EZEKIELA

1 I te 30 o te matahiti, i te pae o te mahana o te maha o te avaˈe, a parahi ai au i pihai iho i te anavai Kebara+ i rotopu i te nunaa tei hopoi-ê-hia,+ matara aˈera te raˈi e ite ihora vau i te mau orama a te Atua. 2 I te pae o te mahana o te avaˈe, oia hoi i te pae o te matahiti i hopoi-ê-hia ˈi te arii Iehoiakina,+ 3 tae maira te parau a Iehova ia ˈu, o Ezekiela* te tamaiti a Buzi te tahuˈa, i pihai iho i te anavai Kebara i te fenua o te Kaladaio.+ Tei nia maira te rima o Iehova ia ˈu+ i reira.

4 A hiˈo ai au, ite ihora vau i te tahi mataˈi vero+ e haere mai ra na apatoerau mai, e e ata rahi mau e e auahi ura*+ haaatihia e te anaana rahi, e i ropu i te auahi, te vai ra te tahi mea o te hohoˈa ra i te hesemala.*+ 5 I roto i te auahi, te vai ra te tahi mea mai e maha melahi+ te huru, e to ratou hohoˈa tataitahi, mai to te taata ïa. 6 E maha hohoˈa mata e e maha pererau to ratou tataitahi.+ 7 Mea afaro noa to ratou avae, e mai to te fanauˈa puaatoro to ratou tapuae avae, e te purapura ra te reira mai te anaana o te veo faaanaanahia.+ 8 E rima taata to ratou i raro aˈe i to ratou na pererau e maha, e e hohoˈa mata e e pererau to ratou e maha. 9 Mea tapiri to ratou na pererau te tahi i te tahi. Eita ratou e fariuriu ia haere ratou. E haere afaro noa ratou tataitahi.+

10 Mai teie te huru o to ratou mau hohoˈa mata: E hohoˈa mata taata to ratou e maha, e hohoˈa mata liona+ i te pae atau, e hohoˈa mata puaatoro oni+ i te pae aui e e hohoˈa mata+ aeto+ to ratou e maha. 11 Tera te huru o to ratou hohoˈa mata. Mea hohora to ratou na pererau i nia aˈe ia ratou. E piti pererau to ratou tataitahi mea tapiri te tahi i te tahi e e piti pererau e tapoˈi ra i to ratou tino.+

12 E haere afaro noa ratou tataitahi, a haere ai i te mau vahi atoa ta te varua o te Atua e turai ia ratou ia haere.+ Eita ratou e fariuriu ia haere ratou. 13 Mai te arahu ura te hohoˈa o te mau melahi, e te vai ra te tahi mea mai te rama auahi ura ra te huru te haere e te hoˈi mai i rotopu i te mau melahi, e te anapa ra te uira mai roto mai i te auahi.+ 14 E ia haere e ia hoˈi mai te mau melahi, mai te anaparaa uira ïa te huru.

15 A mataitai ai au i te mau melahi, ite ihora vau i nia i te fenua hoê huira i pihai iho i te melahi tataitahi e maha hohoˈa mata+ to ratou. 16 Mea anaana te mau huira e te hamaniraa o te reira mai te tarisisa, e hoê â hohoˈa to tera e maha. Te hohoˈa e te hamaniraa o te reira, mai te huru ra e huira to roto i te tahi huira.* 17 Ia tere te reira, e nehenehe te reira e haere i na eˈa e maha ma te ore e tipuu. 18 No te teitei o te mau huira, e tupu te maere rahi, e ua î na maha huira i te mata ati aˈe.+ 19 I te mau taime atoa e haere ai te mau melahi, e tere atoa te mau huira na muri ia ratou, e ia maue te mau melahi i nia aˈe i te fenua, e maue atoa te mau huira i nia.+ 20 E haere ratou i te mau vahi atoa e turai ai te varua o te Atua ia ratou ia haere, i te mau vahi atoa e haere ai te varua o te Atua. E maue atoa te mau huira e o ratou, tei roto atoa hoi i te mau huira te varua o te Atua e ohipa ra i nia i te mau melahi.* 21 Ia haere ratou, e tere atoa te reira. E ia faaea noa ratou, e faaea noa atoa te reira. E ia maue ratou i nia aˈe i te fenua, e maue atoa te mau huira i nia e o ratou, tei roto atoa hoi i te mau huira te varua o te Atua e ohipa ra i nia i te mau melahi.

22 I nia aˈe i te upoo o te mau melahi, te vai ra te tahi mea o te hohoˈa ra i te tahi tahua mea anaana mai te pape paari e mea maere rahi, o te tarava ra i nia aˈe i to ratou upoo.+ 23 I raro aˈe i te tahua, mea afaro noa* to ratou mau pererau, mea tapiri te tahi i te tahi. E piti pererau to ratou tataitahi no te tapoˈi i te tahi pae o to ratou tino, e e piti no te tapoˈi i te tahi atu pae. 24 I te faarooraa vau i te haruru o to ratou mau pererau, mai te haruru o te pape pue ïa, mai te haruru o te Manahope.+ Ia haere ratou, mai te haruru ïa o te hoê nuu. Ia faaea noa ratou, e tuu ratou i to ratou mau pererau i raro.

25 E faaroohia te tahi reo i nia aˈe i te tahua i nia aˈe i to ratou upoo. (Ia faaea noa ratou, e tuu ratou i to ratou mau pererau i raro.) 26 I nia aˈe i te tahua e vai ra i nia aˈe i to ratou upoo, te vai ra te tahi mea o te hohoˈa ra i te saphira,+ e mai te terono+ ra te huru. I nia iho i te terono i nia roa, te parahi ra te tahi mai te taata ra te hohoˈa.+ 27 E mai to ˈna tauupu e nia aˈe ia hiˈohia, ite ihora vau i te tahi mea anaana mai te hesemala+ e mai te auahi ura ra te huru.+ E mai to ˈna tauupu e raro mai, ite ihora vau i te tahi mea mai te auahi ra te huru. E anaana ati aˈe ia ˈna 28 mai to te anuanua+ i roto i te ata i te mahana ûa. Tera te hohoˈa o te anaana ati aˈe. E au i te hohoˈa o te hanahana o Iehova.+ I to ˈu iteraa i te reira, topa ihora vau te mata i raro e faaroo ihora vau i te reo o te tahi e paraparau ra.

2 Parau maira oia ia ˈu: “Tamaiti a te taata,* a tia i nia ia nehenehe au e paraparau ia oe.”+ 2 I to ˈna paraparauraa ia ˈu, haere maira te varua o te Atua i roto ia ˈu e tia aˈera vau i nia+ ia nehenehe au e faaroo i Tei paraparau mai ra ia ˈu.

3 Paraparau noa maira oia ia ˈu: “Tamaiti a te taata, te tono nei au ia oe i te nunaa o Iseraela,+ i te mau nunaa orure hau tei orure hau ia ˈu.+ Ua hara ratou e to ratou mau tupuna ia ˈu tae roa mai i teie mahana.+ 4 Te tono nei au ia oe i te mau tamarii haapaari e te aau etaeta.+ E parau oe ia ratou: ‘Teie ta te Arii hau ê e Fatu ra o Iehova e parau ra.’ 5 Area ratou, ia faaroo noa ˈtu aore ra ia ore ia faaroo, e nunaa orure hau+ hoi ratou, e ite mau â ratou e e peropheta to rotopu ia ratou.+

6 “O oe râ, tamaiti a te taata, eiaha e mǎtaˈu ia ratou+ e eiaha e mǎtaˈu i ta ratou mau parau, noa ˈtu ua haaatihia oe e te raau taratara*+ e te parahi ra oe i rotopu i te mau pata patia. Eiaha e mǎtaˈu i ta ratou mau parau+ e eiaha e riaria i to ratou hohoˈa mata,+ e nunaa orure hau hoi ratou. 7 E parau oe i ta ˈu mau parau ia ratou, ia faaroo noa ˈtu ratou aore ra ia ore ia faaroo, e nunaa orure hau+ hoi ratou.

8 “O oe râ, tamaiti a te taata, a faaroo i ta ˈu e parau atu nei ia oe. Eiaha e orure hau mai teie nunaa orure hau. A hamǎmǎ i to oe vaha e a amu i ta ˈu e horoa ˈtu nei ia oe.”+

9 I to ˈu hiˈoraa ˈtu, ite ihora vau i te tahi rima tei torohia mai ia ˈu,+ e ite ihora vau i roto i te tahi otaro*+ ua papaihia i roto. 10 I to ˈna hohoraraa i te reira i mua ia ˈu, ua papaihia i na piti pae.+ E himene oto, e autâ e e auê tei papaihia i roto.+

3 Parau maira oia ia ˈu: “Tamaiti a te taata, a amu i tei faaitehia ˈtu.* A amu i teie otaro e a haere, a paraparau i te nunaa o Iseraela.”+

2 Hamǎmǎ ˈtura vau i to ˈu vaha, e faaamu maira oia ia ˈu i taua otaro ra. 3 Parau noa maira oia ia ˈu: “Tamaiti a te taata, a amu i teie otaro ta ˈu e horoa ˈtu nei ia oe, e ia î to oe opu i te reira.” Amu ihora ïa vau i te reira, e mea monamona i roto i to ˈu vaha+ mai te meri.

4 Parau maira oia ia ˈu: “Tamaiti a te taata, a haere i te nunaa o Iseraela e a parau i ta ˈu mau parau ia ratou. 5 Aita hoi oe e tonohia ˈtu nei i te tahi nunaa e paraparau ra i te tahi reo aita oe e taa ra aore ra aita oe i ite, i te nunaa râ o Iseraela. 6 Aita oe e tonohia ˈtu nei i te nunaa e rave rahi e paraparau ra i te tahi reo aita oe e taa ra aore ra aita oe i ite, aita oe e taa ra i ta ratou mau taˈo. Ahani ia ratou i tono ai au ia oe, e faaroo ratou ia oe.+ 7 Eita râ te nunaa o Iseraela e faaroo ia oe, aita hoi ratou e hinaaro ra e faaroo ia ˈu.+ E upoo etaeta e te aau etaeta+ to te nunaa taatoa o Iseraela. 8 Inaha, ua faaetaeta vau i to oe hohoˈa mata mai to ratou hohoˈa mata e to oe rae mai to ratou rae.+ 9 Ua faariro vau i to oe rae mai te taiamani, mea paari aˈe i te ofai paari.+ Eiaha e mǎtaˈu ia ratou aore ra e riaria i to ratou hohoˈa mata,+ e nunaa orure hau hoi ratou.”

10 Parau noa maira oia ia ˈu: “Tamaiti a te taata, a faaroo e a feruri maite i ta ˈu mau parau atoa ta ˈu e parau ia oe. 11 A haere i te feia o* to oe nunaa tei hopoi-ê-hia+ e a paraparau ia ratou. A parau atu: ‘Teie ta te Arii hau ê e Fatu ra o Iehova e parau ra,’ ia faaroo noa ˈtu ratou aore ra ia ore ia faaroo.”+

12 Hopoi atura te tahi puai ia ˈu+ e faaroo ihora vau i muri ia ˈu i te tahi haruru puai e parau ra: “Ia aruehia te hanahana o Iehova mai to ˈna vahi mai.” 13 Faaroo ihora vau i te maniania o te pererau o te mau melahi e totete ra,+ te haruru o te mau huira i pihai iho ia ratou,+ e te tahi haruru puai. 14 Rave maira e hopoi atura te puai ia ˈu, e haere ihora vau ma te inoino e te riri rahi, e uˈana maira te rima o Iehova i nia ia ˈu. 15 Haere atura ïa vau i te nunaa tei hopoi-ê-hia i Teli-abiba, o te parahi ra i pihai iho i te anavai Kebara,+ e faaea ihora vau i reira ia ratou ra.+ Faaea ihora vau i rotopu ia ratou e hitu mahana ma te maere.

16 I te hoperaa e hitu mahana, tae maira te parau a Iehova ia ˈu:

17 “Tamaiti a te taata, ua faatoroa vau ia oe ei tiai* no te nunaa o Iseraela.+ E ia faaroo oe i te tahi parau no roto i to ˈu vaha, e faaara oe ia ratou no ˈu.+ 18 Ia parau vau i te taata ino: ‘E pohe mau â oe,’ eita râ oe e faaara ia ˈna, e eita oe e paraparau ia ˈna no te faaara i te taata ino ia fariu ê i to ˈna haerea ino ia ora mai oia,+ e pohe oia no ta ˈna hape no te mea e taata ino oia,+ e titau râ vau ia oe i to ˈna toto.*+ 19 Ia faaara râ oe i te taata ino e eita oia e fariu ê i to ˈna ino e to ˈna haerea ino, e pohe oia no ta ˈna hape, tera râ ua ora oe ia oe iho.+ 20 Ia faarue râ te tahi taata parau-tia i to ˈna haerea parau-tia a rave atu ai i te ino,* e tuu vau i te ofai turoriraa i mua ia ˈna e e pohe oia.+ Ia ore oe ia faaara ia ˈna, e pohe oia no ta ˈna hara e eita ta ˈna mau ohipa parau-tia e haamanaˈohia, e titau râ vau ia oe i to ˈna toto.*+ 21 Mai te peu râ ua faaara oe i te taata parau-tia eiaha e hara, e eita oia e hara, e ora noa iho â oia no te mea ua faaarahia oia,+ e ua ora oe ia oe iho.”

22 Tei nia maira ia ˈu te rima o Iehova i reira, e parau maira oia ia ˈu: “A tia i nia, a haere i te peho, e e paraparau vau ia oe i reira.” 23 Tia aˈera ïa vau i nia e haere atura i te peho, e inaha, to reira te hanahana o Iehova,+ mai te hanahana ta ˈu i ite i pihai iho i te anavai Kebara,+ e topa ihora vau te mata i raro. 24 Ô maira te varua o te Atua i roto ia ˈu, faatia aˈera ia ˈu i nia,+ e paraparau maira te Atua ia ˈu:

“A haere, a faaea i to oe fare. 25 Tamaiti a te taata, e tuu ratou i te taura i nia iho ia oe e e taamu ratou ia oe i te reira ia ore oe e nehenehe e haere i rapae i rotopu ia ratou. 26 E e tapiri au i to oe arero i te aroaro o to oe vaha, e e vava roa oe, eita ta oe e nehenehe e faahapa ia ratou, no te mea e nunaa orure hau ratou. 27 Ia paraparau râ vau ia oe, e tatara vau i to oe vaha, e e parau oe ia ratou:+ ‘Teie ta te Arii hau ê e Fatu ra o Iehova e parau ra.’ Ia faaroo te taata e faaroo ra,+ e te taata eita e hinaaro e faaroo, eiaha ïa e faaroo, no te mea e nunaa orure hau ratou.+

4 “Area oe, tamaiti a te taata, a rave i te tahi ofai araea e a tuu atu i mua ia oe. A nanaˈo i nia iho i te hohoˈa o te tahi oire, to Ierusalema. 2 A haaati i te reira,+ a faatia i te patu ati aˈe no te aro atu,+ a hamani i te puu repo no te aro atu,+ a haamau i te puhapa no te aro atu, e a haaati i te reira i te mau mauhaa otuˈi.+ 3 A rave i te farai pani auri e a tuu i te reira ei pǎpai auri i ropu ia oe e te oire. E a tiatonu atu i te reira, e e haaatihia te oire. Na oe e haaati i te reira. E tapao teie no te nunaa o Iseraela.+

4 “E tarava oe i to oe aoao aui e e tuu oe i te hapa a te nunaa o Iseraela i nia ia oe.*+ E amo oe i ta ratou hapa i te rahiraa mahana e tarava ˈi oe i to oe aoao. 5 E titau vau ia oe ia na reira e 390 mahana, ia au i te mau matahiti a hapa noa ˈi ratou,+ e e amo oe i te hapa a te nunaa o Iseraela. 6 E ia hope roa ia oe te reira.

“E e tarava â oe no te piti o te taime, i to oe aoao atau, e e amo oe i te hapa a te nunaa o Iuda+ e 40 mahana. Hoê mahana no hoê matahiti, hoê mahana no hoê matahiti, o ta ˈu ïa i titau ia oe. 7 E e tiatonu oe ia Ierusalema tei haaatihia+ ma to rima ahu ovirivirihia, e e tohu oe i to ˈna mau ati.

8 “Inaha, e taamu vau ia oe i te taura ia ore oe ia nehenehe e huri i te tahi atu pae e hope noa ˈtu ia oe te mau mahana e haaati ai oe i te oire.

9 “E rave oe i te sitona, te kerite, te pǐpǐ rarahi, te maa pǐpǐ, te mileto e te sitona oviri, e tuu oe i te reira i roto i te tahi farii e e hamani oe i te faraoa na oe i te reira. Te rahiraa mahana hoi e tarava ˈi oe i to oe aoao, e 390 mahana, e amu oe i te reira.+ 10 E faito e e amu oe e 20 sekela* maa i te mahana hoê. E amu oe i te reira i te mau taime faataahia.

11 “E e faito oe i te pape ta oe e inu, hoê tuhaa i nia e ono hina.* E inu oe i te reira i te mau taime faataahia.

12 “E amu oe i te reira mai ta oe e amu i te faraoa kerite menemene. E tunu oe i te reira i mua i to ratou mata, ma te faaohipa i te tutae taata mǎrô ei vahie.” 13 Paraparau noa maira Iehova: “Mai tera te ati Iseraela e amu ai i ta ratou faraoa, mea viivii, i rotopu i te mau nunaa e haapurara ˈi au ia ratou.”+

14 Parau atura vau: “Eiaha tera, Arii hau ê e Fatu ra e Iehova! Mai to ˈu apîraa mai â, aita vau i haaviivii ia ˈu ma te amu i te iˈo o te animara tei pohe ê na aore ra tei hahaehia,+ e aita e iˈo animara viivii* i tae i roto i to ˈu vaha.”+

15 Parau maira ïa oia ia ˈu: “Na reira, e faatia vau ia oe ia rave i te tutae puaatoro eiaha râ te tutae taata, e e tunu oe i ta oe faraoa i nia iho.” 16 Parau maira ïa oia ia ˈu: “Tamaiti a te taata, teie au e faaere nei i te maa* i Ierusalema,+ e ma te hepohepo rahi e amu ai ratou i ta ratou tuhaa faraoa faitohia,+ e ma te haafaufau e inu ai ratou i ta ratou tuhaa pape faitohia.+ 17 E tupu te reira ia hiˈo ratou te tahi i te tahi ma te maere rahi i te ereraa i te faraoa e te pape e ia paruparu roa no ta ratou hape.

5 “Area oe, tamaiti a te taata, a rave i te tahi ˈoˈe oi na oe ei reta a te taata hahu. A hahu i to oe upoo e to oe taa, e a rave mai i te tahi faito no te faito e te tufa i te rouru e te huruhuru taa. 2 E tanina oe hoê tuhaa i roto i te oire ia hope te mau mahana haaatiraa.+ I muri iho, e rave oe i te tahi atu tuhaa e e tairi oe i te reira i te ˈoˈe ati aˈe te oire,*+ e te toru o te tuhaa, e ueue oe i te mataˈi, e e rave au i te tahi ˈoˈe no te aˈuaˈu i te reira.+

3 “E rave atoa oe maa vahi o te reira e e puohu oe i roto i te mau opiraa* o to oe ahu. 4 E rave mai â oe maa vahi o te reira e e taora ˈtu oe i roto i te auahi e ia pau roa. E parare tera auahi i rotopu i te nunaa taatoa o Iseraela.+

5 “Teie ta te Arii hau ê e Fatu ra o Iehova e parau ra: ‘O Ierusalema teie. Ua tuu vau ia ˈna i ropu i te mau nunaa, e fenua anaˈe ati aˈe ia ˈna. 6 Ua orure hau râ oia i ta ˈu mau faaotiraa haavaraa e faatureraa, mea ino aˈe ta ˈna mau ohipa i ta te mau nunaa e fenua ati aˈe ia ˈna.+ Ua faarue hoi ratou i ta ˈu mau faaotiraa haavaraa, e aita ratou i pee i ta ˈu mau faatureraa.’

7 “No reira, teie ta te Arii hau ê e Fatu ra o Iehova e parau ra: ‘No te mea e mea ino aˈe outou i te mau nunaa ati aˈe ia outou e aita outou i pee i ta ˈu mau faatureraa aore ra i haapao i ta ˈu mau faaotiraa haavaraa, ua pee râ outou i te mau faaotiraa haavaraa a te mau nunaa ati aˈe ia outou,+ 8 teie ïa ta te Arii hau ê e Fatu ra o Iehova e parau ra: “Teie au e aro nei ia oe, oire o Ierusalema,+ e na ˈu iho e faautua ia oe i mua i te mata o te mau nunaa.+ 9 E rave au ia oe i ta ˈu i ore i rave aˈenei na mua ˈˈe, e te huru raveraa eita vau e rave faahou, no ta outou mau peu hairiiri atoa.+

10 “‘“E amu ïa te mau metua i ǒ oe i ta ratou mau tamarii+ e te mau tamarii i to ratou mau metua. E faautua vau ia oe e e haapurara vau pauroa tei toe i ǒ oe na te mau vahi* atoa.”’+

11 “‘No reira te horeo nei au i to ˈu nei ora,’ te parau ra te Arii hau ê e Fatu ra o Iehova, ‘no te mea o ta ˈu nao* ta oe i haaviivii i ta oe mau idolo faufau atoa e ta oe mau peu hairiiri atoa,+ e faarue* atoa vau ia oe. Eita to ˈu mata e aroha ˈtu, e eita vau e faaite i te aumihi.+ 12 Hoê tuhaa i ǒ oe te pohe i te maˈi pee* aore ra te mou i te oˈe. E pohe te tahi atu tuhaa ati aˈe ia oe i te ˈoˈe.+ E e haapurara vau i te tuhaa hopea na te mau vahi* atoa, e e rave au i te tahi ˈoˈe no te aˈuaˈu ia ratou.+ 13 I reira e ore ai to ˈu riri, e pee to ˈu riri rahi tahoo ia ratou e e mauruuru vau.+ E e ite mau â ratou e ua paraparau vau, o Iehova, no to ˈu titauraa e o vau anaˈe te haamorihia,+ ua oti anaˈe au i te faatae i to ˈu riri rahi tahoo i nia ia ratou.

14 “‘E faariro vau ia oe ei vahi ano e ei faahaparaa i rotopu i te mau nunaa ati aˈe e i te mata o te taata atoa e na reira i te haere.+ 15 E riro oe ei faahaparaa e ei vahavaharaa,+ ei faaararaa e ei mea faufau na te mau nunaa ati aˈe ia oe, ua faautua anaˈe au ia oe ma te iria e ma te riri rahi tahoo e ma te utua ino mau. Tera ïa ta ˈu, o Iehova, i parau.

16 “‘E faatae au i te mau teˈa haapohe o te oˈe i nia ia outou no te haamou ia outou. E mou outou i te mau teˈa ta ˈu e faatae atu.+ E faauˈana vau i te oˈe no outou ma te faaere roa ia outou i te maa.*+ 17 E faatae au i nia ia outou i te oˈe e te mau animara taehae,+ e e faaere ratou ia outou i ta outou mau tamarii. E roohia outou i te maˈi pee e te faataheraa toto, e e faatae au i te ˈoˈe no te tairi ia outou.+ Tera ïa ta ˈu, o Iehova, i parau.’”

6 Tae faahou maira te parau a Iehova ia ˈu e na ô ra: 2 “Tamaiti a te taata, a fariu i te mau mouˈa o Iseraela e a tohu atu i te mau ati ta ratou e faaruru. 3 E parau oe: ‘E te mau mouˈa o Iseraela, a faaroo i te parau a te Arii hau ê e Fatu ra o Iehova: Teie ta te Arii hau ê e Fatu ra o Iehova e parau ra i te mau mouˈa, te mau aivi, te mau taheraa pape e te mau peho: “Inaha, e faatae au i te ˈoˈe no te aro ia outou, e e haamou vau i to outou mau vahi teitei. 4 E vavahihia ta outou mau fata, e tupararihia ta outou mau fata mea noˈanoˈa,+ e e taora vau i to outou mau taata tei haapohehia i mua i ta outou mau idolo faufau.*+ 5 E taora vau i te mau tino pohe o te nunaa o Iseraela i mua i ta ratou mau idolo faufau e e haapurara vau i to outou mau ivi ati aˈe ta outou mau fata.+ 6 I te mau vahi atoa ta outou e faaea ra, e mou te mau oire,+ e vavahihia e e vai ano noa te mau vahi teitei.+ E vavahihia e e haapurarahia ta outou mau fata i raro, e vavahihia ta outou mau idolo faufau, e hurihia ta outou mau fata mea noˈanoˈa i raro e e faaorehia te mau ohipa ta outou i hamani. 7 E e topa te feia tei haapohehia i rotopu ia outou,+ e e ite outou e o vau o Iehova.+

8 “‘“E vaiiho râ vau i te tahi toea, e ora ˈtu hoi vetahi o outou i te ˈoˈe i rotopu i te mau nunaa ia haapurarahia outou na te mau fenua.+ 9 E te feia tei ora ˈtu, e haamanaˈo ratou ia ˈu i rotopu i te mau nunaa e hopoi-tîtî-hia ˈi ratou.+ E taa ïa ia ratou e ua mauiui roa to ˈu aau i te taivaraa to ratou aau tei fariu ê ia ˈu+ e i te purapuraraa to ratou mata no* ta ratou mau idolo faufau.+ E haama e e haafaufau ratou i te ino e te mau mea hairiiri atoa ta ratou i rave.+ 10 E ite ratou e o vau o Iehova e te mau ati ta ˈu i faaite ia ratou, e ere mea parau hanoa no te faariaria.”’+

11 “Teie ta te Arii hau ê e Fatu ra o Iehova e parau ra: ‘A paipai i to oe rima, a haamaniania ma te taataahi e to oe avae e a oto no te ino e te mau mea faufau atoa ravehia e te nunaa o Iseraela, e pohe hoi ratou i te ˈoˈe, te oˈe e te maˈi pee.+ 12 E pohe to te atea i te maˈi pee, e e pohe to pihai iho i te ˈoˈe, e pauroa tei ora ˈtu i te reira e te toe ra, e pohe ïa i te oˈe. E e hue pauroa vau i to ˈu riri rahi tahoo ia ratou.+ 13 E ite ïa outou e o vau o Iehova,+ ua tarava anaˈe to ratou feia haapohehia i rotopu i ta ratou mau idolo faufau, ati aˈe ta ratou mau fata,+ i nia i te mau aivi atoa, i nia i te mau tupuai mouˈa atoa, i raro aˈe i te mau tumu raau ruperupe atoa, e i raro aˈe i te mau amaa tumu raau rahi i reira to ratou pûpûraa i te mau tusia noˈanoˈa* no te tamǎrû i ta ratou mau idolo faufau.+ 14 E toro vau i to ˈu rima no te tairi ia ratou e e faaano vau i te fenua. E ano to ratou mau faaearaa atoa hau aˈe i te medebara i pihai iho ia Dibilata. E ite ïa ratou e o vau o Iehova.’”

7 Tae faahou maira te parau a Iehova ia ˈu e na ô ra: 2 “Area oe, tamaiti a te taata, teie ta te Arii hau ê e Fatu ra o Iehova e parau ra i te fenua o Iseraela: ‘E hopea! O te hopea tei tae mai i nia i na poro e maha o te fenua. 3 Tei nia ia oe te hopea i teie nei. E hue au i to ˈu riri i nia ia oe, e haava vau ia oe ia au i to oe mau haerea e e faautua vau ia oe no ta oe mau ohipa hairiiri atoa. 4 Eita to ˈu mata e aroha ia oe. Eita atoa vau e faaite i te aumihi,+ e faatae hoi au i nia ia oe i te mau faahopearaa o to oe iho mau haerea, e e faaruru oe i te mau faahopearaa o ta oe mau ohipa hairiiri.+ E e ite oe o vau o Iehova.’+

5 “Teie ta te Arii hau ê e Fatu ra o Iehova e parau ra: ‘Inaha, e ati, e ati aita i itehia aˈenei te tae mai ra.+ 6 E hopea te tae mai ra. E tae mai te hopea. Na te roo-noa-hia oe i te reira.* Inaha, te tae mai ra te reira. 7 O oe te parahi ra i te fenua, ua tae mai to oe hopea. Te piri mai ra te taime, ua fatata te mahana.+ E maere rahi e e ere i te oaoa to nia i te mau mouˈa.

8 “‘Fatata roa vau i te manii i to ˈu riri rahi i nia ia oe,+ e hue pauroa vau i to ˈu riri i nia ia oe,+ e haava vau ia oe ia au i to oe mau haerea e e faautua vau ia oe no ta oe mau ohipa hairiiri atoa. 9 Eita to ˈu mata e aroha ˈtu. Eita atoa vau e faaite i te aumihi.+ E faatae au i nia ia oe i te mau faahopearaa o to oe mau haerea, e e faaruru oe i te mau faahopearaa o ta oe iho mau ohipa hairiiri. E ite ïa oe o vau o Iehova te tairi ra ia oe.+

10 “‘Inaha, te mahana! Inaha, te tae mai ra te reira!+ Ua tae mai to oe hopea. Ua tiarehia te raau e ua oteo te teoteo. 11 Ua riro te haavîraa uˈana ei raau o te ino.+ Eita ratou, eita ta ratou mau faufaa, eita to ratou mau nahoa, eita atoa to ratou rahi e ora ˈtu. 12 E haere mai te taime, e tae mai te mahana. Eiaha tei hoo mai e oaoa, e eiaha tei hoo atu e oto, e riri rahi tahoo hoi to te Atua i to ratou nahoa taatoa.*+ 13 Eita hoi te taata hoo e hoˈi mai i ta ˈna i hoo atu, noa ˈtu e ora mai oia, no te nahoa taatoa hoi te orama. Eita hoê e hoˈi mai, e no ta ˈna hape,* eita hoê e ora mai.

14 “‘Ua faaotohia te pu,+ e ua ineine pauroa te taata, aita râ hoê e haere ra i te aroraa, no te mea e riri rahi tahoo to ˈu i te nahoa taatoa.+ 15 Tei rapae te ˈoˈe,+ e tei roto te maˈi pee e te oˈe. E pohe te taata atoa i rapae i te oire i te ˈoˈe, e e pau to roto i te oire i te oˈe e te maˈi pee.+ 16 E haere to ratou mau taata te ora ˈtu i nia i te mau mouˈa, e mai te mau uupa o te mau peho, e autâ ratou tataitahi no ta ratou hape.+ 17 Pauroa ratou, e tarere to ratou mau rima e e tahe-noa-hia to ratou mau turi i te pape.*+ 18 Ua oomo ratou i te ahu oto,+ e ua hotaratarahia ratou.* E haama te mau taata atoa, e e pahure te mau upoo atoa.*+

19 “‘E taora ratou i ta ratou ario na te mau aroâ, e e haafaufau ratou i ta ratou auro. Eita ta ratou ario, eita atoa ta ratou auro e nehenehe e faaora ia ratou i te mahana o to Iehova riri rahi.+ Eita ratou e paia, eita atoa to ratou vairaa maa e î, ua riro hoi te reira* ei turoriraa no ta ratou hape. 20 Ua haapeu ratou i te nehenehe o ta ratou mau faaunauna, e ua hamani ratou i ta ratou mau tii hairiiri, ta ratou mau idolo faufau,+ i te reira.* No reira vau e faariro ai i te reira ei faufauraa na ratou. 21 E horoa vau i te reira* i te rima o te feia ěê ia haruhia e i te feia ino o te fenua ia riro ei taoˈa haruhia na ratou, e e haaviivii ratou i te reira.

22 “‘E fariu ê roa vau i to ˈu aro ia ratou,+ e e haaviivii ratou i to ˈu vahi huna,* e e tomo atu te mau eiâ i roto e haaviivii i te reira.+

23 “‘A hamani i te fifi,*+ ua î hoi te fenua i te haavaraa tei tafetafeta i te toto+ e ua î te oire i te haavîraa uˈana.+ 24 E faatae atu vau i te feia ino roa ˈˈe o te mau nunaa,+ e e haru ratou i to ratou mau fare,+ e e faaore au i te teoteo o te feia puai, e e haaviiviihia to ratou mau nao.*+ 25 Ia roohia ratou i te ahoaho, e imi ratou i te hau, aita hoê aˈe râ.+ 26 E tae mai te ati te tahi i muri iho i te tahi, e te parau apî te tahi i muri iho i te tahi, e e imi te mau taata i te orama a te tahi peropheta,+ e mou râ te ture* a te tahuˈa e te aˈoraa a te matahiapo.+ 27 E oto te arii, e oomo te raatira i te ahu no te hepohepo,*+ e e rûrû te rima o te taata o te fenua i te riaria. E rave au ia ratou ia au i to ratou mau haerea, e e haava vau ia ratou mai ta ratou i haava ia vetahi ê. E ite ïa ratou o vau o Iehova.’”+

8 E i te ono o te matahiti, i te pae o te mahana o te ono o te avaˈe, a parahi ai au i to ˈu fare e a parahi ai te mau matahiapo o Iuda i mua ia ˈu, haru ihora te rima o te Arii hau ê e Fatu ra o Iehova ia ˈu i reira. 2 A mataitai ai au, ite ihora vau i te tahi hohoˈa mai te auahi ra te huru. E auahi to raro mai i te tahi mea e au ra o to ˈna tauupu,+ e mai to ˈna tauupu e nia ˈˈe, e hohoˈa ïa no te tahi mea anaana, mai te hesemala*+ ra te anaana. 3 Toro maira oia i te tahi mea mai te rima ra te hohoˈa e mau ihora ia ˈna maa rouru o to ˈu upoo. Hopoi atura te tahi puai ia ˈu i ropu i te fenua e te raˈi e tae roa i Ierusalema na roto i te mau orama no ǒ mai i te Atua, tae roa i te tomoraa o te uputa i roto+ o te fariu ra i apatoerau, i reira e tia ˈi te taipe* idolo no te pohehae o te faatupu i te pohehae.+ 4 E inaha, to reira te hanahana o te Atua o Iseraela,+ mai te orama ta ˈu i ite i te peho.+

5 Parau maira oia ia ˈu: “Tamaiti a te taata, a hiˈo na i apatoerau.” Hiˈo aˈera ïa vau i apatoerau, e i reira, i apatoerau atu i te uputa o te fata, i te tomoraa, o tera ïa taipe* no te pohehae. 6 Parau maira oia ia ˈu: “Tamaiti a te taata, te ite ra anei oe i te mau mea riaria e te hairiiri ta te nunaa o Iseraela e rave nei i ǒ nei,+ e mea o te faaatea ê ia ˈu i to ˈu nao?*+ E ite râ oe i te mea hairiiri mea riaria roa ˈtu â.”

7 Hopoi atura oia ia ˈu i te tomoraa o te aua, e i te hiˈoraa ˈtu vau, ite ihora vau i te tahi apoo i roto i te patu. 8 Parau maira oia ia ˈu: “Tamaiti a te taata, a pao na i te patu.” Pao ihora ïa vau i te patu, e ite ihora vau i te tahi tomoraa. 9 Parau maira oia ia ˈu: “A tomo atu e a hiˈo i te mau mea ino e te hairiiri ta ratou e rave nei i ǒ nei.” 10 Tomo atura ïa vau no te hiˈo, e ite ihora vau i te mau hohoˈa atoa ua rau te huru o te mau animara e nee haere e te animara faufau+ e pauroa te idolo faufau* a te nunaa o Iseraela.+ Ua nanaˈohia te reira i nia i te patu ati aˈe. 11 E e 70 o te mau matahiapo o te nunaa o Iseraela te tia ra i mua i te reira, o Iaazania te tamaiti a Saphana+ te tia atoa ra i rotopu ia ratou. E vairaa mea noˈanoˈa ta ratou tataitahi i to ratou rima, e te pee ra te au auahi o te mea noˈanoˈa i nia.+ 12 Parau maira oia ia ˈu: “Tamaiti a te taata, te ite ra anei oe eaha ta te mau matahiapo o te nunaa o Iseraela e rave nei i roto i te poiri, ratou tataitahi i roto i te mau piha moˈemoˈe i reira e vai ai ta ratou mau idolo?* Te parau nei hoi ratou: ‘Aita Iehova e ite mai ra ia tatou. Ua faarue Iehova i te fenua.’”+

13 Parau faahou maira oia ia ˈu: “E ite oe i te ohipa hairiiri mea riaria roa ˈtu â i ta ratou e rave nei.” 14 Hopoi atura ïa oia ia ˈu i te tomoraa o te uputa apatoerau o te fare o Iehova, e ite ihora vau i reira i te tahi mau vahine e parahi ra e e taˈi ra i te atua ra o Tamuza.

