ZEPHANIA
1 Teie te parau a Iehova tei tae mai ia Zephania* te tamaiti a Kusi te tamaiti a Gedalia te tamaiti a Amaria te tamaiti a Hezekia, i te mau mahana o Iosia+ te tamaiti a Amôna+ te arii o Iuda:
2 “E haamou vau i te mau mea atoa i te fenua nei,” te na reira mai ra Iehova.+
3 “E haamou vau i te taata e te animara.
E haamou vau i te mau manu o te raˈi e te mau iˈa o te tai,+
Te mau turoriraa*+ e te taata ino atoa.
E haamou vau i te huitaata i te fenua nei,” te na reira mai ra Iehova.
4 “E toro vau i to ˈu rima i nia ia Iuda
E i nia i to Ierusalema taatoa,
E e faaore au i te mau ohipa atoa a Baala e vai ra i teie vahi,+
Te iˈoa o te mau tahuˈa a te mau atua ěê e te mau tahuˈa haamori idolo,+
5 Te feia o tei tipapa i nia i te mau tapoˈi fare i mua i te nuu o te raˈi,+
Te feia o tei tipapa a horeo ai eita ratou e taiva ia Iehova,+
A horeo atoa ˈi eita ratou e taiva ia Malakama,+
6 E te feia o tei fariu ê ia Iehova+
E o te ore e imi e e ui ia Iehova.”+
7 A mamû i mua i te Arii hau ê e Fatu ra o Iehova, ua fatata hoi te mahana o Iehova.+
Ua faaineine Iehova i te hoê tusia, ua haamoˈa oia i ta ˈna mau manihini.
8 “I te mahana o te tusia a Iehova, e faautua vau i te mau tamaiti huiarii,
Te mau tamaiti a te arii+ e te taata atoa o tei oomo i te ahu no te mau fenua ěê.
9 I tera mahana, e faautua vau i te taata atoa o te haere ra i nia i te tahua,*
Te feia o te faaî ra i te fare o to ratou fatu i te hamani-ino-raa e te haavarevare.
10 I tera mahana,” te na reira mai ra Iehova,
“E faaroohia te auê i te Uputa o te iˈa,+
Te taˈi, no ǒ mai i te tuhaa apî o te oire,+
E te hoê paaina puai mai te mau aivi mai.
11 A auê, e te feia no Maketesa,*
Ua haapohehia* hoi te feia hoohoo taatoa,
Ua haamouhia te taatoaraa o te feia faito i te ario.
12 I tera taime, e imi maite au e te mori na roto ia Ierusalema,
E e faautua vau i te feia haapeapea ore,* o te parau ra i roto i to ratou aau:
‘Eita Iehova e rave i te mea maitai e eita oia e rave i te mea ino.’+
13 E haruhia ta ratou faufaa e e vavahihia to ratou mau fare.+
E patu ratou i te fare, eita râ ratou e parahi i roto.
E tanu ratou i te vine, eita râ ratou e inu i te uaina.+
14 Mea piri te mahana rahi o Iehova!+
Mea piri e te haapeepee mai ra!+
Mea riaria te haruru o te mahana o Iehova.+
I reira, e tuô te taata tamaˈi.+
15 E mahana riri rahi tera mahana,+
E mahana ati e te ahoaho,+
E mahana vero e te haamouraa,
E mahana poiri e te rumaruma,+
E mahana tapoˈipoˈi e te rumaruma rahi,+
16 E mahana e faaroohia ˈi te pu tara e te huro+
No te mau oire auahia i te patu e no te mau pare teitei i te poro o te mau aua.+
17 E tuu vau i te ati i nia i te huitaata,
E e haere ratou mai te matapo ra,+
Ua hara hoi ratou ia Iehova.+
18 Eita ta ratou ario e ta ratou auro e faaora ia ratou i te mahana o to Iehova riri rahi,+
E pau hoi te fenua taatoa i te auahi o to ˈna itoito rahi,+
E haamou hoi oia i te taata atoa i te fenua nei, e mea riaria roa ta ˈna haamouraa.”+
2 Hou te faaueraa mana a tupu ai,
Hou te mahana a mairi ai mai te ota huero maa,
Hou te riri rahi o Iehova a tae mai ai i nia ia outou,+
Hou te mahana o to Iehova riri a tae mai ai i nia ia outou,
3 A imi ia Iehova,+ e te taata mǎrû atoa o te fenua nei,
O te haapao ra i ta ˈna mau faaueraa mana* tia.
A imi i te parau-tia, a imi i te mǎrû.
