PARALEIPOMENO* BUKA PITI
1 Ua rahi noa ˈtu te mana arii o Solomona te tamaiti a Davida. Tei pihai iho Iehova to ˈna Atua ia ˈna e ua faariro oia ia ˈna ei taata rahi roa.+
2 Titau atura Solomona i to Iseraela taatoa: te mau raatira tausani e raatira hanere, te mau haava e te mau raatira atoa o Iseraela, te mau upoo o te mau utuafare. 3 Haere atura Solomona e te amuiraa taatoa i te vahi teitei i Gibeona,+ tei reira hoi te tiahapa o te amuiraa o te Atua mau, te tiahapa ta Mose te tavini a Iehova i hamani i te medebara. 4 Tera râ, i hopoi na Davida i te Afata a te Atua mau mai Kiriata-iearima+ i te vahi ta ˈna i faaineine no te reira. Ua faatia oia i te hoê tiahapa no te reira i Ierusalema.+ 5 Area te fata veo+ ta Bezaleela+ te tamaiti a Uri te tamaiti a Hura i hamani, ua tuuhia ïa i mua i te sekene o Iehova. E pure Solomona e te amuiraa i mua i tera fata.* 6 Ua pûpû ïa Solomona i te tusia i reira i mua ia Iehova. Ua pûpû oia 1 000 tusia taauahi i nia i te fata veo+ o te tiahapa o te amuiraa.
7 I tera po, fa maira te Atua ia Solomona e parau maira ia ˈna: “A ani mai eaha ta oe e hinaaro ia horoa ˈtu vau na oe.”+ 8 Pahono atura ïa Solomona i te Atua: “Ua faaite oe i te here taiva ore rahi ia Davida to ˈu metua tane,+ e ua faaarii oe ia ˈu ei mono ia ˈna.+ 9 I teie nei, e te Atua e Iehova, ia tupu te parau ta oe i fafau ia Davida to ˈu metua tane,+ ua faaarii hoi oe ia ˈu i nia i te hoê nunaa e au i te huˈahuˈa repo i te rahi.+ 10 A ho mai na ïa i te paari e te ite+ ia ˈu no te aratai* i teie nunaa. O vai hoi te nehenehe e haava i to nunaa, teie nunaa iti rahi?”+
11 Parau maira ïa te Atua ia Solomona: “No te mea tera te hinaaro o to aau e aita oe i ani i te taoˈa, te faufaa rahi, e te hanahana aore ra ia pohe te feia e hae ra ia oe, e aita oe i ani ia ora maoro oe,* ua ani râ oe i te paari e te ite no te haava i to ˈu nunaa, i nia ia ratou vau i te faaariiraa ia oe,+ 12 e horoahia ˈtu ia oe te paari e te ite. E horoa atoa ˈtu râ vau i te taoˈa, te faufaa rahi e te hanahana aita i noaa aˈenei i te tahi arii na mua ˈtu ia oe e eita hoê i muri aˈe ia oe e fanaˈo.”+
13 Haere atura ïa Solomona mai te vahi teitei mai i Gibeona,+ to reira te tiahapa o te amuiraa, e hoˈi maira i Ierusalema. E faatere atura oia ia Iseraela. 14 Rahi noa ˈtura ta Solomona pereoo e puaahorofenua.* E 1 400 pereoo e 12 000 puaahorofenua*+ ta ˈna. E vaiiho oia i te reira i te mau oire o te mau pereoo+ i Ierusalema, i pihai iho i te vahi e ora ˈi oia.+ 15 Ua rahi roa hoi te ario e te auro i noaa mai i te arii i Ierusalema, pue noa ˈtura te reira mai te ofai,+ e te arezi, mai te mau tumu sukamino i te Sephela.+ 16 Ua faahaere mai Solomona i ta ˈna mau puaahorofenua mai Aiphiti mai.+ E hoo mai te feia hoo haere a te arii i te nǎnǎ puaahorofenua no te hoê tino moni taa maitai.+ 17 E 600 moni ario te tino moni o te hoê pereoo puaahorofenua no Aiphiti mai, e 150 te moni o te hoê puaahorofenua. I muri iho, e hoo atu te feia hoo haere a te arii i te reira i te mau arii atoa o te ati Heta e te mau arii o Suria.
2 Ua faaue Solomona ia patuhia te hoê hiero* no te iˈoa o Iehova+ e te hoê aorai.*+ 2 Ua maiti Solomona 70 000 feia ei rave ohipa,* 80 000 feia no te tarai i te ofai i nia i te mouˈa+ e 3 600 ei tiaau ia ratou.+ 3 Hau atu â, ua faatae Solomona i teie poroi ia Hirama+ te arii o Turia: “A rave no ˈu mai ta oe i rave no Davida to ˈu metua tane, i te tau a hopoi mai ai oe i te arezi ia patu oia i te hoê aorai* no te ora i roto.+ 4 Te patu ra hoi au i te hoê fare no te iˈoa o Iehova to ˈu Atua. E haamoˈahia te reira no ˈna. E tutuihia te mea noˈanoˈa+ i reira, i mua ia ˈna. Ei reira noa atoa te pane apǎpǎhia,*+ e i reira e pûpûhia ˈi te mau tusia taauahi, i te poipoi e te ahiahi,+ i te mau Sabati,+ i te mau avaˈe apî+ e i te mau mahana oroa+ a to matou Atua ra o Iehova. E faaueraa vai maoro teie no Iseraela. 5 E fare rahi ta ˈu e patu ra, mea rahi aˈe hoi to matou Atua i te mau atua atoa. 6 O vai râ te nehenehe e patu i te hoê fare no ˈna? E ere hoi te raˈi teitei i te mea aano maitai no te riro ei nohoraa no ˈna.+ O vai ïa vau no te patu i te hoê fare no ˈna? E vahi no te tutui i te tusia anaˈe ta ˈu e nehenehe e patu no ˈna. 7 I teie nei, a tono mai i te hoê taata rimaî mea ite i te ohipa i te auro, te ario, te veo,+ te auri, te huruhuru mamoe vareau, te taura uteute paˈo e te taura ninamu, e mea ite i te nanaˈo. E ohipa oia i Iuda e i Ierusalema e ta ˈu feia rimaî aravihi, o ta Davida to ˈu metua tane i maiti.+ 8 E a faatae mai i te raau arezi, te berusi+ e te alamuga+ no Lebanona mai, ua ite maitai hoi au e mea aravihi ta oe mau rave ohipa no te tâpû i te mau tumu raau no Lebanona.+ E ohipa ta ˈu mau tavini na muri i ta oe mau tavini.+ 9 E faaineine ratou e rave rahi tumu raau na ˈu, e tiapai hoi fare ta ˈu e patu. 10 Inaha, e horoa vau i te maa na ta oe mau rave ohipa,+ te feia tâpû raau o te tâpû i te mau tumu raau: 20 000 kora* sitona, 20 000 kora kerite, 20 000 bato* uaina, e 20 000 bato hinu.”
11 Faatae maira Hirama te arii o Turia i teie poroi papaihia ia Solomona: “No to Iehova here i to ˈna nunaa, ua faaarii oia ia oe i nia ia ratou.” 12 Na ô faahou maira Hirama: “Ia aruehia Iehova te Atua o Iseraela, o tei hamani i te raˈi e te fenua, ua horoa hoi oia na te arii Davida i te hoê tamaiti î i te paari,+ haapao maitai e te maramarama,+ o te patu i te hoê fare no Iehova e te hoê aorai.* 13 I teie nei, te tono atu nei au i te hoê taata rimaî aravihi e te maramarama, o Hirama-abi.+ 14 E tamaiti oia na te hoê vahine ati Dana, no Turia râ te metua tane. Mea ite oia i te ohipa i te auro, te ario, te veo, te auri, te ofai, te raau, te huruhuru mamoe vareau, te taura ninamu, te ahu maitai roa e te taura uteute paˈo.+ E nanaˈo oia i te mau huru hohoˈa atoa e e hamani oia i te mau hohoˈa atoa e anihia ˈtu ia ˈna.+ E ohipa oia na muri i ta oe feia rimaî aravihi e te feia rimaî aravihi a to ˈu fatu Davida to oe metua tane. 15 I teie nei, ia hopoi to ˈu fatu i te sitona, te kerite, te hinu e te uaina o ta ˈna i fafau i ta ˈna mau rave ohipa.+ 16 E e tâpû matou i te tumu raau no Lebanona,+ te rahiraa o ta oe e hinaaro. E taamuamu vau i te reira a faahaere atu ai ia oe ra na te miti i Iopa.+ E na oe e faatae roa ˈtu i te reira i Ierusalema.”+
17 Taio atura ïa Solomona i te mau tane ěê atoa i te fenua o Iseraela,+ mai ta Davida to ˈna metua tane i rave,+ e ua itehia mai 153 600. 18 Tuu atura ïa oia 70 000 o ratou ei rave ohipa,* 80 000 feia no te tarai i te ofai+ i nia i te mouˈa, e 3 600 ei tiaau no te faarave ia ratou i te ohipa.+
3 Haamata ˈtura ïa Solomona i te patu i te hiero* o Iehova+ i Ierusalema i nia i te mouˈa Moria,+ i reira Iehova i te faraa mai ia Davida to ˈna metua tane,+ i nia i te tuhaa ta Davida i faaineine i te vahi tairiiriraa huero maa* a Oranana+ ati Iebusi. 2 Ua haamata oia i te paturaa i te piti o te mahana o te piti o te avaˈe, i te maha o te matahiti to ˈna faatereraa. 3 E te niu ta Solomona i haamau no te patu i te fare* o te Atua mau, e 60 kubiti te roa e 20 kubiti te aano,+ ia au i te faito i mutaa iho.* 4 E 20 kubiti te roa o te taupee i mua, ua tuea i te aano o te fare, e 20 kubiti* to ˈna teitei. Ua tapiri oia i to ˈna rotoraa i te auro tamâhia.+ 5 Ua pǎpai oia i te piha rahi i te berusi, ua tapiri oia i te auro maitai roa+ na nia iho e ua faanehenehe oia i te reira i te hohoˈa tumu tamara+ e te fifi.+ 6 Hau atu â, ua tapiri oia i te fare i te ofai maitai roa e te unauna.+ E te auro+ ta ˈna i faaohipa, e auro ïa no Paravaima. 7 Ua tapiri oia i te fare, te mau pou tarava, te mau pae uputa, te mau pǎpai e te mau uputa i te auro.+ E ua nanaˈo oia i te kerubi i nia i te mau pǎpai.+
8 Ua hamani oia i te Vahi Moˈa Roa.+ Ua tuea to ˈna roa i te aano o te fare, 20 kubiti, e to ˈna aano, 20 kubiti. Ua tapiri oia i te reira i te auro maitai roa+ 600 taleni.* 9 Te teiaha o te auro no te mau naero, e 50 sekela.* E ua tapiri oia i na piha i nia ra i te auro.
