TE FAATIARAA A MATAIO

1 E buka teie e faatia ra i te oraraa* o Iesu Mesia,* tamaiti na Davida,+ tamaiti na Aberahama:+

17 Teie ïa te mau uˈi atoa: mai ia Aberahama e tae atu ia Davida, 14 uˈi, mai ia Davida e tae atu i te hopoi-ê-raa i Babulonia, 14 uˈi, e mai te hopoi-ê-raa i Babulonia e tae atu i te Mesia, 14 uˈi.

18 Teie ïa te tupuraa o to Iesu Mesia fanauraahia. Ua momoˈahia to ˈna metua vahine o Maria ia Iosepha, a hapû mai ai oia maoti te varua moˈa,*+ hou raua a taatihia ˈi. 19 No te mea râ e taata parau-tia ta ˈna tane faaipoipo* o Iosepha e aita o ˈna i hinaaro e faahaama ia Maria, opua ihora o ˈna e faataa huna noa ia raua.+ 20 I muri aˈe i to ˈna feruriraa i te reira, fa maira ta Iehova* melahi ia ˈna na roto i te moemoeâ, a na ô ai: “E Iosepha, tamaiti a Davida, eiaha oe e mǎtaˈu i te rave ia Maria ta oe vahine faaipoipo i ǒ oe, maoti hoi te varua moˈa i hapû ai oia.+ 21 E fanau oia i te hoê tamaiti e ia topa oe i to ˈna iˈoa o Iesu,*+ e faaora hoi oia i te taata i ta ratou hara.”+ 22 Ua tupu teie mau mea atoa mai ta Iehova* iho â i parau na roto i ta ˈna peropheta, i te na ôraa: 23 “Inaha, e hapû te vahine apî* e e fanau oia i te hoê tamaiti te topahia i te iˈoa o Imanuela,”+ teie te auraa ia hurihia, “Tei ia tatou ra te Atua.”+

24 Ara maira Iosepha e rave atura i ta te melahi a Iehova* i faaue ia ˈna. Ua rave mai oia i ta ˈna vahine faaipoipo i ǒ ˈna. 25 Aita râ oia i taoto ia ˈna e tae roa ˈtu i to Maria fanauraa mai i te hoê tamaiti+ ta ˈna i topa i te iˈoa o Iesu.+

2 I muri aˈe i to Iesu fanauraahia i Betelehema+ i Iudea i te tau o te arii Heroda,*+ inaha, e feia hiˈo fetia* no hitia o te râ tei tae mai i Ierusalema. 2 Na ô atura ratou: “Teihea roa te arii o te ati Iuda tei fanauhia mai nei?+ Ua ite hoi matou i to ˈna fetia i hitia o te râ e te haere mai nei matou e tipapa i mua ia ˈna.” 3 I to te arii Heroda e to Ierusalema taatoa faarooraa i te reira, horuhoru ihora ratou. 4 Haaputuputu ihora te arii i te taatoaraa o te mau tahuˈa tiaau e papai parau e ui atura ia ratou ihea te Mesia* e fanauhia ˈi. 5 Parau maira ratou ia ˈna: “I Betelehema+ i Iudea, ua papai hoi te peropheta: 6 ‘O oe e Betelehema i te fenua o Iuda, e ere roa ˈtu oe i te oire haihai roa ˈˈe i te aro o te mau tavana o Iuda, mai roto mai hoi ia oe e tia mai ai te hoê faatere o te aratai i to ˈu nunaa o Iseraela.’”+

7 Titau huna ˈtura Heroda i te feia hiˈo fetia e ui maitai ihora ia ratou no afea ra te fetia i te faraa mai. 8 Tono atura oia ia ratou i Betelehema ma te parau: “A haere a imi maitai i tera tamarii e ia itehia mai oia e outou, a hoˈi mai e faaite ia ˈu, ia haere atoa hoi au e tipapa i mua ia ˈna.” 9 I muri aˈe i to te arii horoaraa i teie faaueraa, reva ˈtura ratou. E inaha, te na mua ihora ia ratou te fetia ta ratou i ite i hitia o te râ,+ e mau atura i nia ˈˈe i te fare to reira te tamarii. 10 Oaoa roa ihora ratou i te iteraa i te fetia i te mauraa. 11 Tomo aˈera ratou i roto i te fare e ite atura i te tamarii e ia Maria to ˈna metua vahine. Piˈo ihora ratou e tipapa ˈtura i mua ia ˈna. Tatara atoa maira ratou i ta ratou mau vairaa taoˈa e pûpû atura i te auro, te tapau libano e te tapau mura na ˈna. 12 Ua faaara râ te Atua ia ratou na roto i te moemoeâ+ eiaha e hoˈi ia Heroda ra. Reva ˈtura ïa ratou i to ratou fenua na te tahi atu eˈa.

13 I muri aˈe i to ratou revaraa, inaha, fa maira ta Iehova* melahi ia Iosepha na roto i te moemoeâ,+ a na ô ai: “A tia, a rave i te tamarii e to ˈna metua vahine e a horo i Aiphiti. I reira outou e faaea ˈi e na ˈu e parau atu ia hoˈi mai. Te imi nei hoi Heroda i te haapohe i te tamarii.” 14 I taua po ra, tia aˈera Iosepha, rave ihora i te tamarii e i to ˈna metua vahine e horo atura i Aiphiti. 15 Parahi ihora oia i reira e tae noa ˈtu i te poheraa o Heroda. Tupu atura ta Iehova* i parau na roto i ta ˈna peropheta: “Ua pii au i ta ˈu tamaiti ia haere i rapae i Aiphiti.”+

16 Riri roa ihora Heroda i to ˈna iteraa e ua haavare te feia hiˈo fetia ia ˈna. Tono ihora oia i te taata i Betelehema e i te mau vahi tapiri atoa e haapohe pauroa te tamaroa mai te piti matahiti e raro mai, ia au i te taime ta te feia hiˈo fetia i faaite ia ˈna.+ 17 Tupu atura ta te peropheta Ieremia i parau: 18 “E reo tei faaroohia i Rama, e taˈi e te auê. O Rahela+ teie e taˈi ra i ta ˈna mau tamarii e aita oia i hinaaro i te tamahanahanaraa, no te mea aita faahou ratou.”+

19 I to Heroda poheraa, inaha, fa maira ta Iehova* melahi na roto i te moemoeâ+ ia Iosepha i Aiphiti, 20 e na ô maira: “A tia, a rave i te tamarii e to ˈna metua vahine e a haere i te fenua o Iseraela, ua pohe hoi te feia tei imi na i te rave i te ora* o te tamarii.” 21 Tia aˈera ïa oia, rave ihora i te tamarii e i to ˈna metua vahine e hoˈi atura i te fenua o Iseraela. 22 Faaroo ihora râ Iosepha e o Arehelau te faatere ra i Iudea ei mono i to ˈna metua tane ia Heroda, mǎtaˈu ihora oia e haere i ǒ. Ua faaara atoa te Atua ia ˈna na roto i te moemoeâ,+ e reva ˈtura oia i te fenua o Galilea.+ 23 Parahi ihora oia i te oire o Nazareta+ te iˈoa ia tupu hoi ta te mau peropheta i parau: “E parauhia oia no Nazareta.”*+

3 I taua anotau ra, haere maira Ioane+ Bapetizo e poro+ i te medebara no Iudea, 2 a parau ai: “A tatarahapa, ua fatata mai hoi te Faatereraa arii* o te raˈi.”+ 3 O ˈna hoi ta Isaia te peropheta+ i faahiti a na ô ai: “E taata teie e tuô haere nei na te medebara: ‘A faaineine i te eˈa no Iehova!* A haamanina i te purumu no ˈna.’”+ 4 E ahu huruhuru kamela to Ioane e te hatua i nia i to ˈna tauupu.+ E ta ˈna maa, e vivi ïa e te meri.+ 5 Haere maira to Ierusalema ia ˈna ra, to Iudea taatoa e to te tuhaa fenua taatoa ati aˈe Ioridana,+ 6 e bapetizohia* aˈera ratou e ana i roto i te anavai Ioridana,+ a faˈi ai ratou i mua i te taata atoa i ta ratou mau hara.

7 I to ˈna iteraa e rave rahi Pharisea e Sadukea+ i te haereraa mai i te vahi bapetizoraa, na ô atura oia ia ratou: “Fanauˈa ophi taero ma,+ na vai i faaara ia outou e e ora ˈtu outou i te riri rahi tahoo o te Atua e piri mai ra?+ 8 A rave ïa i te mau ohipa o te faaite i to outou tatarahapa. 9 Eiaha e parau i roto i to outou aau: ‘O Aberahama to matou metua.’+ Te parau atu nei hoi au e e nehenehe te Atua e faariro i teie mau ofai ei tamarii na Aberahama. 10 Ua ineine te opahi* no te tâpû i te mau tumu raau i te aˈa. Te tumu raau atoa e ore e faahotu mai i te maa maitai, ia tâpûhia ïa a hurihia ˈtu ai i roto i te auahi.+ 11 O vau nei, te bapetizo nei au ia outou i te pape no te mea ua tatarahapa outou.+ Area te taata e haere mai i muri aˈe ia ˈu, e mana rahi aˈe ïa to ˈna i to ˈu. E ore e tia ia ˈu ia tatara i to ˈna tiaa.+ E bapetizo oia ia outou i te varua moˈa+ e i te auahi.+ 12 Tei roto ta ˈna ope no te sitona i to ˈna rima e e tamâ roa oia i ta ˈna vahi tairiiriraa huero maa* i te tumu, a haaputu atu ai i ta ˈna sitona i roto i te fare vairaa maa. Area te ota, e tanina ïa oia i te auahi+ o te ore e pohe.”

13 Mai Galilea mai, haere maira Iesu i Ioridana ia bapetizohia oia e Ioane.+ 14 Aita râ Ioane i farii, a na ô ai: “O oe te haere mai ia ˈu nei? O vau hoi ta oe e bapetizo e tia ˈi.” 15 Pahono ihora Iesu ia ˈna: “Ia tupu iho â te reira, mea na reira hoi tâua e rave ai i te mau mea tia atoa.” Farii atura Ioane. 16 E oti aˈera Iesu i te bapetizohia, i reira iho, haere maira oia i nia mai raro mai i te pape. E inaha, matara aˈera te raˈi+ e ite aˈera Ioane i te varua o te Atua i te pouraa mai mai te uupa ra i nia ia Iesu.+ 17 Inaha, e reo atoa tei faaroohia no te raˈi+ mai i te na ôraa: “O ta ˈu Tamaiti teie,+ tei herehia, ta ˈu i mauruuru roa.”+

4 Aratai atura te varua moˈa ia Iesu i te medebara e faahema+ ihora te Diabolo ia ˈna.+ 2 I muri aˈe i to Iesu haapaeraa i te maa e 40 ao e 40 po, poia ihora oia. 3 Haere maira te Diabolo e faahema+ ia ˈna a na ô ai: “Mai te peu e tamaiti oe na te Atua, a parau i teie mau ofai ia riro ei faraoa.” 4 Pahono atura râ Iesu: “Ua papaihia: ‘Eita te taata e ora i te maa anaˈe, i te mau parau atoa râ no roto mai i te vaha o Iehova.’”*+

5 Afai atura te Diabolo ia Iesu i te oire moˈa+ e tuu ihora ia ˈna i te vahi teitei roa* o te hiero+ 6 e na ô atura: “Mai te peu e tamaiti oe na te Atua, a ouˈa i raro. Ua papaihia hoi: ‘E faaue oia i ta ˈna mau melahi e paruru ia oe,’ e ‘Na ratou e amo ia oe i to ratou rima ia ore to oe avae e tano i nia i te ofai.’”+ 7 Pahono atura Iesu: “Ua papai-atoa-hia: ‘Eiaha oe e aa ia Iehova* to oe Atua.’”+

8 Afai faahou aˈera te Diabolo ia Iesu i nia i te hoê mouˈa teitei roa, faaite maira ia ˈna i te mau faatereraa arii atoa o te ao nei e to ratou hanahana,+ 9 e na ô maira oia: “Teie mau mea atoa e horoa vau na oe ia tipapa mai oe a haamori mai ai ia ˈu.” 10 Pahono atura Iesu: “A haere ê atu e Satani. Ua papaihia hoi: ‘O Iehova* to oe Atua ta oe e haamori,+ e ia ˈna anaˈe e pûpû ai oe i te hoê taviniraa moˈa.’”+ 11 Vaiiho atura te Diabolo ia ˈna.+ Inaha, haere maira te mau melahi e aupuru ia Iesu.+

12 I to Iesu faarooraa e ua tapeahia Ioane,+ reva ˈtura oia i Galilea.+ 13 E i muri iho i to ˈna faarueraa i Nazareta, haere atura oia e parahi i Kaperenaumi+ tei te pae miti i te fenua o Zebuluna e o Naphatali, 14 ia tupu hoi tei parauhia na roto ia Isaia te peropheta, tei na ô: 15 “E te fenua o Zebuluna e te fenua o Naphatali e, na te eˈa e tae atu i te miti ra, i tera ˈtu pae o Ioridana, e Galilea o te mau nunaa ěê! 16 Ua ite te feia e parahi ra i roto i te poiri i te maramarama rahi e ua anaana te maramarama+ i nia i tei parahi ra i te fenua o te maru pohe.”+ 17 I reira to Iesu haamataraa i te poro: “A tatarahapa, ua fatata mai hoi te Faatereraa arii* o te raˈi.”+

18 Te haere ra oia na te pae miti o Galilea, ite atura oia e piti taeae, o Simona piihia Petero+ e to ˈna taeae o Anederea, te taora ra i te upeˈa, e ravaai hoi raua.+ 19 Na ô atura oia ia raua: “A pee mai ia ˈu, e faariro vau ia orua ei ravaai taata.”+ 20 I reira iho, vaiiho aˈera raua i ta raua upeˈa, e pee maira ia ˈna.+ 21 Mai reira mai, haere atura Iesu e ite ihora oia e piti atu â taata, e taeae raua, o Iakobo e to ˈna taeae o Ioane na tamaiti a Zebedaio.+ Tei roto raua i te poti e to raua metua tane, te tafai ra i te upeˈa. Pii ihora oia ia raua.+ 22 I reira iho, vaiiho aˈera raua i te poti e to raua metua tane, e pee maira ia Iesu.

23 Haere atura oia e ati aˈe Galilea+ a haapii ai i roto i te mau sunago,+ a poro ai i te parau apî oaoa o te Faatereraa arii e a faaora ˈi i te mau huru maˈi atoa o te taata.+ 24 Faaroo aˈera to Suria atoa i ta ˈna i rave, arataihia maira ia ˈna te feia ua rau to ratou maˈi e mauiui,+ tei uruhia e te demoni,+ te hopii+ e te hapepa. Faaora ihora oia i to ratou maˈi. 25 No reira e nahoa rahi tei pee ia ˈna no Galilea, Dekapoli,* Ierusalema, Iudea e no tera ˈtu pae o Ioridana.

5 I to Iesu iteraa i te nahoa taata, pauma aˈera oia i nia i te mouˈa. Parahi ihora oia e haere maira ta ˈna mau pǐpǐ ia ˈna ra. 2 Paraparau ihora oia e haamata ˈtura i te haapii ia ratou a na ô ai:

3 “E oaoa te feia e hiaai ra* i te mau mea pae varua,+ no ratou hoi te Faatereraa arii* o te raˈi.

4 “E oaoa te feia e oto nei, e tamahanahanahia hoi ratou.+

5 “E oaoa te feia mǎrû,*+ e fatu hoi ratou i te fenua.+

6 “E oaoa te feia e poia e e poihâ+ ra i te parau-tia, e mâha hoi to ratou poia e poihâ.+

7 “E oaoa te feia aroha hamani maitai,+ e aroha-hamani-maitai-hia hoi ratou.

8 “E oaoa te feia aau tia,+ e ite hoi ratou i te Atua.

9 “E oaoa te feia faatupu i te hau,*+ e parauhia hoi ratou e ‘tamarii* na te Atua.’

10 “E oaoa te feia tei hamani-ino-hia no te parau-tia,+ no ratou hoi te Faatereraa arii o te raˈi.

11 “E oaoa outou ia faahapa,+ ia hamani ino+ e ia pari haavare te taata ia outou i te mau mea ino atoa no ˈu nei.+ 12 A oaoa e a umere,+ e haamaitairaa+ rahi hoi ta outou i te raˈi, mea na reira hoi te mau peropheta na mua ˈtu ia outou i te hamani-ino-raahia.+

13 “O outou te miti papaa+ o te fenua, ia maaro râ te miti papaa, e nafea ïa e avaava faahou ai? Ua riro atura ïa ei mea faufaa ore, a faaruehia ˈtu ai+ ia taataahihia e te taata.

14 “O outou te maramarama o teie nei ao.+ Te oire i nia i te mouˈa, e ite-maitai-hia ïa. 15 E tutui te taata i te mori, no te tuu atu ïa eiaha i raro aˈe i te hoê farii,* i nia râ i to ˈna vairaa ia maramarama to te fare atoa.+ 16 Ia anaana atoa ïa to outou maramarama i mua i te taata,+ ia ite hoi ratou i ta outou mau ohipa maitatai,+ a faahanahana ˈtu ai i to outou Metua i te raˈi.+

17 “Eiaha outou e manaˈo e ua haere mai au e faaore i te Ture e te mau papai a te mau peropheta. Aita vau i haere mai no te faaore, ia tupu mau râ te reira.+ 18 Oia mau ta ˈu e parau atu: E mou â ïa te raˈi e te fenua, eiaha râ te hoê reta huˈa roa ˈˈe o te Ture aore ra te hoê tapao reta e ia hope roa te mau mea atoa i papaihia i te tupu.+ 19 No reira, te taata o te ofati i te hoê parau iti haihai roa o teie mau faaueraa e o te haapii ia vetahi ê ia na reira atoa, e ore ïa e tia ia ˈna ia ô i roto i te Faatereraa arii o te raˈi. Area o te haapao e o te haapii atu i te reira, e ô ïa i roto i te Faatereraa arii o te raˈi. 20 Te parau atu nei hoi au e ia ore to outou haerea parau-tia ia hau aˈe i to te mau papai parau e to te mau Pharisea,+ e ore roa ïa outou e ô i roto i te Faatereraa arii o te raˈi.+

21 “Ua faaroo outou e i parauhia na i tahito ra: ‘Eiaha roa oe e taparahi pohe i te taata,+ o tei taparahi pohe râ i te taata, ia haavahia ïa oia.’+ 22 Te parau atu nei râ vau e te taata atoa o te tamau i te riri+ i to ˈna taeae, e haavahia ïa. E o tei vahavaha i to ˈna taeae ma te parau ino, ia haavahia ïa oia i te Tiripuna teitei. Area o tei parau e ‘Maamaa,’ e roohia ïa i te auahi o Gehena.*+

23 “No reira, ia hopoi oe i ta oe ô i te fata+ e haamanaˈo ihora oe e ua inoino to taeae ia oe, 24 a vaiiho i ta oe ô i mua i te fata e a haere e farerei i to taeae. Ia hau orua na mua e hoˈi mai ai oe e pûpû i ta oe ô.+

25 “Ia ru oe i te faaafaro i to oe fifi e tei horo ia oe i te haavaraa a haere ai orua i te tiripuna, ia ore hoi oia ia tuu ia oe i te haava, e te haava i te tiai, a hurihia ˈtu ai oe i roto i te tapearaa.+ 26 Oia mau ta ˈu e parau atu: Eita oe e matara mai ia ore ia pee ta oe tarahu e tae noa ˈtu i te moni huˈa* hopea.

27 “Ua faaroo outou e i parauhia na: ‘Eiaha roa oe e faaturi.’+ 28 Te parau atu nei râ vau e te taata atoa o te hiˈo noa i te hoê vahine+ a faahinaaro atu ai ia ˈna, ua faaturi aˈena oia ia ˈna i roto i to ˈna aau.+ 29 No reira, ia hapa oe no to oe mata atau, a paaro i to oe mata atau e a faarue atu.+ Mea maitai aˈe hoi ia ere oe i te hoê mero o to oe tino i te hurihia to oe tino taatoa i Gehena.*+ 30 E ia hapa oe no to oe rima atau, a tâpû ê i te reira e a faarue atu.+ Mea maitai aˈe hoi ia ere oe i te hoê mero o to oe tino i te hurihia to oe tino taatoa i Gehena.*+

31 “I parau-atoa-hia na: ‘Te tane o te faataa i ta ˈna vahine faaipoipo, ia horoa ïa ia ˈna ra i te tahi parau faataaraa.’+ 32 Te parau atu nei râ vau e te tane o te faataa i ta ˈna vahine faaipoipo tei ore i rave i te peu taotoraa tia ore,* e riro ïa ta ˈna vahine ei faaturi ia faaipoipo faahou oia, e te tane o te faaipoipo i te hoê vahine ua taa raua ta ˈna tane faaipoipo mai teie te huru, ua faaturi ïa.+

33 “Ua faaroo atoa outou e i parauhia na i tahito ra: ‘Eiaha roa oe e horeo faufaa ore noa,+ ia rave râ oe i ta oe i euhe ia Iehova.’*+ 34 Te parau atu nei râ vau: Eiaha roa ˈtu e horeo,+ i te raˈi anei, o te terono hoi o te Atua. 35 Eiaha atoa i te fenua, o to ˈna hoi taahiraa avae,+ eiaha atoa ia Ierusalema, o te oire hoi o te Arii rahi.+ 36 Eiaha e horeo i to upoo, e ore hoi e uouo aore ra e ereere te hoê noa ˈˈe rouru ia oe. 37 Ia riro râ ta outou ‘E’ ei e, ta outou ‘Eita’ ei eita.+ Te mea ê atu hoi i te reira, no ǒ mai ïa i te varua ino.+

38 “Ua faaroo outou e i parauhia na: ‘E mata ei mata ïa. E niho ei niho.’+ 39 Te parau atu nei râ vau: Eiaha e aro i te taata ino. I tei poara mai râ i to papariˈa atau, a fariu atoa ˈtu i te tahi atu papariˈa.+ 40 E ia hinaaro te hoê taata e horo ia oe i te haavaraa, a rave atu ai hoê o to oe na ahu, a horoa atoa ˈtu i te tahi atu ahu,+ 41 e ia faaue mai te hoê taata mana ia amo i te tahi mea teiaha hoê kilometera i te atea, a haere ïa na muri ia ˈna e piti kilometera. 42 A horoa i tei anihia mai ia oe e eiaha e huri tua i tei hinaaro e tarahu ia oe i te moni.*+

43 “Ua faaroo outou e i parauhia na: ‘Ia here oe i to oe taata tupu+ e ia hae oe i to oe enemi.’ 44 Tera râ, te parau atu nei au: A here noa i to outou mau enemi+ e a pure noa no tei hamani ino ia outou,+ 45 a faaite atu ai e tamarii* iho â outou na to outou Metua i te raˈi,+ e faahiti hoi oia i to ˈna mahana i nia i te feia ino e te feia maitai atoa e e haamairi oia i te ûa i nia i te feia parau-tia e te feia parau-tia ore atoa.+ 46 Mai te peu o te feia anaˈe e here mai ia outou ta outou e here atu, eaha ïa te apî?+ Te na reira atoa nei te feia titau tute, e ere anei? 47 E ia aroha* outou i to outou noa mau taeae, eaha ïa te mea faahiahia? Te na reira atoa nei te feia o te mau nunaa ěê, e ere anei? 48 Ia tia roa hoi outou mai to outou Metua tia roa i te raˈi.+

6 “A ara eiaha e rave i te parau-tia i mua i te taata ia itehia mai outou,+ aˈunei to outou Metua i te raˈi e ore ai e haamaitai ia outou. 2 No reira, ia horoa oe i te ô aroha hamani maitai,* eiaha e faaoto na mua i te pu mai ta te feia haavarevare e rave nei i roto i te mau sunago e na te mau aroâ ia aruehia ratou e te taata. Oia mau ta ˈu e parau atu: Te arueraahia ratou e te taata, tera anaˈe ta ratou haamaitairaa e aita ˈtu.* 3 O oe râ, ia horoa oe i te ô aroha hamani maitai, eiaha to oe rima aui ia ite i ta to oe rima atau e rave ra, 4 ia ore te taata ia ite i ta oe ô aroha hamani maitai. E na to Metua o te ite i te mau mea atoa e haamaitai ia oe.+

5 “E ia pure outou, eiaha mai ta te feia haavarevare.+ Mea au hoi na ratou e pure tia noa i roto i te mau sunago e i te mau maaraa purumu ia itehia mai ratou.+ Oia mau ta ˈu e parau atu: Te arueraahia ratou e te taata, tera anaˈe ta ratou haamaitairaa e aita ˈtu.* 6 Ia pure râ oe, a tomo i roto i to oe piha, a tapiri i te opani e a pure i to Metua i te raˈi.+ E na to Metua o te ite i te mau mea atoa e haamaitai ia oe. 7 Ia pure oe, eiaha e tahana i te parau mai ta te feia o te mau nunaa ěê. Te manaˈo ra hoi ratou e no te rahi o te parau e faaroohia ˈi ratou. 8 Eiaha ïa outou e rave i ta ratou peu, ua ite hoi to outou Metua i ta outou e hinaaro mau+ hou outou a ani atu ai ia ˈna.

