TE RATA MATAMUA I TO KORINETIA

1 O Paulo, tei titau-manihini-hia ei aposetolo+ na te Mesia ra o Iesu no te hinaaro o te Atua, e o Sositene to tatou taeae, 2 ia outou i te amuiraa o te Atua i Korinetia+ tei haamoˈahia ia riro ei hoê e te Mesia ra o Iesu+ e tei titau-manihini-hia ei feia moˈa, e i te feia atoa i te mau vahi atoa o te tiaturi* ra i te iˈoa o to tatou Fatu ra o Iesu Mesia,+ to ratou Fatu e to tatou atoa hoi:

3 Ei ia outou te hamani maitai rahi e te hau no ǒ mai i te Atua ra to tatou Metua e i te Fatu ra o Iesu Mesia.

4 Te haamauruuru noa nei au i te Atua i to ˈna horoaraa mai i te hamani maitai rahi ia outou na roto i te Mesia ra o Iesu. 5 Na roto ia ˈna i faufaahia ˈi outou i te mau mea atoa, mai te parau e te ite atoa,+ 6 e no te mea ua mau papu te poroi no nia i te Mesia+ i rotopu ia outou, 7 ia ore roa ïa outou ia ere i te hoê noa ˈˈe ô, a tiai ru noa ˈi ia faaitehia mai to tatou Fatu ra o Iesu Mesia.+ 8 E haapuai atoa te Atua ia outou e tae noa ˈtu i te hopea, ia ore outou ia pari-noa-hia aˈe i te mahana o to tatou Fatu ra o Iesu Mesia.+ 9 E Atua haapao maitai oia+ tei titau manihini ia outou no te amui* atu i ta ˈna Tamaiti ra o Iesu Mesia, to tatou Fatu.

10 Taeae ma, te faaitoito nei au ia outou na roto i te iˈoa o to tatou Fatu ra o Iesu Mesia ia tu ta outou mau parau e eiaha e faatupu i te amahamaha i rotopu ia outou.+ Ia hoê râ outou ma te hoê â feruriraa e hoê â aratairaa manaˈo.+ 11 Ua faaite mai vetahi no te utuafare o Heloe e e aimârôraa tei rotopu ia outou, e to ˈu mau taeae. 12 Oia hoi, te parau nei outou: “No Paulo vau,” “O vau nei râ, no Apolo,”+ “O vau, no Kepha,”* “O vau râ, no te Mesia.” 13 Ua amaha anei te Mesia? Eaha, o Paulo anei tei patitihia i nia i te pou no outou? I te iˈoa o Paulo anei outou i te bapetizoraahia? 14 Te haamauruuru nei au i te Atua i te mea e aita hoê o outou i bapetizohia e au, o Kerisepo+ anaˈe râ raua Gaio,+ 15 ia ore te tahi i rotopu ia outou ia parau e ua bapetizohia oia i to ˈu nei iˈoa. 16 E! Ua bapetizo atoa vau i te utuafare o Setephana.+ Aita râ vau e haamanaˈo ra e ua bapetizo anei au i te tahi atu. 17 Ua tono hoi te Mesia ia ˈu, eiaha no te bapetizo atu, no te faaite râ i te parau apî oaoa,+ e eiaha na roto i te parau a te feia ite* a haafaufaa-ore-hia ˈtu ai te pohe o te Mesia i nia i te pou haamauiuiraa.*

18 No te feia e haamouhia,+ e mea maamaa te parau o te pou haamauiuiraa,* no tatou râ o te faaorahia ra e te Atua, o te mana ïa te reira o te Atua.+ 19 Ua papaihia hoi: “E faaore au i te paari o te taata paari, e te maramarama o te taata maramarama, o ta ˈu ïa e faarue.”*+ 20 Teihea te taata paari? Teihea te papai parau?* Teihea te taata mârô o teie nei ao?* Aita anei te Atua i faariro i te paari o teie nei ao ei mea maamaa? 21 Ia au hoi i te paari o te Atua, aita i noaa i teie nei ao, na roto i to ˈna iho paari,+ ia ite i te Atua.+ Ua tia râ i te Atua, na roto i te poroi ta matou e poro ra e ta vetahi e manaˈo ra e mea maamaa,+ ia faaora i te feia e tiaturi ra.

22 Te ani ra hoi te ati Iuda i te tapao+ e te imi ra te Heleni i te paari. 23 Area tatou, te poro nei ïa e ua haapohehia te Mesia i nia i te pou. No te ati Iuda e ofai turoriraa teie, no te mau nunaa ěê râ e parau maamaa ïa.+ 24 Tera râ, no te feia i titau-manihini-hia, te ati Iuda e te Heleni atoa, o te Mesia te mana e te paari o te Atua.+ 25 E manaˈo paha te taata e mea maamaa e te paruparu te mau mea no ǒ mai i te Atua ra. Tera râ, e mea paari e e mea puai aˈe teie mau mea ia ratou.+

26 Taeae ma, ua ite hoi outou e i to te Atua titau-manihini-raa ia outou, aita rea e taata paari ia au i te tino*+ i rotopu ia outou e aita rea e taata puai, aita rea e taata no roto mai i te opu huiarii.*+ 27 Tera râ, ua maiti te Atua i te mau mea maamaa o teie nei ao no te faahaama i te taata paari. Ua maiti te Atua i te mau mea paruparu o teie nei ao no te faahaama i te taata puai.+ 28 E ua maiti te Atua i te mau mea riirii o teie nei ao e te mau mea i vahavahahia, e te mau mea aita e vai ra, no te faaore roa i te mau mea e vai nei,+ 29 ia ore roa te tahi* ia faatietie ia ˈna i mua i te Atua. 30 No te Atua râ i hoê ai tatou e te Mesia ra o Iesu, na ˈna hoi i faaite ia tatou i te paari e te parau-tia o te Atua.+ Na roto ia ˈna i moˈa ˈi tatou,+ e na roto i te hoo* i tiamâ ˈi tatou.+ 31 E ia tupu iho â mai tei papaihia: “Te taata e haapeu ra, ia haapeu ïa ia Iehova.”*+

2 Taeae ma, aita vau i haere atu i ǒ outou ma te faaiteite i to ˈu aravihi ia paraparau+ aore ra i to ˈu paari a poro ai i te parau huna moˈa+ a te Atua. 2 Ua faaoti hoi au eiaha e faahiti i te tahi parau ê atu i rotopu ia outou maori râ no nia ia Iesu Mesia, e i to ˈna haapoheraahia i nia i te pou.+ 3 E ua haere atu vau i ǒ outou na roto i te paruparu e te mǎtaˈu e te rûrû. 4 Aita ta ˈu mau parau e ta ˈu pororaa ia outou i ravehia na roto i te mau parau paari no te ume mai ia outou, na roto râ i te hoê faaiteraa papu o te varua moˈa* e o te mana o te Atua,+ 5 ia niuhia hoi to outou faaroo, eiaha i nia i te paari o te taata, i nia râ i te puai o te Atua.

6 E paraparau tatou i te feia paari i te pae varua i te mau parau no nia i te paari,+ eiaha râ no nia i te paari o teie nei ao,* eiaha atoa no nia i te paari o te mau raatira o teie nei ao, o te haamouhia hoi.+ 7 E paraparau râ tatou no nia i te paari o te Atua tei hunahia i roto i te hoê parau huna moˈa+ ta te Atua i opua ê na hou te mau faanahoraa o te ao nei* ia noaa ia tatou te hanahana. 8 Tera hoi taua paari ra tei ore i noaa i te hoê noa ˈˈe raatira o teie nei ao* i te ite,+ ahani hoi ratou i ite, eita ïa ratou e haapohe i te Fatu hanahana.* 9 Tera râ, mai tei papaihia: “Aita te mata i ite e aita te tariˈa i faaroo, aita atoa râ ratou i manaˈo i roto i to ratou aau i te mau mea ta te Atua i faaineine no te feia e here ia ˈna.”+ 10 Ua faaite hoi te Atua i te reira ia tatou+ na roto i to ˈna varua.+ E paheru hoi te varua moˈa i te mau mea atoa e tae noa ˈtu i te hohonuraa o te paari o te Atua.+

11 O vai hoi tei ite i te mau manaˈo o te tahi atu taata maori râ taua iho* taata ra? Oia atoa, aita hoê i ite i te mau manaˈo o te Atua, o te varua o te Atua anaˈe râ. 12 E teie nei, ua farii tatou, eiaha te huru feruriraa* o teie nei ao, te varua râ no ǒ mai i te Atua+ ia nehenehe tatou ia ite i te mau mea i horoa-noa-hia mai e te Atua. 13 E faahiti atoa tatou i te reira, eiaha na roto i te mau parau no roto mai i te paari o te taata,+ i te mau parau râ i haapiihia e te varua o te Atua,+ a faataa* noa ˈi tatou i te mau mea pae varua na roto i te mau parau pae varua.

14 Tera râ, eita te hoê taata o te haapao i ta te tino e farii i te mau mea o te varua o te Atua, no ˈna, mea maamaa te reira. Eita iho â e noaa ia ˈna i te ite, no te mea e hiˈopoahia te reira maoti te varua moˈa. 15 Area te taata o te haapao i ta te varua, e hiˈopoa ïa oia i te mau mea atoa,+ eita râ oia e hiˈopoahia e te tahi atu. 16 Inaha hoi, “o vai te nehenehe e ite i te manaˈo o Iehova* a haapii atu ai ia ˈna?”+ Tei ia tatou nei râ te manaˈo o te Mesia.+

3 No reira taeae ma, aita ta ˈu i nehenehe e paraparau ia outou mai ta ˈu e paraparau atu i te taata o te haapao i ta te varua,+ mai ta ˈu râ e paraparau atu i te taata o te haapao i ta te tino, mai i te aiû ra+ i roto i te Mesia. 2 Ua faaamu vau ia outou i te û, eiaha râ i te maa, aita â hoi outou i paari roa ˈtura. E inaha, i teie nei e ere â outou i te taata paari,+ 3 te haapao noa ra hoi outou i ta te tino.+ I te mea e te itehia ra i rotopu ia outou te pohehae e te tatamaˈiraa, aita anei ïa outou e haapao noa ra i ta te tino?+ E aita anei to outou haerea e au ra i to te taata o teie nei ao? 4 Te parau nei hoi te tahi “No Paulo vau” area te tahi atu “O vau, no Apolo.”+ Ia na reira outou, aita anei outou e rave ra mai te taata o teie nei ao?

