DANIELA

1 I te toru o te matahiti o te faatereraa a te arii Iehoiakima+ no Iuda, haere maira te arii Nebukanesa no Babulonia i Ierusalema e haaati ihora i taua oire ra.+ 2 I muri aˈe, tuu atura Iehova i te arii Iehoiakima no Iuda i to ˈna ra rima,+ e te tahi mau taihaa o te hiero* o te Atua mau. Hopoi maira te arii Nebukanesa i te reira i te fenua o Sinara,*+ i te hiero* o to ˈna atua. Vaiiho maira oia i te mau taihaa i roto i te vairaa taoˈa a to ˈna atua.+

3 Faaue ihora te arii ia Asepenaza to ˈna tia mana raatira o te aorai ia aratai mai vetahi no roto i te ati Iseraela,* te huaai huiarii iho â râ e to te feia mana.+ 4 Ei taurearea* ratou, e te tino maitai, mea haviti, mea î i te paari, e te ite rahi e te haroˈaroˈa,+ e e nehenehe e tavini i te arii i te aorai. E haapii Asepenaza ia ratou i te reo e te papai a te Kaladaio. 5 Hau atu â, no te mau mahana atoa, ua faaue te arii ia faataahia te tahi tuhaa maa na ratou no roto i ta ˈna iho tuhaa* e ta ˈna iho uaina. E faaineinehia* ratou e toru matahiti, e i te hopea o na matahiti ra, e tavini ratou i te arii.

6 I rotopu ia ratou, no te opu o* Iuda vetahi: Daniela,*+ Hanania,* Misaela* e Azaria.*+ 7 Topa ˈtura te tia mana rahi o te aorai ia ratou i te tahi mau iˈoa:* to Daniela o Beletesazara,+ to Hanania o Sadaraka, to Misaela o Meseka e to Azaria o Abedenego.+

8 Faaoti ihora râ Daniela i roto i to ˈna aau eiaha e haaviivii ia ˈna i te mau maa* a te arii e ta ˈna uaina. Ani ihora ïa oia i te tia mana rahi o te aorai eiaha o ˈna e amu i tera mau mea o te haaviivii ia ˈna. 9 Turai atura te Atua mau i te tia mana rahi o te aorai ia hamani maitai e ia aroha ia Daniela.+ 10 Na ô maira râ te tia mana rahi o te aorai ia Daniela: “Te mǎtaˈu ra vau i to ˈu fatu te arii, o tei faataa i ta outou e amu e e inu. Eaha te tupu ia ite oia e ere outou mea oraora mai te tahi atu mau taurearea* hoê â matahiti outou? No outou e tâpûhia ˈi to ˈu upoo e te arii.” 11 Na ô atura râ Daniela i te tiai ta te tia mana rahi o te aorai i tuu no te haapao ia ˈna, ia Hanania, Misaela e Azaria: 12 “A tamata na hoê ahuru mahana: a horoa mai i te maa tupu ia amu matou e te pape ia inu. 13 I muri iho, e hiˈo oe i to matou hohoˈa e to te tahi atu mau taurearea* o te amu ra i te maa a te arii, o vai te mea oraora aˈe. I reira oe e faaoti ai eaha te rave ia au i ta oe e ite.”

14 Farii ihora ïa oia i ta ratou aniraa e tamata ihora ia ratou hoê ahuru mahana. 15 I te hoperaa na hoê ahuru mahana, mea maitai e mea oraora aˈe to ratou hohoˈa i to te tahi atu mau taurearea* o tei amu i te maa a te arii. 16 Horoa noa ˈtura ïa te tiai i te maa tupu na ratou, eiaha râ te uaina e te maa a te arii. 17 Horoa ˈtura te Atua mau na teie e maha taurearea* i te paari, te ite e te haroˈaroˈa no te mau huru papai atoa. E horoahia ˈtura na Daniela te maramarama no te taa i te mau huru orama e moemoeâ atoa.+

18 Hope aˈera te tau faataahia e te arii Nebukanesa no te afai mai ia ratou i mua ia ˈna.+ Afai maira te tia mana rahi o te aorai ia ratou i mua ia ˈna. 19 I to te arii paraparauraa ia ratou, aita hoê mai ia Daniela, Hanania, Misaela e Azaria+ i itehia mai i rotopu ia ratou paatoa. Tamau noa ˈtura ïa ratou i te tavini i te arii. 20 Ia ui te arii ia ratou no te mau tupuraa e titauhia te paari e te maramarama, no ˈna, ua tataiahuru to ratou aravihi i to te mau tahuˈa manamana e te feia taˈu+ i te mau varua ino i te fenua taatoa e faaterehia ra e ana. 21 E faaea noa ˈtura Daniela i reira e tae roa ˈtu i te matahiti matamua o te faatereraa a te arii Kuro.+

2 I te piti o te matahiti te faatereraa Nebukanesa, mea rahi ta ˈna moemoeâ, ua peapea roa oia*+ e aita ˈtura to ˈna taoto i topa. 2 Faaue ihora ïa te arii ia titauhia mai te mau tahuˈa manamana, te feia taˈu i te mau varua ino, te feia tahutahu e te mau Kaladaio* ia faatia ratou i te arii i ta ˈna mau moemoeâ. Haere maira ïa ratou e tia i mua i te arii.+ 3 Na ô maira te arii ia ratou: “Ua moemoeâhia vau, e te peapea nei au* no te mea te hinaaro ra vau e ite eaha ta ˈu i moemoeâ.” 4 Pahono atura te mau Kaladaio i te arii na roto i te reo Arama:*+ “E te arii e, ia ora oe e a muri noa ˈtu. A faatia mai i ta oe i moemoeâ, e e horoa ˈtu matou i te auraa.”

5 Parau maira te arii i te mau Kaladaio: “Teie ta ˈu i faaoti: Ia ore outou e faaite mai i te moemoeâ e to ˈna auraa, e tâpûpûhia outou e e faarirohia to outou mau fare ei vahi haumitiraa no te taata atoa.* 6 Ia faaite mai râ outou i te moemoeâ e to ˈna auraa, e haamaitai rahi au ia outou e e faahanahana vau ia outou.+ A faaite mai ïa i te moemoeâ e to ˈna auraa.”

7 Pahono atura ratou i te piti o te taime: “Ia faatia mai te arii ia matou i te moemoeâ, e faaite atu ïa matou i to ˈna auraa.”

8 Parau maira te arii: “Ua ite maitai au e te tamata ra outou i te faataime, no te mea ua ite outou eita ta ˈu faaotiraa e taui. 9 Ia ore outou e faaite mai i te moemoeâ, hoê â utua ta outou paatoa. Ua faaoti râ outou e haavare ia ˈu a tiai noa ˈtu ai ia taui te tupuraa. A faatia mai ïa i te moemoeâ, e taa ïa ia ˈu e e nehenehe ta outou e faataa mai i to ˈna auraa.”

10 Pahono atura te mau Kaladaio i te arii: “Aita e taata i te fenua nei e tia ia rave i ta te arii e faaue ra, aita hoi e arii rahi aore ra e tavana i ani aˈenei i te hoê ohipa mai teie i te hoê tahuˈa manamana, i te hoê taata taˈu i te mau varua ino aore ra i te hoê Kaladaio. 11 Mea fifi te mea ta te arii e ani ra, e aita e taata e nehenehe e rave i te reira maori râ te mau atua, o te ore e parahi ra i rotopu i te mau taata.”*

12 I te faarooraa te arii i tera parau, riri roa ihora oia e faaue ihora oia ia haapohehia te mau tane paari atoa o Babulonia.+ 13 I te faaiteraahia tera faaueraa, e a fatata roa ˈi te mau tane paari i te haapohehia, imi-atoa-hia ihora Daniela e to ˈna mau hoa no te haapohe ia ratou.

14 Ma te haapao maitai, paraparau atura Daniela ia Arioka te raatira o te mau tiai a te arii, a faaineine ai oia i te haere e haapohe i te mau tane paari o Babulonia. 15 Ani atura oia ia Arioka te faehau a te arii: “Eaha te arii i faaue ai i te hoê ohipa ino mai teie?” Faaite maira Arioka ia Daniela i tei tupu.+ 16 Haere atura ïa Daniela i mua i te arii e ani atura ia ˈna ia horoa mai maa taime ia faaite atu oia i te auraa o te moemoeâ.

17 Hoˈi ihora Daniela i to ˈna fare e faaite atura oia i to ˈna mau hoa ra ia Hanania, Misaela e Azaria eaha tei tupu. 18 Parau atura Daniela ia ratou ia pure i te Atua o te raˈi ia faaite mai i to ˈna aroha hamani maitai no nia i teie parau huna, ia ore oia e to ˈna mau hoa ia haapohehia e te mau tane paari atoa o Babulonia.

19 Faaitehia ˈtura taua parau huna ra ia Daniela na roto i te hoê orama i te po.+ Arue aˈera ïa Daniela i te Atua o te raˈi. 20 Teie ta Daniela i parau:

24 Haere maira Daniela ia Arioka ra, ta te arii i faaue no te haapohe i te mau tane paari o Babulonia,+ e parau maira oia ia ˈna: “Eiaha e haapohe i te mau tane paari o Babulonia. A afai ia ˈu i mua i te arii e e faaite au ia ˈna i te auraa o te moemoeâ.”

25 Afai oioi ihora Arioka ia Daniela i mua i te arii e na ô atura ia ˈna: “Ua itea mai ia ˈu hoê taata no roto i te mau tîtî no Iuda+ o te nehenehe e faaite i te auraa o te moemoeâ i te arii.” 26 Na ô atura te arii ia Daniela, tei piihia Beletesazara:+ “E nehenehe mau anei oe e faaite mai i ta ˈu moemoeâ e to ˈna auraa?”+ 27 Pahono maira Daniela i te arii: “Eita e haere i te mau tane paari, te feia taˈu i te mau varua ino, te mau tahuˈa manamana aore ra te feia hiˈo fetia ia faaite i te arii i te parau huna ta ˈna e ani ra.+ 28 Te vai ra râ te hoê Atua i te raˈi, o ˈna tei Faaite i te mau parau huna,+ e ua faaite oia i te arii Nebukanesa eaha te tupu i te pae hopea o te mau mahana. Teie ta oe moemoeâ e te mau orama ta oe i ite i nia i to oe roˈi:

29 “I nia i to oe roˈi, e te arii e, ua moemoeâ oe i te ohipa o te tupu a muri aˈe, e na tei Faaite i te mau parau huna i faaite ia oe eaha te tupu. 30 No ˈu nei, e ere no te mea ua hau aˈe to ˈu paari i to vetahi ê i faaitehia mai ai teie parau huna ia ˈu, ia ite râ te arii i te auraa o te moemoeâ, e ia ite oe i te mau manaˈo i roto i to aau.+

31 “Te mataitai noa ra oe, e te arii e, e ite aˈera oe i te hoê tii rahi. Tei mua noa tera tiapai tii anaana ia oe. E hohoˈa riaria mau to ˈna. 32 E auro maitai roa te upoo o taua tii ra,+ e ario to ˈna ouma e to ˈna rima,+ e veo to ˈna opu e to ˈna na huha,+ 33 e auri to ˈna avae i nia*+ e e auri anoihia i te araea to ˈna avae i raro.+ 34 A mataitai noa ˈi oe, iritihia ˈtura te hoê ofai, e ere na te rima taata. Tairi atura tera ofai i te avae auri e araea o te tii e huˈahuˈa roa ihora te avae.+ 35 I tera taime, huˈahuˈa atoa ihora te auri, te araea, te veo, te ario e te auro e riro atura te reira mai te ota huero i te vahi tairiiriraa huero maa* i te tau veavea. Pee atura te reira i te mataˈi e aita ˈtura i ite-faahou-hia. Area te ofai o tei tairi i te tii, ua riro mai ïa ei mouˈa rahi, o tei tapoˈi i te fenua taatoa.