15 E parau faahou maira oia ia ˈu: “Te ite ra anei oe i te reira, tamaiti a te taata? E ite oe i te ohipa hairiiri mea riaria roa ˈtu â i te reira.”+ 16 Hopoi atura ïa oia ia ˈu i te aua i roto o te fare o Iehova.+ I reira i te tomoraa o te hiero o Iehova, i ropu i te taupee e te fata, piri i te 25 tane tei huri i to ratou tua i te hiero o Iehova e tei fariu i to ratou hohoˈa mata i hitia o te râ. Te piˈo ra ratou i mua i te mahana i hitia o te râ.+

17 Parau maira oia ia ˈu: “Tamaiti a te taata, te ite ra anei oe i te reira? Te manaˈo ra anei te nunaa o Iuda e ere i te mea ino ia rave i tera mau mea hairiiri, ia faaî i te fenua i te haavîraa uˈana+ e ia tamau i te haamauiui ia ˈu? Teie ratou e toro mai nei i te amaa* i to ˈu ihu. 18 No reira vau e ohipa ˈi ma te riri rahi. Eita to ˈu mata e aroha ˈtu.+ Eita atoa vau e faaite i te aumihi. Noa ˈtu e tuô ratou i to ˈu tariˈa, eita vau e faaroo ia ratou.”+

9 Tuô maira oia i to ˈu tariˈa, a na ô ai: “A titau i te feia e faautua i te oire, te taata tataitahi e ta ˈna mauhaa no te haamou i roto i to ˈna rima!”

2 Ite ihora vau e ono taata e haere mai ra na te uputa i nia+ o te fariu ra i apatoerau, te taata tataitahi e ta ˈna mauhaa no te haapohe i roto i to ˈna rima. E e taata e ahu lino to ˈna tei rotopu ia ratou, e farii inita a te papai parau ta ˈna i to ˈna tauupu. Tomo maira ratou e tia ihora i pihai iho i te fata veo.+

3 Pee aˈera te hanahana o te Atua o Iseraela+ i nia mai nia mai i te vahi i vai ai te reira i nia ˈˈe i na kerubi e haere atura i te uputa o te tomoraa o te hiero,+ e tuô ihora oia i te taata e ahu lino to ˈna, tei to ˈna tauupu te farii inita a te papai parau. 4 Parau maira Iehova ia ˈna: “A haere na roto i te oire, na roto ia Ierusalema, e a tuu i te tahi tapao i nia i te rae o te feia e autâ ra e e uuru ra+ no te mau mea hairiiri atoa e ravehia ra i roto i te oire.”+

5 Faaroo atura vau ia ˈna i te parauraa i te tahi atu mau taata: “A haere na roto i te oire na muri ia ˈna e a tairi. Eiaha to outou mata e aroha ˈtu, e eiaha e faaite i te aumihi.+ 6 E haapohe outou pauroa te taata paari, te taata apî, te vahine aita i taoto aˈenei i te tane, te tamarii rii e te vahine.+ Eiaha râ e tapiri atu i te taata e tapao to nia ia ˈna.+ Ia haamata outou mai to ˈu nao*+ mai.” Haamata aˈera ïa ratou i te haapohe i te mau matahiapo e tia ra i mua i te uputa o te hiero.+ 7 Parau ihora oia ia ratou: “A haaviivii i te hiero e a faaî i te mau aua i tei haapohehia.+ Haere!” Haere aˈera ïa ratou e tairi aˈera i to te oire.

8 A tairi ai ratou i to te oire, o vau anaˈe tei toe. Topa ihora vau te mata i raro e tuô ihora vau: “Auê e te Arii hau ê e Fatu ra o Iehova! E haamou anei oe pauroa te toea o Iseraela a manii ai oe i to oe riri rahi i nia ia Ierusalema?”+

9 Parau maira ïa oia ia ˈu: “Ua rahi, ua rahi roa te hape a te nunaa o Iseraela e o Iuda.+ Ua î te fenua i te haapoheraa taata,+ e ua î te oire i te viivii.+ Te parau ra hoi ratou: ‘Ua faarue Iehova i te fenua, e aita Iehova e ite mai ra.’+ 10 Area vau, eita to ˈu mata e aroha ˈtu. Eita atoa vau e faaite i te aumihi.+ E faatae mai au i te mau faahopearaa o to ratou haerea i nia i to ratou iho upoo.”

11 Ite ihora vau i te taata e ahu lino to ˈna e te farii inita i to ˈna tauupu i te faaiteraa mai i ta ˈna parau, a na ô ai: “Ua rave au mai ta oe i faaue ia ˈu.”

10 A mataitai ai au, ite ihora vau i nia ˈˈe i te tahua e vai ra i nia ˈˈe i te mau upoo o te mau kerubi i te tahi mea o te hohoˈa ra i te ofai saphira i te faraa i nia ˈˈe ia ratou, e mai te tahi terono+ ra te huru. 2 Parau atura oia i te taata e ahu lino to ˈna:+ “A haere na ropu i te mau huira,+ i raro aˈe i te mau kerubi, a faaî i to oe rima i te arahu ura+ no ropu mai i te mau kerubi e a ueue atu i nia i te oire.”+ Haere atura ïa oia a mataitai ai au.

3 Te tia ra te mau kerubi i te pae atau o te hiero i te haereraa ˈtu taua taata ra, e ua î te aua o roto i te ata. 4 E pee aˈera te hanahana o Iehova+ mai nia mai i na kerubi e haere ihora i te uputa o te tomoraa o te hiero, e î riirii noa maira te hiero i te ata,+ e ua î te aua i te anaana o te hanahana o Iehova. 5 E ua faaroohia te haruru pererau o te mau kerubi i te aua i rapaeau mai, mai te haruru o te Atua Manahope ia paraparau oia.+

6 Faaue atura oia i te taata e ahu lino to ˈna: “A rave mai i te auahi no ropu mai i te mau huira, no ropu mai i te mau kerubi.” Haere atura ïa taua taata ra e tia ihora i pihai iho hoê o te mau huira. 7 Toro maira hoê o te mau kerubi i to ˈna rima i te auahi i ropu i te mau kerubi.+ Rave maira oia maa arahu ura e tuu atura i roto i te rima o te taata e ahu lino to ˈna,+ o tei rave mai i te reira e tei haere i rapae. 8 E mea o te hohoˈa i te rima taata to raro aˈe i te mau pererau o te mau kerubi.+

9 A mataitai ai au, ite ihora vau e maha huira i pihai iho i te mau kerubi, hoê huira i pihai iho i te mau kerubi tataitahi, e mea anaana te mau huira mai te ofai tarisisa.+ 10 Area te hohoˈa o te reira, hoê â ïa to tera e maha, mai te huru ra e huira to roto i te tahi huira. 11 Ia tere te reira, e nehenehe te reira e haere i na eˈa e maha ma te ore e tipuu, no te mea e haere te reira i te vahi e fariu ai te upoo ma te ore e tipuu. 12 To ratou tino taatoa, to ratou tua, to ratou rima, to ratou pererau e te mau huira, te mau huira a na maha kerubi, ua î ïa i te mata ati aˈe.+ 13 Area te mau huira, faaroo ihora vau i te tahi reo o te pii ra i te reira: “Huira!”

14 E maha hohoˈa mata to ratou* tataitahi. Te hohoˈa mata matamua, o te hohoˈa mata kerubi, te piti o te hohoˈa mata, e hohoˈa mata taata, te toru, e hohoˈa mata liona, e te maha, e hohoˈa mata aeto.+

15 E e maue te mau kerubi, o te mau melahi* tera ta ˈu i ite i te anavai Kebara.+ 16 E ia haere te mau kerubi, e tere atoa te mau huira na muri ia ratou, e ia hohora te mau kerubi i to ratou mau pererau no te maue i nia ˈˈe i te fenua, eita te mau huira e tipuu aore ra e faaatea mai pihai iho mai ia ratou.+ 17 Ia faaea noa ratou, e faaea noa atoa te reira. E ia maue ratou, e maue atoa te reira na muri ia ratou, tei roto hoi i te reira te varua o te Atua e ohipa ra i nia i te mau melahi.*

18 Reva ˈtura ïa te hanahana o Iehova+ mai nia mai i te uputa o te tomoraa o te hiero e faaea noa ihora i nia ˈˈe i te mau kerubi.+ 19 Hohora aˈera te mau kerubi i to ratou mau pererau e maue aˈera mai nia mai i te fenua a mataitai ai au. Tei pihai iho atoa te mau huira ia ratou a faareva ˈi ratou. Faaea aˈera ratou i te tomoraa o te uputa hitia o te râ o te hiero o Iehova, e tei nia ˈˈe ia ratou te hanahana o te Atua o Iseraela.+

20 O te mau melahi* tera ta ˈu i ite i raro aˈe i te Atua o Iseraela i te anavai Kebara.+ Taa ihora ïa ia ˈu e kerubi ratou. 21 E maha hohoˈa mata to ratou e maha, e maha pererau, e e mea o te hohoˈa ra i te rima taata to raro aˈe i to ratou mau pererau.+ 22 E e au to ratou mau hohoˈa mata i te mau hohoˈa mata ta ˈu i ite i pihai iho i te anavai Kebara.+ E haere afaro noa ratou tataitahi.+

11 E haamaue aˈera te tahi puai ia ˈu i nia e hopoi atura ia ˈu i te uputa o te hiero o Iehova o te fariu ra i hitia o te râ.+ Ite ihora vau i reira i te tomoraa o te uputa e 25 tane, e to rotopu ia ratou o Iaazania te tamaiti a Azura e Pelatia te tamaiti a Benaia, e huiarii no te nunaa.+ 2 Parau maira te Atua ia ˈu: “Tamaiti a te taata, o ratou te opua nei i te ino e te horoa nei i te aˈoraa ino i roto i* teie oire. 3 Te parau nei ratou: ‘E ere anei teie i te taime no te patu i te fare?+ E pani*+ teie oire,* e o tatou te inaˈi.’

4 “No reira, a tohu i ta ratou e faaruru. A tohu, tamaiti a te taata.”+

5 Haere faahou maira te varua o Iehova i nia ia ˈu,+ e parau maira oia ia ˈu: “A parau: ‘Teie ta Iehova e parau ra: “Ua tano ta oe i parau, e te nunaa o Iseraela, e ua ite au eaha ta oe e manaˈo nei. 6 Mea rahi tei pohe i roto i teie oire no outou aˈe, e ua î to ˈna mau aroâ ia outou i te feia pohe.”’”+ 7 “No reira, teie ta te Arii hau ê e Fatu ra o Iehova e parau ra: ‘O te mau tino pohe ta outou i haapurara na roto i te oire te inaˈi, e o te oire te pani.+ E faahaerehia râ outou i rapae i te oire.’”

8 “‘E ˈoˈe ta outou i mǎtaˈu,+ e e ˈoˈe ta ˈu e hopoi i nia ia outou,’ te parau ra te Arii hau ê e Fatu ra o Iehova. 9 ‘E hopoi au ia outou i rapae ia ˈna, e tuu vau ia outou i te rima o te feia ěê e e faautua vau ia outou.+ 10 E pohe outou i te ˈoˈe.+ E haava vau ia outou i te otia o Iseraela,+ e e ite outou o vau o Iehova.+ 11 Eita te oire e riro ei pani na outou, e e ere o outou te inaˈi i roto. E haava vau ia outou i te otia o Iseraela, 12 e ite ïa outou o vau o Iehova. Aita hoi outou i pee i ta ˈu mau ture e aita i haapao i ta ˈu mau faaotiraa haavaraa,+ ua ohipa râ outou ia au i te mau faaotiraa haavaraa a te mau nunaa ati aˈe ia outou.’”+

13 I te tohuraa iho â vau, pohe ihora Pelatia te tamaiti a Benaia. Topa ihora vau te mata i raro e tuô ihora vau: “Auê e te Arii hau ê e Fatu ra o Iehova! E haamou anei oe i te toea o Iseraela?”+

14 Tae faahou maira te parau a Iehova ia ˈu e na ô ra: 15 “Tamaiti a te taata, ua parau to Ierusalema i to oe mau taeae, ratou e tiaraa no te hoo mai to ratou, e i te nunaa taatoa o Iseraela: ‘A faaatea ê atu ia Iehova. No matou te fenua. Ua horoahia mai no matou ia fatu matou.’ 16 No reira a parau: ‘Teie ta te Arii hau ê e Fatu ra o Iehova e parau ra: “Noa ˈtu ua faaatea ê au ia ratou mai rotopu i te mau nunaa e ua haapurara vau ia ratou na te mau fenua,+ e riro vau ei nao* no ratou no te hoê taime poto i te mau fenua i reira ratou i haere ai.”’+

17 “No reira a parau: ‘Teie ta te Arii hau ê e Fatu ra o Iehova e parau ra: “E haaputuputu atoa vau ia outou mai roto mai i te mau nunaa e e amui au ia outou mai te mau fenua i haapurarahia ˈi outou, e e horoa vau i te fenua o Iseraela no outou.+ 18 E hoˈi ratou i reira e e faaore ratou i te mau mea faufau e peu hairiiri atoa i reira.+ 19 E horoa vau no ratou i te hoê aau tahoêhia,*+ e e tuu vau i roto ia ratou i te hoê huru feruriraa apî.+ E tatara vau i te aau ofai i roto i to ratou tino+ e e horoa vau no ratou i te hoê aau mǎrû,*+ 20 ia pee ratou i ta ˈu mau faatureraa, ia haapao e ia auraro ratou i ta ˈu mau faaotiraa haavaraa. I reira ratou e riro ai ei nunaa no ˈu, e e riro vau ei Atua no ratou.”’

21 “‘“No te feia râ e tamau â to ratou aau i ta ratou mau mea faufau e ta ratou mau peu hairiiri, e faatae atu vau i te faahopearaa o to ratou haerea i nia i to ratou upoo,” te parau ra te Arii hau ê e Fatu ra o Iehova.’”

22 Hohora aˈera te mau kerubi i to ratou mau pererau, e tei pihai iho te mau huira ia ratou,+ e to nia ˈˈe te hanahana o te Atua o Iseraela ia ratou.+ 23 Pee aˈera te hanahana o Iehova+ mai nia mai i te oire e faaea ihora i nia ˈˈe i te mouˈa i hitia o te râ o te oire.+ 24 Haamaue aˈera te tahi puai ia ˈu i nia, na roto i te hoê orama maoti te varua o te Atua, e hopoi atura ia ˈu i te nunaa tei hopoihia i Kaladaio. Moˈe ihora te orama ta ˈu i ite. 25 E faaite ihora vau i te nunaa tei hopoi-ê-hia i te mau mea atoa ta Iehova i faaite ia ˈu.

12 Tae faahou maira te parau a Iehova ia ˈu, a na ô ai: 2 “Tamaiti a te taata, te ora nei oe i rotopu i te tahi nunaa orure hau. E mata to ratou no te ite, aita râ ratou e ite ra, e tariˈa to ratou no te faaroo, aita râ ratou e faaroo ra,+ e nunaa orure hau+ hoi ratou. 3 Area oe, tamaiti a te taata, a faaineine i to oe otaa no te haere ei taata hopoi-ê-hia. E ia ao, a mataitai noa ˈi ratou, e haere oe ei taata hopoi-ê-hia. A haere ei taata hopoi-ê-hia mai to oe fare i te tahi atu vahi a mataitai ai ratou. E ite mai paha ratou, noa ˈtu e nunaa orure hau ratou. 4 A hopoi i to oe otaa ei taata hopoi-ê-hia ia ao a mataitai ai ratou, e ia ahiahi a mataitai ai ratou, e faareva oe mai te tahi taata e hopoi-ê-hia ra.+

5 “A mataitai ai ratou, a pao i te tahi apoo i roto i te patu, e a hopoi i ta oe mau taihaa i rapae na roto i taua apoo ra.+ 6 A mataitai ai ratou, a tuu i ta oe mau taihaa i nia i to oe tapono e a hopoi i te reira na roto i te poiri. A tapoˈi i to oe hohoˈa mata ia ore oe ia ite i raro, te faariro ra hoi au ia oe ei taipe no te nunaa o Iseraela.”+

7 Rave ihora vau mai tei faauehia ia ˈu. Hopoi atura vau i to ˈu otaa i te ao, mai te otaa a tei hopoi-ê-hia ra, e i te ahiahi, pao rima ˈtura vau i te tahi apoo i roto i te patu. E i te poiriraa, hopoi atura vau i ta ˈu mau taoˈa i rapae, ma te amo i te reira i nia i to ˈu tapono i mua maitai i to ratou mata.

8 Tae faahou maira te parau a Iehova i te poipoiraa, a na ô ai: 9 “Tamaiti a te taata, aita anei te nunaa o Iseraela, tera nunaa orure hau, i ani ia oe: ‘Te aha ra oe?’ 10 A parau ia ratou: ‘Teie ta te Arii hau ê e Fatu ra o Iehova e parau ra: “No te raatira+ i Ierusalema teie parau e te nunaa taatoa o Iseraela i roto i te oire.”’

11 “A parau atu e taipe oe no ratou.+ Mai ta oe iho â i rave, tera te ravehia ia ratou. E hopoi-ê-hia ratou, e hopoi-tîtî-hia.+ 12 E amo te raatira i rotopu ia ratou i ta ˈna mau taoˈa i nia i to ˈna tapono e e faareva oia na roto i te poiri. E pao oia i te apoo i roto i te patu e e hopoi oia i ta ˈna mau taoˈa i rapae na roto i taua apoo ra.+ E tapoˈi oia i to ˈna hohoˈa mata ia ore oia ia ite i raro.’ 13 E taora vau i ta ˈu upeˈa i nia ia ˈna, e e mau oia i roto i ta ˈu upeˈa.+ E hopoi au ia ˈna i Babulonia, i te fenua o te Kaladaio, eita râ oia e ite i te reira, e e pohe oia i reira.+ 14 E pauroa te taata ati aˈe ia ˈna, to ˈna mau tauturu e ta ˈna mau faehau, e haapurara vau ia ratou na te mau vahi atoa.+ E e huti au i te tahi ˈoˈe no te aˈuaˈu ia ratou.+ 15 E e ite ratou o vau o Iehova ua haapurara anaˈe au ia ratou i rotopu i te mau nunaa e ua haapurara anaˈe au ia ratou na te mau fenua. 16 E faaherehere râ vau vetahi o ratou i te ˈoˈe, te oˈe e te maˈi pee, ia nehenehe ratou e faatia i rotopu i te mau nunaa e haere ai ratou i ta ratou mau peu hairiiri atoa. E e ite ratou o vau o Iehova.”

17 Tae faahou maira te parau a Iehova ia ˈu, a na ô ai: 18 “Tamaiti a te taata, e amu oe i ta oe faraoa ma te rûrû e e inu oe i ta oe pape ma te horuhoru e te ahoaho.+ 19 A parau i to teie fenua: ‘Teie ta te Arii hau ê e Fatu ra o Iehova e parau ra i to Ierusalema i te fenua o Iseraela: “E amu ratou i ta ratou faraoa ma te ahoaho e e inu ratou i ta ratou pape ma te mehameha, e ano roa hoi to ratou fenua+ no te haavîraa uˈana a te feia atoa e parahi ra i reira.+ 20 E haamouhia te mau oire parahihia e te taata, e e riro te fenua ei medebara.+ E e ite outou o vau o Iehova.”’”+

21 E tae faahou maira te parau a Iehova ia ˈu, a na ô ai: 22 “Tamaiti a te taata, eaha nei râ tera parau paari ta outou i Iseraela o te na ô ra: ‘E mairi te mau mahana, e aita e orama e tupu’?+ 23 No reira a parau ia ratou: ‘Teie ta te Arii hau ê e Fatu ra o Iehova e parau ra: “E faaore au i tera parau, e eita e faahiti-faahou-hia te reira ei parau paari i Iseraela.”’ A parau râ ia ratou: ‘Te piri mai ra te mau mahana,+ e e tupu te mau orama atoa.’ 24 Aita faahou hoi e orama haavare aore ra e tohu faatietie* i rotopu i te nunaa o Iseraela.+ 25 ‘“Na ˈu hoi e parau, o vau o Iehova. E tupu ta ˈu mau parau atoa aita e faataereraa.+ A ora noa ˈi outou,+ e te nunaa orure hau, e parau vau i te parau e e faatupu vau i te reira,” te parau ra te Arii hau ê e Fatu ra o Iehova.’”

26 Tae faahou maira te parau a Iehova ia ˈu, a na ô ai: 27 “Tamaiti a te taata, teie ta te nunaa* o Iseraela e parau nei: ‘No te hoê tau atea te orama ta ˈna e ite ra, e te tohu ra oia no te tahi ananahi atea.’+ 28 No reira, a parau ia ratou: ‘Teie ta te Arii hau ê e Fatu ra o Iehova e parau ra: “‘Aita hoê o ta ˈu mau parau e taere. E tupu pauroa ta ˈu parau,’ te parau ra te Arii hau ê e Fatu ra o Iehova.”’”

13 E tae faahou maira te parau a Iehova ia ˈu, a na ô ai: 2 “Tamaiti a te taata, a tohu i te mau ati ta te mau peropheta o Iseraela+ e faaruru, e a parau i tei hamani i ta ratou iho mau parau tohu:*+ ‘A faaroo i te parau a Iehova. 3 Teie ta te Arii hau ê e Fatu ra o Iehova e parau ra: “Ua ati te mau peropheta maamaa, tei pee i to ratou iho feruriraa, aita nei hoi ratou i ite i te tahi orama!+ 4 E Iseraela, ua riro ta oe mau peropheta mai te alope i te vahi ano. 5 Eita outou e tataî i te mau vahi parari o te mau patu ofai no te tauturu i te nunaa o Iseraela,+ ia nehenehe Iseraela ia mau papu noa i roto i te tamaˈi i te mahana o Iehova.”+ 6 “E orama haavare ta ratou i ite e e haavare ta ratou i faaite atea, ratou o te parau nei: ‘Teie te parau a Iehova,’ e ere hoi na Iehova i tono ia ratou, e ua tiai ratou ia tupu ta ratou parau.+ 7 E ere anei i te orama haavare ta outou i ite e e haavare ta outou i faaite atea a parau ai outou: ‘Teie te parau a Iehova,’ aita nei hoi au i parau i te tahi mea?”’

8 “‘No reira, teie ta te Arii hau ê e Fatu ra o Iehova e parau ra: “‘No te mea ua parau outou i te haavare e e haavare ta outou mau orama, e enemi ïa vau no outou,’ te parau ra te Arii hau ê e Fatu ra o Iehova.”+ 9 Ua toro vau i to ˈu rima no te faautua i te mau peropheta e orama haavare ta ratou e tei faaite atea i te haavare.+ Aita ratou i rotopu i to ˈu mau hoa piri, eita atoa ratou e papaihia i roto i te buka tapaoraa o te nunaa o Iseraela. Eita atoa ratou e hoˈi i te fenua o Iseraela. E ite ïa outou o vau te Arii hau ê e Fatu ra o Iehova.+ 10 Ua hahi ê hoi to ˈu nunaa i to ratou parauraa: “E hau!” e aita nei hoi e hau.+ Ia hamani te tahi taata i te pǎpai purehu hanoa, e pǎte ratou i te reira i te puˈa.’*+

11 “A parau i te feia o te pǎte nei i te reira i te puˈa e e marua. E ûa puai te haere mai, e ûa paari te topa,* e e vero puai te vavahi i te reira.+ 12 E ia topa te pǎpai, e anihia outou: ‘Teihea ˈtura te pǎte ta outou i parai?’+

13 “No reira, teie ta te Arii hau ê e Fatu ra o Iehova e parau ra: ‘I roto i to ˈu riri rahi tahoo, e faatupu vau i te vero puai, e i roto i to ˈu riri, e faatopa vau i te ûa rahi, e ia hinaaro vau e haamou i te mau mea atoa no te riri rahi, e faatopa vau i te ûa paari. 14 E vavahi au i te pǎpai ta outou i pǎte i te puˈa, e huri au i te reira i raro, e e ite-noa-hia to ˈna niu. Ia topa te oire, e mou outou i roto. E e ite outou o vau o Iehova.’

15 “‘Ia hue pauroa vau i to ˈu riri rahi tahoo i nia i te pǎpai e i nia i te feia tei pǎte i te reira i te puˈa, e parau vau ia outou: “Aita faahou te pǎpai, e aita faahou te feia tei pǎte i te reira.+ 16 Ua faarue mai te mau peropheta o Iseraela, ratou tei tohu ia Ierusalema e tei ite i te orama hau no ˈna, aita nei hoi e hau,”’+ te parau ra te Arii hau ê e Fatu ra o Iehova.

17 “Area oe, tamaiti a te taata, a tiatonu i te mau tamahine a to oe nunaa o te hamani ra i ta ratou iho mau parau tohu, e a tohu i te mau ati ta ratou e faaruru. 18 A parau ia ratou: ‘Teie ta te Arii hau ê e Fatu ra o Iehova e parau ra: “Ua ati te mau vahine o te nira ra i te taamu no te mau rima atoa* e o te hamani ra i te puroˈu ua rau te faito ei herepata no te ora* o te mau taata! Te marei ra anei outou i te ora* o to ˈu nunaa a tamata ˈi i te faaherehere i to outou ora? 19 E haaviivii anei outou ia ˈu i rotopu i to ˈu nunaa no te apu rima î i te kerite e te tâpû faraoa?+ Te haavare ra outou i to ˈu nunaa e e vare ratou.+ A na reira ˈi, te haapohe ra ïa outou i te feia* e ere mea haapohe, e te vaiiho ra outou ia ora mai te feia* eita e tano ia ora noa!”’

20 “No reira, teie ta te Arii hau ê e Fatu ra o Iehova e parau ra: ‘E te mau vahine, mea hae roa na ˈu ta outou mau taamu ta outou e faaohipa no te marei i te taata* mai te manu. E hahae au i te reira mai nia mai i to outou mau rima e e tuu vau i te feia* ta outou i marei mai te manu. 21 E hahae au i to outou mau puroˈu e e faaora vau i to ˈu nunaa i to outou rima, e e ere faahou ratou i te tahi mea ta outou e aˈuaˈu. E ite ïa outou o vau o Iehova.+ 22 Ua faatoaruaru hoi outou i te aau o te taata parau-tia i ta outou haavare,+ aita nei hoi au e faahepohepo* ra ia ˈna, e ua faaetaeta outou i te rima o te taata ino,+ ia ore oia ia fariu ê i to ˈna haerea ino e ia ora noa.+ 23 No reira, eita faahou outou, te mau vahine, e ite i te orama haavare e e rave i te peu hiˈohiˈo.+ E faaora vau i to ˈu nunaa i to outou rima, e e ite outou o vau o Iehova.’”

14 E haere maira te tahi mau matahiapo o Iseraela e parahi ihora i mua ia ˈu.+ 2 Tae maira te parau a Iehova ia ˈu, a na ô ai: 3 “Tamaiti a te taata, ua faaoti papu tera mau taata e haamori i ta ratou mau idolo faufau,* e ua tuu ratou i te ofai turoriraa ia hara te taata. Ia vaiiho anei ïa vau ia ratou ia uiui mai ia ˈu?+ 4 I teie nei, a paraparau ia ratou e a na ô atu: ‘Teie ta te Arii hau ê e Fatu ra o Iehova e parau ra: “Ia faaoti papu te tahi ati Iseraela e haamori i ta ˈna mau idolo faufau e ia tuu i te tahi ofai turoriraa ia hara te taata, a haere mai ai oia e uiui i te tahi peropheta, na ˈu, o Iehova, e pahono ia ˈna mai tei tano ia ˈna no ta ˈna idolo faufau e rave rahi. 5 E faatupu hoi au i te mehameha i roto i te aau o te nunaa o Iseraela* no te mea ua hahi ê ratou pauroa ia ˈu e ua haamori i ta ratou mau idolo faufau.”’+

6 “No reira, a parau i te nunaa o Iseraela: ‘Teie ta te Arii hau ê e Fatu ra o Iehova e parau ra: “A hoˈi mai, a fariu ê i ta outou mau idolo faufau e a haapae i ta outou mau peu hairiiri atoa.+ 7 Ia faataa ê hoi te tahi ati Iseraela aore ra te tahi taata ê e ora ra i Iseraela ia ˈna ia ˈu e ua faaoti oia e haamori i ta ˈna mau idolo faufau e ia tuu oia i te tahi ofai turoriraa ia hara te taata, a haere mai ai e uiui i ta ˈu peropheta,+ na ˈu, o Iehova, na ˈu iho e pahono ia ˈna. 8 E faautua vau i tera taata, e faariro vau ia ˈna ei taipe faaararaa e ei parau paari, e e haapohe au ia ˈna mai rotopu mai i to ˈu nunaa,+ e e ite outou o vau o Iehova.”’

9 “‘Ia vare râ te peropheta a pahono atu ai oia, no ˈu, o Iehova, i vare ai tera peropheta.+ E toro ïa vau i to ˈu rima no te tairi ia ˈna e e haamou vau ia ˈna mai rotopu mai i to ˈu nunaa o Iseraela. 10 E amo iho â ratou i ta ratou hapa. Hoê â hapa ta tei uiui e ta te peropheta, 11 ia faaea te nunaa o Iseraela i te overe haere i te atea ê ia ˈu e ia faaea i te haaviivii ia ratou i ta ratou mau hara atoa. E e riro ratou ei nunaa no ˈu, e e riro vau ei Atua no ratou,’+ te parau ra te Arii hau ê e Fatu ra o Iehova.”

12 E tae faahou maira te parau a Iehova ia ˈu, a na ô ai: 13 “Tamaiti a te taata, ia hara te tahi fenua ia ˈu i te taivaraa ia ˈu, e toro vau i to ˈu rima no te tairi i te reira e e faaore au i te maa*+ i reira, e faatae au i te oˈe i nia i te reira+ e e haapohe au i te taata e te animara i reira.”+ 14 “‘Noa ˈtu to reira teie e toru taata, o Noa,+ o Daniela+ e o Ioba,+ o ratou* noa ta ratou e nehenehe e faaora no ta ratou parau-tia,’+ te parau ra te Arii hau ê e Fatu ra o Iehova.”

15 “‘Aore ra a feruri na e faatae atu vau i te animara taehae na taua fenua ra, a pau atu ai ia ratou to reira mau taata,* a faariro atu ai i te reira ei medebara aita e taata e na roto atu no te animara oviri.+ 16 Te horeo nei au i to ˈu nei ora,’ te parau ra te Arii hau ê e Fatu ra o Iehova, ‘noa ˈtu to reira teie e toru taata, eita ratou e faaora i ta ratou mau tamaiti e ta ratou mau tamahine. O ratou noa ta ratou e faaora, e e riro te fenua ei vahi ano.’”

17 “‘Aore ra a feruri na e faatae atu vau i te tahi ˈoˈe na taua fenua ra+ e e parau vau: “Ia na roto te tahi ˈoˈe i teie fenua,” e e haapohe au i to reira mau taata e animara atoa,+ 18 noa ˈtu to reira teie e toru taata, te horeo nei au i to ˈu nei ora,’ te parau ra te Arii hau ê e Fatu ra o Iehova, ‘eita ratou e faaora i ta ratou mau tamaiti e ta ratou mau tamahine. O ratou noa ta ratou e faaora.’”

19 “‘Aore ra a feruri na e faatae atu vau i te tahi maˈi pee i nia i taua fenua ra+ e e manii au i to ˈu riri rahi i nia iho ma te taparahi e rave rahi no te haapohe i te taata e te animara i reira, 20 noa ˈtu to reira o Noa,+ o Daniela+ e o Ioba,+ te horeo nei au i to ˈu nei ora,’ te parau ra te Arii hau ê e Fatu ra o Iehova, ‘eita ratou e faaora i ta ratou mau tamaiti e ta ratou mau tamahine. O ratou* noa ta ratou e faaora no ta ratou parau-tia.’”+

21 “Teie hoi ta te Arii hau ê e Fatu ra o Iehova e parau ra: “Tera te tupu ia faatae atu vau i ta ˈu e maha faautuaraa,+ te ˈoˈe, te oˈe, te animara taehae e te maˈi pee,+ i nia ia Ierusalema no te haapohe i te taata e te animara i reira.+ 22 Tera râ, e toea te ora mai i reira e te hopoihia,+ e tamaiti e e tamahine. Te haere mai ra ratou ia outou, e ia ite outou i to ratou mau haerea e ta ratou mau ohipa, e tamahanahanahia iho â outou no nia i te ati ta ˈu i faatae i nia ia Ierusalema, no nia i te mau mea atoa ta ˈu i rave i nia ia ˈna.’”

23 “‘E tamahanahanahia outou ia ite outou i to ratou mau haerea e ta ratou mau ohipa, e e ite outou e tumu iho â i na reira ˈi au ia Ierusalema,’+ te parau ra te Arii hau ê e Fatu ra o Iehova.”

15 Tae faahou maira te parau a Iehova ia ˈu, a na ô ai: 2 “Tamaiti a te taata, mea maitai aˈe anei te raau o te tumu vine i to te tahi atu tumu aore ra amaa o te mau tumu raau o te uru raau? 3 E noaa anei te tahi raau roa i te reira no te rave i te ohipa? E hamani anei te taata i te faatautauraa mauhaa i tera raau? 4 Inaha, e hurihia te reira i roto i te auahi ei vahie, e e pau na hopea e piti i te auahi e e paapaa te ropuraa. E i muri iho, e tano anei te reira no te ohipa? 5 Hou atoa te reira a paapaa ˈi i te auahi, eita e nehenehe e rave i te reira no te tahi ohipa. E ore roa ˈtu â ïa i te pauraa e te paapaaraa te reira i te auahi!”

6 “No reira, teie ta te Arii hau ê e Fatu ra o Iehova e parau ra: ‘Mai te raau o te tumu vine i rotopu i te mau tumu raau o te uru raau, ta ˈu i huri i roto i te auahi ei vahie, e na reira atoa vau i to Ierusalema.+ 7 E faautua vau ia ratou. Ua ora mai ratou i te auahi, e pau râ ratou i te auahi. E e ite outou o vau o Iehova ua faautua anaˈe au ia ratou.’”+

8 “‘E e faaano vau i te fenua+ no te mea ua taiva ratou,’+ te parau ra te Arii hau ê e Fatu ra o Iehova.”

16 Tae faahou maira te parau a Iehova ia ˈu, a na ô ai: 2 “Tamaiti a te taata, a faaite ia Ierusalema i ta ˈna mau peu hairiiri.+ 3 E parau oe: ‘Teie ta te Arii hau ê e Fatu ra o Iehova e parau ra ia Ierusalema: “No te fenua o te ati Kanaana mai oe e i reira oe i te fanauraahia. E ati Amori to oe metua tane,+ e e ati Heta to oe metua vahine.+ 4 No to oe fanauraa, i te mahana i fanauhia ˈi oe, aita to oe taura pito i tâpûhia, aita oe i horoihia i te pape ia mâ oe, aita oe i uiuihia i te miti papaa, e aita oe i puohuhia i te pahii. 5 Aita hoê aˈe i aroha ia oe a rave roa ˈtu ai i teie mau mea no oe. Aita hoê aˈe i faaite i te aumihi ia oe. Ua faaruehia râ oe i rapae no te mea mea haehia oe i te mahana i fanauhia ˈi oe.

6 “‘“A haere ai au na pihai iho ia oe, ite ihora vau ia oe e hautiuti ra i roto i to oe iho toto, e a tarava noa ˈi oe i reira i roto i to oe toto, parau atura vau: ‘Ia ora noa oe!’ Oia mau, ua parau vau ia oe e tarava noa ra i reira i roto i to oe toto: ‘Ia ora noa oe!’ 7 Ua faariro vau ia oe ei nahoa rahi roa, mai te mau raau tupu e tupu ra i rapae, e ua rahi mai oe e ua tupu maitai to oe tino e e faaunauna nehenehe roa ˈˈe to nia iho ia oe. Ua faura mai to oe na tîtî, e ua tupu to oe rouru. Aita râ e ahu to oe, mea vai tahaa noa.”’

