TE RATA I TO GALATIA

1 O Paulo, e aposetolo tei faatoroahia, eiaha e te taata, aore ra na roto i te hoê taata, na roto râ ia Iesu Mesia+ e te Atua to tatou Metua+ tei faatia ia ˈna mai te pohe mai. 2 Te papai nei au e te mau taeae atoa ia ˈu nei i te mau amuiraa i Galatia:

3 Ei ia outou te hamani maitai rahi e te hau no ǒ mai i te Atua ra to tatou Metua e i te Fatu ra o Iesu Mesia. 4 Ua pûpû te Mesia ia ˈna iho no ta tatou mau hara+ no te faaora ia tatou i teie nei ao* ino,+ ia au hoi i te hinaaro o to tatou Atua e Metua,+ 5 ei ia ˈna ra hoi te hanahana e a muri noa ˈtu. Amene.

6 Ua maere au e oioi roa outou i te fariu-ê-raa i te Atua o tei titau manihini ia outou na roto i te hamani maitai rahi o te Mesia, no te farii i te hoê poroi ê atu ei parau apî oaoa.+ 7 Aita ˈtu â râ parau apî oaoa ê atu. Tera râ, te haapeapea nei vetahi ia outou+ e te hinaaro ra ratou e taviri i te parau apî oaoa no nia i te Mesia. 8 Ia faaite noa ˈtu râ hoê o matou aore ra te tahi melahi no te raˈi mai i te hoê parau apî oaoa ê atu i ta matou i faaite ia outou, ia vai noa ïa te ino i nia ia ˈna. 9 Mai ta matou i parau iho nei, te parau faahou atu nei au, o tei faaite ia outou i te hoê parau apî oaoa ê atu i ta outou i tiaturi na, ia vai noa ïa te ino i nia ia ˈna, o vai noa ˈtu oia.

10 Ta te taata farii maitai anei ta ˈu e titau ra aore ra ta te Atua? Te titau ra anei au ia auhia vau e te taata? Ahiri e au noa mai te taata ia ˈu, e ere ïa vau i te tavini na te Mesia. 11 Taeae ma, te hinaaro nei hoi au ia ite outou e e ere no ǒ mai i te taata te parau apî oaoa ta ˈu i faaite ia outou,+ 12 e ere atoa na te taata i horoa mai aore ra i haapii mai ia ˈu i te reira, tera râ, na Iesu Mesia iho teie i heheu mai.

13 Ua faaroo iho â ïa outou i te huru o to ˈu haerea na mua ˈˈe i roto i te haapaoraa ati Iuda,+ i hamani ino e i vavahi noa na vau i te amuiraa a te Atua ma te uˈana.*+ 14 I roto i te haapaoraa ati Iuda, to mua roa vau i te taata e rave rahi hoê â matahiti o to ˈu iho nunaa, e e itoito hau ê to ˈu no te mau peu tutuu a to ˈu mau tupuna.+ 15 Te Atua râ, tei tatara ia ˈu i te opu o to ˈu metua vahine e tei titau manihini ia ˈu na roto i to ˈna hamani maitai rahi,+ ua manaˈo ïa e mea maitai 16 ia faaohipa ia ˈu no te faaite haere i te parau apî oaoa no nia i ta ˈna Tamaiti i te tahi atu mau nunaa,+ ia ite ratou o vai oia. I to ˈna maitiraa ia ˈu, aita vau i imi oioi i te aratairaa a te tahi atu taata.* 17 Aita atoa vau i pauma i Ierusalema i te mau aposetolo tei faatoroahia na mua ˈˈe ia ˈu, ua haere râ vau i Arabia. E mai reira mai ua hoˈi au i Damaseko.+

18 E toru matahiti i muri aˈe, pauma ˈtura vau i Ierusalema+ e farerei ia Kepha,*+ faaea ihora vau ia ˈna ra 15 mahana. 19 Aita râ vau i ite i te tahi atu mau aposetolo, o Iakobo anaˈe+ te taeae o te Fatu. 20 E teie nei, no nia i te mau parau ta ˈu e papai nei ia outou, te haapapu atu nei au i te aro o te Atua e aita vau e haavare ra.