36 “Tera ïa te moemoeâ. I teie nei, e faaite atu matou i to ˈna auraa i te arii. 37 O oe, e te arii, te arii o te mau arii, o ta te Atua o te raˈi i horoa i te faatereraa arii,+ te mana, te puai e te hanahana, 38 e te mana faatere i nia i te taata i te mau vahi atoa e parahi ai ratou, oia atoa i nia i te mau animara oviri e te mau manu o te raˈi, oe, o ta ˈna i tuu ei faatere ia ratou paatoa,+ o oe te upoo auro.+

39 “E tia mai râ te hoê faatereraa arii i muri mai ia oe,+ mea haihai aˈe râ ia oe. I muri iho, e tia faahou mai hoê faatereraa arii ê, o te toru ïa, e veo. E faatere oia i te fenua taatoa.+

40 “E te maha o te faatereraa arii, e riro ïa mai te auri i te paari.+ Mai te auri hoi e haaperehu e e faahuˈahuˈa i te mau mea atoa, oia mau, mai te auri e tuparari, e haaperehu e e tuparari oia i tera mau faatereraa atoa.+

41 “E mai te avae i raro e te mau manimani ta oe i ite, e araea* e e auri, e amaha atoa taua faatereraa arii ra. E itehia râ maa paari o te auri i roto, mai ta oe i ite i te auri anoihia i te araea.* 42 E mai te mau manimani avae e auri e e araea, e riro taua faatereraa arii ra i te puai, i te paruparu atoa râ. 43 Mai te auri i anoihia i te araea* ta oe i ite, e anoi atoa ratou* i te nunaa.* E ore râ raua e ati te tahi i te tahi, mai te auri e ore e piri i te araea.

44 “I te mau mahana o taua mau arii ra, e haamau te Atua o te raˈi i te hoê faatereraa arii+ o te ore roa e haamouhia.+ E e ore roa tera faatereraa arii e riro i te hoê nunaa ê atu.+ E faahuˈahuˈa e e haamou oia i tera mau faatereraa arii atoa,+ e o ˈna anaˈe te vai mai e a muri noa ˈtu.+ 45 E tupu te reira, ua ite hoi oe i te hoê ofai i te iritiraahia mai nia mai i te mouˈa, e ere râ na te rima taata, e ua faahuˈahuˈa te ofai i te auri, te veo, te araea, te ario e te auro.+ Ua faaite te Atua Rahi i te arii eaha te tupu a muri aˈe.+ E tupu iho â teie moemoeâ, e e nehenehe e tiaturi i to ˈna tatararaa.”

46 Tipapa ihora te arii Nebukanesa, i mua ia Daniela e faahanahana ihora ia ˈna. E faaue ihora oia ia pûpûhia te hoê ô e ia tutuihia te mea noˈanoˈa no ˈna. 47 Na ô atura te arii ia Daniela: “E Atua mau â to outou Atua no te mau atua, e Fatu no te mau arii e e Faaite i te mau parau huna oia, ua haere hoi ia oe ia faaite mai i teie parau huna.”+ 48 Tuu atura te arii ia Daniela i te hoê tiaraa teitei e horoa ˈtura e rave rahi ô maitatai na ˈna, e tuu atura oia ia ˈna ei faatere i te tuhaa fenua taatoa o te oire o Babulonia,+ e ei raatira tiaau i nia i te mau tane paari atoa o Babulonia. 49 Na nia i te aniraa a Daniela, tuu atura te arii ia Sadaraka, Meseka e Abedenego+ ei tiaau i te tuhaa fenua o te oire o Babulonia. Area o Daniela, tei te aorai a te arii ïa oia i te taviniraa.

3 Hamani ihora te arii Nebukanesa i te hoê tii auro e 60 kubiti* i te teitei e e 6 kubiti* i te aano. Faatia ˈtura oia i te reira i te peho o Dura, i te tuhaa fenua o te oire o Babulonia. 2 Titau atura te arii Nebukanesa i te mau tavana hau, tiaau, tavana, te feia aˈo, te feia haapao faufaa, te mau haava, tia mana e te mau raatira o te mau tuhaa fenua, no te avariraa i te tii ta te arii Nebukanesa i faatia.

3 Putuputu maira ïa te mau tavana hau, tiaau, tavana, te feia aˈo, te feia haapao faufaa, te mau haava, tia mana e te mau raatira o te mau tuhaa fenua, no te avariraa i te tii ta te arii Nebukanesa i faatia. E tia aˈera ratou i mua i te tii ta Nebukanesa i faatia. 4 Tuô maira te vea: “Teie te faauehia ˈtu nei ia outou, e te feia no te mau nunaa e reo atoa, 5 ia faaroo outou i te oto o te pu, te vivo, te kinura, te kinura porotoru, te upaupa taura, te sumephonia e te mau upaupa ê atoa, e tipapa e e haamori outou i te tii auro ta te arii Nebukanesa i faatia. 6 Te taata o te ore e tipapa e e haamori i te tii, e taorahia oia i roto i te umu auahi.”+ 7 Tipapa ihora ïa te taata atoa i te faarooraa ratou i te oto o te pu, te vivo, te kinura, te kinura porotoru, te upaupa taura e te mau upaupa ê atoa ra, te feia no te mau nunaa e reo ê, e haamori atura ratou i te tii auro ta te arii Nebukanesa i faatia.

8 I tera taime, haere maira vetahi o te mau Kaladaio e pari* i te ati Iuda. 9 Na ô maira ratou i te arii Nebukanesa: “E te arii e, ia ora oe e a muri noa ˈtu. 10 E te arii e, ua faaue oe i te taata atoa ia tipapa e ia haamori i te tii auro ia faaroo ratou i te oto o te pu, te vivo, te kinura, te kinura porotoru, te upaupa taura, te sumephonia e te mau upaupa ê atoa. 11 E te taata o te ore e tipapa e e haamori i te tii, e taorahia ïa i roto i te umu auahi.+ 12 Tera râ, te vai ra vetahi no roto i te ati Iuda ta oe i tuu ei tiaau i te tuhaa fenua o te oire o Babulonia, o Sadaraka, o Meseka e o Abedenego,+ aita ratou i faatura ia oe, e te arii. Aita ratou e tavini ra i to oe mau atua e aita ratou e hinaaro ra e haamori i te tii auro ta oe i faatia.”

13 Riri roa ihora Nebukanesa e faaue ihora ia afaihia mai Sadaraka, Meseka e Abedenego. Afaihia maira ïa teie nau tane i mua i te arii. 14 Na ô maira Nebukanesa ia ratou: “E parau mau anei teie, Sadaraka, Meseka e Abedenego, aita outou e tavini ra i to ˈu mau atua+ e aita outou e hinaaro ra e haamori i te tii auro ta ˈu i faatia? 15 I teie nei, ia tipapa outou ia faaroo outou i te oto o te pu, te vivo, te kinura, te kinura porotoru, te upaupa taura, te sumephonia e te mau upaupa ê atoa, e ia haamori outou i te tii ta ˈu i hamani, mea maitai! Ia ore râ outou e haamori i te reira, e taorahia outou i tera iho â taime i roto i te umu auahi. E o vai te atua e nehenehe e faaora ia outou i to ˈu nei rima?”+

16 Pahono atura Sadaraka, Meseka e Abedenego i te arii: “E Nebukanesa, aita e faufaa ia faarahi i te parau no teie ohipa. 17 Ia taorahia matou i roto i te umu auahi, e nehenehe te Atua ta matou e tavini nei e faaora ia matou i te reira e e faaora ia matou i to rima, e te arii.+ 18 E ia ore noa ˈtu oia e faaora mai, ia ite mai oe, e te arii, eita matou e tavini i to oe mau atua e eita matou e haamori i te tii auro ta oe i faatia.”+

19 Riri roa ihora Nebukanesa ia Sadaraka, Meseka e Abedenego, taui roa ˈtura to ˈna huru* i nia ia ratou, e faaue ihora oia ia faaâhuhia te umu e hitu taime hau aˈe i tei matauhia. 20 Faaue ihora oia i te tahi mau aito puai o ta ˈna nuu ia taamu ia Sadaraka, Meseka e Abedenego e ia taora ia ratou i roto i te umu auahi.

21 Taamuhia ihora ïa taua nau tane ra, tei nia noa â ia ratou to ratou pereue, te ahu na roto, te taupoo e to ratou mau ahu ê atu. E taorahia ihora ratou i roto i te umu auahi. 22 No te etaeta o te faaueraa a te arii e no te âhu rahi o te umu, pohe aˈera te mau tane o tei rave ia Sadaraka, Meseka e Abedenego, ua paapaa i te ura auahi. 23 Area na tane e toru, o Sadaraka, Meseka e o Abedenego, o tei taamuhia, ua marua ïa i roto i te umu auahi.

24 Riaria ihora te arii Nebukanesa. Tia aˈera oia e parau atura i to ˈna mau tia mana: “E ere anei e toru taata ta tatou i taamu e i taora i roto i te auahi?” Pahono maira ratou i te arii: “Oia, e te arii.” 25 Na ô atura oia: “A hiˈo na, e maha taata ta ˈu e ite ra te hahaere ra i roto i te auahi, e aita ratou i paapaa, e e au te maha o ratou i te hoê tamaiti a te mau atua.”

26 Faafatata maira Nebukanesa i te opani o te umu auahi e na ô maira: “Sadaraka, Meseka, e Abedenego, te mau tavini a te Atua Teitei Roa ˈˈe,+ a haere mai i rapae, e a haere mai i ǒ nei!” Haere maira ïa Sadaraka, Meseka e Abedenego i rapae i te auahi. 27 Ite aˈera te mau tavana hau, te mau tiaau, te mau tavana e te mau tia mana o te arii o tei putuputu mai i reira+ e aita te tino o teie nau tane i paapaa i te auahi,+ aita hoê rouru o to ratou upoo i paapaa, aita to ratou pereue i ino e aita te hauˈa auahi i mau i nia ia ratou.

