TE FAATIARAA A LUKA

1 Mea rahi te taata tei tutava i te papai i te mau mea atoa i tupu e ta tatou e tiaturi atoa nei.+ 2 Ua faatia-atoa-hia mai te reira e te feia tei ite mata i teie mau mea mai te haamataraa+ e tei riro ei tavini no te poroi a te Atua.+ 3 No reira ua tuatapapa vau i teie mau mea atoa e ua faaoti atoa e papai i te reira ia au i te tupuraa mau ia oe e Teophilo faatura-rahi-hia.+ 4 Ua na reira vau ia papu ia oe e e parau mau iho â tei haapiihia ia oe.+

5 I te anotau o Heroda,*+ arii o Iudea, te vai ra te tahi tahuˈa no te pǔpǔ a Abia o Zekaria te iˈoa.+ No te utuafare o Aarona ta ˈna vahine faaipoipo o Elisabeta te iˈoa. 6 E taata parau-tia raua i te aro o te Atua, mea haapao roa hoi raua i te taatoaraa o te mau faaueraa e te mau ture a Iehova.* 7 Tera râ, aita ta raua e tamarii, eita hoi ta Elisabeta tamarii e noaa, e ua ruhiruhia raua.

8 Te tavini ra Zekaria ei tahuˈa i mua i te Atua i te taime i faataahia no ta ˈna pǔpǔ,+ 9 ia au i tei matauhia e te tahuˈa ia rave, tae maira te taime e tutui ai oia i te mea noˈanoˈa+ a tomo ai oia i roto i te nao* o Iehova.*+ 10 E te pure noa ra te nahoa i rapaeau i taua taime ra a tutuihia ˈi te mea noˈanoˈa. 11 Fa maira te melahi a Iehova* ia Zekaria, a tia noa ˈi oia i te pae atau o te fata o te mea noˈanoˈa. 12 Horuhoru ihora Zekaria i to ˈna hiˈoraa ˈtu e mehameha ihora. 13 Na ô maira râ te melahi ia ˈna: “Eiaha e mǎtaˈu Zekaria, ua faaroohia hoi ta oe taparuparuraa e e fanau mai ta oe vahine o Elisabeta i te hoê tamaiti na oe, e o Ioane te iˈoa ta oe e horoa no ˈna.+ 14 E oaoa roa oe, e oaoa atoa e rave rahi ia fanauhia mai oia,+ 15 e riro hoi oia ei taata faufaa i te aro o Iehova.*+ Tera râ, eiaha roa ˈtu oia e inu i te uaina e te ava,+ e î oia i te varua moˈa* hou oia e fanauhia mai ai.*+ 16 E faahoˈi mai oia e rave rahi tamarii a Iseraela ia Iehova* ra to ratou Atua.+ 17 E haere atoa oia na mua i te Atua ma te itoito e te mana mai to Elia,+ no te faafariu mai i te aau o te mau metua tane i te mau tamarii ra+ e no te tauturu i te feia faaroo ore ia ohipa ma te paari mai te feia parau-tia, ia ineine hoi te hoê nunaa ta Iehova* e au.”+

18 Na ô atura Zekaria i te melahi: “E nafea te reira e tupu ai? Ua paari roa hoi au, oia atoa ta ˈu vahine.” 19 Pahono maira te melahi: “O vau o Gaberiela+ o te tia i mua i te aro o te Atua,+ e ua tonohia mai au no te paraparau ia oe e no te faaite atu i teie parau apî oaoa. 20 Teie râ, e vavahia oe e tae noa ˈtu i te mahana e tupu ai teie mau mea, no te mea aita oe i tiaturi i ta ˈu mau parau, o te tupu i te tau faataahia.” 21 I taua taime ra, te tiai noa ra te taata ia Zekaria, e ua maere ratou no to ˈna maoro i roto i te nao. 22 I to ˈna haereraa mai i rapaeau, aita i haere ia ˈna ia paraparau, ua vavahia hoi oia, ua apǎ noa mai râ i te rima ia ratou. Taa ihora ia ratou e ua ite oia i te hoê ohipa maere roa* i roto i te nao. 23 I te hoperaa te mau mahana o ta ˈna taviniraa moˈa, hoˈi atura oia i to ˈna fare.

24 Tau mahana i muri aˈe, hapû ihora Elisabeta te vahine a Zekaria, e faaea noa ˈtura i te fare e pae avaˈe, a na ô ai: 25 “O ta Iehova* ïa i rave no ˈu, a haamanaˈo mai ai ia ˈu ia ore te taata e hiˈo ino faahou mai ia ˈu.”+

26 I te onoraa o to ˈna avaˈe hapûraa, tono maira te Atua i te melahi Gaberiela i te hoê oire i Galilea+ o Nazareta te iˈoa, 27 i te hoê vahine apî*+ tei momoˈahia i te hoê tane no te utuafare o Davida o Iosepha te iˈoa, e o Maria te iˈoa o te vahine apî.*+ 28 I te tomoraa mai te melahi, na ô maira oia ia Maria: “Ia ora na. Ua mauruuru roa Iehova* ia oe, e te haamaitai nei oia ia oe.” 29 Horuhoru roa ihora râ Maria i ta ˈna mau parau e imi ihora i te auraa o teie huru aroha. 30 Na ô maira ïa te melahi ia ˈna: “Eiaha e mǎtaˈu Maria, ua farii-maitai-hia hoi oe e te Atua. 31 E inaha, e hapû* oe e e fanau oe i te hoê tamaiti+ ta oe e topa i te iˈoa o Iesu.+ 32 E riro oia ei taata faufaa+ e e parauhia oia Tamaiti a Tei Teitei Roa ˈˈe,+ e e horoa te Atua ra o Iehova* i te terono o Davida to ˈna metua no ˈna,+ 33 e faatere oia ei Arii i nia i te utuafare o Iakoba e a muri noa ˈtu e e ore roa ta ˈna Faatereraa arii* e mou.”+

34 Na ô atura râ Maria i te melahi: “E nafea te reira e tupu ai, aita hoi au i taoto aˈenei i te hoê tane?”+ 35 Pahono maira te melahi ia ˈna: “E vai mai te varua moˈa i nia ia oe+ e e tapoˈi mai te mana o Tei Teitei Roa ˈˈe ia oe. No reira atoa te aiû o te fanauhia mai e parauhia ˈi e moˈa+ e e Tamaiti na te Atua.+ 36 E inaha, ua hapû atoa o Elisabeta to fetii, e ono avaˈe to ˈna i teie nei, noa ˈtu ua paari roa oia e ua parauhia eita ta ˈna tamarii e noaa, 37 aita hoi e parau* e ore e tia i te Atua ia faatupu.”+ 38 Na ô atura Maria: “Inaha, e tavini au na Iehova!* Mai ta oe i parau, ia na reirahia mai ïa vau.” Reva ˈtura te melahi.

39 Faaineine ihora ïa Maria ia ˈna i taua mau mahana ra, haere oioi atura i te fenua mouˈa i te hoê oire no Iuda, 40 tomo atura oia i roto i te fare o Zekaria e aroha ˈtura ia Elisabeta. 41 A faaroo ai Elisabeta ia Maria i te aroharaa mai ia ˈna, hauti ihora te aiû i roto i to ˈna opu, î aˈera Elisabeta i te varua moˈa 42 e tuô ihora: “O oe te vahine haamaitai-roa-hia aˈe o te mau vahine atoa e ia haamaitai te Atua i te aiû i roto i to opu! 43 O vai hoi au e haere mai ai te metua vahine o to ˈu Fatu e hiˈo ia ˈu? 44 Inaha hoi, i to ˈu iho â faarooraa ia oe i te aroharaa mai, hauti ihora te aiû i roto i to ˈu opu no te oaoa. 45 Ia oaoa atoa oe tei tiaturi i tei parauhia ia oe, no te mea e tupu hope roa ta Iehova* i parau atu.”

46 Na ô atura Maria: “Te arue nei au* ia Iehova,*+ 47 e te oaoa roa nei to ˈu aau i te Atua to ˈu Faaora,+ 48 ua hiˈo mai hoi oia i ta ˈna tavini, noa ˈtu to ˈna riirii.+ Inaha hoi, mai teie atu nei e faaite haere ai te mau uˈi atoa e ua haamaitaihia vau,+ 49 e ohipa faahiahia hoi ta te Atua puai i rave no ˈu e e iˈoa moˈa to ˈna,+ 50 e e aroha hamani maitai oia i te feia e mǎtaˈu ra ia ˈna i tera uˈi e tera uˈi.+ 51 Ua haa oia ma to ˈna rima puai. Ua haapurara oia i te feia teoteo i roto i te mau opuaraa a to ratou aau.+ 52 Ua huri oia i te feia mana i raro i to ratou terono+ e ua faateitei i te feia riirii.+ 53 Ua horoa oia i te mau mea maitatai na tei poia+ e ua faahoˈi i te feia e faufaa ta ratou ma te taoˈa ore. 54 Ua tauturu oia ia Iseraela ta ˈna tavini, a haamanaˈo ai i to ˈna aroha hamani maitai+ 55 ia Aberahama e to ˈna huaai e a muri noa ˈtu, mai ta ˈna i parau i to tatou mau tupuna.”+ 56 Parahi ihora Maria i ǒ Elisabeta piri i te toru avaˈe e hoˈi atura i to ˈna iho fare.

57 Tae maira te mahana e fanau ai Elisabeta e fanau ihora oia i te hoê tamaiti. 58 Faaroo aˈera te feia tapiri e to ˈna fetii e ua aroha hamani maitai Iehova* ia ˈna, oaoa ˈtura ratou e o ˈna atoa.+ 59 I te vaˈu o te mahana, haere maira ratou no te peritomeraa o te tamaiti,+ e manaˈo ihora ratou e topa ia ˈna i te iˈoa o Zekaria to ˈna metua tane. 60 Parau maira râ to ˈna metua vahine: “Eiaha! O Ioane râ to ˈna iˈoa.” 61 Na ô atura ratou ia ˈna: “Aita roa e taata i roto i to oe fetii tera to ˈna iˈoa.” 62 Ma te apǎ i te rima, ani atura ratou i to ˈna metua tane i te iˈoa ta ˈna e hinaaro e horoa. 63 Ani maira ïa oia i te hoê iri e papai ihora: “O Ioane to ˈna iˈoa.”+ Maere ihora ratou pauroa. 64 I reira iho, matara aˈera to ˈna vaha e to ˈna arero e paraparau atura+ ma te arue i te Atua. 65 Mǎtaˈu ihora te feia atoa e faaea ra na reira, e faatiahia ˈtura teie mau parau e ati aˈe te fenua o Iudea. 66 Tapea maite atura te feia atoa i faaroo i te reira i roto i to ratou aau, a na ô ai: “O vai hoi teie tamaiti?” Tei ia ˈna ra hoi te mana o Iehova.*

67 Î aˈera Zekaria to ˈna metua tane i te varua moˈa e tohu ihora: 68 “Ia aruehia Iehova* te Atua o Iseraela,+ no te mea ua aroha oia i to ˈna nunaa e ua faaora ia ratou.+ 69 I horoa na oia i te hoê tara* faaora*+ no tatou no roto mai i te fare o ta ˈna tavini ra o Davida,+ 70 mai ta ˈna i parau na roto i ta ˈna mau peropheta moˈa i tahito ra.+ 71 I fafau na oia e faaora ia tatou i te rima o to tatou mau enemi e o te feia atoa e hae ra ia tatou.+ 72 E aroha hamani maitai oia ia tatou mai ta ˈna i fafau i to tatou mau tupuna e e haamanaˈo oia i ta ˈna faufaa moˈa,+ 73 ta ˈna i tǎpǔ ia Aberahama to tatou tupuna.+ 74 I muri aˈe i to te Atua faaoraraa ia tatou i te rima o te mau enemi, e nehenehe tatou e pûpû ia ˈna i te hoê taviniraa moˈa ma te mǎtaˈu ore, 75 te taiva ore e te parau-tia i mua i to ˈna aro e hope noa ˈtu to tatou pue mahana. 76 Area oe, e tamaiti, e parauhia oe e peropheta na Tei Teitei Roa ˈˈe, e tono hoi Iehova* ia oe na mua ia ˈna no te faaineine i te eˈa no ˈna,+ 77 no te faaite i to ˈna nunaa e e faaora oia ia ratou ma te faaore i ta ratou mau hara+ 78 no to te Atua hoi aumihi î i te here. Mai te mahana e anaana mai i te aahiata teie aumihi î i te here no nia mai 79 no te turama i tei parahi ra i roto i te poiri e te maru pohe,+ e no te aratai i to tatou avae na te eˈa o te hau.”

80 Paari maira te tamaiti, itoito ihora i te pae varua e ora noa ˈtura i te medebara e tae atu i te mahana i faaite roa mai ai oia ia ˈna ia Iseraela.

2 I taua mau mahana ra, ua faaue Kaisara Auguso ia tapaohia te iˈoa o to te fenua atoa. 2 (I ravehia na tera tapaoraa iˈoa matamua a tavana ˈi Kurenio i Suria.) 3 Haere aˈera te taata atoa i to ratou iho oire fanauraa ia tapaohia to ratou iˈoa. 4 Ei mero no te utuafare e te fetii o Davida, ua haere atoa ïa o Iosepha+ mai te oire mai o Nazareta i Galilea, i te oire o Davida i Iudea tei parauhia Betelehema.+ 5 Haere aˈera Iosepha raua Maria ta ˈna vahine faaipoipo+ tei fatata i te fanau e tapao i to raua iˈoa.+ 6 A parahi noa ˈi raua i reira, tae maira te taime e fanau ai Maria. 7 Fanau ihora oia i ta ˈna tamaiti matahiapo,+ vehî ihora ia ˈna i te ahu e tuu atura i roto i te hoê vahi e paruhia ˈi te animara,+ aita hoi e piha faahou no te ratere.

8 E tiai mamoe atoa tei taua fenua ra e parahi ra i rapae e e haapao ra i ta ratou mau nǎnǎ i te po taatoa. 9 Fa maira ta Iehova* melahi, anaana maira to Iehova* hanahana e ati aˈe ia ratou, e mǎtaˈu roa ihora ratou. 10 Na ô maira râ te melahi: “Eiaha e mǎtaˈu, inaha hoi ua haere mai au e faaite atu i te tahi parau apî oaoa e oaoa roa ˈi te taata atoa. 11 I teie hoi mahana i te oire o Davida,+ ua fanauhia mai te hoê faaora,+ oia hoi te Mesia ra te Fatu.+ 12 Teie te tapao: E ite outou i te hoê aiû vehîhia i te ahu i roto i te hoê vahi e paruhia ˈi te animara.” 13 Fa atoa maira e rave rahi o te nuu o te raˈi e arue atura ratou taua melahi ra+ i te Atua a na ô ai: 14 “Ia faahanahanahia te Atua i te raˈi teitei e ia tupu te hau i te fenua nei no te taata ta te Atua e farii.”

15 Faarue maira te mau melahi no te hoˈi atu i te raˈi e na ô aˈera te mau tiai mamoe te tahi i te tahi: “Mai, haere anaˈe i Betelehema e hiˈo i te ohipa i tupu, ta Iehova* hoi i faaite mai ia tatou.” 16 Haere oioi atura ratou e ite atura ia Maria raua o Iosepha, e to roto te aiû i te vahi e paruhia ˈi te animara. 17 I to ratou iteraa i te aiû, faaite atura ratou ia raua i tei parauhia mai no nia i teie tamaiti. 18 Maere ihora te taata atoa tei faaroo i ta te mau tiai mamoe i parau atu, 19 o Maria râ, ua tapea maite ïa i teie mau parau atoa ma te feruriruri i te auraa i roto i to ˈna aau.+ 20 Hoˈi atura te mau tiai mamoe, a faahanahana ˈi e a arue ai i te Atua no ta ratou i faaroo e i ite, mai tei parauhia ˈtu ia ratou.

21 I te vaˈu o te mahana o to ˈna fanauraa, peritomehia ihora oia+ e topahia ˈtura i te iˈoa ra o Iesu. O te iˈoa ïa ta te melahi i horoa ˈtu hou Maria a hapû ai.+

22 Oia atoa i te mahana tamâraa ia raua ia au i te Ture a Mose,+ afai atoa aˈera raua i te aiû i Ierusalema e faaite ia Iehova,* 23 mai tei papaihia i roto i te Ture a Iehova:* “Ia moˈa te mau tamaroa matahiapo atoa no Iehova.”*+ 24 Pûpû atura raua i te hoê tusia ia au i tei parauhia i roto i te Ture a Iehova:* “e piti uupa aore ra e piti uuairao apî.”+

25 E inaha, te vai ra te hoê tane i Ierusalema o Simeona te iˈoa. E taata parau-tia oia e te mǎtaˈu i te Atua o te tiai ra i te taime e tamahanahana ˈi te Atua ia Iseraela.+ Tei nia iho atoa ia ˈna te varua moˈa. 26 Ua faaite atoa te Atua ia ˈna maoti te varua moˈa e e ite oia i te Mesia a Iehova* hou a pohe ai. 27 Arataihia e te varua o te Atua, haere ihora Simeona i roto i te hiero, e i te mea e te afai mai ra na metua i te tamaiti ra o Iesu no te rave i tei titauhia e te Ture no ˈna,+ 28 rave ihora oia i taua tama ra, arue atura i te Atua e na ô atura: 29 “I teie nei, e to ˈu Arii hau ê e Fatu, e nehenehe to tavini e pohe ma te hau+ ia au i ta oe parau, 30 no te mea ua ite to ˈu mata i ta oe ravea faaoraraa+ 31 ta oe i horoa mai ia ite te taata atoa,+ 32 e maramarama+ oia e ite ai te mata o te feia o te mau nunaa ěê,+ e hanahana atoa no to nunaa Iseraela.” 33 Maere noa ihora te metua tane e te metua vahine o te tamaiti i ta Simeona i parau no ˈna. 34 Haamaitai atoa ihora Simeona ia raua e na ô atura ia Maria te metua vahine o te tamaiti: “Inaha, ua maitihia teie tamaiti ia hiˈa+ e ia faateiteihia e rave rahi i Iseraela+ e ia riro ei tapao o te faainohia,+ 35 (oia mau, e mauiui roa oe mai te huru ra ua puta roa oe* i te ˈoˈe),+ a ite-maitai-hia ˈtu ai te manaˈo o te aau e rave rahi.”

36 Te vai ra te hoê peropheta vahine, o Ana te tamahine a Phanuela no te opu o Asera. E vahine paari roa teie e mai to ˈna faaipoiporaa mai, i ora na oia e ta ˈna tane e hitu matahiti, 37 e i teie nei e vahine ivi oia, e 84 matahiti to ˈna. I haere noa na oia i te hiero e pûpû i te Atua i te hoê taviniraa moˈa i te po e te ao, a haapae atoa ˈi i te maa e a pure ai ma te aau atoa. 38 I taua taime ra, tapiri maira oia, haamauruuru ihora i te Atua e faaite atura i te parau no te tamaiti i te feia atoa e tiai ra ia tiamâ mai Ierusalema.+

39 I te otiraa ia raua i te rave i te mau mea atoa ia au i te Ture a Iehova,*+ hoˈi atura raua i Galilea i to raua iho oire o Nazareta.+ 40 Rahi noa maira te tamaiti e itoito maira, a rahi noa ˈi to ˈna paari, e farii maitai noa maira te Atua ia ˈna.+

41 Ua matau hoi to Iesu na metua i te haere i te mau matahiti atoa i Ierusalema i te oroa Pasa.+ 42 I te 12raa o to ˈna matahiti, haere aˈera ratou i te oroa mai ta ratou i matau.+ 43 I te otiraa te oroa e a hoˈi ai ratou, faaea ihora te tamaiti ra o Iesu i Ierusalema e aita to ˈna na metua i ite. 44 Manaˈo ihora raua e tei rotopu Iesu i te feia ratere. Hoê mahana i muri iho, haamata ˈtura raua i te imi ia ˈna i rotopu i te fetii e te feia ta raua i matau. 45 Aita râ oia i itehia mai, hoˈi atura raua i Ierusalema e imi aˈera ia ˈna. 46 E toru mahana i muri iho to raua iteraa ia ˈna i roto i te hiero e parahi ra i rotopu i te mau orometua a faaroo ai e a uiui ai ia ratou. 47 Maere noa ihora râ te feia atoa e faaroo ra ia ˈna i to ˈna maramarama e ta ˈna mau pahonoraa.+ 48 I te iteraa ˈtu to ˈna na metua ia ˈna, maere ihora raua e na ô atura to ˈna metua vahine ia ˈna: “Ta ˈu tamaiti, eaha oe i na reira mai ai ia mâua? I ahoaho roa na mâua to metua tane i te imiraa ia oe.” 49 Na ô maira râ oia: “Eaha orua i imi ai ia ˈu? Aita orua i ite e ei roto vau i te fare o to ˈu Metua?”+ 50 Tera râ, aita i taa ia raua ta ˈna e parau ra.

51 Hoˈi ihora oia na muri ia raua i Nazareta e auraro noa ˈtura oia ia raua.+ Tapea maite atoa ˈtura to ˈna metua vahine i teie mau parau atoa i roto i to ˈna aau.+ 52 A rahi mai ai Iesu, rahi atoa ˈtura to ˈna paari. Noaa atoa maira ïa ia ˈna te farii maitai o te Atua e te taata.

3 I te 15raa o te matahiti faatereraa a Tiberio Kaisara, o Ponotio Pilato te tavana i Iudea, o Heroda*+ te tavana* i Galilea, area to ˈna taeae o Philipa, e tavana ïa i Ituraia e i Terahoniti, o Lousanio te tavana i Abilene, 2 o Ana te tahuˈa tiaau e o Kaiapha+ te tahuˈa rahi. I taua tau ra, tae maira ta te Atua parau ia Ioane+ te tamaiti a Zekaria i te medebara.+

3 Haere atura ïa Ioane na te mau vahi tapiri atoa ia Ioridana e poro i te taata ia bapetizohia ratou ei faaiteraa i to ratou tatarahapa ia faaorehia ta ratou mau hara,+ 4 mai tei papaihia i roto i te buka a Isaia te peropheta: “E taata teie e tuô haere nei na te medebara: ‘A faaineine i te eˈa no Iehova!* A haamanina i te purumu no ˈna.+ 5 Ia faaîhia te mau peho atoa, ia haaparahurahuhia te mau mouˈa e aivi atoa, ia faaafarohia te mau eˈa tioioi e ia haamaninahia te mau vahi apoopoo e tia ˈi. 6 E ite te taata atoa i te faaoraraa* a te Atua.’”+

7 Parau atura ïa Ioane i te nahoa e haere mai ra ia bapetizohia ratou e ana: “Fanauˈa ophi taero ma, na vai i faaara ia outou e e ora ˈtu outou i te mahana o te riri rahi tahoo o te Atua e piri mai ra?+ 8 A rave ïa i te mau ohipa o te faaite i to outou tatarahapa. Eiaha e parau i roto ia outou iho: ‘O Aberahama to matou metua.’ Te parau atu nei hoi au e e nehenehe te Atua e faariro i teie mau ofai ei tamarii na Aberahama. 9 Ua ineine hoi te opahi* no te tâpû i te mau tumu raau i te aˈa. Te tumu raau atoa e ore e faahotu mai i te maa maitai, e tâpûhia ïa a hurihia ˈtu ai i roto i te auahi.”+

10 Ui maira te nahoa ia ˈna: “E nafea ïa matou?” 11 Pahono atura Ioane: “Te taata e piti ahu to ˈna, a horoa ˈtu ïa i te tahi na tei ere, e te taata e maa ta ˈna, ia na reira atoa ïa.”+ 12 Haere atoa maira te tahi mau titau tute ia bapetizohia+ ratou, e na ô maira ia ˈna: “Orometua, e nafea matou?” 13 Na ô atura oia: “A titau* noa i te tute faataahia e te ture, eiaha ia hau atu.”+ 14 Ui atoa maira te tahi mau faehau ia ˈna: “E nafea matou?” Na ô atura oia: “Eiaha e haru i ta vetahi ê moni,* eiaha atoa e pari haavare,+ ia mauruuru râ outou i tei horoahia mai.”*

15 Te tiai noa ra hoi te taata i te Mesia e te feruri ra ratou paatoa i roto i to ratou aau no nia ia Ioane: “E ere anei o ˈna te Mesia?”+ 16 Pahono atura Ioane ia ratou pauroa: “O vau nei, te bapetizo nei au ia outou i te pape, te haere mai nei râ te taata e mana rahi aˈe to ˈna i to ˈu, e ore hoi e tia ia ˈu ia tatara i te taamu o to ˈna tiaa.+ E bapetizo oia ia outou i te varua moˈa e i te auahi.+ 17 Tei roto ta ˈna ope no te sitona i to ˈna rima no te tamâ roa i ta ˈna vahi tairiiriraa sitona* e no te haaputu i te sitona i roto i ta ˈna fare vairaa maa. Area te ota, e tanina ïa oia i te auahi o te ore e pohe.”

