IONA

1 Teie te parau ta Iehova i faaite ia Iona*+ te tamaiti a Amitai: 2 “A tia, a haere i Nineve+ te oire rahi e a faaite i ta ˈna utua, ua tae roa hoi to ˈna ino i to ˈu tariˈa.”

3 Tia aˈera râ Iona no te horo i Taresisa, i te atea ê ia Iehova. Pou atura oia i Iopa e ite atura i te hoê pahi e fano ra i Taresisa. Aufau atura oia i to ˈna tere e pauma ˈtura i nia i te pahi no te fano na muri ia ratou i Taresisa, i te atea ê ia Iehova.

4 Tuu maira Iehova i te hoê mataˈi puai i nia i te miti, uˈana maira te vero i nia i te miti e fatata roa aˈera te pahi i te parari. 5 Mǎtaˈu ihora te mau ihitai, haamata aˈera ratou tataitahi i te pii i to ratou atua no te ani i te tauturu. Haamata atoa aˈera ratou i te taora i te mau taihaa i nia i te pahi i roto i te miti, ia mâmâ te pahi.+ Area Iona, ua pou ïa i roto i te hati, ua tarava oia e ua varea i te taoto. 6 Tapiri maira te tapena o te pahi ia ˈna e na ô maira: “Eaha oe e taoto ai? A tia mai e a pii i to atua! Peneiaˈe e faaite te Atua mau e te haapeapea ra oia no tatou e eita tatou e pohe.”+

7 Na ô aˈera te mau ihitai te tahi i te tahi: “Haere mai, e tuu tatou i te kelero+ no te ite o vai te tumu i tupu ai teie ati.” Tuu aˈera ïa ratou i te kelero e riro atura te kelero ia Iona.+ 8 Na ô aˈera ratou ia ˈna: “A parau mai na, o vai te tumu i roohia ˈi tatou i teie ati? Eaha to oe toroa, e nohea mai oe? No teihea fenua oe, e no teihea nunaa?”

9 Pahono atura oia: “E Hebera vau, e te mǎtaˈu* nei au ia Iehova te Atua o te raˈi, Tei hamani i te miti e te fenua.”

10 I reira, rahi roa ihora te mǎtaˈu o tera mau tane e parau aˈera ratou ia ˈna: “Eaha ta oe i rave?” (Ua taa ia ratou e te horo ê ra oia ia Iehova, na ˈna hoi i faaite atu ia ratou.) 11 Na ô aˈera ïa ratou ia ˈna: “E nahea ˈtu matou ia oe, ia mania te miti?” Te puai noa ˈtu ra hoi te miti. 12 Pahono atura oia: “A amo e a taue ia ˈu i roto i te miti, e mania ïa te miti. Ua ite hoi au e no ˈu i roohia ˈi outou i teie vero rahi.” 13 Tera râ, faaitoito noa aˈera tera mau tane i te hôe ia tae te pahi i te pae fenua. Aita râ ratou i manuïa, te puai noa ˈtu ra hoi te miti ati aˈe ia ratou.

14 Pii aˈera ratou ia Iehova: “Te taparu atu nei matou ia oe, e Iehova, eiaha matou ia pohe no teie taata! Eiaha oe e tahoo ia matou no te pohe o te hoê taata hara ore,* inaha ua rave oe mai ta oe i hinaaro, e Iehova!” 15 Amo aˈera ratou ia Iona, taue aˈera ia ˈna i roto i te miti e mania ihora te miti. 16 Mǎtaˈu roa ihora tera mau tane ia Iehova.+ Pûpû aˈera ratou i te hoê tusia ia Iehova e euhe aˈera.

17 Faahaere maira Iehova i te hoê iˈa rahi no te horomii ia Iona. Tei roto atura ïa Iona i te opu o te iˈa e toru ao e e toru po.+

2 Pure atura Iona ia Iehova to ˈna Atua mai roto mai i te opu o te iˈa.+ 2 Ua parau oia:

“I roto i to ˈu ati, ua tiaoro vau ia Iehova, e ua pahono oia ia ˈu.+

I roto i te mau vahi hohonu* o te Apoo* ua pii au no te tauturu.+

Ua faaroo mai oe i to ˈu reo.

Ua tapoˈi ta oe mau vavea e are atoa ia ˈu.+

 4 Na ô atura vau: ‘Ua tiahihia vau mai mua mai i to mata!

E nafea vau e hiˈo faahou ai i to hiero moˈa?’

Ua tafifi te remu na nia i to ˈu upoo.

 6 Ua topatari au i raro roa i te tumu o te mau mouˈa.

Ua piri te mau uputa o te fenua i muri ia ˈu e a muri noa ˈtu.

