TE PITI O TE RATA IA TIMOTEO

1 O Paulo, e aposetolo na te Mesia ra o Iesu no te hinaaro o te Atua ia au i te parau fafau o te ora na roto i te Mesia ra o Iesu,+ 2 ia Timoteo, ta ˈu tamaiti here:+

Ei ia oe te hamani maitai rahi, te aroha* e te hau no ǒ mai i te Atua te Metua e i te Mesia ra o Iesu to tatou Fatu.

3 Te mauruuru nei au i te Atua ta ˈu e pûpû nei i te hoê taviniraa moˈa mai to ˈu mau tupuna ra ma te manaˈo haava mâ, a haamanaˈo noa ˈi ia oe i roto i ta ˈu mau taparuparuraa i te po e te ao. 4 Te hinaaro ru nei au e ite ia oe a haamanaˈo ai i to oe roimata, a oaoa roa ˈtu ai au. 5 Te haamanaˈo ra hoi au i to oe faaroo haavarevare ore,+ tei itehia na mua roa i roto i to oe mama ruau ra o Loidi e i to oe metua vahine ra o Eunike, e ua papu ia ˈu e tei roto atoa ia oe taua faaroo ra.

6 No reira vau e haamanaˈo ai ia oe ia atuatu i te ô a te Atua e vai ra i roto ia oe mai te hoê auahi ra, i to ˈu tuuraa i to ˈu rima i nia iho ia oe.+ 7 Aita hoi te puai ohipa o te Atua i horoa mai i te hoê aau taiâ,+ i te hoê râ aau itoito+ e te here e te manaˈo paari. 8 Eiaha ïa oe e haama i te poro no nia i to tatou Fatu+ e eiaha atoa e haama ia ˈu tei tapeahia no ˈna, ia ineine râ oe i te mauiui+ no te parau apî oaoa ma te turui i nia i te puai o te Atua.+ 9 Ua faaora oia ia tatou e ua titau manihini ia tatou ia riro ei feia moˈa,+ e ere no ta tatou mau ohipa, no ta ˈna iho râ opuaraa e no to ˈna hamani maitai rahi.+ Mai tahito mai â i horoahia mai ai to ˈna hamani maitai rahi i roto i te Mesia ra o Iesu, 10 i teie nei râ, ua ite-maitai-hia te reira na roto i te faaiteraa mai to tatou Faaora te Mesia ra o Iesu ia ˈna iho,+ oia tei haamou i te pohe+ e tei faaite mai na roto i te parau apî oaoa+ e nafea e noaa ˈi te ora+ e te tahuti ore,+ 11 no taua ohipa ra hoi i faatoroahia ˈi au ei taata poro, ei aposetolo e ei taata haapii.+

12 No reira ïa vau e roo-atoa-hia ˈi i taua mau mauiui nei,+ aita râ vau e haama ra.+ Ua ite hoi au o vai te Atua ta ˈu e tiaturi ra, e ua papu ia ˈu e e nehenehe oia e faaherehere i ta ˈu i tuu atu ia ˈna ra e tae roa ˈtu i te mahana haavaraa.+ 13 A tapea noa i te hohoˈa o te mau parau maitatai*+ ta oe i ite ia ˈu nei ma te faaroo e te here i roto i te Mesia ra o Iesu. 14 A faaherehere i teie mau mea maitai roa tei tuuhia ia oe ra na roto i te varua moˈa* e vai ra i roto ia tatou.+

15 Ua ite oe e ua faarue te mau taata atoa no te fenua Asia+ ia ˈu, oia atoa o Phugelo e o Heremogene. 16 Ia aroha* mai te Fatu i te utuafare o Onesiphoro,+ mea pinepine hoi to ˈna faaitoitoraa ia ˈu, e aita oia i haama i to ˈu nei mau fifi auri. 17 Ia ˈna hoi i haere mai i Roma, ua imi maite oia ia ˈu e ua itehia mai au. 18 Ia aroha* mai te Fatu ra o Iehova* ia ˈna i te mahana haavaraa. E ua ite maitai oe i ta ˈna i rave no ˈu i Ephesia.