9 “E na ô ïa outou ia pure:+

“‘To matou Metua i te raˈi, ia moˈa*+ to oe iˈoa.+ 10 Ia tae mai ta oe Faatereraa arii.*+ Ia tupu to oe hinaaro+ i te fenua nei,+ mai i te raˈi atoa na. 11 Horoa mai na i ta matou maa no teie mahana,+ 12 e faaore mai na i ta matou mau tarahu,* mai ia matou atoa i faaore i tei tarahu ia matou.+ 13 E tauturu mai na ia matou ia ore ia hema,+ faaora mai na râ ia matou i te varua ino.’+

14 “Ia faaore hoi outou i ta te taata ra hapa, e faaore atoa mai to outou Metua i ta outou.+ 15 Ia ore râ outou e faaore i ta te taata ra hapa, e ore atoa to outou Metua e faaore i ta outou.+

16 “Ia haapae outou i te maa,+ eiaha to outou ei mata oto mai to te feia haavarevare, o te faaea repo noa* ia ite te taata e te haapae ra ratou i te maa.+ Oia mau ta ˈu e parau atu: Te arueraahia ratou e te taata, tera anaˈe ta ratou haamaitairaa e aita ˈtu.* 17 O oe râ, ia haapae oe i te maa, a parai i to oe upoo i te monoˈi e a horoi i to oe mata, 18 ia itehia mai ta oe haapaeraa maa e to oe Metua, eiaha râ e te taata. E na to Metua o te ite i te mau mea atoa e haamaitai ia oe.

19 “A faaea i te haapue i te taoˈa na outou i te fenua nei,+ e pau hoi te reira i te amuhia e te manumanu, e pê i te tutae auri e e haruhia e te eiâ. 20 A haapue râ i te taoˈa na outou i te raˈi,+ e ore hoi te reira e pau i te amuhia e te manumanu, e pê i te tutae auri+ e e haruhia e te eiâ. 21 Te vahi hoi to reira ta outou taoˈa, to reira atoa to outou aau.

22 “Te mori o te tino, o te mata ïa.+ Ia hiˈo to oe mata i te hoê noa mea,* e maramarama* ïa to oe tino taatoa. 23 Ia nounou*+ râ to oe mata, e poiri ïa to oe tino taatoa. Mai te peu te maramarama i roto ia oe, e poiri mau, auê ïa te rahi o te poiri e!

24 “Eita te hoê taata e nehenehe e tavini e piti fatu, e hae hoi oia i te hoê e e here oia i te tahi atu,+ aore ra e faatura oia i te hoê e e vahavaha oia i te tahi atu. Eita outou e nehenehe e tavini i te Atua e te Moni.+

25 “No reira vau e parau atu ai: A faaea i te haapeapea+ no to outou ora* eaha ta outou e amu aore ra eaha ta outou e inu, aore ra no to outou tino eaha ta outou e oomo.+ E ere anei mea faufaa aˈe te ora* i te maa e te ahu?+ 26 A hiˈo maitai na i te mau manu o te reva.+ Eita ratou e ueue i te huero, e ooti e e haaputu i te maa. Teie râ, te faaamu ra to outou Metua i te raˈi ia ratou. E ere anei mea faufaa aˈe outou ia ratou? 27 O vai o outou e nehenehe e faaroa ˈtu â i to ˈna ora hoê noa ˈˈe kubiti* ia haapeapea oia?+ 28 E eaha outou e haapeapea ˈi no te ahu? A hiˈo maitai na i te mau tiare, e nafea ratou e tupu ai. Eita ratou e rave i te ohipa, eita atoa e hamani i te ahu. 29 Te parau atu nei râ vau e aita te ahu o Solomona,+ noa ˈtu to ˈna unauna rahi, i hau aˈe i te nehenehe i to te hoê o teie mau tiare. 30 Te faaahu nei te Atua i teie mau tiare, o te tupu nei i teie mahana, a hurihia ˈtu ai ananahi i roto i te auahi. E hau atu â ïa oia i te faaahu ia outou te feia mea iti te faaroo! 31 Eiaha ïa outou e haapeapea,+ a na ô ai: ‘Eaha ta matou e amu?’ aore ra ‘Eaha ta matou e inu?’ aore ra ‘Eaha ta matou e oomo?’+ 32 O teie mau mea hoi ta te mau nunaa e titau rahi nei. Ua ite to outou Metua i te raˈi e e hinaaro iho â outou i teie mau mea.

33 “No reira, a tamau i te imi na mua i te Faatereraa arii a te Atua e ta ˈna parau-tia, e e horoahia mai teie mau mea atoa na outou.+ 34 Eiaha roa ïa e haapeapea no ananahi,+ no te mea e haapeapearaa ê to ananahi. Tera mahana to ˈna fifi.

7 “A faaea i te haava+ ia ore outou ia haavahia, 2 e haavahia hoi outou mai ta outou e haava ra ia vetahi ê,+ e tei te huru o ta outou faitoraa e faitohia ˈi ta outou.+ 3 Eaha ïa oe e hiˈo ai i te raau huˈa roa i roto i te mata o to oe taeae, aita râ oe e tâuˈa ra i te pou i roto i to oe iho mata?+ 4 Aore ra e nafea oe e nehenehe ai e parau i to oe taeae: ‘Vaiiho na ia ˈu ia iriti i te raau huˈa roa i roto i to oe mata,’ e inaha e pou to roto i to oe iho mata? 5 Haavarevare! A iriti na mua i te pou i roto i to oe iho mata, i reira oe e ite maitai ai e nafea ia iriti i te raau huˈa roa i roto i te mata o to oe taeae.

6 “Eiaha e horoa i te mea moˈa na te urî, eiaha atoa e hue i ta outou mau poe i te puaa ra+ ia ore ratou ia taataahi i te reira e ia ore outou ia pepe maitai ia ratou.

7 “A tamau i te ani, e horoahia mai.+ A tamau i te imi, e itehia mai. A tamau i te patoto, e iritihia mai.+ 8 Te taata hoi e ani, e noaa mai ta ˈna.+ Te taata hoi e imi, e itehia mai e ana. Te taata hoi e patoto, e iritihia mai. 9 O vai hoi o outou, ia ani mai ta ˈna tamaiti i te faraoa, e horoa ˈtu ïa i te ofai? 10 Aore ra ia ani mai oia i te iˈa, eita oia e horoa ˈtu i te ophi, e ere anei? 11 No reira, noa ˈtu e e taata ino outou, ua ite outou i te horoa i te mau mea maitatai na ta outou mau tamarii, hau atu â ïa to outou Metua i te raˈi i te horoa i te mau mea maitatai+ na te feia e ani atu ia ˈna!+

12 “Te mau mea atoa ïa ta outou e hinaaro ia rave te taata no outou, a rave atoa ïa no ratou.+ O ta te Ture ïa e ta te mau papai a te mau peropheta e haapii mai ra.+

13 “A tomo na te uputa pirihao,+ mea ateatea hoi te uputa e mea aano te eˈa e tae atu ai i te haamouraa, e mea rahi o te na reira i te haere. 14 Mea pirihao râ te uputa e mea ôaôa te eˈa e tae atu ai i te ora, e aita i rahi te taata o te ite atu i taua eˈa ra.+

15 “A ara i te mau peropheta haavare+ o te haere mai ia outou mai te mamoe ra te huru,+ area o roto ra, e luko taehae ïa.+ 16 I ta ratou mau hotu e ite maitai ai outou ia ratou. E pofaihia anei te vine aore ra te suke i nia i te raau taratara?+ 17 Oia atoa, e faahotu mai te tumu raau maitai i te maa maitai, area te tumu raau ino i te maa ino.+ 18 E ore roa te hoê tumu raau maitai e faahotu mai i te maa ino, e ore atoa te hoê tumu raau ino e faahotu mai i te maa maitai.+ 19 Te mau tumu raau atoa o te ore e horoa mai i te maa maitai, e tâpûhia ïa a hurihia ˈtu ai i roto i te auahi.+ 20 Oia mau, i ta ratou ïa mau hotu e ite maitai ai outou i taua mau taata ra.+

21 “E ere o te feia atoa e parau mai: ‘E te Fatu, e te Fatu,’ te ô i roto i te Faatereraa arii* o te raˈi, o te taata anaˈe râ o te rave i te hinaaro o to ˈu Metua i te raˈi.+ 22 E rave rahi te parau mai ia ˈu ia tae i tera mahana: ‘E te Fatu, e te Fatu,+ aita anei matou i tohu ma to oe iˈoa, i tiavaru i te demoni ma to oe iˈoa e i faatupu i te mau ohipa mana ma to oe iˈoa?’+ 23 Teie ïa ta ˈu e parau atu ia ratou: ‘Aita roa vau i ite ia outou! Haere ê atu, outou e ofati nei i te ture!’+

24 “No reira, o te faaroo i ta ˈu i parau mai nei e o te haapao atu, e au ïa oia i te hoê taata feruriraa paari tei faatia i to ˈna fare i nia i te pǎpǎ.+ 25 Mairi maira te ûa, tahe maira te pape pue, farara maira te mataˈi i nia i taua fare ra, aita râ i parari no te mea ua haamauhia i nia i te pǎpǎ. 26 Area o te ore e faaroo i ta ˈu i parau mai nei e o te ore e haapao atu, e au ïa oia i te taata maamaa tei faatia i to ˈna fare i nia i te one.+ 27 Mairi maira te ûa, tahe maira te pape pue, farara maira te mataˈi i nia i taua fare ra.+ Marua ihora te fare e parari roa ˈtura.”

28 O te parau hopea ïa teie a Iesu e ua maere te nahoa i ta ˈna huru haapiiraa,+ 29 te haapii ra hoi oia ia ratou eiaha mai ta ratou mau papai parau, mai te hoê râ taata e mana to ˈna+ no ǒ mai i te Atua ra.

8 Pou ihora Iesu mai nia mai i te mouˈa, e pee maira te hoê nahoa rahi ia ˈna. 2 E inaha, haere maira te hoê lepera e tipapa ihora i mua ia ˈna, a na ô ai: “E te Fatu, ia tia ia oe, e nehenehe oe e tamâ ia ˈu.”+ 3 Toro ihora ïa Iesu i to ˈna rima e tapea ˈtura ia ˈna a parau atu ai: “E tia ia ˈu! Ia mâ oe.”+ Ora ihora to ˈna lepera.+ 4 Parau atura Iesu ia ˈna: “Haapao maitai, eiaha oe e faaite i te taata,+ a haere râ e faaite ia oe i te tahuˈa,+ a pûpû atu ai i te ô i faauehia mai e Mose,+ ia ite ratou e ua ora to oe maˈi.”

5 I to ˈna tomoraa ˈtu i Kaperenaumi, haere maira te hoê raatira faehau ia ˈna ma te taparuparu+ 6 a na ô ai: “E te Fatu, te tarava noa ra ta ˈu tavini i te fare, e hapepa hoi oia e ua oti roa oia i te mauiui.” 7 Parau atura oia: “Ia tae atu vau, e faaora vau i to ˈna maˈi.” 8 Pahono maira te raatira faehau: “Eita e tano ia ˈu ia farii ia oe i to ˈu fare. A parau noa râ i te tahi parau, e ora ïa te maˈi o ta ˈu tavini. 9 E taata hoi te faatere mai ia ˈu, e faehau atoa ta ˈu o te auraro mai ia ˈu, e ia parau vau i teie faehau: ‘A haere!’ e haere oia, e i te tahi atu: ‘A haere mai!’ e haere mai oia, e i ta ˈu tavini: ‘A na ô!’ e na ô oia.” 10 I to Iesu faarooraa i taua parau ra, maere ihora oia e na ô atura i tei pee mai ia ˈna: “Oia mau ta ˈu e parau atu: Aita vau i ite aˈenei i te faaroo rahi mai teie i Iseraela.+ 11 Te parau atu nei râ vau e e rave rahi no hitia o te râ e no tooa o te râ o te haere mai, a tarava ˈtu ai i te amuraa maa e o Aberahama, Isaaka e Iakoba i roto i te Faatereraa arii* o te raˈi.+ 12 Area te mau tamarii* a te Faatereraa arii, e hurihia ïa i roto i te poiri i rapae. I reira ratou e taˈi ai e to ratou niho e mauu ai i te ahoaho.”+ 13 Na ô atura Iesu i te raatira faehau: “A haere. Mai ta oe i tiaturi, ia tupu ïa.”+ I reira iho, ora ˈtura te maˈi o te tavini.+

14 E i to Iesu tomoraa i roto i te fare o Petero, ite atura oia i te metua vahine hoovai+ o Petero e tarava noa ra, e fiva to ˈna.+ 15 Tapea ihora ïa Iesu i to ˈna rima,+ e pee atura te fiva. Tia aˈera te vahine e faaineine ihora i te maa na ratou. 16 E ahiahi ihora, arataihia maira ia Iesu ra e rave rahi tei uruhia e te demoni, tiavaru ihora oia i taua mau varua ra i te hoê noa reo, e faaora ˈtura i te feia maˈi atoa, 17 ia tupu hoi ta te peropheta Isaia i parau: “Na ˈna iho i rave i to tatou mau maˈi e ua hopoi ê i to tatou mau mauiui.”+

18 I to Iesu iteraa e e nahoa taata te haaati ra ia ˈna, faaue aˈera oia i ta ˈna mau pǐpǐ ia fano i tera ˈtu pae o te hiti roto.+ 19 Haere maira te tahi papai parau e na ô maira: “Orometua, e pee au ia oe i te mau vahi atoa ta oe e haere.”+ 20 Parau atura râ Iesu: “E apoo to te alope e e ofaaraa to te manu o te raˈi. Te Tamaiti râ a te taata nei, aita ïa to ˈna e vahi taotoraa.”+ 21 Na ô maira te tahi pǐpǐ: “E te Fatu, a faatia na oe ia ˈu ia haere na mua e huna i to ˈu metua tane.”+ 22 Parau atura Iesu: “A pee noa mai ia ˈu, e a vaiiho na tei pohe e huna i tei pohe.”+

23 Haere atura oia i nia i te poti e ta ˈna mau pǐpǐ na muri ia ˈna.+ 24 E inaha, e mataˈi vero tei farara mai i nia i te miti, î aˈera te poti i te miti. Area Iesu, te taoto noa ra ïa.+ 25 Tapiri maira te mau pǐpǐ e faaara ia ˈna, a na ô atu ai: “E te Fatu, a faaora ia tatou, a pohe tatou!” 26 Parau atura râ oia: “Eaha outou e mǎtaˈu* roa ˈi, feia mea iti te faaroo?”+ Tia aˈera oia e tamaˈi ihora i te mataˈi e te miti, mania roa ˈtura.+ 27 Maere ihora ïa ratou e na ô aˈera: “O vai hoi teie taata? E faaroo atoa te mataˈi e te miti ia ˈna.”

28 I to Iesu taeraa i tera ˈtu pae o te roto, i te tuhaa fenua o Gadara, haere maira e piti tane tei uruhia e te demoni na roto mai i te vahi hunaraa.+ No to raua taehae, aita e taata e tae ia haere na taua eˈa ra. 29 E inaha, tuô aˈera ratou: “Eaha ta oe ohipa i ǒ nei, te Tamaiti a te Atua?+ Ua haere mai anei oe e haamauiui ia matou+ hou te tau faataahia?”+ 30 E nǎnǎ puaa te amu ra i te maa i te atea ê.+ 31 Taparu aˈera te mau demoni ia ˈna: “Ia tiavaru oe ia matou, a tuu ia matou i roto i te nǎnǎ puaa.”+ 32 Parau atura ïa oia: “Haere!” Haere maira ratou i rapae e tomo aˈera i roto i te puaa, e inaha horo ihora te nǎnǎ taatoa e topa ˈtura i roto i te miti na nia mai i te mato,* e pohe roa aˈera. 33 Horo ê atura râ te mau tiai puaa i te oire, e faatia pauroa ˈtura i te ohipa i tupu, oia atoa no na tane tei uruhia e te demoni. 34 E inaha, haere maira to te oire atoa e farerei ia Iesu, e i to ratou iteraa ia ˈna, onoono maira ia ˈna ia faarue mai i to ratou fenua.+

9 Haere atura ïa Iesu i nia i te poti, fano atura i te tahi aˈe pae e tae ihora i to ˈna oire.+ 2 E inaha, te afai maira te tahi mau taata ia ˈna ra i te hoê hapepa e tarava noa ra i nia i te roˈi. I to Iesu iteraa i to ratou faaroo, na ô ihora oia i te hapepa: “A faaitoito, ta ˈu tamaiti! Ua faaorehia ta oe mau hara.”+ 3 Na ô ihora te tahi mau papai parau i roto ia ratou: “Te faaino nei teie taata i te Atua.” 4 Inaha ua ite Iesu i to ratou manaˈo, na ô atura oia: “Eaha outou e manaˈo ino ai i roto i to outou aau?+ 5 Eaha hoi te mea ohie aˈe ia parau: ‘Ua faaorehia ta oe mau hara,’ aore ra: ‘A tia, a haere’?+ 6 Ia ite mai râ outou e e mana to te Tamaiti a te taata nei i te fenua e faaore i te hara . . . ” Na ô atura oia i te hapepa: “A tia i nia, a rave i to oe roˈi e a haere i to oe fare.”+ 7 Tia aˈera taua taata ra e haere atura i to ˈna fare. 8 I to ratou iteraa i te reira, mǎtaˈu ihora te nahoa taata e faahanahana ˈtura i te Atua, tei horoa i taua mana ra i te taata.

9 A haere noa ˈi Iesu mai reira mai, ite atura oia i te hoê tane e parahi ra i te fare aufauraa tute, o Mataio te iˈoa, e na ô atura ia ˈna: “A pee mai ia ˈu.” Tia aˈera taua taata ra e pee maira ia ˈna.+ 10 I muri aˈe, a tamaa noa ˈi Iesu e ta ˈna mau pǐpǐ*+ i ǒ Mataio, inaha e rave rahi titau tute e taata rave hara tei haere mai e tamaa atoa* i pihai iho ia ratou. 11 A ite ai râ te mau Pharisea i te reira, parau atura ratou i ta ˈna mau pǐpǐ: “No te aha ta outou orometua e tamaa ˈi e te feia titau tute e te feia rave hara?”+ 12 I to Iesu faarooraa i ta ratou parau, na ô atura oia: “E ere te taote no te feia oraora maitai, no te feia maˈi râ.+ 13 No reira, a haere a haapii i te auraa o teie parau: ‘O te aroha hamani maitai ta ˈu e hinaaro, eiaha te tusia.’+ Ua haere mai hoi au e titau i te feia rave hara ia tatarahapa, eiaha râ te feia parau-tia.”

14 Haere maira te mau pǐpǐ a Ioane ia Iesu ra e ui maira: “E peu matauhia e matou e te mau Pharisea ia haapae i te maa, no te aha ïa ta oe mau pǐpǐ e ore ai e na reira?”+ 15 Na ô atura Iesu ia ratou: “Aita e tumu e oto ai te mau hoa o te tane faaipoipo+ a faaea noa mai ai oia i rotopu ia ratou, e ere anei? E tae mai râ te mau mahana e hopoi-ê-hia ˈi te tane faaipoipo, i reira ïa ratou+ e haapae ai i te maa. 16 Aita e taata e tafai i te ahu apî i nia i te ahu tahito, e tô hoi te ahu apî i nia i te ahu tahito, a rahi atu ai te mutu.+ 17 Aita atoa e taata e tuu i te uaina apî i roto i te pute uaina* tahito. Ia na reira ratou, e mahae te pute uaina, e tahe te uaina, e ino atoa te pute uaina. E tuu râ te taata i te uaina apî i roto i te pute uaina apî, a ore atu ai e mâuˈa na mea e piti.”

18 A faahiti noa ˈi Iesu i teie mau parau, inaha tapiri maira te hoê tavana e tipapa ihora i mua ia ˈna, a na ô ai: “Ua pohe atura paha ïa ta ˈu tamahine, a haere mai na râ e tuu i to rima i nia ia ˈna, e ora ïa oia.”+

19 Tia aˈera Iesu i nia e pee atura ia ˈna, e ta ˈna atoa mau pǐpǐ. 20 E inaha, haere maira te hoê vahine a 12 matahiti to ˈna tapahi-noa-raa+ i muri ia Iesu e tapea maira i to ˈna hiti ahu,+ 21 i parau noa na hoi oia i roto i to ˈna aau: “Ia tapea noa ˈtu vau i to ˈna ahu, e ora ïa to ˈu maˈi.” 22 Fariu aˈera Iesu i muri e ite atura ia ˈna, e parau ihora: “A faaitoito, ta ˈu tamahine! No to faaroo i ora ˈi oe.”+ Ora ihora te maˈi o taua vahine ra.+

23 I to Iesu tomoraa ˈtu i roto i te fare o te tavana e iteraa i te feia faataˈi vivo e te nahoa taata e auê ra,+ 24 parau atura oia: “A haere i rapaeau, aita hoi te potii i pohe, te taoto nei râ.”+ Ata faaooo aˈera ratou ia ˈna. 25 I to te nahoa taata haereraa ˈtu i rapaeau, tomo ihora Iesu i roto i te vahi to reira te potii, tapea ˈtura i to ˈna rima,+ e tia maira te tamahine.+ 26 Papu, ua atutu teie parau e ati aˈe taua tuhaa fenua atoa ra.

27 Te haere mai ra Iesu mai reira mai a pee mai ai e piti matapo+ ia ˈna a pii noa ˈi: “Aroha* mai ia mâua, Tamaiti a Davida.” 28 A tomo atu ai Iesu i roto i te tahi fare, tapiri maira na matapo ia ˈna. Ui atura Iesu ia raua: “Tiaturi anei orua e e araara to orua mata ia ˈu?”+ Pahono maira raua: “E, e te Fatu.” 29 Tapea ˈtura oia i to raua mata+ a parau ai: “Mai ta orua i tiaturi, ia tupu ïa.” 30 Araara aˈera to raua mata. Hau atu â, faaara maitai atura Iesu ia raua a na ô ai: “Eiaha roa e faaite atu i te taata.”+ 31 I to raua râ haereraa ˈtu i rapaeau i te fare, faaatutu aˈera raua i te parau o Iesu na taua tuhaa fenua atoa ra.

32 Te haere atu ra hoi raua, inaha arataihia maira ia Iesu ra te hoê vava tei uruhia e te demoni,+ 33 e i to Iesu tiavaruraa i te demoni, paraparau ihora te vava.+ Maere roa ihora te nahoa taata e na ô atura: “Aita teie huru ohipa i itehia aˈenei i Iseraela.”+ 34 Parau aˈera râ te mau Pharisea: “I te mana hoi o te raatira o te mau demoni e tiavaru ai oia i te mau demoni.”+

35 Haere atura Iesu na roto i te mau oire rahi e oire rii, i te haapiiraa i roto i te mau sunago, te pororaa i te parau apî oaoa o te Faatereraa arii* e te faaoraraa i te mau huru maˈi atoa.+ 36 I to ˈna iteraa i te nahoa taata, aroha roa ihora oia ia ratou,+ no te mea ua rave-ino-hia ratou e aita i tâuˈahia mai te mau mamoe aita e tiai.+ 37 Na ô atura oia i ta ˈna mau pǐpǐ: “Te rahi mau nei te auhune, mea iti râ te rave ohipa.+ 38 A taparu ïa i te Fatu o te auhune ia tono mai i te rave ohipa no te ootiraa.”+

10 Titau ihora ïa Iesu i ta ˈna na 12 pǐpǐ e horoa ˈtura i te mana ia vî te mau varua viivii+ e ia tiavaru ia ratou, e ia faaora i te mau huru maˈi atoa.

