TE PITI O TE RATA I TO KORINETIA

1 O vau o Paulo, e aposetolo na te Mesia ra o Iesu na roto i te hinaaro o te Atua, e o Timoteo+ to tatou taeae, i te amuiraa o te Atua i Korinetia e i te feia moˈa atoa e ati aˈe Ahaia:+

2 Ei ia outou ra te hamani maitai rahi e te hau no ǒ mai i te Atua ra to tatou Metua e i te Fatu ra o Iesu Mesia.

3 Ia aruehia te Atua e Metua o to tatou Fatu ra o Iesu Mesia,+ te Metua o te aroha hamani maitai î i te here+ e te Atua o te tamahanahana i roto i te mau tupuraa atoa,+ 4 o te tamahanahana* ia tatou i roto i te mau tamataraa* atoa,+ e ia nehenehe atoa vetahi ê e mahanahana ia tatou+ i roto i te tamataraa* e rave rau maoti te mahanahana ta tatou e fanaˈo ra no ǒ mai i te Atua.+ 5 E no te mea hoi te mauiui rahi nei tatou no te Mesia,+ na roto i te Mesia atoa ïa tatou e mahanahana maitai ai. 6 E teie nei, ia faaruru noa ˈtu matou i te tamataraa,* no te tamahanahana e no te faaora ïa ia outou. E ia mahanahana noa ˈtu matou, no te tamahanahana ïa ia outou e no te tauturu atu ia faaoromai maite i te mauiui mai ta matou e faaruru atoa ra. 7 No reira, te tiaturi mau nei matou ia outou e ua ite atoa e e tamahanahana-atoa-hia outou e o matou, outou hoi i mauiui mai ia matou.+

8 Taeae ma, e hinaaro hoi matou ia ite outou e ua fifi-roa-hia matou i te ati ta matou i faaruru i te fenua Asia+ e aita ˈtura i noaa i te faaoromai maoti to matou iho puai, e aita atoa i papu e e ora mai anei matou.+ 9 Ua manaˈo matou e e pohe iho â matou. Ua haapii mai teie tupuraa e eiaha e tiaturi ia matou iho, i te Atua râ+ o te faatia mai i te feia pohe. 10 I taua ati pohe ra ua faaora oia ia matou e e faaora â oia. E te tiaturi atoa nei matou ia ˈna e e tamau â oia i te faaora ia matou.+ 11 E nehenehe atoa outou e tauturu mai ma te taparuparu noa no matou+ na roto i te pure. Ia na reira outou, e haamaitaihia te Atua no te tauturu ta matou i fanaˈo ei pahonoraa i te mau pure e rave rahi.+

12 E manaˈo haava mâ to matou no te mea, i roto i teie nei ao e hau atu â i rotopu ia outou, te faaite nei matou i te haerea moˈa e i te haavare ore e au i te Atua ra. Aita matou i tiaturi i te paari o teie nei ao,+ i te hamani maitai rahi râ o te Atua, e o ta matou ïa e haapeu ra. 13 Aita roa ˈtu hoi matou e papai nei i te tahi atu mau mea maori noa râ i ta outou e nehenehe e taio* e e taa te auraa. E hinaaro iho â vau ia taa maitai roa* ia outou taua mau parau ra, 14 mai te tahi pae o outou i taa aˈena te reira, oia hoi ua riro matou ei haapeuraa na outou, mai ia outou atoa e riro ai ei haapeuraa na matou i te mahana o to tatou Fatu ra o Iesu.

15 No to ˈu hoi tiaturiraa ia outou i opua ˈi au e haere atu na mua roa i ǒ outou no te piti o te taime, ia oaoa â outou,* 16 i opua na hoi au e farerei ia outou ia tere atu vau i Makedonia, e mai reira mai e hoˈi faahou mai au ia outou ra, e i muri iho ia apee mai outou ia ˈu maa taime i to ˈu tere i Iudea.+ 17 Oia mau, ua faaoti noa anei au ma te ore e feruri maite? Aore ra ua opua noa anei au i te reira ia au i ta te tino, a parau ai e “E, e” e i muri iho “Eita ïa”? 18 Mai te Atua e nehenehe e tiaturihia, oia atoa ta matou e parau nei ia outou, eita matou e parau “e,” e i te auraa mau râ, “eita.” 19 Oia atoa hoi te Tamaiti a te Atua o Iesu Mesia, ta ˈu e ta Siluano* e ta Timoteo+ i poro i rotopu ia outou, aita ta ˈna “e” i riro ei “eita,” e riro noa râ ta ˈna “e” ei “e.” 20 Rahi noa ˈtu â hoi te mau parau fafau a te Atua, ua riro anaˈe ïa ei “e” na roto ia Iesu.+ E na roto atoa ïa ia ˈna te “Amene” e parauhia ˈi i te Atua+ ia faahanahanahia oia e tatou. 21 Na te Atua râ e haapapu ra e no te Mesia outou e matou atoa, e na ˈna atoa i faatavai ia tatou.+ 22 Ua tuu atoa mai oia i ta ˈna tapao i nia ia tatou+ e ua horoa mai i te varua moˈa*+ i roto i to tatou nei aau ei haapapuraa* o te mau haamaitairaa e tupu a muri aˈe.

23 E teie nei, te euhe nei au i mua i te Atua no ˈu iho* e aita â vau i tae atura i Korinetia no te faaherehere ia outou i te oto. 24 Aita vau e parau nei e o matou te fatu o to outou faaroo,+ e hoa ohipa noa râ matou no to outou oaoa, no te faaroo hoi outou e mau maite ai.

2 Ua faaoti hoi au eiaha e haere atu i ǒ outou ra a tupu atu ai te oto. 2 Ahiri hoi no ˈu outou e oto ai, na vai ïa e faaoaoa mai ia ˈu maori noa râ te taata no ˈu oia i oto ai? 3 No reira ïa vau i papai atu ai ia outou, ia ore outou ia riro ei tumu e oto ai au ia haere atu vau, ia oaoa râ vau ia outou. Oia hoi, te tiaturi nei au e e oaoa atoa outou i te mau mea i faaoaoa ia ˈu. 4 Ua papai atu hoi au na roto i te ahoaho e te aau peapea e te roimata atoa, eiaha outou ia oto,+ ia ite râ outou i te rahi o to ˈu here.