5 Eaha hoi o Apolo? Oia mau, eaha o Paulo? E tavini raua+ o te rave i te ohipa ta te Fatu i horoa mai ia raua. Mea na roto ia raua i tiaturi ai outou ia Iesu. 6 Ua tanu vau,+ ua pîpî Apolo i te pape.+ Na te Atua râ i faatupu. 7 No reira, e ere roa ˈtu tei te taata tanu ra te hanahana, e ere atoa tei te taata pîpî pape ra, tei te Atua râ o te faatupu.+ 8 Hoê anaˈe hoi te taata tanu e te taata pîpî pape,* tera râ, e fanaˈo raua tataitahi i ta raua haamaitairaa ia au i te ohipa ta tera e tera i rave.+ 9 E hoa ohipa hoi mâua no te Atua. O outou te aua ta te Atua e faaapu ra, te fare hoi ta te Atua e patu ra.+

10 No te hamani maitai rahi o te Atua ia ˈu nei, ua riro vau mai te hoê tamuta aravihi.* Ua haamau vau i te hoê niu,+ tera râ, ua patu te tahi atu i nia iho. E haapao maitai anaˈe ïa i te huru o ta tatou paturaa i nia i taua niu ra. 11 Eita hoi hoê noa ˈˈe taata e nehenehe e haamau i te tahi atu niu i tei haamau-aˈena-hia, oia hoi o Iesu Mesia.+ 12 E teie nei, ia patu te tahi i nia iho i te niu ma te faaohipa i te auro, te ario, te ofai maitai roa, te raau, te aihere mǎrô, aore ra te aeho, 13 e faaitehia mai te ohipa a te taata tataitahi ia tae mai te mahana tamataraa, na te auahi hoi e faaite mai e no te auahi+ e ite-roa-hia ˈi te huru paturaa a te taata tataitahi. 14 Ia ore ta te taata i patu i nia i te niu ia pau i te auahi, e haamaitaihia oia. 15 Ia ninahia râ i te auahi, e pau iti rahi ïa ta ˈna. Tera râ, e ora oia mai te huru ra e mea na roto mai i te auahi.

16 Aita anei outou i ite e o outou te hiero o te Atua,+ e te parahi ra te varua o te Atua i rotopu ia outou?+ 17 Ia vavahi noa ˈtu te tahi i te hiero o te Atua, e haamou te Atua ia ˈna, mea moˈa hoi te hiero o te Atua e o outou taua hiero ra.+

18 Eiaha te taata ia haavare ia ˈna iho: Ia manaˈo noa ˈtu te tahi i rotopu ia outou e e mea paari oia i te hiˈoraa a te taata o teie nei ao,* ia riro oia ei maamaa, i reira ïa e noaa ˈi ia ˈna te paari mau. 19 No te Atua, mea maamaa hoi te paari o teie nei ao, mai tei papaihia: “E noaahia ia ˈna te feia paari i ta ratou iho raveraa haavarevare.”+ 20 Hau atu â: “Ua ite Iehova* e mea faufaa ore te huru feruriraa o te taata paari.”+ 21 No reira, eiaha te tahi ia teoteo i ta te taata i rave, no outou hoi te mau mea atoa, 22 o Paulo anei, o Apolo anei, o Kepha*+ anei, teie nei ao anei, te ora anei aore ra te pohe, te mau mea e vai nei aore ra te mau mea e haere mai, no outou te mau mea atoa. 23 Area outou, no te Mesia ïa,+ e te Mesia, no te Atua ïa.

4 E mea tia ia riro matou i mua i te taata mai te mau tauturu o te Mesia* e mai te mau tiaau o te mau parau huna moˈa a te Atua.+ 2 No reira, tei titauhia i te mau tiaau, ia rave ïa i ta ratou ohipa ma te haapao maitai. 3 E teie nei, aita vau e tâuˈa roa ra ia hiˈopoa mai outou aore ra te hoê tiripuna a te taata, ia ˈu. O vau atoa nei hoi, aita vau e hiˈopoa ra ia ˈu iho. 4 Aita hoi au e ite ra i te tahi mea o te faahapa ra ia ˈu. E ere râ no te reira e taata parau-tia ˈi au. Na Iehova* e hiˈopoa mai ia ˈu.+ 5 Hau atu â, eiaha e haava+ i te taata hou te taime tano ra e ia tae roa mai te Fatu. E tuu oia i te mau mea huna o te poiri i te maramarama e e faaite oia i te mau opuaraa o te aau. E fanaˈo ïa te taata tataitahi i te haamaitairaa e au ia ˈna no ǒ mai i te Atua.+

6 Hau atu â taeae ma, ua faaau vau i teie mau parau no ˈu e no Apolo+ no to outou maitai, ia ite outou i teie ture: “Eiaha ia na nia ˈtu i tei papaihia,” ia ore ïa outou ia faaoru+ a manaˈo ai mea hau aˈe te tahi i te tahi atu. 7 Eaha oe e hau ê ai i te tahi atu? Oia mau, eaha ta oe, e ere i te mea horoahia mai?+ E i te mea hoi mea horoahia mai, eaha ïa ta oe e teoteo ra mai te huru ra e e ere i te mea horoahia mai?

8 Ua mâha aˈenei outou? Ua taoˈa-rahi-hia aˈenei outou? Ua faatere ê na anei outou ei arii+ e aita matou? Aita iho â. Ahiri hoi ua faatere ê na outou ei arii, e oaoa ïa vau, no te mea o matou atoa te faatere ei arii e o outou.+ 9 No ˈu nei, e au ra e ua tuu te Atua ia matou, te mau aposetolo, i nia i te tahua no te opani i te hautiraa, mai te feia i faataahia no te pohe,+ e ua riro matou ei mataitairaa na to te ao,+ e na te mau melahi e na te mau taata atoa. 10 Ua riro matou mai te maamaa+ no te Mesia, area outou, mea paari ïa ia au i te Mesia. Mea paruparu matou, area outou, mea puai ïa. Te faahanahana-noa-hia ra outou, area matou, te vahavaha-noa-hia ra ïa. 11 E tae roa mai i teie hora, te poia noa ra matou+ e te poihâ noa ra,+ aita matou e ravai ra i te ahu,* te tairi-noa-hia* ra matou,+ te ere noa ra i te fare 12 e te tautoo noa ra i te rave i te ohipa i to matou iho rima.+ Ia faainohia mai, e haamaitai atu matou.+ Ia hamani-ino-hia mai, e faaoromai tamau matou.+ 13 Ia tuhihia mai, e pahono matou na roto i te mǎrû.*+ Ua riro matou e tae roa mai i teie nei mai te pehu o teie nei ao, mai te mau mea i faaruehia e te taata.

14 Te papai atu nei au i teie mau parau, eiaha no te faahaama ia outou, no te aˈo atu râ mai ta ˈu mau tamarii herehia. 15 Ahuru tausani noa ˈtu â ta outou orometua* i te Mesia, mea papu aita rea metua tane to outou. No te mea, i te Mesia ra o Iesu, ua riro vau mai te metua tane no outou na roto i te parau apî oaoa.+ 16 No reira, te faaitoito atu nei au ia outou ia pee mai i to ˈu haerea.+ 17 Te tumu ïa e tono atu ai au ia Timoteo ia outou ra, o ta ˈu tamaiti herehia hoi teie e te haapao maitai i roto i te taviniraa a te Fatu. E haamanaˈo atu oia ia outou i ta ˈu huru raveraa ia au i ta te Mesia* ra o Iesu,+ mai ta ˈu atoa e haapii ra i te mau vahi atoa i roto i te mau amuiraa atoa.

18 Mea faaoru roa vetahi e te parau nei ratou, “Eita oia e haere mai.” 19 Tera râ, fatata iho â vau i te haere atu ia outou, ia tia ia Iehova.* E hinaaro vau e farerei i taua feia faaoru ra, eiaha no te faaroo i ta ratou mau parau, no te ite râ e tei ia ratou anei te puai o te Atua aore ra aita. 20 E ere hoi te Faatereraa arii a* te Atua tei te parau ra, tei te puai râ no ǒ mai i te Atua. 21 Teihea ta outou e hinaaro? Ia haere atu vau ia outou ma te tapu raau i te rima?+ Aore ra na roto i te here e te aau mǎrû?

5 Inaha, te faarooroohia ra e ua tupu i rotopu ia outou te hoê peu taotoraa tia ore*+ tei ore e itehia ra i roto atoa i te mau nunaa ěê, oia hoi, te faaea ra* te hoê tane i te vahine a to ˈna iho metua tane.+ 2 Ua au roa ïa outou! E mea maitai aˈe râ no outou ia oto,+ e ia tuu i tera taata tei rave i taua ohipa faufau ra i rapae i te amuiraa.+ 3 Noa ˈtu e aita vau i ǒ outou, to ˈu râ manaˈo,* oia ïa. E ua haava ê na vau i te tane tei rave i te reira mai te huru ra e tei rotopu iho â vau ia outou. 4 E ia putuputu outou, tei ia outou ra ïa to ˈu manaˈo* e oia atoa te puai o to tatou Fatu ra o Iesu. No reira, i te iˈoa o to tatou Fatu ra o Iesu, 5 e tuu outou i tera taata ia Satani ra+ ia haamouhia ta te tino, e na reira hoi e paruruhia ˈi te huru feruriraa* o te amuiraa i te mahana o te Fatu.+

6 E ere to outou i te teoteoraa nehenehe. Aita anei outou i ite e e maraa* te taatoaraa o te faraoa ôihia i te hopue rii noa?+ 7 A tatara i te hopue tahito ia riro outou ei puea apî, aita hoi e hopue i roto ia outou.* Inaha, ua faatusiahia+ te Mesia, ta tatou arenio* o te Pasa.+ 8 No reira, e faatupu anaˈe i taua oroa ra,+ eiaha i te hopue tahito, aore ra i te hopue ino e te hara, ma te rave râ i te pane* hopue ore o te haavare ore e te parau mau.

9 I roto i ta ˈu rata, ua papai au ia outou ia faaea i te amuimui atu i te feia e rave i te mau peu taotoraa tia ore,* 10 aita vau e parau ra no te feia atoa o teie nei ao e rave ra i te mau peu taotoraa tia ore*+ aore ra i te feia nounou, e te eiâ e te haamori idolo. Ahiri te reira ra, e tia iho â ïa ia haere ê mai outou i rapae i teie nei ao.+ 11 E teie nei râ, te papai atu nei au ia outou ia faaea i te amuimui atu+ i te taata tei parauhia na e taeae e o te rave nei i te mau peu taotoraa tia ore,* aore ra te taata nounou,+ e te haamori idolo, e te parau ino,* e te inu ava+ e te eiâ.+ Hau atu â, eiaha roa e tamaa e tera huru taata. 12 No te aha hoi au e haava ˈtu ai i to rapae i te amuiraa? Eita anei outou e haava i to roto i te amuiraa, 13 a haava noa ˈi te Atua i to rapae?+ “A tuu i te taata ino i rapae i te amuiraa.”+

6 Ua tupu anaˈe te peapea i rotopu ia outou,+ eaha outou i manaˈo ai e horo i te tahi atu i te haavaraa a te feia parau-tia ore e eiaha râ i mua i te feia moˈa? 2 Aita paha ïa outou i ite e e haava te feia moˈa i to teie nei ao?+ E i te mea e e haava outou i to teie nei ao, mea aravihi mau ïa outou no te haava i te mau peapea rii, e ere anei? 3 Aita outou i ite e e haava tatou i te mau melahi?+ Eaha ˈtu â ïa te mau mea o teie oraraa nei! 4 E i te mea e e haava mau outou i te mau mea o teie oraraa nei,+ eaha ïa outou i rave ai i te feia i ore i fariihia e te amuiraa ei haava no outou? 5 Te parau nei au i te reira no te faahaama ia outou. Eaha, aita anei ïa hoê aˈe taata feruriraa paari e nehenehe e haava i rotopu i to ˈna mau taeae? 6 Aita râ. Te horo ra te taeae i te taeae i te haavaraa, e hau atu â, na te feia aita e tiaturi ra ia Iesu e haava ia raua!

