TE RATA MATAMUA IA TIMOTEO

1 O Paulo, e aposetolo na te Mesia ra o Iesu na roto i te faaueraa a te Atua to tatou Faaora e na roto atoa i te faaueraa a te Mesia ra o Iesu, te niu o to tatou tiaturiraa,+ 2 ia Timoteo,*+ e tamaiti mau na ˈu+ i roto i te faaroo:

Ei ia oe te hamani maitai rahi, te aroha* e te hau no ǒ mai i te Atua te Metua e i te Mesia ra o Iesu to tatou Fatu.

3 Mai ta ˈu i faaitoito ia oe e faaea i Ephesia i to ˈu faaineineraa e haere i Makedonia, te na reira faahou atu nei au, ia faaue hoi oe i te tahi pae eiaha e haaparare i te mau haapiiraa hape, 4 eiaha atoa e tâuˈa ˈtu i te mau aai+ e te mau pǎpǎraa tupuna. Aita hoi to te reira e faufaa,+ hopea ore noa râ i te faatupu i te aimârô, eita râ e noaa mai te tahi noa ˈˈe maitai no ǒ mai i te Atua ia au i te faaroo. 5 Te fa o teie faaueraa,* o te here ïa+ no roto mai i te hoê aau mâ e te hoê manaˈo haava maitai e te faaroo+ haavarevare ore. 6 Ua atea ê vetahi i taua mau mea nei a faaô atu ai ia ratou i roto i te tahi mau utataraa faufaa ore.+ 7 E hinaaro ratou e riro ei orometua+ no te ture, tera râ, aita nei hoi ratou e taa ra i te mau mea ta ratou e parau ra aore ra ta ratou e mârô uˈana ra.

8 E teie nei, ua ite tatou e e mea maitai te Ture, ia faaohipa-maitai-hia râ.* 9 Te farii atoa ra tatou e aita taua ture ra i haamauhia no te hoê taata parau-tia, no te feia ofati ture râ+ e te orure hau, te faatura ore i te Atua e te rave hara, e te taiva,* e te vahavaha i te mea moˈa, e te taparahi pohe i to ˈna metua tane e metua vahine, e te taparahi taata, 10 e te rave i te mau peu taotoraa tia ore,* e te tane e taoto i te tane, e te haru taata, e te haavare, e te ore e tapea i ta ˈna euhe,* e te rave i te mau mea atoa e patoi ra i te haapiiraa maitai*+ 11 tei au i te parau apî oaoa hanahana a te Atua oaoa tei horoahia mai ia ˈu.+

12 Te mauruuru nei au i te Mesia ra o Iesu to tatou Fatu tei haapuai ia ˈu no te mea ua ite mai oia i to ˈu haapao maitai ma te faatoroa ia ˈu no te hoê taviniraa,+ 13 noa ˈtu e na mua ˈˈe e taata faaino vau i te Atua e te hamani ino i te taata e te faateitei.+ Ua arohahia mai râ vau,* no te mea i na reira na vau no te taa ore e te ereraa i te faaroo. 14 Ua rahi roa râ te hamani maitai rahi o to tatou Fatu, e ua rahi roa atoa te faaroo e te here no ǒ mai i te Mesia ra o Iesu. 15 E nehenehe teie parau e tiaturihia e e farii-roa-hia: Ua haere mai te Mesia ra o Iesu i te ao nei no te faaora i te feia hara.+ O vau nei hoi te taata hara roa ˈˈe.+ 16 Ua arohahia mai râ vau,* a nehenehe atu ai te Mesia ra o Iesu e faaite atu i te rahi o to ˈna faaoromai na roto ia ˈu te taata hara roa ˈˈe, ei hiˈoraa ïa no te feia atoa e tuu i to ratou faaroo ia ˈna, a noaa mai ai ia ratou te ora mure ore.+

17 E teie nei, ei te Arii mure ore ra,+ te tahuti ore+ e te ite-ore-hia,+ te Atua hoê roa,+ te tura ïa e te hanahana e a muri noa ˈtu. Amene.

