TE RATA MATAMUA I TO TESALONIA

1 O Paulo, o Siluano*+ e o Timoteo,+ i te amuiraa i Tesalonia tei hoê e te Atua te Metua e tei hoê e te Fatu ra o Iesu Mesia:

Ei ia outou to te Atua hamani maitai rahi e te hau.

2 E haamauruuru noa matou i te Atua ia faahiti matou ia outou i roto i ta matou mau pure,+ 3 no te mea i mua i to tatou Atua e Metua, e haamanaˈo noa matou i to outou rohiraa ma te haapao maitai e te here, e i to outou faaoromai tamau no to outou tiaturiraa+ i te Fatu ra o Iesu Mesia. 4 Taeae herehia e te Atua, ua ite hoi outou e ua maitihia outou 5 no te mea aita te parau apî oaoa ta matou e poro ra i tae ia outou na roto i te parau noa, na roto atoa râ i te mana e te varua moˈa* e te ite papu, ua ite hoi outou i ta matou i rave no to outou maitai. 6 E ua pee atoa outou i to matou hiˈoraa+ e i to te Fatu+ i te mea e, noa ˈtu te hamani-ino-raa e rave rahi,+ ua farii outou i te parau a te Atua ma te oaoa ta te varua moˈa e faatupu, 7 i riro ai outou ei hiˈoraa no te feia atoa e tiaturi ra ia Iesu i Makedonia e i Ahaia.

8 Parau mau hoi, mai i ǒ outou, aita noa te parau a Iehova* i faaroohia i Makedonia e i Ahaia anaˈe, ua atutu atoa râ te parau o to outou faaroo i te Atua na te mau vahi atoa,+ e aita ˈtu â parau ta matou. 9 Te faatia noa ra hoi ratou e mea nafea matou i te farereiraa ia outou i te taime matamua e mea nafea outou i te fariu-ê-raa i ta outou mau idolo+ a tavini atu ai i te Atua ora e te parau mau, 10 e a tiai atu ai i ta ˈna Tamaiti no te raˈi mai,+ ta ˈna i faatia mai te pohe mai, oia hoi o Iesu te faaora ia tatou i te riri rahi tahoo e tae mai ra.+

2 Taeae ma, ua ite maitai outou e aita to matou tere i ǒ outou i faufaa ore.+ 2 Na mua ua haamauiuihia mâua e ua hamani-ino-hia i Philipi,+ mai ta outou hoi i ite. Noa ˈtu râ, ua horoa mai to tatou Atua i te mǎtaˈu ore* no te faaite ia outou i te parau apî oaoa a te Atua+ a faaruru noa ˈi i te patoiraa uˈana.* 3 E ere hoi ta matou aˈoraa e horoa ˈtu no roto mai i te mea hape e te viivii aore ra te haavare, 4 ua fariihia râ matou e te Atua tei horoa mai i te parau apî oaoa e parau atu ai matou, eiaha ia mauruuru te taata, ia mauruuru râ te Atua o te hiˈopoa i to matou aau.+

5 Ua ite mau outou e aita roa matou i faahiti i te parau aminamina ia outou aore ra i faahua taata maitai no te huna i to matou nounou,+ o te Atua te ite! 6 Aita atoa matou i titau i te taata, outou anei aore ra te tahi atu, ia faahanahana mai ia matou noa ˈtu e nehenehe matou, te mau aposetolo a te Mesia, e faateimaha ia outou i te moni rahi.+ 7 Tera râ, e feia hamani maitai matou i rotopu ia outou, e mai te hoê metua vahine e faatamaa ra e e aupuru ra* i ta ˈna iho mau tamarii. 8 E no te rahi o to matou here ia outou, ua faaoti papu matou e faaite atu* i te parau apî oaoa a te Atua e e horoa atoa i to matou ora* no te tauturu atu,+ no te mea ua here roa matou ia outou.+