2 No reira ta ˈu tamaiti,+ ia noaa noa ia oe te puai maoti te hamani maitai rahi e vai ra i te Mesia ra o Iesu. 2 E te mau parau ta oe i faaroo ia ˈu e tei haapapuhia e te ite e rave rahi,+ o ta oe ïa e tuu atu i te mau tane haapao maitai, a ite atoa ˈtu ai ratou i te haapii maitai ia vetahi ê. 3 Ei faehau mau+ na te Mesia ra o Iesu, ia ineine oe i te faaruru i te ati.+ 4 Aita e taata e tavini ra ei faehau e faaô* i roto i te ohipa tapihooraa o te oraraa nei,* ia mauruuru hoi te taata tei rave ia ˈna ei faehau. 5 I roto atoa i te mau tataˈuraa, eita te re* e noaa i te taata tataˈu ia ore oia ia haapao i te mau faatureraa.+ 6 O te taata faaapu itoito te amu na mua i te mau maa hotu ta ˈna i tanu. 7 A haamanaˈo noa i ta ˈu e parau nei. E maramarama oe i* te mau mea atoa maoti te Fatu.

8 A haamanaˈo e ua faatiahia Iesu Mesia mai te pohe mai,+ e huaai o ˈna no Davida+ ia au i te parau apî oaoa ta ˈu e poro nei,+ 9 no taua parau ra hoi e mauiui ai au e e mau ai i te fare tapearaa mai te hoê taata ohipa ino.+ Tera râ, aita te parau a te Atua i tapeahia.+ 10 No reira ïa vau e faaoromai noa ˈi i te mau mea atoa no te maitai o te feia maitihia,+ ia noaa atoa ia ratou te faaoraraa maoti te Mesia ra o Iesu, e te hanahana mure ore atoa. 11 E parau papu teie: Ia pohe tatou e o ˈna, e ora atoa ïa tatou e o ˈna.+ 12 Ia faaoromai noa tatou, e faatere atoa ïa tatou ei arii e o ˈna.+ Ia haavare ite ore tatou ia ˈna, e haavare ite ore atoa oia ia tatou.+ 13 Ia ore noa ˈtu tatou e tapea i ta tatou parau, e tapea noa oia i ta ˈna parau, e haa noa hoi oia ia au i to ˈna huru mau.

14 A haamanaˈo noa ia ratou i teie mau parau, ma te aˈo* ia ratou i te aro o te Atua eiaha e mârô, aita roa hoi e faufaa no te mea e haamauiui* te reira i te feia e faaroo ra. 15 A tutava ia fariihia oe e te Atua ei rave ohipa aita e haama ra i ta ˈna i rave, o te faaohipa maitai i te parau o te parau mau.+ 16 Eiaha râ e faaroo i te mau parau faufaa ore e patoi i te mea moˈa,+ e faaatea ê hoi te reira i te taata i te Atua, 17 e e parare ta ratou mau parau mai te maˈi aai. To roto atoa o Humenaio e o Phileto ia ratou.+ 18 Ua hahi ê raua i te parau mau, te parau nei hoi raua e ua tupu aˈena te tia-faahou-raa,+ e te tuino nei raua i te faaroo o te tahi pae. 19 Noa ˈtu râ, te mau papu noa ra te niu ta te Atua i haamau ma teie tapao i nia iho: “Ua ite Iehova* i to ˈna mau taata,”+ e “Ia haapae te feia atoa e tiaoro ra i te iˈoa o Iehova*+ i te parau-tia ore.”

20 E teie nei, i roto i te hoê fare rahi, e ere ïa i te farii* auro e te ario anaˈe, e farii raau atoa râ e te araea, no te hoê faaohiparaa tura vetahi, area vetahi atu no te hoê ïa faaohiparaa tura ore. 21 No reira, ia atea ê mai te tahi i te mau farii no te hoê faaohiparaa tura ore, e riro ïa oia ei mauhaa* no te hoê faaohiparaa tura, tei haamoˈahia, faufaa no to ˈna fatu, tei faaineinehia no te mau ohipa maitatai atoa. 22 No reira, a horo ê i te mau hinaaro o te apîraa, a tapi râ i te parau-tia, te faaroo, te here, te hau e te feia atoa e tiaoro ra i te Fatu ma te aau mâ.