5 E teie nei, mai te peu e ua faatupu te tahi i te oto,+ e ere ïa o vau anaˈe tei oto no ta ˈna i rave, o outou paatoa râ. Aita hoi au e hinaaro ra ia teimaha roa ta ˈu parau. 6 Ua navai noa i to te rahiraa o outou aˈoraa i teie taata. 7 E teie nei, ia ineine ïa outou i te faaore i ta ˈna hara e tia ˈi e i te tamahanahana ia ˈna,+ ia ore oia ia horomii-roa-hia i te oto rahi.+ 8 No reira, te faaitoito ra vau ia outou ia haapapu i to outou here ia ˈna.+ 9 O te tumu atoa ïa i papai atu ai au, ia faaite mai outou e te auraro mau ra anei outou i te mau mea atoa. 10 Ia faaore hoi outou i te hapa a te tahi, e na reira atoa ïa vau. Mai ia ˈu atoa nei râ, ua faaore anaˈe au i ta te tahi ra hapa, no to outou ïa maitai i te aro o te Mesia, 11 ia ore tatou ia noaa* ia Satani,+ ua ite hoi tatou i ta ˈna mau raveraa.*+

12 E teie nei, e uputa tei matara i mua ia ˈu i roto i te ohipa a te Fatu i to ˈu taeraa ˈtu i Teroa+ no te faaite i te parau apî oaoa no nia i te Mesia, 13 ua hepohepo vau no te mea aita o Tito+ to ˈu taeae i itehia e au. No reira, ua aroha ˈtu vau i to ǒ mau pǐpǐ, e fano atura i Makedonia.+

14 Ia haamaitaihia râ te Atua, oia te aratai noa ia tatou i roto i te hoê poroteraa upootiaraa i pihai iho i te Mesia, e na roto ia tatou e parare ai* i te mau vahi atoa te noˈanoˈa o te ite no nia ia ˈna! 15 E au tatou o te poro ra no nia i te Mesia i te mea noˈanoˈa no te Atua. E ua raea te feia e faaorahia e te feia e haapohehia i teie noˈanoˈa. 16 No te feia e pohe, e hauˈa pohe ïa o te aratai i te pohe,+ area no te feia e ora, e hauˈa ora ïa o te aratai i te ora. E o vai hoi te tano roa no teie taviniraa? 17 E ere tatou i te feia hoohoo haere i te parau a te Atua*+ mai e rave rahi taata, te parau nei râ tatou i te parau mau ei feia e pee ra i te Mesia i te aro o te Atua e ei feia i tonohia e te Atua.

3 E faaite faahou atu anei matou o vai matou? Aore ra mea titauhia anei te rata haapapuraa no ǒ mai ia outou aore ra no outou, mai ta te tahi mau taata e rave ra? 2 O outou hoi ta matou rata haapapuraa tei papaihia+ i nia i to matou aau, o te itehia ra e te taiohia ra e te huitaata atoa. 3 Mea papu e rata outou na te Mesia ta matou te mau tavini+ i papai eiaha i te inita, i te varua râ o te Atua ora, e eiaha i nia i te pǎpǎ ofai,+ i nia râ i te aau.+

4 O te huru ïa o to matou tiaturiraa i te Atua na roto i te Mesia. 5 Aita matou e parau ra e e tia ia matou ia rave i teie ohipa na roto i to matou iho puai, tera râ, maoti te Atua i tia ˈi te reira,+ 6 e maoti hoi ia ˈna e tia ˈi ia matou ia riro ei tavini i te hoê faufaa apî,+ eiaha i te hoê ture papaihia,+ ei tavini râ i te varua moˈa. E horoa mai hoi te ture papaihia i te utua pohe,+ area te varua moˈa, e horoa mai ïa i te ora.+

7 E teie nei, mai te peu ua horoahia mai na roto i te hanahana te pǎpǎ ture, o te hopoi mai i te pohe e tei papaihia i nia i na pǎpǎ ofai,+ e aita ˈtura te mau tamaiti a Iseraela i nehenehe e hiˈo i te hohoˈa mata o Mose no te hanahana o to ˈna hohoˈa mata,+ e hanahana te faaorehia, 8 no reira, eita anei ïa te varua moˈa+ e horoahia mai na roto i te hanahana rahi atu â?+ 9 Mai te peu hoi e mea hanahana+ te pǎpǎ ture o te horoa i te faautuaraa,+ e mea hanahana atu â ïa te taviniraa o te faariro i te taata ei taata parau-tia.+ 10 Oia atoa, ua faufaa-ore-hia te hanahana o te pǎpǎ ture ia faaauhia i te hanahana hau ê o te faufaa apî.+ 11 Mai te peu mea na roto i te hanahana te ture papaihia i te horoaraahia,+ e tei faaorehia i muri iho, e hanahana rahi atu â ïa to te faufaa apî o te vai noa mai.+

12 I te mea e teie ta matou e tiaturi nei,+ te parau roa ˈtu nei matou ma te mǎtaˈu ore, 13 aita ïa matou e rave nei mai ia Mose i to ˈna tapoˈiraa i to ˈna hohoˈa mata i te puroˈu,+ ia ore hoi te mau tamarii Iseraela ia hiˈo i te hanahana o te ture papaihia o te faaorehia. 14 Ua haapoirihia râ to ratou feruriraa.+ E tae roa mai i teie mahana, te tapoˈi-noa-hia ra to ratou feruriraa i teie ahu paruru a taio ai ratou i te faufaa tahito,+ e mea na roto noa hoi i te Mesia e tatarahia ˈi te reira.+ 15 Oia mau, te tapoˈi noa ra teie ahu paruru i to ratou aau+ a taiohia ˈi te mau papai a Mose+ e tae roa mai i teie mahana. 16 Ia fariu râ te tahi taata ia Iehova,* e tatarahia ïa te ahu paruru.+ 17 E teie nei, o Iehova* te Varua,+ e i te vahi tei reira te varua o Iehova,* tei reira atoa ïa te tiamâraa.+ 18 E tatou paatoa, aita faahou to tatou hohoˈa mata i tapoˈihia i te ahu paruru e e au tatou i te hiˈo anaana o te faaite ra i te hanahana o Iehova.* A na reira ˈi tatou, te tauihia ra to tatou hohoˈa ia riro mai to ˈna iho hohoˈa o te hanahana noa ˈtu ra, mai ta Iehova* te Varua* e rave iho â.+

4 No te mea e ua horoahia mai teie taviniraa ia matou na roto i te aroha hamani maitai ta te Atua i faaite mai, eita ïa matou e tuu. 2 Ua haapae râ matou i te mau peu haama rave-huna-hia, e aita matou i pee i te haerea haavarevare e aita atoa i taviri* i te parau a te Atua.+ I to matou râ faaiteraa i te parau mau, ua riro ïa matou ei hiˈoraa maitai no te taata atoa* i te aro o te Atua.+ 3 E mai te peu ua hunahia* te parau apî oaoa ta matou e faaite ra, ua huna-noa-hia ïa i te feia e pohe, 4 oia hoi te feia aita e tiaturi ra ia Iesu,+ ta te atua hoi o teie nei ao*+ i haapoiri i te feruriraa ia ore te maramarama o te parau apî oaoa hanahana no nia i te Mesia, te hohoˈa o te Atua,+ ia anaana i nia ia ratou.+ 5 Aita hoi matou e poro nei i te parau no nia ia matou, te poro nei râ matou e o Iesu Mesia te Fatu, e o matou nei, e tavini ïa na outou na roto ia Iesu. 6 Na te Atua hoi i parau: “Ia anaana te maramarama i roto i te poiri.”+ Na roto i te hohoˈa mata o te Mesia, ua turama mai te Atua i to matou aau+ tei anaana i to ˈna ite hanahana.