18 Horoa atoa ˈtura Ioane e rave rahi atu â faaitoitoraa a faaite noa ˈi i te parau apî oaoa i te taata. 19 Faahapa ˈtura râ oia ia Heroda te tavana, no Herodia te vahine faaipoipo a to ˈna taeae e no te mau ohipa ino atoa a Heroda. 20 Rave atura Heroda i te tahi mea ino roa ˈtu â: Ua huri oia ia Ioane i roto i te fare tapearaa.+

21 E teie nei, i te bapetizoraahia te taata atoa, ua bapetizo-atoa-hia o Iesu.+ E a pure ai oia, matara aˈera te raˈi,+ 22 pou maira te varua moˈa mai te uupa ra i nia ia ˈna e faaroohia maira te hoê reo mai te raˈi mai: “O ta ˈu Tamaiti oe, tei herehia. Ua mauruuru roa vau ia oe.”+

4 Faarue atura Iesu tei î i te varua moˈa ia Ioridana e arataihia ˈtura oia e te varua moˈa i te medebara+ 2 e 40 mahana. Aita atoa oia i tamaa e i te hoperaa taua mau mahana ra, poia ihora oia. I reira, faahema ihora te Diabolo ia ˈna.+ 3 Na ô maira te Diabolo: “Mai te peu e tamaiti oe na te Atua, a parau i teie mau ofai ia riro ei faraoa.” 4 Pahono atura râ Iesu: “Ua papaihia: ‘Eita te taata e ora i te maa anaˈe.’”+

5 Afai aˈera te Diabolo ia Iesu i nia i te hoê vahi teitei e faaite maira maa taime noa i te mau faatereraa arii atoa o te ao nei.+ 6 Na ô maira ïa te Diabolo: “E horoa ˈtu vau i te mana i nia i teie mau faatereraa atoa e to ratou hanahana, no te mea ua tuuhia mai te reira ia ˈu ra+ e e horoa ˈtu vau no te taata ta ˈu e hinaaro. 7 No reira, ia haamori mai oe ia ˈu, na oe ïa teie mau mea atoa.” 8 Pahono atura Iesu: “Ua papaihia: ‘O Iehova* to oe Atua ta oe e haamori, e ia ˈna anaˈe e pûpû ai oe i te hoê taviniraa moˈa.’”+

9 Afai atura te Diabolo ia Iesu i Ierusalema, tuu ihora ia ˈna i te vahi teitei roa o te hiero e na ô ihora: “Mai te peu e tamaiti oe na te Atua, a ouˈa i raro,+ 10 ua papaihia hoi: ‘E faaue oia i ta ˈna mau melahi e paruru ia oe,’ 11 e ‘Na ratou e amo ia oe i to ratou rima ia ore to oe avae e tano i nia i te ofai.’”+ 12 Pahono atura Iesu: “Ua parauhia: ‘Eiaha oe e aa ia Iehova* to oe Atua.’”+ 13 I muri aˈe i to ˈna faahemaraa ia Iesu, vaiiho maira te Diabolo ia ˈna, a tiai ai i te tahi atu taime tano.+

14 Hoˈi maira Iesu ma te î i te mana o te varua moˈa i Galilea.+ Atutu atura te parau maitai no nia ia ˈna na te mau vahi tapiri mai. 15 Haapii atoa ˈtura oia i te taata i roto i te mau sunago, e arue maira te taata atoa ia ˈna.

16 Haere atura oia i Nazareta,+ i reira to ˈna paariraa mai, tomo ihora i roto i te sunago mai ta ˈna i matau i te mahana Sabati,+ e tia aˈera no te taio. 17 Horoahia maira ïa te otaro a te peropheta Isaia ia ˈna, hohora ihora oia i te otaro e itehia ˈtura ia ˈna te vahi i papaihia ˈi: 18 “Tei nia iho ia ˈu te varua o Iehova,* ua faatavai hoi oia ia ˈu no te faaite i te parau apî oaoa i te feia veve. Ua tono mai oia ia ˈu no te faaite i te mau tîtî e tiamâ ratou e e ite faahou te matapo, no te tuu i te feia i haavîhia,+ 19 no te poro i te tau e haamaitai faahou ai Iehova* ia ratou.”+ 20 Oviri atura oia i te otaro, faahoˈi atura oia i te reira i te tavini e parahi ihora. Hiˈo noa maira to te sunago atoa ia ˈna. 21 Na ô atura oia: “Teie parau i papaihia ta outou i faaroo mai nei, ua tupu ïa i teie mahana.”+

22 Faahiti aˈera ratou paatoa i te parau maitai no nia ia ˈna e to ratou maere i te au rahi o ta ˈna mau parau,+ a na ô ai: “E tamaiti na Iosepha teie, e ere anei?”+ 23 Na ô atura oia: “E faaau mai paha outou ia ˈu i teie parau e na ô ra: ‘Taote, a faaora ia oe iho. Ua faaroo matou i ta oe i rave i Kaperenaumi,+ a na reira atoa ïa i ǒ nei, i to oe nei fenua.’” 24 Na ô atura ïa oia: “Oia mau ta ˈu e parau atu, aita e peropheta e auhia i to ˈna iho fenua.+ 25 E parau mau ta ˈu e parau atu: Mea rahi te vahine ivi i Iseraela i te tau o Elia i te mauraa te ûa e toru matahiti e te afa e i te tupuraa te oˈe rahi e ati aˈe te fenua.+ 26 Teie râ, aita o Elia i tonohia i taua mau vahine ra, ua tonohia râ oia i te hoê noa vahine ivi i Zarephate i te fenua o Sidona.+ 27 Mea rahi atoa te taata lepera i Iseraela i te tau o Elisaia te peropheta, aita râ ratou i tamâhia,* o Naamana anaˈe râ no Suria.”+ 28 Riri roa aˈera to te sunago atoa tei faaroo i teie mau parau,+ 29 tia aˈera ratou, afai ru ihora ia ˈna i rapae i te oire, e hopoi atura ia ˈna i te vahi topa tarere o te mouˈa to reira to ratou oire, no te turai ia ˈna i raro. 30 Na roto atura râ Iesu ia ratou i te haere e reva ˈtura.+

31 Pou ihora oia i Kaperenaumi, e oire no Galilea. Haapii atura oia i te taata i te Sabati,+ 32 e maere ihora ratou i ta ˈna huru haapiiraa,+ no te mea te paraparau ra oia ma te mana. 33 E taata râ tei uruhia e te hoê varua, te hoê demoni viivii, to roto i te sunago e te tuô ra:+ 34 “Eaha ta oe ohipa i ǒ nei, Iesu no Nazareta?+ Ua haere mai oe e haamou ia matou? Ua ite maitai au o vai oe, te tavini Moˈa a te Atua.”+ 35 Tamaˈi ihora râ Iesu ia ˈna, a na ô ai: “Mamû, haere i rapae ia ˈna.” Taora ihora te demoni i taua taata ra i raro i ropu ia ratou e haere atura i rapae ma te ore e rave ino ia ˈna. 36 Maere ihora ratou pauroa e na ô aˈera te tahi i te tahi: “Eaha teie? E faaue oia i te mau varua viivii ma te mana e te puai e haere mai ratou i rapae!” 37 Atutu atura ïa to ˈna parau na te mau vahi tapiri atoa.

38 Faarue atura Iesu i te sunago, e tomo ihora i roto i te fare o Simona. E fiva rahi to te metua vahine hoovai o Simona e ani maira to reira mau taata ia Iesu ia faaora ia ˈna.+ 39 Tia ihora Iesu i pihai iho ia ˈna, tamaˈi aˈera i te fiva e pee atura ïa. I reira iho, tia maira taua vahine ra e faaineine atura i te maa na ratou.

40 Tera râ, i te toparaa te mahana, arataihia maira te taata ua rau to ratou maˈi ia Iesu ra. Faaora ihora oia i to ratou maˈi ma te tuu i to ˈna rima i nia iho ia ratou tataitahi.+ 41 Haere atoa ˈtura te mau demoni i rapae e rave rahi taata, ma te tuô e te na ô: “O te Tamaiti a te Atua oe.”+ Tamaˈi atura râ oia ia ratou ma te faaue atu ia mamû,+ ua ite hoi ratou e o ˈna te Mesia.+

42 E ao aˈera, haere ihora Iesu i te hoê vahi moˈemoˈe.+ Imi aˈera râ te nahoa ia ˈna, haere maira i te vahi to reira oia e taparuparu aˈera ia ˈna ia faaea mai. 43 Na ô atura râ oia: “Ia faaite atoa vau i te parau apî oaoa o te Faatereraa arii a* te Atua i te tahi atu mau oire e tia ˈi, no reira hoi au i tonohia mai ai.”+ 44 Haere atura ïa oia e poro i roto i te mau sunago i Iudea.

5 I te hoê mahana, ua piri roa mai te nahoa ia Iesu. Te faaroo ra ratou i te parau a te Atua a tia ˈi oia i te hiti roto o Genesareta.*+ 2 Ite atura oia e piti poti i tatahi e tei uta te mau ravaai e tamâ ra i ta ratou mau upeˈa.+ 3 Haere ihora oia i nia hoê o taua na poti ra, to Simona, e ani atura ia ˈna ia turai rii atu i te poti i tai. Parahi ihora oia e haapii atura i te nahoa mai nia ˈtu i te poti. 4 I te otiraa ta ˈna paraparauraa, na ô ihora oia ia Simona: “A hôe atu i te vahi hohonu, e a tuu i ta outou mau upeˈa.” 5 Na ô maira râ Simona: “Orometua, ua taiˈa matou e ao noa ˈtura e aita hoê aˈe iˈa.+ No ta oe râ parau, e tuu vau i te upeˈa.” 6 I te na reiraraa ratou, mea rahi ta ratou iˈa i noaa mai, a mutumutu atu ai ta ratou mau upeˈa.+ 7 Tarape atura ratou i to ratou mau hoa ravaai i roto i te tahi atu poti ia haere mai e tauturu ia ratou, tapiri maira ratou e faaî ihora i na poti e piti tei fatata roa i te tomo. 8 A ite ai oia i te reira, tuturi ihora Simona Petero i mua ia Iesu, a na ô ai: “E te Fatu, eiaha e tapiri mai ia ˈu, e taata hara hoi au.” 9 No tera rahiraa iˈa tei noaa mai, maere roa ihora oia e te mau hoa ravaai atoa, 10 oia atoa Iakobo raua Ioane na tamaiti a Zebedaio,+ na hoa ohipa o Simona. Na ô atura râ Iesu ia Simona: “Eiaha e mǎtaˈu faahou. Mai teie atu nei, te taata te noaa mai ia outou+ eiaha râ te iˈa.” 11 Faahoˈi maira ratou i na poti i tatahi, vaiiho pauroa ˈtura e pee maira ia Iesu.+

12 I te tahi atu mahana tei te hoê oire oia, inaha te vai ra te hoê taata ua î roa to ˈna tino i te lepera! I to ˈna iteraa ia Iesu, tipapa ihora oia e taparu maira ia ˈna: “E te Fatu, ia tia ia oe, e nehenehe oe e tamâ ia ˈu.”+ 13 Toro ihora ïa Iesu i to ˈna rima, e tapea ˈtura ia ˈna a na ô ai: “E tia ia ˈu! Ia mâ oe.” Pee ihora te lepera.+ 14 Faaue ihora oia ia ˈna eiaha e faaite i te taata e na ô atura: “A haere râ e faaite ia oe i te tahuˈa, e a pûpû i te ô ta Mose i faaue+ ei haapapuraa e ua mâ to oe lepera, ia ite ratou.”+ 15 Teie râ, atutu noa ˈtura te parau no Iesu e haere maira te nahoa e faaroo ia ˈna e ia ora to ratou mau maˈi.+ 16 Pinepine râ oia i te haere i te mau vahi aita e taata, no te pure.

17 I te hoê mahana, a haapii ai Iesu i te taata i roto i te hoê fare, parahi atoa maira te mau Pharisea e te feia haapii i te Ture no te mau oire rii atoa o Galilea e to Iudea e no Ierusalema mai. E tei ia ˈna ra te mana o Iehova* e faaora i te maˈi.+ 18 E inaha, amo maira te tahi mau taata i te hoê hapepa i nia i te hoê roˈi, e imi aˈera i te ravea no te afai roa ˈtu ia ˈna i mua ia Iesu.+ 19 Aita râ i tae ia ratou no te rahi o te taata. Pauma aˈera ratou i nia i te tapoˈi fare, faaapoo aˈera i te reira e haapou maira i te hapepa i nia i te roˈi i rotopu i te feia i mua ia Iesu. 20 I to Iesu iteraa i to ratou faaroo, na ô atura oia i te hapepa: “Ua faaorehia ta oe mau hara.”+ 21 Na ô ihora te mau papai parau e te mau Pharisea te tahi i te tahi: “O vai hoi teie taata e faaino ra i te Atua? E ere anei o te Atua anaˈe te nehenehe e faaore i te hara?”+ 22 Taa ihora râ ia Iesu to ratou huru feruriraa e na ô atura: “Eaha outou e feruri ai mai tera i roto i to outou aau? 23 Eaha hoi te mea ohie aˈe ia parau: ‘Ua faaorehia ta oe mau hara,’ aore ra: ‘A tia, a haere’? 24 E faaite atu râ vau e e mana to te Tamaiti a te taata nei i te fenua e faaore i te hara . . . ” Na ô atura oia i te hapepa: “Te parau atu nei au ia oe: A tia, a rave i to oe roˈi e a haere i to oe fare.”+ 25 I reira iho, tia aˈera oia i mua ia ratou, rave maira i to ˈna roˈi e haere atura i to ˈna fare a faahanahana ˈi i te Atua. 26 Maere e mǎtaˈu ihora ratou pauroa, e faahanahana ˈtura i te Atua a na ô ai: “E ohipa faahiahia ta tatou i ite i teie mahana!”

27 I muri aˈe i teie mau mea, haere atura Iesu i rapae, ite atura i te hoê titau tute o Levi te iˈoa, te parahi ra i te fare aufauraa tute, e na ô atura: “A pee mai ia ˈu.”+ 28 Tia aˈera Levi, vaiiho pauroa ˈtura e pee maira ia Iesu. 29 Faatupu atoa ihora Levi i te hoê tamaaraa rahi no Iesu i to ˈna fare, e i rotopu i te mau manihini e tamaa ra,* mea rahi roa te titau tute.+ 30 Ohumu aˈera te mau Pharisea e ta ratou mau papai parau e na ô atura i ta ˈna mau pǐpǐ: “Eaha outou e tamaa ˈi e te mau titau tute e te feia rave hara?”+ 31 Pahono maira Iesu: “E ere te taote no te feia oraora maitai, no te feia maˈi râ.+ 32 Ua haere mai hoi au e titau i te feia rave hara ia tatarahapa,+ eiaha râ te feia parau-tia.”

33 Na ô atura ratou: “E pinepine te mau pǐpǐ a Ioane i te haapae i te maa e i te pure ma te taparuparu, oia atoa te mau pǐpǐ a te mau Pharisea. Ta oe râ, te tamaa nei e te inu noa nei ïa.”+ 34 Na ô maira Iesu: “Eita ta outou e nehenehe e faahepo i te mau hoa o te tane faaipoipo ia haapae i te maa a faaea noa mai ai oia i rotopu ia ratou, e ere anei? 35 E tae mai râ te mau mahana+ e hopoi-ê-hia ˈi te tane faaipoipo,+ i reira ïa ratou e haapae ai i te maa.”

36 Horoa atoa ˈtura oia i te hoê faahohoˈaraa: “Aita e taata e tâpû i te ahu apî no te tafai atu i nia i te ahu tahito. Ia na reira oia, e mutu te ahu tahito i te ahu apî, e ore atoa te ahu apî e tano e te ahu tahito.+ 37 Aita atoa e taata e tuu i te uaina apî i roto i te mau pute uaina* tahito. Ia na reira oia, e mahae te mau pute uaina, e tahe te uaina apî, e ino atoa te mau pute uaina. 38 E tuuhia râ te uaina apî i roto i te mau pute uaina apî. 39 Aita e taata e hinaaro i te uaina apî mai te peu e ua tamata ê na oia i te mea tahito, a na ô ai: ‘Mea au te uaina tahito.’”

6 I te hoê râ Sabati, haere atura Iesu na roto i te mau faaapu sitona, hutihuti aˈera ta ˈna mau pǐpǐ i te huero sitona,+ orooro ihora i roto i to ratou rima e amu atura.+ 2 Na ô maira te tahi mau Pharisea: “Eaha outou e rave ai i tei opanihia i te Sabati?”+ 3 Pahono atura râ Iesu: “Aita outou i taio i ta Davida i rave a poia ˈi oia e to ˈna mau taata?+ 4 Ua tomo oia i roto i te fare o te Atua, ua horoahia mai te mau pane pûpûhia,* tei opanihia i te taata atoa ia amu. O te mau tahuˈa anaˈe te nehenehe e amu i te reira. Ua amu oia e ua horoa i te tahi na to ˈna mau taata.”+ 5 Na ô atura oia: “O te Tamaiti a te taata nei te Fatu o te Sabati.”+

6 I te tahi atu Sabati,+ tomo ihora Iesu i roto i te sunago e haapii atura i te taata. E taata atoa to reira ua pohe* to ˈna rima atau.+ 7 Hiˈo maitai maira te mau papai parau e te mau Pharisea ia Iesu no te ite e faaora anei oia i te taata maˈi i te Sabati, a faahapa mai ai ia ˈna. 8 Ua ite râ Iesu i to ratou manaˈo+ e parau atura i te taata rima pohe:* “A tia mai e a faaea noa i ropu.” Tia aˈera oia e faaea noa ihora i ropu. 9 Na ô atura Iesu: “E ui atu vau ia outou: Ia au i te Ture, mea tano anei i te Sabati ia hamani maitai aore ra ia hamani ino, ia faaora aore ra ia haapohe?”+ 10 Hiˈo ihora oia ia ratou pauroa e na ô atura i taua taata ra: “A toro mai na i to rima.” Na reira ˈtura oia e ora ˈtura to ˈna rima. 11 Hae ihora râ ratou e paraparau aˈera te tahi i te tahi i ta ratou e rave ia Iesu.

12 I te hoê mahana, pauma ˈtura Iesu i nia i te mouˈa e pure+ atura i te Atua i te po taatoa.+ 13 E ao aˈera, parau atura oia i ta ˈna mau pǐpǐ ia haere mai e maiti ihora i rotopu ia ratou 12 ta ˈna i topa i te iˈoa aposetolo:+ 14 Simona ta ˈna i topa atoa i te iˈoa Petero, Anederea to ˈna taeae, Iakobo, Ioane, Philipa,+ Baretolomea, 15 Mataio, Toma,+ Iakobo te tamaiti a Alephaia, Simona piihia “tei itoito rahi,” 16 Iuda te tamaiti a Iakobo e Iuda Isakariota tei riro ei enemi.

17 Pou maira Iesu e ratou atoa e faaea ˈtura oia i te hoê vahi papu, to reira e rave rahi o ta ˈna mau pǐpǐ e te nahoa no Iudea atoa, no Ierusalema e no te pae miti o Turia e Sidona, tei haere mai e faaroo ia ˈna e ia ora to ratou mau maˈi. 18 Ua ora atoa mai te feia tei haamauiuihia e te varua viivii. 19 Imi atura te taata atoa i te tapea ia Iesu, no te mea e mana no roto mai ia ˈna te haere i rapae,+ a ora ˈtu ai to ratou maˈi.

20 Hiˈo atura Iesu i ta ˈna mau pǐpǐ e na ô atura:

“E oaoa outou te feia veve, no outou hoi te Faatereraa arii a* te Atua.+

21 “E oaoa outou e poia nei, e paia hoi outou.+

“E oaoa outou e taˈi nei, e ata hoi outou.+

22 “E oaoa outou ia hae te taata ia outou,+ ia tiavaru ia outou,+ ia faahapa ia outou e ia faaino i to outou iˈoa no te Tamaiti a te taata nei. 23 I na reira na hoi to ratou mau tupuna i te mau peropheta. A oaoa i taua mahana ra e ia oaoa roa outou, inaha, e haamaitairaa rahi hoi ta outou i te raˈi.+

24 “Ua ati râ outou te feia taoˈa rahi,+ ta outou hoi e fanaˈo nei, tera noa ïa te noaa ia outou.+

25 “Ua ati outou tei paia, e poia hoi outou.

“Ua ati outou e ata nei, e oto e e taˈi hoi outou.+

26 “Ua ati outou ia arue te taata ia outou,+ ua na reira hoi to ratou mau tupuna i te mau peropheta haavare.

27 “Tera râ, te parau atu nei au ia outou e faaroo nei: A here noa i to outou mau enemi, a hamani maitai noa i te feia e hae ra ia outou,+ 28 a haamaitai noa i tei faaino mai ia outou, a pure noa no tei parau ino mai ia outou.+ 29 I te taata e poara mai i to oe papariˈa, a fariu atu i te tahi atu papariˈa. E i te taata e rave i to oe ahu tapoˈi, a horoa atoa ˈtu i te tahi atu ahu.+ 30 A horoa i ta te taata atoa e ani mai.+ E i te taata e rave i ta oe ra, eiaha e ani ia faahoˈi mai.

31 “Oia atoa, ta outou e hinaaro ia rave te taata no outou, a na reira atoa ˈtu ïa.+

32 “Mai te peu o te feia anaˈe e here mai ia outou ta outou e here atu, eaha ïa te apî? Te here atoa nei hoi te feia rave hara i tei here mai ia ratou.+ 33 E ia hamani maitai outou i tei hamani maitai mai, eaha ïa te apî? Te na reira atoa nei te feia rave hara. 34 Ia horoa tarahu* atoa outou i te tahi mea ma te manaˈo e e faahoˈihia mai, eaha ïa te apî?+ Te horoa tarahu atoa nei te feia rave hara ma te tiaturi e e faahoˈi-pauroa-hia mai. 35 Area to outou mau enemi, a here noa ia ratou, a hamani maitai e a horoa tarahu ma te ore e tiai ia faahoˈihia mai.+ E haamaitairaa rahi ïa ta outou e e riro outou ei tamarii na Tei Teitei Roa ˈˈe, mea hamani maitai hoi oia i te feia mauruuru ore e te ino.+ 36 A aroha hamani maitai noa, mai to outou Metua aroha hamani maitai.+

37 “A faaea atoa i te haava, e ore roa ïa outou e haavahia,+ e a faaea i te faahapa, e ore roa ïa outou e faahapahia. A faaore noa i ta vetahi ê hara, e faaorehia ïa ta outou.+ 38 A tamau i te horoa, e horoa atoa mai ïa te taata.+ E ninii ratou i roto i to outou ahu e ia rahi roa, ia pue maitai, ia ueuehia e purehu noa ˈtu i rapae. Tei te huru hoi o ta outou faitoraa e faito-atoa-hia ˈi ta outou.”

39 Horoa atoa ˈtura oia i te hoê faahohoˈaraa: “E nehenehe anei te hoê matapo e aratai i te tahi atu matapo? E ore anei raua e topa i roto i te apoo?+ 40 Aita te hoê piahi* i hau aˈe i ta ˈna orometua, te taata râ e haapii-maitai-hia ra, e riro ïa mai ta ˈna orometua. 41 Eaha ïa oe e hiˈo ai i te raau huˈa roa i roto i te mata o to taeae, aita râ oe e tâuˈa ra i te pou i roto i to oe iho mata?+ 42 E nafea oe e nehenehe ai e parau i to oe taeae: ‘Taeae, vaiiho na ia ˈu ia iriti i te raau huˈa roa i roto i to oe mata,’ e aita hoi oe e ite ra i te pou i roto i to oe iho mata? Haavarevare! A iriti na mua i te pou i roto i to oe iho mata, e ite maitai ïa oe ia iriti i te raau huˈa roa i roto i te mata o to oe taeae.

43 “Aita hoi e tumu raau maitai e faahotu mai i te maa ino, aita atoa e tumu raau ino e faahotu mai i te maa maitai.+ 44 Na te maa hoi e faaite eaha tera e tera tumu raau.+ Eita e pofaihia te suke aore ra e tâpûhia te vine i nia i te raau taratara. 45 E parau te hoê taata maitai i te mea maitai, no te mea ua î to ˈna aau i te mea maitai. Te taata ino râ, e parau ïa i te mea ino, no te mea ua î to ˈna aau i te mea ino. E parau hoi te vaha i te mea e vai ra i roto i te aau.+

46 “Eaha ïa outou e parau mai ai ia ˈu, e te Fatu, e te Fatu, e aita hoi outou e haapao ra i ta ˈu mau parau?+ 47 Te taata e haere mai ia ˈu nei e faaroo i ta ˈu mau parau, a haapao atu ai, e faaite atu ïa vau e e au o ˈna ia vai:+ 48 E au oia i te hoê taata o te hinaaro e faatia i te hoê fare. E ô oia i te hoê apoo hohonu e tae roa ˈtu i te pǎpǎ, a haamau atu ai i te niu i reira. I te ûa-rahi-raa mai, tairi maira te pape pue i nia i taua fare ra, aita râ te fare i aueue, no te mea ua faatia-maitai-hia.+ 49 Te taata râ o te faaroo mai ma te ore e haapao,+ e au ïa i te hoê taata tei faatia i te hoê fare i nia i te repo e aita e niu. I te tairiraa mai te pape pue, marua ihora te fare e parari roa ˈtura.”

