NEHEMIA

1 Teie te mau parau a Nehemia*+ te tamaiti a Hakalia: I te avaˈe no Kisilu,* i te 20raa o te matahiti, tei Susana*+ vau i te pare.* 2 I taua taime ra, tae maira Hanani+ hoê o to ˈu mau taeae, e te tahi atu mau taata no Iuda, e ui atura vau ia ratou no nia i te toea ati Iuda tei ora mai i te hopoi-ê-raa,+ e no nia atoa ia Ierusalema. 3 Pahono maira ratou: “To roto te toea i ǒ i tera fenua, o tei ora mai i te hopoi-ê-raa, i te hoê tupuraa fifi mau e te haama.+ Ua vavahihia te aua o Ierusalema,+ e ua taninahia to ˈna mau uputa.”+

4 I to ˈu iho â faarooraa i taua mau parau ra, parahi ihora vau, taˈi e oto ihora vau e rave rahi mahana. Haapae noa ˈtura vau i te maa+ e pure noa ˈtura i mua i te Atua o te raˈi. 5 Na ô atura vau: “E Iehova, te Atua o te raˈi, te Atua rahi ia mǎtaˈuhia o te haapao i ta ˈna faufaa e o te faaite i te here taiva ore i te feia e here ra ia ˈna e e haapao ra i ta ˈna mau faaueraa,+ 6 ia faaroo mai to tariˈa e ia hiˈo mai to oe mata. A faaroo i te pure a to tavini ta ˈu e pure nei ia oe i teie mahana, i te po e te ao,+ no nia i to mau tavini te ati Iseraela, a faˈi noa ˈi au i te mau hara ta te nunaa o Iseraela i rave ia oe. Ua hara matou, o vau atoa e te nunaa* o to ˈu metua.+ 7 Ua rave mau â matou i te ohipa viivii i mua ia oe,+ a ore ai e haapao i te mau ture, faaueraa e faaotiraa haavaraa ta oe i horoa i to tavini o Mose.+

8 “A haamanaˈo na i te parau ta oe i faaue* i to tavini o Mose: ‘Ia taiva outou, e haapurara vau ia outou i rotopu i te mau nunaa.+ 9 Ia hoˈi mai râ outou ia ˈu, ia haapao outou i ta ˈu mau faaueraa e ia faaroo outou i te reira, noa ˈtu ua haapurarahia outou tae roa i te hopea o te fenua, e haaputuputu mai au ia outou+ mai reira mai, a aratai atu ai ia outou i te vahi ta ˈu i maiti no te haamau i to ˈu iˈoa.’+ 10 E tavini ratou na oe e e nunaa no oe, ta oe i hoo mai i to mana rahi e to rima puai.+ 11 E Iehova, ia faaroo mai to tariˈa i ta ˈu pure e te pure a to mau tavini o te faatura* ra i to iˈoa. A rave ia manuïa vau i teie mahana, e ia aumihi mai te arii ia ˈu.”+

E hopoi auˈa uaina hoi au na te arii.+

2 I te avaˈe no Nisana,* i te 20 o te matahiti+ faatereraa a te arii Aretehasaseta,+ e uaina tei tuuhia i mua ia ˈna, e mai tei matauhia, rave ihora vau i te uaina e horoa ˈtura i te arii.+ Aita râ vau i tia aˈenei ma te peapea i mua i to ˈna aro. 2 Parau maira ïa te arii ia ˈu: “Eaha oe e peapea roa ˈi, aita hoi to oe e maˈi? Eita e ore to aau te peapea ra.” Mǎtaˈu roa ihora vau.

3 Na ô atura vau i te arii: “Ia ora maoro te arii! Eaha hoi au e ore ai e peapea? Te vai ano ra te oire, te vahi i hunahia ˈi to ˈu mau tupuna, e ua paapaa to ˈna mau uputa.”+ 4 Parau maira ïa te arii ia ˈu: “Eaha ta oe e hinaaro?” I reira iho, pure aˈera vau i te Atua o te raˈi.+ 5 E na ô atura vau i te arii: “Ia tia i te arii e ia fariihia to tavini e oe, a tono ia ˈu i Iuda, i te oire i hunahia ˈi to ˈu mau tupuna, ia nehenehe au e patu faahou i te reira.”+ 6 Parau maira ïa te arii, te parahi ra hoi ta ˈna arii vahine i pihai iho ia ˈna: “Ehia maororaa to oe tere, e afea oe e hoˈi mai ai?” Ua farii ïa te arii e tono ia ˈu,+ e faaite atura vau i te maororaa o to ˈu tere.+

7 Na ô atura vau i te arii: “Ia tia i te arii, ia horoahia mai te tahi mau rata ia ˈu na te mau tavana o te tuhaa fenua o tera ˈtu pae o te Anavai,*+ ia vaiiho ratou ia ˈu ia haere na to ratou fenua a tae atu ai au i Iuda, 8 oia atoa te hoê rata na Asapha te tiai i te uru raau a te arii, ia horoa mai oia i te raau ei pou no te mau uputa o te Pare+ o te fare* e no te aua o te oire+ e no te fare i reira vau e haere ai.” Horoa maira ïa te arii i te reira ia ˈu,+ tei ia ˈu ra hoi to ˈu Atua hamani maitai.+

9 Tae atura vau i te mau tavana o te tuhaa fenua o tera ˈtu pae o te Anavai e horoa ˈtura ia ratou i te mau rata a te arii. Ua tono atoa mai te arii na muri ia ˈu i te tahi mau raatira nuu e taata faahoro puaahorofenua. 10 I to Sanabalata+ no Bete-horona raua Tobia+ te tia* ati Amona+ faarooraa i te reira, aita roa ˈtu raua i au i te haereraa mai te tahi taata no te rave i te tahi ohipa maitai no te nunaa o Iseraela.

11 Tae atura vau i Ierusalema, e faaea ihora vau i reira e toru mahana. 12 Tia aˈera vau i nia i te po, o vau e te tahi mau tane na muri ia ˈu, e aita vau i faaite aˈe eaha ta to ˈu Atua i tuu i roto i to ˈu aau e rave no Ierusalema, e aita ˈtu e animara ia ˈu ra maori râ tei parahihia ra e au. 13 E haere ihora vau i rapae i te po na roto i te Uputa o te peho,+ a na mua ˈtu ai i te Pape pihaa o te ophi rahi tae roa i te Uputa o te haapueraa rehu,+ e hiˈopoa ihora vau i te aua o Ierusalema tei vavahihia e to ˈna mau uputa tei paapaa.+ 14 Haere noa ˈtura vau tae roa i te Uputa o te pape pihaa+ e te Pape hopu a te arii. Aita râ i tia i te animara e parahihia ra e au ia na roto atu i te haere. 15 Tamau noa ˈtura ïa vau i te pauma i te peho+ i taua po ra, e hiˈopoa noa ˈtura vau i te aua. I muri iho, fariu maira vau, tomo ihora na roto i te Uputa o te peho, e hoˈi ihora i te fare.

16 Aita te huitoofa+ i ite ihea vau i te haereraa e eaha ta ˈu i rave, aita â hoi au i faaite atura i te ati Iuda, te mau tahuˈa, te huimana, te huitoofa e te toea o te mau rave ohipa. 17 Na ô atura vau ia ratou: “E nehenehe outou e ite to roto tatou i te hoê tupuraa fifi mau, te vai ano ra Ierusalema e ua taninahia to ˈna mau uputa. Mai, haere anaˈe e patu faahou i te aua o Ierusalema, eiaha teie haama ia tamau noa.” 18 Parau atura vau ia ratou e tei ia ˈu ra to ˈu Atua hamani maitai+ e oia atoa te mau parau ta te arii i faahiti mai ia ˈu.+ Na ô maira ratou: “E tia anaˈe i nia e e patu anaˈe.” Faaitoito aˈera ïa ratou te tahi i te tahi* no taua ohipa maitai ra.+

19 I te faarooraa Sanabalata no Bete-horona, Tobia+ te tia* ati Amona+ e Gesema no Arabia+ i te reira, faaooo maira ratou ia matou,+ vahavaha maira e na ô maira: “Te aha ra outou? Te orure hau ra outou i te arii?”+ 20 Pahono atura râ vau: “Na te Atua o te raˈi e haamanuïa ia matou,+ e e tia matou ta ˈna mau tavini i nia e e patu matou. Tera râ, aita hoê aˈe ta outou i Ierusalema, aita e tiaraa e aita atoa e tuhaa i roto i to ˈna aamu.”+

3 Haamata aˈera Eliasiba+ te tahuˈa rahi e to ˈna mau taeae te mau tahuˈa i te patu i te Uputa o te mamoe.+ Haamoˈa aˈera ratou i te reira*+ e tamau aˈera i to ˈna mau uputa. Haamoˈa aˈera ratou i tera tuhaa mai te Uputa o te mamoe tae roa i te Pare o Mea,+ e tae roa i te Pare o Hananela.+ 2 E i pihai iho ia ratou, te patu ra te mau tane no Ieriko,+ e i pihai iho ia ratou te patu ra Zakura te tamaiti a Imiri.

3 Patu aˈera te mau tamaiti a Hasena i te Uputa o te iˈa.+ Tuu aˈera ratou i te tafare raau na nia iho+ e tamau aˈera i to ˈna mau uputa, to ˈna mau rota e to ˈna mau raau tarava. 4 E i pihai iho ia ratou, te rave ra Meremota+ te tamaiti a Urîa te tamaiti a Hakoza i te ohipa tataîraa, e i pihai iho ia ˈna, te rave ra Mesulama+ te tamaiti a Berekia te tamaiti a Mesezabela i te ohipa tataîraa, e i pihai iho ia ˈna te rave ra Zadoka te tamaiti a Baana i te ohipa tataîraa. 5 E i pihai iho ia ˈna, te rave ra te ati Tekoa+ i te ohipa tataîraa, aita râ to ratou mau taata mana i faahaehaa ia ratou no te apiti* i te ohipa i raro aˈe i te aratairaa a to ratou mau tiaau.

6 Tataî ihora Ioiada te tamaiti a Pasea raua Mesulama te tamaiti a Besodeia i te Uputa o te oire tahito.+ Tuu aˈera raua i te tafare raau na nia iho e tamau aˈera i to ˈna mau uputa, to ˈna mau rota e to ˈna mau raau tarava. 7 I pihai iho ia raua te rave ra Melatia te ati Gibeona+ raua Iadona te ati Meronoti i te ohipa tataîraa, e taata no Gibeona e no Mizepa+ raua i raro aˈe i te mana faatere* o te tavana o te tuhaa fenua o tera ˈtu pae o te Anavai.*+ 8 I pihai iho ia raua, te rave ra Uziela te tamaiti a Harahaia, hoê o te feia tupai auro, i te ohipa tataîraa, e i pihai iho ia ˈna, te rave ra Hanania, hoê o te feia anoi monoˈi,* i te ohipa tataîraa, e ua apǎpǎ ratou i te ofai na raro i Ierusalema tae roa i te Patu aano.+ 9 E i pihai iho ia ratou, te rave ra Rephaia te tamaiti a Hura, e faatere o te afaraa o te tuhaa fenua o Ierusalema, i te ohipa tataîraa. 10 E i pihai iho ia ˈna, te rave ra Iedaia te tamaiti a Harumapha i te ohipa tataîraa i mua i to ˈna iho fare, e i pihai iho ia ˈna, te rave ra Hatusa te tamaiti a Hasabenia i te ohipa tataîraa.

