TE RATA I TO KOLOSA

1 Paulo, e aposetolo na te Mesia ra o Iesu na roto i te hinaaro o te Atua, e o Timoteo+ to tatou taeae, 2 i te feia moˈa, e taeae haapao maitai, tei hoê e te Mesia ra i Kolosa:

Ei ia outou te hamani maitai rahi e te hau no ǒ mai i te Atua ra to tatou Metua.

3 E haamauruuru noa matou i te Atua, te Metua o to tatou Fatu ra o Iesu Mesia, ia pure matou no outou, 4 i te mea e ua faarooroo matou i te parau o to outou faaroo i te Mesia ra o Iesu e i to outou here i te feia moˈa atoa, 5 no te tiaturiraa i faahereherehia no outou i te raˈi.+ Ua faaroo outou i taua tiaturiraa ra na roto i te poroi o te parau mau, oia hoi te parau apî oaoa 6 tei tae atu i ǒ outou ra. Mai te parau apî oaoa e hotu e e atutu ra na te ao atoa,+ o te rave-atoa-hia ïa i rotopu ia outou mai te mahana mai â i faaroo e i ite ai outou ma te papu i te hamani maitai rahi mau o te Atua. 7 Tera ïa tei haapiihia ia outou e Epaphera+ to tatou hoa tavini here e tavini haapao maitai na te Mesia no to outou maitai. 8 Ua faaite atoa mai oia ia matou i to outou here faatupuhia e te varua o te Atua.

9 Te tumu atoa ïa i ore ai matou i faaea i te pure no outou+ mai te mahana mai â i faarooroo ai matou i te reira, e i ore atoa ˈi i faaea i te ani ia fanaˈo rahi outou i te ite mau+ o to ˈna hinaaro na roto i te paari atoa e te maramarama pae varua,+ 10 ia au to outou haerea ia Iehova* ia mauruuru roa oia ia outou, a faatupu noa ˈi outou i te hotu na roto i te mau ohipa maitatai atoa e a rahi noa ˈi to outou ite mau i te Atua.+ 11 E ia faaetaetahia outou i te puai atoa ia au i te hanahana o to ˈna mana+ ia nehenehe outou ia faaruru maite na roto i te faaoromai e te oaoa, 12 a haamauruuru noa ˈi i te Metua, no ˈna hoi i nehenehe ai outou e fanaˈo atoa i ta ˈna i fafau i te feia moˈa+ tei roto i te maramarama.

13 Ua faaora oia ia tatou i te mana o te poiri+ e ua tuu ia tatou i roto i te faatereraa arii a ta ˈna Tamaiti here, 14 na roto ia ˈna i tiamâ ˈi tatou maoti te hoo,* oia hoi te faaoreraa i ta tatou mau hara.+ 15 O ˈna te hohoˈa o te Atua ite-ore-hia,+ te matahiapo o te mau mea atoa i poietehia.+ 16 E mea na roto hoi ia ˈna i poietehia ˈi to te raˈi atoa e to te fenua atoa, tei itehia e tei ore i itehia,+ e terono anei, e mana, e faatereraa aore ra e hau. Ua poietehia te mau mea atoa na roto ia ˈna+ e no ˈna. 17 Hau atu â, ua na mua oia i te mau mea atoa nei,+ e na roto ia ˈna te mau mea atoa nei i hamanihia ˈi, 18 e o ˈna te upoo o te tino, oia hoi te amuiraa.+ O ˈna te haamataraa, te matahiapo no roto mai i tei pohe,+ no te riro mai ei matamua i te mau mea atoa ra. 19 Ua tia hoi i te Atua ia vai te mau mea atoa i roto ia ˈna,+ 20 e na roto ia ˈna, ia faahau ïa i te mau mea atoa ia ˈna ra,+ to te fenua e to te raˈi atoa, ma te faatupu i te hau na roto i te toto+ o te Mesia i niniihia i nia i te pou haamauiuiraa.*

21 Tei te atea ê hoi outou na mua ˈˈe e mai te enemi na outou no te mea tei nia noa to outou feruriraa i te ohipa ino, 22 area i teie nei, ua faahau te Atua ia tatou na roto i taua tino taata ra, maoti to ˈna pohe, a tia ˈtu ai outou i mua i te Atua ma te moˈa, te tafetafeta ore e te hapa ore.+ 23 Tera râ, ia tamau noa outou i roto i te faaroo,+ ma te haamauhia+ e te mau papu i nia i te niu o te faaroo,+ ma te ore e hahi ê i te tiaturiraa o taua parau apî oaoa ra ta outou i faaroo e tei porohia i rotopu i te taata atoa i raro aˈe i te raˈi.+ Ua riro vau, o Paulo, ei tavini no te poro i teie parau apî oaoa.+

