TE RATA I TE MAU HEBERA

1 I mutaa iho, i paraparau na te Atua i to tatou mau tupuna na roto i te mau peropheta e rave rahi taime e na roto i te ravea rau.+ 2 E teie nei, ua hope taua mau mahana ra, ua paraparau oia ia tatou na roto i ta ˈna Tamaiti+ ta ˈna i faafatu i te mau mea atoa,+ e na roto ia ˈna i hamani ai oia i te mau faanahoraa o te ao nei.*+ 3 O ˈna te anaana o to te Atua hanahana+ e te hohoˈa o to te Atua huru mau,+ e maoti ta ˈna parau mana e vai noa ˈi te mau mea atoa. E i muri aˈe i to ˈna tamâraa ia tatou i ta tatou mau hara,+ parahi ihora oia i te rima atau o te Atua teitei i te raˈi.+ 4 Ua hau aˈe ïa o ˈna i te mau melahi,+ i te mea e ua noaa ia ˈna te hoê iˈoa maitai roa ˈˈe i to ratou.+

5 O vai atu â te melahi ta te Atua i parau: “O oe ta ˈu tamaiti. I teie mahana ua riro vau ei metua no oe”?+ Oia atoa: “E riro vau ei metua no ˈna e e riro oia ei tamaiti na ˈu”?+ 6 Ia tono faahou mai râ oia i ta ˈna Tamaiti matahiapo+ i te ao nei,* e parau oia: “Ia tipapa te mau melahi atoa a te Atua i mua ia ˈna.”

7 Teie atoa ta ˈna e parau no nia i te mau melahi: “E faariro oia i ta ˈna mau melahi ei varua, e ta ˈna mau tavini+ ei auahi ura.”+ 8 No nia râ i te Tamaiti, e parau oia: “O te Atua to terono+ e a muri noa ˈtu, e te sepeta o ta oe Faatereraa arii,* o te sepeta ïa o te parau-tia. 9 Mea au roa na oe te parau-tia e mea au ore roa na oe te ohipa ino. No reira ïa te Atua, to Atua, i faatavai ai ia oe+ i te monoˈi o te oaoa hau aˈe i to mau hoa.”+ 10 Oia atoa: “E te Fatu, i te haamataraa, ua haamau oe i te niu o te fenua, e te raˈi ra, o te ohipa ïa a to rima. 11 E mou te reira, area oe e vai noa ïa. E marau te reira mai te hoê ahu, 12 e e potaro oe i te reira mai te hoê ahu roa mahanahana, e mai te hoê ahu, e tauihia te reira. Aita râ oe i taui aˈe, e eita to oe mau matahiti e hope.”+

13 O vai atu â hoi te melahi ta ˈna i parau: “A parahi i to ˈu rima atau nei e ia faariro roa vau i to oe mau enemi ei taahiraa avae no oe”?+ 14 E ere anei ratou paatoa i te varua no te hoê taviniraa moˈa,+ tei tonohia ˈtu no te tavini i te feia e faaorahia?

2 No reira, e mea faufaa ˈi ia haapao maite atu â tatou i te mau parau ta tatou i faaroo+ ia ore roa tatou ia hahi ê.+ 2 I te mea e ua tupu iho â te parau i parauhia na roto i te mau melahi+ e ua faautuahia te ofati ture e te faaroo ore atoa ia au i te parau-tia,+ 3 e nafea ïa tatou e ora mai ai ia haafaufaa ore tatou i te hoê faaoraraa+ faahiahia mai teie? Ua parauhia mai te reira na mua na roto i to tatou Fatu+ e ua haapapuhia mai ia tatou na roto i te feia i faaroo ia ˈna, 4 a haapapu atoa mai ai te Atua na roto i te semeio, te ohipa faahiahia mau,*+ te ohipa mana e rave rau e te varua moˈa* i tufahia mai ia au i to ˈna hinaaro.+

5 Aita hoi oia i tuu i raro aˈe i te mau melahi i te ao* e haere mai ra,+ ta tatou e parau ra. 6 I haapapu na te hoê taata: “Eaha te taata nei i manaˈo ai oe ia ˈna, aore ra te tamaiti a te taata nei i haapao ai oe ia ˈna?+ 7 Ua tuu oe ia ˈna i raro iti aˈe i te mau melahi. Ua faahei oe ia ˈna i te hanahana e te tura, e ua faatoroa oe ia ˈna i nia i te mau ohipa a to rima. 8 Ua tuu oe i te mau mea atoa i raro aˈe i to ˈna avae.”+ Ma te tuu i te mau mea atoa i raro aˈe ia ˈna,+ aita hoê aˈe mea i toe i te Atua i te tuu atu i raro aˈe ia ˈna.+ E teie nei râ, aita â tatou i ite atura e ua tuuhia te mau mea atoa i raro aˈe ia ˈna.+ 9 Te ite nei râ tatou ia Iesu, tei tuuhia i raro iti aˈe i te mau melahi,+ e tei faaheihia i teie nei i te hanahana e te tura no to ˈna faaoromairaa i te pohe,+ e maoti te hamani maitai rahi o te Atua i faaruru ai oia i te pohe no te taata atoa.+

10 No te faahanahana e rave rahi tamaiti,+ e mea tano ia vaiiho te Atua, no ˈna e na roto ia ˈna te mau mea atoa e vai ai, i te Aratai rahi o to ratou faaoraraa+ ia tia-roa-hia na roto i te mauiui.+ 11 No roto mai hoi Iesu o te haamoˈa ra e oia atoa te feia e haamoˈahia ra,+ i te hoê â Metua,+ no reira ïa oia e ore ai e haama i te pii ia ratou e taeae,+ 12 mai ta ˈna e parau: “E faaite au i to iˈoa i to ˈu mau taeae. E arue au ia oe ma te himene i rotopu i te amuiraa.”+ 13 Oia atoa: “E tuu vau i to ˈu tiaturiraa ia ˈna.”+ E: “Inaha, teie au e te mau tamarii ta Iehova* i horoa na ˈu.”+

14 I te mea hoi e e taata* te mau “tamarii,” ua riro atoa mai ïa oia ei taata,+ a nehenehe atu ai oia, na roto i to ˈna pohe, e haamou i te Diabolo+ o te faatupu i te pohe,+ 15 e a nehenehe atu ai oia e faatiamâ* i te feia atoa i faatîtîhia na i te roaraa o to ratou oraraa no to ratou mǎtaˈu i te pohe.+ 16 E ere hoi te mau melahi ta ˈna e turu nei. Te turu nei râ oia i te huaai o Aberahama.+ 17 No reira, ia riro oia mai to ˈna ra mau “taeae” i te mau mea atoa e tia ˈi,+ a riro atu ai oia ei tahuˈa rahi aroha* e te haapao maitai i te taviniraa i te Atua, ia pûpû oia i te hoê tusia e tapoˈi i te hara*+ a te mau taata.+ 18 I te mea e ua mauiui oia i to ˈna tamataraahia,+ e nehenehe ïa oia e tauturu i te feia e tamatahia ra.+

3 No reira, to ˈu mau taeae moˈa tei titau-manihini-atoa-hia no te raˈi,+ a feruri maite ia Iesu ta tatou e farii* ra ei aposetolo e ei tahuˈa rahi.+ 2 E haapao maitai to ˈna i te Atua tei faatoroa ia ˈna+ mai ia Mose atoa a tavini ai oia i roto i te fare* taatoa o te Atua.+ 3 E au hoi ia ˈna* te hanahana hau aˈe+ ia Mose, i te mea e e faatura-rahi-hia aˈe te taata e hamani i te fare i te fare iho. 4 E mea hamanihia hoi te fare e te taata, o tei hamani râ i te mau mea atoa, o te Atua ïa. 5 E teie nei, e haapao maitai to Mose ei tavini i roto i te fare taatoa o te Atua, ei haapapuraa* i te mau mea i parauhia e e tupu a muri aˈe, 6 e haapao maitai râ to te Mesia ei tamaiti+ i te tiaauraa i te fare o te Atua. O tatou te fare o te Atua+ ia tamau tatou i te paraparau ma te itoito, e ia mau papu ia tatou te tiaturiraa ta tatou e haapeu ra e tae roa ˈtu i te hopea.