28 Na ô aˈera Nebukanesa: “Ia aruehia te Atua o Sadaraka, Meseka e o Abedenego,+ o tei tono mai i ta ˈna melahi e faaora i ta ˈna mau tavini. Ua tiaturi ratou i to ratou Atua, ua patoi i te faaueraa a te arii e ua ineine i te pohe, eiaha râ i te tavini aore ra i te haamori i te tahi atu atua maori râ to ratou iho Atua.+ 29 Teie ïa ta ˈu e parau atu nei: te feia no te mau nunaa e reo ê o te faaino i te Atua o Sadaraka, Meseka e o Abedenego, e tâpûpûhia ratou e e faarirohia to ratou mau fare ei vahi haumitiraa no te taata atoa.* Aita hoi e atua ê atu e nehenehe e faaora mai taua Atua ra.”+

30 Tuu atura te arii ia Sadaraka, Meseka e Abedenego i te hoê tiaraa teitei atu â i te tuhaa fenua o te oire o Babulonia.+

4 “Te arii Nebukanesa i te feia no te mau nunaa e reo ê, o te parahi ra i te fenua nei: Te hau ia rahi! 2 Mea tia ia ˈu ia faaite i te mau tapao e te mau ohipa faahiahia mau ta te Atua Teitei Roa ˈˈe i rave no ˈu. 3 E tapao rahi mau â ta ˈna e mea faahiahia mau ta ˈna mau ohipa! Ta ˈna faatereraa arii, e faatereraa arii ïa o te vai e a muri noa ˈtu, e e vai to ˈna mana faatere i tera uˈi e tera uˈi.+

4 “O vau, o Nebukanesa, te parahi hau noa ra vau i roto i to ˈu fare, e te maitai noa ra vau i roto i to ˈu aorai. 5 Moemoeâhia ˈtura vau e mǎtaˈu ihora vau i taua moemoeâ ra. Tei nia vau i to ˈu roˈi e riaria ihora vau i te mau hohoˈa e orama ta ˈu i ite.+ 6 Faaue ihora ïa vau ia afaihia mai i mua ia ˈu te mau tane paari atoa o Babulonia, ia faaite mai ratou ia ˈu i te auraa o taua moemoeâ ra.+

7 “Haere maira ïa te mau tahuˈa manamana, te feia taˈu i te mau varua ino, te mau Kaladaio* e te feia hiˈo fetia.+ Faatia ˈtura vau ia ratou i taua moemoeâ ra, aita râ i haere ia ratou ia faaite mai i to ˈna auraa.+ 8 I te pae hopea, o Daniela tei haere mai i mua ia ˈu, tei piihia Beletesazara+ (mai te iˈoa o to ˈu atua),+ tei roto ia ˈna te varua o te mau atua moˈa.+ Faaite atura vau ia ˈna i te moemoeâ:

9 “‘E Beletesazara, te raatira o te mau tahuˈa manamana,+ ua ite maitai au e tei roto ia oe te varua o te mau atua moˈa+ e aita e parau huna aita oe i ite.+ A faataa mai na ïa i te mau orama ta ˈu i ite i roto i ta ˈu moemoeâ e a faaite mai i te auraa.

10 “‘I roto i te mau orama ta ˈu i ite i nia i to ˈu roˈi, ua ite au i te hoê tumu raau+ i ropu i te fenua nei, e mea teitei roa ino.+ 11 Ua tupu tera tumu raau e ua haere i te etaetaraa. Raea roa ˈtura ia ˈna te raˈi, e itehia ˈtura oia e tae noa ˈtu i te mau hopea o te fenua. 12 Mea nehenehe to ˈna mau rauere, mea hotu maitai to ˈna maa, e mea navai te maa i nia iho no te taatoaraa. E haere mai te mau animara i raro aˈe e imi i te marumaru, i nia i to ˈna mau amaa te mau manu o te raˈi e faaea ˈi, e e amu te mau mea ora atoa i tei hotu mai i nia i taua tumu ra.

13 “‘Te hiˈo noa ra vau i te mau orama i nia i to ˈu roˈi, ite aˈera vau i te hoê tiai, te hoê vea moˈa, i te pouraa mai te raˈi mai.+ 14 Tuô aˈera oia: “A tâpû i te tumu raau,+ a tâpû i to ˈna mau amaa, a ueue i to ˈna mau rauere e a haapurara i to ˈna mau maa! Ia horo te mau animara mai raro aˈe mai i taua tumu ra, e ia maue ê te mau manu mai nia mai i to ˈna mau amaa. 15 A vaiiho râ i te raroraa o te tumu e to ˈna mau aˈa i roto i te repo i roto i te aihere, e a tamau i te tapea auri e te tapea veo i nia iho. Ia rari te reira i te hupe o te raˈi, e ei te mau animara ra ta ˈna tuhaa, i rotopu i te mau raau rii o te fenua nei.+ 16 Ia tauihia to ˈna aau, eiaha ei aau taata faahou, ei aau animara râ, e ia mairi noa ˈtu e hitu tau.+ 17 Na te mau tiai teie faaueraa mana e faaite ra,+ na te mau vea moˈa teie parau e faaite ra, ia ite te feia e ora nei e o Tei Teitei Roa ˈˈe te Faatere i te faatereraa arii a te huitaata+ e e horoa oia i te mana faatere i te taata ta ˈna e hinaaro, i te taata haihai roa atoa.”

18 “‘Tera ta ˈu, te arii Nebukanesa, i moemoeâ. I teie nei, e Beletesazara, a faaite mai i to ˈna auraa, aita hoi e haere ra i te mau tane paari atoa o ta ˈu faatereraa arii ia faaite mai ia ˈu i to ˈna auraa.+ E haere râ ia oe, tei roto hoi ia oe te varua o te mau atua moˈa.’

19 “Huru ê ihora Daniela, tei piihia Beletesazara,+ e riaria ihora oia i to ˈna mau manaˈo.

“Na ô atura te arii: ‘E Beletesazara, eiaha oe e riaria i teie moemoeâ e to ˈna tatararaa.’

“Pahono maira Beletesazara: ‘To ˈu fatu, ia tupu teie moemoeâ i nia i te feia e hae ra ia oe, e to ˈna tatararaa, i nia i to oe mau enemi.

20 “‘Te tumu raau ta oe i ite, o tei tupu, o tei haere i te etaetaraa e raea roa ˈtura ia ˈna te raˈi, o tei itehia e ati aˈe te fenua,+ 21 te tumu raau mea nehenehe to ˈna mau rauere, mea hotu e mea navai te maa no te taatoaraa, i raro aˈe ia ˈna te mau animara e faaea ˈi e i nia i to ˈna mau amaa te mau manu o te raˈi e faaea ˈi,+ 22 tera tumu raau, o oe ïa, e te arii, no te mea ua haere oe i te rahiraa e i te etaetaraa, e to oe teitei, ua raea roa te raˈi,+ e to oe mana faatere, te hopea o te fenua.+

23 “‘E ite atura te arii i te hoê tiai, te hoê vea moˈa,+ te pou mai ra mai te raˈi mai, e tei parau: “A tâpû i te tumu raau e a faaore ia ˈna, a vaiiho noa râ i te raroraa o te tumu e to ˈna mau aˈa i roto i te repo i roto i te aihere, e a tamau i te tapea auri e te tapea veo i nia iho. Ia rari te reira i te hupe o te raˈi, e ei te mau animara ra ta ˈna tuhaa e mairi noa ˈtu e hitu tau.”+ 24 Teie te tatararaa, e te arii. Teie te mau mea e roohia ˈi to ˈu fatu te arii, ia au i te faaotiraa a Tei Teitei Roa ˈˈe: 25 E tiahihia oe mai rotopu mai i te taata nei, e ei pihai iho i te mau animara oe e parahi ai, e e amu oe i te aihere mai te mau puaatoro. E rari oe i te hupe o te raˈi,+ e e hitu tau te mairi+ e tae roa i te taime e ite ai oe e o Tei Teitei Roa ˈˈe te Faatere i te faatereraa arii a te huitaata e e horoa oia i te mana faatere i te taata ta ˈna e hinaaro.+

26 “‘No te mea râ ua parauhia ia vaiihohia te raroraa o te tumu raau e to ˈna mau aˈa,+ e faahoˈihia mai to oe mana faatere i te taime e taa ˈi ia oe e te faatere ra te Atua i te raˈi. 27 No reira, e te arii, ia farii oe i ta ˈu aˈoraa. A fariu ê i ta oe mau hara e a rave i te mea maitai, a fariu ê i ta oe mau hape e a hamani maitai i te feia veve. Peneiaˈe ïa e parahi hau â oe ma te au e te maitai.’”+

28 Roohia ˈtura te arii Nebukanesa i tera mau mea atoa.

29 Ahuru ma piti avaˈe i muri aˈe, te hahaere ra oia i nia i te tafare o te aorai o Babulonia. 30 Te na ô ra te arii: “E ere anei teie o Babulonia rahi o ta ˈu i patu ei fare arii maoti to ˈu puai e to ˈu mana, ia itehia to ˈu hanahana e to ˈu teitei?”

31 Tei roto noa â te parau i te vaha o te arii, faaroohia ihora te hoê reo no te raˈi mai: “Te parauhia ˈtu nei oe, e te arii Nebukanesa: ‘Te faaerehia ra oe i te mana faatere,+ 32 e te tiahihia ra oe mai rotopu mai i te taata nei. I pihai iho i te mau animara oe e parahi ai, e e amu oe i te aihere mai te mau puaatoro, e e hitu tau te mairi e tae roa ˈtu i te taime e ite ai oe e o Tei Teitei Roa ˈˈe te Faatere i te faatereraa arii a te huitaata e e horoa oia i te reira i te taata ta ˈna e hinaaro.’”+

33 I tera iho â taime, tupu ihora taua parau nei i nia ia Nebukanesa. Tiahihia ihora oia mai rotopu mai i te huitaata, e haamata ihora oia i te amu i te aihere mai te mau puaatoro. Ua rari to ˈna tino i te hupe o te raˈi e ua tupu to ˈna rouru mai te huruhuru aeto i te roa, e to ˈna maiuu, mai to te manu.+

34 “I te hoperaa taua tau ra,+ hiˈo aˈera vau, o Nebukanesa, i te raˈi, e hoˈi maira to ˈu maramarama. Arue ihora vau i Tei Teitei Roa ˈˈe, arue e faahanahana ihora vau i te Atua o te ora e a muri noa ˈtu, no te mea e mana faatere mure ore to ˈna e e vai noa ta ˈna faatereraa arii i tera uˈi e tera uˈi.+ 35 Aita rea faufaa to te taata atoa o te fenua nei ia faaauhia i te Atua. E rave oia mai ta ˈna e hinaaro i nia i te nuu o te raˈi e te taata atoa o te fenua nei. E aita e taata e nehenehe e tapea i ta ˈna ohipa+ aore ra e parau atu: ‘Eaha ta oe i rave?’+

36 “I tera taime, hoˈi maira to ˈu maramarama e faahoˈihia maira te hanahana o to ˈu mana faatere, to ˈu tura e to ˈu unauna.+ Imi atura to ˈu mau tia mana rahi e te huimana i ta ˈu mau aˈoraa. Hoˈi maira ia ˈu to ˈu mana faatere e ua rahi atu â to ˈu hanahana i na mua ˈtu.