7 Tera râ, te vai nei taua taoˈa ra ia tatou+ mai te mea ra e tei roto i te farii repo*+ ia itehia e no ǒ mai i te Atua ra te puai o te hau ê i to te taata nei, e ere râ no ǒ mai ia tatou.+ 8 Te roohia ra tatou i te mau huru ati atoa, aita râ i apǐapǐ roa. Te feaa ra tatou, e itea râ te tahi faaoraraa.*+ 9 Te hamani-ino-hia ra tatou, aita râ i faaruehia.+ Te hurihia ra tatou i raro, aita râ i mou.+ 10 E faaû noa na matou i te ati pohe ta Iesu i faaruru ia ite te taata e te ora ra matou mai ia Iesu ra.+ 11 No to matou hoi peeraa ia Iesu, e faaruru noa na matou i te pohe+ ia ite hoi te taata atoa e te mauiui ra matou mai ia Iesu i mauiui. 12 Te ohipa nei te pohe i roto ia matou, area te ora, te ohipa nei ïa i roto ia outou.

13 Ua papaihia hoi: “Ua faatupu vau i te faaroo, no reira ïa vau i parau ai.” Te faatupu atoa nei matou i te faaroo, no reira ïa matou e parau ai,+ 14 e ua ite atoa matou e na te Atua, tei faatia ia Iesu, e faatia mai ia matou mai ia Iesu ra a hopoi atu ai ia matou e ia outou atoa i mua ia Iesu.+ 15 No to outou hoi maitai taua mau mea atoa nei, ia rahi mai â te hamani maitai rahi o te Atua. E rahi mai â te reira ia arue e rave rahi atu â taata i te Atua ma te haamauruuru ia ˈna.+

16 No reira, eita ïa tatou e tuu, e noa ˈtu e te ruhiruhia noa ˈtu ra te taata i rapaeau, mea papu e te faaapî-noa-hia ra te taata i roto i tera e tera mahana. 17 E noa ˈtu e mea poto e te mâmâ te ati* ta tatou e faaruru ra, na roto i taua ati ra e fanaˈo ai tatou i te hanahana mure ore o te haere noa ˈtu ra i te faahiahiaraa,*+ 18 a tiatonu noa ˈi tatou i te mau mea ite-ore-hia, eiaha râ i te mau mea itehia ra.+ No te hoê taime poto noa hoi te mau mea itehia ra, area te mau mea ite-ore-hia ra, e mea mure ore ïa.

5 Ua ite hoi tatou e ia hurihia i raro* to tatou fare i te fenua,+ e tiahapa hoi, e fanaˈo ïa tatou i te hoê paturaa no ǒ mai i te Atua ra, te hoê fare mure ore i nia i te raˈi tei ore i hamanihia e te rima taata.+ 2 Te autâ nei hoi tatou i roto i teie nei fare* no te hinaaro rahi e rave mai i te fare* no te raˈi+ o te tapoˈi ia tatou mai te ahu ra, 3 ia ore tatou ia vai tahaa noa ia tae i te taime e ahu ai tatou i te reira. 4 Oia mau, te autâ nei tatou i roto i teie tiahapa no te teimaha, e ere no te mea e te hinaaro nei tatou e tatara i teie tiahapa, tera râ, e hinaaro rahi to tatou i te ahu mai i te tahi atu,+ a mono atu ai te ora mure ore i te tino pohe.+ 5 E na te Atua i faaineine ia tatou no teie huru ora,+ oia tei horoa mai i te varua moˈa ei haapapuraa* i te mau haamaitairaa e fatata i te tupu.+

6 No reira, te tiaturi papu nei matou, e ua ite atoa hoi e a ora noa ˈi matou i roto i te tino, aita ïa matou i pihai iho i te Fatu.+ 7 E haerea faaroo hoi to tatou, e ere i te haerea ite mata. 8 Mea papu râ te hinaaro ra tatou e haapae i to tatou tino e e ora e te Fatu.+ 9 No reira, te ora ra anei tatou e o ˈna aore ra i te atea ia ˈna, e tutava anaˈe ia farii oia ia tatou. 10 E tia paatoa hoi tatou* i mua i te terono haavaraa o te Mesia, ia faahoˈihia ta te taata tataitahi ia au i ta ˈna i rave a ora noa ˈi i roto i te tino, e ohipa maitai anei ta ˈna aore ra e ohipa ino.+

11 Ua ite hoi matou e mea tia ia mǎtaˈu i te Fatu, no reira te haaferuri noa ra matou i te taata, ua ite maitai râ te Atua i to matou huru mau. Te tiaturi nei râ vau e ua tauturu to outou manaˈo haava ia outou ia taa i to matou huru mau. 12 Aita matou e faaite faahou ra ia outou o vai matou, te faaitoito nei râ ia riro matou ei haapeuraa na outou, a pahono atu ai outou i te feia e teoteo ra i te huru rapaeau,+ eiaha râ i to roto i te aau. 13 Mai te peu ua rave matou i te tahi mea mai te neneva ra,+ no te Atua ïa. Mai te peu râ e mea afaro to matou feruriraa, no outou ïa. 14 Te faahepo nei hoi te here o te Mesia ia tatou, no te mea teie to matou manaˈo, ua pohe te hoê no te taata atoa,+ i pohe ê na hoi te taata atoa. 15 E ua pohe oia no te taata atoa ia ore te feia e ora ra ia ora faahou no ratou iho,+ ia ora râ no ˈna o tei pohe no ratou e tei faatiahia mai.

16 Mai teie atu nei â, aita matou e hiˈo faahou ra i te taata ia au i ta te mata e ite.+ Noa ˈtu e ua ite roa ˈtu vetahi o matou i te Mesia, eita tatou e nehenehe e na reira faahou.+ 17 No reira, te taata atoa tei hoê e te Mesia, e taata hamani-apî-hia ïa.+ Ua mou hoi te mau mea tahito, e inaha, e mau mea apî teie i hamanihia. 18 No ǒ mai râ te mau mea atoa i te Atua ra tei faatupu i te hau i rotopu ia ˈna e ia tatou na roto i te Mesia+ e tei horoa mai i te taviniraa o te faahauraa,+ 19 te auraa, na roto i te Mesia, te faatupu ra ïa te Atua i te hau i rotopu ia ˈna e to te ao nei+ ma te faaore i ta ratou mau hapa,+ e ua horoa mai i te poroi o te faahauraa.+

20 No reira, ei tia tatou+ no te mono i te Mesia,+ mai te huru ra e te pii nei te Atua na roto ia tatou. Ei mono i te Mesia, te taparu nei ïa tatou: “A faahau e te Atua.” 21 Ua faariro te Atua i te taata hara ore+ ra ei hara* no tatou, ia nehenehe tatou, na roto ia ˈna, ia riro ei taata parau-tia i te aro o te Atua.+

6 Ei hoa ohipa no te Atua,+ te faaitoito nei matou ia outou e eiaha e farii faufaa ore noa i te hamani maitai rahi o te Atua.+ 2 Te na ô ra hoi oia: “I te tau o te farii maitai, ua faaroo vau ia oe, e i te hoê mahana faaoraraa, ua tauturu vau ia oe.”+ Inaha, teie mau â te tau o te farii maitai. E inaha, teie te mahana faaoraraa.