21 I muri aˈe, haere atura vau na te mau tuhaa fenua o Suria e o Kilikia.+ 22 Aita râ te mau amuiraa i Iudea tei hoê e te Mesia i ite mata aˈenei ia ˈu. 23 I faarooroo noa na ratou: “Te taata tei hamani ino na ia tatou,+ o ˈna hoi teie e faaite nei i te parau apî oaoa no nia i te faaroo ta ˈna i tuino na.”+ 24 No ta ratou i ite no nia ia ˈu i haamata ˈi ratou i te faahanahana i te Atua.

2 E i muri aˈe 14 matahiti, pauma faahou atura mâua Baranaba+ i Ierusalema a rave atoa mai ai ia Tito na muri ia ˈu.+ 2 No te hoê heheuraa no te raˈi mai i pauma ˈi au i Ierusalema. Faaite atura vau i te mau taeae faatura-rahi-hia i te parau apî oaoa ta ˈu e poro ra i te mau nunaa ěê. Ua ravehia te reira i mua ia ratou anaˈe ra, ia papu hoi ia ˈu e e ere i te mea faufaa ore te hororaa ta ˈu e horo nei aore ra ta ˈu i horo na. 3 Tera râ, o Tito+ hoi tei na muri mai ia ˈu, aita oia i faahepohia ia peritomehia+ noa ˈtu e e Heleni oia. 4 Ua tupu râ taua fifi ra no te mau faahua taeae tei tomo omoˈe mai+ e tei faaô noa mai no te moemoe i te tiamâraa+ ta tatou e fanaˈo ra e te Mesia ra o Iesu, a nehenehe atu ai ratou e faatîtî roa ia matou.+ 5 Aita roa matou i fati a auraro atu ai ia ratou,+ noa ˈtu e maa taime* noa, e ia vai â te parau mau o te parau apî oaoa ia outou ra.

6 No nia râ i taua mau taeae ra tei manaˈohia e mea faufaa roa,+ i ta ˈu râ hiˈoraa aita ïa ratou e taa ê ra i te tahi atu, noa ˈtu to ratou tiaraa na mua ˈˈe, eita hoi te Atua e haapao i te huru rapaeau o te hoê taata. No reira, aita vau i apî aˈe i tera mau taeae faatura-rahi-hia. 7 I to ratou râ iteraa e ua tuuhia mai ia ˈu te pororaa i te parau apî oaoa i tei peritome-ore-hia,+ mai tei tuuhia ˈtu ia Petero te pororaa i tei peritomehia 8 (na te Atua hoi tei haamana ia Petero ei aposetolo no tei peritomehia, i haamana atoa ia ˈu ei aposetolo no to te mau nunaa ěê)+ 9 e i to ratou iteraa i te hamani maitai rahi tei noaa mai ia ˈu,+ ua horoa mai Iakobo,+ Kepha* e Ioane, tei manaˈohia e pou no te amuiraa, i te rima atau ia mâua Baranaba+ ei tapao no te auhoaraa,* e ia haere mâua i te feia o te mau nunaa ěê e tia ˈi, area ratou i tei peritomehia ïa. 10 Ua ani noa mai ratou ia haamanaˈo i te feia veve, o ta ˈu ïa i tutava maite i te rave.+

