HAGAI

1 I te piti o te matahiti faatereraa a te arii Dariu, i te mahana matamua o te ono o te avaˈe, tae maira te parau a Iehova na roto i te peropheta Hagai,*+ i te tavana o Iuda ra o Zerubabela+ te tamaiti a Sealatiela, e i te tahuˈa rahi ra o Iosua te tamaiti a Iehozadaka, e na ô ra:

2 “Teie ta Iehova o te mau nuu* e parau ra: ‘Te na ô ra teie nunaa: “Aita â te taime no te patu*+ i te fare* o Iehova i tae mai atura.”’”

3 Tae faahou maira te parau a Iehova na roto ia Hagai+ te peropheta e na ô ra: 4 “E taime anei teie no outou no te parahi i roto i to outou mau fare pǎpaihia i te raau, area teie fare, e pueraa huˈahuˈa ïa?+ 5 Teie ïa ta Iehova o te mau nuu e parau ra: ‘A haapao i to outou mau eˈa.* 6 Ua ueue outou i te huero maa e rave rahi, mea iti râ ta outou e ooti mai ra.+ Te tamaa ra outou, aita râ e paia ra. Te inu ra outou, aita râ to outou poihâ e mâha ra. Te oomo ra outou i te ahu, aita râ outou e mahanahana ra. Te taata rave ohipa, te tuu ra o ˈna i ta ˈna moni i roto i te hoê pute apoopoo.’”

7 “Teie ta Iehova o te mau nuu e parau ra: ‘A haapao i to outou mau eˈa.’*

8 “‘A pauma i nia i te mouˈa e a rave mai i te raau.+ A patu i te fare,+ ia mauruuru vau i te reira e ia faahanahanahia vau,’+ te parau mai ra Iehova.”

9 “‘Ua titau rahi outou e mea iti tei noaa mai ia outou. E i to outou afairaa i te reira i ǒ outou, puhipuhi atura vau i nia iho ia pee.+ No te aha?’ te na reira mai ra Iehova o te mau nuu. ‘No te mea e pueraa huˈahuˈa to ˈu fare, area outou, te horohoro noa ra ïa no te atuatu i to outou fare.+ 10 Tapea ihora ïa te raˈi i te hupe, e tapea ihora te fenua i to ˈna hoturaa. 11 Titau atura vau i te paˈurâ ia tupu i nia i te fenua, te mau mouˈa, i nia i te mau huero maa, te uaina apî, te hinu, i nia i te mau hotu o te fenua, i nia i te taata e te animara, e pauroa te ohipa a to outou rima.’”

12 Faaroo aˈera Zerubabela+ te tamaiti a Sealatiela,+ e te tahuˈa rahi o Iosua te tamaiti a Iehozadaka,+ e te toea o te nunaa i te reo o Iehova to ratou Atua e i te mau parau a te peropheta Hagai, no te mea ua tono Iehova to ratou Atua ia ˈna. Haamata aˈera te nunaa i te mǎtaˈu ia Iehova.

13 Mai ta Iehova i faaue ia ˈna, faaite maira Hagai, te vea a Iehova, i teie poroi i te nunaa: “‘Tei pihai iho vau ia outou,’+ te na reira mai ra Iehova.”

14 Faaaraara ihora ïa Iehova i te aau+ o te tavana o Iuda+ o Zerubabela te tamaiti a Sealatiela, e te aau o te tahuˈa rahi o Iosua+ te tamaiti a Iehozadaka, e te aau o te toea o te nunaa. Haamata aˈera ratou i te patu faahou i te fare o Iehova o te mau nuu, to ratou Atua.+ 15 Ua haamata ratou i tera ohipa i te 24 o te mahana o te ono o te avaˈe, i te piti o te matahiti te faatereraa te arii Dariu.+

2 I te 21 o te mahana o te hitu o te avaˈe, tae maira te parau a Iehova ia Hagai+ ra te peropheta e na ô ra: 2 “A ui na i te tavana o Iuda+ o Zerubabela+ te tamaiti a Sealatiela, e i te tahuˈa rahi o Iosua+ te tamaiti a Iehozadaka,+ e te toea o te nunaa: 3 ‘O vai te toe ra i rotopu ia outou o tei ite i teie fare* e to ˈna hanahana i mutaa iho?+ Eaha to ˈna huru i teie nei? Eita anei e tano ia parau e aita e haapaoraa ia faaauhia i to ˈna hanahana i mutaa iho?’+

4 “‘I teie nei râ, ia puai oe, Zerubabela,’ te na reira mai ra Iehova, ‘e ia puai oe, Iosua te tahuˈa rahi, te tamaiti a Iehozadaka.’

“‘E ia puai outou, te nunaa taatoa o teie fenua,’+ te na reira mai ra Iehova, ‘e a ohipa.’