37 “I teie nei, te arue, te faateitei e te faahanahana nei au, o Nebukanesa, i te Arii o te raˈi,+ e parau mau hoi ta ˈna mau ohipa atoa e mea tia to ˈna mau eˈa,+ e e nehenehe hoi ta ˈna e faahaama i te feia teoteo.”+

5 Ua faatupu te arii Belesazara+ i te hoê tamaaraa rahi no hoê tausani o to ˈna huimana, e ua inu oia i te uaina i mua ia ratou.+ 2 I roto i to ˈna taero, faaue ihora Belesazara ia afaihia mai te mau farii auro e ario ta Nebukanesa to ˈna metua tane i rave mai i roto i te hiero i Ierusalema,+ na te arii e to ˈna huimana, ta ˈna mau vahine faaipoipo tavini* e ta ˈna mau vahine faaipoipo ê atu, ia inu ratou i roto. 3 Afaihia maira te mau farii auro tei ravehia mai i roto i te nao* o te fare o te Atua i Ierusalema, i te arii ra e to ˈna huimana, ta ˈna mau vahine faaipoipo tavini e ta ˈna mau vahine faaipoipo ê atu, e inu aˈera ratou i roto. 4 Inu aˈera ratou i te uaina e arue aˈera i te mau atua auro e ario, veo, auri, raau e ofai.

5 I tera iho â taime, fa maira te hoê rima e papai ihora i nia i te pǎpai o te aorai o te arii, i mua i te vairaa mori, e te mataitai ra te arii i te rima e papai ra. 6 Horuhoru ihora te arii* e riaria ihora oia i to ˈna mau manaˈo, rûrû atura to ˈna tauupu+ e tairiiri ihora to ˈna na turi avae te tahi i te tahi.

7 Tuô aˈera te arii ia arataihia mai te feia taˈu i te mau varua ino, te mau Kaladaio* e te feia hiˈo fetia.+ Na ô atura te arii i te mau tane paari o Babulonia: “Te taata o te taio mai i teie papai e o te faaite mai i to ˈna auraa, e ahuhia oia i te ahu vareau, e tamauhia te fifi auro i nia i to ˈna arapoa+ e o ˈna te toru o te faatere i roto i te faatereraa arii.”+

8 Haere maira te mau tane paari atoa a te arii, aita râ i haere ia ratou ia taio i te papai e ia faaite i te auraa i te arii.+ 9 Mǎtaˈu roa ihora ïa te arii Belesazara e horuhoru ihora oia. Huru ê ihora to ˈna huimana.+

10 I to te arii vahine faarooraa i ta te arii e to ˈna huimana e parau ra, tomo maira oia i roto i te piha tamaaraa e na ô maira: “E te arii, ia ora oe e a muri noa ˈtu. Eiaha oe e riaria i to mau manaˈo, e eiaha oe e horuhoru. 11 Te vai ra hoê tane* i roto i ta oe faatereraa arii, tei ia ˈna ra te varua o te mau atua moˈa. I te tau o to metua tane, ua itea mai te maramarama, te haroˈaroˈa e te paari mai to te mau atua i roto ia ˈna.+ Faatoroa ˈtura te arii Nebukanesa to metua tane ia ˈna ei raatira o te mau tahuˈa manamana, te feia taˈu i te mau varua ino, te mau Kaladaio e te feia hiˈo fetia.+ Tera ta to metua tane i rave, e te arii. 12 E huru feruriraa faahiahia hoi to Daniela, o ta te arii i topa i te iˈoa o Beletesazara.+ E ite e e haroˈaroˈa to ˈna no te faaite i te auraa o te mau moemoeâ, faataa i te mau piri, e no te tatara i te auraa o te mau mea fifi.*+ A titau mai ïa ia Daniela, e faaite atu oia i te auraa o tera papai.”

13 Afaihia maira ïa Daniela i mua i te arii. Ani atura te arii ia ˈna: “O oe anei o Daniela, hoê o na tîtî ta to ˈu metua tane te arii i hopoi mai mai Iuda mai?+ 14 Ua faaroo vau e tei roto ia oe te varua o te mau atua+ e ua itea mai te maramarama, te haroˈaroˈa e te paari rahi i roto ia oe.+ 15 Ua afaihia mai i mua ia ˈu te mau tane paari e te feia taˈu i te mau varua ino no te taio i teie papai e no te faaite mai i to ˈna auraa. Aita râ i haere ia ratou ia faaite mai i te auraa o tera papai.+ 16 Ua faaroo râ vau e haere ia oe ia horoa i te auraa o te mau parau huna e ia tatara i te auraa+ o te mau mea fifi.* I teie nei, mai te peu e haere ia oe ia taio i tera papai e ia faaite mai i to ˈna auraa, e ahuhia oe i te ahu vareau, e tamauhia te fifi auro i nia i to arapoa e o oe te toru o te faatere i roto i te faatereraa arii.”+

17 Pahono maira Daniela i te arii: “A tapea i ta oe mau ô e a horoa i ta oe mau taoˈa na vetahi ê. E taio noa râ vau i tera papai i te arii e e faaite au i to ˈna auraa. 18 Teie te poroi no oe, e te arii, ua horoa te Atua Teitei Roa ˈˈe i te faatereraa arii e te mana e te hanahana e te tura+ ia Nebukanesa to metua tane. 19 No te mana ta te Atua i horoa na ˈna, ua mǎtaˈu te feia no te mau nunaa e reo ê ia ˈna.+ Tei ia ˈna noa te parau e haapohe aore ra e vaiiho i te hoê taata ia ora, tei ia ˈna noa te parau e faateitei aore ra e faahaehaa.+ 20 Tera râ, teoteo atura to ˈna aau, etaeta ihora to ˈna feruriraa e haa ˈtura oia ma te teoteo.+ I reira, faaerehia ihora oia i te terono o ta ˈna faatereraa arii, ere atoa ihora oia i to ˈna tura. 21 Tiahihia ihora oia mai rotopu mai i te huitaata, e riro atura to ˈna aau mai to te animara, e i pihai iho i te mau asini oviri oia i te parahiraa. Ua amu oia i te aihere mai te mau puaatoro, e ua rari to ˈna tino i te hupe o te raˈi e tae roa ˈtu i te taime i ite ai oia e o te Atua Teitei Roa ˈˈe te Faatere i te faatereraa arii a te huitaata e e horoa oia i te mana faatere i te taata ta ˈna e hinaaro.+

22 “O oe râ, ta ˈna tamaiti o Belesazara, aita oe i faahaehaa i to aau, noa ˈtu ua ite oe i tera mau mea atoa. 23 Ua faateitei râ oe ia oe i mua i te Fatu o te raˈi,+ e ua faaue oe ia afaihia mai ia oe ra te mau farii o to ˈna fare.+ Inu aˈera oe i te uaina i roto, oe e to oe huimana, ta oe mau vahine faaipoipo tavini e ta oe mau vahine faaipoipo ê atu, e arue aˈera outou i te mau atua ario e auro, veo, auri, raau e ofai, e atua o te ore e ite, o te ore e faaroo e o te ore e taa i te haapaoraa.+ Aita râ oe i faahanahana i te Atua tei roto i to ˈna rima to aho+ e to mau haerea atoa. 24 No reira oia i hopoi mai ai i tera rima e papai i tera parau.+ 25 Teie ïa te parau i papaihia: MENE, MENE, TEKELE e PARISINE.

26 “Teie te auraa o tera mau taˈo: MENE, ua taio te Atua i te mau mahana o ta oe faatereraa arii e ua faaore oia i te reira.+

27 “TEKELE, ua faitohia oe i nia i te faito e mea mâmâ roa oe.

28 “PERESE, ua vahihia ta oe faatereraa arii e ua horoahia i to Medai e to Peresia.”+

29 I reira, mai ta Belesazara i faaue, ahuhia ihora Daniela i te ahu vareau e tamauhia ihora te fifi auro i nia i to ˈna arapoa. E faaitehia ihora e o ˈna te riro o te toru o te faatere i roto i te faatereraa arii.+

30 I tera iho â po, haapohehia ihora Belesazara te arii Kaladaio.+ 31 E riro atura te faatereraa arii ia Dariu+ no Medai. Ua piri i te 62 matahiti to ˈna.

6 Faaoti ihora Dariu e faatoroa 120 tavana hau no te faatereraa arii taatoa.+ 2 E toru tia mana ta te arii i faatoroa no te tiaau i te ohipa a te mau tavana hau,+ no te paruru i te faufaa a te arii. O Daniela+ hoê o ratou e toru. 3 Mea hau aˈe râ Daniela i te tahi atu mau tia mana e tavana hau, e huru feruriraa faahiahia hoi to ˈna,+ e ua opua te arii e tuu ia ˈna i nia i te faatereraa arii taatoa.

4 I tera ra tau, ua imi te mau tia mana e te mau tavana hau i te tahi pariraa ia Daniela no ta ˈna huru tiaauraa i te mau ohipa a te faatereraa arii. Aita râ i itea mai ia ratou te pariraa aore ra te ohipa piˈo, e nehenehe hoi oia e tiaturihia, mea haapao maitai e aita oia i rave aˈenei i te ohipa piˈo. 5 Na ô aˈera ïa tera mau taata: “Eita e itea mai ia tatou te pariraa i teie taata o Daniela, maori râ ia imi tatou i roto i te ture a to ˈna Atua.”+

6 Haere ru maira ïa na tia mana e te mau tavana hau i mua i te arii e na ô maira ia ˈna: “E te arii Dariu, ia ora oe e a muri noa ˈtu. 7 Ua putuputu te mau tia mana, te mau tiaau, te mau tavana hau, te feia aˈo a te arii e te mau tavana, ia ravehia te hoê faaotiraa mana e ia haamanahia teie opaniraa, oia hoi i roto i te hoê roaraa 30 mahana, ia titau te hoê taata i te tahi mea i te tahi taata aore ra atua ê atu maori râ ia oe, e te arii, ia taorahia oia i roto i te apoo liona.+ 8 I teie nei, e te arii, a haamana e a tarima i teie faaotiraa,+ eiaha te reira ia tauihia, mai ta te ture a to Medai e to Peresia e titau, eita e nehenehe e faaore.”+

9 Tarima ihora ïa te arii Dariu i tera faaotiraa e tera opaniraa.

10 I to Daniela râ iteraa e ua tarimahia te faaotiraa mana, hoˈi atura oia i roto i to ˈna fare, e haamaramarama to to ˈna piha i nia i te tafare, mea matara noa i te pae o Ierusalema.+ E e toru taime i te mahana oia i te tuturiraa a pure ai e a arue ai i to ˈna Atua, mai ta ˈna i matau i te rave. 11 I tera taime, tomo maira tera mau taata i ǒ Daniela e ite maira ia ˈna te pure ra e te taparuparu ra i te hamani maitai i to ˈna Atua.

