TE PITI O TE RATA A PETERO

1 O Simona Petero, e tavini e e aposetolo na Iesu Mesia, i te feia i noaa ia ratou te hoê faaroo faufaa rahi mai to matou, na roto i te parau-tia a to tatou Atua e i ta te Faaora o Iesu Mesia:

2 Ei ia outou te hamani maitai rahi e te hau e ia rahi atu â na roto i te ite papu+ i te Atua e i to tatou Fatu ra o Iesu, 3 no te mana o te Atua i noaa mai ai te mau mea atoa e ora ˈi tatou ma te haamori i te Atua anaˈe na roto i te ite papu ia ˈna, o tei titau manihini ia tatou+ na roto i to ˈna iho hanahana e huru maitai roa. 4 Na roto i teie na mea i horoa noa mai ai oia i te mau parau fafau faufaa rahi e te faahiahia mau,+ ia riro hoi outou ei varua mai ia ˈna+ ma te haapae i te mau peu viivii a teie nei ao ta te mau hinaaro tia ore* e faatupu.

5 No reira, a tutava maite+ i te apiti i to outou faaroo te huru maitai roa,+ i to outou huru maitai roa te ite,+ 6 i to outou ite te haavîraa ia outou iho, i to outou haavîraa ia outou iho+ te faaoromai tamau, i to outou faaoromai tamau te haamoriraa i te Atua anaˈe,+ 7 i ta outou haamoriraa i te Atua anaˈe te here i te mau taeae, i to outou here i te mau taeae te here.+ 8 Mai te peu e te vai ra teie mau huru maitatai i roto ia outou e ia rahi atu â, eita ïa outou e faatau,+ e nuu râ outou i mua i te faaohiparaa i te ite papu i to tatou Fatu ra o Iesu Mesia.

9 Te taata hoi e ere ra i teie mau huru maitatai, e matapo ïa, te tapo nei oia i to ˈna mata i te maramarama,+ e ua moˈe ia ˈna e ua tamâhia oia i ta ˈna mau hara+ tahito. 10 No reira taeae ma, a tutava ˈtu â ia mau papu ia outou to outou titau-manihini-raahia+ e maitiraahia. Ia na reira noa hoi outou, eita roa ˈtu ïa outou e faarue i te faaroo.+ 11 Ia na reira hoi outou, e haamaitai-rahi-hia outou a ô atu ai i roto i te Faatereraa arii mure ore a*+ to tatou Fatu e Faaora ra o Iesu Mesia.+

12 No reira, e hinaaro noa vau e haamanaˈo ia outou i teie mau parau, noa ˈtu e ua ite outou i te reira e ua mau papu i roto i te parau mau e vai ra ia outou ra. 13 Mea tano râ i to ˈu manaˈo, a ora noa ˈi au i roto i teie nei tiahapa,*+ ia haamanaˈo noa ˈtu vau ia outou i teie mau parau,+ 14 ua ite hoi au e fatata vau i te vaiiho i to ˈu tiahapa, mai ta to tatou Fatu ra o Iesu Mesia i haapapu atoa ia ˈu.+ 15 E imi noa vau i te mau ravea atoa ia haamanaˈo noa outou iho i teie mau parau ua reva anaˈe au.

16 E ere mea na roto i te mau aai a te taata i faaite ai matou ia outou i te puai o to tatou Fatu ra o Iesu Mesia e te tau o to ˈna hoˈiraa mai,* ua ite mata roa râ matou i to ˈna hanahana.+ 17 Ua noaa hoi ia ˈna te tura e te hanahana no ǒ mai i te Atua te Metua, i to te Atua hanahana* parauraa ˈtu ia ˈna i teie mau parau: “O ta ˈu Tamaiti teie, tei herehia e au, ta ˈu iho i mauruuru roa.”+ 18 Oia mau, ua faaroo matou i teie mau parau no te raˈi mai i to matou tiaraa e o ˈna i nia i te mouˈa moˈa.

19 No reira, ua papu roa ˈtu â ia tatou te parau a te mau peropheta, e ua tano outou i te haapao maitai i te reira mai te hoê lamepa+ i te hoê vahi poiri (e aahiata noa ˈtu e a hiti mai ai te hoê fetia poipoi)+ i roto i to outou aau. 20 Ua ite hoi outou i teie parau faufaa: aita hoê aˈe parau tohu i roto i te mau Papai i niuhia i nia i te manaˈo taata. 21 E ere hoi na te hinaaro o te taata i hopoi mai i te parau tohu,+ ua faahiti râ te taata i te mau parau no ǒ mai i te Atua a arataihia ˈi* ratou e te varua moˈa.+