24 Te oaoa nei au noa ˈtu e te mauiui ra vau no outou,+ e te mauiui nei au mai te Mesia, e ia faaruru hope roa râ vau i taua mauiui ra no te tino o te Mesia,+ te amuiraa.+ 25 Ua riro vau ei tavini no teie amuiraa ia au i te hopoia+ ta te Atua i horoa ia ˈu no to outou maitai e poro hope roa i te parau a te Atua, 26 te parau huna moˈa+ tei hunahia i te mau faanahoraa o te ao nei*+ i mutaa iho ra e i te mau uˈi i mutaa iho ra. I teie nei râ, ua faaitehia mai i to ˈna feia moˈa,+ 27 tei tia i te Atua ia faaite atu i rotopu i te mau nunaa ěê i te hanahana hau ê o teie parau huna moˈa,+ oia hoi te Mesia tei hoê e outou, te tiaturiraa ïa e e faahanahanahia outou e o ˈna.+ 28 O ˈna ta matou e faaite haere nei, ma te faaara e te haapii i te taata atoa i te parau paari taatoa, no te pûpû i te taata atoa i te Atua ra ei pǐpǐ na te Mesia tei paari i te pae varua.+ 29 No reira, te rohi nei au, i te tautooraa na roto i to ˈna puai o te ohipa ra i roto ia ˈu.+

2 E hinaaro hoi au ia ite outou e te tutava ra vau no to outou maitai, e to Laodikea+ e to te feia atoa aita i ite mata ia ˈu, 2 ia mahanahana hoi to ratou aau+ e ia tahoê-maitai-hia ratou i te here+ e ia fanaˈo i te mau faufaa atoa, oia hoi to ratou maramarama-papu-raa a noaa ˈi te ite mau no nia i te parau huna moˈa a te Atua, oia hoi te Mesia.+ 3 Ua huna-maitai-hia te taoˈa rau atoa o te paari e te ite i roto ia ˈna.+ 4 Te parau atu nei au i te reira ia ore outou ia hema i te mau parau haavarevare. 5 Noa ˈtu e aita vau i ǒ outou, to ˈu râ manaˈo tei ia outou ra ïa, e te oaoa nei au i te ite+ e mea naho maitai outou e mea papu to outou faaroo i te Mesia ra.+

6 No reira, mai ta outou i farii i te Fatu ra o Iesu Mesia, a tamau i te auraro maite ia ˈna, 7 ma te aˈahia i roto ia ˈna e te patuhia i nia iho ia ˈna+ e te mau papu i te faaroo,+ mai tei haapiihia ia outou, e ia haamauruuru outou i te Atua no te rahi o to outou faaroo.+

8 A ara eiaha outou ia faatîtîhia* i te haapiiraa philosopho e te haavare faufaa ore+ ia au i te peu tutuu a te taata e te mau mea rii a teie nei ao, eiaha râ ia au i te Mesia. 9 No te mea te ite-maitai-hia ra* te mau huru maitatai atoa o te Atua i roto ia ˈna.+ 10 Ua fanaˈo outou i te mau mea atoa maoti ia ˈna, o ˈna hoi te upoo o te faatereraa e te mana atoa.+ 11 No to outou hoêraa e te Mesia i peritome-atoa-hia ˈi outou i te hoê peritomeraa o tei ore i ravehia e te rima taata,+ ua peritomehia râ outou i te peritomeraa a te Mesia ma te haapae i ta te tino hara.+ 12 Ua hunahia outou e o ˈna atoa na roto i te hoê â bapetizoraa e to ˈna,+ e maoti to outou hoêraa e o ˈna i faatia-atoa-hia mai ai outou+ no to outou faaroo i te ohipa mana a te Atua, o tei faatia mai ia ˈna mai roto mai i te feia pohe.+

13 Hau atu â, noa ˈtu e i pohe na outou no ta outou mau hapa e no to outou peritome-ore-raahia i te tino, ua faaora faahou mai te Atua ia outou e te Mesia atoa.+ Ua farii oia i te faaore i ta tatou mau hapa atoa+ 14 e ua tumâ* oia i te ture papaihia a Mose,+ i roto e taiohia ˈi e rave rahi faaueraa+ o te faahapa ia tatou.+ Ua hopoi ê oia i te reira ma te patiti atu i nia i te pou haamauiuiraa.*+ 15 Maoti te pou haamauiuiraa* i pau ai te mau faatereraa e te mau mana ia ˈna, e ua faariro oia ia ratou ei mataitairaa na te taata atoa,+ a aratai ai ia ratou mai te tîtî ra i roto i te hoê poroteraa upootiaraa.

