AMOSA
1 Te mau parau a Amosa,* no roto oia i te feia faaamu mamoe no Tekoa.+ Ua tae mai teie mau parau no nia ia Iseraela ia Amosa ra na roto i te hoê orama i te mau mahana o te arii Uzia+ no Iuda e i te mau mahana o Ieroboama+ te tamaiti a Ioasa,+ te arii o Iseraela, e piti matahiti hou te aueueraa fenua.+ 2 Na ô maira oia:
“E uuru Iehova mai Ziona mai,
Mai Ierusalema mai e tuô oia.
E oto te mau vahi aihere a te mau tiai mamoe,
E e mǎrô te tupuai o Karemela.”+
3 “Teie ta Iehova e parau ra:
‘“No e toru orureraa hau* a Damaseko, e no e maha, eita vau e taui i ta ˈu i faaoti,
Ua taataahi hoi ratou ia Gileada mai te huero maa ia faaterehia te mauhaa auri na nia iho no te haaperehu i te reira.+
4 E faatae ïa vau i te hoê auahi i nia i te fare o Hazaela,+
E e pau te mau pare etaeta o Bene-hada i tera auahi.+
5 E ofati au i te mau teˈa o te mau uputa o Damaseko.+
E haamou vau i te feia no Bikata-avena
E i te faatere* ra i Bete-edene.
E afai-tîtî-hia te feia no Suria i Kira,”+ te parau ra Iehova.’
6 Teie ta Iehova e parau ra:
‘“No e toru orureraa hau a Gaza,+ e no e maha, eita vau e taui i ta ˈu i faaoti,
Ua rave hoi ratou i te taatoaraa o te hoê pǔpǔ tîtî+ no te tuu atu ia ratou i te rima o Edoma.
7 E faatae ïa vau i te hoê auahi i nia i te aua o Gaza,+
E e pau to ˈna mau pare etaeta i tera auahi.
8 E haamou vau i te feia no Asadoda,+
E i te faatere* ra i Asekelona.+
E fariu vau i to ˈu rima i nia ia Ekerona,+
E e pohe te mau Philiseti e toe ra,”+ te na reira mai ra te Arii hau ê e Fatu ra o Iehova.’
9 Teie ta Iehova e parau ra:
‘No e toru orureraa hau a Turia,+ e no e maha, eita vau e taui i ta ˈu i faaoti,
Ua tuu hoi ratou i te taatoaraa o te hoê pǔpǔ tîtî i te rima o Edoma,
E aita ratou i haamanaˈo i te faufaa a te mau taeae.+
10 E faatae ïa vau i te hoê auahi i nia i te aua o Turia,
E e pau to ˈna mau pare etaeta i tera auahi.’+
11 Teie ta Iehova e parau ra:
‘No e toru orureraa hau a Edoma,+ e no e maha, eita vau e taui i ta ˈu i faaoti,
Ua aˈuaˈu hoi oia i to ˈna taeae i te ˈoˈe,+
E aita oia i faaite i te aroha hamani maitai.
I roto i to ˈna riri, te hahae noa ra oia ia ratou,
E te tamau noa ra to ˈna riri ia ratou.+
12 E faatae ïa vau i te hoê auahi i nia ia Temana,+
E e pau te mau pare etaeta o Bozara i tera auahi.’+
13 Teie ta Iehova e parau ra:
‘“No e toru orureraa hau a te ati Amona,+ e no e maha, eita vau e taui i ta ˈu i faaoti,
Ua atore hoi ratou i te mau vahine hapû no Gileada no te faarahi i to ratou iho tuhaa fenua.+
14 E tutui ïa vau i te aua o Raba,+
E e pau to ˈna mau pare etaeta
A hurohia ˈi i te mahana aroraa,
E a paaina mai ai te hoê mataˈi rorofai i te mahana vero.
15 E e afai-tîtî-hia to ratou arii e to ˈna mau tia mana,”*+ te na reira mai ra Iehova.’
2 “Teie ta Iehova e parau ra:
‘“No e toru orureraa hau* a Moabi,+ e no e maha, eita vau e taui i ta ˈu i faaoti,
Ua tutui hoi oia i te mau ivi o te arii o Edoma ia riro te reira ei puˈa.
2 E faatae ïa vau i te hoê auahi i nia ia Moabi,
E e pau te mau pare etaeta o Keriota+ i tera auahi.
E pohe Moabi i roto i te maniania,
I te huro, i te oto o te pu.+
3 E iriti ê au i te faatere* no roto ia Moabi
A haapohe atu ai i to ˈna mau tia mana* e o ˈna atoa,”+ te parau mai ra Iehova.’