11 Tataî aˈera Malakia te tamaiti a Harima+ raua Hatuba te tamaiti a Pahata-moabi+ i te tahi atu tuhaa,* oia atoa te Pare o te mau umu.+ 12 E i pihai iho ia raua, te rave ra Saluma te tamaiti a Halohesa, e faatere o te afaraa o te tuhaa fenua o Ierusalema, i te ohipa tataîraa e ta ˈna mau tamahine.

13 Tataî aˈera Hanuna e to Zanoa+ i te Uputa o te peho.+ Patu faahou aˈera ratou i te reira e tamau aˈera i to ˈna mau uputa, to ˈna mau rota e to ˈna mau raau tarava, e tataî aˈera ratou 1 000 kubiti* o te patu tae roa i te Uputa o te haapueraa rehu.+ 14 Tataî ihora Malakia te tamaiti a Rekaba, e faatere o te tuhaa fenua o Bete-hakerema,+ i te Uputa o te haapueraa rehu. Patu faahou ihora oia i te reira e tamau ihora i to ˈna mau uputa, to ˈna mau rota e to ˈna mau raau tarava.

15 Tataî ihora Saluna te tamaiti a Kolahoze, e faatere o te tuhaa fenua o Mizepa,+ i te Uputa o te pape pihaa.+ Patu faahou ihora oia i te reira e to ˈna tafare, tamau ihora i to ˈna mau uputa, to ˈna mau rota e to ˈna mau raau tarava, e tataî atoa ihora i te patu o te Pape hopu+ o te taheraa pape tae roa i te Ô o te arii+ e tae roa i te Eˈa paumaraa+ o te haapou atu mai te Oire mai o Davida.+

16 I pihai iho ia ˈna, te rave ra Nehemia te tamaiti a Azabuka, e faatere o te afaraa o te tuhaa fenua o Bete-zura,+ i te ohipa tataîraa mai mua i te mau Vahi hunaraa a Davida+ tae roa i te pape hopu+ tei hamanihia e tae roa i te Fare o te aito.

17 I pihai iho ia ˈna, te rave ra te ati Levi i te ohipa tataîraa: Rehuma te tamaiti a Bani, e i pihai iho ia ˈna, te rave ra Hasabia, e faatere o te afaraa o te tuhaa fenua o Keila,+ i te ohipa tataîraa no to ˈna tuhaa fenua. 18 I pihai iho ia ˈna, te rave ra to ˈna mau taeae i te ohipa tataîraa: Bavai te tamaiti a Henadada, e faatere o te afaraa o te tuhaa fenua o Keila.

19 E i pihai iho ia ˈna, te tataî ra Etera te tamaiti a Iesua,+ e faatere no Mizepa, i te tahi atu tuhaa i mua i te paumaraa e tae atu i te Vairaa mauhaa tamaˈi i te Pou turu.+

20 I pihai iho ia ˈna, te rohi ra Baruka te tamaiti a Zabai+ e te tataî ra i te tahi atu tuhaa, mai te Pou turu tae roa i te tomoraa o te fare o Eliasiba+ te tahuˈa rahi.

21 I pihai iho ia ˈna, te tataî ra Meremota+ te tamaiti a Urîa te tamaiti a Hakoza i te tahi atu tuhaa, mai te tomoraa o te fare o Eliasiba tae roa i te hopearaa o to Eliasiba fare.

22 E i pihai iho ia ˈna, te rave ra te mau tahuˈa, to te tuhaa fenua o Ioridana,*+ i te ohipa tataîraa. 23 I pihai iho ia ratou, te rave ra Beniamina raua Hatuba i te ohipa tataîraa i mua i to raua iho fare. I pihai iho ia raua, te rave ra Azaria te tamaiti a Maaseia te tamaiti a Ananîa i te ohipa tataîraa i pihai iho i to ˈna iho fare. 24 I pihai iho ia ˈna, te tataî ra Binui te tamaiti a Henadada i te tahi atu tuhaa, mai te fare o Azaria tae roa i te Pou turu+ e tae roa i te poro.

25 I pihai iho ia ˈna, te rave ra Palala te tamaiti a Uzai i te ohipa tataîraa i mua i te Pou turu e te pare o te pipiha ˈtu mai te Fare* mai o te arii,+ te pare i nia o te Aua o te tiai.+ I pihai iho ia ˈna, o Pedaia ïa te tamaiti a Parosa.+

26 E rave aˈera te mau tavini o te hiero,*+ e ora ra i Ophela,+ i te ohipa tataîraa tae roa i mua i te Uputa o te pape+ i hitia o te râ e te pare o te pipiha ˈtu i rapae.

27 I pihai iho ia ratou, te tataî ra te ati Tekoa+ i te tahi atu tuhaa, mai mua i te pare rahi o te pipiha ˈtu i rapae tae roa i te patu o Ophela.

28 Rave aˈera te mau tahuˈa i te ohipa tataîraa i nia ˈtu i te Uputa o te puaahorofenua,+ te tahuˈa tataitahi i mua i to ˈna iho fare.

29 I pihai iho ia ratou, te rave ra Zadoka+ te tamaiti a Imera i te ohipa tataîraa i mua i to ˈna iho fare.

E i pihai iho ia ˈna, te rave ra Semaia te tamaiti a Sekania, te tiai o te Uputa i hitia o te râ,+ i te ohipa tataîraa.

30 I pihai iho ia ˈna, te tataî ra Hanania te tamaiti a Selemia raua Hanuna te ono o te tamaiti a Zalapha i te tahi atu tuhaa.

I pihai iho ia raua, te rave ra Mesulama+ te tamaiti a Berekia i te ohipa tataîraa i mua i to ˈna iho piha.

31 I pihai iho ia ˈna, te rave ra Malakia, e mero o te pǔpǔ feia tupai auro, i te ohipa tataîraa tae roa i te fare o te mau tavini o te hiero*+ e te feia hoo taoˈa, i mua i te Uputa hiˈopoaraa tae roa i te piha i nia o te poro.

32 E i ropu i te piha i nia o te poro e te Uputa o te mamoe,+ te rave ra te feia tupai auro e te feia hoo taoˈa i te ohipa tataîraa.

4 I te faarooraa iho â Sanabalata+ e te patu faahou ra matou i te aua, au ore* ihora oia e riri ihora, e faaooo noa maira oia i te ati Iuda. 2 E i mua i te aro o to ˈna mau hoa e te nuu no Samaria, parau maira oia: “Te aha ra te ati Iuda paruparu? E rave anei ratou i te reira na nia i to ratou puai? E pûpû anei ratou i te tusia? E oti anei ia ratou tera ohipa hoê noa mahana? E haere anei ia ratou ia faaohipa i te mau ofai tei paapaa i rotopu i te mau haapueraa huˈahuˈa patu tei poˈi i te repo puehu?”+

3 Parau maira Tobia+ ati Amona+ e tia ra i pihai iho ia ˈna: “Ua ouˈa anaˈe te tahi alope i nia iho i ta ratou e patu ra, e marua ta ratou aua ofai i raro.”

4 A faaroo mai, e to matou Atua, te vahavahahia ra hoi matou,+ e a faahoˈi i ta ratou faainoraa i nia i to ratou iho upoo.+ A vaiiho ia hopoi-tîtî-hia ratou mai te taoˈa ia haruhia a hopoihia ˈtu ai i te fenua ê. 5 Eiaha e tapoˈi i ta ratou hapa, eiaha atoa ta ratou hara ia tumâhia mai mua ia oe,+ ua tuhi hoi ratou i te feia patu.

6 Tamau noa ˈtura ïa matou i te patu i te aua, e puoi roa ˈtura te aua taatoa tei patu-faahou-hia tae roa i te afaraa o to ˈna teitei, e rave noa ˈtura te nunaa i taua ohipa ra ma te aau tae.

7 I te faarooraa iho â Sanabalata, Tobia,+ to Arabia,+ te ati Amona e to Asadoda+ e te nuu ra te tataîraa o te aua o Ierusalema e te faaîhia ra te mau apoopoo, riri roa ihora ratou. 8 Opua aˈera ratou pauroa e haere mai e aro ia Ierusalema e e faahuehue i reira. 9 Pure aˈera râ matou i to matou Atua e tuu aˈera i te tahi pǔpǔ tiai i te po e te ao no te paruru ia matou.

10 Te na ô noa ra râ to Iuda: “Ua paruparu te mau rave ohipa,* e mea rahi roa hoi te huˈahuˈa patu. Eita roa ˈtu e haere ia matou ia patu faahou i te aua.”

11 E te parau noa ra to matou mau enemi: “Hou ratou a ite ai i te reira aore ra a ite mai ai ia tatou, e tae roa tatou i rotopu ia ratou, a haapohe atu ai ia ratou e a mau atu ai te ohipa.”

12 I te mau taime atoa e tomo mai ai te ati Iuda o te parahi ra i pihai iho ia ratou, e parau noa mai ratou* ia matou: “E haere mai ratou e aro ia tatou na te mau vahi atoa mai.”

13 Tuu ihora ïa vau i te tahi mau tane na te mau vahi raro roa ˈˈe o te area i muri mai i te aua i te mau vahi mea ohie ia tomo mai, e tuu ihora vau ia ratou ia au i to ratou mau fetii e ta ratou mau ˈoˈe, ta ratou mau omore e ta ratou mau fana. 14 I to ˈu iteraa i to ratou mǎtaˈu, tia oioi aˈera vau i nia e na ô atura i te huimana,+ te huitoofa e te toea o te nunaa: “Eiaha e mǎtaˈu ia ratou.+ A haamanaˈo ia Iehova, e Atua rahi ia mǎtaˈuhia,+ e a aro no to outou mau taeae, ta outou mau tamaiti e tamahine, ta outou mau vahine faaipoipo e to outou mau fare.”

15 I muri iho i te faarooraa to matou mau enemi e ua itehia e matou ta ratou e hinaaro ra e rave e ua haafifi te Atua mau i ta ratou opuaraa, hoˈi aˈera matou pauroa i te ohipa paturaa i te aua. 16 Mai taua mahana mai ra, na te afaraa o to ˈu mau taata i rave i te ohipa+ e na te afaraa o ratou i tapea i te omore, te paruru, te fana e i oomo i te ahu tamaˈi. E na te mau faatere+ i tia i muri mai i to Iuda taatoa 17 o te patu ra i te aua. Te feia e amo ra i te mau mea teiaha, ua rave ïa i te ohipa i te hoê noa rima, a tapea ˈi te tahi atu rima i te tahi mauhaa tamaˈi.* 18 E ˈoˈe ta te taata patu tataitahi tei taamuhia i nia iho i to ˈna tauupu a patu noa ˈi, e tei pihai iho ia ˈu te taata faaoto pu tara+ i te tiaraa.