7 Oia mau, mea haama roa no outou ia horo te tahi i te tahi i te haavaraa. No te aha e ore ai e faaoromai noa i te ino?+ No te aha e ore ai e vaiiho noa ia faaerehia outou? 8 Aita. O outou iho râ te hamani ino ra e te faaere ra, e hau atu â, i to outou iho mau taeae!

9 Eaha! Aita outou i ite e eita te feia parau-tia ore e fatu i te Faatereraa arii a* te Atua?+ Eiaha outou e vare.* Eita roa ˈtu te feia o te rave i te mau peu taotoraa tia ore,*+ e te haamori idolo,+ e te faaturi,+ e te peu mahu,+ e te tane e taoto i te tane,+ 10 e te eiâ, e te nounou,+ e te inu ava,+ e te parau ino,* e te taviri taata, eita roa ˈtu ïa e fatu i te Faatereraa arii a te Atua.+ 11 Mai te reira na hoi vetahi o outou. Ua tamâ-roa-hia râ outou,+ e ua haamoˈahia,+ e ua parauhia outou e taata parau-tia+ i te iˈoa o te Fatu ra o Iesu Mesia e na roto i te varua o to tatou Atua.

12 No ˈu, e mea tia anaˈe te mau mea atoa, eita râ te taata e faufaahia i te mau mea atoa.+ No ˈu, e mea tia anaˈe te mau mea atoa, eita râ vau e vaiiho ia faaterehia vau e te tahi noa ˈˈe mea.* 13 No te opu te maa e no te maa te opu, e haamou râ te Atua i te reira.+ E ere te tino no te rave i te mau peu taotoraa tia ore,* no te rave râ i te ohipa a te Fatu,+ e e aupuru te Fatu i te tino. 14 Ua faatia mai râ te Atua i te Fatu,+ e na roto i to ˈna mana,+ e faatia atoa mai oia ia tatou mai te pohe mai.+

15 Aita anei outou i ite e e mero to outou mau tino no te tino o te Mesia?+ Nafea ïa, e faataa ê anei au i te mau mero o te tino o te Mesia a taati atu ai i te reira i te hoê vahine taiata? Eiaha roa ˈtu! 16 Aita anei outou i ite e te taata tei ati atu i te hoê vahine taiata, ua riro ïa ei tino hoê e taua taiata ra? Te parau ra hoi te Atua, “e riro raua ei hoê.”+ 17 Te taata râ tei hoê e te Fatu, hoê â ïa manaˈo* to raua.+ 18 A maue ê atu i te mau peu taotoraa tia ore!*+ Eita hoi te tahi atu hara e tuino i te tino, area râ o te rave i te mau peu taotoraa tia ore, te hara ra ïa i to ˈna iho tino.+ 19 Aita anei outou i ite e to outou tino, o te hiero ïa+ o te varua moˈa o te Atua e vai ra i roto ia outou?+ E ere atoa outou no outou iho,+ 20 no te mea ua hoohia mai outou i te hoê hoo.+ No reira, a faahanahana ïa i te Atua+ i to outou tino.+

7 E teie nei, no te pahono atu i te mau uiraa ta outou i papai mai, e mea maitai aˈe no te hoê tane eiaha ia taoto i te hoê vahine. 2 No te mea râ te rahi noa ˈtu ra te mau peu taotoraa tia ore,* ei vahine faaipoipo ïa ta te tane tataitahi+ e ei tane faaipoipo ta te vahine tataitahi+ e tia ˈi. 3 Ia haamâha te tane faaipoipo i te mau hinaaro o ta ˈna iho vahine e ia na reira atoa ˈtu te vahine faaipoipo i ta ˈna iho tane.+ 4 E ere tei te vahine faaipoipo te parau i nia i to ˈna iho tino, tei ta ˈna iho râ tane. Oia atoa, e ere tei te tane faaipoipo te parau i nia i to ˈna iho tino, tei ta ˈna iho râ vahine. 5 Eiaha orua ia faaere te tahi i te tahi, maori râ ia tia ia orua atoa, e no te hoê taime poto noa a faataa ˈi orua i te taime no te pure. I muri aˈe, ia apiti faahou orua e tia ˈi, ia ore Satani ia râmâ noa ia orua no te oreraa e vî ia orua i te faaoromai. 6 Tera râ, e aˈoraa noa teie ta outou e nehenehe e pee, e ere i te faaheporaa. 7 Te hinaaro nei hoi au ia riro te taata atoa mai ia ˈu atoa nei. Tera râ, ua horoa te Atua i te ô na te taata tataitahi,+ ia faaipoipo aore ra ia faaea taa noa.

8 E teie nei, te parau atu nei au i te feia taa noa* e i te mau vahine ivi e mea maitai aˈe no ratou ia faaea noa mai ia ˈu atoa nei.+ 9 Ia ore râ ia vî ia ratou i te faaoromai, ia faaipoipo ïa, e mea maitai aˈe hoi te faaipoiporaa i te ura-noa-raa i te hinaaro.+

10 Teie atu te mau faaueraa i te feia faaipoipo, e ere hoi na ˈu, na te Fatu râ. Eiaha te vahine faaipoipo e faataa ê i ta ˈna iho tane.+ 11 Tera râ, ia faataa ê noa ˈtu oia, eiaha oia ia faaipoipo faahou, aore ra ia hau faahou raua ta ˈna tane faaipoipo. E eiaha roa te hoê tane faaipoipo e faarue i ta ˈna iho vahine.+

12 I te tahi atu râ feia faaipoipohia, o vau teie e parau atu nei, e ere ïa te Fatu:+ Mai te peu e ua faaipoipohia te hoê taeae i te hoê vahine e ere i te tuahine i roto i te faaroo, e ua farii taua vahine ra ia faaea noa raua, eiaha ïa te taeae e faarue ia ˈna. 13 E mai te peu e ua faaipoipohia te hoê vahine i te hoê tane e ere i te taeae i roto i te faaroo, e ua farii taua tane ra ia faaea noa raua, eiaha ïa te vahine e faarue i ta ˈna iho tane. 14 No ta ˈna hoi vahine faaipoipo i haamoˈahia ˈi te tane e ere i te taeae i roto i te faaroo, e no te taeae i haamoˈahia ˈi te vahine e ere i te tuahine i roto i te faaroo. Aita anaˈe, e mea viivii ïa ta outou mau tamarii. E teie nei râ, e mea moˈa ratou. 15 Tera râ, ia faaoti te hoa faaipoipo aita i roto i te faaroo e faataa ê, ia faataa ê ïa. Ia tupu noa ˈtu râ te reira, eita te taeae aore ra te tuahine e faahepohia ia faaea mai, ua titau manihini hoi te Atua ia outou ia ora ma te hau.+ 16 E teie nei vahine faaipoipo, e nafea oe i ite ai e eita ta oe iho tane e ora mai ia oe?+ E teie nei tane faaipoipo, e nafea oe i ite ai e eita ta oe iho vahine e ora mai ia oe?

17 Ia ora noa te taata tataitahi ia au i te tuhaa ta Iehova* i horoa ia ˈna i to ˈna titau-manihini-raahia e te Atua.+ No reira, te horoa nei au i teie faaueraa i te mau amuiraa atoa. 18 Ua peritomehia anei te tahi i to ˈna titau-manihini-raahia?+ Eiaha ïa to ˈna peritomeraa ia faaorehia. Aita anei te tahi i peritomehia i to ˈna titau-manihini-raahia? Eiaha ïa ia peritomehia.+ 19 O te haapaoraa i te mau faaueraa a te Atua te mea faufaa roa,+ eiaha râ te peritomeraa aore ra te peritome-ore-raa.+ 20 Te huru iho â i titau-manihini-hia ˈi te taata tataitahi, ia faaea noa oia mai te reira.+ 21 E tîtî anei oe i to oe titau-manihini-raahia? Eiaha e haapeapea.+ Ia nehenehe râ oe ia faatiamâhia, ia na reirahia ïa. 22 E riro hoi te taata i titau-manihini-hia i roto i te Fatu a vai tîtî noa ˈi ei taata faatiamâhia no te Fatu.+ E te taata atoa i titau-manihini-hia a vai tiamâ noa ˈi, e riro ïa ei tavini na te Mesia. 23 Ua hoohia mai outou i te hoê hoo,+ eiaha faahou ïa outou ia riro ei tîtî na te taata. 24 Taeae ma, te huru iho â i titau-manihini-hia ˈi te taata tataitahi, ia faaea noa oia mai te reira i mua i te Atua.

25 E teie nei, no te feia aita i faaipoipo aˈenei,* aita ta ˈu e faaueraa no ǒ mai i te Fatu. Tera râ, e horoa atu vau i to ˈu manaˈo.+ No te mea ua aroha* mai te Fatu ia ˈu, e nehenehe ïa outou e tiaturi i ta ˈu parau. 26 No reira, i to ˈu manaˈo, i te mea e e tau fifi mau teie, e mea maitai aˈe no te hoê tane ia faaea noa oia mai ta ˈna e faaea nei. 27 Ua taatihia anei oe i te hoê vahine faaipoipo? Eiaha e imi i te faarue ia ˈna.+ Aita anei ta oe e vahine faaipoipo? Eiaha e imi faahou. 28 Tera râ, ia faaipoipo noa ˈtu oe, eita oe e hara. Oia atoa te feia aita i faaipoipo aˈenei,* eita ratou e hara ia faaipoipo noa ˈtu ratou, e fifihia râ ratou i te tino. E hinaaro râ vau eiaha outou ia fifihia.