4 Teie ta Iehova e parau ra:
‘No e toru orureraa hau a Iuda,+ e no e maha, eita vau e taui i ta ˈu i faaoti,
Ua faarue hoi ratou i te ture* a Iehova,
E aita ratou i haapao i ta ˈna mau faaueraa.+
Ua tiaturi râ ratou i te mau parau haavare ta to ratou mau tupuna i tiaturi na e ua aratai te reira ia ratou ia rave i te mea ino.+
5 E faatae ïa vau i te hoê auahi i nia ia Iuda,
E e pau te mau pare etaeta o Ierusalema i tera auahi.’+
6 Teie ta Iehova e parau ra:
‘No e toru orureraa hau a Iseraela,+ e no e maha, eita vau e taui i ta ˈu i faaoti,
Te hoo ra hoi ratou i te taata parau-tia no maa ario,
E te taata veve no e piti tiaa.+
7 Te taataahi ra ratou i te upoo o te feia haihai i raro i te repo,+
E te opani ra ratou i te eˈa i te feia mǎrû.+
Te taoto ra te metua tane e te tamaiti i te hoê â tamahine,
E ma te na reira, te haaviivii ra ratou i to ˈu iˈoa moˈa.
8 I pihai iho i te mau fata atoa,+ te tarava nei ratou i nia i te mau ahu ta ratou i haru ei haapapuraa no te hoê tarahu.*+
E te uaina ta ratou e inu ra i roto i te hiero* o to ratou mau atua, ua noaa mai ïa i te feia ta ratou i faaaufau i te utua moni.’
9 ‘Na ˈu râ i haamou i te ati Amori i mua ia ratou,+
O ˈna o tei au i te tumu arezi i te teitei e i te tumu alona i te paari.
Ua faaore au i to ˈna maa i nia e to ˈna mau aˈa i raro.+
10 Ua aratai mai au ia outou i rapae ia Aiphiti,+
E ua faahaere au ia outou na te medebara e 40 matahiti,+
Ia fatu outou i te fenua o te ati Amori.
11 Ua faatoroa vau vetahi o ta outou mau tamaiti ei peropheta+
E vetahi o to outou mau taata apî ei Nazira.+
E ere anei tera ta ˈu i rave, e te nunaa o Iseraela?’ Te na reira mai ra Iehova.
12 ‘Ua faainu râ outou i te uaina i te mau Nazira,+
E ua parau outou i te mau peropheta: “Eiaha outou e tohu.”+
13 E haaperehu ïa vau ia outou
Mai te hoê pereoo î i te amaa huero maa tâpûhia e haaperehu i te mau mea atoa i raro aˈe ia ˈna.
14 Aita e vahi e horo ai te taata vitiviti,+
E ere te taata puai i to ˈna puai,
E aita e taata tamaˈi e ora ˈtu.
15 Eita te taata teˈa e mau i to ˈna vahi,
Eita te taata avae vitiviti e ora ˈtu,
E eita te taata faahoro puaahorofenua e ora ˈtu.
16 E te taata itoito* roa ˈˈe i rotopu i te feia tamaˈi,
E horo o ˈna ma te ahu ore i tera mahana,’+ te na reira mai ra Iehova.”
3 “A faaroo mai i teie parau ta Iehova i faaite no nia ia outou, e te nunaa o Iseraela, no nia i te nunaa taatoa ta ˈu i aratai i rapae i Aiphiti:
2 ‘O outou anaˈe ta ˈu i ite i rotopu i te mau nunaa atoa o te fenua nei.+
No reira, e faautua vau ia outou no ta outou mau hape atoa.+
3 E haere apipiti anei e piti taata aita anaˈe raua i faaau i te farerei?
4 E uuru anei te liona i roto i te uru raau aita anaˈe ta ˈna e maa?
E uuru anei te liona apî mai roto mai i to ˈna tapuniraa aita anaˈe ta ˈna i aˈuaˈu i noaa?
5 E mau anei te hoê manu i roto i te hoê marei aita anaˈe te marei i tuuhia i raro?*
E pata anei te hoê marei aita anaˈe e ohipa i mau mai i roto?
6 Ia faaotohia te pu tara i roto i te hoê oire, eita anei te taata e rûrû?
Ia tupu te tahi ati i roto i te oire, e ere anei na Iehova i faatupu?
7 Eita hoi te Arii hau ê e Fatu ra o Iehova e rave i te tahi mea
Ma te ore e faaite i ta ˈna opuaraa huna* i ta ˈna mau tavini te mau peropheta.+
8 Ua uuru te liona!+ O vai te ore e mǎtaˈu?
Ua paraparau te Arii hau ê e Fatu ra o Iehova! O vai te ore e tohu?’+
9 ‘A faaite haere i te reira na nia i te mau pare etaeta o Asadoda
E na nia i te mau pare etaeta o Aiphiti.