9 Taeae ma, te haamanaˈo ra outou i to matou rohiraa e tautooraa. Ua rave matou i te ohipa i te po e te ao eiaha matou ia faateimaha i te hoê o outou i te moni rahi+ a poro ai matou i te parau apî oaoa a te Atua. 10 O outou te ite, oia atoa te Atua, ua tauturu matou ia outou e tiaturi ra ia Iesu ma te haapao maitai e te tia e te hapa ore. 11 Ua ite maitai outou, mai te hoê metua tane ra+ i ta ˈna mau tamarii, ua tamau noa matou i te aˈo e te tamahanahana e te faaara ia outou tataitahi,+ 12 ia au noa to outou haerea i te Atua+ tei titau manihini ia outou ia fatu i ta ˈna Faatereraa arii*+ e to ˈna hanahana.+

13 No reira atoa matou e haamauruuru noa ˈi i te Atua,+ no te mea i to outou fariiraa i te parau a te Atua ta outou i faaroo ia matou nei, ua farii outou i te reira eiaha mai te parau a te taata, mai te parau iho â râ a te Atua, o te ohipa atoa ra i roto ia outou e tiaturi ra ia Iesu. 14 Taeae ma, ua pee hoi outou i te hiˈoraa o te mau amuiraa a te Atua i Iudea tei hoê e te Mesia ra o Iesu, no te mea ua hamani-ino-hia outou e te feia no to outou iho fenua,+ mai te mau taeae o Iudea i hamani-ino-atoa-hia e te ati Iuda 15 tei tae roa i te haapohe i te Fatu ra o Iesu+ e te mau peropheta, e tei hamani ino ia tatou.+ Hau atu â, aita te Atua e mauruuru ra ia ratou, e ta ratou e rave ra, e ere ïa no te maitai o te taata atoa, 16 te tamata ra hoi ratou i te opani ia tatou ia poro i te feia o te mau nunaa ěê a nehenehe atu ai taua feia ra e faaorahia.+ A na reira ˈi ratou, te maraa noa ˈtu ra ïa te faito o ta ratou mau hara. Tera râ, e tae mai iho â te riri rahi tahoo o te Atua i nia ia ratou.+

17 Taeae ma, ia matou râ i faataa-ê-hia* ia outou no te hoê tau poto, i te mata noa, eiaha râ i to matou aau, ua tutava mau matou ma te hinaaro rahi e farerei tino* ia outou. 18 No reira matou i hinaaro ai e haere i ǒ outou, o vau o Paulo nei, e ere hoê noa taime to ˈu opuaraa, e piti râ. Ua tâpûhia râ to matou eˈa e Satani. 19 O vai hoi to matou tiaturiraa, oaoaraa, aore ra hei upoo haapeuraa i mua i te Fatu ra o Iesu i te tau o to ˈna hoˈiraa mai?* E ere anei o outou?+ 20 O outou mau to matou hanahana e oaoaraa.

3 Aita matou i nehenehe e faaoromai faahou, faaoti ihora ïa matou e mea maitai aˈe ia faaea o matou anaˈe i Ateno.+ 2 Tono atura matou ia Timoteo,+ to tatou taeae e tavini na te Atua* no te parau apî oaoa no nia i te Mesia, no te haapuai* e tamahanahana ia outou no te maitai o to outou faaroo, 3 ia ore te tahi ia aueue* i taua mau ati ra. Ua ite hoi outou e e roohia iho â tatou i taua mau mea ra.*+ 4 Ua faaite aˈena ˈtu matou, a parahi ai i rotopu ia outou, e e roohia tatou e te ati, e tera iho â tei tupu mai ta outou e ite ra.+ 5 Aita vau i nehenehe e faaoromai faahou, no reira vau i tono ai ia ˈna ia ite au e te mau papu ra anei outou i te faaroo+ e aita anei te Diabolo i faahema ia outou,+ a faufaa ore atu ai to matou rohiraa no outou.

6 I teie nei râ, no hoˈi noa mai nei o Timoteo no ǒ ia outou ra,+ e ua faatia mai oia i te parau oaoa o to outou faaroo e to outou here, e te oaoa noa ra outou a manaˈo ai ia matou. E te ru nei outou i te ite ia matou, e o matou atoa hoi. 7 No outou ïa, taeae ma, e no te faaroo ta outou e faaite i tamahanahanahia ˈi matou i to matou hepohepo* e ati atoa.+ 8 No te mea e itoitohia mai* matou ia mau papu outou i roto i te Fatu. 9 E nafea hoi matou e nehenehe ai e haamauruuru i te Atua no outou, no te mea e oaoa iti rahi to matou ia outou i te aro o te Atua? 10 Ma te aau tae, e taparuparu noa matou i te po e te ao ia farerei tino* matou ia outou, a noaa ˈtu ai ia outou te mea e ere ra, ia puai to outou faaroo.+