19 Na ô atura ïa vau i te huimana, te huitoofa e te toea o te nunaa: “Mea rahi roa te ohipa, mea roa roa te aua, e mea atea tatou te tahi i te tahi i nia i te patu. 20 Ia faaroo outou i te pu, a haaputuputu mai i te vahi to reira vau. Na to tatou Atua e aro no tatou.”+

21 Tamau noa ˈtura ïa matou i te rave i te ohipa, a tapea noa ˈi te tahi atu afaraa i te omore, mai te haamataraa i te marama e ia ite-noa–hia ˈtu te mau fetia. 22 I taua mau mahana ra, na ô atura vau i te nunaa: “E taoto te mau tane, te tane tataitahi e ta ˈna tavini, i te po i roto ia Ierusalema. E tiai ratou i te po e e rave ratou i te ohipa i te ao.” 23 Aita ˈtura ïa vau, to ˈu mau taeae, ta ˈu mau tavini+ e te mau tiai tei pee mai ia ˈu, i tatara noa ˈˈe i to matou ahu. Tapea noa ihora matou tataitahi i ta matou mauhaa tamaˈi i roto i to matou rima atau.

5 Tera râ, faahapa aˈera te mau tane e ta ratou vahine faaipoipo ma te reo puai i to ratou mau taeae ati Iuda.+ 2 Te parau ra vetahi: “Mea rahi matou e ta matou mau tamaiti e ta matou mau tamahine. Ia noaa mai ta matou huero maa e tia ˈi no te tamaa e no te ora.” 3 Te na ô ra te tahi atu: “Te horoa nei matou i ta matou mau faaapu maa, ta matou mau faaapu vine e to matou mau fare ei piri taoˈa ia noaa mai ta matou huero maa no te tau oˈe.” 4 Te parau atoa ra te tahi atu: “Ua tarahu matou i te moni i nia i ta matou mau faaapu maa e ta matou mau faaapu vine no te ô titauhia a te arii.+ 5 Hoê â hoi fetii matou e to matou mau taeae, e mai ta ratou mau tamarii ta matou mau tamarii. Ua horoa râ matou i ta matou mau tamaiti e tamahine ei tavini, e e tavini ê na vetahi o ta matou mau tamahine.+ Aita râ to matou e mana no te tapea i te reira, no te mea na vetahi ê ta matou mau faaapu maa e ta matou mau faaapu vine.”

6 Riri roa ihora vau i to ˈu faarooraa i ta ratou faahaparaa e teie mau parau. 7 Feruri maite ihora vau i teie mau mea i roto i to ˈu aau, e faahapa ihora vau i te huimana e te huitoofa e na ô atura ia ratou: “Te titau nei outou tataitahi i te moni taime* i nia i to outou iho taeae.”+

Hau atu â, ua faanaho vau i te hoê tairururaa rahi no ratou aˈe. 8 E na ô atura vau ia ratou: “Ua tutava mau â tatou i te hoo faahou mai i to tatou iho mau taeae ati Iuda tei hoohia ˈtu i te mau nunaa. Teie râ, e hoo atu anei râ outou i to outou iho mau taeae,+ e ia hoo-faahou-hia mai ratou ia tatou nei?” Mamû noa aˈera ratou, e aita i itehia mai ia ratou eaha te parau. 9 Na ô atura vau: “E ere mea maitai ta outou e rave nei. Eiaha anei outou e haere ma te mǎtaˈu i to tatou Atua+ ia ore te mau nunaa, to tatou mau enemi, e faaino ia tatou? 10 Hau atu â, te horoa tarahu nei au, to ˈu mau taeae e ta ˈu mau tavini i te moni e te huero maa. E faaea anaˈe na i te horoa ma te titau i te moni taime.+ 11 A faahoˈi na ia ratou i teie iho â mahana i ta ratou mau faaapu,+ ta ratou mau faaapu vine, ta ratou mau faaapu olive, e to ratou mau fare, tae noa ˈtu hoê tuhaa i nia i te hanere* o te moni, te huero maa, te uaina apî e te hinu ta outou e titau nei ia ratou ei moni taime.”

12 Parau maira ratou: “E faahoˈi matou i tera mau mea ia ratou e eita matou e ani i te tahi faahoˈiraa. E na reira matou mai ta oe iho â e parau ra.” Titau atura ïa vau i te mau tahuˈa e faahoreo ihora i taua mau tane ra ia tapea ratou i teie parau fafau. 13 Ueue atoa ihora vau i te opiraa o to ˈu ahu* e na ô atura: “Mai teie te huru e ueue ai te Atua mau mai roto mai i to ˈna fare e mai roto mai i ta ˈna faufaa te tane atoa o te ore e haapao i teie parau fafau, e mai teie te huru e ueuehia ˈi ratou e e faaerehia ˈi.” Parau aˈera te amuiraa taatoa: “Amene!”* Arue aˈera ratou ia Iehova, e rave aˈera taua mau tane ra mai ta ratou iho â i fafau.

14 Hau atu â, mai te mahana mai â i faatoroa ˈi te arii Aretehasaseta+ ia ˈu ei tavana+ no ratou i te fenua o Iuda, mai te 20+ tae roa i te 32+ o te matahiti faatereraa oia, 12 matahiti, aita vau e aita atoa to ˈu mau taeae i amu i te maa faataahia no te tavana.+ 15 Area te mau tavana na mua ˈtu ia ˈu, ua faateimaha ïa i te nunaa e ua rave mai ia ratou e 40 sekela* ario no te faraoa e te uaina i te mau mahana atoa. Oia atoa, ua haavî ta ratou mau tavini i te nunaa. Aita râ vau i na reira+ no to ˈu mǎtaˈu i te Atua.+

16 Hau atu â, ua tauturu vau i te paturaa i tera aua, e aita e faaapu i noaa mai ia matou.+ Ua putuputu mai ta ˈu mau tavini atoa i reira no te ohipa. 17 Te vai ra 150 ati Iuda e huitoofa e tamaa ra i ta ˈu airaa maa, oia atoa te feia tei haere mai ia matou no te mau nunaa mai. 18 I te mau mahana atoa, hoê puaatoro oni, e ono mamoe maitai roa e te manu tei faaineinehia no ˈu,* e hoê taime pauroa te ahuru mahana e uaina ta matou ua rau te huru. Noa ˈtu râ pauroa teie mau mea, aita vau i titau i te maa faataahia no te tavana, no te mea te rave ê na ra taua mau taata ra i ta ratou taviniraa no te arii. 19 A haamanaˈo mai ia ˈu ma te farii maitai,* e to ˈu Atua, no te mau mea atoa ta ˈu i rave no teie mau taata.+

6 Tera râ, i te faaiteraahia iho â ia Sanabalata, Tobia,+ Gesema no Arabia,+ e te toea o to matou mau enemi e ua patu faahou vau i te aua+ e aita e apoopoo faahou (noa ˈtu aita â vau i tamau atura i te mau opani i te tomoraa o te oire),+ 2 faatae oioi maira Sanabalata raua Gesema i teie poroi ia ˈu: “A haere mai, e faataa anaˈe i te tahi taime e farerei ai tatou i te mau oire rii o te peho o Ôno.”+ Te opua ra râ ratou e rave ino ia ˈu. 3 Tono ihora ïa vau i te vea e parau ia raua: “E ohipa rahi ta ˈu e rave nei, e eita ta ˈu e nehenehe e pou atu. Eaha hoi te ohipa e faaea ˈi a vaiiho ai au i te reira no te haere atu ia orua ra?” 4 Faatae maira raua ia ˈu i taua noa poroi ra e maha taime, e hoê â pahonoraa ta ˈu i horoa ˈtu i taua maha taime ra.

5 Tono maira ïa Sanabalata i ta ˈna tavini ia ˈu e taua noa poroi ra i te pae o te taime, e te hoê rata tei tatarahia i roto i to ˈna rima. 6 Teie te parau i papaihia: “Te faaroohia ra i rotopu i te mau nunaa e o ta Gesema+ atoa e parau ra, te opua ra oe e te ati Iuda e orure hau.+ No reira oe e patu ai i te aua e ia au i taua mau parau ra e riro oe ei arii no ratou. 7 Oia atoa, ua faatoroa oe i te peropheta no te faaite no nia ia oe na Ierusalema: ‘Te vai ra te tahi arii i Iuda!’ I teie nei, e faaitehia taua mau mea ra i te arii. No reira, a haere mai e e tauaparau anaˈe no nia i te reira.”

8 Pahono atura râ vau ia ˈna: “Aita hoê aˈe o taua mau mea ra ta oe e parau ra i tupu, na to oe iho feruriraa* i hamani i te reira.” 9 Te tamata ra hoi ratou pauroa i te haamǎtaˈu ia matou, a na ô ai: “E toaruaru ratou,* e eita te ohipa e oti.”+ Teie nei, te pure nei au, a horoa mai i te itoito.*+

10 Haere atura ïa vau i te fare o Semaia te tamaiti a Delaia te tamaiti a Mehetabela i reira oia i te faaea-noa-raa. Na ô maira oia: “Faataa anaˈe i te tahi taime e farerei ai tâua i te fare o te Atua mau, i roto i te hiero. E tapiri anaˈe i te mau opani o te hiero, te haere mai ra hoi ratou e haapohe ia oe. E haere mai ratou e haapohe ia oe i te po.” 11 Na ô atura râ vau: “E horo ê anei te hoê taata mai ia ˈu? E nehenehe anei te hoê taata mai ia ˈu e tomo i roto i te hiero e e ora noa?+ E ore au e tomo atu!” 12 Taa ihora ïa ia ˈu e ere na te Atua i tono mai ia ˈna, ua tarahu râ Tobia raua Sanabalata+ ia ˈna no te haamauiui ia ˈu i teie mau parau. 13 Ua tarahuhia oia no te haamǎtaˈu ia ˈu e no te turai ia ˈu ia hara, ia noaa ta ratou pariraa ia ˈu a ino atu ai to ˈu roo no te faahaama ia ˈu.

14 A haamanaˈo, e to ˈu Atua, ia Tobia+ raua Sanabalata e ta raua mau ohipa, e oia atoa ia Noadia te peropheta vahine e te toea o te mau peropheta o te imi noa ra i te haamǎtaˈu ia ˈu.