A parau: “A haaputuputu i nia i te mau mouˈa o Samaria.+
A hiˈo na i te arepurepu
E te ohipa taviri i reira.+
10 Aita hoi ratou i ite i te rave i te mea tia,” te na reira mai ra Iehova,
“Te feia e haaputu ra i te hamani-ino-raa e te haamouraa i roto i to ratou mau pare etaeta.”’
11 Teie ïa ta te Arii hau ê e Fatu ra o Iehova e parau ra:
‘E haaati mai te hoê enemi i te fenua,+
E faaere oia ia oe i to oe puai,
E e eiâhia i roto i to oe mau pare etaeta.’+
12 Teie ta Iehova e parau ra:
‘Mai te tiai mamoe e iriti e piti avae aore ra te tahi apaapa tariˈa mai roto mai i te vaha o te liona,
Mea na reira te nunaa o Iseraela e iritihia ˈi,
Te feia e parahi ra i Samaria i nia i te roˈi unauna e te tofa maitai roa.’*+
13 ‘A faaroo mai e a faaara* i te huaai o Iakoba,’ te na reira mai ra te Arii hau ê e Fatu ra o Iehova, te Atua o te mau nuu.*
14 ‘No te mea i te mahana e faautua ˈi au ia Iseraela no ta ˈna mau orureraa hau* atoa,+
E faautua atoa vau ia ratou no te mau fata i Betela.+
E tâpûhia te mau tara o te fata a marua ˈtu ai i raro.+
15 E vavahi au i te fare o te tau toˈetoˈe e te fare o te tau veavea,’
4 “A faaroo mai i teie parau, e te mau puaatoro ufa o Basana
I nia i te mouˈa o Samaria,+
Outou te mau vahine o te taviri ra i te feia haihai+ e o te taataahi ra i te feia riirii,
O te parau ra i ta outou mau tane faaipoipo:* ‘A afai mai i te tahi mea e inu!’
2 Ua horeo te Arii hau ê e Fatu ra o Iehova i to ˈna moˈaraa:
‘“Inaha, te fatata mai ra te mahana e amohia ˈi outou i nia i te tarou a te feia tupai animara,
E te toea o outou, i te mǎtau a te feia ravaai.
3 E haere outou i rapae na te mau apoo o te aua, e haere afaro noa outou tataitahi.
E e faaruehia outou i Haramona,” te na reira mai ra Iehova.’
4 ‘A haere mai i Betela e a rave i te hara,*+
A haere mai i Gilagala e ia rahi atu â ta outou mau hara!+
Mea au hoi na outou e rave i te reira, e te nunaa o Iseraela,’ te na reira mai ra te Arii hau ê e Fatu ra o Iehova.
6 ‘O vau nei, ua haapohe au ia outou i te poia i roto i to outou mau oire atoa
E ua ere to outou mau fare atoa ia ˈu i te faraoa.+
Aita râ outou i hoˈi mai ia ˈu nei,’+ te na reira mai ra Iehova.
7 ‘Ua tapea atoa vau i te ûa i ǒ outou e toru avaˈe hou te ootiraa.+
Ua faatopa vau i te ûa i te hoê oire, eiaha râ i te tahi oire.
Ua ûahia i nia i te tahi tâpû fenua,
Ua mǎrô râ te tahi atu tâpû fenua no te ûa ore.
8 Ua haere peretete te taata no e piti aore ra e toru oire i te hoê â oire no te inu i te pape,+
E aita ratou i mâha.
Aita râ outou i hoˈi mai ia ˈu nei,’+ te na reira mai ra Iehova.
9 ‘Ua tairi au i ta outou mau maa i te âhu rahi e te tutae ro.+
Ua tanu outou e rave rahi maa hotu e te vine,
Ua pau râ ta outou mau tumu suke e tumu olive i te amuhia e te vivi.+
E aita iho â outou i hoˈi mai ia ˈu nei,’+ te na reira mai ra Iehova.
10 ‘Ua tuu vau i rotopu ia outou i te hoê maˈi pee mai te maˈi i roohia ˈi to Aiphiti.+
Ua haapohe au i to outou feia apî i te ˈoˈe+ e ua haru vau i ta outou mau puaahorofenua.+
Ua faahaere au i te hauˈa ino no roto mai i to outou mau puhapa i roto roa i to outou apoo ihu.+
Aita râ outou i hoˈi mai ia ˈu nei,’ te na reira mai ra Iehova.
