TE RATA MATAMUA A IOANE

1 Te papai atu nei matou no nia i te parau o te ora,+ tei vai na mai te matamua mai â, ta matou i faaroo, ta matou i ite mata, ta matou i hiˈo maite e ta to matou rima i fafa. 2 (Ua faaitehia mai hoi te ora, ua ite atu matou, ua papu ia matou te reira,+ e te faaite atu nei matou i te ora mure ore+ no ǒ mai i te Metua ra e tei faaitehia mai ia matou.) 3 Te faaite atoa ˈtu nei matou i ta matou i ite e i faaroo,+ ia nehenehe outou e apiti mai ia matou, mai ia matou i apiti i te Metua e i ta ˈna Tamaiti o Iesu Mesia.+ 4 E te papai nei matou i teie mau parau ia oaoa roa tatou pauroa.

5 Teie te poroi ta matou i faaroo ia ˈna e ta matou e faaite atu nei: E maramarama te Atua,+ e aita roa e poiri i roto ia ˈna. 6 Ia parau tatou: “Te apiti nei tatou ia ˈna,” a haere noa ˈi râ na te poiri, te haavare nei ïa tatou e aita tatou e rave nei i te parau mau.+ 7 Mai te peu râ e te haere nei tatou na te maramarama, no te mea to roto te Atua i te maramarama, e apiti ïa tatou te tahi i te tahi, e e tamâ te toto o Iesu ta ˈna Tamaiti ia tatou i te mau hara atoa.+

8 Ia parau tatou: “Aita ta tatou e hara,” te haavare nei ïa tatou ia tatou iho+ e aita te parau mau i roto i to tatou aau. 9 Ia faˈi tatou i ta tatou mau hara, e faaore te Atua i te reira e e tamâ oia ia tatou i te mau ohipa parau-tia ore atoa. E Atua haapao maitai hoi oia e te parau-tia.+ 10 Ia parau tatou: “Aita tatou i hara,” te faariro nei ïa tatou ia ˈna ei haavare, e aita ta ˈna parau i roto i to tatou aau.

2 Ta ˈu mau tamarii here, te papai atu nei au i teie mau parau ia ore outou e rave i te hara. Ia rave noa ˈtu râ te tahi taata i te hara, e tauturu* to tatou tei te Metua ra, o Iesu Mesia+ te taata parau-tia.+ 2 E tusia faahau*+ hoi o ˈna no ta tatou mau hara,+ eiaha no ta tatou anaˈe, no ta to te ao atoa râ.+ 3 Ia haapao noa tatou i ta ˈna mau faaueraa e papu ai ia tatou e ua ite tatou o vai o ˈna. 4 Te taata e parau: “Ua ite au o vai o ˈna,” aita râ e haapao ra i ta ˈna mau faaueraa, e haavare ïa e aita te parau mau i roto i te aau o taua taata ra. 5 Ia haapao râ te hoê taata i ta te Mesia parau e papu ai ia tatou e te here mau ra oia i te Atua.+ Mea na reira tatou e ite ai e mea hoê tatou e o ˈna.+ 6 Te taata o te parau e mea hoê noa o ˈna e o Iesu, ia pee noa ïa o ˈna i te huru haerea o Iesu e tia ˈi.+

7 Taeae here ma, e ere i te faaueraa apî ta ˈu e papai atu nei, e faaueraa tahito râ ta outou i ite mai te omuaraa mai â.+ Tera faaueraa tahito, o te parau ïa ta outou i faaroo. 8 Noa ˈtu râ, e faaueraa apî ta ˈu e papai atu nei, e faaueraa ta Iesu e ta outou i haapao, no te mea fatata te poiri i te mou e ua anaana ê na te maramarama mau.+

9 Te taata e parau e to roto o ˈna i te maramarama, mea hae râ na ˈna+ i to ˈna taeae, to roto noa ïa i te poiri.+ 10 Te taata mea here na ˈna i to ˈna taeae, e vai noa ïa i roto i te maramarama+ e eita ïa e hahi ê. 11 Area te taata mea hae na ˈna i to ˈna taeae, to roto ïa i te poiri e te haere nei na te poiri.+ E aita o ˈna e ite ra i te vahi ta ˈna e haere nei,+ no te mea ua po to ˈna mata i te poiri.