7 No reira, mai tei parauhia na roto i te varua moˈa:+ “I teie mahana, ia faaroo outou i to ˈna reo, 8 eiaha e faaetaeta i to outou aau mai i te mahana ra a tupu ai to ˈu riri rahi, i te mahana o te aaraa i roto i te medebara,+ 9 i te aaraa to outou mau tupuna ia ˈu, noa ˈtu e ua ite noa ratou i ta ˈu mau ohipa e 40 matahiti.+ 10 No reira vau i faufau roa ˈi i teie uˈi e i parau ai: ‘E aau faaroo ore noa to ratou, e aita ratou i ite i to ˈu mau eˈa.’ 11 Tǎpǔ ihora vau no to ˈu riri: ‘Eita ratou e ô i roto i to ˈu faafaaearaa.’”+

12 Taeae ma, a ara eiaha te hoê aau ino o te ere ra i te faaroo e tupu i roto i te hoê o outou no te atea-ê-raa i te Atua ora.+ 13 A tamau noa râ i te faaitoito te tahi i te tahi i tera e tera mahana, mai tei parauhia “i teie mahana,”+ ia ore hoi te aau o te hoê o outou ia etaeta i te puai haavare o te hara. 14 Ei apiti hoi tatou no te Mesia* ia mau papu ia tatou te tiaturiraa i vai na ia tatou i te haamataraa e tae roa ˈtu i te hopea.+ 15 Mai tei parauhia: “I teie mahana, ia faaroo outou i to ˈna reo, eiaha e faaetaeta i to outou aau mai i te mahana ra a tupu ai to ˈu riri rahi.”+

16 O vai hoi tei faaroo i to ˈna reo e tei faatupu râ i to ˈna riri rahi? E ere anei o te feia atoa ta Mose i aratai i rapae i Aiphiti?+ 17 E o vai ta te Atua i faufau e 40 matahiti?+ E ere anei o te feia i hara e i pohe i roto i te medebara?+ 18 E ia vai oia i tǎpǔ ai e eita ratou e ô i roto i to ˈna vahi faafaaearaa? E ere anei i te feia i faaroo ore? 19 Te ite ra ïa tatou e aita ratou i nehenehe e ô atu no to ratou ereraa i te faaroo.+

4 I te mea e te toe ra te parau fafau e ô i roto i to ˈna vahi faafaaearaa, e ara anaˈe ïa* eiaha ia itehia e ua ere te hoê o outou i te reira.+ 2 Ua faaite-atoa-hia mai hoi te parau apî oaoa ia tatou,+ mai ia ratou atoa. Aita râ ratou i faufaahia i te parau ta ratou i faaroo, no te mea e ere hoê â faaroo to ratou e to te feia i auraro. 3 Tatou hoi e faatupu i te faaroo, o tatou te ô i roto i to ˈna vahi faafaaearaa, mai ta ˈna i parau: “Tǎpǔ ihora vau no to ˈu riri: ‘Eita ratou e ô i roto i to ˈu faafaaearaa,’”+ noa ˈtu e ua oti ta ˈna mau ohipa mai te omuaraa mai â o teie nei ao.+ 4 I parau na hoi oia no nia i te hitu o te mahana: “Faafaaea ihora te Atua i ta ˈna mau ohipa atoa i te hitu o te mahana,”+ 5 e te parau faahou ra oia: “Eita ratou e ô i roto i to ˈu faafaaearaa.”+

6 I te mea hoi e aita â vetahi i ô atura, e aita te feia i faaitehia na mua te parau apî oaoa i ô atu no to ratou faaroo ore,+ 7 ua haamau â oia i te tahi mahana ma te parau i muri aˈe i roto i te hoê Salamo a Davida: “I teie mahana.” Mai tei parauhia i nia ˈˈe: “I teie mahana, ia faaroo outou i to ˈna reo, eiaha e faaetaeta i to outou aau.”+ 8 Ahiri hoi Iosua+ i aratai ia ratou i te hoê vahi faafaaearaa, eita ïa te Atua e paraparau i muri aˈe no nia i te tahi atu mahana. 9 No reira, te toe ra te hoê Sabati faafaaearaa no te nunaa o te Atua.+ 10 Te taata hoi i ô i roto i te vahi faafaaearaa o te Atua, ua faafaaea atoa ïa i ta ˈna mau ohipa, mai te Atua atoa i ta ˈna.+

11 E rohi anaˈe ïa no te ô i roto i taua vahi faafaaearaa ra, ia ore te tahi ia pee i te hoê â huru faaroo ore.+ 12 E mea ora hoi te parau a te Atua e te puai rahi,+ e mea oi aˈe i te mau ˈoˈe ua oi na pae e piti.+ E ô te reira i roto roa i te taata, a taa ê atu ai to ˈna rapaeauraa* e to ˈna rotoraa,* e te mau puoiraa ivi e te puo ivi, e e faaite mai te reira i te mau manaˈo e opuaraa o te aau. 13 Aita e mea i poietehia tei hunahia i te aro o te Atua,+ e mea mahora te mau mea atoa e te ite-maitai-hia e ana, ia ˈna hoi tatou e faˈi ai i ta tatou i rave.+

14 I te mea hoi e e tahuˈa rahi hau ê to tatou tei na roto atu i te raˈi, oia hoi o Iesu te Tamaiti a te Atua,+ e faaite noa anaˈe ïa i te taata atoa i to tatou faaroo ia ˈna.+ 15 E ere hoi to tatou i te hoê tahuˈa rahi o te ore e nehenehe e aumauiui i to tatou mau paruparu,+ ua tamatahia râ oia i te mau mea atoa mai ia tatou atoa nei, tera râ, aita roa ta ˈna e hara.+ 16 E faafatata anaˈe ïa i te terono o te hamani maitai rahi, a paraparau roa ˈtu ai i te Atua,+ ia itehia mai ia tatou te aroha* e te hamani maitai rahi ia hinaaro tatou i te tauturu.

5 Te tahuˈa rahi i ravehia no roto mai i te taata, ua faatoroahia ïa no te taviniraa i te Atua no te maitai o te mau taata,+ a pûpû ai oia i te ô e te tusia no te mau hara.+ 2 E nehenehe oia e aumihi* i te feia ite ore e tei hapa,* i te mea e te faaruru atoa ra oia i to ˈna iho mau paruparu,* 3 e no reira, ia pûpû oia i te tusia no ta ˈna iho mau hara e tia ˈi, mai ta ˈna e na reira atoa ra no te mau hara a te nunaa.+

4 E ere na te hoê taata e faaoti e rave i teie toroa hanahana, na te Atua râ tei titau manihini ia ˈna e faatoroa ia ˈna, mai ia Aarona.+ 5 Oia atoa te Mesia, aita oia i faahanahana ia ˈna iho+ ma te faariro ia ˈna ei tahuˈa rahi, ua faahanahanahia râ oia e te Atua tei parau ia ˈna: “O oe ta ˈu tamaiti. I teie mahana ua riro vau ei metua no oe.”+ 6 I parau atoa na oia: “E tahuˈa oe mai ia Melehizedeka ra te huru e a muri noa ˈtu.”+

7 A ora ˈi oia i nia i te fenua,* i pure na te Mesia i te Atua tei nehenehe e faaora ia ˈna i te pohe ma te taparuparu e te aniraa, ma te auê e te roimata,+ e ua faaroohia oia no to ˈna mǎtaˈu i te Atua. 8 E noa ˈtu e tamaiti oia, ua haapii oia i te auraro na roto i te mau mea ta ˈna i faaruru.+ 9 E i muri aˈe i to ˈna auraroraa ma te tia roa,+ ua riro oia ei ravea e noaa ˈi i te feia atoa e auraro ia ˈna te faaoraraa mure ore,+ 10 no te mea ua maitihia oia e te Atua ei tahuˈa rahi mai ia Melehizedeka ra te huru.+

11 Mea rahi hoi ta matou e nehenehe e parau no nia i te Mesia, e mea fifi ia faataa ˈtu no te mea ua turiturihia to outou tariˈa. 12 Ei taata haapii hoi outou i teie nei,* e aita râ, e mea titauhia ia haapii â te hoê taata ia outou i te mau mea rii o te poroi moˈa a te Atua mai te haamataraa mai,+ e ua hiaai faahou outou i te û, eiaha te maa etaeta. 13 Te taata hoi e inu noa i te û, aita ïa i ite i te parau o te parau-tia, e tamarii hoi oia.+ 14 Area te maa etaeta, na te feia paari ïa i te pae varua, te feia o te faaohipa noa i to ratou haroˈaroˈa,* a haapii atu ai ia ratou iho ia faataa ê i te maitai i te ino.