29 Taeae ma, te parau atoa ˈtu nei au e ua poto te taime.+ Mai teie atu nei, ia riro te mau tane i faaipoipohia i te vahine mai te huru ra e aita ta ratou e vahine, 30 e te feia e taˈi ra mai te huru ra e aita ratou e taˈi ra, e te feia e oaoa ra mai te huru ra e aita ratou e oaoa ra, e te feia e hoo mai ra mai te huru ra e aita ta ratou, 31 e te feia e faaohipa ra i te mau mea o teie nei ao, mai te huru ra e aita ratou e faaohipa roa ra i te reira, te taui ra hoi te tupuraa o teie nei ao. 32 E hinaaro hoi au eiaha outou ia haapeapea faahou. E haapeapea te tane taa noa no te ohipa a te Fatu, e nafea hoi te Fatu e nehenehe ai e mauruuru ia ˈna. 33 E haapeapea râ te tane faaipoipo no te mau mea o teie nei ao,+ e nafea ta ˈna iho vahine e nehenehe ai e mauruuru ia ˈna, 34 e e feaa noa o ˈna. Hau atu â, te vahine faaipoipo-ore-hia, aore ra te tamahine apî,* e haapeapea oia no te ohipa a te Fatu,+ e nafea to ˈna tino e to ˈna feruriraa* e moˈa ˈi. Area te vahine faaipoipo, e haapeapea oia no te mau mea o teie nei ao, e nafea ta ˈna iho tane e nehenehe ai e mauruuru ia ˈna. 35 Tera râ, e parau atu vau i te reira no to outou iho maitai, eiaha no te haavî ia outou,* no te faaitoito atu râ ia rave i te mea tano e ia tavini noa i te Fatu ma te aau atoa, eiaha râ ma te aau piti.

36 Ia manaˈo râ te tahi taata e eita e vî ia ˈna i te faaoromai i to ˈna faaea-taa-noa-raa, e ua mairi anaˈe to ˈna taurearearaa mai te umoa tiare i uaa ra, teie ïa ta ˈna e rave: Ia rave oia i ta ˈna e hinaaro, eita oia e hara. Ia faaipoipo ïa.+ 37 Mai te peu râ aita tera hinaaro i roto i te tahi taata tei papu i roto i to ˈna aau, tei ia ˈna atoa hoi te parau no nia ia ˈna iho a faaoti ai i roto i to ˈna iho aau e faaea taa noa, mea maitai ïa.+ 38 No reira ïa, ia faaipoipo te hoê taata, mea maitai. Ia faaea taa noa râ, mea maitai aˈe ïa.+

39 Ua taatihia te hoê vahine faaipoipo i ta ˈna iho tane a ora noa ˈi ta ˈna tane.+ Ia taoto noa ˈtu râ ta ˈna tane i roto i te pohe, ua tiamâ ïa te vahine i te faaipoipo atu i te tane ta ˈna e hinaaro, i roto noa râ i te Fatu.+ 40 I to ˈu râ manaˈo, mea oaoa aˈe taua vahine ra ia ore ia faaipoipo faahou. Te tiaturi nei au e tei ia ˈu atoa ra te varua o te Atua.

8 E teie nei, no nia i te maa i pûpûhia i te idolo:+ Ua taa ia tatou e tei ia tatou paatoa ra te ite no nia i teie parau.+ E faatupu te ite i te teoteo, e faaitoito râ te here i te taata.+ 2 Ia manaˈo te hoê taata e ua ite oia i te tahi parau, aita â ïa oia i ite i te mau mea atoa no nia i taua parau ra. 3 Tera râ, ia here te hoê taata i te Atua, o taua taata ra ïa tei itehia e ana.

4 E teie nei, no nia i te amuraa i te maa i pûpûhia i te idolo, ua ite tatou e aita roa to te idolo e faufaa+ i roto i teie nei ao. Ua ite atoa râ tatou e hoê anaˈe Atua e aita ˈtu.+ 5 Noa ˈtu hoi e e rave rahi o tei parauhia ra e atua, i te raˈi anei e i te fenua,+ e parau mau hoi e rave rahi iho â “atua” e e rave rahi atoa “fatu,” 6 no tatou râ, hoê anaˈe ïa Atua,+ o te Metua,+ no ǒ mai hoi ia ˈna te mau mea atoa e no ˈna atoa hoi tatou.+ E hoê anaˈe Fatu, o Iesu Mesia, na roto hoi ia ˈna te mau mea atoa e vai ai,+ e te ora nei tatou na roto ia ˈna.

7 Tera râ, e ere te taata atoa tei ite i te reira.+ No te mea râ e i haamori na vetahi i te idolo, te amu nei ïa ratou i te maa a manaˈo ai e ua faatusiahia i te idolo,+ i reira ïa to ratou manaˈo haava paruparu e viivii ai.+ 8 E ere râ na te maa e faafatata ˈtu ia tatou i te Atua.+ Ia ore hoi tatou ia amu i te maa, eita tatou e erehia, e ia amu tatou i te maa, eita atoa tatou e faufaahia.+ 9 E ara râ eiaha teie tiamâraa to outou ia riro ei ofai turoriraa na te feia paruparu.+ 10 Ia ite noa mai te tahi taata ia oe, tei noaa te ite no nia i taua parau ra, e tamaa ra i roto i te hiero e haamorihia ˈi te idolo, eita anei te manaˈo haava o teie taata paruparu e fifihia a turaihia ˈtu ai o ˈna ia amu i te maa i pûpûhia i te idolo? 11 No taua hoi ite to oe ra, te tuinohia ra te faaroo o te taata paruparu, o to oe hoi taeae no ˈna te Mesia i pohe ai.+ 12 Ia na reira outou i te hara ˈtu i to outou mau taeae e i te faainoino i to ratou manaˈo haava paruparu,+ ua hara ïa outou i te Mesia. 13 No reira, ia turori noa ˈtu to ˈu taeae no te maa iˈo ta ˈu e amu, eita roa ˈtu vau e amu faahou i te maa iˈo, ia ore to ˈu taeae ia turori.+

9 E ere anei au i te taata tiamâ? E ere anei au i te aposetolo? Aita anei au i ite ia Iesu to tatou Fatu?+ E ere anei outou i te hotu o ta ˈu ohipa i roto i te Fatu? 2 Noa ˈtu e e ere au i te aposetolo i te hiˈoraa a te tahi pae, no outou râ, e aposetolo iho â vau! Mai te hoê tapao ra hoi outou e haapapu ra e e aposetolo iho â vau i roto i te Fatu.

3 Teie atu ta ˈu parau ei parururaa ia ˈu i te feia e haava mai: 4 Eita anei e tia ia matou ia amu e ia inu* i te mea i horoahia mai? 5 Mai te tahi atu mau aposetolo e mai te mau taeae o te Fatu+ e mai ia Kepha,*+ eita anei e tia ia matou ia apeehia e ta matou vahine faaipoipo+ e tuahine atoa hoi?* 6 Aore ra o mâua Baranaba+ noa anei te ore e tia ia faaea i te rave i te ohipa ei imiraa? 7 O vai ïa taata e aufau i ta ˈna mau haamâuˈaraa atoa a tavini noa ˈi oia ei faehau? O vai ïa taata e tanu i te aua vine a ore atu ai e amu i te maa vine?+ Aore ra, o vai ïa taata e tiai i te hoê nǎnǎ mamoe a ore atu ai e inu i te tahi maa û?

8 E manaˈo taata noa anei ta ˈu e parau atu nei aore ra te na reira atoa ra te Ture? 9 Ua papaihia hoi i roto i te Ture a Mose: “Eiaha oe e tavaha i te puaatoro oni ia taataahi oia i te sitona.”+ Te haapeapea ra anei te Atua no te puaatoro oni? 10 Aore ra te parau ra oia no tatou? No tatou mau te reira i papaihia ˈi. E tia hoi i te taata e arote e te taata e taataahi i te sitona ia na reira i te rave a tiai noa ˈi ia noaa mai ta ˈna tuhaa.

11 I ueue na hoi matou i te mau mea pae varua i rotopu ia outou, mea ino anei ia ooti matou i te tahi mau taoˈa no ǒ mai ia outou ei tauturu ia matou?+ 12 Te titau ra hoi te tahi pae ia tauturu outou ia ratou, eaha ˈtu â ïa ia matou nei? Noa ˈtu e e tia ia matou ia na reira,*+ aita râ matou i na reira. Te faaoromai maite ra matou i te mau mea atoa ia ore te parau apî oaoa no nia i te Mesia ia taupupu.+ 13 Aita anei outou i ite e e amu te taata o te rave i te ohipa moˈa i te maa no roto mai i te hiero, e te feia e raverave i te ohipa i te fata, e fanaˈo ïa i ta ratou tuhaa o te tusia e pûpûhia i nia i te fata?+ 14 Oia atoa ïa, ua faaue te Fatu i te feia e poro ra i te parau apî oaoa e maoti te parau apî oaoa e tamaa ˈi ratou.+

15 Tera râ, aita roa ˈtu vau i titau noa ˈˈe i teie mau faanahoraa.+ Inaha, aita vau i papai i teie mau parau ia na reirahia mai au, mea maitai aˈe na ˈu e pohe i te ere i te tumu e haapeu ai au!+ 16 E teie nei, ia faaite au i te parau apî oaoa, aita e tumu no ˈu no te haapeu, e mea titauhia hoi ia na reira vau. Oia mau, ua ati au ia ore au ia faaite i te parau apî oaoa!+ 17 Ia na reira vau ma te aau tae, e haamaitairaa ta ˈu. Tera râ, ia faaite noa ˈtu vau i te reira, aita râ to ˈu aau i tae, e hopoia noa iho â tera tei horoahia mai ia ˈu.+ 18 Eaha ïa ta ˈu haamaitairaa? Ia faaite hoi au i te parau apî oaoa, te pûpû atu ra ïa vau i te reira ma te tamoni ore, eiaha vau ia faaohipa roa i teie mana to ˈu ei taata poro.

19 E ere au i te tîtî no te tahi noa ˈˈe taata, ua faariro râ vau ia ˈu iho ei tavini na te taata atoa, ia noaa mai ia ˈu e rave rahi â taata. 20 I te ati Iuda, ua riro vau mai te ati Iuda ra ia noaa mai ia ˈu te ati Iuda.+ I te feia e auraro i te ture, noa ˈtu aita vau e auraro ra i te ture, ua riro vau mai te huru ra e te auraro ra vau i te ture ia noaa ia ˈu te feia e auraro i te ture.+ 21 I te feia aita e ture, ua riro vau mai te huru ra e aita atoa, ia noaa mai ia ˈu te feia aita e ture, noa ˈtu e tei raro aˈe vau i te ture i mua i te Atua e tei raro aˈe vau i te ture a te Mesia.+ 22 I te feia paruparu ua riro vau mai te taata paruparu ra ia noaa mai ia ˈu te feia paruparu.+ Ua rave au i te mau mea atoa no te tauturu i te mau huru taata atoa ia ora mai vetahi o ratou. 23 Tera râ, no te parau apî oaoa e no te poro i taua parau ra ia vetahi ê i faariro ai au ia ˈu mai te mau huru taata atoa.+

24 Aita anei outou i ite e o te feia tataˈu atoa te horo i te hoê hororaa, tera râ, hoê anaˈe iho te haru i te re? A horo ia riro ia outou te re.+ 25 Hau atu â, te taata atoa e tataˈu i roto i te hoê tataˈuraa,* e haavî ratou ia ratou iho i te mau mea atoa. Mea papu, e na reira ratou ia noaa hoi te tahi hei upoo o te nehenehe e pê,+ area tatou, te tahi ïa hei upoo o te ore e pê.+ 26 No reira, aita vau e horo hanoa ra,+ e aita vau e moto ra mai te huru ra e te tairi ra vau i te mataˈi. 27 Tera râ, te tairi* nei au i to ˈu iho tino,+ o ta ˈu e faariro ei tîtî na ˈu, eiaha te Atua ia faahapa ia ˈu* i muri aˈe i to ˈu pororaa ia vetahi ê.