12 Te papai nei au ia outou ta ˈu mau tamarii here, no te mea ua faaorehia ta outou mau hara no to Iesu iˈoa.+ 13 Te papai nei au ia outou te mau metua tane, no te mea ua ite outou o vai Iesu mai te omuaraa mai â. Te papai nei au ia outou te mau tane apî, no te mea ua upootia outou i nia i te varua ino.+ Te papai nei au ia outou ta ˈu mau tamarii here, no te mea ua ite outou o vai te Atua, to tatou Metua.+ 14 Te papai nei au ia outou te mau metua tane, no te mea ua ite outou o vai Iesu mai te omuaraa mai â. Te papai nei au ia outou te mau tane apî, no te mea mea puai outou+ e te vai noa ra te parau a te Atua i roto i to outou aau+ e ua upootia outou i nia i te varua ino.+

15 Eiaha e nounou i teie nei ao e te mau mea a teie nei ao.+ Te taata e nounou i teie nei ao, aita ïa o ˈna e here ra i te Metua.+ 16 Te mau mea atoa hoi a teie nei ao, oia hoi te hinaaro tia ore o te tino+ e te hinaaro tia ore o te mata+ e te faaiteiteraa i ta ˈna mau faufaa,* e ere ïa no ǒ mai i te Metua ra, no ǒ mai râ i teie nei ao. 17 Fatata atoa teie nei ao i te mou e ta to te ao atoa e hinaaro ra.+ Area te taata e rave i te hinaaro o te Atua, e vai noa mai ïa e a muri noa ˈtu.+

18 Ta ˈu mau tamarii here, o te hora hopea teie. Ua faaroo outou e te haere mai nei te taata patoi i te Mesia,*+ e inaha mea rahi te taata patoi i te Mesia tei tia mai,+ mea na reira tatou i ite ai e o te hora hopea teie. 19 Ua faarue mai ratou ia tatou nei, no te mea e ere ratou mai ia tatou.+ Ahani ratou mai ia tatou, e faaea mai ïa ratou ia tatou nei. Ua faarue mai râ ratou ia itehia e e ere pauroa mai ia tatou.+ 20 Ua faatavaihia outou e te Atua moˈa,+ e ua ite outou pauroa i te parau mau. 21 Te papai nei au ia outou, e ere no te mea aita outou i ite i te parau mau,+ no te mea râ ua ite outou i te reira, e no te mea aita e haavare no roto mai i te parau mau.+

22 O vai te haavare? E ere anei o te taata e parau ra e e ere Iesu te Mesia?+ Tera te patoi i te Mesia,+ te taata aita e tiaturi ra i te Metua e i te Tamaiti. 23 Te taata aita e tiaturi ra i te Tamaiti, eita e farii-maitai-hia e te Metua.+ Area te taata e tiaturi ra i te Tamaiti,+ e farii-maitai-hia e te Metua.+ 24 Outou râ, ia vai maite ïa ta outou i faaroo mai te omuaraa mai â i roto i to outou aau e tia ˈi.+ Ia vai maite ta outou i faaroo mai te omuaraa mai â i roto i to outou aau, e hoê noa atoa ïa outou e te Tamaiti e te Metua. 25 Teie hoi ta ˈna* iho i fafau mai ia tatou: te ora mure ore.+

26 Te papai nei au i teie mau parau ia outou no nia i te feia e tamata nei i te haavare ia outou. 27 Area outou, ua faatavaihia ïa e te Atua i to ˈna varua moˈa+ e e vai noa taua varua moˈa ra i roto ia outou. Aita e faufaa ia haapii vetahi ê ia outou, na te Atua hoi e haapii nei ia outou i te mau mea atoa na roto i te varua moˈa,+ e parau mau te reira e e ere i te haavare. Ia hoê noa ïa outou e o ˈna mai tei haapiihia ia outou.+ 28 No reira i teie nei, ta ˈu mau tamarii here, ia hoê noa outou e o ˈna, ia paraparau hoi tatou ma te mǎtaˈu ore ia faaitehia mai o ˈna,+ e ia ore tatou e atea ê ia ˈna ma te haama i te tau o to ˈna hoˈiraa mai.* 29 Ua ite anaˈe outou e mea parau-tia oia,* ua ite atoa ïa outou e e tamarii na ˈna*+ te taata atoa e rave i te parau-tia.

3 A hiˈo na i te here rahi o te Metua ia tatou+ i parauhia ˈi tatou e tamarii na te Atua.+ E tamarii iho â tatou na ˈna. No reira i ore ai to teie nei ao i ite o vai tatou,+ no te mea aita ratou i ite o vai te Atua.+ 2 Taeae here ma, e tamarii tatou na te Atua+ i teie nei. Teie râ, aita â i faaitehia mai atura mai te aha tatou a muri aˈe.+ Ta tatou i ite, e riro tatou mai ia ˈna ia faaitehia mai o ˈna, no te mea e ite roa ˈtu tatou ia ˈna. 3 Te taata tera to ˈna tiaturiraa tei niuhia i nia ia ˈna, e tamâ ïa ia ˈna iho,+ mea viivii ore hoi o ˈna.

