+

8 O vau, o Ioane, tei faaroo e tei ite i teie mau mea. I to ˈu iho â faarooraa e iteraa i te reira, tipapa ihora vau no te haamori i te melahi tei faaite mai ia ˈu i teie mau mea. 9 Parau maira râ oia: “A haapao maitai! Eiaha roa e na reira! E tavini noa vau mai ia oe e mai to oe mau taeae te mau peropheta e te feia e haapao ra i te mau parau o teie otaro. A haamori i te Atua.”+

10 Parau atoa maira oia: “Eiaha e tapea huna noa i te mau taˈo o te parau tohu o teie otaro, ua fatata hoi te tau faataahia. 11 Ia tamau â te taata parau-tia ore i te rave i te ohipa parau-tia ore, e ia tamau â te taata faufau i te rave i te mea faufau. Area te taata parau-tia, ia tamau â ïa i te rave i te ohipa parau-tia, e te taata moˈa i te mea moˈa.

12 “‘Inaha, te haere oioi atu nei au, e tei ia ˈu ra te haamaitairaa e te faautuaraa ia faahoˈi au i ta te taata tataitahi ia au i ta ˈna ohipa.+ 13 O vau te Alepha e te Omega,*+ te matamua e te faahopea, te haamataraa e te hopea. 14 E oaoa te feia tei tamâ i to ratou ahu roa,+ ia faatiahia ratou ia amu i te maa o te mau tumu raau o te ora+ e ia tomo na te mau uputa i roto i te oire.+ 15 Tei rapae te mau urî* e te feia e rave ra i te peu tahutahu e te feia e rave ra i te mau peu taotoraa tia ore* e te taparahi taata e te haamori idolo e te taata atoa mea au na ratou e haavare e o te parau ra i te haavare.’+

16 “‘O vau nei, o Iesu, ua tono atu vau i ta ˈu melahi no te faaite ia outou i teie mau mea no te maitai o te mau amuiraa. O vau te aˈa e te huaai o Davida+ e te fetia poipoi anaana.’”+

17 E te parau noa ra te varua moˈa e te vahine o te faaipoipo i te Arenio:+ “A haere mai!” Ia parau atoa te taata e faaroo ra: “A haere mai!” E te taata e poihâ ra, ia haere mai,+ e te taata atoa e hinaaro, ia rave noa mai i te pape o te ora.+

18 “Te haapapu nei au i te taata atoa e faaroo ra i te mau taˈo o te parau tohu o teie otaro: Ia tuu te hoê taata i te tahi atu parau i roto i teie mau parau tohu,+ e tuu te Atua i te mau ati i papaihia i roto i teie otaro i nia ia ˈna.+ 19 E ia tatara te hoê taata i te tahi parau o te mau parau tohu o teie otaro, e tatara te Atua i ta ˈna tuhaa o te mau tumu raau o te ora+ e o te oire moˈa,+ tei papaihia i roto i teie otaro.

20 Te na ô ra tei haapapu i teie mau parau: ‘Te haere oioi atu nei iho â vau.’”+

“Amene! A haere mai, to ˈu Fatu Iesu.”

21 Ei te feia moˈa ra te hamani maitai rahi o te Fatu ra o Iesu.