18 Teie te faaueraa* ta ˈu e tuu ia oe Timoteo ta ˈu tamaiti, ia au i te mau parau i faaite-atea-hia no oe, e maoti hoi taua mau parau nei, ia nehenehe oe ia aro noa i te aroraa maitai,+ 19 ma te tapea i te faaroo e te hoê manaˈo haava maitai,+ ta te tahi pae hoi i tuu i te hiti, a mou atu ai to ratou faaroo mai te hoê pahi tei tomo i raro i te miti. 20 To roto atoa o Humenaio+ e o Alesanedero, e ua tuu vau ia raua ia Satani ra*+ ia haapiihia e ia aˈohia raua eiaha e faaino i te Atua.

2 Na mua roa, te faaitoito nei au ia outou paatoa ia tamau i te taparuparu, te pure, te ani no vetahi ê e te haamauruuru i te Atua no te mau huru taata atoa, 2 no te mau arii e no te feia tiaraa teitei* atoa,+ ia nehenehe tatou ia ora hau noa e te haafifi-ore-hia i te haamoriraa i te Atua anaˈe ma te tura.+ 3 E mea maitai hoi te reira e te au i te aro o to tatou Faaora, te Atua,+ 4 tei hinaaro ia ora mai te mau huru taata atoa+ e ia noaa ia ratou te ite papu i te parau mau. 5 Hoê anaˈe hoi Atua,+ e hoê anaˈe arai+ i rotopu i te Atua e te taata,+ te hoê ïa taata, te Mesia ra o Iesu,+ 6 tei horoa ia ˈna iho no te taata atoa* ei hoo* aifaito.+ E faaite-mau-hia te reira i te taime tano. 7 No teie faaiteraa+ i faatoroahia ˈi au ei taata poro e ei aposetolo,+ e parau mau ta ˈu e aita vau e haavare ra, oia hoi ei taata haapii i te mau nunaa ěê+ no nia i te faaroo e te parau mau.

8 No reira, e hinaaro vau ia tamau te mau tane i te pure i te Atua i te mau vahi atoa e putuputu ai outou, i te hopoiraa i te rima moˈa i nia,+ ma te riri ore+ e te mârô ore.+ 9 E hinaaro atoa vau ia faanehenehe te mau vahine ia ratou i te ahu e tano,* ma te tura e ma te manaˈo paari,* eiaha râ ma te rouru firi faaunauna-roa-hia e te piru e te poe e te ahu moni rahi,+ 10 mai tei au râ i te mau vahine e parau ra e e haamori ratou i te Atua,+ oia hoi maoti te mau ohipa maitatai.

11 Ia haapii te vahine ma te mamû* noa e te auraro maite.+ 12 Eita vau e faatia i te hoê vahine ia haapii aore ra ia faatere i te hoê tane, ia vai mamû* noa râ oia e tia ˈi.+ 13 O Adamu hoi tei hamanihia na mua, i muri aˈe o Eva ïa.+ 14 E ere atoa o Adamu tei vare, o te vahine râ tei vare roa+ a hara ˈtu ai oia. 15 Tera râ, e faahereherehia te vahine i te fanauraa i te tamarii,+ ia mau maite â oia* i te faaroo, te here, te haerea moˈa e oia atoa te manaˈo paari.*+