23 Hau atu â, eiaha e faaroo i te mau aimârôraa a te maamaa e te feia ite ore,+ ua ite hoi oe e e faatupu te reira i te tatamaˈiraa. 24 Eiaha roa hoi te hoê tavini a te Fatu e tatamaˈi, e hamani maitai râ oia i te taata atoa,+ ua ite oia i te haapii atu, te haavî ia ˈna iho ia hamani-ino-hia mai,+ 25 te haapii atu na roto i te mǎrû i te feia mârô.+ Peneiaˈe e faatia te Atua ia ratou ia tatarahapa* a ite papu atu ai ratou i te parau mau,+ 26 ia feruri maitai faahou ratou e ia ora mai i te marei a te Diabolo, inaha hoi, ua haru-ora-noa-hia ratou e ana no te rave i to ˈna hinaaro.+

3 Ia ite râ oe e ia tae i te mau mahana hopea,+ e tau ino mau ïa e te fifi ia faaruru. 2 E haapao noa te taata ia ratou iho, e nounou i te moni, e faateitei, e teoteo, e faaino, e faaroo ore i te metua, e mauruuru ore, e taiva, 3 e au ore te taata te tahi i te tahi, e etaeta, e pari haavare, e haavî ore ia ratou iho, e iria, e au ore i te maitai, 4 e haavare, e farii ore i te aˈoraa, e faaoru, mea au na ratou i te mau mea navenave eiaha râ i te Atua, 5 ia hiˈohia ˈtu e au ra e te haamori ra ratou i te Atua, aita râ ratou e faaohipa ra i te reira.+ A fariu ê atu i taua mau taata ra. 6 No rotopu mai hoi ia ratou te mau tane e faaô i roto i te mau fare ma te haavare e e hopoi tîtî i te mau vahine paruparu tei teimaha i te hara e tei faatîtîhia e te mau hinaaro e rave rau, 7 te haapii noa nei ratou, eita râ ta ratou e nehenehe e ite papu i te parau mau.

8 Mai ia Iane e Iamebera i patoi ia Mose, te patoi noa atoa nei ratou i te parau mau. Ua ino roa te feruriraa o tera mau taata, tei ore i fariihia ia au i te faaroo. 9 Eita râ ratou e na reira noa, e ite-maitai-hia hoi to ratou maamaa* e te taata atoa, mai te reira atoa no Iane e Iamebera.+ 10 Ua pee maite râ oe i ta ˈu mau haapiiraa, to ˈu huru oraraa,+ ta ˈu fa, to ˈu faaroo, to ˈu faaoromai, to ˈu here, to ˈu faaoromai tamau, 11 te hamani-ino-raa e te mauiui ta ˈu i faaruru i Anetiohia,+ Ikonio,+ Lusetera.+ Ua faaruru vau i te reira, e ua faaora mai te Fatu ia ˈu i taua mau mea atoa.+ 12 Oia mau, te feia atoa e hinaaro e haamori i te Atua anaˈe ma te hoê e te Mesia ra o Iesu, e hamani-ino-atoa-hia ïa.+ 13 Tera râ, e ino roa ˈtu â te feia ino e te feia haavare, i te haavareraa ˈtu e te haavareraahia mai.+

14 Area oe, a tamau i roto i te mau mea i haapiihia ia oe e i tauturuhia ia oe ia tiaturi,+ e ua ite oe na vai i haapii atu ia oe 15 e mai to oe tamariiraa+ to oe iteraa i te mau Papai moˈa+ e noaa ˈi ia oe te paari a faaorahia ˈtu ai oe na roto i te faaroo i te Mesia ra o Iesu.+ 16 Te mau Papai moˈa atoa, ua papaihia ïa i raro aˈe i te aratairaa a te varua o te Atua,+ e mea faufaa no te haapii mai,+ no te faaite mai i te hapa, no te faaafaro* i te mau mea, no te aˈo mai ia au i te parau-tia,+ 17 ia aravihi roa te taata o te Atua e ia ineine roa no te mau ohipa maitatai atoa.

