IOELA
1 Teie te parau ta Iehova i faaite ia Ioela* te tamaiti a Petuela:
2 “A faaroo mai i teie parau, outou te mau matahiapo,
E a fariu mai i te tariˈa, to te fenua taatoa.
Ua tupu aˈena anei te hoê ohipa mai teie i to outou tau
Aore ra i te tau o to outou mau tupuna?+
3 A faaite i te reira i ta outou mau tamaiti,
E ia faaite ta outou mau tamaiti i te reira i ta ratou mau tamaiti,
E ta ratou mau tamaiti i to muri atu uˈi.
4 Ta te vivi amu rahi i vaiiho, na te vivi pererau i amu.+
Ta te vivi pererau i vaiiho, na te vivi aita e pererau i amu.
Ta te vivi aita e pererau i vaiiho, na te vivi taehae i amu.+
5 A ara mai, e te feia taero ava,+ e a taˈi!
A auê, e te feia inu uaina,
Ua ravehia hoi te uaina momona i to outou vaha ra.+
6 Ua haere mai hoi te hoê nunaa i to ˈu fenua, hoê nunaa puai e te rahi.+
E niho+ e e taa liona to ˈna.
7 Ua tuino ratou i ta ˈu tumu vine e o te raroraa anaˈe o ta ˈu tumu suke ta ratou i vaiiho mai.
Ua vaiiho ratou i na tumu aita e paa faahou e ua faarue atu i te hiti,
Oia atoa te paa o to raua mau amaa, aita faahou.
9 Aita e tusia huero maa+ e tusia uaina+ faahou i te hiero o Iehova.
Te oto nei te mau tahuˈa, te mau tavini a Iehova.
10 Ua pau te maa i roto i te faaapu i te tuinohia, te oto nei te repo,+
Ua tuinohia hoi te mau huero maa, ua pau te uaina apî e ua pau te hinu.+
11 Te peapea nei te feia faaapu e te auê nei te feia faaapu vine
No te sitona e te kerite.
Aita faahou hoi e maa to roto i te mau faaapu.
12 Ua mǎrô te tumu vine,
Ua maemae te tumu suke.
Te tumu remuna, te tumu tamara e te tumu apara,
Te mau tumu raau atoa, ua mǎrô pauroa.+
Ua taui hoi te oaoa ei haama i rotopu i te nunaa.
E te mau tavini a to ˈu Atua, a tomo mai e a taoto e te ahu oto i nia ia outou.
Aita hoi te taata e afai faahou mai ra i te tusia huero maa+ e te tusia uaina+ i te hiero o to outou Atua.
14 A faaite* i te hoê haapaeraa maa, a titau i te tahi tairururaa taa ê.+
A titau mai i te mau matahiapo e to te fenua taatoa
I te hiero o Iehova to outou Atua,+ e a pii ia Iehova ia tauturu mai.
15 Mea riaria mau tera mahana!
Mea piri hoi te mahana o Iehova,+
E e tae mai te reira mai te hoê haamouraa no ǒ mai i te Manahope!
16 Aita anei te maa i tatarahia mai mua mai i to tatou mata?
E te oaoa rahi i te hiero o to tatou Atua?
17 Ua mǎrô te mau huero* i raro aˈe i ta ratou mau ope.
Aita e ohipa to roto i ta ratou mau fare vairaa taihaa.
Ua vavahihia te mau vairaa maa, ua maemae hoi te mau huero maa.
18 Te autâ atoa nei te mau nǎnǎ animara!
Te overe haere ra te mau nǎnǎ puaatoro ma te taa ore, aita hoi ta ratou e vahi aihere!
E te amo nei te mau nǎnǎ mamoe i te utua.
Ua ura hoi te mau vahi aihere o te mau fenua aita i faaapuhia e ua pau i te auahi.
Ua ura te mau tumu raau atoa o te fenua i te hoê ura auahi.
20 Te fariu atoa nei te mau animara oviri ia oe ra,
Ua mǎrô hoi te mau taheraa pape
E ua ura te mau vahi aihere o te mau fenua aita i faaapuhia e ua pau i te auahi.”
2 “A faaoto i te pu tara i Ziona!+
A huro i nia i to ˈu mouˈa moˈa.
Ia rûrû to te fenua taatoa,
Te piri mai ra hoi te mahana o Iehova,+ te fatata mai ra!