11 Tera râ, i to Kepha*+ haereraa mai i Anetiohia,+ ua patoi* tia ˈtu vau ia ˈna no te mea ua hapa mau oia.* 12 I tamaa noa na hoi oia e te feia o te mau nunaa ěê hou a tae mai ai te tahi mau taata ta Iakobo+ i tono. Ia ratou râ i tae mai, faataa ê ihora oia ia ˈna i te feia o te mau nunaa ěê+ e aita ˈtura i amuimui faahou ia ratou no to ˈna mǎtaˈu i te feia e turu ra i te peritomeraa.+ 13 Apiti atoa ˈtura te tahi pae o te ati Iuda ia ˈna i teie huru haavarevare to ˈna, e riro atoa ˈtura Baranaba i ta ratou haavarevare. 14 I to ˈu râ iteraa e aita ratou e pee maite ra i te parau mau o te parau apî oaoa,+ na ô atura vau ia Kepha* i mua ia ratou paatoa: “O oe hoi, noa ˈtu e e ati Iuda, te ora ra oe mai to te mau nunaa ěê eiaha râ mai te ati Iuda ra, eaha ïa oe e faahepo ai i to te mau nunaa ěê ia ora ia au i te peu a te ati Iuda?”+

15 Ua fanauhia tatou ei ati Iuda, e ere tatou i te feia rave hara no te mau nunaa ěê. 16 Ua ite tatou e e parauhia te tahi taata e taata parau-tia, eiaha na roto i to ˈna haapaoraa i te ture, na roto noa râ i te faatupuraa i te faaroo+ ia Iesu Mesia.+ Ua tiaturi ïa tatou i te Mesia ra o Iesu a parauhia ˈtu ai tatou e taata parau-tia na roto i te faaroo i te Mesia, eiaha râ na roto i te haapaoraa i te ture. Aita hoi e taata* e parauhia e taata parau-tia na roto i te haapaoraa i te ture.+ 17 E teie nei, noa ˈtu e ua manaˈohia e e feia rave hara tatou a imi noa ˈi ia parauhia tatou e taata parau-tia na roto i te Mesia, te auraa anei ïa e e tavini te Mesia na te hara? E ere roa ˈtu! 18 Ahiri hoi au e patu faahou i te mau mea ta ˈu i vavahi na, te faaite ra ïa vau e e ofati ture au. 19 Na roto hoi i to ˈu haapaoraa i te ture i pohe ai au no te ture,+ ia nehenehe au e ora no te Atua. 20 Ua patitihia vau i nia i te pou mai te Mesia ra te huru.+ Aita vau e ora faahou nei no ˈu iho,+ no te Mesia râ tei hoê e o vau. Oia mau, te ora nei au maoti to ˈu faaroo i te Tamaiti a te Atua+ o tei here ia ˈu e tei horoa ia ˈna iho no ˈu.+ 21 Aita vau e haafaufaa ore ra* i te hamani maitai rahi o te Atua,+ ahiri hoi tei te haapaoraa i te ture e noaa mai ai te parau-tia, e pohe faufaa ore ïa to te Mesia.+

3 E to Galatia maamaa e! Na vai i haavarevare ia outou?+ Ua faataa-maitai-hia hoi ia outou to Iesu Mesia patitiraahia i nia i te pou.+ 2 Teie ta ˈu e hinaaro e ui atu:* Ua fanaˈo anei outou i te varua moˈa no to outou haapaoraa i te ture aore ra no to outou tiaturiraa i ta outou i faaroo na?+ 3 Mai tera anei outou i te maamaa? Ua haamata outou i te hororaa ia au i ta te varua moˈa,* e faahope anei ïa outou i te hororaa ia au i ta te tino?*+ 4 Ua faaruru anei outou e rave rahi mauiui aita e tumu? Ua papu ia ˈu e aita. 5 Te taata hoi o te horoa ia outou i te varua moˈa e o te rave i te mau ohipa mana+ i rotopu ia outou, e na reira anei oia no to outou haapaoraa i te ture aore ra no to outou tiaturiraa i ta outou i faaroo na? 6 E ere anei e “ua faatupu Aberahama i te faaroo ia Iehova* e ua hiˈohia oia ei taata parau-tia”?+