12 Haere aˈera ïa ratou e farerei i te arii e haamanaˈo atura ia ˈna i te opaniraa mana: “Aita anei oe i tarima i te hoê opaniraa e parau ra e, i roto i te hoê roaraa 30 mahana, ia titau te hoê taata i te tahi mea i te tahi taata aore ra atua ê atu maori râ ia oe, e te arii, ia taorahia oia i roto i te apoo liona?” Pahono maira te arii: “Tera iho â tei haamanahia, ia au i te ture a to Medai e to Peresia, eita e nehenehe e faaore.”+ 13 Na ô atura ïa ratou i te arii: “Aita o Daniela, hoê o te mau tîtî no Iuda,+ i haapao ia oe, e te arii, i te opaniraa atoa ta oe i tarima. Te pure ra oia e toru taime i te mahana.”+ 14 I to te arii faarooraa i tera parau, ahoaho roa ihora oia e feruri ihora oia i te hoê ravea e ora ˈi Daniela. Rohi noa ˈtura oia no te faaora ia Daniela e topa noa ˈtu te mahana. 15 I te pae hopea, haere ru maira taua mau taata ra i mua i te arii e na ô maira ia ˈna: “A haamanaˈo, e te arii, ia au i te ture a to Medai e to Peresia, eita e nehenehe e taui i te tahi faaotiraa aore ra te tahi opaniraa ta te arii i haamana.”+

16 Faaue aˈera ïa te arii ia afaihia mai Daniela e taorahia ˈtura oia i roto i te apoo o te mau liona.+ Na ô atura te arii ia Daniela: “To Atua ta oe e tamau nei i te tavini, na ˈna e faaora ia oe.” 17 Afaihia maira te hoê ofai e tuuhia ˈtura na nia iho i te auvaha o te apoo e titiro ihora te arii i te reira i to ˈna tapea rima titiro e te tapea rima titiro a to ˈna huimana, eiaha te tahi parau ia tauihia no Daniela.

18 Hoˈi atura te arii i to ˈna aorai. Aita oia i tamaa i taua po ra e aita i farii i te mea e faanavenave ia ˈna,* e aita to ˈna taoto i topa. 19 I te aahiata roa, tia aˈera te arii e haere oioi ihora i te apoo o te mau liona. 20 A faafatata ˈtu ai oia i te apoo, pii atura te arii ia Daniela ma te reo oto. Parau atura te arii: “E Daniela, te tavini a te Atua ora, to Atua ta oe e tamau noa ra i te tavini, ua haere anei ia ˈna ia faaora ia oe i te mau liona?” 21 Na ô maira Daniela i te arii: “E te arii, ia ora oe e a muri noa ˈtu. 22 Ua tono mai to ˈu Atua i ta ˈna melahi no te tapiri i te vaha o te mau liona+ e aita ˈtura vau i pepe ia ratou,+ no te mea aita ta ˈu e hapa i mua ia ˈna, aita atoa vau i rave i te tahi ohipa ino i nia ia oe, e te arii.”

23 Oaoa roa ihora te arii, e faaue ihora ia tatarahia mai Daniela i rapae i te apoo. I te matararaa mai Daniela, aita oia i pepe noa ˈˈe no te mea ua tiaturi oia i te Atua.+

24 Na nia i te faaueraa a te arii, afaihia maira te mau taata o tei pari* ia Daniela e taorahia ˈtura ratou i roto i te apoo o te mau liona, ratou, ta ratou mau tamaiti e ta ratou mau vahine faaipoipo. Aita ratou i tae i raro i te apoo, apu maira te mau liona ia ratou e faahuˈahuˈa roa aˈera i to ratou mau ivi.+

25 Papai atura te arii Dariu i te feia no te mau nunaa e reo ê e parahi ra na te fenua atoa nei:+ “Te hau ia rahi! 26 Teie ta ˈu faaueraa i te mau tuhaa fenua atoa o ta ˈu faatereraa: ia mǎtaˈu e ia faatura te taata atoa i te Atua o Daniela.+ O ˈna hoi te Atua ora e e ora oia e a muri noa ˈtu. Eita roa ta ˈna faatereraa arii e haamouhia, e mea mure ore to ˈna mana faatere.*+ 27 E paruru,+ e faaora e e faatupu oia i te tapao e te ohipa faahiahia mau i te raˈi e i te fenua,+ ua faaora hoi oia ia Daniela ia ore oia ia haapohehia e te mau liona.”

28 Maitai noa ˈtura ïa Daniela i raro aˈe i te faatereraa a Dariu+ e te faatereraa a Kuro no Peresia.+

7 I te matahiti matamua te faatereraa Belesazara+ te arii o Babulonia, moemoeâhia ˈtura Daniela e ite atura oia i te orama i nia i to ˈna roˈi.+ Papai ihora oia i taua moemoeâ+ ra e faatia pauroa ˈtura oia i te reira. 2 Teie ta Daniela i faatia:

“I roto i te mau orama ta ˈu i ite i te po, te mataitai noa ra vau e inaha, faaarepurepu ihora na mataˈi e maha no te raˈi mai i te miti rahi.+ 3 Faura maira e maha tiapai animara+ mai te miti mai, mea taa ê te tahi i te tahi.

4 “E au te matamua i te hoê liona,+ e e pererau aeto+ to ˈna. Te mataitai noa ra vau e iriti-ê-hia ihora to ˈna na pererau, amohia ihora oia i nia e faatiahia maira oia i nia e piti avae, mai te hoê taata, e e aau taata tei horoahia ˈtu ia ˈna.

5 “E inaha, te tahi atu animara, o te piti, e au ïa i te daba.+ Te tia ra oia i nia hoê pae, e e toru ivi aoao to roto i to ˈna vaha. Ua parauhia o ˈna: ‘A tia, e a amu faarahi i te iˈo.’+

6 “I muri aˈe i te reira, tamau noa ˈtura vau i te mataitai, e inaha, te tahi atu animara, e au i te hoê nemera,+ e maha râ pererau mai to te manu to nia i to ˈna tua. E maha afii+ to taua animara ra, e ua horoahia ˈtu ia ˈna te mana no te faatere.

7 “I muri aˈe i te reira, i roto i te mau orama o te po, te mataitai noa ra vau e ite atura vau i te maha o te animara, mea riaria, mea mehameha e mea puai roa ino, e e niho auri rarahi to ˈna. Ua amu e ua faahuˈahuˈa oia, e tei toe mai, ua taataahihia ïa e ana i to ˈna avae.+ Mea taa ê oia i te tahi atu mau animara na mua ˈtu ia ˈna. E hoê ahuru tara to ˈna. 8 A mataitai noa ˈi au i te mau tara, inaha, tupu ihora te hoê tara i ropu i te tahi atu mau tara, mea nainai.+ Iriti-ê-hia ihora e toru o na tara matamua i mua i teie. E inaha, e mata mai to te taata to taua tara ra, e e vaha to ˈna o te paraparau ra ma te teoteo.*+

9 “Te mataitai noa ra vau, haamauhia ihora te tahi mau terono e parahi ihora To te mau Mahana Tahito+ ra i nia i to ˈna terono.+ Mea uouo to ˈna ahu mai te hiona,+ e te rouru o to ˈna upoo, mai te huruhuru mamoe mâ ïa. E ura auahi to ˈna terono. E auahi ama to ˈna mau huira.+ 10 Te tahe noa mai ra te auahi mai mua mai ia ˈna.+ E rave rahi tausani* te tavini ra ia ˈna, e e rave rahi mirioni* te tia ra i mua ia ˈna.+ Putuputu maira te Tiripuna,+ e tatarahia ihora te tahi mau buka.

11 “Te mataitai noa ra vau no te mau parau teoteo* ta taua tara ra e parau noa ra.+ A mataitai noa ˈi au, haapohehia ˈtura taua animara ra, taorahia ihora to ˈna tino i roto i te auahi e mou atura. 12 No te toea râ o na animara ra,+ tatarahia ihora to ratou mana faatere e vaiihohia ˈtura ratou ia ora no te hoê taime.

13 “I roto i te mau orama o te po, te mataitai noa ra vau e, inaha, ite atura vau i te hoê taata e au i te tamaiti a te taata,+ i te haereraa mai e te mau ata o te raˈi. Faatiahia ˈtura oia ia haere i mua i To te mau Mahana Tahito+ ra, e arataihia ihora oia i mua roa ia ˈna. 14 E horoahia ˈtura te mana faatere ia ˈna,+ te hanahana+ e te hoê faatereraa arii, ia tavini te feia no te mau nunaa e reo ê ia ˈna.+ E mana faatere mure ore to ˈna, o te ore roa e hope e e ore roa ta ˈna faatereraa arii e haamouhia.+

15 “O vau râ, o Daniela, ahoaho ihora vau no te mea ua riaria roa vau i te mau orama ta ˈu i ite.+ 16 Faafatata ˈtura vau i te hoê melahi o te tia noa ra i reira no te ani eaha mau te auraa o teie mau mea. Pahono maira ïa oia ma te faaite mai i te auraa o teie mau mea:

17 “‘Teie na animara e maha,+ e maha ïa arii o te tia mai i te fenua nei.+ 18 E horoahia râ te faatereraa arii+ i tei moˈa o Tei Hau ê+ e e fatu ratou i te faatereraa arii+ e a muri, e a muri noa ˈtu.’

19 “Hinaaro atura vau e ite atu â no nia i te maha o te animara. Mea taa ê oia i te tahi atu mau animara. Mea mehameha roa ino oia, e niho auri to ˈna e te maiuu veo. Ua amu e ua faahuˈahuˈa oia, e tei toe mai, ua taataahihia ïa e ana i to ˈna avae.+ 20 Ua hinaaro atoa vau e ite atu â no nia i na tara hoê ahuru+ i nia i to ˈna upoo e te tahi atu tara o tei tupu mai e marua ˈtu ai e toru tara.+ E mata to tera tara e e vaha to ˈna e paraparau ra ma te teoteo.* E au ra e mea roa aˈe oia i te toea.

21 “Mataitai noa ˈtura vau a aro ai taua tara ra i tei moˈa, e te upootia ra oia i nia ia ratou,+ 22 e tae noa mai To te mau Mahana Tahito+ ra, e upootia aˈera tei moˈa o Tei Hau ê+ i te haavaraa, e tae maira te tau faataahia e riro ai te faatereraa arii+ i tei moˈa.

23 “Teie tei faataahia mai ia ˈu: ‘Te maha o te animara, o te maha ïa o te faatereraa arii o te tia mai i te fenua nei. Mea taa ê oia i te tahi atu mau faatereraa, e amu haapau oia i te fenua taatoa, e taataahi e e faahuˈahuˈa oia i te reira.+ 24 No na tara hoê ahuru, e tia mai hoê ahuru arii no roto i tera faatereraa. E e tia faahou mai hoê i muri aˈe, mea taa ê i te tahi atu mau arii matamua, e e faahaama oia e toru arii.+ 25 E tuhi oia i Tei Teitei Roa ˈˈe,+ e e tamau oia i te hamani ino i tei moˈa o Tei Hau ê. E tamata oia i te taui i te tau e te mau ture, e e tuuhia ˈtu ratou i to ˈna ra rima no te hoê tau, na tau e hoê afaraa tau.*+ 26 Haaputuputu maira râ te Tiripuna e tatarahia ˈtura te mana faatere i tera arii ra ia haamouhia oia e ia faaore-roa-hia.+

27 “‘E te faatereraa arii, te mana faatere e te hanahana o te mau faatereraa arii i raro aˈe i te raˈi taatoa, ua horoahia ïa i te pǔpǔ o tei moˈa o Tei Hau ê.+ E faatereraa arii+ mure ore ta ratou, e tavini e e auraro te mau faatereraa atoa ia ratou.’