8 “‘A haere ai au na pihai iho ia oe e a hiˈo ai au ia oe, ite ihora vau e ua raea to oe matahiti no te faaite i te here. Vauvau ihora ïa vau i to ˈu ahu* na nia iho ia oe+ e tapoˈi ihora vau i to oe tino aita e ahu. Horeo ihora vau ia oe e faaau ihora vau i te faufaa ia oe,’ te parau ra te Arii hau ê e Fatu ra o Iehova, ‘e riro maira oe no ˈu. 9 Hau atu â, horoi ihora vau ia oe i te pape, tamâ ihora vau i te toto i nia i to oe tino e tuu atura vau i te monoˈi i nia iho ia oe.+ 10 Faaoomo ihora vau ia oe i te tahi ahu nira-faanehenehe-hia, horoa ˈtura vau i te tiaa iri animara* maitai roa, vehî ihora vau ia oe i te ahu lino maitai roa, e faaoomo ihora vau ia oe i te ahu moni rahi. 11 Faanehenehe ihora vau ia oe i te mau faaunauna e tamau ihora i te fifi rima i nia i to oe rima e te tahi fifi arapoa i nia i to oe arapoa. 12 Tamau atoa ihora vau i te tahi tapea ihu i nia i to oe ihu e te tapea tariˈa i nia i to oe tariˈa e tuu ihora i te tahi hei arii nehenehe i nia i to oe upoo. 13 Ua faanehenehe noa oe ia oe i te auro e te ario, e e ahu lino maitai roa to oe, e ahu moni rahi, e e ahu nira-faanehenehe-hia. Te faraoa ota oro-maitai-hia, te meri e te hinu ta oe e amu na, e riro maira oe ei vahine hope te haviti+ e tano ia riro ei arii vahine.’”*

14 “‘Atutu ihora to oe roo* na rotopu i te mau nunaa+ no to oe haviti, e haviti tia roa hoi no te mea o to ˈu iho unauna ta ˈu i tuu i nia iho ia oe,’+ te parau ra te Arii hau ê e Fatu ra o Iehova.”

15 “‘Haamata ihora râ oe i te tiaturi i to oe haviti,+ e riro maira oe ei vahine taiata no to oe roo.+ Rave noa ˈtura oe i ta oe mau peu taiata e te taata atoa e haere mai na reira,+ e no ratou atura to oe haviti. 16 Rave ihora oe vetahi o to oe mau ahu ua rau te û e faaunauna ˈtura i te mau vahi teitei i reira oe e taiata ˈi.+ Eiaha roa hoi taua mau mea ra ia tupu, eiaha roa ia tupu. 17 Rave atoa ihora oe i ta oe mau taoˈa faanehenehe hamanihia i te auro e te ario ta ˈu i horoa na oe, e hamani ihora oe i te tii tane no oe e taiata ˈtura oe i te reira.+ 18 E rave ihora oe i to oe mau ahu nira-faanehenehe-hia e tapoˈi ihora oe i te reira,* e pûpû atura oe i ta ˈu monoˈi e ta ˈu mea noˈanoˈa i te reira.+ 19 E pûpû atoa ˈtura oe i te reira ei mea hauˈa noˈanoˈa au maitai*+ i te faraoa ta ˈu i horoa na oe hamanihia i te faraoa ota oro-maitai-hia, te hinu e te meri ta ˈu i horoa na oe e amu. Tera mau â tei tupu,’ te parau ra te Arii hau ê e Fatu ra o Iehova.”

20 “‘Rave ihora oe i ta oe mau tamaiti e ta oe mau tamahine ta oe i fanau mai na ˈu,+ e pûpû atura oe ia ratou i te mau idolo ia pau ratou i te amuhia.+ Aita ïa i navai noa ta oe mau peu taiata? 21 Haapohe ihora oe i ta ˈu mau tamarii, e pûpû ihora oe ia ratou ei tusia ma te tanina ia ratou.+ 22 A rave noa ˈi oe i ta oe mau peu hairiiri e peu taiata atoa, aita oe i haamanaˈo i te mau mahana o to oe apîraa aita hoi e ahu to oe, a vai tahaa e a hautiuti noa ˈi oe i roto i to oe iho toto. 23 No ta oe mau ohipa ino atoa, ua ati, ua ati oe,’+ te parau ra te Arii hau ê e Fatu ra o Iehova. 24 ‘Ua hamani oe i te tahi puu repo teitei no oe e ua patu oe i te tahi vahi teitei no oe i te mau mahora atoa o te oire. 25 Ua patu oe i ta oe mau vahi teitei i te mau vahi ite-maitai-hia o te mau aroâ atoa, e ua taui oe i to oe haviti ei mea hairiiri ma te horoa noa ia oe* i te taata atoa e haere mai na reira,+ e ua faarahi oe i ta oe mau peu taiata.+ 26 Ua taiata oe i te mau tamaiti a to Aiphiti,+ to oe mau taata tapiri mea rahi to ratou hiaai,* e ua faainoino oe ia ˈu i ta oe peu taiata e rave rahi roa. 27 I teie nei e toro vau i to ˈu rima no te faautua ia oe, e faaiti mai au i ta oe tuhaa maa faataahia+ e e tuu atu vau ia oe i te mau vahine mea hae na ratou ia oe+ ia rave ratou ia oe mai ta ratou e hinaaro, te mau tamahine a te mau Philiseti, o tei huru ê roa i to oe haerea faufau.+

28 “‘No te mea aita oe i fiu, taiata ˈtura oe i te mau tamaiti a to Asura.+ I muri iho i to oe taiataraa ia ratou, aita atoa oe i fiu. 29 Faarahi atura ïa oe i ta oe taiataraa na te fenua o te feia tapihoo* e i ǒ to Kaladaio.+ I reira atoa, aita oe i fiu. 30 Mea paruparu mau â to oe aau,’* te parau ra te Arii hau ê e Fatu ra o Iehova, ‘a rave ai oe i teie mau mea atoa, mai te hoê vahine taiata faufau!+ 31 I to oe râ hamaniraa i ta oe puu repo teitei i te vahi ite-maitai-hia o te mau aroâ atoa e to oe paturaa i te hoê vahi teitei na oe i te mau mahora atoa o te oire, e ere oe mai te hoê vahine taiata, no te mea aita oe i farii ia aufauhia oe. 32 E vahine faaipoipo faaturi oe o te au aˈe i te taata ěê eiaha râ i ta oe iho tane!+ 33 E horoahia te tahi ô na te mau vahine taiata atoa,+ o oe râ, na oe ïa e horoa i te ô na te feia atoa e hinaaro e taoto ia oe,+ e na oe e aufau ia ratou ia haere mai ia oe ra na te mau vahi atoa no te rave i te peu taiata.+ 34 Mea taa ê roa oe i te tahi atu mau vahine o te rave i te peu taiata. Aita hoê aˈe e rave i te peu taiata mai ia oe! Na oe e aufau, e eita oe e aufauhia. Mea taa ê roa ta oe raveraa.’

35 “No reira, vahine taiata,+ a faaroo mai i te parau a Iehova. 36 Teie ta te Arii hau ê e Fatu ra o Iehova e parau ra: ‘Ua faaite maitai oe i to oe hinaaro e taoto e ua faaiteite oe i to oe vai-tahaa-raa a taiata ˈi oe i te tahi atu mau tane e i ta oe mau idolo hairiiri e te faufau* atoa.+ Ua pûpû atoa oe i te toto o ta oe mau tamarii.+ 37 No reira te haaputuputu nei au pauroa te tane ta oe i taoto, pauroa tei herehia e oe e pauroa mea hae na oe. E haaputuputu vau ia ratou pauroa mai te mau vahi atoa mai no te aro ia oe, e faaiteite au ia ratou i to oe vai-tahaa-raa, e e ite ratou ia oe i te vai-tahaa-roa-raa.+

38 “‘E faautua vau ia oe i te mau utua e tano no te mau vahine faaturi+ e te mau vahine o te haamanii i te toto,+ e e haamaniihia to oe toto ma te riri rahi e te pohehae.+ 39 E tuu atu vau ia oe i to ratou rima, e turai ratou i ta oe mau puu repo teitei, e e hurihia i raro ta oe mau vahi teitei.+ E tatara ratou i to oe ahu,+ e rave ratou i ta oe mau taoˈa faanehenehe+ e e faarue mai ratou ia oe, mea vai tahaa noa. 40 E faahaere mai ratou i te hoê nahoa e aro ia oe,+ e pehi ratou ia oe i te ofai+ e e haapohe ratou ia oe i ta ratou mau ˈoˈe.+ 41 E tanina ratou i to oe mau fare+ e e faautua ia oe i mua i te mata o te vahine e rave rahi. E faaore au i ta oe taiataraa,+ e e faaea oe i te aufau i te taata. 42 E tamǎrû vau i to ˈu riri rahi ia oe,+ e e fariu ê to ˈu inoino ia oe.+ E mǎrû mai au e e ore e inoino faahou.’

43 “‘No te mea aita oe i haamanaˈo i te mau mahana o to oe apîraa+ e ua riri au ia oe i te raveraa i tera mau mea atoa, i teie nei e faatae au i te mau faahopearaa o to oe mau haerea i nia i to oe iho upoo,’ te parau ra te Arii hau ê e Fatu ra o Iehova, ‘e eita oe e tamau faahou i to oe haerea faufau e ta oe mau peu hairiiri atoa.

44 “‘Inaha, pauroa te taata o te faahiti i te mau parau paari, e parau ïa i teie parau paari no oe: “Tia maitai te tamahine i to ˈna metua vahine!”+ 45 O oe iho â te tamahine a to oe metua vahine, tei vahavaha i ta ˈna tane faaipoipo e ta ˈna mau tamarii. E o oe iho â te tuahine o to oe mau tuahine, tei vahavaha i ta ratou tane faaipoipo e ta ratou mau tamarii. E ati Heta to oe metua vahine, e e ati Amori to oe metua tane.’”+

46 “‘To oe tuaana, o Samaria,+ e parahi ra i te pae apatoerau atu ia oe* e ta ˈna mau tamahine,*+ e to oe teina e parahi ra i te pae apatoa ˈtu ia oe,* o Sodoma+ ïa e ta ˈna mau tamahine.+ 47 Ua pee oe i to ratou mau haerea e ua rave i ta ratou mau peu hairiiri. Hau atu â râ, ua ino roa ˈtu to oe haerea i to ratou i te hoê taime poto noa.+ 48 Te horeo nei au i to ˈu nei ora,’ te parau ra te Arii hau ê e Fatu ra o Iehova, ‘aita Sodoma to oe teina e ta ˈna mau tamahine i rave i ta oe e ta ta oe mau tamahine i rave. 49 Inaha, teie te hape a Sodoma to oe teina: Mea faaoru+ o ˈna e ta ˈna mau tamahine+ e mea rahi ta ratou maa+ e te parahi maitai noa ra ratou ma te haapeapea ore.+ Tera râ, aita ratou i tauturu i te feia i roto i te ati e te feia veve.+ 50 Ua vai teoteo noa ratou+ e ua tamau noa i te rave i te mau peu hairiiri i mua i to ˈu aro,+ manaˈo ihora ïa vau e mea tano ia haamou ia ratou.+

51 “‘Aita hoi Samaria+ i rave i te afaraa o te mau hara ta oe i rave. Ua tamau noa oe i te faarahi atu â i ta oe mau peu hairiiri i ta ratou, a manaˈohia ˈtu ai mea tia to oe mau tuahine no ta oe mau peu hairiiri atoa.+ 52 Ia faahaehaahia oe i teie nei no te mea ua turu oe i te haerea o* to oe mau tuahine. Mea tia aˈe ratou ia oe, no ta oe hara i te raveraa i te mea hairiiri aˈe i ta ratou. No reira, i teie nei, ia haama e ia faahaamahia oe no to oe raveraa ia manaˈohia mea tia to oe mau tuahine.’

53 “‘E e haaputuputu vau i ta ratou mau tîtî, te mau tîtî a Sodoma e ta ˈna mau tamahine e te mau tîtî a Samaria e ta ˈna mau tamahine. E haaputuputu atoa vau i ta oe mau tîtî e o ratou,+ 54 ia faahaamahia oe. E e ite oe i te haama no ta oe i rave i te tamahanahanaraa ia ratou. 55 E riro faahou to oe teina o Sodoma e ta ˈna mau tamahine mai na mua ˈˈe, e riro faahou to tuaana o Samaria e ta ˈna mau tamahine mai na mua ˈˈe, e e riro faahou oe e ta oe iho mau tamahine mai na mua ˈˈe.+ 56 I te mahana o to oe faaoruraa, aita e faufaa to oe faahitiraa ia Sodoma to oe teina, 57 hou to oe iho ino a faaitehia mai ai.+ I teie nei te faaino ra te mau tamahine a Suria e to pihai iho mai ia oe, e te vahavahahia ra oe e te mau tamahine a te mau Philiseti,+ tei ati aˈe ia oe. 58 E faaruru oe i te mau faahopearaa o to oe haerea faufau e ta oe mau peu hairiiri,’ te parau ra Iehova.”

59 “Teie hoi ta te Arii hau ê e Fatu ra o Iehova e parau ra: ‘I teie nei e rave au ia oe mai ta oe iho â i rave,+ ua haafaufaa ore hoi oe i te horeo ma te ofati i ta ˈu faufaa.+ 60 O vau râ, e haamanaˈo ïa vau i te faufaa ta ˈu i faaau ia oe i te mau mahana o to oe apîraa, e e haamau vau i te hoê faufaa vai tamau e o oe.+ 61 E haamanaˈo oe i to oe haerea e e ite oe i te haama+ ia farii mai oe i to oe mau tuahine, to oe mau tuaana e to oe atoa mau teina, e e horoa ˈtu vau ia ratou ei tamahine na oe, e ere râ no ta oe faufaa.’

62 “‘E e haamau o vau iho nei i ta ˈu faufaa e o oe, e e ite oe o vau o Iehova. 63 Ia faaore au i ta oe hara noa ˈtu te mau mea atoa ta oe i rave,+ i reira oe e haamanaˈo ai i ta oe i rave e e haama roa ˈi i te hamǎmǎ i to oe vaha no to oe faahaamaraahia,’+ te parau ra te Arii hau ê e Fatu ra o Iehova.”

17 Tae faahou maira te parau a Iehova ia ˈu, a na ô ai: 2 “Tamaiti a te taata, a tuu i te tahi piri e a faahiti i te tahi parau paari no nia i te nunaa o Iseraela.+ 3 E parau oe: ‘Teie ta te Arii hau ê e Fatu ra o Iehova e parau ra: “Ua tae mai i Lebanona+ nei te aeto rahi,+ e pererau rahi e te roroa to ˈna, e te huruhuru meumeu e te araaraa, e rave maira oia i te tupuai o te tumu arezi.+ 4 Ohiti atura oia i te omou i nia roa ˈˈe, hopoi atura i te reira i te fenua o te feia tapihoo* e vaiiho ihora i te reira i roto i te tahi oire o te feia tapihoo.+ 5 Rave maira oia i te tahi mau huero o te fenua,+ e ueue ihora i roto i te tahi faaapu repo maitai. Tanu ihora oia i te reira mai te tahi tumu arobe i pihai iho i te taheraa pape. 6 Tupu ihora ïa te reira e riro maira ei tumu vine haehaa toro noa.+ Mea huri to ˈna mau amaa e rauere i roto e ua tupu to ˈna mau aˈa i raro aˈe ia ˈna. Riro maira ïa oia ei tumu vine e faatupu ihora i te omou e toro aˈera to ˈna mau amaa.+

7 “‘“E tae maira te tahi atu aeto rahi,+ e pererau rahi e te roroa to ˈna.+ Toro aˈera taua vine ra i to ˈna mau aˈa ia ˈna ma te nounou, i te atea ê i te tâpû fenua i tanuhia ˈi oia, e toro atura oia i to ˈna mau amaa e rauere ia ˈna ia faararirari mai oia ia ˈna.+ 8 Ua tanu-aˈena-hia hoi oia i roto i te tahi faaapu repo maitai i pihai iho i te taheraa pape, ia faatupu mai oia i te mau amaa, ia horoa i te maa, e ia riro oia ei tumu vine ruperupe.”’+

9 “A parau: ‘Teie ta te Arii hau ê e Fatu ra o Iehova e parau ra: “E tupu ruperupe anei oia? Eita anei te tahi e iriti tumu ia ˈna+ e e vaiiho i to ˈna mau hotu ia pê e to ˈna mau omou ia mǎrô?+ E mǎrô roa oia e aita ˈtura e faufaa e na te tahi rima puai aore ra na te taata e rave rahi e iriti tumu ia ˈna. 10 Noa ˈtu e tanuhia oia i te vahi ê, e tupu ruperupe anei oia? Eita anei oia e mǎrô roa ia puhi mai te mataˈi no hitia o te râ i nia ia ˈna? E mǎrô roa oia i te tâpû fenua i tupu ai oia.”’”

11 Tae faahou maira te parau a Iehova ia ˈu, a na ô ai: 12 “A parau na i te nunaa orure hau: ‘Aita anei outou e taa ra i te auraa o te reira?’ A parau: ‘Inaha, ua tae mai te arii o Babulonia i Ierusalema. Rave maira oia i to ˈna arii e to ˈna huiarii e hopoi atura ia ratou i Babulonia+ na muri ia ˈna. 13 Hau atu â, rave maira oia hoê o te huaai huiarii,+ faaau ihora i te tahi faufaa ia ˈna e faahoreo atura ia ˈna.+ Hopoi ê atura oia i te feia tiaraa teitei o te fenua,+ 14 ia faahaehaahia te faatereraa arii, a ore atu ai e nehenehe e faateitei, a vai noa ˈi te reira+ mai te peu noa e haapao te nunaa i ta ˈna faufaa. 15 Orure hau maira râ te arii ia ˈna+ a tono mai ai i ta ˈna mau vea i Aiphiti ia noaa mai te mau puaahorofenua+ e te tahi nuu rahi ia ratou.+ E manuïa anei oia? E ape anei te feia e na reira ra i te faautuaraa? E nehenehe anei oia e ofati i te faufaa a ape noa ˈtu ai i te faautuaraa?’+

16 “‘“Te horeo nei au i to ˈu nei ora,” te parau ra te Arii hau ê e Fatu ra o Iehova, “e pohe oia i Babulonia, i te vahi e ora ˈi te arii* o tei faaarii ia ˈna,* te arii na ˈna te horeo ta ˈna i haafaufaa ore e na ˈna te faufaa ta ˈna i ofati.+ 17 Aita e faufaa to te mau nuu rahi a Pharao i roto i te tamaˈi,+ ua faatia-anaˈe-hia te aua e te mau patu no te aro atu e no te haapohe e rave rahi taata. 18 Ua haafaufaa ore oia i te hoê horeo e ua ofati i te hoê faufaa. Noa ˈtu ua fafau oia,* tera pauroa ta ˈna i rave, e eita oia e ape i te faautuaraa.”’

19 “‘No reira, teie ta te Arii hau ê e Fatu ra o Iehova e parau ra: “Te horeo nei au i to ˈu nei ora, e faatae au i nia i to ˈna upoo i te mau faahopearaa o to ˈna haafaufaa-ore-raa i ta ˈu horeo+ e ofatiraa i ta ˈu faufaa. 20 E taora vau i ta ˈu upeˈa i nia ia ˈna, e e mau oia i roto i ta ˈu upeˈa.+ E hopoi au ia ˈna i Babulonia e e haava vau ia ˈna i reira no to ˈna taivaraa ia ˈu.+ 21 E pohe pauroa tei ora ˈtu no roto mai i ta ˈna mau nuu i te ˈoˈe, e e haapurarahia na te mau vahi* atoa+ te feia tei ora mai. E ite ïa outou e o vau, o Iehova, tei paraparau.”’+

22 “‘Teie ta te Arii hau ê e Fatu ra o Iehova e parau ra: “E rave au i te tahi omou i nia roa i te tumu arezi teitei+ e e tanu vau i te reira. Mai nia roa mai i to ˈna mau omou e pofai ai au i te tahi omou apî,+ e na ˈu iho e tanu i te reira i nia i te tahi mouˈa teitei.+ 23 I nia i te tahi mouˈa teitei o Iseraela e tanu ai au i te reira, e e tupu to ˈna mau amaa, e e hotu mai te reira e e riro mai ei tumu arezi rahi. E ora te mau manu atoa ua rau te huru i raro aˈe i te reira e e faaea ratou i raro aˈe i te marumaru o to ˈna mau amaa e rauere. 24 E e ite te mau tumu raau atoa o te fenua e na ˈu iho, o Iehova, i faahaehaa i te tumu raau teitei e i faateitei i te tumu raau haehaa,+ no ˈu i mǎrô ai te tumu raau ruperupe e i tiarehia ˈi te tumu raau mǎrô.+ Na ˈu iho, o Iehova, i parau e i rave i te reira.”’”

18 E tae faahou maira te parau a Iehova ia ˈu, a na ô ai: 2 “Eaha te auraa o teie parau paari ta outou e faahiti ra i te fenua o Iseraela: ‘O te mau metua tane tei amu i te vine puu, o te niho râ o te mau tamaiti tei mania’?+

3 “‘Te horeo nei au i to ˈu nei ora,’ te parau ra te Arii hau ê e Fatu ra o Iehova, ‘eita outou e tamau i te faahiti i tera parau i Iseraela. 4 Inaha, no ˈu pauroa te ora.* Te ora o te metua tane, oia atoa te ora o te tamaiti, no ˈu ïa. Te taata* o te hara, o ˈna te pohe.

5 “‘A feruri na mea parau-tia te tahi taata e te rave ra oia i te mea afaro e te tia. 6 Eita oia e amu i te tusia na te mau idolo i nia i te mau mouˈa.+ Eita oia e fariu i te mau idolo faufau* a te nunaa o Iseraela. Eita oia e faaturi* i te vahine faaipoipo a to ˈna taata tupu+ e eita oia e taoto i te tahi vahine e maˈi avaˈe to ˈna.+ 7 Eita oia e hamani ino i te taata,+ e faahoˈi râ oia i ta te taata tarahu i horoa ia ˈna ei piri taoˈa.+ Eita oia e eiâ i te taata,+ e horoa râ oia i ta ˈna iho maa na tei poia+ e e tapoˈi oia i tei vai tahaa i te ahu.+ 8 Eita oia e faaaufau i te moni taime aore ra e imi i te tahi apî,+ e opani râ oia ia ˈna iho ia rave i te mea parau-tia ore.+ E haava oia ma te parau-tia mau i rotopu i te tahi taata e te tahi atu.+ 9 E e tamau oia i te pee i ta ˈu mau faatureraa e i te haapao i ta ˈu mau faaotiraa haavaraa ia ohipa oia ma te haapao maitai. E taata parau-tia oia e e ora mau â oia,’+ te parau ra te Arii hau ê e Fatu ra o Iehova.

10 “‘A feruri na râ ua fanauhia mai ta ˈna te tahi tamaiti e eiâ+ oia aore ra e taparahi taata*+ aore ra te rave ra oia i te tahi o teie mau mea 11 (noa ˈtu aita te metua tane i rave i teie mau mea): e amu oia i te tusia na te mau idolo i nia i te mau mouˈa, e faaturi* oia i te vahine faaipoipo a to ˈna taata tupu, 12 e hamani ino oia i tei ere e tei veve,+ e eiâ oia i te taoˈa, eita e faahoˈi i te piri taoˈa, e fariu oia i te mau idolo faufau,+ e rave oia i te peu hairiiri,+ 13 e imi oia i te apî e e faaaufau oia i te moni taime,+ eita ïa teie tamaiti e ora noa. No tera mau mea hairiiri atoa ta ˈna i rave, e haapohehia oia. No ˈna iho te hape e pohe ai oia.*

14 “‘A feruri na râ i te tahi metua tane e tamaiti ta ˈna tei ite i te mau hara atoa ta to ˈna metua tane i rave, e noa ˈtu ua ite oia i te reira, eita oia e rave i te mea mai tera te huru. 15 Eita oia e amu i te tusia na te mau idolo i nia i te mau mouˈa. Eita oia e fariu i te mau idolo faufau a te nunaa o Iseraela. Eita oia e faaturi* i te vahine faaipoipo a to ˈna taata tupu. 16 Eita oia e hamani ino i te taata. Eita oia e tapea i tei horoahia mai ei piri taoˈa. Eita oia e eiâ. E horoa oia i ta ˈna iho maa na tei poia e e tapoˈi oia i tei vai tahaa i te ahu. 17 E opani oia ia ˈna iho ia haavî i tei veve. Eita oia e imi i te apî aore ra e faaaufau i te moni taime. E haapao oia i ta ˈu mau faaotiraa haavaraa e e pee oia i ta ˈu mau faatureraa. Eita tera huru taata e pohe no te hape a to ˈna metua tane. E ora noa oia. 18 No te mea râ ua taviri noa to ˈna metua tane i te taata, ua eiâ i to ˈna taeae, e ua rave i te mea ino i rotopu i to ˈna nunaa, e pohe oia no ta ˈna hape.

19 “‘E parau râ outou: “Eaha te tamaiti e ore ai e faahapahia no te hape a to ˈna metua tane?” I te mea ua rave te tamaiti i te mea afaro e te tia, ua pee i ta ˈu mau faatureraa atoa e ua haapao i te reira, e ora noa oia.+ 20 Te taata* o te hara, o ˈna te pohe.+ Eita te tamaiti e faahapahia no te hape a to ˈna metua tane, e eita te metua tane e faahapahia no te hape a ta ˈna tamaiti. E haavahia te taata parau-tia ia au i ta ˈna iho parau-tia, e e haavahia te taata ino ia au i to ˈna iho ino.+

21 “‘Ia fariu ê râ te tahi taata ino i te mau hara atoa ta ˈna i rave, ia pee oia i ta ˈu mau faatureraa e ia rave oia i te mea afaro e te tia, e ora noa oia. Eita oia e pohe.+ 22 Aita e hara ta ˈna i rave te faahitihia* no te faahapa ia ˈna.+ E ora noa oia no te raveraa i te mea tia.’+

23 “‘Mea au anei na ˈu ia pohe te taata ino?’+ te parau ra te Arii hau ê e Fatu ra o Iehova. ‘E ere anei mea au aˈe na ˈu ia fariu ê oia i to ˈna mau haerea a ora noa ˈtu ai oia?’+

24 “‘Ia faarue râ te taata parau-tia i to ˈna haerea parau-tia a rave atu ai i te ino,* ma te rave i te mau mea hairiiri atoa ta te taata ino e rave na, e ora anei oia? Eita hoê o ta ˈna mau ohipa parau-tia e haamanaˈohia.+ No to ˈna taiva e te hara ta ˈna i rave, e pohe oia.+

25 “‘E parau râ outou: “Aita e tano ra ta Iehova raveraa.”+ A faaroo mai na, e te nunaa o Iseraela! Ta ˈu anei te raveraa aita e tano ra?+ E ere anei ta outou mau raveraa aita e tano ra?+

26 “‘Ia faarue te tahi taata parau-tia i to ˈna haerea parau-tia e ia rave oia i te ino a pohe atu ai no te reira, e pohe oia no ta ˈna iho ino i rave.

27 “‘E ia fariu ê te taata ino i te ino ta ˈna i rave a haamata ˈtu ai i te rave i te mea afaro e te tia, e faaherehere oia i to ˈna iho ora.*+ 28 Ia taa ia ˈna mea ino ta ˈna e rave ra e ia fariu ê i te mau hara atoa ta ˈna i rave, e ora noa oia. Eita oia e pohe.

29 “‘E parau râ te nunaa o Iseraela: “Aita e tano ra ta Iehova raveraa.” Ta ˈu iho â anei mau raveraa aita e tano ra, e te nunaa o Iseraela?+ E ere anei ta outou mau raveraa aita e tano ra?’

30 “‘No reira, e haava vau ia outou tataitahi ia au i to outou iho haerea,+ e te nunaa o Iseraela,’ te parau ra te Arii hau ê e Fatu ra o Iehova. ‘A fariu ê, oia mau, a fariu ê roa i ta outou mau hara atoa, ia ore te reira ia riro ei ofai turoriraa o te faahapa ia outou. 31 A faarue roa i te mau hara atoa ta outou i rave+ e ia noaa ia outou* te aau apî e te huru feruriraa apî,+ eaha hoi outou e pohe ai,+ e te nunaa o Iseraela?’

32 “‘Eita roa vau e au ia pohe te taata,’+ te parau ra te Arii hau ê e Fatu ra o Iehova. ‘A fariu mai ïa e ia ora outou.’”+

Ua parahi oia i rotopu i te mau liona apî puai e ua haapao i ta ˈna mau fanauˈa.

 3 Ua haapao oia hoê o ta ˈna mau fanauˈa, e riro maira oia ei liona apî puai.+

 5 Tiai noa ˈtura te maiaa liona e taa ihora ia ˈna eiaha e tiaturi faahou e hoˈi mai oia.

Rave maira ïa oia i te tahi atu o ta ˈna mau fanauˈa e faariro atura ia ˈna ei liona apî puai.

 6 Ua haere atoa oia na rotopu i te mau liona e ua riro mai ei liona apî puai.

Ua haapii oia e nafea ia hahae i te animara ta ˈna e aˈuaˈu, e ua pau atoa ia ˈna te taata i te amuhia.+

 9 I te tarou to ratou tuuraa ia ˈna i roto i te tahi afata auri e hopoi aˈera ia ˈna i te arii no Babulonia.

Tapea ˈtura ratou ia ˈna i reira, ia ore to ˈna uuru ia faaroo-faahou-hia i nia i te mau mouˈa o Iseraela.

10 E au to oe metua vahine i te tahi tumu vine+ i roto i to oe toto,* tei tanuhia i te pae pape.

I hotu na oia e ua amaa-roa-hia no te rahi o te pape.

11 E amaa* paari to ˈna e tano no te mau sepeta a te feia faatere.

Ofatihia aˈera to ˈna mau amaa paari e mǎrô aˈera,+ e pau aˈera te reira i te auahi.+

“‘Tera te hoê himene oto, e e himenehia te reira ei himene oto.’”

20 E i te hitu o te matahiti, i te ahuru o te mahana o te pae o te avaˈe, haere maira te tahi mau matahiapo o Iseraela e parahi ihora i mua ia ˈu no te uiui ia Iehova. 2 Tae maira te parau a Iehova ia ˈu, a na ô ai: 3 “Tamaiti a te taata, a paraparau i te mau matahiapo o Iseraela e a na ô atu: ‘Teie ta te Arii hau ê e Fatu ra o Iehova e parau ra: “Te haere mai ra anei outou e uiui ia ˈu?+ ‘Te horeo nei au i to ˈu nei ora, eita vau e pahono i ta outou uiuiraa,’ te parau ra te Arii hau ê e Fatu ra o Iehova.”’

4 “Ua ineine anei oe i te haava ia ratou? Ua ineine anei oe i te haava ia ratou, tamaiti a te taata? A faaite ia ratou i te mau mea hairiiri ta to ratou mau tupuna i rave.+ 5 A parau ia ratou: ‘Teie ta te Arii hau ê e Fatu ra o Iehova e parau ra: “I te mahana i maiti ai au ia Iseraela,+ ua horeo atoa vau* i te huaai o Iakoba, e ua faaite au ia ˈu iho ia ratou i te fenua o Aiphiti.+ Oia mau, ua horeo vau ia ratou e ua parau: ‘O vau o Iehova to outou Atua.’ 6 I taua mahana ra, ua horeo vau e aratai ia ratou i rapae i te fenua o Aiphiti e tae roa i te hoê fenua ta ˈu i imi* no ratou, e fenua e tahe noa te û e te meri.+ O te mea nehenehe roa ˈˈe* o te mau fenua atoa. 7 Parau atura vau ia ratou: ‘E faarue outou tataitahi i te mau mea hairiiri atoa e vai ra i mua i to outou mata. Eiaha e haaviivii ia outou i te mau idolo faufau* a Aiphiti.+ O vau o Iehova to outou Atua.’+

8 “‘“Tera râ orure hau maira ratou ia ˈu e aita i hinaaro e faaroo ia ˈu. Aita ratou i faarue i te mau mea hairiiri i vai na i mua ia ratou, e aita ratou i hinaaro e faarue i te mau idolo faufau a Aiphiti.+ Fafau ihora ïa vau e manii i to ˈu riri rahi i nia ia ratou e e hue pauroa to ˈu riri i nia ia ratou i te fenua o Aiphiti. 9 Ua haa râ vau no to ˈu nei iˈoa ia ore te reira ia haafaufaa-ore-hia i mua i te mau nunaa i reira ratou i ora ˈi.+ Ua faaite hoi au ia ˈu iho ia ratou i mua i tera mau nunaa i to ˈu aratairaa ia ratou i rapae i te fenua o Aiphiti.+ 10 Hopoi atura ïa vau ia ratou i rapae i te fenua o Aiphiti e aratai atura ia ratou i te medebara.+

11 “‘“Horoa ˈtura vau i ta ˈu mau faatureraa e faaite atura vau i ta ˈu mau faaotiraa haavaraa ia ratou,+ ia nehenehe te taata o te pee ra i te reira ia ora maoti te reira.+ 12 Horoa atoa ˈtura vau i ta ˈu mau Sabati ia ratou+ ei tapao i rotopu ia ˈu e ia ratou,+ ia ite ratou e o vau, o Iehova, te haamoˈa nei ia ratou.

13 “‘“Tera râ orure hau maira te nunaa o Iseraela ia ˈu i roto i te medebara.+ Aita ratou i pee i ta ˈu mau faatureraa, e ua faarue i ta ˈu mau faaotiraa haavaraa, tei te peeraa hoi i te reira e ora ˈi te taata. E ua haafaufaa ore roa ratou i ta ˈu mau Sabati. Fafau ihora ïa vau e manii i to ˈu riri rahi i nia ia ratou i roto i te medebara no te haapohe ia ratou.+ 14 Ua haa râ vau no to ˈu iho iˈoa ia ore te reira ia haafaufaa-ore-hia i mua i te mau nunaa, i mua i to ratou mata to ˈu aratairaa ia ratou i rapae.+ 15 Horeo atoa ˈtura vau ia ratou i te medebara e eita vau e aratai ia ratou i te fenua ta ˈu i horoa no ratou,+ hoê fenua e tahe noa te û e te meri,+ te mea nehenehe roa ˈˈe* o te mau fenua atoa, 16 no te mea ua faarue ratou i ta ˈu mau faaotiraa haavaraa, aita ratou i pee i ta ˈu mau faatureraa, e ua haafaufaa ore ratou i ta ˈu mau Sabati, te pee ra hoi to ratou aau i ta ratou mau idolo faufau.+

17 “‘“Aroha ˈtura râ vau* ia ratou, e aita ˈtura vau i haamou ia ratou. Aita ˈtura vau i haapohe ia ratou i te medebara. 18 Parau atura vau i ta ratou mau tamarii i roto i te medebara:+ ‘Eiaha e pee i te mau faaueraa a to outou mau tupuna,+ eiaha e pee i ta ratou mau faaotiraa haavaraa e eiaha e haaviivii ia outou i ta ratou mau idolo faufau. 19 O vau o Iehova to outou Atua. A pee i ta ˈu mau faatureraa, a pee i ta ˈu mau faaotiraa haavaraa, e a haapao i te reira.+ 20 A haamoˈa i ta ˈu mau Sabati,+ e e riro te reira ei tapao i rotopu ia ˈu e ia outou ia ite outou o vau o Iehova to outou Atua.’+

21 “‘“Orure hau maira râ te mau tamarii ia ˈu.+ Aita ratou i pee i ta ˈu mau faatureraa, e aita ratou i haapao e i faatupu i ta ˈu mau faaotiraa haavaraa, tei te peeraa hoi i te reira e ora ˈi te taata. Ta ˈu mau Sabati, ua haafaufaa ore ratou. Fafau ihora ïa vau e manii i to ˈu riri rahi i nia ia ratou e e hue pauroa to ˈu riri i nia ia ratou i te medebara.+ 22 Haavî ihora râ vau ia ˈu+ e haa ˈtura vau no to ˈu iˈoa,+ ia ore te reira ia haafaufaa-ore-hia i mua i te mau nunaa, i mua i to ratou mata to ˈu aratairaa ia ratou i rapae. 23 Horeo atoa ˈtura vau ia ratou i te medebara e haapurara vau ia ratou i rotopu i te mau nunaa e e haapurara vau ia ratou na te mau fenua,+ 24 no te mea aita ratou i faatupu i ta ˈu mau faaotiraa haavaraa e ua faarue ratou i ta ˈu mau faatureraa,+ ua haafaufaa ore ratou i ta ˈu mau Sabati, e ua pee ratou* i te mau idolo faufau a to ratou mau tupuna.+ 25 Ua vaiiho atoa vau ia ratou ia pee i te mau faaueraa e ere i te mea maitai e te mau faaotiraa haavaraa eita ratou e ora i te reira.+ 26 Ua vaiiho vau ia ratou ia haaviivii ia ratou i ta ratou iho mau tusia, i to ratou taninaraa pauroa te tamarii matahiapo,+ ia hepohepo roa ratou e ia ite ratou o vau o Iehova.”’