10 I muri iho, ua hamani oia i roto i te Vahi Moˈa Roa e piti kerubi, e ua tapiri oia i te reira i te auro.+ 11 Te roa o na pererau o taua na kerubi ra,+ e 20 kubiti. E pae kubiti te roa hoê pererau o te kerubi matamua, e e û i nia i te pǎpai o te fare, e te tahi atu pererau, e pae kubiti te roa e e û i nia hoê o na pererau o te tahi atu kerubi. 12 E pae kubiti te roa hoê pererau o te tahi atu kerubi, e e û i nia i te tahi atu pǎpai o te fare, e te tahi atu pererau to ˈna, e pae kubiti te roa e e û i nia hoê o na pererau o te kerubi matamua. 13 Mea hohora na pererau o taua na kerubi ra, 20 kubiti. Mea tia noa raua a fariu ai i to raua hohoˈa i roto.*
14 Ua hamani atoa oia i te paruru+ i te taura ninamu, te huruhuru mamoe vareau, te taura uteute paˈo e te ahu maitai, e ua hamani oia i te hohoˈa kerubi i nia iho i te paruru.+
15 Ua hamani atoa oia e piti pou+ i mua i te fare, 35 kubiti te roa, e te tapoˈi i nia i te pou tataitahi, e pae kubiti ïa.+ 16 E ua hamani oia i te fifi e au i te fifi arapoa, e ua tamau i te reira i nia roa i na pou. Ua hamani atoa oia 100 remuna e ua tamau i te reira i nia i te mau fifi. 17 Faatia ˈtura oia i na pou i mua i te hiero, hoê i te pae atau* e hoê i te pae aui.* Ua topa oia i te pou i te atau i te iˈoa o Iakina* e te pou i te aui i te iˈoa o Boaza.*
4 I muri iho, ua hamani oia i te fata veo,+ 20 kubiti te roa, 20 kubiti te aano e 10 kubiti te teitei.
2 Ua hamani oia i te Miti*+ faatôhia. Mea menemene, 10 kubiti mai te tahi hiti i te tahi atu hiti o te auvaha, 5 kubiti te teitei e 30 kubiti e ati ai te reira i te taura faito.+ 3 E hohoˈa maa hotu menemene+ to raro aˈe mai i te auvaha, ati aˈe i te reira, hoê ahuru maa i te kubiti tataitahi ati aˈe i te Miti. E piti anairaa maa hotu menemene to nia iho e ua faatôhia i nia noa iho â i taua Miti ra. 4 To nia te reira 12 puaatoro oni,+ e 3 e hiˈo ra i apatoerau, 3 e hiˈo ra i tooa o te râ, 3 e hiˈo ra i apatoa e 3 e hiˈo ra i hitia o te râ. E to nia ia ratou te Miti i te vairaa, e ua hurihia to ratou muriraa atoa i ropu. 5 E maha manimani* to ˈna meumeu. E ua hamanihia to ˈna auvaha mai te auvaha o te hoê auˈa, mai te hoê lili. E ô 3 000 bato* i roto i tera tura rahi.
6 Hau atu â, ua hamani oia hoê ahuru farii pape rarahi e ua tuu oia e pae i te pae atau, e pae i te pae aui.+ Tera mau farii pape rarahi, no te horoi ïa i te mau mea i faaohipahia no te mau tusia taauahi.+ Area te Miti, no te mau tahuˈa ïa no te horoi ia ratou.+
7 I muri iho, ua hamani oia hoê ahuru vairaa mori auro,+ mai tei faataahia,+ e ua tuu oia i te reira i roto i te hiero: e pae i te pae atau, e pae i te pae aui.+
8 Ua hamani atoa oia hoê ahuru amuraa maa e ua tuu oia i te reira i roto i te hiero: e pae i te pae atau, e pae i te pae aui.+ E ua hamani oia 100 auˈa auro.
9 I muri iho, ua hamani oia i te aua+ o te mau tahuˈa+ e te aua rahi,+ e te mau uputa no te aua, e ua tapiri oia i tera mau uputa i te veo. 10 Tuu atura oia i te Miti i te pae atau, i apatoa hitia o te râ.+
11 Hamani atoa ˈtura Hirama i te mau farii rehu, te mau ope e te mau auˈa.+
Faaoti ihora ïa Hirama i te ohipa ta te arii Solomona i faaue ia ˈna ia rave no te hiero* o te Atua mau.+ Teie ta ˈna i hamani: 12 na pou e piti+ e na tapoˈi mai te auˈa te hohoˈa i nia i na pou e piti, na upeˈa e piti+ no te vehî i na piti tapoˈi mai te auˈa te hohoˈa i nia i na pou, 13 na 400 remuna+ no na upeˈa e piti, e piti anairaa remuna no te upeˈa tataitahi ei vehî i na piti tapoˈi mai te auˈa te hohoˈa i nia i na pou,+ 14 na ahuru pereoo turairai e na ahuru farii pape rarahi i nia i na pereoo turairai,+ 15 te Miti e na 12 puaatoro oni i raro aˈe,+ 16 te mau farii rehu, te mau ope, te mau patia+ e te mau taihaa atoa ta Hirama-abiu+ i hamani i te veo faaanaanahia na te arii Solomona no te hiero o Iehova. 17 Ua faatô te arii i te reira i roto i te araea meumeu i te tuhaa fenua o Ioridana i ropu ia Sukota+ e ia Zêreda. 18 Ua hamani faarahi Solomona i tera mau taihaa. Aita i faitohia te veo i faaohipahia.+
19 Hamani atura Solomona i te mau taihaa atoa+ no te hiero o te Atua mau: te fata auro,+ te mau amuraa maa+ no te pane pûpûhia,+ 20 te mau vairaa mori e to ratou mau mori i te auro tamâhia,+ o tei tutuihia i mua i te Vahi Moˈa Roa* ia au i tei titauhia, 21 te mau tiare, te mau mori, e te mau tapea uiti, i te auro, te auro maitai roa ˈˈe, 22 te mau paoti uiti, te mau auˈa, te mau hapaina, e te mau farii auahi, i te auro tamâhia, e te tomoraa o te hiero, to ˈna mau uputa i roto no te Vahi Moˈa Roa,+ e te mau uputa o te fare o te hiero, i te auro.+
5 Oti aˈera ïa ia Solomona i te rave i te mau ohipa atoa i titauhia ia rave oia no te hiero* o Iehova.+ Hopoi maira Solomona i te mau mea ta Davida to ˈna metua tane i faataa no te haamoriraa.*+ Ua tuu oia i te ario, te auro e te mau taoˈa atoa i roto i te mau vairaa taoˈa o te hiero o te Atua mau.+ 2 I tera taime, haaputuputu maira Solomona i te mau matahiapo o Iseraela, te mau upoo atoa o te mau opu e te mau raatira o te mau utuafare o Iseraela. Haere maira ratou i Ierusalema no te hopoi mai i te afata o te faufaa a Iehova mai te Oire o Davida mai,+ oia hoi Ziona.+ 3 Haaputuputu maira te mau tane atoa o Iseraela i mua i te arii, i te oroa* e faatupuhia i te hitu o te avaˈe.+
4 Haere maira ïa te mau matahiapo atoa o Iseraela, e amo ihora te ati Levi i te Afata.+ 5 Amo atura ratou i te Afata, te tiahapa o te amuiraa+ e te mau taihaa moˈa atoa no roto mai i te tiahapa. Na te mau tahuˈa e te ati Levi* i amo i te reira. 6 Tei mua i te Afata te arii Solomona e te amuiraa taatoa o Iseraela, o tei faauehia e putuputu ia ˈna ra. Ua rahi roa hoi te mamoe e te puaatoro tei pûpûhia ei tusia,+ aita ˈtura i haere ia taio i te reira. 7 Tuu atura te mau tahuˈa i te afata o te faufaa a Iehova i to ˈna vairaa, i roto i te piha o te hiero i roto roa, te Vahi Moˈa Roa, i raro aˈe i te mau pererau o na kerubi.+ 8 Mea hohora ïa te mau pererau o na kerubi i nia i te vairaa o te Afata, a tapoˈi roa ˈtu ai na kerubi i te Afata e to ˈna na raau amoraa+ na nia. 9 No te roa o na raau amoraa, ite-noa-hia ˈtura te mau hopearaa o na raau amoraa mai te Vahi Moˈa ˈtu i mua i te Vahi Moˈa Roa,* aita râ i itehia na rapaeau mai. To reira noa â to ˈna vairaa e tae roa mai i teie mahana. 10 Aita e ohipa to roto i te Afata maori râ na pǎpǎ e piti ta Mose i tuu i roto, i Horeba,+ i to Iehova faaauraa i te hoê faufaa+ i te nunaa o Iseraela a haere mai ai ratou i rapae i Aiphiti.+