6 E teie nei, ua tiaturi aˈena tatou i te mau haapiiraa+ ta tatou i ite na no nia i te Mesia, e haere ru anaˈe ïa i mua i te paari i te pae varua,+ ma te ore e haamau faahou i te niu, oia hoi te tatarahaparaa i te mau ohipa pohe e te faaroo i te Atua, 2 te haapiiraa o te mau bapetizoraa e te tuuraa rima,+ te tia-faahou-raa o tei pohe+ e te haavaraa mure ore. 3 O ta tatou ïa e rave ia tia i te Atua.

4 Te feia tei haamaramaramahia+ e tei fanaˈo i te ô horoa noa no te raˈi mai e tei apiti i te ohiparaa a te varua moˈa, 5 e tei fanaˈo i te parau maitai roa a te Atua e te mau ohipa mana a te ao* no a muri aˈe, 6 tei taiva râ,+ eita roa ïa e nehenehe e tauturu ia ratou ia tatarahapa, no te mea te patiti faahou ra ratou i te Tamaiti a te Atua i nia i te pou e te faahaama ra ratou ia ˈna i mua i te taata atoa.+ 7 E haamaitairaa no ǒ mai i te Atua te ûa e topa pinepine no te fenua, no te mea e faarari te reira i te fenua, a tupu mai ai te maa hinaaro-mau-hia e te feia faaapu. 8 Ia tupu mai râ te raau taratara, e faaruehia tera fenua, a faainohia ˈtu ai e i te pae hopea, e taninahia.

9 Area outou, taeae here ma, parau noa ˈtu ai matou i teie nei parau, ua papu ia matou e e tupuraa maitai aˈe to outou, e te rave nei outou i te mau mea e faaorahia ˈi outou. 10 E ere hoi te Atua i te Atua parau-tia ore a moˈe ai ia ˈna ta outou ohipa e to outou hinaaro rahi i to ˈna iˈoa+ ma te tavini e ma te tamau i te tavini i te feia moˈa. 11 Te hinaaro nei râ matou ia faaite outou tataitahi i te hoê â itoito rahi ia papu maitai to outou tiaturiraa+ e tae noa ˈtu i te hopea,+ 12 ia ore outou ia faatau,+ ia pee râ i te hiˈoraa o te feia e fatu i te mau parau fafau no to ratou faaroo e to ratou faaoromai.

13 I to te Atua fafauraa i ta ˈna parau ia Aberahama, i te mea e aita hoê i teitei aˈe ia ˈna e tǎpǔ ai oia, ua tǎpǔ ïa oia na nia ia ˈna iho,+ 14 a na ô ai: “E haamaitai iho â vau ia oe e e faarahi mau â vau ia oe.”+ 15 I muri aˈe i to Aberahama faaoromairaa i fafauhia ˈi ia ˈna teie parau. 16 E horeo te taata na nia hoê tei teitei aˈe ia ratou, a ore atu ai te mau mârôraa atoa i ta ratou horeo, i te mea e e haapapuraa mana te reira no ratou.+ 17 Oia atoa, i to te Atua faaotiraa e faaite maitai atu â i te feia e fatu i te parau fafau+ e e ore roa ta ˈna opuaraa* e taui, ua haapapu oia i te reira* na roto i te hoê tǎpǔ, 18 na roto hoi e piti parau o te ore roa e taui, e ore atoa e tia i te Atua ia haavare,+ e faaitoito-mau-hia ïa tatou, o tei horo i te haapuraa a te Atua, ia tapea maite i te tiaturiraa i tuuhia mai i mua ia tatou. 19 Teie tiaturiraa to tatou,+ mai te hoê ïa tutau no to tatou ora,* mea papu e te aueue ore atoa, o te tomo i roto i te vahi i muri mai i te paruru,+ 20 i reira Iesu te matamua i te tomoraa ˈtu no tatou,+ o ˈna hoi tei riro ei tahuˈa rahi mai ia Melehizedeka ra te huru e a muri noa ˈtu.+

7 Ua farerei hoi taua Melehizedeka ra, arii no Salema, tahuˈa na te Atua Teitei Roa ˈˈe, ia Aberahama o te hoˈi mai ra i te pauraa te mau arii ia ˈna e ua haamaitai ia ˈna,+ 2 e ua horoa* Aberahama na ˈna i te tuhaa ahuru o te mau mea atoa ta ˈna i haru. Na mua, “Arii o te parau-tia” te auraa o to ˈna iˈoa, e arii atoa oia no Salema, “Arii o te hau” ïa. 3 Aita e metua tane to ˈna, aita e metua vahine, aita e pǎpǎraa tupuna, aita e haamataraa to to ˈna pue mahana e aita atoa e hopea to to ˈna oraraa, ua faarirohia râ oia mai te Tamaiti a te Atua ra te huru, e vai noa ïa oia ei tahuˈa e a muri noa ˈtu.+

4 A hiˈo na i te rahi o taua taata ra ta Aberahama, te upoo utuafare,* i horoa ˈtu i te ahuru o te mau mea maitai roa ˈˈe ta ˈna i haru mai.+ 5 Parau mau, ia au i te Ture, ua faauehia to te mau tamaiti a Levi+ tei faatoroahia ei tahuˈa, ia rave mai i te ahuru o te mau taoˈa a te nunaa,+ oia hoi to ratou mau taeae, noa ˈtu e e huaai ratou no Aberahama. 6 Area taua taata ra e ere no roto mai i te utuafare o Levi, ua rave mai ïa i te ahuru o ta Aberahama mau taoˈa i haru mai, e ua haamaitai ia ˈna o tei faaitehia ˈtu te mau parau fafau.+ 7 E teie nei, e farii iho â te taata e ua haamaitaihia tei iti aˈe na tei rahi aˈe. 8 Te vai ra te tahi mau taata o te rave mai i te tuhaa ahuru, e pohe hoi ratou, te vai atoa ra râ hoê o tei faaite-papu-hia e e ora noa oia.+ 9 E nehenehe atoa e parau e tae noa ˈtu ia Levi, o te rave mai i te tuhaa ahuru, ua horoa atoa oia i te tuhaa ahuru na roto ia Aberahama, 10 to roto noa â hoi oia* i to ˈna tupuna a farerei ai Melehizedeka ia ˈna.+

11 Ahiri e noaa te tia-roa-raa na roto noa i te mau tahuˈa no te opu o Levi+ (tuhaa faufaa hoi o te Ture tei horoahia i te nunaa), eaha ïa e hinaarohia ˈi te tahi atu tahuˈa tei parauhia e mai ia Melehizedeka ra te huru,+ eiaha râ mai ia Aarona? 12 I te mea hoi e te taui ra te toroa tahuˈa, ia taui-atoa-hia ïa te Ture e tia ˈi.+ 13 E mero hoi oia no te tahi atu opu, aita hoê aˈe i rave i te ohipa i te fata, no ˈna teie mau parau i parauhia.+ 14 Mea papu hoi e no roto mai to tatou Fatu ia Iuda,+ aita râ Mose i faahiti i te tahi noa ˈˈe parau no nia i te mau tahuˈa no roto mai i taua opu ra.