4 Te taata e rave i te hara, te ofati atoa nei ïa i te ture a te Atua, e e hara ia ofati i te ture a te Atua. 5 Ua ite atoa outou e ua haere mai Iesu no te faaore i ta tatou mau hara,+ e aita e hara i roto ia ˈna. 6 Te taata e hoê noa e o ˈna, eita ïa e rave i te hara.+ Te taata e rave i te hara, aita ïa i ite o vai o ˈna e aita atoa e tiaturi ra ia ˈna. 7 Ta ˈu mau tamarii here, eiaha outou e vare i te taata. O te rave i te parau-tia, e taata parau-tia ïa, mai ia Iesu mea parau-tia oia. 8 Te taata e rave i te hara, no te Diabolo ïa o ˈna, no te mea mai te haamataraa mai â i hara noa ˈi te Diabolo.+ Te tumu i haere mai ai te Tamaiti a te Atua, no te faaore* i te mau ohipa a te Diabolo.+

9 Te taata e tamarii na te Atua, eita e rave i te hara,+ no te mea e vai noa te varua moˈa* o te Atua i roto ia ˈna, e eita ta ˈna e nehenehe e rave i te hara, e tamarii hoi o ˈna na te Atua.+ 10 I teie e itehia ˈi te mau tamarii a te Atua e te mau tamarii a te Diabolo: Te taata aita e rave ra i te parau-tia, e ere ïa o ˈna no te Atua, oia atoa te taata aita e here ra i to ˈna taeae.+ 11 Teie hoi te poroi ta outou i faaroo mai te omuaraa mai â, ia here tatou te tahi i te tahi,+ 12 eiaha mai ia Kaina, no te varua ino o ˈna e ua taparahi pohe i to ˈna teina.+ E no te aha o ˈna i taparahi pohe ai i to ˈna teina? No te mea e ohipa ino ta ˈna.+ Area ta to ˈna teina, e ohipa parau-tia ïa.+

13 Eiaha e maere, taeae ma, ia hae teie nei ao ia outou.+ 14 Ua ite tatou e ua haere mai tatou mai te pohe mai i te ora,+ no te mea te here ra tatou i te mau taeae.+ Te taata aita e here ra i to ˈna mau taeae, mai te huru ra ïa e ua pohe o ˈna.+ 15 Te taata mea hae na ˈna i to ˈna taeae, e taparahi taata ïa,+ e ua ite outou e aita e ora mure ore to te taparahi taata.+ 16 Ua ite tatou eaha te here, no te mea ua horoa Iesu i to ˈna ora* no tatou,+ e ia horoa atoa ïa tatou i to tatou ora* no to tatou mau taeae e tia ˈi.+ 17 Te taata râ e taoˈa ta ˈna, o te ite atu i to ˈna taeae i roto i te fifi, eita râ e faaite atu i te aumihi, e nehenehe anei ïa tatou e parau e te here ra o ˈna i te Atua?+ 18 Ta ˈu mau tamarii here, ia here tatou, eiaha ïa ei parau noa,+ ei here ohipa+ râ e te parau mau.+

19 Mea na reira ïa tatou e ite ai e no te parau mau tatou, e e tiaturi tatou i roto* i to tatou aau e mea here na te Atua ia tatou. 20 Ia faahapa noa mai hoi to tatou aau ia tatou, e haamanaˈo anaˈe e mea rahi aˈe te Atua i to tatou aau e ua ite o ˈna i te mau mea atoa.+ 21 Taeae here ma, ia ore to tatou aau e faahapa mai ia tatou, e nehenehe tatou e paraparau roa ˈtu i te Atua.+ 22 E noa ˈtu eaha ta tatou e ani ia ˈna, e horoa mai iho â o ˈna,+ no te mea te haapao nei tatou i ta ˈna mau faaueraa e te rave nei i te mau mea e mauruuru ai o ˈna. 23 Teie hoi ta ˈna faaueraa: ia tiaturi tatou i te iˈoa o ta ˈna Tamaiti o Iesu Mesia,+ e ia here tatou te tahi i te tahi,+ mai ta ˈna i faaue mai. 24 E te taata o te haapao ra i ta te Atua mau faaueraa, e hoê noa ïa e o ˈna, a hoê noa ˈi te Atua e taua taata ra.+ Maoti te varua moˈa ta ˈna i horoa mai i ite ai tatou e e hoê noa o ˈna e o tatou.+