11 I to te mau tahuˈa haereraa mai i rapae i te vahi moˈa (ua haamoˈa hoi te mau tahuˈa atoa i reira ia ratou,+ aita e hiˈoraa to ratou pǔpǔ),+ 12 ua oomo te feia himene ati Levi+ no te pǔpǔ o Asapha,+ Hemana,+ Iedutuna,+ e o ta ratou mau tamaiti e to ratou mau taeae i te ahu maitai roa. E sumebalo, e upaupa taura e e kinura to roto i to ratou rima. Te tia noa ra ratou i te pae hitia o te râ o te fata, e i pihai iho ia ratou, 120 tahuˈa e faaoto ra i te pu.+ 13 A arue e a haamauruuru amui ai te feia faaoto pu e te feia himene ia Iehova, a maraa ˈi te oto o te mau pu, te mau sumebalo e te tahi atu mau mauhaa, a arue ai ratou ia Iehova, “mea maitai hoi oia e e vai â to ˈna here taiva ore e a muri noa ˈtu,”+ i reira, î aˈera te hiero, te hiero o Iehova, i te hoê ata.+ 14 No taua ata ra, aita ˈtura te mau tahuˈa i rave faahou i ta ratou ohipa, ua î hoi te hiero o te Atua mau i te hanahana o Iehova.+
6 I taua taime ra, na ô aˈera Solomona: “E Iehova, ua parau oe e parahi oe i roto i te rumaruma rahi.+ 2 I teie nei, ua patu vau i te hoê fare nehenehe no oe, te hoê vahi papu ia parahi oe e a muri noa ˈtu.”+
3 Fariu ihora te arii i te amuiraa taatoa o Iseraela o te tia noa ra, e haamaitai ihora oia ia ratou.+ 4 Na ô atura oia: “Ia aruehia Iehova te Atua o Iseraela, o tei fafau i te parau i to ˈu metua tane ia Davida ma to ˈna iho vaha, e o tei faatupu i te reira ma to ˈna iho rima, a parau ai: 5 ‘Mai te mahana mai â i aratai mai ai au i to ˈu nunaa i rapae i Aiphiti, aita vau i maiti i te hoê oire i roto i te mau opu atoa o Iseraela no te patu i te hoê fare ia vai to ˈu iˈoa i reira,+ e aita vau i maiti i te tahi taata no te riro mai ei aratai no to ˈu nunaa o Iseraela. 6 I teie nei râ, ua maiti au ia Ierusalema+ ia vai to ˈu iˈoa i reira, e ua maiti au ia Davida no te aratai i to ˈu nunaa o Iseraela.’+ 7 E ua tupu te hinaaro i roto i te aau o to ˈu metua tane o Davida e patu i te hoê fare no te iˈoa o Iehova te Atua o Iseraela.+ 8 Ua parau mai râ Iehova i to ˈu metua tane ia Davida: ‘Ua tupu te hinaaro i roto i to oe aau e patu i te hoê fare no to ˈu iˈoa, e e ohipa maitai tera. 9 E ere râ na oe e patu i taua fare nei. Na ta oe tamaiti o te fanauhia mai* e patu i te fare no to ˈu iˈoa.’+ 10 Ua faatupu Iehova i te parau ta ˈna i fafau, te mono ra hoi au i to ˈu metua tane ra ia Davida e te parahi ra vau i nia i te terono o Iseraela,+ mai ta Iehova i fafau.+ Ua patu atoa vau i te fare no te iˈoa o Iehova te Atua o Iseraela, 11 e i reira vau i te tuuraa i te Afata to roto te faufaa+ ta Iehova i faaau i te nunaa o Iseraela i te vairaa.”
12 Tia aˈera Solomona i mua i te fata a Iehova i mua i te amuiraa taatoa o Iseraela e faateitei aˈera oia i to ˈna rima.+ 13 (Ua hamani hoi Solomona i te hoê tahua veo e ua tuu oia i te reira i ropu i te aua.+ E pae kubiti* to ˈna roa, e pae kubiti te aano e e toru kubiti te teitei. Te tia ra oia i nia iho i te reira.) Tuturi ihora oia i mua i te amuiraa taatoa o Iseraela, faateitei aˈera i to ˈna rima i nia i te raˈi,+ 14 e na ô aˈera oia: “E Iehova te Atua o Iseraela, aita ˈtu e Atua mai ia oe i te raˈi e i te fenua nei. Te faaite ra oe i te here taiva ore i to mau tavini o te haere ra i mua ia oe ma te aau atoa, e te haapao ra oe i te faufaa ta oe i faaau ia ratou.+ 15 Ua haapao oe i te parau ta oe i fafau i to tavini o Davida to ˈu metua tane.+ Ua fafau oe i taua parau ra i to oe iho vaha, e i teie mahana ua faatupu oe i te reira i to oe iho rima.+ 16 E i teie nei, e Iehova te Atua o Iseraela, a haapao i te parau ta oe i fafau i to tavini ra ia Davida to ˈu metua tane a parau ai oe: ‘Ia haapao ta oe mau tamaiti i to ratou haerea ma te auraro i ta ˈu ture,+ mai ia oe i na reira, e vai â te tahi huaai no oe i mua ia ˈu e o te parahi i nia i te terono o Iseraela.’+ 17 E i teie nei, e Iehova te Atua o Iseraela, ia tupu te parau ta oe i fafau i to tavini o Davida.
18 “E te Atua e, e parahi mau â anei râ oe i te fenua nei i rotopu i te taata?+ Inaha, e ere te raˈi teitei i te mea aano maitai no te riro ei nohoraa no oe.+ Eaha ˈtu â ïa teie fare ta ˈu i patu!+ 19 I teie nei, a faaroo i ta ˈu pure e ta ˈu taparuraa, to ˈu Atua, e Iehova. A faaroo i ta ˈu pii no te tauturu e te pure ta ˈu e faatae atu nei ia oe, o vau, to tavini. 20 Ia araara to mata i nia i teie fare i te ao e te po, teie vahi ta oe i parau e tuu oe i to oe iˈoa,+ ia faaroo oe i te pure ta ˈu* e pure nei i mua i teie vahi. 21 A faaroo i te mau pii no te tauturu a to tavini e a to nunaa o Iseraela ia pure ratou i mua i teie vahi.+ Ia faaroo oe mai te vahi e parahi ai oe, mai te raˈi mai.+ Ia faaroo e ia faaore oe i te hara.+
22 “Ia parihia te hoê taata i te hararaa i te tahi atu taata e ia faahoreohia oia,* e ia haere mai oia i mua i ta oe fata i teie fare a vai noa ˈi i raro aˈe i taua horeo* ra,+ 23 ia faaroo oe mai te raˈi mai, a ohipa e a haava i to mau tavini: a tahoo i te ino ta te taata ino i rave, a faahoˈi i to ˈna ino i nia i to ˈna upoo,+ a parau aita e hapa ta* te taata parau-tia e a haamaitai ia ˈna ia au i ta ˈna parau-tia.+
24 “E ia pau to oe nunaa o Iseraela i te enemi no te mea ua hara noa ratou ia oe,+ ia hoˈi mai ratou a faahanahana ˈtu ai i to iˈoa,+ ia pure+ e ia taparu ratou i mua ia oe i roto i teie fare,+ 25 ia faaroo oe mai te raˈi mai+ a faaore atu ai i te hara a to nunaa o Iseraela, e ia faahoˈi mai oe ia ratou i te fenua ta oe i horoa no ratou e to ratou mau tupuna.+
26 “Ia opanihia te raˈi e ia mau te ûa+ no te mea ua hara noa ratou ia oe,+ ia pure ratou i mua i teie vahi a faahanahana ˈtu ai i to oe iˈoa, e ia haapae ratou i ta ratou hara no te mea ua faahaama* oe ia ratou,+ 27 a faaroo mai na mai te raˈi mai e a faaore i te hara a to mau tavini, a to oe nunaa o Iseraela. E haapii hoi oe ia ratou i te eˈa maitai ia haere.+ E e faatopa oe i te ûa+ i nia i to oe fenua ta oe i horoa no to oe nunaa ei faufaa na ratou.