15 E mea papu roa ˈtu â e mai ia Melehizedeka ra te huru+ e tia mai ai te tahi atu tahuˈa.+ 16 E ohipa oia ei tahuˈa, e ere no te opu no reira mai oia mai tei titauhia e te Ture, no te mana râ e fanaˈo ai oia i te ora o te ore roa e mou.+ 17 I parauhia na hoi no ˈna ei haapapuraa: “E tahuˈa oe mai ia Melehizedeka ra te huru e a muri noa ˈtu.”+

18 No reira ïa te faaueraa tahito i faaorehia ˈi, no te mea e faaueraa paruparu e te faufaa ore.+ 19 Aita hoê aˈe mea i tia-roa-hia i te Ture,+ tera râ, ua tia-roa-hia i te faaôraahia mai te hoê tiaturiraa maitai aˈe,+ a nehenehe atu ai tatou e faafatata i te Atua.+ 20 Oia atoa, aita te reira i ravehia ma te tǎpǔ ore 21 (inaha, te vai ra tei riro mai ei tahuˈa ma te tǎpǔ ore, area teie, ua riro mai ïa ei tahuˈa na roto i te hoê tǎpǔ a tei parau mai: “Ua tǎpǔ Iehova,* e eita oia e taui i to ˈna manaˈo:* ‘E tahuˈa oe e a muri noa ˈtu’”),+ 22 ua riro mai ïa Iesu ei haapapuraa no te hoê faufaa maitai aˈe.+ 23 Hau atu â, mea rahi tei riro mai ei tahuˈa te tahi i muri iho i te tahi,+ no te pohe hoi i ore ai ratou e tamau i to ratou toroa, 24 area oia o te ora noa e a muri noa ˈtu,+ eita hoê aˈe e mono ia ˈna ei tahuˈa. 25 No reira e tia atoa ˈi ia ˈna ia faaora roa i te feia e faafatata nei i te Atua na roto ia ˈna, no te mea te ora noa ra oia no te taparuparu i te Atua no ratou.+

26 Tano maitai hoi no tatou taua huru tahuˈa rahi ra, mea taiva ore, te hapa ore, te viivii ore,+ e ere oia mai te feia hara, e ua faateiteihia i nia ˈˈe i te mau raˈi.+ 27 E ere oia mai taua mau tahuˈa rahi ra, eita e titauhia ia pûpû oia i te mau tusia pauroa te mahana,+ na mua no ta ˈna iho mau hara, e i muri iho no ta te nunaa,+ no te mea ua na reira oia hoê roa pûpûraa i to ˈna pûpûraa ia ˈna iho ei tusia.+ 28 I raro aˈe i te Ture, e feia e paruparu to ratou te faatoroahia ei tahuˈa rahi,+ i muri aˈe râ i te Ture e ia au i te parau i tǎpǔhia,+ o te hoê ïa Tamaiti te faatoroahia, oia tei tia-roa-hia+ e a muri noa ˈtu.

8 E teie te manaˈo faufaa roa ta tatou e parau nei: E tahuˈa rahi to tatou mai tera te huru,+ e ua parahi oia i te pae atau o te terono o te Atua teitei i te raˈi,+ 2 te hoê tavini i te vahi moˈa+ e i te tiahapa mau, ta Iehova* i faatia, eiaha te taata. 3 Ua faatoroahia hoi te tahuˈa rahi no te pûpû i te ô e te tusia, e pûpû atoa ïa teie i te tusia.+ 4 Ahiri tei te fenua oia, e ore oia e riro ei tahuˈa,+ te vai ra hoi te tane o te pûpû i te ô ia au i te Ture. 5 Te pûpû nei teie mau tane i te hoê taviniraa moˈa ei taipe e ei ata+ no te mau mea o te raˈi.+ Mai ia Mose a fatata ˈi oia i te faatia i te tiahapa, ua faauehia oia e te Atua: “A haapao maitai ia hamani oe i te mau mea atoa ia au i to ratou hohoˈa i faaitehia ˈtu ia oe i nia i te mouˈa.”+ 6 E teie nei râ, e taviniraa maitai roa ˈtu â tei horoahia na Iesu, a riro atoa ˈi oia ei arai+ no te tahi faufaa maitai aˈe,+ tei niuhia ia au i te ture i nia i te mau parau fafau maitai aˈe.+

7 Ahiri e mea hapa ore taua faufaa matamua ra, e ore ïa e hinaarohia te piti.+ 8 Ua faahapa mau râ te Atua i te nunaa no te mea: “Te parau ra Iehova:* ‘Inaha, te tae mai ra te mau mahana e faaau ai au i te tahi faufaa apî i te nunaa o Iseraela e i te nunaa o Iuda.’ 9 Te parau atoa ra Iehova:* ‘E ere taua faufaa ra mai te faufaa ta ˈu i faaau i to ratou mau tupuna i te mahana i tapea ˈi au i to ratou rima no te aratai mai ia ratou i rapae i te fenua o Aiphiti,+ no te mea aita ratou i vai tamau i roto i ta ˈu faufaa, ua faaea ïa vau i te aupuru ia ratou.’

10 “‘Teie hoi te faufaa ta ˈu e faaau i te nunaa o Iseraela i muri aˈe i taua mau mahana ra,’ ta Iehova* ïa e parau ra. ‘E tuu vau i ta ˈu mau ture i roto i to ratou manaˈo, e i roto i to ratou aau e papai ai au i te reira.+ E riro vau ei Atua no ratou, e e riro ratou ei nunaa no ˈu.+

11 “‘Eita ratou tataitahi e haapii faahou i te taata o to ratou nunaa e i to ratou taeae, a na ô ai: “Ia ite outou o vai Iehova!”* E ite hoi ratou pauroa o vai au, te taata haihai e tae noa ˈtu i te taata tiaraa teitei. 12 E aroha* hoi au ia ratou tei rave i te ohipa parau-tia ore, e e ore roa vau e haamanaˈo faahou i ta ratou mau hara.’”+

13 Ia ˈna i parau “te tahi faufaa apî,” ua faariro ïa oia i te faufaa matamua ei mea tahito.+ E te mea tahito e tei marau, fatata ïa i te mou.+

9 I roto i te faufaa matamua, te vai ra te mau titauraa a te ture no te taviniraa moˈa e te vahi+ moˈa i te fenua nei. 2 I faatiahia na hoi te piha matamua o te tiahapa, to reira te mori*+ e te iri vairaa pane e te mau pane pûpûhia.*+ E parauhia taua vahi ra te Vahi Moˈa.+ 3 I muri mai râ i te piti o te paruru,+ o te piha ïa o te tiahapa parauhia te Vahi Moˈa Roa.+ 4 I reira, te vai ra te hoê vairaa mea noˈanoˈa auro+ e te afata faufaa+ tei tapiri-pauroa-hia i te auro.+ I roto i te afata o te faufaa, e farii auro ïa e mâna to roto,+ e te raau a Aarona tei puahia,+ e na pǎpǎ+ o te faufaa. 5 E i nia iho i te afata o te faufaa, na kerubi hanahana ïa e tamaru ra te vahi o te tapoˈiraa hara*+ i to raua na pererau. Tera râ, e ere teie te taime no te faahiti huˈahuˈa ˈtu i teie mau mea.

6 I te otiraa teie mau mea i te hamanihia mai teie, e tomo te mau tahuˈa i roto i te piha matamua o te tiahapa i te mau mahana atoa no te rave i ta ratou taviniraa moˈa.+ 7 Area te tahuˈa rahi, e tomo ïa o ˈna anaˈe i roto i te piti o te piha hoê taime i te matahiti,+ a hopoi atoa ˈi i te toto+ ta ˈna e pûpû no ˈna iho+ e no te mau hara ta te nunaa+ i rave ma te ite ore. 8 Te faaite maitai ra ïa te varua moˈa* e aita â te eˈa e tae atu ai i te vahi moˈa i faaitehia ˈtura a tia noa ˈi te tiahapa matamua.+ 9 E taipe teie tiahapa no teie nei tau,+ e ia au i teie faanahoraa e pûpûhia ˈi te mau ô e te mau tusia atoa.+ E ere râ na roto i teie mau mea e noaa ˈi i te taata o te rave nei i te taviniraa moˈa te hoê manaˈo haava maitai roa.+ 10 Teie râ mau ô e tusia, e maa anaˈe ïa, e inu e e horoiraa e rave rau* ia au i te Ture.+ E mau titauraa o te ture te reira no nia i te mau mea pae tino+ e tei haamauhia tae noa ˈtu i te tau faataahia e faatitiaifarohia ˈi te mau mea.