11 ‘Ua faatae mai au i te hoê haamouraa i rotopu ia outou,
Mai te haamouraa o Sodoma e Gomora ta ˈu i faatae mai.+
E e au outou i te hoê tâpû raau i tatarahia mai roto mai i te auahi.
Aita râ outou i hoˈi mai ia ˈu nei,’+ te na reira mai ra Iehova.
12 Tera ïa ta ˈu e rave ia oe, e Iseraela!
Tera ta ˈu e rave ia oe,
A faaineine ïa i te farerei i to Atua, e Iseraela!
13 Inaha hoi na ˈna i hamani i te mau mouˈa+ e i poiete i te mataˈi.+
Te faaite nei oia i to ˈna mau manaˈo i te taata,
Te taui nei oia i te maramarama o te aahiata ei poiri,+
E te taahi nei oia i nia i te mau vahi teitei o te fenua nei.+
O Iehova te Atua o te mau nuu* to ˈna iˈoa.”
5 “E te nunaa o Iseraela, a faaroo mai i teie parau no nia ia outou ta ˈu e faaite atu nei mai te hoê himene oto:
2 ‘Ua hiˈa te tamahine apî,* o Iseraela, i raro i to ˈna fenua.
Aita e haere faahou ra ia ˈna ia tia i nia.
Ua faaruehia oia.
Aita hoê no te faatia mai ia ˈna.’
3 “Teie hoi ta te Arii hau ê e Fatu ra o Iehova e parau ra:
‘Te oire o te haere i te tamaˈi e hoê tausani faehau, hoê hanere noa ta ˈna e toe mai.
E o te haere e hoê hanere faehau, hoê ahuru noa ta ˈna e toe mai. Tera te tupu no te nunaa o Iseraela.’+
4 “Teie hoi ta Iehova e parau ra i te nunaa o Iseraela:
‘A hoˈi mai ia ˈu nei e a ora noa.+
Eiaha e haere i Gilagala+ e eiaha e haere i Beere-seba,+
E afai-tîtî-hia hoi Gilagala,+
E e mou Betela.*
6 A hoˈi mai ia Iehova ra e a ora noa,+
Aita anaˈe, e ura oia mai te hoê auahi i nia i te utuafare o Iosepha,
E pau Betela ia ˈna e aita hoê no te tupohe ia ˈna.
8 Tei hamani i te pue fetia o Kima e te pue fetia o Kesili,+
Tei taui i te poiri rahi ei maramarama o te poipoi,
Tei haapoiri i te mahana ia au te reira i te po,+
Tei titau i te mau pape o te miti
No te manii i nia i te fenua nei,+
O Iehova to ˈna iˈoa.
9 E faatae oia i te haamouraa i nia i te taata puai,
E faatae oia i te haamouraa i nia i te mau pare etaeta.
10 Mea hae na tera mau taata i te feia o te aˈo ra ia ratou i te uputa o te oire,
E mea riri na ratou i te feia o te parau i te parau mau.+
11 Te titau ra hoi outou ia aufau te taata riirii i te fenua* ta ˈna e faaapu ra
E te rave nei outou i ta ˈna huero maa ei ô titauhia,+
Eita outou e parahi e a muri noa ˈtu i roto i te mau fare ofai taraihia ta outou i patu.+
Eita atoa outou e inu i te uaina no te mau tumu vine maitai roa ta outou i tanu.+
12 Ua ite hoi au i te rahi o ta outou mau orureraa hau*
E te rahi o ta outou mau hara,
Te haavî nei outou i te taata parau-tia,
Te farii ra outou i te petaraa,
E i te uputa o te oire, te faaere ra outou i te taata veve i to ˈna mau tiaraa.+
15 A faufau i te mea ino e a hinaaro i te mea maitai.+
Ia upootia te parau-tia i te uputa o te oire.+
Peneiaˈe e faaite Iehova te Atua o te mau nuu
I ta ˈna farii maitai i te toea o te utuafare o Iosepha.’+
16 “Teie ïa ta Iehova te Atua o te mau nuu, o Iehova, e parau ra:
‘E auê te faaroohia i te mau mahora atoa,
E e parauhia na te mau aroâ atoa: “Auê! Auê!”
E titau ratou i te feia faaapu ia oto ratou,
E te feia i tarahuhia no te oto, ia auê ratou.’
17 ‘E auê te faaroohia i roto i te mau faaapu vine atoa.+
E na ropu hoi au ia oe i te haere,’ te parau ra Iehova.
18 ‘Ua ati te feia o te tiai ru ra i te mahana o Iehova!+
Eaha ïa no outou te mahana o Iehova?+
E poiri ïa, e ere i te maramarama.+
19 I tera mahana, e riro outou mai te hoê taata o te horo ra no te hoê liona a farerei atu ai i te hoê daba,
Ia tomo oia i roto i to ˈna fare a tapea ˈtu ai i te pǎpai, e hohoni te hoê ophi ia ˈna.