7 Ua ite maitai hoi outou e o te feia e mau maite ra i te faaroo, o ratou te mau tamaiti a Aberahama.+ 8 E teie nei, mea maoro to te mau Papai faaiteraa e e hiˈo te Atua i te taata o te mau nunaa ěê ei taata parau-tia na roto i te faaroo, e ua faaite-atea-hia ˈtu ia Aberahama i te parau apî oaoa, oia hoi: “Na roto ia oe e haamaitaihia ˈi te mau nunaa atoa.”+ 9 No reira, e haamaitaihia te feia atoa e mau maite ra i te faaroo mai ia Aberahama i faatupu i te faaroo.+

10 Te feia atoa e tiaturi ra i te ohipa a te ture, e vai noa ïa te ino i nia ia ratou, ua papaihia hoi: “Ia vai noa te ino i nia i te taata atoa aita e haapao maite ra i te mau parau atoa i papaihia i roto i te otaro o te Ture.”+ 11 E mea papu e aita e taata e parauhia e taata parau-tia i te aro o te Atua+ na roto i te ture, no te mea “e ora te taata parau-tia i to ˈna faaroo.”+ 12 E teie nei, aita te Ture i niuhia i nia i te faaroo. Tera râ, “te taata e rave i taua mau mea ra, e ora ïa i te reira.”+ 13 Ua papai-atoa-hia: “Ia vai noa te ino i nia i te taata atoa tei tarîhia i nia i te pou.”+ Ua faaora+ mai te Mesia ia tatou i te faaino a te Ture e ua amo i te ino i vai na i nia ia tatou. Mea na reira ïa to ˈna hooraa mai ia tatou,+ 14 ia fanaˈo hoi to te mau nunaa ěê i te haamaitairaa i fafauhia ia Aberahama na roto i te Mesia ra o Iesu,+ e ia noaa ia tatou te varua moˈa+ i fafauhia na roto i to tatou faaroo.

15 Taeae ma, teie te tahi faahohoˈaraa: Ia oti te hoê parau faaau i te haamanahia, noa ˈtu e na te hoê noa taata, eita roa e tia ia faaorehia aore ra ia tuuhia te tahi parau ê atu. 16 E teie nei, ua fafauhia teie parau ia Aberahama e i to ˈna huaai.+ Aita i parauhia, “e no to oe mau huaai,” mai te mea ra e e rave rahi. Ua parauhia râ, “e no to huaai,” mai te mea ra e hoê noa, o te Mesia ïa.+ 17 Teie atoa ta ˈu parau: Eita te Ture, tei tuuhia mai e 430 matahiti i muri aˈe,+ e haafaufaa ore i te faufaa ta te Atua i faaau aˈena ia Aberahama, a faaore atu ai i te parau fafau. 18 Ahiri hoi te haamaitairaa i niuhia i nia i te ture, aita faahou ïa i niuhia i nia i te hoê parau fafau, tera râ, ua horoa te Atua i te reira ia Aberahama na roto i te hoê parau fafau.+

19 No te aha ïa te Ture? Ua tuuhia mai ïa ia ite-maitai-hia te hara+ e ia tae roa mai te huaai no ˈna te parau i fafauhia.+ Ua horoahia mai ïa na roto i te mau melahi,+ e na roto i te hoê arai.+ 20 E teie nei, aita e arai mai te peu e hoê noa pae. Area râ te Atua, o ˈna anaˈe ïa i to ˈna fafauraa i teie parau. 21 E patoi anei ïa te Ture i te mau parau fafau a te Atua? Eita roa ˈtu! Ahiri hoi mea na roto i te hoê ture i tuuhia mai e noaa ˈi te ora, e noaa ïa te parau-tia na roto i te ture. 22 Tera râ, te tapea noa ra te mau Papai i te mau mea atoa i raro aˈe i te mana o te hara, ia fanaˈo hoi te feia e faatupu ra i te faaroo i te mau haamaitairaa i fafauhia, no to ratou faaroo ia Iesu Mesia.