3 Eita roa ˈtu matou e tuu noa ˈˈe i te turoriraa i mua i te taata atoa, ia ore ta matou taviniraa ia faahapahia.+ 4 I roto râ i te mau tupuraa atoa, e faaite matou e e tavini matou na te Atua:+ na roto i te faaoromai-tamau-raa i te tamataraa e rave rahi, te ati, te ereraa, te fifi,+ 5 te tairiraa, te tapearaa,+ te faaarepurepuraa, te ohipa teimaha, te ara-noa-raa i te po e te ereraa i te maa,+ 6 na roto i te haerea viivii ore e te au i te ite, na roto i te faaoromai,+ te hamani maitai,+ te peeraa i te aratairaa a te varua moˈa, te faaiteraa i te here haavare ore,+ 7 na roto i te parau mau e te mana o te Atua,+ e maoti te mauhaa o te parau-tia+ i te rima atau e i te rima aui,* 8 e i roto i te hanahana e te tura ore, a faainohia ˈi e a haapopouhia ˈi. E feia haavare matou i te hiˈoraa a te taata, te parau nei râ matou i te parau mau. 9 Mai te feia ite-ore-hia ra matou, e feia ite-maitai-hia râ matou. Mai te mea ra e te pohe ra matou,* e inaha te ora noa nei.+ Mai te mea ra e ua aˈohia matou, aita râ i taparahi-pohe-roa-hia.+ 10 Mai te mea ra e te oto ra matou, te oaoa nei râ. Mai te veve ra matou, mea rahi râ te taoˈa ta matou e horoa ˈtu nei. Mai te taata taoˈa ore ra matou, tei ia matou nei râ te mau mea atoa.+

11 Ua parau roa ˈtu to matou vaha ia outou, te mau taeae no Korinetia, e ua haamahora ˈtu matou i to matou aau. 12 Ua faaite roa ˈtu matou i to matou here ia outou,+ aita râ outou i faaite roa mai i to outou here ia matou. 13 Te parau atu nei ïa vau ia outou mai te mea ra e e tamarii outou na ˈu, mai ia matou i na reira ˈtu, ia haamahora outou atoa i to outou aau.+

14 Eiaha outou ia amui-au-ore-hia i te feia* aita e tiaturi ra ia Iesu.+ E tuati anei te parau-tia i te ohipa ino?+ E tu anei te maramarama e te poiri?+ 15 Hau atu â, e auraa anei to te Mesia ia Behala?*+ E apiti anei te taata e tiaturi ra ia Iesu i te taata e ore e tiaturi ra?+ 16 E parahiraa anei to te idolo i roto i te hiero o te Atua?+ O tatou te hiero o te Atua ora,+ mai ta te Atua hoi i parau: “Ei pihai iho vau ia ratou,+ ei rotopu atoa ia ratou. E riro vau ei Atua no ratou e e riro ratou ei nunaa no ˈu.”+ 17 “‘No reira, a haere ê mai i rapae mai rotopu mai ia ratou, e a faataa ê mai ia outou’ te na reira mai ra Iehova,* ‘atira i te tapea i te mea viivii,’”+ “‘e e farii au ia outou.’”+ 18 “‘E e riro vau ei metua no outou,+ e e riro outou ei tamaiti e ei tamahine na ˈu,’+ te na reira mai ra Iehova,* te Manahope.”

7 Taeae here ma, i te mea e ua fafauhia mai taua mau parau ra ia tatou,+ e tamâ anaˈe ia tatou iho i te mau viivii atoa o te tino e o te feruriraa,*+ e ia moˈa roa ˈtu â tatou a mǎtaˈu ai i te Atua.

2 A farii ia matou i roto i to outou aau.+ Aita matou i haamauiui i te taata, aita matou i faahahi ê i te taata e aita matou i haavare i te taata ia faufaahia matou.+ 3 Aita vau e na reira ra i te parau no te faahapa ia outou. Ua parau aˈena hoi au e, ia ora aore ra ia pohe noa ˈtu matou, e here noa iho â matou ia outou. 4 E nehenehe ta ˈu e parau roa ˈtu ia outou. Ua haapeu roa vau ia outou. Ua tamahanahana-rahi-hia vau, e i roto i te mau fifi atoa ta matou e faaruru ra,+ te oaoa roa nei au.

5 Ia matou hoi i tapae atu i Makedonia,+ aita to matou rohirohi i mâha, ua tamau noa râ matou i te faaruru i te fifi e rave rau. Ua patoi uˈana mai to rapae, e ua haapeapea noa matou no te mau amuiraa. 6 Area te Atua, o te tamahanahana i te feia e hepohepo ra,+ ua tamahanahana ïa ia matou na roto ia Tito i to ˈna faaearaa mai ia matou ra. 7 Tera râ, e ere noa no to ˈna faaearaa mai, no to outou atoa râ tamahanahanaraa ia ˈna, ua faaite mai hoi oia i to outou hinaaro e farerei ia ˈu, e to outou oto rahi e to outou haapeapea rahi no ˈu. No reira vau i oaoa roa ˈi.

8 Noa ˈtu e ua oto outou no ta ˈu i papai i roto i ta ˈu rata,+ aita vau e tatarahapa ra. I tatarahapa na hoi au (i to ˈu hoi iteraa e ua oto outou no taua rata ra, noa ˈtu e no te hoê taime poto noa), 9 e teie nei, te oaoa nei au, eiaha no te mea te oto ra outou, no te mea râ ua turai taua oto ra ia outou ia tatarahapa. Ua oto outou ia au i te hinaaro o te Atua, e aita outou i ere i te tahi noa ˈˈe mea. 10 E faatupu hoi te oto ia au i te hinaaro o te Atua i te tatarahapa e noaa ˈi te faaoraraa,+ e e faufaa-noa-hia tatou i te reira. Area te oto ia au i teie nei ao, e faatupu ïa i te pohe. 11 A hiˈo na eaha te mea e ite-mau-hia ra i to outou otoraa ia au i te hinaaro o te Atua: ua haapapu outou iho e aita ta outou e hapa, mea hae na outou i te ino, ua mǎtaˈu i te Atua, ua hinaaro mau e tatarahapa, ua faaite i te itoito rahi e ua faatitiaifaro i te hape.+ I roto i te mau tupuraa atoa, ua haapapu outou e mea mâ* outou i taua mau mea nei. 12 Ua papai atu vau ia outou, eiaha no te taata tei rave i te ino,+ eiaha atoa no tei rave-ino-hia. Ua papai atu râ vau ia ite-maitai-hia e te faaroo maite ra outou ia matou i mua i te Atua. 13 No reira ïa matou i tamahanahanahia ˈi.

