TE RATA MATAMUA A PETERO

1 O Petero, e aposetolo+ na Iesu Mesia, i te feia e purutia ra e tei purara ê na Ponoto, Galatia, Kapadokia,+ Asia e Bitunia, tei maitihia 2 ia au i ta te Atua te Metua i opua ê na,+ ia moˈa outou i te varua moˈa,*+ ia nehenehe outou e faaroo e e pîpîhia i te toto o Iesu Mesia:+

Ei ia outou te hamani maitai rahi e te hau e ia rahi atu â.

3 Ia aruehia te Atua e te Metua o to tatou Fatu ra o Iesu Mesia, no to ˈna hoi aroha hamani maitai ua faafanau faahou oia ia tatou+ no te hoê tiaturiraa mure ore+ na roto i te tia-faahou-raa o Iesu Mesia mai te pohe mai,+ 4 no te hoê haamaitairaa ino ore e te viivii ore e te mure ore.+ Ua faahereherehia te reira i te raˈi no outou,+ 5 o te paruruhia ra e te mana o te Atua na roto i te faaroo no te hoê faaoraraa o te faaitehia i te anotau hopea. 6 No teie mau mea atoa outou e oaoa rahi ai, noa ˈtu i teie taime e mea titauhia ia oto outou maa taime no te mau ati e rave rau,+ 7 ia noaa hoi ia outou te arueraa e te hanahana e te tura ia faaitehia mai o Iesu Mesia,+ maoti to outou faaroo tamatahia+ tei rahi aˈe te faufaa i te auro o te pau, noa ˈtu e ua tamatahia i te auahi. 8 Noa ˈtu e aita outou i ite aˈenei ia ˈna, te here ra outou ia ˈna. Noa ˈtu e aita outou e ite ra ia ˈna i teie nei, te faatupu ra outou i te faaroo ia ˈna e te oaoa rahi nei outou e te oaoa roa nei, 9 a noaa ˈi ia outou te fa o to outou faaroo, to outou* faaoraraa.+

10 No nia i teie faaoraraa, ua hiˈopoa tamau e ua maimi maite te mau peropheta tei tohu no nia i te hamani maitai rahi ta outou e fanaˈo.+ 11 Ua maimi maite noa ratou eaha te tupu e eaha te tau e tupu ai te mau mea no nia i te Mesia,+ ta te varua moˈa e vai ra i roto ia ratou e faaite ra, no te mea ua haapapu atea te varua moˈa e e mauiui te Mesia+ e e noaa ia ˈna te hanahana a muri aˈe. 12 Ua faaitehia ia ratou e te tavini ra ratou eiaha ia ratou iho, ia outou râ, no nia i te mau mea tei faaitehia ˈtu ia outou e te feia tei poro atu i te parau apî oaoa maoti te varua moˈa no te raˈi mai.+ O teie hoi mau mea ta te mau melahi e hinaaro roa ra e taa.

13 Ei manaˈo puai ïa to outou,+ a rave i te mau mea atoa ma te feruriraa maitai,+ e a tiai i te mea maitai na roto i te hamani maitai rahi o te horoahia ˈtu ia faaitehia mai o Iesu Mesia. 14 Mai te mau tamarii faaroo, a faaea i te haa ia au i to outou mau hinaaro ino na mua ˈˈe a ore ai outou i ite i te Atua, 15 tera râ, mai te Atua Moˈa tei titau manihini ia outou, ia moˈa outou i roto i to outou haerea atoa,+ 16 ua papaihia hoi: “Ia moˈa outou, no te mea mea moˈa vau.”+

17 E mai te peu e te tiaoro nei outou i te Metua o te haava ma te maitiiti ore i te taata+ ia au i te ohipa a te taata tataitahi, ei haerea to outou tei au i te mǎtaˈu i te Atua+ a purutia ˈi outou i roto i teie nei ao. 18 Ua ite hoi outou e e ere na te mau mea e ino noa, na te ario aore ra te auro, i faatiamâ mai* ia outou+ i to outou huru oraraa faufaa ore no ǒ mai i to outou mau tupuna.* 19 Tera râ, na te toto faufaa roa,+ mai to te arenio* ino ore e te viivii ore,+ te toto o te Mesia.+ 20 Parau mau, ua maiti-aˈena-hia oia hou te omuaraa o teie nei ao,+ ua faaitehia mai râ oia i te anotau hopea no outou.+ 21 Na roto ia ˈna i tiaturi ai outou i te Atua,+ o tei faatia mai ia ˈna mai te pohe mai+ e tei horoa ˈtu i te hanahana,+ ia faatupu hoi outou i te faaroo i te Atua e ia tiai ia ˈna.