23 Hou aˈe râ te faaroo* a tae mai ai, na te ture i tiai na ia tatou a tapea-noa-hia ˈi tatou i raro aˈe i te mana o te Ture, e a tiai noa ˈi i te faaroo tei fatata i te faaitehia mai.+ 24 Ua riro ïa te Ture no tatou ei tiai* e aratai i te Mesia,+ a parauhia ˈtu ai tatou e taata parau-tia na roto i te faaroo.+ 25 I teie nei râ ua tae mai te faaroo,+ aita faahou ïa tatou i raro aˈe i te hoê tiai.*+

26 E tamaiti anaˈe outou paatoa na te Atua+ na roto i to outou faaroo i te Mesia ra o Iesu.+ 27 Outou paatoa hoi tei bapetizohia e tei hoê e te Mesia, ua ahu mai ïa i te huru o te Mesia.+ 28 Aita e ati Iuda e aita e Heleni,+ aita e tîtî e aita e tiamâ,+ aita e tane e aita e vahine,+ ua hoê anaˈe hoi outou paatoa e te Mesia ra o Iesu.+ 29 E no te Mesia ra outou, o outou mau ïa te huaai o Aberahama,+ e fatu+ outou ia au i te hoê parau i fafauhia.+

4 E teie nei, te parau atu nei au e a vai tamarii noa ˈi te taata e fatu i te faufaa, aita oia i taa ê i te hoê tîtî, noa ˈtu e na ˈna e fatu i te mau mea atoa, 2 tei raro aˈe noa â oia i te tiaau e te tiai e tae roa ˈtu i te mahana faataahia e to ˈna metua tane. 3 Oia atoa, i faatîtîhia na tatou e te mau mea rii a teie nei ao i to tatou vai tamariiraa.+ 4 I te hoperaa râ te taime faataahia, tono maira te Atua i ta ˈna Tamaiti tei fanauhia mai e te hoê vahine+ e tei ora i raro aˈe i te ture,+ 5 ia nehenehe oia ia faatiamâ i te feia i raro aˈe i te ture ma te hoo mai ia ratou,+ e ia farii te Atua ia tatou ei tamaiti na ˈna.+

6 E teie nei, no te mea e tamaiti outou na te Atua, ua tuu oia i te varua moˈa+ i vai na i ta ˈna Tamaiti i roto i to tatou aau,+ e te turai nei taua varua ra ia tatou ia pii atu: “Aba,* to ˈu Metua!”+ 7 E ere faahou ïa oe i te tîtî, e tamaiti râ. E tamaiti ra, e fatu ïa oe i te faufaa maoti te Atua.+

8 Area râ i te tau aita ˈi outou i ite i te Atua, e tîtî ïa outou na te mau atua hape. 9 I teie nei râ ua ite outou i te Atua, aore ra i to ˈna tanoraa mau ua itehia mai outou e te Atua, eaha ïa outou e hoˈi faahou ai i te mau mea rii faufaa ore+ a teie nei ao e e hinaaro faahou ai e riro ei tîtî na ratou?+ 10 Te haapao roa ra outou i te mahana e te avaˈe+ e te tau e te matahiti. 11 Te taiâ nei au e peneiaˈe ua mâuˈa ta ˈu mau tutavaraa no outou.