Hau atu â râ, ua rahi roa to matou oaoa a ite ai i te oaoa o Tito, no te mea ua faaitoito outou paatoa ia ˈna.* 14 Aita hoi au i haama i to ˈu haapopouraa ia outou i mua ia ˈna. Te mau parau atoa ta matou i parau no nia ia outou, e parau mau anaˈe. E ia haapopou matou ia Tito, e parau mau atoa ïa. 15 E ia manaˈo oia i to outou auraro e to outou fariiraa ia ˈna ma te faatura rahi,+ e rahi atu â ïa to ˈna here ia outou. 16 Te oaoa nei au, no te mea e nehenehe au e tiaturi ia outou* i te mau mea atoa.

8 Taeae ma, e hinaaro matou ia ite outou i teie nei i ta te hamani maitai rahi o te Atua i faatupu i rotopu i te mau amuiraa i Makedonia.+ 2 I roto i te tamataraa rahi a roohia ˈi ratou i te ati, ua faaite ratou i te oaoa rahi e te aau horoa noa, noa ˈtu e mea veve roa ratou. 3 Te haapapu atu nei au, ua horoa ratou+ i te mea e vai ra ia ratou,+ e hau atu â. 4 Ua onoono noa mai ratou, mai ta ratou iho i faaoti, ia nehenehe ratou e horoa i te tahi ô ma te aau tae e e apiti i teie taviniraa no te tauturu i te feia moˈa.+ 5 Ua rave hau atu â ratou i ta matou i manaˈo, ua haapae hoi ia ratou iho no te tavini i te Fatu e ia matou atoa na roto i te hinaaro o te Atua. 6 No reira, ua faaitoito matou ia Tito+ ia faaoti i te haaputu i ta outou ô horoahia ma te aau tae, i te mea e na ˈna i haamata i taua ohipa ra i rotopu ia outou. 7 I te mea e te rahi nei teie nei mau mea ia outou, oia hoi te faaroo e te aravihi i te parau e te ite e te anaanatae i te mau mea atoa e to matou here ia outou, ia rahi atoa ïa ta outou e horoa ma te aau tae.+

8 Te parau nei au i te reira, eiaha no te faahepo ia outou, ia taa râ ia outou to vetahi ê ra anaanatae. E hinaaro hoi au e ite e e here mau anei to outou. 9 Ua ite hoi outou i te hamani maitai rahi o to tatou Fatu ra o Iesu Mesia, noa ˈtu e e taoˈa rahi ta ˈna, ua riro oia ei taata veve no outou,+ ia taoˈahia hoi outou maoti to ˈna veve.

10 Teie to ˈu manaˈo:+ No to outou hoi maitai, inaha, a tahi aˈenei matahiti, aita outou i opua noa, ua rave roa râ i teie ohipa. 11 E teie nei, a rave faahope i ta outou i haamata ia au i te mea e vai ra ia outou, ta outou hoi i opua na e rave. 12 Ia anaanatae hoi te tahi taata i te horoa, e fariihia ïa ia au i te mea e vai ra ia ˈna,+ eiaha râ i te mea aita e vai ra ia ˈna. 13 Aita hoi au e hinaaro ra ia mâmâ te oraraa no te tahi pae, area no outou ra, ia teimaha ïa. 14 Tera râ, ia aifaito, ia turu atu outou i tei ere ra i teie mahana maoti ta outou taoˈa rahi, e ia nehenehe ratou ia turu mai i ta outou e ere ra maoti ta ratou taoˈa rahi, ia aifaito hoi te hopoia. 15 Mai tei papaihia: “Aita i rahi roa ta te taata i haaputu rahi mai, e aita i iti roa ta te taata i haaputu rii mai.”+

16 E teie nei, ia haamaitaihia te Atua i te tuuraa i te hoê â haapeapearaa no outou i roto i te aau o Tito,+ 17 no te mea ua farii oia i ta matou aniraa, e ma te hinaaro mau, na ˈna iho i faaoti e haere atu ia outou ra. 18 Tera râ, na muri ia ˈna, te tono atu nei matou i te taeae tei haapopouhia i roto i te mau amuiraa atoa no ta ˈna e rave ra no te parau apî oaoa. 19 Oia atoa râ, ua faatoroahia oia e te mau amuiraa ia apee mai ia matou i to matou tere, e ia tauturu mai i te haapaoraa i teie mau ô horoa noa i haaputuhia no te hanahana o te Fatu, e ei haapapuraa e ua ineine matou i te tauturu ia vetahi ê. 20 Te vai ara nei hoi matou ia ore matou ia faahapahia no teie tino moni i horoa-noa-hia mai, e o ta matou e haapao nei.+ 21 No te mea hoi, ‘te rave nei matou i te mau mea atoa ma te afaro, eiaha noa i mua ia Iehova,* i mua atoa râ i te taata.’+

22 E te tono atoa ˈtu nei matou i te tahi atu taeae to tatou, tei hiˈopoahia e tei itehia to ˈna haapao maitai i te mau mea atoa, e hau atu â i teie nei, i te mea e te tiaturi rahi nei oia ia outou. 23 Ia feaa noa ˈtu outou no Tito, e hoa* teie no ˈu e o mâua te rave i te ohipa no to outou maitai. E ia feaa noa ˈtu outou no te mau taeae, e aposetolo ratou no te mau amuiraa e o ratou te hanahana o te Mesia. 24 No reira, a haapapu atu i to outou here ia ratou,+ e a faaite atu i te mau amuiraa no te aha matou e haapeu ai ia outou.

9 E teie nei, aita hoi e titauhia ra ia papai vau ia outou no nia i te taviniraa i te feia moˈa,+ 2 ua ite hoi au i to outou anaanatae, o ta ˈu ïa e haapeu nei i mua i to Makedonia, hoê matahiti hoi i teie nei to outou ineineraa i Ahaia i te tauturu i te feia moˈa, e no to outou itoito rahi i anaanatae ai te rahiraa o ratou. 3 Tera râ, te tono atu nei au i te mau taeae, eiaha to matou haapeuraa ia outou ia faufaa ore, e ia ineine mau â outou, mai ta ˈu iho â i parau. 4 Ia apee mai râ te mau taeae no Makedonia ia ˈu a ite atu ai ratou e aita outou i ineine, e haama ïa matou no to matou tiaturi ia outou, e e haama atoa hoi outou. 5 Ua manaˈo ïa vau e mea maitai ia faaitoito atu i te mau taeae ia haere ratou na mua roa i ǒ outou, a haaputu mai ai i te ô ta outou i euhe e horoa, e ia tae atu matou, ua ineine ïa, e tapao te reira e e ô horoa noa teie, e ere i te mea faahepohia.