2 Tera râ, i tia atoa mai na te mau peropheta haavare i rotopu i te nunaa Iseraela, e tia atoa mai ïa te mau orometua haavare i rotopu ia outou.+ E haamau omoˈe ratou i te mau pǔpǔ faaroo amaha o te tuino i to outou faaroo, e e faarue atoa ratou i te fatu tei hoo mai ia ratou,+ a faatae oioi mai ai i te haamouraa i nia ia ratou. 2 E mea rahi te pee i ta ratou mau peu faufau,*+ e no ratou e faainohia ˈi te eˈa o te parau mau.+ 3 E no to ratou nounou e faahema ˈi ratou ia outou na roto i te mau parau haavarevare ia apîhia ratou. Eita râ to ratou haavaraa, tei faaoti-aˈena-hia,+ e haamaoro, e e tae mai iho â to ratou haamouraa.+

4 Oia mau, ua faautua te Atua i te mau melahi tei rave i te hara+ e ua huri ia ratou i roto i Taretaruso,*+ a taamu atu ai ia ratou i roto i te poiri* taˈotaˈo, a faataa ˈtu ai no te haavaraa.+ 5 E ua faautua oia i te hoê ao i tahito ra,+ ua faaora râ ia Noa taata poro i te parau-tia+ e e hitu â taata+ i to ˈna hopoiraa mai i te diluvi i nia i te hoê ao taata faatura ore i te Atua.+ 6 E ua faautua atoa oia i na oire o Sodoma e o Gomora ma te faariro atu ei rehu,+ a riro atu ai te reira ei faaararaa i te mau taata faatura ore i te Atua no a muri aˈe.+ 7 E ua faaora oia ia Lota taata parau-tia,+ tei mauiui roa no te mau peu faufau a* te feia ofati ture. 8 (I mauiui roa na hoi taua taata parau-tia ra i tera e tera mahana no te mau ohipa ino ta ˈna i ite e i faaroo a ora ˈi oia i rotopu ia ratou.) 9 No reira, ua ite Iehova* i te faaora i te feia e haamori ra ia ˈna anaˈe i te mau ati,+ i te faataa râ i te feia parau-tia ore ia haamouhia* i te mahana haavaraa,+ 10 te feia iho â râ e imi ra i te haaviivii i te tino o vetahi ê,+ e vahavaha atoa ra i te mana faatere.*+

Ma te taiâ ore e te faatietie, aita ratou e mǎtaˈu ra i te faaino i te feia hanahana o te Atua, 11 area te mau melahi tei hau aˈe i te puai e te mana, aita ïa e pari faaino ra i te mau orometua haavare no to ratou faatura* ia Iehova.*+ 12 Area teie mau tane, te faaino nei ïa i te mau mea aita ratou i ite. E haamouhia ratou no to ratou iho haerea ino, mai te mau animara aita e feruriraa+ o te fanauhia ia haruhia e ia haapohehia, 13 e hamani-ino-hia ratou ei utua no ta ratou iho ohipa ino.

Mea au na ratou e haamâha i to ratou mau hinaaro o te tino,*+ oia atoa i te ao. E tafetafeta ratou o te au roa i te haavare i te taata i te mau haapiiraa hape a tamaa ˈi e o ratou atoa.+ 14 Ua î to ratou mata i te faaturi+ e eita ratou e fiu i te rave i te hara, e te faahema ra i te feia* paruparu. Ua matau to ratou aau i te nounou i ta vera ma. E tamarii faautuahia ratou e te Atua. 15 A faarue ai ratou i te eˈa maitai, ua atea ê ratou. Ua pee ratou i te eˈa o Balaama+ te tamaiti a Beora, o tei nounou i te moni o te ohipa ino,+ 16 ua faaitehia râ ta ˈna hapa no to ˈna ofatiraa i te mea tia.+ Ua tamata te hoê asini paraparau ore o tei paraparau ma te reo taata i te tapea i te peropheta ia ore ia rave i te ohipa ino.+

17 E apoo pape ore teie mau tane e e rupehu turaihia e te vero puai, e o te poiri taˈotaˈo tei faataahia no ratou.+ 18 Te parau ra ratou i te mau parau faatietie faufaa ore. Ma te faaara i te mau hinaaro tia ore o te tino+ e ma te mau peu faufau,* te faahema ra ratou i te mau taata no faataa ê noa mai ra ia ratou, i te feia e ora ra i roto i te haavare.+ 19 A fafau atu ai ratou i te tiamâraa, e tîtî ratou iho no te mau ohipa viivii.+ O tei faaterehia hoi e te tahi atu, e tîtî ïa oia no taua taata ra.*+ 20 Te feia hoi o tei faataa ê mai ia ratou i te mau mea viivii a teie nei ao+ maoti te ite papu i te Fatu e Faaora ra o Iesu Mesia, e ua rave faahou i taua mau mea ra, a faaterehia ˈtu ai e te reira, mea ino roa ˈtu ïa to ratou hopea nei i to na mua ˈtu.+ 21 Mea maitai aˈe hoi ahiri aita ratou i ite papu i te eˈa o te parau-tia, i te ite-papu-raa i te reira a fariu ê atu ai i te faaueraa moˈa i horoahia ia ratou.+ 22 Ua tano maitai ïa no ratou teie parau paari: “Ua hoˈi te urî e amu i ta ˈna i pihaˈe, e te maiaa puaa i mâ e taaviriviri i roto i te vari.”+