2 Teie te iˈoa o na 12 aposetolo:+ Na mua, Simona piihia Petero+ raua Anederea+ to ˈna taeae, Iakobo raua Ioane+ to ˈna taeae, na tamaiti a Zebedaio, 3 Philipa raua Baretolomea,+ Toma+ raua Mataio+ te titau tute, Iakobo te tamaiti a Alephaia e Tadaio, 4 Simona piihia “tei itoito rahi” e Iuda Isakariota tei tuu ia Iesu i to ˈna mau enemi i muri aˈe.+

5 O taua na 12 ra ta Iesu i tono ma te faaue atu:+ “Eiaha e haere i ǒ te feia o te mau nunaa ěê e eiaha e tomo atu i te mau oire no Samaria,+ 6 a haere noa râ i te mau mamoe tei moˈe o te utuafare o Iseraela.+ 7 A poro haere ai outou, a na ô atu: ‘Ua fatata mai te Faatereraa arii* o te raˈi.’+ 8 A faaora i te maˈi,+ a faatia i te feia pohe, a faaora i te mau lepera, a tiavaru i te mau demoni. Mea horoa-noa-hia mai ta outou, a horoa noa atoa ïa. 9 Eiaha ei auro, ario aore ra veo i roto i to outou hatua,+ 10 eiaha ei pute maa no te tere, eiaha ei piti ahu,* tiaa, turutootoo,+ e fanaˈo hoi te rave ohipa i ta ˈna maa.+

11 “I te mau oire aore ra oire rii e tomo ai outou, a imi i te feia e farii ia outou, e a faaea i reira e reva noa ˈtu outou.+ 12 Ia tomo outou i roto i te fare, a aroha ˈtu i te utuafare. 13 Ia farii ratou ia outou, ei nia ïa ia ratou te hau ta outou e faatae atu.+ Ia ore râ ratou e farii mai, ia hoˈi ïa to outou hau i nia ia outou. 14 I te mau vahi atoa e ore ai te taata e farii ia outou aore ra e faaroo i ta outou parau, a haere mai i rapaeau i tera fare aore ra oire, e a tûtû i te repo o to outou avae.+ 15 Oia mau ta ˈu e parau atu: Mea mâmâ aˈe te utua a te fenua o Sodoma e Gomora+ i ta taua oire ra i te Mahana Haavaraa.

16 “Inaha, te tono nei au ia outou mai te mau mamoe i rotopu i te mau luko. Ia haapao maitai ïa outou mai te ophi ra e te hapa ore mai te uupa ra.+ 17 A ara i te taata, e tuu hoi ratou ia outou i te haavaraa+ e e hui ia outou+ i roto i ta ratou mau sunago.+ 18 E afaihia outou i mua i te mau tavana e te mau arii+ no ˈu nei, ia ite hoi ratou e te feia o te mau nunaa ěê+ i ta outou e tiaturi ra. 19 Ia tapeahia râ outou, eiaha e haapeapea eaha ta outou e parau aore ra e nafea, no te mea e faaitehia ˈtu ta outou e parau i taua hora ra,+ 20 e ere hoi o outou anaˈe te parau atu, o te varua râ o to outou Metua te parau atu na roto ia outou.+ 21 Hau atu â, e tuu te taata i to ˈna taeae aore ra te metua tane i ta ˈna tamarii ia haapohehia e e orure hau te tamarii i te metua, a tuu atu ai i to ratou metua ia haapohehia.+ 22 E hae te taata atoa ia outou no to ˈu nei iˈoa.+ Te taata râ tei faaoromai tamau* e tae noa ˈtu i te hopea, e ora ïa.+ 23 Ia hamani ino ratou ia outou i te hoê oire, a horo i te tahi atu oire.+ Oia mau hoi ta ˈu e parau atu: E ore e ati te mau oire o Iseraela ia outou e tae mai ai te Tamaiti a te taata nei.

24 “Aita te hoê piahi* i hau aˈe i ta ˈna orometua, aita atoa te hoê tavini i hau aˈe i to ˈna fatu.+ 25 Ia riro te piahi mai ta ˈna orometua e te tavini mai to ˈna fatu,+ atira ïa. Mai te peu i mairi na te taata i te iˈoa o te fatu fare, o Belezebuba,*+ tera atoa ïa te iˈoa ta ratou e mairi no to ˈna utuafare! 26 Eiaha ïa outou e mǎtaˈu ia ratou, aita hoi e mea i tapoˈihia e ore e hohorahia, e aita e mea huna e ore e itehia.+ 27 Ta ˈu e parau ia outou i roto i te poiri, a faaite atu ïa i roto i te maramarama, e ta ˈu e parau i roto i to outou tariˈa, a faaite ïa na nia mai i te fare.+ 28 E eiaha e mǎtaˈu i te feia e haapohe ia outou, e ore râ e tia ia faaore i te ora.*+ A mǎtaˈu râ i te Atua, e tia hoi ia ˈna ia faaore roa i te ora* e te tino i Gehena.*+ 29 E piti manu rii te hoohia i te hoê noa moni huˈa haihai roa,* e ere anei? Ia mairi noa ˈtu râ hoê o ratou i raro, e ite iho â to outou Metua i te reira.+ 30 Area outou, ua taio-pauroa-hia te rouru o to outou upoo. 31 Eiaha ïa e mǎtaˈu. Mea faufaa aˈe outou i te manu rii e rave rahi.+

32 “No reira, te taata o te faaite i mua ia vetahi ê e pǐpǐ oia na ˈu,+ e faaite atoa vau i mua i to ˈu Metua i te raˈi e pǐpǐ oia na ˈu.+ 33 Te taata râ o te haavare e aita oia i ite ia ˈu i mua ia vetahi ê, e parau atoa vau e aita vau i ite ia ˈna i mua i to ˈu Metua i te raˈi.+ 34 Eiaha e manaˈo ua haere mai au e hopoi i te hau i te fenua nei. Aita vau i haere mai e hopoi i te hau, i te ˈoˈe râ.+ 35 Ua haere mai hoi au e faatupu i te amahamaha, e patoi te tamaiti i to ˈna metua tane, te tamahine i to ˈna metua vahine, e te hunoa vahine i to ˈna metua vahine hoovai.+ 36 Oia mau te enemi o te taata, o te mau mero ïa o to ˈna iho utuafare. 37 Te taata mea here aˈe na ˈna i to ˈna metua tane aore ra to ˈna metua vahine ia ˈu nei, e ore ïa e tia ia ˈna ia riro ei pǐpǐ na ˈu, e te taata mea here aˈe na ˈna i ta ˈna tamaiti aore ra ta ˈna tamahine ia ˈu nei, e ore ïa e tia ia ˈna ia riro ei pǐpǐ na ˈu.+ 38 E tei ore e hinaaro e amo i ta ˈna pou haamauiuiraa* e e pee mai ia ˈu, e ore ïa e tia ia ˈna ia riro ei pǐpǐ na ˈu.+ 39 O tei tapea i to ˈna ora,* e ere oia i te reira, e tei ere i to ˈna ora* no ˈu nei, e noaa faahou mai ia ˈna te reira.+

40 “O tei farii ia outou, ua farii atoa ia ˈu, e tei farii ia ˈu, ua farii atoa i Tei tono mai ia ˈu.+ 41 O tei farii i te hoê peropheta no te mea e peropheta, e fanaˈo ïa i te haamaitairaa a te peropheta,+ e tei farii i te hoê taata parau-tia no te mea e taata parau-tia, e fanaˈo ïa i te haamaitairaa a te taata parau-tia. 42 E o tei horoa i te tahi noa auˈa pape toˈetoˈe na te hoê o teie feia rii no te mea e pǐpǐ oia na ˈu, oia mau ta ˈu e parau atu: E ore roa oia e ere i ta ˈna haamaitairaa.”+

11 E oti aˈera Iesu i te horoa i te mau faaueraa i ta ˈna na 12 pǐpǐ, haere atura oia e haapii e e poro na te tahi atu mau oire.+

2 Faaroo ihora râ Ioane i roto i te fare tapearaa+ i te mau ohipa a te Mesia, e tono ihora e piti o ta ˈna mau pǐpǐ+ 3 e ui ia ˈna: “O oe anei ta matou i tiai noa na, aore ra e taata ê te tae mai?”+ 4 Pahono ihora Iesu ia raua: “A haere e faatia ia Ioane i ta orua e faaroo e e ite nei:+ 5 Te ite faahou nei te matapo,+ te haere nei te pirioi, te faaorahia nei te lepera+ e te faaroo nei te tariˈa turi, te faatia-faahou-hia nei tei pohe e te faaitehia nei te parau apî oaoa i te feia veve.+ 6 E oaoa te taata e tiaturi mau nei ia ˈu.”+

7 I to raua revaraa, parau ihora Iesu i te nahoa no nia ia Ioane: “Eaha ta outou i haere e hiˈo i te medebara?+ Te hoê aeho e taueue ra i te mataˈi?+ 8 Eaha ïa ta outou i haere e hiˈo? Te hoê taata e ahu unauna* to ˈna? Te feia e ahu unauna to ratou, to roto ïa i te aorai o te mau arii. 9 Eaha mau na ïa te tumu i haere ai outou i te medebara? No te ite i te hoê peropheta? Oia mau, te parau atu nei au, e rahi aˈe oia i te hoê peropheta.+ 10 No ˈna i papaihia ˈi: ‘Inaha, te tono nei au i ta ˈu vea na mua ia oe,* na ˈna e faaineine i te eˈa no oe!’+ 11 Oia mau ta ˈu e parau atu: I rotopu i te taata atoa,* aita hoê i rahi aˈe ia Ioane Bapetizo, area tei haihai aˈe i roto i te Faatereraa arii* o te raˈi, mea rahi aˈe ïa ia ˈna.+ 12 Mai ia Ioane Bapetizo mai e tae mai i teie mahana, o te Faatereraa arii o te raˈi ta te taata e tautoo nei i te titau, e e noaa iho â te reira i te feia e tautoo nei.+ 13 I tohu na hoi te mau papai a te mau peropheta e te Ture e tae roa aˈenei ia Ioane ra i te mau mea e tupu.+ 14 Ia tiaturi mai outou aore ra eita, o Ioane te ‘Elia o te tae mai.’+ 15 Te taata e tariˈa to ˈna, ia faaroo ïa.

16 “E faaau vau i teie nei uˈi ia vai?+ E au ratou i te mau tamarii e parahi ra na te mahora e e pii ra i te tahi atu mau tamarii, 17 a na ô ai: ‘Ua faataˈi matou i te vivo no outou, aita râ outou i ori. Ua himene matou ma te oto, aita râ outou i tupaipai i to outou ouma no te oto.’ 18 Oia atoa, ua haere mai Ioane e aita i tamaa e i inu, ua parau râ te taata: ‘E demoni to ˈna.’ 19 Ua haere mai te Tamaiti a te taata nei e ua tamaa e ua inu,+ ua parau râ te taata: ‘Inaha, mea tamaa roa teie taata ma te haapuupuu, mea inu i te uaina, e hoa no te feia titau tute e te feia rave hara.’+ Na te mau ohipa parau-tia ta te hoê taata e rave e haapapu e e taata paari oia.”+

20 Faahapa ˈtura oia i na oire i reira to ˈna raveraa i te rahiraa o ta ˈna mau ohipa mana, aita hoi to reira mau taata i tatarahapa: 21 “Ua ati oe Korazina! Ua ati oe Betesaida! No te mea ahiri te mau ohipa mana tei ravehia i ǒ orua, i rave-atoa-hia na i Turia e i Sidona, ua tatarahapa ê na ïa ratou ma te ahu oto e te rehu.+ 22 Teie râ ta ˈu e parau i to Korazina e Betesaida: Mea mâmâ aˈe te utua a to Turia e Sidona i ta outou i te Mahana Haavaraa.+ 23 E oe Kaperenaumi,+ e faateiteihia anei oe i te raˈi? I te Apoo* oe e pou ai,+ no te mea ahiri te mau ohipa mana tei ravehia i ǒ oe, i rave-atoa-hia i Sodoma, ua vai noa mai ïa taua oire ra e tae roa mai i teie mahana. 24 Teie râ ta ˈu e parau i to Kaperenaumi: Mea mâmâ aˈe te utua a te fenua o Sodoma i ta outou i te Mahana Haavaraa.”+

25 I reira, na ô ihora Iesu: “To ˈu Metua e te Fatu o te raˈi e te fenua, te arue nei au ia oe i mua i te taata no te mea ua huna oe i teie mau parau i te feia paari e te maramarama e ua faaite atu i te feia e au i te tamarii.+ 26 Oia mau e to ˈu Metua, no te mea tera ta oe i faaoti e rave. 27 Ua tuu mai to ˈu Metua i te mau mea atoa ia ˈu.+ O te Metua anaˈe tei ite mau â o vai te Tamaiti,+ e o te Tamaiti anaˈe tei ite mau â o vai te Metua e te taata atoa ta te Tamaiti e hinaaro e faaite atu o vai te Metua.+ 28 A haere mai ia ˈu nei outou atoa e rohirohi e e teimaha nei, na ˈu e tamahanahana ia outou. 29 A rave mai i ta ˈu zugo i nia ia outou e ia haapiihia outou e au, mea mǎrû hoi au e te haehaa o te aau,+ e ite ïa outou* i te tamahanahanaraa. 30 Mea mǎrû* hoi ta ˈu zugo, e mea mâmâ ta ˈu hopoia.”

12 I reira, haere atura Iesu na roto i te mau faaapu sitona i te Sabati. Poia aˈera ta ˈna mau pǐpǐ, hutihuti ihora i te huero sitona e amu atura.+ 2 A ite ai te mau Pharisea i te reira, na ô maira ratou ia Iesu: “A hiˈo na! Te rave nei ta oe mau pǐpǐ i tei opanihia ia rave i te Sabati.”+ 3 Pahono atura oia ia ratou: “Aita outou i taio i ta Davida i rave a poia ˈi oia e to ˈna mau taata?+ 4 Ua tomo oia i roto i te fare o te Atua e ua amu ratou i te mau pane pûpûhia,*+ tei opanihia ia ˈna e i to ˈna mau taata ia amu. O te mau tahuˈa anaˈe te nehenehe e amu i te reira.+ 5 Aita atoa anei outou i taio i roto i te Ture e e rave te mau tahuˈa i te ohipa i te hiero i te Sabati e aita ratou i hara?+ 6 Te parau atu nei râ vau e to ǒ nei te hoê taata tei hau aˈe i te hiero.+ 7 Ahiri râ outou i taa i te auraa o teie parau: ‘O te aroha hamani maitai ta ˈu e hinaaro,+ eiaha te tusia,’+ e ore ïa outou e faahapa i te feia hapa ore. 8 O te Tamaiti hoi a te taata nei te Fatu o te Sabati.”+

9 Faarue ihora oia i taua vahi ra, haere atura i roto i ta ratou sunago, 10 e inaha, e taata rima pohe* to reira!+ Ui maira vetahi ia Iesu: “Mea tano anei ia au i te Ture ia faaora i te maˈi i te Sabati?” Te imi ra hoi ratou i te tahi tumu no te faahapa ia ˈna.+ 11 Parau atura Iesu ia ratou: “O vai ïa taata i rotopu ia outou hoê anaˈe mamoe ta ˈna o te topa i roto i te hoê apoo i te Sabati, e ore e tii e huti mai i ta ˈna mamoe i rapae?+ 12 Mea faufaa aˈe hoi te taata i te mamoe! No reira, mea tano ia au i te Ture ia rave i te mea maitai i te Sabati.” 13 Na ô atura oia i taua taata ra: “A toro mai na i to rima.” Toro maira oia i to ˈna rima e ora roa ˈtura mai te tahi atoa rima. 14 Haere atura râ te mau Pharisea i rapaeau e opua aˈera e haapohe ia Iesu. 15 I to Iesu iteraa i te reira, reva ˈtura oia. E rave rahi taata tei pee ia ˈna,+ e ua faaora oia i to ratou mau maˈi atoa, 16 ua faaue maitai râ oia ia ratou eiaha e faaite o vai oia,+ 17 ia tupu hoi ta te peropheta Isaia i parau:

18 “Teie ta ˈu tavini+ ta ˈu i maiti, mea here na ˈu ia ˈna e ua mauruuru roa vau* ia ˈna!+ E tuu vau i to ˈu varua i nia ia ˈna,+ e na ˈna e faataa maitai i te feia o te mau nunaa ěê eaha te parau-tia. 19 E ore oia e tatamaˈi,+ e ore e tutuô, e ore atoa te taata e faaroo i to ˈna reo na te mau purumu rahi. 20 E ore oia e taataahi i te aeho paruparu, e ore atoa e tupohe i te uiti e ama rii noa ra+ e ia faatupu roa oia i te parau-tia. 21 Oia mau, na roto i to ˈna iˈoa e tiaturi ai te mau nunaa.”+

22 Afai maira ratou ia ˈna ra i te hoê taata tei uruhia e te demoni, e matapo oia e te vava, faaora ihora oia ia ˈna, paraparau ihora taua vava ra e ite atoa ˈtura oia. 23 Maere ihora te nahoa taata e na ô atura: “E ere anei o te Tamaiti a Davida teie?” 24 A faaroo ai te mau Pharisea i te reira, parau aˈera ratou: “Na roto noa ia Belezebuba,* te raatira o te mau demoni, e tiavaru ai tena taata i te mau demoni.”+ 25 Ua ite râ Iesu i to ratou manaˈo e parau atura: “Ia amahamaha te hoê faatereraa, e mou te reira, e ia amahamaha te hoê oire aore ra te hoê utuafare, eita ïa e mau. 26 Oia atoa, ia tiavaru Satani ia Satani, ua amahamaha ïa oia, e nafea ïa ta ˈna faatereraa e mau ai? 27 Hau atu â, mai te peu e mea na roto ia Belezebuba e tiavaru ai au i te mau demoni, mea na roto ïa ia vai e tiavaru ai ta outou mau tamarii i te mau demoni? No reira, na ratou e faahapa ia outou. 28 Mai te peu râ e i te varua o te Atua e tiavaru ai au i te mau demoni, ua roohia ïa outou e te Faatereraa arii a* te Atua.+ 29 E nafea atoa te hoê taata e tomo ai i roto i te fare o te hoê taata puai a rave atu ai i ta ˈna mau taoˈa? E taamuamu oia na mua i taua taata puai ra. I reira noa oia e nehenehe ai e eiâ i ta ˈna mau taoˈa. 30 Te taata o te ore e turu mai ia ˈu, te patoi nei ïa ia ˈu, e o te ore e haaputu mai i te taata e o vau atoa nei, te haapurara nei ïa.+

31 “No reira, te parau atu nei au e e faaorehia te mau hara e parau faaino atoa a te taata, area te faaino i te varua moˈa, e ore ïa e faaorehia.+ 32 Ei hiˈoraa, o te faaino i te Tamaiti a te taata nei, e faaorehia ïa ta ˈna hara,+ area o te faaino i te varua moˈa, e ore ïa e faaorehia ta ˈna hara i roto i teie nei ao* e to a muri aˈe atoa.+

33 “Ia aupuru outou i te tumu raau, e maa maitai ïa te hotu mai, ia ore râ outou e aupuru i te tumu raau, e maa ino ïa te hotu mai, na te maa hoi e faaite e tumu raau maitai anei aore ra eita.+ 34 Fanauˈa ophi taero ma,+ e nafea outou e nehenehe ai e parau i te mea maitai, e feia ino hoi outou? E parau te vaha i te mea e vai ra i roto i te aau.+ 35 E parau te taata maitai i te mea maitai, no te mea ua î to ˈna aau i te mea maitai, area te taata ino, e parau ïa i te mea ino, no te mea ua î to ˈna aau i te mea ino.+ 36 Te faaite atu nei râ vau e ia tae i te Mahana Haavaraa, e haavahia te taata+ no ta ˈna mau parau faufaa ore atoa, 37 no ta oe hoi mau parau e faarirohia ˈi oe ei taata parau-tia, e no ta oe mau parau e faahapahia ˈi oe.”

38 Na ô aˈera ïa te tahi mau papai parau e Pharisea ia ˈna: “Orometua, hinaaro matou ia faaite mai oe i te tahi tapao.”+ 39 Pahono atura Iesu ia ratou: “Te imi noa nei te hoê uˈi ino e te faaturi* i te hoê tapao. O te tapao a Iona te peropheta anaˈe râ te horoahia ˈtu.+ 40 Mai ia Iona hoi i vai na i roto i te opu o te iˈa rahi e toru po e toru ao,+ e vai atoa te Tamaiti a te taata nei i te hohonuraa o te fenua e toru po e toru ao.+ 41 E tia faahou mai to Nineve i te haavaraa e teie nei uˈi atoa. E faahapa ratou i teie nei uˈi, no te mea ua tatarahapa ratou no ta Iona pororaa.+ Inaha râ, e taata to ǒ nei tei rahi aˈe ia Iona.+ 42 E tia faahou mai te arii vahine no apatoa i te haavaraa e teie nei uˈi atoa. E faahapa oia i teie nei uˈi, mai te hopea mai hoi o te fenua i haere mai ai oia e faaroo i te paari o Solomona.+ Inaha râ, e taata to ǒ nei tei rahi aˈe ia Solomona.+

43 “Ia haere mai te hoê varua viivii i rapae i te hoê taata, e haere oia na te mau vahi pape ore e imi i te faafaaearaa, eita râ e itehia mai e ana.+ 44 Na ô ihora oia: ‘E hoˈi au i to ˈu fare mai reira mai au,’ e ia tae atu oia i reira, ua vata te fare, ua purumuhia e ua faanehenehehia. 45 Haere ihora oia e rave maira e hitu varua ino aˈe ia ˈna, tomo aˈera ratou i roto i taua fare ra, faaea ihora i reira. Ino roa ˈtura ïa te huru o taua taata ra i to na mua ˈˈe.+ Mai tera atoa ïa no teie nei uˈi ino.”

46 A paraparau noa ˈi Iesu i te nahoa taata, te tia ra to ˈna metua vahine e to ˈna mau taeae+ i rapaeau, te hinaaro ra e paraparau ia ˈna.+ 47 Parau atura te hoê taata ia ˈna: “Inaha, te tia ra to oe metua vahine e to oe mau taeae i rapaeau, te hinaaro ra e paraparau ia oe.” 48 Pahono maira oia i taua taata ra: “O vai to ˈu metua vahine e o vai to ˈu mau taeae?” 49 Tohu ihora oia i ta ˈna mau pǐpǐ, e parau ihora: “Teie to ˈu metua vahine e to ˈu mau taeae!+ 50 Te taata hoi o te rave i te hinaaro o to ˈu Metua i te raˈi, o ˈna ïa to ˈu taeae, to ˈu tuahine e to ˈu metua vahine.”+

13 I tera mahana, haere atura Iesu i rapae i taua fare ra e parahi ihora i tatahi. 2 E nahoa rahi tei putuputu mai ia ˈna ra. Haere atura oia i nia i te hoê poti e parahi ihora, a tia noa ˈi pauroa te taata i tatahi.+ 3 Paraparau atura oia ia ratou na roto i te faahohoˈaraa+ e rave rahi a na ô ai: “Inaha, e taata ueue tei haere e ueue i te huero.+ 4 A ueue ai oia, topa ihora te tahi mau huero na te hiti purumu, haere maira te mau manu e amu ihora i te mau huero.+ 5 Topa ihora te tahi atu mau huero i te vahi ofaifai aita i rahi te repo e tupu ihora, no te mea e maa repo iti to reira.+ 6 I te puairaa mai râ te mahana, paapaa aˈera te mau huero e mǎrô atura no te mea aita i aˈa. 7 Topa ihora te tahi atu i roto i te mau raau taratara, tupu maira te mau raau taratara e tapoˈi aˈera i te mau huero.+ 8 Topa ihora râ te tahi atu i nia i te repo maitai, e hotu maira tataihanere ta teie, tataiono ahuru ta tera e tataitoru ahuru ta te tahi atu.+ 9 Te taata e tariˈa to ˈna, ia faaroo ïa.”+

10 Haere maira te mau pǐpǐ e parau maira ia ˈna: “No te aha oe e paraparau ai ia ratou na roto i te mau faahohoˈaraa?”+ 11 Pahono ihora oia ia ratou: “Ua horoahia ia outou te taaraa i te mau parau huna moˈa+ o te Faatereraa arii* o te raˈi, aita râ i horoahia ia ratou. 12 Te taata hoi e faufaa ta ˈna, e horoahia hau atu â e e rahi mau â ta ˈna faufaa. Te taata râ aita ta ˈna e faufaa, oia atoa te mea e vai ra ia ˈna ra, e iriti-ê-hia.+ 13 No reira vau e paraparau ai ia ratou na roto i te mau faahohoˈaraa: te hiˈo ra hoi ratou, aita râ e ite ra, te horoa ˈtu ra i te tariˈa faaroo, aita râ e faaroo ra, e aita atoa e taa ra i te auraa.+ 14 I nia ia ratou e tupu ai te parau tohu a Isaia e na ô ra: ‘E faaroo iho â outou, eita roa râ e taa i te auraa. E hiˈo iho â outou, eita roa râ e ite.+ 15 Ua etaetahia hoi te aau o teie nunaa, ua tapiri ratou i to ratou tariˈa e ua tapo i to ratou mata, ia ore roa hoi to ratou mata e ite e to ratou tariˈa e faaroo e to ratou aau e taa i te auraa e ia ore roa ratou e hoˈi mai, a ore atu ai au e faaora ia ratou.’+

16 “Tera râ, e oaoa outou, no te mea te ite nei to outou mata e te faaroo nei to outou tariˈa i teie mau mea.+ 17 Oia mau hoi ta ˈu e parau atu: Mea rahi te peropheta e te taata parau-tia tei hinaaro e ite i te mau mea ta outou e hiˈo nei, aita râ i ite,+ e faaroo atoa i te mau mea ta outou e faaroo nei, aita râ i faaroo.

