MALAKI

1 Te tahi poroi:

Te parau a Iehova ia Iseraela na roto ia Malaki:*

2 Te parau ra Iehova: “Ua faaite au i te here ia outou, to ˈu nunaa.”+

Te na ô nei râ outou: “Mea nafea oe i te faaiteraa i te here ia matou?”

Te parau ra Iehova: “E ere anei Esau i te taeae no Iakoba?+ Mea here râ na ˈu ia Iakoba. 3 Area o Esau, mea hae na ˈu ia ˈna.+ Ua faaano vau i to ˈna mau mouˈa+ e ua vaiiho vau i ta ˈna tuhaa na te mau urî taehae o te medebara.”+

4 “Noa ˈtu te parau ra Edoma: ‘Ua taataahihia matou. E hoˈi mai râ matou e e faatia faahou matou i te mau pueraa ofai,’ te parau ra Iehova o te mau nuu:* ‘E patu ratou, e vavahi râ vau, e e parauhia ratou “te tuhaa fenua o te ino” e “te nunaa ta Iehova i faautua e a muri noa ˈtu.”+ 5 E ite to outou mata i te reira, e e parau outou: “Ia faateiteihia Iehova i te tuhaa fenua o Iseraela.”’”

6 “‘E faatura te tamaiti i to ˈna metua tane,+ e te tavini i to ˈna fatu. Mai te peu e metua tane au no outou,+ teihea te faatura e au ia ˈu?+ E mai te peu e fatu* vau no outou, teihea te mǎtaˈu* e au ia ˈu?’ Tera ta Iehova o te mau nuu e parau mai ra ia outou te mau tahuˈa o te vahavaha ra i to ˈu iˈoa.+

“‘Tera râ, te na ô ra outou: “Mea nafea matou i te vahavaharaa i to iˈoa?”’

7 “‘Ma te pûpû i te maa* viivii i nia i ta ˈu fata.’

“‘E te parau ra outou: “Mea nafea matou i te haaviiviiraa ia oe?”’

“‘Ma te parau: “E au ia vahavahahia te amuraa maa a Iehova.”+ 8 E ia pûpû outou i te animara matapo ei tusia, e parau outou: “E ere i te mea ino.” E ia pûpû outou i te animara pirioi aore ra te mea maˈimaˈi: “E ere i te mea ino.”’”+

“A tamata na i te pûpû i te reira i to tavana. E mauruuru anei o ˈna ia oe aore ra e faaite anei o ˈna i te farii maitai ia oe?” te parau ra Iehova o te mau nuu.

9 “I teie nei, a ani na i* te Atua ia faaite mai i ta ˈna farii maitai. Ia pûpû outou i teie huru ô, e ite anei hoê o outou i ta ˈna farii maitai?” te parau ra Iehova o te mau nuu.

10 “O vai i rotopu ia outou tei ineine i te tapiri i te mau uputa?*+ Eita hoi outou e tutui i nia i ta ˈu fata aita anaˈe outou e aufauhia.+ Aita vau e mauruuru ra ia outou,” te parau mai ra Iehova o te mau nuu, “e aita vau e mauruuru ra i te mau ô atoa ta outou e pûpû ra.”+

11 “Mai te hitiraa mahana hoi e tae atu i to ˈna toparaa,* e rahi to ˈu nei iˈoa i rotopu i te mau nunaa.+ I te mau vahi atoa, e tutuihia te tusia ia au auahi te reira e e pûpûhia te ô i to ˈu nei iˈoa, e ô viivii ore, e rahi hoi to ˈu nei iˈoa i rotopu i te mau nunaa,”+ te parau mai ra Iehova o te mau nuu.

12 “Te faaino nei râ outou i te reira*+ ma te parau: ‘Ua viivii te amuraa maa a Iehova. E te mau ô i tuuhia i nia iho, ta ˈna maa, e au ïa ia vahavahahia.’+ 13 Te parau atoa ra outou: ‘Mea fiu!’ E te faaite roa ra outou i to outou faatura ore i tera mau mea,” te parau mai ra Iehova o te mau nuu. “Te hopoi mai ra outou i te animara eiâhia, te pirioi e te maˈimaˈi. Oia, te hopoi mai ra outou i tera mau mea ei ô! E farii anei au i te reira i to outou rima?”+ te parau mai ra Iehova.