15 Oti ihora ïa te aua i te 25 o te mahana o Elula,* e 52 ïa mahana.

16 I te faarooraa iho â pauroa to matou enemi i te reira e i te iteraa te taatoaraa o te mau nunaa ati aˈe i te reira, haama roa ihora ratou,*+ e taa ihora ia ratou e maoti te tauturu a to matou Atua i oti ai teie ohipa. 17 I taua mau mahana ra, te hapono ra te huimana+ no Iuda e rave rahi rata ia Tobia, e ua pahono Tobia ia ratou. 18 E rave rahi i Iuda tei horeo e turu ia ˈna, e hunoa hoi oia na Sekania te tamaiti a Araha,+ e o Iehohanana ta ˈna tamaiti tei faaipoipo i te tamahine a Mesulama+ te tamaiti a Berekia. 19 Ua tamau noa atoa ratou i te parau ia ˈu i te mau mea maitatai no nia ia ˈna e ua faaite ratou ia ˈna i ta ˈu i parau. Ua hapono noa mai ïa Tobia i te rata no te haamǎtaˈu ia ˈu.+

7 I te otiraa iho â te aua i te patu-faahou-hia,+ tamau ihora vau i te mau uputa+ e faatoroahia ˈtura te feia tiai uputa,+ te feia himene,+ e te ati Levi.+ 2 Faatoroa ˈtura vau i nia ia Ierusalema i to ˈu taeae o Hanani+ raua Hanania te raatira o te Pare,+ e tane hoi oia e nehenehe e tiaturihia e o te mǎtaˈu ra i te Atua mau+ hau aˈe i te rahiraa. 3 Parau atura ïa vau ia raua: “Eiaha te mau uputa no Ierusalema ia tatarahia hou te mahana a veavea ˈi, e a tia noa ˈi te feia tiai uputa no te tiai i reira, e tapiri ratou i te mau uputa e e ponao ratou i te reira i te raau tarava. A faataa i te feia no Ierusalema ei tiai, te taata tataitahi i to ˈna iho vahi tiairaa faataahia, e te taata tataitahi i mua i to ˈna iho fare.” 4 I teie nei, mea rahi te oire e te aano, e mea iti te taata i reira,+ e aita â te mau fare i patu-faahou-hia ˈtura.

5 Tuu ihora râ to ˈu Atua i roto i to ˈu aau i te manaˈo e haaputuputu i te huimana e te huitoofa e te nunaa atoa ia tapaohia ratou ia au i te pǎpǎraa tupuna.+ E itehia maira ia ˈu te buka o te tapaoraa ia au i te pǎpǎraa tupuna o te feia matamua tei pauma mai, e teie tei papaihia i roto:

6 E teie te feia tei hoˈi mai na te hopoi-ê-raa, ta te arii Nebukanesa+ no Babulonia i hopoi ê+ e tei hoˈi i muri aˈe i Ierusalema e i Iuda, te taata tataitahi i to ˈna iho oire,+ 7 te feia tei na muri mai ia Zerubabela,+ Iesua,+ Nehemia, Azaria, Raamia, Nahamani, Moredekai, Bilasana, Misipereta, Bigavai, Nehuma e Baanaha.

Teie te rahiraa tane ati Iseraela:+ 8 te mau tamaiti a Parosa, 2 172, 9 te mau tamaiti a Sephatia, 372, 10 te mau tamaiti a Araha,+ 652, 11 te mau tamaiti a Pahata-moabi,+ ta te mau tamaiti a Iesua e Ioaba,+ 2 818, 12 te mau tamaiti a Elama,+ 1 254, 13 te mau tamaiti a Zatu, 845, 14 te mau tamaiti a Zakai, 760, 15 te mau tamaiti a Binui, 648, 16 te mau tamaiti a Bebai, 628, 17 te mau tamaiti a Azagada, 2 322, 18 te mau tamaiti a Adonikama, 667, 19 te mau tamaiti a Bigavai, 2 067, 20 te mau tamaiti a Atina, 655, 21 te mau tamaiti a Atera, ta Hezekia, 98, 22 te mau tamaiti a Hasuma, 328, 23 te mau tamaiti a Bezai, 324, 24 te mau tamaiti a Haripha, 112, 25 te mau taata no Gibeona,+ 95, 26 te mau taata no Betelehema e Netopha, 188, 27 te mau taata no Anatota,+ 128, 28 te mau taata no Bete-azamaveta, 42, 29 te mau taata no Kiriata-iearima,+ Kephira e Beerota,+ 743, 30 te mau taata no Rama e Geba,+ 621, 31 te mau taata no Mikamasa,+ 122, 32 te mau taata no Betela+ e Ai,+ 123, 33 te mau taata no te tahi atu Nebo, 52, 34 te mau tamaiti a te tahi atu Elama, 1 254, 35 te mau tamaiti a Harima, 320, 36 te mau taata no Ieriko, 345, 37 te mau taata no Loda, Hadida e Ôno,+ 721, 38 te mau taata no Senaa, 3 930.

39 Te mau tahuˈa:+ te mau tamaiti a Iedaia no te utuafare o Iesua, 973, 40 te mau tamaiti a Imera, 1 052, 41 te mau tamaiti a Pasura,+ 1 247, 42 te mau tamaiti a Harima,+ 1 017.

43 Te ati Levi:+ te mau tamaiti a Iesua, a Kadamiela,+ ta te mau tamaiti a Hodeva, 74. 44 Te feia himene:+ te mau tamaiti a Asapha,+ 148. 45 Te feia tiai uputa:+ te mau tamaiti a Saluma, te mau tamaiti a Atera, te mau tamaiti a Talemona, te mau tamaiti a Akuba,+ te mau tamaiti a Hatita, te mau tamaiti a Sobai, 138.

46 Te mau tavini o te hiero:*+ te mau tamaiti a Ziha, te mau tamaiti a Hasupha, te mau tamaiti a Tabaota, 47 te mau tamaiti a Kerosa, te mau tamaiti a Sia, te mau tamaiti a Padona, 48 te mau tamaiti a Lebana, te mau tamaiti a Hagaba, te mau tamaiti a Salamai, 49 te mau tamaiti a Hanana, te mau tamaiti a Gidela, te mau tamaiti a Gahara, 50 te mau tamaiti a Reaia, te mau tamaiti a Rezina, te mau tamaiti a Nekoda, 51 te mau tamaiti a Gazama, te mau tamaiti a Uta, te mau tamaiti a Pasea, 52 te mau tamaiti a Besai, te mau tamaiti a Meunima, te mau tamaiti a Nephusesima, 53 te mau tamaiti a Bakabuka, te mau tamaiti a Hakupha, te mau tamaiti a Harahura, 54 te mau tamaiti a Bazelita, te mau tamaiti a Mehida, te mau tamaiti a Haresa, 55 te mau tamaiti a Barakosa, te mau tamaiti a Sisera, te mau tamaiti a Tema, 56 te mau tamaiti a Nezia, te mau tamaiti a Hatipha.

57 Te mau tamaiti a te mau tavini a Solomona:+ te mau tamaiti a Sotai, te mau tamaiti a Sophereta, te mau tamaiti a Perida, 58 te mau tamaiti a Iaala, te mau tamaiti a Darakona, te mau tamaiti a Gidela, 59 te mau tamaiti a Sephatia, te mau tamaiti a Hatila, te mau tamaiti a Pokereta-hazebaima, te mau tamaiti a Amôna. 60 Pauroa te tavini o te hiero*+ e te tamaiti a te mau tavini a Solomona, e 392 ïa.

61 E teie te feia tei pauma mai Teli-mela, Teli-haresa, Keruba, Adona e Imera mai, aita râ ta ratou i nehenehe e haapapu o vai to ratou opu fetii e no teihea utuafare ratou, e ati Iseraela anei ratou:+ 62 te mau tamaiti a Delaia, te mau tamaiti a Tobia, te mau tamaiti a Nekoda, 642. 63 E ta te mau tahuˈa: te mau tamaiti a Habaia, te mau tamaiti a Hakoza,+ te mau tamaiti a Barazilai, tei rave i te hoê vahine faaipoipo no rotopu i te mau tamahine a Barazilai+ ati Gileada e tei topahia i te iˈoa o to ˈna metua tane hoovai. 64 Imi aˈera ratou i ta ratou mau pueraa parau no te haapapu i to ratou pǎpǎraa tupuna, aita râ i itehia mai ia ratou. Tatarahia ˈtura ïa to ratou toroa tahuˈa.*+ 65 Parau atura te tavana*+ ia ratou eiaha e amu i te mau mea moˈa roa+ e ia ui roa te tahi tahuˈa i te Atua na roto i te Urima e te Tumima.+

66 Te rahiraa o te amuiraa taatoa ia amuihia, e 42 360,+ 67 taa ê atu i ta ratou mau tavini tane e tavini vahine,+ e 7 337, e 245 atoa taata himene ta ratou, te tane e te vahine.+ 68 E 736 puaahorofenua ta ratou, 245 niuru, 69 435 kamela e 6 720 asini.

70 Pûpû aˈera vetahi mau upoo o te mau utuafare i te ô no te ohipa.+ Horoa ˈtura te tavana* no te pueraa taoˈa 1 000 derama auro,* 50 auˈa e 530 ahu roa no te mau tahuˈa.+ 71 Pûpû ihora vetahi mau upoo o te mau utuafare no te pueraa taoˈa no taua opuaraa ra 20 000 derama auro e 2 200 mina ario.* 72 Horoa ihora te toea o te nunaa 20 000 derama auro, 2 000 mina ario e 67 ahu roa no te mau tahuˈa.

73 Parahi ihora te mau tahuˈa, te ati Levi, te feia tiai uputa, te feia himene,+ vetahi o te nunaa, te mau tavini o te hiero* e pauroa te toea o Iseraela* i to ratou mau oire.+ I te taeraa mai te hitu o te avaˈe,+ parahi ihora te ati Iseraela i to ratou mau oire.+

8 Amui aˈera pauroa te nunaa i te mahora o te oire i mua i te Uputa o te pape,+ e parau aˈera ratou ia Ezera+ te papai parau ia afai mai i te buka o te Ture a Mose,+ ta Iehova i faaue ia Iseraela ia haapao.+ 2 Afai maira ïa Ezera te tahuˈa i te Ture i mua i te amuiraa+ o te mau tane, vahine, e te feia atoa te nehenehe e faaroo e e taa i te auraa. Tei te mahana matamua o te hitu o te avaˈe taua taime ra.+ 3 Taio haapuai ihora oia i te reira+ i mua i te mahora o te oire i mua i te Uputa o te pape mai te aahiata tae roa i te avatea, i te mau tane, te mau vahine e te feia atoa e nehenehe e taa i te auraa, e faaroo maite aˈera te nunaa+ i te taioraa o te buka o te Ture. 4 Te tia noa ra Ezera te papai parau i nia i te hoê tahua raau hamanihia no taua taime ra, e i pihai iho mai ia ˈna i to ˈna pae atau te tia ra o Matitia, Sêma, Anaia, Uria, Hilikia e Maaseia. E i to ˈna pae aui o Pedaia, Misaela, Malakia,+ Hasuma, Hasebadana, Zekaria e Mesulama.