18 “E teie nei, a faaroo na i te auraa o te faahohoˈaraa o te taata tei ueue i te huero.+ 19 Te hiti purumu i ueuehia ˈi te huero, o te taata ïa e faaroo i te poroi o te Faatereraa arii ma te ore e taa i te auraa, e haere mai te varua ino+ e hutihuti i tei ueuehia i roto i to ˈna aau.+ 20 Te vahi ofaifai i ueuehia ˈi te huero, o te taata ïa e faaroo i te poroi e e farii oioi i te reira ma te oaoa.+ 21 Aita râ te reira i aˈa i roto i to ˈna aau, maa taime noa ïa to ˈna fariiraa i te reira, e i te tupuraa te ati aore ra te hamani-ino-raa no te poroi, turori oioi atura oia. 22 Te mau raau taratara i topa ˈi te huero, o te taata ïa e faaroo i te poroi, ua tapoˈihia râ te poroi i te haapeapearaa no te oraraa i roto i teie nei ao*+ e te mana haavarevare o te taoˈa rahi, e aita ˈtura i hotu mai.+ 23 Te repo maitai i ueuehia ˈi te huero, o te taata ïa e faaroo i te poroi ma te taa i te auraa, hotu maira ta ˈna, tataihanere ta teie, tataiono ahuru ta tera e tataitoru ahuru ta te tahi atu.”+

24 Horoa ˈtura oia i te tahi atu faahohoˈaraa a parau ai: “E nehenehe e faaau i te Faatereraa arii o te raˈi i te hoê taata tei ueue i te huero maitai i roto i ta ˈna faaapu. 25 A taoto noa ˈi râ pauroa te taata, haere maira to ˈna enemi e ueue i te zizania i te vahi i ueuehia ˈi te sitona, e haere ê atura. 26 I te oteoraa e te hoturaa mai te sitona, tupu atoa maira te zizania. 27 Haere maira te mau tavini a te fatu fare, e na ô maira ia ˈna: ‘E te Fatu, e ere anei i te huero maitai ta oe i ueue i roto i ta oe faaapu? Nohea mai ïa te zizania?’ 28 Parau atura oia: ‘Na te hoê enemi i rave i te reira.’+ Na ô maira te mau tavini: ‘E hinaaro anei oe ia haere matou e hutihuti i te zizania?’ 29 Parau ihora oia: ‘Eiaha, aˈunei outou e hutihuti mai ai i te zizania e te sitona atoa. 30 A vaiiho ia tupu apipiti e ia auhune noa ˈtu, e ia tae i te ootiraa, na ˈu e parau i te feia ooti: A hutihuti na mua i te zizania e a taamu ia taninahia, e i muri iho a haaputu i te sitona i roto i ta ˈu fare vairaa maa.’”+

31 Horoa ˈtura oia i te tahi atu faahohoˈaraa a parau ai: “E au te Faatereraa arii o te raˈi i te hoê huero sinapi ta te hoê taata i rave e i tanu i roto i ta ˈna faaapu.+ 32 O te huero nainai roa ˈˈe ïa o te mau huero atoa, ia tupu mai râ, e rahi aˈe ïa i te mau maa tupu atoa, a riro atu ai ei tumu raau e i nia i to ˈna mau amaa e haere mai ai e e parahi ai te mau manu o te raˈi.”

33 Faahiti atura oia i te tahi atu faahohoˈaraa: “E au te Faatereraa arii o te raˈi i te hopue ta te hoê vahine i rave e i anoi i roto e toru faito faraoa ota e ia maraa noa ˈtu te taatoaraa o te faraoa i ôihia.”+

34 Tera te mau parau atoa ta Iesu i faahiti i te nahoa na roto i te mau faahohoˈaraa. Oia mau, na roto noa i te mau faahohoˈaraa e paraparau ai oia ia ratou,+ 35 ia tupu hoi tei tohuhia e te peropheta: “E parau to ˈu vaha i te mau faahohoˈaraa. E faaite haere au i te mau mea hunahia mai te omuaraa mai â.”*+

36 I muri aˈe i to Iesu faahoˈiraa i te nahoa taata, tomo atura oia i roto i te hoê fare. Haere maira ta ˈna mau pǐpǐ ia ˈna ra e parau maira: “A faataa mai na i te faahohoˈaraa o te zizania i roto i te faaapu.” 37 Pahono atura oia ia ratou: “Te taata tei ueue i te huero maitai, o te Tamaiti ïa a te taata nei. 38 Te faaapu, o te ao nei ïa.+ Te huero maitai, o te mau tamarii ïa a te Faatereraa arii, area te zizania, o te mau tamarii ïa a te varua ino,+ 39 e te enemi tei ueue i te zizania, o te Diabolo ïa. Te ootiraa, o te anotau hopea ïa o te hoê ao,* e te feia ooti, o te mau melahi ïa. 40 E taamuhia te zizania a taninahia ˈtu ai, oia atoa ïa i te anotau hopea o te ao* nei.+ 41 E tono te Tamaiti a te taata nei i ta ˈna mau melahi, e na ratou e iriti ê mai roto mai i ta ˈna Faatereraa arii i te feia atoa e faaturori ia vetahi ê e te feia e ofati ra i te ture, 42 a huri atu ai ia ratou i roto i te auahi ura,+ i reira ratou e taˈi ai e to ratou niho e mauu ai i te ahoaho. 43 I reira te feia parau-tia e anaana ˈi mai te mahana+ i roto i te Faatereraa arii a to ratou Metua. Te taata e tariˈa to ˈna, ia faaroo ïa.

44 “E au te Faatereraa arii o te raˈi i te hoê taoˈa tei hunahia i te hoê tuhaa fenua, ta te hoê taata i ite e i huna faahou, e no to ˈna oaoa, haere atura oia e hoo pauroa i ta ˈna mau mea, e hoo maira i taua tuhaa fenua ra.+

45 “E au atoa te Faatereraa arii o te raˈi i te hoê taata hoohoo ratere e imi ra i te poe nehenehe. 46 I to ˈna iteraa i te hoê poe moni rahi, haere atura oia e ru aˈera i te hoo pauroa ta ˈna faufaa, e hoo maira i taua poe ra.+

47 “E au atoa te Faatereraa arii o te raˈi i te hoê upeˈa tei tuuhia i raro i te miti e ua haaputuputu i te mau huru iˈa atoa. 48 I te îraa te upeˈa, ume maira te feia ravaai i te upeˈa i tatahi, parahi ihora, haaputu aˈera i te iˈa maitatai+ i roto i te farii, faarue atura râ i te iˈa eita e amuhia.+ 49 Oia atoa i te anotau hopea o te ao* nei. E haere mai te mau melahi e faataa ê i te feia ino e te feia parau-tia, 50 a huri atu ai i te feia ino i roto i te auahi ura, i reira ratou e taˈi ai e to ratou niho e mauu ai i te ahoaho.

51 “Ua taa anei ia outou te auraa o teie mau mea atoa?” Parau maira ratou ia ˈna: “E.” 52 Na ô ihora oia ia ratou: “Ia ite mai ïa outou e e au te mau orometua haapii atoa tei haapiihia no nia i te Faatereraa arii o te raˈi i te hoê fatu fare o te rave mai roto mai i ta ˈna mau taoˈa i te mea apî e te mea tahito atoa.”

53 E oti aˈera teie mau faahohoˈaraa i te horoahia e Iesu, reva ˈtura oia. 54 Tae atura oia i to ˈna iho fenua,+ haapii ihora i to reira mau taata i roto i ta ratou sunago, maere ihora ratou e na ô aˈera: “Nohea mai te paari o teie taata e to ˈna puai no te faatupu i teie mau ohipa mana?+ 55 E ere anei teie i te tamaiti a te tamuta?+ E ere anei o Maria te iˈoa o to ˈna metua vahine, e o Iakobo, Iosepha, Simona e Iuda to ˈna mau taeae?+ 56 E ere anei tei ǒ tatou nei atoa to ˈna mau tuahine? Nohea mai ïa te paari o teie taata e to ˈna puai no te faatupu i teie mau ohipa mana?”+ 57 No reira, aita ratou i tiaturi ia ˈna.+ Parau atura râ Iesu ia ratou: “E faaturahia te hoê peropheta i te mau vahi atoa, area i to ˈna iho fenua e i rotopu i to ˈna iho utuafare, eita ïa.”+ 58 Aita i rahi te mau ohipa mana ta Iesu i faatupu i reira no to ratou ereraa i te faaroo.

14 I taua tau ra, ua faarooroo Heroda te tavana* o Galilea i ta Iesu i rave+ 2 e ua parau oia i ta ˈna mau tavini: “O Ioane Bapetizo taua taata ra. Ua tia faahou mai oia mai te pohe mai, no reira oia i rave ai i teie mau ohipa mana.”+ 3 I haru na e i taamu na Heroda* ia Ioane a tuu atu ai ia ˈna i roto i te tapearaa no Herodia te vahine faaipoipo a Philipa to ˈna taeae.+ 4 I parau na hoi Ioane ia Heroda: “E ere i te mea tano ia au i te Ture ia faaipoipo oe ia ˈna.”+ 5 Hinaaro ihora Heroda e haapohe ia Ioane, ua mǎtaˈu râ oia i te nahoa taata o tei manaˈo e e peropheta Ioane.+ 6 A tupu ai râ te oroa fanauraa o Heroda,+ ori ihora te tamahine a Herodia i mua i te mau manihini e au roa ˈtura Heroda+ 7 i horeo ai oia e horoa ˈtu i ta ˈna atoa e ani mai. 8 Parau atura ïa oia mai ta to ˈna metua vahine i faaue ia ˈna: “A horoa mai i te upoo o Ioane Bapetizo i roto i te hoê farii parahurahu.”+ 9 Peapea ihora te tavana, no ta ˈna râ i horeo e no te feia e tamaa ra* e o ˈna, faaue ihora oia ia horoahia te upoo o Ioane i te tamahine ra. 10 Tono atura ïa oia i te taata e tâpû i te upoo o Ioane i te fare tapearaa. 11 Hopoihia maira to ˈna upoo i nia i te hoê farii parahurahu e horoahia ˈtura i te tamahine ra, o tei afai atu i to ˈna metua vahine. 12 I muri iho, haere maira te mau pǐpǐ a Ioane e tii i to ˈna tino, huna aˈera ia ˈna e haere atura e faaite ia Iesu. 13 I to Iesu faarooraa i te reira, faarue maira oia i taua vahi ra na nia i te poti e fano atura i te hoê vahi moˈemoˈe o ˈna anaˈe. A faaroo ai râ te nahoa taata i te reira, faarue maira ratou i to ratou mau oire e pee atura ia ˈna na raro.+

14 I to Iesu pouraa ˈtu i tatahi, ite ihora oia i te hoê nahoa rahi, aroha roa ˈtura ia ratou+ e faaora ˈtura i te feia maˈi.+ 15 E ahiahi ihora, haere maira ta ˈna mau pǐpǐ ia ˈna ra e na ô maira: “E vahi moˈemoˈe teie e ua topa ê na te mahana. A tuu na i te nahoa ia haere na te mau oire rii e hoo mai i te maa na ratou.”+ 16 Parau atura râ Iesu: “Aita e faufaa ia haere ratou, na outou e horoa i te maa na ratou.” 17 Na ô maira ratou ia ˈna: “E pae anaˈe faraoa e e piti iˈa ta matou.” 18 Parau atura oia: “Afai mai na ia ˈu nei.” 19 Faaue ihora oia i te nahoa e parahi i nia i te matie. Rave ihora oia i na faraoa e pae e na iˈa e piti, hiˈo aˈera i nia i te raˈi, haamaitai ihora i te Atua,+ ofati ihora i na faraoa e horoa ˈtura i te mau pǐpǐ o tei opere na te nahoa. 20 Tamaa aˈera ïa ratou pauroa e paia ˈtura. Haaputuhia ˈtura te toea faraoa i roto 12 farii î maitai.+ 21 Te feia i tamaa, e piri ïa i te 5 000 tane, aita i taiohia te vahine e te tamarii.+ 22 I reira iho, parau atura Iesu i ta ˈna mau pǐpǐ ia na mua ratou ia ˈna i te fano i te tahi aˈe pae na nia i te poti, a tuu ai oia i te nahoa ia haere.+

23 E oti aˈera te nahoa i te tuuhia, haere atura Iesu i nia i te mouˈa e pure o ˈna anaˈe.+ I te poraa, to reira noa â oia. 24 Ua atea ê na te poti e rave rahi hanere metera* i te fenua e te faaû ra i te mataare no te mataˈi e na mua mai ra. 25 Tera râ, i te aahiata,* haere maira Iesu i ta ˈna mau pǐpǐ ra na nia i te miti. 26 A ite mai ai ratou ia ˈna i te haereraa na nia i te miti, riaria ihora ratou e na ô atura: “E orama teie!” Tuô aˈera ratou no te mehameha. 27 Parau ihora râ Iesu ia ratou: “Ia itoito outou! O vau teie, eiaha e mǎtaˈu.”+ 28 Na ô atura Petero: “E te Fatu, mai te peu e o oe teie, a faaue mai na ia ˈu ia haere atu ia oe ra na nia i te miti.” 29 Parau maira Iesu: “Haere mai!” Pou ihora Petero mai nia mai i te poti, e haere tia ˈtura ia Iesu ra na nia i te miti. 30 I to ˈna râ hiˈoraa i te mataˈi, mǎtaˈu ihora oia. E a haamata ˈi oia i te paremo i raro i te miti, pii atura oia: “E te Fatu, faaora mai ia ˈu!” 31 Toro oioi atura Iesu i to ˈna rima, haru maira ia Petero e na ô atura: “Taata mea iti te faaroo, eaha oe i feaa ˈi?”+ 32 Pauma ˈtura raua i roto i te poti e faaea ihora te mataˈi. 33 Tipapa aˈera te mau pǐpǐ to nia i te poti i mua ia ˈna a parau ai: “E Tamaiti mau â oe na te Atua.” 34 Fano atura ratou i te tahi atu pae e tae atura i Genesareta.+

35 I te iteraa to reira e o Iesu tera, haere aˈera ratou e faaara i to taua fenua taatoa ra, e hopoihia maira ia ˈna ra te feia maˈi atoa. 36 Taparu maira ratou ia ˈna ia tapea noa ˈtu ratou i to ˈna hiti ahu.+ Ora roa maira te taata atoa tei tapea i to ˈna hiti ahu.

15 Haere maira te tahi mau Pharisea e papai parau ia Iesu ra na Ierusalema mai,+ e na ô maira: 2 “No te aha ta oe mau pǐpǐ e ofati ai i te peu a te mau tupuna? Eita hoi ratou e horoi i to ratou rima* ia tamaa ratou.”+

3 Pahono ihora oia ia ratou: “No te aha outou e ofati ai i te faaueraa a te Atua no ta outou tutuu?+ 4 Ua parau hoi te Atua: ‘A faatura i to metua tane e to metua vahine,’+ e ‘O tei faaino* i to ˈna metua tane aore ra metua vahine, ia haapohehia ïa.’+ 5 Outou râ, te na ô nei ïa: ‘Ia parau te hoê taata i to ˈna metua tane aore ra metua vahine: “E ô pûpûhia i te Atua ta ˈu mau mea atoa o ta ˈu e nehenehe e faaohipa no te tauturu ia oe,”+ 6 aita ïa e faufaa ia faatura oia i to ˈna metua tane.’ Ua haafaufaa ore ïa outou i te parau a te Atua no ta outou peu tumu.+ 7 Haavarevare ma, ua tano Isaia i te tohuraa no nia ia outou, i to ˈna parauraa:+ 8 ‘Te faatura nei te vaha o teie mau taata ia ˈu, tei te atea ê râ to ratou aau ia ˈu. 9 Mea faufaa ore to ratou haamori-noa-raa mai ia ˈu, te haapii nei hoi ratou ia vetahi ê i te mau faaueraa a te taata.’”+ 10 Pii ihora Iesu i te nahoa taata ia tapiri mai, e na ô atura: “A faaroo mai e ia taa ia outou te auraa:+ 11 Eita te taata e viivii i ta ˈna e amu, e viivii râ oia i te mea e na roto mai i to ˈna vaha.”+

12 Haere maira te mau pǐpǐ ia Iesu ra, e na ô maira: “Ua ite anei oe e ua inoino te mau Pharisea no ta oe i parau?”+ 13 Pahono atura oia: “Te mau raau atoa e ere na to ˈu Metua i te raˈi i tanu, e iriti-tumu-hia ïa. 14 Vaiiho noa ˈtu ia ratou. E aratai matapo ratou. Ia aratai te hoê matapo i te tahi matapo, e topa ïa raua e piti i roto i te apoo.”+ 15 Parau maira Petero: “A faataa mai na ia matou i te faahohoˈaraa.” 16 Na ô atura Iesu: “Aita â i taa ˈtura ia outou?+ 17 Aita outou i ite e te mau mea atoa e ô i roto i te vaha, e na roto atu ïa i te opu a faaruehia ˈtu ai i te haumitiraa? 18 Te mau mea râ e na roto mai i te vaha, no roto mai ïa i te aau, no taua mau mea ra e viivii ai te hoê taata.+ 19 No roto mai hoi i te aau te manaˈo ino:+ te taparahi-pohe-raa, te faaturi, te mau peu taotoraa tia ore,* te eiâ, te parau haavare, te faaino. 20 No teie mau mea e viivii ai te hoê taata. E ere râ no te amuraa i te maa ma te ore e horoi i te rima* e viivii ai oia.”

21 Reva ˈtura Iesu e haere ihora i na tuhaa fenua o Turia e Sidona.+ 22 E inaha, haere maira te hoê vahine Phenikia no taua tuhaa fenua mai ra, e pii maira: “Aroha* mai ia ˈu, e te Fatu, Tamaiti a Davida. Ua uruhia ta ˈu tamahine e te demoni o te haamauiui nei ia ˈna.”+ 23 Aita râ oia i pahono atu. Haere maira ïa ta ˈna mau pǐpǐ e na ô maira: “A parau ia ˈna ia haere, te pii noa mai ra hoi oia.” 24 Pahono atura oia: “Aita vau i tonohia i te mau taata atoa, i te mau mamoe anaˈe râ tei moˈe o te utuafare o Iseraela.”+ 25 Tera râ, tapiri maira te vahine e tipapa ihora i mua ia Iesu a parau ai: “E te Fatu, a tauturu mai ia ˈu!” 26 Na ô atura oia: “E ere mea maitai ia rave i te faraoa a te mau tamarii, a horoa ˈtu ai na te mau fanauˈa urî.” 27 Parau maira te vahine: “Oia mau e te Fatu, e amu atoa râ te mau fanauˈa urî i te huˈahuˈa faraoa e topa na nia mai i te amuraa maa a to ratou fatu.”+ 28 Pahono atura Iesu: “E faaroo rahi to oe. Ta oe e hinaaro, ia tupu ïa.” I reira iho, ora maira ta ˈna tamahine.

29 Reva ˈtura Iesu mai taua vahi ra e tae ihora i pihai iho i te miti o Galilea.+ Haere atura oia i nia i te mouˈa, e parahi ihora. 30 Haere maira te hoê nahoa rahi ia ˈna ra, ma te afai atoa mai i te pirioi, te huma mero, te matapo, te vava, e e rave rahi atu â taata maˈi, tuu maira ia ratou i te pae avae o Iesu, e faaora ihora oia i to ratou maˈi.+ 31 Maere roa ihora ïa te nahoa a ite ai ratou i te vava i te paraparauraa, te pirioi i te haereraa e te matapo i te iteraa, e faahanahana ˈtura ratou i te Atua o Iseraela.+

32 Pii ihora râ Iesu i ta ˈna mau pǐpǐ ia haere mai e na ô atura: “Ua aroha roa vau i teie nahoa taata,+ a toru atura hoi mahana to ratou faaearaa ia ˈu nei e aita ta ratou e maa. Eita vau e hinaaro e tuu ia ratou ia hoˈi ma te poia,* aˈunei ratou e matapoirihia ˈi i nia i te purumu.”+ 33 Parau maira râ te mau pǐpǐ: “Ihea i teie vahi moˈemoˈe e noaa mai ai te faraoa e paia ˈi teie rahiraa taata?”+ 34 Na ô atura Iesu: “Ehia faraoa ta outou?” Parau maira ratou: “E hitu, e maa iˈa rii atoa.” 35 Faaue ihora ïa oia i te nahoa ia parahi, 36 rave ihora i na faraoa e hitu e te iˈa, haamauruuru aˈera i te Atua, ofati ihora i te faraoa e horoa ˈtura i te mau pǐpǐ o tei opere na te nahoa.+ 37 Tamaa aˈera ratou pauroa, paia ˈtura e haaputu atura te mau pǐpǐ i te toea faraoa i roto e hitu farii* rahi î maitai.+ 38 Te feia i tamaa, e 4 000 ïa tane, aita i taiohia te vahine e te tamarii. 39 I te hoˈiraa te nahoa, haere ihora Iesu i nia i te poti e fano atura i te tuhaa fenua o Magadana.+

16 Haere maira te mau Pharisea e te mau Sadukea ia Iesu ra e ani maira i te hoê tapao no te raˈi mai no te râmâ ia ˈna.+ 2 Pahono atura oia: “Ua ahiahi anaˈe, e parau outou: ‘E maitai te mahana ananahi, mea uteute hoi te raˈi,’ 3 e ia poipoi: ‘E ûahia i teie mahana, mea uteute hoi te raˈi, mea rumaruma atoa râ.’ Ua ite outou i te huru o te mahana ma te hiˈo i te raˈi, aita râ outou i ite i te tatara i te auraa o te mau tapao o te tau. 4 Te imi noa nei te hoê uˈi ino e te faaturi* i te hoê tapao.+ O te tapao a Iona anaˈe râ te horoahia ˈtu.”+ Vaiiho ihora oia ia ratou e reva ˈtura.

5 Fano aˈera te mau pǐpǐ i te tahi atu pae, ua moˈe râ ia ratou i te rave i te faraoa.+ 6 Parau ihora Iesu ia ratou: “A haapao maitai, a ara i te hopue a te mau Pharisea e te mau Sadukea.”+ 7 Feruri ihora ratou e na ô aˈera te tahi i te tahi: “No te mea paha ïa e ua moˈe ia tatou te faraoa i parau mai ai oia i te reira.” 8 Ite ihora Iesu i te reira e na ô atura: “E te feia mea iti te faaroo, eaha outou e paraparau ai no te faraoa tei moˈe ia outou i te rave? 9 Aita â i taa ˈtura ia outou, aita atoa anei outou e haamanaˈo ra i na faraoa e pae tei amuhia e na tane e 5 000 e ehia farii ta outou i rave?+ 10 E na faraoa e hitu atoa tei amuhia e na tane e 4 000 e ehia farii* rahi ta outou i rave?+ 11 Aita â i taa ˈtura ia outou e e ere te faraoa ta ˈu e parau ra? Tera râ, a ara i te hopue a te mau Pharisea e te mau Sadukea.”+ 12 Taa ˈtura ia ratou ta Iesu i parau e ara i te mau haapiiraa a te mau Pharisea e te mau Sadukea, eiaha râ i te hopue faraoa.