22 I teie nei, e ua tamâ outou ia outou iho* no to outou faaroo i te parau mau, a here atu ai i te mau taeae+ ma te haavarevare ore, a here rahi ïa te tahi i te tahi ma to outou aau atoa.+ 23 Ua faafanau-faahou-hia hoi outou,+ eiaha i te huero* tahuti, i te huero tahuti ore râ,+ na roto i te parau a te Atua ora e te mure ore.+ 24 Inaha, “mai te aihere te mau taata atoa,* e to ratou unauna mai te tiare o te fenua ïa o taua aihere ra. E mǎrô te aihere, e e topa te tiare, 25 area te parau a Iehova,* e vai ïa e a muri noa ˈtu.”+ E teie “parau,” o te parau apî oaoa ïa tei faaitehia ia outou.+

2 No reira, a haapae i te ino atoa+ e te haavare e te haavarevare e te nounou e te faaino atoa. 2 Mai te mau aiû fanau-apî-hia,+ ia hiaai outou i te û anoi-ore-hia* o te parau a te Atua, ia nehenehe outou e paari mai i te pae varua maoti te reira, a ora ˈtu ai outou,+ 3 ia tamata* râ outou na mua a ite atu ai e mea hamani maitai te Fatu.

4 A faafatata ˈi outou ia ˈna, te hoê ofai ora tei faaruehia e te taata,+ tei maitihia râ e te Atua e mea faufaa roa no ˈna,+ 5 te patuhia nei outou iho mai te mau ofai ora ei fare pae varua+ ia riro outou ei tahuˈa moˈa no te pûpû i te mau tusia pae varua+ e fariihia e te Atua na roto ia Iesu Mesia.+ 6 Te na ô ra hoi te mau Papai: “Inaha, te haamau nei au i Ziona i te hoê ofai maitihia, te hoê ofai tihi* faufaa roa, e eita te taata o te faatupu i te faaroo i te reira e tatarahapa.”*+

7 No outou ïa e mea faufaa roa ˈi oia, no te mea te tiaturi ra outou ia ˈna. Area no te feia aita e tiaturi ra ia ˈna, “te ofai ta te feia patu fare i faarue,+ ua riro mai ïa ei ofai tihi”*+ 8 e “hoê ofai turoriraa e hoê mato hiˈaraa.”+ Te turori nei ratou, no te mea e mea faaroo ore ratou i te parau a te Atua. Tera atoa te hopea e tiai mai ra ia ratou. 9 Outou râ, “e opu maitihia ïa, e autahuˈa arii, e nunaa moˈa,+ e pǔpǔ taata hoohia mai no te Atua,+ ia faaite haere hoi outou i te mau huru maitatai roa”+ o tei titau manihini ia outou mai roto mai i te poiri i to ˈna maramarama faahiahia.+ 10 E ere hoi outou i te hoê nunaa na mua ˈˈe, teie nei râ, e nunaa outou no te Atua.+ Aita outou i arohahia* mai na mua ˈˈe, teie nei râ, ua arohahia* mai ïa.+

11 Taeae here ma, te faaitoito nei au ia outou, te taata ěê e purutia ra,+ ia haapae i te mau hinaaro tia ore o te tino+ e aro ra ia outou.*+ 12 Ei haerea maitai noa to outou i rotopu i te mau nunaa,+ ia pari noa ˈtu hoi ratou ia outou i te ohipa ino, e ite ïa ratou i ta outou mau ohipa maitai roa,+ a faahanahana ˈtu ai i te Atua i te mahana e hiˈopoa ˈi oia i te huitaata.

13 No te Fatu, a auraro i te mau mea atoa ta te taata i hamani,*+ i te hoê arii anei+ tei nia ˈˈe 14 aore ra i te mau tavana ta ˈna i faatoroa no te faautua i te feia ohipa ino, no te haapopou râ i te feia e rave ra i te maitai.+ 15 O te hinaaro hoi o te Atua ia rave outou i te maitai no te haamamû i* te feia maamaa e parau ra i te mau parau faufaa ore.+ 16 Ei feia tiamâ outou+ o te faaohipa i to outou tiamâraa, eiaha no te huna i te ohipa ino,+ no te tavini râ i te Atua.+ 17 A faatura i te mau huru taata atoa,+ a here i te fetii taeae taatoa,+ a mǎtaˈu i te Atua,+ a faatura i te arii.+