2 E mahana poiri e te rumaruma+ tera mahana,
E mahana ata e te rumaruma rahi,+
Mai te maramarama o te aahiata e hiti ra i nia i te mau mouˈa.
Te vai ra te tahi nunaa rahi e te puai.+
Aita te hoê nunaa mai teie i itehia aˈenei,
E eita e ite-faahou-hia te hoê mai teie
I roto i te mau uˈi atoa a muri aˈe.
3 E auahi te haapau ra i te mau mea atoa i mua ia ratou,
E e ura auahi te haapau+ ra i te mau mea atoa i muri ia ratou.
E au te fenua i mua ia ratou i te ô i Edene,+
I muri râ ia ratou, e medebara ano ïa,
E aita e mea e nehenehe e ora mai.
5 Mai te haruru o te mau pereoo tamaˈi te maniania ia ouˈa ratou na nia i te mau tupuai mouˈa,+
Mai te paapaaina o te hoê auahi puai o te haapau ra i te aihere mǎrô.
E au ratou i te hoê nunaa puai e faanaho ra ia ratou no te tamaˈi.+
6 No ratou, e hepohepo te mau nunaa.
E mǎtaˈu te itehia i nia i te mau hohoˈa mata atoa.
7 Te aro ra ratou mai te feia tamaˈi,
Te pauma ra ratou i te mau patu mai te faehau,
Te haere afaro noa ra ratou tataitahi,
Aita ratou e fariu ê ra i to ratou mau eˈa.
8 Aita ratou e turai ra te tahi i te tahi.
Te haere noa ra te tane tataitahi na to ˈna eˈa.
Ia hiˈa vetahi i te mauhaa tamaˈi,*
Eita te toea e faarue i te anairaa faehau.
9 Te horo ra ratou i roto i te oire, te horo ra ratou i nia i te aua.
Te pauma ra ratou i nia i te mau fare, te tomo ra ratou na roto i te haamaramarama mai te tahi taata eiâ.
10 I mua ia ratou, te aueue nei te fenua e te aueue nei te raˈi.
Ua haapoiri te mahana e te avaˈe,+
E ua ere te mau fetia i to ratou anaana.
11 E tuô Iehova i mua i ta ˈna nuu,+ e tiapai nuu hoi ta ˈna+
E e mana rahi hoi to tei faatupu i ta ˈna parau.
E mahana rahi hoi te mahana o Iehova e mea riaria roa.+
O vai te nehenehe e faaoromai i te reira?”+
12 “Aita râ i taere roa no te hoˈi mai ia ˈu nei ma to outou aau atoa,”+ te na reira mai ra Iehova,
“A haapae i te maa,+ a taˈi e a auê.
13 A hahae i to outou aau,+ eiaha to outou ahu,+
E a hoˈi ia Iehova ra to outou Atua,
E Atua aumihi e te aroha hamani maitai hoi oia, o te ore e riri oioi+ e o tei rahi i te here taiva ore,+
E eita oia e faatae faahou mai* i te ati.
14 Peneiaˈe e taui oia i to ˈna manaˈo a ore atu ai e faatupu i ta ˈna i opua.*+
Peneiaˈe e horoa oia i te tahi haamaitairaa na outou
A nehenehe atu ai outou e pûpû i te tahi tusia huero maa e te tahi tusia uaina ia Iehova to outou Atua.
15 A faaoto i te pu tara i Ziona!
A faaite* i te hoê haapaeraa maa, a titau i te tahi tairururaa taa ê.+
16 A haaputuputu i te nunaa, a haamoˈa i te amuiraa.+
A haaputuputu i te mau tane paari,* a haaputuputu i te mau tamarii e te mau aiû.+
Ia haere mai te tane faaipoipo e te vahine faaipoipo i rapae i to raua piha.
‘Ia aroha oe i to nunaa e Iehova e,
Eiaha e farii ia vahavahahia ta oe tuhaa tutuuhia
Ma te vaiiho ia faatere te mau nunaa ia ratou.