13 I to Iesu taeraa ˈtu i te tuhaa fenua o Kaisarea Philipi, ui ihora oia i ta ˈna mau pǐpǐ: “O vai te Tamaiti a te taata nei i ta te taata parauraa?”+ 14 Na ô maira ratou: “O Ioane Bapetizo+ ta vetahi, o Elia+ ta te tahi pae, o Ieremia aore ra hoê o te mau peropheta ta te tahi atu.” 15 Parau atura oia: “E outou, o vai au i ta outou parauraa?” 16 Pahono maira Simona Petero: “O te Mesia oe,+ te Tamaiti a te Atua ora.”+ 17 Parau atura Iesu ia ˈna: “Ia oaoa oe, Simona te tamaiti a Iona, e ere na te taata* i faaite ia oe i te reira, na to ˈu râ Metua i te raˈi.+ 18 E parau atoa ˈtu vau ia oe: O Petero oe.+ E patu vau i ta ˈu amuiraa i nia i teie pǎpǎ,+ e e ore te uputa o te Apoo* e upootia i nia i te reira. 19 E horoa ˈtu vau ia oe i te mau taviri o te Faatereraa arii* o te raˈi, e o ta oe e taamu i te fenua nei, ua taamu-aˈena-hia i nia i te raˈi, e o ta oe e tatara i te fenua nei, ua tatara-aˈena-hia i nia i te raˈi.” 20 Faaue maitai atura Iesu i te mau pǐpǐ eiaha e faaite e o ˈna te Mesia.+

21 Mai reira mai, haamata ihora Iesu i te faataa i ta ˈna mau pǐpǐ e ia haere oia i Ierusalema e tia ˈi, ia hamani-ino-hia oia e te mau aratai ati Iuda, te mau tahuˈa tiaau e te mau papai parau, ia haapohehia e ia faatiahia mai i te toru o te mahana.+ 22 Aratai rii ê ihora Petero ia Iesu e tamaˈi atura ia ˈna a na ô ai: “E te Fatu, eiaha oe e na reira i te parau, eita oe e roohia i teie mau mea.”+ 23 Huri tua maira râ Iesu, e na ô ihora ia Petero: “Haere na muri mai ia ˈu, Satani! E turoriraa oe no ˈu, no te mea e ere to oe manaˈo i to te Atua, to te taata râ.”+

24 Parau atura Iesu i ta ˈna mau pǐpǐ: “Te taata e hinaaro e pee mai ia ˈu, ia haapae ïa ia ˈna iho e ia rave i ta ˈna pou haamauiuiraa,* a pee noa mai ai ia ˈu.+ 25 O tei faaherehere hoi i to ˈna ora,* e ere ïa oia i te reira. O tei ere râ i to ˈna ora* no ˈu nei, e noaa faahou mai ïa ia ˈna te reira.+ 26 Eaha hoi te apî ia noaa i te hoê taata te ao taatoa, a ere ai râ oia i to ˈna ora?*+ Aore ra eaha ta te hoê taata e horoa no to ˈna ora?*+ 27 E haere mai hoi te Tamaiti a te taata nei ma te hanahana o to ˈna Metua e ta ˈna mau melahi, i reira oia e faautua ˈi aore ra e haamaitai ai i te taata atoa ia au i ta ratou i rave.+ 28 Oia mau ta ˈu e parau atu: Te vai ra vetahi o te feia i ǒ nei o te ore e pohe hou a ite ai na mua i te Tamaiti a te taata nei ia haere mai i roto i ta ˈna Faatereraa arii.”+

17 E ono mahana i muri aˈe, rave ihora Iesu ia Petero, Iakobo e Ioane to ˈna taeae, e aratai atura ia ratou i nia i te hoê mouˈa teitei o ratou anaˈe.+ 2 Faahuru-ê-hia ˈtura Iesu i mua ia ratou: ua anaana to ˈna mata mai te mahana e ua anaana* to ˈna ahu mai te maramarama.+ 3 E inaha, fa maira Mose raua Elia i mua ia ratou e te paraparau ra raua e o ˈna. 4 Na ô atura ïa Petero ia Iesu: “E te Fatu, mea fanaˈo matou i te tiaraa mai i ǒ nei. Ia hinaaro oe, e faatia vau e toru fare ie i ǒ nei, hoê no oe, hoê no Mose e hoê no Elia.” 5 A paraparau noa ˈi oia, inaha tapoˈihia maira ratou e te hoê ata anaana, e na ô maira te hoê reo no roto mai i te ata: “O ta ˈu Tamaiti teie, tei herehia, ta ˈu i mauruuru roa.+ A faaroo ia ˈna.”+ 6 I te faarooraa te mau pǐpǐ i te reira, mǎtaˈu roa ihora ratou e tipapa ihora ratou te mata i raro. 7 Tapiri maira ïa Iesu e tapea ihora ia ratou, a na ô ai: “A tia mai. Eiaha e mǎtaˈu.” 8 Hiˈo aˈera ratou, o Iesu anaˈe ta ratou e ite ra, aita ˈtu e taata. 9 A pou mai ai ratou mai nia mai i te mouˈa, faaue maira Iesu ia ratou: “Eiaha e faaite i te taata i teie orama e ia tia roa mai te Tamaiti a te taata nei mai te pohe mai.”+

10 Ui aˈera râ te mau pǐpǐ ia ˈna: “No te aha ïa te mau papai parau e na ô ai e o Elia na mua te haere mai?”+ 11 Pahono ihora oia: “E haere mai iho â Elia e e faahoˈi oia i te mau mea atoa mai i te matamua ra.+ 12 Te parau atu nei râ vau e ua haere ê mai na Elia, e aita ratou i ite e o ˈna tera, ua rave râ ia ˈna mai ta ratou i hinaaro.+ Na reira atoa te Tamaiti a te taata nei, e rave ino ratou ia ˈna.”+ 13 Taa ihora i te mau pǐpǐ e o Ioane Bapetizo ta ˈna e parau ra.

14 I to ratou haereraa ˈtu i te nahoa ra,+ tapiri maira te hoê tane ia Iesu, tuturi ihora i mua ia ˈna e na ô maira: 15 “E te Fatu, aroha* mai oe i ta ˈu tamaiti, e hopii to ˈna e mea ino roa oia. Pinepine oia i te topa i roto i te auahi e i roto atoa i te pape.+ 16 Ua afai au ia ˈna i ta oe mau pǐpǐ ra, aita râ to ˈna maˈi i ora ia ratou.” 17 Na ô atura Iesu: “Auê ïa uˈi ino aita e faaroo,+ ehia â maororaa e parahi ai au ia outou nei? Ehia â maororaa e faaoromai ai au ia outou? Afai mai ia ˈna i ǒ nei.” 18 Tamaˈi atura Iesu i te demoni, haere maira te demoni i rapae i te tamaroa, e ora ihora te maˈi o te tamaroa.+ 19 Haere maira te mau pǐpǐ ia Iesu ra o ratou anaˈe, e na ô maira: “No te aha aita i haere ia matou ia tiavaru i te demoni?” 20 Parau atura Iesu: “No te iti o to outou faaroo. Oia mau ta ˈu e parau atu: Ahiri to outou faaroo mai te hoê huero sinapi te rahi, e parau outou i teie mouˈa, ‘A haere i ǒ,’ e haere iho â taua mouˈa ra, e aita e mea e ore e tia ia outou ia rave.”+ 21 *——

22 Tei Galilea Iesu e ta ˈna mau pǐpǐ i parau ai oia ia ratou: “E tuuhia te Tamaiti a te taata nei i te rima o to ˈna mau enemi,+ 23 e haapohe ratou ia ˈna, e i te toru o te mahana, e faatiahia mai oia.”+ Oto roa ihora te mau pǐpǐ.

24 I to ratou taeraa ˈtu i Kaperenaumi, haere maira te feia titau tute e titau ia Petero na piti derama* e na ô maira: “Eita anei ta outou orometua e aufau i na piti derama no te tute?”+ 25 Parau atura Petero: “Oia.” I to ˈna râ tomoraa ˈtu i roto i te fare, parau ihora Iesu ia ˈna: “Eaha to oe manaˈo Simona? E titau te mau arii o te fenua i te mau tute* rau ia vai ma? I ta ratou mau tamarii anei aore ra ia vetahi ê?” 26 I to Petero parauraa: “Ia vetahi ê,” na ô maira Iesu: “Eita iho â ïa te mau tamarii e aufau i te tute. 27 Teie râ, ia ore ratou ia inoino mai,+ e haere oe i tatahi e taora i te mǎtau, e te iˈa matamua e amu, a rave e ia hamǎmǎ oe i te vaha o te iˈa, e ite oe i te hoê moni ario,* o ta oe ïa e hopoi atu ia ratou ra no tâua.”

18 I reira, haere maira te mau pǐpǐ ia Iesu ra e na ô maira: “O vai mau na tei rahi aˈe i roto i te Faatereraa arii* o te raˈi?”+ 2 Pii atura ïa oia i te hoê tamarii, tuu atura ia ˈna i ropu ia ratou 3 e parau ihora: “Oia mau ta ˈu e parau atu: Ia ore outou e fariu mai,* a riro ai mai te mau tamarii,+ e ore roa ïa outou e ô i roto i te Faatereraa arii o te raˈi.+ 4 No reira, te taata e faahaehaa ia ˈna mai teie nei tamarii, o ˈna tei rahi aˈe i roto i te Faatereraa arii o te raˈi,+ 5 e te taata o te farii i te hoê tamarii mai teie no to ˈu nei iˈoa, e farii atoa ïa ia ˈu. 6 Ia faaturori râ te tahi taata i te hoê o teie feia o te au i te tamarii, mea maitai aˈe ia taamuhia i nia i to ˈna aˈî te hoê ofai oro e hutihia na e te asini, a huri atu ai ia ˈna i raro i te moana.+

7 “Ua ati to te ao nei no te mau turoriraa! Papu, e tupu mai iho â te turoriraa, ua ati râ te taata na ˈna i faatupu mai i te turoriraa! 8 No reira, ia hapa oe no to oe rima aore ra avae, a tâpû a faarue atu.+ Mea maitai aˈe ia tae atu oe i te ora ma te hoê noa rima aore ra avae, i te hurihia oe i roto i te auahi mure ore e to oe rima aore ra avae.+ 9 E ia turori oe no to oe mata, a paaro a faarue atu. Mea maitai aˈe ia fanaˈo oe i te ora ua ere râ oe i te hoê mata, i te hurihia oe e to oe na mata i roto i te auahi o Gehena.*+ 10 Eiaha ïa outou e vahavaha hoê o teie feia e au i te tamarii, te parau atu nei hoi au ia outou e e tia noa to ratou mau melahi i nia i te raˈi i mua i te aro o to ˈu Metua i te raˈi.+ 11 *——

12 “Eaha to outou manaˈo? Mai te peu e 100 mamoe ta te hoê taata e ia moˈe te hoê,+ eita anei oia e vaiiho i na 99 i nia i te mouˈa, a haere atu ai e imi i tei moˈe?+ 13 E ia itea ia ˈna tei moˈe, oia mau ta ˈu e parau atu, e rahi aˈe to ˈna oaoa no taua mamoe ra i na 99 tei ore i moˈe. 14 Eita atoa to ˈu* Metua i te raˈi e hinaaro ia pohe hoê noa ˈˈe o teie feia e au i te tamarii.+

15 “Hau atu â, ia hara to taeae, a haere e faaite ia ˈna i ta ˈna hapa* orua anaˈe.+ Ia faaroo oia ia oe, ua faahoˈi ïa oe i to taeae i nia i te eˈa maitai.+ 16 Ia ore râ oia e faaroo ia oe, a rave hoê aore ra e piti atu â taata na muri ia oe, no te haapapu i te mau mea atoa maoti te haapapuraa a* e piti aore ra e toru ite.+ 17 Ia ore oia e faaroo ia raua, a faaite atu i te amuiraa. Ia ore atoa oia e faaroo i te amuiraa, ia riro ïa oia no oe mai te hoê taata no te mau nunaa ěê+ e mai te hoê titau tute.+

18 “Oia mau ta ˈu e parau atu: Te mau mea atoa ta outou e taamu i te fenua nei, ua taamu-aˈena-hia ïa i nia i te raˈi, e te mau mea atoa ta outou e tatara i te fenua nei, ua tatara-aˈena-hia ïa i nia i te raˈi. 19 Oia mau ta ˈu e parau faahou atu: Ia tu te manaˈo o e piti o outou i te fenua nei no nia i te mea faufaa e titauhia ia ani raua, e horoa mai iho â to ˈu Metua i te raˈi.+ 20 I te vahi hoi e amui ai e piti aore ra e toru ma to ˈu nei iˈoa,+ tei rotopu atoa ïa vau ia ratou.”

21 Haere maira Petero e na ô maira ia ˈna: “E te Fatu, ehia taime e tia ˈi i to ˈu taeae ia hara mai ia ˈu e ia faaore au i ta ˈna hara? E hitu anei taime?” 22 Na ô atura Iesu ia ˈna: “Te parau atu nei au ia oe: Eiaha e hitu taime, e 77 râ.+

23 “No reira e nehenehe ai e faaau i te Faatereraa arii o te raˈi i te hoê arii tei hinaaro ia aufau mai ta ˈna mau tavini i ta ratou tarahu. 24 I te taime aufauraa, arataihia maira te hoê taata tei tarahu ia ˈna 10 000 taleni.* 25 No te mea râ aita e moni ta taua taata ra no te aufau i ta ˈna tarahu, faaue atura to ˈna fatu ia hoohia oia, ta ˈna vahine faaipoipo, ta ˈna mau tamarii e ta ˈna mau taoˈa atoa ia pee ta ˈna tarahu.+ 26 Tuturi ihora ïa te tavini e taparu maira ia ˈna: ‘Tiai rii na oe, e faahoˈi pauroa ˈtu iho â vau i ta oe moni.’ 27 Aroha ihora te fatu o taua tavini ra ia ˈna, tuu ihora ia ˈna e faaore atura i ta ˈna tarahu.+ 28 Haere atura râ taua tavini ra i rapae, ite ihora hoê o to ˈna mau hoa tavini tei tarahu ia ˈna 100 denari,* haru ihora ia ˈna e uumi atura i to ˈna arapoa a na ô ai: ‘Faahoˈi pauroa mai i ta ˈu moni.’ 29 Tuturi ihora ïa to ˈna hoa tavini e taparu maira ia ˈna: ‘Tiai rii na oe, e faahoˈi atu iho â vau i ta oe moni.’ 30 Aita râ oia i farii, haere atura râ e faaue atura ia hurihia to ˈna hoa tavini i roto i te fare tapearaa e ia pee noa ˈtu ta ˈna tarahu. 31 I te iteraa to ˈna mau hoa tavini i te ohipa i tupu, peapea roa ihora ratou e haere atura e faatia pauroa i to ratou fatu. 32 Faaue ihora te fatu e tii ia ˈna e na ô atura: ‘Tavini ino, ua faaore pauroa vau i ta oe tarahu i to oe taparuraa mai. 33 Eiaha anei ïa oe e aroha* atoa i to oe hoa tavini, mai ia ˈu i aroha ia oe?’+ 34 Riri roa ihora to ˈna fatu, e tuu atura ia ˈna i te mau tiai o te fare tapearaa e ia pee noa ˈtu pauroa ta ˈna tarahu. 35 E na reira atoa to ˈu Metua i te raˈi ia outou+ ia ore outou tataitahi e faaore i te hapa a to ˈna hoa ma te aau atoa.”+

19 I te otiraa Iesu i te faahiti i teie mau parau, faarue ihora oia ia Galilea e haere atura i te otia fenua o Iudea i tera ˈtu pae o Ioridana.+ 2 E nahoa rahi atoa tei pee ia ˈna e faaora ihora oia i to ratou mau maˈi i reira.

3 Haere maira te mau Pharisea e râmâ ia ˈna e ui maira: “Mea tano anei ia au i te Ture ia faataa te hoê tane i ta ˈna vahine faaipoipo no te mau tumu atoa?”+ 4 Pahono atura oia: “Aita anei outou i taio e o tei poiete i te taata i te haamataraa, ua poiete i te tane e te vahine+ 5 e na ô atura: ‘No reira te tane e faarue ai i to ˈna metua tane e to ˈna metua vahine, a taati atu ai i ta ˈna vahine faaipoipo, e e riro raua ei hoê’?+ 6 E ere atura ïa raua e piti, hoê râ. No reira, o ta te Atua i taati, eiaha te taata e faataa ê.”+ 7 Parau maira ratou ia ˈna: “No te aha ïa Mose i faaue ai ia horoa te hoê tane i te hoê parau tuuraa ia faataa oia i ta ˈna vahine faaipoipo?”+ 8 Na ô atura oia: “No te etaeta o to outou aau i vaiiho ai Mose ia faataa outou i ta outou vahine faaipoipo.+ E ere râ mai tera i to te Atua poieteraa i te tane e te vahine matamua.+ 9 Te parau atu nei au e te tane o te faataa i ta ˈna vahine faaipoipo tei ore i rave i te peu taotoraa tia ore,* a faaipoipo atu ai i te tahi atu, ua faaturi ïa.”+

10 Na ô maira te mau pǐpǐ ia ˈna: “Mai te peu e mai tera te tupuraa o te tane e ta ˈna vahine faaipoipo, mea au aˈe ïa eiaha roa ˈtu e faaipoipo.” 11 Parau atura oia: “E ere o te taata atoa te farii i te reira, o te feia anaˈe râ e fanaˈo ra i taua ô ra.+ 12 Te vai ra o te ore e faaipoipo* no te tahi fifi i to ratou fanauraahia mai, te tahi pae* no te mea ua patehehia ratou, e te vai ra o tei faaoti eiaha e faaipoipo* no te Faatereraa arii* o te raˈi. Te taata e tia ia ˈna ia farii i te reira, a farii ïa.”+

13 Arataihia maira te mau tamarii ia Iesu ra ia tuu oia i to ˈna rima i nia iho ia ratou e ia pure no ratou. Tamaˈi aˈera râ te mau pǐpǐ i taua mau taata ra.+ 14 Parau atura râ Iesu: “A vaiiho noa i te mau tamarii ia haere mai ia ˈu nei, eiaha e tapea ˈtu, no te feia hoi mai teie mau tamarii te Faatereraa arii o te raˈi.”+ 15 Tuu ihora oia i to ˈna rima i nia iho ia ratou e reva ˈtura.

16 E inaha, haere maira te hoê taata apî ia Iesu ra e na ô maira: “Orometua, eaha te maitai te tia ia ˈu ia rave a noaa ˈi ia ˈu te ora mure ore?”+ 17 Na ô atura oia: “Eaha oe e ui mai ai no nia i te mea maitai? O te Atua anaˈe te mea maitai.+ Ia hinaaro hoi oe e fanaˈo i te ora, a haapao noa i te mau faaueraa.”+ 18 Ui maira oia: “Teihea mau faaueraa?” Pahono atura Iesu: “Eiaha roa oe e taparahi pohe i te taata,+ eiaha roa oe e faaturi,+ eiaha roa oe e eiâ,+ eiaha roa oe e pari haavare,+ 19 a faatura i to metua tane e to metua vahine+ e ia here oe i to oe taata tupu mai ia oe iho.”+ 20 Na ô maira te taata apî ra: “Ua hope ia ˈu i te haapao i teie mau parau atoa, eaha te toe ra ia ˈu ia rave?” 21 Parau atura Iesu: “Ia hinaaro oe ia tia roa oe, a haere a hoo i ta oe mau faufaa, a horoa ˈtu ai i te moni na te feia veve, e taoˈa ïa ta oe i nia i te raˈi,+ e a pee mai ia ˈu.”+ 22 A faaroo ai te taata apî i teie parau, haere atura oia ma te oto, mea rahi hoi ta ˈna faufaa.+ 23 Na ô atura ïa Iesu i ta ˈna mau pǐpǐ: “Oia mau ta ˈu e parau atu: Mea fifi no te hoê taata taoˈa rahi ia ô i roto i te Faatereraa arii o te raˈi.+ 24 Te parau faahou atu nei au: Mea ohie aˈe no te hoê kamela ia ô i roto i te hoê apoo nira, i te hoê taata taoˈa rahi ia ô i roto i te Faatereraa arii a te Atua.”+

25 Maere roa ihora te mau pǐpǐ i to ratou faarooraa i te reira, e na ô aˈera: “O vai ïa te nehenehe e ora ˈtu?”+ 26 Hiˈo maitai atura Iesu ia ratou e na ô atura: “I te taata, e ore e tia. I te Atua râ, e tia ïa te mau mea atoa.”+

27 Parau maira ïa Petero: “Inaha, ua haapae matou i te mau mea atoa e ua pee mai ia oe, eaha ïa ta matou e fanaˈo?”+ 28 Na ô atura Iesu ia ratou: “Oia mau ta ˈu e parau atu: E faaapî te Atua i te mau mea atoa ia parahi te Tamaiti a te taata nei i nia i to ˈna terono hanahana. I reira outou o tei pee mai ia ˈu e parahi ai i nia 12 terono, a haava ˈi i na opu 12 o Iseraela.+ 29 E te taata atoa tei haapae i to ˈna fare aore ra taeae, tuahine, metua tane, metua vahine, tamarii aore ra fenua no to ˈu nei iˈoa, e tataihanere ïa ta ˈna e fanaˈo e e noaa ia ˈna te ora mure ore.+

30 “E rave rahi râ to mua te riro no muri, e to muri no mua.+

20 “E au hoi te Faatereraa arii* o te raˈi i te hoê fatu faaapu vine, o tei haere i rapae i te poipoi roa e imi i te rave ohipa no ta ˈna faaapu vine.+ 2 I muri aˈe i to ˈna faaauraa e te mau rave ohipa e aufau ia ratou hoê denari* i te mahana, tono atura oia ia ratou i roto i ta ˈna faaapu vine. 3 I te area hora 9 i te poipoi,* haere faahou atura oia i rapae, ite ihora i te tahi mau taata e tia noa ra na te mahora, aita ta ratou e ohipa, 4 e parau atura ia ratou: ‘Outou atoa, a haere i roto i ta ˈu faaapu vine, e aufau atu vau i te moni tia na outou.’ 5 Reva ˈtura ratou. Haere faahou atura oia i rapae i te area hora 12 i te avatea* e i te area hora 3 i te taperaa mahana,* e na reira atoa ˈtura oia. 6 I te area hora 5 i te ahiahi,* haere faahou atura oia i rapae, ite ihora i te tahi atu mau taata e tia noa ra, e na ô atura: ‘Eaha outou e tia noa ˈi i ǒ nei e po noa ˈtu te mahana ma te ore e rave i te ohipa?’ 7 Parau maira ratou: ‘No te mea aita e taata i tihepu ia matou.’ Na ô atura oia: ‘Outou atoa, a haere i ta ˈu faaapu vine.’