3 E nehenehe teie parau e tiaturihia: Ia titau te hoê tane i te hopoia tiaau,+ te hinaaro ra oia i te hoê ohipa maitai. 2 Eiaha ta te tiaau e hapa ia itehia, ei tane faaipoipo i te vahine hoê râ, te haerea au noa, te manaˈo paari,*+ te haerea afaro, te farii i te taata,+ te ite i te haapii,+ 3 e ere i te taata inu ava+ e te taata haavî,* e feruriraa au noa+ râ to ˈna, e ere i te taata imi hara,+ te nounou moni,+ 4 e tane râ e faatere* maitai i to ˈna iho utuafare, e auraro maite hoi ta ˈna mau tamarii ia ˈna ma te tura+ 5 (ia ore hoi te tahi tane ia ite i te faatere* i to ˈna iho utuafare, e nafea ïa oia e aupuru ai i te amuiraa a te Atua?), 6 e ere i te hoê tane no riro noa mai nei ei pǐpǐ,+ a faaoru atu ai oia no te teoteo e a roohia ˈtu ai i te hoê â utua e ta te Diabolo. 7 Ei roo maitai* atoa to ˈna i te feia no rapae e tia ˈi,+ ia ore oia ia faainohia e te taata* e ia topa ˈtu i roto i te marei a te Diabolo.

8 Na reira atoa, ei tane haapao maitai te mau tavini tauturu e tia ˈi, eiaha te vaha piti,* te inu hua i te uaina e te nounou faufaa,+ 9 o te mau papu râ i te parau huna moˈa o te faaroo ma te manaˈo haava mâ.+

10 E ia tamatahia ratou na mua ia itehia e e au anei ia ratou taua hopoia ra.* E aita anaˈe e mea e faahapa ra ia ratou,+ ia riro ïa ratou ei tavini tauturu.

11 Na reira atoa, ei manaˈo paari to te mau vahine e tia ˈi, eiaha te afai parau haavare e te faaino,+ ei haerea au noa râ to ratou, e te haapao maitai i ta ratou mau ohipa atoa.+

12 Ei tane faaipoipo i te vahine hoê te mau tavini tauturu e tia ˈi, e te faatere maitai i ta ratou mau tamarii e to ratou iho utuafare. 13 E roo maitai hoi te noaa ra i te mau tane e rave maitai i ta ratou taviniraa, oia atoa râ te itoito rahi i te parau no nia i to ratou faaroo i te Mesia ra o Iesu.

14 E hinaaro rahi to ˈu e farerei ia oe, ia ore noa ˈtu râ vau ia tae oioi atu, te papai nei au i teie nei mau parau 15 ia ite oe mai teihea to oe haerea e tia ˈi i roto i te utuafare o te Atua,+ oia hoi te amuiraa a te Atua ora, te pou e te paturu o te parau mau. 16 Oia mau, e parau rahi te parau huna moˈa o te haamoriraa i te Atua anaˈe: ‘Ua itehia Iesu ei taata,+ ua farii-maitai-hia ei varua,+ ua fa i te mau melahi,+ ua porohia to ˈna parau i te mau nunaa ěê,+ ua tiaturihia na te ao nei,+ e ua fariihia i te raˈi ma te hanahana.’

4 Tera râ, te haapapu ra te parau no ǒ mai i te varua o te Atua,* i te mau tau e haere mai ra, e faarue te tahi pae i te faaroo no to ratou tâuˈaraa i te mau poroi faauruhia haavare*+ e te mau haapiiraa a te mau demoni, 2 na roto i te huru haavarevare o te feia e haavare,+ to ratou hoi te manaˈo haava i tapaohia i te auri ama. 3 Te opani ra ratou i te taata ia faaipoipo+ e te faahepo ra ia haapae i te tahi mau maa,+ ta te Atua hoi i poiete ia amuhia+ ma te haamaitai e te feia faaroo+ tei ite papu i te parau mau. 4 E mea maitai hoi te mau mea atoa ta te Atua i poiete,+ eiaha roa ïa te tahi ia haapaehia+ ua amu-anaˈe-hia ma te haamaitai, 5 ua haamoˈahia hoi te reira na roto i te parau a te Atua e te pure.