27 “A paraparau ïa i te nunaa o Iseraela, e te tamaiti a te taata, e a na ô atu: ‘Teie ta te Arii hau ê e Fatu ra o Iehova e parau ra: “Mai tera atoa to outou mau tupuna i te faainoraa ia ˈu ma te taiva ia ˈu. 28 Aratai atura vau ia ratou i te fenua ta ˈu i horeo e horoa no ratou.+ I to ratou iteraa pauroa te aivi teitei e te tumu raau mea rauere roa,+ pûpû aˈera ratou i ta ratou mau tusia e ta ratou mau ô hairiiri. Pûpû atura ratou i ta ratou mau tusia hauˈa noˈanoˈa au maitai* e ninii aˈera i ta ratou mau tusia uaina i reira. 29 Ui atura ïa vau ia ratou: ‘Eaha te tumu e haere ai outou i tera vahi teitei? (Te parau-noa-hia ra Vahi teitei tae roa mai i teie mahana.)’”’+

30 “I teie nei, a parau i te nunaa o Iseraela: ‘Teie ta te Arii hau ê e Fatu ra o Iehova e parau ra: “Te haaviivii ra outou ia outou mai ta to outou mau tupuna i rave a haamori ai i ta ratou mau idolo faufau no te rave i te taiataraa pae varua e o ratou.+ 31 E te haaviivii noa ra outou ia outou tae roa mai i teie mahana a pûpû ai i te tusia i ta outou mau idolo faufau atoa, a tanina ai i ta outou mau tamarii.+ Hinaaro ïa outou ia pahono vau i ta outou uiuiraa, e te nunaa o Iseraela?”’+

“‘Te horeo nei au i to ˈu nei ora,’ te parau ra te Arii hau ê e Fatu ra o Iehova, ‘eita vau e pahono i ta outou uiuiraa.+ 32 E ta outou e manaˈo* ra ia parau outou: “Ia riro tatou mai te mau nunaa, mai te mau utuafare o te tahi atu mau fenua, o te haamori* ra i te raau e te ofai,”+ e ore roa ïa e tupu.’”

33 “‘Te horeo nei au i to ˈu nei ora,’ te parau ra te Arii hau ê e Fatu ra o Iehova, ‘e faatere au ei arii i nia ia outou ma te rima puai, ma te rima faatorohia e ma te riri uˈana.+ 34 E aratai au ia outou i rapae i te mau nunaa e e haaputuputu vau ia outou i rapae i te mau fenua i haapurarahia ˈi outou ma te rima puai, ma te rima faatorohia e ma te riri uˈana.+ 35 E aratai au ia outou i te medebara o te mau nunaa e e haava vau ia outou i reira, e aro e aro.+

36 “‘Mai ta ˈu i haava i to outou mau tupuna i te medebara o te fenua o Aiphiti, e na reira atoa vau i te haava ia outou,’ te parau ra te Arii hau ê e Fatu ra o Iehova. 37 ‘E faahaere au ia outou na raro aˈe i te raau a te tiai mamoe+ e e faahepo vau ia outou ia haapao i te faufaa. 38 E tatara râ vau mai rotopu ia outou i te feia orure hau e tei hara ra ia ˈu.+ E aratai hoi au ia ratou i rapae i te fenua e parahi ai ratou ei feia ěê, eita râ ratou e tomo i te fenua o Iseraela.+ E ite ïa outou o vau o Iehova.’

39 “Area outou, e te nunaa o Iseraela, teie ta te Arii hau ê e Fatu ra o Iehova e parau ra: ‘Ia haere outou tataitahi e ia tavini i ta outou mau idolo faufau.+ I muri iho râ, ia ore outou ia faaroo ia ˈu, eita outou e nehenehe faahou e haafaufaa ore i to ˈu iˈoa moˈa i ta outou mau tusia e ta outou mau idolo faufau.’+

40 “‘I nia hoi i to ˈu mouˈa moˈa, i nia i te hoê mouˈa teitei o Iseraela,’+ te na reira maira te Arii hau ê e Fatu ra o Iehova, ‘i reira te nunaa taatoa o Iseraela, ratou pauroa, e tavini ai ia ˈu i teie fenua.+ E mauruuru vau ia ratou i reira, e e titau vau i ta outou mau ô e te mea maitai roa ˈˈe o ta outou mau tusia, pauroa ta outou mea moˈa.+ 41 No te mea hauˈa noˈanoˈa au maitai* o ta outou mau tusia, e mauruuru vau ia outou ia aratai au ia outou i rapae i te mau nunaa e ia haaputuputu vau ia outou mai te mau fenua mai i haapurarahia ˈi outou.+ E e haamoˈahia vau i rotopu ia outou i mua i te mata o te mau nunaa.’+

42 “‘E ite outou o vau o Iehova+ ia aratai au ia outou i te fenua o Iseraela,+ i te fenua ta ˈu i horeo e horoa no to outou mau tupuna. 43 E i reira outou e haamanaˈo ai i to outou haerea e pauroa te ohipa i haaviivii ai outou ia outou,+ e e haafaufau outou ia outou* no te mau mea ino atoa ta outou i rave.+ 44 E ite ïa outou o vau o Iehova ia na reira vau ia outou no to ˈu nei iˈoa,+ eiaha ia au i to outou haerea ino aore ra ia au i ta outou mau raveraa faufau, e te nunaa o Iseraela,’ te parau ra te Arii hau ê e Fatu ra o Iehova.”

45 Tae faahou maira te parau a Iehova ia ˈu, a na ô ai: 46 “Tamaiti a te taata, a fariu i te tuhaa fenua apatoa e a poro atu i to apatoa, a tohu i te uru raau o te tuhaa fenua no apatoa. 47 A parau i te uru raau no apatoa: ‘A faaroo i te parau a Iehova. Teie ta te Arii hau ê e Fatu ra o Iehova e parau ra: “Teie au e tutui nei i te tahi auahi ura i nia ia outou,+ e e pau pauroa te tumu raau ota e pauroa te tumu raau mǎrô i ǒ outou. Eita te auahi ura e pohe,+ e te mau hohoˈa mata atoa te paapaa i te reira, mai apatoa tae roa i apatoerau. 48 E pauroa te taata te ite e na ˈu, o Iehova, i tutui i tera auahi ura, ia ore te reira ia pohe.”’”+

49 E parau atura vau: “Auê e te Arii hau ê e Fatu ra o Iehova! Te parau ra ratou no ˈu: ‘E ere noa anei i te piri* ta ˈna e faahiti ra?’”

21 Tae faahou maira te parau a Iehova ia ˈu, a na ô ai: 2 “Tamaiti a te taata, a fariu i Ierusalema, e a poro eaha te tupu no te mau vahi moˈa e a tohu eaha te tupu no te fenua o Iseraela. 3 A parau i te fenua o Iseraela: ‘Teie ta Iehova e parau ra: “Teie au e aro nei ia oe, e e huti mai au i ta ˈu ˈoˈe i rapae i to ˈna vehî,+ e e haapohe au i te taata parau-tia e te taata ino i ǒ oe. 4 No te mea e haapohe au i ǒ oe i te taata parau-tia e te taata ino, e hutihia mai ta ˈu ˈoˈe i rapae i to ˈna vehî no te tairi i te taata atoa, mai apatoa tae roa i apatoerau. 5 E ite te taata atoa e na ˈu, o Iehova, i huti mai i ta ˈu ˈoˈe i rapae i to ˈna vehî. Eita te reira e hoˈi faahou i roto i to ˈna vehî.”’+

6 “E oe, tamaiti a te taata, a autâ a rûrû noa ˈi oe,* oia mau, a autâ uˈana i mua ia ratou.+ 7 E ia ui mai ratou ia oe: ‘Eaha oe e autâ ˈi?,’ e na ô atu oe: ‘No te tahi parau apî.’ E tae mai iho â te reira, e horuhoru te mau aau atoa i te riaria, e tarere te mau rima atoa, e toaruaru te mau taata* atoa e e tahe-noa-hia te mau turi atoa i te pape.*+ ‘Inaha, e tae mai iho â te reira, e tupu te reira,’ te parau ra te Arii hau ê e Fatu ra o Iehova.”

8 Tae faahou maira te parau a Iehova ia ˈu, a na ô ai: 9 “Tamaiti a te taata, a tohu e a na ô: ‘Teie ta Iehova e parau ra: “A na ô: ‘E ˈoˈe! E ˈoˈe+ tei faaoihia, e ua faaanaanahia te reira. 10 Ua faaoihia te reira no te tahi taparahiraa rahi. Ua faaanaanahia te reira no te anapa mai te uira.’”’”

“Eiaha anei matou ia oaoa?”

“‘E vahavaha anei te reira* i te sepeta a ta ˈu iho tamaiti,+ mai ta te reira e vahavaha i te mau tumu raau atoa?

11 “‘E horoahia te reira ia faaanaanahia e ia faaohipahia. Ua faaoihia e ua faaanaanahia taua ˈoˈe ra ia tuuhia i roto i te rima o te tahi taata taparahi pohe.+

12 “‘A tuô e a auê,+ tamaiti a te taata, e tae mai hoi te reira no te tairi i to ˈu nunaa. E tairi te reira pauroa te raatira o Iseraela.+ E roohia ratou e to ˈu nunaa atoa i te ˈoˈe. No reira, a tupai i to oe huha no te oto. 13 Ua ravehia hoi te tahi hiˈopoaraa,+ e eaha te tupu ia vahavaha te ˈoˈe i te sepeta? E mou te reira,’*+ te parau ra te Arii hau ê e Fatu ra o Iehova.

14 “E oe, tamaiti a te taata, a tohu, a paipai i to oe rima e a parau e toru taime: ‘E ˈoˈe!’ O te ˈoˈe no tei haapohehia, te ˈoˈe o te tahi taparahiraa rahi, te ˈoˈe e haaati ra ia ratou.+ 15 E horuhoru to ratou aau i te riaria+ e mea rahi te topa i te mau uputa o to ratou oire. E faatupu vau i te tahi taparahiraa i te ˈoˈe. Oia mau, e anapa te reira mai te uira e ua faaanaanahia te reira no te tahi taparahiraa! 16 A tâpû i te pae atau! A tairi i te pae aui! A haere na te mau vahi atoa e torohia ˈi ta oe ˈoˈe! 17 E paipai atoa vau i to ˈu rima e e tamǎrû vau i to ˈu riri rahi.+ O vau, o Iehova, tei paraparau.”

18 E tae faahou maira te parau a Iehova ia ˈu, a na ô ai: 19 “Area oe, tamaiti a te taata, a reni e piti eˈa no te ˈoˈe a te arii o Babulonia ia tae mai. No ǒ mai na eˈa e piti i te hoê â fenua. E faatiahia te tahi tapao* i te vahi e amaa ˈi te purumu e tae atu ai i na piti oire. 20 E reni oe hoê eˈa no te ˈoˈe e tae mai no te tairi ia Raba+ a te ati Amona, e te tahi atu eˈa no te tairi ia Ierusalema+ tei auahia i te patu i Iuda. 21 No te rave hoi i te peu hiˈohiˈo, e faaea te arii o Babulonia i te amaaraa purumu, i reira e amaa ˈi te purumu ei piti eˈa. E ueue oia i te mau teˈa. E uiui oia i ta ˈna mau idolo.* E hiˈopoa oia i te upaa. 22 Te tohu ra te peu hiˈohiˈo i roto i to ˈna rima atau ia Ierusalema, no te faanaho i te mau mauhaa otuˈi, no te horoa i te faaueraa e taparahi haapohe, no te huro, no te faanaho i te mau mauhaa otuˈi no te vavahi i te mau uputa, no te hamani i te puu repo no te aro, no te faatia i te patu ati aˈe no te aro.+ 23 Mai te peu hiˈohiˈo haavare râ te reira i te mata o te feia* tei horeo ia ratou.+ E haamanaˈo râ oia i ta ratou hapa e e haru oia ia ratou.+

24 “Teie ïa ta te Arii hau ê e Fatu ra o Iehova e parau ra: ‘Na outou i rave ia haamanaˈohia ta outou iho hapa i te faaiteraa outou i ta outou mau hapa e te faaiteraa i ta outou mau hara i roto i ta outou mau ohipa atoa. I teie nei e ua haamanaˈohia outou, e hopoihia outou ma te faahepo.’*

25 “Ua tae mai râ to oe mahana, oe tei pepe ino roa, raatira ino o Iseraela,+ te taime o to oe faautuaraa hopea. 26 Teie ta te Arii hau ê e Fatu ra o Iehova e parau ra: ‘A tatara i te taamu upoo, e a rave ê i te hei arii.+ E taui te mau mea.+ A faateitei i tei haehaa,+ e a faahaehaa i tei teitei.+ 27 E faataahuri, e faataahuri, e faataahuri au i te reira. E eita te reira e riro i te tahi taata e ia tae roa mai oia e tiaraa mana to ˈna,+ e e horoa vau i te reira ia ˈna.’+

28 “E oe, tamaiti a te taata, a tohu e a parau: ‘Teie ta te Arii hau ê e Fatu ra o Iehova e parau ra no te ati Amona e no ta ratou mau parau ino.’ A parau: ‘E ˈoˈe! E ˈoˈe tei hutihia mai no te tahi taparahiraa. Ua faaanaanahia te reira no te haamou e no te anapa mai te uira. 29 Noa ˈtu te mau orama haavare e te peu hiˈohiˈo haavare no nia ia oe, e apǎpǎhia tei taparahihia i ǒ oe na nia iho i tei* haapohehia, te feia ino ua tae mai to ratou mahana, te taime o to ratou faautuaraa hopea. 30 A faahoˈi i te reira i roto i to ˈna vehî. E haava vau ia oe i te vahi i hamanihia ˈi oe, i to oe fenua tumu. 31 E manii au i to ˈu riri i nia ia oe. E puhipuhi au i nia ia oe i te auahi o to ˈu riri rahi, e e tuu atu vau ia oe i te feia haavî, te feia ite i te haamou i te taata.+ 32 E riro oe ei vahie no te auahi.+ E manii to oe toto i nia i te fenua, e eita oe e haamanaˈo-faahou-hia, o vau hoi, o Iehova, tei paraparau.’”

22 E tae faahou maira te parau a Iehova ia ˈu, a na ô ai: 2 “E oe, tamaiti a te taata, ua ineine anei oe i te faahiti i te haavaraa i nia* i te oire haamanii toto+ e i te faaite ia ˈna i ta ˈna mau mea hairiiri atoa?+ 3 E parau oe: ‘Teie ta te Arii hau ê e Fatu ra o Iehova e parau ra: “Oe te oire o te haamanii ra i te toto+ i ǒ oe, oe ua tae mai to oe taime,+ oe o te hamani ra i te idolo faufau* no te haaviivii ia oe,+ 4 ua hara oe i to oe haamaniiraa i te toto,+ e ua viivii oe i ta oe mau idolo faufau.+ Ua faaoioi oe i te hopea o to oe mau mahana, e ua tae mai te hopea o to oe mau matahiti. No reira vau e faariro ai ia oe ei faainoraa na te mau nunaa e ei faaoooraa na te mau fenua atoa.+ 5 E faaooo te mau fenua tapiri e te atea ia oe,+ oe tei viivii to oe iˈoa e tei î i te horuhoru. 6 Inaha, te faaohipa ra te raatira tataitahi o Iseraela i ǒ oe i to ˈna mana faatere no te haamanii i te toto.+ 7 I ǒ oe, te vahavahahia ra te metua tane e te metua vahine.+ Te tavirihia ra te taata ê e parahi ra i ǒ oe, e te hamani-ino-hia ra te tamarii aita e metua tane* e te vahine ivi.”’”+

8 “‘Te vahavaha ra oe i ta ˈu mau vahi moˈa, e te haafaufaa ore ra oe i ta ˈu mau Sabati.+ 9 I ǒ oe, te vai ra te feia pari haavare tei opua e haamanii i te toto.+ I ǒ oe, te amuhia ra te mau tusia i nia i te mau mouˈa e e haerea faufau to te taata i ǒ oe.+ 10 I ǒ oe, te faataehia ra te haama i nia i te roˈi* o te metua tane,+ e te maferahia ra te vahine tei viivii i to ˈna maˈi avaˈe.+ 11 I ǒ oe, te rave ra te hoê tane i te tahi ohipa hairiiri i nia i te vahine faaipoipo a to ˈna taata tupu,+ te haaviivii ra te tahi atu i ta ˈna iho hunoa vahine i to ˈna haerea faufau,+ e te mafera ra te tahi atu i to ˈna tuahine, te tamahine a to ˈna iho metua tane.+ 12 I ǒ oe, te fariihia ra te moni peta no te haamanii i te toto.+ Te horoa tarahu ra oe i te moni ma te faaaufau i te moni taime+ aore ra ia apîhia oe, e te taviri ra oe i te moni a to oe mau taata tupu.+ Oia mau, ua haamoˈe roa oe ia ˈu,’ te parau ra te Arii hau ê e Fatu ra o Iehova.

13 “‘Inaha, e paipai au i to ˈu rima ma te haafaufau no te apî i noaa mai ia oe i te ohipa taviri e no te mau haamaniiraa toto i ǒ oe. 14 E itoito noa anei oe* e e puai noa anei to oe rima i te mau mahana e ohipa mai ai au no te tairi ia oe?+ O vau, o Iehova, tei paraparau, e e ohipa mai iho â vau. 15 E haapurara vau ia oe i rotopu i te mau nunaa,+ e haapurara vau ia oe na te mau fenua, e e tinai au i to oe viivii.+ 16 E faahaamahia oe i mua i te mau nunaa, e e ite oe o vau o Iehova.’”+

17 E tae faahou maira te parau a Iehova ia ˈu, a na ô ai: 18 “Tamaiti a te taata, ua riro te nunaa o Iseraela no ˈu mai te ota faufaa ore. E veo anaˈe ratou, e bidila, e auri e e tapau i roto i te umu. Ua riro ratou ei ota ario.+

19 “Teie ïa ta te Arii hau ê e Fatu ra o Iehova e parau ra: ‘No te mea ua riro outou pauroa mai te ota faufaa ore,+ te haaputuputu nei au ia outou pauroa i roto ia Ierusalema. 20 Mai te ario e te veo e te auri e te tapau e te bidila o te haaputuhia i roto i te umu ia puhipuhihia te auahi i nia iho no te faatahe i te reira, mea na reira vau ia haaputuputu ia outou pauroa i roto i to ˈu riri e i roto i to ˈu riri rahi, e e puhipuhi au i nia ia outou no te faatahe ia outou.+ 21 E amui au ia outou pauroa e e puhipuhi au i nia iho ia outou i te auahi o to ˈu riri rahi,+ e e tahe outou i roto i te oire.+ 22 Mai te ario e tahe i roto i te umu, e tahe atoa ïa outou i roto i te oire. E e ite outou e na ˈu, na Iehova, i manii i to ˈu riri rahi i nia ia outou.’”

23 E tae faahou maira te parau a Iehova ia ˈu, a na ô ai: 24 “Tamaiti a te taata, a parau ia ˈna: ‘E fenua oe o te ore e tamâhia e o te ore e mairihia i te ûa i te mahana o te riri. 25 Ua opua ta oe mau peropheta i ǒ oe i te ino,+ mai te hoê liona uuru e hahae ra i ta ˈna i aˈuaˈu.+ Te haapohe ra ratou i te taata.* Te haru ra ratou i te mau faufaa e te mau mea moni rahi. Mea rahi te vahine ivi i ǒ oe no ratou aˈe. 26 Ua ofati ta oe mau tahuˈa i ta ˈu ture,+ e ua haaviivii noa ratou i ta ˈu mau vahi moˈa.+ No ratou aita e taa-ê-raa i rotopu i te mea moˈa e te mea moˈa ore,+ aita ratou i faaite eaha te mea viivii e eaha te mea viivii ore,+ aita ratou i hinaaro e haapao i ta ˈu mau Sabati, e ua vahavahahia vau i ǒ ratou. 27 To oe huiarii i ǒ oe, mai te luko ïa e hahae ra i ta ratou i aˈuaˈu. Ua haamanii ratou i te toto e ua haapohe i te taata* ia apîhia ratou i te ohipa taviri.+ 28 Ua pǎte ta oe mau peropheta i ta ratou mau ohipa i te puˈa. E orama haavare ta ratou e ite ra e e tohu haavare+ ta ratou e faaite ra, e te na ô ra ratou: “Teie ta te Arii hau ê e Fatu ra o Iehova e parau ra,” aita râ hoi Iehova i paraparau. 29 Ua rave te mau taata o te fenua i te ohipa taviri e te ohipa eiâ,+ ua hamani ino ratou i tei ere e tei veve, ua taviri ratou i te taata ê e parahi ra i rotopu ia ratou e ua faaere ia ˈna i te parau-tia.’

30 “‘Te imi ra vau i te tahi taata i rotopu ia ratou o te tataî i te patu ofai aore ra o te tia i mua ia ˈu i te vahi o te patu tei vavahihia no te paruru i te fenua, ia ore te reira ia haamouhia,+ aita râ i itehia mai ia ˈu. 31 E manii ïa vau i to ˈu riri i nia ia ratou e e haapohe au ia ratou i te auahi o to ˈu riri rahi. E faatae au i te mau faahopearaa o to ratou haerea i nia i to ratou upoo,’ te parau ra te Arii hau ê e Fatu ra o Iehova.”

23 Tae faahou maira te parau a Iehova ia ˈu, a na ô ai: 2 “Tamaiti a te taata, te vai ra e piti vahine, e tamahine na te hoê â metua vahine.+ 3 Ua riro mai raua ei vahine taiata i Aiphiti.+ Mai to raua apîraa to raua taiata-noa-raa. I ǒ te romiromiraahia e te mirimiriraahia to raua tîtî a tahi ra hoi. 4 To raua iˈoa, o Ohola* te matahiapo, e o Oholiba* to ˈna teina. Na ˈu raua e ua fanau mai raua i te tamaiti e te tamahine. No to raua iˈoa, Ohola o Samaria ïa,+ e Oholiba o Ierusalema ïa.

5 “Haamata ihora Ohola i te taiata,+ na ˈu hoi oia. Hinaaro uˈana ihora oia i ta ˈna mau tane,+ to Asura+ i pihai iho mai. 6 E tavana ratou ma te ahu ninamu e e huitoofa, e tane apî haviti anaˈe i nia iho i ta ratou mau puaahorofenua. 7 Taiata noa ˈtura oia e pauroa te taata haviti roa ˈˈe o Asura, e haaviivii ihora oia ia ˈna+ i te mau idolo faufau* a te feia ta ˈna i hinaaro uˈana. 8 Aita oia i haapae i te peu taiata ta ˈna i rave na i Aiphiti, i taoto na hoi ratou ia ˈna i to ˈna apîraa, e ua mirimiri ratou i to ˈna tîtî a tahi ra hoi, e ua haamâha i to ratou hinaaro uˈana* i nia ia ˈna.+ 9 Tuu atura ïa vau ia ˈna i te rima o ta ˈna mau tane, to Asura,+ ta ˈna i hinaaro uˈana. 10 Faaite ihora ratou i to ˈna vai-tahaa-raa,+ haru ihora i ta ˈna mau tamaiti e tamahine,+ e haapohe atura ia ˈna i te ˈoˈe. Tui ihora to ˈna roo i rotopu i te mau vahine, e faautua aˈera ratou ia ˈna.

11 “I te iteraa to ˈna teina o Oholiba i te reira, riro maira to ˈna hinaaro uˈana ei mea faufau aˈe, e mea ino aˈe ta ˈna peu taiata i ta to ˈna tuaana.+ 12 Hinaaro uˈana ihora oia i to Asura+ i pihai iho mai, te mau tavana e huitoofa mea unauna to ratou ahu e to nia iho ratou i te mau puaahorofenua, e tane apî haviti anaˈe. 13 I to ˈna haaviiviiraa ia ˈna, ite ihora vau e hoê â haerea to raua.+ 14 Tamau noa ihora râ oia i te faarahi i ta ˈna mau peu taiata. Ua ite oia i te hohoˈa o te tahi mau tane tei nanaˈohia i nia i te patu, te hohoˈa nanaˈohia o to Kaladaio tei penihia i te û uteute, 15 e hatua to nia iho i to ratou tauupu, e taamu upoo aano to nia iho i to ratou upoo, e aito ia hiˈohia ˈtu, e hohoˈa anaˈe no to Babulonia tei fanauhia i te fenua o to Kaladaio. 16 I to ˈna iho â iteraa ia ratou, hinaaro uˈana ihora oia ia ratou, e tono ihora oia i te vea ia ratou ra i Kaladaio.+ 17 Haere noa maira ïa to Babulonia i to ˈna roˈi herehere, e haaviivii aˈera ratou ia ˈna i to ratou hinaaro uˈana.* I muri iho i to ˈna viiviiraa ia ratou, fariu ê maira oia ia ratou ma te haafaufau.

18 “A tamau ai oia i te taiata ma te haama ore e i te faaite i to ˈna vai-tahaa-raa,+ ua fariu ê mai au ia ˈna ma te haafaufau, mai ia ˈu i fariu ê mai i to ˈna tuaana ma te haafaufau.+ 19 E faarahi noa ihora oia i ta ˈna mau peu taiata,+ a haamanaˈo atu ai oia i to ˈna apîraa a taiata ˈi oia i te fenua o Aiphiti.+ 20 Ua hinaaro uˈana oia ia ratou mai te mau vahine a te mau tane mai to te asini e mai to te puaahorofenua to ratou mero atiraa. 21 Ua mihi oe i te haerea faufau i to oe apîraa i Aiphiti,+ a mirimirihia ˈi to oe tîtî, te tîtî o to oe apîraa.+

22 “No reira, Oholiba, teie ta te Arii hau ê e Fatu ra o Iehova e parau ra: ‘Teie au e turai nei i ta oe mau tane+ ta oe i huri tua mai ma te haafaufau, e e faahaere mai au ia ratou na te mau vahi atoa e aro ia oe,+ 23 to Babulonia+ e to Kaladaio+ taatoa, te mau tane no Pekoda,+ no Soa e no Koa, e pauroa to Asura. Pauroa ratou e tane apî haviti, e tavana e e huitoofa, e aito e e tane tei maiti-maitai-hia,* to nia iho ratou pauroa i te puaahorofenua. 24 E aro ratou ia oe ma te haruru o te mau pereoo tamaˈi e o te mau huira, ma te faehau e rave rahi, ma te paruru rahi e te paruru nainai* e te taupoo auri. E tia ratou ati aˈe ia oe, e e vaiiho vau ia ratou ia haava, e e haava ratou ia oe mai ta ratou e hinaaro.+ 25 E faatae au i to ˈu riri i nia ia oe, e e rave ratou ia oe ma te riri rahi. E tâpû ratou i to oe ihu e to oe tariˈa, e e pohe te toea i ǒ oe i te ˈoˈe. E hopoi ê ratou i ta oe mau tamaiti e ta oe mau tamahine, e e pau te toea i ǒ oe i te auahi.+ 26 E tatara ratou i to oe ahu+ e e haru ratou i ta oe mau taoˈa faanehenehe.+ 27 E tinai au i to oe haerea faufau e ta oe peu taiata,+ tei haamata i te fenua o Aiphiti.+ E faaea oe i te hiˈo ia ratou, e eita oe e haamanaˈo faahou ia Aiphiti.’

28 “Teie hoi ta te Arii hau ê e Fatu ra o Iehova e parau ra: ‘Fatata vau i te tuu ia oe i te feia mea hae na oe, te feia ta oe i fariu ê mai ma te haafaufau.+ 29 E rave ratou ia oe ma te hae, e hopoi ê ratou i te mau mea atoa i rohi ai oe+ e e vaiiho mai ratou ia oe aita e ahu, e e vai tahaa noa oe. E faaitehia te vai-tahaa-raa haama o ta oe peu tia ore, to oe haerea faufau e ta oe peu taiata.+ 30 E ravehia teie mau mea i nia ia oe no te mea ua na muri oe i te mau nunaa mai te hoê vahine taiata,+ no te mea ua haaviivii oe ia oe i ta ratou mau idolo faufau.+ 31 Hoê â haerea to orua to oe tuaana,+ e e tuu vau i ta ˈna auˈa i roto i to oe rima.’+

32 “Teie ta te Arii hau ê e Fatu ra o Iehova e parau ra:

“O vau hoi tei paraparau,” te parau ra te Arii hau ê e Fatu ra o Iehova.’

35 “Teie ïa ta te Arii hau ê e Fatu ra o Iehova e parau ra: ‘No te mea ua haamoˈe oe ia ˈu e ua mata ê roa oe ia ˈu,*+ e faaruru oe i te mau faahopearaa o to oe haerea faufau e ta oe mau peu taiata.’”

36 E parau maira Iehova ia ˈu: “Tamaiti a te taata, e haava anei oe ia Ohola e ia Oholiba+ e e faaite anei oe ia raua i ta raua mau peu hairiiri? 37 Ua faaturi*+ raua, e e toto tei to raua rima. Aita raua i faaturi noa e ta ratou mau idolo faufau, ua tanina atoa râ raua i ta raua mau tamarii ta raua i fanau mai ia ˈu, ei maa na ta ratou mau idolo.+ 38 Teie atoa ta raua i rave mai ia ˈu: Ua haaviivii raua i to ˈu nao* i taua mahana ra, e ua haafaufaa ore raua i ta ˈu mau Sabati. 39 I muri iho i to raua haapoheraa i ta raua mau tamarii ei tusia na ta ratou mau idolo faufau,+ ua tomo raua i roto i to ˈu nao no te haaviivii i te reira+ i taua noa mahana ra. Tera ta raua i rave i roto i to ˈu hiero. 40 Ua tono atoa raua i te vea ia haere mai te tane na te atea mai.+ A haere mai ai ratou, horoi ihora oe ia oe, parai ihora i to oe mata i te peni e faanehenehe ihora ia oe i te mau taoˈa faanehenehe.+ 41 Parahi ihora oe i nia iho i te hoê roˈi+ nehenehe e amuraa maa tei faaineinehia i mua noa mai,+ i nia iho to oe tuuraa i ta ˈu mea noˈanoˈa+ e ta ˈu monoˈi.+ 42 I reira i faaroohia ˈi e rave rahi tane haapeapea ore, e feia inu ava to rotopu ia ratou na te medebara i te aratairaahia mai. Ua tamau ratou i te fifi rima i nia i te rima o te mau vahine e ua tuu i te hei nehenehe i nia iho i to ratou upoo.

43 “Parau atura vau no te vahine tei rohirohi roa i te faaturiraa: ‘E tamau hoi oia i te rave i ta ˈna peu taiata.’ 44 Tamau ihora ïa ratou i te tomo i ǒ ˈna, mai te tahi taata ia tomo i ǒ te hoê vahine taiata. Mea na reira ratou i te tomoraa i ǒ Ohola e i ǒ Oholiba, na vahine haerea faufau. 45 E haava râ te tahi mau taata parau-tia ia ˈna* ma te tano no ta ˈna faaturi+ e haamaniiraa toto.+ E faaturi hoi raua, e e toto tei to raua rima.+

46 “Teie hoi ta te Arii hau ê e Fatu ra o Iehova e parau ra: ‘E faahaerehia mai te tahi nuu e aro ia raua no te faariro ia raua ei riariaraa na te taata e ei taoˈa e haruhia.+ 47 E taora taua nuu ra i te ofai i nia ia raua+ e e haapohe ratou ia raua i ta ratou mau ˈoˈe. E haapohe ratou i ta raua mau tamaiti e tamahine+ e e tanina ratou i to raua na fare.+ 48 E faaore au i te haerea faufau i te fenua e pauroa te vahine te huti mai i te haapiiraa e te ore e pee i to orua haerea faufau.+ 49 E faautua ratou ia orua no to orua haerea faufau e ta orua mau hara i rave e ta orua mau idolo faufau. E ite ïa orua e o vau te Arii hau ê e Fatu ra o Iehova.’”+

24 I te iva o te matahiti, i te ahuru o te mahana o te ahuru o te avaˈe, tae faahou maira te parau a Iehova ia ˈu a na ô ai: 2 “Tamaiti a te taata, a tapao i teie taio mahana,* teie mahana. Ua haamata te arii o Babulonia i ta ˈna aroraa ia Ierusalema i teie mahana.+ 3 E a faatia i te tahi parau paari* no nia i te nunaa orure hau, e a parau no ratou:

“‘Teie ta te Arii hau ê e Fatu ra o Iehova e parau ra:

“A tuu i te pani.* A tuu atu i nia i te auahi e a ninii i te pape i roto.+

 5 A rave i te mau mamoe maitai roa ˈˈe o te nǎnǎ,+ e a apǎpǎ i te mau tâpû raau i raro aˈe i te pani e ati aˈe.

A vaipâ i te reira, e a tunu i te mau ivi i roto.”’

6 “No reira, teie ta te Arii hau ê e Fatu ra o Iehova e parau ra:

‘Ua ati te oire haamanii toto,+ te pani tutae auri, tei ore i tamâhia te tutae auri!

A tatara hoê hoê mai i te mau inaˈi i roto,+ eiaha e tuu i te kelero no te reira.

 7 To roto noa hoi ia ˈna te toto ta ˈna i haamanii,+ ua haamanii oia i te reira i raro noa i te mato.

Aita oia i haamanii i te reira i nia i te fenua, no te tapoˈi atu i te repo.+

9 “No reira, teie ta te Arii hau ê e Fatu ra o Iehova e parau ra:

‘Ua ati te oire haamanii toto!+

E faatia vau i te tahi apǎpǎraa vahie teitei.

E tahe to ˈna viivii i roto ia ˈna,+ e e pau to ˈna tutae auri i te auahi.

A taora ˈtu i te pani i roto i te auahi e to ˈna tutae auri!’

13 “‘Ua viivii oe no to oe haerea faufau.+ Ua tamata vau i te tamâ ia oe, aita râ oe i mâ i to oe viivii. Eita oe e mâ hou to ˈu riri rahi ia oe e pee ai.+ 14 O vau iho, o Iehova, tei paraparau. E tupu te reira. E ohipa vau ma te ore e otohe, ma te ore e oto, ma te ore e tatarahapa.+ E haavahia oe ia au i to oe mau haerea e ta oe mau raveraa,’ te parau ra te Arii hau ê e Fatu ra o Iehova.”