8 “E ahiahi ihora, parau atura te fatu faaapu vine i ta ˈna tiaau ohipa: ‘A pii i te mau rave ohipa no te aufau ia ratou,+ na mua te feia hopea e tae atu i te feia matamua.’ 9 Haere maira te feia tei haamata i te hora 5 i te ahiahi, horoahia ˈtura na ratou tataitahi hoê denari.* 10 I to te feia matamua taeraa mai, manaˈo ihora ratou e e hau aˈe ta ratou moni, hoê noa râ denari* tei horoa-atoa-hia ˈtu na ratou. 11 A rave ai ratou i ta ratou moni, amuamu aˈera ratou i te fatu faaapu vine 12 e parau maira: ‘Ua rave teie feia hopea i te ohipa 1 noa hora, hoê â râ moni ta oe i aufau na ratou e na matou tei rohirohi i te ohiparaa i raro aˈe i te veavea o te mahana e ahiahi noa ˈtu!’ 13 No te pahono râ i te hoê o ratou, na ô atura te fatu faaapu vine: ‘E hoa, aita vau i taviri ia oe. Aita anei tâua i faaau no hoê denari?*+ 14 A rave i ta oe moni e a haere. Te hinaaro nei au e horoa na te feia hopea hoê â moni ohipa e ta oe. 15 E ere anei na ˈu e faaoti e faaohipa i ta ˈu mau taoˈa mai ta ˈu e hinaaro? Aore ra e mata nounou* anei to oe no te mea e taata maitai au?’*+ 16 Mea na reira ïa to muri e riro ai no mua, e to mua no muri.”+

17 A pauma ˈi ratou i Ierusalema, aratai rii ê ihora Iesu i na pǐpǐ 12 o ratou anaˈe e parau atura:+ 18 “Inaha, te pauma nei tatou i Ierusalema, e tuuhia te Tamaiti a te taata nei i te rima o te mau tahuˈa tiaau e te mau papai parau. E faautua ratou ia ˈna i te pohe,+ 19 a tuu atu ai ia ˈna i te rima o te feia o te mau nunaa ěê ia faaooohia, ia huihia e ia haapohehia i nia i te pou,+ e i te toru o te mahana e faatiahia mai ai oia.”+

20 Haere maira te vahine a Zebedaio+ e ta ˈna e piti tamaiti ia Iesu ra ma te tipapa i mua ia ˈna no te ani atu i te tahi mea.+ 21 Na ô atura Iesu i te vahine: “Eaha ta oe e hinaaro?” Pahono maira oia: “A faaue na ia parahi ta ˈu na tamaiti i roto i ta oe Faatereraa arii,+ hoê i to rima atau e te tahi i to rima aui.” 22 Pahono atura Iesu: “Aita orua i ite i ta orua e ani mai nei. E haere anei ia orua ia inu i ta ˈu e fatata i te inu?”+ Na ô maira raua: “E haere ia mâua.” 23 Parau atura oia: “E inu iho â orua i ta ˈu e inu,+ area te parahiraa i to ˈu rima atau e i to ˈu rima aui, e ere na ˈu e horoa ˈtu. No te feia râ no ratou teie na parahiraa ta to ˈu Metua i faaineine.”+

24 I to te tahi atu mau pǐpǐ hoê ahuru faarooraa i te reira, inoino ihora ratou i na piti taeae.+ 25 Pii ihora râ Iesu ia ratou ia haere mai e na ô atura: “Ua ite outou e te faatere ra te mau arii o teie nei ao i te mau nunaa o te haavî-atoa-hia ra e te feia mana.+ 26 Eiaha roa mai tera i rotopu ia outou,+ o tei hinaaro hoi ia rahi oia i rotopu ia outou, ia riro ïa ei tavini no outou e tia ˈi,+ 27 e o tei hinaaro i te tiaraa matamua i rotopu ia outou, ia riro ïa ei tavini no outou e tia ˈi.+ 28 Ua haere atoa mai te Tamaiti a te taata nei eiaha ia tavinihia oia, no te tavini râ+ e no te horoa i to ˈna ora* ei hoo* no te taata e rave rahi.”+

29 A faarue ai Iesu e ta ˈna mau pǐpǐ ia Ieriko, pee aˈera te hoê nahoa rahi ia ˈna. 30 E inaha, faaroo aˈera e piti tane matapo e parahi ra i te pae purumu e te haere mai ra Iesu, e pii maira: “E te Fatu, aroha* mai ia mâua, Tamaiti a Davida!”+ 31 Tamaˈi aˈera râ te nahoa ia raua ia mamû raua, puai noa ˈtura râ to raua tuôraa: “E te Fatu, aroha* mai ia mâua, Tamaiti a Davida!” 32 Tia noa ihora ïa Iesu, pii atura ia raua e na ô atura: “Eaha ta orua e hinaaro ia rave au no orua?” 33 Parau maira raua: “E te Fatu, ia araara to mâua mata.” 34 Aroha ihora Iesu ia raua e tapea ˈtura i to raua mata.+ I reira iho ite faahou ihora raua e pee maira ia ˈna.

21 A piri atu ai ratou ia Ierusalema e i to ratou taeraa i Betephage i nia i te mouˈa Oliveta, tono ihora Iesu e piti pǐpǐ,+ 2 a na ô ai: “A haere i roto i tera oire iti i mua ia orua, i reira orua e ite ai i te hoê asini tei taamuhia e ta ˈna fanauˈa i pihai iho mai. A tatara ïa e a putô mai. 3 Ia parau mai te hoê taata i te tahi mea, a parau atu: ‘Te hinaaro mai ra te Fatu.’ E tuu oioi mai oia i na animara.”

4 Ua tupu mau â te reira mai tei parauhia na roto i ta ˈna peropheta: 5 “A parau i te tamahine o Ziona: ‘A hiˈo na! Te haere mai ra to arii ia oe+ ma te haehaa+ e ma te parahi i nia i te hoê asini, i nia hoi i te hoê fanauˈa, ta te hoê maiaa asini i fanau.’”+

6 Haere aˈera ïa na pǐpǐ e rave atura i ta Iesu i faaue ia raua.+ 7 Putô maira raua i te asini e te fanauˈa, tuu aˈera te mau pǐpǐ i to ratou ahu tapoˈi i nia iho, e parahi ihora Iesu i nia i te fanauˈa asini.+ 8 Vauvau aˈera te rahiraa o te nahoa i to ratou ahu tapoˈi i nia i te purumu,+ a tâpû ai vetahi i te mau amaa raau no te apǎpǎ ˈtu i nia i te purumu. 9 Hau atu â, te tuô noa ra te nahoa i mua e i muri mai ia ˈna: “A faaora na ia ˈna, te Tamaiti a Davida!+ Ia haamaitaihia tei haere mai ma te iˈoa o Iehova!*+ A faaora na ia ˈna, to te raˈi teitei!”+

10 E i to Iesu taeraa ˈtu i Ierusalema, te arepurepu ra te oire taatoa e te uiui ra te taata: “O vai teie?” 11 Te parau noa ra te nahoa: “O te peropheta Iesu+ no Nazareta i Galilea!”

12 Tomo ihora Iesu i roto i te hiero, tiahi atura i rapae i te feia atoa e hoo atu ra e e hoo mai ra i roto i te hiero, e huri ihora i te mau amuraa maa a te feia taui moni e te mau parahiraa a te feia hoo uupa.+ 13 Na ô atura oia ia ratou: “Ua papaihia: ‘E parauhia to ˈu fare e fare no te pure,’+ te faariro nei râ outou i te reira ei ana no te eiâ.”+ 14 Tapiri atoa maira te matapo e te pirioi ia ˈna i roto i te hiero e faaora ˈtura oia i to ratou maˈi.

15 I to te mau tahuˈa tiaau e te mau papai parau iteraa i te mau ohipa faahiahia ta Iesu i rave e te tuôraa te mau tamaroa na roto i te hiero: “Teie ta matou pure: A faaora na i te Tamaiti a Davida!”+ inoino ihora ratou.+ 16 Na ô maira ratou ia ˈna: “Te faaroo ra oe i ta ratou parau?” Pahono atura Iesu: “E. Aita anei outou i taio: ‘Ua faatupu oe i te arueraa na roto i te vaha o te mau tamarii e te mau aiû’?”+ 17 Vaiiho ihora oia ia ratou, faarue atura i te oire no te haere i Betania e taoto atura i reira.+

18 I te poipoi roa, a hoˈi mai ai oia i te oire, poia ihora oia.+ 19 Ite ihora oia i te hoê tumu suke i te pae purumu, haere atura i pihai iho. Aita râ e maa to nia iho, e rauere anaˈe.+ Na ô atura oia: “Eiaha roa ˈtu oe e hotu faahou mai.”+ Mǎrô ihora taua tumu suke ra. 20 I to te mau pǐpǐ iteraa i te reira, maere ihora ratou e na ô atura: “Mea nafea tera tumu suke i te mǎrôraa i reira iho?”+ 21 Pahono atura Iesu: “Oia mau ta ˈu e parau atu: Mai te peu e e faaroo papu to outou, e rave ïa outou i ta ˈu i rave i te tumu suke. Ia parau atoa outou i teie mouˈa: ‘Ia pee oe e ia taorahia i roto i te miti,’ e tupu iho â te reira.+ 22 E te mau mea atoa ta outou e ani na roto i te pure ma te faaroo, e fanaˈo iho â outou.”+

23 Tomo ihora Iesu i roto i te hiero, haapii atura i te taata, tapiri maira te mau tahuˈa tiaau e te mau aratai ati Iuda ia ˈna e na ô maira: “Na roto i teihea mana e rave ai oe i teie mau mea atoa? E na vai i horoa ia oe i teie mana?”+ 24 Pahono atura Iesu: “E uiraa atoa ta ˈu. Ia pahono mai outou, e faaite atoa ˈtu ïa vau i teihea mana e rave ai au i teie mau mea: 25 Nohea mai te bapetizoraa a Ioane? No te raˈi mai anei aore ra no ǒ mai i te taata ra?” Feruri ihora ratou e na ô aˈera te tahi i te tahi: “Ia parau tatou: ‘No te raˈi mai,’ e na ô mai oia: ‘No te aha ïa outou i ore ai i tiaturi ia ˈna?’+ 26 Ia parau râ tatou: ‘No ǒ mai i te taata ra,’ ua ati ïa tatou i te nahoa o te tiaturi ra e e peropheta Ioane.” 27 Pahono aˈera ïa ratou ia Iesu: “Aita matou i ite.” Na ô atura oia: “Eita atoa ïa vau e faaite atu i teihea mana e rave ai au i teie mau mea.

28 Eaha to outou manaˈo? E piti tamarii ta te hoê taata, haere atura oia i te matahiapo ra e na ô atura: ‘Ta ˈu tamaiti, i teie mahana e haere oe i te faaapu vine e rave i te ohipa.’ 29 Pahono maira te tamaiti: ‘Eita.’ I muri iho râ, tatarahapa ihora oia e haere atura. 30 Tapiri atura te metua tane i te teina, e na reira atoa ˈtura i te parau i te teina, o tei pahono mai: ‘E.’ Aita râ oia i haere. 31 O vai o raua tei rave i te hinaaro o to ˈna metua tane?” Na ô maira ratou: “Te matahiapo.” Na ô atura Iesu: “Oia mau ta ˈu e parau atu: O te mau titau tute e te mau vahine taiata te na mua ˈtu ia outou i te ô i roto i te Faatereraa arii a* te Atua. 32 Ua haere mai hoi Ioane ia outou ra ma te faaite i te eˈa o te parau-tia, aita râ outou i tiaturi ia ˈna.+ Area te mau titau tute e te mau vahine taiata, oia ïa. Outou râ o tei ite i te reira, aita ïa i tatarahapa a tiaturi atu ai ia ˈna.

33 “Teie te tahi atu faahohoˈaraa: Ua tanu te hoê fatu fenua i te vine,+ e aua ˈtura i te reira. I roto, ô ihora oia i te hoê apoo taataahiraa vine, faatia aˈera i te hoê pare,+ horoa tarahu atura i ta ˈna faaapu i te tahi feia faaapu, e reva ˈtura i te ara.+ 34 I te tau ootiraa vine, tono ihora oia i ta ˈna mau tavini i te feia faaapu no te rave i ta ˈna tuhaa vine. 35 Haru aˈera te feia faaapu i ta ˈna mau tavini, rutu ihora i te hoê, haapohe ihora i te tahi atu e pehi ihora i te tahi atu i te ofai.+ 36 Tono faahou atura oia i te tahi atu mau tavini, hau aˈe i to na mua ˈtu. Na reira atoa maira te feia faaapu ia ratou.+ 37 E i te hopea, tono atura oia i ta ˈna tamaiti i te feia faaapu, a na ô ai: ‘E faatura ratou i ta ˈu tamaiti.’ 38 A ite ai râ te feia faaapu i te tamaiti, na ô aˈera ratou te tahi i te tahi: ‘Teie te taata o te fatu i teie faaapu,+ mai haere anaˈe e haapohe ia ˈna, a fatu atu ai tatou i teie faaapu!’ 39 Haru aˈera ïa ratou ia ˈna, huti atura i rapae i te faaapu vine e haapohe atura ia ˈna.+ 40 No reira, ia haere mai te fatu o te faaapu vine, e aha oia i taua feia faaapu ra?” 41 Na ô maira te mau tahuˈa tiaau e te mau aratai ati Iuda: “No to ratou ino, e haapohe roa ïa oia ia ratou, a horoa tarahu atu ai i te faaapu vine i te tahi atu feia faaapu o te horoa ˈtu i ta ˈna tuhaa vine i te taime au.”

42 Parau atura Iesu: “Aita outou i taio aˈenei i roto i te mau Papai: ‘Te ofai ta te feia patu fare i faarue, ua riro mai ïa ei ofai tihi.*+ No ǒ mai te reira ia Iehova* ra, e mea faahiahia roa no tatou’?+ 43 No reira vau e parau atu ai: E ravehia mai te Faatereraa arii a te Atua ia outou e e horoahia i te hoê nunaa o te faahotu i te reira. 44 Oia atoa te taata e topa i nia iho i teie ofai ra, e pepe maitai ïa.+ E te taata e topahia i teie ofai ra, e perehu roa ïa.”+

45 I to te mau tahuˈa tiaau e te mau Pharisea faarooraa i ta Iesu mau faahohoˈaraa, taa ihora ia ratou e o ratou ta ˈna e parau ra.+ 46 Hinaaro ihora ratou e haru ia ˈna,* ua mǎtaˈu râ i te nahoa o te tiaturi ra e peropheta Iesu.+

22 Paraparau faahou atura Iesu ia ratou na roto i te mau faahohoˈaraa e na ô atura: 2 “E nehenehe e faaau i te Faatereraa arii* o te raˈi i te hoê arii o tei faatupu i te hoê oroa faaipoiporaa+ no ta ˈna tamaiti. 3 Tono atura oia i ta ˈna mau tavini e tii i te feia i titau-manihini-hia i te oroa faaipoiporaa, aita râ ratou i hinaaro e haere mai.+ 4 Tono faahou atura oia i te tahi atu mau tavini a na ô ai: ‘A parau atu i te mau manihini: “Inaha, ua faaineine au i te maa, ua tupaihia ta ˈu mau puaatoro e animara haaporiahia, e ua nahonaho te mau mea atoa. A haere mai i te oroa faaipoiporaa.”’ 5 Aita râ ratou i tâuˈa ˈtu, haere atura te tahi i ta ˈna faaapu, te tahi atu i ta ˈna ohipa tapihooraa.+ 6 Te toea râ, haru aˈera ïa i ta ˈna mau tavini, rave ino e haapohe roa ˈtura ia ratou.

7 “Riri roa ihora te arii, tono atura i ta ˈna mau faehau, haapohe atura i taua mau taparahi taata ra e tanina ˈtura i to ratou oire.+ 8 Parau atura oia i ta ˈna mau tavini: ‘Ua nahonaho te oroa faaipoiporaa, eita râ e au i te feia i titau-manihini-hia.+ 9 A haere ïa na te mau purumu rahi e a titau manihini i te taata atoa ta outou e ite atu.’+ 10 Haere aˈera taua mau tavini ra na te mau purumu rahi e titau manihini maira i te feia atoa ta ratou i ite atu, te feia maitai e te feia ino. Î roa aˈera te piha faaipoiporaa i te manihini.*

11 “I to te arii tomoraa mai e hiˈopoaraa i te mau manihini, ite ihora oia i te hoê tane aita i oomo i te ahu no te oroa faaipoiporaa. 12 Na ô atura oia ia ˈna: ‘E hoa, eaha oe i tomo mai ai i ǒ nei e aita hoi to oe e ahu no te oroa faaipoiporaa?’ Mamû noa ihora taua taata ra. 13 Parau atura te arii i ta ˈna mau tavini: ‘A taamu i to ˈna rima e to ˈna avae e a huri ia ˈna i te poiri i rapae. I reira oia e taˈi ai e to ˈna niho e mauu ai i te ahoaho.’

14 “Mea rahi hoi tei titau-manihini-hia, mea iti râ tei maitihia.”

15 Haere atura te mau Pharisea e feruri ihora i te hoê ravea e noaa ˈi Iesu ia ratou na roto i ta ˈna mau parau.+ 16 Tono aˈera ratou i ta ratou mau pǐpǐ e to te pǔpǔ a Heroda+ e parau ia Iesu: “Orometua, ua ite matou e taata parau mau oe e te haapii ra oe ia vetahi ê i te eˈa o te Atua ma te parau mau, eita atoa oe e imi i ta te taata farii maitai, eita hoi oe e haapao i te huru rapaeau o te taata. 17 Faaite mai na ïa i to oe manaˈo. Mea tano* anei ia au i te Ture ia aufau i te tute* ia Kaisara aore ra eita?” 18 Ua ite râ Iesu i ta ratou opuaraa ino e na ô atura: “Haavarevare ma, eaha outou e râmâ mai ai ia ˈu? 19 Faaite mai na i te moni aufau tute.” Horoa maira ratou i te hoê denari.* 20 Na ô atura oia: “No vai te hohoˈa e te iˈoa i nia iho?” 21 Parau maira ratou: “No Kaisara.” Na ô atura oia: “A faahoˈi ïa i ta Kaisara ia Kaisara, ta te Atua râ i te Atua.”+ 22 I to ratou faarooraa i te reira, maere ihora ratou, vaiiho atura ia ˈna e haere atura.

23 I taua mahana ra, haere maira te mau Sadukea, o te parau ra e aita e tia-faahou-raa,+ e ui maira ia Iesu:+ 24 “Orometua, ua parau Mose: ‘Ia pohe te hoê tane aita e tamarii ta ˈna, ia faaipoipo ïa to ˈna taeae i ta ˈna vahine faaipoipo e tia ˈi e ia fanau mai ta ˈna ei tamarii na to ˈna taeae i pohe.’+ 25 I vai na hoi e hitu taeae i ǒ matou. Faaipoipo ihora te matahiapo e pohe atura, e no te mea aita e tamarii ta ˈna, faaipoipo ihora to ˈna teina i ta ˈna vahine. 26 Na reira atoa ˈtura te piti e te toru e tae noa ˈtu i te hitu. 27 Pohe atoa ˈtura te vahine. 28 I te tia-faahou-raa, ei vahine oia na vai i rotopu i na hitu? Ua faaipoipo hoi ratou paatoa ia ˈna.”

29 Pahono atura Iesu: “Ua hape outou, no te mea aita outou i ite i te mau Papai e e nafea te mana o te Atua e ohipa ˈi.+ 30 Eita hoi te feia tei faatiahia mai e faaipoipo, e eita e horoahia ia faaipoipo, e riro râ ratou mai te mau melahi i te raˈi.+ 31 Aita outou i taio i ta te Atua i parau ia outou no nia i te tia-faahou-raa o tei pohe: 32 ‘O vau te Atua o Aberahama e te Atua o Isaaka e te Atua o Iakoba’?+ E ere oia i te Atua no te feia pohe, no te feia ora râ.”+ 33 A faaroo ai te nahoa i te reira, maere ihora ratou i ta ˈna haapiiraa.+

34 I to ratou faarooraa e ua haamamû Iesu i te mau Sadukea, haere maira te mau Pharisea ia ˈna ra. 35 Râmâhia maira Iesu e te hoê Pharisea, mea ite i te Ture, ma te ui: 36 “Orometua, teihea te faaueraa rahi roa ˈˈe i roto i te Ture?”+ 37 Pahono atura oia: “‘Ia here oe ia Iehova* to oe Atua ma to oe aau atoa e ma to oe ora* atoa e ma to oe manaˈo atoa.’+ 38 O te faaueraa rahi roa ˈˈe teie e te matamua. 39 Mai tera atoa te piti, o te na ô ra: ‘Ia here oe i to oe taata tupu mai ia oe iho.’+ 40 I nia i teie na faaueraa e piti i niuhia ˈi te Ture taatoa e te mau papai a te mau peropheta.”+

41 Ui atura Iesu i te mau Pharisea atoa i reira:+ 42 “Eaha to outou manaˈo i te Mesia? E huaai o ˈna no vai?” Pahono maira ratou: “No Davida.”+ 43 Ui atura oia: “No te aha ïa Davida tei arataihia e te varua moˈa+ i parau ai ia ˈna e Fatu? Ua na ô oia: 44 ‘Ua parau Iehova* i to ˈu Fatu: “A parahi i to ˈu rima atau nei e ia tuu roa vau i to oe mau enemi i raro aˈe i to oe avae”’?+ 45 Mai te peu e ua parau Davida i te Mesia e Fatu, mea nafea ïa e huaai ai oia no ˈna?”+ 46 Aita ˈtura i tae ia ratou pauroa ia pahono, e mai taua mahana mai ra aita roa e taata i ui faahou ia ˈna no te taiâ.

23 Parau atura Iesu i te nahoa e i ta ˈna mau pǐpǐ: 2 “Ua rave te mau papai parau e te mau Pharisea i te parahiraa o Mose. 3 No reira, te mau mea atoa ta ratou e parau mai, a rave e a haapao, eiaha râ e pee i ta ratou mau peu, e parau hoi ratou eita râ e rave mai ta ratou e parau ra.+ 4 E taamu ratou i te mau hopoia teimaha, a tuu atu ai i nia i te tapono o te taata.+ O ratou râ, eita ïa e hinaaro e hauti i te reira.+ 5 Te mau mea atoa ta ratou e rave, ia hiˈohia ïa ratou e te taata.+ Te faaaano nei hoi ratou i te mau afata nainai e irava o te mau Papai to roto, ta ratou e taamu i nia iho ia ratou ei taoˈa paruru,+ e te faaroa nei i to ratou hiti ahu.+ 6 Mea au na ratou e parahi i te mau vahi faataahia no te mau manihini tiaraa teitei i te mau tamaaraa e i mua roa* i roto i te mau sunago,+ 7 e ia arohahia ratou ma te faatura na te mahora e ia parauhia ratou e Rabi.* 8 O outou râ, eiaha outou ia parauhia e Rabi, hoê anaˈe hoi Orometua to outou,+ e taeae anaˈe outou paatoa. 9 Eiaha atoa e parau i te taata i te fenua nei e metua no outou, hoê anaˈe hoi Metua to outou,+ tei te raˈi ïa. 10 Eiaha atoa outou ia parauhia e aratai, hoê anaˈe hoi Aratai to outou, o te Mesia. 11 O tei rahi aˈe râ i rotopu ia outou, ia riro ïa ei tavini no outou.+ 12 Te taata o te faateitei ia ˈna, e faahaehaahia ïa,+ e te taata o te faahaehaa ia ˈna, e faateiteihia ïa.+

13 “Haavarevare ma, ua ati outou te mau papai parau e te mau Pharisea, no te mea te ponao nei outou i te uputa o te Faatereraa arii* o te raˈi i mua i te taata, eita hoi outou iho e tomo, e te feia e hinaaro e tomo, e tapea ïa outou.+ 14 *——

15 “Haavarevare ma,+ ua ati outou te mau papai parau e te mau Pharisea, no te mea te tere nei outou na te tai e na te fenua ia noaa mai te hoê taata o te farii i te haapaoraa ati Iuda.* Ia farii oia, e ino roa ˈtu â oia ia outou. Mai te peu e mea tano ia haere outou i Gehena,* o ˈna atoa ïa.

16 “Ua ati outou te mau aratai matapo+ o te parau nei: ‘Ia tǎpǔ te taata i te hiero, aita e faufaa ia haapao oia i te reira. Ia tǎpǔ râ oia i te auro o te hiero, ia haapao ïa oia i te reira e tia ˈi.’+ 17 Maamaa, matapo ma! Eaha hoi te mea faufaa aˈe, te auro aore ra te hiero o te haamoˈa i te auro? 18 Hau atu â: ‘Ia tǎpǔ te taata i te fata, aita e faufaa ia haapao oia i te reira. Ia tǎpǔ râ oia i te ô i nia i te fata, ia haapao ïa oia i te reira e tia ˈi.’ 19 Matapo ma! Eaha hoi te mea faufaa aˈe, te ô aore ra te fata o te haamoˈa i te ô? 20 O te tǎpǔ hoi i te fata, te tǎpǔ ra ïa i taua fata ra e i te mau mea atoa i nia iho, 21 e o te tǎpǔ i te hiero, te tǎpǔ ra ïa i taua hiero ra e tei parahi ra i roto,+ 22 e o te tǎpǔ i te raˈi, te tǎpǔ ra ïa i te terono o te Atua e tei parahi ra i nia iho.