6 Ia horoa oe i teie aˈoraa i te mau taeae, e riro oe ei tavini maitai roa a te Mesia ra o Iesu, e tavini hoi tei faatamaahia i te mau parau o te faaroo e o te haapiiraa maitai ta oe e pee maite ra.+ 7 Eiaha râ e faaroo i te mau aai+ o te faatura ore i te Atua, mai ta te tahi mau ruau vahine e faatia na. Tera râ, a faaineine maite ia oe ia riro te haamoriraa i te Atua anaˈe ei fa na oe. 8 Aita rea hoi e faufaa to te faaetaetaraa tino,* o te haamoriraa râ i te Atua anaˈe te mea faufaa i te mau mea atoa, e fanaˈo atu ai i te haamaitairaa i roto i teie oraraa nei e to a muri aˈe tei fafauhia mai.+ 9 E nehenehe teie parau e tiaturihia e e farii-roa-hia. 10 No reira tatou e rohi e e tautoo ai,+ no te mea ua tiaturi tatou i te Atua ora, te Faaora+ no te mau huru taata atoa,+ no te taata faaroo iho â râ.

11 A tamau i te horoa ˈtu i teie mau faaueraa e i te haapii ia ratou. 12 Eiaha roa ei taata e vahavaha i to apîraa. Tera râ, ia riro oe ei hiˈoraa no te feia faaroo, i te parau hoi, te haerea, te here, te faaroo e te vai-viivii-ore-raa.* 13 A haamatau noa i te taio maitai i mua i te taata atoa,+ e te aˈo* atu e te haapii atu, e ia tae roa ˈtu vau. 14 Eiaha e haafaufaa ore i te ô e vai ra i roto ia oe, tei horoahia mai na roto i te hoê parau tohu no oe, i to te tino matahiapo tuuraa i te rima i nia iho ia oe.+ 15 A feruri maite* e a manaˈo noa i teie mau mea atoa nei ia ite maitai te taata atoa e te nuu ra oe i mua i te pae varua. 16 A haapao maitai ia oe iho e i te mau haapiiraa ta oe e horoa.+ A rave noa i teie mau mea atoa nei, mea na reira hoi oe iho e ora mai ai e te feia e faaroo ia oe.+

5 Eiaha oe e aˈo etaeta i te hoê tane paari aˈe.+ A paraparau râ ia ˈna mai te hoê metua tane, e te tane apî aˈe mai te taeae, 2 e te vahine paari aˈe mai te metua vahine, e te vahine apî aˈe mai te tuahine ma te aau mâ.

3 A aupuru* i te mau vahine ivi, te vahine ivi mau.*+ 4 E tamarii râ aore ra e mootua ta teie vahine ivi, ia haapii na mua ratou i te faaite i te tura e au i te Atua i roto i to ratou iho utuafare,+ ma te faahoˈi atu i te mea e au i to ratou mau metua, papa ruau e mama ruau,+ o te mea maitai hoi i te aro o te Atua.+ 5 E teie nei, te vahine ivi mau e te veve, ua tuu ïa i to ˈna tiaturiraa i te Atua+ e te tamau noa ra oia i te taparuparu e te pure ia ˈna i te po e te ao.+ 6 Tera râ, te vahine ivi o te ora no te mau mea navenave anaˈe, ua pohe ïa a ora noa ˈi oia. 7 A tamau noa i te horoa i teie mau aratairaa* ia vai hapa ore noa ratou. 8 Ia ore hoi te tahi ia aupuru i to ˈna iho, i te mau mero iho â râ o to ˈna utuafare, ua ere oia i te faaroo e ua hau aˈe to ˈna ino i to te taata aita e faaroo to ˈna.+

9 E nehenehe te hoê vahine ivi tei hau i te 60 matahiti e tapaohia i nia i te tapura, ei vahine i faaipoipo i te tane hoê, 10 ei vahine matauhia no ta ˈna mau ohipa maitai roa,+ tei haapii maite i ta ˈna mau tamarii,+ tei farii maitai i te taata,+ tei horoi i te avae o te feia moˈa,+ tei tauturu i tei roohia e te ati,+ tei itoito i te rave i te mau ohipa maitatai atoa.