10 Taeae ma, te hinaaro nei au ia ite outou e ua haere paatoa to tatou mau tupuna na raro aˈe i te ata+ e na roto atu i te miti+ 2 e ua bapetizohia ratou paatoa i raro aˈe i te ata e na roto atu i te miti a pee ai ratou ia Mose, 3 e ua amu paatoa ratou i te hoê â maa pae varua+ 4 e ua inu paatoa i te hoê â pape pae varua.+ I inu na hoi ratou no roto mai i te mato pae varua tei pee ia ratou, o te Mesia ïa ei auraa parau.+ 5 Aita râ te Atua i mauruuru i te rahiraa o ratou, inaha, ua tairi-pohe-hia ratou i roto i te medebara.+

6 E teie nei, ei hiˈoraa te reira no tatou, eiaha hoi ia hinaaro e rave i te mea ino, mai ia ratou i hinaaro na.+ 7 Eiaha atoa e haamori i te idolo, mai ta vetahi pae i rave na. Ua papaihia hoi: “Parahi ihora te nunaa, tamaa aˈera ratou e inu aˈera. Tia aˈera ratou no te arearea.”+ 8 Eiaha atoa tatou e rave i te mau peu taotoraa tia ore,* mai ta vetahi pae i rave na, e pohe ihora e 23 000 o ratou i te hoê noa mahana.+ 9 Eiaha atoa tatou e aa ia Iehova,*+ mai ta vetahi pae i aa na ia ˈna, e pohe ihora i te ophi.+ 10 Eiaha atoa e amuamu, mai ta vetahi pae i amuamu na,+ e pohe ihora i te rima o te melahi.+ 11 Inaha, ua papaihia taua mau mea ra ta ratou i faaruru ei haapiiraa e ei faaararaa ia tatou+ o te roohia ra i te hopea o te mau faanahoraa o te ao nei.*

12 No reira, te taata e manaˈo ra e te tia ra oia, ia ara maitai eiaha oia ia hiˈa.+ 13 Aita e tamataraa ta outou i faaruru aita i faaruruhia e te taata.+ Eita râ te Atua haapao maitai e vaiiho ia tamatahia outou hau aˈe i ta outou e nehenehe e faaruru.+ Tera râ, a tamata-noa-hia ˈi outou, te faaineine atoa ra oia i te faaoraraa ia nehenehe outou ia faaoromai maite.+

14 No reira, to ˈu mau hoa herehia, a maue ê atu i te haamori idolo.+ 15 E taata haroˈaroˈa outou, na outou iho ïa e faaoti e e parau mau anei ta ˈu aore ra aita. 16 No nia i te auˈa uaina tei haamaitaihia na roto i te pure, eita anei tatou atoa e faufaahia i te toto o te Mesia?+ No nia i te pane* ta tatou e ofati ra, eita anei tatou atoa e faufaahia i te tino o te Mesia?+ 17 Hoê anaˈe hoi pane,* no reira, noa ˈtu e mea rahi tatou, e tino hoê râ tatou+ no te mea te amu nei tatou paatoa i te hoê â pane.*

18 A hiˈo na i te ati Iseraela: Aita anei vetahi, i to ratou amuraa i te mau tusia i pûpûhia i nia i te fata, i apiti atoa i te fata?+ 19 Te na ô ra anei au e e mea faufaa te tusia i pûpûhia na te idolo? E e mea faufaa atoa te idolo? 20 Aita. Tera râ, te na ô ra vau e te tusia ta te mau nunaa e pûpû ra, te pûpû ra ratou i te mau demoni, eiaha râ i te Atua.+ E aita vau e hinaaro ra ia apiti outou i te mau demoni.+ 21 Eita outou e nehenehe e inu i te auˈa a Iehova* e i te auˈa a te mau demoni, eita outou e nehenehe e amu i to nia iho i “te amuraa maa a Iehova”*+ e i to nia iho i te amuraa maa a te mau demoni. 22 Te aha ra ïa tatou? ‘Te faatupu ra i te pohehae o Iehova’?*+ Eaha, e mea puai aˈe tatou ia ˈna?

23 E mea tia anaˈe te mau mea atoa, eita râ te taata e faufaahia i te mau mea atoa. E mea tia anaˈe te mau mea atoa, eita râ te taata e itoitohia i te mau mea atoa.+ 24 Ia imi te taata tataitahi, eiaha i to ˈna iho maitai, i to vetahi ê râ.+

25 A amu i te inaˈi atoa e hoohia ra i te matete, eiaha e uiui a hauti to oe manaˈo haava, 26 no te mea, “no Iehova* te fenua e te mau mea atoa i nia iho.”+ 27 E teie nei, ia titauhia mai oe e te tahi taata aita e tiaturi ra ia Iesu e tamaa e ua farii oe, a amu i te maa e tuuhia i mua ia oe, eiaha e uiui a hauti to oe manaˈo haava. 28 Ia parau mai râ te tahi ia oe, “E maa teie tei pûpûhia ei tusia na te mau idolo,” no taua taata ra i parau mai, eiaha ïa oe e amu, e ia ore atoa te manaˈo haava o te tahi ia hauti.+ 29 Aita vau e parau ra no to oe manaˈo haava, no te manaˈo haava râ o taua taata ra. No te aha hoi e faahapahia ˈi to ˈu tiamâraa no te manaˈo haava o te tahi atu?+ 30 Ia haamauruuru vau i te Atua no te maa ta ˈu e amu, eaha ïa vau e faainohia mai ai no taua maa ra ta ˈu i haamauruuru i te Atua?+

31 No reira, te amu ra outou, te inu ra aore ra te rave ra i te tahi atu ohipa, a rave i te mau mea atoa ia hanahana te Atua.+ 32 Eiaha outou ia riro ei tumu e turori ai te ati Iuda e te Heleni e te amuiraa o te Atua,+ 33 mai ia ˈu atoa e tutava nei ia mauruuru te taata atoa ia ˈu i te mau mea atoa, e te imi nei au i te maitai o te taata e rave rahi, eiaha râ i to ˈu iho,+ ia nehenehe hoi te Atua ia faaora mai ia ratou.+

11 A pee mai i to ˈu haerea, mai ia ˈu atoa e pee nei i to te Mesia.+

2 Te haapopou nei au ia outou, no te mea te manaˈo noa nei outou ia ˈu e te haapao maite nei i te mau mea atoa ta ˈu i haapii atu. 3 E hinaaro râ vau ia ite outou e te upoo o te mau tane atoa, o te Mesia,+ e te upoo o te vahine, o te tane,+ e te upoo o te Mesia, o te Atua.+ 4 Te tane atoa e pure aore ra e tohu ua tapoˈihia te upoo, ua faahaama ïa i to ˈna upoo. 5 Tera râ, te vahine atoa e pure aore ra e tohu+ aita te upoo i tapoˈihia, ua faahaama ïa i to ˈna upoo, hoê â huru hoi te reira e te vahine i hahuhia te upoo. 6 Ia ore hoi te vahine ia tapoˈi i to ˈna upoo, mea maitai aˈe ia tâpû-poto-roa-hia to ˈna rouru. Mai te peu râ e e ere i te mea nehenehe no te vahine te rouru poto roa aore ra te upoo hahuhia, ia tapoˈi ïa i to ˈna upoo e tia ˈi.

7 Eita e tia i te tane ia tapoˈi i to ˈna upoo, o te tane hoi te hohoˈa e te hanahana o te Atua.+ Area te vahine, o te hanahana ïa o te tane. 8 E ere hoi te tane no roto mai i te vahine, no roto mai râ te vahine i te tane.+ 9 E hau atu â, e ere te tane tei poietehia no te vahine, o te vahine râ tei poietehia no te tane.+ 10 No reira e mea tia ˈi i te vahine ia tapoˈi i to ˈna upoo no te faaiteraa i to ˈna auraro i ta ˈna tane, e no te mau melahi atoa.+

11 Oia atoa i mua i te Fatu, aita anaˈe e tane, aita ïa e vahine. E aita anaˈe e vahine, aita ïa e tane. 12 Mai te vahine hoi no roto mai i te tane i te hamaniraahia,+ oia atoa te tane, no roto mai ïa i te vahine i te fanauraahia mai. Tera râ, te mau mea atoa, no ǒ mai ïa i te Atua ra.+ 13 E feruri na outou: E mea tano anei no te vahine ia pure i te Atua aita te upoo i tapoˈihia? 14 Aita anei to te tane natura e faaite ra ia outou e mea haama roa no te tane te rouru roroa, 15 mai te peu râ e rouru roroa to te vahine, e mea unauna ïa no ˈna? Ua horoahia hoi te rouru no te vahine ei tapoˈi i to ˈna upoo. 16 Tera râ, ia mârô te tahi taata no te pee i te tahi atu peu, a parau atu ia ˈna tera anaˈe ta tatou peu e ta te mau amuiraa o te Atua e aita ˈtu.

17 Tera râ, a horoa ˈtu ai au i teie mau faaueraa, aita vau e haapopou nei ia outou, no te mea ia putuputu outou, eita outou e itoito, e ino râ. 18 Na mua roa, ua faarooroo vau e ia putuputu outou i roto i te amuiraa, e itehia i rotopu ia outou te amahamaharaa. Eita vau e maere e te reira iho â. 19 Mea papu, te vai ra te tahi mau pǔpǔ faaroo amaha i rotopu ia outou,+ ia ite-maitai-hia te taata ta te Atua i farii.

20 Ia putuputu outou i te hoê vahi, aita outou e haapao ra i te Amuraa maa a te Fatu ma te tano.+ 21 I te taime hoi e haapao ai outou i te reira, ua tamaa aˈena vetahi. E inaha, te poia ra te tahi, area te tahi atu ua taero roa ïa. 22 Eaha, aita to outou e fare no te tamaa e no te inu? Te haafaufaa ore ra anei outou i te amuiraa o te Atua? Te haavahavaha ra anei outou i te feia e ere ra? Eaha ta ˈu e parau atu, e haapopou anei au ia outou? I roto i teie tupuraa, eita vau e haapopou ia outou.