11 Teie râ, i to te Mesia haereraa mai ei tahuˈa rahi no te mau mea maitatai tei tupu aˈena, ua na roto atu oia i te tiahapa rahi aˈe e te maitai roa ˈtu â e ere mea hamanihia e te rima taata, oia hoi e ere mea poietehia i te fenua nei. 12 Ua tomo oia i roto i te vahi moˈa, eiaha ma te toto o te puaaniho e to te puaatoro oni apî, ma to ˈna iho râ toto,+ hoê roa tomoraa, e ua noaa mai ia tatou te faaoraraa* mure ore.+ 13 Mai te peu e e moˈa te feia tei viiviihia, a mâ ˈtu ai ratou, i te toto o te puaaniho e to te puaatoro oni+ e te rehu o te puaatoro ufa apî tei pîpîhia i nia ia ratou,+ 14 hau atu â ïa te toto o te Mesia,+ o tei pûpû ia ˈna iho ei tusia tia roa i te Atua maoti te ohiparaa a te varua moˈa mure ore, i te tamâ i to tatou manaˈo haava i te mau ohipa pohe,+ a nehenehe atu ai tatou e pûpû i te hoê taviniraa moˈa i te Atua ora.+

15 No reira, e arai oia no te tahi faufaa apî,+ no te mea ua pohe oia ia tiamâ te feia tei titau-manihini-hia maoti te hoo*+ i te mau hara i ravehia i raro aˈe i te faufaa matamua, a fatu atu ai ratou i te mau haamaitairaa mure ore tei fafauhia.+ 16 Mai te peu e e faufaa, ia pohe ïa te taata tei faaau i te faufaa e tia ˈi, 17 no te mea e mana te hoê faufaa ia pohe te taata tei faaau i te reira, e ore roa hoi te reira e mana a ora noa ˈi oia. 18 No reira, aita atoa te faufaa matamua i haamauhia* ma te ore e ninii i te toto. 19 I te otiraa hoi ia Mose i te faahiti i te mau faaueraa atoa o te Ture i te nunaa taatoa, ua rave oia i te toto o te puaatoro oni apî e to te puaaniho, e te pape, te huruhuru mamoe uteute e te amaa hisopa, e ua pîpî i te buka* e te nunaa taatoa i te reira, 20 a na ô ai: “Teie te toto o te faufaa ta te Atua i faaue ia outou ia haapao.”+ 21 Ua pîpî atoa oia i te tiahapa e te mau farii atoa no te taviniraa moˈa i te toto.+ 22 Oia mau, ua tamâhia te rahiraa o te mau mea i te toto ia au i te Ture,+ aita anaˈe e toto i manii, aita atoa ïa e faaoreraa hara.+

23 No reira, mea titauhia ia tamâhia te mau taipe+ o te mau mea o te raˈi na roto i te mau tusia animara, e titau râ te mau mea+ o te raˈi i te tusia maitai aˈe. 24 Aita hoi te Mesia i tomo i roto i te hoê vahi moˈa hamanihia e te rima taata,+ e hohoˈa hoi teie o te vahi moˈa mau,+ i roto râ i te raˈi,+ a tia ˈtu ai oia i teie nei i mua i* te Atua no tatou.+ 25 E ere no te pûpû ia ˈna ei tusia e rave rahi taime, mai te tahuˈa rahi e tomo i roto i te vahi moˈa i te mau matahiti atoa+ ma te toto eiaha râ to ˈna iho. 26 Ahiri aita ra, ua mauiui ïa oia e rave rahi taime mai te omuaraa mai â o teie nei ao. E teie nei râ, ua faaite mai oia ia ˈna iho hoê roa faaiteraa i te anotau hopea o te mau faanahoraa o te ao nei* no te faaore i te hara na roto i te pûpûraa ia ˈna iho ei tusia.+ 27 E pohe te taata hoê roa poheraa, tera râ, e haavaraa to muri mai, 28 oia atoa te Mesia, ua pûpûhia ei tusia hoê roa pûpûraa no te amo i te mau hara a te taata e rave rahi,+ e i te piti o te taime e haere mai ai oia, e ere ïa no te hopoi ê i te hara,* e itehia râ oia e te feia e tiai maite nei ia ˈna ia faaorahia ratou.+

10 I te mea hoi e e ata te Ture+ no te mau haamaitairaa e tupu a muri aˈe,+ e ere râ te mea mau o teie mau haamaitairaa, e ore roa ïa te feia e faafatata i te Atua e tia-roa-hia i te reira* e i taua â mau tusia ra e pûpû-noa-hia i te mau matahiti atoa.+ 2 Ahiri oia ra, e ore ïa te mau tusia e pûpû-faahou-hia, e ere anei? Ua mâ anaˈe hoi taua mau taata ra o te pûpû ra i te hoê taviniraa moˈa, eita ïa to ratou manaˈo haava e hauti faahou no ta ratou mau hara. 3 Aita râ, e haamanaˈo-noa-hia te mau hara i te mau matahiti atoa na roto i taua mau tusia ra,+ 4 eita hoi e tia i te toto o te puaatoro oni e to te puaaniho ia hopoi ê i te mau hara.

5 No reira, i to ˈna haereraa mai i te ao nei, ua parau oia: “‘Aita oe i hinaaro i te tusia e te ô, ua faaineine râ oe i te hoê tino no ˈu. 6 Aita oe i farii i te tusia taauahi e te tusia no te hara.’+ 7 Na ô atura vau: ‘Inaha, ua haere mai au (no ˈu te parau i papaihia i roto i te otaro*) no te rave i to hinaaro, e te Atua.’”+ 8 I to ˈna parauraa na mua: “Aita oe i hinaaro e aita atoa i farii i te tusia, te ô, te tusia taauahi e te tusia no te hara,” e tusia hoi teie i pûpûhia ia au i te Ture, 9 na ô atura oia: “Inaha, ua haere mai au no te rave i to hinaaro.”+ Ua faaore mau â oia i te faanahoraa matamua no te haamau i te piti o te faanahoraa. 10 No teie “hinaaro”+ i haamoˈahia ˈi tatou na roto i to Iesu Mesia pûpûraa i to ˈna tino hoê roa pûpûraa.+

11 Oia atoa, e tia te tahuˈa tataitahi i ta ˈna ohipa i te mau mahana atoa no te pûpû i te hoê taviniraa moˈa+ e no te pûpû i taua noa mau tusia ra e rave rahi taime,+ o te ore roa e tia ia hopoi ê roa i te mau hara.+ 12 O ˈna râ, ua pûpû ïa i te hoê tusia no te mau hara no te mau tau atoa e ua parahi i te rima atau o te Atua,+ 13 a tiai atu ai e ia faarirohia to ˈna mau enemi ei taahiraa avae no ˈna.+ 14 Na roto hoê noa pûpûraa tusia i tia-roa-hia ˈi ia ˈna+ e a muri noa ˈtu te feia e haamoˈahia ra. 15 Hau atu â, te haapapu atoa mai ra te varua moˈa a na ô ai: 16 “‘Teie te faufaa ta ˈu e faaau ia ratou i muri aˈe i taua mau mahana ra,’ ta Iehova* ïa e parau ra. ‘E tuu vau i ta ˈu mau ture i roto i to ratou aau, e i roto i to ratou manaˈo e papai ai au i te reira,’”+ 17 e na ô atura: “E e ore roa vau e haamanaˈo faahou i ta ratou mau hara e ta ratou mau ohipa iino.”+ 18 Ia faaorehia teie mau hara, eita ïa e hinaaro-faahou-hia te tusia no te hara.