18 Ia auraro te mau tavini i to ratou mau fatu ma te mǎtaˈu e au ia ratou,+ eiaha noa i te mau fatu maitai e te mǎrû, i te mau fatu atoa râ eita e mauruuru hanoa. 19 E mauruuru hoi te Atua i te taata o te faaoromai tamau i te ati* e o te mauiui ma te tano ore no to ˈna manaˈo haava i te aro o te Atua.+ 20 Eaha hoi te faufaa ia tairihia outou no to outou hararaa e ia faaoromai noa outou i te reira?+ Tera râ, ia faaoromai noa outou i te mauiui, no te mea te rave ra outou i te maitai, e mauruuru mai ïa te Atua.+

21 Inaha, no teie huru haerea i titau-manihini-hia ˈi outou, no te mea ua mauiui atoa te Mesia no outou,+ a vaiiho mai ai i te hiˈoraa ia pee maite outou i to ˈna mau taahiraa avae.+ 22 Aita oia i rave i te hara,+ aita atoa e haavare i itehia i roto i to ˈna vaha.+ 23 A tuhihia ˈi* oia,+ aita oia i tuhi* atu.+ A mauiui ai oia,+ aita oia i haamǎtaˈu atu, ua tuu râ ia ˈna i roto i te rima o tei haava ma te parau-tia.+ 24 Ua amo oia i ta tatou mau hara+ i roto i to ˈna iho tino i nia i te pou,*+ ia nehenehe tatou e tiamâ mai i te hara e e ora ma te parau-tia. E “maoti to ˈna mau pepe i maitai mai ai outou.”+ 25 Mai te mamoe ra hoi outou tei atea ê,+ i teie nei râ ua hoˈi mai outou i te tiai+ e te tiaau o to outou ora.*

3 Oia atoa outou te mau vahine faaipoipo, a auraro i ta outou iho tane,+ ore noa ˈtu â ratou e faaroo i te parau a te Atua, e nehenehe ratou e taui eiaha maoti te parau, maoti râ te haerea o ta ratou iho vahine,+ 2 no te mea ua ite roa ˈtu ratou i to outou haerea viivii ore+ e to outou faatura rahi. 3 Eiaha ei faanehenehe rapaeau noa to outou, mai te rouru firi e te faaneheneheraa auro+ aore ra te ahu moni rahi, 4 ei faanehenehe râ i te rotoraa o to outou aau, i te faaneheneheraa mou ore o te hau e te mǎrû,+ e faufaa rahi hoi to te reira i te aro o te Atua. 5 Mai te reira hoi te mau vahine moˈa tei tiaturi i te Atua i tahito ra, ia faanehenehe ia ratou, ma te auraro i ta ratou iho tane faaipoipo, 6 mai ia Sara i faaroo ia Aberahama, a pii ai ia ˈna e fatu.+ E ua riro outou ei tamahine na ˈna, ia tamau noa râ outou i te rave i te maitai e ia ore ia riaria i te tahi noa ˈˈe mea.+

7 Oia atoa outou te mau tane faaipoipo, a tamau noa i te parahi e o ratou ma te taa i to ratou huru.* A faatura i te vahine+ mai te hoê farii paruparu aˈe, i te mea e e fatu atoa ratou e o outou+ i te ô horoa noa o te ora. Aita anaˈe, eita ta outou mau pure e faaroohia.

8 E outou paatoa, ia hoê â* to outou manaˈo,+ a faaite ai i te aumauiui, te here i te mau taeae, te aumihi î i te here+ e te haehaa.+ 9 Eiaha e tahoo i te ino i te ino+ aore ra te tuhi i te tuhi.+ A haamaitai atu râ,+ no teie hoi haerea i titau-manihini-hia ˈi outou, ia nehenehe outou e fatu i te hoê haamaitairaa.

10 Inaha, “te taata mea au na ˈna te ora e e hinaaro e ite i te mau mahana oaoa, ia tapea ïa i to ˈna arero ia ore ia parau i te mea ino+ e to ˈna vaha i te parau haavare. 11 Ia fariu ê mai oia i te mea ino+ e ia rave i te mea maitai.+ Ia imi oia i te hau e ia tapi i te reira.+ 12 Tei nia iho hoi te mata o Iehova* i te feia parau-tia, e te faaroo ra to ˈna tariˈa i ta ratou taparuparuraa,+ te patoi nei râ Iehova* i te feia e rave ra i te mau mea ino.”+