14 “Ia faainohia te taata haavare e animara oni maitai to roto i ta ˈna nǎnǎ, o te euhe nei râ a pûpû atu ai i te hoê animara maˈimaˈi ei tusia ia Iehova. E Arii rahi hoi au,”+ te parau mai ra Iehova o te mau nuu, “e e mǎtaˈuhia to ˈu iˈoa i rotopu i te mau nunaa.”+

2 “I teie nei, e te mau tahuˈa, no outou teie faaueraa.+ 2 Ia ore outou e faaroo e ia ore outou e faahanahana i to ˈu iˈoa ma te aau atoa,” te parau mai ra Iehova o te mau nuu,* “e tuu vau i te ino i nia ia outou+ e e taui au i ta outou mau haamaitairaa ei faainoraa.+ Oia, ua taui au i te mau haamaitairaa ei faainoraa no te mea aita outou i haapao i te reira ma te aau atoa.”

3 “Inaha, no ta outou mau ohipa iino, e tuino vau* i ta outou mau huero maa i tanu.+ E e taora vau i te tutae i nia i to outou hohoˈa, te tutae o ta outou mau oroa. E e tauehia outou i nia i te haapueraa tutae.* 4 E ite ïa outou e ua horoa vau i teie faaueraa ia outou ia mau noa ta ˈu faufaa e o Levi,”+ te parau mai ra Iehova o te mau nuu.

5 “Ta ˈu faufaa e o ˈna, e faufaa ïa no te ora e no te hau, o ta ˈu hoi i horoa ˈtu ia ˈna e te mǎtaˈu atoa. Ua mǎtaˈu oia ia ˈu, oia mau, ua mǎtaˈu oia i to ˈu iˈoa ma te faatura. 6 Tei roto i to ˈna vaha te ture* o te parau mau+ e aita te parau-tia ore i itehia i nia i to ˈna utu. Ua haere apipiti oia e o vau ma te hau e te parau-tia+ e mea rahi ta ˈna i faahoˈi mai i nia i te eˈa tia. 7 Ia tapea hoi te utu o te tahuˈa i te ite, e ia imihia te ture* i to ˈna vaha,+ o ˈna hoi te vea a Iehova o te mau nuu.

8 Ua fariu ê râ outou i taua eˈa ra. Mea rahi ta outou i faaturori no nia i te ture.*+ Ua tuino outou i te faufaa a Levi,”+ te parau mai ra Iehova o te mau nuu. 9 “E faariro ïa vau ia outou ei vahavaharaa e e faahaama vau ia outou i mua i te nunaa taatoa, aita hoi outou i haapao i to ˈu mau eˈa, ua maitiiti râ outou i te taata i to outou haavaraa ia au i te ture.”+

10 “E ere anei hoê â metua tane to tatou?+ E ere anei na te hoê â Atua i poiete ia tatou? Eaha ïa tatou e haavare ai te tahi i te tahi,+ a faaino atu ai i te faufaa a to tatou mau tupuna? 11 Ua taiva Iuda, e e ohipa hairiiri tei ravehia i Iseraela e i Ierusalema. Ua haaviivii hoi Iuda i te moˈaraa* o Iehova,+ te moˈaraa o ta ˈna e haafaufaa, e ua faaipoipo oia i te tamahine a te hoê atua ê.+ 12 E haapohe Iehova i te taata atoa no roto mai i te mau fare ie o Iakoba o te rave i te reira, aita e parauraa o vai,* noa ˈtu e pûpû oia i te hoê ô ia Iehova o te mau nuu.”+