4 Taeae here ma, eiaha e tiaturi i te mau parau tohu* atoa,+ a hiˈopoa râ i te mau parau tohu* ia ite outou e no ǒ mai anei i te Atua ra,+ no te mea e rave rahi te peropheta haavare tei haere atu i roto i teie nei ao.+

2 I teie e ite ai outou e no ǒ mai te parau tohu i te Atua ra: Te mau parau tohu atoa o te faaite ra e ua haere mai Iesu Mesia ei taata, no ǒ mai ïa i te Atua ra.+ 3 Area te mau parau tohu atoa e na ô ra e aita Iesu i haere mai ei taata, e ere ïa no ǒ mai i te Atua ra.+ Na te taata patoi i te Mesia* hoi teie parau ta outou i faaroo e e parau o ˈna,+ e i teie nei, te parauhia ra te reira na te ao nei.+

4 No te Atua outou ta ˈu mau tamarii here, e ua upootia outou i nia i te mau peropheta haavare,+ no te mea mea puai aˈe te Atua tei hoê e o outou,+ i te Diabolo tei hoê e to teie nei ao.+ 5 No teie nei ao ratou,+ no reira ratou e parau ai i te mau mea no teie nei ao e e faaroo to teie nei ao ia ratou.+ 6 No te Atua tatou. Te taata tei ite o vai te Atua, e faaroo mai ïa ia tatou.+ Te taata e ere o ˈna no te Atua, e ore ïa e faaroo mai.+ Mea na reira ïa tatou e ite ai e e parau tohu mau tera aore ra e parau tohu haavare.+

7 Taeae here ma, e here noa anaˈe te tahi i te tahi,+ no ǒ mai hoi te here i te Atua ra, e o tei here ra, e tamarii ïa na te Atua e ua ite oia o vai te Atua.+ 8 Tei ore e here ra, aita ïa i ite o vai te Atua, no te mea e here te Atua.+ 9 I teie i faaitehia mai ai te here o te Atua ia tatou: ua tono mai te Atua i ta ˈna Tamaiti otahi+ i te ao nei ia noaa ia tatou te ora na roto ia ˈna.+ 10 Teie te here o te Atua, e ere o tatou tei here i te Atua, o ˈna râ tei here mai ia tatou e tei tono mai i ta ˈna Tamaiti ei tusia faahau*+ no ta tatou mau hara.+

11 Taeae here ma, i te mea e ua here te Atua ia tatou mai te reira te huru, ia here atoa ïa tatou te tahi i te tahi e tia ˈi.+ 12 Aita roa e taata i ite i te Atua.+ Ia here noa tatou te tahi i te tahi, e vai noa ïa te Atua ia tatou ra e e ite-maitai-hia e te here mau ra tatou ia ˈna.+ 13 I teie e ite ai tatou e mea hoê noa tatou e o ˈna e mea hoê o ˈna e o tatou: ua horoa mai oia i to ˈna varua ia tatou nei. 14 Ua ite roa matou e te faaite atoa ˈtu nei e ua tono mai te Metua i ta ˈna Tamaiti ei Faaora i to te ao nei.+ 15 Te taata e tiaturi ra e e Tamaiti Iesu na te Atua,+ mea hoê noa ïa te Atua e o ˈna e mea hoê o ˈna e te Atua.+ 16 Ua ite hoi tatou e mea here na te Atua ia tatou e ua papu ia tatou te reira.+

E here te Atua,+ e te taata e here noa ra, mea hoê noa ïa o ˈna e te Atua e mea hoê noa te Atua e o ˈna.+ 17 Mea na reira ïa e ite-maitai-hia ˈi to tatou here mau, ia nehenehe tatou e paraparau ma te mǎtaˈu ore*+ i te Atua ia tae i te mahana haavaraa, no te mea mai ia Iesu Mesia ra tatou i roto i teie nei ao. 18 Aita e mǎtaˈu i roto i te here,+ e tiavaru râ te here mau i te mǎtaˈu,* no te mea e haafifi te mǎtaˈu ia tatou. Te taata hoi e mǎtaˈu ra, aita ïa e here mau ra.+ 19 Te here nei tatou, no te mea o ˈna na mua tei here mai ia tatou.+

20 Ia parau te hoê taata: “Te here nei au i te Atua,” mea hae râ na ˈna i to ˈna taeae, e haavare ïa.+ Te taata aita e here ra i to ˈna taeae+ ta ˈna e ite ra, eita ïa ta ˈna e nehenehe e here i te Atua ta ˈna e ore e ite ra.+ 21 Teie te faaueraa ta te Atua i horoa mai, te taata e here ra i te Atua, ia here atoa ïa i to ˈna taeae e tia ˈi.+