23 O ta ˈu i farii no ǒ mai i te Fatu, o ta ˈu ïa e haapii atoa ˈtu ia outou, oia hoi i te po+ e tuuhia ˈi te Fatu ra o Iesu i to ˈna mau enemi, ua rave oia i te hoê pane,* 24 e i muri iho i to ˈna haamauruururaa i te Atua, ofati ihora i te reira e parau atura: “O to ˈu tino teie+ e horoahia no outou. A tamau i te rave i te reira ei manaˈoraa ia ˈu.”+ 25 Na reira atoa ˈtura oia no te auˈa+ i muri aˈe i to ratou tamaaraa, a na ô ai: “Teie auˈa, o te faufaa apî+ ïa e haamauhia maoti to ˈu toto.+ A tamau i te haapao i te reira, i te mau taime atoa e inu ai outou i teie auˈa, ei manaˈoraa ia ˈu.”+ 26 Ua amu anaˈe hoi outou i teie pane* e ua inu anaˈe i teie auˈa, te tamau noa ra ïa outou i te faaite i te pohe o te Fatu, e ia tae roa mai oia.

27 No reira, te taata atoa e amu i te pane* e e inu i te auˈa a te Fatu ma te tano ore, ua hara ïa i te tino e i te toto o te Fatu. 28 Na mua roa, ia hiˈopoa maite ïa te taata ia ˈna iho.+ E ua tia anaˈe ia ˈna, i reira noa ïa oia e amu ai i te pane* e e inu ai i te auˈa. 29 Te taata hoi e amu e e inu ma te ore e taa i te auraa o te tino o te Fatu, te amu ra ïa e te inu ra i te faautuaraa no ˈna iho. 30 No reira i paruparu ai e i maˈihia ˈi e rave rahi o outou, e te taoto nei e rave rahi atu â i roto i te pohe.*+ 31 Ia hiˈopoa maite râ tatou i to tatou iho huru, eita ïa tatou e haavahia. 32 Tera râ, ia haavahia tatou, na Iehova*+ ïa e aˈo mai ra, ia ore hoi tatou ia roo-atoa-hia i te utua a to te ao.+ 33 No reira, to ˈu mau taeae, ia putuputu outou no taua Amuraa maa ra, a tiai maite te tahi i te tahi. 34 Ia poia noa ˈtu râ te tahi, ia tamaa ïa i te fare, ia ore outou ia faautuahia a putuputu ai outou.+ Area no te mau mea e toe ra, ia tae atu vau, i reira ïa e faatitiaifaro ai.

12 Taeae ma, te hinaaro nei au e haamaramarama maitai ia outou no nia i te mau ô pae varua.+ 2 Ua ite outou e i te mea e e feia outou no te mau nunaa ěê* na mua ˈˈe, i vare na e i pee hanoa na outou i tera mau idolo vava+ a arato-noa-hia ˈi outou. 3 No reira, te hinaaro nei au e haapapu ia outou e aita e taata e parau na roto i te varua o te Atua: “Ia vai noa te ino i nia ia Iesu!” E aita e taata e nehenehe e parau: “O Iesu te Fatu,” na roto noa râ i te varua moˈa.+

4 E teie nei, ua rau te ô, hoê noa râ varua moˈa,+ 5 ua rau te taviniraa,+ hoê noa râ Fatu, 6 ua rau te ohipa,* hoê noa râ Atua te tauturu i te taata atoa ia rave i taua mau ohipa atoa ra.+ 7 Tera râ, te ite-papu-hia ra te ohiparaa a te varua moˈa i roto i te taata tataitahi no te maitai o te taata atoa.+ 8 Maoti hoi te varua moˈa e nehenehe ai te tahi e paraparau ma te paari,* e maoti taua noa varua ra e nehenehe ai te tahi e parau ma te ite, 9 e maoti taua noa varua ra e nehenehe ai te tahi e faatupu i te faaroo,+ e te tahi atu, e faaora i te maˈi,+ 10 e te tahi atu, e faatupu i te mau ohipa mana,+ e te tahi atu, e tohu, e te tahi atu, e haroˈaroˈa e no ǒ mai anei te tahi parau i te Atua ra+ aore ra eita, e te tahi atu, e paraparau na roto i te reo e rave rahi,+ e te tahi atu, e auvaha i te reo e rave rahi.+ 11 Tera râ, na taua noa â varua moˈa ra e rave i taua mau ohipa atoa ra, i te opereraa i teie mau ô na te taata tataitahi ia au i tei hinaarohia.

12 Oia hoi, hoê noa tino, e rave rahi râ mero. E teie nei mau mero atoa, rahi noa ˈtu â ratou, hoê noa râ tino.+ Oia atoa te Mesia. 13 Ua bapetizohia hoi tatou paatoa i taua varua moˈa ra ia riro tatou ei tino hoê ra, te ati Iuda e te Heleni atoa, te tîtî e te tiamâ atoa, e ua niniihia mai taua varua ra i nia ia tatou paatoa.

14 Oia hoi, e ere hoê noa mero to te tino, e rave rahi râ.+ 15 Ia parau mai te avae, “No te mea e ere au i te hoê rima, e ere ïa vau i te hoê tuhaa o te tino,” no te reira anei e ere ai teie avae i te hoê tuhaa o te tino? 16 Ia parau mai te tariˈa, “No te mea e ere au i te hoê mata, e ere ïa vau i te hoê tuhaa o te tino,” no te reira anei e ere ai teie tariˈa i te hoê tuhaa o te tino? 17 Ahiri e mata te tino taatoa, nafea tatou e faaroo ai? Ahiri e tariˈa te tino taatoa, nafea tatou e hauˈa ˈi? 18 E teie nei râ, ua tuu te Atua i te mero tataitahi o te tino i to ratou vairaa mau.

19 Ahiri hoê â te mau mero atoa, e nehenehe anei ïa e parauhia e tino? 20 E teie nei, e rave rahi mero, hoê noa râ tino. 21 Eita te mata e nehenehe e parau i te rima, “Aita to oe e faufaa no ˈu,” e eita te upoo e nehenehe e parau i na avae, “Aita to orua e faufaa no ˈu.” 22 Tera râ, te mau mero o te tino e au ra e mea paruparu aˈe, e mero faufaa anaˈe ïa, 23 e te mau tuhaa o te tino e au ra e e ere i te mea tura roa, o ta tatou ïa e tapoˈi maite ma te tura,+ ia faanehenehe-maite-hia to tatou mau tuhaa e ere i te mea nehenehe roa. 24 Area te mau tuhaa o te tino e mea nehenehe roa, aita ïa e faufaa ia faanehenehe-roa-hia. Ua faanaho te Atua i te tino ia rahi aˈe te faatura i te mau tuhaa o te ere ra i te tura, 25 ia ore te faataa-ê-raa ia tupu i roto i te tino, tera râ, ia haapeapea te mau mero o te tino no te tahi e te tahi.+ 26 E ia mauiui te hoê, o te mau mero atoa o te tino te mauiui.+ Aore ra, ia haapopouhia te hoê, o te mau mero atoa ïa o te tino te oaoa.+

27 E teie nei, o outou hoi te tino o te Mesia+ e e mero outou tataitahi no taua tino ra.+ 28 E ua faatoroa te Atua i te taata tataitahi i roto i te amuiraa: a tahi, te mau aposetolo,+ te piti, te mau peropheta,+ te toru, te mau orometua haapii,+ e i muri iho, te faatupuraa i te mau ohipa mana,+ te ô e faaora i te maˈi,+ te tautururaa ia vetahi ê, te ite i te aratai+ e te mau reo ěê.+ 29 E aposetolo anei ratou paatoa? E ere! E peropheta anei ratou paatoa? E ere! E orometua haapii anei ratou paatoa? E ere! O ratou paatoa anei te faatupu i te mau ohipa mana? E ere! 30 Tei ia ratou paatoa anei te ô e faaora i te maˈi? E ere! O ratou paatoa anei te parau na roto i te mau reo ěê?+ E ere! E auvaha* anei ratou paatoa?+ E ere! 31 A tutava noa ia noaa mai ia outou te mau ô faufaa aˈe.*+ E inaha, e faaite atu vau ia outou i te eˈa hau ê.+

13 Ia paraparau noa ˈtu vau i te mau reo o te taata e to te melahi atoa, aita râ to ˈu e here, ua riro ïa vau mai te maniania o te punu e atete ra. 2 Noa ˈtu e tei ia ˈu nei te ô e tohu e ua taa ia ˈu te mau parau huna moˈa atoa e ua noaa ia ˈu te ite taatoa,+ e ia puai noa ˈtu â to ˈu faaroo a hopoi ê atu ai i te mau mouˈa, aita râ to ˈu e here, mea faufaa ore anaˈe ïa ta ˈu e rave.+ 3 E ia hoo noa ˈtu vau i ta ˈu mau faufaa atoa no te faatamaa i tei veve,+ e ia ineine noa ˈtu vau e tuu i to ˈu tino ia pohe a teoteo atu ai, aita râ to ˈu e here,+ eita roa ˈtu vau e faufaahia i te reira.

4 E faaoromai*+ e e hamani maitai+ te here.+ Eita te here e pohehae,+ eita e faateitei, eita e faaoru.+ 5 Eita te here e rave i te mea au ore,*+ eita e imi i to ˈna iho maitai,+ eita e riri oioi.+ Eita te here e tapea i te ino.*+ 6 Eita te here e oaoa i te parau-tia ore,+ e oaoa râ i te parau mau. 7 E tapoˈi te here i te mau mea atoa,+ e tiaturi i te mau mea atoa,+ e tiai i te mau mea atoa+ e e faaruru i te mau mea atoa.+

8 Eita roa te here e mure. Area te ô e tohu, e faaorehia, e te mau reo ěê,* e mou ïa, e te ite, e faaore-atoa-hia. 9 Maa vahi iti noa ta tatou i ite+ e e tohu atoa, 10 tera râ, ia tae mai te mea tia roa, e faaorehia ïa te mea iti. 11 I to ˈu tamariiraa ra, mai te tamarii au ia paraparau e ia manaˈo e ia feruri. I teie nei râ e taata paari au, ua haapae ïa vau i te mau peu a te tamarii. 12 E teie nei hoi, e hohoˈa mohimohi* ta tatou e ite nei mai te huru ra e mea na roto i te hiˈo veo, i muri aˈe râ, e ite papu tatou mai te huru ra e e aro e aro. I teie nei, maa vahi iti noa to ˈu ite no nia i te Atua, i muri aˈe râ e papu roa to ˈu ite,* mai te Atua atoa i ite papu ia ˈu. 13 E teie nei râ, e vai â na parau e toru nei: te faaroo, te tiaturiraa e te here. Tera râ, o te here tei hau ê i na toru nei.+

14 A tapi i te here. Ia tamau atoa râ outou i te tapi* i te mau ô a te varua moˈa, te ô iho â râ o te tohu.+ 2 Eita e taahia te parau a te taata e paraparau ra i te hoê reo ê, o te Atua anaˈe te taa.+ Noa ˈtu e parau huna moˈa+ ta ˈna e faahiti na roto i te varua moˈa, eita atoa e taahia. 3 Area te taata e tohu, te faaitoito ra ïa, te tauturu ra e te tamahanahana ra i te taata i ta ˈna mau parau. 4 Te faaitoito ra te taata e paraparau i te hoê reo ê ia ˈna iho, area te taata e tohu, te faaitoito ra ïa i te amuiraa taatoa. 5 E teie nei, e hinaaro vau ia paraparau outou paatoa i te mau reo ěê,+ tera râ, mea au aˈe na ˈu ia tohu outou.+ Ia ore hoi te taata o te paraparau i te mau reo ěê ia auvaha* i ta ˈna mau parau, mea hau aˈe ïa te taata e tohu ia itoitohia te amuiraa i te taata e paraparau i te mau reo ěê. 6 Taeae ma, ia haere noa ˈtu vau ia outou a paraparau atu ai na roto i te mau reo ěê, eaha te faufaaraa no outou ia ore au ia faahiti atu i te parau ta te Atua i faaite mai,+ aore ra i te ite,+ te parau tohu e te haapiiraa?