7 I te otiraa ta ˈna paraparauraa i te taata, tomo ihora Iesu i Kaperenaumi. 2 E tavini ta te tahi raatira faehau e mea au na ˈna ia ˈna, e maˈi rahi râ to ˈna e ua fatata i te pohe.+ 3 I to te raatira faehau faarooraa no nia ia Iesu, tono ihora oia i te tahi mau aratai ati Iuda e ani ia Iesu ia haere mai e faaora i te maˈi o ta ˈna tavini. 4 Haere maira ratou ia Iesu ra e taparuparu maira ia ˈna: “Mea tano ia farii oe i ta ˈna aniraa, 5 mea au hoi na ˈna to tatou nunaa e na ˈna i hamani i ta matou sunago.” 6 Haere atura ïa Iesu e ratou atoa. Te piri atu ra râ oia i te fare i tono mai ai te raatira faehau i te mau hoa e parau ia Iesu: “E te Fatu, eiaha e faaohipa rahi ia oe, eita hoi e tano ia ˈu ia farii ia oe i to ˈu fare.+ 7 No reira vau i ore ai i haere atu ia oe ra. A parau noa râ i te tahi parau, e ia ora te maˈi o ta ˈu tavini. 8 E taata hoi te faatere mai ia ˈu, e faehau atoa ta ˈu o te auraro mai ia ˈu, e ia parau vau i teie faehau: ‘A haere!’ e haere oia, i te tahi atu: ‘A haere mai!’ e haere mai oia, e i ta ˈu tavini: ‘A na ô!’ e na ô oia.” 9 I to Iesu faarooraa i teie mau parau, maere ihora oia i taua raatira faehau ra, fariu atura oia i te nahoa tei pee mai ia ˈna e na ô atura: “E parau atu vau: Aita vau i ite aˈenei i te faaroo rahi mai teie i Iseraela.”+ 10 I to te feia i tonohia hoˈiraa ˈtu i te fare, ite aˈera ratou e ua ora te maˈi o te tavini.+

11 I muri iti aˈe, reva ˈtura Iesu i te hoê oire o Naina te iˈoa, ua pee atoa mai ta ˈna mau pǐpǐ e te hoê nahoa rahi. 12 A piri atu ai oia i te uputa o te oire, inaha te amohia mai ra te hoê taata pohe, o ˈna anaˈe te tamaiti* a te hoê vahine ivi.+ E rave rahi to te oire i pihai iho i taua vahine ra. 13 Ite atura te Fatu ia ˈna, aroha ihora ia ˈna+ e na ô atura: “Eiaha e taˈi faahou.”+ 14 Tapiri atura Iesu, tapea ˈtura i te roˈi e tia noa ihora te feia amo. Na ô atura oia: “Taurearea, te parau atu nei au ia oe: A tia mai!”+ 15 Tia maira taua taata pohe ra, paraparau ihora e tuu atura Iesu ia ˈna i to ˈna metua vahine.+ 16 Mǎtaˈu ihora ratou pauroa e faahanahana ˈtura i te Atua a na ô ai: “Ua tia mai te hoê peropheta rahi i rotopu ia tatou,”+ e “Ua haamanaˈo mai te Atua i to ˈna nunaa.”+ 17 Atutu atura teie parau apî no nia ia Iesu e ati aˈe Iudea e te mau vahi tapiri atoa.

18 E teie nei, faatia aˈera te mau pǐpǐ a Ioane ia ˈna i teie mau mea atoa.+ 19 Titau ihora Ioane e piti o ta ˈna mau pǐpǐ e tono atura ia raua e ui i te Fatu: “O oe anei ta matou i tiai noa na,+ aore ra e taata ê te tae mai?” 20 Haere atura raua ia Iesu ra e na ô atura: “Ua tono mai Ioane Bapetizo ia mâua e ui ia oe: ‘O oe anei ta matou i tiai noa na, aore ra e taata ê te tae mai?’” 21 I taua taime ra, ua faaora oia e rave rau maˈi+ e te matapo e rave rahi ia ite faahou ratou. E ua tiavaru atoa oia i te mau varua ino. 22 Pahono maira Iesu ia raua: “A haere e faatia ia Ioane i ta orua i ite e i faaroo: Te ite faahou nei te matapo,+ te haere nei te pirioi, te faaorahia nei te lepera, te faaroo nei te tariˈa turi,+ te faatia-faahou-hia nei tei pohe e te faaitehia nei te parau apî oaoa i te feia veve.+ 23 E oaoa te taata e tiaturi mau nei ia ˈu.”+

24 I te revaraa na pǐpǐ a Ioane, parau ihora Iesu i te nahoa no nia ia Ioane: “Eaha ta outou i haere e hiˈo i te medebara? Te hoê aeho e taueue ra i te mataˈi?+ 25 O vai ïa ta outou i haere e hiˈo? Te hoê taata e ahu unauna* to ˈna?+ Te feia e ahu unauna e e oraraa fanaˈo to ratou, to roto ïa i te aorai o te mau arii. 26 O vai ïa ta outou i haere e hiˈo i te medebara? Te hoê peropheta? Oia mau, te parau atu nei au, e rahi aˈe oia i te hoê peropheta.+ 27 No ˈna i papaihia ˈi: ‘Inaha, te tono nei au i ta ˈu vea na mua ia oe,* na ˈna e faaineine i te eˈa no oe.’+ 28 Te parau atu nei au, i rotopu i te taata atoa,* aita hoê i rahi aˈe ia Ioane, area tei haihai aˈe i roto i te Faatereraa arii a* te Atua, mea rahi aˈe ïa ia ˈna.”+ 29 (I to te taata atoa e te feia titau tute faarooraa i teie parau, farii aˈera ratou e parau-tia ta te Atua, i bapetizohia na hoi ratou e Ioane.+ 30 Area te mau Pharisea e te feia mea ite i te Ture, ua haafaufaa ore ïa i ta te Atua opuaraa* no ratou,+ aita hoi ratou i bapetizohia e Ioane.)

31 Na ô faahou atura Iesu: “E faaau ïa vau i te mau taata o teie nei uˈi ia vai, e au hoi ratou ia vai?+ 32 E au ratou i te mau tamarii e parahi ra na te mahora e e pii ra i te tahi atu mau tamarii, a na ô ai: ‘Ua faataˈi matou i te vivo no outou, aita râ outou i ori. Ua himene matou ma te oto, aita râ outou i taˈi.’ 33 Oia atoa, ua haere mai Ioane Bapetizo e aita oia i amu i te faraoa e aita i inu i te uaina,+ ua parau râ outou: ‘E demoni to ˈna.’ 34 Ua haere mai te Tamaiti a te taata nei e ua tamaa e ua inu, ua parau râ outou: ‘Inaha, mea tamaa roa teie taata ma te haapuupuu, mea inu i te uaina, e hoa no te mau titau tute e te feia rave hara!’+ 35 Na te mau ohipa parau-tia ta te hoê taata e rave* e haapapu e e taata paari oia.”+

36 Ani maira râ te hoê Pharisea ia Iesu ia tamaa i ǒ ˈna. Tomo ihora ïa Iesu i roto i te fare o taua Pharisea ra e tarava ihora i te amuraa maa. 37 E inaha, haere maira te hoê vahine, matauhia na te oire ei vahine rave hara. I faaroo na oia e te tamaa ra Iesu* i te fare o te Pharisea. E mohina alabata ta ˈna e monoˈi noˈanoˈa to roto.+ 38 Tuturi ihora oia i te pae avae o Iesu, taˈi atura, rari aˈera to Iesu avae i to ˈna roimata ta ˈna i tamǎrô i to ˈna rouru. Apa atoa ˈtura oia i to Iesu avae ta ˈna i ninii i te monoˈi noˈanoˈa i nia iho. 39 I to te Pharisea, tei titau manihini ia Iesu, iteraa i te reira, feruri ihora oia: “Ahiri e peropheta teie taata, e ite ïa o ˈna o vai e eaha teie vahine e tapea nei i to ˈna avae, e vahine rave hara.”+ 40 Pahono atura râ Iesu ia ˈna: “Simona, e parau ta ˈu ia oe.” Na ô maira Simona: “A parau mai Orometua!”

41 “E piti taata tei tarahu i te moni i te tahi atu taata, e 500 denari* tarahu ta te tahi, e 50 ta te tahi atu. 42 No te mea râ e aita ta raua e moni no te faahoˈi, faaore noa maira taua taata ra i ta raua tarahu. O vai ïa o raua te here atu â ia ˈna?” 43 Pahono maira Simona: “I to ˈu manaˈo, o te taata ïa mea rahi aˈe ta ˈna tarahu.” Na ô atura Iesu: “Mea tano to manaˈo.” 44 Hiˈo atura oia i te vahine e na ô atura ia Simona: “Te ite ra oe i teie vahine? Ua tomo vau i roto i to oe fare, aita râ oe i horoa mai i te pape no to ˈu avae. Teie râ vahine, ua horoi ïa i to ˈu avae i to ˈna roimata e ua tamǎrô i to ˈna rouru. 45 Aita oe i apa mai ia ˈu, teie râ vahine, aita ïa i faaea i te apa i to ˈu avae mai to ˈu iho â tomoraa mai. 46 Aita oe i ninii i te monoˈi i nia i to ˈu upoo, teie râ vahine, ua ninii ïa i te monoˈi noˈanoˈa i nia iho i to ˈu avae. 47 Teie ïa ta ˈu e parau atu, noa ˈtu te rahi o te hara a teie vahine, ua faaorehia ïa.+ E faaite atu â ïa oia i te here. Te taata râ mea iti ta ˈna hara i faaorehia, mea iti atoa ïa te here ta ˈna e faaite.” 48 Na ô atura Iesu i taua vahine ra: “Ua faaorehia ta oe mau hara.”+ 49 Na ô ihora te feia e tarava ra i te amuraa maa e o Iesu, i rotopu ia ratou: “O vai teie taata e faaore atoa ˈi oia i te hara?”+ 50 Na ô atura râ Iesu i taua vahine ra: “Ua ora oe i to oe faaroo.+ A haere, eiaha e haapeapea.”

8 I muri iti aˈe, haere atura Iesu na te mau oire e oire rii e poro e e faaite haere i te parau apî oaoa o te Faatereraa arii a* te Atua.+ Ua pee mai na 12 ia ˈna, 2 oia atoa te tahi mau vahine ta ˈna i tiavaru i te mau varua ino e i faaora i te maˈi: o Maria piihia Magadala, e hitu demoni tei haere i rapae no roto mai ia ˈna, 3 o Ioana+ te vahine faaipoipo a Huza, tiaau a Heroda, o Susana e e rave rahi atu â vahine. Ua aupuru ratou ia Iesu e te mau aposetolo i ta ratou mau faufaa.+

4 Putuputu maira râ te hoê nahoa rahi e te feia no te mau oire mai o tei apee ia ˈna, e faahiti atura oia i te hoê faahohoˈaraa:+ 5 “Ua haere te hoê taata ueue e ueue i ta ˈna huero. A ueue ai oia, topa ihora te tahi mau huero na te hiti purumu, taataahihia ihora e te taata e amuhia ˈtura e te mau manu o te raˈi.+ 6 Topa ihora te tahi atu mau huero i nia i te pǎpǎ, tupu aˈera e mǎrô ihora no te pape ore.+ 7 Topa ihora te tahi atu i roto i te mau raau taratara, e tapoˈi aˈera te mau raau taratara tei tupu atoa mai i te mau huero.+ 8 Topa ihora râ te tahi atu i nia i te repo maitai, tupu aˈera e hotu tataihanere maira ta te hoê.”+ E na ô atura oia ma te reo puai: “Te taata e tariˈa to ˈna no te faaroo, ia faaroo ïa.”+

9 Ani maira râ te mau pǐpǐ ia Iesu i te auraa o teie faahohoˈaraa.+ 10 Na ô atura Iesu: “Ua horoahia ia outou te taaraa i te mau parau huna moˈa o te Faatereraa arii a te Atua, no te tahi atu râ, e faahiti ïa vau i te mau faahohoˈaraa.+ Hiˈo noa ˈi ratou, aita ratou e ite ra, horoa noa ˈi ratou i te tariˈa faaroo, aita ratou e taa ra i te auraa.+ 11 Teie te auraa o te faahohoˈaraa: Te huero, o te poroi ïa a te Atua.+ 12 Te hiti purumu i ueuehia ˈi te huero, o te feia ïa tei faaroo. Haere maira te Diabolo e hutihuti ihora i te poroi i roto i to ratou aau, ia ore hoi ratou e tiaturi a ora ˈtu ai.+ 13 Te pǎpǎ i ueuehia ˈi te huero, o te feia ïa e faaroo e e farii i te poroi ma te oaoa. No te mea râ aita te reira i aˈa, tiaturi ihora ratou maa taime. I te tupuraa mai râ te fifi, aita ˈtura i tiaturi faahou.+ 14 Te mau raau taratara i topa ˈi te huero, o te feia ïa tei faaroo. A manaˈonaˈo ai râ i te mau haapeapearaa, te mau taoˈa+ e te mau mea navenave o teie oraraa,+ poˈi roa ˈtura ratou e aita ˈtura i hotu maitai mai.+ 15 Te repo maitai i ueuehia ˈi te huero, o te feia ïa tei faaroo i te poroi ma te aau maitai roa,+ tei tapea maite i te reira e tei hotu mai a faaoromai tamau ai i te fifi.+

16 “Aita e taata e tutui i te mori, a tapoˈi atu ai i te hoê farii aore ra a tuu atu ai i raro aˈe i te hoê roˈi. E tuu atu râ oia i nia i to ˈna vairaa, ia ite hoi te feia e tomo mai i te maramarama.+ 17 Aita hoi e mea huna eita e faaitehia, e aita e mea i tapoˈi-maitai-hia eita e haamahorahia.+ 18 No reira, a faaroo maitai ïa, te taata hoi e faufaa ta ˈna, e horoahia hau atu â e e rahi mau â ta ˈna faufaa.+ Te taata râ aita ta ˈna e faufaa, oia atoa te mea e vai ra ia ˈna ra e iriti-ê-hia.”+

19 Haere maira râ to Iesu metua vahine e to ˈna mau taeae+ e hiˈo ia ˈna, aita râ i tae atu ia ˈna ra no te rahi o te taata.+ 20 Parauhia maira ïa ia ˈna: “Te tia ra to oe metua vahine e to oe mau taeae i rapaeau, te hinaaro nei e farerei ia oe.” 21 Na ô atura oia: “To ˈu metua vahine e to ˈu mau taeae, o te feia ïa e faaroo i te poroi a te Atua e e haapao i te reira.”+

22 I te hoê mahana, ua haere Iesu e ta ˈna mau pǐpǐ i nia i te hoê poti e na ô ihora oia ia ratou: “Mai, fano anaˈe i tera ˈtu pae o te roto.” Fano atura ratou.+ 23 A tere noa ˈi râ ratou, varea ihora Iesu i te taoto. Farara maira te mataˈi puai, î aˈera to ratou poti i te pape e fatata ˈtura i te tomo.+ 24 Tapiri maira ïa te mau pǐpǐ ia Iesu e faaara maira ia ˈna, a na ô ai: “Orometua, Orometua, e pohe tatou!” Tia aˈera Iesu, tamaˈi ihora i te mataˈi e te miti, faaea aˈera te mataˈi e mania ˈtura.+ 25 Na ô atura oia: “Teihea ˈtura to outou faaroo?” Mǎtaˈu e maere ihora ratou e na ô aˈera te tahi i te tahi: “O vai hoi teie taata? E faaroo hoi te mataˈi e te miti i ta ˈna parau.”+

26 Tapae atura ratou i te tuhaa fenua o Geregasa,+ o Galilea to tera ˈtu pae. 27 A pou atu ai Iesu i tatahi, haere maira te tahi taata no taua oire ra ia ˈna. Ua uruhia oia e te mau demoni. Mea maoro aita oia i oomo i te ahu, e tei te menema*+ to ˈna faaearaa eiaha râ i te fare. 28 Ite maira oia ia Iesu, tuô ihora, tuturi ihora i mua ia ˈna, e na ô atura ma te reo puai: “Eaha ta oe ohipa i ǒ nei, Iesu te Tamaiti a te Atua Teitei Roa ˈˈe? Te taparu atu nei au ia oe eiaha e haamauiui ia ˈu.”+ 29 (I faaue na hoi Iesu i te varua viivii ia haere i rapae i taua taata ra. E rave rahi taime to ratou haruraa ia ˈna.*+ E pinepine oia i te taamuhia i te fifi e te auri e i te tiaihia, e mutu râ ia ˈna te reira, a aratohia ˈi oia e te demoni na te mau vahi taata ore.) 30 Ui ihora Iesu ia ˈna: “O vai to oe iˈoa?” Pahono maira oia: “O Nuu,” mea rahi hoi te demoni i roto ia ˈna. 31 Taparu aˈera ratou ia ˈna eiaha e faaue ia ratou ia haere i roto i te abuso.+ 32 E nǎnǎ rahi puaa râ+ te amu haere ra i te maa na nia i te mouˈa, taparu aˈera te mau demoni ia Iesu ia vaiiho ia ratou ia tomo i roto i te mau puaa, e faatia ihora oia.+ 33 Haere maira te mau demoni i rapae i taua taata ra e tomo aˈera i roto i te mau puaa, horo atura te nǎnǎ, topa ˈtura i roto i te miti na nia mai i te mato* e paremo aˈera. 34 A ite ai râ te mau tiai puaa i te ohipa i tupu, horo ê atura ratou e faaite i te reira na te oire e na te mataeinaa.

35 Haere maira te taata e hiˈo i tei tupu. Haere maira ratou ia Iesu e ite aˈera i te taata tei tiavaruhia te mau demoni i rapae, te parahi ra oia i te pae avae o Iesu. E ahu to ˈna e ua afaro to ˈna feruriraa. Mǎtaˈu ihora ratou. 36 Faatia ˈtura te feia tei ite mata i te reira mea nafea te taata tei uruhia na e te demoni i te faaoraraahia. 37 No to ratou mǎtaˈu rahi, ani aˈera te nahoa o te fenua o Geregasa ia Iesu ia faarue i to ratou vahi. Haere atura Iesu i nia i te poti e ua ineine i te reva. 38 Taparu maira râ taua taata ra ia Iesu ia faatia ia pee oia ia ˈna. Aita râ Iesu i farii e na ǒ atura:+ 39 “A hoˈi i to oe fare e a faatia i te taata atoa i ta te Atua i rave no oe.” Reva ˈtura ïa oia e faaite haere i te taata o te oire taatoa i ta Iesu i rave no ˈna.

40 I to Iesu tapaeraa ˈtu, farii maitai maira te nahoa ia ˈna, te tiai ra hoi ratou paatoa ia ˈna.+ 41 E inaha, haere maira te hoê taata o Iaeiro te iˈoa, e aratai o te sunago. Tipapa ihora oia i mua ia Iesu a taparu atu ai ia ˈna ia tomo mai i roto i to ˈna fare,+ 42 no te mea ua fatata ta ˈna tamahine otahi,* tei piri i te 12 matahiti, i te pohe.

A haere ai Iesu, piri roa maira te nahoa ia ˈna. 43 Te vai ra te hoê vahine, a 12 matahiti to ˈna tapahi-noa-raa,+ e aita roa e taata i nehenehe e rapaau ia ˈna.+ 44 Haere maira oia i muri ia Iesu, tapea maira i to ˈna hiti ahu,+ e mau ihora to ˈna tapahi. 45 Parau aˈera Iesu: “Na vai i tapea ia ˈu?” I te mea e aita i itehia, na ô atura Petero: “Orometua, te haaati nei te taata ia oe e ua piri roa mai ratou.”+ 46 Parau maira râ Iesu: “E taata tei tapea ia ˈu, ua ite hoi au e e mana+ tei haere i rapae ia ˈu.” 47 Taa ˈtura i tera vahine e ua ite Iesu i tei tupu, tuturi ihora oia i mua ia Iesu ma te rûrû, e faaite atura i mua i te taata atoa no te aha oia i tapea ˈi ia ˈna e mea nafea to ˈna maˈi i ora ˈi i reira iho. 48 Parau maira râ Iesu ia ˈna: “Ta ˈu tamahine, no to oe faaroo i ora ˈi oe. A haere, eiaha oe e haapeapea.”+

49 A paraparau noa ˈi Iesu, haere maira te hoê taata o te fare o te tavana o te sunago e na ô maira: “Ua pohe ta oe tamahine. Eiaha e haapeapea faahou i te Orometua.”+ 50 I to Iesu faarooraa i teie parau, na ô ihora oia ia Iaeiro: “Eiaha oe e mǎtaˈu, a tiaturi noa mai, e ora ïa oia.”+ 51 I to ˈna taeraa ˈtu i te fare, o Petero, Ioane, Iakobo e na metua o te tamahine anaˈe ta ˈna i faatia ia tomo atu na muri ia ˈna. 52 Te taˈi ra râ te taata atoa e te tupaipai ra i to ratou ouma no te oto. Na ô ihora Iesu: “A faaea i te taˈi,+ aita hoi oia i pohe, te taoto nei râ.”+ 53 Ata faaooo aˈera ratou ia ˈna, no te mea ua ite ratou e ua pohe oia. 54 Rave ihora râ Iesu i te rima o te tamahine e na ô atura ma te reo puai: “Tamahine, a tia mai!”+ 55 Hoˈi maira te potii i te ora,*+ tia maira i reira iho+ e faaue atura Iesu ia horoa i te maa na ˈna. 56 Oaoa roa ihora na metua o te potii, faaue ihora râ Iesu ia raua eiaha e faaite i te ohipa i tupu.+

9 Titau atura Iesu i na 12 e horoa ˈtura ia ratou i te puai e te mana ia tiavaru pauroa te demoni+ e ia faaora i te mau maˈi.+ 2 Tono atura oia ia ratou e poro i te Faatereraa arii a* te Atua e e faaora i te maˈi, 3 e na ô atura: “No teie tere, eiaha e rave i te tahi mea: e turutootoo, e pute maa, e faraoa, e moni.* Eiaha atoa e piti ahu.+ 4 I te mau vahi atoa râ e tomo ai outou i roto i te hoê fare, a faaea i reira e reva noa ˈtu outou.+ 5 E i te mau vahi atoa e ore ai te taata e farii ia outou, a haere mai i rapaeau i taua oire ra, e a tûtû i te repo o to outou avae ei faaararaa ia ratou.”+ 6 Haere atura ratou na te mau oire rii atoa e faaite haere i te parau apî oaoa e e faaora i te maˈi.+

7 Faarooroo ihora râ Heroda* te tavana* i te ohipa e tupu ra, e horuhoru ihora no ta vetahi parau e ua tia faahou mai Ioane mai te pohe mai,+ 8 ta te tahi atu râ, o Elia tei fa mai e ta te tahi atu, e peropheta no tahito tei tia faahou mai.+ 9 Na ô ihora Heroda: “Ua tâpûhia te upoo o Ioane,+ na ˈu hoi i faaue. O vai ïa teie taata e paraparauhia nei?” Hinaaro roa ihora oia e ite i taua taata ra.+

10 I te hoˈiraa mai te mau aposetolo, faatia maira ratou ia Iesu i tei ravehia e ratou.+ Rave atura Iesu ia ratou e reva ˈtura o ratou anaˈe i te hoê oire o Betesaida te iˈoa.+ 11 Ite aˈera râ te nahoa e pee maira ia ˈna. Farii maitai maira Iesu ia ratou, faaite atura i te parau o te Faatereraa arii a te Atua, e faaora ˈtura i te feia maˈi.+ 12 Ahiahi ihora, haere maira na 12 e na ô maira ia Iesu: “A tuu na i te nahoa ia haere na te mataeinaa e na te mau oire rii tapiri e imi i te nohoraa e e hoo mai i te maa, no te mea e vahi moˈemoˈe teie.”+ 13 Na ô atura râ oia: “Na outou e horoa i te maa na ratou.”+ Pahono maira ratou: “E pae anaˈe faraoa e e piti iˈa ta matou, e haere anei ïa matou e hoo mai i te maa na teie mau taata atoa?” 14 Piri i te 5 000 tane i reira. Na ô atura râ Iesu i ta ˈna mau pǐpǐ: “A haaparahi ia ratou e 50 taata i te pǔpǔ hoê.” 15 Na reira ˈtura ratou e parahi ihora te taata atoa. 16 Rave ihora Iesu i na faraoa e pae e na iˈa e piti, hiˈo aˈera i nia i te raˈi, haamaitai ihora i te Atua no tera maa, ofati ihora i na faraoa e horoa ˈtura i te faraoa e te iˈa i te mau pǐpǐ o tei opere na te nahoa. 17 Tamaa aˈera ratou pauroa e paia ˈtura. E haaputuhia ˈtura te toea maa i roto 12 farii.+

18 I te tahi atu mahana, a pure noa ˈi Iesu o ˈna anaˈe, haere maira te mau pǐpǐ ia ˈna ra e ui atura Iesu ia ratou: “O vai au i ta te nahoa parauraa?”+ 19 Pahono maira ratou: “O Ioane Bapetizo, o Elia râ ta te tahi pae, e ta te tahi atu, hoê ïa o te mau peropheta i tahito ra tei tia faahou mai.”+ 20 Na ô atura oia: “E outou, o vai au i ta outou parauraa?” Pahono maira Petero: “O te Mesia a te Atua.”+ 21 Faaue maitai ihora oia ia ratou eiaha e faaite i te reira i te taata,+ 22 na ô atura râ oia: “Ia roohia te Tamaiti a te taata nei i te mauiui rahi e tia ˈi, ia vahavahahia oia e te mau aratai ati Iuda, te mau tahuˈa tiaau e te mau papai parau, ia haapohehia+ e ia faatiahia mai i te toru o te mahana.”+

23 Na ô atura oia i te taata atoa: “Te taata e hinaaro e pee mai ia ˈu, ia haapae ïa ia ˈna iho+ e ia rave i ta ˈna pou haamauiuiraa* i te mau mahana atoa, a pee noa mai ai ia ˈu.+ 24 O tei faaherehere hoi i to ˈna ora,* e ere ïa oia i te reira. O tei ere râ i to ˈna ora* no ˈu, e noaa faahou mai ïa ia ˈna te reira.+ 25 Eaha hoi te apî ia noaa i te hoê taata te ao taatoa, a faaino atu ai râ oia ia ˈna iho aore ra a ere ai oia i to ˈna ora?+ 26 Te taata hoi o te haama ia ˈu e i ta ˈu mau parau, e haama atoa ïa te Tamaiti a te taata nei ia ˈna ia haere mai oia ma to ˈna hanahana e to te Metua e to te mau melahi moˈa.+ 27 Oia mau râ ta ˈu e parau atu: Te vai ra vetahi o te feia i ǒ nei o te ore e pohe hou a ite ai na mua i te Faatereraa arii a te Atua.”+

28 Piri i te vaˈu mahana i muri aˈe i to ˈna faahitiraa i teie mau parau, rave ihora Iesu ia Petero, Ioane e Iakobo e pauma aˈera i nia i te mouˈa e pure.+ 29 A pure noa ˈi Iesu, taui ihora te huru o to ˈna hohoˈa mata e uouo aˈera to ˈna ahu e anaana roa ˈtura. 30 E inaha, e piti taata te paraparau ra e o ˈna, o Mose raua Elia. 31 Ma te hanahana i fa mai ai raua e paraparau atura e nafea Iesu e faarue mai ai i teie nei ao, o te fatata hoi i te tupu i Ierusalema.+ 32 E varea taoto rahi to Petero, Ioane e Iakobo, ia ratou râ i ara roa mai, ite aˈera ratou i to Iesu hanahana+ e na taata e piti i pihai iho ia ˈna. 33 A fatata ˈi na taata i te vaiiho mai ia Iesu, na ô atura Petero ia Iesu: “Orometua, mea fanaˈo matou i te tiaraa mai i ǒ nei. Vaiiho na ia matou ia faatia e toru fare ie, hoê no oe, hoê no Mose e hoê no Elia.” Aita e taa ra ia ˈna ta ˈna e parau ra. 34 A paraparau noa ˈi râ Petero, fa maira te hoê ata e tapoˈi maira ia ratou. A poˈi ai râ ratou i te ata, mǎtaˈu ihora ratou. 35 Faaroohia ˈtura te hoê reo+ no roto mai i taua ata ra e na ô ra: “O ta ˈu Tamaiti teie, o ˈna tei maitihia e au.+ A faaroo ia ˈna.”+ 36 A faaroohia ˈi taua reo ra, ite ihora ratou ia Iesu anaˈe. Mamû noa ihora râ ratou, e i taua mau mahana ra aita ratou i faatia haere i ta ratou i ite.+

37 I te mahana i muri iho, a pou mai ai ratou na nia mai i te mouˈa, haere maira te hoê nahoa rahi ia Iesu ra.+ 38 E inaha, tuô maira te hoê taata o taua nahoa ra a na ô ai: “Orometua, te ani atu nei au ia oe ia tauturu* i ta ˈu tamaiti, o ˈna anaˈe hoi ta ˈu tamarii.+ 39 E inaha, e haru te hoê varua ino ia ˈna, o te tuô taue hoi, a iriti atu ai e a tahe noa ˈi te haae. I muri aˈe atoa i te haamauiuiraa ˈtu, eita te varua ino e faarue hanoa ia ˈna. 40 Ua ani au i ta oe mau pǐpǐ ia tiavaru i taua varua ra, aita râ i haere ia ratou.” 41 Na ô atura Iesu: “Auê ïa uˈi ino aita e faaroo,+ ehia â maororaa e parahi ai au ia outou nei, e faaoromai ai au ia outou? Afai mai i ta oe tamaiti i ǒ nei.”+ 42 A tapiri atu ai râ Iesu, taora ihora te demoni i te tamaroa i raro e rave atura e ia iriti roa oia. Tamaˈi ihora râ Iesu i te varua viivii, faaora ˈtura i te tamaroa e tuu atura ia ˈna i to ˈna metua tane ra. 43 Maere ihora ratou pauroa i te mana rahi o te Atua.