3 Taeae here ma, teie te piti o te rata ta ˈu e papai atu nei ia outou. I roto i teie rata mai ta ˈu rata matamua, te faaaraara nei au i to outou haroˈaroˈa ma te haamanaˈo atu i te tahi mau parau,+ 2 ia haamanaˈo hoi outou i te mau parau i parauhia i mutaa iho* e te mau peropheta moˈa, e te faaueraa ta te Fatu e Faaora i horoa na roto i ta outou mau aposetolo. 3 Na mua roa, ua ite outou e i te mau mahana hopea e tia mai te feia faaooo e ta ratou mau parau faaooo, a rave ai i to ratou iho mau hinaaro+ 4 e a na ô ai: “Teihea ˈtura te tau o to ˈna hoˈiraa mai* i fafauhia?+ Mai te mahana i taoto ai to tatou mau tupuna i roto i te pohe, te vai noa nei â te mau mea atoa, te huru â te huru, mai te omuaraa mai â i to te Atua poieteraa i te taata.”+

5 Aita hoi ratou e hinaaro ra e haamanaˈo e i vai na i mutaa iho te mau raˈi e te hoê fenua tei maraa mai no raro mai i te pape e e pape to nia ˈˈe maoti te poroi a te Atua.+ 6 E i teie mau mea i mou ai te ao o taua tau ra i te diluviraahia te reira.+ 7 Tera râ, maoti taua noa parau ra i faataahia ˈi te mau raˈi e te fenua e vai nei no te auahi e i tapeahia ˈi e tae roa i te mahana haavaraa e haamouraa o te feia faatura ore i te Atua.+

8 Tera râ, eiaha ia moˈe ia outou, taeae here ma, no Iehova* hoê mahana hoê ïa tausani matahiti, e hoê tausani matahiti hoê ïa mahana.+ 9 E ere Iehova* i te mea taere i te faatupu i ta ˈna parau fafau+ mai ta vetahi e manaˈo ra, mea faaoromai râ oia ia outou, no te mea aita oia e hinaaro ra ia haamouhia te hoê, te hinaaro nei râ ia noaa i te taata atoa te tatarahapa.+ 10 Tera râ, e tae mai to Iehova* mahana+ mai te eiâ ra,+ i reira te mau raˈi e mou ai+ ma te haruru rahi, area te mau mea o te raˈi e te fenua, e pau ïa, e te fenua e te mau ohipa i nia iho, e faaite-roa-hia mai ïa.+

11 I te mea e e pau teie mau mea atoa mai teie te huru, a feruri ïa i teihea huru taata e titauhia ˈi ia riro outou. Ei taata haerea moˈa ïa e o te rave i te mau ohipa tei au i te haamoriraa i te Atua anaˈe, 12 a tiai noa ˈi e a haamanaˈo noa ˈi* i te taeraa mai o te mahana o Iehova,*+ i reira e mou ai te mau raˈi+ i te auahi e e tahe ai te raˈi e te fenua i te âhu rahi! 13 Te tiai nei râ tatou i te raˈi apî e te fenua apî ia au i ta ˈna i fafau,+ e i reira e vai noa ˈi te parau-tia.+

14 No reira, taeae here ma, i te mea e te tiai nei outou i teie mau mea, a imi i te mau ravea atoa a itehia ˈtu ai outou e te Atua i roto i te hau+ ma te viivii ore e te hapa ore. 15 Hau atu â, a hiˈo i te faaoromai o to tatou Fatu ei faaoraraa, mai ta Paulo atoa to tatou taeae here i papai ia outou ia au i te paari i horoahia mai ia ˈna,+ 16 i te faahitiraa i teie mau mea mai ta ˈna i na reira i roto i ta ˈna mau rata atoa. Tera râ, mea fifi ia taa i te tahi mau parau i roto i taua mau rata ra, e te taviri nei te feia ite ore* e te paruparu i taua mau parau ra e te toea atoa o te mau Papai, e e mou ratou.

17 No reira, outou taeae here ma, ua ite ê na outou i teie mau mea, a haapao maitai ïa ia ore outou ia hema i te haavare a te feia ofati ture e ia ore outou iho ia paruparu.+ 18 Tera râ, ia fanaˈo atu â outou i te hamani maitai rahi e te ite i to tatou Fatu e Faaora ra o Iesu Mesia. Ei ia ˈna te hanahana i teie nei e a muri noa ˈtu. Amene.