TE PITI O TE RATA A IOANE

1 Te matahiapo* i te tuahine* maitihia e te Atua e i ta ˈna mau tamarii, ta ˈu e here mau nei, e ere o vau anaˈe, te feia atoa râ tei ite i te parau mau, 2 no te parau mau hoi e vai noa ra i roto i to tatou aau e e vai â e a muri noa ˈtu. 3 E fanaˈo ïa tatou i te hamani maitai rahi, te aroha hamani maitai e te hau no ǒ mai i te Atua ra te Metua e no ǒ mai ia Iesu Mesia te Tamaiti a te Metua, oia atoa te parau mau e te here.

4 E oaoa rahi to ˈu i to ˈu iteraa e te pee ra vetahi o ta oe mau tamarii i te parau mau,+ mai ta te Metua i faaue mai. 5 Te papai nei ïa vau ia oe, tuahine, no te ani atu ia here tatou te tahi i te tahi, e ere i te faaueraa apî teie, e faaueraa râ ta tatou i ite mai te omuaraa mai â.+ 6 Teie hoi te here, ia pee noa tatou i ta ˈna mau faaueraa.+ Teie hoi te faaueraa, mai ta outou i faaroo mai te omuaraa mai â, ia faaite noa outou i te here. 7 Mea rahi hoi te taata haavare tei haere atu i roto i teie nei ao,+ te feia aita e tiaturi ra e ua haere mai Iesu Mesia ei taata.+ Tera te haavare e te taata patoi i te Mesia.*+

8 A ara ia outou iho, ia ore outou ia ere i te mau mea ta matou i tutava i te rave, ia fanaˈo râ i te mau haamaitairaa atoa+ ta te Atua i faaineine no outou. 9 Te taata e na nia ˈˈe i te haapiiraa a te Mesia, a ore atu ai e haapao noa i te reira, e ere ïa i te tavini na te Atua.+ Area te taata o te haapao noa i taua haapiiraa ra, e hoê noa ïa o ˈna e te Metua e te Tamaiti.+ 10 Ia haere mai te hoê taata ia outou ra e ia ore e horoa mai i taua haapiiraa ra, eiaha e farii ia ˈna i ǒ outou,+ eiaha atoa e aroha ˈtu ia ˈna. 11 O te aroha ˈtu hoi ia ˈna, te apiti ra ïa i ta ˈna mau ohipa ino.

12 Mea rahi te parau ta ˈu e faaite ia outou, eita râ vau e hinaaro e papai atu. Te manaˈo nei râ vau e haere atu ia outou ra, a paraparau roa ˈtu ai tatou, ia oaoa roa hoi outou.

13 Te aroha ˈtu nei te mau tamarii a to outou tuahine maitihia e te Atua.