Peneiaˈe e faatapunihia outou i te mahana o to Iehova riri.+
5 “Ua ati te feia e parahi ra na te pae miti, te nunaa o te mau Kereti!+
Ua faautua Iehova ia outou.
E Kanaana, te fenua o te mau Philiseti, e haamou vau ia oe,
Aita e taata e toe mai.
6 E riro te pae miti ei vahi aihere,
Ei apoo pape no te mau tiai mamoe e ei aua no te mau mamoe.
I te po, e taoto ratou i roto i te mau fare o Asekelona.
E haapao hoi Iehova to ratou Atua ia ratou,
E e faahoˈi mai oia i to ratou mau taata tei afai-tîtî-hia.”+
8 “Ua faaroo vau i te faaino a Moabi+ e te mau parau ino a te ati Amona,+
O tei faaooo i to ˈu nunaa e o tei parau ma te teoteo e e haru ratou i to ratou fenua.+
9 No reira, te horeo nei au i to ˈu nei ora,” te na reira mai ra Iehova o te mau nuu,* te Atua o Iseraela,
“E riro Moabi mai ia Sodoma,+
E te ati Amona mai ia Gomora,+
E vahi no te raau taratara, e apoo miti papaa e e medebara e a muri noa ˈtu.+
E haru te toea o to ˈu nunaa i ta ratou mau taoˈa,
E e faaere te toea o to ˈu nunaa ia ratou i ta ratou faufaa.
10 Tera te noaa mai ia ratou no to ratou teoteo,+
Ua faaooo hoi ratou i te nunaa o Iehova o te mau nuu e ua faateitei ratou ia ratou iho.
11 E riro Iehova ei mǎtaˈuraa no ratou.
E haamou* hoi oia i te mau atua atoa o te fenua nei,
E e tipapa* te mau motu atoa o te mau nunaa i mua ia ˈna,+
Te motu tataitahi mai to ˈna vahi mai.
12 Outou atoa to Etiopia, e taparahi-pohe-hia outou i ta ˈu ˈoˈe.+
13 E toro oia i to ˈna rima i te pae apatoerau a haamou atu ai ia Asura.
E faaano oia ia Nineve+ mai te hoê medebara mǎrô.
14 E taoto te mau nǎnǎ animara i rotopu ia ˈna, te mau huru animara oviri atoa.*
E taoto te kata e te puaa taratara i rotopu i to ˈna mau pou parari.
E himene te hoê reo na roto i te haamaramarama.
E faaanohia te mau tomoraa,
E faaite hoi oia i te mau pǎpai arezi.
15 O te oire teoteo teie o tei parahi na ma te hau,
O tei parau na i roto i to ˈna aau: ‘O vau teie, aita ˈtu mai ia ˈu.’
I teie nei, ua riro oia ei riariaraa,
Ei vahi e taoto ai te mau animara oviri!
E hio te taata atoa e haere atu na reira a haamenemene atu ai i to ratou rima.”+
3 Ua ati te oire orure hau, viivii e haavî!+
2 Aita oia i hinaaro e faaroo,+ aita oia i farii i te aˈoraa.+
Aita oia i tiaturi ia Iehova,+ aita oia i faafatata ˈtu i to ˈna Atua.+
3 E liona uuru to ˈna huiarii i rotopu ia ˈna.+
E luko o te aˈuaˈu ra i te po to ˈna mau haava.
Eita ratou e vaiiho hoê ivi no te honihoni ia poipoi aˈe.
4 Mea teoteo ta ˈna mau peropheta, e feia haavarevare.+
5 E Atua parau-tia Iehova i rotopu ia ˈna,+ eita oia e rave i te tahi mea ino.
I te mau poipoi atoa, e faaite oia i ta ˈna mau faaotiraa haavaraa,+
E au te reira i te mahana ia hiti.
Aita râ te taata parau-tia ore i ite i te haama.+
6 “Ua haamou vau i te tahi mau nunaa, ua parari to ratou mau pare i te poro o te mau aua.
Ua haamou vau i to ratou mau aroâ e aita e taata i haere faahou na reira.
Ua mou to ratou mau oire, aita e taata faahou, aita hoê e parahi faahou ra i reira.+
7 Ua parau vau: ‘E mǎtaˈu iho â oe ia ˈu a farii atu ai i te aˈoraa,’+
Ia ore to ˈna nohoraa ia haamouhia.+
Ia faautua vau ia ˈna no tera mau ohipa atoa.