23 “Haavarevare ma, ua ati outou te mau papai parau e te mau Pharisea, no te mea te horoa nei outou i te tuhaa ahuru o te mineta, te aneto e te kumina,+ ua haapae râ outou i te mau mea faufaa aˈe o te Ture, oia hoi te parau-tia,+ te aroha hamani maitai+ e te taiva ore. Ia horoa iho â outou i te tuhaa ahuru e tia ˈi, eiaha râ e haapae i te tahi atu mau parau.+ 24 Aratai matapo ma,+ te titia nei outou i te naonao+ e te horomii nei râ i te kamela!+

25 “Haavarevare ma, ua ati outou te mau papai parau e te mau Pharisea, no te mea te tamâ nei outou i te rapaeau o te auˈa e o te farii maa.+ O roto râ, ua î ïa outou i te nounou*+ e te hinaaro vî ore.+ 26 Pharisea matapo, o roto o te auˈa e o te farii maa ta oe e tamâ na mua ia mâ atoa o rapaeau.

27 “Haavarevare ma,+ ua ati outou te mau papai parau e te mau Pharisea, no te mea e au outou i te mau menema faauouohia,+ mea nehenehe i rapaeau, o roto râ, ua î ïa i te ivi taata pohe e i te mea viivii ua rau te huru. 28 Oia atoa outou, e au ra e e feia parau-tia outou ia hiˈo mai te taata. To outou râ aau, mea haavarevare roa ïa e te ofati ture.+

29 “Haavarevare ma,+ ua ati outou te mau papai parau e te mau Pharisea, no te mea te patu nei outou i te menema o te mau peropheta e te faaunauna nei i te menema* o te feia parau-tia+ 30 e te na ô nei outou: ‘Ahiri matou i ora na i te tau o to matou mau tupuna, eita matou e apiti ia ratou i te haamaniiraa i te toto o te mau peropheta.’ 31 No reira, na outou iho e faaite nei e e tamarii outou na te feia o tei haapohe i te mau peropheta.+ 32 No reira, a faaoti i ta to outou mau tupuna i haamata.

33 “Ophi, fanauˈa ehidena ma!+ E nafea outou e ora ˈtu ai i te faautuaraa i Gehena?*+ 34 No reira ïa vau e tono atu ai i te mau peropheta,+ te feia paari e te mau orometua haapii.+ Te vai ra i rotopu ia ratou ta outou e taparahi pohe,+ e haapohe i nia i te pou, e hui+ i roto i ta outou mau sunago e e hamani ino+ i tera e tera oire, 35 ia hoˈi mai i nia ia outou te toto o te feia parau-tia atoa tei haapohehia i te ao nei, mai ia Abela+ mai e tae roa ˈtu i te tamaiti a Barakia ra o Zekaria, ta outou i haapohe i rotopu i te nao* e te fata.+ 36 Oia mau ta ˈu e parau atu: E roohia teie nei uˈi i teie mau mea atoa.

37 “Ierusalema, Ierusalema, o te haapohe i te mau peropheta e o te pehi i tei tonohia ˈtu ia ˈna i te ofai!+ Ahia aˈenei to ˈu hinaaroraa e haaputu i ta oe mau tamarii, mai te maiaa moa o te haaputu i ta ˈna mau fanauˈa i raro aˈe i to ˈna pererau! Aita râ outou i hinaaro.+ 38 Inaha, e faaruehia* to outou fare.+ 39 Teie hoi ta ˈu e parau atu: E ore roa outou e ite faahou mai ia ˈu e tae noa ˈtu i te taime e na ô ai outou: ‘Ia haamaitaihia tei haere mai ma te iˈoa o Iehova!’”*+

24 I to Iesu haereraa i rapaeau i te hiero, tapiri maira ta ˈna mau pǐpǐ no te faaite ia ˈna i te hiero taatoa. 2 Na ô atura oia: “Te ite ra outou i teie mau mea atoa? Oia mau ta ˈu e parau atu: E ore roa e vaiihohia te hoê ofai i nia iho i te tahi, e huri-pauroa-hia i raro.”+

3 Te parahi ra Iesu i nia i te mouˈa Oliveta i haere mai ai ta ˈna mau pǐpǐ ia ˈna ra, o ratou anaˈe, e na ô maira: “A faaite mai na, afea teie mau mea e tupu ai, e eaha te tapao o te tau o to oe hoˈiraa mai*+ e to te anotau hopea o te ao* nei?”+

4 Pahono atura Iesu: “A ara ia ore outou ia vare i te taata,+ 5 mea rahi hoi o te haere mai ma to ˈu iˈoa, a na ô ai: ‘O vau te Mesia,’ e mea rahi te vare.+ 6 E faaroo outou i te tamaˈi e te parau o te tamaˈi. A ara eiaha outou ia riaria, ia tupu hoi teie mau mea e tia ˈi, aita â râ te hopea i tae mai atura.+

7 “E aro hoi te tahi nunaa i te tahi atu nunaa e te tahi faatereraa i te tahi atu faatereraa,+ e e tupu te oˈe+ e te aueueraa fenua i tera e tera vahi.+ 8 E haamataraa teie mau mea atoa o te mauiui rahi.

9 “I reira te taata e hamani ino+ e e haapohe ai ia outou.+ E hae te mau nunaa atoa ia outou no to ˈu nei iˈoa.+ 10 Mea rahi atoa te taiva, te tuu te tahi i te tahi i te rima o te feia hamani ino e te hae te tahi i te tahi. 11 E tia mai e rave rahi peropheta haavare e mea rahi te vare ia ratou,+ 12 e no te rahi o te ino, e iti roa mai te here o te rahiraa. 13 Te taata râ tei faaoromai tamau* e tae noa ˈtu i te hopea, e ora ïa.+ 14 E e porohia te parau apî oaoa o te Faatereraa arii* e ati aˈe te fenua ia ite te mau nunaa atoa,+ i reira ïa te hopea e tae mai ai.

15 “No reira, ia ite outou i te mea faufau o te haamou, ia tia hoi i te hoê vahi moˈa mai tei parauhia e Daniela te peropheta,+ (ia feruri maite te taata taio e taa ˈi ia ˈna teie parau), 16 ia horo ïa te feia e parahi ra i Iudea i te mau mouˈa.+ 17 Eiaha te taata i nia iho i to ˈna tafare e pou mai e tii i te taoˈa i roto i to ˈna fare, 18 eiaha atoa te taata i roto i te faaapu e hoˈi e tii i to ˈna ahu tapoˈi. 19 Ua ati te mau vahine hapû e te mau vahine e aiû ta ratou i taua mau mahana ra! 20 A tamau i te pure ia ore ta outou hororaa ia tupu i te tau toˈetoˈe aore ra i te Sabati, 21 e tupu hoi te hoê ati rahi+ aita i tupu aˈenei mai te omuaraa mai o teie nei ao e tae roa mai i teie mahana, e o te ore atoa e tupu faahou.+ 22 Ia ore taua mau mahana ra e haapotohia, aita e taata e ora. No te feia râ i maitihia e haapotohia ˈi taua mau mahana ra.+

23 E ia na ô mai te taata: ‘A hiˈo! Tei ǒ nei te Mesia,’+ aore ra: ‘Tei ǒ!’ eiaha e tiaturi atu.+ 24 E tia mai hoi te mau Mesia haavare e te mau peropheta haavare+ e e faatupu ratou i te mau tapao rahi e te mau ohipa faahiahia mau no te tamata i te haavare+ i te feia i maitihia. 25 A haamanaˈo, ua faaara vau ia outou. 26 E ia parau mai te tahi taata ia outou: ‘A hiˈo! Tei te medebara oia,’ eiaha e haere. Aore ra: ‘A hiˈo! Tei roto oia i te piha,’ eiaha e tiaturi atu.+ 27 Mai te uira hoi o te anapa i hitia o te râ e tae roa ˈtu i tooa o te râ, oia atoa ïa te tau o te hoˈiraa mai* o te Tamaiti a te taata nei.+ 28 I te mau vahi e tino pohe to reira e amui ai te mau aeto.+

29 “I muri iho i taua mau mahana ati ra, e haapoiri te mahana,+ eita te avaˈe e anaana mai, e topa te mau fetia mai te raˈi mai e e ueuehia te mau mea puai o te raˈi.+ 30 I reira e itehia ˈi te tapao a te Tamaiti a te taata nei i nia i te raˈi, e i reira te mau nunaa* atoa o te fenua e tupaipai ai i to ratou ouma ma te oto+ e e ite ai i te Tamaiti a te taata nei+ ia haere mai na nia i te mau ata o te raˈi ma te puai e te hanahana rahi.+ 31 E tono atoa ˈtu oia i ta ˈna mau melahi e ia oto rahi te pu e haaputuputu ai ratou i to ˈna mau taata maitihia mai apatoerau, apatoa, hitia o te râ e tooa o te râ, mai te hoê pae o te raˈi e tae atu i te tahi pae.+

32 “A haapii na no nia i teie faahohoˈaraa o te tumu suke: I te tupuraa iho â te amaa apî e te oteoraa mai te omou, ua ite ïa outou e ua fatata te tau tupuraa.+ 33 Oia atoa ia ite outou i teie mau mea atoa, ua taa ïa ia outou e tei te uputa te Tamaiti a te taata nei.+ 34 Oia mau ta ˈu e parau atu: E ore roa teie nei uˈi e mou e tupu ai teie mau mea atoa. 35 E mou te raˈi e te fenua, ta ˈu râ mau parau, e ore roa ïa e mou.+

36 “No nia i te reira mahana e te reira hora, aita te hoê i ite,+ aita te mau melahi o te raˈi e aita atoa te Tamaiti, o te Metua anaˈe râ.+ 37 E riro hoi te tau o te hoˈiraa mai* o te Tamaiti a te taata nei+ mai te tau o Noa ra.+ 38 I te reira hoi tau hou te diluvi, te tamaa ra te taata e te inu ra, te faaipoipo ra te tane, te horoahia ra te vahine ia faaipoipo e tae roa i te mahana i tomo ai Noa i roto i te araka,+ 39 e aita ratou i tâuˈa e tae noa mai ai te diluvi e mou atura ratou paatoa,+ oia atoa ïa te tau o te hoˈiraa mai* o te Tamaiti a te taata nei. 40 E piti hoi tane tei te faaapu: E ravehia hoê e e vaiihohia te tahi. 41 E piti vahine te taviri ra i te ofai oro: E ravehia hoê e e vaiihohia te tahi.+ 42 A ara noa ïa, no te mea aita outou i ite eaha te mahana e haere mai ai to outou Fatu.+

43 “Ua ite hoi outou: Ahiri te fatu fare i ite i teihea hora* e haere mai ai te eiâ,+ e ara oia e eita e vaiiho noa i to ˈna fare ia tomohia.+ 44 No reira, ia vai ineine atoa outou,+ no te mea i te hora manaˈo-ore-hia e outou e haere mai ai te Tamaiti a te taata nei.

45 “O vai hoi te tavini haapao maitai e te paari ta to ˈna fatu i faatoroa i nia i te mau tavini o to ˈna utuafare, no te horoa ˈtu i ta ratou maa i te taime tano?+ 46 E oaoa taua tavini ra ia tae mai to ˈna fatu a ite atu ai e te na reira ra o ˈna!+ 47 Oia mau ta ˈu e parau atu: E faatoroa oia ia ˈna ei tiaau i ta ˈna mau faufaa atoa.

48 “Ia na ô râ te tavini ino i roto i to ˈna aau: ‘Ua maoro to ˈu fatu,’+ 49 a rutu ai i to ˈna mau hoa tavini, a tamaa e a inu atu ai e te feia inu ava, 50 e haere mai te fatu o taua tavini ra i te mahana manaˈo-ore-hia e ana e i te hora aita oia i ite.+ 51 E faautua oia ia ˈna i te utua ino mau, a amui atu ai ia ˈna i te feia haavarevare. I reira oia e taˈi ai e to ˈna niho e mauu ai i te ahoaho.+

25 “E nehenehe ïa e faaau i te Faatereraa arii* o te raˈi i na vahine apî* hoê ahuru tei rave i ta ratou mori+ e tei haere e farerei i te tane faaipoipo.+ 2 E pae o ratou mea neneva, e e pae mea paari.+ 3 Ua rave hoi na vahine apî neneva i ta ratou mori, aita râ i rave atoa i te hinu. 4 Area te mea paari, ua rave ïa i ta ratou mori e te hinu atoa i roto i te farii. 5 Vareahia ˈtura ratou paatoa i te taoto no te maoro o te tane faaipoipo, e taoto atura ratou. 6 E tae atura i te tuiraa po, tuôhia maira: ‘Teie te tane faaipoipo! A haere e farerei ia ˈna.’ 7 Tia aˈera pauroa taua na vahine apî ra e faaineine aˈera i ta ratou mori.+ 8 Na ô maira na vahine apî neneva i te mea paari: ‘A horoa mai na maa vahi iti o ta outou hinu, te pohe ra hoi ta matou mori.’ 9 Pahono atura te mea paari: ‘Eita paha e navai na tatou paatoa. A haere na râ e hoo mai i ta outou iho i te feia hoohoo.’ 10 A haere ai râ na vahine apî neneva e hoo mai i te hinu, tae maira te tane faaipoipo. Tomo aˈera na vahine apî tei ineine na muri ia ˈna i roto i te fare oroa faaipoiporaa,+ e tapirihia ˈtura te opani. 11 I muri iho, tae atoa maira na vahine apî e toe ra, e na ô maira: ‘E te fatu, e te fatu, iriti mai na!’+ 12 Pahono atura oia: ‘Oia mau ta ˈu e parau atu, aita vau i ite ia outou.’

13 “A ara ïa,+ aita hoi outou i ite i te mahana e te hora.+

14 “E au atoa hoi te Faatereraa arii o te raˈi i te hoê taata hou a reva ˈi i te ara, o tei titau i ta ˈna mau tavini, e tuu atura i ta ˈna mau faufaa ia ratou ra.+ 15 Ua horoa oia e pae taleni* na te hoê, e piti na te tahi e hoê na te tahi atu, ia au i tei tia ia ratou tataitahi ia haapao, e reva ˈtura oia i te ara. 16 Haere oioi ihora te tavini tei horoahia ˈtu e pae taleni e faaohipa i te reira ia hoona mai e ua apî mai oia e pae atu â taleni. 17 Oia atoa te tavini tei horoahia ˈtu e piti, ua apî mai ïa e piti atu â taleni. 18 Area te tavini tei horoahia ˈtu hoê noa taleni, ua haere ïa e ô i te apoo e huna ˈtura i te moni* a to ˈna fatu.

19 “I muri aˈe roa, hoˈi maira te fatu o taua mau tavini ra e titau ihora i ta ˈna moni.+ 20 Haere maira te tavini tei horoahia ˈtu na taleni e pae, hopoi atoa maira e pae atu â taleni, a na ô ai: ‘E te Fatu, ua tuu mai oe e pae taleni, a hiˈo na, e pae taleni hau tei noaa mai ia ˈu.’+ 21 Na ô atura to ˈna fatu: ‘Maitai roa, e tavini afaro oe e te haapao maitai! Ua faaite oe i te haapao maitai no te mau ohipa rii ta ˈu i tuu atu. E faatoroa vau ia oe ei tiaau no e rave rahi atu â ohipa.+ Ia oaoa atoa oe e to oe fatu.’+ 22 I muri iho, haere maira te tavini tei horoahia ˈtu e piti taleni e na ô maira: ‘E te Fatu, ua tuu mai oe e piti taleni, a hiˈo na, e piti taleni hau tei noaa mai ia ˈu.’+ 23 Na ô atura to ˈna fatu: ‘Maitai roa, e tavini afaro oe e te haapao maitai! Ua faaite oe i te haapao maitai no te mau ohipa rii ta ˈu i tuu atu. E faatoroa vau ia oe ei tiaau no e rave rahi atu â ohipa. Ia oaoa atoa oe e to oe fatu.’

24 “Haere maira te tavini tei horoahia ˈtu hoê taleni e parau maira: ‘E te Fatu, ua ite au e e taata etaeta oe, o te ooti i ta oe i ore i ueue e o te haaputu i ta oe i ore i tanu.+ 25 Mǎtaˈu ihora vau e haere atura vau e huna i ta oe taleni i roto i te repo. Tera mai ta oe taleni.’ 26 Pahono atura to ˈna fatu: ‘Tavini ino e te faatau, ua ite ïa oe e e ooti au i ta ˈu i ore i ueue e e haaputu vau i ta ˈu i ore i tanu. 27 Ahani oe i hopoi i ta ˈu moni* i te fare moni, e ia tae mai au, e rave ïa vau i ta ˈu moni e te moni taime.

28 “Na ô ihora oia i ta ˈna mau tavini: ‘A rave i ta ˈna taleni e a horoa ˈtu na te tavini e ahuru taleni ta ˈna.+ 29 Te taata hoi e faufaa ta ˈna, e horoahia ˈtu â ïa ta ˈna e e rahi atu â. Te taata râ aita ta ˈna e faufaa, oia atoa te mea e vai ra ia ˈna ra, e iriti-ê-hia.+ 30 A huri atu i te tavini faufaa ore i te poiri i rapae. I reira oia e taˈi ai e to ˈna niho e mauu ai i te ahoaho.’

31 “Ia tae mai te Tamaiti a te taata nei+ ma to ˈna hanahana e ma te mau melahi atoa,+ e parahi oia i nia i to ˈna terono hanahana. 32 E haaputuhia te mau nunaa atoa i mua ia ˈna, e e faataa ê oia ia ratou ei piti pǔpǔ taata, mai te hoê tiai e faataa ê i te mamoe i te puaaniho. 33 E tuu oia i te mamoe+ i to ˈna rima atau, te puaaniho râ, i to ˈna rima aui.+

34 “I reira te Arii e parau ai i te feia i to ˈna rima atau: ‘Haere mai outou o tei haamaitaihia e to ˈu Metua, a fatu i te Faatereraa arii tei faaineinehia no outou mai te omuaraa mai â o teie nei ao. 35 I poia na hoi au e ua horoa mai outou i te maa. I poihâ na vau e ua horoa mai outou i te pape. I ratere mai na vau e ua farii maitai outou ia ˈu.+ 36 I vai tahaa na vau* e ua horoa mai outou i te ahu.+ I maˈihia na vau e ua utuutu outou ia ˈu. I roto na vau i te tapearaa e ua haere mai outou e hiˈo ia ˈu.’+ 37 I reira te feia parau-tia e na ô atu ai: ‘E te Fatu, no afea ra to matou iteraa ia oe i te poiaraa a faatamaa ˈtu ai ia oe, aore ra i te poihâraa a horoa ˈtu ai i te pape?+ 38 No afea ra to matou iteraa ia oe i te ratereraa mai a farii maitai atu ai matou ia oe, aore ra i te vai-tahaa-raa a faaahu atu ai matou ia oe? 39 No afea ra to matou iteraa ia oe i te maˈiraahia aore ra i roto i te tapearaa, a haere atu ai matou e hiˈo ia oe?’ 40 E pahono atu te Arii: ‘Oia mau ta ˈu e parau atu: Ia na reira outou i to ˈu taeae iti haihai roa, o vau ta outou i na reira.’+

41 “I reira oia e parau ai i te feia i to ˈna rima aui: ‘Haere ê atu+ outou tei faautuahia i roto i te auahi mure ore+ tei faaineinehia no te Diabolo e ta ˈna mau melahi.+ 42 I poia na hoi au, aita râ outou i horoa mai i te maa. I poihâ na vau, aita râ outou i horoa mai i te pape. 43 I ratere mai na vau, aita râ outou i farii maitai ia ˈu. I vai tahaa na vau, aita râ outou i horoa mai i te ahu. I maˈihia e i roto na vau i te tapearaa, aita râ outou i haapao ia ˈu.’ 44 I reira ratou atoa e na ô atu ai: ‘E te Fatu, no afea ra to matou iteraa ia oe i te poiaraa, te poihâraa, te ratereraa mai, te vai-tahaa-raa, te maˈiraahia aore ra i roto i te tapearaa e aita matou i tauturu ia oe?’ 45 I reira oia e pahono atu ai: ‘Oia mau ta ˈu e parau atu: Te oreraa outou i na reira i to ˈu taeae iti haihai roa, o vau ta outou i ore i na reira.’+ 46 E roohia teie nei feia i te pohe mure ore,*+ area te feia parau-tia, e fanaˈo ïa i te ora mure ore.”+

26 I te otiraa ta Iesu faahitiraa i teie mau parau atoa, na ô atura oia i ta ˈna mau pǐpǐ: 2 “Ua ite outou e i roto e piti mahana e tupu ai te Pasa,+ e e tuuhia te Tamaiti a te taata nei i te rima o te enemi ia patitihia oia i nia i te pou.”+

3 I taua taime ra, putuputu aˈera te mau tahuˈa tiaau e te mau aratai ati Iuda i roto i te aua o te tahuˈa rahi, o Kaiapha te iˈoa,+ 4 e opua ihora+ e haru ia Iesu* na roto i te hoê ravea haavarevare e e haapohe ia ˈna. 5 Tera râ, te parau ra ratou: “Eiaha e haru ia ˈna i te oroa, ia ore te taata e faahuehue.”

6 Tei Betania Iesu i te fare o Simona e lepera na mua ˈˈe,+ 7 tapiri maira te hoê vahine e mohina alabata ta ˈna e monoˈi noˈanoˈa moni rahi to roto, e ninii ihora i nia i te upoo o Iesu o te tamaa ra.* 8 I to te mau pǐpǐ iteraa i te reira, aita ratou i mauruuru e na ô ihora: “Mâuˈa noa! 9 E nehenehe hoi e hoo i teie monoˈi, e moni rahi ïa te noaa mai a horoa ˈtu ai na te feia veve.” 10 A faaroo ai Iesu i ta ratou parau, na ô atura oia: “Eaha outou e haapeapea ˈi i teie vahine? E ohipa maitai ta ˈna i rave no ˈu. 11 E faaea noa mai hoi te feia veve ia outou ra.+ O vau nei râ, eita ïa e faaea noa mai ia outou ra.+ 12 I to teie vahine niniiraa i te monoˈi noˈanoˈa i nia i to ˈu tino, ua na reira oia no te faaineine ia ˈu no to ˈu hunaraa.+ 13 Oia mau ta ˈu e parau atu: I te mau vahi atoa e porohia ˈi te parau apî oaoa e ati aˈe te ao nei, e faatia-atoa-hia ta teie vahine i rave ei manaˈoraa ia ˈna.”+

14 Haere atura hoê o na 12, tei piihia Iuda Isakariota,+ i te mau tahuˈa tiaau+ 15 e parau atura: “Eaha ta outou e horoa mai na ˈu ia tuu atu vau ia Iesu i to outou rima?”+ Faaau aˈera ratou e horoa ˈtu e 30 moni ario.+ 16 E mai reira mai, imi ihora oia i te taime tano no te tuu atu ia Iesu i to ratou rima.

17 I te mahana matamua o te Oroa pane hopue ore,+ haere maira te mau pǐpǐ ia Iesu ra e na ô maira: “Ihea oe e hinaaro ai ia faaineine matou i te Pasa ia amu oe i te reira?”+ 18 Parau atura oia: “A haere i te oire, e ite outou i te tahi taata e a parau atu ia ˈna: ‘Te na ô mai ra te Orometua: “Ua fatata to ˈu taime faataahia no te pohe. E faatupu vau i te Pasa e ta ˈu mau pǐpǐ i to oe fare.”’” 19 Na reira ˈtura te mau pǐpǐ mai ta Iesu i faaue e faaineine aˈera i te Pasa.

20 E ahiahi ihora,+ te tarava ra Iesu i te amuraa maa e na pǐpǐ 12.+ 21 A tamaa ˈi ratou, na ô atura oia: “Oia mau ta ˈu e parau atu: E tuu atu te hoê o outou ia ˈu i to ˈu mau enemi.”+ 22 Peapea roa ihora ratou e na ô maira ratou paatoa: “E te Fatu, o vau anei?” 23 Pahono atura oia: “Te taata o te tuu i to ˈna rima i roto i te auˈa hoê â tuuraa e o vau atoa, na ˈna e tuu ia ˈu i te enemi.+ 24 Te reva nei iho â te Tamaiti a te taata nei, mai tei papaihia no ˈna, ua ati râ+ te taata na ˈna e tuu i te Tamaiti a te taata nei i to ˈna mau enemi!+ Mea maitai aˈe no tera taata ahani aita oia i fanauhia.”+ 25 Ui maira Iuda o te tuu ia Iesu i te enemi: “O vau anei, Rabi?” Na ô atura Iesu: “Na oe noa iho â i parau.”