6 Tera râ, te taata e ueue ma te pipiri, mea iti ïa ta ˈna e ooti mai, area te taata e ueue ma te pipiri ore, mea rahi ïa ta ˈna e ooti mai.+ 7 Ia horoa te taata tataitahi mai ta ˈna i faaoti i roto i to ˈna aau, eiaha ma te hinaaro ore* aore ra ma te faahepohia,+ mea here hoi na te Atua te taata o te horoa ma te aau tae.+

8 Hau atu â, e nehenehe te Atua e faaite i to ˈna hamani maitai rahi hau ê ia outou, ia navai outou i te mau mea hinaaro-mau-hia no te oraraa, e no te rave atoa i te ohipa maitatai e rave rau.+ 9 (Mai tei papaihia: “Ua opere rahi oia,* ua horoa oia na te taata veve. E vai â ta ˈna parau-tia e a muri noa ˈtu.”+ 10 E teie nei, na te Atua o te horoa rahi mai i te huero na te taata ueue e i te faraoa ei maa, e horoa faarahi mai i te huero ia ueue outou e e faarahi i te hoturaa o ta outou parau-tia.) 11 I te mau mea atoa, te haamaitai-rahi-hia ra outou ia nehenehe hoi outou ia horoa noa i roto i te mau tupuraa atoa, no reira ïa te taata tei tauturuhia e haamauruuru ai i te Atua. 12 Teie hoi taviniraa ta outou e rave ra, e ere noa ïa no te horoa i te mea e hinaaro-mau-hia e te feia moˈa,+ ia riro atoa râ te reira ei tumu e haamauruuru-rahi-hia ˈi te Atua. 13 Te haapapu ra ta outou i rave i to outou huru mau, e no reira ratou e faahanahana ˈi i te Atua, ua auraro hoi outou i te parau apî oaoa no nia i te Mesia, mai ta outou e faaite haere ra, oia atoa no to outou aau horoa noa a turu ai outou ia ratou e ia vetahi ê atoa.+ 14 E na roto i to ratou taparuparuraa i te Atua no outou, e faaite ratou i to ratou here ia outou no te hau ê o te hamani maitai rahi o te Atua i nia ia outou.

15 E haamauruuru anaˈe i te Atua no teie ô faahiahia roa ta ˈna i horoa noa mai.

10 E teie nei, o vau iho nei o Paulo, te taparu nei au ia outou ma te mǎrû e te hamani maitai o te Mesia,+ o vau ta outou e manaˈo ra e e taata haihai ia parahi au i rotopu ia outou,+ mea itoito râ aita anaˈe vau i ǒ outou.+ 2 Te tiaturi nei au e ia tae atu vau, ua taui ê na te feia e manaˈo ra e e au to matou haerea i ta te tino, ia ore au ia aˈo etaeta ˈtu ia ratou. 3 Noa ˈtu e e haerea e au i ta te tino to matou, aita râ matou e tamaˈi ra ia au i ta te tino nei. 4 E ere hoi ta matou mauhaa tamaˈi i ta te tino,+ e mauhaa puai râ no ǒ mai i te Atua,+ no te huri i raro i te mau mea e au i te pare. 5 Te huri nei hoi matou i raro i te mau feruriraa hape e te mau mea teitei atoa o te patoi ra i te ite no nia i te Atua,+ e te faatîtî nei matou i te mau manaˈo atoa ia auraro noa i te Mesia. 6 Ua ineine atoa matou i te faautua ˈtu i te taata faaroo ore atoa,+ a haapapu roa mai ai outou i to outou auraro taatoa.

7 E haava outou i te mau mea ia au i te huru rapaeau. Mai te peu ua papu i te tahi ra e no te Mesia oia, ia haamanaˈo ïa: I te mea e no te Mesia oia, no te Mesia atoa ïa matou. 8 Mai te peu hoi e e haapeu roa vau i te mana ta te Fatu i horoa ia matou no te faaitoito ia outou eiaha râ no te vavahi,+ eita iho â vau e haama. 9 Aita hoi au e hinaaro ra ia manaˈo outou e te faariaria ra vau ia outou i ta ˈu mau rata. 10 Te parau nei hoi vetahi: “Mea teimaha ta ˈna mau rata e te puai, e taata haihai râ oia ia parahi tino mai i rotopu ia tatou e te faufaa ore hoi ta ˈna parau.” 11 Ia ite râ tera huru taata, ta matou i parau i roto i te rata aita ˈi matou i ǒ outou ra, o ta matou atoa ïa e rave* a parahi ai i rotopu ia outou.+ 12 Eita hoi e tia ia matou ia faafaito e ia faaau ia matou iho i te tahi pae o te faateitei ra ia ratou iho.+ A faafaito ai e a faaau ai ratou ia ratou iho, aita roa ïa ratou e maramarama ra.+

13 E haapeu iho â matou, eiaha râ hau atu i tei tia. E haapeu noa hoi matou i ta matou i rave i roto i te ohipa ta te Atua i horoa* mai, e to roto atoa outou.+ 14 A haere ai matou i ǒ outou, aita matou i rave i te tahi ohipa tei ore i faauehia mai e te Atua, o matou hoi tei tae matamua i ǒ outou no te faaite atu i te parau apî oaoa no nia i te Mesia.+ 15 Aita matou e haapeu nei i tei ore i faaotihia no matou, e aita hoi matou i haapeu i ta vetahi ê ra ohipa, te tiaturi nei râ matou, a rahi noa mai ai to outou faaroo, e rahi atoa mai ta matou ohipa e rave, i roto noa râ i ta matou tuhaa fenua pororaa. I reira ïa ta matou ohipa e aano roa ˈtu ai, 16 ia nehenehe matou e faaite i te parau apî oaoa i te mau fenua atea ˈtu â ia outou, ia ore matou ia haapeu i te ohipa i rave-aˈena-hia i roto i te tuhaa fenua a te tahi atu. 17 “Te taata e haapeu ra, ia haapeu ïa ia Iehova.”*+ 18 E farii Iehova* i te taata ta ˈna i haapopou,+ eiaha râ te taata tei haapopou ia ˈna iho.+

11 E hinaaro vau ia faaoromai outou ia ˈu noa ˈtu ta ˈu mau parau rii maamaa. Inaha hoi, te faaoromai noa ra outou! 2 Te manaˈonaˈo ra hoi au ia outou mai ta te Atua e manaˈonaˈo ra,* na ˈu iho hoi i momoˈa ia outou i te hoê tane faaipoipo, e te hinaaro nei au e pûpû ia outou mai te hoê vahine apî* viivii ore ra na te Mesia.+ 3 Tera râ, mai te ophi hoi i faahema ia Eva i ta ˈna ravea paari,+ te taiâ nei au ia viivii-atoa-hia to outou feruriraa, a ere atu ai outou i te haavare ore e te viivii ore e au i te Mesia.+ 4 Inaha, ia haere noa mai te tahi taata e poro ia outou i te hoê Iesu ê atu i ta matou i poro, aore ra ia pee outou i te hoê huru feruriraa* ê atu i ta outou i pee na, aore ra i te hoê parau apî oaoa ê atu i ta outou i farii na,+ ohie noa outou i te faaoromai i tera taata. 5 I to ˈu hoi hiˈoraa, aita roa ˈtu vau i iti noa ˈˈe i ta outou mau faahua aposetolo rarahi.+ 6 Tera râ, maˈua noa ˈtu vau i te parau,+ e ere roa ˈtu vau i te mea maˈua i te ite. Ua faaite papu atu hoi matou i te reira na roto i te mau ravea atoa e na roto i te mau mea atoa.