20 E poiri te mahana o Iehova, e ere i te maramarama.
Mea rumaruma tera mahana, e ere mea maramarama.
21 Mea hae na ˈu, mea vahavaha na ˈu ta outou mau oroa,+
E aita vau e au ra i te hauˈa o ta outou mau tairururaa taa ê.
22 Noa ˈtu e pûpû outou i te tusia taauahi e te ô ia ˈu,
Eita vau e mauruuru i te reira.+
E eita vau e farii i te mau animara haaporiahia ta outou e pûpû ra ei tusia no te hau.+
23 A hopoi ê atu i te maniania o ta outou mau himene.
25 E te nunaa o Iseraela, ua hopoi mai anei outou i te tusia e te ô na ˈu
I te roaraa o na 40 matahiti i roto i te medebara?+
26 I teie nei, e afai ê atu outou ia Sakuta to outou arii e ia Kiuna,
Te mau tii, te fetia o to outou atua, o ta outou i hamani,
27 E e hopoi tîtî au ia outou i te hoê fenua atea ˈtu â ia Damaseko,’+ te na reira mai ra oia no ˈna te iˈoa Iehova te Atua o te mau nuu.”+
6 “Ua ati te feia i Ziona o te tiaturi ra ia ratou iho,
Te feia e manaˈo ra e eita ratou e roohia i te ati i nia i te mouˈa o Samaria,+
Te feia mana o te nunaa rahi roa ˈˈe,
Te feia ia ratou ra te nunaa o Iseraela e fariu ai!
2 A haere atu i Kalane e a hiˈo.
Mai reira ˈtu, a haere i Hamata rahi,+
E a pou i Gata i ǒ te mau Philiseti.
Mea maitai aˈe anei te reira i teie na faatereraa arii?*
Mea aano aˈe anei to ratou fenua i to outou?
3 Te tatara ra outou i roto i to outou feruriraa i te mahana ati+
A haamau mai ai i te parahiraa no te haavîraa uˈana.+
4 Te tarava nei ratou i nia i te roˈi ivori+ e te tiraha nei i nia i te tofa,+
A amu ai i te mau mamoe oni o te nǎnǎ e te mau fanauˈa puaatoro* haaporiahia.+
5 Te papai ra ratou i te himene i te taˈi o te kinura,*+
E mai ia Davida, te hamani ra ratou i te mauhaa faataˈi upaupa.+
6 Mea inu auˈa noa ta ratou i te uaina+
E te parai ra ratou ia ratou i te mau monoˈi maitai roa ˈˈe.
Aita râ ratou e tâuˈa ra i* te ati o Iosepha.+
8 ‘Ua horeo te Arii hau ê e Fatu ra o Iehova,’+ te na reira mai ra Iehova te Atua o te mau nuu,*
‘“Mea riri roa na ˈu te teoteo o Iakoba,+
Mea hae na ˈu to ˈna mau pare etaeta,+
E e tuu vau i te oire e to roto atoa i te rima o te enemi.+
9 “‘“E mai te peu hoê ahuru anaˈe tane te toe mai i roto hoê fare, e pohe atoa ratou. 10 E haere mai hoê fetii no ratou* e amo ia ratou i rapae a tanina hoê hoê atu ai ia ratou. E afai oia i to ratou mau ivi i rapae i te fare. I muri iho, e ui oia i te taata i roto i te mau piha o taua fare ra: ‘E taata faahou anei to reira ia oe ra?’ E e pahono mai oia: ‘Aita!’ Ei reira, e parau oia: ‘A mamû! E ere hoi teie i te taime no te faahiti i te iˈoa o Iehova.’”
E vavahi oia i te fare rahi a purehu roa ˈtu ai,
E te fare nainai, a huˈahuˈa roa ˈtu ai.+
12 E horo anei te mau puaahorofenua na nia i te mau mato?
Aore ra e arotehia anei i reira e te puaatoro?
13 Te oaoa ra outou i te mea faufaa ore,
E te parau nei outou: “E ere anei ma to tatou iho puai tatou i te puairaa mai?”*+
14 No reira, e te nunaa o Iseraela, e faatae mai au i te tahi nunaa no te aro ia outou,’+ te na reira mai ra Iehova te Atua o te mau nuu,
‘E e haavî ratou ia outou mai Lebo-hamata*+ e tae roa ˈtu i te tahora o te Araba.’”