28 “Ia roohia teie fenua i te oˈe,+ te maˈi pee,+ te mataˈi veavea, te tutae ro,+ te aere vivi,+ aore ra ia haaati te enemi i to nunaa i te mau oire atoa o teie fenua*+ aore ra ia tupu te tahi atu huru ati aore ra maˈi,+ 29 te mau pure atoa,+ te mau taparuraa+ atoa a te hoê taata aore ra a to nunaa o Iseraela (ua ite hoi te taata tataitahi i to ˈna iho ati e to ˈna iho mauiui)+ ia hohora ratou i to ratou rima i mua i teie fare,+ 30 ia faaroo oe mai te raˈi mai, te vahi e parahi ai oe,+ e ia faaore oe i te hara.+ A faahoˈi i ta te taata tataitahi ia au i to ˈna mau haerea atoa, ua ite hoi oe i to ˈna aau (o oe anaˈe tei ite mau i te aau o te taata),+ 31 ia mǎtaˈu ratou ia oe ma te haapao i ta oe mau faaueraa i te mau mahana atoa e ora ˈi ratou i nia i te fenua ta oe i horoa no to matou mau tupuna.
32 “Oia atoa no te taata ê e ere no to oe nunaa o Iseraela e o te haere mai mai te hoê fenua atea mai no to oe iˈoa rahi,*+ to rima puai e to rima faatorohia, ia haere mai oia e pure i mua i teie fare,+ 33 a faaroo mai na mai te raˈi mai, te vahi e parahi ai oe, e a rave pauroa ta teie taata ê e ani ia oe. E ite ïa te mau nunaa atoa o te fenua nei i to iˈoa+ e e mǎtaˈu ratou ia oe, mai to nunaa o Iseraela e mǎtaˈu ra ia oe. E e ite ratou e tei nia to iˈoa i teie fare ta ˈu i patu.
34 “Ia haere to nunaa i te tamaˈi e aro i to ratou mau enemi na te eˈa e tono ai oe ia ratou,+ e ia pure ratou+ ia oe ma te fariu i nia i teie oire ta oe i maiti e i nia i te fare ta ˈu i patu no to iˈoa,+ 35 a faaroo mai na mai te raˈi mai i ta ratou pure e ta ratou taparuraa, e a ohipa no ratou.+
36 “Ia hara ratou ia oe (aita hoi e taata o te ore e hara),+ ia riri oe ia ratou e ia faarue oe ia ratou i te tahi enemi, e ia hopoi tîtî to ratou enemi ia ratou i te hoê fenua ê, mea atea anei aore ra mea piri,+ 37 e ia afaro mai to ratou feruriraa i te fenua i reira ratou i te hopoi-tîtî-raahia, ia hoˈi mai ratou ia oe ra a taparu atu ai ia oe i to farii maitai i te fenua i reira ratou i te faatîtîraahia, ma te parau: ‘Ua hara matou e ua rave i te ohipa ino. Ua haa matou ma te ino,’+ 38 ia hoˈi mai ratou ia oe ra ma to ratou aau+ e ora* taatoa i te fenua i hopoi-tîtî-hia ˈi ratou,+ e ia pure ratou ia oe ma te fariu i nia i te fenua ta oe i horoa no to ratou mau tupuna, i nia i te oire ta oe i maiti+ e te fare ta ˈu i patu no to iˈoa, 39 a faaroo mai na mai te raˈi mai, te vahi e parahi ai oe, i ta ratou pure e ta ratou taparuraa, a tauturu ia ratou+ e a faaore i te hara a to nunaa ia oe.
40 “I teie nei, to ˈu Atua e, ia araara to mata e ia faaroo to tariˈa i te pure e purehia i teie vahi.+ 41 E i teie nei, e te Atua e Iehova, a haere i to oe vahi faafaaearaa,+ o oe e te Afata o to puai. E te Atua e Iehova, ia faaite ta oe mau tahuˈa e no ǒ mai ia oe ra te faaoraraa, e ia oaoa tei ore i taiva ia oe i to oe maitai.+ 42 E te Atua e Iehova, eiaha e patoi i* tei faatavaihia e oe.+ Ia haamanaˈo oe i to here taiva ore ia Davida to tavini.”+
7 I te otiraa iho â ta Solomona pure,+ topa maira te auahi mai te raˈi mai,+ pau ihora te tusia taauahi e te tahi atu mau tusia, e î aˈera te hiero* i te hanahana o Iehova.+ 2 Aita i haere i te mau tahuˈa ia tomo i roto i te hiero o Iehova, ua î hoi te hiero o Iehova i te hanahana o Iehova.+ 3 Ua ite te nunaa taatoa o Iseraela i te auahi i te toparaa mai e te hanahana o Iehova i nia i te hiero. Piˈo ihora ratou e to ratou hohoˈa i raro, tipapa ihora e haamauruuru aˈera ia Iehova, “mea maitai hoi oia e e vai â to ˈna here taiva ore e a muri noa ˈtu.”
4 Pûpû atura te arii e te nunaa taatoa i te tusia i mua ia Iehova.+ 5 Ua pûpû te arii Solomona e 22 000 puaatoro e 120 000 mamoe ei tusia. Mea na reira te arii e te nunaa taatoa i te avariraa i te hiero o te Atua mau.+ 6 Ua haapao te mau tahuˈa i ta ratou tuhaa ohipa, oia atoa te ati Levi e ta ratou mau mauhaa upaupa faaohipahia no te apee i te himene na Iehova.+ (Ua hamani te arii Davida i teie mau mauhaa upaupa no te haamauruuru ia Iehova, “e vai â hoi to ˈna here taiva ore e a muri noa ˈtu,” ia arue Davida i te Atua e o ratou.*) E ua faaoto haapuai te mau tahuˈa i te pu+ i mua i te ati Levi, a tia noa ˈi te ati Iseraela taatoa.
7 Haamoˈa ihora Solomona i te vahi i ropu i te aua i mua i te hiero o Iehova, i reira hoi oia e pûpû ai i te mau tusia taauahi+ e te mii o te mau tusia no te hau, inaha aita pauroa te tusia taauahi, te tusia huero maa+ e te mii+ i ô i nia i te fata veo+ ta Solomona i hamani. 8 I tera taime, faatupu atura Solomona i te oroa e hitu mahana+ e to Iseraela taatoa, e nahoa rahi roa no Lebo-hamata* e tae atu i te tahora o Aiphiti.+ 9 I te vaˈu râ o te mahana,* haaputuputu aˈera ratou no te hoê tairururaa taa ê,+ no te mea ua faatupu ratou i te avariraa o te fata e hitu mahana e te oroa e hitu mahana. 10 I te 23 o te mahana o te hitu o te avaˈe, tuu atura oia i te nunaa ia hoˈi i ǒ ratou ma te oaoa+ rahi i te aau no te maitai ta Iehova i faaite ia Davida, Solomona e Iseraela to ˈna nunaa.+
11 Mea na reira te otiraa ia Solomona te hiero o Iehova e te aorai* o te arii.+ E ua manuïa te mau mea atoa ta Solomona i opua e rave no te hiero o Iehova e to ˈna iho aorai.+ 12 Fa maira Iehova ia Solomona+ i te po e parau maira ia ˈna: “Ua faaroo vau i ta oe pure, e ua maiti au i teie vahi no ˈu ei fare no te mau tusia.+ 13 Ia opani au i te raˈi e aita anaˈe e ûa, ia faaue au i te mau vivi ia amu haapau i te fenua e ia tuu vau i te maˈi pee i rotopu i to ˈu nunaa, 14 ia faahaehaa+ te nunaa e amo nei i to ˈu iˈoa+ ia ratou, ia pure ratou, ia imi ratou i to ˈu aro e ia haapae ratou i ta ratou mau ohipa ino,+ e faaroo vau mai te raˈi mai, e faaore au i ta ratou hara e e faaora vau i to ratou fenua.+ 15 I teie nei, e araara to ˈu mata e e faaroo to ˈu tariˈa i te pure e purehia i teie vahi.+ 16 E i teie nei, ua maiti e ua haamoˈa vau i teie fare ia vai noa to ˈu iˈoa i reira,+ e ei reira noa to ˈu mata e to ˈu aau.+
17 “Ia tavini oe ia ˈu mai to metua tane o Davida i tavini ia ˈu,* ma te rave i te mau mea atoa ta ˈu i faaue ia oe, e ia auraro oe i ta ˈu mau ture e ta ˈu mau faaotiraa haavaraa,+ 18 e haamau vau i to oe mana arii,+ mai ta ˈu i fafau i to ˈu faaauraa i te hoê faufaa ia Davida to metua tane+ ma te parau: ‘E vai â te tahi huaai no oe o te faatere ia Iseraela.’+ 19 Ia fariu ê râ outou ia ˈu e ia faarue outou i ta ˈu mau faatureraa e ta ˈu mau faaueraa ta ˈu i tuu atu i mua ia outou, e ia haere outou e tavini i te tahi atu mau atua a tipapa ˈtu ai i mua ia ratou,+ 20 e iriti tumu vau ia Iseraela mai nia mai i te fenua ta ˈu i horoa ia ratou+ e e hopoi ê au i te fare ta ˈu i haamoˈa no to ˈu iˈoa mai mua mai i to ˈu mata. E faariro vau i te reira ei vahavaharaa* e ei faaoooraa na te mau nunaa atoa.+ 21 E riro teie fare ei haapueraa huˈahuˈa. E maere+ te taata atoa o te haere na pihai iho e e parau ratou: ‘Eaha Iehova i na reira ˈi i teie fenua e teie fare?’+ 22 E pahonohia ˈtu ïa: ‘No te mea ua faarue ratou ia Iehova+ te Atua o to ratou mau tupuna, o tei aratai ia ratou i rapae i Aiphiti,+ e ua ati atu ratou i te tahi atu mau atua, ua tipapa i mua ia ratou e ua tavini ia ratou.+ No reira oia i faatae mai ai i teie ati i nia ia ratou.’”+
8 E 20 matahiti te maoro to Solomona paturaa i te hiero* o Iehova e to ˈna aorai.*+ 2 I muri iho, ua patu faahou Solomona i te mau oire ta Hirama+ i horoa na ˈna e ua haaparahi oia i te ati Iseraela* i reira. 3 Hau atu â, ua haere Solomona i Hamata-zoba e ua haru mai i tera oire. 4 I muri iho, ua haapaari* oia ia Tadamora, i te medebara, e te mau oire vairaa taoˈa atoa+ ta ˈna i patu na i Hamata.+ 5 Ua haapaari atoa oia ia Bete-horona nia+ e Bete-horona raro+ i te aua, te uputa e te auri tarava, 6 e ia Baalata,+ te mau oire vairaa taoˈa atoa, te taatoaraa o te mau oire no te mau pereoo+ e no te feia faahoro puaahorofenua. Ua patu atoa oia i te mau mea atoa ta ˈna i hinaaro i Ierusalema, i Lebanona e na te fenua taatoa i raro aˈe i ta ˈna faatereraa.