16 No reira, eiaha te tahi noa ˈˈe taata ia faahapa ia outou no nia i ta outou e amu e e inu+ aore ra no nia i te haapaoraa i te oroa, te avaˈe apî+ aore ra i te Sabati.+ 17 E ata anaˈe teie mau mea no te mau mea e tupu a muri aˈe,+ area te mea mau ra, o te Mesia ïa.+ 18 Eiaha outou ia faaerehia i ta outou re e te tahi noa ˈˈe taata,+ e mea au hoi na ˈna te faahua haehaa e te haamoriraa melahi, “ma te turui i nia”* i te mau mea ta ˈna i ite. E mea faaoru oia e aita e tumu mau, no to ˈna huru feruriraa e au i to te taata hara, 19 e aita oia e ati maite ra i te upoo,+ oia hoi tei horoa i ta te tino taatoa e hinaaro e tei faatuatiati maite i te mau tuhaa atoa maoti te mau puoiraa ivi e te mau uaua, a paari mai ai te tino taatoa i te tupuraa no ǒ mai i te Atua ra.+

20 I te mea e ua haapae outou i te mau mea rii a teie nei ao e ua pohe outou e te Mesia atoa,+ eaha ïa outou e ora ˈi mai te mea ra e no teie nei ao outou, a auraro atu ai i teie mau faaueraa:+ 21 “Eiaha e rave noa ˈtu, eiaha e tamata noa ˈtu, eiaha e tapea noa ˈtu,” 22 no te mau mea ïa o te riro i te pau i te amuhia e te inuhia, ia au i te mau faaueraa e te mau haapiiraa a te taata?+ 23 Mai te mea ra e faaueraa paari teie, i te mea e na te taata e faaoti e nafea ratou e haamori ai i te Atua, e te faahua haehaa ra ratou e te haamauiui ra i to ratou tino,+ aita râ te reira e tauturu ra i te taata ia patoi i te mau hinaaro o te tino.

3 Tera râ, i te mea e ua faatiahia mai outou e te Mesia atoa,+ a tapi noa ïa i te mau mea no nia ra, i te vahi e parahihia ˈi e te Mesia i te rima atau o te Atua.+ 2 A manaˈo noa i te mau mea no nia ra,+ eiaha râ i te mau mea no te fenua nei.+ 3 I pohe na hoi outou e ua hunahia to outou ora i te Mesia ra ia au i te hinaaro o te Atua. 4 Ia itehia te hanahana o te Mesia to tatou ora,+ ei reira atoa ïa e itehia ˈi to outou hanahana e o ˈna.+

5 No reira, a haapohe i te mau mero o to outou tino+ no te fenua nei, to roto hoi te mau peu taotoraa tia ore,* te peu viivii, te hinaaro faufau vî ore,+ te hinaaro ino, e te nounou e haamoriraa idolo hoi. 6 No taua mau mea nei e tae mai ai te riri rahi tahoo o te Atua. 7 Mai tera atoa ïa to outou haerea i roto i to outou oraraa* na mua ˈˈe ra.+ 8 E teie nei râ, ia haapae outou i te reira e tia ˈi: te iria, te riri, te ino,+ te parau faaino+ e te parau faufau+ no roto mai i to outou vaha. 9 Eiaha e haavare te tahi i te tahi.+ A tatara i te huru taata tahito*+ e ta ˈna ra mau peu, 10 e a ahu mai i te huru taata apî,+ tei faaapîhia na roto i te ite mau ia au i te hohoˈa o te Atua tei poiete i te reira,+ 11 aita ïa e Heleni e te ati Iuda, aita e peritome e te peritome ore, aita atoa e taata ěê, e Sekute,* e tîtî aore ra e taata tiamâ. O te Mesia râ te mau mea atoa e to roto oia i te taata atoa.+

12 Ia ahu mai outou i te here rahi, te aumihi,+ te hamani maitai, te haehaa,+ te mǎrû+ e te faaoromai,+ mai tei au i te feia maitihia e te Atua,+ e te moˈa e te herehia. 13 A faaoromai noa i te tahi e te tahi, e ia hapa noa mai te tahi ia oe,+ a faaore noa ˈtu ïa i ta ˈna hapa.+ Mai ia Iehova* i faaore noa mai i ta outou ra, ia na reira atoa ˈtu outou.+ 14 Hau atu â râ i taua mau mea nei, a ahu mai i te here,+ o te taamu tia roa ïa e tahoê ai te taata.+

15 Ia aratai* atoa te hau o te Mesia i to outou aau,+ ua titau-manihini-hia hoi outou no taua hau ra ia riro outou ei mero no te hoê noa tino. E ia mauruuru atoa outou. 16 Ia î outou i te parau a te Mesia ma te paari atoa. A tamau i te haapii e i te faaitoito* te tahi i te tahi ma te Salamo,+ te arueraa i te Atua, te himene haamoriraa himenehia ma te mauruuru,* ma te himene i roto i to outou aau no Iehova.*+ 17 Ta outou mau parau e ohipa atoa, ia ravehia ïa i te iˈoa o te Fatu ra o Iesu, ma te haamauruuru i te Atua te Metua na roto i te Mesia.+