7 Teie ta te Arii hau ê e Fatu ra o Iehova i faaite ia ˈu: ua faahaere mai oia i te hoê aere vivi a haamata ˈi te maa o te tau toˈetoˈe* i te tupu mai. O te maa tera i tanuhia i muri aˈe i te tâpûraahia te aihere a te arii. 2 I te pauraa i te aere vivi i te amu i tei tupu i taua fenua ra, na ô atura vau: “E te Arii hau ê e Fatu ra e Iehova, a faaore na i te hara a to nunaa!+ E nafea Iakoba e ora ˈi?* Mea paruparu hoi oia!”+
3 Taui ihora ïa Iehova i to ˈna manaˈo.*+ Na ô maira Iehova: “Eita te reira e tupu.”
4 Teie ta te Arii hau ê e Fatu ra o Iehova i faaite ia ˈu: ua titau te Arii hau ê e Fatu ra o Iehova i te hoê auahi ei faautuaraa i to ˈna nunaa. Ua pau te miti rahi e te hohonu i tera auahi, e ua pau hoê tuhaa o taua fenua ra. 5 Na ô atura vau: “E te Arii hau ê e Fatu ra e Iehova, a faaea na!+ E nafea Iakoba e ora ˈi?* Mea paruparu hoi oia!”+
6 Taui ihora ïa Iehova i to ˈna manaˈo.*+ Na ô maira te Arii hau ê e Fatu ra o Iehova: “Eita atoa te reira e tupu.”
7 Teie ta ˈna i faaite ia ˈu: te tia noa ra Iehova i nia i te hoê patu hamanihia i te tapau faito, e e tapau faito to roto i to ˈna rima. 8 Ui maira Iehova ia ˈu: “Eaha ta oe e ite ra Amosa?” Pahono atura vau: “E tapau faito.” Na ô maira Iehova: “E tuu vau i te hoê tapau faito i rotopu i to ˈu nunaa o Iseraela. Eita vau e faaore faahou i ta ratou hara.+ 9 E vai ano te mau vahi teitei o Isaaka,+ e e faaanohia te mau nao* o Iseraela.+ E tairi au i te utuafare o Ieroboama i te ˈoˈe.”+
10 Faatae atura Amazia te tahuˈa o Betela+ i teie poroi i te arii Ieroboama+ no Iseraela: “Te orure hau ra Amosa ia oe i ropu mau ia Iseraela.+ Aita to teie fenua e faaoromai faahou ra i ta ˈna mau parau.+ 11 Teie hoi ta Amosa e parau ra: ‘E pohe Ieroboama i te ˈoˈe, e e afai-tîtî-hia Iseraela mai to ˈna fenua mai.’”+
12 Na ô atura Amazia ia Amosa: “E te taata ite orama ra, a haere, a horo i te fenua o Iuda, ia noaa ta oe imiraa* i ǒ, a tohu noa ˈtu ai oe i ǒ.+ 13 Eiaha râ oe e tohu faahou i Betela,+ e nao hoi teie na te hoê arii+ e e hiero* no te hoê faatereraa arii.”
14 Pahono maira Amosa ia Amazia: “E ere au i te peropheta, e ere atoa i te tamaiti na te peropheta. E tiai nǎnǎ râ vau,+ e i haapao na vau i te mau tumu suke sukamino.* 15 Rave maira râ Iehova ia ˈu a tiai noa ˈi au i te nǎnǎ mamoe, e parau maira Iehova ia ˈu: ‘A haere e tohu i to ˈu nunaa o Iseraela.’+ 16 I teie nei, a faaroo mai ïa i te parau a Iehova: ‘Te na ô ra oe: “Eiaha e tohu i te ati no Iseraela,+ e eiaha e poro+ i te poroi faautuaraa no te utuafare o Isaaka.” 17 Teie ïa ta Iehova e parau ra: “E riro ta oe vahine faaipoipo ei vahine taiata i roto i te oire, e e pohe ta oe mau tamaiti e ta oe mau tamahine i te ˈoˈe. E tufahia to oe mau tâpû fenua i te taura faito, e e pohe oe i te hoê fenua viivii. E e afai-tîtî-hia iho â Iseraela mai to ˈna fenua mai.”’”+
8 Teie ta te Arii hau ê e Fatu ra o Iehova i faaite ia ˈu: e farii maa hotu o te tau auhune ta ˈu i ite. 2 Na ô maira oia ia ˈu: “Eaha ta oe e ite ra Amosa?” Pahono atura vau: “E farii maa hotu o te tau auhune.” Na ô maira Iehova ia ˈu: “Ua tae te hopea no to ˈu nunaa o Iseraela. Eita vau e faaore faahou i ta ratou hara.+ 3 ‘I tera mahana, e taui te mau himene o te hiero ei auê,’+ te na reira mai ra te Arii hau ê e Fatu ra o Iehova. ‘Mea rahi te tino pohe e faaruehia i te mau vahi atoa.+ A mamû!’