28 “Tera te hopea o te faatiaraa. O vau nei, o Daniela, ua riaria roa vau i to ˈu mau manaˈo, horuhoru ihora ïa vau.* Ua tapea noa râ vau i teie mau mea i roto i to ˈu aau.”

8 I te toru o te matahiti o te faatereraa a te arii Belesazara,+ fa maira te hoê orama ia ˈu, ia Daniela, i muri aˈe i te orama i fa mai ia ˈu na mua noa ˈtu.+ 2 A mataitai noa ˈi au i taua orama ra, ite atura vau tei ǒ vau i Susana*+ te pare,* i te tuhaa fenua o Elama.+ I roto i taua orama ra, ite atura vau tei pihai iho vau i te taheraa pape o Ulai. 3 I te hiˈoraa vau, inaha, e mamoe oni+ te tia ra i mua i te taheraa pape, e e piti tara to ˈna.+ Mea roa na tara e piti, mea roa ˈtu â râ hoê i te tahi atu, e ua tupu mai te mea roa roa ˈˈe i muri aˈe.+ 4 Te tui noa ra te mamoe oni i te pae tooa o te râ, te pae apatoerau e te pae apatoa, aita e animara oviri i mau i mua ia ˈna, e aita i haere ia faaora ia ratou i to ˈna puai.*+ I rave noa na oia i te mea ta ˈna i hinaaro a faateitei noa ˈtu ai ia ˈna iho.

5 A mataitai noa ˈi au, inaha, haere maira te hoê puaaniho oni+ mai te pae tooa o te râ.* No te vitiviti ia haaati oia i te fenua taatoa, aita to ˈna avae i taahi i raro. E tara rahi to tera puaaniho i ropu i to ˈna mata.+ 6 Te afaro mai ra oia i nia i te mamoe oni e piti tara o ta ˈu i ite te tia noa ra i mua i te taheraa pape. Te horo mai ra oia i nia ia ˈna ma te riri rahi.

7 Ite atura vau ia ˈna i te piriraa ˈtu i te mamoe oni ma te riri rahi ia ˈna. Tairi ihora oia i te mamoe oni e ofati aˈera i to ˈna na tara e piti, e aita i haere i te mamoe oni ia aro ia ˈna. Taora ihora oia i te mamoe oni i raro i te repo e taataahi atura ia ˈna e aita i haere ia faaora ia ˈna i to ˈna puai.*

8 Faateitei roa ˈtura te puaaniho oni ia ˈna. I te puairaa mai râ oia, ofatihia ihora to ˈna tara rahi. Monohia maira ïa te reira i e maha tara rahi, mea huri i nia i na mataˈi e maha o te raˈi.+

9 Faura maira te tahi tara nainai no roto hoê o na tara e rarahi roa ˈtura oia i te pae apatoa, hitia o te râ* e i te pae o te Unauna.+ 10 Ua rahi roa mai hoi oia, naea roa ˈtura ia ˈna te nuu o te raˈi. Haamarua maira oia i raro i te fenua vetahi o taua nuu ra e te tahi mau fetia e taataahi ihora oia ia ratou. 11 Faateitei atoa ˈtura oia ia ˈna i mua i te Huiarii o te nuu, rave-ê-hia ihora te tusia tamau* i te Huiarii ra e hurihia ihora te nao* ta ˈna i haamau i raro.+ 12 E no te hara, tuuhia ˈtura te hoê nuu i taua tara ra, oia atoa te tusia tamau. Ua taora noa te tara i te parau mau i raro i te repo, ua rave oia i ta ˈna i opua e ua manuïa.

13 Faaroo atura vau hoê melahi e paraparau ra, e ui maira hoê melahi ê atu ia ˈna: “Ehia maororaa teie orama o te tusia tamau, o te hara o te faaano ra,+ e te taataahiraa o te vahi moˈa e te nuu?” 14 Na ô maira ïa oia ia ˈu: “E mairi noa ˈtu 2 300 po e poipoi. I muri iho, e haamau-faahou-hia iho â te vahi moˈa i te tiaraa e au i te reira.”

15 Te mataitai noa ra vau, o Daniela, i te orama a imi atu ai i te auraa. Ite atura vau hoê te tia noa ra i mua ia ˈu mai te taata ra te huru. 16 Faaroo atura vau i te hoê reo taata i ropu ia Ulai+ e tuô aˈera oia: “Gaberiela,+ a faataa ˈtu ia ˈna i ta ˈna i ite.”+ 17 Haere maira ïa oia i te vahi to reira vau. I te piriraa mai râ oia, riaria roa ihora vau, tipapa roa ˈtura vau. Na ô maira oia ia ˈu: “Ia ite oe, e te tamaiti a te taata, e no te anotau o te hopea te orama.”+ 18 A paraparau mai ai râ oia ia ˈu, varea ihora vau i te taoto e to ˈu hohoˈa i raro. Tapea maira ïa oia ia ˈu e faatia aˈera oia ia ˈu i te vahi to reira vau.+ 19 Na ô maira oia: “E faaite au ia oe eaha te tupu i te pae hopea o te riri, e tupu hoi te reira i te taime faataahia o te hopea.+

20 “Te mamoe oni e piti tara ta oe i ite, o na arii ïa no Medai e no Peresia.+ 21 Te puaaniho oni huruhuru, o te arii o Heleni ïa.+ E te tara rahi i ropu i to ˈna mata, o te arii matamua ïa.+ 22 Ua ofatihia taua tara ra, e e maha tei mono mai ia ˈna.+ E maha ïa faatereraa no roto i to ˈna nunaa te tia mai, eiaha râ e te hoê â mana e to ˈna.

23 “E i te pae hopea o ta ratou faatereraa, ua tae anaˈe ta ratou mau hara i te hoê faito aita â i naea aˈenei, e tia mai te hoê arii mea riaria ia hiˈo e o te taa i te mau parau fifi ia taa. 24 E puai roa mai oia, eiaha râ ma to ˈna iho puai. E faatae mai oia i te hoê haamouraa e maere roa ˈi te taata, e e manuïa te mau mea ta ˈna e rave. E haamou oia i te feia puai, oia atoa te nunaa moˈa.+ 25 Ma te maramarama, e haavare oia no te manuïa mai. E faateitei oia ia ˈna iho i roto i to ˈna aau. E i te hoê taime ati ore,* mea rahi ta ˈna e haamou. E tia atoa mai oia no te aro i te Huiarii o te mau huiarii. E ofatifatihia râ oia, e ere na te rima taata e na reira ia ˈna.

26 “Mea mau tei parauhia i roto i te orama no nia i te mau po e te mau poipoi, eiaha râ oe e faaite i teie orama, no te hoê tau atea â hoi te reira.”+

27 O vau râ, o Daniela, ua rohirohi roa vau e ua maˈihia vau tau mahana.+ I muri aˈe, tia aˈera vau e rave atura i ta ˈu ohipa na te arii.+ Ua paruparu râ vau i te ohipa ta ˈu i ite e aita i haere i te taata ia taa i taua orama ra.+

9 I te matahiti matamua o Dariu+ te tamaiti a Ahasueru, e huaai no to Medai o tei faaariihia i nia i te faatereraa a te mau Kaladaio,+ 2 i te matahiti matamua oia i te faatereraa, taa ˈtura ia ˈu, o Daniela, na roto i te mau buka,* ia au i ta Iehova i parau i te peropheta Ieremia, i te rahiraa matahiti e vai ano ai Ierusalema:+ 70 matahiti.+ 3 Fariu atura ïa vau ia Iehova ra te Atua mau, taparuparu atura vau ia ˈna na roto i te pure, ma te haapae i te maa,+ e ma te ahu oto e te rehu auahi i nia ia ˈu. 4 Pure atura vau ia Iehova to ˈu Atua, e faˈi atura vau:

“E Iehova te Atua mau, te Atua rahi ia mǎtaˈuhia o te haapao i ta ˈna faufaa e o te faaite i te here taiva ore+ i te feia e here ra ia ˈna e e haapao ra i ta ˈna mau faaueraa,+ 5 ua hara matou e ua rave i te mea ino, ua hamani ino matou e ua orure hau.+ Ua fariu ê matou i ta oe mau faaueraa e ta oe mau faaotiraa haavaraa. 6 Aita matou i faaroo i to mau tavini te mau peropheta+ o tei paraparau ma to iˈoa i to matou mau arii, huiarii, tupuna e te nunaa taatoa o te fenua. 7 Na oe, e Iehova, te parau-tia, na matou râ te haama* mai teie mahana, na te mau taata no Iuda, to Ierusalema, e to Iseraela taatoa, te feia mea fatata e to te atea ê, i te mau fenua atoa i haapurara ˈi oe ia ratou no te mea ua taiva ratou ia oe.+

8 “E Iehova, na matou te haama,* na to matou mau arii, huiarii e tupuna, no te mea ua hara matou ia oe. 9 Na oe, e Iehova to matou Atua, te aroha hamani maitai e te faaoreraa i te hara,+ ua orure hau hoi matou ia oe.+ 10 Aita matou i faaroo ia oe, e Iehova to matou Atua, ma te haapao i ta oe mau ture ta oe i horoa mai na roto i to mau tavini te mau peropheta.+ 11 Ua ofati Iseraela taatoa i ta oe Ture e ua fariu ê atu ratou ma te ore e faaroo ia oe. No reira oe i manii ai i nia ia matou te faainoraa e te horeo i papaihia i roto i te Ture a Mose te tavini a te Atua mau,+ ua hara hoi matou ia oe. 12 Ua faatupu oe i te mau parau ta oe i faaite no matou+ e to matou mau aratai o tei faatere ia matou,* ma te faatae mai i te ati rahi i nia ia matou. Aita e ati mai tei tupu i Ierusalema+ i tupu aˈenei i raro aˈe i te raˈi taatoa. 13 Mai tei papaihia i roto i te Ture a Mose, ua roohia matou i teie ati,+ aita râ matou i taparu i to hamani maitai,* e Iehova to matou Atua, ma te fariu ê i ta matou hape+ a imi atu ai i te taa i ta oe parau mau.*

14 “Tiai noa ˈtura ïa Iehova e faatae maira oia i te ati i nia ia matou, e Atua parau-tia hoi to matou Atua Iehova i te mau ohipa atoa ta ˈna e rave. Aita râ matou i faaroo ia ˈna.+