18 E te mau vahine faaipoipo, a auraro i ta outou iho tane+ mai tei au i te Fatu. 19 E te mau tane faaipoipo, a here noa i ta outou iho vahine+ e eiaha e iria ˈtu* ia ratou.+ 20 Outou te mau tamarii, a faaroo i to outou na metua i te mau mea atoa,+ e mauruuru hoi te Fatu i te reira. 21 Outou te mau metua tane, eiaha e faariri i ta outou mau tamarii,+ a toaruaru roa ˈtu ai ratou. 22 E te mau tavini, a auraro i to outou mau fatu i te fenua nei,+ eiaha noa ia hiˈohia mai outou e te taata* e ia au mai ratou ia outou, a auraro râ ma te aau atoa e te mǎtaˈu ia Iehova.* 23 Te mau mea atoa ta outou e rave, a rave ma to outou aau e puai* atoa mai te mea ra e no Iehova,*+ eiaha no te taata, 24 ua ite hoi outou e no ǒ mai ia Iehova* ra ta outou haamaitairaa e noaa mai ai.+ A tavini i te Fatu, te Mesia. 25 Oia mau, te taata i rave i te ino, e faautuahia ïa no te ino ta ˈna i rave+ aita e faataaraa.+

4 E te mau fatu, a rave maitai i ta outou mau tavini ma te parau-tia e ma te ite e e Fatu atoa to outou i te raˈi ra.+

2 A tamau i te pure e eiaha e haamoˈe i te pure,*+ ma te haamauruuru i te Atua.+ 3 E a pure atoa no matou+ ia iriti te Atua i te hoê uputa no ta matou poroi ia nehenehe matou e faaite haere i te parau huna moˈa no nia i te Mesia, i mau ai hoi au i te fare tapearaa,+ 4 e ia faaite au i te reira ma te maramarama roa mai tei tia ia ˈu.

5 Ei haerea paari noa to outou i nia i te feia no rapae, ma te faaohipa maitai i to outou taime.*+ 6 Ei parau nehenehe noa ta outou e te tamitihia,+ ia ite hoi outou e nafea ia pahono i te taata tataitahi.+

7 Na to ˈu taeae here o Tuhiko,+ e tavini haapao maitai e e hoa tavini o te Fatu, e faaite ia outou i te parau apî no ˈu. 8 Te tono atu ra vau ia ˈna ia ite outou eaha to matou huru e ia mahanahana to outou aau. 9 Te haere atu ra raua Onesimo,+ to ˈu taeae here haapao maitai no ǒ mai ia outou. Na raua e faaite ia outou i te mau mea atoa e tupu ra i ǒ nei.

10 Te aroha ˈtu nei o Arisetareho,+ mâua to roto i te fare tapearaa nei, e te aroha atoa ˈtu nei o Mareko+ te fetii o Baranaba (o ta matou i faaue ia farii maitai outou ia ˈna+ ia haere noa ˈtu oia), 11 e o Iesu atoa tei piihia o Iuseto, no roto mai i te feia peritomehia. O ratou anaˈe to ˈu mau hoa ohipa no te Faatereraa arii a* te Atua, e ua tamahanahana* rahi mai ratou ia ˈu. 12 Te arohahia nei outou e Epaphera,+ e tavini na te Mesia ra o Iesu no ǒ mai ia outou. Te tutava maite ra oia no outou i roto i ta ˈna mau pure, ia nehenehe outou e mau papu ei taata paari i te pae varua e ma te tiaturi papu i te taatoaraa o te hinaaro o te Atua. 13 Te haapapu nei hoi au e ua rohi mau oia no outou e no to Laodikea e no to Hierapoli.

14 Te aroha ˈtu nei o Luka,+ te taote here, e oia atoa o Dema.+ 15 A aroha ˈtu i te mau taeae i Laodikea e i te tuahine ra o Numepha e i te amuiraa e putuputu ra i roto i to ˈna fare.+ 16 E ua taio-anaˈe-hia ˈtu teie rata i ǒ outou, a haapao e ia taio-atoa-hia te reira+ i te amuiraa i Laodikea. E te rata ta ˈu i hapono i to Laodikea, ia taio-atoa-hia ïa i ǒ outou. 17 A parau atoa ˈtu ia Arehipo:+ “A haapao maitai ia rave hope roa oe i te taviniraa ta oe i farii i te Fatu ra.”

18 Te faatae atu nei au, o Paulo, i to ˈu aroha ia outou ta ˈu i papai i to ˈu iho rima.+ A haamanaˈo e tei roto vau i te fare tapearaa.+ Ei ia outou te hamani maitai rahi o te Atua.