4 A faaroo mai i teie parau, outou o te taataahi ra i te feia veve
E o te faaore ra i te feia mǎrû o teie fenua,+
5 O te parau ra: ‘Afea te oroa o te avaˈe apî e hope ai,+ ia hoo atu matou i ta matou mau huero maa,
E te Sabati,+ ia rave matou i ta matou mau huero maa no te hoo atu?
E nehenehe ïa matou e faaohipa i te faito epha* huˈa aˈe
E te sekela* teiaha aˈe,
A faahape atu ai i ta matou mau faito no te taviri i te taata.+
6 E nehenehe ïa matou e hoo mai i te feia riirii i te ario
E te feia veve i na tiaa e piti,+
A hoo atu ai i te pehu o te huero maa.’
Eita anei te fenua e maraa mai te anavai Nile?
E maraa oia a topa faahou mai ai i raro mai te anavai Nile i Aiphiti.’+
9 ‘I tera mahana,’ te na reira mai ra te Arii hau ê e Fatu ra o Iehova,
‘E faatopa vau i te mahana i te avatea,
E e haapoiri au i te fenua a ao noa ˈi.+
E tuu vau i te ahu oto i nia i te mau tauupu atoa e e hahuhia te mau upoo atoa.
E au ta ˈu e faatae i nia ia outou i te otoraa i te hoê tamaiti otahi,
E e riro te hopea o tera mahana ei mea mauiui mau.’
11 ‘Inaha,’ te na reira mai ra te Arii hau ê e Fatu ra o Iehova, ‘te fatata mai ra te mahana
E faatae mai ai au i te oˈe i teie fenua.
Eita te taata e hinaaro i te maa e te pape,
E hinaaro ru râ ratou e faaroo i te parau a Iehova.+
E imi haere ratou i te parau a Iehova, eita râ e itea mai ia ratou.
13 I tera mahana, e matapoirihia te mau tamahine apî* haviti,
Te mau tane apî atoa, no to ratou hinaaro i te pape.
14 Te feia e horeo ra i te hara a Samaria+ a parau ai:
“Te ora nei to oe atua, e Dana!”+
E: “Te vai ra iho â te purumu e tae atu ai i Beere-seba!”+
E hiˈa ratou, e eita ratou e tia faahou mai.’”+
9 Ite atura vau ia Iehova+ i te tia-noa-raa i nia ˈˈe i te fata, e na ô ihora oia: “A tairi i te niaraa o te mau pou,* e aueue ïa te raroraa. A tâpû i to ratou mau upoo,* e na ˈu e haapohe i te toea o ratou i te ˈoˈe. Eita e haere ia ratou ia horo aore ra ia imi i te ora.+
2 Ia heru ratou e tae roa ˈtu i te Apoo,*
E rave to ˈu rima ia ratou i reira.
E ia pauma ratou i nia i te raˈi,
E haapou vau ia ratou mai reira ˈtu.
3 Ia tapuni ratou i nia i te tupuai o Karemela,
E imi au ia ratou, e e rave au ia ratou mai reira ˈtu.+
Ia tapuni ratou mai mua mai i to ˈu aro i raro i te moana,
I reira, e faaue au i te ophi ia hohoni ia ratou.
4 Ia afai-tîtî-hia ratou i te fenua o to ratou mau enemi,
I reira, e faaue au i te ˈoˈe ia haapohe ia ratou.+
E fariu vau i to ˈu mata i nia ia ratou no te faatae atu i te ati, eiaha i te haamaitairaa.+
5 Na te Arii hau ê e Fatu ra hoi, na Iehova o te mau nuu,* e tapea i teie fenua,
A tahe atu ai te reira,+ e e oto te taata atoa e parahi ra i reira.+
E maraa teie fenua taatoa mai te anavai Nile,
A topa faahou mai ai i raro mai te anavai Nile i Aiphiti.+
6 ‘Tei patu i to ˈna eˈa paumaraa i te raˈi
E tei haamau i ta ˈna paturaa i nia ˈˈe i te fenua,
Tei titau i te mau pape o te miti
No te manii i te reira i nia i te fenua,+
O Iehova to ˈna iˈoa.’+
7 ‘E te nunaa o Iseraela, e ere anei outou no ˈu mai te mau tamaiti a te ati Kusa?’ te na reira mai ra Iehova.
‘Aita anei au i aratai mai ia Iseraela i rapae ia Aiphiti,+
8 ‘Inaha, tei nia te mata o te Arii hau ê e Fatu ra o Iehova i te faatereraa arii rave hara,
E e haamou oia i tera faatereraa i nia i teie fenua.+
Eita râ vau e haamou pauroa te huaai o Iakoba,’+ te na reira mai ra Iehova.