12 Taeae ma, te taparu atu nei au, a riro mai ia ˈu. No te mea na mua ˈˈe, mai ia outou atoa na vau.+ Aita roa ˈtu outou i hamani ino ia ˈu. 13 Ua ite râ outou e no to ˈu maˈiraahia i nehenehe ai au e faaite ia outou i te parau apî oaoa no te taime matamua. 14 E noa ˈtu e ua huru ê outou i to ˈu maˈi, aita râ outou i vahavaha mai ia ˈu e i haafaufau* mai. Tera râ, ua farii outou ia ˈu mai te hoê melahi a te Atua ra te huru aore ra mai te Mesia ra o Iesu. 15 I oaoa na outou, eaha ˈtura ïa i teie nei? Papu roa ia ˈu, ahiri i tia ia outou, ua paaro roa mai outou i to outou iho mata a horoa mai ai.+ 16 Ua riro anei ïa vau ei enemi no outou no to ˈu faaiteraa ˈtu i te parau mau? 17 E itoito rahi to ratou i te ume mai ia outou, e ere râ ma te manaˈo maitai. Te titau ra ratou ia mutu to tatou auhoaraa, a hinaaro roa ˈtu ai outou e pee ia ratou. 18 E mea maitai râ ia tâuˈa rahi te tahi ia outou ma te manaˈo maitai, eiaha noa ia parahi au i rotopu ia outou. 19 Ta ˈu mau tamarii here,+ no outou hoi au e mauiui faahou ai i te mauiui fanau, e ia ite-roa-hia ˈtu te huru o te Mesia i roto ia outou. 20 E hinaaro vau e parahi i pihai iho ia outou i teie nei â e e paraparau mǎrû atu, no te mea aita vau e taa faahou ra e nafea râ ia outou.

21 Outou hoi i raro aˈe i te ture, a parau mai na, aita anei outou i ite i ta te Ture e parau ra? 22 Ei hiˈoraa, ua papaihia e e piti tamaiti ta Aberahama, hoê tamaiti na te tavini vahine,+ e te tahi atu na te vahine tiamâ.+ 23 Ua fanauhia râ te tamaiti a te tavini vahine ia au i te hinaaro o te taata,*+ area te tamaiti a te vahine tiamâ, ua fanauhia ïa ia au i te hoê parau fafau.+ 24 E auraa taipe to taua mau mea nei. Na vahine e piti, e piti ïa faufaa, hoê i faaauhia i te mouˈa ra i Sinai,+ oia i fanau mai i te tamarii i raro aˈe i te faatîtîraa, oia hoi o Hagara. 25 E teie nei o Hagara, o Sinai ïa,+ te hoê mouˈa i Arabia, e e au oia ia Ierusalema i teie mahana, te vai tîtî nei hoi oia e ta ˈna mau tamarii. 26 Tera râ, e vahine tiamâ te Ierusalema no nia mai, to tatou metua vahine.

27 Ua papaihia hoi: “A oaoa, e te vahine fanau ore eita ta oe tamarii e noaa. A umere ma te oaoa, e te vahine aita i mauiui i te mauiui fanau. Mea rahi aˈe hoi te tamarii a te vahine i faaruehia i ta te vahine e tane faaipoipo ta ˈna.”+ 28 Taeae ma, e teie nei, o outou te mau tamarii o te parau fafau, mai ia Isaaka atoa ra.+ 29 I tera râ tau, i hamani ino na te tamaiti tei fanauhia ia au i te hinaaro o te taata* i te tamaiti tei fanauhia na roto i te varua moˈa.+ Mai tera atoa ïa i teie nei.+ 30 Tera râ, te nahea mai ra te mau Papai? “A tiahi i te tavini vahine e ta ˈna tamaiti, eita hoi te tamaiti a te tavini vahine e fatu atoa i te faufaa e te tamaiti a te vahine tiamâ.”+ 31 Taeae ma, e tamarii ïa tatou na te vahine tiamâ, eiaha râ na te tavini vahine.