Ua rahi atu â râ to ratou hinaaro e rave i te ohipa piˈo.+
8 ‘A tamau ïa i te tiai ia ˈu,’+ te na reira mai ra Iehova,
‘E tae roa ˈtu i te mahana e tia mai ai au no te haru i te taoˈa,*
No te mea ta ˈu faaotiraa haavaraa, o te haaputuputuraa ïa i te mau nunaa, te amuiraa i te mau faatereraa arii,
No te manii i nia ia ratou i to ˈu inoino, to ˈu riri rahi.+
E pau hoi te fenua taatoa i te auahi o to ˈu itoito rahi.+
9 Ei reira vau e taui ai i te reo o te mau nunaa ei reo viivii ore,
Ia arue* ratou paatoa i te iˈoa o Iehova,
E ia tavini ratou ia ˈna ma te tahoê.’+
10 Mai te tuhaa fenua o te mau anavai o Etiopia mai,
E hopoihia mai te tahi ô na ˈu na te feia o te taparuparu ra ia ˈu, te tamahine a to ˈu feia o tei haapurarahia.+
11 I tera mahana, eita oe e haama faahou
No te mau ohipa atoa i orure hau ai oe ia ˈu,+
Ei reira vau e tatara ˈi i te feia teoteo e te faateitei i rotopu ia oe.
E eita oe e faateitei faahou ia oe i nia i to ˈu mouˈa moˈa.+
12 E vaiiho vau i te hoê pǔpǔ taata haehaa e te aau faahaihai i rotopu ia oe,+
E e haapu ratou i te iˈoa o Iehova.
13 Eita te toea o Iseraela+ e rave i te ohipa parau-tia ore.+
Eita ratou e haavare, eita atoa te arero haavare e itehia i roto i to ratou vaha.
E tamaa ratou* a taoto atu ai, e eita te tahi taata e faariaria ia ratou.”+
14 A umere ma te oaoa, e te tamahine o Ziona!
A huro, e Iseraela!+
A popou e a oaoa ma to aau atoa, e te tamahine o Ierusalema!+
15 Ua faaore Iehova i ta oe mau utua.+
Ua faafariu ê oia i to oe enemi.+
Tei rotopu ia oe te Arii o Iseraela, Iehova.+
Eita oe e mǎtaˈu faahou i te ati.+
16 I tera mahana, e parauhia ia Ierusalema:
“Eiaha e mǎtaˈu e Ziona.+
Eiaha e faatopa i to rima i raro.
17 Tei rotopu Iehova to Atua ia oe.+
Ei Atua puai, e faaora oia.
E oaoa roa oia ia oe.+
E mauruuru oia i to ˈna here ia oe.*
E oaoa oia no oe ma te reo umere.
18 E haaputuputu vau i tei oto no to ratou mairiraa i ta oe mau oroa.+
Aita ratou ia oe ra, i faaruru na hoi ratou i te haama no ˈna.+
19 Inaha i tera tau, e aro vau i tei haavî ia oe.+
E e faaora vau i te pirioi,+
E e haaputuputu vau i tei haapurarahia.+
E faariro vau ia ratou ei mea e au ia aruehia e ia faateiteihia te roo*
I te fenua taatoa o to ratou haama.
20 I tera tau, e faahoˈi mai au ia outou,
I tera tau, e haaputuputu vau ia outou.
E faariro hoi au ia outou ei mea e au ia faateiteihia te roo* e ia aruehia+ i rotopu i te mau nunaa atoa o te fenua nei,
Ia faahoˈi mai au i ta outou mau tîtî i mua i to outou mata,” te parau mai ra Iehova.+
“Ua huna (faaherehere maitai) Iehova” te auraa.
E au ra e taoˈa aore ra e ohipa niuhia i nia i te haamoriraa idolo.
Peneiaˈe te tahua o te terono o te arii.
E au ra e tuhaa teie no Ierusalema i pihai iho i te Uputa o te iˈa.
Heb: “haamamûhia.”
Heb: “te feia o tei mau i roto i to ratou rito,” mai i roto i te hoê tura uaina.
Heb: “aau.”
Heb: “ta ˈna faaotiraa.”
Aore ra “i te avatea.”
Aore ra “sabaota.”
Aore ra “haapohe poia.”
Aore ra “haamori.”
Heb: “te mau animara atoa a te hoê nunaa.”
Huri-atoa-hia “tia mai ai au ei ite.”
Heb: “tiaoro.”
Aore ra “amu ratou i te aihere.”
Heb: “E mamû oia i roto i to ˈna here.”
Heb: “iˈoa.”
Heb: “iˈoa.”