11 Eiaha râ e tapao i te mau vahine ivi apî aˈe i nia i te tapura, e taupupu hoi ta ratou taviniraa i te Mesia ia tupu te hinaaro, e opua ïa ratou e faaipoipo. 12 E e faautuahia ratou no te mea ua haapae ratou i te parau matamua ta ratou i fafau. 13 E ua matau roa ratou i te faaea noa aita e ohipa, e i te haere hanoa i tera e tera fare. E ere râ i te vahine hupehupe anaˈe, e afai parau atoa râ e te faaô i roto i ta vera ma ohipa,+ e te faatiatia haere i te parau tano ore. 14 E hinaaro râ vau ia faaipoipo te mau vahine ivi apî aˈe,+ ia fanau i te tamarii,+ ia haapao i te utuafare, ia ore te enemi e faaino ia ratou. 15 Ua hahi ê aˈena hoi te tahi mau vahine ivi e ua pee ia Satani. 16 Mai te peu e vahine ivi to roto i te utuafare o te tahi vahine faaroo, na ˈna ïa e tauturu ia ratou ia ore te amuiraa ia teimaha. E nehenehe ïa te amuiraa e tauturu i te vahine ivi mau.*+

17 Ia faatura-rahi-hia+ te mau matahiapo e aratai maitai roa ra i te amuiraa,+ ratou iho â râ e rohi ra i roto i te parau e te haapiiraa.+ 18 Te na ô ra hoi te mau Papai: “Eiaha oe e tavaha i te puaatoro oni ia taataahi oia i te sitona,”+ oia atoa: “E mea tano ia aufauhia te rave ohipa no ta ˈna i rave.”+ 19 Eiaha oe e faaroo ia parihia te hoê tane ruhiruhia,* i te parau haapapuraa noa râ a e piti aore ra e toru ite.+ 20 A aˈo+ i te feia rave hara i mua i te taata atoa,+ ei faaararaa i te tahi pae.* 21 E faaueraa mana ta ˈu e tuu atu ia oe i te aro o te Atua e o te Mesia ra o Iesu e te mau melahi maitihia, oia hoi ia haapao maite oe i teie mau aratairaa ma te ore e faahapa ru noa e ma te ore e maitiiti i te taata.+

22 Eiaha roa oe e ru i te tuu atu i te rima i nia iho i te tahi taata.*+ Eiaha roa atoa e apiti i te hara a vetahi ê. Ei haerea mâ noa to oe.

23 Eiaha faahou oe e inu i te pape,* a inu râ maa uaina no to oe opu, e mea maˈimaˈi roa hoi oe.

24 Te itehia ra ta te tahi pae ra mau hara e te taata atoa a faautuahia ˈi ratou i reira iho, area ta te tahi atu pae, i muri aˈe ïa e itehia ˈi.+ 25 Na reira atoa te mau ohipa maitai roa o te itehia ra e te taata atoa,+ e te mau ohipa maitai roa aita e itehia ra e te taata, eita roa ïa e vai huna noa.+

6 Ia faatura maite noa te mau tîtî* i to ratou mau fatu+ ia ore roa te iˈoa o te Atua e ta ˈna haapiiraa ia faainohia.+ 2 Eiaha atoa te mau tîtî ia hiˈo ino i to ratou mau fatu e tiaturi ra ia Iesu no te mea e taeae ratou. Tera râ, ia tavini atu â ratou ma te aau tae, no te mea te feia e fanaˈo i ta ratou ohipa maitai, te tiaturi ra ïa ia Iesu e e taeae herehia ratou.