11 E teie nei, ia arataihia matou e to tatou Atua e Metua, e ia aratai-atoa-hia matou e to tatou Fatu ra o Iesu na te eˈa e tae atu ai i ǒ outou ra. 12 Hau atu â, ia faarahi te Fatu i to outou here, oia mau, ia here rahi roa outou te tahi i te tahi+ e i te taata atoa, mai ta matou e here ra ia outou, 13 e na roto ia ˈna e itoitohia ˈi to outou aau, ma te hapa ore e te moˈa i te aro o to tatou Atua+ e Metua i te tau o te hoˈiraa mai* o to tatou Fatu ra o Iesu+ e to ˈna atoa ra feia moˈa.

4 Taeae ma, ua horoa ˈtu matou i te aˈoraa no nia i to outou haerea ia mauruuru te Atua ia outou,+ e te na reira ra hoi outou. E teie nei, te ani e te taparu atu nei matou na roto i te Fatu ra o Iesu ia na reira noa ˈtu â outou. 2 Ua ite hoi outou i te mau aˈoraa* ta matou i horoa ˈtu na roto i te Fatu ra o Iesu.

3 Teie hoi te hinaaro o te Atua, ia moˈa noa outou+ e ia haapae i te mau peu taotoraa tia ore* e tia ˈi.+ 4 Ia ite outou tataitahi e nafea ia haavî i to outou iho tino+ e tia ˈi ma te moˈa+ e te tura, 5 eiaha ma te nounou e te hinaaro faufau vî ore+ mai to te mau nunaa ite ore i te Atua.+ 6 Eiaha roa ˈtu te tahi ia hapa e ia faaere i to ˈna taeae i taua mea nei, no te mea na Iehova* e faautua i te feia e rave i tera mau hara atoa, mai ta matou i parau aˈena e i faaara maitai atu. 7 Ua titau manihini hoi te Atua ia tatou, eiaha ia rave i te mau peu viivii, ia moˈa râ tatou.+ 8 No reira, te taata e vahavaha ra i taua mea nei, te vahavaha ra ïa, eiaha i te taata, i te Atua râ+ o te horoa mai i to ˈna varua moˈa ia outou.+

9 Tera râ, aita e titauhia ra ia papai atu matou no nia i te here taeae,+ ua haapiihia hoi outou e te Atua ia here te tahi i te tahi.+ 10 E oia mau, te na reira ra outou i te mau taeae atoa i Makedonia taatoa. Taeae ma, te faaitoito atu nei râ vau ia outou ia na reira noa ˈtu â. 11 A tutava i te ora hau noa+ ma te ore e faaô i roto i to vetahi ê oraraa e a tutava i te rave i te ohipa+ i to outou iho rima,+ mai ta matou i faaue atu, 12 ia tura ïa to outou haerea i mua i te feia no rapae+ e ia ore outou ia ere i te tahi noa ˈˈe mea.

13 Taeae ma, e hinaaro atoa matou ia taa ia outou te parau o te feia e taoto ra i roto i te pohe,+ ia ore outou ia oto mai te tahi pae ra no te mea aita to ratou e tiaturiraa.+ 14 Ia tiaturi hoi tatou e ua pohe o Iesu e ua tia faahou mai,+ e aratai atoa ïa te Atua ia Iesu ra te feia atoa tei taoto i roto i te pohe e tei hoê e oia.+ 15 Teie ïa ta matou parau ia outou ia au i te parau a Iehova,* tatou hoi te feia ora o te ora ˈtu i te tau o te hoˈiraa mai* o te Fatu, eita roa ˈtu ïa tatou e na mua ˈtu i te feia i taoto i roto i te pohe. 16 No te mea e pou mai te Fatu iho mai te raˈi mai, e e faaroohia to ˈna reo mana, to te melahi rahi ïa,+ e te pu a te Atua, e na mua te feia pohe tei hoê e te Mesia te tia faahou mai.+ 17 I muri mai, o tatou te feia ora o te ora ˈtu te ravehia i roto i te ata+ ia farerei i te Fatu+ i nia i te raˈi e o ratou atoa, ei reira tatou e vai noa ˈi i te Fatu ra.+ 18 No reira, a tamau i te tamahanahana te tahi i te tahi na roto i teie mau parau.