19 No reira, taeae ma, i te mea e te faaohipa nei tatou ma te mǎtaˈu ore* i te ravea e tomo ai i roto i te vahi moˈa*+ maoti te toto o Iesu, 20 ta ˈna i iriti* no tatou ei ravea apî e tae atu ai i te ora na roto atu i te paruru,+ oia hoi to ˈna tino, 21 e i te mea e e tahuˈa rahi to tatou o te haapao ra i te utuafare o te Atua,+ 22 e faafatata anaˈe ïa i te Atua ma to tatou aau atoa e faaroo puai, ua tamâhia hoi to tatou aau i te hoê manaˈo haava ino+ na roto i te pîpîraa i te toto, e ua horoihia to tatou tino i te pape mâ.+ 23 E tamau maite anaˈe i te faaite i te taata atoa i to tatou tiaturiraa ma te aueue ore,+ e nehenehe hoi tatou e tiaturi i tei fafau i taua mau parau ra. 24 E e manaˈo anaˈe te tahi i* te tahi, a turai atu ai te tahi i te tahi ia faaite i te here e ia rave i te ohipa maitai roa,+ 25 eiaha e faarue i ta tatou mau putuputuraa,+ mai ta vetahi i matau, ia faaitoito râ te tahi i te tahi,+ e ia rahi atu â a ite ai outou i taua mahana ra e fatata mai ra.+

26 Ia rave hoi tatou i te hara ma te hinaaro mau e ua noaa ia tatou te ite papu i te parau mau,+ aita faahou ïa e tusia e toe ra no te mau hara,+ 27 te vai nei râ te tahi tiairaa riaria i te faautuaraa e i te riri mai te auahi te huru e pau roa ˈi te feia patoi.+ 28 Te taata o tei haafaufaa ore i te Ture a Mose, e haapohehia ïa ma te ore oia e arohahia na nia i te parau a e piti aore ra e toru ite.+ 29 Eaha râ ïa te rahi o te utua i to outou manaˈo e au i te taata tei taataahi i te Tamaiti a te Atua, tei ore i haafaufaa roa i te toto o te faufaa i moˈa ˈi oia,+ e tei faaino ma te vahavaha i te varua o te Atua tei faaite mai i to ˈna hamani maitai rahi?+ 30 Ua ite hoi tatou i te Atua tei parau: “Na ˈu e tahoo. Na ˈu e faautua.” Oia atoa: “E haava Iehova* i to ˈna nunaa.”+ 31 Mea riaria ia topa i roto i te rima o te Atua ora.

32 Tera râ, a haamanaˈo noa i to mutaa iho mau mahana, i muri aˈe i to outou haamaramaramaraahia,+ ua faaruru outou i te hoê aroraa rahi i roto i te mauiui e rave rahi. 33 I te tahi taime, ua faarirohia outou ei mataitairaa na te taata,* a faaû atu ai i te faainoraa e te ati e rave rahi, e i te tahi atu taime, ua tauturu* outou i te feia o te faaruru ra i te reira. 34 Ua faaite outou i te aumihi no te mau taeae i roto i te tapearaa, e ua farii outou ma te oaoa ia haruhia ta outou mau faufaa,+ ua ite hoi outou e e faufaa maitai aˈe ta outou o te vai noa mai.+

35 No reira, eiaha e faaea i te paraparau ma te mǎtaˈu ore, e haamaitairaa rahi hoi te noaa mai.+ 36 Mea titauhia hoi ia faaoromai tamau outou,+ ua oti anaˈe ia outou te rave i te hinaaro o te Atua, e noaa ïa ia outou ta ˈna i fafau. 37 Noa ˈtu e “taime poto roa”+ te toe ra, e “e tae mai o tei haere mai nei e e ore oia e maoro.”+ 38 “E ora râ to ˈu taata parau-tia i to ˈna faaroo,”+ e “ia otohe oia, eita vau* e mauruuru ia ˈna.”+ 39 E teie nei, e ere tatou i te feia o te otohe a haamouhia ˈtu ai,+ i te feia râ e faaroo to tatou a ora ˈtu ai.*

11 Te faaroo, o te tiairaa papu ïa i te mau mea tiaturihia,+ te haapapuraa maramarama o te mau mea mau aita e itehia ra. 2 Maoti hoi te faaroo i faaite ai te Atua i te feia no tahito ra* e ua mauruuru oia ia ratou.

3 No te faaroo i taa ˈi ia tatou e ua haamauhia te mau faanahoraa o te ao nei* e te parau a te Atua, e ua faaohipa te Atua i te mau mea aita tatou e ite ra no te hamani i te mau mea ta tatou e ite ra.

4 No te faaroo i pûpû ai Abela i te hoê tusia hau aˈe i te faufaa i ta Kaina,+ e na roto i taua faaroo ra i faaitehia ˈi ia ˈna e e taata parau-tia oia, ua farii hoi te Atua i ta ˈna mau ô,+ e noa ˈtu e ua pohe oia, te paraparau noa mai ra oia+ na roto i to ˈna faaroo.

5 No te faaroo i ravehia ˈi Enoha+ ia ore oia ia mauiui ia pohe oia, e aita oia i ite-faahou-hia no te mea i rave na te Atua ia ˈna.+ Hou râ oia a ravehia ˈi, ua faaite te Atua ia ˈna e ua mauruuru oia ia ˈna. 6 Hau atu â, e ore roa te Atua e mauruuru i te taata aita e faaroo to ˈna, ia tiaturi hoi te taata o te faafatata i te Atua e te ora ra* oia e e riro mai oia o te Atua o te haamaitai i te feia e imi maite nei ia ˈna.+

7 No te faaroo i mǎtaˈu ai Noa+ i te Atua i muri aˈe i to te Atua faaararaa ia ˈna i te mau mea aita â i itehia ˈtura,+ e i hamani ai i te hoê araka+ ia ora to ˈna utuafare. E na roto i teie faaroo i faahapa ˈi oia i te ao,+ e i riro ai oia ei fatu no te parau-tia maoti te faaroo.

8 No te faaroo i auraro ai Aberahama+ i ta te Atua parau, a haere ai i te vahi ta ˈna i fafau e horoa no ˈna. Ua reva oia noa ˈtu e aita oia i ite i te vahi ta ˈna e haere ra.+ 9 No te faaroo i ora ˈi oia ei taata ê i te fenua tǎpǔhia mai te hoê fenua ê,+ a ora ˈi i roto i te mau fare ie+ e o Isaaka e o Iakoba, o te fatu atoa e o ˈna i ta te Atua i fafau ia ratou.+ 10 Te tiai ra hoi oia i te oire e niu mau to te reira, na te Atua e opua* e e patu.+

11 No te faaroo atoa i noaa ˈi ia Sara te puai e hapû ai oia, a mairi atoa ˈi to ˈna matahiti no te fanau,+ i te mea e ua papu ia ˈna e e nehenehe e tiaturi i Tei fafau mai ia ˈna ra. 12 No reira ïa i fanauhia mai ai ta te hoê noa tane mai te taata pohe ra te huru,+ te tamarii+ mai te fetia o te raˈi te rahi e mai te one tahatai eita e pau ia taio.+

13 Ua pohe teie mau taata atoa ma te faaroo, noa ˈtu e aita i noaa ia ratou te mau mea i fafauhia.+ Ua ite atu râ ratou na te atea ê+ e ua farii popou atu e ua faaite haere e e taata ěê ratou e e purutia i taua fenua ra. 14 Te faaite maitai ra hoi te feia e faahiti ra i taua mau parau ra e te imi maite nei ratou i te hoê vahi ta ratou e fatu. 15 Tera râ, ahiri ratou i manaˈo noa i te vahi ta ratou i faarue na,+ ua tia noa ia ratou ia hoˈi. 16 E teie nei râ, te tiai ru nei ratou i te hoê vahi maitai aˈe, oia hoi no te raˈi. No reira, aita te Atua i haama ia ratou ia parauhia oia ei Atua no ratou,+ ua faaineine hoi oia i te hoê oire no ratou.+

17 No te faaroo i tae roa ˈi Aberahama i te pûpû ia Isaaka ei tusia i to ˈna tamataraahia.+ Ua ineine oia, o tei farii popou i te mau mea i fafauhia, i te pûpû i ta ˈna tamaiti otahi,+ 18 noa ˈtu tei parauhia ia ˈna: “Na roto mai ia Isaaka te parauhia to huaai.”+ 19 Tera râ, ua tiaturi oia e e nehenehe ta te Atua e faatia mai i ta ˈna tamaiti mai te pohe mai, e ua noaa mai iho â ia ˈna ta ˈna tamaiti mai te huru ra e no roto mai i te pohe, a riro atu ai ei faahohoˈaraa.+