15 Tae faahou maira te parau a Iehova ia ˈu, a na ô ai: 16 “Tamaiti a te taata, fatata vau i te rave ê i tei herehia e oe hoê noa tairiraa.+ Eiaha e oto.* Eiaha atoa e taˈi, eiaha atoa ia tahe to oe roimata. 17 A autâ mamû noa, e eiaha e haapao i te mau peu oto no tei pohe.+ A taamu i to oe taamu upoo,+ e a oomo i to oe tiaa.+ Eiaha e tapoˈi i to oe huruhuru utu,+ e eiaha e amu i te maa ta vetahi ê e afai mai na oe.”*+

18 Paraparau atura vau i te nunaa i te poipoi, e pohe ihora ta ˈu vahine faaipoipo i te ahiahi. Rave ihora ïa vau i te poipoi aˈe mai tei faauehia ia ˈu. 19 Te parau mai ra te nunaa ia ˈu: “Eita anei oe e faaite ia matou eaha ta matou ohipa i roto i teie mau mea ta oe e rave nei?” 20 Pahono atura vau ia ratou: “Ua tae mai te parau a Iehova ia ˈu, a na ô ai: 21 ‘A parau i te nunaa o Iseraela: “Teie ta te Arii hau ê e Fatu ra o Iehova e parau ra: ‘Fatata vau i te haaviivii i to ˈu nao,*+ te tumu e teoteo rahi ai outou, te mea faufaa roa no outou e ta to outou aau e hinaaro. Ta outou mau tamaiti e tamahine tei ore i haere mai na muri ia outou, e pohe ïa i te ˈoˈe.+ 22 I reira outou e rave ai mai ta ˈu iho â i rave. Eita outou e tapoˈi i to outou huruhuru utu, e eita outou e amu i te maa ta vetahi ê e afai mai na outou.+ 23 Ei nia i to outou upoo to outou taamu upoo, e ei nia i to outou avae to outou tiaa. Eita outou e oto aore ra e taˈi. E pê râ outou no ta outou mau hape,+ e e autâ outou te tahi i te tahi. 24 Ua riro Ezekiela ei tapao no outou.+ Mai ta ˈna iho â i rave, e na reira outou. Ua tupu anaˈe te reira, e ite outou o vau te Arii hau ê e Fatu ra o Iehova.’”’”

25 “E oe tamaiti a te taata, i te mahana e rave ê ai au i ta ratou mau pare, te mea nehenehe e oaoa ˈi ratou, te mea faufaa roa no ratou, ta to ratou aau e hinaaro, e ta ratou mau tamaiti e tamahine,+ 26 na te tahi taata tei ora mai e faatia ia oe.+ 27 I taua mahana ra, e hamǎmǎ oe i to oe vaha e e paraparau oe i tei ora mai, e ere oe mea vava faahou.+ E riro oe ei tapao no ratou, e e ite ratou o vau o Iehova.”

25 Tae faahou maira te parau a Iehova ia ˈu, a na ô ai: 2 “Tamaiti a te taata, a fariu i te ati Amona,+ e a tohu i te mau ati ta ratou e faaruru.+ 3 E parau oe i te ati Amona: ‘A faaroo i te parau a te Arii hau ê e Fatu ra o Iehova. Teie ta te Arii hau ê e Fatu ra o Iehova e parau ra: “No te mea ua parau outou ua tano te haaviiviiraahia to ˈu nao,* te vai-ano-raa te fenua o Iseraela e te hopoi-ê-raahia te nunaa o Iuda, 4 te tuu nei au ia outou ei tuhaa na to hitia o te râ ia fatu ratou. E faatia ratou i to ratou mau puhapa* i ǒ outou, e patia ratou i to ratou mau fare ie i rotopu ia outou. E amu ratou i ta outou maa hotu e e inu ratou i ta outou û. 5 E faariro vau ia Raba+ ei vahi aihere no te kamela, e te fenua o te ati Amona ei vahi faafaaearaa no te nǎnǎ mamoe. E ite ïa outou o vau o Iehova.”’”

6 “Teie hoi ta te Arii hau ê e Fatu ra o Iehova e parau ra: ‘No te mea ua paipai outou i to outou rima,+ ua taataahi to outou avae e ua oaoa outou ma te vahavaha rahi no tei roohia e te fenua o Iseraela,+ 7 e toro ïa vau i to ˈu rima no te horoa ia outou ei taoˈa haru na te mau nunaa. E haapohe au ia outou mai rotopu mai i te mau nunaa e e haamou vau ia outou mai rotopu i te mau fenua.+ E faaore au ia outou, e e ite outou o vau o Iehova.’

8 “Teie ta te Arii hau ê e Fatu ra o Iehova e parau ra: ‘No te mea ua parau Moabi+ raua Seira:+ “Inaha, mai te tahi atu mau nunaa atoa te nunaa o Iuda,” 9 te faaite roa nei au i te taha mouˈa o Moabi i to ˈna mau oire piri i te otia, te nehenehe* o to ˈna fenua, Bete-iesimota, Baala-meona e tae roa i Kiriataima.+ 10 E horoa vau i te reira e te ati Amona ei tuhaa na to Hitia o te râ ia fatu ratou,+ ia ore te ati Amona ia haamanaˈohia i rotopu i te mau nunaa.+ 11 E faautua vau ia Moabi,+ e e ite ratou o vau o Iehova.’

12 “Teie ta te Arii hau ê e Fatu ra o Iehova e parau ra: ‘Ua faatae Edoma i te tahooraa i nia i te nunaa o Iuda e e hapa rahi ta ˈna i te tahooraa ia ratou.+ 13 No reira, teie ta te Arii hau ê e Fatu ra o Iehova e parau ra: “E toro atoa vau i to ˈu rima e tairi ia Edoma e e haapohe au i te taata e te animara atoa i reira, e e faaano vau ia ˈna.+ Mai Temana tae roa i Dedana, e pohe ratou i te ˈoˈe.+ 14 ‘E faatae au i te tahooraa i nia ia Edoma na roto i te rima o to ˈu nunaa o Iseraela.+ Na ratou e faatae i to ˈu riri e to ˈu riri rahi tahoo i nia ia Edoma, ia faaruru ratou i ta ˈu tahooraa,’+ te parau ra te Arii hau ê e Fatu ra o Iehova.”’

15 “Teie ta te Arii hau ê e Fatu ra o Iehova e parau ra: ‘No to ratou riri rahi tamau, ua imi te mau Philiseti ma te manaˈo ino* i te tahoo e te haamou.+ 16 No reira, teie ta te Arii hau ê e Fatu ra o Iehova e parau ra: “Teie au e toro nei i to ˈu rima e tairi i te mau Philiseti,+ e haapohe au i te mau Kereti+ e e haamou vau i te toea o te feia e faaea ra na te pae miti.+ 17 E faatae au i nia ia ratou i te tahooraa rahi ma te utua ino mau, e e ite ratou o vau o Iehova ua faatae anaˈe atu vau i ta ˈu tahooraa i nia ia ratou.”’”

26 I te 11 o te matahiti, i te mahana matamua o te avaˈe, tae maira te parau a Iehova ia ˈu a na ô ai: 2 “Tamaiti a te taata, no te mea ua parau Turia no Ierusalema:+ ‘Ua tano! Ua tupararihia te uputa o te mau nunaa!+ E haere te mau mea atoa na ǒ nei i ǒ ˈu, e e rahi atu â ta ˈu faufaa i teie nei ua haamouhia oia.’ 3 No reira, teie ta te Arii hau ê e Fatu ra o Iehova e parau ra: ‘Teie au e aro nei ia oe, e Turia, e e faatae atu vau e rave rahi nunaa no te aro ia oe, mai te miti ia huri mai i to ˈna mau are. 4 E vavahi ratou i te mau patu o Turia e e huri ratou i to ˈna mau pare i raro.+ E paraˈu vau i te repo e e faariro vau ia ˈna ei ofai anaana e te vai ano. 5 E riro oia ei vahi taraˈiraa upeˈa i ropu i te moana.’+

“‘O vau hoi tei paraparau,’ te parau ra te Arii hau ê e Fatu ra o Iehova, ‘e e riro oia ei taoˈa haru na te mau nunaa. 6 E tairihia to ˈna mau oire* i te mataeinaa i te ˈoˈe, e e ite te taata o vau o Iehova.’

7 “Teie hoi ta te Arii hau ê e Fatu ra o Iehova e parau ra: ‘Teie au e faatae atu nei i te arii Nebukanesa o Babulonia e aro ia Turia na apatoerau mai.+ E arii oia no te mau arii,+ ma te puaahorofenua,+ te pereoo tamaˈi,+ te feia faahoro puaahorofenua e te nuu e rave rahi faehau.* 8 E haamou oia i to oe mau oire i te mataeinaa i te ˈoˈe, e faatia oia i te tahi patu ati aˈe, e hamani oia i te tahi puu repo e e faatia oia i te tahi aua paruru no te aro ia oe. 9 E vavahi oia i ta oe mau patu i ta ˈna mauhaa otuˈi,* e e huri oia i ta oe mau pare i raro i ta ˈna mau opahi.* 10 E rahi roa ta ˈna mau puaahorofenua a poˈi roa ˈi oe i te repo, e e aueue ta oe mau patu ia tomo oia i to oe mau uputa i te haruru o te feia faahoro puaahorofenua, te mau huira e te mau pereoo, mai te mau taata ia faura ˈtu i roto i te tahi oire ua marua to ˈna mau patu. 11 E taataahi te maiuu o ta ˈna mau puaahorofenua i ta oe mau aroâ atoa.+ E haapohe oia i to oe nunaa i te ˈoˈe, e e topa ta oe mau pou etaeta i raro. 12 E haruhia ta oe mau faufaa e ta oe mau taoˈa hoo,+ e hurihia ta oe mau patu i raro, e e vavahihia to oe mau fare nehenehe. I reira e taorahia ˈi ta oe mau ofai, ta oe mau taoˈa raau e ta oe repo i roto i te pape.’

13 “‘E faaore au i te reo o ta oe mau himene, e eita te taˈi o ta oe mau kinura e faaroo-faahou-hia.+ 14 E faariro vau ia oe ei ofai anaana e te vai ano, e e riro oe ei vahi taraˈiraa upeˈa.+ E ore roa oe e patu-faahou-hia, o vau hoi, o Iehova, tei paraparau,’ te parau ra te Arii hau ê e Fatu ra o Iehova.

15 “Teie ta te Arii hau ê e Fatu ra o Iehova e parau ra ia Turia: ‘I te haruru o to oe toparaa, ia uuru te feia e pohe ra,* ia tupu te tahi taparahiraa taata i rotopu ia oe, eita anei te mau motu e aueue?+ 16 Pauroa te huiarii* o te moana te pou mai nia mai i to ratou mau terono e te tatara i to ratou mau ahu roa* e to ratou mau ahu nira-faanehenehe-hia, e e rûrû ratou.* E parahi ratou i raro, e rûrû noa ratou e e hiˈo ratou ia oe ma te maere.+ 17 E himene ratou i te tahi himene oto+ no oe e e na ô ratou:

19 “Teie hoi ta te Arii hau ê e Fatu ra o Iehova e parau ra: ‘Ia haamou vau ia oe mai te mau oire aita e taata, ia ninahia oe e au i te pape arepurepu e ia moˈe oe i te mau pape puai,+ 20 e hopoi au ia oe e te feia e pou ra i te apoo* i te nunaa no mutaa iho ra. E haaparahi au ia oe i te vahi haehaa roa ˈˈe, mai te mau vahi no mutaa iho ra tei haamouhia, e te feia e pou ra i te apoo,+ ia ore oe ia parahihia e te taata. I reira vau e faateitei ai* i te fenua o te feia ora.

21 “‘E roohia oe i te riaria tupu taue, e aita faahou oe.+ E imihia oe, e ore roa râ oe e ite-faahou-hia,’ te parau ra te Arii hau ê e Fatu ra o Iehova.”

“E Turia, o oe tei parau: ‘Ua hope roa vau i te haviti.’+

 8 O to Sidona e to Aravada+ to oe feia hôe.

O to oe iho mau taata aravihi, e Turia, to oe mau mataro.+

 9 Na te mau taata tehu* e te aravihi no Gebala+ i pǎte i to oe mau raau pahi ia ore te pape ia tomo.+

Pauroa te pahi o te moana e to ratou mau ihitai tei haere mai ia oe no te tapihoo.

10 E feia no Peresia, Luta e Puta+ to roto i ta oe nuu, ta oe mau aito.

E faatautau ratou i ta ratou mau paruru e to ratou mau taupoo auri i ǒ oe, a faahanahanahia ˈtu ai oe.

12 “‘“Ua tapihoo Taresisa+ e o oe no te rahi o ta oe faufaa.+ Ua taui ratou i te ario, te auri, te bidila e te tapau i ta oe mau faufaa.+ 13 Ua tapihoo Iavana, Tubala+ e Meteka+ e o oe, a taui ai i te tîtî+ e te taoˈa veo i ta oe mau taoˈa hoo. 14 Ua taui te huaai o Togarama+ i te puaahorofenua, te puaahorofenua tamaˈi e te pheradi i ta oe mau faufaa. 15 Ua tapihoo to Dedana+ e o oe. Ua tihepu oe i te feia tapihoo i nia e rave rahi motu. Ua horoa mai ratou na oe i te ivori+ e te raau ereere taa ê ei ô titauhia. 16 Ua tapihoo Edoma e o oe no te rahi o ta oe mau taoˈa. Ua horoa mai ratou i te nepheka, te huruhuru mamoe vareau, te ahu nira-faanehenehe-hia araaraa, te ahu maitai roa, te toˈa, e te adama ei taui i ta oe mau faufaa.

17 “‘“Ua tapihoo Iuda e te fenua o Iseraela e o oe, a horoa mai ai i te sitona no Minita,+ te maa maitai, te meri,+ te hinu e te zuri+ ei taui i ta oe mau faufaa.+

18 “‘“Ua tapihoo Damaseko+ e o oe no te rahi o ta oe mau taoˈa e no ta oe mau faufaa atoa, a hoo atu ai i te uaina no Helibona e te huruhuru mamoe no Zahara.* 19 Ua horoa mai Vedana e Iavana no Uzala i te auri tupaihia, te kade, e te aeho noˈanoˈa* ei taui i ta oe mau faufaa. 20 Ua tapihoo Dedana+ e o oe i te ahu no te parahi i nia i te animara.* 21 Ua tihepu oe i te Arabia e pauroa te raatira o Kedara,+ e feia hoo fanauˈa mamoe, mamoe oni e puaaniho.+ 22 Ua tapihoo te feia tapihoo no Seba e Raama+ e o oe. Ua horoa mai ratou i te mau faanoˈanoˈa atoa ua rau te huru, te ofai maitai roa e te auro ei taui i ta oe mau faufaa.+ 23 O Harana,+ o Kane, o Edene,+ te feia tapihoo no Seba,+ o Asuhura+ e Kilimada tei tapihoo e o oe. 24 I nia i to oe mau mahora, ua tapihoo ratou i te ahu nehenehe, te ahu tapoˈi ninamu nira-faanehenehe-hia e te araaraa, e te vauvau û rau, ua taamuhia pauroa te reira i te taura.

28 Ia tuô to oe mau mataro, e aueue te fenua na tatahi.

32 A oto ai ratou, e himene ratou i te tahi himene oto e e auê ratou no oe:

‘O vai mai ia Turia, o te mamû noa i teie nei i ropu i te moana?+

33 I te tapaeraa mai ta oe mau faufaa na te moana i tua, ua mauruuru e rave rahi nunaa ia oe.+

I te rahi o ta oe faufaa e ta oe mau taoˈa hoo, ua taoˈahia te mau arii o te fenua.+

36 E hio te feia tapihoo i rotopu i te mau nunaa no tei roohia e oe.

28 Tae faahou maira te parau a Iehova ia ˈu, a na ô ai: 2 “Tamaiti a te taata, a parau i te raatira o Turia: ‘Teie ta te Arii hau ê e Fatu ra o Iehova e parau ra:

“No te mea ua teoteohia to oe aau,+ te parau noa ra oe: ‘E atua vau.

Te parahi nei au i nia i te terono o te hoê atua i ropu i te moana.’+

 3 Inaha, e feruriraa paari aˈe ïa to oe i to Daniela?+

Aita atoa ïa e parau huna i hunahia ia oe?

6 “‘No reira, teie ta te Arii hau ê e Fatu ra o Iehova e parau ra:

 9 E parau noa anei oe: ‘E atua vau,’ i te taata e haapohe ia oe?

E taata noa oe, e ere i te atua, i te rima o te feia e haaviivii ia oe.”’

11 E tae faahou maira te parau a Iehova ia ˈu, a na ô ai: 12 “Tamaiti a te taata, a himene i te tahi himene oto no te arii o Turia, e a parau ia ˈna: ‘Teie ta te Arii hau ê e Fatu ra o Iehova e parau ra:

13 I vai na oe i Edene, te ô a te Atua.

Ua faaineinehia te reira i te mahana i poietehia ˈi oe.

14 I faatoroa na vau ia oe mai te kerubi faatavaihia o te paruru.

I tia na oe i nia i te mouˈa moˈa o te Atua,+ e i haere na oe na rotopu i te mau ofai ura.

17 Ua teoteohia to oe aau no to oe haviti.+

Ua faaino oe i to oe paari no te unauna o to oe iho hanahana.+

E taora vau ia oe i raro i te fenua.+

E faariro vau ia oe ei mataitairaa na te mau arii.

18 No te rahi o ta oe hapa e ta oe tapihooraa tano ore, ua haaviivii oe i to oe mau vahi moˈa.

E tahu vau i te tahi auahi i roto ia oe, e e pau oe i te reira.+

E faariro vau ia oe ei rehu i nia i te fenua i mua i te feia atoa e mataitai ra ia oe.

19 Pauroa tei matau ia oe i rotopu i te mau nunaa te hiˈo ia oe ma te maere.+

20 E tae faahou maira te parau a Iehova ia ˈu, a na ô ai: 21 “Tamaiti a te taata, a fariu i Sidona,+ e a tohu i te mau ati ta ˈna e faaruru. 22 E parau oe: ‘Teie ta te Arii hau ê e Fatu ra o Iehova e parau ra:

23 E faatae au i te maˈi pee i ǒ ˈna e e tahe te toto i roto i to ˈna mau aroâ.

24 “‘“I reira te nunaa o Iseraela e ore faahou ai e haaatihia e te raau taratara mauiui,+ te feia o te vahavaha ia ratou. E e ite te taata o vau te Arii hau ê e Fatu ra o Iehova.”’

25 “‘Teie ta te Arii hau ê e Fatu ra o Iehova e parau ra: “Ia haaputuputu faahou vau i te nunaa o Iseraela mai rotopu mai i te mau nunaa i haapurarahia ˈi ratou,+ e haamoˈahia vau i rotopu ia ratou i mua i te mata o te mau nunaa.+ E e parahi ratou i to ratou fenua+ ta ˈu i horoa no ta ˈu tavini o Iakoba.+ 26 E parahi ratou i reira ma te taiâ ore,+ e patu ratou i te fare, e tanu ratou i te vine,+ e e parahi ratou ma te taiâ ore ua faautua anaˈe au i te feia atoa ati aˈe ia ratou o te vahavaha ia ratou.+ E e ite ratou o vau o Iehova to ratou Atua.”’”

29 I te ahuru o te matahiti, i te 12 o te mahana o te ahuru o te avaˈe, tae maira te parau a Iehova ia ˈu, a na ô ai: 2 “Tamaiti a te taata, a fariu ia Pharao arii o Aiphiti, e a tohu i te mau ati ta ˈna e ta to Aiphiti taatoa e faaruru.+ 3 A parau i teie mau parau: ‘Teie ta te Arii hau ê e Fatu ra o Iehova e parau ra:

Na ˈu i hamani i te reira no ˈu iho.’+

 4 E tuu vau i te tarou i roto i to oe taa e e tapiri au i te mau iˈa o Nile i nia i to oe mau poa.

E ume mai au ia oe i rapae i ta oe anavai Nile e pauroa te iˈa o Nile tei mau i nia i to oe mau poa.

 5 E faarue au ia oe i roto i te medebara, oe e pauroa te iˈa o Nile.

8 “‘No reira, teie ta te Arii hau ê e Fatu ra o Iehova e parau ra: “Teie au e faatae nei i te tahi ˈoˈe i nia ia oe,+ e e haapohe au i te taata e te animara atoa i ǒ oe. 9 E riro te fenua o Aiphiti ei vahi taata ore e te vai ano.+ E e ite ratou o vau o Iehova, ua parau hoi oe:* ‘Na ˈu te anavai Nile. Na ˈu i hamani i te reira.’+ 10 Te aro nei ïa vau ia oe e ta oe anavai Nile, e vai ano e e mǎrô te fenua o Aiphiti ia ˈu, ei fenua taata ore,+ mai Migadola+ tae atu i Siene,+ tae atu i te otia o Etiopia. 11 Aita e taata, aita atoa e animara e na roto atu i te haere,+ e eita taua fenua ra e parahihia e te taata e 40 matahiti. 12 E faariro vau i te fenua o Aiphiti ei fenua taata ore roa ˈˈe, e to ˈna mau oire ei mau oire taata ore roa ˈˈe e 40 matahiti.+ E e haapurara vau i to Aiphiti i rotopu i te mau nunaa e na te mau fenua.”+

13 “‘Teie hoi ta te Arii hau ê e Fatu ra o Iehova e parau ra: “I muri aˈe e 40 matahiti, e haaputuputu vau i to Aiphiti mai rotopu mai i te mau nunaa i haapurarahia ˈi ratou.+ 14 E faahoˈi mai au i te mau tîtî no Aiphiti i te fenua o Patarota,+ i to ratou fenua tumu, e e riro ratou ei faatereraa arii haihai roa. 15 E riro Aiphiti ei mea haihai aˈe i te tahi atu mau faatereraa arii e eita faahou oia e mana i nia i te tahi atu mau nunaa.+ E faariro vau ia ˈna ei mea haihai roa a ore atu ai e noaa ia ˈna ia haavî i te tahi atu mau nunaa.+ 16 E ore roa oia e tiaturi-faahou-hia e te nunaa o Iseraela,+ e haamanaˈo noa râ oia ia ratou i to ratou hape i te fariuraa i to Aiphiti no te ani i te tauturu. E e ite ratou o vau te Arii hau ê e Fatu ra o Iehova.”’”

17 E i te 27 o te matahiti, i te mahana matamua o te avaˈe matamua, tae maira te parau a Iehova ia ˈu, a na ô ai: 18 “Tamaiti a te taata, ua faarave Nebukanesa+ arii o Babulonia i ta ˈna nuu i te ohipa teimaha no te aro ia Turia.+ Ua pahure te mau upoo atoa e te mau tapono atoa. Aita râ oia e ta ˈna nuu i aufauhia no ta ˈna ohipa teimaha i rave no te aro ia Turia.

19 No reira, teie ta te Arii hau ê e Fatu ra o Iehova e parau ra: ‘Teie au e horoa nei i te fenua o Aiphiti na Nebukanesa arii o Babulonia,+ e hopoi ê oia i ta ˈna faufaa, e rave oia e rave rahi taoˈa, oia mau, e haru oia i te reira. E riro te reira ei aufauraa i ta ˈna nuu.’

20 “‘Ei faahoˈiraa no ta ˈna ohipa teimaha i rave no te aro ia ˈna,* e horoa vau i te fenua o Aiphiti na ˈna no te mea ua ohipa ratou no ˈu,’+ te parau ra te Arii hau ê e Fatu ra o Iehova.

21 “I taua mahana ra, e faatupu vau i te tahi tara no* te nunaa o Iseraela,+ e e faatia vau ia oe ia paraparau i rotopu ia ratou. E e ite ratou o vau o Iehova.”

30 E tae faahou maira te parau a Iehova ia ˈu, a na ô ai: 2 “Tamaiti a te taata, a tohu e a parau: ‘Teie ta te Arii hau ê e Fatu ra o Iehova e parau ra:

“A tuô: ‘Auê, te tae mai ra te mahana!’

 3 Fatata hoi te mahana, oia mau, fatata te tahi mahana o Iehova.+

Ei mahana ata+ ïa, ei taime faataahia no te mau nunaa.+

 6 Teie ta Iehova e parau ra:

“‘Mai Migadola+ tae roa i Siene+ e pohe ai ratou i te ˈoˈe i te fenua,’ te parau ra te Arii hau ê e Fatu ra o Iehova. 7 ‘E riro Aiphiti mai te fenua taata ore roa ˈˈe, e to ˈna mau oire mai te mau oire ano roa ˈˈe.+ 8 E ite ratou o vau o Iehova ua tahu anaˈe au i te tahi auahi i Aiphiti e ua perehu roa anaˈe to ˈna mau tauturu atoa. 9 I taua mahana ra, e tono vau i te vea na nia i te pahi ia rûrû to Etiopia o te tiaturi ia ˈna iho. E rapu ratou i te mahana e tae mai ra i nia ia Aiphiti, e tae mai iho â hoi te reira.’

10 “Teie ta te Arii hau ê e Fatu ra o Iehova e parau ra: ‘E haamou vau i te nahoa taata o Aiphiti i te rima o Nebukanesa arii o Babulonia.+ 11 E faahaerehia mai oia e ta ˈna mau pǔpǔ faehau, te mea taehae roa ˈˈe o te mau nunaa,+ no te haamou i te fenua. E huti ratou i ta ratou ˈoˈe e tairi ia Aiphiti e e faaî i te fenua i te taata tei haapohehia.+ 12 E faariro vau i te mau taheraa pape o Nile+ ei fenua mǎrô e e hoo atu vau i te fenua i te feia ino. E faariro vau i te fenua e pauroa to reira ei vahi taata ore i te rima o te feia ěê.+ O vau, o Iehova, tei paraparau.’

13 “Teie ta te Arii hau ê e Fatu ra o Iehova e parau ra: ‘E haamou atoa vau i te mau idolo faufau* e e faaore au i te mau atua faufaa ore o Nopha.+ Aita faahou e huiarii* i te fenua o Aiphiti, e e faatupu vau i te mǎtaˈu i te fenua o Aiphiti.+ 14 E faaano vau ia Patarota,+ e tahu vau i te tahi auahi i Zoana e e faautua vau ia No.+ 15 E manii au i to ˈu riri rahi i nia ia Sini, te pare o Aiphiti, e e haamou vau i to No. 16 E tahu vau i te tahi auahi i Aiphiti, e mehameha roa o Sini, e paohia te patu o No e e arohia Nopha te ao noa ra! 17 E pohe te mau tane apî o Ono e o Pibeseta i te ˈoˈe, e e hopoi-tîtî-hia to te mau oire. 18 I Tehaphanehesa e haapoirihia te mahana ua ofati anaˈe au i na raau zugo o Aiphiti i reira.+ E faaorehia to ˈna puai teoteo,+ e poˈi oia i te ata, e e hopoi-tîtî-hia to to ˈna mau oire.+ 19 E faautua vau ia Aiphiti, e e ite ratou o vau o Iehova.’”

20 E i te 11 o te matahiti, i te hitu o te mahana o te avaˈe matamua, tae maira te parau a Iehova ia ˈu, a na ô ai: 21 “Tamaiti a te taata, ua ofati au i te rima o Pharao arii o Aiphiti. Eita te reira e taamuhia no te rapaau, eita atoa e puohuhia ia puai te reira no te rave mai i te ˈoˈe.”

22 “No reira, teie ta te Arii hau ê e Fatu ra o Iehova e parau ra: ‘Teie au e aro nei ia Pharao arii o Aiphiti,+ e e ofati au i to ˈna rima, te mea puai e tei fati,+ e e haamarua vau i te ˈoˈe mai roto mai i to ˈna rima.+ 23 E e haapurara vau i to Aiphiti i rotopu i te mau nunaa e na te mau fenua.+ 24 E haapuai au i te rima* o te arii o Babulonia,+ e tuu vau i ta ˈu ˈoˈe i roto i to ˈna rima,+ e ofati au i te rima o Pharao, e e uuru roa oia i mua ia ˈna* mai te tahi taata e pohe ra. 25 E haapuai au i te rima o te arii o Babulonia, e tarere râ to Pharao rima. E ite te taata o vau o Iehova ua tuu anaˈe au i ta ˈu ˈoˈe i roto i te rima o te arii o Babulonia e ua tairi anaˈe oia i te fenua o Aiphiti i te reira.+ 26 E e haapurara vau i to Aiphiti i rotopu i te mau nunaa e na te mau fenua,+ e e ite te taata o vau o Iehova.’”

 4 No te pape i rahi ai oia, no te mau pape pihaa hohonu i teitei ai oia.

 5 No reira oia i teitei aˈe i te tahi atu mau tumu raau atoa o te fenua.

 8 Aita ˈtu e tumu arezi i roto i te ô a te Atua+ e nehenehe e faaauhia ia ˈna.

Aita ˈtu e tumu raau i roto i te ô a te Atua mea nehenehe mai ia ˈna.

10 “No reira, teie ta te Arii hau ê e Fatu ra o Iehova e parau ra: ‘No te mea ua rahi roa mai oia,* ua faateitei oia i to ˈna tupuai i roto i te ata, e ua teoteohia to ˈna aau no to ˈna teitei, 11 e tuu vau ia ˈna i te rima o te raatira puai o te mau nunaa.+ E faautua mau â oia ia ˈna, e e faarue au ia ˈna no to ˈna ino. 12 E e tâpû te feia ěê, te mea taehae roa ˈˈe o te mau nunaa, ia ˈna e e faarue ratou ia ˈna i nia i te mau mouˈa, e topa to ˈna mau rauere i te mau peho atoa, e e apǎpǎ noa to ˈna mau amaa tei ofatifatihia i roto i te mau tahora atoa o te fenua.+ Pauroa te nunaa o te fenua te haere mai raro aˈe mai i to ˈna marumaru e te faarue ia ˈna. 13 Pauroa te manu o te raˈi te ora i nia i to ˈna tumu tei tâpûhia, e pauroa te animara oviri o te fenua i nia i to ˈna mau amaa.+ 14 Ua na reirahia ia ore te tahi tumu raau i pihai iho i te mau pape ia teitei roa aore ra ia faateitei i to ˈna tupuai i roto i te mau ata e ia ore ia raea i te tahi tumu raau faararirari-maitai-hia i te pape te teitei o te ata. E tuuhia hoi ratou pauroa i te pohe, te fenua no raro, e te mau tamarii a te huitaata, o te pou ra i te apoo.’*

15 “Teie ta te Arii hau ê e Fatu ra o Iehova e parau ra: ‘I te mahana e pou ai oia i te Apoo,* e faatupu vau i te tahi oto. E tapoˈi au i te mau pape hohonu e e tapea vau i to ratou mau anavai rii ia mau te pape e rave rahi. E haapoiri au ia Lebanona no ˈna aˈe, e e mǎrô pauroa te tumu raau o te fenua. 16 I te haruru o to ˈna toparaa, e rûrû te mau nunaa ia ˈu ua haapou anaˈe au ia ˈna i te Apoo* e te feia atoa e pou ra i te apoo,* e e tamahanahanahia pauroa te tumu raau o Edene,+ te mea nehenehe roa ˈˈe e te mea maitai roa ˈˈe o Lebanona, pauroa tei faararirari-maitai-hia i te pape, i te fenua no raro. 17 Ua pou ratou i te Apoo* na muri ia ˈna, i te feia tei haapohehia i te ˈoˈe,+ ratou to ˈna mau tauturu* tei ora i raro aˈe i to ˈna marumaru i rotopu i te mau nunaa.’+

18 “‘Teihea tumu raau o Edene mai ia oe te hanahana e te rahi?+ Tera râ, e haapouhia mau â oe na muri i te mau tumu raau o Edene i te fenua no raro. E tarava oe i rotopu i te feia peritome-ore-hia, e te feia tei haapohehia i te ˈoˈe. Tera ta Pharao e to ˈna nahoa taata atoa e faaruru,’ te parau ra te Arii hau ê e Fatu ra o Iehova.”

 3 Teie ta te Arii hau ê e Fatu ra o Iehova e parau ra:

 7 ‘E ia pohe oe, e tapoˈi au i te raˈi e e haapoiri au i to ratou mau fetia.

11 Teie hoi ta te Arii hau ê e Fatu ra o Iehova e parau ra:

‘E tae te ˈoˈe a te arii o Babulonia i nia ia oe.+

E faahaehaa ratou i te teoteo o Aiphiti, e pauroa to ˈna nahoa taata te haamouhia.+

E himene ratou i te reira no nia ia Aiphiti e pauroa to ˈna nahoa taata,’ te parau ra te Arii hau ê e Fatu ra o Iehova.”

17 E i te 12 o te matahiti, i te 15 o te mahana o te avaˈe, tae maira te parau a Iehova ia ˈu, a na ô ai: 18 “Tamaiti a te taata, a tuô i te nahoa taata o Aiphiti e a haapou ia ˈna i te fenua no raro, o ˈna e te mau tamahine o te mau nunaa puai, e te feia e pou ra i te apoo.*

19 “‘Ia vai oe i hau aˈe i te haviti? A pou, e a tarava e te feia peritome-ore-hia!’

20 “‘E topa ratou i rotopu i te feia tei haapohehia i te ˈoˈe.+ Ua tuuhia oia i te ˈoˈe. A faaatea ê atu ia ˈna e to ˈna nahoa taata atoa.

21 “‘Mai te hohonuraa mai o te Apoo,* e paraparau te mau aito puai ia ˈna e to ˈna mau tauturu. E pou iho â ratou e e tarava mai te feia peritome-ore-hia, tei haapohehia i te ˈoˈe. 22 To reira Asura e ta ˈna nuu taatoa. Ua haaatihia o ˈna i to ratou mau apoo hunaraa atoa, pauroa ratou tei pohe i te ˈoˈe.+ 23 Tei te hohonuraa o te apoo* to ˈna mau apoo hunaraa, e ua haaatihia to ˈna apoo hunaraa i ta ˈna nuu, pauroa ratou tei haapohehia i te ˈoˈe, no te mea ua faatupu ratou i te riaria i te fenua o te feia ora.

24 “‘To reira Elama+ e pauroa to ˈna nahoa taata ati aˈe i to ˈna apoo hunaraa, pauroa ratou tei pohe i te ˈoˈe. Ua pou ratou ma te peritome-ore-hia i te fenua no raro, te feia tei faatupu i te riaria i te fenua o te feia ora. I teie nei, e haama noa ratou e te feia e pou ra i te apoo.* 25 Ua hamanihia te tahi roˈi no ˈna i rotopu i tei haapohehia, e pauroa to ˈna nahoa taata tei haaati i to ˈna mau apoo hunaraa. Mea peritome-ore-hia ratou pauroa, ua haapohehia i te ˈoˈe, no te mea ua faatupu ratou i te riaria i te fenua o te feia ora. E e haama noa ratou e te feia e pou ra i te apoo.* To rotopu oia i te feia tei haapohehia.

26 “‘To reira Meteka e Tubala+ e pauroa to raua* nahoa taata. Ua haaatihia oia* e pauroa to ratou* apoo hunaraa. E feia peritome-ore-hia ratou pauroa, tei puta roa i te ˈoˈe, no te mea ua faatupu ratou i te riaria i te fenua o te feia ora. 27 Eita anei ratou e tarava e te mau aito puai peritome-ore-hia, tei pou i te Apoo* e ta ratou mau mauhaa tamaˈi? E e tuu ratou i ta ratou mau ˈoˈe i raro aˈe i to ratou upoo* e ta ratou mau hara i nia iho i to ratou mau ivi, no te mea ua faatupu taua mau aito puai ra i te riaria i te fenua o te feia ora. 28 Area râ oe, e haaperehuhia i rotopu i te feia peritome-ore-hia, e e tarava oe e te feia tei haapohehia i te ˈoˈe.

29 “‘To reira Edoma,+ ua tarava to ˈna mau arii e pauroa to ˈna raatira, tei vahavaha i to ratou puai, i rotopu i te feia tei haapohehia i te ˈoˈe. E tarava atoa ratou e te feia peritome-ore-hia+ e te feia e pou ra i te apoo.*

30 “‘To reira pauroa te huiarii* no apatoerau, e pauroa to Sidona,+ tei pou ma te haama i te feia tei haapohehia, noa ˈtu te riaria ta ratou i faatupu no to ratou puai. E tarava ratou ma te peritome-ore-hia e te feia tei haapohehia i te ˈoˈe e e haama noa ratou e te feia e pou ra i te apoo.*

31 “‘E ite Pharao ia ratou pauroa, e e tamahanahanahia oia i te mau mea atoa ta to ˈna nahoa taata i faaruru.+ E haapohehia Pharao e ta ˈna nuu taatoa i te ˈoˈe,’ te parau ra te Arii hau ê e Fatu ra o Iehova.

