TE RATA IA TITO

1 O Paulo, e tavini na te Atua e e aposetolo na Iesu Mesia ia au i te faaroo o te feia maitihia e te Atua e te ite papu i te parau mau tei au i te haamoriraa i te Atua anaˈe 2 e tei niuhia i nia i te tiaturiraa o te ora mure ore+ ta te Atua, te ore e nehenehe e haavare,+ i fafau mai tahito mai â. 3 Ua faaite râ oia i ta ˈna parau i te taime tano na roto i te pororaa i tuuhia mai ia ˈu ia au+ i te faaueraa a to tatou Faaora, te Atua. 4 Te papai nei au ia Tito, e tamaiti mau na ˈu e e hoa i roto i te faaroo:

Ei ia oe ra te hamani maitai rahi e te hau no ǒ mai i te Atua te Metua e no ǒ mai i te Mesia ra o Iesu to tatou Faaora.

5 Ua vaiiho vau ia oe i Kereta ia faatitiaifaro oe i te mau mea e titauhia ia faatitiaifaro, e ia faatoroa oe i te tahi mau matahiapo i tera e tera oire mai ta ˈu i faaue atu: 6 e tane aita i parihia i te raveraa i te mea ino, e tane faaipoipo i te hoê noa vahine, tei roto ta ˈna mau tamarii i te faaroo e aita i parihia i te ohipa haapaoraa ore e te orure hau.+ 7 Ei tiaau hoi na te Atua, eiaha roa oia ia parihia i te raveraa i te mea ino, eiaha atoa te taata haapaari,+ te riri hanoa,+ te taero ava, te haavî,* te nounou taoˈa ia apîhia oia, 8 ei taata farii maitai râ oia,+ te au i te rave i te mau ohipa maitatai, te manaˈo+ paari,* te parau-tia,+ te haapao maitai, te haavî ia ˈna iho,+ 9 e ia tapea maite oia i te parau mau* i roto i ta ˈna huru haapiiraa i te taata,+ a nehenehe atu ai oia e faaitoito* ia vetahi ê maoti te haapiiraa maitai*+ e e faaite+ i te hapa a te feia e patoi mai.

10 E mea rahi hoi te taata auraro ore, te utata faufaa ore e te faahema, te feia iho â râ e turu ra i te peritomeraa.+ 11 A haamamû atu i to ratou vaha, no te mea te faahuehue noa ra tera mau taata i te faaroo o te mau utuafare taatoa ma te haapii atu i te parau tano ore ia apîhia ratou. 12 Ua parau hoê o ratou, ta ratou iho peropheta: “E feia haavare to Kereta, e animara oviri taehae, e feia tamaa roa ma te haapuupuu e e faatau.”

13 E parau mau iho â teie. No reira, a tamau i te faahapa etaeta ia ratou ia itoitohia mai ratou i roto i te faaroo, 14 ma te ore e tâuˈa i te mau aai a te ati Iuda e te mau faaueraa a te taata o te faarue i te parau mau. 15 E mea mâ te mau mea atoa no te feia mâ.+ No te feia viivii râ e ere ra i te faaroo, aita ïa e mea mâ, ua viivii hoi to ratou feruriraa e to ratou atoa manaˈo haava.+ 16 Te parau roa ra ratou e ua ite ratou i te Atua, aita nei râ ia au i ta ratou mau ohipa,+ no te mea e mea hairiiri ratou e te faaroo ore, e aita ratou i fariihia no te rave i te tahi ohipa maitai.

2 Area oe, a tamau i te parau i te mea e au i te haapiiraa maitai.*+ 2 Ei haerea au noa to te mau tane paari aˈe, te tura, te manaˈo paari, te itoito i roto i te faaroo, te here e te faaoromai tamau. 3 Na reira atoa, ei haerea e au i te feia moˈa to te mau vahine paari aˈe, eiaha te pari haavare e te inu-hua-raa i te uaina, ei vahine râ e haapii atu i te mea maitai, 4 a nehenehe atu ai ratou e aˈo* i te mau vahine apî aˈe ia here i ta ratou iho tane faaipoipo, ia here i ta ratou mau tamarii, 5 ei manaˈo paari to ratou, te haerea mâ, te rave i te ohipa i te fare,* te maitai e te auraro i ta ratou iho tane faaipoipo+ ia ore te parau a te Atua ia faainohia.