13 “E te vai ra te tahi atu ohipa ta outou e rave ra o te tapoˈi ra i te fata a Iehova i te roimata e te taˈi e te autâ, a ore atu ai oia e tâuˈa faahou i ta outou ô e e hiˈo ma te farii maitai i te ohipa a to outou rima.+ 14 E te ani ra outou: ‘Eaha te tumu?’ E faahaparaa hoi ta Iehova ia oe no te mea ua taiva oe i te vahine faaipoipo o to apîraa, e hoa hoi o ˈna no oe e e vahine faaipoipo na oe.*+ 15 Te vai ra râ hoê o tei ore i rave i tera ohipa, tei ia ˈna ra hoi tei toe mai i te varua ra. Eaha ta ˈna i imi na? Te huaai o te Atua. A haapao maitai ïa i to outou huru feruriraa e eiaha e taiva i te vahine faaipoipo o to outou apîraa. 16 Mea hae hoi na ˈu* te faataaraa,”+ te parau mai ra Iehova te Atua o Iseraela, “e te taata hamani ino,” te parau mai ra Iehova o te mau nuu. “A haapao maitai i to outou huru feruriraa e eiaha outou e taiva.+

17 “Ua faarohirohi outou ia Iehova i ta outou mau parau.+ Te na ô nei râ outou: ‘Mea nafea matou i te faarohirohiraa ia ˈna?’ Ma te parau: ‘Mea maitai no Iehova te taata o te rave i te mea ino, e mea au na ˈna tera huru taata.’+ Aore ra ma te parau: ‘Teihea te Atua o te parau-tia?’”

3 “Inaha te tono nei au i ta ˈu vea, e na ˈna e faaineine i te hoê eˈa i mua ia ˈu.+ E i reira iho, e haere mai te Fatu mau o ta outou e imi nei i to ˈna hiero.+ E e haere mai te vea o te faufaa, te vea o ta outou e tiai nei ma te oaoa. Inaha, e haere mai iho â oia,” te parau mai ra Iehova o te mau nuu.*

2 “O vai râ te faaoromai i te mahana o to ˈna haereraa mai, e o vai te mau ia fa mai oia? E au hoi oia i te auahi a te taata tamâ auro*+ e i te puˈa a te feia puˈa ahu. 3 E parahi oia mai te hoê taata o te tamâ e o te haamaitai i te ario+ e na ˈna e haamaitai i te mau tamaiti a Levi. E tamâ oia ia ratou mai te auro e te ario, e e riro mau â ratou no Iehova ei feia o te pûpû i te hoê ô ma te parau-tia. 4 E mauruuru Iehova i te ô a Iuda e a Ierusalema, mai i te mau mahana i tahito ra e mai i te mau matahiti i mutaa ihora.+

5 “E faafatata ˈtu vau ia outou no te haava ia outou, e oioi roa vau i te faautua i te feia tahutahu,+ tei faaturi, tei horeo ma te haavare,+ tei taviri i te taata rave ohipa,+ te vahine ivi e te tamarii aita e metua tane,*+ e i te feia o te ore e hinaaro e tauturu i te taata ê.+ Aita ratou i mǎtaˈu ia ˈu,” te parau mai ra Iehova o te mau nuu.

6 “O vau hoi o Iehova, eita vau e taui.*+ E e tamaiti outou na Iakoba, aita â outou i tae atura i to outou hopea. 7 Mai te mau mahana mai â o to outou mau tupuna outou i te fariu-ê-raa i ta ˈu mau faaueraa e aita outou i haapao i te reira.+ A hoˈi mai ia ˈu nei, e e hoˈi atu vau ia outou ra,”+ te parau mai ra Iehova o te mau nuu.

Te parau nei râ outou: “E nafea matou e hoˈi mai ai?”

8 “E eiâ anei te hoê taata rii i te Atua? Te eiâ nei râ outou ia ˈu.”

E te parau ra outou: “Mea nafea matou i te eiâraa ia oe?”