5 Tatara ihora Ezera i te buka, ua nehenehe te nunaa taatoa e ite ia ˈna, tei nia rii aˈe oia i te nunaa. E i to ˈna tatararaa i te buka, tia aˈera te nunaa taatoa. 6 Arue atura Ezera ia Iehova te Atua mau, te Atua rahi. Pahono maira te nunaa taatoa: “Amene!* Amene!”+ a amo ai i to ratou rima i nia. Tuturi ihora ratou e tipapa ihora i mua ia Iehova to ratou mata i raro. 7 E na Iesua, Bani, Serebia,+ Iamina, Akuba, Sabetai, Hodia, Maaseia, Kelita, Azaria, Iosabada,+ Hanana e Pelaia, e ati Levi, e faataa ra i te Ture i te nunaa,+ a tia noa ˈi te nunaa. 8 Taio haapuai noa aˈera ratou i te buka, i te Ture a te Atua mau, ma te faataa papu i te reira e ma te horoa i te auraa. Tauturu aˈera ïa ratou i te nunaa ia taa eaha te taiohia ra.*+

9 Parau atura Nehemia, te tavana* i taua mau mahana ra, Ezera+ te tahuˈa e te papai parau, e te ati Levi o te haapii ra i te nunaa, i te nunaa taatoa: “E mahana moˈa teie no Iehova to outou Atua.+ Eiaha e oto aore ra e taˈi.” Te taˈi ra hoi te nunaa taatoa a faaroo ai ratou i te mau parau o te Ture. 10 Parau atura oia ia ratou: “A haere, a amu i te mau mea maitai roa* e a inu i te mea monamona, e a afai i te tahi tuhaa maa+ na te feia aita ta ratou e maa, e mahana moˈa hoi teie no to tatou Fatu. Eiaha e oto, no te mea o te oaoa o Iehova to outou haapuraa.”* 11 E te tamǎrû ra te ati Levi i te nunaa taatoa, a na ô ai: “Eiaha na e taˈi! E mahana moˈa hoi teie, e eiaha e oto.” 12 Haere atura ïa te nunaa taatoa e tamaa, e inu e e afai i te tahi tuhaa maa na vetahi ê e rahi noa aˈera te oaoaraa,+ ua taa hoi ia ratou te mau parau o tei faaitehia ia ratou.+

13 E i te piti o te mahana, putuputu maira te mau upoo o te mau utuafare o te nunaa taatoa, te mau tahuˈa, e te ati Levi ati aˈe ia Ezera te papai parau, no te haroˈaroˈa ˈtu â i te mau parau o te Ture. 14 Itehia maira ia ratou tei papaihia i roto i te Ture, i faaue na Iehova na roto ia Mose ia faaea te ati Iseraela i raro aˈe i te mau tiahapa* i te roaraa o te oroa i te hitu o te avaˈe,+ 15 e ia faaite haere ratou i teie poroi+ e ia faaara na to ratou mau oire atoa e na Ierusalema: “A haere i te tuhaa fenua mouˈa e a faahoˈi mai i te mau amaa o te mau tumu olive, te mau tumu paina, te mau tumu hedesa e tamara, e te mau amaa o te tahi atu mau tumu raau no te hamani i te mau tiahapa, ia au i tei papaihia.”

16 Haere ihora ïa te nunaa e faahoˈi maira i te reira no te hamani i te mau tiahapa no ratou, te taata tataitahi i nia i to ˈna tafare, oia atoa i roto i to ratou mau aua, i roto i te mau aua o te fare o te Atua mau,+ i te mahora o te oire o te Uputa o te pape,+ e i te mahora o te oire o te Uputa o Epheraima.+ 17 Hamani aˈera ïa to te amuiraa taatoa tei hoˈi mai na te vahi i hopoihia ˈi ratou i te tiahapa, e parahi ihora i raro aˈe i te mau tiahapa, aita hoi te ati Iseraela i na reira mai te mau mahana mai â o Iosua+ te tamaiti a Nuna tae roa mai i teie mahana. No reira, e oaoaraa rahi roa te reira.+ 18 E i tera e tera mahana, e taiohia te buka o te Ture a te Atua mau,+ mai te mahana matamua tae roa i te mahana hopea. Ua faatupu ratou i te oroa e hitu mahana e i te vaˈu o te mahana e tairururaa taa ê ïa, mai tei titauhia.+

9 I te 24 o te mahana o taua avaˈe ra, putuputu aˈera te ati Iseraela. Te haapae ra ratou i te maa ma te ahu oto e te repo i nia iho ia ratou.+ 2 Faataa ê aˈera te huaai o te ati Iseraela ia ratou i te mau taata ěê atoa,+ e a tia noa ˈi ratou, faˈi aˈera ratou i ta ratou mau hara e te mau hape a to ratou mau metua.+ 3 Tia noa ihora ratou i to ratou vahi e taiohia aˈera te buka o te Ture+ a Iehova to ratou Atua e toru hora ma te reo puai, faˈi aˈera ratou i ta ratou mau hara e piˈo ihora i raro i mua ia Iehova to ratou Atua e toru â hora.

4 Tia aˈera Iesua, Bani, Kadamiela, Sebania, Buni, Serebia,+ Bani e Kenani i nia i te tahua hamanihia+ no te ati Levi, e tiaoro aˈera ia Iehova to ratou Atua ma te reo puai. 5 Parau aˈera na ati Levi Iesua, Kadamiela, Bani, Hasabenia, Serebia, Hodia, Sebania e Petahia: “A tia i nia e a arue ia Iehova to outou Atua e a muri noa ˈtu.+ E te Atua, ia arue ratou i to iˈoa hanahana tei faateiteihia i nia ˈˈe i te haamaitairaa e te arueraa taatoa.

6 “O oe anaˈe o Iehova,+ na oe i hamani i te raˈi, te raˈi o te mau raˈi e ta ratou nuu taatoa, te fenua e pauroa to nia iho, te mau moana e pauroa to roto. E na oe e faaherehere pauroa te reira ia ora noa, e te tipapa ra te nuu o te raˈi i mua ia oe. 7 O oe o Iehova te Atua mau, tei maiti ia Aberama+ e tei aratai ia ˈna mai Ura+ mai o te Kaladaio e tei topa ia ˈna i te iˈoa Aberahama.+ 8 Ua ite mai oe i to ˈna aau haapao maitai ia oe,+ faaau ihora ïa oe i te hoê faufaa ia ˈna e horoa no ˈna i te fenua o te ati Kanaana, te ati Heta, te ati Amori, te ati Perizi, te ati Iebusi e te ati Geregasi, no te horoa i te reira no to ˈna huaai.+ E ua tapea oe i ta oe mau parau fafau, mea parau-tia hoi oe.

9 “Ite ihora ïa oe i te ahoaho o to matou mau tupuna i Aiphiti,+ e faaroo ihora oe i ta ratou auê i te miti Uteute. 10 Faatupu ihora oe i te tapao e te semeio no te faautua ia Pharao, ta ˈna mau tavini atoa e te nunaa taatoa o to ˈna fenua,+ ua ite hoi oe e ua hamani ino+ ratou i to nunaa. Ua faaite oe i to iˈoa o tei matau-maitai-hia tae roa mai i teie mahana.+ 11 Vahi ihora oe i te miti i mua ia ratou. Na roto atura ïa ratou i te miti na nia iho i te repo mǎrô,+ e huri ihora oe i tei aˈuaˈu ia ratou i roto i te hohonuraa mai te hoê ofai taorahia i roto i te pape arepurepu.+ 12 Aratai ihora oe ia ratou i te hoê pou ata ia ao, e i te hoê pou auahi ia po, no te turama i te eˈa ia na reira ratou i te haere.+ 13 Pou maira oe i nia iho i te mouˈa Sinai,+ paraparau ihora oe ia ratou mai te raˈi mai+ e horoa maira i te mau haavaraa afaro, te mau ture o te parau mau,* e te mau ture e te mau faaueraa maitai.+ 14 Faaite ihora oe ia ratou i ta oe Sabati moˈa,+ e horoa maira oe ia ratou i te mau faaueraa, faatureraa e te hoê ture na roto i to tavini o Mose. 15 Horoa maira oe i te maa na ratou mai te raˈi mai i to ratou poiaraa,+ e pihaa maira ia oe te pape no roto i te mato i to ratou poihâraa.+ E parau ihora oe ia ratou ia tomo e ia fatu i te fenua ta oe i horeo* e horoa no ratou.

16 “Faateoteo aˈera râ ratou,+ to matou mau tupuna, e haapaari*+ aˈera, e aita ˈtura ratou i hinaaro e faaroo i ta oe mau faaueraa. 17 Aita ˈtura ratou i faaroo,+ e aita ˈtura i haamanaˈo i ta oe mau ohipa maere mau ta oe i faatupu i rotopu ia ratou. Ua haapaari* râ e ua faatoroa ratou i te tahi raatira no te hoˈi i to ratou faatîtîraa i Aiphiti.+ E Atua râ oe tei ineine i te faaore i te hara, e Atua aumihi e te aroha hamani maitai, o te ore e riri oioi e tei rahi i te here taiva ore,*+ e aita oe i faarue ia ratou.+ 18 I to ratou atoa hamaniraa i te tahi tii fanauˈa puaatoro faatôhia* no ratou a parau atu ai: ‘Teie to Atua tei aratai mai ia oe i rapae i Aiphiti,’+ e ua faatura ore mau â ratou ia oe. 19 I reira atoa, i roto i te rahi o to aroha hamani maitai, aita oe i faarue ia ratou i roto i te medebara.+ Aita te pou ata i faarue ia ratou i te ao no te aratai ia ratou na nia i te eˈa, aita atoa te pou auahi i faaea i te turama i to ratou eˈa i te po.+ 20 Horoa ihora oe i to varua maitai ia noaa ia ratou te haroˈaroˈa,+ e aita oe i tapea i ta oe mâna i to ratou vaha,+ e horoa ihora oe i te pape na ratou i to ratou poihâraa.+ 21 E 40 matahiti to oe horoaraa i te maa na ratou i roto i te medebara.+ Aita ratou i ere noa ˈˈe. Aita to ratou ahu i ino,+ e aita to ratou avae i oru.

22 “Horoa ihora oe i te mau faatereraa arii e te mau nunaa na ratou, ma te tufa i te reira na ratou,+ a fatu atu ai ratou i te fenua o Sihona,+ oia hoi te fenua o te arii no Hesebona,+ oia atoa te fenua o Oga+ te arii no Basana. 23 E faarahi ihora oe i ta ratou mau tamarii mai te mau fetia o te raˈi te rahi.+ Aratai maira oe ia ratou i te fenua ta oe i fafau i to ratou mau tupuna ia tomo e ia fatu ratou.+ 24 Tomo aˈera ïa ta ratou mau tamarii e fatu aˈera i taua fenua ra.+ Vî ihora ia oe i mua ia ratou te ati Kanaana,+ o te parahi ra i taua fenua ra, e tuu ihora oe ia ratou i to ratou rima, to ratou mau arii e te mau nunaa o taua fenua ra, a rave atu ai te ati Iseraela ia ratou mai ta ratou i hinaaro. 25 Haru aˈera ratou i te mau oire auahia i te patu+ e te hoê fenua repo maitai,+ e fatu aˈera ratou i te mau fare î i te mau mea maitai atoa ua rau te huru, te mau apoo pape tei ô-aˈena-hia, te mau faaapu vine, te mau faaapu olive+ e te tumu maa hotu e rave rahi. Tamaa aˈera ïa ratou e ia paia e ia îî, e oaoa roa ihora ratou i to maitai rahi.