7 Eaha, ua hara anei au i to ˈu faahaehaaraa ia ˈu iho ia faateiteihia outou, no te mea ua faaite au ia outou i te parau apî oaoa a te Atua ma te tamoni ore?+ 8 Ua faaere au* i te tahi atu mau amuiraa i to ˈu fariiraa i ta ratou mau ô* ia nehenehe au e tavini ia outou.+ 9 E inaha, i to ˈu ereraa i te mau mea hinaaro-mau-hia i rotopu ia outou, aita vau i faateimaha i te hoê o outou, na te mau taeae râ tei haere mai na Makedonia mai i tauturu rahi mai ia ˈu.+ Oia mau, ua imi au i te mau ravea atoa eiaha roa e faateimaha ia outou, e e na reira noa vau.+ 10 E parau mau ta ˈu e parau atu nei mai te Mesia ra, eita ïa vau e faaea i te haapeu i te reira+ na Ahaia taatoa. 11 No te aha hoi? No te mea anei aita vau e here ra ia outou? O te Atua tei ite e mea here na ˈu ia outou.

12 E teie nei, mai ta ˈu e rave nei e na reira noa vau,+ no te haafaufaa ore i te ravea a te feia e imi ra i te tahi tumu* e aifaito ai ratou ia matou i te mau mea* ta ratou e haapeu ra. 13 E aposetolo haavare, e rave ohipa haavarevare, e e faahua aposetolo na te Mesia tera mau taata.+ 14 Eita vau e maere i te reira, o Satani hoi o te faahua noa nei ia ˈna ei melahi no te maramarama.+ 15 E ere ïa i te mea maere e te faahua rave noa nei ta ˈna mau tavini i te parau-tia. Tera râ, e au to ratou hopea i ta ratou mau ohipa.+

16 Te parau atu nei â vau: Eiaha te tahi taata ia manaˈo e e taata maamaa vau. Tera râ, ia na reira noa ˈtu outou, a faaoromai na ia ˈu i to ˈu maamaa nei, ia nehenehe atoa vau ia haapeu rii. 17 E ta ˈu e parau atu i teie nei, e ere ïa mai ta te Fatu, mai ta te hoê maamaa râ o te tiaturi rahi roa ia ˈna iho. 18 I te mea e e rave rahi teie e haapeu nei ia au i ta te tino,* e haapeu atoa ïa vau. 19 Inaha, e “feruriraa paari” to outou, oaoa roa ïa outou i te faaoromai i te feia maamaa. 20 Oia mau, te taata e faatîtî ra ia outou, e haru e e haapau ra i ta outou mau faufaa, e faateitei ra ia ˈna iho no te vahavaha ia outou aore ra te taata e tupai ia outou i te mata, o ta outou ïa e faaoromai nei.

21 Mea haama roa no matou ia parau i te reira, e au ra e ua ohipa matou ma te paruparu.

Ia ohipa râ te tahi pae ma te mǎtaˈu ore, e parau atu vau mai te maamaa ra, e ohipa atoa ïa vau ma te mǎtaˈu ore. 22 E Hebera ratou? O vau atoa.+ E ati Iseraela ratou? O vau atoa. E huaai ratou no Aberahama? O vau atoa.+ 23 E tavini ratou na te Mesia? E pahono vau mai te maamaa ra, eaha ˈtu â ïa vau: Mea rahi aˈe ta ˈu ohipa i rave,+ pinepine vau i te tapeahia,+ i te tairihia e e rave rahi taime ua fatata roa vau i te pohe.+ 24 E pae taime to ˈu tairiraahia e te ati Iuda, e 39 tairiraa i te taime hoê.+ 25 E toru taime to ˈu ruturaahia i te raau,+ hoê taime ua pehihia vau i te ofai,+ e e toru taime to ˈu atiraa a parari ai te pahi,+ hoê po hoê ao i te vairaa i roto i te moana. 26 I to ˈu mau tere e rave rahi, ua faaruru vau i te pape pue, i te eiâ, i te ati no ǒ mai i to ˈu iho nunaa+ e te tahi atu,+ i te ati i roto i te oire,+ te medebara, te miti e te ati i rotopu i te mau faahua taeae. 27 Ua faaruru vau i te ohipa teimaha e te rohirohi, pinepine au i te ara noa i te po,+ i te poia e te poihâ,+ e rave rahi taime i te ereraa i te maa,+ i te vairaa i roto i te toˈetoˈe e te navai-ore-raa i te ahu.*

28 Hau atu i taua mau fifi ra, te mea o te haapeapea ra ia ˈu i tera e tera mahana,* o to ˈu ïa tapitapiraa no te mau amuiraa atoa.+ 29 O vai tei paruparu e aita atoa vau i paruparu? O vai tei turori e aita vau i riri roa?

30 E ia haapeu vau e tia ˈi, e haapeu ïa vau i te mau mea e faaite ra i to ˈu paruparu. 31 Ua ite te Metua o to tatou Fatu ra o Iesu, o to ˈna atoa hoi Atua te tia ia aruehia e a muri noa ˈtu, e aita vau e haavare nei. 32 I Damaseko, ua tuu te tavana o te arii Areta i te tiai i te uputa o te oire no te haru ia ˈu, 33 ua haapouhia râ vau i roto i te hoê farii* na roto atu i te hoê haamaramarama o te patu o te oire,+ i ora mai ai au i to ˈna rima.

12 E mea tia ia haapeu vau. No reira, e faahiti atu vau i te mau orama+ e te mau heheuraa a te Fatu+ noa ˈtu e eita vau e faufaahia i te na reiraraa. 2 Ua ite au i te hoê taata tei hoê e te Mesia, ua ravehia ˈtu oia i nia i te toru o te raˈi a 14 matahiti i teie nei. Ua rave-tino-hia anei oia aore ra aita? Aita vau i ite, te Atua anaˈe tei ite. 3 Oia mau, ua ite au i teie nei taata. Ua rave-tino-hia anei oia aore ra aita? Aita vau i ite, te Atua anaˈe tei ite. 4 E i roto i te paradaiso, ua faaroo oia i te tahi mau parau e ore e tia ia parauhia, e ore atoa e tano no te hoê taata ia faahiti. 5 E haapeu vau i teie nei taata, e haapeu vau i to ˈu nei mau paruparu, eiaha râ ia ˈu iho. 6 Ahiri hoi au i hinaaro e haapeu, e ere ïa i te mea maamaa, no te mea e parau mau ta ˈu e parau atu. Eita râ vau e na reira, ia ore te taata ia haafaufaa rahi roa ia ˈu no ta ˈna e ite ra e e faaroo ra ia ˈu nei, 7 no teie noa mau heheuraa faahiahia i faaitehia mai ia ˈu.