32 “‘No te mea ua faatupu oia i te riaria i te fenua o te feia ora, e hunahia Pharao e pauroa to ˈna nahoa taata e te feia peritome-ore-hia, e te feia tei haapohehia i te ˈoˈe,’ te parau ra te Arii hau ê e Fatu ra o Iehova.”

6 “‘Ia ite râ te tiai i te ˈoˈe e tae mai ra e eita oia e faaoto i te pu+ e eita te nunaa e faaarahia e e tae mai te ˈoˈe a haapohe atu ai hoê o ratou, e pohe oia no ta ˈna iho hape, e titau râ vau i to ˈna toto i te taata tiai.’*+

7 “Area oe, tamaiti a te taata, ua faatoroa vau ia oe ei tiai no te nunaa o Iseraela. E ia faaroo oe i te tahi parau no roto i to ˈu vaha, e faaara ïa oe ia ratou no ˈu.+ 8 Ia parau vau i te taata ino: ‘Taata ino, e pohe mau â oe!,’+ eita râ oe e paraparau no te faaara i te taata ino e taui i to ˈna haerea, e pohe oia ei taata ino no ta ˈna iho hape,+ e titau râ vau ia oe i to ˈna toto. 9 Ia faaara râ oe i te taata ino ia fariu ê i to ˈna haerea e eita oia e farii e taui i to ˈna haerea, e pohe oia no ta ˈna hape,+ tera râ ua ora oe ia oe iho.+

10 “Area oe, tamaiti a te taata, a parau i te nunaa o Iseraela: ‘Ua parau outou: “Mea teimaha roa ta matou mau orureraa hau e ta matou mau hara i nia ia matou, a ino roa ˈi matou.+ E nafea ïa matou e ora noa ˈi?”’+ 11 A parau ia ratou: ‘“Te horeo nei au i to ˈu nei ora,” te parau ra te Arii hau ê e Fatu ra o Iehova, “eita vau e au ia pohe te taata ino,+ ia taui râ te taata ino i to ˈna haerea+ a ora noa ˈtu ai.+ A fariu ê mai, a fariu ê mai i to outou mau haerea ino,+ eaha hoi outou e pohe ai, e te nunaa o Iseraela?”’+

12 “Area oe, tamaiti a te taata, a parau i te mau tamarii a to oe nunaa: ‘Eita te parau-tia a te taata parau-tia e faaora ia ˈna ia orure hau oia.+ Eita atoa te ino o te taata ino e faaturori ia ˈna ia fariu ê mai oia i to ˈna ino.+ Eita atoa te tahi taata parau-tia e nehenehe e ora noa no ta ˈna parau-tia i te mahana e hara ˈi oia.+ 13 Ia parau vau i te taata parau-tia: “E ora noa mau â oe,” e e tiaturi oia i ta ˈna iho parau-tia a rave atu ai i te mea ino,*+ eita hoê o ta ˈna mau ohipa parau-tia e haamanaˈohia, e pohe oia no te ino ta ˈna i rave.+

14 “‘E ia parau vau i te taata ino: “E pohe mau â oe,” e e fariu ê mai oia i ta ˈna hara a rave atu ai i te mea afaro e te tia,+ 15 ia faahoˈi oia i tei ravehia e ana ei piri taoˈa,+ ia faahoˈi oia i te moni ta ˈna i eiâ,+ e ia pee oia i te mau faatureraa o te ora ma te ore e rave i te mea ino, e ora noa oia.+ Eita oia e pohe. 16 Aita e hara ta ˈna i rave te faahitihia* no te faahapa ia ˈna.+ No te raveraa i te mea afaro e te tia, e ora noa oia.’+

17 “Ua parau râ to oe nunaa: ‘Aita e tano ra ta Iehova raveraa,’ o ta ratou hoi raveraa aita e tano ra.

18 “Ia faarue te tahi taata parau-tia i to ˈna haerea parau-tia a rave atu ai i te ino, e pohe oia no te reira.+ 19 Ia fariu ê mai râ te tahi taata ino i to ˈna ino a rave atu ai i te mea afaro e te tia, e ora noa oia no te na reiraraa.+

20 “Ua parau râ outou: ‘Aita e tano ra ta Iehova raveraa.’+ E haava vau ia outou tataitahi ia au i ta ˈna raveraa, e te nunaa o Iseraela.”

21 E i te 12 o te matahiti o to matou hopoi-ê-raahia, i te pae o te mahana o te ahuru o te avaˈe, haere maira te tahi taata tei ora mai Ierusalema mai,+ e na ô maira: “Ua haruhia te oire!”+

22 E te po na mua ˈˈe te taata tei ora ˈtu a haere mai ai, haere maira te rima o Iehova i nia ia ˈu, e faahamǎmǎ ihora oia i to ˈu vaha hou te taata a haere mai ai i te poipoi. Ua hamǎmǎ ïa to ˈu vaha, e aita faahou vau i vava.+

23 Tae maira te parau a Iehova ia ˈu, a na ô ai: 24 “Tamaiti a te taata, te parau nei te feia e parahi ra i tera mau vahi ano+ no nia i te fenua o Iseraela: ‘Hoê noa taata o Aberahama, e inaha ua fatu oia i te fenua.+ Tatou râ mea rahi. Mea papu ua horoahia mai iho â te fenua ia fatu tatou.’

25 “No reira, a parau ia ratou: ‘Teie ta te Arii hau ê e Fatu ra o Iehova e parau ra: “Te amu nei outou i te maa e te toto,+ te hiˈo nei outou i ta outou mau idolo faufau,* e te haamanii noa ra outou i te toto.+ Eaha ïa outou e fatu ai i te fenua? 26 Ua tiaturi outou i ta outou ˈoˈe,+ te rave ra outou i te mau peu hairiiri, e ua haaviivii outou tataitahi i te vahine faaipoipo a to outou taata tupu.+ Eaha ïa outou e fatu ai i te fenua?”’+

27 “Teie ta oe e parau ia ratou: ‘Teie ta te Arii hau ê e Fatu ra o Iehova e parau ra: “Te horeo nei au i to ˈu nei ora, e pohe te feia e ora ra i te mau vahi ano i te ˈoˈe. Te feia e ora ra i te peho, e horoa vau ei maa na te mau animara oviri. E e pohe te feia i roto i te mau pare e te mau ana i te maˈi.+ 28 E faariro vau i te fenua ei vahi ano e te taata ore roa,+ e haamouhia to ˈna teoteo rahi, e e faaanohia te mau mouˈa o Iseraela,+ eita hoê e na nia ˈtu. 29 E e ite ratou o vau o Iehova ua faariro anaˈe au i te fenua ei vahi ano e te taata ore roa+ no te mau peu hairiiri atoa ta ratou i rave.”’+

30 “Area oe, tamaiti a te taata, te paraparau nei to oe nunaa te tahi i te tahi no oe i pihai iho i te mau patu e i te tomoraa o te mau fare.+ Te na ô ra ratou te tahi i te tahi, te taata tataitahi i to ˈna taeae: ‘Haere mai, e faaroo anaˈe i te parau no ǒ mai ia Iehova.’ 31 E tae rahi mai ratou e parahi i mua ia oe ei nunaa no ˈu. E faaroo ratou i ta oe mau parau, eita râ ratou e rave i te reira.+ E faatietie hoi ratou ia oe i to ratou vaha,* e nounou râ to ratou aau i te apî e noaa mai i te ohipa taviri. 32 Inaha, e au oe i te tahi taata reo navenave, mea ite i te hauti i te upaupa taura, o te himene ra no nia i te here. E faaroo ratou i ta oe mau parau, eita râ hoê noa ˈˈe e faaohipa i te reira. 33 E ia tupu te reira, e tupu mau hoi te reira, e ite ratou i tia na te hoê peropheta i rotopu ia ratou.”+

34 Tae faahou maira te parau a Iehova ia ˈu, a na ô ai: 2 “Tamaiti a te taata, a tohu i te mau ati ta te mau tiai mamoe o Iseraela e faaruru. A tohu, e a parau i te mau tiai mamoe: ‘Teie ta te Arii hau ê e Fatu ra o Iehova e parau ra: “Ua ati te mau tiai mamoe o Iseraela,+ tei faaamu noa na ia ratou iho! E ere anei te nǎnǎ mamoe ta te mau tiai mamoe e faaamu?+ 3 E amu outou i te mii, e faaahu outou ia outou iho i te huruhuru mamoe e e tupai outou i te animara poria roa ˈˈe,+ eita râ outou e faaamu i te nǎnǎ mamoe.+ 4 Aita outou i faaitoito i tei paruparu, i rapaau i tei maˈihia, i taamu i te pepe, i faahoˈi mai i tei overe aore ra i imi i tei moˈe.+ Tera râ, ua faatere outou ia ratou ma te etaeta e te haavî.+ 5 Purara ˈtura ïa ratou no te mea aita e tiai mamoe.+ Purara ˈtura ratou e riro aˈera ei maa na te mau animara oviri atoa o te fenua. 6 I overe na ta ˈu mau mamoe i nia i te mau mouˈa atoa e aivi teitei atoa. Ua purara ta ˈu mau mamoe na te mau vahi atoa o te fenua, e aita hoê i imi ia ratou aore ra i haapeapea teihea roa ratou.

7 “‘“No reira, outou te mau tiai mamoe, a faaroo i te parau a Iehova: 8 ‘“Te horeo nei au i to ˈu nei ora,” te parau ra te Arii hau ê e Fatu ra o Iehova, “no te mea ua riro ta ˈu mau mamoe ei animara aˈuaˈuhia, ei maa na te mau animara oviri atoa o te fenua, aita hoi e tiai mamoe, e aita ta ˈu mau tiai mamoe i imi i ta ˈu mau mamoe, ua faaamu noa râ ratou ia ratou iho e aita i faaamu i ta ˈu mau mamoe,”’ 9 no reira, outou te mau tiai mamoe, a faaroo i te parau a Iehova. 10 Teie ta te Arii hau ê e Fatu ra o Iehova e parau ra: ‘Te patoi nei au i te mau tiai mamoe, e e titau vau ia ratou i te tahi faahoˈiraa no ta ˈu mau mamoe,* e e tatara vau ia ratou i te hopoia e faaamu* i ta ˈu mau mamoe,+ e eita faahou te mau tiai mamoe e faaamu ia ratou iho. E faaora vau i ta ˈu mau mamoe i to ratou vaha, e eita ratou e riro faahou ei maa na ratou.’”

11 “‘Teie hoi ta te Arii hau ê e Fatu ra o Iehova e parau ra: “Teie au, e na ˈu e imi i ta ˈu mau mamoe, e na ˈu e aupuru ia ratou.+ 12 E aupuru vau i ta ˈu mau mamoe mai te tahi tiai mamoe o tei ite mai i ta ˈna mau mamoe tei purara e o te faaamu ra ia ratou.+ E faaora vau ia ratou i te mau vahi atoa i purara ˈi ratou i te mahana ata e te rumaruma rahi.+ 13 E aratai au ia ratou i rapae mai i te mau nunaa, e haaputuputu vau ia ratou mai te mau fenua mai, e hopoi au ia ratou i to ratou fenua e e faaamu vau ia ratou i nia i te mau mouˈa o Iseraela,+ na pihai iho i te mau taheraa pape e te mau faaearaa atoa o te fenua. 14 I nia i te hoê fenua maitai e faaamu ai au ia ratou, e to nia i te mau mouˈa teitei o Iseraela+ te fenua e amu ai ratou i te aihere. E tarava ratou i nia i te hoê fenua aihere maitai,+ e e amu ratou i te aihere i te fenua maitai roa ˈˈe i nia i te mau mouˈa o Iseraela.”

15 “‘“Na ˈu e faaamu i ta ˈu mau mamoe,+ e na ˈu e faatarava ia ratou,”+ te parau ra te Arii hau ê e Fatu ra o Iehova. 16 “E imi au i tei moˈe,+ e faahoˈi mai au i tei overe ra, e taamu vau i te pepe, e e faaitoito vau i tei paruparu. E haamou râ vau i tei poria e tei itoito. E faaamu vau ia ˈna i te utua.”

17 “‘Area outou, ta ˈu mau mamoe, teie ta te Arii hau ê e Fatu ra o Iehova e parau ra: “Fatata vau i te haava i te tahi mamoe e te tahi atu, i te mau mamoe oni e te mau puaaniho oni.+ 18 Aita anei e navai ra no outou ia amu i te aihere o te mau fenua maitai roa ˈˈe? Eaha outou e taataahi atoa ˈi i te toea aihere o to outou mau fenua? E i muri iho i to outou inuraa i te pape mâ roa ˈˈe, eaha outou e faarepo ai i te pape a taataahi ai i roto? 19 E amu anei ta ˈu mau mamoe i te aihere i nia i te fenua taataahihia? E inu anei ratou i te pape ta outou i faarepo a taataahi ai i roto?”

20 “‘No reira, teie ta te Arii hau ê e Fatu ra o Iehova e parau ra ia ratou: “Teie au, e na ˈu e haava i te mamoe poria e te mamoe piaoao, 21 te turai noa nei hoi outou i to outou aoao e tapono e i to outou tara pauroa tei maˈihia e purara roa ˈtu ai ratou i te atea. 22 E faaora vau i ta ˈu mau mamoe, e eita ratou e riro faahou ei animara aˈuaˈuhia.+ E e haava vau i te mamoe e te mamoe. 23 E faatia vau hoê tiai mamoe i nia ia ratou,+ o ta ˈu tavini o Davida,+ e e faaamu oia ia ratou. O ˈna te faaamu ia ratou e te riro ei tiai mamoe no ratou.+ 24 E o vau, o Iehova, te riro ei Atua no ratou,+ e o ta ˈu tavini o Davida te raatira i rotopu ia ratou.+ O vau, o Iehova, tei paraparau.

25 “‘“E e faaau vau i te tahi faufaa no te hau ia ratou,+ e e faaore au i te mau animara taehae+ mai nia mai i te fenua, ia parahi ratou ma te taiâ ore i roto i te medebara e ia taoto ratou i roto i te mau uru raau.+ 26 E faariro vau ia ratou e te mau vahi na pihai iho i to ˈu aivi ei haamaitairaa,+ e e faatopa vau i te ûa i te taime faataahia. E topa te mau haamaitairaa mai te ûa.+ 27 E faatupu te mau tumu raau o te fenua i to ratou mau hotu, e horoa te fenua i ta ˈna e faatupu,+ e e parahi te feia o to ˈu nunaa ma te taiâ ore i te fenua. E ite ratou o vau o Iehova ua ofati anaˈe au i ta ratou na raau zugo+ e ua faaora anaˈe au ia ratou i tei faatîtî ra ia ratou. 28 Eita ratou e riro faahou ei animara ta te mau nunaa e aˈuaˈu, e eita ratou e pau faahou i te amuhia e te mau animara oviri o te fenua, e e parahi ratou ma te taiâ ore, eita hoê e faariaria ia ratou.+

29 “‘“E tanu vau i te maa na ratou ei faaapu tuiroo,* eita ratou e pohe faahou no te oˈe i te fenua,+ e eita ratou e faahaama-faahou-hia e te mau nunaa.+ 30 ‘I reira ratou e ite ai e tei pihai iho vau o Iehova to ratou Atua ia ratou, e o ratou te nunaa o Iseraela, to ˈu nunaa,’+ te parau ra te Arii hau ê e Fatu ra o Iehova.”’

31 “‘Area outou, ta ˈu mau mamoe,+ te mau mamoe ta ˈu e aupuru, e taata noa outou, e o vau to outou Atua,’ te parau ra te Arii hau ê e Fatu ra o Iehova.”

35 Tae faahou maira te parau a Iehova ia ˈu, a na ô ai: 2 “Tamaiti a te taata, a fariu i te tuhaa fenua mouˈa o Seira,+ e a tohu i te mau ati ta ˈna e faaruru.+ 3 A parau ia ˈna: ‘Teie ta te Arii hau ê e Fatu ra o Iehova e parau ra: “Teie au e aro nei ia oe, e te tuhaa fenua mouˈa o Seira, e e toro vau i to ˈu rima e tairi ia oe e e faariro vau ia oe ei fenua taata ore e te vai ano.+ 4 E faariro vau i to oe mau oire ei vahi ano, e e riro oe ei fenua taata ore e te vai ano.+ E e ite oe o vau o Iehova. 5 Ua uˈana roa hoi to oe riri,+ e ua tuu oe i te ati Iseraela i te ˈoˈe i te taime o to ratou ati, i te taime o to ratou faautuaraa hopea.”’+

6 “‘No reira, te horeo nei au i to ˈu nei ora,’ te parau ra te Arii hau ê e Fatu ra o Iehova, ‘e faaineine au ia oe no te taparahiraa taata, e e aˈuaˈu te taparahiraa taata ia oe.+ I te mea e mea hae na oe te toto, e aˈuaˈu te taparahiraa taata ia oe.+ 7 E faariro vau i te tuhaa fenua mouˈa o Seira ei fenua taata ore e te ano,+ e e haapohe au i reira i te taata atoa e na roto atu aore ra e hoˈi ra i ǒ. 8 E faaî au i to ˈna mau mouˈa i tei haapohehia. E e topa te feia tei haapohehia i te ˈoˈe i nia i to oe mau aivi, i roto i to oe mau peho e i to oe mau taheraa pape atoa. 9 E faariro vau ia oe ei fenua ano e a muri noa ˈtu, e eita to oe mau oire e parahihia e te taata.+ E ite ïa oe o vau o Iehova.’

10 “No te mea ua parau oe: ‘E riro teie e piti nunaa e teie e piti fenua ia ˈu, e e fatu tatou i tera e piti,’+ noa ˈtu to reira Iehova, 11 ‘te horeo nei au i to ˈu nei ora,’ te parau ra te Arii hau ê e Fatu ra o Iehova, ‘e hamani ino vau ia oe ma te hoê â riri e pohehae ta oe i faaite i to oe haeraa ia ratou.+ E e faaite au ia ˈu iho i rotopu ia ratou ia haava vau ia oe. 12 I reira oe e ite ai o vau, o Iehova, tei faaroo i te mau mea faatura ore atoa ta oe i parau no nia i te mau mouˈa o Iseraela i to oe parauraa: “Ua vaiiho-ano-hia te reira e ua tuuhia mai ia pau te reira ia tatou.” 13 E ua faaino mai outou ia ˈu ma te pateo, e ua faarahi outou i ta outou mau faainoraa ia ˈu.+ Ua faaroo vau pauroa te reira.’

14 “Teie ta te Arii hau ê e Fatu ra o Iehova e parau ra: ‘Te fenua taatoa te oaoa ua faariro anaˈe au ia oe ei fenua taata ore e te ano. 15 Mai ia oe i oaoa i te faaanoraahia te tuhaa a te nunaa o Iseraela, e na reira atoa vau ia oe.+ E riro oe ei vahi ano, e te tuhaa fenua mouˈa o Seira, pauroa to Edoma,+ e e ite te taata o vau o Iehova.’”

36 “Area oe, tamaiti a te taata, a tohu no te mau mouˈa o Iseraela e a parau: ‘E te mau mouˈa o Iseraela, a faaroo i te parau a Iehova. 2 Teie ta te Arii hau ê e Fatu ra o Iehova e parau ra: “Ua parau te enemi no outou: ‘Ua tano! Ua riro atoa ia tatou te mau vahi teitei no tahito!’”’+

3 “A tohu ïa e a parau: ‘Teie ta te Arii hau ê e Fatu ra o Iehova e parau ra: “No te mea ua faaano e ua aro ratou ia oe na te mau vahi atoa, ia riro outou ei tuhaa fatuhia e te feia tei ora mai* mai rotopu i te mau nunaa, e te paraparau noa ra te mau taata no outou e te faaino noa ra ia outou,+ 4 no reira, e te mau mouˈa o Iseraela, a faaroo i te parau a te Arii hau ê e Fatu ra o Iehova! Teie ta te Arii hau ê e Fatu ra o Iehova e parau ra i te mau mouˈa e aivi, i te mau taheraa pape e peho, i te mau vahi ano taata ore,+ e i te mau oire faaruehia tei haruhia te taoˈa e tei faaooohia e te feia tei ora mai o te mau nunaa ati aˈe,+ 5 o ratou ta te Arii hau ê e Fatu ra o Iehova e parau ra: ‘Ma te auahi o to ˈu itoito rahi,+ e faaite au i te mau ati e faaruruhia e to te mau nunaa tei ora mai e to Edoma atoa, te feia tei faafatu i to ˈu fenua ma te oaoa rahi e te vahavaha ino mau,+ no te haru i to ˈna mau vahi aihere e no te eiâ i ǒ.’”’+

6 “A tohu ïa no te fenua o Iseraela, e a parau i te mau mouˈa e aivi, i te mau taheraa pape e peho: ‘Teie ta te Arii hau ê e Fatu ra o Iehova e parau ra: “Inaha, e paraparau vau ma to ˈu itoito rahi e riri rahi, no te mea ua faahaamahia outou e te mau nunaa.”’+

7 “Teie ta te Arii hau ê e Fatu ra o Iehova e parau ra: ‘O vau iho te amo i to ˈu rima i nia no te euhe e na te mau nunaa ati aˈe iho e amo i to ratou haama.+ 8 E faatupu râ outou, e te mau mouˈa o Iseraela, i te amaa e e hotu mai outou no to ˈu nunaa o Iseraela,+ fatata hoi ratou i te hoˈi mai. 9 Tei pihai iho hoi au ia outou, e fariu vau ia outou, e faaapuhia outou e e ueuehia i te huero. 10 E faarahi au i to outou mau taata, te nunaa taatoa o Iseraela, pauroa ratou, e parahihia te mau oire e te taata+ e e patu-faahou-hia te mau vahi ano.+ 11 Oia mau, e faarahi au i to outou mau taata e ta outou mau animara.+ E rahi mai ratou e e fanau ratou i te tamarii e te fanauˈa. E haaparahihia outou e au i te taata mai na mua ˈˈe ra,+ e e faarahi au i ta outou faufaa hau aˈe i na mua ˈˈe ra.+ E e ite outou o vau o Iehova.+ 12 E e faahaere au i te taata, oia hoi to ˈu nunaa o Iseraela, na nia iho ia outou, e e fatu ratou ia outou.+ E riro outou ei tuhaa na ratou, e e ore roa outou e faaere faahou ia ratou i te tamarii.’”+

13 “Teie ta te Arii hau ê e Fatu ra o Iehova e parau ra: ‘No te mea te parau nei ratou ia oe: “E fenua oe e pau ai te taata ia oe i te amuhia e o te faaere i to oe mau nunaa i te tamarii,”’ 14 ‘no reira, eita faahou te taata e pau ia oe i te amuhia e eita oe e faaere i to oe mau nunaa i te tamarii,’ te parau ra te Arii hau ê e Fatu ra o Iehova. 15 ‘Eita vau e vaiiho faahou ia oe ia faainohia ˈtu â e te mau nunaa+ aore ra e faatihaehaehia e te taata, e eita oe e faaturori faahou i to oe mau nunaa,’ te parau ra te Arii hau ê e Fatu ra o Iehova.”

16 Tae faahou maira te parau a Iehova ia ˈu, a na ô ai: 17 “Tamaiti a te taata, i te parahiraa te nunaa o Iseraela i to ratou fenua, ua haaviivii ratou i te reira i to ratou mau haerea e ta ratou mau raveraa.+ E au to ratou mau haerea no ˈu i te viivii o te maˈi avaˈe o te vahine.+ 18 Manii ihora ïa vau i to ˈu riri rahi i nia ia ratou no te toto ta ratou i haamanii i nia i te fenua+ e no to ratou haaviiviiraa i te fenua i ta ratou mau idolo faufau.*+ 19 Haapurara ˈtura ïa vau ia ratou i rotopu i te mau nunaa e na te mau fenua.+ Ua haava vau ia ratou ia au i to ratou haerea e ta ratou mau raveraa. 20 I te taeraa ˈtu râ ratou i tera mau nunaa ra, ua haafaufaa ore te taata i to ˈu iˈoa moˈa+ a parau ai no ratou: ‘O te nunaa o Iehova tera, ua faarue râ ratou i to ˈna fenua.’ 21 E haapeapea ïa vau no to ˈu iˈoa moˈa ta te nunaa o Iseraela i haafaufaa ore i rotopu i te mau nunaa i haere ai ratou.”+

22 “No reira, a parau i te nunaa o Iseraela: ‘Teie ta te Arii hau ê e Fatu ra o Iehova e parau ra: “E ere no outou e ohipa ˈi au, e te nunaa o Iseraela, no to ˈu râ iˈoa moˈa ta outou i haafaufaa ore i rotopu i te mau nunaa i haere ai outou.”’+ 23 ‘E haamoˈa iho â vau i to ˈu iˈoa teitei,+ tei haafaufaa-ore-hia i rotopu i te mau nunaa, o ta outou i haafaufaa ore i rotopu ia ratou. E e ite te mau nunaa o vau o Iehova,’+ te parau ra te Arii hau ê e Fatu ra o Iehova, ‘ua haamoˈa-anaˈe-hia vau i mua i to ratou mata. 24 E rave au ia outou mai rotopu mai i te mau nunaa, e haaputuputu faahou mai au ia outou na te mau fenua atoa e e hopoi au ia outou i to outou fenua.+ 25 E pîpî au ia outou i te topata pape mâ, e e mâ mai outou.+ E tamâ vau ia outou i to outou viivii atoa+ e i ta outou mau idolo faufau atoa.+ 26 E horoa vau i te hoê aau apî+ no outou e e tuu atu vau i te hoê huru feruriraa apî i roto ia outou.+ E tatara vau i te aau ofai+ i roto i to outou tino e e horoa vau no outou i te hoê aau mǎrû.* 27 E tuu vau i to ˈu varua i roto ia outou, e rave au ia pee outou i ta ˈu mau faaueraa,+ e e haapao e e auraro outou i ta ˈu mau faaotiraa haavaraa. 28 I reira outou e parahi ai i te fenua ta ˈu i horoa no to outou mau tupuna, e ei nunaa outou no ˈu e ei Atua vau no outou.’+

29 “‘E faaora vau ia outou i to outou viivii atoa e e faaue au i te huero ia tupu rahi mai, e eita vau e faatae i te oˈe i nia ia outou.+ 30 E faarahi au i te hotu o te tumu raau e ta te faaapu e faatupu, ia ore roa ˈtu oe ia haama faahou no te oˈe i rotopu i te mau nunaa.+ 31 I reira outou e haamanaˈo ai i to outou mau haerea ino e ta outou mau ohipa e ere i te mea maitai, e e faufau outou ia outou iho no ta outou hapa e ta outou mau peu hairiiri.+ 32 Ia ite mai râ outou: Aita vau e na reira nei no outou,’+ te parau ra te Arii hau ê e Fatu ra o Iehova. ‘Tera râ, ia haama e ia peapea outou no to outou mau haerea, e te nunaa o Iseraela.’

33 “Teie ta te Arii hau ê e Fatu ra o Iehova e parau ra: ‘I te mahana e tamâ ˈi au ia outou i ta outou hapa atoa, e rave au ia parahihia te mau oire e te taata+ e ia patu-faahou-hia te mau vahi ano.+ 34 E faaapuhia te fenua ano tei vai ano na i mua i te mata o te feia tei na reira i te haere. 35 E e parau te taata: “Ua riro te fenua ano mai te ô i Edene,+ e te mau oire taata ore tei vai ano na e tei vavahihia, ua auahia ïa i te patu e ua parahihia e te taata i teie nei.”+ 36 E e ite te mau nunaa te toe na pihai iho ia outou e na ˈu, o Iehova, i patu i tei vavahihia, e na ˈu i tanu i tei vai ano na. O vau, o Iehova, tei paraparau e tei rave i te reira.’+

37 “Teie ta te Arii hau ê e Fatu ra o Iehova e parau ra: ‘E faatia atoa vau i te nunaa o Iseraela e ani ia ˈu ia rave i teie no ratou: e faarahi au i to ratou mau taata mai te nǎnǎ, 38 mai te nahoa taata moˈa, mai te nahoa no Ierusalema* i te tau o ta ˈna mau oroa,+ e î te mau oire tei vai ano na i te nahoa taata.+ E e ite ratou o vau o Iehova.’”

37 To nia te rima o Iehova ia ˈu, e rave maira Iehova ia ˈu i to ˈna varua e tuu ihora ia ˈu i raro i ropu i te peho,+ e ua î te reira i te ivi. 2 Ua faahaere oia ia ˈu ati aˈe te reira, e ite ihora vau e mea rahi roa te ivi i roto i te peho, e ua mǎrô roa.+ 3 Ui maira oia ia ˈu: “Tamaiti a te taata, e nehenehe anei tera mau ivi e ora faahou mai?” Pahono atura vau: “Arii hau ê e Fatu ra o Iehova, o oe tei ite.”+ 4 Parau maira oia ia ˈu: “A tohu no nia i tera mau ivi, e a parau atu: ‘Outou teie mau ivi mǎrô: a faaroo i te parau a Iehova:

5 “‘Teie ta te Arii hau ê e Fatu ra o Iehova e parau i tera mau ivi: “E faaô vau i te aho i roto ia outou, e e ora mai outou.+ 6 E tuu vau i te uaua e te iˈo i nia ia outou, e tapoˈi au ia outou i te iri, e tuu vau i te aho i roto ia outou, e e ora mai outou. E ite ïa outou o vau o Iehova.”’”

7 Tohu atura ïa vau mai tei faauehia mai. I to ˈu iho â tohuraa, faaroohia ihora te tahi maniania, e atete, e haamata ˈtura te mau ivi i te tuatiati, te ivi e te ivi. 8 Ite ihora vau i te mau uaua e te iˈo i te piriraa i nia ia ratou, e tapoˈi aˈera te iri ia ratou. Aita â râ e aho atura i roto ia ratou.

9 Parau maira oia ia ˈu: “A tohu i te mataˈi. A tohu, tamaiti a te taata e a parau i te mataˈi: ‘Teie ta te Arii hau ê e Fatu ra o Iehova e parau ra: “A haere mai mai na eˈa* e maha, e te mataˈi e,* e a puhi i nia i teie mau taata tei haapohehia, ia nehenehe ratou ia ora mai.”’”

10 Tohu ihora ïa vau mai ta ˈna iho â i faaue ia ˈu, e ô maira te aho i roto ia ratou, e ora maira ratou e tia aˈera i nia,+ e nuu rahi roa.

11 Parau maira oia ia ˈu: “Tamaiti a te taata, o te nunaa taatoa o Iseraela taua mau ivi ra.+ Te parau nei ratou: ‘Ua mǎrô to matou mau ivi, e ua ore to matou tiaturiraa.+ Ua mou roa matou.’ 12 A tohu ïa e a parau ia ratou: ‘Teie ta te Arii hau ê e Fatu ra o Iehova e parau ra: “E tatara vau i to outou mau apoo hunaraa+ e e faatia mai au ia outou mai roto mai i to outou mau apoo hunaraa, to ˈu nunaa, e e hopoi au ia outou i te fenua o Iseraela.+ 13 E e ite outou o vau o Iehova ua tatara anaˈe au i to outou mau apoo hunaraa e ua faatia anaˈe au ia outou i nia, i rapae i to outou mau apoo hunaraa, e to ˈu nunaa e.”’+ 14 ‘E tuu vau i to ˈu varua i roto ia outou, e ora mai outou,+ e e tuu vau ia outou i nia i to outou fenua. E e ite outou o vau, o Iehova, tei paraparau e tei rave i te reira,’ te parau ra Iehova.”

15 Tae faahou maira te parau a Iehova ia ˈu, a na ô ai: 16 “Area oe, tamaiti a te taata, a rave i te tahi raau e a papai i nia iho: ‘No Iuda e no te nunaa o Iseraela ia ˈna ra.’*+ A rave i te tahi atu raau e a papai i nia iho: ‘No Iosepha, te raau a Epheraima, e te nunaa taatoa o Iseraela ia ˈna ra.’*+ 17 A tapiri ia raua ia riro raua ei hoê noa raau i roto i to oe rima.+ 18 Ia parau to oe nunaa* ia oe: ‘E faaite mai anei oe ia matou eaha te auraa o teie mau mea?,’ 19 a parau ia ratou: ‘Teie ta te Arii hau ê e Fatu ra o Iehova e parau ra: “E rave au i te raau a Iosepha, tei roto i te rima o Epheraima, e te mau opu o Iseraela ia ˈna ra, e e tapiri au ia ratou i te raau a Iuda. E e faariro vau ia ratou ei hoê noa raau,+ e e riro ratou ei hoê i roto i to ˈu rima.”’ 20 Ei roto i to oe rima na raau ta oe e papai i nia iho, ia nehenehe ratou ia ite mai.

21 “E a parau ia ratou: ‘Teie ta te Arii hau ê e Fatu ra o Iehova e parau ra: “E rave au i te ati Iseraela mai rotopu mai i te mau nunaa i haere ai ratou, e haaputuputu vau ia ratou na te mau vahi atoa e e aratai au ia ratou i to ratou fenua.+ 22 E faariro vau ia ratou ei hoê noa nunaa i te fenua,+ i nia i te mau mouˈa o Iseraela, na te hoê noa arii e faatere ia ratou pauroa,+ e e ere faahou ratou e piti nunaa. Eita atoa ratou e vahi-faahou-hia ei piti faatereraa arii.+ 23 Eita ratou e haaviivii faahou ia ratou i ta ratou mau idolo faufau,* ta ratou mau peu hairiiri e ta ratou mau hara atoa.+ E faaora vau ia ratou i te mau ohipa taiva i hara ˈi ratou, e e tamâ vau ia ratou. Ei nunaa ratou no ˈu, e ei Atua vau no ratou.+

24 “‘“O ta ˈu tavini o Davida te riro ei arii no ratou,+ e hoê noa tiai mamoe to ratou pauroa.+ E pee ratou i ta ˈu mau faaotiraa haavaraa e e haapao maite ratou i ta ˈu mau faatureraa.+ 25 E parahi ratou i te fenua ta ˈu i horoa no ta ˈu tavini, no Iakoba, i reira to outou mau tupuna i ora ˈi,+ e e parahi ratou i reira e a muri noa ˈtu,+ ratou e ta ratou mau tamarii* e te mau tamarii a ta ratou mau tamarii.+ E o Davida ta ˈu tavini te riro ei raatira* no ratou e a muri noa ˈtu.+

26 “‘“E e faaau vau i te tahi faufaa no te hau ia ratou.+ Ei faufaa mure ore te reira. E haamau e e faarahi au ia ratou.+ E tuu vau i to ˈu nao* i rotopu ia ratou e a muri noa ˈtu. 27 Ei ia ratou ra* to ˈu sekene,* e ei Atua vau no ratou, e ei nunaa ratou no ˈu.+ 28 E e ite te mau nunaa o vau, o Iehova, te haamoˈa nei ia Iseraela ia tia to ˈu nao i rotopu ia ratou e a muri noa ˈtu.”’”+

38 Tae faahou maira te parau a Iehova ia ˈu, a na ô ai: 2 “Tamaiti a te taata, a tiatonu ia Goga no te fenua o Magoga,+ te raatira* rahi o Meteka e Tubala,+ e a tohu i te mau ati ta ˈna e faaruru.+ 3 A parau: ‘Teie ta te Arii hau ê e Fatu ra o Iehova e parau ra: “Teie au e aro nei ia oe, e Goga, te raatira* rahi o Meteka e Tubala. 4 E faahoˈi au ia oe i muri e e tuu vau i te tarou i roto i to oe taa.+ E hopoi au ia oe e pauroa ta oe nuu i rapae,+ te puaahorofenua e te feia faahoro puaahorofenua, ua ahuhia ratou pauroa ma te hanahana, e amuiraa rahi ma te paruru rahi e te paruru nainai,* te amo nei ratou pauroa i te ˈoˈe. 5 O Peresia, Etiopia e Puta+ tei ia ratou ra, ratou pauroa ma te paruru nainai e te taupoo auri. 6 Gomera e pauroa ta ˈna pǔpǔ faehau, te huaai o Togarama+ mai te mau vahi atea roa ˈˈe i apatoerau, e pauroa ta ˈna pǔpǔ faehau, e rave rahi nunaa tei ia oe ra.+

7 “‘“Ia ineine oe, a faaineine ia oe, oe e pauroa ta oe nuu tei putuputu ia oe ra, e o oe to ratou raatira.*

8 “‘“E rave rahi mahana i muri iho, e haapaohia* oe. I te pae hopea o te mau matahiti, e tomo oe i te fenua o te feia tei tairihia i te ˈoˈe e tei faahoˈihia mai, ratou pauroa tei haaputuputuhia i nia i te mau mouˈa o Iseraela mai roto mai i te mau nunaa, tei faaanohia mea maoro aˈenei. Ua faahoˈihia mai te mau taata o taua fenua ra mai roto mai i te mau nunaa, e pauroa ratou te parahi ma te taiâ ore.+ 9 E tae mai oe i nia ia ratou mai te vero, e e tapoˈi oe i te fenua mai te ata, oe e pauroa ta oe pǔpǔ faehau e e rave rahi nunaa na muri ia oe.”’