26 “Tera râ, faaroo ore aˈera ratou, orure hau atura ia oe+ e huri maira i to ratou tua i ta oe Ture.* Haapohe aˈera ratou i ta oe mau peropheta o tei faaara ia ratou no te faahoˈi mai ia ratou ia oe ra, e faatura ore mau aˈera ratou ia oe.+ 27 No reira oe i tuu ai ia ratou i te rima o to ratou mau enemi,+ o tei haamauiui noa ia ratou.+ Ua tiaoro râ ratou ia oe a ahoaho ai ratou, e ua faaroo mai oe mai te raˈi mai. E no to aroha hamani maitai rahi, ua horoa mai oe i te tahi mau faaora ia ora mai ratou i te rima o to ratou mau enemi.+

28 “Tera râ, i te fanaˈoraa iho â ratou i te hau, ua rave faahou ratou i te mea ino i mua i to aro,+ e ua faarue oe ia ratou i te rima o to ratou mau enemi, o tei faatere* ia ratou.+ E ua hoˈi mai ratou e ua tiaoro ia oe no te ani i te tauturu,+ e ua faaroo oe mai te raˈi mai e ua faaora ia ratou e rave rahi taime no to aroha hamani maitai rahi.+ 29 Noa ˈtu ua faaara oe ia ratou no te faahoˈi mai ia ratou i ta oe Ture, ua faateoteo ratou e aita i faaroo i ta oe mau faaueraa,+ e ua hara ratou i te ofatiraa i ta oe mau ture, i te reira hoi e ora ˈi te hoê taata ia haapao oia.+ Ua fariu mai râ ratou i to ratou tua ma te haapaari e ua faaetaeta i to ratou aˈî, e aita i faaroo. 30 Ua faaoromai oe ia ratou+ e rave rahi matahiti e ua tamau noa i te faaara ia ratou ma to varua na roto i to mau peropheta, aita râ ratou i faaroo. I te pae hopea, ua tuu oe ia ratou i te rima o te mau nunaa o te mau fenua.+ 31 E i roto i to aroha hamani maitai rahi, aita oe i haamou ia ratou,+ aita atoa i faarue ia ratou, e Atua aumihi hoi oe e te aroha hamani maitai.+

32 “E i teie nei, e to matou Atua, te Atua rahi, te puai e te mǎtaˈuhia, o tei haapao i ta oe faufaa e tei faaite i te here taiva ore,+ eiaha e tâuˈa ore i te mau ati atoa i roohia ˈi matou, to matou mau arii, to matou huiarii,+ to matou mau tahuˈa,+ to matou mau peropheta,+ to matou mau tupuna, e pauroa to nunaa mai te mau mahana mai â o te mau arii no Asura+ tae roa mai i teie mahana. 33 Mea parau-tia oe i roto i te mau mea atoa i roohia ˈi matou, ua haa hoi oe ma te haapao maitai, o matou râ tei rave i te mea ino.+ 34 To matou mau arii, to matou huiarii, to matou mau tahuˈa e to matou mau tupuna, aita ratou i haapao i ta oe Ture, aita atoa i tâuˈa i ta oe mau faaueraa aore ra i ta oe mau haamanaˈoraa,* na roto hoi i te reira i faaara ˈi oe ia ratou. 35 A faatere atoa ˈi to ratou mau arii, a fanaˈo ai ratou i te maitai rahi ta oe i faaite ia ratou e a parahi ai i te fenua rahi e te repo maitai ta oe i horoa no ratou, aita ratou i tavini ia oe+ e aita i fariu ê mai i ta ratou mau peu ino. 36 Teie ïa matou i teie mahana, e tîtî,+ oia mau e tîtî i te fenua ta oe i horoa i to matou mau tupuna ia amu ratou i to ˈna mau maa hotu e ia fanaˈo i te mau mea maitai i reira. 37 Te maa rahi o teie fenua, no te mau arii ïa ta oe i tuu i nia iho ia matou no ta matou mau hara.+ Te faatere nei ratou ia matou* e ta matou mau animara mai tei au ia ratou, e to roto matou i te ahoaho rahi.

38 “No reira, no teie mau mea atoa, te faaau nei matou i te tahi parau fafau papu+ ma te papai roa, e tei haamanahia e te titiro a to matou huiarii, to matou ati Levi, e to matou mau tahuˈa.”+

10 Teie te feia tei haamana i taua parau ra ma te tuu i ta ratou titiro i nia iho:+

9 Oia atoa te ati Levi: Iesua te tamaiti a Azania, Binui ta te mau tamaiti a Henadada, Kadamiela,+ 10 e to ratou mau taeae Sebania, Hodia, Kelita, Pelaia, Hanana, 11 Mita, Rehoba, Hasabia, 12 Zakura, Serebia,+ Sebania, 13 Hodia, Bani e Beninu.

14 Te mau aratai o te nunaa: Parosa, Pahata-moabi,+ Elama, Zatu, Bani, 15 Buni, Azagada, Bebai, 16 Adonia, Bigavai, Atina, 17 Atera, Hezekia, Azura, 18 Hodia, Hasuma, Bezai, 19 Haripha, Anatota, Nebai, 20 Magapiasa, Mesulama, Hezira, 21 Mesezabela, Zadoka, Iadua, 22 Pelatia, Hanana, Anaia, 23 Hotea, Hanania, Hatuba, 24 Halohesa, Pileha, Sobeka, 25 Rehuma, Hasabena, Maaseia, 26 Ahia, Hanana, Anana, 27 Maluka, Harima e Baanaha.

28 Te toea o te nunaa, oia hoi te mau tahuˈa, te ati Levi, te feia tiai uputa, te feia himene, te mau tavini o te hiero,* e pauroa tei faataa ê ia ratou i te mau nunaa o te mau fenua no te haapao i te Ture a te Atua mau,+ e ta ratou vahine faaipoipo, ta ratou mau tamaiti e ta ratou mau tamahine, e pauroa te taata ite e te maramarama,* 29 ua apiti ratou i to ratou mau taeae, to ratou feia mana, e ua horeo e haere ia au i te Ture a te Atua mau, tei horoahia na roto ia Mose te tavini a te Atua mau, e e haapao maite i te mau faaueraa atoa a Iehova to matou Fatu, ta ˈna mau haavaraa e ta ˈna mau ture, e aita anaˈe, ia roohia ïa ratou i te ati. 30 Ua horeo ratou: “Eita matou e horoa i ta matou mau tamahine na te mau nunaa o teie fenua, e eita matou e rave i ta ratou mau tamahine na ta matou mau tamaiti.+

31 “Ia hopoi noa mai te mau nunaa o teie fenua i ta ratou mau taoˈa e te mau huru huero maa atoa e hoo i te mahana Sabati, eita matou e hoo noa ˈˈe mai i te reira i te Sabati+ aore ra te tahi atu mahana moˈa.+ E haapae atoa matou i ta te fenua e horoa mai i te hitu o te matahiti+ e e faaore matou i te mau tarahu atoa.+

32 “Ua faaoti papu atoa matou tataitahi e horoa hoê tuhaa i nia e toru o te hoê sekela* i tera e tera matahiti no te taviniraa i te fare* o to tatou Atua,+ 33 no te mau pane apǎpǎhia,*+ te tusia huero maa tamau,+ te tusia taauahi tamau o te mau Sabati+ e avaˈe apî,+ e no te mau oroa faataahia,+ no te mau mea moˈa, no te mau tusia no te hara+ ia faaorehia te hara a* Iseraela, e no te mau ohipa atoa i te fare o to tatou Atua.

34 “Ua tuu kelero atoa matou i te hopoiraa i te vahie ta te mau tahuˈa, te ati Levi e te nunaa e hopoi i te fare o to tatou Atua na nia i to matou mau utuafare, i te mau taime faataahia, i tera e tera matahiti, no te tutui i nia iho i te fata a Iehova to tatou Atua, ia au i tei papaihia i roto i te Ture.+ 35 E hopoi atoa matou i te mau hotu paari matamua o to matou fenua e te mau hotu paari matamua o te tumu maa hotu huru rau atoa, i tera e tera matahiti, i te fare o Iehova,+ 36 oia atoa te matahiapo a ta matou mau tamaiti e te fanauˈa matamua a ta matou mau animara,+ ia au i tei papaihia i roto i te Ture, e te fanauˈa matamua a ta matou mau puaatoro e a ta matou mau mamoe e puaaniho. E hopoi matou i te reira i te fare o to tatou Atua, i te mau tahuˈa e tavini ra i te fare o to tatou Atua.+ 37 Oia atoa ta matou faraoa ota orarahi matamua,+ ta matou mau ô, te hotu o te mau tumu raau huru rau atoa,+ te uaina apî e te hinu,+ ia hopoi ïa matou i te mau tahuˈa i te mau piha vairaa maa* o te fare o to tatou Atua,+ e te tuhaa ahuru o te hotu o to matou fenua i te ati Levi,+ na te ati Levi hoi e haaputu i te mau tuhaa ahuru no roto pauroa to matou oire faaapu.

38 “E na muri te tahuˈa, te tamaiti a Aarona, i te ati Levi ia haaputu te ati Levi i te tuhaa ahuru. E e pûpû te ati Levi hoê tuhaa i nia ahuru o te tuhaa ahuru i te fare o to tatou Atua,+ i te mau piha* o te fare vairaa maa. 39 I te mau piha vairaa maa* hoi e hopoi ai te ati Iseraela e te ati Levi i te mau ô+ huero maa, te uaina apî e te hinu.+ I reira te mau taihaa o te nao* e vai ai, e i reira atoa te mau tahuˈa e tavini ra, te feia tiai uputa e te feia himene e haere mai ai. Eita matou e haapao ore i te fare o to tatou Atua.”+

11 Teie nei, te ora ra te huiarii o te nunaa i Ierusalema.+ Tuu atura te toea o te nunaa i te kelero+ no te haaparahi hoê utuafare i nia ahuru i Ierusalema, te oire moˈa. Area te tahi atu na iva ra, ua faaea ïa i te tahi atu mau oire. 2 Hau atu â, ua haamaitai te nunaa i te mau tane atoa tei hinaaro e ora i Ierusalema.