13 Oia mau, ia itoito rahi outou i te rave i te mea maitai, o vai hoi o te hamani ino ia outou?+ 14 Ia mauiui noa ˈtu râ outou no te parau-tia, te oaoa ra outou.+ Eiaha râ e riaria i ta ratou e riaria ra,* eiaha atoa e horuhoru.+ 15 I roto râ i to outou aau, a farii e mea moˈa te Mesia e e Fatu oia. Ia ineine noa outou i te paturu i ta outou e tiaturi ra i mua i te taata atoa o te ui mai i te tumu o to outou tiaturiraa, ia na reira râ ma te mǎrû+ e te faatura rahi.+

16 Ei manaˈo haava maitai noa to outou,+ a haama ˈtu ai te feia o te faaino ia outou+ i te mau huru faainoraa atoa no to outou haerea maitai ei pǐpǐ na te Mesia.+ 17 Mea maitai aˈe hoi ia mauiui no te mea te rave ra outou i te maitai,+ mai te peu e tera te hinaaro o te Atua, eiaha râ no te mea te rave ra outou i te ino.+ 18 Ua pohe hoi te Mesia hoê roa poheraa no te mau hara,+ te hoê taata parau-tia no te feia parau-tia ore,+ no te aratai ia outou i te Atua ra.+ Ua haapohehia oia ei taata,+ ua faatiahia mai râ ei varua.+ 19 E ei varua oia i te haereraa e poro i te mau varua i roto i te tapearaa,+ 20 o tei faaroo ore i mutaa ihora a tiai ai te Atua ma te faaoromai i te tau o Noa,+ a hamanihia ˈi te araka,+ i roto i taua araka ra i ora mai ai e vaˈu anaˈe taata* na roto atu i te pape.+

21 E nehenehe e faaauhia tei tupu i taua mau mahana ra i te bapetizoraa o te faaora atoa ia outou i teie nei na roto i te tia-faahou-raa o Iesu Mesia (e ere te bapetizoraa i te tamâraa i te repo o te tino, o te aniraa râ i te Atua i te hoê manaˈo haava maitai).+ 22 Tei te pae atau oia o te Atua,+ ua haere hoi oia i te raˈi, e ua tuuhia i raro aˈe ia ˈna te mau melahi e tei horoahia ˈtu te mana e te puai.+

4 I te mea e i mauiui na te Mesia a ora ˈi ei taata,+ ia ineine atoa outou i te faaite i te hoê â huru feruriraa,* no te mea te taata i mauiui, ua faaea ïa i te rave i te hara,+ 2 ia nehenehe hoi oia e ora i te toea o to ˈna oraraa ei taata, eiaha faahou no te rave i te mau hinaaro o te taata,+ i te hinaaro râ o te Atua.+ 3 Ua ravai hoi te tau i mutaa iho ra i rave ai outou i te hinaaro o te feia o teie nei ao,+ oia hoi te mau peu faufau,* te mau hinaaro vî ore, te inu-hua-raa, te mau arearearaa ahoahoa, te inu faataero e te haamoriraa idolo faufau.+ 4 Te maere ra ratou e aita outou e horo faahou ra e o ratou i taua mau peu hairiiri ra, e no reira, te faaino ra ratou ia outou.+ 5 Tera râ, e faˈi teie mau taata i ta ratou i rave i te Mesia tei ineine i te haava i te feia ora e te feia pohe.+ 6 No reira te parau apî oaoa i faaite-atoa-hia ˈi i te feia pohe,*+ noa ˈtu hoi e te haavahia ra ratou ia au i te raveraa a te taata, e nehenehe râ ratou e ora ma te arataihia e te varua o te Atua.

7 Ua fatata râ te hopea o te mau mea atoa. No reira, ei manaˈo paari to outou,+ e a ara eiaha ia haamoˈe i te pure.+ 8 Ia here rahi iho â râ outou te tahi i te tahi,+ no te mea e tapoˈi te here i te hara e rave rahi.+ 9 A farii maitai te tahi i te tahi ma te mutamuta ore.+ 10 Ua fanaˈo outou tataitahi i te hoê ô, a faaohipa ïa i te reira no te tavini te tahi i te tahi mai te mau tiaau maitai roa tei fanaˈo i te hamani maitai rahi o te Atua i faaitehia na roto i te mau ravea huru rau.+ 11 Ia paraparau te hoê taata, ia na reira oia mai te mea ra e e poroi no ǒ mai i te Atua. Ia tavini te hoê taata, ia na reira oia ma te turui i nia i te puai ta te Atua e horoa,+ a faahanahanahia ˈtu ai te Atua i te mau mea atoa+ na roto ia Iesu Mesia. No ˈna te hanahana e te mana e a muri noa ˈtu. Amene.