5 No taua tiamâraa ra i faatiamâ ˈi te Mesia ia outou. A mau maite ïa,+ e eiaha faahou outou e faatîtîhia i raro aˈe i te hoê zugo.+

2 Inaha, te parau atu nei au, o Paulo, e ia peritomehia outou e faufaa ore ïa ta te Mesia i rave.+ 3 E te parau faahou nei au i te taata peritomehia ia haapao i te taatoaraa o te Ture e tia ˈi.+ 4 Ua taa ê outou i te Mesia, outou hoi e titau ra ia parauhia outou e taata parau-tia maoti te ture.+ Ua haapae outou i to ˈna hamani maitai rahi. 5 Area matou, te tiai nei ïa i te riro ei taata parau-tia i te aro o te Atua, o te tupu noa na roto i te varua moˈa e te faaroo. 6 Te mea faufaa no te feia tei hoê e te Mesia ra o Iesu, o te faaroo ïa e faaitehia ra na roto i te here, eiaha râ te peritomeraa e te peritome-ore-raa.+

7 I horo maitai na hoi outou.+ Na vai ïa i haafifi ia outou a ore atu ai e haapao faahou i te parau mau? 8 E ere tera huru haapiiraa no ǒ mai i te Atua o tei titau manihini ia outou. 9 E maraa te taatoaraa o te faraoa ôihia i te hopue rii noa.+ 10 Ua papu ia ˈu e hoê â manaˈo to outou, tei hoê e te Fatu, e to ˈu.+ E noaa râ i te taata e haapeapea ra+ ia outou te faautuaraa e au ia ˈna, o vai noa ˈtu oia. 11 Taeae ma, ahiri e te poro noa ra vau i te peritomeraa, no te aha ïa vau e hamani-ino-noa-hia ˈi? I roto i tera huru tupuraa, ua faaorehia ïa te ofai turoriraa, oia hoi te pou haamauiuiraa.*+ 12 Te hinaaro nei au i te feia e faahepo ra ia peritomehia outou ia rave hau atu â i nia ia ratou iho.*

13 Taeae ma, ua titau-manihini-hia outou no te tiamâraa. Eiaha râ no taua tiamâraa ra e tapi ai outou i te mau hinaaro o te tino.+ Ia tavini râ te tahi i te tahi ma te here.+ 14 Ua hope roa* hoi te Ture i roto i teie noa faaueraa: “Ia here oe i to oe taata tupu mai ia oe iho.”+ 15 Ia haamauiui noa râ outou ia outou iho e ia tatamaˈi outou,+ a ara, a mou outou ia outou iho.+

16 A pee noa i te aratairaa a te varua moˈa,+ o ta ˈu ïa parau ia outou, e e ore roa outou e rave i te mau hinaaro tia ore o te tino.+ 17 No to ˈna mau hinaaro tia ore hoi e patoi ai te tino i te varua moˈa, e te varua moˈa ra i te mau hinaaro tia ore o te tino. Aita hoi e tuatiraa i rotopu i te tino e te varua moˈa. E te mau mea maitatai ta outou e hinaaro e rave, aita ïa outou e rave ra.+ 18 I te mea e te arataihia ra outou e te varua moˈa, aita ïa outou i raro aˈe i te ture.

19 E ite-maitai-hia ta te tino hara e faatupu, oia ïa te mau peu taotoraa tia ore,*+ te peu viivii, te peu faufau,*+ 20 te haamori idolo, te peu tahutahu,*+ te enemiraa, te mârô, te pohehae, te iria, te tatamaˈi, te amahamaha, te pǔpǔ faaroo amaha, 21 te feii, te taero ava,+ te arearearaa ahoahoa e te tahi atu mau mea mai tera atoa te huru.+ Mai ta ˈu i faaara noa na ia outou, te faaara faahou atu nei au e e ore roa te feia o te rave noa i teie mau peu e fatu i te Faatereraa arii a* te Atua.+

22 Area te mau huru maitatai* ta te varua moˈa e faatupu, o te here ïa, te oaoa, te hau, te faaoromai, te hamani maitai, te maitai,+ te faaroo, 23 te mǎrû, te haavîraa ia ˈna iho.+ Aita e ture o te faahapa i te reira. 24 E te feia tei hoê e te Mesia ra o Iesu, ua patiti ïa i te mau hinaaro tia ore e te vî ore+ o te tino i nia i te pou.