3 E teie te mau aratai tei ora i Ierusalema. (I ora na te toea o Iseraela, te mau tahuˈa, te ati Levi, te mau tavini o te hiero,*+ e te mau tamaiti a te mau tavini a Solomona+ i te tahi atu mau oire o Iuda, te taata tataitahi i to ˈna iho tuhaa fenua i to ˈna oire.+

4 I ora atoa na vetahi o te opu o Iuda e o Beniamina i Ierusalema.) To Iuda, o Atatia te tamaiti a Uzia te tamaiti a Zekaria te tamaiti a Amaria te tamaiti a Sephatia te tamaiti a Mahalalela ta te mau tamaiti a Pereza,+ 5 e Maaseia te tamaiti a Baruka te tamaiti a Kolahoze te tamaiti a Hazaia te tamaiti a Adaia te tamaiti a Ioiariba te tamaiti a Zekaria te tamaiti a te ati Sela. 6 Pauroa te tamaiti a Pereza e ora ra i Ierusalema, e 468 tane itoito.

7 E teie to Beniamina: Salu+ te tamaiti a Mesulama te tamaiti a Ioeda te tamaiti a Pedaia te tamaiti a Kolaia te tamaiti a Maaseia te tamaiti a Itiela te tamaiti a Iesaia, 8 e i muri mai ia ˈna o Gabai raua Salai, 928, 9 e o Ioela te tamaiti a Zikeri to ratou tiaau, e o Iuda te tamaiti a Hasenua te raatira piti o te oire.

10 To te mau tahuˈa: Iedaia te tamaiti a Ioiariba, Iakina,+ 11 Seraia te tamaiti a Hilikia te tamaiti a Mesulama te tamaiti a Zadoka te tamaiti a Meraiota te tamaiti a Ahituba,+ e aratai o te hiero* o te Atua mau, 12 e to ratou mau taeae tei rave i te ohipa i te hiero, 822, e Adaia te tamaiti a Ierohama te tamaiti a Pelalia te tamaiti a Amezi te tamaiti a Zekaria te tamaiti a Pasura+ te tamaiti a Malakia, 13 e to ˈna mau taeae, e upoo no te mau utuafare, 242, e Amasesai te tamaiti a Azarela te tamaiti a Ahasai te tamaiti a Mesilemota te tamaiti a Imera, 14 e to ratou mau taeae, e tane puai e te itoito, 128, e o Zabadiela to ratou tiaau, e mero no te tahi utuafare mana.

15 E to te ati Levi: Semaia+ te tamaiti a Hatuba te tamaiti a Azerikama te tamaiti a Hasabia te tamaiti a Buni, 16 e Sabetai+ raua Iosabada,+ to te mau raatira o te ati Levi, tei haapao i te mau ohipa i ravehia i rapaeau i te hiero o te Atua mau, 17 e Matania,+ te tamaiti a Mika te tamaiti a Zabadi te tamaiti a Asapha,+ te aratai o te himene, tei aratai i te mau arueraa i te taime pureraa,+ e Bakabukia, te tauturu o to ˈna mau taeae, e Abada te tamaiti a Samua te tamaiti a Galala te tamaiti a Iedutuna.+ 18 Pauroa te ati Levi i te oire moˈa, e 284.

19 E te feia tiai uputa, o Akuba, Talemona,+ e to raua mau taeae tei tiai i te mau uputa, 172.

20 Tei te tahi atu mau oire atoa o Iuda te toea o Iseraela, te mau tahuˈa e te ati Levi, te taata tataitahi i to ˈna iho fenua tutuuhia.* 21 Te ora ra te mau tavini o te hiero*+ i Ophela,+ e na Ziha raua Gisipa e haapao ra ia ratou.

22 Te tiaau o te ati Levi i Ierusalema, o Uzi te tamaiti a Bani te tamaiti a Hasabia te tamaiti a Matania+ te tamaiti a Mita, ta te mau tamaiti a Asapha, te feia himene. Na ˈna e haapao ra i te ohipa i te hiero o te Atua mau. 23 E faaueraa hoi ta te arii no ratou.+ E maa faataahia ta te feia himene ia au i tei hinaaro-mau-hia e ratou i tera e tera mahana. 24 E o Petahia te tamaiti a Mesezabela ta te mau tamaiti a Zera te tamaiti a Iuda te taata aˈo o te arii* no te mau ohipa atoa a te nunaa.

25 No nia i te mau oire rii e te mau fenua ati aˈe, i ora na vetahi o to Iuda i Kiriata-araba+ e to ˈna mau oire ati aˈe, i Dibona e to ˈna mau oire ati aˈe, i Iekabezeela+ e to ˈna mau oire rii tapiri, 26 i Iesua, i Molada,+ i Bete-paleta,+ 27 i Hazara-suala,+ i Beere-seba e to ˈna mau oire ati aˈe, 28 i Zikelaga,+ i Mekona e to ˈna mau oire ati aˈe, 29 i Ene-rimona,+ i Zora+ e i Iaremuta, 30 i Zanoa,+ i Adulama e to ratou mau oire rii tapiri, i Lakisa+ e to ˈna mau fenua ati aˈe e i Azeka+ e to ˈna mau oire ati aˈe. I noho* na ratou mai Beere-seba haere roa i te peho o Hinoma.+

31 Area to Beniamina, tei Geba ïa,+ Mîkamasa, Aia, Betela+ e to ˈna mau oire ati aˈe, 32 Anatota,+ Nôba,+ Ananîa, 33 Hazora, Rama,+ Gitaima, 34 Hadida, Zeboima, Nebalata, 35 Loda e Ôno,+ te peho o te feia rimaî. 36 E i haaparahihia na te tahi mau pǔpǔ o te ati Levi no Iuda mai i te tuhaa fenua o Beniamina.

12 Teie te mau tahuˈa e te ati Levi tei pauma na muri ia Zerubabela+ te tamaiti a Sealatiela,+ e Iesua:+ Seraia, Ieremia, Ezera, 2 Amaria, Maluka, Hatusa, 3 Sekania, Rehuma, Meremota, 4 Ido, Ginetoi, Abia, 5 Miamina, Maadia, Bilega, 6 Semaia, Ioiariba, Iedaia, 7 Salu, Amoka, Hilikia e Iedaia. Tera te mau raatira o te mau tahuˈa e to ratou mau taeae i te mau mahana o Iesua.

8 Te ati Levi, o Iesua ïa, Binui, Kadamiela,+ Serebia, Iuda, e Matania+ tei aratai i te mau himene haamauruururaa e to ˈna mau taeae. 9 E te tia ra Bakabukia e Uni to ratou mau taeae i mua noa ia ratou no ta raua ohipa tiairaa.* 10 Fanau maira ta Iesua o Ioiakima, e fanau maira ta Ioiakima o Eliasiba,+ e ta Eliasiba o Ioiada.+ 11 E fanau maira ta Ioiada o Ionatana, e fanau maira ta Ionatana o Iadua.

12 I te mau mahana o Ioiakima, teie te mau tahuˈa, te mau upoo o te mau utuafare: no Seraia+ o Meraia, no Ieremia o Hanania, 13 no Ezera+ o Mesulama, no Amaria o Iehohanana, 14 no Maluki o Ionatana, no Sebania o Iosepha, 15 no Harima,+ o Adana, no Meraiota o Helekai, 16 no Ido o Zekaria, no Ginetona o Mesulama, 17 no Abia+ o Zikeri, no Miniamina o . . . ,* no Moadia o Piletai, 18 no Bilega+ o Samua, no Semaia o Iehonatana, 19 no Ioiariba o Matenai, no Iedaia+ o Uzi, 20 no Salai o Kalai, no Amoka o Ebera, 21 no Hilikia o Hasabia, no Iedaia o Netanela.

22 Ua tapaohia te mau upoo o te mau utuafare o te ati Levi i te mau mahana o Eliasiba, Ioiada, Iohanana e Iadua,+ e te mau tahuˈa atoa, tae roa i te ariiraa Dariu no Peresia.

23 Ua tapaohia te ati Levi e upoo ratou no te mau utuafare i roto i te buka tuatapaparaa, tae roa i te mau mahana o Iohanana te tamaiti a Eliasiba. 24 Te mau raatira o te ati Levi, o Hasabia ïa, Serebia, e Iesua+ te tamaiti a Kadamiela,+ e i tia na to ratou mau taeae i mua ia ratou no te arue e no te haamauruuru i te Atua ia au i te mau faaueraa a Davida+ te taata o te Atua mau, ia au i tera e tera pǔpǔ tiai. 25 E tiai uputa Matania,+ Bakabukia, Obadia, Mesulama, Talemona e Akuba.+ I tiai na ratou+ i te mau piha vairaa maa na pihai iho i te mau uputa. 26 Ua tavini ratou i te mau mahana o Ioiakima te tamaiti a Iesua+ te tamaiti a Iozadaka e i te mau mahana o Nehemia te tavana e o Ezera+ te tahuˈa e papai parau.

27 I te avariraa o te aua o Ierusalema, imihia ˈtura te ati Levi e arataihia maira ratou i Ierusalema na te mau vahi atoa i ora ˈi ratou, no te faatupu i te avariraa ma te oaoa, ma te himene haamauruururaa,+ e ma te sumebalo, te nabala e te kinura. 28 Putuputu aˈera ïa te feia himene tei haapiihia* na te tuhaa fenua* mai, na te mau vahi atoa ati aˈe ia Ierusalema, na te mau oire rii mai o to Netopha,+ 29 na Bete-gilagala+ mai, e na te mau tuhaa fenua o Geba+ e Azamaveta.+ Ua hamani hoi te feia himene i te nohoraa no ratou iho ati aˈe ia Ierusalema. 30 E tamâ aˈera te mau tahuˈa e te ati Levi ia ratou, e tamâ aˈera ratou i te nunaa,+ te mau uputa+ e te aua.+

31 Aratai aˈera vau i te huiarii o Iuda i nia iho i te aua. Faatoroa atoa ihora vau e piti pǔpǔ rahi mau no te himene haamauruururaa e te poroteraa. Haere ihora hoê pǔpǔ i te pae atau na nia iho i te aua e tae atu ai i te Uputa o te haapueraa rehu.+ 32 Na muri maira Hosaia e te afaraa o te huiarii o Iuda ia ratou, 33 e o Azaria, Ezera, Mesulama, 34 Iuda, Beniamina, Semaia e Ieremia. 35 Vetahi o te mau tamaiti a te mau tahuˈa tei na muri ia ratou ma te pu:+ Zekaria te tamaiti a Ionatana te tamaiti a Semaia te tamaiti a Matania te tamaiti a Mikaia te tamaiti a Zakura te tamaiti a Asapha,+ 36 e to ˈna mau taeae Semaia, Azarela, Milalai, Gilalai, Maai, Netanela, Iuda e Hanani, e te mau mauhaa upaupa a Davida+ te taata o te Atua mau, e to mua Ezera+ te papai parau ia ratou i te haereraa. 37 I te Uputa o te pape pihaa,+ pauma afaro noa aˈera ratou i te Eˈa paumaraa+ o te Oire o Davida+ na te paumaraa o te aua i nia ˈtu i te Fare o Davida e tae roa i te Uputa o te pape+ i hitia o te râ.