“‘Tei ia outou ra hoi au,’+ te na reira mai ra Iehova o te mau nuu.* 5 ‘A haamanaˈo i ta ˈu i fafau atu ia outou i to outou haereraa mai i rapae i Aiphiti.+ Tei rotopu noa atoa to ˈu varua ia outou.*+ Eiaha e mǎtaˈu.’”+

6 “Teie hoi ta Iehova o te mau nuu e parau ra: ‘Fatata roa vau i te faaaueue faahou â i te raˈi e te fenua e te miti e te repo fenua.’+

7 “‘E faaaueue au i te mau nunaa atoa, e e tae mai te mau taoˈa hinaaro-rahi-hia o te mau nunaa atoa i roto i teie fare,+ e e faaî au ia ˈna i te hanahana,’+ te parau mai ra Iehova o te mau nuu.

8 “‘Na ˈu te ario, e na ˈu te auro,’ te na reira mai ra Iehova o te mau nuu.

9 “‘E rahi atu â te hanahana o teie fare i to mutaa iho,’+ te parau mai ra Iehova o te mau nuu.

“‘E ei teie vahi au e haaparahi ai i te hau,’+ te na reira mai ra Iehova o te mau nuu.”

10 I te 24 o te mahana o te iva o te avaˈe, i te piti o te matahiti te faatereraa o Dariu, tae maira te parau a Iehova ia Hagai+ ra te peropheta e na ô ra: 11 “Teie ta Iehova o te mau nuu e parau ra: ‘A ui na i te mau tahuˈa no nia i te ture:+ 12 “Ia tuu te hoê taata i te iˈo moˈa i roto i to ˈna ahu, e ia tano to ˈna ahu i nia i te faraoa aore ra te pǐpǐ, te uaina, te hinu aore ra te tahi atu maa, e riro anei te reira ei mea moˈa?”’”

Pahono aˈera te mau tahuˈa: “Eita!”

13 Ui atura Hagai: “Ia tapea te tahi taata o tei viiviihia i te tino pohe i teie mau mea, e viiviihia anei te reira?”+

Pahono aˈera te mau tahuˈa: “E viiviihia te reira.”

14 Na ô atura ïa Hagai: “‘Tera te huru o teie mau taata, e tera te huru o teie nunaa i mua ia ˈu,’ te na reira mai ra Iehova, ‘e tera te huru o te mau ohipa atoa a to ratou rima. Mea viivii te mau mea atoa ta ratou e pûpû ra.’

15 “‘I teie nei râ, a feruri na i teie ohipa mai teie nei â mahana: Hou te hoê ofai a faautahia ˈi i nia i te tahi atu ofai i roto i te hiero o Iehova,+ 16 i te taime a hinaaro ai te taata e 20 oini huero maa, 10 anaˈe oini tei noaa ia ratou. A hinaaro ai ratou e 50 mohina uaina, e 20 anaˈe mohina tei noaa ia ratou.+ 17 Ua tairi au ia outou, te mau ohipa atoa a to outou rima, i te mataˈi veavea, te tutae ro+ e te ûa paari, aita râ hoê o outou i fariu mai ia ˈu nei,’ te na reira mai ra Iehova.

18 “‘A feruri na mai teie nei â mahana, mai te 24 o te mahana o te iva o te avaˈe, mai te mahana i haamauhia ˈi te niu o te hiero o Iehova,+ a feruri i teie ohipa: 19 Te toe ra anei te huero i roto i te fare vairaa maa?*+ Aita â te vine, te suke, te remuna e te olive i hotu atura, e ere anei? Mai teie nei â mahana, e haamaitai au ia outou.’”+

20 Tae faahou maira te parau a Iehova ia Hagai ra, te piti o te taime, i te 24 o te mahana o te avaˈe+ e na ô ra: 21 “A parau ia Zerubabela, te tavana o Iuda: ‘E faaaueue au i te raˈi e te fenua.+ 22 E faataahuri au i te terono o te mau faatereraa arii, a faaore atu ai i te puai o te mau faatereraa arii o te mau nunaa.+ E faataahuri au i te pereoo tamaˈi e te feia i nia iho, e hiˈa te mau puaahorofenua e te feia i nia iho, e hiˈa te taata tataitahi i te ˈoˈe a to ˈna taeae.’”+

23 “‘I tera mahana,’ te na reira mai ra Iehova o te mau nuu, ‘e rave au ia oe, ta ˈu tavini e Zerubabela+ te tamaiti a Sealatiela,’+ te na reira mai ra Iehova, ‘e e faariro vau ia oe mai te hoê tapea rima titiro, o oe hoi ta ˈu i maiti,’ te na reira mai ra Iehova o te mau nuu.”