15 “E Iehova to matou Atua, Tei aratai i to nunaa i rapae i te fenua o Aiphiti ma te rima puai,+ e o tei faaite i to iˈoa e tae roa mai i teie mahana,+ ua hara matou e ua rave i te mea ino. 16 E Iehova, ia au i ta oe mau ohipa parau-tia atoa,+ ia fariu ê to oe riri e to oe riri rahi tahoo i to oire o Ierusalema, to mouˈa moˈa. No ta matou hoi mau hara e te mau hape a to matou mau tupuna i riro ai Ierusalema e to nunaa ei vahavaharaa no te taata atoa ati aˈe ia matou.+ 17 E i teie nei, e to matou Atua, a faaroo mai i te pure a to tavini e ta ˈna mau taparuparuraa, e no to oe iˈoa, e Iehova, ia anaana to aro i nia i to nao*+ e vai ano nei.+ 18 A fariu mai i to tariˈa, to ˈu Atua, e a faaroo mai! Ia araara to mata e ia ite oe i to matou ati e te oire i topahia i to iˈoa. E ere hoi no ta matou mau ohipa parau-tia e taparu ai matou ia oe, no to oe râ aroha hamani maitai rahi.+ 19 E Iehova, a faaroo mai na. E Iehova, a faaore na i te hara.+ E Iehova, a hiˈo mai na ia matou e a ohipa! No to iˈoa, eiaha e haamarirau, to ˈu Atua e, ua topahia hoi to oire e to nunaa i to iˈoa.”+

20 A paraparau noa ˈi au, a pure ai e a faˈi ai i ta ˈu hara e te hara a to ˈu nunaa o Iseraela, a taparu ai au i te hamani maitai ia Iehova to ˈu Atua no te mouˈa moˈa o to ˈu Atua,+ 21 oia, a paraparau noa ˈi au na roto i te pure, haere maira te taata ra o Gaberiela,+ o ta ˈu i ite na mua ˈtu i roto i te orama.+ Ua rohirohi roa vau. Tei te taime ïa e pûpûhia ˈi te tusia ahiahi. 22 Tauturu maira oia ia ˈu ia taa eaha te tupu ma te parau:

“E Daniela, ua haere mai au no te horoa ˈtu i te haroˈaroˈa e te maramarama ia taa ia oe teie mau ohipa atoa. 23 I te haamataraa oe i te pure, tae maira te hoê poroi ia ˈu nei no ǒ mai i te Atua e te haere mai ra vau e faaite atu ia oe, no te mea e taata faufaa rahi* oe.+ A faaroo maitai ïa i teie poroi e ia taa ia oe te orama.

24 “E 70 hebedoma* tei faataahia no to oe nunaa e to oe oire moˈa,+ no te iriti ê i te ohipa ino, tumâ i te hara,+ faaore i te hape,+ no te haamau i te parau-tia mure ore,+ no te titiro i te orama e te parau tohu,*+ e no te faatavai i te Vahi Moˈa Roa. 25 Ia ite oe e ia taa ia oe e, mai te faaiteraa o te parau e patu faahou ia Ierusalema+ e tae roa mai i te Mesia*+ te Aratai,+ e 7 ïa hebedoma, oia atoa 62 hebedoma.+ E patu-faahou-hia oia, e te hoê mahora e te hoê taheraa pape ati aˈe, tei te tau ati râ te reira e ravehia ˈi.

26 “E i muri aˈe i na 62 hebedoma, e iriti-ê-hia* te Mesia,+ aita e ohipa ta ˈna e toe mai.+

“E haamou te nuu* a te hoê aratai o te haere mai ra, i te oire e te vahi moˈa.+ E mea na roto i te pape pue e ore roa ˈi to ˈna parau. E tupu te tamaˈi e tae roa ˈtu i te hopea. Tei faaotihia, o te haamouraa ïa.+

27 “E e haapao oia ia mana noa te faufaa no te taata e rave rahi hoê hebedoma. E i te afaraa o taua hebedoma ra, e faaore oia i te mau tusia e te mau ô.+

“E e haere mai tei faaano na nia i te pererau o te mau mea faufau.+ E tae roa ˈtu i te haamouraa, e maniihia te mea i faaotihia i nia atoa i tei ano.”

10 I te toru o te matahiti te faatereraa te arii Kuro+ no Peresia, faaitehia maira te hoê parau ia Daniela, tei piihia Beletesazara.+ E parau mau taua poroi ra, e no nia i te hoê tamaˈi rahi. Taa aˈera ia ˈna te poroi e faataahia maira ia ˈna te mea ta ˈna i ite.

2 I taua mau mahana ra, e toru hebedoma taatoa vau, o Daniela, i te otoraa.+ 3 E toru hebedoma taatoa aita vau i amu i te maa maitai no te tino, aita e iˈo e aita e uaina i haere i roto i to ˈu vaha, e aita vau i parai ia ˈu i te monoˈi. 4 I te 24 o te mahana o te avaˈe matamua, tei te hoê pae au o te anavai rahi o Hidekela.+ 5 Hiˈo atura vau e ite atura i te hoê taata e ahu lino to ˈna,+ e e auro no Uphaza te haaati ra i to ˈna tauupu. 6 To ˈna tino, e au i te tarisisa,+ to ˈna hohoˈa, e au i te uira, to ˈna mata, e au i te mori auahi, to ˈna rima e to ˈna avae, e au i te veo faaanaanahia,+ e te puai o to ˈna reo, e au i te maniania o te hoê nahoa taata. 7 O vau anaˈe, o Daniela, tei ite i teie orama.+ Aita te mau taata i pihai iho ia ˈu i ite i te reira. Tera râ, hotaratara roa ihora ratou e horo aˈera ratou e tapuni.

8 Toe noa maira o vau anaˈe. I to ˈu iteraa i taua orama maere rahi ra, ere atura vau i to ˈu puai, taui roa aˈera to ˈu hohoˈa e paruparu roa ihora vau.+ 9 Faaroo atura vau i to ˈna reo. I to ˈu râ faarooraa ˈtu ia ˈna e paraparau ra, varea ihora vau i te taoto e to ˈu hohoˈa i raro.+ 10 Tapea maira râ te hoê rima ia ˈu+ e faaara maira ia ˈu ia tia mai au i nia. 11 Na ô maira oia ia ˈu:

“E Daniela, e taata faufaa rahi* oe,+ a faaroo maitai i te mau parau ta ˈu e faaite atu ia oe. I teie nei, a tia mai i nia, ua tonohia hoi au ia oe ra.”

I to ˈna parauraa mai i te reira, tia aˈera vau ma te rûrû.

12 Na ô maira oia ia ˈu: “Eiaha e mǎtaˈu,+ e Daniela. Ua faaroohia ta oe mau parau mai te mahana matamua mai â i fariu ai oe i to aau i te taaraa e i te faahaehaaraa ia oe i mua i to Atua, e no reira vau i haere mai ai.+ 13 Tera râ, patoi maira te huiarii+ o te faatereraa o Peresia ia ˈu 21 mahana. Haere maira Mihaela,*+ hoê o na huiarii rahi, e tauturu ia ˈu. Faaea noa ˈtura ïa vau i reira, i pihai iho i te mau arii o Peresia. 14 Ua haere mai au e faaite ia oe eaha te tupu no to oe nunaa i te pae hopea o te mau mahana,+ e orama hoi teie no nia i te tupu a muri aˈe.”+

15 I to ˈna parauraa mai i te reira, hiˈo atura vau i raro e mamû noa ˈtura vau. 16 Tapea maira hoê tei hohoˈa i te taata i to ˈu utu,+ hamǎmǎ ˈtura vau i to ˈu vaha e na ô atura vau i tei tia mai i mua ia ˈu: “To ˈu fatu, te rûrû nei au no tera orama e aita to ˈu e puai faahou.+ 17 E nafea ïa vau, te tavini a to ˈu fatu, e paraparau ai ia oe, to ˈu fatu?+ Ua pau hoi to ˈu puai e aita e aho faahou i roto ia ˈu.”+

18 Tapea faahou maira o ˈna o tei hohoˈa i te taata, e faaitoito maira ia ˈu.+ 19 Na ô maira oia: “Eiaha e mǎtaˈu,+ e te taata faufaa rahi.*+ Ei ia oe te hau.+ Ia puai oe, oia mau, ia puai oe.” A paraparau noa ˈi oia ia ˈu, itoito faahou atura vau e na ô atura vau: “A parau mai, e to ˈu fatu, ua faaitoito mai hoi oe ia ˈu.”

20 Na ô maira oia: “Ua ite oe eaha vau i haere mai ai e farerei ia oe? E hoˈi au e aro i te huiarii o Peresia.+ Ia reva vau, e haere mai te huiarii o Heleni. 21 Tera râ, e faaite atu vau ia oe i te mau parau i papaihia i roto i te buka o te parau mau. Aita hoê e turu mai ra ia ˈu no tera mau ohipa maori râ o Mihaela,+ to outou huiarii.+

11 “I te matahiti matamua te faatereraa Dariu+ no Medai, haere atura vau e turu e e faaitoito ia ˈna. 2 E parau mau ta ˈu e parau atu ia oe i teie nei:

“Inaha, e toru â arii o te tia mai no Peresia, e e haaputu te maha i te taoˈa, hau aˈe i te tahi atu mau arii. E ia puai mai oia i te rahi o ta ˈna mau taoˈa, e turai oia i te taata atoa ia patoi i te faatereraa arii a Heleni.+

3 “E e tia mai te hoê arii puai, e faatere oia ma te mana rahi+ a rave ai mai ta ˈna e hinaaro. 4 Ia tia mai râ oia, e tupararihia e e operehia ta ˈna faatereraa i na mataˈi e maha o te raˈi,+ eiaha râ na to ˈna mau huaai, eiaha atoa ma te mana i faatere ai oia. E iriti-tumu-hia ta ˈna faatereraa e e riro ia vetahi ê.

5 “E puai mai te arii no apatoa, oia hoi hoê o to ˈna mau taata rahi. E upootia râ hoê i nia ia ˈna e e faatere oia ma te mana rahi, rahi aˈe i to ˈna.

6 “I muri aˈe tau matahiti, e faaau raua i te faufaa, e e haere mai te tamahine a te arii no apatoa i te arii no apatoerau no te faaau i te parau. Eita râ te tamahine e tapea i te mana o to ˈna rima, e e ere te arii i to ˈna mana. E hoohia te tamahine, oia atoa te feia i aratai mai ia ˈna, e to ˈna metua tane, e te taata o tei turu ia ˈna i taua tau ra. 7 E e tia mai hoê ohi no roto mai i to ˈna mau aˈa ei mono ia ˈna,* e haere mai oia i te nuu ra e e aro oia i te pare o te arii no apatoerau, e aro oia ia ratou e e upootia mai oia. 8 E hopoi atoa oia i Aiphiti i to ratou mau atua, ta ratou mau tii faatôhia,* ta ratou mau taoˈa ario e auro* e te tahi mau tîtî. E faaea oia tau matahiti na te atea ê i te arii no apatoerau. 9 E haere mai oia* e aro i te faatereraa a te arii no apatoa. Tera râ, e hoˈi oia i to ˈna iho fenua.

10 “Area ta ˈna* mau tamaiti, e faaineine ratou no te tamaˈi e e haaputuputu mai ratou i te hoê tiapai nuu. E haere mau â oia a manii atu ai mai te tahora. E hoˈi râ oia ma te aro e tae roa ˈtu oia i to ˈna pare.

11 “E riri te arii no apatoa e e haere oia e aro ia ˈna, oia hoi i te arii no apatoerau. E e haaputuputu mai teie* i te hoê nahoa rahi. E tuuhia râ taua nahoa ra i te rima o te tahi atu.* 12 E e hopoi-ê-hia te nahoa. E teoteo mai to ˈna* aau, e e hiˈa e rave rahi tausani ia ˈna. Eita râ oia e faaohipa i to ˈna mana rahi.