38 Haere ihora te tahi atu pǔpǔ himene haamauruururaa na te tahi atu pae,* e pee ihora vau ia ratou e te toea o te pǔpǔ, na nia iho i te aua na nia ˈˈe i te Pare o te mau umu+ e tae roa i te Patu aano+ 39 e na nia ˈˈe i te Uputa o Epheraima,+ tae roa i te Uputa o te oire tahito,+ tae roa i te Uputa o te iˈa,+ te Pare o Hananela,+ te Pare o Mea, e tae roa i te Uputa o te mamoe,+ e faaea aˈera matou i te Uputa o te tiai.

40 Tia noa ihora na piti pǔpǔ himene haamauruururaa i mua i te hiero o te Atua mau. Na reira atoa ˈtura ïa vau e te afaraa o te huitoofa na muri ia ˈu, 41 e te mau tahuˈa Eliakima, Maaseia, Miniamina, Mikaia, Elioenai, Zekaria e Hanania, ma te pu, 42 e Maaseia, Semaia, Eleazara, Uzi, Iehohanana, Malakia, Elama e Etera. Himene aˈera te feia himene ma te reo puai i raro aˈe i te tiaauraa a Iezerahia.

43 I taua mahana ra, pûpû aˈera ratou e rave rahi tusia e oaoa ihora,+ ua faaoaoa rahi hoi te Atua mau ia ratou. Oaoa atoa ihora te mau vahine e te mau tamarii+ e faaroo-roa-hia ˈtura te oaoaraa o Ierusalema i te atea ê.+

44 I taua mahana ra i faatoroahia ˈi te tahi mau tane no te haapao i te mau fare vairaa maa+ no te mau ô,+ te mau hotu matamua+ e te mau tuhaa ahuru.+ I reira ratou i haaputu ai no ǒ mai i te mau fenua ati aˈe te mau oire i te mau tuhaa titauhia e te Ture+ na te mau tahuˈa e te ati Levi,+ e oaoaraa hoi tei Iuda no te mau tahuˈa e te ati Levi e rave ra i ta ratou taviniraa: 45 Ua haamata ratou i te haapao i te mau hopoia no ǒ mai i to ratou Atua e te titauraa o te tamâraa, mai ta te feia himene e te feia tiai uputa i rave, ia au i te mau faaueraa a Davida e ta ˈna tamaiti o Solomona. 46 Mea maoro aˈenei hoi, i te mau mahana o Davida e o Asapha, te vai ra te mau aratai no te feia himene e no te mau himene arueraa e haamauruururaa i te Atua.+ 47 E i te mau mahana o Zerubabela+ e i te mau mahana o Nehemia, ua horoa Iseraela taatoa i te tuhaa na te feia himene+ e te feia tiai uputa,+ ia au i tei hinaaro-mau-hia e ratou i te mahana hoê. Ua faataa atoa ratou i te tuhaa na te ati Levi,+ e ua faataa te ati Levi i te tuhaa na te huaai o Aarona.

13 I taua mahana ra, taiohia ˈtura te buka a Mose i mua i te nunaa,+ e itehia ihora e ua papaihia eiaha roa hoê ati Amona aore ra hoê ati Moabi+ ia fariihia i roto i te amuiraa a te Atua mau,+ 2 aita hoi ratou i horoa i te maa e te pape na te ati Iseraela, ua tarahu râ ratou ia Balaama no te faatae i te ino i nia ia ratou.+ Tera râ, ua taui to tatou Atua i te ino ei haamaitairaa.+ 3 I te faarooraa iho â ratou i te Ture, faataa ê aˈera ratou mai roto mai ia Iseraela pauroa te huaai o te taata ěê.+

4 Na mua ˈtu, na Eliasiba+ te tahuˈa i haapao i te mau piha vairaa maa* o te hiero* o to tatou Atua,+ e fetii no Tobia.+ 5 Ua horoa oia no ˈna hoê piha vairaa maa rahi, tei faaohipahia na no te tuu i te tusia huero maa, te tapau libano, te mau taihaa, te tuhaa ahuru o te huero maa, te uaina apî e te hinu,+ tei faauehia e horoa na te ati Levi,+ te feia himene e te feia tiai uputa, e te mau ô na te mau tahuˈa.+

6 E i taua roaraa ra, aita vau i Ierusalema, ua haere hoi au i te arii Aretehasaseta+ no Babulonia i te 32 o te matahiti o ta ˈna faatereraa.+ E tau mahana i muri iho, ani atura vau i te arii i te parau faatia no te haere. 7 Haere maira ïa vau i Ierusalema e ite ihora vau i te ohipa ino mau ta Eliasiba+ i rave no Tobia,+ i te horoaraa i te tahi piha vairaa maa no ˈna i roto i te aua o te hiero o te Atua mau. 8 Au ore roa ihora vau i te reira, taora ihora ïa vau i te mau taihaa atoa a Tobia i rapaeau i te piha vairaa maa. 9 I muri iho, faaue atura vau ia tamâhia te mau piha vairaa maa, e faahoˈi maira vau i te mau taihaa o te hiero o te Atua mau+ i reira, e te tusia huero maa e te tapau libano.+

10 Ite-atoa-hia maira ia ˈu e aita i horoahia i te ati Levi+ ta ratou mau tuhaa.+ Haere aˈera ïa te ati Levi e te feia himene tei rave i te taviniraa, te taata tataitahi i ta ˈna faaapu.+ 11 Tamaˈi atura ïa vau i te huitoofa+ e na ô atura: “Eaha te fare o te Atua mau i haapao-ore-hia ˈi?”+ Haaputuputu ihora ïa vau te ati Levi e te feia himene e faahoˈi aˈera ia ratou i to ratou mau toroa. 12 Hopoi maira pauroa to Iuda i te tuhaa ahuru+ o te huero maa, te uaina apî e te hinu i te mau piha vairaa maa.+ 13 Faatoroa ihora vau ia Selemia te tahuˈa, Zadoka te papai parau e Pedaia te ati Levi no te haapao i te mau piha vairaa maa, e o Hanana te tamaiti a Zakura te tamaiti a Matania to ratou tauturu, i parauhia na hoi e tane ratou o te nehenehe e tiaturihia. Na ratou te hopoia e opere na to ratou mau taeae.

14 A haamanaˈo mai ia ˈu,+ e to ˈu Atua, no te reira, e eiaha e tumâ i te here taiva ore ta ˈu i faaite no to oe fare e te mau taviniraa i reira.*+

15 I taua mau mahana ra, ite ihora vau i to Iuda i te taataahiraa i te vine i te Sabati,+ i te hopoiraa mai i te huero maa na nia i te mau asini, e i te hopoiraa mai i te uaina, te vine, te suke e te faufaa ua rau te huru i Ierusalema i te mahana Sabati.+ Faaara ihora ïa vau ia ratou eiaha e hoo atu i te maa i tera mahana.* 16 E te hopoi mai ra to Turia tei ora na i roto i te oire i te iˈa e te faufaa ua rau te huru, a hoo atu ai i to Iuda e i Ierusalema i te Sabati.+ 17 Tamaˈi atura ïa vau i te huimana o Iuda a na ô ai: “Eaha teie ohipa ino ta outou e rave ra, a haafaufaa ore atoa ˈi i te mahana Sabati? 18 E ere anei tera ta to outou mau tupuna i rave, i faatae mai ai to tatou Atua pauroa teie ati i nia ia tatou e teie oire atoa? Te faauˈana nei outou i to ˈna riri rahi ia Iseraela a haafaufaa ore ai i te Sabati.”+

19 Faaue atura vau ia tapirihia te mau uputa o Ierusalema hou a ahiahi ai, na mua ˈˈe te Sabati a haamata ˈi. Parau atoa ˈtura vau eiaha e tatara i te reira e ia hope roa te Sabati, e tuu ihora vau vetahi o ta ˈu mau tavini i te mau uputa ia ore hoê aˈe faufaa ia hopoihia mai i roto i te mahana Sabati. 20 Taoto ihora ïa te feia tapihoo e te feia hoo i te faufaa ua rau te huru i rapae ia Ierusalema hoê taime aore ra e piti. 21 Faaara ˈtura ïa vau ia ratou a na ô ai: “Eaha outou e taoto ai i mua i te aua? Ia na reira faahou outou, e tiahi au ia outou ma te faaherehere ore.” Mai taua mahana ra, aita ratou i haere mai i te Sabati.

22 Parau atura vau i te ati Levi ia tamâ noa ratou ia ratou, e ia haere mai e tiai i te mau uputa ia moˈa noa te mahana Sabati.+ Teie atoa ta oe e haamanaˈo mai no nia ia ˈu, e to ˈu Atua, e e aroha mai ia ˈu ia au i te rahi o to here taiva ore.+

23 I taua mau mahana ra, ite atoa ˈtura vau i te ati Iuda tei faaipoipo* i te vahine+ Asadoda,+ ati Amona e ati Moabi.+ 24 Te paraparau ra te afaraa o ta ratou mau tamarii i te reo Asadoda e te tahi atu afaraa, i te reo o te tahi atu mau nunaa. Aita râ hoê i ite i te paraparau i te reo o te ati Iuda. 25 Tamaˈi atura ïa vau ia ratou e faaara ˈtura ia ratou no nia i te mau haavaraa a te Atua. Tairi atura vau vetahi o te mau tane,+ hutihuti aˈera i to ratou rouru e faahoreo atura ia ratou i te ora o te Atua: “Eiaha outou e horoa i ta outou mau tamahine na ta ratou mau tamaiti, e eiaha outou e farii hoê o ta ratou mau tamahine na ta outou mau tamaiti aore ra na outou.+ 26 E ere anei no te reira i hara ˈi te arii Solomona no Iseraela? I rotopu i te nunaa e rave rahi, aita e arii mai ia ˈna,+ e mea here na to ˈna Atua ia ˈna,+ i faaarii ai te Atua ia ˈna i nia ia Iseraela taatoa. O ˈna atoa râ tei hara no te mau vahine faaipoipo ěê.+ 27 E ere anei mea huru ê roa te raveraa outou i teie ino rahi a taiva ˈi i to tatou Atua ma te faaipoipo i te vahine ěê?”+

28 I riro na hoê o te mau tamaiti a Ioiada+ te tamaiti a Eliasiba+ te tahuˈa rahi ei hunoa na Sanabalata+ te ati Horona. Tiahi ihora ïa vau ia ˈna mai mua ia ˈu.

29 A haamanaˈo ia ratou, e to ˈu Atua, no te mea ua haaviivii ratou i te autahuˈaraa e te faufaa o te autahuˈaraa+ e te ati Levi.+

30 Tamâ ˈtura vau ia ratou i te mau viivii atoa no ǒ mai i te mau nunaa ěê, horoa ˈtura vau i te hopoia na te mau tahuˈa e te ati Levi, te taata tataitahi i ta ˈna taviniraa,+ 31 e faanaho ihora vau ia hopoihia mai te vahie+ i te mau taime faataahia e te mau hotu paari matamua.

A haamanaˈo mai ia ˈu ma te farii maitai,* e to ˈu Atua.+