Eaha hoi te mau nunaa e parau ai: “Teihea to ratou Atua?”’+
19 E pahono Iehova i to ˈna nunaa:
‘E faatae atu vau i te huero maa, te uaina apî e te hinu na outou,
E e mâha maitai outou.+
Eita vau e farii faahou ia vahavahahia outou i rotopu i te mau nunaa.+
20 E faaatea vau i to apatoerau ia outou,
E haapurara vau ia ˈna i te hoê fenua ano e te mǎrô,
Ta ˈna pǔpǔ faehau no mua,* e tiahi au ia ratou i te miti i te pae hitia o te râ*
E ta ˈna pǔpǔ faehau no muri, i te miti ïa i te pae tooa o te râ.*
E haere to ˈna hauˈa ino i nia,
E haere roa to ˈna hauˈa neoneo i nia,+
E ohipa faahiahia hoi ta ˈu e rave.’
21 Eiaha e mǎtaˈu, e te fenua!
A oaoa e a popou, e ohipa faahiahia hoi ta Iehova e rave.
22 Eiaha e mǎtaˈu, e te mau animara oviri!
E ruperupe hoi te mau vahi aihere o te mau fenua aita i faaapuhia,+
E e faahotu te mau tumu raau i te maa.+
E auhune te maa i nia i te tumu suke e te tumu vine.+
23 E te mau tamaiti o Ziona, a oaoa e a popou no ta Iehova to outou Atua+ e rave!
E horoa mai hoi oia na outou te faito ûa tano i te taime tano,
E faatopa mai oia i nia ia outou i te ûa rahi,
Te ûa matamua e te ûa hopea, mai i mutaa ihora.+
24 E î te mau vahi tairiiriraa huero maa* i te huero maa tamâhia,
E e manii mai te uaina apî e te hinu+ mai roto mai i te mau taataahiraa olive e te vine.
25 E e faahoˈi atu vau i ta outou no tei amuhia i tera roaraa matahiti
E te vivi pererau, te vivi aita e pererau, te vivi taehae e te vivi amu rahi,
Ta ˈu nuu rahi ta ˈu i tono atu i ǒ outou.+
26 E tamaa e e paia maitai outou,+
E e arue outou i te iˈoa o Iehova to outou Atua,+
O tei rave i te ohipa faahiahia mau no outou,
Eita to ˈu nunaa e haama faahou.+
Eita to ˈu nunaa e haama faahou.
28 I muri aˈe i te reira, e ninii au i to ˈu varua+ i nia i te mau huru taata atoa.
E tohu ta outou mau tamarii tamaroa e ta outou mau tamahine,
E moemoeâ to outou mau ruhiruhia,
E e ite to outou mau taata apî i te orama.+
29 E i nia atoa i ta ˈu mau tavini tane e tavini vahine
E ninii au i to ˈu varua i taua mau mahana ra.
30 E faaite atu vau i te ohipa faahiahia mau* i nia i te raˈi e i nia i te fenua:
Te toto, te auahi e te pou au auahi.+
31 E riro te mahana ei poiri e te avaˈe ei toto+
Hou to Iehova mahana rahi e te mǎtaˈuhia e tae mai ai.+
32 E faaorahia te taata atoa o te tiaoro i te iˈoa o Iehova.+
Oia hoi, mai ta Iehova i parau, ei nia i te mouˈa Ziona e i Ierusalema e tia ˈi tei ora mai,+
Te feia o tei ora mai o ta Iehova e pii ra.”
3 “Inaha, i tera tau e i tera taime,
Ia faahoˈi mai au i to Iuda e to Ierusalema o tei rave-tîtî-hia,+
2 E haaputuputu atoa vau i te mau nunaa atoa
E e haapou vau ia ratou i roto i te peho o Iehosaphata.*
I reira, e haava vau ia ratou+
No ta ratou i rave i to ˈu nunaa e ta ˈu tuhaa, ia Iseraela,
Ua haapurara hoi ratou ia ratou i rotopu i te mau nunaa
E ua tufa ratou i to ˈu fenua na nia ia ratou.+
3 No te tufa i to ˈu nunaa, ua tuu ratou i te kelero.+
Ua hoo atu ratou i te tamaroa no te tarahu mai i te vahine taiata
E ua hoo atu ratou i te tamahine no maa uaina, ia inu ratou.
4 E outou, eaha ta outou ia ˈu,
E Turia, Sidona e te mau tuhaa fenua o Philisetia?
Te tahoo ra anei outou ia ˈu no te tahi mea?