5 Taeae ma, e teie nei, aita e titauhia ra ia papai atu vau no te taime e te tau. 2 Ua ite maitai hoi outou e te haere mai ra te mahana o Iehova*+ mai te eiâ ra i te po.+ 3 I te taime e parau ai ratou: “Te hau e te ati ore!” ei reira iho e haamouhia ˈi ratou ma te manaˈo-ore-hia,+ mai te vahine hapû ia roohia e te mauiui fanau, e aita roa e hororaa no ratou. 4 Outou râ, taeae ma, aita outou i roto i te poiri a roohia ˈi outou e taua mahana ra mai te eiâ ra e roohia i te hitiraa mahana, 5 e tamaiti hoi outou paatoa no te maramarama e e tamaiti no te ao.+ E ere tatou no te po, e ere atoa no te poiri.+

6 No reira, eiaha tatou e taoto mai te tahi pae ra,+ e vai ara râ+ e e feruri maite anaˈe.+ 7 Te feia hoi e taoto, i te po ratou e taoto ai, e te feia e taero ra i te ava, i te po ratou e taero ai.+ 8 Area tatou no te ao, e feruri maite anaˈe e e ahu anaˈe i te tapoˈi ouma o te faaroo e te here, e te taupoo o te tiaturiraa i te faaoraraa+ 9 no te mea ua maiti te Atua ia tatou, eiaha ia roohia e to ˈna riri rahi tahoo, ia noaa mai râ te faaoraraa+ na roto i to tatou Fatu ra o Iesu Mesia 10 tei pohe no tatou+ ia ora tatou e o ˈna atoa, ara noa ˈi aore ra taoto noa ˈi tatou.*+ 11 No reira, a tamau i te faaitoito* e i te tauturu te tahi i te tahi,+ mai ta outou hoi e rave nei.

12 Taeae ma, teie ta matou aniraa ia outou, ia faatura ia ratou e rohi ra i rotopu ia outou e e aratai ra ia outou i te taviniraa i te Fatu e e aˈo ra ia outou. 13 E ia hau atu â to outou hamani maitai ia ratou ma te here, no ta ratou hoi ohipa e rave ra.+ Ia vai noa te hau i rotopu ia outou.+ 14 Taeae ma, te faaitoito atu nei râ matou ia outou ia faaara* i te feia haerea tano ore,+ e ei parau mahanahana ta outou i te feia e hepohepo* ra, e turu i tei paruparu, e faaoromai i te taata atoa.+ 15 A ara eiaha te tahi ia tahoo i te tahi i te ino,+ ia tapi noa râ outou i te mea maitai no te tahi e te tahi, e te taata atoa.+

16 Ia oaoa noa outou.+ 17 A tamau i te pure.+ 18 A haamauruuru i te Atua no te mau mea atoa,+ ta ˈna ïa e hinaaro ia tatou na roto i te Mesia ra o Iesu. 19 Eiaha e tupohe i te auahi o te varua moˈa.+ 20 Eiaha e vahavaha i te mau parau tohu.+ 21 Ia papu ia outou te mau mea atoa,+ a mau noa ˈtu ai i te mea maitai roa. 22 A haapae i te mau mea iino e rave rau.+

23 Ia haamoˈa te Atua o te hau ia outou. Ia tura noa te huru feruriraa,* te ora* e te tino no outou, te mau taeae, i te mau mea atoa, e ia vai hapa ore noa e tae roa ˈtu ai i te tau o te hoˈiraa mai* o to tatou Fatu ra o Iesu Mesia.+ 24 E haapao maitai to te Atua tei titau manihini ia outou, e e na reira noa iho â oia.

25 Taeae ma, a pure noa no matou.+

26 A aroha ˈtu i te mau taeae atoa ma te apa ˈtu i te here taeae.

27 E hopoia faufaa mau ta ˈu ia outou i te iˈoa ra o te Fatu, ia taiohia teie rata i te mau taeae atoa.+

28 Ei ia outou ra te hamani maitai rahi o to tatou Fatu ra o Iesu Mesia.