7 Area te feia atoa tei toe mai no te ati Heta, te ati Amori, te ati Perizi, te ati Hevi e te ati Iebusi,+ e ere i te ati Iseraela,+ 8 to ratou huaai o tei toe mai i taua fenua ra, oia hoi te feia ta te ati Iseraela i ore i haamou,+ ua ravehia e Solomona no te ohipa faahepohia e tae roa mai i teie mahana.+ 9 Aita râ Solomona i faatîtî i te ati Iseraela no ta ˈna ohipa,+ e feia tamaˈi hoi ratou no ˈna, e raatira no ta ˈna mau faehau e e raatira no ta ˈna feia faahoro pereoo e ta ˈna feia faahoro puaahorofenua.+ 10 E 250 raatira o te feia toroa a te arii Solomona, e tiaau ratou i te feia rave ohipa.+
11 Ua aratai atoa mai Solomona i te tamahine a Pharao+ mai te Oire o Davida mai i te fare ta ˈna i patu no ˈna,+ ua parau hoi oia: “Noa ˈtu e vahine faaipoipo o ˈna na ˈu, eiaha o ˈna ia parahi i te fare o te arii Davida no Iseraela, mea moˈa hoi te mau vahi i afaihia ˈi te Afata a Iehova.”+
12 I muri iho, ua pûpû Solomona i te tusia taauahi+ ia Iehova i nia i te fata+ a Iehova ta ˈna i faatia i mua i te taupee.+ 13 Ua pûpû oia i te tusia i te mau mahana atoa e ua pûpû i te ô ia au i te faaueraa a Mose no te mau Sabati,+ te mau avaˈe apî+ e te mau oroa faatupuhia e toru taime i te matahiti:+ te Oroa pane hopue ore,+ te Oroa hebedoma+ e te Oroa patiaraa tiahapa.*+ 14 Hau atu â, ua tuu oia i te mau pǔpǔ tahuˈa+ i ta ratou tuhaa taviniraa ia au i te parau a to ˈna metua tane o Davida, e te ati Levi i ta ratou tuhaa ohipa, no te arue+ e no te tavini i mua i te mau tahuˈa ia au i te tereraa o te mau mahana atoa. Ua tuu atoa oia i te mau tiai uputa i roto i ta ratou mau pǔpǔ no te mau uputa atoa,+ tera hoi te faaueraa a Davida, te taata o te Atua mau. 15 Aita e taata i fariu ê i te faaueraa ta te arii i horoa i te mau tahuˈa e te ati Levi, no nia i te mau ohipa atoa aore ra no nia i te mau fare vairaa taoˈa. 16 Ua faanaho-maitai-hia ïa pauroa te ohipa a Solomona, mai te mahana mai â i haamauhia ˈi te niu o te hiero o Iehova+ e oti noa ˈtu te hiero. Mea na reira ïa te fare o Iehova i te otiraa.+
17 I muri iho to Solomona haereraa ˈtu i Eziona-gebera+ e i Elata+ i te pae miti i te fenua o Edoma.+ 18 Ua faatae Hirama+ i te pahi e te ihitai aravihi na ˈna i raro aˈe i te aratairaa a to ˈna mau taata. Ua haere ratou e ta Solomona mau tavini i Ophira+ e ua faahoˈi mai e 450 taleni* auro+ no reira na te arii Solomona.+
9 Ua faaroo te arii vahine no Seba+ i te parau o Solomona. Haere maira ïa oia i Ierusalema e tamata ia ˈna i te tahi mau uiraa fifi.* Mea rahi te taata tei na muri ia ˈna, e te mau kamela e uta ra i te monoˈi zuri, te auro+ e rave rahi e te ofai maitai roa. Haere maira oia i mua ia Solomona e ui maira pauroa ta ˈna i hinaaro e ite.+ 2 Pahono atura Solomona i ta ˈna mau uiraa atoa. Aita e mea fifi roa no* Solomona ia faataa ˈtu ia ˈna.
3 I to te arii vahine no Seba iteraa i te paari o Solomona,+ te aorai* ta ˈna i patu,+ 4 te maa i nia i ta ˈna amuraa maa,+ te faanahoraa o to ˈna mau tia mana i nia i te amuraa maa, te faanahoraa o te ohipa a ta ˈna mau tavini i te amuraa maa e to ratou ahu, to ˈna feia hopoi auˈa e to ratou ahu, e te mau tusia taauahi ta ˈna i tamau i te pûpû i te hiero* o Iehova,+ faahiahia roa aˈera oia.* 5 Na ô maira ïa oia i te arii: “E parau mau ta ˈu i faaroo i to ˈu fenua no nia i ta oe mau ohipa* e to oe paari. 6 Aita vau i tiaturi i tei parauhia mai no oe e haere noa mai ai au a ite mata roa ˈtu ai i te reira.+ E inaha, aita te rahi o to oe paari i faatia-pauroa-hia mai.+ Ua hau aˈe te reira i te parau ta ˈu i faaroo.+ 7 Mea oaoa no to oe mau taata, e mea oaoa no ta oe mau tavini o te tia tamau ra i pihai iho ia oe, a faaroo noa ˈtu ai i ta oe mau parau î i te paari! 8 Ia aruehia to Atua o Iehova, o tei tuu ia oe i nia i to ˈna terono ei arii na Iehova to Atua no to ˈna here ia oe. No te mea ua here to Atua ia Iseraela,+ ua faaarii oia ia oe i nia ia ratou no te haava ma te tano e te parau-tia, ia vai noa Iseraela e a muri noa ˈtu.”
9 Horoa maira oia na te arii 120 taleni* auro,+ te hoê faito monoˈi zuri rahi e te ofai maitai roa. Aita hoê faito monoˈi zuri mai ta te arii vahine no Seba i horoa na te arii Solomona i afai-faahou-hia mai.+
10 Hau atu â, te mau tavini a Hirama e te mau tavini a Solomona o tei hopoi mai i te auro no Ophira mai,+ ua hopoi atoa mai i te alamuga e te ofai maitai roa.+ 11 I taua raau ra, ua hamani te arii i te eˈa paumaraa no te hiero o Iehova+ e no te aorai o te arii,+ oia atoa te kinura e te upaupa taura na te feia himene.+ Aita e raau mai teie i itehia aˈenei i te fenua o Iuda.
12 Horoa atoa ˈtura te arii Solomona na te arii vahine no Seba i te mau mea atoa ta ˈna i hinaaro, ta ˈna i ani. Ua hau aˈe ta Solomona i horoa na ˈna i ta ˈna i hopoi mai na te arii. I muri iho, hoˈi atura oia i to ˈna fenua e ta ˈna mau tavini na muri ia ˈna.+
13 E 666 taleni auro tei tae mai ia Solomona ra i te matahiti tataitahi,+ 14 taa ê atu i tei hopoihia mai e te feia tapihoo e te feia hoo taoˈa, e te mau arii Arabia atoa e te mau tavana o te fenua o tei hopoi mai i te auro e te ario ia Solomona ra.+
15 Ua hamani te arii Solomona 200 paruru rarahi i te auro anoihia+ (600 sekela* auro anoihia no te paruru tataitahi).+ 16 Ua hamani atoa oia 300 paruru nainai* i te auro anoihia (e toru mina* auro no te paruru nainai tataitahi). E ua tuu te arii i te reira i roto i te Fare o te Uru raau no Lebanona.+
17 Ua hamani atoa te arii i te hoê terono ivori rahi e ua tapiri oia i te reira i te auro tamâhia.+ 18 E ono taahiraa to taua terono ra e e tuuraa avae auro tei tamauhia i raro i taua terono ra. E mauraa rima to na pae e piti o te parahiraa e e piti liona+ to pihai iho i na mauraa rima. 19 E 12 liona+ to nia i na taahiraa e ono, hoê i te hiti tataitahi o na taahiraa e ono. Aita te tahi faatereraa arii ê atu i hamani aˈenei i te terono mai teie. 20 E auro anaˈe ta te arii Solomona mau auˈa, e te mau taihaa o te Fare o te Uru raau no Lebanona, e auro tamâhia anaˈe. Aita e ohipa hamanihia i te ario, aita hoi e faufaa to te ario i te tau o Solomona.+ 21 E haere hoi ta te arii mau pahi i Taresisa+ e te mau tavini a Hirama.+ Hoê taime i roto e toru matahiti, e hoˈi mai te mau pahi no Taresisa ma te hopoi mai i te auro e te ario, te ivori,+ te urî taata e te teki.