7 Hoê â huru atoa ia hautihia te upaupa mai te vivo aore ra te kinura. Ahiri eita te hoê nota e taa ê i te tahi atu, e nafea e taahia ˈi tei hautihia i te vivo aore ra i te kinura? 8 Ia ore hoi te oto o te pu ia faaroo-papu-hia, o vai te faaineine ia ˈna no te aroraa? 9 Oia atoa, ia ore to outou vaha ia parau i te parau ohie ia taa, eaha te taata e taa ˈi i te parauhia ra? Mai te huru ra e te parau ra outou i roto i te aore. 10 E rave rau hoi reo e paraparauhia ra na te ao nei, e e taahia hoi taua mau reo atoa ra. 11 Ia ore râ vau ia taa i te auraa o te parau, no te taata e parau mai ra e taata ê ïa vau, e no ˈu e taata ê atoa te taata e parau mai ra. 12 Oia atoa outou, i te mea e e hinaaro rahi to outou i te mau ô a te varua moˈa, a titau i te mau ô e rave rahi ia itoitohia te amuiraa.+

13 No reira, ia pure te taata o te paraparau i te hoê reo ê ia nehenehe atoa oia e auvaha* i ta ˈna parau.+ 14 Ia pure hoi au na roto i te hoê reo ê, te pure ra vau maoti teie ô a te varua moˈa, aita râ vau e taa ra i ta ˈu e pure ra. 15 E nafea ïa vau? E pure au maoti teie ô a te varua moˈa, tera râ, ia taa atoa ia ˈu te auraa o ta ˈu pure. E himene au no te arue i te Atua maoti teie ô a te varua moˈa, tera râ, ia taa atoa ia ˈu te auraa o ta ˈu himene arueraa i te Atua. 16 E ia pure oe i te Atua maoti teie ô a te varua moˈa, e nafea te taata haapii-ore-hia i rotopu ia outou e parau ai “Amene” i ta oe haamaitairaa, aita hoi oia e taa ra i ta oe e parau mai ra? 17 Mea au roa iho â ta oe haamaitairaa, tera râ, aita te taata haapii-ore-hia e itoitohia ra. 18 Te haamauruuru nei au i te Atua i te mea e ua hau atu te reo ta ˈu e paraparau ra i ta outou paatoa. 19 Tera râ, i roto i te hoê amuiraa, mea au aˈe na ˈu e faahiti e pae parau ohie ia taa a haapii atu ai ia vetahi ê, i te faahiti 10 000 parau na roto i te hoê reo ê.+

20 Taeae ma, eiaha outou ia feruri mai te tamarii ra,+ no nia râ i te ino,+ ia riro ïa outou mai te tamarii. E ia feruri outou mai te taata paari ra e tia ˈi.+ 21 Ua papaihia i roto i te Ture: “‘E paraparau atu vau i teie nunaa na roto i te reo o te taata ěê e na roto i te vaha o te taata ěê, e eita iho â ratou e faaroo mai ia ˈu,’ te na ô mai ra Iehova.”*+ 22 No reira, e tapao noa te mau reo ěê no te feia aita e tiaturi ra ia Iesu,+ eiaha râ no tei tiaturi. Area te parau tohu, e ere ïa no te feia aita e tiaturi ra ia Iesu, no tei tiaturi râ. 23 No reira, ia putuputu mai te amuiraa taatoa i te hoê vahi a haamata ˈtu ai ratou paatoa i te parau na roto i te mau reo ěê, eita anei te taata haapii-ore-hia aore ra te taata aita e tiaturi ra ia Iesu e parau e ua inohia to outou upoo? 24 Ia haere mai râ te taata aita e tiaturi ra ia Iesu aore ra te taata haapii-ore-hia e te tohu ra outou paatoa, e faahapa ta outou mau parau ia ˈna a hiˈopoa maite atu ai oia ia ˈna iho. 25 I reira e ite-roa-hia ˈi te mau mea huna o to ˈna aau, e tipapa oia i raro a haamori atu ai i te Atua, e e na ô oia: “Tei rotopu mau te Atua ia outou.”+

26 Taeae ma, eaha ïa te rave? Ia putuputu mai outou, e himene te hoê i te Salamo, e haapiiraa ta te tahi, e faahiti te tahi atu i te parau ta te Atua i faaite mai, e reo ê ta te tahi atu, e te tahi atu, e auvaha ïa.+ Ia ravehia te mau mea atoa no te faaitoito te tahi i te tahi. 27 E ia paraparau mai vetahi na roto i te hoê reo ê, ei piti aore ra ei toru anaˈe iho taata o te paraparau te tahi i muri iho i te tahi. E ia auvahahia* te parau e tia ˈi.+ 28 Aita anaˈe e auvaha,* e mamû te taata e paraparau i te hoê reo ê i roto i te amuiraa, e paraparau noa râ oia i roto i to ˈna aau i te Atua ra. 29 Ei piti aore ra ei toru aˈe taata no te tohu,+ e e imi te tahi atu pae i te auraa o taua tohu ra. 30 Ia parau mai râ te tahi taata i ta te Atua e faaite mai ra a parahi noa ˈi oia, e mamû te taata i paraparau i taua taime ra. 31 E nehenehe hoi outou paatoa e tohu te tahi i muri iho i te tahi, e na reira outou paatoa e haapiihia ˈi e e faaitoitohia ˈi.+ 32 E tei te taata e tohu ra te faaohiparaa ma te au i te ô a te varua moˈa e tohu. 33 E ere te Atua i te Atua no te huanane, no te hau râ.+

Mai tei itehia i roto i te mau amuiraa atoa a te feia moˈa, 34 e mamû te mau vahine i roto i te amuiraa, eita hoi ratou e faatiahia ia paraparau.+ Tera râ, e auraro noa ratou,+ mai ta te Ture e parau ra. 35 Ia ore ratou ia taa i te tahi parau, ei te fare ratou e uiui ai i ta ratou iho tane faaipoipo, e mea haama hoi no te hoê vahine ia paraparau i te amuiraa.

36 No ǒ ia outou ra anei te matararaa mai te parau a te Atua? Aore ra, ua tae noa anei ta ˈna parau ia outou anaˈe ra?

37 Ia manaˈo râ te tahi e e taata tohu oia aore ra ua horoahia mai ia ˈna te ô a te varua moˈa, ia farii oia, te mau parau ta ˈu e papai atu nei ia outou, e faaueraa ïa no ǒ mai i te Fatu. 38 Ia ore râ te tahi ia tâuˈa i te reira, e tâuˈa-ore-atoa-hia oia.* 39 No reira, to ˈu mau taeae, a tutava noa i te tohu,+ eiaha râ e opani i te tahi ia paraparau i te mau reo ěê.+ 40 Ia ravehia râ te mau mea atoa ma te au e te naho maitai.+

15 Taeae ma, e haamanaˈo vau ia outou i te parau apî oaoa ta ˈu i faaite atu,+ o ta outou atoa i farii e e mau papu noa ra. 2 E faaorahia outou ia tapea maite outou i te parau apî oaoa ta ˈu i faaite atu. Aita anaˈe, ua faufaa ore to outou tiaturiraa ia Iesu.

3 I te mau parau faufaa atoa hoi ta ˈu i haapii ia outou, o ta ˈu atoa i farii, oia hoi ua pohe te Mesia no ta tatou mau hara ia au i te mau Papai,+ 4 ua hunahia oia,+ e i te toru o te mahana+ ua faatiahia mai oia+ ia au i te mau Papai,+ 5 fa ihora oia ia Kepha,*+ e i muri iho i na 12.+ 6 Fa ˈtura oia i mua hau atu e 500 taeae i te hoê â vahi.+ Te ora noa ra te rahiraa o ratou, area te tahi pae ra ua taoto ïa i roto i te pohe. 7 Fa ˈtura oia ia Iakobo,+ e i muri iho i te mau aposetolo atoa.+ 8 I te hopea roa râ, fa atoa maira oia ia ˈu+ mai te hoê aiû aita â i tia ˈtura te taime ia fanauhia mai.

9 O vau hoi te aposetolo haihai roa ˈˈe, e eita e au ia parauhia vau e aposetolo, no te mea i hamani ino na vau i te amuiraa o te Atua.+ 10 Tera râ, ua fanaˈo vau i teie toroa maoti te hamani maitai rahi o te Atua. E aita i faufaa ore to ˈna hamani maitai rahi ia ˈu, tera râ, ua rohi au hau aˈe ia ratou paatoa, ua rohi au eiaha na roto i to ˈu iho puai, na roto râ i te hamani maitai rahi o te Atua ia ˈu nei. 11 No reira, noa ˈtu e na ˈu i poro ia outou aore ra na ratou, hoê anaˈe poroi tei porohia, e mea na reira hoi outou i te tiaturiraa.

12 E teie nei, te porohia ra e ua faatiahia mai te Mesia mai roto mai i tei pohe,+ eaha ïa vetahi o outou e parau ai e aita e tia-faahou-raa to te feia pohe? 13 Ahiri hoi aita iho â e tia-faahou-raa to te feia pohe, aita atoa ïa te Mesia i faatiahia mai. 14 E ahiri aita te Mesia i faatiahia mai, ua faufaa ore mau ta tatou pororaa e oia atoa to outou faaroo. 15 Hau atu â, ahiri eita mau te feia pohe e faatiahia mai, aita ïa te Atua i faatia mai i te Mesia. Te auraa, te haavare ra tatou no nia i te Atua+ a parau ai e ua faatia mai oia i te Mesia.+ 16 Ahiri hoi eita te feia pohe e faatiahia mai, aita atoa ïa te Mesia i faatiahia mai. 17 E ahiri aita te Mesia i faatiahia mai, ua faufaa ore to outou faaroo e te vai noa ra outou i roto i ta outou mau hara.+ 18 Oia atoa tei hoê e te Mesia i roto i te pohe, ua mou ratou.+ 19 Ahiri i roto noa i teie oraraa e tiai ai tatou i te mea maitai na roto i te Mesia, mea aroha roa ïa tatou.