25 Te ora nei tatou ia au i te varua o te Atua, e pee maite noa anaˈe ïa i te aratairaa a taua varua ra.+ 26 Eiaha tatou e faateitei noa,+ e tataˈu e e feii te tahi i te tahi.+

6 Taeae ma, ia haere te tahi taata na te eˈa e hapa ˈi oia hou oia a haroˈaroˈa ˈi, na outou te feia paari i te pae varua e faatitiaifaro ia ˈna ma te mǎrû.+ A haapao maitai râ ia oe iho,+ eiaha oe ia hema atoa.+ 2 A tamau i te tauturu te tahi i te tahi e teimaha ra,+ e na reira outou e haapao ai i te ture a te Mesia.+ 3 Ia manaˈo hoi te tahi e mea faufaa oia e aita nei hoi,+ te haavare ra o ˈna ia ˈna iho. 4 Tera râ, ia hiˈopoa te taata tataitahi i ta ˈna iho ohipa,+ e na reira hoi oia e oaoa ˈi ia ˈna iho, eiaha râ no te mea ua faaau o ˈna ia ˈna i te tahi atu.+ 5 E amo hoi te taata tataitahi i ta ˈna iho hopoia.+

6 Hau atu â, te taata e haapiihia ra i te parau a te Atua, ia horoa ïa i te mau mea maitatai atoa i te taata e haapii mai ra.+

7 Eiaha e vare: Eita te Atua e noaa i te haavare. Ta te taata hoi e ueue ra, o ta ˈna atoa ïa e ooti.+ 8 No te mea te taata e ueue ia au i ta to ˈna iho tino, e ooti ïa i ta te tino e faatupu, oia hoi te tahuti. Area te taata e ueue ia au i ta te varua moˈa, e ooti ïa i ta te varua moˈa e faatupu, oia hoi te ora mure ore.+ 9 Eiaha ïa tatou e faaea i te rave i te mea maitai, e ooti hoi tatou i te taime tano ra ia ore noa ˈtu tatou ia rohirohi.*+ 10 No reira, te vai ra ta tatou ravea,* e hamani maitai anaˈe i te taata atoa, i to tatou iho â râ mau taeae e tuahine i roto i te faaroo.

11 A hiˈo na i te mau reta orarahi ta ˈu i papai ia outou i to ˈu iho rima.

12 Te feia atoa e titau ra ia auhia mai ratou e te taata,* o ratou mau teie e faahepo nei ia peritomehia outou, eiaha hoi ratou ia hamani-ino-hia no te pou haamauiuiraa* o te Mesia. 13 E tera mau taata e faahepo ra ia peritomehia outou, aita atoa hoi ratou e haapao nei i te Ture,+ e hinaaro râ ratou ia peritomehia outou a haapeu atu ai ratou no tei ravehia i nia i to outou tino. 14 Eiaha roa vau ia haapeu maori noa râ no te pou haamauiuiraa* o te Fatu ra o Iesu Mesia,+ na roto hoi ia ˈna i haapohehia ˈi to te ao* i ta ˈu hiˈoraa, e i te hiˈoraa a to te ao ua haapohehia vau.* 15 Te mea faufaa, e ere hoi te peritomeraa aore ra te peritome-ore-raa,+ o te taata râ tei hamani-apî-hia.+ 16 Ei te feia atoa e pee maite ra i teie huru haerea, oia hoi te Iseraela o te Atua, te hau e te aroha hamani maitai.+

17 E teie nei, eiaha roa ei taata e haapeapea mai ia ˈu, tei nia hoi i to ˈu tino te mau tapao o te hoê tavini a Iesu.+

18 Taeae ma, ei ia outou te hamani maitai rahi o to tatou Fatu ra o Iesu Mesia a faaite ai outou i te haerea maitai. Amene.