22 Ua hau ê ïa te arii Solomona i te tahi atu mau arii i te fenua nei i ta ˈna faufaa e to ˈna paari.+ 23 Ua imi te mau arii ati aˈe i te fenua i te farerei ia* Solomona no te faaroo i te paari ta te Atua mau i tuu i roto i to ˈna aau.+ 24 E hopoi mai ratou paatoa i te ô: te taoˈa ario, te taoˈa auro, te ahu,+ te mauhaa tamaˈi, te monoˈi zuri, te puaahorofenua e te pheradi. Mai tera noa i te mau matahiti atoa. 25 E 4 000 vairaa ta Solomona no ta ˈna mau puaahorofenua huti pereoo e e 12 000 puaahorofenua.*+ E vaiiho oia i te reira i te mau oire o te mau pereoo i Ierusalema, i pihai iho i te vahi e ora ˈi oia.+ 26 Ua faatere oia i te mau arii atoa mai te Anavai* e tae atu i te fenua o te mau Philiseti e i te otia o Aiphiti.+ 27 Ua rahi roa hoi te ario i noaa mai i te arii i Ierusalema, pue noa ˈtura te reira mai te ofai, e te arezi, mai te mau tumu sukamino i te Sephela.+ 28 E e hopoihia mai ta Solomona puaahorofenua mai Aiphiti mai+ e mai te tahi atu mau fenua.
29 Te toea o te aamu o Solomona,+ mai te omuaraa e tae atu i te hopea, ua papaihia ïa i roto i te anairaa parau a Natana+ te peropheta, i roto i te parau tohu a Ahia+ no Silo, e i roto i te pueraa parau orama a Ido+ te taata ite orama no nia ia Ieroboama+ te tamaiti a Nebata. 30 E 40 matahiti to Solomona ariiraa i Ierusalema i nia i to Iseraela taatoa. 31 Taoto ihora Solomona i roto i te pohe e to ˈna mau tupuna. Hunahia ihora ïa oia i te Oire o Davida to ˈna metua tane+ e riro maira ta ˈna tamaiti o Rehoboama ei arii ei mono ia ˈna.+
10 Haere atura Rehoboama i Sekema,+ ua haere mai hoi to Iseraela taatoa i Sekema no te faaarii ia ˈna.+ 2 I to Ieroboama+ te tamaiti a Nebata faarooraa i te reira (tei Aiphiti noa â oia no te mea ua horo ê oia i te arii Solomona),+ hoˈi maira oia mai Aiphiti mai. 3 Tonohia ˈtura te taata e tii ia ˈna, e haere maira Ieroboama e to Iseraela taatoa ia Rehoboama ra e na ô maira: 4 “Ua faateimaha to oe metua tane i ta matou zugo.+ Ia faaohie râ oe i te taviniraa teimaha a to metua tane e ia haamâmâ oe i te zugo teimaha ta ˈna i tuu i nia ia matou, e tavini matou ia oe.”
5 Pahono atura Rehoboama ia ratou: “A hoˈi mai ia ˈu nei i muri aˈe e toru mahana.” Reva ˈtura ïa te nunaa.+ 6 Ui atura te arii Rehoboama i te mau tane paari* o tei tavini i to ˈna metua tane ra o Solomona a ora noa ˈi oia: “Eaha ta ˈu e pahono i teie nunaa?” 7 Pahono maira ratou ia ˈna: “Mai te peu mea maitai oe i nia i teie nunaa, ia mauruuru ratou ia oe e ia pahono oe ia ratou ma te hamani maitai, e tavini noa ratou ia oe.”
8 Tera râ, patoi atura oia i te aˈoraa ta te mau tane paari* i horoa ˈtu, e ui atura oia i te feia apî hoê â ratou i te paariraa mai e o tei riro ei tavini na ˈna i teie nei.+ 9 Ua ui oia ia ratou: “Ua ani teie nunaa ia ˈu ia haamâmâ i te zugo ta to ˈu metua tane i tuu i nia ia ratou. Eaha ta ˈu e pahono ia ratou?” 10 Na ô maira te feia apî hoê â ratou Rehoboama i te paariraa mai: “I teie nunaa o tei parau mai ia oe: ‘Ua faateimaha to metua tane i ta matou zugo, e haamâmâ râ oe i te reira no matou,’ teie ta oe e pahono atu: ‘E rahi atu â to ˈu manimani rima iti i te tauupu o to ˈu metua tane. 11 Ua tuu to ˈu metua tane i te zugo teimaha i nia ia outou. E faateimaha ˈtu â râ vau i ta outou zugo. Ua tairi to ˈu metua tane ia outou i te hui. O vau râ, e tairi au ia outou i te hui taratara.’”
12 Haere maira Ieroboama e te nunaa taatoa i te arii Rehoboama ra i te toru o te mahana, mai ta ˈna i parau: “A hoˈi mai ia ˈu nei i te toru o te mahana.”+ 13 Parau iria ˈtura râ te arii Rehoboama ia ratou. Aita ïa oia i haapao i te aˈoraa a te mau tane paari.* 14 Ua faaroo râ oia i te aˈoraa a te feia apî e ua pahono oia: “E faateimaha ˈtu â vau i ta outou zugo. Ua tairi to ˈu metua tane ia outou i te hui. O vau râ, e tairi au ia outou i te hui taratara.” 15 Aita ïa te arii i faaroo i te nunaa, o te Atua mau hoi to muri i teie tupuraa,+ ia tupu te parau ta Iehova i faaite ia Ieroboama te tamaiti a Nebata na roto ia Ahia+ no Silo.
16 No te mea aita te arii i hinaaro e faaroo ia ratou, na ô maira Iseraela taatoa ia ˈna: “Eaha ta matou tuhaa ia Davida ra? Aita ta matou e tuhaa i te tamaiti a Iese. A hoˈi i to oe ra mau atua, e Iseraela e. I teie nei, a haapao i to oe iho utuafare, e Davida.”+ Hoˈi atura ïa to Iseraela taatoa i ǒ ratou.*+
17 Tamau noa ˈtura râ Rehoboama i te faatere i te ati Iseraela e ora ra i te mau oire o Iuda.+
18 I muri aˈe, tono ihora te arii Rehoboama ia Hadorama,+ te tiaau o te feia titauhia i te ohipa, no te farerei i te ati Iseraela. Tera râ, pehi aˈera ratou ia ˈna i te ofai e pohe atura oia. Area te arii Rehoboama, ua noaa ia ˈna ia ouˈa i roto i to ˈna pereoo e reva ê atura oia i Ierusalema.+ 19 E mai tera mahana, orure hau noa ˈtura te ati Iseraela i te utuafare o Davida.
11 I to Rehoboama taeraa mai i Ierusalema, haaputuputu ihora oia i na opu o Iuda e o Beniamina,+ 180 000 feia tamaˈi faaineinehia,* no te aro ia Iseraela e no te faahoˈi mai i te faatereraa arii ia Rehoboama ra.+ 2 Tae maira teie parau a Iehova ia Semaia+ ra te taata o te Atua mau: 3 “A parau ia Rehoboama te tamaiti a Solomona te arii o Iuda e i to Iseraela taatoa o te parahi ra i Iuda e i Beniamina: 4 ‘Teie ta Iehova e parau ra: “Eiaha outou e haere e aro i to outou mau taeae. A hoˈi i ǒ outou, o vau hoi to muri i taua ohipa ra.”’”+ Auraro aˈera ïa ratou ia Iehova e hoˈi atura e aita ˈtura i haere e aro ia Ieroboama.
5 Parahi ihora Rehoboama i Ierusalema e hamani ihora i te tahi mau oire auahia i te patu i Iuda. 6 Ua patu faahou* ïa oia ia Betelehema,+ Etama, Tekoa,+ 7 Bete-zura, Soko,+ Adulama,+ 8 Gata,+ Mâresa, Zipha,+ 9 Adoraima, Lakisa,+ Azeka,+ 10 Zora, Aialona+ e Heberona,+ e oire auahia i te patu i Iuda e i Beniamina. 11 I muri aˈe, ua haapaari atu â oia i te mau oire auahia i te patu, ua tuu i te raatira i taua mau vahi ra e ua hopoi atu i te maa na ratou, te hinu e te uaina. 12 Ua faatae oia i te mau paruru rarahi e te mau omore i te mau oire atoa. Ua haapaari maitai oia i tera mau oire. E faatere noa ˈtura oia ia Iuda e ia Beniamina.