Ia ore au ia faaoru, ua tuuhia mai te hoê tara i roto i to ˈu nei tino,+ te hoê melahi a Satani, no te haamauiui* noa ia ˈu ia ore au ia faaoru. 8 E toru hoi taime to ˈu taparuraa i te Fatu ia tatara i taua tara ra. 9 Ua parau mai râ oia: “Ua ravai oe i to ˈu hamani maitai rahi, i roto hoi i te paruparu e ite-maitai-hia ˈi te rahi o to ˈu puai.”+ No reira ïa vau e haapeu ai i to ˈu mau paruparu, ia vai mai hoi te puai o te Mesia mai te hoê tamaru i nia ia ˈu. 10 No reira, no te Mesia te oaoa nei au i to ˈu nei mau paruparu, oia atoa te faainoraa, te ereraa, te hamani-ino-raa e te fifi. Ia paruparu hoi au, i reira ïa vau e puai ai.+

11 Ua riro vau mai te maamaa ra te huru, o outou te tumu, no te mea aita outou i faahiti i te mau mea maitatai ta ˈu i rave. Faufaa ore noa ˈtu vau, aita roa vau i iti noa ˈˈe i ta outou mau faahua aposetolo rarahi.+ 12 Ua ite mau hoi outou i te mau haapapuraa e e aposetolo vau na roto i te faaoromai tamau,+ oia atoa te semeio, te ohipa faahiahia mau* e te mau ohipa mana.+ 13 Eaha hoi ta te tahi atu mau amuiraa maitai e aita ta outou? Aita hoi au i faateimaha ia outou. Ua hapa anei au?+ A faaore mai na ïa i teie hapa ta ˈu.

14 Inaha, teie au e haere atu nei i ǒ outou no te toru o te taime, e eita vau e faateimaha ia outou. E ere ta outou mau faufaa ta ˈu e hinaaro nei,+ o outou râ. E ere hoi na te tamarii+ e haaputu i te faufaa na to ratou mau metua, na te metua râ e haaputu na ta ratou mau tamarii. 15 Ia ˈu nei hoi, ua ineine au i te horoa i to ˈu puai atoa e ia hope roa no outou.*+ Ia rahi â hoi to ˈu here ia outou, eaha ïa to outou here ia ˈu e iti mai ai? 16 Noa ˈtu e aita vau i faateimaha ia outou,+ te parau noa nei outou: “E taata taviri tera e ua râmâ ia matou i ta ˈna mau haavarevare.” 17 Aita vau i apî ia outou na roto i te hoê o te feia ta ˈu i tono atu, tera iho â anei? 18 Ua faaue au ia Tito e ua tono atoa ˈtu i te hoê taeae na muri ia ˈna. Aita roa ˈtu Tito i apî ia outou, tera iho â anei?+ E ere anei hoê â manaˈo e hoê â haerea to matou?

19 Ua manaˈo noa anei outou e te pahono ra matou i ta outou mau pariraa? I te aro o te Atua matou e paraparau ai ei feia tei hoê e te Mesia. Taeae here ma, ua na reira hoi matou no te faaitoito ia outou. 20 Te taiâ nei hoi au e ia tae atu vau, te rave ra outou i te mea eita vau e au, e o vau nei te rave nei ïa i te mea eita outou e au, e itehia ˈtu te aimârôraa, te pohehae, te iria, te amahamaharaa, te faaino, te mutamuta,* te faaoru e te faahuehueraa. 21 Peneiaˈe ia haere faahou atu vau, e faahaehaa mai to ˈu Atua ia ˈu i mua ia outou, a oto atu ai au no te rahiraa o te feia i hara na aita râ i tatarahapa i ta ratou mau peu viivii e peu taotoraa tia ore,* e te mau peu faufau ta ratou i rave.*

13 Te haere atu nei au i ǒ outou no te toru o te taime. “Tei te parau a* e piti aore ra e toru ite e papu roa ˈi te mau mea atoa.”+ 2 Noa ˈtu e aita vau i rotopu ia outou i teie nei, teie râ, a farii i ta ˈu parau, mai te huru ra e o te piti o te taime vau i rotopu ai ia outou. Mai ta ˈu i rave aˈena, te faaara faahou atu nei au i te feia atoa i hara na e i te tahi atu pae e eita vau e faaherehere ia ratou ia tae noa ˈtu â vau, 3 i te mea e te imi nei outou i te haapapuraa e o te Mesia iho â teie e parau nei na roto ia ˈu, e ere oia i te mea paruparu i rotopu ia outou, e faaite noa râ oia i to ˈna puai rahi. 4 Oia mau, no te paruparu oia i haapohehia ˈi i nia i te pou, tera râ, te ora nei oia maoti te mana o te Atua.+ Parau mau, e mea paruparu tatou mai ia ˈna i paruparu na,+ tera râ, e ora matou paatoa e o ˈna maoti te mana o te Atua i rotopu ia outou.+

5 A tamau i te hiˈopoa ia outou tei roto anei outou i te faaroo, e i te tamata ia outou teihea huru taata outou.+ Aore ra aita anei outou i taa e ua hoê outou e Iesu Mesia? Mai te peu aita, aita ïa outou i fariihia e te Atua. 6 Te tiaturi mau nei au e e taa ia outou e ua fariihia matou.

7 E teie nei, te pure nei matou i te Atua ia ore outou ia rave i te mea ino, e ere ïa no te faaite e ua fariihia matou e te taata, ia rave râ outou i te mea maitai, noa ˈtu e eita matou e fariihia e te taata. 8 Eita roa hoi matou e nehenehe e patoi i te parau mau, e turu noa râ i te parau mau. 9 Ia paruparu matou a puai ai outou, e oaoa noa ïa matou. Teie hoi ta matou e ani nei na roto i te pure, ia faatitiaifarohia outou. 10 No reira vau e papai ai i teie mau parau aita anaˈe au i rotopu ia outou, e to reira anaˈe au, eiaha vau ia etaeta roa a faaohipa ˈi i te mana tei horoahia mai e te Fatu no te faaitoito ia outou,+ eiaha râ no te vavahi atu.

11 Taeae ma, teie ta ˈu mau parau hopea, ia tamau â outou i te oaoa, i te faatitiaifarohia, i te tamahanahanahia,+ i te faaite i te manaˈo hoê+ e i te ora hau noa.+ Ei ia outou ra te Atua o te here e o te hau.+ 12 E apa maitai i te tahi e te tahi ma te here taeae. 13 Te aroha ˈtu nei te feia moˈa atoa ia outou.

14 Ei ia outou paatoa te hamani maitai rahi o te Fatu ra o Iesu Mesia e te here o te Atua, e ia fanaˈo outou paatoa i te varua moˈa.