A maere ai ratou pauroa i te mau mea atoa ta Iesu e rave ra, na ô atura oia i ta ˈna mau pǐpǐ: 44 “A faaroo maitai e a haamanaˈo i teie mau parau: E tuuhia te Tamaiti a te taata nei i te rima o to ˈna mau enemi.”+ 45 Aita râ i taa ia ratou ta ˈna e parau ra. Ua hunahia hoi te reira ia ratou ia ore ratou e maramarama, e ua taiâ ratou i te uiui ia ˈna eaha te auraa o teie parau.

46 Mârô aˈera te tahi i te tahi o vai o ratou tei rahi aˈe.+ 47 Ua ite râ Iesu i te manaˈo o to ratou aau, rave maira oia i te hoê tamarii, tuu ihora i pihai iho ia ˈna, 48 e na ô atura: “Te taata o te farii i teie tamarii no to ˈu nei iˈoa, e farii atoa ïa ia ˈu. E te taata e farii ia ˈu, e farii atoa ïa i tei tono mai ia ˈu.+ Te taata hoi o te faahaehaa ia ˈna i rotopu ia outou pauroa, o ˈna ïa tei rahi.”+

49 Na ô maira Ioane: “Orometua, ua ite matou i te hoê taata i te tiavaruraa i te mau demoni ma te faaohipa i to oe iˈoa, e ua tamata matou i te tapea ia ˈna, no te mea e ere oia i te pǐpǐ na oe.”+ 50 Na ô atura râ Iesu: “Eiaha e tamata i te tapea ia ˈna, te taata hoi aita e patoi ra ia outou, te turu ra ïa ia outou.”

51 A fatata mai ai te taime* e ravehia ˈi Iesu i nia i te raˈi,+ faaoti roa ˈtura oia e haere i Ierusalema. 52 Tono ihora oia i te tahi mau vea na mua ia ˈna. Reva ˈtura ratou e tomo atura i te hoê oire iti o to Samaria no te faaineine i te mau mea no to Iesu taeraa ˈtu. 53 Aita râ to reira mau taata i farii mai ia ˈna,+ no te mea ua faaoti oia e haere i Ierusalema. 54 I to te mau pǐpǐ Iakobo raua Ioane+ iteraa i te reira, na ô maira raua: “E te Fatu, hinaaro anei oe ia faaue mâua i te auahi ia topa mai te raˈi mai ia mou ratou?”+ 55 Fariu aˈera Iesu e tamaˈi atura ia raua. 56 Haere atura Iesu e ta ˈna mau pǐpǐ i te tahi atu oire iti.

57 Te haere noa ra ratou, na ô maira te hoê taata ia Iesu: “E pee au ia oe i te vahi atoa ta oe e haere.” 58 Na ô atura râ Iesu: “E apoo to te alope e e ofaaraa to te manu o te raˈi. Te Tamaiti râ a te taata nei, aita ïa to ˈna e vahi taotoraa.”+ 59 Na ô atura oia i te tahi atu taata: “A pee mai ia ˈu.” Parau maira taua taata ra: “E te Fatu, a faatia na ia ˈu ia haere na mua e huna i to ˈu metua tane.”+ 60 Na ô atura râ Iesu: “A vaiiho na tei pohe+ e huna i tei pohe. O oe râ, a haere e faaite na te mau vahi atoa i te Faatereraa arii a te Atua.”+ 61 Na ô atoa maira te tahi atu: “E te Fatu, e pee au ia oe, na mua râ a faatia na ia ˈu ia haere e aroha i to ˈu utuafare.” 62 Na ô atura Iesu: “Te taata e tuu i to ˈna rima i nia iho i te arote, a hiˈo ai i muri,+ e ore ïa e tano ia ˈna ia ô i roto i te Faatereraa arii a te Atua.”+

10 I muri aˈe i teie mau mea, maiti ihora te Fatu e 70 pǐpǐ ê atu, e tono tataipiti atura ia ratou+ na mua ia ˈna i te mau oire e vahi atoa e haere atu ai oia. 2 Na ô atura oia ia ratou: “Te rahi mau nei te auhune, mea iti râ te rave ohipa. A taparu ïa i te Fatu o te auhune ia tono mai i te rave ohipa no te ootiraa.+ 3 A haere! Inaha, te tono nei au ia outou mai te mamoe i rotopu i te luko.+ 4 Eiaha e rave i te pute moni, te pute maa aore ra te tiaa,+ eiaha atoa e faataere i te aroha haere i te taata ta outou e farerei i te pae purumu. 5 I te mau vahi atoa e tomo ai outou i roto i te hoê fare, a parau atu na mua: ‘Ia vai te hau i roto i teie nei fare.’+ 6 Mai te peu e e taata e au i te hau to reira, tei nia ïa to outou hau ia ˈna. Aita anaˈe râ, e hoˈi mai ïa to outou hau ia outou ra. 7 A faaea ïa i taua fare ra,+ a amu e a inu i tei horoahia mai,+ e mea tano hoi ia aufauhia te rave ohipa no ta ˈna i rave.+ Eiaha e haere hanoa i tera e tera fare.

8 “Ia tomo atoa outou i roto i te hoê oire e ia fariihia mai outou, a amu i ta ratou e tuu mai i mua ia outou, 9 a faaora i te maˈi o to reira mau taata e a parau atu: ‘Ua fatata mai te Faatereraa arii a* te Atua.’+ 10 Ia ore râ outou e fariihia i roto i te hoê oire, a haere na te mau aroâ e parau: 11 ‘Te repo o to outou oire tei piri mai i to matou avae, te horoi nei ïa matou ei faaararaa ia outou.+ A haamanaˈo râ e ua fatata mai te Faatereraa arii a te Atua.’ 12 Te parau atu nei au e mea mâmâ aˈe te utua a Sodoma i ta taua oire ra i tera mahana.+

13 “Ua ati oe Korazina! Ua ati oe Betesaida! No te mea ahiri te mau ohipa mana tei ravehia i ǒ orua, i rave-atoa-hia na i Turia e Sidona, ua tatarahapa ê na ïa ratou, a parahi ai i roto i te rehu auahi ma te ahu oto.+ 14 Mea mâmâ aˈe ïa te utua a Turia e Sidona i ta outou i te haavaraa. 15 E oe Kaperenaumi, e faateiteihia anei oe i te raˈi? I te Apoo* oe e pou ai!

16 “Te taata o te faaroo ia outou, e faaroo ïa ia ˈu.+ E te taata e vahavaha ia outou, e vahavaha ïa ia ˈu atoa. E te taata o te vahavaha ia ˈu, e vahavaha atoa ïa i Tei tono mai ia ˈu.”+

17 Hoˈi maira na 70 ma te oaoa, a na ô ai: “E te Fatu, ua vî atoa te mau demoni ia matou ia faahiti matou i to oe iˈoa.”+ 18 Na ô atura oia: “Te ite ra vau ia Satani i te toparaa+ mai te raˈi mai mai te uira ra. 19 Inaha, ua horoa ˈtu vau i te mana ia taataahi outou i te ophi e te pata patia, e te mana i nia i te puai o te enemi,+ e aita roa e mea e rave ino ia outou. 20 Eiaha râ e oaoa e ua vî te mau varua ino ia outou, a oaoa râ e ua papaihia to outou iˈoa i te raˈi.”+ 21 I taua taime ra, oaoa roa ihora Iesu maoti te varua moˈa e na ô atura: “To ˈu Metua e te Fatu o te raˈi e te fenua, te arue nei au ia oe i mua i te taata no te mea ua huna maitai oe i teie mau parau i te feia paari e te maramarama+ e ua faaite atu i te feia e au i te tamarii. Oia mau e to ˈu Metua, no te mea tera ta oe i faaoti e rave.+ 22 Ua tuu mai to ˈu Metua i te mau mea atoa ia ˈu. O te Metua anaˈe tei ite o vai te Tamaiti, e o te Tamaiti anaˈe tei ite o vai te Metua e te taata atoa ta te Tamaiti+ e hinaaro e faaite atu o vai te Metua.”+

23 Paraparau atura Iesu i ta ˈna mau pǐpǐ anaˈe e na ô atura: “E oaoa te feia o te ite nei to ratou mata i ta outou e ite nei.+ 24 Te parau atu nei hoi au: Mea rahi te peropheta e te arii tei hinaaro e ite i te mau mea ta outou e hiˈo nei, aita râ i ite,+ e faaroo atoa i te mau mea ta outou e faaroo nei, aita râ i faaroo.”

25 E inaha, tia maira te hoê taata, mea ite i te Ture, no te râmâ ia Iesu e na ô maira: “Orometua, eaha ta ˈu e rave e fatu ai au i te ora mure ore?”+ 26 Na ô atura Iesu: “Eaha tei papaihia i roto i te Ture? Eaha ta oe e taio ra?” 27 Pahono maira oia: “‘Ia here oe ia Iehova* to oe Atua ma to oe aau atoa, ma to oe ora* atoa, ma to oe puai atoa e ma to oe manaˈo atoa’+ e ‘i to oe taata tupu mai ia oe iho.’”+ 28 Na ô atura Iesu: “Ua tano ta oe pahonoraa. A na reira noa, e ora ïa oe e a muri noa ˈtu.”+

29 No to ˈna râ hinaaro e faaite e e taata parau-tia oia,+ na ô maira taua taata ra ia Iesu: “O vai hoi to ˈu taata tupu?” 30 Pahono atura Iesu: “Te pou mai ra te hoê taata na Ierusalema mai i Ieriko, haru ihora te tahi feia eiâ ia ˈna, rave atura i ta ˈna mau mea atoa, rutu aˈera ia ˈna e reva ˈtura, a faarue mai ai ia ˈna ua fatata i te pohe. 31 Te pou atoa mai ra hoi te hoê tahuˈa na taua eˈa ra. I to ˈna râ iteraa ˈtu i taua taata ra, haere ihora oia na te tahi aˈe pae o te eˈa. 32 Na reira atoa ˈtura te hoê ati Levi, a pou mai ai oia na taua vahi ra e a ite ai ia ˈna. 33 Tae maira râ te tahi taata no Samaria+ i taua vahi ra, ite atura ia ˈna e aroha ihora. 34 Tapiri maira oia, ninii ihora i te monoˈi e te uaina i nia iho i to ˈna mau pepe e taamu atura. Tuu aˈera oia ia ˈna i nia iho i ta ˈna animara, afai atura i te hoê fare no te mau ratere e utuutu atura ia ˈna. 35 E ao aˈera, rave ihora oia e piti denari,* horoa ˈtura i te fatu fare e na ô atura: ‘E utuutu oe ia ˈna e ia hau atu te haamâuˈaraa, e faahoˈi atu iho â vau i ta oe ia hoˈi mai au.’ 36 I to oe manaˈo, i roto ia ratou e toru, o vai tei faariro ia ˈna ei taata tupu+ no te taata tei haruhia e te eiâ?” 37 Na ô maira oia: “O te taata ïa tei aroha e tei hamani maitai i tei eiâhia.”+ Parau atura Iesu: “A haere e a na reira atoa.”+

38 Haere atura Iesu e ta ˈna mau pǐpǐ e tomo atura i te tahi oire iti. I reira farii maira te hoê vahine o Mareta+ te iˈoa ia Iesu i to ˈna fare. 39 E tuahine atoa to teie vahine, o Maria te iˈoa, e parahi ra i te pae avae o te Fatu ra, a faaroo noa ˈi i ta ˈna e parau ra.* 40 O Mareta râ, te raverave noa ra ïa e rave rahi ohipa. Tapiri maira ïa oia ia Iesu e na ô maira: “E te Fatu, aita oe e ite ra e o vau anaˈe teie e rave nei i te ohipa? A parau na i to ˈu tuahine ia tauturu mai ia ˈu.” 41 Pahono atura te Fatu: “Mareta, Mareta, te haapeapea roa nei oe no e rave rahi mea. 42 Mea iti hoi te hinaaro-mau-hia, hoê noa paha. Ua maiti Maria i te mea faufaa,*+ e eita te reira e rave-ê-hia ia ˈna.”

11 E teie nei, te pure ra Iesu i te tahi vahi, e i te otiraa ta ˈna pure, na ô maira hoê o ta ˈna mau pǐpǐ: “E te Fatu, haapii na oe ia matou ia pure, mai ta Ioane atoa i haapii i ta ˈna mau pǐpǐ.”

2 Parau atura ïa oia: “Ia pure outou, a na ô: ‘To matou Metua, ia moˈa* to oe iˈoa.+ Ia tae mai ta oe Faatereraa arii.*+ 3 Horoa mai na i ta matou maa no te mahana tataitahi ia au i te hinaaro-mau-hia e matou i te mau mahana atoa.+ 4 Faaore mai na i ta matou mau hara,+ te faaore atoa nei hoi matou i ta vetahi ê tarahu ia matou,+ e tauturu mai na ia matou ia ore ia hema.’”+

5 Na ô faahou atura Iesu: “Ahani e hoa to te hoê o outou e haere atura oia ia ˈna ra i te tuiraa po e na ô atura: ‘To ˈu hoa, horoa mai na e toru faraoa, 6 no tae noa maira hoi hoê o to ˈu mau hoa mai to ˈna tere mai e aita ta ˈu e maa e horoa na ˈna.’ 7 Pahono maira râ te hoa na roto mai i te fare: ‘Faaea na i te haapeapea ia ˈu. Ua ponaohia te opani e tei nia vau i te roˈi e ta ˈu mau tamarii. Eita ta ˈu e nehenehe e tia, a horoa ˈtu ai i te faraoa na oe.’ 8 Te parau atu nei au: E tia mai iho â oia, a horoa ˈtu ai i ta to ˈna hoa e hinaaro, e ere no te mea e hoa no ˈna, no to ˈna râ onoono rahi.+ 9 No reira, te parau atu nei au: A tamau i te ani,+ e horoahia mai. A tamau i te imi, e itehia mai. A tamau i te patoto, e iritihia mai.+ 10 Te taata hoi e ani, e noaa mai ta ˈna.+ Te taata hoi e imi, e itehia mai e ana. Te taata e patoto, e iritihia mai. 11 O vai ïa metua e horoa ˈtu i te ophi ia ani mai ta ˈna tamaiti i te iˈa?+ 12 Aore ra e horoa ˈtu i te pata patia ia ani atoa mai ta ˈna tamaiti i te huero moa? 13 No reira, noa ˈtu e e taata ino outou, ua ite outou i te horoa i te mau mea maitatai na ta outou mau tamarii, hau atu â ïa te Metua i te raˈi i te horoa i te varua moˈa na te feia e ani atu ia ˈna!”+

14 I muri aˈe, tiavaru ihora oia i te hoê demoni i rapae i te hoê vava.+ Haere atura te demoni i rapae, paraparau ihora te vava e maere ihora te nahoa.+ 15 Parau aˈera râ vetahi o ratou: “Te tiavaru nei oia i te mau demoni i te mana o Belezebuba,* te raatira o te mau demoni.”+ 16 Ani maira râ te tahi atu ia ˈna i te hoê tapao+ no te raˈi mai no te râmâ ia ˈna. 17 Ua ite râ oia i to ratou manaˈo+ e parau atura: “Ia amahamaha te hoê faatereraa, e mou te reira e ia amahamaha te hoê utuafare, eita ïa e mau. 18 Oia atoa, ia amahamaha Satani, e nafea ïa ta ˈna faatereraa e mau ai? Te parau nei hoi outou e mea na roto ia Belezebuba e tiavaru ai au i te mau demoni. 19 Mai te peu e mea na roto ia Belezebuba e tiavaru ai au i te mau demoni, mea na roto ïa ia vai e tiavaru ai ta outou mau tamarii i te mau demoni? No reira, na ratou e faahapa ia outou. 20 Mai te peu râ e i te mana* o te Atua+ e tiavaru ai au i te mau demoni, ua roohia ïa outou e te Faatereraa arii a te Atua.+ 21 Ia tiai te hoê taata puai i to ˈna fare ma ta ˈna mau mauhaa tamaˈi, e ore ta ˈna mau taoˈa e eiâhia. 22 Ia haere mai râ te tahi atu taata puai aˈe, a vî atu ai te fatu fare ia ˈna, e rave taua taata ra pauroa te mauhaa tamaˈi ta te fatu fare i manaˈo e e paruru te reira i ta ˈna mau taoˈa, a opere atu ai i ta ˈna i haru na vetahi ê. 23 Te taata o te ore e turu mai ia ˈu, te patoi nei ïa ia ˈu, e o te ore e haaputu mai i te taata e o vau atoa nei, te haapurara nei ïa.+

24 “Ia haere mai te hoê varua viivii i rapae i te hoê taata, e haere oia na te mau vahi pape ore e imi i te faafaaearaa, eita râ e itehia mai e ana. Na ô ihora oia: ‘E hoˈi au i to ˈu fare mai reira mai au.’+ 25 Ia tae atu oia i reira, ua purumuhia te fare e ua faanehenehehia. 26 Haere ihora oia e rave maira e hitu varua ino aˈe ia ˈna, tomo aˈera ratou i roto i taua fare ra, e faaea ihora i reira. Ino roa ˈtura ïa te huru o taua taata ra i to na mua ˈˈe.”

27 A paraparau noa ˈi râ Iesu, pii maira te hoê vahine i rotopu i te nahoa a na ô ai: “Ia oaoa te vahine tei fanau mai ia oe e tei faaote ia oe!”+ 28 Na ô atura râ oia: “Mea oaoa aˈe te feia e faaroo e e haapao i te parau a te Atua!”+

29 A putuputu mai ai te nahoa, na ô atura oia: “E uˈi ino teie o te imi nei i te hoê tapao, o te tapao a Iona anaˈe râ te horoahia ˈtu.+ 30 I riro na hoi Iona+ ei tapao no to Nineve, e riro atoa ïa te Tamaiti a te taata nei ei tapao no teie nei uˈi. 31 E tia faahou mai te arii vahine no apatoa+ i te haavaraa e te feia o teie nei uˈi atoa. E faahapa oia ia ratou, mai te hopea mai hoi o te fenua i haere mai ai oia e faaroo i te paari o Solomona. Inaha râ, e taata to ǒ nei tei rahi aˈe ia Solomona.+ 32 E tia faahou mai to Nineve i te haavaraa e teie nei uˈi atoa. E faahapa ratou i teie nei uˈi, no te mea ua tatarahapa ratou no ta Iona pororaa.+ Inaha râ, e taata to ǒ nei tei rahi aˈe ia Iona. 33 Ia tutui te hoê taata i te mori, e ere ïa no te huna aore ra no te tuu i raro aˈe i te hoê farii,* i nia râ i to ˈna vairaa,+ ia ite hoi te feia e tomo mai i te maramarama. 34 Te mori o te tino, o to oe ïa mata. Ia hiˈo to oe mata i te hoê noa mea,* e maramarama* atoa ïa to oe tino taatoa. Ia nounou* râ to oe mata, e poiri atoa ïa to oe tino.+ 35 A haapao maitai ïa e e ere te maramarama i roto ia oe i te poiri. 36 No reira, ia maramarama to oe tino taatoa aita roa ˈtu e poiri, e maramarama roa ïa to oe tino mai te hoê mori e turama ia oe.”

37 A parau ai Iesu i te reira, ani maira te hoê Pharisea ia ˈna ia tamaa i ǒ ˈna. Haere atura Iesu i to ˈna fare e tarava ihora i te amuraa maa. 38 Maere ihora râ te Pharisea i to ˈna iteraa e aita Iesu i horoi i to ˈna rima* hou a tamaa ˈi.+ 39 Na ô atura râ te Fatu: “Te tamâ nei outou te mau Pharisea i te rapaeau o te auˈa e o te farii maa, o roto râ, ua î ïa outou i te nounou e te ino.+ 40 Neneva ma! Na te Atua i hamani i te rapaeauraa e te rotoraa, e ere anei? 41 A horoa râ i te ô aroha hamani maitai* ma to outou aau atoa, e inaha e mâ roa outou. 42 Ua ati râ outou te mau Pharisea, no te mea te horoa nei outou i te tuhaa ahuru o te mineta, o te pegano e o te tahi atu mau raau tupu atoa no te faanoˈanoˈa i te maa,+ te haapae nei râ i te parau-tia a te Atua e te faaueraa e here ia ˈna! Ia horoa iho â outou i te tuhaa ahuru e tia ˈi, eiaha râ e haapae i te parau-tia a te Atua e te faaueraa e here ia ˈna.+ 43 Ua ati outou te mau Pharisea, no te mea mea au na outou e parahi i mua roa* i roto i te mau sunago e ia arohahia outou ma te faatura na te mahora!+ 44 Ua ati outou, no te mea e au outou i tera mau menema* eita e ite-maitai-hia,*+ a taataahi atu ai te taata na nia iho ma te ite ore!”

45 Na ô maira te hoê taata mea ite i te Ture: “Orometua, a na reira ˈi oe i te parau, o matou atoa ïa ta oe e faaino nei.” 46 Pahono atura Iesu: “Ua ati atoa outou mea ite i te Ture, no te mea te tuu nei outou i te mau hopoia teimaha i nia i te taata. Outou râ, eita ïa hoê o to outou mau manimani rima e tapea i taua mau hopoia ra!+

47 “Ua ati outou, no te mea te patu nei outou i te mau menema* no te mau peropheta, na to outou râ mau tupuna i haapohe ia ratou!+ 48 Ua ite maitai outou i tei ravehia e to outou mau tupuna, ua farii atu râ outou i te reira, na ratou hoi i haapohe i te mau peropheta,+ na outou râ e patu nei i to ratou mau menema. 49 No reira te Atua i parau atoa ˈi no to ˈna paari: ‘E tono atu vau i te mau peropheta e te mau aposetolo ia ratou ra. E haapohehia vetahi e e hamani-ino-hia te tahi atu, 50 ia hoˈi mai i nia i teie nei uˈi te toto o te mau peropheta atoa tei haamaniihia, mai te omuaraa mai â o teie nei ao,+ 51 mai ia Abela mai+ e tae roa ˈtu ia Zekaria, tei haapohehia i rotopu i te fata e te hiero.’+ Oia mau ta ˈu e parau atu: E hoˈi mai iho â to ratou toto i nia i teie nei uˈi.