13 Ua haere mai te mau tahuˈa e te ati Levi no Iseraela taatoa mai to ratou mau tuhaa fenua mai, e turu ia Rehoboama. 14 Ua faarue te ati Levi i to ratou mau vahi e ta ratou faufaa+ e ua haere mai i Iuda e i Ierusalema, no te mea ua tatara Ieroboama e ta ˈna mau tamaiti i to ratou tiaraa tahuˈa na Iehova.+ 15 I muri iho, ua faatoroa Ieroboama i ta ˈna iho mau tahuˈa no te mau vahi teitei+ e no te haamoriraa o te mau demoni hohoˈa puaaniho*+ e no na fanauˈa puaatoro ta ˈna i hamani.+ 16 E te feia no te mau opu atoa o Iseraela o tei faaoti papu e imi ia Iehova te Atua o Iseraela, ua pee ïa i te mau tahuˈa e te ati Levi i Ierusalema no te pûpû i te tusia ia Iehova te Atua o to ratou mau tupuna.+ 17 E toru matahiti to ratou faaetaetaraa i te faatereraa arii o Iuda e to ratou tururaa ia Rehoboama te tamaiti a Solomona, e toru matahiti hoi to ratou peeraa i te hiˈoraa* o Davida e o Solomona.
18 I muri iho, ua faaipoipo Rehoboama ia Mahalata. E tamahine o ˈna na Ierimota te tamaiti a Davida e na Abihaila te tamahine a Eliaba+ te tamaiti a Iese. 19 I muri aˈe, ua fanau Mahalata i te tamaiti na ˈna: Ieusa, Semaria e Zahama. 20 I muri aˈe ia ˈna, ua faaipoipo oia ia Maaka ta Abasaloma+ mootua. I muri aˈe, ua fanau oia i te tamaiti na ˈna: Abia,+ Atai, Ziza e Selomita. 21 Ua rahi aˈe to Rehoboama here ia Maaka ta Abasaloma mootua i te tahi atu o ta ˈna mau vahine faaipoipo e vahine faaipoipo tavini.+ Inaha, 18 vahine faaipoipo ta ˈna e 60 vahine faaipoipo tavini, tei fanau mai 28 tamaiti e 60 tamahine. 22 Faatoroa ˈtura ïa Rehoboama ia Abia te tamaiti a Maaka ei upoo e ei aratai i rotopu i to ˈna mau taeae, ua opua hoi oia e faaarii ia ˈna. 23 Tera râ, ua haa oia ma te maramarama e ua tono* vetahi o ta ˈna mau tamaiti i te mau tuhaa fenua atoa o Iuda e o Beniamina, i te mau oire auahia i te patu.+ Ua hopoi oia i te maa e rave rahi na ratou e ua horoa ˈtu e rave rahi vahine faaipoipo na ratou.
12 I muri iti aˈe i te mau-papu-raa te mana arii o Rehoboama+ e i te puairaa mai oia, faarue ihora oia i te Ture a Iehova,+ e ua na reira atoa to Iseraela taatoa. 2 I te pae o te matahiti te faatereraa te arii Rehoboama, haere maira te arii Sisaka+ no Aiphiti e aro ia Ierusalema, ua taiva hoi to Iseraela ia Iehova. 3 E 1 200 pereoo ta ˈna, 60 000 feia faahoro puaahorofenua e te faehau e rave rahi o tei na muri ia ˈna mai Aiphiti mai: to Libia, te mau Suki e to Etiopia.+ 4 Haru aˈera oia i te mau oire auahia o Iuda e tae roa maira oia i Ierusalema.
5 Haere maira Semaia+ te peropheta e farerei ia Rehoboama e te huiarii o Iuda o tei putuputu mai i Ierusalema no Sisaka, e na ô maira oia ia ratou: “Teie ta Iehova e parau ra: ‘Ua faarue outou ia ˈu, no reira vau i tuu atoa ˈi ia outou+ i te rima o Sisaka.’” 6 I reira, faahaehaa ihora te huiarii o Iseraela e te arii ia ratou+ e na ô aˈera: “E parau-tia ta Iehova.” 7 I to Iehova iteraa e ua faahaehaa ratou ia ratou, parau maira Iehova ia Semaia: “Ua faahaehaa ratou ia ratou. Eita vau e haamou ia ratou.+ Maa taime â e e faaora vau ia ratou. Eita vau e manii i to ˈu riri rahi i nia ia Ierusalema na roto i te rima o Sisaka. 8 E riro râ ratou ei tavini na ˈna, ia ite ratou i te taa-ê-raa ia tavini ia ˈu e ia tavini i te mau arii o* te tahi atu mau fenua.”
9 Haere maira ïa te arii Sisaka no Aiphiti e aro ia Ierusalema. Rave ihora oia i te mau taoˈa o te hiero* o Iehova+ e te mau taoˈa o te aorai* o te arii. Ua rave oia pauroa te taihaa, oia atoa te mau paruru auro i hamanihia e Solomona.+ 10 Hamani ihora ïa te arii Rehoboama i te paruru veo ei mono i te reira, e horoa ihora oia i te reira i te mau raatira o te mau tiai,* o tei tiai i te tomoraa o te aorai o te arii. 11 Ia haere mai te arii i te hiero o Iehova, e na muri mai te mau tiai ia ˈna a amo atu ai i te reira, e i muri iho, e faahoˈi ratou i te reira i roto i te piha o te mau tiai. 12 No te mea ua faahaehaa te arii ia ˈna, mǎrû maira to Iehova riri ia ˈna+ e aita ˈtura oia i haamou i te taatoaraa o te oire.+ Hau atu â, e ohipa maitai â tei itehia i Iuda.+
13 Haapapu ihora te arii Rehoboama i to ˈna tiaraa i Ierusalema e tamau noa ˈtura i te faatere. E 41 matahiti to Rehoboama i te riroraa mai oia ei arii, e 17 matahiti to ˈna faatereraa i Ierusalema, te oire ta Iehova i maiti i te tuhaa fenua taatoa o te mau opu o Iseraela ei vahi e tuuhia ˈi to ˈna iˈoa. Te iˈoa o te metua vahine o te arii, o Naama ïa ati Amona.+ 14 Ua rave râ Rehoboama i te mea ino, aita hoi oia i faaoti i roto i to ˈna aau e imi ia Iehova.+
15 Te aamu o Rehoboama, mai te omuaraa e tae atu i te hopea, ua papaihia ïa i roto i te anairaa parau a Semaia+ te peropheta e a Ido+ te taata ite orama, i roto i te mau tapaoraa o te pǎpǎraa tupuna. Ua faatupu noa Rehoboama e Ieroboama i te tamaˈi.+ 16 Taoto ihora Rehoboama i roto i te pohe e to ˈna mau tupuna e hunahia ˈtura oia i te Oire o Davida.+ E riro maira Abia+ ta ˈna tamaiti ei arii ei mono ia ˈna.
13 I te 18 o te matahiti te faatereraa te arii Ieroboama, riro maira Abia ei arii no Iuda.+ 2 E toru matahiti to ˈna faatereraa i Ierusalema. Te iˈoa o to ˈna metua vahine, o Mikaia+ te tamahine a Uriela no Gibea.+ E tamaˈi tei tupu i rotopu ia Abia raua Ieroboama.+
3 Ua haere Abia i te tamaˈi e te hoê nuu e 400 000 aito puai e tei faaineinehia.*+ Ua faanaho Ieroboama i ta ˈna nuu faehau no te aro ia ˈna. E 800 000 tane faaineinehia,* e aito puai anaˈe. 4 Tia aˈera Abia i nia i te mouˈa Zemaraima, i te tuhaa fenua mouˈa o Epheraima, e na ô atura: “A faaroo mai na, e Ieroboama, e to Iseraela taatoa. 5 Aita anei outou i ite e ua horoa Iehova te Atua o Iseraela i te faatereraa arii o Iseraela ia Davida e a muri noa ˈtu,+ ia ˈna e i ta ˈna mau tamaiti,+ na roto i te hoê faufaa o te miti papaa?*+ 6 Tera râ, tia aˈera Ieroboama+ te tamaiti a Nebata, te tavini a Solomona te tamaiti a Davida, e orure hau ihora i to ˈna fatu.+ 7 Apitihia maira oia e te feia aita e ohipa maitai e te haapaoraa ore. Upootia aˈera ratou i nia ia Rehoboama te tamaiti a Solomona. Mea apî â ïa Rehoboama e e mǎtaˈu hanoa oia, e aita i haere ia ˈna ia patoi ia ratou.