A tamau i te haapii atu i teie mau mea e te horoa ˈtu i teie mau aˈoraa. 3 Ia haaparare noa ˈtu te tahi taata i te mau haapiiraa hape, e ia ore oia ia farii i te haapiiraa maitai*+ no ǒ mai i to tatou Fatu ra o Iesu Mesia e te haapiiraa e au i te haamoriraa i te Atua,+ 4 e taata faaoru ïa e te teoteo, e aita oia e taa ra i te hoê noa ˈˈe mea.+ To nia noa to ˈna feruriraa* i te mau uiuiraa e te aimârôraa parau.+ E faatupu te reira i te nounou, te peapea, te parau faaino,* te manaˈo ino, 5 te tatamaˈiraa hopea ore i nia i te mau parau rii faatupuhia e te taata feruriraa viivii+ e tei ere i te parau mau, ma te manaˈo e e apîhia ratou i te haamoriraa i te Atua.+ 6 Oia iho â, e apî rahi to te haamoriraa i te Atua anaˈe+ e te mauruururaa i te mea e vai ra. 7 Aita hoi ta tatou e taoˈa i hopoi mai a fanauhia mai ai tatou i roto i teie nei ao, e aita ta tatou e taoˈa e hopoi na muri ia tatou ia pohe tatou.+ 8 No reira, te vai ra ta tatou maa e te ahu,* e mauruuru tatou i te reira.+

9 Area te feia e onoono ra i te titau i te taoˈa rahi, e topa ratou i roto i te faahemaraa, te marei+ e te hinaaro ino e te maamaa e rave rahi, a mou roa ˈtu ai ratou.+ 10 O te nounou moni hoi te tumu o te mau mea ino atoa, e no te nounou moni i atea ê ai te tahi pae i te faaroo e i roohia ˈi i te mauiui e rave rahi.+

11 O oe râ te taata no te Atua, a horo ê oe i teie mau mea. A tapi râ i te parau-tia, te haamoriraa i te Atua anaˈe, te faaroo, te here, te faaoromai tamau e te mǎrû.+ 12 A aro i te aroraa maitai roa o te faaroo. A mau maite i te ora mure ore i titau-manihini-hia ˈi oe e ta oe i faaite maitai i mua e rave rahi ite.

13 I te aro o te Atua o te horoa nei i te ora i te mau mea atoa, e to te Mesia ra o Iesu tei horoa i te hoê faaiteraa maitai i mua ia Ponotio Pilato,+ te faaue nei au ia oe 14 ia haapao i te faaueraa ma te viivii ore e te hapa ore, e ia faaite-roa-hia mai to tatou Fatu ra o Iesu Mesia.+ 15 Ia tae i te tau faataahia e faaite mai ai te Arii oaoa hoê roa ia ˈna iho. Oia te Arii o te feia e faatere ra ei arii, e te Fatu o te feia e faatere ra ei fatu,+ 16 tei ia ˈna anaˈe ra te pohe ore,+ te parahi ra oia i roto i te maramarama eita e raeahia,+ aita hoê aˈe taata i ite ia ˈna,+ e ore atoa e nehenehe e hiˈo atu. Ei ia ˈna ra te hanahana e te puai mure ore. Amene.

17 A poroi* i te feia taoˈa rahi i roto i teie nei ao* eiaha e teoteo,* e ia tuu i to ratou tiaturiraa, eiaha i te mau taoˈa e pê,+ i te Atua râ o te horoa mai i te mau mea atoa ta tatou e fanaˈo ra.+ 18 A parau ia ratou ia rave i te maitai, ia rahi ta ratou ohipa maitai roa, ia horoa noa e ia tufa ˈtu ma te aau tae,+ 19 ma te faaherehere no ratou i te hoê niu maitai roa no a muri aˈe+ a mau papu atu ai ia ratou te ora mau.+

20 Timoteo, a tapea noa i tei tuuhia ˈtu ia oe,+ ma te fariu ê i te mau parau faufaa ore e patoi ra i te mea moˈa e te mau aimârôraa e parauhia ra ma te hape e “ite.”+ 21 No to ratou faaiteite-haere-raa i teie huru ite i hahi ê ai vetahi i te faaroo.

Ei ia oe ra te hamani maitai rahi o te Atua.