20 E teie nei râ, ua faatiahia iho â te Mesia mai roto mai i tei pohe, te hotu matamua no tei taoto i roto i te pohe.+ 21 No te taata hoê ra i ô mai ai te pohe,+ oia atoa no te taata hoê e faatia-faahou-hia ˈi tei pohe.+ 22 No Adamu hoi te taata atoa e pohe ai,+ no te Mesia atoa e noaa ˈi i te taata atoa te ora,+ 23 te taata tataitahi râ ia au i to ˈna iho tiaraa: te Mesia te hotu matamua,+ e i muri aˈe te feia no te Mesia i te tau o to ˈna hoˈiraa mai.*+ 24 E i te hopea, e tuu oia i te Faatereraa arii* i te rima o to ˈna Atua e Metua ia haamou oia i te mau faatereraa e mana e puai atoa.+ 25 E faatere oia ei arii e ia tuu roa mai te Atua i to ˈna mau enemi atoa i raro aˈe i to ˈna avae.+ 26 O te pohe te enemi hopea ta ˈna e haamou.+ 27 “Ua tuu” hoi te Atua “i te mau mea atoa i raro aˈe i to ˈna avae.”+ Ia parauhia râ e ‘ua tuuhia te mau mea atoa i raro aˈe ia ˈna,’+ e ere iho â ïa teie parau no te Atua tei tuu i te mau mea atoa i raro aˈe ia ˈna.+ 28 Ia tuuhia râ te mau mea atoa i raro aˈe ia ˈna, i reira te Tamaiti iho e auraro atoa ˈi i te Atua tei tuu i te mau mea atoa i raro aˈe ia ˈna,+ ia riro hoi te Atua ei Arii hoê roa no te mau mea atoa.+

29 Ahiri e ore roa te feia pohe e faatiahia mai, eaha ïa te faufaa no te feia e bapetizohia ra i te mea e e pohe ratou?+ No te aha ïa ratou e bapetizohia ˈi a pohe atu ai? 30 No te aha atoa hoi tatou e faaruru noa ˈi i te ati?*+ 31 E faaruru na vau i te pohe i te mau mahana atoa. Taeae ma, e parau mau iho â te reira mai ia ˈu e oaoa nei ia outou i roto i te Mesia ra o Iesu to tatou Fatu. 32 I te mea e ua aro vau i te mau animara taehae i Ephesia+ mai te tahi atu mau taata,* eaha te maitai no ˈu? Ahiri eita te feia pohe e faatiahia mai, “e tamaa e e inu anaˈe ïa, inaha, ananahi tatou e pohe ai.”+ 33 Eiaha outou e vare. E ino te haerea maitai i te amuimuiraa i te feia iino.+ 34 A feruri maitai ma te rave i te parau-tia e eiaha e rave i te hara, aita hoi te tahi pae i ite i te Atua. Te parau atu nei au i te reira ia haama outou.

35 Tera râ, e parau mai paha te tahi: “Nafea te feia pohe e faatiahia mai ai? Oia hoi, i teihea huru tino e tia mai ai ratou?”+ 36 Auê oe i te maamaa! Eita te mea ta oe e ueue e ora mai ia ore te reira ia pohe na mua. 37 Ia ueue oe, eita oe e ueue i te raau* o te tupu, e ueue râ oe i te huero, e sitona anei aore ra te tahi atu huru huero. 38 Na te Atua râ e faatupu i te huero mai tei au ia ˈna e mai tei au i te tupuraa o tera e tera huero. 39 E ere hoê â huru te iˈo atoa, mea ê hoi to te taata, mea ê to te puaatoro, mea ê to te manu e mea ê to te iˈa. 40 E tino ê to te mau mea e vai ra i nia i te raˈi+ i to tei nia i te fenua.+ E anaana ê to te mau mea e vai ra i nia i te raˈi i to tei nia i te fenua. 41 E anaana ê hoi to te mahana i to te avaˈe+ e i to te mau fetia atoa. Oia mau, e anaana taa ê to te hoê fetia i to te tahi atu.

42 Hoê â atoa e te tia-faahou-raa o te feia pohe. E ueuehia ei mea tahuti, e faatiahia mai ei mea tahuti ore.+ 43 E ueuehia ei mea vahavahahia, e faatiahia mai ei mea hanahana.+ E ueuehia ei mea paruparu, e faatiahia mai ei mea puai.+ 44 E ueuehia ei tino taata, e faatiahia mai ei tino varua. Mai te peu te vai ra te tino taata, te vai atoa ra te tino varua. 45 Mai tei papaihia: “Riro maira te tane matamua ra o Adamu ei taata* ora.”+ Ua riro râ te Adamu hopea ei varua o te horoa i te ora.+ 46 E ere te tino matamua i te tino varua. Na mua te tino taata, e i muri aˈe te tino varua. 47 No te fenua mai te taata matamua, oia hoi tei hamanihia i te repo.+ No te raˈi mai te piti o te taata.+ 48 Mai te taata tei hamanihia i te repo, te huru atoa ïa o te feia i hamanihia i te repo. E mai ia ˈna tei haere mai na te raˈi mai, te huru atoa ïa o tei parahi i nia i te raˈi.+ 49 Mai ia tatou i hohoˈa i te taata i hamanihia i te repo,+ e hohoˈa atoa tatou i tei haere mai na te raˈi mai.+

50 Taeae ma, e parau râ vau ia outou e aita ta te tino taata* e tuhaa i roto i te Faatereraa arii a te Atua, e aita atoa ta te mea tahuti e tuhaa i roto i te mea tahuti ore. 51 Inaha, e faaite atu vau ia outou i te hoê parau huna moˈa: Eita tatou paatoa e taoto i roto i te pohe, o tatou paatoa râ te tauihia,+ 52 i reira iho mai te amoraa mata ra, ia oto te pu hopea. E oto hoi te pu+ e e faatiahia mai tei pohe ei mea tahuti ore e e tauihia tatou. 53 E mea tia hoi i te mea tahuti ia tauihia ei mea tahuti ore,+ e te mea pohe ei mea pohe ore.+ 54 Tera râ, ia tauihia te mea tahuti ei mea tahuti ore e te mea pohe ei mea pohe ore, i reira e tupu ai te parau: “Ua horomiihia te pohe e a muri noa ˈtu.”+ 55 “E te pohe e, teihea ta oe re? E te pohe e, teihea to oe tara?”+ 56 Te tara o te faatupu i te pohe, o te hara ïa,+ e te puai o te hara, o te Ture ïa.*+ 57 Ia haamauruuruhia râ te Atua, na ˈna hoi e horoa mai i te re ia tatou na roto i to tatou Fatu ra o Iesu Mesia!+

58 No reira, to ˈu mau taeae here, ia mau papu outou,+ eiaha e aueue, ia rahi noa ta outou ohipa+ i roto i te Fatu, ma te ite e e ere ta outou e rave i roto i te ohipa+ a te Fatu i te mea faufaa ore.

16 E teie nei, no nia i te haaputuraa i te moni na te feia moˈa,+ e nehenehe outou e pee i te mau faaueraa ta ˈu i horoa i te mau amuiraa i Galatia. 2 I te mahana matamua o te hebedoma atoa, e mea tia ia tuu tataitahi outou i te hiti te mea e maraa ia outou, ia ore hoi te reira ia ravehia ia tae atu vau. 3 Ia tae atu râ vau, o te mau tane ta outou i faahiti i roto i ta outou mau rata,+ o ta outou hoi e tiaturi, ta ˈu e tono no te hopoi atu i Ierusalema ta outou mau ô horoa noa. 4 Mai te peu râ e mea maitai aˈe ia haere atoa vau, e na muri mai ïa ratou ia ˈu.

5 E na Makedonia ˈtu vau i te haere ia outou ra, e na Makedonia iho â vau i te haere atu,+ 6 e eita e ore e e parahi rii au ia outou ra, i te tau toˈetoˈe atoa paha, ia nehenehe hoi outou ia apee mai ia ˈu maa taime i te vahi ta ˈu e haere. 7 Aita hoi au e hinaaro e farerei poto noa ia outou i teie nei, ia tia râ ia Iehova* e hinaaro vau e faaea ia outou ra maa taime.+ 8 Tera râ, e parahi noa vau i Ephesia+ nei e tae atu i te Oroa Penetekose, 9 no te mea e uputa rahi tei matara i mua ia ˈu no te taviniraa,+ mea rahi râ hoi te enemi.

10 E teie nei, ia tae atu Timoteo,+ a hiˈo atu e eiaha oia ia taiâ a parahi ai i rotopu ia outou, te rave nei hoi oia i te ohipa a Iehova,*+ mai ia ˈu atoa nei. 11 Tera râ, eiaha roa ˈtu te taata ia hiˈo ino ia ˈna. A aratai ia ˈna i to ˈna tere ma te hau ia nehenehe oia ia haere mai ia ˈu nei, te tiai nei hoi au e te mau taeae atoa ia ˈna.

12 E teie nei, te ani ru nei au ia Apolo+ to tatou taeae ia haere atu na muri i te mau taeae ia tae atu ratou. Aita oia i opua i te haere atu i teie nei, e haere atu râ ia nehenehe oia.

13 A ara,+ a mau papu i roto i te faaroo,+ ia itoito outou mai te tane ra+ e ia puai roa.+ 14 Ia ravehia ta outou mau ohipa atoa na roto i te here.+

15 E teie nei, ua ite outou e o te utuafare o Setephana te mau pǐpǐ matamua i Ahaia, e ua ineine noa ratou i te tavini i te feia moˈa. Taeae ma, te faaitoito nei ïa vau ia outou: 16 Ia auraro noa outou i te mau taata mai ia ratou ra e i te feia atoa e rohi ra ei hoa ohipa no outou.+ 17 Te oaoa nei râ vau e tei ǒ nei o Setephana,+ o Foratunato e o Ahaiko, no te mea na ratou i tauturu maitai ia ˈu aita ˈi outou i ǒ nei. 18 Ua tamahanahana hoi ratou ia ˈu e ia outou atoa. No reira, e faatura ˈtu i te mau tane mai ia ratou.

19 Te aroha ˈtu nei te mau amuiraa i Asia ia outou. O Akuila raua Periseka e oia atoa te amuiraa e putuputu i ǒ raua ra,+ te aroha ˈtu nei ïa ia outou i te aroha taeae i roto i te Fatu. 20 Te mau taeae atoa teie e aroha ˈtu nei. E apa maitai i te tahi e te tahi ma te here taeae.

21 Te faatae atu nei au, o Paulo, i to ˈu aroha o ta ˈu i papai i to ˈu iho rima.

22 Te taata aita e here ra i te Fatu, ia vai noa ïa te ino i nia ia ˈna. E to ˈu Fatu, e haere mai na! 23 Ei ia outou te hamani maitai rahi o te Fatu ra o Iesu. 24 Ei ia outou paatoa ra to ˈu here, outou hoi tei hoê e te Mesia ra o Iesu.