5 Te taata atoa e tiaturi ra e o Iesu te Mesia, e tamarii ïa na te Atua,+ e te taata atoa e here ra i te Atua, te here atoa ra ïa i te mau tamarii a te Atua. 2 Ia here tatou i te Atua e ia rave tatou i ta ˈna mau faaueraa e ite ai tatou e te here ra tatou i te mau tamarii a te Atua.+ 3 Teie hoi te here i te Atua, ia haapao tatou i ta ˈna mau faaueraa.+ E ere ta ˈna mau faaueraa i te mea teimaha,+ 4 no te mea e upootia te tamarii atoa a te Atua i nia i teie nei ao.+ Teie hoi te mea e nehenehe ai tatou e upootia i nia i teie nei ao, to tatou ïa faaroo.+

5 O vai te nehenehe e upootia i nia i teie nei ao?+ Te taata ïa e tiaturi ra e o Iesu te Tamaiti a te Atua, e ere anei?+ 6 O Iesu Mesia tei haere mai ma te pape e te toto, eiaha râ te pape anaˈe,+ te pape e te toto atoa râ.+ E te haapapu ra te varua moˈa i te reira,+ no te mea e parau mau ta te varua moˈa. 7 E toru mea o te faaite ra i te parau mau no nia ia Iesu: 8 te varua moˈa+ e te pape+ e te toto.+ Hoê â faaiteraa ta teie na mea e toru.

9 Ia farii tatou i te faaiteraa a te taata, hau atu â ïa i te faaiteraa a te Atua. No te mea na te Atua iho e faaite ra i te parau no nia i ta ˈna Tamaiti. 10 Te taata e tiaturi ra i te Tamaiti a te Atua, to roto ïa te faaiteraa a te Atua i to ˈna aau. Te taata aita e tiaturi ra i te Atua, te faariro ra ïa i te Atua ei haavare,+ no te mea aita o ˈna e tiaturi ra i te parau ta te Atua i faaite no nia i ta ˈna Tamaiti. 11 E teie te parau ta te Atua i faaite, ua horoa mai o ˈna i te ora mure ore,+ e e mana to ta ˈna Tamaiti e horoa i teie ora.+ 12 Te taata e farii ra i te Tamaiti, e fanaˈo ïa i teie ora. Te taata aita e farii ra i te Tamaiti a te Atua, eita ïa e fanaˈo i teie ora.+

13 Te papai nei au i teie mau parau ia ite outou e e fanaˈo outou i te ora mure ore,+ outou tei faatupu i te faaroo i te iˈoa o te Tamaiti a te Atua.+ 14 E teie ta tatou e tiaturi ra i te Atua,+ noa ˈtu eaha ta tatou e ani ia au i to ˈna hinaaro, e faaroo mai o ˈna.+ 15 E i te mea e ua ite tatou e e faaroo mai o ˈna noa ˈtu eaha ta tatou e ani ra, ua papu ïa ia tatou e e noaa mai iho â ta tatou e ani ra, i te mea ua ani atu tatou ia ˈna.+

16 Ia ite te hoê taata i to ˈna taeae i te raveraa i te hoê hara e ere o te pohe te utua, ia pure ïa o ˈna no to ˈna taeae e tia ˈi, e na te Atua e horoa ˈtu i te ora,+ oia hoi i te feia aita i rave i te hara o te pohe te utua.+ Te vai ra râ te tahi hara o te pohe te utua. E ere no taua hara ra e faaue atu ai au ia pure. 17 E hara te mau ohipa parau-tia ore atoa,+ e te vai ra râ te hoê hara e ere o te pohe te utua.

18 Ua ite tatou eita te taata e tamarii na te Atua e rave i te hara, na te Tamaiti râ a te Atua e tiai mai ia ˈna, e aita e mana to te varua ino i nia ia ˈna.+ 19 Ua ite tatou e no te Atua tatou, te vai nei râ to te ao atoa i raro aˈe i te mana o te varua ino.+ 20 Ua ite râ tatou e ua haere mai te Tamaiti a te Atua+ e ua horoa mai i te maramarama* ia ite tatou o vai te Atua mau. E maoti ta ˈna Tamaiti ra o Iesu Mesia e hoê ai tatou e te Atua mau.+ Teie te Atua mau e te ora mure ore.+ 21 Ta ˈu mau tamarii here, a ara i te mau idolo.+