10 “Teie ta te Arii hau ê e Fatu ra o Iehova e parau ra: ‘I taua mahana ra, e tupu te manaˈo i roto i to oe aau, e e opua oe i te mea ino. 11 E parau oe: “E tomo vau i te fenua e parahi ai te taata i roto i te mau faaearaa paruru-ore-hia.*+ E haere au e aro i tei parahi ra ma te taiâ ore, ma te haafifi-ore-hia, pauroa ratou e parahi ra i roto i te mau faaearaa aita i auahia i te patu, aita e raau tarava e aita atoa e uputa.” 12 No te haru ïa e rave rahi taoˈa e no te eiâ, no te aro i te mau vahi ano tei parahihia i teie nei e te taata,+ e no te aro i te hoê nunaa tei haaputuputu-faahou-hia mai roto mai i te mau nunaa,+ o te haapue ra i te taoˈa e te faufaa,+ ratou e ora ra i ropu i te fenua.

13 “‘E parau o Seba,+ Dedana,+ te feia tapihoo no Taresisa+ e pauroa ta ˈna aito ia oe: “Te tomo ra anei oe i te fenua no te haru e rave rahi taoˈa e no te eiâ? Ua haaputuputu anei oe i ta oe mau nuu no te hopoi ê i te ario e te auro, no te rave i te taoˈa e te faufaa, no te haru e rave rahi roa taoˈa?”’

14 “No reira a tohu, tamaiti a te taata, e a parau ia Goga: ‘Teie ta te Arii hau ê e Fatu ra o Iehova e parau ra: “I tera mahana ua parahi anaˈe to ˈu nunaa o Iseraela ma te taiâ ore, eita anei oe e ite?+ 15 E haere mai oe mai to oe vahi mai, mai te vahi atea roa ˈˈe i apatoerau,+ oe e e rave rahi nunaa na muri ia oe, pauroa ratou i nia i te mau puaahorofenua, e nuu rahi, e pǔpǔ faehau rahi.+ 16 E tae oe i nia i to ˈu nunaa o Iseraela mai te ata e tapoˈi i te fenua. I te pae hopea o te mau mahana, e hopoi mai au ia oe no te aro i to ˈu fenua+ ia ite te mau nunaa o vai au ua haamoˈa anaˈe au ia ˈu i mua i to ratou mata na roto ia oe, e Goga.”’+

17 “Teie ta te Arii hau ê e Fatu ra o Iehova e parau ra: ‘E ere anei o oe o ta ˈu i faahiti i te parau na roto i ta ˈu mau tavini te mau peropheta no Iseraela, tei tohu e rave rahi matahiti e hopoihia mai oe e aro ia ratou?’

18 “‘I taua mahana ra, i te mahana e tomo ai Goga i te fenua o Iseraela,’ te parau ra te Arii hau ê e Fatu ra o Iehova, ‘e ura roa to ˈu riri rahi.+ 19 I to ˈu itoito rahi, i te ura o to ˈu riri rahi, e paraparau vau. E i taua mahana ra, e tupu te tahi aueueraa fenua rahi i te fenua o Iseraela. 20 No ˈu aˈe e aueue ai te mau iˈa o te tai, te mau manu o te raˈi, te mau animara oviri o te fenua, e pauroa te animara e nee haere i raro, e pauroa te taata i nia i te fenua, e e hurihia pauroa te mouˈa i raro,+ e topa te mau mato, e e marua te mau patu atoa i raro.’

21 “‘I nia i ta ˈu mau mouˈa atoa, e tono vau i te tahi ˈoˈe no te tairi ia ˈna,’ te parau ra te Arii hau ê e Fatu ra o Iehova. ‘E huri te taata atoa i ta ratou ˈoˈe i nia i to ratou mau taeae.+ 22 E faautua* vau ia ˈna i te maˈi pee+ e te haamaniiraa toto. E e faatopa rahi au i te ûa, te ûa paari,+ te auahi+ e te ofai ura+ i nia ia ˈna e ta ˈna mau pǔpǔ faehau e te nunaa e rave rahi na muri ia ˈna.+ 23 E faahanahana vau ia ˈu, e haamoˈa vau ia ˈu e e faaite au o vai au i mua i te mata o te nunaa e rave rahi. E e ite ratou o vau o Iehova.’

39 “Area oe, tamaiti a te taata, a tohu i te mau ati ta Goga e faaruru,+ e a parau ia ˈna: ‘Teie ta te Arii hau ê e Fatu ra o Iehova e parau ra: “Te aro nei au ia oe, e Goga, te raatira* rahi o Meteka e Tubala.+ 2 E faahoˈi au ia oe i muri, e aratai au ia oe, e hopoi au ia oe mai te mau vahi atea roa ˈˈe i apatoerau+ e e haapauma vau ia oe i nia i te mau mouˈa o Iseraela. 3 E tairi au i ta oe fana ia marua mai roto mai i to oe rima aui e e faatopa vau i ta oe mau teˈa mai roto mai i to oe rima atau. 4 E topa oe i nia i te mau mouˈa o Iseraela,+ oe e pauroa ta oe pǔpǔ faehau e te mau nunaa e na muri ia oe. E horoa vau ia oe ei maa na te mau huru manu aˈuaˈu atoa e te mau animara oviri o te fenua.”’+

5 “‘E topa oe i nia i te fenua,+ na ˈu hoi i parau,’ te parau ra te Arii hau ê e Fatu ra o Iehova.

6 “‘E faatae au i te auahi i nia ia Magoga e i nia i te feia e parahi ra i nia i te mau motu ma te taiâ ore,+ e e ite ratou o vau o Iehova. 7 E faaite au i to ˈu iˈoa moˈa i rotopu i to ˈu nunaa o Iseraela, e eita vau e vaiiho faahou i to ˈu iˈoa moˈa ia haafaufaa-ore-hia. E e ite te mau nunaa o vau o Iehova,+ Tei Moˈa i Iseraela.’+

8 “‘Oia mau, e tupu te reira, e e ravehia te reira,’ te parau ra te Arii hau ê e Fatu ra o Iehova. ‘Tera taua mahana ra ta ˈu i faahiti. 9 E haere to te mau oire o Iseraela i rapae e e tahu ratou i te mau mauhaa tamaˈi i te auahi, te paruru nainai* e te paruru rahi, te fana e te teˈa, te tâpû raau* e te omore. E tera ta ratou e rave no te tahu i te auahi+ e hitu matahiti. 10 Aita e faufaa ia tii ratou i te raau i roto i te peho aore ra ia haaputu i te vahie i roto i te mau uru raau no te mea e rave ratou i te mau mauhaa tamaˈi no te tahu i te auahi.’

“‘E haru ratou i te taoˈa a tei haru i ta ratou, e e eiâ ratou i tei eiâ na ia ratou,’ te parau ra te Arii hau ê e Fatu ra o Iehova.

11 “‘I taua mahana ra, e horoa vau i te tahi vahi hunaraa no Goga i Iseraela,+ i te peho o te feia e ratere i hitia o te râ o te miti, a mau atu ai te eˈa o te feia e na reira i te haere. I reira ratou e huna ˈi ia Goga e pauroa to ˈna nahoa taata, e e parau ratou i te reira te peho o Hâmona-Goga.*+ 12 E hitu avaˈe e huna ˈi te nunaa o Iseraela ia ratou no te tamâ i te fenua.+ 13 Pauroa to te fenua te rohi no te huna ia ratou, e e tui to ratou roo i te reira i te mahana e faahanahana ˈi au ia ˈu,’+ te parau ra te Arii hau ê e Fatu ra o Iehova.

14 “‘E faatoroahia te tahi mau taata no te haere tamau na te fenua e huna i te mau tino pohe tei vaiihohia i raro, no te tamâ i te fenua. E tamau ratou i ta ratou imiraa e hitu avaˈe. 15 Ia ite te feia e na roto atu i te fenua i te tahi ivi taata, e tuu ratou i te tahi tapao i pihai iho. I reira tei faatoroahia no te hunaraa e haere mai ai e huna i te reira i te peho o Hâmona-Goga.+ 16 E e topa-atoa-hia te tahi oire i reira i te iˈoa o Hâmona.* E e tamâ ratou i te fenua.’+

17 “Area oe, tamaiti a te taata, teie ta te Arii hau ê e Fatu ra o Iehova e parau ra: ‘A parau i te mau huru manu atoa e pauroa te animara oviri o te fenua: “A haaputuputu mai outou e a haere mai. A haaputuputu mai outou ati aˈe i ta ˈu tusia ta ˈu e faaineine nei no outou, e tusia rahi i nia i te mau mouˈa o Iseraela.+ E amu outou i te iˈo e e inu outou i te toto.+ 18 E amu outou i te iˈo o te feia puai e e inu outou i te toto o te mau raatira o te fenua, te mamoe oni, te fanauˈa mamoe, te puaaniho e te puaatoro, pauroa te animara haaporiahia no Basana. 19 E puunena roa outou i te mii e e inu outou i te toto e taero roa ˈtu ai no te tusia ta ˈu e faaineine no outou.”’

20 “‘I ta ˈu amuraa maa, e paia roa outou i te puaahorofenua e te feia faahoro pereoo puaahorofenua, i te feia puai e i te mau aito atoa ua rau te huru,’+ te parau ra te Arii hau ê e Fatu ra o Iehova.

21 “‘E faaite au i to ˈu hanahana i rotopu i te mau nunaa, e pauroa te nunaa te ite i te utua ta ˈu i faatopa e te puai* ta ˈu i faaite i rotopu ia ratou.+ 22 Mai taua mahana mai ra e ite ai te nunaa o Iseraela o vau o Iehova to ratou Atua. 23 E e ite te mau nunaa e ua hopoi-ê-hia te nunaa o Iseraela no ta ratou iho hape, no to ratou taivaraa ia ˈu.+ Huna ihora ïa vau i to ˈu aro ia ratou+ e tuu ihora ia ratou i to ratou mau enemi,+ e pohe aˈera ratou pauroa i te ˈoˈe. 24 Rave ihora vau ia ratou ia au i to ratou viivii e ta ratou mau hara, e huna ihora vau i to ˈu aro ia ratou.’

25 “No reira, teie ta te Arii hau ê e Fatu ra o Iehova e parau ra: ‘E faahoˈi mai au i te mau tîtî o Iakoba+ e e aroha vau i te nunaa taatoa o Iseraela.+ E e paturu vau i to ˈu iˈoa moˈa ma te itoito rahi.+ 26 Ua rave-ino-anaˈe-hia ratou no to ratou taivaraa ia ˈu,+ e parahi ratou i nia i to ratou fenua ma te taiâ ore, eita hoê e faariaria ia ratou.+ 27 Ia faahoˈi mai au ia ratou mai rotopu i te mau nunaa e ia haaputuputu vau ia ratou mai te mau fenua mai o to ratou mau enemi,+ e haamoˈa atoa vau ia ˈu i rotopu ia ratou i mua i te mata o te nunaa e rave rahi.’+

28 “‘E ite ratou o vau o Iehova to ratou Atua ia hopoi ê au ia ratou i rotopu i te mau nunaa e ia haaputuputu faahou mai au ia ratou i to ratou fenua, ma te ore e vaiiho hoê o ratou.+ 29 Eita vau e huna faahou i to ˈu aro ia ratou,+ e ninii hoi au i to ˈu varua i nia i te nunaa o Iseraela,’+ te parau ra te Arii hau ê e Fatu ra o Iehova.”

40 I te 25 o te matahiti o to matou hopoi-ê-raahia,+ i te haamataraa o te matahiti, i te ahuru o te mahana o te avaˈe, i te 14 o te matahiti i muri aˈe i te toparaa te oire,+ tei nia maira te rima o Iehova ia ˈu i taua mahana ra, e hopoi atura oia ia ˈu i te oire.+ 2 Na roto i te mau orama no ǒ mai i te Atua, aratai atura oia ia ˈu i te fenua o Iseraela e tuu ihora ia ˈu i nia i te hoê mouˈa teitei roa,+ e paturaa to nia iho mai te tahi oire te hohoˈa i te pae apatoa.

3 I to ˈna hopoiraa ia ˈu i reira, ite atura vau i te tahi taata mai te veo to ˈna hohoˈa.+ E taura lino e e aeho faito* to roto i to ˈna rima,+ e te tia ra oia i te pae uputa. 4 Parau maira taua taata ra ia ˈu: “Tamaiti a te taata, a hiˈo maitai, a faaroo maitai e a haapao mai* i te mau mea atoa ta ˈu e faaite ia oe, no reira hoi oe i hopoihia ˈi i ǒ nei. A faaite i te nunaa o Iseraela i te mau mea atoa ta oe e ite.”+

5 Ite atura vau i te tahi aua i rapaeau mai i te hiero* e ati noa ˈˈe. E aeho faito e ono kubiti te roa to roto i te rima o taua taata ra (ua amuihia e maha manimani i te kubiti tataitahi).* Faito ihora oia i te aua, hoê aeho te aano e hoê aeho te teitei.

6 Haere maira oia i te uputa i te pae hitia o te râ+ e pauma aˈera na nia i to ˈna mau taahiraa. I to ˈna faitoraa i te tomoraa o te uputa, hoê aeho to ˈna aano, e hoê aeho atoa te aano o te tahi atu tomoraa o te uputa. 7 Hoê aeho te roa e hoê aeho te aano o te mau piha o te mau tiai tataitahi, e e pae kubiti i rotopu i te mau piha o te mau tiai.+ Hoê aeho te tomoraa o te uputa i pihai iho i te taupee o te uputa e matara ra i roto mai.

8 Faito ihora oia i te taupee o te uputa e matara ra i roto mai, hoê ïa aeho. 9 Faito ihora oia i te taupee o te uputa, e vaˈu ïa kubiti. E faito ihora oia i to ˈna mau pou na te hiti, e piti ïa kubiti. E tei te pae i roto mai te taupee o te uputa.

10 E toru piha o te mau tiai i te tahi e te tahi pae o te uputa hitia o te râ. Hoê â faito to tera e toru, e hoê â faito to na pou i te tahi e te tahi pae.

11 Faito ihora oia i te aano o te tomoraa o te uputa, 10 ïa kubiti. E te roa o te uputa, 13 ïa kubiti.

12 Hoê kubiti te vahi faataahia i mua noa mai i te mau piha o te mau tiai na te tahi e te tahi pae. E ono kubiti te mau piha o te mau tiai na te tahi e te tahi pae.

13 Faito ihora oia i te uputa mai te aroaro mai o te hoê piha tiairaa* e tae atu i te aroaro o te tahi atu piha, e 25 ïa kubiti te aano. E e tuati te tahi tomoraa i te tahi atu.+ 14 Faito ihora oia i te mau pou na te hiti, e 60 ïa kubiti te teitei, oia atoa te mau pou o te mau uputa ati aˈe te aua. 15 Mai te muaraa o te tomoraa o te uputa tae atu i te muaraa o te taupee i te pae i roto mai o te uputa, e 50 ïa kubiti.

16 E e haamaramarama mea aano i roto mea pirihao i rapae+ to te mau piha o te mau tiai e to te mau pou i roto mai na te tahi e te tahi pae. E haamaramarama atoa to te mau taupee i roto mai na te tahi e te tahi pae, e e hohoˈa tumu tamara+ to nia iho i te mau pou na te hiti.

17 Hopoi atura oia ia ˈu i roto i te aua i rapaeau mai, e ite atura vau i te mau piha tamaaraa*+ e te tahua ati aˈe te aua. E 30 piha tamaaraa i nia i te tahua. 18 Hoê â te aano o te tahua na te tahi e te tahi pae o te mau uputa e te roa o te mau uputa, o te tahua raro ïa tera.

19 Faito ihora oia i te atea* mai mua mai i te uputa i raro tae atu i te haaatiraa o te aua i roto, 100 ïa kubiti i hitia o te râ e i apatoerau.

20 E uputa to te aua i rapaeau mai i te pae apatoerau, e faito ihora oia i to ˈna roa e to ˈna aano. 21 E toru piha o te mau tiai na te tahi e te tahi pae. Hoê â faito to te mau pou na te hiti e te taupee e to te uputa matamua. E 50 ïa kubiti te roa e e 25 kubiti te aano. 22 Hoê â faito to to ˈna mau haamaramarama, to ˈna taupee e to ˈna mau hohoˈa tumu tamara+ e to te uputa hitia o te râ. E hitu taahiraa ia pauma ˈtu i reira, e to mua to ˈna taupee ia ratou.

23 E uputa to te aua i roto mai i te tahi atu pae o te uputa apatoerau e hoê i te tahi atu pae o te uputa hitia o te râ. Faito ihora oia i te atea mai te hoê uputa i te tahi atu uputa, 100 ïa kubiti.

24 Hopoi atura oia ia ˈu i te pae apatoa, e ite atura vau i te tahi uputa i te pae apatoa.+ Faito ihora oia i to ˈna mau pou na te hiti e to ˈna taupee, e hoê â faito e te tahi atu. 25 E haamaramarama to ˈna e to to ˈna taupee i te tahi e te tahi pae, hoê â huru e te tahi atu mau haamaramarama. E 50 ïa kubiti te roa e e 25 kubiti te aano. 26 E hitu taahiraa no te tae atu i reira,+ e to mua noa to ˈna taupee. E e hohoˈa tumu tamara to nia iho i te mau pou na te hiti, hoê i nia iho i te tahi e te tahi pae.

27 E uputa to te aua i roto mai i te pae apatoa. Faito ihora oia i te atea mai te tahi uputa i te tahi atu uputa i apatoa, 100 ïa kubiti. 28 Hopoi atura oia ia ˈu i roto i te aua i roto mai na roto i te uputa apatoa. I to ˈna faitoraa i te uputa apatoa, hoê â faito to ˈna e te tahi atu. 29 Hoê â faito to ˈna mau piha o te mau tiai, to ˈna mau pou na te hiti e to ˈna taupee e te tahi atu. E haamaramarama to ˈna e to to ˈna taupee na te tahi e te tahi pae. E 50 ïa kubiti te roa e e 25 kubiti te aano.+ 30 E taupee anaˈe ati aˈe, e 25 kubiti te roa e e 5 kubiti te aano. 31 Tei te pae o te aua i rapaeau mai to ˈna taupee, e e hohoˈa tumu tamara to nia iho i to ˈna mau pou na te hiti,+ e e vaˈu taahiraa e tae atu ai i reira.+

32 I to ˈna hopoiraa ia ˈu i te aua i roto mai na hitia o te râ mai, faito ihora oia i te uputa, e hoê â faito e te tahi atu. 33 Hoê â faito to ˈna mau piha o te mau tiai, to ˈna mau pou na te hiti e to ˈna taupee e te tahi atu, e e haamaramarama to ˈna e to to ˈna taupee na te tahi e te tahi pae. E 50 ïa kubiti te roa e e 25 kubiti te aano. 34 Tei te pae o te aua i rapaeau mai to ˈna taupee, e e hohoˈa tumu tamara to nia iho i te tahi e te tahi pae o to ˈna mau pou na te hiti, e e vaˈu taahiraa e tae atu ai i reira.

35 Hopoi atura oia ia ˈu na roto i te uputa apatoerau+ e faito ihora i te reira. Hoê â faito e te tahi atu. 36 Hoê â to ˈna mau piha o te mau tiai, to ˈna mau pou na te hiti e to ˈna taupee e te tahi atu. E haamaramarama to ˈna na te tahi e te tahi pae. E 50 ïa kubiti te roa e e 25 kubiti te aano. 37 Tei te pae o te aua i rapaeau mai to ˈna taupee, e e hohoˈa tumu tamara to nia iho i to ˈna mau pou na te tahi e te tahi pae, e e vaˈu taahiraa e tae atu ai i reira.

38 To pihai iho te tahi piha tamaaraa e to ˈna tomoraa i te mau pou na te hiti o te mau uputa, i reira te mau tusia taauahi taatoa e horoihia ˈi.+

39 E piti amuraa maa na te tahi e te tahi pae o te taupee o te uputa, i nia iho e tupaihia ˈi te mau tusia taauahi taatoa,+ te mau tusia no te hara+ e te mau tusia no te hapa.+ 40 Na te uputa apatoerau mai, e piti amuraa maa to rapaeau mai i te tomoraa. E piti atoa amuraa maa tei te tahi atu pae o te taupee o te uputa. 41 E maha amuraa maa na te tahi e te tahi pae o te uputa, e vaˈu ïa amuraa maa, i nia iho e tupaihia ˈi te mau tusia. 42 E ofai taraihia na amuraa maa e maha no te tusia taauahi taatoa. Hoê kubiti e te afa ïa te roa e hoê kubiti e te afa te aano, e hoê kubiti te teitei. To nia iho te mau mauhaa no te tupai i te mau tusia taauahi e te tahi atu mau tusia. 43 Ua tamauhia te tahi mau paˈepaˈe e maha manimani te aano ati aˈe te pǎpai i roto mai. E i tuuhia na te iˈo o te mau tusia pûpûhia i nia i te mau amuraa maa.

44 To rapaeau mai i te uputa i roto mai te mau piha tamaaraa no te feia himene.+ To roto i te aua i roto mai i pihai iho i te uputa apatoerau taua mau piha ra, o te matara i apatoa. To pihai iho i te uputa hitia o te râ te tahi atu piha tamaaraa, o te matara i apatoerau.

45 Parau maira oia ia ˈu: “Tera piha tamaaraa e matara i apatoa, no te mau tahuˈa ïa o te tiaau ra i te mau hopoia i te hiero.+ 46 Te piha tamaaraa e matara i apatoerau, no te mau tahuˈa ïa o te tiaau ra i te taviniraa i te fata.+ O ratou te huaai o Zadoka,+ te feia no roto mai i te ati Levi tei faatoroahia no te faafatata ˈtu ia Iehova no te tavini ia ˈna.”+

47 Faito ihora oia i te aua i roto mai, 100 kubiti te roa e 100 kubiti te aano, hoê â ïa roa e hoê â aano. To mua te fata i te hiero.

48 Hopoi maira oia ia ˈu na roto i te taupee o te hiero,+ e faito ihora oia i te pou i pihai iho i te taupee, e pae ïa kubiti i te tahi pae e e pae kubiti i te tahi atu pae. E toru kubiti te aano o te uputa i te tahi pae e e toru kubiti i te tahi atu pae.

49 E 20 kubiti te roa o te taupee e 11* kubiti te aano. E pauma te taata na nia i te taahiraa e tae atu ai i reira. E pou to pihai iho i te mau pou na te hiti, hoê i te tahi e te tahi pae.+

41 Hopoi atura oia ia ˈu i roto i te nao* i rapaeau mai, e faito ihora oia i te mau pou na te hiti. E ono ïa kubiti* te aano i te tahi pae e e ono kubiti te aano i te tahi atu pae. 2 Hoê ahuru kubiti te aano o te tomoraa, e e pae kubiti te mau pǎpai na te hiti* o te tomoraa i te tahi pae e e pae kubiti i te tahi atu pae. Faito atura oia i to ˈna roa, e 40 ïa kubiti, e to ˈna aano, e 20 ïa kubiti.

3 Tomo atura oia i roto* e faito atura i te pou i pihai iho i te tomoraa, e piti ïa kubiti te meumeu, e e ono kubiti te aano o te tomoraa. E hitu kubiti te mau pǎpai na te hiti* o te tomoraa. 4 Faito ihora oia i muri iho i te piha i mua noa i te nao i rapaeau mai, e 20 ïa kubiti te roa e e 20 kubiti te aano.+ E parau maira oia ia ˈu: “Teie te Vahi Moˈa Roa.”+

5 Faito ihora oia i te pǎpai o te hiero, e ono ïa kubiti te meumeu. E maha kubiti te aano o te mau piha na te hiti ati aˈe te hiero.+ 6 E toru tahua te anairaa o te mau piha na te hiti, te tahi i nia iho i te tahi, e 30 piha i te tahua hoê. Ua hamanihia te pǎpai o te hiero ia nehenehe te mau piha na te hiti e paˈepaˈehia i nia i te patu. Aita ïa i titauhia ia faaapoohia te mau pǎpai o te hiero.+ 7 I na pae e piti o te hiero, e eˈa paumaraa menemene o te aano atu â a pauma ˈi i te mau piha i nia.+ E aano atu â te reira a pauma ˈi te tahi taata i to nia roa ˈtu tahua na te tahua ropu i te haere.

8 Ite atura vau e paˈepaˈe faateiteihia ati aˈe te hiero, e e aeho e ono kubiti te faito o te niu o te mau piha na te hiti tae roa i te poro. 9 E pae kubiti te aano o te patu i rapaeau mai o te mau piha na te hiti. E area vata noa* tei te roaraa o te mau piha na te hiti, e tuhaa te reira no te hiero.

10 E area to ropu i te hiero e te mau piha tamaaraa*+ e 20 kubiti te aano i te tahi e te tahi pae. 11 E tomoraa to ropu i te mau piha na te hiti e te area vata noa i te pae apatoerau e te tahi atu tomoraa i te pae apatoa. E pae kubiti te aano te vahi vata noa ati aˈe.

12 E 70 kubiti te aano e e 90 kubiti te roa o te paturaa i tooa o te râ i mua noa i te area vata noa. E pae kubiti te meumeu o te pǎpai o te paturaa ati aˈe.

13 Faito ihora oia i te hiero, 100 ïa kubiti te roa. Te area vata noa, te paturaa,* e to ˈna mau pǎpai, 100 atoa ïa kubiti te roa. 14 Te aano o te muaraa o te hiero i hitia o te râ e te area vata noa, 100 ïa kubiti.

15 Faito ihora oia i te roa o te paturaa i mua noa i te area vata noa i muri, e to ˈna na eˈa i te tahi e te tahi pae, 100 ïa kubiti te roa.

Faito atoa ˈtura oia i te nao i rapaeau mai, te nao i roto mai,+ e te mau taupee o te aua, 16 oia atoa te mau tomoraa, te mau haamaramarama mea aano i roto mea pirihao i rapae,+ e te mau eˈa na taua na vahi ra e toru. I pihai iho i te tomoraa, e pǎpai raau+ ïa mai te tahua haere roa i te mau haamaramarama, e ua tapoˈihia te mau haamaramarama. 17 Ua faitohia i nia ˈˈe i te tomoraa, i roto mai i te hiero, i rapaeau mai e i nia iho i te patu ati aˈe. 18 E kerubi nanaˈohia+ e te hohoˈa tumu tamara+ to nia iho, hoê tumu tamara i ropu e piti kerubi, e e piti hohoˈa mata to te kerubi tataitahi. 19 Mea fariu te hohoˈa mata taata i te tumu tamara i te tahi pae, e te hohoˈa mata liona i te tumu tamara i te tahi atu pae.+ Ua nanaˈohia te reira na te hiero taatoa. 20 Ua nanaˈohia te kerubi e te hohoˈa tumu tamara mai te tahua e nia ˈˈe i te tomoraa i nia i te pǎpai o te nao.

21 Hoê â roa e hoê â aano to na pou uputa* o te hiero.+ I mua noa i te vahi moˈa,* mai te huru ra 22 e fata raau+ e toru kubiti te teitei e e piti kubiti te roa. E pou to ˈna i te mau poro, e e raau te hamaniraahia to ˈna niu* e na te hiti. Parau maira oia ia ˈu: “O te amuraa maa teie i mua ia Iehova.”+

23 E piti uputa tataitahi to te nao i rapaeau mai e te vahi moˈa.+ 24 E piti opani to te mau uputa, e piti opani no te uputa tataitahi. 25 E kerubi nanaˈohia e e hohoˈa tumu tamara to nia iho i te mau uputa o te hiero, mai to nia iho i te mau pǎpai.+ E tamaru raau to nia i te taupee i rapaeau mai. 26 Te vai atoa ra te haamaramarama mea aano i roto mea pirihao i rapae+ e te hohoˈa tumu tamara i nia iho i na pae e piti o te taupee, oia atoa te mau piha na te hiti o te hiero e te mau tamaru.

42 Aratai atura oia ia ˈu i te aua i rapaeau mai i te pae apatoerau.+ E hopoi atura oia ia ˈu i te paturaa no te mau piha tamaaraa i pihai iho i te area vata noa,+ i te pae apatoerau o te paturaa i pihai iho mai.+ 2 I to ˈna tomoraa apatoerau, 100 ïa kubiti* to ˈna roa e e 50 kubiti to ˈna aano. 3 I tia na te reira i ropu i te aua i roto mai, e 20 kubiti te aano,+ e te tahua i te aua i rapaeau mai. Mea huri to ˈna mau eˈa te tahi i te tahi i nia e toru tahua. 4 I mua i te mau piha tamaaraa,* e eˈa ïa i roto mai+ 10 kubiti te aano e 100 kubiti te roa,* e to apatoerau to ratou mau tomoraa. 5 Mea pirihao aˈe to nia mau piha tamaaraa o te paturaa i to te tahua raro e to te tahua ropu no te mau eˈa. 6 Tei nia hoi te reira e toru tahua, aita râ e pou mai te mau pou o te mau aua. No reira mea pirihao aˈe te reira i te tahua raro e te tahua ropu.

7 E 50 kubiti te roa o te patu ofai i rapaeau mai i pihai iho i te mau piha tamaaraa i te pae o te aua i rapaeau mai i mua i te tahi atu mau piha tamaaraa. 8 E 50 kubiti hoi te roa o te mau piha tamaaraa i te pae o te aua i rapaeau mai, 100 râ kubiti to te mau piha tamaaraa i mua i te nao.* 9 E tomoraa to te mau piha tamaaraa i te pae hitia o te râ no te haere atu i reira na te aua i rapaeau mai.

10 E piha tamaaraa atoa to muri mai i* te patu ofai o te aua i te pae hitia o te râ, i pihai iho i te area vata noa e te paturaa.+ 11 E eˈa to mua i te reira mai te eˈa o te mau piha tamaaraa apatoerau.+ Hoê â roa e aano, e hoê â haereraa i rapae e faanahoraa. To ratou mau tomoraa, 12 mai te tomoraa ïa o te mau piha tamaaraa i te pae apatoa. E tomoraa to te omuaraa o te eˈa, i mua i te patu ofai i te pae hitia o te râ, i reira e nehenehe ai e tomo mai.+

13 Parau maira oia ia ˈu: “Te mau piha tamaaraa no apatoerau e te mau piha tamaaraa no apatoa i pihai iho i te area vata noa,+ e piha tamaaraa moˈa ïa i reira te mau tahuˈa o te faafatata ra ia Iehova e amu ai i te mau tusia moˈa.+ I reira ratou e tuu ai i te mau tusia moˈa roa ˈˈe, te tusia huero maa, te tusia no te hara e te tusia no te hapa, no te mea e vahi moˈa teie.+ 14 Ia tomo te mau tahuˈa, eiaha ratou ia haere i rapae i te vahi moˈa i te aua i rapaeau mai hou a tatara ˈi i to ratou mau ahu no te taviniraa,+ mea moˈa hoi te reira. E ahu mai ratou i te tahi atu mau ahu no te haere i te mau vahi faatiahia no te nunaa.”

15 I te otiraa ia ˈna i te faito i te rotoraa o te hiero,* aratai atura oia ia ˈu i rapae na te eˈa o te uputa hitia o te râ,+ e ua faito oia i teie vahi taatoa.

16 Ua faito oia i te pae hitia o te râ i te aeho faito.* Ia au i te aeho faito, e 500 kubiti te roa mai te tahi pae i te tahi atu pae.

17 Ua faito oia i te pae apatoerau, e ia au i te aeho faito, e 500 kubiti te roa.

18 Ua faito oia i te pae apatoa, e ia au i te aeho faito, e 500 kubiti te roa.

19 Tipuu atura oia i te pae tooa o te râ. Ua faito oia e 500 aeho te roa i te aeho faito.

20 Ua faito oia i to ˈna na pae e maha. E patu ati aˈe te reira+ e 500 aeho te roa e e 500 aeho te aano,+ no te faataaraa i te mea moˈa e te mea moˈa ore.+

43 Hopoi atura oia ia ˈu i te uputa i hitia o te râ.+ 2 I reira, ite atura vau i te hanahana o te Atua o Iseraela e haere mai ra na hitia o te râ mai,+ e e au to ˈna reo mai te haruru o te taheraa pape.+ E ua marama te fenua i to ˈna hanahana.+ 3 Ta ˈu i ite, mai te orama ïa ta ˈu* i ite i to ˈu haereraa mai e vavahi i te oire, e e au ra e o ta ˈu i ite i pihai iho i te anavai Kebara,+ e topa ihora vau to ˈu hohoˈa mata i raro.

4 Tomo maira te hanahana o Iehova i roto i te hiero* na te uputa i hitia o te râ.+ 5 Faatia aˈera te tahi puai ia ˈu i nia e hopoi atura ia ˈu i roto i te aua i roto mai, e ite atura vau ua î te hiero i te hanahana o Iehova.+ 6 Faaroo ihora vau i te tahi taata e paraparau ra ia ˈu no roto mai i te hiero, e haere maira taua taata ra e tia aˈera i pihai iho ia ˈu.+ 7 Parau maira oia ia ˈu:

“Tamaiti a te taata, teie te vahi o to ˈu terono+ e te vahi o to ˈu tapuae avae,+ i reira vau e parahi ai i rotopu i te nunaa o Iseraela e a muri noa ˈtu.+ Eita te nunaa o Iseraela e haaviivii faahou i to ˈu iˈoa moˈa,+ ratou e to ratou mau arii, i ta ratou taiataraa pae varua e i te tino pohe o to ratou mau arii ia pohe ratou. 8 I to ratou tuuraa i to ratou tomoraa i pihai iho i to ˈu tomoraa e ta ratou pou uputa i pihai iho i ta ˈu pou uputa, ma te hoê noa pǎpai i ropu ia ˈu e ia ratou,+ ua haaviivii ratou i to ˈu iˈoa moˈa i te mau peu hairiiri ta ratou i rave, i haamou ai au ia ratou a riri ai au.+ 9 I teie nei, ia faaatea ê ratou i ta ratou taiataraa pae varua e te tino pohe o to ratou mau arii ia ˈu, e e parahi au i rotopu ia ratou e a muri noa ˈtu.+

10 “Area oe, tamaiti a te taata, a faataa i te hiero i te nunaa o Iseraela,+ ia haama roa ratou no ta ratou mau hape,+ e ia haapii ratou i to ˈna hamaniraa.* 11 Mai te peu e haama ratou i te mau mea atoa ta ratou i rave, e faaite oe ia ratou i te hamaniraa o te hiero, to ˈna faanahoraa, e nafea ia haere i rapae e ia tomo i roto.+ A faaite ia ratou pauroa to ˈna hamaniraa e ta ˈna mau faatureraa, to ˈna hamaniraa e ta ˈna mau ture, e a papai i te reira i mua i to ratou mata, ia hiˈopoa ratou pauroa to ˈna hamaniraa e ia haapao ratou i ta ˈna mau faatureraa.+ 12 Teie te ture o te hiero: Mea moˈa roa te tuhaa fenua taatoa ati aˈe i te tupuai mouˈa.+ Inaha, tera te ture o te hiero.