4 E faaueraa mana ta ˈu e tuu atu ia oe i te aro o te Atua e o te Mesia ra o Iesu, o te haava+ i te feia ora e te feia pohe,+ e na roto i to ˈna faaiteraa mai ia ˈna iho+ e ta ˈna Faatereraa arii:*+ 2 A poro i te parau.+ A rave ru i te reira i te taime maitai e te taime fifi. A faaite atu i te hapa,+ a aˈo atu e a faaitoito atu ma te faaoromai atoa e te aravihi i te haapii.+ 3 E haere mai hoi te hoê tau e tâhiti roa ˈi ratou i te haapiiraa maitai,*+ ia au râ i to ratou iho mau hinaaro, e imi ratou i te tahi mau orometua na ratou no te faanavenave i to ratou tariˈa.*+ 4 E fariu ê ratou i to ratou tariˈa i te parau mau a faaroo atu ai i te mau aai. 5 O oe râ, a feruri maite noa i te mau mea atoa, a faaruru i te fifi,+ a rave i te ohipa a te hoê taata poro evanelia,* a rave faahope roa i ta oe taviniraa.+

6 Mai te tusia uaina hoi au e niniihia nei i nia i te fata,+ e ua fatata roa te taime e pohe ai au.+ 7 Ua aro vau i te aroraa maitai roa,+ ua hope ia ˈu te hororaa,+ ua pee au i te faaroo. 8 Mai teie atu nei, ua faahereherehia no ˈu te hei upoo o te parau-tia+ ta te Fatu, te haava parau-tia,+ e horoa na ˈu i te mahana haavaraa ei haamaitairaa,+ eiaha noa râ na ˈu, na te feia atoa râ tei tiai ru i to ˈna faaiteraa mai ia ˈna iho.

9 A imi i te mau ravea atoa ia tae oioi mai oe ia ˈu ra. 10 Ua faarue hoi Dema+ ia ˈu no to ˈna nounou i teie nei ao* e ua reva ˈtu i Tesalonia, o Kerese i Galatia e o Tito i Dalemetia. 11 O Luka anaˈe tei ia ˈu nei. A rave ia Mareko na muri ia oe, e tauturu rahi hoi oia no ˈu i roto i te taviniraa. 12 Tera râ, ua tono vau ia Tuhiko+ i Ephesia. 13 Ia haere mai oe, a afai mai i te ahu roa mahanahana ta ˈu i vaiiho i Teroa i ǒ Karepo, e te mau otaro, te mau otaro iri animara iho â râ.

14 Ua hamani-ino-rahi-hia vau e Alesanedero te taata tupai veo. Na Iehova* e faautua ia ˈna ia au i ta ˈna i rave mai.+ 15 O oe atoa, a haapao maitai ia ˈna, ua patoi uˈana roa mai oia i ta matou poroi.

16 I to ˈu tiaraa i mua i te feia mana no te taime matamua, aita hoê aˈe i turu mai ia ˈu, ua faarue paatoa râ ratou ia ˈu. Eiaha râ ratou ia faahapahia no te reira. 17 Tera râ, ua turu e ua haapuai mai te Fatu ia ˈu ia hope roa te parau apî oaoa i te porohia na roto ia ˈu e ia faaroo te mau nunaa atoa i te reira.+ E ua faaorahia vau i te vaha o te liona.+ 18 E faaora te Fatu ia ˈu i te mau ohipa ino atoa e e faaherehere oia ia ˈu no ta ˈna Faatereraa arii i te raˈi.+ Ei ia ˈna ra te hanahana e a muri noa ˈtu. Amene.

19 A aroha ˈtu ia Periseka raua Akuila+ e te utuafare o Onesiphoro.+

20 Ua faaea o Eraseto+ i Korinetia, ua vaiiho râ vau ia Terophimo+ i Mileto no te mea e maˈi to ˈna. 21 A imi i te mau ravea atoa ia tae mai oe hou te tau toˈetoˈe.

Te aroha ˈtu nei o Eubalo, na reira atoa o Pude, o Lino e o Kalaudia e te mau taeae atoa.

22 Ia haamaitai te Fatu i to oe huru feruriraa. E ia hamani maitai rahi oia ia outou.