20 No te faaroo atoa i haamaitai ai Isaaka ia Iakoba+ raua Esau+ no nia i te mau mea e tupu a muri aˈe.

21 No te faaroo i haamaitai ai Iakoba i na tamaiti a Iosepha+ e i haamori ai i te Atua a turui ai oia i nia i ta ˈna turutootoo,+ a fatata ˈi oia i te pohe.+

22 No te faaroo i faahiti ai Iosepha i te faarueraa te mau tamarii a Iseraela ia Aiphiti e i horoa ˈi i te faaueraa no nia i to ˈna mau ivi,* a fatata ˈi oia i te pohe.+

23 No te faaroo i hunahia ˈi Mose e to ˈna na metua e toru avaˈe i muri aˈe i to ˈna fanauraahia mai,+ no te mea ua ite atu raua e mea nehenehe te tamaiti,+ e aita raua i mǎtaˈu i te faaueraa a te arii.+ 24 No te faaroo i ore ai Mose i farii, i to ˈna paariraa mai,+ ia parauhia oia te tamaiti a te tamahine a Pharao,+ 25 ua maiti oia ia rave-ino-hia oia e te nunaa atoa o te Atua, eiaha râ ia fanaˈo i te mau mea navenave poto noa o te hara, 26 no te mea ua papu ia ˈna e e faufaa rahi aˈe to te faainoraa ta ˈna e faaruru ei Mesia i te mau taoˈa rahi a Aiphiti, te tiatonu ra hoi oia i te fanaˈoraa i te haamaitairaa. 27 No te faaroo i faarue ai oia ia Aiphiti,+ ma te ore râ e mǎtaˈu i te riri o te arii,+ ua mau papu noa hoi oia mai te huru ra e te ite ra oia i te Atua ite-ore-hia.+ 28 No te faaroo i faatupu ai oia i te Pasa e te pîpîraa toto ia ore te melahi a te Atua ia haapohe* i ta ratou mau tamaiti matahiapo.+

29 No te faaroo i na roto atu ai ratou i te miti Uteute mai i nia i te fenua mǎrô,+ tera râ, i te tamataraa to Aiphiti e na reira atoa, tapoˈihia maira ratou e te miti.+

30 No te faaroo i marua ˈi te mau patu o Ieriko i muri aˈe i to te nunaa Iseraela haaatiraa i te oire e hitu mahana.+ 31 No te faaroo i ore ai Rahaba te vahine taiata i pohe e te feia tei faaroo ore, no te mea ua farii maitai oia i na tane tei tonohia ia hiˈopoa omoˈe i te fenua.+

32 E eaha ˈtu â ta ˈu e parau? Eita hoi e taimehia ia faatia ˈtu vau no Gideona,+ Baraka,+ Samasona,+ Iepheta,+ Davida,+ e Samuela atoa,+ e te tahi atu mau peropheta. 33 No te faaroo i pau ai ia ratou te mau faatereraa arii tei aro mai,+ i tupu ai te parau-tia, i noaa ˈi te mau mea i fafauhia,+ i piri ai te vaha o te mau liona,+ 34 i ore ai i paapaa i te auahi ura,+ i ore ai i pohe i te ˈoˈe,+ i puai mai ai i te paruparuraa ra,+ i aro ai ma te itoito,+ i aˈuaˈu ai i te mau nuu i tomo mai.+ 35 Ua noaa mai i te tahi mau vahine ta ratou mau tamarii tei pohe na roto i te tia-faahou-raa.+ Area te tahi atu mau tane, ua haamauiuihia ïa tae noa ˈtu i te pohe, no te mea aita ratou i farii ia tuuhia ratou na roto i te tahi hoo, ia noaa râ te hoê tia-faahou-raa maitai aˈe. 36 Oia mau, te tamataraa ta te tahi atu i faaruru, te faaoooraa ïa e te huiraa, e hau atu â, te fifi auri+ e te tapearaa.+ 37 Ua pehihia ratou i te ofai,+ ua tamatahia to ratou faaroo, ua ˈeˈehia na ropu,* ua haapohehia i te ˈoˈe,+ ua hahaere noa ma te iri mamoe e te iri puaaniho i nia iho ia ratou,+ a vai ai ratou i roto i te veve e te ati+ e a rave-ino-hia ˈi ratou.+ 38 Aita i au i te ao nei taua mau taata ra. Ua overe haere ratou na te mau medebara e te mau mouˈa e te mau ana+ e te mau vahi apoo o te fenua.

39 Aita râ i noaa i teie mau taata atoa te mea i fafauhia, noa ˈtu e ua faaite atu te Atua e ua mauruuru oia ia ratou no to ratou faaroo, 40 no te mea ua ite atea te Atua i te tahi mea maitai aˈe no tatou,+ ia ore ratou ia tia-roa-hia, aita tatou.

12 No reira, e nahoa rahi ite* te haaati nei ia tatou, e haapae atoa anaˈe ïa i te mau mea teimaha atoa e te hara e faataupupu ohie ia tatou,+ e e horo anaˈe ma te faaoromai tamau i te hororaa i tuuhia i mua ia tatou,+ 2 a tiatonu ai ia Iesu te Aratai rahi e te Faatia roa o to tatou faaroo.+ No te oaoa i tuuhia i mua ia ˈna i faaoromai ai oia i te pou haamauiuiraa* ma te tâuˈa ore i te haama, e i parahi ai i te pae atau o te terono o te Atua.+ 3 Oia mau, a haamanaˈo maite i tei faaoromai rahi i te mau parau patoi a te feia rave hara+ o te faautua ra ia ratou iho, a ore atu ai outou e rohirohi e e toaruaru.+

4 I roto i ta outou taputôraa i taua hara ra, aita outou i aro aˈenei a tahe roa ˈtu ai to outou toto. 5 E ua moˈe roa ia outou te aˈoraa e horoahia ra ia outou ei tamaiti: “Ta ˈu tamaiti, eiaha e haafaufaa ore i te aˈo no ǒ mai ia Iehova,* eiaha atoa e toaruaru ia faaite o ˈna i ta oe hapa. 6 E aˈo hoi Iehova* i te feia ta ˈna e here ra, oia mau, e tairi oia i te taata atoa ta ˈna e farii ei tamaiti.”+

7 A faaoromai tamau, no te mea e aˈo* te reira no outou. Te na reira nei te Atua ia outou ei tamaiti na ˈna.+ O vai hoi te tamaiti e ore e aˈohia e to ˈna metua tane?+ 8 Mai te peu râ e aita outou paatoa i aˈohia, e tamarii ïa outou na te tahi atu, e ere i te tamaiti mau na ˈna. 9 Hau atu â, i aˈo noa na to tatou mau metua tane ia tatou, e ua faatura tatou ia ratou. Eiaha anei ïa tatou e auraro noa ˈtu â i te Metua o to tatou ora pae varua, a ora ˈtu ai?+ 10 Ua aˈo hoi ratou ia tatou no te hoê taime poto ia au i ta ratou i manaˈo e mea maitai, area te Atua, te aˈo ra ïa ia tatou no to tatou maitai ia nehenehe tatou e apiti i to ˈna moˈaraa.+ 11 E ere iho â i te mea oaoa i te taime e aˈohia mai ai, mea mauiui* râ. I muri aˈe râ, e faatupu te aˈo i te parau-tia o te horoa i te hau i te feia tei haapiihia i te reira.