52 “Outou mea ite i te Ture, ua ati outou, no te mea ua hopoi ê outou i te taviri e noaa ˈi te ite. Aita outou iho i tomo atu, e ua tapea outou i te feia i hinaaro e tomo atu!”+

53 A haere atu ai Iesu i rapae, tapiri maira te mau papai parau e te mau Pharisea ma te onoono i te uiui faahou ia ˈna 54 no te râmâ ia ˈna ia noaa hoi oia ia ratou i roto i ta ˈna mau parau.+

12 I taua taime ra, a putuputu mai ai te hoê nahoa e rave rahi tausani, a taataahi atu ai i to te tahi e te tahi avae, ua na ô Iesu i ta ˈna mau pǐpǐ: “A ara i te hopue a te mau Pharisea, oia hoi te haavarevare.+ 2 Aita râ e mea i tapoˈi-maitai-hia eita e faaitehia, e aita e mea huna eita e itehia.+ 3 No reira, te mau mea atoa ta outou e parau i roto i te poiri, e faaroohia i roto i te maramarama. E ta outou e parau i roto i te tariˈa o te hoê taata i roto i te piha, e faaitehia na nia mai i te fare. 4 Teie atoa ta ˈu e parau atu ia outou to ˈu mau hoa:+ Eiaha e mǎtaˈu i te feia e haapohe ia outou. Ia pohe hoi outou, aita ˈtu â ta ratou e nehenehe e rave i nia ia outou.+ 5 E faaite atu râ vau o vai ta outou e mǎtaˈu atu: A mǎtaˈu i Tei nehenehe e haapohe ia outou, a huri atu ai ia outou i Gehena.*+ O ˈna ïa ta outou e mǎtaˈu e tia ˈi.+ 6 E hoohia e pae manu rii no e piti moni huˈa haihai roa,* e ere anei? Aita râ hoê noa ˈˈe i moˈe i te Atua.+ 7 Area outou, ua taio-pauroa-hia te rouru o to outou upoo.+ Eiaha e mǎtaˈu. Mea faufaa aˈe outou i te manu rii e rave rahi.+

8 “Te parau atu nei au: Te taata e faaite i mua ia vetahi ê e pǐpǐ oia na ˈu,+ e faaite atoa te Tamaiti a te taata nei i mua i te mau melahi a te Atua e no ˈna taua taata ra.+ 9 Te taata râ o te haavare e aita oia i ite ia ˈu i mua ia vetahi ê, e parau atoa te Tamaiti a te taata nei e aita oia i ite ia ˈna i mua i te mau melahi a te Atua.+ 10 Te taata o te faaino i te Tamaiti a te taata nei, e faaorehia ïa ta ˈna hara, te taata râ o te faaino i te varua moˈa, e ore ïa e faaorehia ta ˈna hara.+ 11 Ia arataihia outou i mua i te nahoa tei ruru mai,* te mau tia faatere e te feia mana, eiaha outou e haapeapea e nafea ia paraparau atu aore ra eaha te parau atu.+ 12 Na te varua moˈa hoi e haapii ia outou i ta outou e parau i tera iho â hora.”+

13 Na ô maira hoê o taua nahoa ra: “Orometua, a parau na oe i to ˈu tuaana ia tufa oia i ta mâua faufaa.” 14 Pahono atura oia: “Na vai i faatoroa ia ˈu ei haava ia orua aore ra ei arai i rotopu ia orua?” 15 Na ô atura oia: “A ara e eiaha e nounou i ta vetahi ê taoˈa,+ no te mea noa ˈtu e mea rahi te taoˈa a te hoê taata, eita oia e ora i te reira.”+ 16 Faahiti ihora oia i te hoê faahohoˈaraa a na ô ai: “Ua tupu maitai te faaapu a te hoê taata taoˈa rahi. 17 Feruri ihora ïa oia: ‘E nafea râ vau, ua apǐ pauroa hoi ta ˈu mau fare haapueraa huero maa?’ 18 Na ô ihora oia: ‘Teie ta ˈu e rave:+ E vavahi au i ta ˈu mau fare vairaa maa, a hamani atu ai i te mau fare rarahi aˈe, i reira hoi au e haapue ai pauroa ta ˈu huero maa e ta ˈu taoˈa, 19 a na ô atu ai au i roto ia ˈu iho:* “Mea rahi ta ˈu* taoˈa i haapue no te matahiti e rave rahi. E faafaaea ïa vau, e tamaa, e inu, a oaoa ˈi.”’ 20 Na ô atura râ te Atua ia ˈna: ‘Neneva, i teie po e ravehia ˈi to oe ora.* Tena mau taoˈa ta oe i haapue, e riro ïa ia vai?’+ 21 Tera ïa te tupu i nia i te taata o te haapue i te taoˈa na ˈna iho, mea veve râ oia i te aro o te Atua.”+

22 Na ô atura Iesu i ta ˈna mau pǐpǐ: “No reira vau e parau atu ai: A faaea i te haapeapea no to outou ora* eaha ta outou e amu, aore ra no to outou tino eaha ta outou e oomo.+ 23 Mea faufaa aˈe hoi te ora* i te maa, e te tino i te ahu. 24 A hiˈo na i te oreba. Eita teie mau manu e ueue i te huero, e ooti e aita ta ratou e fare vairaa maa. Teie râ, te faaamu ra te Atua ia ratou.+ E ere anei mea faufaa aˈe outou i tera mau manu?+ 25 O vai o outou e nehenehe e faaroa ˈtu â i to ˈna ora hoê noa ˈˈe kubiti* ia haapeapea oia? 26 Eita ta outou e nehenehe e rave i teie mea haihai, no te aha ïa e haapeapea ˈi no te tahi atu mau mea?+ 27 A hiˈo i te mau lili: Eita teie mau tiare e rave i te ohipa, eita atoa e hamani i te ahu. Te parau atu nei râ vau e aita te ahu o Solomona, noa ˈtu to ˈna unauna rahi, i hau aˈe i te nehenehe i to te hoê o teie mau tiare.+ 28 Te faaahu nei te Atua i teie mau tiare, o te tupu nei i teie mahana, a hurihia ˈtu ai ananahi i roto i te auahi. E hau atu â ïa oia i te faaahu ia outou te feia mea iti te faaroo! 29 A faaea ïa i te haapeapea no ta outou e amu e no ta outou e inu e a faaea i te ahoaho,+ 30 o teie mau mea hoi ta te mau nunaa o teie nei ao e titau rahi nei, ua ite râ to outou Metua e e hinaaro iho â outou i teie mau mea.+ 31 Tera râ, a tamau i te imi i ta ˈna Faatereraa arii,* e e horoahia mai teie mau mea na outou.+

32 “E te nǎnǎ iti, eiaha e mǎtaˈu,+ ua faaoti hoi to outou Metua i te horoa ˈtu i te Faatereraa arii na outou.+ 33 A hoo i ta outou mau faufaa e a horoa i te ô aroha hamani maitai.*+ A hamani i te pute moni mutu ore na outou, e taoˈa pau ore ïa i te raˈi,+ a ore atu ai e noaahia i te eiâ e e pau i te manumanu. 34 Te vahi hoi to reira ta outou taoˈa, to reira atoa to outou aau.

35 “Ia ineine outou*+ e ia ama noa ta outou mori,+ 36 e ia riro outou mai te feia e tiai ra i to ratou fatu ia hoˈi mai+ na te faaipoiporaa mai,+ no te iriti atu i te opani ia tae mai oia e ia patoto mai. 37 E oaoa taua mau tavini ra ia roohia mai ratou e te fatu te ara ra ratou! Oia mau ta ˈu e parau atu: E faaineine* oia ia ˈna, e faatarava ia ratou i te amuraa maa, a faatamaa ˈtu ai ia ratou. 38 Ia haere mai oia mai te hora 9 i te po e tae atu i te tuiraa po* aore ra mai te tuiraa po e tae atu i te hora 3 i te aahiata,* a ite atu ai e te ara ra ratou, e oaoa ïa ratou! 39 Ua ite hoi outou e ahiri te fatu fare i ite i teihea hora te eiâ e haere mai ai, eita ïa oia e vaiiho noa i to ˈna fare ia tomohia.+ 40 Outou atoa, ia ineine noa ïa, no te mea i te hora manaˈo-ore-hia e outou e haere mai ai te Tamaiti a te taata nei.”+

41 Ui maira Petero: “E te Fatu, no matou anei teie faahohoˈaraa ta oe e parau ra aore ra no te taata atoa?” 42 Na ô atura te Fatu: “O vai hoi te tiaau* haapao maitai e te paari ta to ˈna fatu e faatoroa i nia i ta ˈna mau tavini atoa no te tamau i te horoa na ratou i te maa e navai i te taime tano?+ 43 E oaoa taua tavini ra ia tae mai to ˈna fatu a ite atu ai e te na reira ra oia! 44 Oia mau ta ˈu e parau atu: E faatoroa oia ia ˈna ei tiaau i ta ˈna mau faufaa atoa. 45 Ia parau noa ˈtu râ taua tavini ra i roto i to ˈna aau: ‘Ua maoro to ˈu fatu,’ a rutu atu ai i te mau tavini tane e te mau tavini vahine, a tamaa, a inu e a taero atu ai,+ 46 e haere mai te fatu o taua tavini ra i te mahana manaˈo-ore-hia e ana e i te hora aita oia i ite, e e faautua ia ˈna i te utua ino mau, a amui atu ai ia ˈna i te feia taiva. 47 E tairi-rahi-hia taua tavini ra o tei taa i te hinaaro o to ˈna fatu aita râ i vai ineine, aita atoa i rave i ta to ˈna fatu i ani.*+ 48 Te tavini râ tei rave i te ino no te taa ore, a tairihia ˈtu ai oia ma te tano, e tairi-rii-hia ïa. Inaha, te taata mea rahi tei horoahia ˈtu ia ˈna, mea rahi ïa te titauhia ia ˈna. E te taata mea rahi ta ˈna hopoia, mea rahi atu â ïa te titauhia ia ˈna.+

49 “Ua haere mai au e tutui i te auahi i nia i te fenua. Mai te peu e ua ama ê na te auahi, eaha ˈtu â ïa ta ˈu e hinaaro? 50 Te vai ra te hoê bapetizoraa ia bapetizohia vau. Te ahoaho roa nei au e ia oti roa te reira.+ 51 Te manaˈo ra outou e o te hau ta ˈu i haere mai e faatupu i te fenua nei? Te parau atu nei au: E ere te hau, o te amahamaha râ.+ 52 Mai teie atu nei hoi, e amahamaha e pae taata o te hoê utuafare, e toru te patoi i e piti, e na piti i na toru. 53 E amahamaha ratou, e patoi te metua tane i te tamaiti e te tamaiti i te metua tane, te metua vahine i te tamahine e te tamahine i te metua vahine, te metua vahine hoovai i te hunoa vahine e te hunoa vahine i te metua vahine hoovai.”+

54 Na ô atoa ˈtura Iesu i te nahoa: “Ia ite outou i te hoê ata ia hiti mai i tooa o te râ, e parau outou: ‘Ua fatata te vero,’ e tera iho â. 55 E ia farara mai te mataˈi no apatoa mai, e na ô outou: ‘E mahana veavea roa ïa,’ e tera iho â. 56 Haavarevare ma, ua ite outou eaha te huru o te mahana ia hiˈo outou i te fenua e te raˈi, no te aha râ outou aita i ite i te auraa o te mau mea e tupu nei i teie tau?+ 57 No te aha eita ˈi outou e faaoti no outou iho i te mea tia ia rave? 58 Ei hiˈoraa, a haere ai oe e te taata tei horo ia oe e hiˈo i te hoê tia faatere, a tutava i te faaafaro i to orua peapea a haere noa ˈi orua, ia ore hoi oia e tuu ia oe i mua i te haava, a tuu atu ai te haava ia oe i te tiai, a huri atu ai te tiai ia oe i roto i te tapearaa.+ 59 Te parau atu nei au ia oe: Eita oe e matara mai ia ore ia pee ta oe tarahu e tae noa ˈtu i te moni huˈa* hopea.”

13 I taua taime ra, e taata to reira tei faatia ia Iesu no te tahi mau taata Galilea ta Pilato i haapohe, a pûpû ai ratou i ta ratou mau tusia. 2 Parau atura Iesu: “I to outou manaˈo, no te mea anei e feia hara rahi aˈe taua mau taata Galilea ra i to Galilea atoa i roohia ˈi ratou i taua ati ra? 3 E ere roa ˈtu, ta ˈu ïa e parau atu. Ia ore outou e tatarahapa, e pohe atoa outou pauroa mai ia ratou.+ 4 E tera na 18 taata tei topahia i te pare i Siloama e pohe ihora, i to outou manaˈo, ua hau aˈe anei ta ratou hara i ta to Ierusalema atoa? 5 E ere roa ˈtu, ta ˈu ïa e parau atu. Ia ore outou e tatarahapa, e pohe atoa outou pauroa mai ia ratou.”

6 Faahiti atura Iesu i teie faahohoˈaraa: “E tumu suke tei tanuhia i roto i te faaapu vine a te hoê taata. Haere maira oia e tii i te maa i nia i taua tumu ra, e aita e maa.+ 7 Na ô maira oia i te taata faaapu vine: ‘Teie te toruraa o te matahiti e tii mai ai au i te maa i nia i teie tumu suke e aita e maa. A tâpû atu! Eaha hoi e haamâuˈa ˈi i te fenua?’ 8 Pahono atura te taata faaapu vine: ‘E te Fatu, tiai rii na hoê â matahiti. E utaru vau e ati noa ˈˈe, a tuu atu ai i te para. 9 Ia hotu mai te maa, mea maitai ïa. Ia ore râ, e tâpû ïa oe.’”+

10 E teie nei, te haapii ra Iesu i te taata i roto i te hoê sunago i te Sabati. 11 E inaha, e vahine atoa to reira, a 18 matahiti to ˈna maˈiraahia no te hoê varua ino. Ua fefe roa oia, a ore atu ai e nehenehe e faaafaro ia ˈna. 12 I to Iesu iteraa ˈtu ia ˈna, na ô atura oia: “Ua ora to oe maˈi.”+ 13 Tuu atura oia i to ˈna rima i nia iho i taua vahine ra. I reira iho, afaro roa maira to ˈna tino e faahanahana aˈera oia i te Atua. 14 Aita râ te aratai o te sunago i mauruuru no to Iesu faaoraraa i te maˈi i te Sabati e na ô atura i te nahoa: “E ono mahana raveraa ohipa,+ i tera ïa mau mahana outou e haere mai ai ia faaorahia to outou mau maˈi, eiaha râ i te mahana Sabati.”+ 15 Pahono atura râ te Fatu ia ˈna: “Haavarevare ma,+ eita anei outou e tatara i ta outou puaatoro oni aore ra ta outou asini i te Sabati, a putô atu ai e faainu i te pape?+ 16 E tamahine na Aberahama teie vahine. Ua tapeahia oia e Satani 18 matahiti, eita anei ïa e tano ia faaora i to ˈna maˈi i te mahana Sabati?” 17 A faahiti ai Iesu i teie mau parau, haama ihora te feia atoa i mârô mai ia ˈna. Te nahoa râ, oaoa ihora ïa i te mau mea faahiahia atoa ta ˈna i rave.+

18 Na ô atura ïa oia: “E au te Faatereraa arii a* te Atua i te aha, e e faaau vau i te reira i te aha? 19 E au ïa i te hoê huero sinapi ta te hoê taata i rave e i tanu i roto i ta ˈna faaapu. Tupu maira e riro maira ei tumu raau, a hamani atu ai te mau manu o te raˈi i to ratou ofaaraa i nia i te mau amaa.”+

20 Na ô faahou atura oia: “E faaau vau i te Faatereraa arii a te Atua i te aha? 21 E au ïa i te hopue ta te hoê vahine i rave e i anoi i roto e toru faito* faraoa ota e ia maraa noa ˈtu te faraoa ôihia.”+

22 E na roto atura oia i te mau oire e oire rii no te haere atu i Ierusalema a haapii haere ai i te taata. 23 Na ô maira râ te hoê taata ia ˈna: “E te Fatu, e parau mau anei e aita i rahi te taata e faaorahia?” Parau atura oia ia ratou: 24 “A tutava i te tomo na te uputa pirihao.+ Te parau atu nei hoi au e mea rahi te tamata i te tomo, eita râ ratou e ô atu. 25 Ia tia mai te fatu fare a ponao atu ai i te opani, e tia noa ïa outou i rapaeau mai, a patoto mai ai i te opani e a na ô ai: ‘E te fatu, a iriti mai na.’+ E pahono atu râ oia: ‘Aita vau i ite o vai outou.’ 26 I reira outou e parau ai: ‘I tamaa na tatou, e i haapii na oe i te taata na te mau aroâ o to matou oire.’+ 27 E na ô atu râ oia: ‘Aita vau i ite o vai outou. Haere ê atu, outou pauroa e rave nei i te ohipa ino!’ 28 I reira outou e taˈi ai e to outou niho e mauu ai i te ahoaho ia ite outou ia Aberahama, Isaaka, Iakoba e te mau peropheta atoa i roto i te Faatereraa arii a te Atua. Outou râ, tei rapae ïa.+ 29 E haere atoa mai te taata no hitia o te râ e tooa o te râ, no apatoerau e apatoa, a tarava ˈtu ai i te amuraa maa i roto i te Faatereraa arii a te Atua. 30 I reira ïa vetahi o to muri e riro ai no mua, e vetahi o to mua e riro ai no muri.”+

31 I taua taime ra, tapiri maira te tahi mau Pharisea e na ô maira ia Iesu: “A haere ê, e a faarue mai i teie vahi, te hinaaro ra hoi Heroda e haapohe ia oe.” 32 Na ô atura oia: “A haere a parau i tera alope, i teie mahana e ananahi, e tiavaru vau i te mau demoni e e faaora i te maˈi, e i te toru o te mahana e oti roa ˈi ta ˈu ohipa. 33 Ia tamau râ vau i to ˈu tere e tia ˈi i teie mahana, ananahi e ananahi atu, eita hoi e tano* ia haapohe i te hoê peropheta i rapae ia Ierusalema.+ 34 Ierusalema, Ierusalema, o te haapohe i te mau peropheta e o te pehi i tei tonohia ˈtu ia ˈna i te ofai!+ Ahia aˈenei to ˈu hinaaroraa e haaputu i ta oe mau tamarii, mai te maiaa moa o te haaputu i ta ˈna mau fanauˈa i raro aˈe i to ˈna pererau! Aita râ outou i hinaaro.+ 35 Inaha, e faaruehia to outou fare.+ Teie ta ˈu e parau atu: E ore roa outou e ite faahou mai ia ˈu e tae noa ˈtu i te taime e na ô ai outou: ‘Ia haamaitaihia tei haere mai ma te iˈoa o Iehova!’”*+

14 I te hoê Sabati, tomo atura Iesu i roto i te fare o te hoê raatira Pharisea no te tamaa. Hiˈo noa maira to reira mau taata ia ˈna. 2 E inaha, te vai ra i mua ia ˈna te hoê taata ua oruoru to ˈna rima e avae i te pape. 3 Ui ihora Iesu i te feia mea ite i te Ture e i te mau Pharisea: “Mea tano anei ia au i te Ture ia faaora i te maˈi i te Sabati aore ra eita?”+ 4 Mamû noa ihora râ ratou. Tapea ˈtura oia i taua taata ra, faaora ihora i to ˈna maˈi e tuu atura ia ˈna ia haere. 5 Na ô atura oia: “O vai o outou, ia topa ta ˈna tamaiti aore ra puaatoro oni i roto i te apoo pape+ i te mahana Sabati,+ e ore e huti mai i rapae i reira iho?” 6 Aita i haere ia ratou ia pahono.

7 A ite ai oia e te maiti ra te mau manihini i te mau vahi faataahia no te feia tiaraa teitei, horoa ˈtura oia i te hoê hiˈoraa.+ Na ô ihora oia ia ratou: 8 “Ia titau-manihini-hia oe i te hoê oroa faaipoiporaa, eiaha e tarava i te vahi faataahia no te feia tiaraa teitei.+ Peneiaˈe ua titau-manihini-atoa-hia te tahi atu taata tei hau aˈe ia oe. 9 Haere maira te fatu fare e na ô maira ia oe: ‘A vaiiho i tena parahiraa no teie taata.’ Haere haama noa ˈtura oe i te parahiraa hopea. 10 Ia titau-manihini-hia râ oe, a haere i te parahiraa hopea. Ia haere mai te fatu fare, e na ô mai oia: ‘To ˈu hoa, a haere i mua ˈtu.’ I reira ïa oe e faaturahia ˈi e te mau manihini atoa.+ 11 Te taata hoi o te faateitei ia ˈna, e faahaehaahia. E te taata o te faahaehaa ia ˈna, e faateiteihia.”+

12 Na ô atoa ˈtura Iesu i tei titau manihini mai ia ˈna: “Ia faatupu oe i te hoê tamaaraa i te avatea aore ra i te ahiahi, eiaha oe e titau manihini i to oe mau hoa, taeae, fetii aore ra te feia tapiri taoˈa rahi. E titau manihini atoa mai paha ratou ia oe ei faahoˈiraa i ta oe. 13 Ia faatupu râ oe i te hoê tamaaraa, a titau manihini i te feia veve, te huma, te pirioi, te matapo.+ 14 E oaoa ïa oe, no te mea aita ta ratou no te faahoˈi mai i ta oe. I te tia-faahou-raa+ hoi o te feia parau-tia e faahoˈihia mai ai ta oe.”

15 A faaroo ai te hoê manihini i te reira, na ô maira oia ia Iesu: “E oaoa te taata o te tamaa* i roto i te Faatereraa arii a* te Atua.”

16 Na ô atura Iesu: “E tamaaraa rahi ta te hoê taata i te ahiahi,+ e mea rahi te taata ta ˈna i titau manihini. 17 Tae aˈera i te hora tamaaraa, tono ihora oia i ta ˈna tavini e parau i te mau manihini: ‘Haere mai, ua ineine te maa.’ 18 Imi aˈera râ ratou pauroa i te otoheraa.+ Na ô maira te hoê: ‘E faaapu ta ˈu i hoo mai e te haere nei au e hiˈo. Eiaha e inoino mai, eita vau e tae atu.’ 19 Na ô maira te tahi atu: ‘Hoê ahuru puaatoro ta ˈu i hoo mai e te haere nei au e hiˈopoa i te reira. Eiaha e inoino mai, eita vau e tae atu.’+ 20 Na ô atoa maira te tahi atu: ‘No faaipoipo noa mai ra vau i te vahine, eita ïa vau e tae atu.’ 21 Hoˈi maira te tavini e faatia ihora i te reira i to ˈna fatu. Riri ihora te fatu fare e na ô atura i ta ˈna tavini: ‘A haere haaviti na te mau aroâ e te mau purumu o te oire, a aratai mai ai i ǒ nei i te feia veve, te huma, te matapo e te pirioi.’ 22 I to te tavini hoˈiraa mai, na ô maira oia: ‘Fatu, ua rave au i ta oe i faaue, te toe noa nei râ te parahiraa.’ 23 Na ô atura ïa te fatu i te tavini: ‘A haere na te mau purumu e te mau eˈa, a onoono maite atu ai i te taata ia haere mai ia î hoi to ˈu fare.+ 24 Te parau atu nei hoi au: E ore roa tera mau taata tei titau-manihini-hia e amu i te maa ta ˈu i faaineine.’”+

25 I teie nei, e nahoa rahi te haere atoa ra na muri ia ˈna. Fariu atura oia e na ô atura: 26 “Te taata e pee mai ia ˈu, ia rahi aˈe ïa to ˈna here ia ˈu* i to ˈna metua tane, to ˈna metua vahine, ta ˈna vahine faaipoipo, ta ˈna mau tamarii, to ˈna mau taeae, to ˈna mau tuahine, i to ˈna* atoa iho ora.+ Aita anaˈe, eita e tia ia ˈna ia riro ei pǐpǐ na ˈu.+ 27 Te taata o te ore e amo i ta ˈna pou haamauiuiraa* a pee mai ai ia ˈu, eita ïa e nehenehe e riro ei pǐpǐ na ˈu.+ 28 O vai o outou, ia hinaaro oia e patu i te hoê pare, e ore e parahi na mua, a numera ˈtu ai i te haamâuˈaraa no te ite e navai anei ta ˈna moni no te faaoti i te paturaa? 29 Ia haamau noa ˈtu oia i te niu, a ore atu ai râ e oti ia ˈna, e faaooo mai ïa te taata atoa e hiˈo mai ia ˈna, 30 a na ô ai: ‘Ua haamata teie taata i te paturaa, aita râ i oti.’ 31 E o vai ïa arii 10 000 faehau ta ˈna o te haere ra e faaû i te tahi atu arii e 20 000 faehau ta ˈna, e ore e parahi na mua, a uiui atu ai ia vetahi ê no te ite e upootia anei oia? 32 Mai te peu e eita, e tono ïa oia i te tahi mau tia e ani i te hau i tera arii tei te atea ê â hoi. 33 Oia atoa, te taata i rotopu ia outou o te ore e haapae i ta ˈna faufaa atoa, e ore ïa e tia ia riro ei pǐpǐ na ˈu.+

34 “Mea maitai roa iho â te miti papaa. Ia maaro râ te reira, e nafea ïa e avaava faahou ai?+ 35 Eita ˈtura ïa te miti papaa e anoihia i roto i te repo aore ra te para. E faaruehia râ i rapae. Te taata e tariˈa to ˈna no te faaroo, ia faaroo ïa.”+

15 Tapiri maira te feia titau tute e te feia rave hara ia Iesu no te faaroo ia ˈna.+ 2 Ohumu aˈera te mau Pharisea e te mau papai parau a na ô ai: “Te farii maitai ra teie taata i te feia rave hara e te tamaa ra e o ratou.” 3 Horoa ˈtura oia i teie faahohoˈaraa: 4 “O vai ïa taata i rotopu ia outou 100 mamoe ta ˈna, ia moˈe te hoê, eita e vaiiho i na 99 i te vahi aihere, a imi atu ai i tei moˈe e ia itehia mai?+ 5 E ia itehia ia ˈna, e amo oia i taua mamoe ra i nia i to ˈna tapono ma te oaoa. 6 E ia tae oia i te fare, e titau oia i to ˈna mau hoa e te feia tapiri atoa a na ô ai: ‘Mai, oaoa anaˈe, ua itehia mai hoi ia ˈu ta ˈu mamoe i moˈe na.’+ 7 Te parau atu nei au, e oaoa rahi atoa tei te raˈi no te hoê noa taata rave hara e tatarahapa,+ eiaha râ no na 99 taata parau-tia e manaˈo ra e aita e faufaa ia tatarahapa ratou.