Ia tahoo outou ia ˈu,
E faatae oioi atu vau i ta outou tahoo i nia i to outou upoo.+
5 Ua rave hoi outou i ta ˈu ario e ta ˈu auro,+
E ua hopoi outou i ta ˈu mau taoˈa maitai roa ˈˈe i roto i to outou mau hiero.
6 Te feia no Iuda e to Ierusalema, ua hoo atu outou ia ratou i to Heleni,+
Ia afaihia ratou i te hoê vahi atea roa i to ratou tuhaa fenua.
7 E faaara mai ïa vau ia ratou ia haere mai ratou i te vahi i hoo ai outou ia ratou,+
E e faatae atu vau i ta outou tahoo i nia i to outou upoo.
8 E hoo atu vau i ta outou mau tamarii tamaroa e tamahine i te nunaa o Iuda,+
E e hoo atu to Iuda ia ratou i te mau taata no Seba, i te hoê nunaa atea roa,
Na ˈu hoi, na Iehova, te reira i parau.
9 A faaite haere i teie parau i rotopu i te mau nunaa atoa:+
‘A faaineine no* te tamaˈi! A turai i te mau aito puai ia haere i te tamaˈi!
Ia tapiri mai te mau faehau atoa, ia nuu ratou!+
10 A tupai i ta outou mau auri arote ei ˈoˈe e ta outou mau tipi tope raau ei omore.*
Ia parau te taata paruparu: “Mea puai au.”
11 Outou te mau nunaa ati aˈe, a haere mai e tauturu mai, a haaputuputu mai!’”+
I tera vahi, e Iehova, a haapou mai i ta oe mau aito puai.
12 “Ia ara mai te mau nunaa e ia haere ratou i te peho o Iehosaphata.
I reira hoi au e parahi ai no te haava i te mau nunaa ati aˈe.+
13 A faahaere i te tahi tipi fefe, ua para hoi te maa.
A pou mai e taataahi i te maa vine, ua î hoi te taataahiraa vine,+
Ua î te mau tura,* ua rahi roa hoi te ino o tera mau nunaa.
14 E nahoa, e nahoa to roto i te peho o te faaotiraa,
Te fatata mai ra hoi te mahana o Iehova i roto i te peho o te faaotiraa.+
15 E haapoiri te mahana e te avaˈe,
E e ere te mau fetia i to ratou anaana.
16 E uuru Iehova mai Ziona mai,
Mai Ierusalema mai e tuô oia.
E aueue te raˈi e te fenua.
E riro râ Iehova ei haapuraa no to ˈna nunaa,+
Ei pare etaeta no te nunaa o Iseraela.
17 E ite outou o vau o Iehova to outou Atua, o te parahi ra i Ziona, to ˈu mouˈa moˈa.+
18 I tera mahana e tahe te uaina momona na nia i te mau mouˈa,+
E tahe te û na nia i te mau aivi,
E e tahe te pape na te mau anavai atoa o Iuda.
E tahe te hoê pape pihaa mai roto mai i te hiero o Iehova+
E e faararirari maitai te reira i te peho o te mau Tumu sitima.
19 E riro râ Aiphiti ei vahi ano,+
E e riro Edoma ei fenua ano,+
Ua hamani ino hoi ratou i te nunaa o Iuda,+
E i to ratou fenua, ua haamanii ratou i te toto o te feia hara ore.+
21 Ta ratou hara taparahiraa taata ta ˈu i faahapa na, eita vau e faahapa ˈtu.+
E o vau nei, o Iehova, e parahi au i Ziona.”+
“E Atua o Iehova” te auraa.
Heb: “aita i taoto aˈenei i te tane.”
Aore ra “tane faaipoipo.”
Heb: “a taamu i to outou tauupu.”
Aore ra “a tupaipai i to outou ouma.”
Heb: “haamoˈa.”
Huri-atoa-hia “maa suke taraˈihia.”
Aore ra “mauhaa tamaˈi mea taora.”
Aore ra “e tatarahapa oia.”
Aore ra “e e tatarahapa oia.”
Heb: “haamoˈa.”
Aore ra “te mau matahiapo.”
Heb: “To ˈna aro.”
Oia hoi te miti Pohe.
Oia hoi Mediteranea.
Hiˈo i te titionare.
Aore ra “tapao.”
“E Haava o Iehova” te auraa.
Heb: “haamoˈa i.”
Aore ra “mahae.”
Aore ra “apoo taataahiraa vine.”