“I roto i te mau tuhaa ahuru e te mau ô. 9 Tei nia mau ia outou te faainoraa,* te eiâ ra hoi outou ia ˈu, oia mau, te na reira ra te nunaa taatoa. 10 A hopoi i te tuhaa ahuru taatoa i roto i te fare vairaa maa,+ e maa ïa to roto i to ˈu fare.+ E a tamata na ia ˈu no nia i te reira,” te parau mai ra Iehova o te mau nuu, “no te ite eita anei au e iriti no outou i te mau uputa pape o te raˈi+ a manii atu ai i nia ia outou i te hoê haamaitairaa a ore roa ˈtu ai outou e ere i te tahi noa ˈˈe mea.”+

11 “E no outou, e tamaˈi mau â vau i tei amu haapau,* e eita te reira e tuino i te mau hotu o to outou fenua, e hotu noa atoa te vine o ta outou faaapu,”+ te parau mai ra Iehova o te mau nuu.

12 “E parau te mau nunaa e mea oaoa outou,+ e riro hoi outou ei fenua no te au,” te parau mai ra Iehova o te mau nuu.

13 “Mea etaeta ta outou mau parau ia ˈu,” te parau mai ra Iehova.

E te na ô ra outou: “Eaha ta matou i parau no nia ia oe?”+

14 “Te parau ra outou: ‘Mea faufaa ore ia tavini i te Atua.+ Eaha te apî ia haapao i ta ˈna i faaue ia tatou ia rave e ia haere na mua ia Iehova o te mau nuu ma te mata oto? 15 I teie nei, te parau nei tatou e mea oaoa te feia teoteo e mea manuïa te feia o te rave ra i te mea ino.+ E tamata ratou i te Atua e eita ratou e roohia i te ati.’”

16 I tera ra tau, ua paraparau te feia i mǎtaˈu ia Iehova te tahi i te tahi, te taata tataitahi i to ˈna hoa, e te faaroo noa ra Iehova ia ratou. Papaihia ihora te hoê buka haamanaˈoraa i mua ia ˈna+ no te feia e mǎtaˈu ra ia Iehova e no te feia e feruriruri* ra i to ˈna iˈoa.+

17 “Na ˈu ratou,”+ te parau mai ra Iehova o te mau nuu, “i te mahana e faariro ai au ia ratou ei nunaa* taa ê no ˈu.+ E aroha vau ia ratou mai te hoê taata e aroha i ta ˈna tamaiti o te tavini ra ia ˈna.+ 18 E ite faahou outou i te taa-ê-raa i rotopu i te taata parau-tia e te taata ino,+ i rotopu i te taata o te tavini i te Atua e te taata o te ore e tavini ia ˈna.”

4 “Inaha, te fatata mai ra te mahana o te ama ra mai te umu,+ i reira te feia teoteo e te feia o te rave i te mea ino e riro ai mai te aihere mǎrô. E haamouhia ratou i tera mahana e fatata mai ra,” te parau mai ra Iehova o te mau nuu,* “e eita to ratou aˈa e amaa e faahereherehia. 2 E hiti râ te mahana o te parau-tia i nia ia outou o te faatura* ra i to ˈu iˈoa. Ei roto i to ˈna mau hihi* te rapaauraa. I reira, e ouˈauˈa outou mai te fanauˈa puaatoro haaporiahia.”

3 “E taataahi outou i te feia ino, e riro hoi ratou mai te repo i raro aˈe i to outou avae i te mahana e ohipa ˈi au,” te parau mai ra Iehova o te mau nuu.

4 “A haamanaˈo i te Ture a ta ˈu tavini ra o Mose, te mau faaueraa e ture* ta ˈu i horoa ˈtu i Horeba ia haapao to Iseraela taatoa.+

5 “Inaha, te tono atu nei au i te peropheta Elia+ ia outou ra hou a tae mai ai to Iehova mahana rahi e te mǎtaˈuhia.+ 6 E faafariu faahou oia i te aau o te mau metua tane i te mau tamaiti ra,+ e te aau o te mau tamaiti i te mau metua tane ra, ia ore au e haere mai e tairi i te fenua nei a haamou atu ai i te reira.”

(Hopea o te huriraa o te mau Papai Hebera e Arama. I muri iho, o te huriraa ïa o te mau Papai Heleni Kerisetiano)