8 “E o vai ïa vahine hoê ahuru moni derama* ta ˈna, ia moˈe te hoê, eita e tutui i te mori, a purumu atu ai i to ˈna fare e a paimi maitai atu ai e ia itehia mai? 9 E ia itehia ia ˈna, e titau oia i to ˈna mau hoa* e te feia tapiri atoa a na ô ai: ‘Mai, oaoa anaˈe, ua itehia mai hoi ia ˈu te moni derama* i moˈe na ia ˈu.’ 10 Te parau atu nei ïa vau, e oaoa te mau melahi a te Atua no te hoê noa taata rave hara e tatarahapa.”+

11 Na ô atoa ˈtura oia: “E piti tamaiti ta te hoê taata. 12 Parau maira te teina i to ˈna metua tane: ‘To ˈu metua, horoa mai na i ta ˈu tufaa.’ Tufa ihora te metua tane i ta ˈna mau faufaa mai tei au ia raua tataitahi. 13 Tau mahana i muri iho, haaputu ihora te teina i ta ˈna mau mea atoa, reva ˈtura i te hoê fenua atea, e hue atura i ta ˈna faufaa i roto i te ohipa haapaoraa ore.* 14 Pau roa aˈera ta ˈna faufaa, tupu ihora te oˈe rahi i taua fenua ra, e poia roa ihora oia. 15 Haere roa ˈtura oia e rave i te ohipa na te hoê taata no reira, o tei faaue ia ˈna ia haere i to ˈna mau fenua e haapao i te nǎnǎ puaa.+ 16 Hiaai atura oia i te maa ta te puaa e amu, aita râ e taata e horoa ˈtu i te maa na ˈna.

17 “Haamata ˈtura oia i te feruri maitai e na ô ihora: ‘Te tamaa maitai ra te rave ohipa e rave rahi a to ˈu metua tane, o vau nei râ, te pohe nei ïa i te poia i ǒ nei! 18 E reva vau i ǒ to ˈu metua tane ra, a na ô atu ai: “To ˈu metua, ua hara vau i te Atua i te raˈi e ia oe. 19 Eita e tano faahou ia parauhia vau e tamaiti na oe. Faariro oe ia ˈu mai te hoê o ta oe mau rave ohipa.”’ 20 Reva ˈtura ïa oia i ǒ to ˈna metua tane ra. Tei te atea ê â oia, ite maira to ˈna metua tane ia ˈna, aroha ihora, horo maira, tauahi maitai ihora ia ˈna* e apa maira. 21 Na ô atura te tamaiti: ‘To ˈu metua, ua hara vau i te Atua i te raˈi e ia oe.+ Eita e tano faahou ia parauhia vau e tamaiti na oe.’ 22 Na ô ihora râ te metua tane i ta ˈna mau tavini: ‘Haaviti, hopoi mai i te hoê ahu roa, te mea nehenehe roa ˈˈe, a faaahu ia ˈna, a oomo i te tapea i to ˈna rima e te tiaa i to ˈna avae. 23 Putô atoa mai i te puaatoro oni apî poria e tupai atu. Tamaa e arearea anaˈe, 24 i pohe na hoi ta ˈu tamaiti nei e ua ora faahou mai.+ I moˈe na oia e ua hoˈi mai.’ Arearea ˈtura ratou.

25 “Tei te faaapu ta ˈna tamaiti matahiapo. I to ˈna râ hoˈiraa mai e piriraa mai i te fare, faaroo ihora oia i te upaupa e te ori. 26 Pii maira oia i te hoê tavini e ui maira eaha tera. 27 Pahono atura te tavini: ‘Ua tae mai to teina, e ua tupai to metua tane i te puaatoro oni apî haaporiahia, no te mea ua hoˈi mai oia e mea maitai o ˈna.’ 28 Riri ihora râ oia e aita ˈtura i hinaaro e tomo i roto i te fare. Haere atura to ˈna metua tane i rapaeau e taparu ia ˈna ia tomo mai. 29 Pahono maira oia i to ˈna metua tane: ‘Ahia ˈtura matahiti to ˈu taviniraa ia oe e haapao-noa-raa i ta oe i faaue mai. Aita roa ˈtu râ oe i horoa mai i te hoê puaaniho apî ia tamaa vau e to ˈu mau hoa. 30 I te taeraa mai iho â tena tamaiti ta oe, o tei hue* i ta oe faufaa na te mau vahine taiata, tupai ihora ïa oe i te puaatoro oni apî poria no ˈna.’ 31 Na ô atura te metua tane: ‘Ta ˈu tamaiti, to pihai iho noa na oe ia ˈu, e ta ˈu mau taoˈa atoa, na oe ïa. 32 E mea tia râ ia arearea e ia oaoa tatou, i pohe na hoi to teina e ua ora faahou mai. I moˈe na oia e ua hoˈi mai.’”

16 Na ô atoa ˈtura Iesu i te mau pǐpǐ: “E tiaau* ta te hoê taata taoˈa rahi e ua parihia oia i te haamâuˈa i te faufaa a to ˈna fatu. 2 Titau atura te fatu ia ˈna e na ô atura: ‘Eaha ta ˈu e faaroo nei no oe? Haere a papai mea nafea to oe faaohiparaa i ta ˈu moni, eita hoi oe e tiaau faahou i to ˈu utuafare.’ 3 Feruri ihora te tiaau: ‘E nafea râ vau, e tihati hoi to ˈu fatu ia ˈu? Eita e haere ia ˈu ia utaru, mea haama atoa ia taparu haere i te moni. 4 A e! Ua ite au eaha ta ˈu e rave ia farii mai te taata ia ˈu i ǒ ratou ua ere anaˈe au i to ˈu toroa tiaau.’ 5 Titau hoê hoê atura oia i te feia tei tarahu i to ˈna fatu e na ô atura i te hoê: ‘Ehia ta oe tarahu i to ˈu fatu?’ 6 Pahono maira oia: ‘Hoê hanere tura* hinu olive.’ Na ô atura oia: ‘A rave i ta oe parau faaau, a parahi e a papai haaviti e 50.’ 7 Ui ihora oia i te tahi: ‘E oe, ehia ta oe tarahu?’ Pahono maira oia: ‘Hoê hanere pute* sitona.’ Na ô atura oia: ‘A rave i ta oe parau faaau e a papai e 80.’ 8 Haapopou ihora te fatu i te tiaau, noa ˈtu e e taata parau-tia ore, no to ˈna haaraa ma te paari. E rahi aˈe te paari o te mau tamaiti o teie nei ao* i to te mau tamaiti o te maramarama+ ia ohipa ratou i nia ia vetahi ê.

9 “Te parau atoa ˈtu nei au: A imi i te hoa no outou maoti te mau taoˈa a teie nei ao parau-tia ore.+ E ia moˈe taua mau taoˈa ra, e fariihia mai outou e teie na hoa i roto i te mau nohoraa mure ore.+ 10 Te taata o te haapao maitai i te mea iti, e haapao maitai atoa ïa i te mea rahi. E te taata o te haapao ore i te mea iti, e haapao ore atoa i te mea rahi. 11 No reira, aita anaˈe outou i haapao maitai i te mau taoˈa a teie nei ao parau-tia ore, eita atoa e horoahia ˈtu te mau taoˈa mau. 12 Aita anaˈe outou i haapao maitai i ta vetahi ê mau taoˈa, eita atoa ïa e horoahia ˈtu ta outou.+ 13 Eita te hoê tavini e nehenehe e tavini e piti fatu, e hae hoi oia i te hoê e e here oia i te tahi atu, aore ra e faatura oia i te hoê e e vahavaha oia i te tahi atu. Eita outou e nehenehe e tavini i te Atua e te Moni.”+

14 Faaroo noa maira râ te mau Pharisea nounou moni e hiˈo faaooo maira ia Iesu.+ 15 Na ô atura ïa oia: “Te faataata parau-tia nei outou ia outou i mua ia vetahi ê,+ ua ite râ te Atua eaha to roto i to outou aau.+ Ta te taata e haafaufaa rahi nei, mea faufau ïa i te aro o te Atua.+

16 “I faaite-haere-hia na te Ture e te mau papai a te mau peropheta e tae roa aˈenei ia Ioane ra. Mai reira mai, o te Faatereraa arii a* te Atua te faaite-haere-hia nei ei parau apî oaoa e ta te mau huru taata atoa e tapi nei.+ 17 Ia mou noa ˈtu te raˈi e te fenua, e ore te hoê tuhaa iti o te Ture e mou e ia hope roa i te tupu.+

18 “Te tane o te faataa i ta ˈna vahine faaipoipo, a faaipoipo atu ai i te tahi atu, e faaturi ïa. E te tane o te faaipoipo i te hoê vahine ua taa raua ta ˈna tane faaipoipo, e faaturi ïa.+

19 “Te vai ra te hoê taata taoˈa rahi, tei oomo noa na i te ahu lino vareau moni rahi, a oaoa ˈi i te mau mahana atoa i to ˈna oraraa fanaˈo. 20 Teie râ, e vaiihohia na te hoê taata veve e te taparu o Lazaro te iˈoa i te uputa o te fare o te taata taoˈa rahi. Ua î roa to ˈna tino i te aai. 21 E hiaai oia e amu i te huˈahuˈa maa e topa mai nia mai te amuraa maa a te taata taoˈa rahi. E haere atoa mai te urî e mitimiti i to ˈna tino aai. 22 I muri aˈe, pohe atura te taata veve e hopoihia ˈtura oia e te mau melahi i pihai iho ia Aberahama.*

“Pohe atoa ˈtura te taata taoˈa rahi e hunahia ˈtura. 23 I te Apoo,* a mauiui roa ˈi oia, hiˈo aˈera oia i nia e ite maira ia Aberahama i te atea ê e ia Lazaro i pihai iho ia Aberahama.* 24 Pii maira oia e na ô maira: ‘To ˈu metua Aberahama, aroha* mai ia ˈu, e a tono mai ia Lazaro ia tuu rii noa ˈˈe i to ˈna manimani rima i roto i te pape, a faatopatapata mai ai i nia i to ˈu arero, te mauiui nei hoi au i roto i teie auahi ura.’ 25 Na ô atura râ Aberahama: ‘Tamaiti, a haamanaˈo i te mau maitai rahi tei noaa ia oe i to oe oraraa, area Lazaro te mauiui rahi ïa. I teie nei râ, te tamahanahanahia ra oia i ǒ nei, o oe râ, te mauiui nei ïa. 26 Ua tuu-atoa-hia te hoê area rahi i rotopu ia matou e ia outou, ia ore to ǒ nei e tae i ǒ outou, e ia ore to ǒ atu e tae mai i ǒ matou.’ 27 Na ô maira oia: ‘Te ani atu nei ïa vau ia oe, to ˈu metua Aberahama, ia tono ia Lazaro i te fare o to ˈu metua tane, 28 e pae hoi taeae to ˈu, ia faaara ïa oia ia ratou, ia ore ratou e haere atoa mai i teie nei vahi haamauiuiraa.’ 29 Na ô atura râ Aberahama: ‘Tei ia ratou ra Mose e te mau peropheta. Ia faaroo ïa to oe mau taeae ia ratou.’+ 30 Parau maira oia: ‘To ˈu metua Aberahama, eita ratou e faaroo. Ia haere atu râ te hoê taata tei faatiahia mai te pohe mai ia ratou ra, e tatarahapa ïa ratou.’ 31 Pahono atura râ oia: ‘Ia ore ratou e faaroo ia Mose+ e te mau peropheta, eita atoa ïa ratou e faaroo i te taata tei faatiahia mai te pohe mai.’”

17 Na ô atura Iesu i ta ˈna mau pǐpǐ: “Te vai ra iho â te tahi mau faaturoriraa. Ua ati râ te taata no ˈna e turori ai vetahi ê! 2 Mea maitai aˈe ia taamu i te hoê ofai oro i nia i to ˈna aˈî, a huri atu ai ia ˈna i raro i te moana, eiaha râ hoê ia turori o teie feia e au i te tamarii no ˈna.+ 3 A haapao maitai ia outou iho. Ia hara mai to oe taeae ia oe, a aˈo atu ia ˈna+ e ia tatarahapa oia, a faaore ïa i ta ˈna hapa.+ 4 Ia hitu noa ˈtu taime i te mahana to ˈna hararaa mai ia oe e ia hitu atoa taime to ˈna haereraa mai ia oe ra, a na ô mai ai: ‘Te tatarahapa nei au,’ e faaore oe i ta ˈna hapa e tia ˈi.”+

5 Na ô maira te mau aposetolo i te Fatu: “A faarahi mai i to matou faaroo.”+ 6 Na ô atura te Fatu: “Ahiri to outou faaroo mai te huero sinapi te rahi, e parau ïa outou i teie tumu sukamino: ‘Ia iriti-tumu-hia oe e ia tanuhia oe i roto i te miti!’ E faaroo oia ia outou.+

7 “O vai o outou e tavini ta ˈna e arote ra i te faaapu aore ra e tiai ra i te nǎnǎ, e na ô atu i ta ˈna tavini ia hoˈi mai: ‘Haaviti, parahi mai e tamaa’? 8 Eita anei oia e na ô atu: ‘A tunu mai i te tahi maa na ˈu, a taamu mai i to oe pareu tûtu maa e a afai mai i te maa e ia paia roa vau, e i muri iho oe e tamaa ˈi’? 9 E mauruuru anei oia i te tavini no te mea ua rave oia i tei faauehia ˈtu? Eita. 10 Oia atoa, ua oti anaˈe ia outou i te rave i tei faauehia ˈtu, a na ô: ‘E tavini faufaa ore matou. Ua rave noa matou i tei faauehia mai.’”+

11 A haere ai oia i Ierusalema, na roto atura oia ia Samaria e ia Galilea. 12 A tomo atu ai oia i roto i te hoê oire iti, farerei maira ahuru taata lepera ia ˈna, a tia noa ˈi râ i te atea ê.+ 13 Tuô maira ratou: “E Iesu e, Orometua, aroha* mai ia matou!” 14 I to Iesu iteraa ˈtu ia ratou, na ô atura oia: “Haere a faaite ia outou i te mau tahuˈa.”+ A haere noa ˈi ratou, ora ihora to ratou lepera.+ 15 Ite ihora hoê o ratou e ua ora to ˈna maˈi, hoˈi maira a faahanahana ˈi i te Atua ma te reo puai. 16 Tipapa ihora oia i to Iesu pae avae e haamauruuru maira ia ˈna. Hau atu â, e taata Samaria oia.+ 17 Na ô atura Iesu: “E ere anei hoê ahuru tei ora to ratou maˈi? Teihea roa ïa na iva? 18 Aita ˈtu anei taata i hoˈi mai no te faahanahana i te Atua, o teie anaˈe râ taata nunaa ê?” 19 Na ô atura oia: “A tia e a haere, no to oe faaroo i ora ˈi oe.”+

20 I te hoê mahana, ua ui mai te mau Pharisea ia ˈna afea te Faatereraa arii a* te Atua e tae mai ai.+ Pahono atura oia: “Eita te Faatereraa arii a te Atua e tae mai a ite atu ai te taata, 21 eita atoa e parauhia: ‘A hiˈo na, tei ǒ nei!’ aore ra: ‘A hiˈo na, tei ǒ atu!’ Inaha, tei rotopu te Faatereraa arii a te Atua ia outou nei.”+

22 Na ô atura oia i ta ˈna mau pǐpǐ: “E tae mai te mau mahana e hinaaro ai outou e ite i te tau e hoˈi mai ai te Tamaiti a te taata nei, eita râ outou e ite atu i te reira. 23 E na ô atoa mai te taata ia outou: ‘A hiˈo na, tei ǒ atu!’ aore ra: ‘A hiˈo na, tei ǒ nei!’ Eiaha e haere atu, eiaha atoa e pee ia ratou.+ 24 Mai te uira hoi e anapa mai te hoê pae raˈi i te tahi atu pae raˈi, mai tera atoa ïa i to ˈna mahana+ e faaitehia mai ai te Tamaiti a te taata nei.+ 25 Ia roohia râ oia na mua i te mauiui rahi e ia vahavahahia e teie nei uˈi e tia ˈi.+ 26 E mai i te tau o Noa,+ oia atoa ïa i te tau o te Tamaiti a te taata nei:+ 27 Te tamaa ra te taata, te inu ra, te faaipoipo ra te tane, te horoahia ra te vahine ia faaipoipo e tae roa i te mahana i tomo ai Noa i roto i te araka,+ tae maira te diluvi e mou aˈera ratou pauroa.+ 28 Mai i te tau atoa o Lota:+ Te tamaa ra te taata, te inu ra, te hoo mai ra, te hoo atu ra, te tanu ra, te patu ra. 29 I te mahana râ i faarue ai Lota ia Sodoma, topa maira te auahi e te mau ofai ura mai te raˈi mai e mou aˈera ratou pauroa.+ 30 Mai tera atoa ïa ia tae i te mahana e faaitehia mai ai te Tamaiti a te taata nei.+

31 “I taua mahana ra, te taata i nia iho i to ˈna fare e to roto ta ˈna mau taoˈa i te fare, eiaha ïa e pou atu e tii i ta ˈna mau taoˈa, e oia atoa te taata i roto i te faaapu, eiaha ïa e hoˈi i muri. 32 A haamanaˈo i te vahine a Lota.+ 33 O tei tapea i to ˈna ora,* e ere ïa oia i te reira. O tei ere râ i to ˈna ora,* e noaa faahou mai ïa ia ˈna te reira.+ 34 Te parau atu nei au: I taua po ra, e piti taata to nia i te hoê â roˈi. E ravehia hoê, e vaiihohia râ te tahi.+ 35 E piti vahine te taviri ra i te ofai oro. E ravehia hoê, e vaiihohia râ te tahi.” 36 *—— 37 Na ô maira ïa ratou ia ˈna: “Ihea ïa, e te Fatu?” Pahono atura oia: “I te vahi e tino pohe to reira, e amui atoa mai te mau aeto.”+

18 Horoa ˈtura Iesu i te mau pǐpǐ i te hoê faahohoˈaraa no nia i te faufaaraa ia tamau i te pure e eiaha e fiu,+ 2 a na ô ai: “E haava tei te hoê oire. Aita oia e mǎtaˈu ra i te Atua e aita e tâuˈa ra i te taata. 3 E vahine ivi atoa tei taua oire ra. E haere noa oia e parau i te haava: ‘A haava mai na ia ˈu e te taata i horo ia ˈu i te haavaraa ma te parau-tia.’ 4 Aita râ te haava i farii oioi, i muri aˈe râ, feruri ihora oia: ‘Aita vau e mǎtaˈu ra i te Atua e aita atoa e tâuˈa ra i te taata, 5 no te mea râ e haapeapea noa teie vahine ivi ia ˈu, e haava vau ia ˈna ma te parau-tia a ore atu ai oia e haere noa mai, a taahoa ˈtu vau ia ˈna no to ˈna onoono.’”*+ 6 Na ô atura te Fatu: “A faaroo i ta te haava i parau, noa ˈtu e e taata parau-tia ore oia! 7 Eita anei ïa te Atua e rave e ia haavahia ma te parau-tia te feia ta ˈna i maiti, o te taparuparu ra ia ˈna i te po e te ao,+ a faaoromai noa ˈi oia ia ratou?+ 8 Te parau atu nei au: E rave iho â oia e ia haava-oioi-hia ratou ma te parau-tia. Teie râ, ia tae mai te Tamaiti a te taata nei, e ite anei oia i teie huru faaroo* i te fenua nei?”

9 Faahiti atoa ˈtura oia i teie faahohoˈaraa i te feia e manaˈo ra e feia parau-tia ratou, e mea faufaa ore vetahi ê: 10 “E piti taata tei haere i te hiero e pure, e Pharisea hoê, e titau tute te tahi. 11 Tia noa ihora te Pharisea e pure atura i roto i to ˈna aau mai teie: ‘E te Atua e, te haamauruuru atu nei au ia oe i te mea e e ere au mai te tahi atu mau taata, e eiâ hoi ratou, e feia parau-tia ore, e faaturi. E ere atoa vau mai tera titau tute. 12 E haapae au i te maa e piti taime i te hebedoma. E horoa vau i te tuhaa ahuru o te mau mea atoa i noaa mai ia ˈu.’+ 13 Te titau tute râ, te tia noa ra ïa i te atea ê e aita i hinaaro noa ˈˈe e hiˈo i nia i te raˈi. Na ô ihora oia a tupaipai noa ˈi i to ˈna ouma: ‘E te Atua e, aroha mai oe ia ˈu te hoê taata hara.’+ 14 Te parau atu nei au: Ia hoˈi oia i te fare, o ˈna te taata parau-tia aˈe i te aro o te Atua eiaha tera Pharisea.+ Te taata hoi o te faateitei ia ˈna, e faahaehaahia. Te taata râ o te faahaehaa ia ˈna, e faateiteihia.”+

15 Aratai maira te taata i ta ratou mau tamarii ia Iesu ra ia tuu oia i to ˈna rima i nia iho ia ratou. I to te mau pǐpǐ râ iteraa ˈtu, tamaˈi aˈera ratou i taua mau taata ra.+ 16 Pii atura râ Iesu i te mau tamarii ia haere mai, a na ô ai: “A vaiiho noa i te mau tamarii ia haere mai ia ˈu nei, eiaha e tapea ˈtu, no te feia hoi mai teie mau tamarii te Faatereraa arii a* te Atua.+ 17 Oia mau ta ˈu e parau atu: Te taata e ore e farii i te Faatereraa arii a te Atua mai te hoê tamarii, eita roa ˈtu ïa e ô i roto.”+

18 Ui maira te hoê raatira ati Iuda ia ˈna: “Orometua maitai, eaha ta ˈu e rave e noaa ˈi ia ˈu te ora mure ore?”+ 19 Na ô atura Iesu: “Eaha oe e pii ai ia ˈu e Orometua maitai? Aita hoê aˈe e mea maitai, o te Atua anaˈe râ.+ 20 Ua ite oe i te mau faaueraa: ‘Eiaha roa e faaturi,+ eiaha roa e taparahi pohe i te taata,+ eiaha roa e eiâ,+ eiaha roa e pari haavare,+ a faatura i to metua tane e to metua vahine.’”+ 21 Na ô maira oia: “Ua hope ia ˈu i te haapao i teie mau parau atoa mai to ˈu apîraa mai â.” 22 I to Iesu faarooraa i teie parau, na ô atura oia: “Hoê noa mea e toe ra ia oe: A hoo pauroa i ta oe mau taoˈa, a horoa ˈtu ai i te moni na te feia veve, e taoˈa ïa ta oe i te raˈi e a pee mai ia ˈu.”+ 23 A faaroo ai oia i teie parau, oto roa ihora oia, mea rahi roa hoi ta ˈna faufaa.+

24 Hiˈo atura Iesu ia ˈna e na ô atura: “Mea fifi mau â no te feia mea rahi ta ratou moni ia ô i roto i te Faatereraa arii a te Atua!+ 25 Inaha, mea ohie aˈe no te hoê kamela ia ô i roto i te hoê apoo nira, i te hoê taata taoˈa rahi ia ô i roto i te Faatereraa arii a te Atua.”+ 26 Na ô maira te mau pǐpǐ tei faaroo i te reira: “O vai ïa te nehenehe e ora ˈtu?”+ 27 Pahono atura oia: “Te mau ohipa e ore e tia i te taata, e tia ïa i te Atua.”+ 28 Parau maira râ Petero: “Inaha, ua haapae matou i ta matou ra e ua pee mai ia oe.”+ 29 Na ô atura oia ia ratou: “Oia mau ta ˈu e parau atu: Te taata tei haapae i te fare, te vahine faaipoipo, te taeae, te metua aore ra te tamarii no te Faatereraa arii a te Atua,+ 30 e fanaˈo iho â oia hau atu i teie nei â, e i roto i te ao* no a muri aˈe, te ora mure ore ïa.”+

31 Aratai rii ê atura Iesu i na 12 e na ô atura: “Inaha, te pauma nei tatou i Ierusalema, e te mau mea atoa i papaihia e te mau peropheta no nia i te Tamaiti a te taata nei, e tupu ïa.*+ 32 E tuuhia oia i te rima o te feia o te mau nunaa ěê,+ e faaooohia,+ e tuhihia, e tutuhahia,+ 33 e ia oti oia i te huihia, e haapohehia oia.+ I te toru râ o te mahana, e tia faahou mai oia.”+ 34 Aita râ i taa ia ratou teie mau mea, ua hunahia hoi te auraa o teie parau ia ratou.