13 “E hoˈi mai te arii no apatoerau e e haaputuputu mai oia i te hoê nahoa rahi aˈe i te matamua. Tau taime i muri aˈe, tau matahiti, e haere mai mau â oia e te hoê nuu rahi e te mauhaa e rave rahi. 14 I tera taime, mea rahi te tia mai e aro i te arii no apatoa.

“E tamata te feia hamani ino no roto i to nunaa i te faatupu i te orama. Eita râ ratou e manuïa.

15 “E haere mai te arii no apatoerau e faatia i te hoê aua haaati a haru atu ai i te hoê oire auahia i te patu. E eita te mau nuu a to apatoa e mau mai, to ratou atoa mau aito, e ere ratou i te puai no te patoi atu. 16 E rave tei haere mai e aro ia ˈna* mai ta ˈna e hinaaro, e eita hoê e mau i mua ia ˈna. E tia oia i te fenua o te Unauna,+ e i roto i to ˈna rima te mana no te haamou e vai ai. 17 E opua oia e haere mai e te nuu taatoa o ta ˈna faatereraa arii. E faaau oia i te tahi parau faaau i tera arii. E faatiahia oia ia faatae mai i te ati i nia i te tamahine a te mau vahine. Eita te tamahine e faaoromai e eita oia e faaea i to ˈna pae. 18 E fariu oia i to ˈna mata i te mau fenua pae miti e e haru mai oia e rave rahi. E faaore râ te hoê raatira i te haama i roohia ˈi oia, ia ore roa te reira. E e faahoˈi oia i te haama i nia ia ˈna. 19 I reira, e hoˈi oia* i te mau pare* o to ˈna iho fenua. E turori oia a hiˈa ˈtu ai, e eita oia e ite-faahou-hia.

20 “Ei mono ia ˈna, e tia mai hoê o te tono i te tahi titau tute* na taua faatereraa arii unauna ra. Tau mahana noa râ e ofatihia ˈtu ai oia, eiaha râ i roto i te riri, eiaha atoa i roto i te tamaˈi.

21 “Ei mono ia ˈna, e tia mai te tahi taata vahavahahia,* e eita te hanahana e au i te hoê arii e horoahia ˈtu. E haere mai oia i te hoê tau ati ore,* a rave atu ai i te faatereraa arii ma te haavarevare. 22 E haavî oia i te mau nuu e au i te pape pue e e taataahihia ratou, mai te Aratai+ o te faufaa.+ 23 E no te faufaa i faaauhia ia ˈna, e haavare oia, e tia mai oia a puai roa mai ai maoti te hoê nunaa iti. 24 I te hoê tau ati ore,* e haere oia i te mau vahi maitai roa ˈˈe* o te tuhaa fenua a rave atu ai i ta to ˈna mau metua tane e ta to ratou mau metua tane i ore i rave. E opere oia na roto ia ratou i te taoˈa e te mau taihaa i haruhia mai. E opua oia i te ohipa ino i te mau vahi paruru-maitai-hia, no te hoê noa râ tau.

25 “E amui oia i to ˈna itoito e to ˈna puai no te patoi i te arii no apatoa, ma te hoê nuu rahi. E e faaineine te arii no apatoa ia ˈna iho no te tamaˈi e te hoê tiapai nuu puai. E eita oia* e upootia, e opuahia hoi te ohipa ino ia ˈna. 26 E imi te feia o te amu i ta ˈna maa faahiahia ia hiˈa oia.

“Area ta ˈna nuu, e ninahia ïa, e mea rahi o te taparahi-pohe-hia.

27 “E no teie na arii e piti, e fariu to raua aau i te mea ino, e e parahi raua i te hoê amuraa maa a haavare noa ˈi te tahi i te tahi. Aita râ e ohipa e manuïa, no te taime faataahia hoi te hopea.+

28 “E e hoˈi oia* i to ˈna fenua e te taoˈa rahi. E aro oia i te faufaa moˈa. E ohipa maitai oia a hoˈi atu ai i to ˈna fenua.

29 “I te taime faataahia, e haere faahou oia e aro i to apatoa. I tera râ taime, eita te ohipa e tupu mai na mua ˈtu, 30 e haere mai hoi te mau pahi o Kitima+ e aro ia ˈna, e e faahaamahia oia.

“E hoˈi mai oia, e faaino rahi oia* i te faufaa moˈa+ a ohipa maitai atu ai. E hoˈi mai oia a haapao atu ai i tei faarue i te faufaa moˈa. 31 E tia mai te tahi mau nuu* e tonohia e ana. E haaviiviihia te nao,*+ te pare, e e iriti-ê-hia te tusia tamau.+

“E e haamauhia te mea faufau o te haamou.+

32 “E tei rave i te mea ino a ofati atu ai i te faufaa, e aratai oia ia ratou i roto i te orureraa hau na roto i te parau aminamina.* Tera râ, e upootia e e ohipa maitai te nunaa o tei ite i to ratou Atua. 33 E tauturu te feia haroˈaroˈa+ i rotopu i te nunaa i te taata e rave rahi ia taa. E hiˈa ratou tau mahana i te ˈoˈe e te auahi, i te tîtîraa e te eiâraa. 34 Ia hiˈa râ ratou, e fanaˈo ratou maa tauturu. Mea rahi te apiti atu ia ratou na roto i te parau aminamina.* 35 E e hiˈa vetahi o te feia haroˈaroˈa, ia tamâhia e ia haamaitaihia+ te nunaa e tae roa ˈtu i te anotau o te hopea, no te taime faataahia hoi te reira.

36 “E rave te arii mai ta ˈna e hinaaro, e faarahi oia ia ˈna iho a faateitei atu ai ia ˈna i nia ˈˈe i te mau atua atoa. E faaino oia i te Atua o te mau atua.+ E manuïa ta ˈna mau ohipa atoa e hope roa ˈtu te riri, ia tupu te mea i faaotihia. 37 Eita oia e faatura i te Atua o to ˈna mau metua tane, eita atoa oia e haapao i te hiaai o te mau vahine e i te tahi atu mau atua. E faateitei râ oia ia ˈna iho i nia i te taatoaraa. 38 E faahanahana râ oia i te atua o te mau pare. Te hoê atua ta to ˈna mau metua i ore i ite, e faahanahana ïa oia e te auro e te ario e te ofai maitai roa e te mau taoˈa faufaa rahi. 39 E rave oia i ta ˈna i opua i te mau pare paruru-maitai-hia ma te tiaturi i* te hoê atua ê. E faahanahana rahi oia i tei faatura ia ˈna,* e e tuu oia ia ratou ia faatere i rotopu e rave rahi. E tufa* oia i te mau tâpû fenua no te hoê tino moni.

40 “I te anotau o te hopea, e turai te arii no apatoa ia ˈna, e e haere mai te arii no apatoerau mai te hoê vero e aro ia ˈna, e te pereoo, te feia faahoro puaahorofenua e te pahi e rave rahi. E tomo oia i te mau fenua a manii mai ai mai te tahora. 41 E tomo atoa oia i te fenua o te Unauna,+ e e rave rahi fenua o te hiˈa. Teie râ te mau fenua o te ora ˈtu i to ˈna rima: o Edoma e o Moabi e te tuhaa rahi roa ˈˈe o te ati Amona. 42 E tamau oia i te aro i te mau fenua. Area o Aiphiti, eita oia e ora ˈtu. 43 E mana oia i nia i te mau taoˈa hunahia, te auro, te ario e te mau taoˈa ê atu* a Aiphiti. E apee to Libia e to Etiopia ia ˈna.

44 “E haapeapea râ oia no te tahi mau parau no hitia o te râ e no apatoerau, e e haere oia ma te riri rahi no te taparahi e no te haamou* e rave rahi. 45 E patia oia i to ˈna mau fare ie e au i te aorai i ropu i te miti rahi e te mouˈa moˈa o Unauna.+ Ei reira to ˈna hopea e tae mai ai, e eita hoê e tauturu ia ˈna.

12 “I tera tau e tia mai ai Mihaela,*+ te huiarii rahi+ o te tia ra i reira no to nunaa.* E tupu te hoê tau ahoaho o tei ore i itehia aˈenei mai te taime a tia mai ai te hoê nunaa e tae roa ˈtu i tera tau. E i te roaraa o tera tau, e ora ˈtu to nunaa,+ te taata atoa i papaihia te iˈoa i roto i te buka.+ 2 E mea rahi o te taoto ra i raro i te repo o te fenua o te ara mai, vetahi no te ora mure ore e vetahi atu no te haama e te vahavaha mure ore.

3 “E e anaana te feia haroˈaroˈa mai te anaana o te raˈi, e te feia o te aratai ra i te taata e rave rahi i te parau-tia, e anaana ïa mai te mau fetia, e a muri noa ˈtu.

4 “Area oe, e Daniela, a tapea noa i teie mau parau na oe, e a tapiri i te buka e tae roa ˈtu i te anotau o te hopea.+ Mea rahi o te imi maite i roto i te buka e e haere te ite mau i te rahiraa.”+

5 Hiˈo atura vau, o Daniela, e ite atura vau e piti â melahi o te tia ra i reira, hoê i te tahi hiti anavai e hoê i te tahi atu hiti anavai.+ 6 Na ô atura hoê i te taata e ahu lino to ˈna+ i nia ˈˈe i te anavai: “Ehia maororaa hou e hope ai teie mau tupuraa faahiahia?” 7 Faaroo atura vau i te taata e ahu lino to ˈna i nia ˈˈe i te anavai i te paraparauraa. Ma te afai i to ˈna rima atau e to ˈna rima aui i te raˈi, horeo ihora oia i Tei ora e a muri noa ˈtu:+ “Hoê tau faataahia, na tau faataahia e hoê afaraa tau* te maoro. I te otiraa iho â te puai o te nunaa moˈa i te ofatihia,+ e hope teie mau mea atoa.”

8 Ua faaroo vau, aita râ vau i taa i te auraa.+ Na ô atura ïa vau: “To ˈu fatu, eaha te tupu i te pae hopea?”

9 Na ô maira oia: “A haere, e Daniela, e hunahia hoi tera mau parau e e tapirihia e tae roa ˈtu i te anotau o te hopea.+ 10 Mea rahi te tamâhia, te haamaitaihia e te tamatahia.+ E rave te feia ino i te mea ino, e eita hoê taata ino e taa i tera mau parau. E taa râ i te feia haroˈaroˈa te auraa o te reira.+

11 “E mai te taime e tatarahia ˈi te tusia tamau+ e e haamauhia ˈi te mea faufau o te haamou,+ e mairi 1 290 mahana.

12 “E oaoa te taata o te tiai maite* e tae roa ˈtu i te hopea o na 1 335 mahana!

13 “O oe râ, ia mau papu oe e tae roa ˈtu i te hopea. E faafaaea oe e, i te hopea o te mau mahana, e tia mai oe a fanaˈo atu ai i ta oe tuhaa.”*+