Ua tatara mai râ oe i to ˈu ora mai roto mai i te apoo, e Iehova to ˈu Atua.+

 7 A fatata roa ˈi au i te pohe, o Iehova ta ˈu i haamanaˈo.+

Tae atura ta ˈu pure ia oe ra, i roto i to hiero moˈa.+

 8 Te feia o tei ati maite i te mau idolo faufaa ore, ua faarue ïa i tei faaite i te here taiva ore ia ratou.*

 9 O vau râ, e pûpû vau i te tusia ia oe ma te reo haamauruuru.

E faatupu vau i ta ˈu i euhe.+

Na Iehova e faaora.”+

10 Na nia i te faaueraa a Iehova, pihaˈe maira te iˈa ia Iona i nia i te fenua.

3 Paraparau maira Iehova ia Iona te piti o te taime:+ 2 “A tia, a haere i Nineve+ te oire rahi, e a faaite atu i te poroi ta ˈu e parau atu nei ia oe.”

3 Tia aˈera ïa Iona e haere atura i Nineve,+ mai ta Iehova i faaue ia ˈna.+ E tiapai oire* o Nineve, e toru mahana na avae e ati ai.* 4 Tomo atura Iona i roto i te oire e faaite haere atura hoê mahana taatoa: “E 40 mahana toe e haamouhia ˈi Nineve.”

5 Faatupu ihora to Nineve i te faaroo i te Atua.+ Faaite haere aˈera ratou i te hoê haapaeraa maa e tapoˈi aˈera ratou paatoa ia ratou i te ahu oto. 6 I te faarooraa te arii o Nineve i tera poroi, tia aˈera oia mai nia mai i to ˈna terono, tatara ihora i to ˈna ahu arii, tapoˈi atura ia ˈna i te ahu oto e parahi atura i nia i te rehu auahi. 7 Hau atu â, faaitehia ˈtura na roto ia Nineve te hoê poroi no ǒ mai ia ˈna: “Teie te faaueraa a te arii e to ˈna mau tia mana: Eiaha te taata aore ra te animara, te puaatoro anei aore ra te mamoe, ia amu i te tahi noa ˈˈe mea. Eiaha ratou ia amu i te maa, eiaha atoa ratou ia inu i te pape. 8 Ia tapoˈihia ratou i te ahu oto, te taata e te animara. Ia pii ratou i te Atua ma to ratou puai atoa e ia fariu ê ratou i to ratou mau haerea iino e ta ratou ohipa haavîraa. 9 Peneiaˈe e taui* te Atua mau i te mea ta ˈna i opua a fariu ê atu ai i to ˈna riri rahi, ia ore tatou ia pohe.”

10 I te iteraa te Atua mau i te ohipa ta ratou i rave, i to ratou fariu-ê-raa i to ratou mau haerea iino,+ taui* ihora oia i ta ˈna i opua e aita ˈtura i tuu faahou mai i te ati ta ˈna i parau e tuu mai oia.+

4 Aita râ Iona i mauruuru i te reira e riri roa ihora oia. 2 Pure atura ïa oia ia Iehova: “E Iehova, tei to ˈu fenua noa â vau i taa ˈi ia ˈu e tera te tupu! No reira vau i tamata ˈi i te horo i Taresisa+ i te omuaraa. Ua ite hoi au e Atua aumihi oe e te aroha hamani maitai, o te ore e riri oioi e o tei rahi i te here taiva ore,+ e taui oe i to oe manaˈo a ore atu ai e tuu mai i te ati. 3 E Iehova, i teie nei, a rave i to ˈu ora, mea maitai aˈe hoi no ˈu te pohe i te ora.”+

4 Ui maira Iehova: “Mea tano anei ia riri oe?”

5 Haere atura Iona i rapae i te oire e parahi atura i te pae hitia o te râ o te oire. Hamani ihora oia i te hoê tamaru no ˈna i reira e parahi atura i raro aˈe i te marumaru no te ite eaha te tupu i taua oire ra.+ 6 Faatupu maira te Atua o Iehova i te hoê raau tupu mea toro* no Iona, ei marumaru no ˈna e no te tamǎrû i to ˈna ahoaho. Oaoa roa ihora Iona i tera raau tupu.

7 Tera râ, i te mahana i muri iho, tuu maira te Atua mau i te hoê toˈe i te aahiata, amu ihora taua toˈe ra i te raau tupu e maemae atura te reira. 8 A haamata ˈi te mahana i te hiti, tuu atoa maira te Atua i te hoê mataˈi âhu no hitia o te râ. Tupai noa maira te mahana i nia i to Iona upoo e fatata roa ˈtura oia i te matapoirihia. Ani noa ˈtura oia ia pohe oia e na ô noa ˈtura oia: “Mea maitai aˈe no ˈu te pohe i te ora.”+

9 Ui maira te Atua ia Iona: “Mea tano anei ia riri oe no tera raau tupu?”+

Pahono atura oia: “Mea tano ia riri au, ia riri au a pohe atu ai.” 10 Na ô maira râ Iehova: “Te aroha ra oe i teie raau tupu, e ere na oe i ohipa no ˈna, e ere atoa na oe i faatupu. Ua tupu te reira i te roaraa hoê po e ua pohe i te roaraa hoê po. 11 Eiaha atoa anei ïa vau e aroha ia Nineve te oire rahi,+ te oire ua hau i te 120 000 taata, o tei ore i ite i te taa-ê-raa i rotopu i te maitai e te ino,* e ta ratou atoa animara e rave rahi?”+