35 A piri atu ai Iesu ia Ieriko, te parahi noa ra te hoê matapo i te pae purumu, te taparu haere ra.+ 36 A faaroo ai oia i te nahoa e haere ra na reira, ui maira oia eaha tera. 37 Parau atura ratou: “O Iesu no Nazareta teie e haere nei!” 38 Tuô maira oia: “Iesu, Tamaiti a Davida, aroha* mai oe ia ˈu!” 39 Te feia râ i mua, tamaˈi aˈera ïa ia ˈna ia mamû oia. Puai noa ˈtura râ to ˈna tuôraa: “Tamaiti a Davida, aroha* mai ia ˈu!” 40 Tia noa ihora ïa Iesu e faaue atura ia arataihia mai te matapo. I to ˈna piriraa mai, ui atura Iesu: 41 “Eaha ta oe e hinaaro ia rave au no oe?” Na ô maira oia: “E te Fatu, ia ite faahou vau.” 42 Na ô atura Iesu: “Ia ite faahou oe! No to oe faaroo i ora ˈi oe.”+ 43 I reira noa, ite faahou ihora oia e pee maira ia Iesu,+ a faahanahana ˈi i te Atua. Arue atoa aˈera te taata atoa, tei ite atu i te reira, i te Atua.+

19 Tomo atura Iesu i Ieriko e na roto atura i taua oire ra. 2 Tei reira te hoê taata o Zakaio te iˈoa, e raatira titau tute, e taata taoˈa rahi atoa. 3 Te hinaaro ra oia e ite atu ia Iesu, aita râ ta ˈna i nehenehe no te rahi o te taata, mea poto hoi oia. 4 Horo atura oia na mua e tauma aˈera i nia i te hoê tumu sukamino ia ite oia ia Iesu o te haere mai ra na reira. 5 I to Iesu taeraa mai i taua vahi ra, hiˈo aˈera oia i nia e na ô atura: “Zakaio, a pou haaviti mai, e parahi hoi au i ǒ oe i teie mahana.” 6 Pou oioi maira Zakaio e farii atura ia Iesu i to ˈna fare ma te oaoa. 7 I to te taata râ iteraa i te reira, ohumu aˈera ratou pauroa a na ô ai: “Ua tomo oia i roto i te fare o te hoê taata rave hara.”+ 8 Tia maira râ Zakaio e na ô ihora ia Iesu: “E te Fatu, te horoa nei au i te afaraa o ta ˈu mau faufaa na te feia veve, e te taata ta ˈu i taviri,* e tataimaha ïa ta ˈu e faahoˈi na ˈna.”+ 9 Na ô atura Iesu: “I teie mahana ua faaora te Atua i teie taata e to ˈna utuafare, no te mea e tamaiti atoa oia na Aberahama. 10 Ua haere mai hoi te Tamaiti a te taata nei e imi e e faaora i tei moˈe.”+

11 A faaroo noa ˈi te mau pǐpǐ i teie mau parau, faahiti atura Iesu i te tahi atu faahohoˈaraa, no te mea te manaˈo ra ratou e ia tae ratou i Ierusalema e itehia mai ai te Faatereraa arii a* te Atua i reira iho.+ 12 Na ô atura ïa oia: “Ua reva ˈtu te hoê taata no roto mai i te huiarii i te hoê fenua atea+ ia faatoroahia oia ei arii a hoˈi mai ai. 13 Na mua râ, titau ihora oia ahuru o ta ˈna mau tavini, horoa ˈtura ahuru mina* e na ô atura: ‘A faaohipa i te reira ia hoona mai e ia hoˈi noa mai au.’+ 14 Mea hae râ na te mau taata o to ˈna fenua ia ˈna. Tono maira ratou i te tahi mau tia e parau ia ˈna: ‘Eita matou e hinaaro ia oe ei arii no matou.’

15 “Hoˈi maira oia i muri aˈe i to ˈna faatoroaraahia ei arii, e titau ihora i te mau tavini ta ˈna i horoa ˈtu i te moni* no te ite ehia ta ratou i apî mai.+ 16 Tia maira ïa te tavini matamua e na ô maira: ‘Fatu, hoê ahuru mina tei noaa mai i ta oe mina.’+ 17 Na ô atura oia: ‘Maitai roa, e tavini maitai oe! No te mea ua haapao maitai oe i te mea haihai roa, e faatere ïa oe hoê ahuru oire.’+ 18 Haere maira te piti o te tavini e na ô maira: ‘Fatu, e pae mina tei noaa mai i ta oe mina.’+ 19 Na ô atura oia i teie tavini: ‘E faatere ïa oe e pae oire.’ 20 Haere maira râ te tahi atu tavini e na ô maira: ‘Fatu, tera mai ta oe mina ta ˈu i huna i roto i te hoê ahu. 21 Ua mǎtaˈu hoi au ia oe, e taata etaeta oe. E rave oe i te moni ta oe i ore i tuu i te fare moni, e ooti atoa oe i ta oe i ore i ueue.’+ 22 Na ô atura oia: ‘I ta oe iho mau parau e faahapa ˈi au ia oe, tavini ino. Ua ite ïa oe e e taata etaeta vau, o te rave i te moni ta ˈu i ore i tuu i te fare moni, o te ooti atoa i ta ˈu i ore i ueue.+ 23 No te aha ïa oe i ore ai i tuu i ta ˈu moni* i te fare moni? Ia tae mai au, e rave ïa vau i ta ˈu moni e te moni taime.’

24 “Na ô atura oia i te feia e tia noa ra na pihai iho mai: ‘A rave i ta ˈna mina e a horoa ˈtu na te tavini ahuru mina ta ˈna.’+ 25 Na ô maira râ ratou: ‘Fatu, e ahuru hoi mina ta ˈna!’ 26 Pahono atura oia: ‘Te parau atu nei au: Te taata e faufaa ta ˈna, e horoahia ˈtu â ïa ta ˈna. Te taata râ aita ta ˈna e faufaa, oia atoa te mea e vai ra ia ˈna ra, e iriti-ê-hia.+ 27 A tii atoa i to ˈu mau enemi aita i hinaaro ia ˈu ei arii no ratou e a haapohe ia ratou i mua ia ˈu.’”

28 I muri aˈe i to ˈna faahitiraa i teie mau mea, reva ˈtura oia a pauma ˈi i Ierusalema. 29 A piri atu ai oia ia Betephage e ia Betania i nia i te mouˈa parauhia Oliveta,+ tono atura oia e piti o ta ˈna mau pǐpǐ,+ 30 a na ô ai: “A haere i tera oire iti i mua ia orua, e ia tomo atu orua, e ite orua i te hoê fanauˈa asini tei taamuhia e aita â i parahihia ˈtura e te taata. A tatara e a putô mai. 31 Ia ui mai râ te tahi taata: ‘Eaha orua e tatara ˈi i tena asini?’ a na ô atu: ‘Te hinaaro mai ra te Fatu.’” 32 Reva ˈtura na pǐpǐ e ite aˈera i te fanauˈa asini mai ta Iesu i parau.+ 33 Tera râ, a tatara ˈi raua i te asini, na ô maira te mau fatu: “Eaha orua e tatara ˈi i tena asini?” 34 Na ô atura raua: “Te hinaaro mai ra te Fatu.” 35 Putô maira raua i te fanauˈa asini ia Iesu ra, tuu aˈera te mau pǐpǐ i to ratou ahu tapoˈi i nia iho, e haaparahi ihora ia Iesu i nia iho.+

36 A faahoro noa ˈi Iesu i te asini, vauvau aˈera te taata i to ratou ahu tapoˈi i nia i te purumu.+ 37 I to ˈna iho â piriraa ˈtu i te purumu titapou mai te mouˈa Oliveta mai, oaoa ihora te pǐpǐ e rave rahi e arue aˈera i te Atua ma te reo puai no te mau ohipa mana atoa ta ratou i ite, 38 a na ô ai: “Ia haamaitaihia tei haere mai ei Arii ma te iˈoa o Iehova!* Ia hau i nia i te raˈi e ia hanahana te Atua i te raˈi teitei!”+ 39 Na ô maira râ te tahi mau Pharisea i rotopu i te nahoa ia Iesu: “Orometua, tamaˈi na i ta oe mau pǐpǐ.”+ 40 Pahono atura oia: “Te parau atu nei au: Ia mamû noa ratou, na te ofai ïa e tuô mai.”

41 A piri atu ai oia ia Ierusalema, ite atura oia i te oire e taˈi ihora,+ 42 a na ô ai: “Ahiri iho â ïa oe i ite i teie mahana e nafea e noaa ˈi te hau. I teie nei râ, ua hunahia te reira i to mata.+ 43 E tae mai hoi te mau mahana e aua ˈi to oe mau enemi ia oe i te pou oeoe, a haaati atu ai ia oe.+ 44 E haamou uˈana ˈtu ai ratou ia oe e to mau tamarii.+ E ore te hoê ofai i roto i teie oire e vaiihohia i nia iho i te tahi,+ no te mea ua haere mai te Atua e haava ia oe, aita râ oe i ite.”

45 Tomo ihora Iesu i roto i te hiero e tiahi atura i te feia hoohoo,+ 46 a na ô atu ai: “Ua papaihia: ‘E riro to ˈu fare ei fare no te pure,’+ ua faariro râ outou i te reira ei ana no te eiâ.”+

47 Tamau noa ˈtura oia i te haapii i te taata pauroa te mahana i roto i te hiero. Area te mau tahuˈa tiaau, te mau papai parau e te mau raatira ati Iuda, te imi ra ïa i te haapohe ia ˈna,+ 48 aita râ i itehia mai ia ratou te ravea, tei pihai iho noa hoi te taata ia Iesu a faaroo maite noa ˈi ia ˈna.+

20 I te hoê o taua mau mahana ra, a haapii ai Iesu i te taata i roto i te hiero e a faaite atu ai i te parau apî oaoa, tapiri maira te mau tahuˈa tiaau, te mau papai parau e te mau aratai ati Iuda, 2 e na ô maira ia ˈna: “Faaite mai na, i teihea mana e rave ai oe i teie mau mea? Aore ra na vai i horoa ia oe i teie mana?”+ 3 Pahono atura Iesu: “E uiraa atoa ta ˈu e na outou e pahono mai: 4 Te bapetizoraa a Ioane, no te raˈi mai anei aore ra no ǒ mai i te taata ra?” 5 Feruri ihora ratou e na ô aˈera te tahi i te tahi: “Ia parau tatou: ‘No te raˈi mai,’ e na ô mai oia: ‘No te aha ïa outou i ore ai i tiaturi ia ˈna?’ 6 Ia parau râ tatou: ‘No ǒ mai i te taata ra,’ e pehi te taata ia tatou i te ofai, te tiaturi ra hoi ratou e e peropheta Ioane.”+ 7 Pahono aˈera ïa ratou e aita ratou i ite nohea mai. 8 Na ô atura Iesu: “Eita atoa ïa vau e faaite atu i teihea mana e rave ai au i teie mau mea.”

9 Faaite atura Iesu i te taata i teie faahohoˈaraa: “Ua tanu te hoê taata i te vine,+ horoa tarahu atura i ta ˈna faaapu i te tahi feia faaapu, e reva ˈtura i te ara no te hoê tau huru maoro.+ 10 I te tau ootiraa vine, tono ihora oia i te hoê tavini i te feia faaapu ia horoa mai ratou i ta ˈna tuhaa vine. Rutu aˈera râ ratou i taua tavini ra+ e faahoˈi maira ia ˈna ma te ore e horoa mai i te vine. 11 Tono faahou atura râ oia i te tahi atu tavini. Tairi atoa aˈera ratou i teie tavini, faahaama ihora ia ˈna e faahoˈi maira ia ˈna ma te ore e horoa mai i te vine. 12 Tono faahou atura râ oia i te toru o te tavini. Haapepe maitai atoa aˈera ratou i teie e tiahi atura ia ˈna. 13 Na ô ihora te fatu faaapu vine: ‘Eaha ta ˈu e rave? E tono vau i ta ˈu tamaiti, tei herehia.+ E faatura paha ïa ratou ia ˈna.’ 14 I to te feia faaapu iteraa mai i te tamaiti, feruri ihora ratou e na ô aˈera te tahi i te tahi: ‘Teie te taata o te fatu i teie faaapu, haapohe anaˈe ia ˈna, a fatu atu ai tatou i teie faaapu.’ 15 Afai aˈera ratou ia ˈna i rapae i te faaapu vine e haapohe ihora ia ˈna.+ Eaha ïa ta te fatu faaapu vine e rave? 16 E haere mai oia e haapohe i teie feia faaapu, a horoa tarahu atu ai i te faaapu vine i te tahi atu feia faaapu.”

A faaroo ai ratou i te reira, na ô atura ratou: “Eiaha ïa!” 17 Hiˈo tia ˈtura râ Iesu ia ratou e na ô atura: “Eaha ïa te auraa o teie parau i papaihia: ‘Te ofai ta te feia patu fare i faarue, ua riro mai ïa ei ofai tihi’?*+ 18 Te taata atoa e topa i nia iho i teie ofai ra, e mou ïa.+ E te taata e topahia i teie ofai ra, e perehu roa ïa.”

19 I reira, imi aˈera te mau papai parau e te mau tahuˈa tiaau i te haru ia Iesu, ua taa hoi ia ratou e no ratou te faahohoˈaraa ta ˈna i parau.+ Mǎtaˈu ihora râ ratou i te taata. 20 A imi ai ratou i te ravea no te râmâ ia ˈna, tono maira ratou i te tahi mau taata ta ratou i peta ia faahua taata parau-tia ia ratou, ia noaa hoi Iesu ia ratou na roto i ta ˈna mau parau,+ a tuuhia ˈtu ai oia i te feia mana e te tavana. 21 Ui maira taua mau taata ra ia ˈna: “Orometua, ua ite matou e e parau mau ta oe e faahiti e e haapii ia vetahi ê. Eita oe e maitiiti i te taata e te haapii nei oe ia vetahi ê i te eˈa o te Atua ma te parau mau: 22 Mea tano* anei ia au i te Ture ia aufau matou i te tute ia Kaisara aore ra eita?” 23 Taa ihora râ ia ˈna to ratou huru haavarevare e na ô atura: 24 “Faaite mai na i te hoê denari.* No vai te hohoˈa e te iˈoa i nia iho?” Na ô maira ratou: “No Kaisara.” 25 Na ô atura oia: “A faahoˈi ïa i ta Kaisara ia Kaisara ra,+ ta te Atua râ i te Atua ïa.”+ 26 Aita ˈtura i noaa ia ratou ia râmâ ia ˈna i roto i ta ˈna mau parau i mua i te taata, maere ihora râ i ta ˈna pahonoraa e mamû noa ˈtura.

27 Haere maira râ te tahi mau Sadukea, o te parau ra e aita e tia-faahou-raa,+ e ui maira ia Iesu:+ 28 “Orometua, ua papai mai Mose: ‘Ia pohe te hoê taata, a vaiiho mai ai i ta ˈna vahine faaipoipo ma te tamarii ore, ia faaipoipo ïa to ˈna taeae i taua vahine ra e tia ˈi e ia fanau mai ta ˈna ei tamarii na to ˈna taeae i pohe.’+ 29 I vai na e hitu taeae, faaipoipo ihora te matahiapo i te vahine e pohe atura râ ma te tamarii ore. 30 Faaipoipo ihora te piti i taua vahine ra e pohe atura. 31 Na reira atoa te toru. O na hitu atoa tei faaipoipo i taua vahine ra e pohe atura ma te tamarii ore. 32 Pohe atoa ˈtura te vahine. 33 I te tia-faahou-raa, ei vahine oia na vai? I faaipoipo na hoi na hitu atoa ia ˈna.”

34 Na ô atura Iesu: “E faaipoipo te taata o teie nei ao* e e horoahia ia faaipoipo. 35 Te feia râ mea tano iho â ia fanaˈo i te ao* no a muri aˈe e i te tia-faahou-raa o tei pohe, eita ïa e faaipoipo e e horoahia ia faaipoipo.+ 36 Eita atoa ratou e pohe faahou, e au hoi ratou i te mau melahi. E riro atoa ratou ei tamarii na te Atua no te mea e faatiahia mai ratou. 37 E tia faahou mai te feia pohe, ta Mose ïa i faaite i to ˈna faatiaraa no nia i te raau taratara e ura ra, a parau ai no Iehova* mai ‘te Atua o Aberahama e te Atua o Isaaka e te Atua o Iakoba.’+ 38 E Atua oia no te feia ora, eiaha no te feia pohe, mea ora hoi ratou pauroa no ˈna.”*+ 39 Na ô maira te tahi mau papai parau: “Orometua, ua tano ta oe parau.” 40 Taiâ ˈtura ratou i te uiui faahou ia ˈna.

41 Ui atura Iesu: “No te aha te taata e parau ai e e huaai te Mesia no Davida?+ 42 Na Davida iho e parau ra i roto i te buka Salamo: ‘Ua parau Iehova* i to ˈu Fatu: “A parahi i to ˈu rima atau nei 43 e ia faariro roa vau i to oe mau enemi ei taahiraa avae no oe.”’+ 44 Te parau ra hoi Davida i te Mesia e Fatu, mea nafea ïa e huaai ai oia no ˈna?”

45 A faaroo noa ˈi te taata atoa, na ô atura oia i ta ˈna mau pǐpǐ: 46 “A ara i te mau papai parau, mea au na ratou e hahaere ma te ahu roa, ia arohahia ratou ma te faatura na te mahora, e parahi i mua roa* i roto i te mau sunago e i te mau vahi faataahia no te mau manihini tiaraa teitei i te mau tamaaraa.+ 47 E rave haapau atoa ratou i te faufaa a te mau vahine ivi e e faaroa i te pure ia hiˈohia mai ratou. E faautuahia ratou ma te etaeta ˈtu â.”

21 A hiˈo ai Iesu i te mau afata* moni, ite atura oia i te feia taoˈa rahi e tuu ra i ta ratou mau ô i roto.+ 2 Ite ihora oia i te hoê vahine ivi veve e tuu ra e piti moni huˈa haihai roa,*+ 3 e na ô atura: “Oia mau ta ˈu e parau atu: Mea rahi aˈe ta teie vahine ivi veve i tuu i ta tera mau taata atoa.+ 4 Ua horoa hoi ratou paatoa i ta ratou moni hau ei ô, o ˈna râ, noa ˈtu to ˈna veve, ua tuu pauroa ïa i ta ˈna moni e ora ˈi oia.”+

5 I muri aˈe, te paraparau ra vetahi o ta ˈna mau pǐpǐ no nia i te hiero, ua faaunaunahia i te mau ofai taraihia e i te mau mea i pûpûhia i te Atua.+ 6 Na ô ihora Iesu: “Teie mau mea ta outou e hiˈo nei, e tae mai te mau mahana e ore ai e vaiihohia te hoê ofai i nia iho i te tahi, e huri-pauroa-hia i raro.”+ 7 Ui maira ratou ia ˈna: “Orometua, afea hoi teie mau mea e tupu ai, e eaha te tapao e ite ai matou e e tupu te reira?”+ 8 Na ô atura oia: “A ara eiaha outou ia vare,+ mea rahi hoi o te haere mai ma to ˈu iˈoa, a na ô ai: ‘O vau te Mesia,’ e: ‘Ua fatata mai te taime tano.’ Eiaha e pee ia ratou.+ 9 Ia faaroo atoa outou i te tamaˈi e te arepurepu,* eiaha e mǎtaˈu. Ia tupu iho â na mua teie mau mea, eita râ te hopea e tae oioi mai.”+

10 Na ô atura Iesu ia ratou: “E aro te tahi nunaa i te tahi atu nunaa+ e te tahi faatereraa i te tahi atu faatereraa.+ 11 E tupu te aueueraa fenua rahi, e i tera e tera vahi te oˈe e te maˈi pee.+ E ite-atoa-hia te mau mea riaria e te mau tapao rahi no te raˈi mai.

12 “Hou râ teie mau mea atoa e tupu ai, e haruhia outou, e hamani-ino-hia,+ a tuuhia ˈtu ai i mua i te sunago e i roto i te tapearaa. E afaihia outou i mua i te mau arii e te mau tavana no to ˈu nei iˈoa.+ 13 E riro ïa te reira ei ravea e tia ˈi outou i mua ia ratou ei ite no ˈu. 14 A faaoti ïa i roto i to outou aau eiaha e faaineine ê na i ta outou e parau,+ 15 na ˈu hoi e horoa ˈtu i te parau e te paari e eita e nehenehe i to outou mau enemi e patoi aore ra e mârô mai.+ 16 Hau atu â, e tuu to outou mau metua, taeae, fetii e hoa ia outou i te haavaraa,* e haapohe ratou vetahi o outou,+ 17 e e hae te taata atoa ia outou no to ˈu nei iˈoa.+ 18 Eita roa râ te hoê rouru o to outou upoo e marua.+ 19 I to outou faaoromai tamau e ora ˈi outou.*+

20 “Teie râ, ia ite outou ia Ierusalema ia haaatihia e te nuu,+ ua fatata ïa oia i te mou.+ 21 Ia horo ïa te feia e parahi ra i Iudea i te mau mouˈa,+ ia faarue te feia i roto i te oire i taua oire ra, e eiaha to te mataeinaa e tomo mai, 22 e mau mahana hoi teie e faautua ˈi te Atua i te taata* ia tupu te mau mea atoa i papaihia. 23 Ua ati te mau vahine hapû e te mau vahine e aiû ta ratou i taua mau mahana ra!+ E tupu hoi te mauiui rahi i nia i te fenua e te riri rahi tahoo i nia i teie nunaa. 24 E pohe ratou i te ˈoˈe, e hopoi-tîtî-hia i te tahi atu mau nunaa atoa,+ a taataahihia ˈtu ai Ierusalema e te mau nunaa ěê e ia hope noa ˈtu te tau faataahia o te mau nunaa ěê.+

25 “E ite-atoa-hia te mau tapao i nia i te mahana, te avaˈe e te mau fetia.+ I te fenua nei, e ahoaho te mau nunaa a ore atu ai e ite e nafea râ no te haruru e te arepurepu o te miti. 26 E riaria roa te taata i te tiairaa i te mau mea e tupu i te fenua nei, e ueuehia hoi te mau mea puai o te raˈi. 27 I reira ratou e ite ai i te Tamaiti a te taata nei+ ia haere mai i roto i te hoê ata ma te puai e te hanahana rahi.+ 28 Ia tupu râ teie mau mea, a tia mai e a faateitei i to outou upoo, no te mea ua fatata to outou faaoraraa.”

29 Faahiti atura Iesu i te hoê faahohoˈaraa: “A hiˈo na i te tumu suke e te tahi atu mau tumu raau atoa.+ 30 Ia oteo mai te omou, ua ite ïa outou e ua fatata te tau tupuraa. 31 Oia atoa ia ite outou i teie mau mea ia tupu, ua fatata ïa te Faatereraa arii a* te Atua. 32 Oia mau ta ˈu e parau atu: E ore roa teie nei uˈi e mou e tupu ai teie mau mea atoa.+ 33 E mou te raˈi e te fenua, ta ˈu râ mau parau, e ore roa ïa e mou.+

34 “A haapao maitai râ ia outou iho ia ore to outou aau ia teimaha i te rahi o te tamaa, i te inu hua,+ i te haapeapearaa o te oraraa,+ a roohia mai ai outou e taua mahana ra ma te manaˈo-ore-hia 35 mai te hoê marei.+ E tae mai hoi te reira i nia i te taatoaraa o te taata i te fenua nei. 36 A vai ara ïa+ e a tamau i te pure+ ia nehenehe outou e ora ˈtu i teie mau mea atoa o te tupu iho â, a tia ˈtu ai i mua i te Tamaiti a te taata nei.”+

37 No reira, i te ao, e haapii Iesu i te taata i roto i te hiero, i te po râ, e haere oia e faaea i nia i te mouˈa parauhia mouˈa Oliveta. 38 E e haere mai te taata atoa ia ˈna ra i te poipoi roa no te faaroo ia ˈna i roto i te hiero.

22 E te piri mai ra te Oroa pane hopue ore, tei parauhia Pasa.+ 2 Te imi ra te mau tahuˈa tiaau e te mau papai parau i te tahi ravea papu no te haapohe ia Iesu+ no to ratou mǎtaˈu i te taata.+ 3 Tomo atura Satani i roto ia Iuda, tei piihia Isakariota, hoê o na 12,+ 4 e haere atura Iuda e paraparau i te mau tahuˈa tiaau e te mau raatira tiai hiero e nafea oia e tuu ai ia Iesu i to ratou rima.+ 5 Au roa ihora ratou e faaoti atura e horoa i te moni ario na ˈna.+ 6 Farii ihora oia e imi atura i te taime tano no te tuu ia Iesu i to ratou rima ma te ore e itehia e te taata.

7 Tae maira te mahana o te Oroa pane hopue ore e pûpûhia ˈi te animara ei tusia i te Pasa.+ 8 Tono atura Iesu ia Petero e ia Ioane a na ô ai: “A haere e faaineine i te Pasa ia amu tatou i te reira.”+ 9 Parau maira raua: “Ihea oe e hinaaro ai ia faaineine mâua i te Pasa?” 10 Parau atura oia: “Ia tomo orua i roto i te oire, e farerei mai te hoê taata e amo ra i te hoê farii araea î i te pape ia orua. A pee ia ˈna e tae roa ˈtu i roto i te fare ta ˈna e tomo atu.+ 11 E parau orua i te fatu fare: ‘Te na ô mai ra te Orometua: “Teihea te piha no te mau manihini e nehenehe ai au e amu i te Pasa e ta ˈu mau pǐpǐ?”’ 12 E faaite mai tera taata i te hoê piha rahi i nia, mea naho maitai. A faaineine i te Pasa i reira.” 13 Reva ˈtura raua, tupu aˈera te mau mea atoa mai ta Iesu i parau, e faaineine aˈera raua i te Pasa.

14 Tae maira te hora tamaaraa, e tarava ihora oia i te amuraa maa e te mau aposetolo atoa.+ 15 Na ô atura oia ia ratou: “Ua hinaaro roa vau e amu i teie Pasa e outou hou vau e mauiui ai, 16 te parau atu nei hoi au: Eita vau e amu faahou i te Pasa e tae noa ˈtu i te taime e tupu ai te reira i roto i te Faatereraa arii a* te Atua.” 17 Rave ihora oia i te hoê auˈa tei horoahia mai, haamauruuru aˈera i te Atua e parau atura: “A rave i teie auˈa e a horoa ˈtu i te tahi e te tahi, 18 te parau atu nei hoi au: Mai teie atu nei, e ore roa vau e inu faahou i te uaina e tae noa ˈtu i te taime e tae mai ai te Faatereraa arii a te Atua.”