9 ‘Te horoa ra hoi au i te hoê faaueraa,
E e ueue au i te nunaa o Iseraela i rotopu i te mau nunaa atoa,+
Mai te hoê titia ia ueuehia,
E aita e ofai e marua ra i raro.
10 E pohe ratou i te ˈoˈe, te feia rave hara o to ˈu nunaa,
Te feia e parau ra: “Eita te ati e piri mai ia tatou, eita tatou e roohia i te reira.”’
11 ‘I tera mahana e faatia faahou mai au i te tiahapa* o Davida+ tei topa i raro,
E tataî au i te* mau vahi apoo,
E e tataî au i to ˈna mau vahi paparari.
E patu faahou vau ia ˈna mai i tahito ra,+
12 Ia fatu ratou i tei toe mai o Edoma,+
E o te mau nunaa ěê atoa i topahia i to ˈu iˈoa,’ te na reira mai ra Iehova, o te faatupu i te reira.
13 ‘Inaha,’ te na reira mai ra Iehova, ‘te fatata mai ra te mahana
E noaahia te taata arote i te taata ooti,
E te taata ueue huero, e roohia ïa e te taata taataahi vine.+
E topatapata mai te uaina momona na nia i te mau mouˈa,+
14 E faahoˈi mai au i te mau tîtî o to ˈu nunaa o Iseraela.+
E patu faahou ratou i te mau oire ano a parahi atu ai i roto.+
E tanu ratou i te vine a inu atu ai i te uaina,+
E tanu ratou i te aua maa hotu a amu atu ai i te mau hotu.’+
15 ‘E tanu vau ia ratou i to ratou fenua,
E eita ratou e iriti-tumu-faahou-hia
Mai nia mai i te fenua ta ˈu i horoa na ratou,’+ te parau mai ra Iehova to Atua.”
“E hopoia te reira,” “E amo ra i te hopoia” te auraa.
Aore ra “ohipa iino.”
Heb: “i te tapea ra i te sepeta.”
Heb: “i te tapea ra i te sepeta.”
Huri-atoa-hia “te mau tamaiti a te arii.”
Aore ra “ohipa iino.”
Heb: “haava.”
Huri-atoa-hia “te mau tamaiti a te arii.”
Aore ra “haapiiraa.”
Aore ra “ei piri taoˈa.”
Heb: “fare.”
Aore ra “feia aau itoito.”
Huri-atoa-hia “e ainu to roto?”
Aore ra “parau huna.”
Aore ra “tofa no Damaseko.”
Aore ra “faahapa.”
Aore ra “sabaota.”
Aore ra “ohipa iino.”
Huri-atoa-hia “e rave rahi fare.”
Aore ra “to outou mau fatu.”
Aore ra “a orure hau.”
Aore ra “sabaota.”
Heb: “aita i taoto aˈenei i te tane.”
Huri-atoa-hia “e riro Betela ei mea manamana.”
Aore ra “ei mea maramara.”
Aore ra “tute fenua.”
Aore ra “ohipa iino.”
Aore ra “sabaota.”
Aore ra “upaupa taura.”
Eita e ore o na faatereraa arii o Iuda e Iseraela.
Aore ra “puaatoro oni apî.”
Aore ra “upaupa taura.”
Heb: “i maˈihia no.”
Aore ra “sabaota.”
Heb: “te taeae o to ˈna metua tane.”
Aore ra “ei mea maramara.”
Heb: “i noaa ˈi ta tatou tara?”
Aore ra “te tomoraa o Hamata.”
Oia hoi mai Tenuare tae atu Fepuare.
Heb: “tia mai ai?”
Aore ra “Tatarahapa ihora ïa Iehova.”
Heb: “tia mai ai?”
Aore ra “Tatarahapa ihora ïa Iehova.”
Hiˈo i te titionare.
Heb: “a amu i ta oe faraoa.”
Heb: “fare.”
Aore ra “e i paraˈu na vau i te mau suke i nia i te mau tumu sukamino.”
Hiˈo i te tuhaa hau B14.
Hiˈo i te tuhaa hau B14.
Aore ra “te hitiraa o te mahana.”
Heb: “aita i taoto aˈenei i te tane.”
Aore ra “i te mau tapoˈi pou.”
Huri-atoa-hia “tapoˈi.”
Aore ra “Hade,” oia hoi te menema o te huitaata. Hiˈo i te titionare.
Aore ra “sabaota.”
Aore ra “fare ie,” “tamaru.”
Aore ra “to ratou.”
Heb: “E tahe.”