13 “Teie te mau faito o te fata ei kubiti+ (ua amuihia e maha manimani i te kubiti tataitahi).* Hoê kubiti te teitei o to ˈna niu, e hoê kubiti aano aˈe te reira i te tuhaa i nia mai, i na pae e maha. E hiti to ˈna ati aˈe te niaraa hoê tiapana* te aano. O te niu tera o te fata. 14 E piti kubiti te teitei o te tuhaa i nia mai i te tuhaa matamua. Hoê kubiti aano aˈe teie tuhaa i to nia mai, i na pae e maha. E maha kubiti te teitei o te toru o te tuhaa. Hoê atoa kubiti aano aˈe teie tuhaa i to nia mai, i na pae e maha. 15 O te tahuraa auahi o te fata te tuhaa i nia roa, e e maha kubiti to ˈna teitei. E i nia i na poro e maha, e maha ïa tara.+ 16 Hoê â roa e hoê â aano to te tahuraa auahi o te fata, 12 kubiti te roa e 12 kubiti te aano.+ 17 Na pae e maha o te toru o te tuhaa, 14 ïa kubiti te roa e 14 kubiti te aano, e afa kubiti to te hiti ati aˈe, e hoê kubiti te hiti o to ˈna niu i na pae e maha.

“E tei hitia o te râ to ˈna mau taahiraa.”

18 Parau maira oia ia ˈu: “Tamaiti a te taata, teie ta te Arii hau ê e Fatu ra o Iehova e parau ra: ‘Tera te mau faaueraa te pee ia hamanihia te fata, ia nehenehe te mau tusia taauahi taatoa ia pûpûhia e te toto ia pîpîhia i nia iho.’+

19 “‘E horoa oe i te tahi puaatoro oni apî o te nǎnǎ ei tusia no te hara+ i te mau tahuˈa ati Levi no te huaai o Zadoka,+ o te faafatata mai ia ˈu no te tavini ia ˈu,’ te parau ra te Arii hau ê e Fatu ra o Iehova. 20 ‘E rave oe maa toto to ˈna a tuu atu ai i nia iho i na tara e maha o te fata, i na poro e maha o te hiti ati aˈe e i nia iho i te hiti i nia roa, no te tamâ i te fata i te hara e no te tapoˈi i te hara.*+ 21 E a rave i te puaatoro oni apî, te tusia no te hara, no te tutui i te reira i te vahi faataahia o te hiero, i rapaeau mai i te nao.*+ 22 I te piti o te mahana e pûpû ai oe i te tahi puaaniho oni oraora maitai, e e tamâhia te fata i te hara mai tei tamâhia te reira i te hara i te puaatoro oni apî.’

23 “‘Ia oti ia oe i te tamâ i te reira i te hara, e pûpû oe i te tahi puaatoro oni apî oraora maitai o te nǎnǎ e te tahi mamoe oni oraora maitai o te nǎnǎ. 24 E hopoi oe i te reira i mua ia Iehova, e taora te mau tahuˈa i te miti papaa i nia iho+ e e pûpû ratou i te reira ei tusia taauahi taatoa na Iehova. 25 E hitu mahana e pûpû ai oe i te puaaniho oni ei tusia no te hara pauroa te mahana,+ e te tahi atoa puaatoro oni apî o te nǎnǎ e te mamoe oni o te nǎnǎ. E animara oraora maitai* ta oe e pûpû. 26 E hitu mahana e rave ai te mau tahuˈa ia tapoˈihia te hara no te tamâ i te fata e ia ineine te reira. 27 Ia hope taua mau mahana ra, mai te vaˈu o te mahana+ e haere atu, e pûpû te mau tahuˈa i ta outou* mau tusia taauahi taatoa e ta outou mau tusia no te hau i nia iho i te fata, e e mauruuru vau ia outou,’+ te parau ra te Arii hau ê e Fatu ra o Iehova.”

44 Faahoˈi maira oia ia ˈu i te uputa i rapaeau mai o te nao* i hitia o te râ,+ e ua tapirihia te reira.+ 2 Parau maira Iehova ia ˈu: “E tapiri-noa-hia teie uputa. E ere mea tatarahia, e aita e taata e tomo na reira. Ua tomo mai hoi Iehova te Atua o Iseraela na reira,+ ia tapiri-noa-hia ïa te reira. 3 Tera râ, e parahi te raatira i reira no te amu i te maa i mua ia Iehova,+ e raatira hoi oia. E tomo mai oia na te taupee o te uputa, e na reira oia e haere ai i rapae.”+

4 E hopoi atura oia ia ˈu na roto i te uputa apatoerau e tae roa i mua i te hiero. I to ˈu hiˈoraa ˈtu, ite atura vau ua î te hiero o Iehova i te hanahana o Iehova.+ Topa ihora ïa vau te mata i raro.+ 5 E parau maira Iehova ia ˈu: “Tamaiti a te taata, a haapao maitai, a mataitai, e a faaroo maitai i te mau mea atoa ta ˈu e parau ia oe no nia i te mau faatureraa e ture o te hiero o Iehova. A haapao maitai i te tomoraa o te hiero e te mau uputa atoa no te haere i rapae i te nao.+ 6 E parau oe i te nunaa orure hau o Iseraela: ‘Teie ta te Arii hau ê e Fatu ra o Iehova e parau ra: “Ua navai ta outou mau ohipa hairiiri atoa, e te nunaa o Iseraela. 7 Ia aratai mai outou i te feia ěê peritome-ore-hia te aau e te tino i roto i to ˈu nao, e haaviivii ratou i to ˈu hiero. Te pûpû mai ra outou i ta ˈu pane, te mii e te toto, a ofatihia ˈi ta ˈu faufaa no ta outou mau peu hairiiri atoa. 8 Aita outou i haapao i ta ˈu mau mea moˈa.+ Ua faatoroa râ outou i te tahi atu mau taata no te haapao i te mau ohipa i to ˈu nao.”’

9 “‘Teie ta te Arii hau ê e Fatu ra o Iehova e parau ra: “Aita e taata ê e ora ra i Iseraela e tei ore i peritomehia te aau e te tino e nehenehe e tomo i roto i to ˈu nao.”’

10 “‘Area râ te ati Levi tei fariu ê roa ia ˈu+ i te fariu-ê-raa Iseraela ia ˈu no te pee i ta ratou mau idolo faufau,* e faaruru ratou i te mau faahopearaa o ta ratou hape. 11 E e riro ratou ei tavini i roto i to ˈu nao no te tiaau i te mau uputa o te hiero+ e no te tavini i te hiero. E tupai ratou i te tusia taauahi taatoa e te tusia no te nunaa, e e tia ratou i mua i te nunaa no te tavini ia ratou. 12 No te mea i tavini na ratou i te nunaa o Iseraela i mua i ta ratou mau idolo faufau a riro atu ai ei ofai turoriraa o te turai ra i te nunaa o Iseraela ia hara,+ no reira vau e tuu ai i to ˈu rima i nia no te faahapa ia ratou na roto i te tahi euhe,’ te parau ra te Arii hau ê e Fatu ra o Iehova, ‘e e faaruru ratou i te mau faahopearaa o ta ratou hape. 13 Eita ratou e faafatata mai no te tavini ia ˈu ei tahuˈa na ˈu e eita ratou e faafatata i te tahi mea moˈa aore ra moˈa roa ta ˈu. E haama ratou no te mau mea hairiiri ta ratou i rave. 14 E faatoroa râ vau ia ratou no te haapao i te mau hopoia o te hiero, no te haapao i te taviniraa i reira e pauroa te mea ia ravehia i reira.’+

15 “‘Area no te mau tahuˈa ati Levi, te huaai o Zadoka,+ tei haapao i te mau hopoia o to ˈu nao i te fariu-ê-raa to Iseraela ia ˈu,+ e faafatata mai ratou ia ˈu no te tavini ia ˈu, e e tia ratou i mua ia ˈu no te pûpû mai i te mii+ e te toto,’+ te parau ra te Arii hau ê e Fatu ra o Iehova. 16 ‘O ratou te tomo i roto i to ˈu nao, e faafatata mai ratou i ta ˈu amuraa maa no te tavini ia ˈu+ e e haapao ratou i ta ratou mau hopoia ia ˈu.+

17 “‘Ia tomo ratou na roto i te mau uputa o te aua i roto mai, e oomo ïa ratou i te ahu lino.+ Eiaha ratou e oomo i te tahi ahu huruhuru mamoe ia tavini ratou i te mau uputa o te aua i roto mai aore ra i roto i te reira. 18 E oomo ratou i te taamu upoo lino i nia i to ratou upoo, e e tapoˈi te piripou lino i to ratou tauupu.+ Eiaha ratou e oomo i te tahi mea e rari ai ratou i te hou. 19 Hou ratou a haere ai i rapae i te aua i rapaeau mai, to reira te nunaa, e tatara ratou i to ratou mau ahu ta ratou i oomo a tavini ai ratou+ e e tuu ratou i te reira i roto i te mau piha tamaaraa* moˈa.+ E e oomo ratou i te tahi atu mau ahu, ia ore te nunaa ia peehia i te moˈaraa i to ratou mau ahu. 20 Eiaha ratou e hahu i to ratou upoo+ e e vaiiho ia roroa to ratou rouru. E tâpû ratou i to ratou rouru. 21 Eiaha te mau tahuˈa e inu i te uaina ia tomo ratou i roto i te aua i roto mai.+ 22 Eiaha ratou e faaipoipo i te tahi vahine ivi aore ra te tahi vahine tei faataa i ta ˈna tane faaipoipo,+ e nehenehe râ ratou e faaipoipo i te tahi vahine no te huaai o Iseraela aita i taoto aˈenei i te tane aore ra te vahine faaipoipo a te tahi tahuˈa tei pohe.’+

23 “‘E haapii ratou i to ˈu nunaa i te taa-ê-raa i rotopu i te mea moˈa e te mea moˈa ore, e e haapii ratou ia ratou i te taa-ê-raa i rotopu i te mea viivii e te mea viivii ore.+ 24 Ei haava ratou i roto i te haavaraa.+ E haava ratou ia au i ta ˈu mau faaotiraa haavaraa.+ E haapao ratou i ta ˈu mau ture e ta ˈu mau faatureraa no nia i ta ˈu mau oroa atoa+ e e haamoˈa ratou i ta ˈu mau Sabati. 25 Eiaha ratou e faafatata i te tahi taata pohe, a viivii ratou. E nehenehe râ ratou e haaviivii ia ratou no to ratou metua tane, metua vahine, taeae, tuahine tei ore i faaipoipo, no ta ratou tamaiti aore ra tamahine.+ 26 E i muri iho i te tamâraahia te tahi tahuˈa, e taiohia e hitu mahana no ˈna. 27 I te mahana e tomo ai oia i roto i te vahi moˈa, i roto i te aua i roto mai, no te tavini i te vahi moˈa, e pûpû oia i ta ˈna tusia no te hara,’+ te parau ra te Arii hau ê e Fatu ra o Iehova.

28 “‘E teie ta ratou tuhaa: o vau ta ratou tuhaa.+ Eiaha outou e horoa i te tahi tuhaa fenua no ratou i Iseraela, o vau hoi to ratou tuhaa fenua. 29 O ratou te amu i te tusia huero maa,+ te tusia no te hara e te tusia no te hapa,+ e e riro ia ratou te mau mea atoa i pûpûhia i Iseraela.+ 30 E riro i te mau tahuˈa pauroa te hotu paari matamua maitai roa ˈˈe e pauroa te ô ua rau te huru no ǒ mai ia outou.+ E e horoa outou i ta outou faraoa ota orarahi matamua na te tahuˈa.+ Na roto i te reira e vai noa ˈi te haamaitairaa i nia i to outou mau utuafare.+ 31 Eiaha te mau tahuˈa e amu i te tahi manu e te animara tei pohe ê na aore ra tei hahaehia.’+

45 “‘Ia tufa outou i te fenua ei tuhaa,+ e pûpû ïa outou ei ô na Iehova i te tahi tuhaa moˈa o te fenua.+ E 25 000 kubiti* to ˈna roa, e to ˈna aano, 10 000 ïa kubiti.+ E tuhaa moˈa tera vahi taatoa.* 2 Ei tuhaa hoê â roa e hoê â aano to roto i te reira no te vahi moˈa, e 500 kubiti i nia e 500 kubiti,*+ e e 50 kubiti te aano o te mau fenua aihere ati aˈe.+ 3 Tera te faito ia faito oe i te roa e 25 000 e te aano 10 000, e ei roto i te reira te nao,* te tahi mea moˈa roa. 4 Ei tuhaa moˈa taua fenua ra no te mau tahuˈa,+ te mau tavini o te nao, o te faafatata ˈtu ia Iehova no te tavini ia ˈna.+ Ei vahi te reira no to ratou mau fare e ei vahi moˈa no te nao.

5 “‘No te ati Levi, te mau tavini o te hiero, ei tuhaa ïa e 25 000 kubiti te roa e 10 000 kubiti te aano ta ratou,+ e ei 20 piha tamaaraa*+ ta ratou e fatu.

6 “‘E horoa outou no te oire i te tahi vahi e 25 000 kubiti te roa (ia au i te ô moˈa) e e 5 000 kubiti te aano.+ E riro te reira i te nunaa taatoa o Iseraela.

7 “‘E ei fenua to te raatira i na pae e piti o te ô moˈa e o te vahi tufahia no te oire. Ei pihai iho te reira i te ô moˈa e te vahi tufahia no te oire. Ei te pae tooa o te râ e hitia o te râ te reira. E tuea to ˈna roa na to ˈna otia tooa o te râ haere roa i to ˈna otia hitia o te râ i te hoê o te mau tuhaa a te mau opu.+ 8 E riro te reira ei tuhaa na ˈna i Iseraela. Eita ta ˈu mau raatira e hamani ino faahou i to ˈu nunaa,+ e e horoa ratou i te fenua no te nunaa o Iseraela ia au i to ratou mau opu.’+

9 “Teie ta te Arii hau ê e Fatu ra o Iehova e parau ra: ‘Ua rahi roa ta outou, te mau raatira o Iseraela!’

“‘A faaea i ta outou haavîraa e faaheporaa, e a rave i te mea afaro e te tia.+ A faaea i te haru i te faufaa a to ˈu nunaa,’+ te parau ra te Arii hau ê e Fatu ra o Iehova. 10 ‘E faaohipa outou i te faito tia, i te hoê faito epha* tia e te hoê faito bato* tia.+ 11 Ei faito tia to te epha e to te bato. Ei hoê tuhaa i nia ahuru o te hoê homera* te bato, ei hoê tuhaa i nia ahuru o te hoê homera te epha. O te homera te ravehia no te faito i te tahi atu mau mea. 12 Ei 20 gera* te sekela.*+ E 20 sekela e e 25 sekela e 15 sekela, o ta outou ïa mane.’*

13 “‘Teie te ô ta outou e pûpû: hoê tuhaa i nia e ono o te hoê epha no roto i te homera sitona tataitahi e hoê tuhaa i nia e ono o te hoê epha no roto i te homera kerite tataitahi. 14 I nia i te faito bato e faitohia ˈi te rahiraa hinu. Hoê tuhaa i nia ahuru o te kora* te hoê bato, e hoê ahuru bato te hoê homera, hoê homera, hoê ahuru hoi bato. 15 E no roto mai i te nǎnǎ animara a Iseraela, e horoahia hoê mamoe i nia e 200. E pûpûhia te reira no te tusia huero maa,+ te tusia taauahi taatoa+ e te mau tusia no te hau,+ no te faaore i te mau hara a te nunaa,’+ te parau ra te Arii hau ê e Fatu ra o Iehova.

16 “‘Pauroa te taata o te fenua te pûpû i tera ô+ na te raatira o Iseraela. 17 Na te raatira râ te hopoia o te tusia taauahi taatoa,+ te tusia huero maa+ e te tusia uaina i te roaraa o te mau oroa,+ te mau avaˈe apî, te mau Sabati+ e pauroa te oroa faataahia a te nunaa o Iseraela.+ Na ˈna e horoa i te tusia no te hara, te tusia huero maa, te tusia taauahi taatoa e te mau tusia no te hau, ia faaorehia te mau hara a te nunaa o Iseraela.’

18 “Teie ta te Arii hau ê e Fatu ra o Iehova e parau ra: ‘I te mahana matamua o te avaˈe matamua, e rave oe i te hoê puaatoro oni apî oraora maitai o te nǎnǎ, e e tamâ oe i te nao i te hara.+ 19 E rave te tahuˈa maa toto o te tusia no te hara a tuu atu ai i nia iho i te pou uputa o te hiero,+ i na poro e maha o te hiti ati aˈe te fata, e i nia i te pou uputa o te aua i roto mai. 20 Tera ta oe e rave i te hitu o te mahana o te avaˈe no te taata atoa o te hara ma te hape aore ra ma te ite ore.+ E e tamâ outou i te hiero i te hara.+

21 “‘I te 14 o te mahana o te avaˈe matamua, e faatupu outou i te oroa Pasa.+ E amuhia te pane hopue ore+ e hitu mahana. 22 I tera mahana, e horoa te raatira i te hoê puaatoro oni apî ei tusia no te hara no ˈna e no te taata atoa o te fenua.+ 23 No na hitu mahana o te oroa, e horoa oia i na hitu mahana tataitahi+ ei tusia taauahi taatoa na Iehova e hitu puaatoro oni apî oraora maitai e e hitu mamoe oni oraora maitai, e te hoê puaaniho oni ei tusia no te hara. 24 E horoa atoa oia ei tusia huero maa i te hoê epha no te puaatoro oni apî tataitahi e te hoê epha no te mamoe oni tataitahi, e te hoê hina* hinu no te epha tataitahi.

25 “‘I te 15 o te mahana o te hitu o te avaˈe, i te roaraa o na hitu mahana o te oroa,+ e horoa oia i te hoê â tusia no te hara, tusia taauahi taatoa, tusia huero maa e hinu.’”

46 “Teie ta te Arii hau ê e Fatu ra o Iehova e parau ra: ‘Ia tapiri-noa-hia te uputa o te aua i roto mai+ i hitia o te râ+ i na ono mahana raveraa ohipa.+ Ia tatarahia râ te reira i te mahana Sabati e i te mahana o te avaˈe apî. 2 E tomo mai te raatira mai rapaeau mai na te taupee o te uputa,+ e e tia oia i pihai iho i te pou uputa. E pûpû te mau tahuˈa i ta ˈna tusia taauahi taatoa e ta ˈna mau tusia no te hau, e e tipapa oia i raro i te tomoraa o te uputa a haere atu ai i rapae. Eiaha râ te uputa ia tapirihia e ahiahi noa ˈtu. 3 E tipapa atoa to teie fenua i mua ia Iehova i te tomoraa o taua uputa ra i te mau Sabati e i te mau avaˈe apî.+

4 “‘E ono fanauˈa mamoe oni oraora maitai e hoê mamoe oni oraora maitai+ te tusia taauahi taatoa ta te raatira e hopoi na Iehova i te mahana Sabati. 5 Hoê epha* te tusia huero maa no te mamoe oni e ta ˈna atoa e nehenehe e horoa no te mau fanauˈa mamoe oni, e hoê hina* hinu no te epha tataitahi.+ 6 I te mahana o te avaˈe apî, e pûpûhia te hoê puaatoro oni apî oraora maitai o te nǎnǎ, e e ono fanauˈa mamoe oni e te hoê mamoe oni. Ei animara oraora maitai te reira.+ 7 E horoa oia ei tusia huero maa i te hoê epha no te puaatoro oni apî, hoê epha no te mamoe oni, e ta ˈna atoa e nehenehe e horoa no te mau fanauˈa mamoe oni. E e horoa oia i te hoê hina hinu no te epha tataitahi.

8 “‘Ia tomo mai te raatira, ia tomo mai ïa oia na te taupee o te uputa, e ia na reira atoa oia i te haere i rapae.+ 9 E ia tomo mai to teie fenua i mua ia Iehova i te mau oroa,+ te feia tei tomo mai na te uputa apatoerau+ no te haamori, ia haere ïa ratou i rapae na te uputa apatoa,+ e te feia tei tomo mai na te uputa apatoa, ia haere ïa ratou i rapae na te uputa apatoerau. Eiaha hoê e hoˈi faahou i muri na te uputa i tomo mai ai oia, e haere hoi ratou i rapae na te uputa i te tahi atu pae ia ratou. 10 Area te raatira i rotopu ia ratou, e tomo mai oia ua tomo anaˈe mai ratou, e e haere oia i rapae ua haere anaˈe ratou i rapae. 11 I te mau oroa e te mau tau oroa, hoê epha te tusia huero maa no te puaatoro oni apî, hoê epha no te mamoe oni e ta ˈna atoa e nehenehe e horoa no te mau fanauˈa mamoe oni, e hoê hina hinu no te epha tataitahi.+

12 “‘Ia horoa te raatira i te hoê tusia taauahi taatoa+ aore ra i te tahi mau tusia no te hau ei ô horoa noa na Iehova, e tatarahia te uputa i hitia o te râ no ˈna, e e horoa oia i ta ˈna tusia taauahi taatoa e ta ˈna mau tusia no te hau mai ta ˈna iho â e rave i te mahana Sabati.+ Ua haere anaˈe oia i rapae, e tapirihia te uputa i muri ia ˈna.+

13 “‘E horoa oe pauroa te mahana i te hoê fanauˈa mamoe oni oraora maitai aita â i hoê matahiti ei tusia taauahi taatoa na Iehova.+ E na reira oe i tera e tera poipoi. 14 E pauroa te poipoi, e horoa atoa oe hoê tuhaa i nia e ono o te hoê epha ei tusia huero maa, e hoê tuhaa i nia e toru o te hoê hina hinu no te pîpî i nia i te faraoa ota oro-maitai-hia ei tusia huero maa tamau na Iehova. E faatureraa vai maoro tera. 15 E horoahia te fanauˈa mamoe oni, te tusia huero maa e te hinu pauroa te poipoi ei tusia taauahi taatoa tamau.’

16 “Teie ta te Arii hau ê e Fatu ra o Iehova e parau ra: ‘Ia horoa te raatira i te tahi ô ei tuhaa na ta ˈna tamaiti tataitahi, e riro te reira ei faufaa na ta ˈna mau tamaiti. E faufaa te reira na ratou tei tutuuhia mai. 17 Ia horoa râ oia i te tahi ô no roto mai i ta ˈna tuhaa na te hoê o ta ˈna mau tavini, e riro te reira ia ˈna e tae roa i te matahiti e faatiamâhia ˈi oia,+ a hoˈi mai ai te reira i te raatira. Te tuhaa noa a ta ˈna mau tamaiti te riro ia ratou e a muri noa ˈtu. 18 Eiaha te raatira e rave i te tuhaa a te nunaa ma te faahepo ia ratou e faarue i to ratou tuhaa fenua. Ia horoa oia na ta ˈna mau tamaiti i te hoê tuhaa no roto i to ˈna tuhaa fenua, ia ore hoê o to ˈu nunaa ia faaerehia i to ˈna tuhaa fenua.’”

19 Faatomo atura oia ia ˈu na te tomoraa+ i pihai iho i te uputa e tae atu ai i te mau piha tamaaraa* moˈa no te mau tahuˈa, i apatoerau,+ e i reira, ite atura vau i te tahi vahi i muri i te pae tooa o te râ. 20 Parau maira oia ia ˈu: “Teie te vahi e vaipâ ˈi te mau tahuˈa i te tusia no te hapa e te tusia no te hara e i reira ratou e tunu ai i te tusia huero maa,+ ia ore ratou ia afai i te tahi mea i te aua i rapaeau mai e ia ore te nunaa ia peehia i te moˈaraa.”+

21 Hopoi atura oia ia ˈu i rapae i te aua i rapaeau mai e faahaere atura ia ˈu i na poro e maha o te aua, e ite atura vau i te hoê aua i te poro tataitahi o te aua i rapaeau mai. 22 I na poro e maha o te aua, e aua nainai ïa, e 40 kubiti* te roa e e 30 kubiti te aano. Hoê â faito to ratou e maha.* 23 E hiti* ati aˈe ia ratou e maha, e i raro aˈe i te mau hiti, ua patuhia te tahi mau vahi no te vaipâ i te mau tusia. 24 Parau maira oia ia ˈu: “Teie te mau vahi e vaipâ ˈi te mau tavini o te hiero i te tusia a te nunaa.”+

47 Faahoˈi maira oia ia ˈu i te tomoraa o te hiero,+ e ite atura vau i reira i te pape e tahe ra i hitia o te râ mai raro aˈe mai i te tomoraa o te hiero,+ tei hitia o te râ hoi te muaraa o te hiero. Te tahe ra te pape mai raro aˈe mai i te pae atau o te hiero, i apatoa o te fata.

2 Faahaere atura oia ia ˈu i rapae na te uputa apatoerau+ e aratai atura ia ˈu na rapae a haaati ai i te uputa i rapaeau mai i hitia o te râ,+ e ite atura vau i te pape i te taheraa i te pae atau.

3 I te haereraa taua taata ra i rapae i hitia o te râ e te tahi taura faito i to ˈna rima,+ faito atura oia 1 000 kubiti* e faahaere atura ia ˈu na roto i te pape. Tei to ˈu poro avae te pape.

4 Faito faahou atura oia 1 000 kubiti e faahaere atura ia ˈu na roto i te pape, e tei to ˈu turi te pape.

Faito faahou atura oia 1 000 kubiti e faahaere atura ia ˈu na roto i te pape, e tei to ˈu tauupu te pape.

5 I te faito-faahou-raa oia 1 000 kubiti, e tahora ïa eita ta ˈu e nehenehe e na roto atu. No te hohonu rahi hoi o te pape e titauhia ˈi ia ˈau, e tahora eita e nehenehe e na roto atu i te haere i te tahi atu pae.

6 Ui maira oia ia ˈu: “Ua ite anei oe i te reira, tamaiti a te taata?”

Faahaere atura oia ia ˈu e faahoˈi maira ia ˈu i te hiti pape. 7 I te hoˈiraa mai au, ite atura vau e rave rahi roa tumu raau i na pae e piti o te hiti pape.+ 8 Parau maira oia ia ˈu: “Te tahe ra teie pape i te tuhaa fenua no hitia o te râ a pou atu ai na roto i te Araba*+ e a reva ˈtu ai i roto i te miti. Ia reva te reira i roto i te miti,+ e oraora mai te pape. 9 E nehenehe te mau animara o te aere e ora na te mau vahi atoa e tahe ai te mau pape.* E aere te iˈa, no te mea e tahe taua pape ra i reira. E oraora mai te miti, e e ora te mau mea atoa na te mau vahi atoa e tahe ai te pape.

10 “E tia te feia ravaai i te hiti pape mai Ene-gedi+ tae roa i Ene-egelaima, i reira e taraˈihia ˈi te upeˈa. E aere te iˈa ua rau te huru, mai te iˈa o te miti Rahi.*+

11 “Area te mau vahi pape hopuna e te mau vahi vari, eita ïa e oraora mai. E vai noa te miti papaa i reira.+

12 “E tupu te mau huru tumu raau atoa o te horoa mai i te maa i na pae e piti o te hiti pape. Eita to ratou mau rauere e mǎrô e e horoa noa mai iho â ratou i te maa. Pauroa te avaˈe, e horoa mai ratou i te mau hotu apî, no te mea na te nao*+ mai e tahe mai ai te pape no ratou. E riro to ratou mau hotu ei maa e to ratou mau rauere ei rapaauraa.”+

13 Teie ta te Arii hau ê e Fatu ra o Iehova e parau ra: “Teie te tuhaa fenua ta outou e horoa ei fenua tutuuhia no na 12 opu o Iseraela, e ei piti tuhaa ta Iosepha.+ 14 E fatu outou i te reira e hoê â faito tuhaa ta outou e fanaˈo.* Ua horeo vau e horoa i teie fenua no to outou mau tupuna,+ e i teie nei no outou i horoahia ˈi te reira ei tuhaa.

15 “Teie te otia o te fenua i te pae apatoerau: Na te miti Rahi e na te eˈa e tae atu ai i Hetelona+ tae roa i Zedada,+ 16 Hamata,+ Berota,+ e Siberaima, i ropu i te tuhaa fenua o Damaseko e te tuhaa fenua o Hamata, tae roa i Hazara-hatikona i pihai iho i te otia o Haurana.+ 17 Na te miti mai ïa te otia tae roa i Hazara-enana,+ na te roaraa o te otia o Damaseko i te pae apatoerau e te otia o Hamata.+ Tera te otia apatoerau.

18 “E na ropu atu te pae hitia o te râ ia Haurana e ia Damaseko e na te roaraa o Ioridana i ropu ia Gileada+ e te fenua o Iseraela. E faito outou i te reira mai te otia tae roa i te miti i te pae hitia o te râ.* Tera te otia hitia o te râ.

19 “Te otia apatoa,* na Tamara mai ïa tae roa i te mau pape o Meriba-kadesa,+ haere atu ai i te tahora* e tae roa i te miti Rahi.+ Tera te otia apatoa.*

20 “I te pae tooa o te râ, o te miti Rahi ïa, na te otia mai tae roa i te tahi vahi i mua noa ia Lebo-hamata.*+ Tera te otia tooa o te râ.”

21 “E tufa outou i teie fenua i rotopu ia outou, i rotopu i na 12 opu o Iseraela. 22 E opere outou i te reira ei tuhaa i rotopu ia outou e te feia ěê e parahi ra i ǒ outou e tei tamariihia a ora ˈi ratou i rotopu ia outou. E riro ratou no outou mai te ati Iseraela tumu. E fanaˈo ratou mai ia outou i te tahi tuhaa i rotopu i te mau opu o Iseraela. 23 E horoa outou no te taata ê e parahi ra i rotopu ia outou i te tahi tuhaa o te tuhaa fenua o te opu i reira oia i te parahiraa,” te parau ra te Arii hau ê e Fatu ra o Iehova.

48 “Teie te iˈoa o te mau opu, na te otia apatoerau mai: E haere te tuhaa a Dana+ na te eˈa o Hetelona haere roa i Lebo-hamata*+ e tae roa i Hazara-enana, na te otia o Damaseko i apatoerau, i pihai iho ia Hamata,+ e e haere te reira mai te otia hitia o te râ tae roa i te otia tooa o te râ. 2 Tei te otia o Dana te tuhaa a Asera,+ mai te otia hitia o te râ tae roa i te otia tooa o te râ. 3 Tei te otia o Asera te tuhaa a Naphatali,+ mai te otia hitia o te râ tae roa i te otia tooa o te râ. 4 Tei te otia o Naphatali te tuhaa a Manase,+ mai te otia hitia o te râ tae roa i te otia tooa o te râ. 5 Tei te otia o Manase te tuhaa a Epheraima,+ mai te otia hitia o te râ tae roa i te otia tooa o te râ. 6 Tei te otia o Epheraima te tuhaa a Reubena,+ mai te otia hitia o te râ tae roa i te otia tooa o te râ. 7 Tei te otia o Reubena te tuhaa a Iuda,+ mai te otia hitia o te râ tae roa i te otia tooa o te râ. 8 I te otia o Iuda, mai te otia hitia o te râ tae roa i te otia tooa o te râ, ei 25 000 kubiti* te aano+ o te ô ta outou e faataa e ia tuea i te roa o te tahi atu mau tuhaa a te mau opu mai te otia hitia o te râ tae roa i te otia tooa o te râ. Ei ropu te nao* i te reira.

9 “Ei 25 000 kubiti te roa e 10 000 kubiti te aano o te ô ta outou e faataa na Iehova. 10 Ei ô moˈa teie na te mau tahuˈa.+ Ei 25 000 kubiti i apatoerau, 10 000 kubiti i tooa o te râ, 10 000 kubiti i hitia o te râ e 25 000 kubiti i apatoa. Ei ropu te nao o Iehova i te reira. 11 E riro te reira i te mau tahuˈa haamoˈahia no roto mai i te huaai o Zadoka,+ tei haapao i ta ratou mau hopoia ia ˈu e tei ore i hahi ê i te hahi-ê-raa te ati Iseraela e te ati Levi.+ 12 E riro ia ratou hoê tuhaa o te ô o te fenua tei faataahia ei mea moˈa roa, i te otia o te ati Levi.

13 “I pihai iho noa mai i te tuhaa fenua o te mau tahuˈa, ei tuhaa ta te ati Levi e 25 000 kubiti te roa e 10 000 kubiti te aano. (E 25 000 kubiti te roa taatoa e 10 000 kubiti te aano.) 14 Eiaha ratou e hoo atu, e taui aore ra e faafatu i te tahi atu i te tuhaa maitai roa ˈˈe o te fenua, mea moˈa hoi te reira no Iehova.

15 “E faaohipahia te vahi toe, e 5 000 kubiti to ˈna aano na te otia e 25 000 kubiti, no te mau ohipa matauhia a te oire,+ ei vahi faaearaa e ei vahi faaamuraa i te animara. Ei ropu te oire i te reira.+ 16 Teie te faito o te oire: E 4 500 kubiti te otia apatoerau, e 4 500 te otia apatoa, e 4 500 te otia hitia o te râ e e 4 500 te otia tooa o te râ. 17 Te vahi o te oire e faaamuhia ˈi te animara, ei 250 ïa kubiti i apatoerau, ei 250 i apatoa, ei 250 i hitia o te râ e ei 250 i tooa o te râ.

18 “E tuea te roa o te tuhaa e toe ra i te roa o te ô moˈa,+ 10 000 kubiti i hitia o te râ e 10 000 i tooa o te râ. E tuea te reira i te roa o te ô moˈa, e e riro te mau mea e tupu i nia iho ei maa na te feia e ohipa ra no te oire. 19 Na te feia o te mau opu atoa o Iseraela o te ohipa ra no te oire e faaapu i te reira.+

20 “Hoê â roa e hoê â aano to te ô taatoa e 25 000 kubiti. E faataa outou i te reira ei ô moˈa e oia atoa te tuhaa fenua o te oire.

21 “Na te raatira te mea e toe mai i na pae e piti o te ô moˈa e o te tuhaa fenua o te oire.+ Ei na pihai iho te reira i na 25 000 kubiti o te otia i hitia o te râ e tooa o te râ o te ô. E tuea te reira i tera mau tuhaa na pihai iho, e e riro te reira i te raatira. Ei ropu i te reira te ô moˈa e te nao o te hiero.

22 “Ei ropu te tuhaa fenua o te ati Levi e te tuhaa fenua o te oire i te fenua o te raatira. Ei ropu te tuhaa fenua o te raatira i te otia o Iuda+ e te otia o Beniamina.

23 “Area te mau opu e toe ra, mai te otia hitia o te râ tae roa i te otia tooa o te râ te tuhaa a Beniamina.+ 24 Tei pihai iho te tuhaa a Simeona i te otia o Beniamina,+ mai te otia hitia o te râ tae roa i te otia tooa o te râ. 25 Tei pihai iho te tuhaa a Isakara+ i te otia o Simeona, mai te otia hitia o te râ tae roa i te otia tooa o te râ. 26 Tei pihai iho te tuhaa a Zebuluna i te otia o Isakara,+ mai te otia hitia o te râ tae roa i te otia tooa o te râ.+ 27 Tei pihai iho te tuhaa a Gada i te otia o Zebuluna,+ mai te otia hitia o te râ tae roa i te otia tooa o te râ. 28 E haere te otia apatoa to pihai iho i te otia o Gada mai Tamara+ mai tae roa i te mau pape o Meriba-kadesa,+ haere roa i te tahora*+ e i te miti Rahi.*

29 “Tera te fenua ta outou e tufa ei tuhaa na te mau opu o Iseraela,+ e e riro te reira ei tuhaa na ratou,”+ te parau ra te Arii hau ê e Fatu ra o Iehova.

30 “Teie te mau uputa e haerehia i rapae i te oire: E 4 500 kubiti te faito o te pae apatoerau.+

31 “E topahia te mau uputa o te oire i te iˈoa o te mau opu o Iseraela. No na uputa e toru i apatoerau, hoê uputa no Reubena, hoê uputa no Iuda e hoê uputa no Levi.

32 “E 4 500 kubiti te roa o te pae hitia o te râ, e e toru uputa: hoê uputa no Iosepha, hoê uputa no Beniamina e hoê uputa no Dana.

33 “E 4 500 kubiti te faito o te pae apatoa, e e toru uputa: hoê uputa no Simeona, hoê uputa no Isakara e hoê uputa no Zebuluna.

34 “E 4 500 kubiti te roa o te pae tooa o te râ, e e toru uputa: hoê uputa no Gada, hoê uputa no Asera e hoê uputa no Naphatali.

35 “Ei 18 000 kubiti te haaatiraa. E ‘to reira Iehova’+ te iˈoa o te oire mai taua mahana mai ra.”