26 A tamaa noa ˈi ratou, rave ihora Iesu i te hoê pane, haamaitai aˈera i te Atua, ofati ihora i te pane+ e horoa ˈtura i te mau pǐpǐ a na ô ai: “A rave, a amu. O to ˈu tino teie.”+ 27 Rave atoa ihora oia i te hoê auˈa uaina, haamauruuru aˈera i te Atua e horoa ˈtura ia ratou a na ô ai: “A inu outou paatoa,+ 28 o to ˈu ‘toto+ o te faufaa’+ teie o te haamaniihia no te taata e rave rahi+ ia faaorehia ta ratou mau hara.+ 29 Tera râ, te parau atu nei au: E ore roa vau e inu faahou i teie uaina e tae roa ˈtu i te mahana e inu ai au e outou atoa i te uaina apî i roto i te Faatereraa arii a* to ˈu Metua.”+ 30 E i muri aˈe i to ratou himeneraa no te arue i te Atua,* haere atura ratou i te mouˈa Oliveta.+

31 Parau atura Iesu ia ratou: “I teie nei po, e faarue mai outou paatoa ia ˈu no ta ˈu e faaruru, ua papaihia hoi: ‘E tairi au i te tiai mamoe e e purara ê te mau mamoe o te nǎnǎ.’+ 32 I muri aˈe râ i to ˈu tia-faahou-raa, e na mua ˈtu vau ia outou i te haere i Galilea.”+ 33 Parau maira râ Petero: “Noa ˈtu e e faarue ratou paatoa ia oe no ta oe e faaruru, eita roa vau e faarue ia oe!”+ 34 Na ô atura Iesu: “Oia mau ta ˈu e parau atu: I teie nei po, hou te hoê moa e totereo ai, e haavare oe e toru taime e aita oe i ite ia ˈu.”+ 35 Na ô maira Petero: “Pohe noa ˈtu â vau e oe atoa, eita roa vau e haavare e aita vau i ite ia oe.”+ Na reira atoa maira te tahi atu mau pǐpǐ i te parau.

36 Haere atura Iesu e o ratou atoa i te vahi parauhia Getesemane,+ e na ô ihora oia i te mau pǐpǐ: “A parahi na outou i ǒ nei, e haere au i ǒ aˈe e pure.”+ 37 Rave atura oia ia Petero e na tamaiti e piti a Zebedaio, e haamata ihora oia i te oto e te horuhoru roa.+ 38 Parau atura oia: “E oto iti rahi to ˈu.* A parahi na i ǒ nei e a ara e o vau atoa.”+ 39 Faaatea rii atura oia, tipapa ihora e pure atura:+ “To ˈu Metua, ia tia ia oe, a hopoi ê atu na i teie auˈa.+ Ia tupu râ to hinaaro, eiaha to ˈu.”+

40 Hoˈi maira oia i te mau pǐpǐ ra, ite ihora e te taoto ra ratou e na ô maira ia Petero: “Aita iho â ïa ta outou i nehenehe e ara hoê noa ˈˈe hora e o vau atoa?+ 41 A vai ara+ e a tamau i te pure+ ia ore outou ia hema.+ E hinaaro iho â te aau,* te tino râ, mea paruparu ïa.”+ 42 Haere faahou atura oia e pure, te piti ïa o te taime: “To ˈu Metua, ia ore ia tia ia hopoi ê i teie auˈa ma te ore au e inu atu, ia tupu ïa to hinaaro.”+ 43 Hoˈi faahou maira oia e ite ihora e te taoto ra ratou, e varea taoto iti rahi hoi to ratou. 44 Vaiiho ihora oia ia ratou, haere faahou atura e pure, te toru ïa o te taime, ma te faahiti i te hoê â parau. 45 Hoˈi faahou maira oia i na pǐpǐ ra e na ô maira: “I te hoê taime mai teie outou e taoto ai e e haamâha ˈi i to outou rohirohi! Inaha, ua fatata hoi te hora e tuuhia ˈi te Tamaiti a te taata nei i te rima o te feia rave hara. 46 A tia, mai, haere anaˈe. A hiˈo, te fatata mai ra te taata e tuu ia ˈu i to ˈu mau enemi.” 47 Te paraparau noa ra Iesu, inaha, haere maira Iuda, hoê o na 12, e te hoê nahoa rahi ma te ˈoˈe e te raau. No ǒ mai taua nahoa ra i te mau tahuˈa tiaau e te mau aratai ati Iuda.+

48 I horoa na hoi Iuda i te hoê tapao ia ratou, a parau ai: “Te taata ta ˈu e apa, o ˈna ïa. A haru ia ˈna.” 49 Haere tia maira oia ia Iesu ra, na ô maira: “Ia ora na Rabi!” e apa ihora ia ˈna. 50 Parau atura râ Iesu ia ˈna: “Eaha ta oe ohipa i ǒ nei?”+ Tapiri maira ratou e haru aˈera ia Iesu. 51 E inaha, rave maira hoê o te feia tei apee ia Iesu i ta ˈna ˈoˈe, tairi ihora i te tavini a te tahuˈa rahi e mutu ê atura to ˈna tariˈa.+ 52 Parau atura Iesu ia ˈna: “A faahoˈi i ta oe ˈoˈe i roto i te vehî,+ te taata atoa hoi e rave i te ˈoˈe, e pohe ïa i te ˈoˈe.+ 53 Te manaˈo ra anei oe e eita ta ˈu e nehenehe e ani i to ˈu Metua ia horoa mai i teie nei taime hau atu i te 12 nuu melahi?+ 54 E nafea ˈtura ïa e tupu ai te mau Papai, o tei faaite e ia tupu te reira e tia ˈi?” 55 I reira, na ô atura Iesu i te nahoa: “Ua haere mai outou e tapea ia ˈu ma te ˈoˈe e te raau mai te mea ra e e eiâ vau? I tia noa na hoi au i te mau mahana atoa i te hiero a haapii ai i te taata,+ aita râ outou i tuu ia ˈu i te fare tapearaa.+ 56 Ua tupu teie mau mea atoa ia tupu hoi ta te mau peropheta i papai.”+ Faarue aˈera te mau pǐpǐ atoa ia Iesu e horo atura.+

57 Arataihia ˈtura Iesu e te feia tei tapea ia ˈna i ǒ Kaiapha+ te tahuˈa rahi, to reira atoa te mau papai parau e te mau aratai ati Iuda.+ 58 Pee noa maira râ Petero ia ˈna na te atea ê e tae roa ˈtu i te aua o te tahuˈa rahi, tomo atura oia e parahi ihora e te mau tavini no te ite i te ohipa e tupu.+

59 Te imi ra hoi te mau tahuˈa tiaau e te Sunederi taatoa i te pari haavare ia Iesu i te tahi mea e haapohehia ˈi oia.+ 60 Aita râ i itehia mai, noa ˈtu e mea rahi te ite haavare tei haere mai.+ I muri aˈe, tapiri maira e piti taata 61 e na ô maira: “Ua parau teie taata: ‘E tia ia ˈu ia vavahi i te hiero o te Atua e ia patu faahou i te reira e toru mahana.’”+ 62 Tia aˈera te tahuˈa rahi e na ô maira ia Iesu: “Eita oe e pahono? Aita oe e faaroo ra i ta teie nau taata e pari nei ia oe?”+ 63 Mamû noa ihora râ Iesu.+ Na ô maira ïa te tahuˈa rahi: “Te faaue nei au ia oe i te iˈoa o te Atua ora, ia parau mai e o te Mesia anei oe, te Tamaiti a te Atua!”+ 64 Na ô atura Iesu: “Na oe noa iho â i parau. Teie râ, te parau atu nei au ia outou: Mai teie atu nei, e ite outou i te Tamaiti a te taata nei+ i te parahiraa i te rima atau o te Atua Manahope+ e te haereraa mai na nia i te mau ata o te raˈi.”+ 65 Hahae ihora te tahuˈa rahi i to ˈna ahu, a na ô ai: “Ua faaino oia i te Atua! Eaha ïa te faufaa ia imi â i te ite? Inaha, ua faaroo outou ia ˈna i te faainoraa i te Atua. 66 Eaha to outou manaˈo?” Pahono maira ratou: “Ia pohe iho â oia.”+ 67 Tutuha aˈera ratou i nia i to ˈna mata+ e moto atura ia ˈna.+ Poara ˈtura te tahi pae ia ˈna,+ 68 a na ô ai: “E peropheta oe te Mesia, faaite mai ïa na vai i tupai ia oe.”

69 Te parahi noa ra Petero i rapaeau, i roto i te aua, a haere mai ai te hoê tavini vahine ia ˈna ra e na ô maira: “Na muri atoa oe ia Iesu no Galilea!”+ 70 Parau atura râ oia i mua ia ratou paatoa: “Aita vau e taa ra eaha ta oe e parau ra.” 71 Haere atura oia i rapaeau, i pihai iho i te uputa, ite maira te tahi atu vahine ia ˈna e na ô maira i to reira mau taata: “Na muri atoa teie taata ia Iesu no Nazareta.”+ 72 Haapapu faahou atura Petero: “Aita vau i ite i tena taata!” 73 I muri iho, tapiri maira te feia e tia noa ra na reira e na ô maira ia Petero: “E pǐpǐ iho â oe na ˈna, na to oe hoi taˈiraa reo* e faaite mai ra.” 74 Horeo ihora oia: “Ia faautua te Atua ia ˈu ia haavare au. Aita vau i ite i tena taata!” Totereo ihora te hoê moa. 75 Haamanaˈo ihora Petero i ta Iesu i parau, oia hoi: “Hou te hoê moa e totereo ai, e haavare oe e toru taime e aita oe i ite ia ˈu.”+ Haere atura oia i rapaeau e taˈi ihora no te peapea rahi.

27 E poipoi aˈera, putuputu ihora te mau tahuˈa tiaau atoa e te mau aratai ati Iuda no te paraparau no nia i te haapoheraa ia Iesu.+ 2 I muri iho i to ratou taamuraa ia ˈna, aratai e tuu atura ratou ia ˈna ia Pilato te tavana.+

3 I te iteraa Iuda, tei tuu ia Iesu i te enemi, e ua faautuahia Iesu, tatarahapa ihora oia e faahoˈi atura i na moni ario e 30 i te mau tahuˈa tiaau e te mau aratai ati Iuda,+ 4 a na ô ai: “Ua hara vau i to ˈu hooraa ˈtu i te toto o te hoê taata hapa ore.” Parau aˈera ratou: “Eaha ïa na matou?* Ohipa oe te reira!” 5 Taora ihora ïa Iuda i na moni ario i roto i te hiero, reva ˈtura e tarî ihora ia ˈna.+ 6 Tera râ, rave aˈera te mau tahuˈa tiaau i na moni ario e parau aˈera: “E ere i te mea tano ia au i te Ture ia tuu i teie moni i te vairaa taoˈa o te hiero, o te hoo hoi teie o te toto tei haamaniihia.” 7 Paraparau atura ratou paatoa e hoo maira i te fenua o te potera i taua moni ra ei vahi hunaraa i te mau taata ěê. 8 Parauhia ˈtura taua fenua ra “Fenua o te toto”+ e tae roa mai i teie mahana. 9 Tupu atura tei parauhia na roto ia Ieremia te peropheta: “Rave atura ratou i na moni ario e 30, te hoo o te taata ta te mau tamarii Iseraela i faaau e aufau, 10 e hoo maira i te hoê tâpû fenua i taua moni ra, mai ta Iehova* i faaue mai ia ˈu.”+

11 Tia noa ihora Iesu i mua i te tavana e ui maira te tavana ia ˈna: “O oe anei te Arii o te ati Iuda?” Pahono atura Iesu: “Na oe noa iho â e parau ra.”+ 12 A parihia ˈi râ oia e te mau tahuˈa tiaau e te mau aratai ati Iuda, aita oia i pahono atu.+ 13 Na ô maira Pilato: “Aita oe e faaroo ra i ta ratou pariraa e rave rahi ia oe?” 14 Aita râ oia i pahono atu, aita roa ˈtu, a maere roa ˈi te tavana.

15 I te mau oroa Pasa atoa, ua matau te tavana i te tuu mai i te hoê taata tei tapeahia ta te nahoa e hinaaro.+ 16 I taua mau mahana ra, to roto te hoê taata ohipa ino tuiroo o Baraba te iˈoa i te tapearaa. 17 No reira, a putuputu mai ai te nahoa, parau atura Pilato: “O vai ta outou e hinaaro ia tuu atu vau, o Baraba aore ra o Iesu tei parauhia te Mesia?” 18 Ua ite hoi Pilato e no te pohehae i tuu ai ratou ia Iesu ia ˈna ra. 19 Hau atu â, te parahi noa ra Pilato i te vahi haavaraa i faatae mai ai ta ˈna vahine faaipoipo i teie poroi: “A vaiiho atu i tena taata parau-tia, ua horuhoru roa hoi au i teie mahana no to ˈu moemoeâraa ia ˈna inapo ra.” 20 Onoono aˈera râ te mau tahuˈa tiaau e te mau aratai ati Iuda i te nahoa ia ani ia Baraba,+ ia haapohehia râ Iesu.+ 21 Ui faahou atura te tavana: “O vai o raua ta outou e hinaaro ia tuu atu vau?” Na ô maira ratou: “O Baraba.” 22 Parau atura Pilato: “E nafea ïa vau ia Iesu tei parauhia te Mesia?” Na ô maira ratou paatoa: “A tuu atu* i nia i te pou!”+ 23 Ui atura oia: “No te aha hoi? Eaha ta ˈna ohipa ino i rave?” Tera râ, puai noa ˈtu â to ratou tuôraa: “A tuu atu i nia i te pou!”+

24 Ite ihora Pilato e aita ta ˈna e ravea, e te haamata ra te taata i te faahuehue. Rave ihora oia i te pape e horoi atura i to ˈna rima i mua i te nahoa a na ô ai: “Aita ta ˈu e hara i te toto o teie taata. Tei ia outou ra.” 25 Parau maira te taata atoa: “Ia hoˈi mai to ˈna toto i nia ia matou e i nia i ta matou mau tamarii.”+ 26 Tuu atura Pilato ia Baraba e faaue ihora râ ia huihia Iesu+ e tuu atura ia ˈna i te mau faehau ia haapohehia i nia i te pou.+

27 Aratai aˈera te mau faehau a te tavana ia Iesu i roto i te aorai o te tavana, e putuputu maira te taatoaraa o te mau pǔpǔ faehau o te haaati ia Iesu.+ 28 Tatara aˈera ratou i to ˈna ahu, faaahu aˈera ia ˈna i te hoê ahu roa uteute,+ 29 firi aˈera i te hoê hei taratara e tuu atura i nia i to ˈna upoo e te hoê aeho i roto i to ˈna rima atau. A tuturi noa ˈi ratou i mua ia ˈna, parau faaooo maira ratou: “Ia ora na* te Arii o te ati Iuda!” 30 Tutuha aˈera ratou i nia ia ˈna,+ rave aˈera i te aeho e tairi atura i to ˈna upoo. 31 I muri aˈe i to ratou faaoooraa ia ˈna, tatara aˈera ratou i te ahu roa, faaahu ihora ia ˈna i to ˈna iho ahu tapoˈi e aratai atura ia ˈna ia patitihia i nia i te pou.+

32 A haere ai ratou i rapae, ite aˈera ratou i te hoê tane no Kurene, o Simona te iˈoa. Faahepo aˈera ratou i teie tane ia amo i te pou haamauiuiraa* o Iesu.+ 33 Tae atura ratou i te hoê vahi parauhia Gologota, e “Apu upoo” te auraa,+ 34 horoa aˈera ratou i te uaina anoihia i te raau maramara ia inu oia,+ aita râ oia i hinaaro e inu i muri aˈe i to ˈna tamataraa i te reira. 35 Patiti aˈera ratou ia ˈna i nia i te pou, opere atura i to ˈna mau ahu ma te tuu i te kelero,+ 36 e parahi ihora ratou i reira a tiai noa ˈi ia ˈna. 37 Ua tuu atoa ratou i nia noa mai i to Iesu upoo i tei parihia ia ˈna ma teie papai: “O Iesu teie te Arii o te ati Iuda.”+

38 E e piti eiâ tei patitihia i nia i te pou i pihai iho ia ˈna, hoê i to ˈna pae atau e hoê i to ˈna pae aui.+ 39 Faaino maira te feia e haere ra na reira ia ˈna,+ a tairiiri ai i te upoo+ 40 e a na ô ai: “O oe tei hinaaro na e vavahi i te hiero e e patu i te reira e toru mahana,+ a faaora ia oe iho! Mai te peu e tamaiti oe na te Atua, a pou mai ïa i raro i tena pou haamauiuiraa!”*+ 41 Faaooo atoa maira te mau tahuˈa tiaau, te mau papai parau e te mau aratai ati Iuda ia ˈna, a na ô ai:+ 42 “Ua faaora o ˈna ia vetahi ê, eita râ ta ˈna e nehenehe e faaora ia ˈna iho! E Arii o ˈna no Iseraela,+ ia pou mai ïa oia i teie nei i raro i te pou haamauiuiraa,* e tiaturi ïa matou ia ˈna. 43 Ua tiaturi oia i te Atua, ia faaora ïa te Atua ia ˈna i teie nei mai te peu e ua mauruuru Oia ia ˈna,+ ua parau hoi oia: ‘E Tamaiti au na te Atua.’”+ 44 Faaino atoa maira na eiâ tei patitihia i nia i te pou i pihai iho ia ˈna.+

45 Mai te hora 12 i te avatea* ati ihora te fenua taatoa i te poiri e tae atu i te hora 3 o te taperaa mahana.*+ 46 Piri i te hora 3,* tuô ihora Iesu: “Eli, Eli, lama sabakatani?” oia hoi: “To ˈu Atua, to ˈu Atua, eaha oe i faarue mai ai ia ˈu?”+ 47 A faaroo ai vetahi e tia noa ra na reira, na ô aˈera ratou: “Te pii ra teie taata ia Elia.”+ 48 Horo ihora hoê o ratou e tii i te rimu, tutau ihora i roto i te uaina toavaava, tuu ihora i nia i te hoê aeho e horoa ˈtura ia Iesu ia inu oia.+ 49 Parau maira râ te tahi pae: “Vaiiho noa ia ˈna! E hiˈo tatou e e haere mai anei Elia e faaora ia ˈna.” 50 Tuô faahou ihora Iesu e pohe atura.*+

51 E inaha, mahae ihora+ te paruru o te nao*+ mai nia mai e raro roa,+ aueue ihora te fenua e amaha aˈera te mau pǎpǎ. 52 Matara aˈera te mau menema,* pee maira i rapaeau te tino o te feia moˈa e taoto ra i roto i te pohe, 53 a itehia ˈtu ai e te taata e rave rahi. (I muri aˈe i to Iesu tia-faahou-raa, ua tomo vetahi na te vahi hunaraa mai i roto i te oire moˈa.) 54 I to te raatira faehau e te feia e tiai ra ia Iesu iteraa i te aueueraa fenua e te mau mea i tupu, riaria roa ihora ratou e na ô atura: “O te Tamaiti a te Atua iho â teie.”+

55 Mea rahi atoa te vahine e hiˈo mai ra na te atea ê. I apee mai na ratou ia Iesu mai Galilea mai no te tauturu ia ˈna.+ 56 I rotopu ia ratou, te vai ra o Maria Magadala, Maria te metua vahine o Iakobo raua Iose e te metua vahine o na tamaiti a Zebedaio.+

57 E ahiahi ihora, haere maira te hoê taata taoˈa rahi no Arimataio o Iosepha te iˈoa, tei riro atoa ei pǐpǐ na Iesu.+ 58 Farerei ihora teie taata ia Pilato e ani maira i te tino o Iesu.+ Faaue atura Pilato ia horoahia ˈtu te tino.+ 59 Rave maira Iosepha i te tino, vehî atura i te ahu lino maitai e te mâ,+ 60 e tuu ihora i roto i te menema*+ apî ta ˈna i pao i roto i te mato. Turai ihora oia i te hoê ofai rahi i mua i te uputa o te menema* e reva ˈtura. 61 Area Maria Magadala e te tahi atu Maria, parahi noa ihora ïa i mua i te menema.+

62 E ao aˈera, i muri aˈe i te mahana Faaineineraa+ no te Sabati, putuputu maira te mau tahuˈa tiaau e te mau Pharisea i mua ia Pilato, 63 e na ô maira: “Tavana, te haamanaˈo ra matou e a ora noa ˈi tera taata haavare, ua parau oia: ‘E faatiahia mai au ua mairi anaˈe e toru mahana.’+ 64 A faaue na ïa ia tiaihia te menema e tae atu i te toru o te mahana, ia ore hoi ta ˈna mau pǐpǐ ia haere mai e eiâ i to ˈna tino,+ a na ô atu ai i te taata: ‘Ua faatiahia mai oia mai te pohe mai!’ Mea ino aˈe ïa teie haavare i te haavare matamua.” 65 Parau atura Pilato: “A rave i te tahi mau faehau no te tiai maitai i te menema.” 66 Haere atura ratou i te menema, tapiri maitai aˈera i te ofai e tuu atura i te tiai.

28 I muri aˈe i te Sabati, i te aahiata o te mahana matamua o te hebedoma, haere atura Maria Magadala e te tahi atu Maria e hiˈo i te menema.+

2 E inaha, i tupu na te hoê aueueraa fenua rahi, no te mea ua pou mai te hoê melahi a Iehova* mai te raˈi mai, ua turai i te ofai e ua parahi i nia iho.+ 3 Te anaana ra oia mai te uira e mea uouo to ˈna ahu mai te hiona.+ 4 No to ratou riaria, rûrû aˈera te mau tiai e riro atura mai te taata pohe ra.

5 Na ô atura râ te melahi i na vahine: “Eiaha e mǎtaˈu, ua ite hoi au e te imi nei orua ia Iesu tei haapohehia i nia i te pou.+ 6 Aita oia i ǒ nei, ua faatiahia hoi oia, mai ta ˈna iho â i parau.+ Haere mai a hiˈo i te vahi i vaiihohia ˈi to ˈna tino. 7 A haere oioi na e parau i ta ˈna mau pǐpǐ e ua faatiahia mai oia mai te pohe mai, inaha, te na mua ˈtu ra oia ia outou i te haere i Galilea.+ I reira outou e ite ai ia ˈna. Tera ïa ta ˈu poroi ia orua.”+

8 Faarue ihora ïa raua i te menema ma te riaria e te oaoa rahi, e horo atura e faaite i te parau apî i te mau pǐpǐ a Iesu.+ 9 E inaha, farerei maira Iesu ia raua e na ô maira: “Ia ora na!” Tapiri atura raua ia ˈna, tapea aˈera i to ˈna avae e tipapa ˈtura i mua ia ˈna. 10 Parau maira Iesu: “Eiaha e mǎtaˈu! A haere e faaite i te parau apî i to ˈu mau taeae ia haere hoi ratou i Galilea, i reira ratou e ite ai ia ˈu.”

11 A reva ˈtu ai raua, inaha haere aˈera te tahi mau tiai+ i te oire e faatia ˈtura i te mau tahuˈa tiaau i te mau mea atoa i tupu. 12 Putuputu aˈera te mau tahuˈa tiaau e te mau aratai ati Iuda, tauaparau aˈera ratou, horoa ˈtura e rave rahi moni ario na te mau faehau, 13 e na ô atura: “A parau: ‘Ua haere mai ta Iesu mau pǐpǐ i te po e ua eiâ i to ˈna tino a taoto noa ˈi matou.’+ 14 E ia tae noa ˈtu teie parau i te tariˈa o te tavana, eiaha outou e haapeapea, na matou e faataa ˈtu ia ˈna.” 15 Rave aˈera ratou i na moni ario, parau haere atura i tei faauehia ˈtu, e atutu atura teie parau i rotopu i te ati Iuda e tae roa mai i teie mahana.

16 Area na pǐpǐ 11, haere maira ïa i Galilea+ i te mouˈa ta Iesu i parau.+ 17 I to ratou iteraa ia ˈna, tipapa maira ratou, feaa ihora râ vetahi. 18 Tapiri atura Iesu ia ratou e parau atura: “Ua horoahia mai ia ˈu te mana atoa i te raˈi e i te fenua.+ 19 A haere ïa e faariro i te taata o te mau nunaa atoa ei pǐpǐ+ ma te bapetizo ia ratou+ i te iˈoa o te Metua e o te Tamaiti e o te varua moˈa, 20 ma te haapii ia ratou ia haapao i te mau mea atoa ta ˈu i faaue ia outou.+ E a haamanaˈo, tei pihai iho vau ia outou i te mau mahana atoa e tae noa ˈtu i te anotau hopea o te ao* nei.”+