19 Rave atoa ihora oia i te hoê pane,*+ haamauruuru aˈera i te Atua, ofati ihora i te reira e horoa ˈtura ia ratou, a na ô ai: “O to ˈu tino teie+ e horoahia no outou.+ A tamau i te rave i te reira ei manaˈoraa ia ˈu.”+ 20 Na reira atoa ˈtura Iesu no te auˈa i muri aˈe i to ratou tamaaraa, a na ô ai: “Teie auˈa, o te faufaa apî+ ïa e haamauhia maoti to ˈu toto+ o te haamaniihia no outou.”+

21 “Inaha râ, te tarava atoa ra te taata o te tuu ia ˈu i to ˈu mau enemi i teie amuraa maa.+ 22 Te reva nei iho â te Tamaiti a te taata nei mai tei faaotihia.+ Ua ati râ tera taata na ˈna e tuu i te Tamaiti a te taata nei i to ˈna mau enemi!”+ 23 Uiui aˈera te mau aposetolo te tahi i te tahi o vai hoi o ratou te na reira.+

24 Tupu atoa ˈtura râ te hoê aimârôraa rahi i rotopu ia ratou no te ite o vai te mea rahi aˈe.+ 25 Parau atura râ Iesu ia ratou: “Te faatere ra te mau arii o te mau nunaa i te taata e te haavî atoa ra te feia parauhia Hamani maitai ia ratou.+ 26 Outou râ, eiaha ïa e na reira.+ Ia riro râ te taata rahi aˈe mai te tamarii hopea,+ e te taata e aratai ra mai te hoê taata e tavini ra. 27 O vai hoi te taata rahi aˈe, te taata e tamaa ra* aore ra te taata e tavini ra? E ere anei o te taata e tamaa ra?* O vau nei râ, mai te taata ïa e tavini ra ia outou.+

28 “Outou râ, ua pee maite ïa ia ˈu+ i roto i to ˈu mau ati,+ 29 e e haamau vau i te hoê faufaa e o outou, mai to ˈu Metua i haamau i te hoê faufaa e o vau no te hoê faatereraa arii,+ 30 ia nehenehe outou e tamaa e e inu i ta ˈu amuraa maa i roto i ta ˈu Faatereraa arii,+ e e parahi i nia i te mau terono+ no te haava i na opu 12 o Iseraela.+

31 “Simona, Simona, inaha, ua ani Satani ia ueue oia ia outou paatoa mai te sitona.+ 32 Ua pure râ vau no oe ia ore to oe faaroo ia paruparu,+ e ua tatarahapa anaˈe oe, a faaitoito i to oe mau taeae.”+ 33 Parau maira Petero ia Iesu: “E te Fatu, ua ineine au i te pee ia oe i roto i te tapearaa e te pohe atoa.”+ 34 Na ô atura râ oia: “Te parau atu nei au ia oe, Petero, hou te hoê moa e totereo ai i teie mahana, e haavare oe e toru taime e aita oe i ite ia ˈu.”+

35 Na ô atoa ˈtura oia ia ratou: “I to ˈu tonoraa ia outou ma te ore e rave i te pute moni, te pute maa e te tiaa,+ aita outou i ere noa ˈˈe i te tahi mea, e ere anei?” Parau maira ratou: “Aita!” 36 Parau atura oia: “I teie nei râ, te taata e pute moni ta ˈna, ia rave ïa, e te hoê pute maa. E te taata aita ta ˈna e ˈoˈe, ia hoo atu ïa i to ˈna ahu tapoˈi e ia hoo mai i te hoê ˈoˈe. 37 Te parau atu nei hoi au e ia tupu tei papaihia no ˈu e tia ˈi, oia hoi ‘Ua amuihia oia i te feia rave hara.’+ Te tupu nei hoi tei papaihia no ˈu.”+ 38 Parau maira ratou: “E te Fatu, inaha, teie e piti ˈoˈe.” Parau atura oia: “Ua ravai noa te reira.”

39 Reva ˈtura oia, haere atura i te mouˈa Oliveta mai ta ˈna i matau, e pee atoa maira ta ˈna mau pǐpǐ ia ˈna.+ 40 I to ratou taeraa ˈtu, parau atura oia: “A tamau i te pure ia ore outou ia hema.”+ 41 Faaatea rii atura oia,* tuturi ihora e pure ihora, 42 a na ô ai: “To ˈu Metua, ia tia ia oe, a hopoi ê atu na i teie auˈa. Teie râ, ia tupu eiaha to ˈu hinaaro, to oe râ.”+ 43 Fa maira te hoê melahi mai te raˈi mai e faaitoito ihora ia ˈna.+ 44 No to ˈna râ ahoaho rahi, tamau noa ˈtura oia i te pure ma te uˈana ˈtu â,+ e riro atura to ˈna hou mai te toto e topata ra i raro i te repo. 45 I to ˈna tiaraa mai i ta ˈna pureraa e i to ˈna haereraa i ta ˈna mau pǐpǐ, ite ihora oia e te taoto ra ratou, ua rohirohi roa no te oto.+ 46 Parau atura oia: “No te aha outou e taoto ai? A tia e a tamau i te pure ia ore outou ia hema.”+

47 Te paraparau noa ra Iesu, inaha, tae maira te hoê nahoa arataihia e Iuda, hoê o na 12. Tapiri maira oia ia Iesu no te apa ia ˈna.+ 48 Parau atura râ Iesu ia ˈna: “Iuda, te tuu ra oe i te Tamaiti a te taata nei i to ˈna mau enemi ma te apa?” 49 I te iteraa ta ˈna mau pǐpǐ i te ohipa e tupu ra, na ô maira ratou: “E te Fatu, e tairi anei matou ia ratou i te ˈoˈe?” 50 Tairi ihora hoê o ratou i te tavini a te tahuˈa rahi e mutu ê atura to ˈna tariˈa atau.+ 51 Parau atura râ Iesu: “Atira.” Tapea ihora oia i te tariˈa o te tavini e ora ihora oia. 52 Parau atura Iesu i te mau tahuˈa tiaau, te mau raatira tiai hiero e te mau aratai ati Iuda o tei haere mai i reira no ˈna: “Ua haere mai outou e haru ia ˈu ma te ˈoˈe e te raau mai te mea ra e e eiâ vau?+ 53 A tia noa ˈi au e o outou i te hiero i te mau mahana atoa,+ aita outou i haru ia ˈu.+ Teie nei râ hora, no outou ïa e no te mana o te poiri.”+

54 Tapea aˈera ratou ia ˈna, afai atura ia ˈna+ e tae roa ˈtu i roto i te fare o te tahuˈa rahi. O Petero râ, pee maira ïa na te atea ê.+ 55 Tahu aˈera ratou i te auahi i ropu i te aua e parahi ihora. Parahi atoa maira Petero i rotopu ia ratou.+ 56 Ite maira râ te hoê tavini vahine ia ˈna e parahi ra i te vahi maramarama, hiˈo maitai maira ia ˈna e na ô ihora: “Na muri atoa teie taata ia ˈna.” 57 Parau atura râ Petero: “Aita vau i ite ia ˈna.” 58 I muri iti aˈe, ite maira te tahi atu taata ia ˈna e na ô maira: “E pǐpǐ atoa oe na ˈna.” Parau atura râ Petero: “Eita.”+ 59 Piri i te hoê hora i muri iho, parau haapapu maira te tahi atu taata: “Na muri atoa na iho â teie taata ia ˈna, e taata Galilea hoi oia!” 60 Na ô atura râ Petero: “Aita vau i ite i ta oe e parau ra.” A paraparau noa ˈi oia, totereo ihora te hoê moa. 61 Fariu maira te Fatu, hiˈo maira ia Petero e haamanaˈo ihora Petero i ta te Fatu i parau ia ˈna: “Hou te hoê moa e totereo ai i teie mahana, e haavare oe e toru taime e aita oe i ite ia ˈu.”+ 62 Haere atura oia i rapaeau e taˈi ihora no te peapea rahi.

63 Haamata ˈtura te mau taata e tiai ra ia Iesu i te faaooo ia ˈna+ e i te tupai ia ˈna.+ 64 E i muri aˈe i te tapoˈiraa i to ˈna mata, parau noa maira ratou: “E peropheta oe, faaite mai ïa na vai i tupai ia oe.” 65 E parau maira ratou e rave rahi atu â parau faaino ia ˈna.

66 E ao aˈera, putuputu maira te mau aratai ati Iuda, te mau tahuˈa tiaau e te mau papai parau,+ afai atura ia ˈna i roto i ta ratou Sunederi, e na ô atura: 67 “O te Mesia oe, faaite mai ïa.”+ Parau maira râ oia: “Noa ˈtu e e faaite atu vau ia outou, eita iho â outou e tiaturi. 68 Ia ui atoa ˈtu vau ia outou, eita outou e pahono mai. 69 Tera râ, mai teie atu nei, e parahi te Tamaiti a te taata nei+ i te rima atau o te Atua Manahope.”+ 70 Na ô atura ratou pauroa: “O oe ïa te Tamaiti a te Atua?” Pahono maira oia: “Na outou noa iho â e parau ra.” 71 Na ô aˈera ratou: “No te aha ïa e imi ai i te tahi atu haapapuraa? Ua faaroo hoi tatou iho i te reira no roto mai i to ˈna vaha.”+

23 Tia aˈera ratou pauroa e aratai atura ia Iesu ia Pilato ra.+ 2 Pari maira ratou ia ˈna+ a na ô ai: “Ua ite matou i teie taata i te haavareraa i to matou nunaa, i te opaniraa ia aufau i te tute ia Kaisara+ e i te parauraa e o ˈna te Mesia e e arii oia.”+ 3 Ui maira Pilato ia ˈna: “O oe anei te Arii o te ati Iuda?” Pahono atura oia: “Na oe noa iho â e parau ra.”+ 4 Na ô ihora Pilato i te mau tahuˈa tiaau e i te nahoa: “Aita e hara i itehia mai e au i teie taata.”+ 5 Onoono aˈera râ ratou i te parau: “Ua huehue te taata i ta ˈna haapiiraa na Iudea taatoa, na Galilea atoa e tae roa mai i ǒ nei.” 6 I to Pilato faarooraa i te reira, ui ihora oia e taata Galilea anei o ˈna. 7 I te papuraa ia ˈna e no ǒ mai Iesu i te fenua faaterehia e Heroda,+ tono ihora oia ia ˈna ia Heroda ra, tei Ierusalema hoi oia i taua mau mahana ra.

8 I to Heroda iteraa ia Iesu, oaoa roa ihora oia. Mea maoro hoi to ˈna tiai-noa-raa i te ite ia Iesu, no te mea mea rahi te parau ta ˈna i faaroo no ˈna,+ e te manaˈo ra oia e ite i te tahi mau semeio ta ˈna e rave. 9 Uiui ihora Heroda ia ˈna, aita râ oia i pahono atu.+ 10 Hopea ore râ te mau tahuˈa tiaau e te mau papai parau i te tia mai e i te pari ia ˈna ma te riri. 11 Vahavaha maira Heroda e ta ˈna mau faehau atoa ia Iesu.+ Faaooo ihora oia ia ˈna+ ma te faaahu ia ˈna i te hoê ahu nehenehe, e faahoˈi atura ia ˈna ia Pilato ra. 12 Hoa ˈtura Heroda raua Pilato i taua mahana ra, e enemi hoi raua na mua ˈˈe.

13 Titau ihora Pilato i te mau tahuˈa tiaau, te mau raatira e te nahoa ia amui mai 14 e na ô atura: “Ua aratai mai outou i teie taata tei parihia i te orure hau. Inaha, ua uiui au ia ˈna i mua ia outou, aita râ i itehia e au te tahi tumu e pari ai outou i teie taata.+ 15 Aita atoa i itehia e Heroda, ua faahoˈi mai hoi oia ia ˈna, e inaha, aita oia i rave i te tahi mea e tano ai ia pohe oia. 16 E faautua ïa vau ia ˈna,+ a tuu atu ai ia ˈna.” 17 *—— 18 Tuô aˈera râ te nahoa atoa: “Haapohe atu i tena taata, e tuu mai râ ia Baraba!”+ 19 (I hurihia na teie taata i roto i te tapearaa no te orure-hau-raa i roto i te oire e no te taparahi-pohe-raa i te hoê taata.) 20 Paraparau faahou atura Pilato ia ratou no to ˈna hinaaro e tuu ia Iesu.+ 21 Tuô maira ratou: “I nia i te pou!* I nia i te pou!”+ 22 Parau faahou atura oia, te toru ïa o te taime: “No te aha hoi? E ohipa ino ta ˈna i rave? Aita vau i ite i te tahi mea e tano ai ia pohe oia. E faautua ïa vau ia ˈna, a tuu atu ai ia ˈna.” 23 Parau onoono maira ratou ma te reo puai ia haapohehia oia,* e rahi noa ˈtura ta ratou tutuôraa.+ 24 Faaoti ihora Pilato e farii i ta ratou aniraa. 25 Tuu ihora oia i te taata tei tapeahia no te orure-hau-raa e no te taparahi-pohe-raa i te hoê taata, e tuu atura râ ia Iesu i to ratou rima ia haapohehia ia au i to ratou hinaaro.

26 A aratai ai ratou ia Iesu, haru aˈera ratou ia Simona no Kurene, na te mataeinaa mai ra, e tuu aˈera i nia i to ˈna tapono i te pou haamauiuiraa* ta ˈna e amo na muri mai ia Iesu.+ 27 E nahoa rahi atoa tei apee mai ia Iesu, e te tahi atoa mau vahine o te tupaipai noa ra i to ratou ouma ma te oto, a taˈi noa ˈi. 28 Fariu maira Iesu i te mau vahine ra e na ô maira: “Te mau tamahine no Ierusalema, a faaea na i te taˈi no ˈu. A taˈi râ no outou iho e no ta outou mau tamarii.+ 29 Inaha hoi, te piri mai ra te mau mahana e na ô ai te taata: ‘E oaoa te mau vahine eita ta ratou tamarii e noaa, te mau vahine aita i fanau, e te mau vahine aita ta ratou e aiû!’+ 30 I reira ïa ratou e parau ai i te mau mouˈa: ‘A topa mai i nia ia matou!’ e i te mau aivi: ‘A tapoˈi mai ia matou!’+ 31 I te mea e e tupu te reira ia ota te raau, mai te aha ïa te huru ia mǎrô te raau?”

32 Aratai-atoa-hia maira e piti taata ohipa ino, ia haapohehia e o Iesu.+ 33 Tae atura ratou i te vahi parauhia Apu upoo,+ patiti atura ia Iesu i nia i te pou e na taata ohipa ino atoa i pihai iho ia ˈna, hoê i to ˈna pae atau e hoê i to ˈna pae aui.+ 34 Parau atura râ Iesu: “To ˈu Metua, a faaore i ta ratou hara, aita hoi ratou i ite i ta ratou e rave nei.” Tuu kelero atoa ˈtura ratou i to ˈna ahu.+ 35 Te tia noa ra te taata a hiˈo noa ˈi. Hiˈo faaooo maira râ te mau raatira, a na ô ai: “Ua faaora o ˈna ia vetahi ê. Ia faaora ïa oia ia ˈna iho, o ˈna hoi te Mesia a te Atua, tei maitihia.”+ 36 Faaooo atoa maira te mau faehau ia ˈna, ma te tapiri mai a horoa mai ai i te uaina toavaava,+ 37 a na ô ai: “O oe te Arii o te ati Iuda, a faaora ïa ia oe iho.” 38 Ua papai-atoa-hia i nia noa mai i to ˈna upoo: “Teie te Arii o te ati Iuda.”+

39 Hoê râ o na taata ohipa ino tei patitihia, faaino maira ïa ia Iesu,+ a na ô ai: “O oe te Mesia, e ere anei? A faaora ïa ia oe iho e ia mâua atoa!” 40 Tamaˈi maira te tahi atu ia ˈna e na ô maira: “Aita oe e mǎtaˈu ra i te Atua, ua roohia oe i te hoê â utua? 41 Mea tano roa teie utua no tâua no ta tâua i rave. Teie râ taata, aita ïa i rave i te ohipa ino.” 42 E na ô maira oia: “Iesu, haamanaˈo mai oe ia ˈu ia tae oe i roto i ta oe Faatereraa arii.”+ 43 Na ô atura Iesu ia ˈna: “Oia mau ta ˈu e parau atu ia oe i teie mahana: Ei te paradaiso oe e o vau atoa.”+

44 Tei te area hora 12 i te avatea,* ati ihora te fenua taatoa i te poiri e tae atu i te area hora 3 i te taperaa mahana,*+ 45 no te mea aita faahou te maramarama o te mahana. Mahae ihora te paruru o te nao*+ na ropu.+ 46 Tuô ihora Iesu e na ô atura: “To ˈu Metua, te tuu atu nei au i to ˈu ora*+ i roto i to rima.” I muri aˈe i to ˈna parauraa i te reira, pohe atura oia.*+ 47 Ite aˈera te raatira faehau i te reira e faahanahana ˈtura i te Atua, a na ô ai: “E taata parau-tia mau â teie.”+ 48 E a ite ai te nahoa atoa tei haere mai e mataitai, i te ohipa e tupu ra, hoˈi atura ratou i ǒ ratou ma te tupaipai i to ratou ouma. 49 E te tia noa ra te feia atoa tei matau ia ˈna i te atea ê. To reira atoa te mau vahine tei pee mai ia ˈna na Galilea mai e ua ite ratou i te reira.+

50 E inaha, te vai ra te hoê mero no te Sunederi o Iosepha te iˈoa. E taata maitai oia e te parau-tia.+ 51 (Aita roa ˈtu teie taata i turu i ta ratou opuaraa e ta ratou ohipa.) No Arimataio oia, e oire no to Iudea, e te tiai ra oia i te Faatereraa arii a* te Atua. 52 Haere ihora teie taata i mua ia Pilato e ani maira i te tino o Iesu. 53 Haapou maira oia i te tino,+ vehî atura i te ahu lino maitai, e tuu ihora i roto i te hoê menema* tei paohia i roto i te mato,+ aita â e tino i tuuhia ˈtura i roto. 54 O te mahana Faaineineraa+ ïa e te piri mai ra te Sabati.+ 55 Te mau vahine râ tei na muri mai ia Iesu na Galilea mai, apee maira ïa ia Iosepha, hiˈo atura i te menema,* ite aˈera i te vahi i tuuhia ˈi to Iesu tino,+ 56 e hoˈi atura e faaineine i te mau raau noˈanoˈa e te monoˈi noˈanoˈa. Aita râ ratou i rave i te ohipa i te Sabati+ ia au i te Ture.

24 Teie râ, i te mahana matamua o te hebedoma, haere atura taua mau vahine ra i te poipoi roa i te menema* e ta ratou mau raau noˈanoˈa i faaineine.+ 2 Ite aˈera râ ratou e ua turaihia te ofai e opani ra i te menema,*+ 3 tomo atura ratou i roto e aita i ite atu i te tino o te Fatu ra o Iesu.+ 4 Huru ê ihora ratou i te reira, e inaha, tia maira e piti taata ma te ahu anaana i pihai iho mai. 5 Mehameha ihora te mau vahine, a piˈo noa ˈi te mata i raro. Parau maira raua: “No te aha outou e imi ai i rotopu i te taata pohe i tei ora nei?+ 6 Aita oia i ǒ nei, ua faatiahia hoi oia. A haamanaˈo i ta ˈna i parau ia outou a vai ai oia i Galilea, 7 a na ô ai e ia tuuhia te Tamaiti a te taata nei i te rima o te feia rave hara e ia haapohehia i nia i te pou, e i te toru o te mahana, e tia faahou mai oia.”+ 8 Haamanaˈo ihora ratou i ta ˈna parau,+ 9 faarue aˈera ratou i te menema* e faatia ˈtura i teie mau mea atoa i na 11 e i te toea o te mau pǐpǐ.+ 10 O Maria Magadala, o Ioana, o Maria te metua vahine o Iakobo, e te toea o te mau vahine tei apee mai ia ratou, tei faatia i te reira i te mau aposetolo. 11 Manaˈo ihora râ ratou e aita e auraa to teie mau parau e aita ˈtura i tiaturi i taua mau vahine ra.

12 Tia aˈera râ Petero, horo atura i te menema* e fâao ihora, e ahu lino anaˈe ta ˈna i ite atu. Hoˈi maira oia a uiui noa ˈi ma te maere eaha tei tupu.

13 Inaha râ, i taua noa mahana ra, reva ˈtura e piti pǐpǐ i te hoê oire iti o Emausa te iˈoa, hau atu i te 11 kilometera* i te atea ia Ierusalema, 14 e paraparau noa ihora raua no teie mau mea atoa i tupu na.

15 A paraparau noa ˈi raua, tapiri maira Iesu e haere atura ratou e toru, 16 aita râ raua i ite noa ˈˈe e o Iesu tera.+ 17 Parau maira oia ia raua: “Eaha tera mau parau ta orua i mârô aˈenei?” Tia noa ihora raua ma te mata oto. 18 Pahono atura hoê o raua, o Keleopa te iˈoa: “O oe noa anei te taata ê* i Ierusalema tei ore i ite i te mau mea i tupu i teie mau mahana nei?” 19 Ui maira oia: “Teihea mau mea?” Parau atura raua: “Te mau mea no nia ia Iesu no Nazareta,+ te hoê peropheta o tei faahiti i te mau parau mana e tei rave i te mau ohipa mana i te aro o te Atua e o te taata atoa.+ 20 Ua tuu atu te mau tahuˈa tiaau e te mau raatira ia ˈna ia faautuahia i te pohe,+ e ua patiti ia ˈna i nia i te pou. 21 I manaˈo na râ matou e na teie taata e faaora ia Iseraela.+ Oia mau, e hau atu â, teie te toru o te mahana i tupu ai teie mau mea. 22 Ua maere atoa matou i ta te tahi mau vahine no rotopu ia matou i faatia mai, ua haere hoi ratou i te poipoi roa i te menema*+ 23 e aita i ite atu i to Iesu tino, e ua haere mai ratou e faaite e ua ite atoa ratou e piti melahi i te faraa mai e tei parau e te ora nei Iesu. 24 Haere atura vetahi o matou i te menema,*+ e ite aˈera i te reira mai ta te mau vahine i faatia, aita râ i ite atu ia Iesu.”

25 Parau maira oia: “Aita â i taa ˈtura ia orua e aita â orua i tiaturi atura i te mau mea atoa ta te mau peropheta i parau! 26 Eiaha anei te Mesia ia faaruru i teie mau mea+ e ia faahanahanahia?”+ 27 E faataa maira oia ia raua i ta Mose e tae roa ˈtu i ta te mau peropheta atoa+ i parau no nia ia ˈna i roto i te taatoaraa o te mau Papai.

28 Fatata ˈtura ratou i te oire iti i reira raua e haere atu ai. O Iesu râ, tamau noa ˈtura ïa i to ˈna tere mai te huru ra e te haere ra oia i mua ˈtu â. 29 Ani ru atura râ raua ia ˈna ia faaea mai, a na ô ai: “A faaea mai, no te mea te topa ra te mahana e ua fatata te po.” Tomo ihora oia i roto i to raua fare. 30 A tamaa ˈi ratou,* rave ihora Iesu i te faraoa, haamaitai aˈera i te Atua, ofati ihora i te faraoa e horoa ˈtura ia raua ra.+ 31 Taa aˈera ia raua e o Iesu oia. Moˈe ihora râ Iesu.+ 32 Parau aˈera te tahi i te tahi: “Aita anei to tâua aau i putapû roa a paraparau mai ai oia ia tâua i nia i te purumu, a tatara* maitai mai ai i te mau Papai?” 33 Tia aˈera raua i taua taime ra, hoˈi atura i Ierusalema, e itehia maira ia raua na 11 e te tahi atu mau pǐpǐ tei putuputu mai 34 e tei parau: “Ua faatiahia mai iho â te Fatu e ua fa ˈtu oia ia Simona!”+ 35 Faatia maira raua i tei tupu i nia i te purumu, e i to raua iteraa ia ˈna i te ofatiraa i te faraoa i taa ˈi ia raua e o Iesu oia.+

36 A paraparau noa ˈi ratou, fa maira Iesu i rotopu ia ratou e na ô maira: “Ei ia outou na te hau.”+ 37 Manaˈo ihora ratou e e varua ta ratou e ite ra, mehameha e riaria ihora ratou. 38 Parau maira oia: “No te aha outou e horuhoru ai, e no te aha to outou aau e feaa ˈi? 39 A hiˈo mai i to ˈu rima e to ˈu avae, o vau iho â. A fafa mai e a hiˈo, aita hoi to te hoê varua e iˈo e e ivi mai to ˈu.” 40 E mai ta ˈna i parau, faaite maira oia i to ˈna rima e to ˈna avae. 41 No to ratou oaoa e te maere, aita â ratou i tiaturi. Parau maira oia: “E maa ta outou i ǒ nei?” 42 Horoa ˈtura ratou i te tahi iˈa tunu paa, 43 rave maira oia e amu atura i mua i to ratou mata.

44 Parau maira oia: “A vai ai au ia outou ra, ua parau atu vau+ e ia tupu iho â te mau mea atoa i papaihia no ˈu i roto i te Ture, te mau peropheta e te mau Salamo.”+ 45 Tauturu ihora oia ia ratou ia taa maitai i te auraa o te mau Papai,+ 46 e na ô maira: “Teie tei papaihia: E mauiui te Mesia e e tia mai oia mai te pohe mai i te toru o te mahana,+ 47 e ma to ˈna iˈoa, e porohia te tatarahapa ia faaorehia te hara+ i te mau nunaa atoa,+ na Ierusalema ˈtu ia haamata.+ 48 Na outou ïa e faaite haere i te reira.+ 49 E inaha, e faatae atu vau i nia ia outou i ta to ˈu Metua i fafau. Outou râ, a faaea noa ïa i te oire nei e ia noaa mai ia outou te puai no nia mai.”+

50 Aratai atura Iesu ia ratou i Betania, hopoi aˈera i to ˈna rima i nia e haamaitai maira ia ratou. 51 A haamaitai ai oia ia ratou, vaiiho maira Iesu ia ratou e ravehia ˈtura oia i te raˈi.+ 52 Tipapa maira ratou i mua ia ˈna e hoˈi atura i Ierusalema ma te oaoa rahi.+ 53 E tia noa ˈtura ratou i te hiero, a arue ai i te Atua.+