6 Na reira atoa, a tamau i te onoono i te mau tane apî aˈe ei manaˈo paari to ratou,+ 7 ma te faaite atu i te hiˈoraa i roto i te mau ohipa maitai roa atoa. A haapii atu i te mea viivii ore* ma te feruriraa paari,+ 8 ma te faaohipa i te parau maitai* te ore e nehenehe e faahapahia,+ a haama ˈtu ai te feia e patoi mai, aita roa hoi ta ratou e parau faaino ia tatou.+ 9 Ia auraro te mau tîtî i to ratou mau fatu i te mau mea atoa,+ ia mauruuru to ratou fatu ia ratou, ma te ore e vaha ˈtu 10 e ma te ore e eiâ ia ratou,+ ei feia tiaturi-roa-hia râ a faanehenehe roa ˈtu â ˈi ratou i te haapiiraa a to tatou Faaora, te Atua.+

11 Ua faaitehia hoi to te Atua hamani maitai rahi, o te horoa mai i te faaoraraa i te mau huru taata atoa.+ 12 E haapii mai te reira ia tatou ia haapae i te haerea ino e oia atoa te mau hinaaro o teie nei ao,+ e ia ora ma te manaˈo paari e te parau-tia e te haamori i te Atua anaˈe i roto i teie nei ao,*+ 13 a tiai noa ˈi tatou i te tiaturiraa faahiahia+ e te faaiteraa mai o te Atua Manahope e o to tatou Faaora o Iesu Mesia ia raua ma te hanahana, 14 ua horoa hoi te Mesia ia ˈna iho+ no te faaora* ia tatou+ i te mau ohipa ino atoa e no te tamâ i te hoê nunaa no ˈna iho ei feia i maiti-taa-ê-hia no ˈna e te itoito rahi i roto i te mau ohipa maitai roa.+

15 A tamau i te faahiti i teie mau mea e te aˈo* e te faaite atu i te hapa ma te mana rahi.+ Eiaha ei taata e vahavaha ia oe.

3 A haamanaˈo noa ia ratou ia auraro e ia faaroo i te mau faatereraa e te feia mana,+ ia ineine no te mau ohipa maitatai atoa, 2 eiaha ia faaino i te taata e eiaha ia tatamaˈi, ei haerea au noa râ to ratou+ e te mǎrû i nia i te taata atoa.+ 3 E feia maˈua hoi tatou na mua ˈˈe e te faaroo ore, te vare hanoa, te faatîtîhia e te mau hinaaro e rave rau e te mau mea navenave, a rave noa ˈi i te ino e a pohehae noa ˈi, e feia ohipa ino e te hae te tahi i te tahi.

4 Tera râ, i te faaiteraahia mai te hamani maitai o to tatou Faaora, te Atua+ e to ˈna here no te huitaata 5 (e ere no ta tatou mau ohipa parau-tia atoa i rave,+ no to ˈna iho râ aroha*),+ ua faaora oia ia tatou ma te tamâ ia tatou ia ora mai tatou+ e ma te faataata apî ia tatou maoti te varua moˈa.*+ 6 Ua ninii rahi mai oia i teie varua i nia ia tatou na roto ia Iesu Mesia to tatou Faaora,+ 7 e ua parau-anaˈe-hia tatou e taata parau-tia na roto i to ˈna hamani maitai rahi,+ ia noaa mai ïa ia tatou+ te ora mure ore ia au i to tatou tiaturiraa.+

8 E mea papu teie mau parau, e e hinaaro vau ia haafaufaa oe i te reira, a feruri maite atu ai te feia e tiaturi ra i te Atua i te raveraa i te mau ohipa maitai roa. E mea maitai roa teie mau mea e faufaahia ˈi te taata.

9 Eiaha roa râ oe e faaô i roto i te mau aimârôraa maamaa, te mau pǎpǎraa tupuna e te mau tatamaˈiraa e aroraa no nia i te Ture, aita hoi e apî e mea faufaa ore.+ 10 Area te taata e haamau i te hoê pǔpǔ faaroo amaha,+ a aˈo maitai* ia ˈna e piti aˈe taime,+ e ia ore oia ia faaroo, eiaha ïa e amuimui faahou ia ˈna,+ 11 ua hahi ê hoi tera taata i te eˈa tia, e te hara ra oia e te faahapa ra to ˈna haerea ia ˈna iho.

12 Ia tono atu vau ia Aretema aore ra ia Tuhiko+ ia oe ra, a imi i te mau ravea atoa ia haere mai oe ia ˈu nei i Nikopoli, ua faaoti hoi au e faaea i reira i te tau toˈetoˈe. 13 A tauturu maite ia Zena, mea ite i te Ture, e ia Apolo eiaha raua ia ere i te tahi mea i to raua tere.+ 14 Ia haapii atoa râ to tatou mau taeae i te rave i te mau ohipa maitai roa no te horoa ˈtu i te tauturu ia hinaaro-ru-hia,+ ia ore hoi ratou e riro ei tavini aita e nuu ra i mua.+

15 Te aroha ˈtu nei te mau taeae atoa ia ˈu nei ia oe. A aroha ˈtu i tei here ra ia matou i roto i te faaroo.

Ei ia outou paatoa te hamani maitai rahi.