12 No reira, a faaetaeta i te mau rima e tautau ra e te turi paruparu,+ 13 e a haamanina noa i te mau eˈa no to outou avae,+ ia ore te avae o te pirioi e maoi, ia ora râ. 14 A tapi i te parahi hau noa e te taata atoa,+ e i te haamoˈa ia outou,+ aita anaˈe aita ïa e taata e ite i te Fatu. 15 A haapao maitai ia ore te hoê ia ere i te hamani maitai rahi o te Atua, eiaha roa hoi e aˈa taero e oteo mai o te faatupu i te peapea, e mea rahi tei viivii i te reira.+ 16 E a ara eiaha roa ei taata o te rave ra i te mau peu taotoraa tia ore* i rotopu ia outou, eiaha atoa ei taata o te haafaufaa ore ra i te mau mea moˈa, mai ia Esau o tei horoa i ta ˈna tuhaa matahiapo no te hoê noa maa.+ 17 Ua ite hoi outou e i muri aˈe, i to ˈna hinaaroraa e fatu i te haamaitairaa, aita oia i fariihia. Noa ˈtu e ua onoono oia ma te roimata ia taui to ˈna metua tane i te manaˈo, aita oia i manuïa.+

18 Aita hoi outou i faafatata i te mouˈa e nehenehe e fafahia+ e tei ura i te auahi,+ e i te ata ereere e te poiri rahi e te vero,+ 19 e te oto o te pu+ e te reo o te Atua,+ ta te feia o tei faaroo atu i taparu ia Mose eiaha taua reo ra ia paraparau faahou mai ia ratou.+ 20 Ua riaria roa hoi ratou i te faaueraa: “Ia taahi noa ˈtu te tahi animara i nia i te mouˈa, ia pehihia ïa i te ofai.”+ 21 Oia atoa, no te riaria rahi o taua mau mea ra i parau ai Mose: “Te mehameha nei au e te rûrû nei.”+ 22 Tera râ, ua faafatata outou i te mouˈa Ziona,+ te oire o te Atua ora, te Ierusalema i te raˈi,+ e te mau ahuru tausani melahi 23 tei tairuru rahi mai,+ e te amuiraa o te mau tamaiti matahiapo tei papaihia te iˈoa i roto i te raˈi, e te Atua te Haava o te taata atoa,+ e te ora pae varua+ o te feia parau-tia tei tia-roa-hia,+ 24 e ia Iesu te arai+ o te tahi faufaa apî,+ e te toto tei pîpîhia e tei hau aˈe i te maitai i to Abela toto.+

25 A ara aˈunei outou e ore ai e faaroo* i tei paraparau ra. Taua feia ra tei ore i faaroo i te faaararaa a te Atua i te fenua nei, aita ïa i ora mai, hau atu â ïa tatou i te ore e ora mai ia fariu ê mai tatou i tei paraparau ra mai te raˈi mai!+ 26 I taua taime ra, ua faaaueue to te Atua reo i te fenua,+ i teie nei râ, ua fafau oia: “E faaaueue faahou â vau eiaha noa i te fenua, i te raˈi atoa râ.”+ 27 E teie nei, te faaite ra te parau “faahou â” e e mou te mau mea tei faaaueuehia, te mau mea i hamanihia, ia vai noa mai hoi te mau mea aita i faaaueuehia. 28 No reira, i te mea e e noaa ia tatou te hoê Faatereraa arii* e ore e tia ia faaaueuehia, e tamau noa anaˈe i te fanaˈo i te hamani maitai rahi, a nehenehe atu ai tatou e pûpû i te Atua i te hoê taviniraa moˈa ta ˈna e au ma te mǎtaˈu e te faatura. 29 E auahi ura hoi to tatou Atua.+

13 A tamau noa i te here te tahi i te tahi ei taeae.+ 2 Eiaha e haamoˈe i te farii maitai,*+ ma te na reira hoi vetahi i farii ai i te melahi, ore noa ˈi ratou i ite e e melahi.+ 3 A haamanaˈo i te feia i roto i te fare tapearaa,*+ mai te huru ra e ua tapeahia outou e o ratou,+ e te feia e hamani-ino-hia ra, mai te huru ra e te mauiui ra outou e o ratou.* 4 Ia tura te faaipoiporaa no te taata atoa, e ia vai viivii ore te roˈi o te feia faaipoipo,+ e faautua hoi te Atua i te feia e rave ra i te mau peu taotoraa tia ore* e te feia faaturi.+ 5 Eiaha roa ei nounou moni i roto i to outou oraraa,+ ia mauruuru râ i ta outou mau mea e vai nei.+ Ua parau hoi te Atua: “E ore roa vau e vaiiho ia oe, e e ore roa vau e faarue ia oe.”+ 6 Ia itoito roa hoi tatou e ia parau: “O Iehova* to ˈu tauturu. E ore au e mǎtaˈu. Eaha hoi ta te taata e nehenehe e rave i nia ia ˈu?”+

7 A haamanaˈo i te feia e aratai ra i rotopu ia outou,+ o tei parau ia outou i te parau a te Atua, e a hiˈopoa maite ai outou i ta to ratou haerea e faatupu ra, a pee i to ratou faaroo.+

8 Inanahi, i teie mahana e a muri noa ˈtu, e ore roa Iesu Mesia e taui.

9 Eiaha outou e pee hanoa i te mau haapiiraa ěê ua rau te huru, mea maitai aˈe hoi ia itoito to outou aau i te hamani maitai rahi eiaha râ i te maa,* aita hoi e maitai i noaa mai i te feia tei haafaufaa aˈe i te maa.+

10 E fata ta tatou aita e tiaraa to te feia e pûpû i te taviniraa moˈa i te tiahapa ia amu i tei pûpûhia i nia iho.+ 11 Te mau tino hoi o taua mau animara ra tei hopoihia to ratou toto e te tahuˈa rahi i roto i te vahi moˈa ei tusia no te hara, e taninahia ïa i rapae mai i te puhapa.+ 12 No reira Iesu i mauiui atoa ˈi i rapae mai i te uputa oire+ no te haamoˈa i te mau taata i to ˈna iho toto.+ 13 E haere anaˈe ïa ia ˈna ra i rapae mai i te puhapa, a faaruru ai i te faainoraa ta ˈna i faaruru,+ 14 aita hoi to tatou e oire i ǒ nei o te vai noa mai, te tiai ru nei râ tatou i te oire no a muri aˈe.+ 15 Na roto ia Iesu, e pûpû noa anaˈe i te Atua i te hoê tusia arueraa,+ oia hoi te mau parau no roto mai i to tatou vaha+ o te faaite i to ˈna iˈoa i te taata atoa.+ 16 Hau atu â, eiaha e haamoˈe i te rave i te maitai e i te tufa i ta outou mau mea na vetahi ê,+ e mauruuru hoi te Atua i taua mau huru tusia ra.+

17 A faaroo i te feia e aratai ra ia outou+ e a auraro atu,+ te tiai noa ra hoi ratou ia outou* a haavahia ˈtu ai ratou no ta ratou i rave,+ ia nehenehe ratou e na reira ma te oaoa eiaha râ ma te autâ, mea ino hoi no outou ia autâ ratou.

18 A tamau noa i te pure no matou, ua papu hoi ia matou e e manaˈo haava mâ* to matou e te hinaaro ra matou ia afaro noa to matou haerea i te mau mea atoa.+ 19 Tera râ, te faaitoito nei au ia outou ia pure ia hoˈi oioi atu vau ia outou ra.

20 E teie nei, te Atua hau o tei faatia mai te pohe mai i te tiai mamoe rahi,+ to tatou Fatu ra o Iesu, i te toto o te hoê faufaa mure ore, 21 ia horoa ˈtu ïa i te mau mea maitatai atoa no te rave i to ˈna hinaaro, a turai atu ai ia tatou na roto ia Iesu Mesia ia rave i ta ˈna e mauruuru. I te Atua te hanahana e a muri noa ˈtu. Amene.

22 E teie nei, te faaitoito nei au ia outou, taeae ma, ia faaroo maite i teie parau faaitoitoraa, ua papai hoi au i te hoê rata poto na outou. 23 Te hinaaro ra vau ia ite outou e ua tuuhia mai to tatou taeae Timoteo. Ia tae oioi mai oia, o mâua ïa te haere atu e hiˈo ia outou.

24 A aroha ˈtu i te feia atoa e aratai ra ia outou e te feia moˈa atoa. Te aroha ˈtu nei to Italia+ ia outou.

25 Ei ia outou paatoa te hamani maitai rahi o te Atua.