12 Taeae here ma, eiaha e maere i te mau ati uˈana e au i te auahi ta outou e faaruru nei,+ mai te mea ra e te roohia ra outou i te tahi mea huru ê. 13 Ia oaoa noa râ outou+ i te mea e te mauiui atoa ra outou mai te Mesia tei mauiui,+ a nehenehe atu ai outou e oaoa roa i te taime atoa e faaitehia mai ai to ˈna hanahana.+ 14 Ia faaino-noa-hia ˈtu* outou no te iˈoa o te Mesia, te oaoa nei outou,+ no te mea tei nia iho ia outou te varua hanahana o te Atua.

15 Tera râ, eiaha te hoê o outou ia fifi ei taparahi taata, ei eiâ, ei taata ohipa ino aore ra ei taata o te faaô i roto i ta vera ma ohipa.+ 16 Ia fifi râ te hoê taata no te mea e Kerisetiano oia, eiaha oia e haama,+ ia tamau noa râ i te faahanahana i te Atua a amo ai oia i teie iˈoa. 17 Teie hoi te tau faataahia no te haavaraa i te utuafare o te Atua na mua.+ I teie nei, mai te peu e o tatou na mua,+ eaha ïa te faahopearaa no te feia aita e faaroo ra i te parau apî oaoa a te Atua?+ 18 “E mai te peu e e ere mea ohie no te taata parau-tia ia faaorahia, eaha ˈtu â ïa no te taata faatura ore i te Atua e te taata rave hara?”+ 19 No reira, te feia e fifi nei i te raveraa i te hinaaro o te Atua, ia tamau noa ïa i te tuu i to ratou ora* i roto i te rima o te Atua poiete haapao maitai, a rave ai i te maitai.+

5 No reira, ei hoa matahiapo tei ite i te mau mauiui o te Mesia e o te apiti i te hanahana e faaitehia mai,+ te faaitoito* nei au i te mau matahiapo i rotopu ia outou: 2 A aupuru i te nǎnǎ a te Atua+ tei tuuhia ˈtu ia outou ma te tavini ei tiaau,* eiaha ma te faahepohia, ma te aau tae râ i mua i te Atua,+ eiaha no te nounou taoˈa,+ ma te hinaaro mau râ, 3 eiaha ma te faatere i te mau taata o te Atua,+ ma te riro râ ei hiˈoraa no te nǎnǎ.+ 4 E ia faaitehia mai te tiai mamoe rahi,+ e fanaˈo outou i te hei upoo hanahana mure ore.+

5 Oia atoa outou te mau tane apî aˈe, a auraro i te mau tane paari aˈe.*+ Ia ahu* râ outou paatoa i te haehaa te tahi e te tahi, no te mea e patoi te Atua i te feia teoteo, e hamani maitai rahi râ oia i te feia haehaa.+

6 No reira, a faahaehaa ia outou iho i raro aˈe i te rima puai o te Atua, ia faateitei oia ia outou i te taime tano,+ 7 a huri ai i to outou mau ahoaho* atoa i nia ia ˈna,+ no te mea te haapeapea mai ra oia no outou.+ 8 A feruri maite, a vai ara!+ Te hahaere nei to outou enemi, te Diabolo, mai te liona uuru e imi nei i te amu i te hoê taata.*+ 9 A patoi râ ia ˈna ma te faaroo puai,+ ua ite hoi outou e tera atoa te mau mauiui ta to outou fetii taeae na te ao nei e faaruru ra.+ 10 I muri iti aˈe râ i to outou mauiuiraa, na te Atua î i te hamani maitai rahi, o tei titau manihini ia outou ia hoê e te Mesia e ia fanaˈo i te hanahana mure ore,+ e faaineine hope roa ia outou. E faaitoito oia ia outou,+ e haapuai oia ia outou,+ e haamau papu oia ia outou. 11 Ei ia ˈna te mana e a muri noa ˈtu. Amene.

12 Na roto ia Siluano,*+ e taeae haapao maitai i to ˈu manaˈo, ua papai poto atu vau no te faaitoito ia outou e no te faaite maitai atu e ua hamani maitai rahi mau â te Atua ia outou. A tapea maite i te reira. 13 Te aroha ˈtu nei te amuiraa i Babulonia, tei maitihia mai ia outou atoa, e o Mareko+ atoa ta ˈu tamaiti. 14 A aroha te tahi i te tahi ma te apa ˈtu ei faaiteraa i te here.

Ei ia outou paatoa te hau, outou tei hoê e te Mesia.