8 “E i teie nei, te manaˈo ra outou e haere ia outou ia patoi i te faatereraa arii a Iehova i te rima o te mau tamaiti a Davida, no te mea e nahoa rahi outou e te vai ra ia outou ra na fanauˈa puaatoro auro ta Ieroboama i hamani ei atua no outou.+ 9 Ua tiahi outou i ta Iehova mau tahuˈa,+ te huaai o Aarona, e te ati Levi, e ua faatoroa outou i ta outou iho mau tahuˈa mai te mau nunaa o te tahi atu mau fenua.+ Te taata o tei haere mai e* te hoê puaatoro oni apî e e hitu mamoe oni, e nehenehe ta ˈna e riro ei tahuˈa na te mau mea e ere i te atua. 10 Area matou, o Iehova to matou Atua,+ e aita matou i faarue ia ˈna. Ta matou mau tahuˈa, te huaai o Aarona, te tavini ra ratou ia Iehova, e te apiti ra te ati Levi i roto i taua ohipa ra. 11 Te tutui ra ratou i te tusia taauahi ia Iehova ia au auahi te reira i te mau poipoi e te mau ahiahi atoa,+ oia atoa te mea noˈanoˈa.+ Te apǎpǎ ra ratou i te pane*+ i nia i te amuraa maa auro tamâhia e te tutui ra ratou i te vairaa mori auro+ e to ˈna mau mori i te mau ahiahi atoa,+ no te mea te haapao ra matou i ta matou hopoia ia Iehova to matou Atua. Outou râ, ua faarue outou ia ˈna. 12 E inaha, tei pihai iho te Atua mau ia matou, te aratai ra oia ia matou, e ta ˈna mau tahuˈa e te mau pu tamaˈi ia faaotohia no te aro ia outou. E te mau tane o Iseraela, eiaha e aro ia Iehova te Atua o to outou mau tupuna, eita hoi outou e manuïa.”+
13 Tuu atura râ Ieroboama i te tahi pǔpǔ faehau tamoemoe no te aro i to Iuda na muri mai. Tei mua ïa te rahiraa o ta ˈna nuu i to Iuda e tei muri mai te pǔpǔ tamoemoe ia ratou. 14 I to te mau tane o Iuda fariuraa i muri, inaha, mea na mua e mea na muri mai te aroraa. Pii aˈera ïa ratou ia Iehova+ ia tauturu mai a faaoto puai ai te mau tahuˈa i te pu. 15 Pii ihora te mau tane o Iuda i ta ratou pii aroraa, e i to te mau tane o Iuda piiraa mai tera, haapau ihora te Atua mau ia Ieroboama e to Iseraela taatoa i mua ia Abia e to Iuda. 16 Horo ê aˈera te ati Iseraela i mua i to Iuda, e tuu maira te Atua ia ratou i te rima o Iuda. 17 Mea rahi roa to ratou ta Abia e to ˈna nunaa i taparahi pohe. I rotopu i to Iseraela, e 500 000 tane faaineinehia* tei pohe i te aroraa. 18 Mea na reira te mau tane o Iseraela i te faahaehaaraahia i taua tau ra. Ua upootia râ te mau tane o Iuda no te mea ua tiaturi ratou* ia Iehova te Atua o to ratou mau tupuna.+ 19 Aˈuaˈu noa ˈtura Abia ia Ieroboama e haru maira i te tahi mau oire ia ˈna ra: Betela+ e to ˈna mau oire ati aˈe, Iesana e to ˈna mau oire ati aˈe, e Epheraina+ e to ˈna mau oire ati aˈe. 20 E aita i noaa faahou mai ia Ieroboama to ˈna mana i te tau o Abia. Tairi ihora Iehova ia ˈna e pohe atura oia.+
21 Ua puai noa ˈtu â râ Abia. I muri aˈe, ua rave oia 14 vahine faaipoipo na ˈna+ e fanau aˈera ta ˈna e 22 tamaiti e 16 tamahine. 22 Te toea o te aamu o Abia, ta ˈna mau ohipa e ta ˈna mau parau, ua faatiahia i roto i te mau papai a te peropheta Ido.+
14 Taoto ihora Abia i roto i te pohe e to ˈna ra mau tupuna e hunahia ihora oia i te Oire o Davida.+ E riro maira ta ˈna tamaiti ra o Asa ei arii ei mono ia ˈna. I to ˈna mau mahana, ua ora hau noa to taua fenua ra hoê ahuru matahiti.
2 Ua rave Asa i te mea maitai e te tia i mua ia Iehova to ˈna Atua. 3 Ua tatara oia i te mau fata ěê+ e te mau vahi teitei, ua vavahi i te mau pou haamoriraa+ e ua tâpû i te mau raau haamoriraa.*+ 4 Hau atu â, ua parau oia i to Iuda ia imi ia Iehova te Atua o to ratou mau tupuna e ia haapao i te Ture e te mau faaueraa. 5 Ua tatara ïa oia i te mau vahi teitei e te mau fata mea noˈanoˈa+ i te mau oire atoa o Iuda, e ua vai hau noa te faatereraa arii i raro aˈe i ta ˈna aratairaa. 6 Ua hamani oia i te tahi mau oire auahia i te patu i Iuda,+ ua vai hau noa hoi te fenua e aita oia i arohia mai i taua mau matahiti ra, ua horoa hoi Iehova i te faafaaearaa no ˈna.+ 7 Ua parau oia i to Iuda: “E patu anaˈe i teie mau oire a haaati atu ai i te reira i te aua e te pare,+ te uputa e te auri tarava. Tei ia tatou noa ra te fenua, ua imi hoi tatou ia Iehova to tatou Atua. Ua imi tatou ia ˈna, e ua horoa mai oia i te faafaaearaa ati aˈe.” Manuïa aˈera ïa ta ratou paturaa.+
8 E nuu ta Asa e 300 000 tane no Iuda, e paruru rarahi e e omore ta ratou. E no roto mai ia Beniamina, e 280 000 aito puai o tei amo i te paruru nainai* e tei rave* i te fana.+
9 I muri aˈe, haere maira Zera no Etiopia e aro ia ratou e te hoê nuu 1 000 000 tane e 300 pereoo.+ I te taeraa oia i Mâresa,+ 10 haere atura Asa e aro ia ˈna. Faaineine aˈera ratou no te aro i te peho o Zephata i Mâresa. 11 Taparu aˈera Asa ia Iehova to ˈna Atua:+ “E Iehova, eita oe e tâuˈa mea rahi aore ra mea paruparu te feia ta oe e tauturu ra.+ A tauturu mai na ia matou, e Iehova to matou Atua, te tiaturi nei hoi matou* ia oe,+ e ma to iˈoa matou i haere mai ai i mua i teie nahoa.+ E Iehova, o oe to matou Atua. Eiaha e vaiiho ia upootia te taata i nia ia oe.”+
12 Tairi ihora ïa Iehova i to Etiopia i mua ia Asa e i mua i to Iuda, e horo aˈera to Etiopia.+ 13 Aˈuaˈu atura Asa e te nuu ia ˈna ra ia ratou e tae roa i Gerara.+ Taparahi atura ratou i to Etiopia e pohe noa ˈtu ratou paatoa, na Iehova e ta ˈna nuu hoi ratou i tairi. I muri iho, haru atura ratou i te faufaa e rave rahi. 14 Hau atu â, tairi aˈera ratou i te mau oire atoa ati aˈe ia Gerara, ua mǎtaˈu hoi ratou ia Iehova. Haru atoa aˈera ratou i te faufaa i roto i te mau oire atoa, mea rahi hoi te ohipa e haru i reira. 15 Tairi atoa aˈera ratou i te mau fare ie o te mau tiai animara, haru maira ratou e rave rahi mamoe e te kamela, e hoˈi aˈera ratou i Ierusalema.
15 Ohipa maira te varua o te Atua i nia ia Azaria te tamaiti a Odeda. 2 Haere atura ïa oia e farerei ia Asa e na ô atura ia ˈna: “A faaroo mai na, e Asa, e to Iuda e to Beniamina taatoa! Ei pihai iho Iehova ia outou ia faaea noa outou i pihai iho ia ˈna.+ Ia imi outou ia ˈna, e vaiiho oia ia itehia oia e outou.+ Ia faarue râ outou ia ˈna, e faarue oia ia outou.+ 3 Mea maoro* aita te Atua mau ia Iseraela ra, aita e tahuˈa no te haapii e aita e ture.+ 4 I roto râ i to ratou ati, i to ratou hoˈiraa ˈtu ia Iehova ra te Atua o Iseraela e i to ratou imiraa ia ˈna, ua vaiiho oia ia itehia oia e ratou.+ 5 I taua tau ra, aita e taata e nehenehe e ratere ma te ore e haapeapea,* mea rahi hoi te arepurepuraa i rotopu i te feia no te mau tuhaa fenua atoa. 6 E taahihia te tahi nunaa e te tahi atu nunaa, te tahi oire e te tahi atu oire, na te Atua hoi i na reira, ia huehue noa ratou i te mau huru ati atoa.+ 7 Outou râ, a faaitoito e eiaha e toaruaru,*+ e haamaitaihia hoi ta outou ohipa.”
8 I te faarooraa iho â Asa i tera mau parau e te parau tohu a te peropheta Odeda, itoitohia ihora oia e faaore ihora oia i te mau idolo faufau i te fenua taatoa o Iuda+ e Beniamina e i te mau oire ta ˈna i haru mai i te tuhaa fenua mouˈa o Epheraima, e faatia faahou aˈera oia i te fata a Iehova i mua i te taupee o te fare o Iehova.+ 9 Haaputuputu maira oia i to Iuda e to Beniamina, oia atoa te feia ěê i rotopu ia ratou no Epheraima mai, no Manase e no Simeona,+ ua horo hoi ratou ia ˈna ra mai Iseraela mai i to ratou iteraa e tei pihai iho Iehova to ˈna Atua ia ˈna. 10 Ua haaputuputuhia ïa ratou i Ierusalema i te toru o te avaˈe o te 15 o te matahiti faatereraa a te arii Asa. 11 I tera mahana, ua pûpû ratou i te tusia ia Iehova no roto mai i te faufaa haruhia mai e ratou: 700 puaatoro e 7 000 mamoe. 12 Hau atu â, ua faaau ratou i te hoê faufaa e imi ia Iehova te Atua o to ratou mau tupuna ma to ratou aau e ora* taatoa.+ 13 E haapohehia te taata o te ore e imi ia Iehova te Atua o Iseraela, aita e parauraa mea apî aore ra mea paari, e tane anei aore ra e vahine.+ 14 Horeo aˈera ïa ratou ia Iehova ma te reo puai, te umere, te pu e te pu tara. 15 Oaoa ihora Iuda taatoa i tera horeo, ua horeo hoi ratou ma to ratou aau taatoa, ua imi ratou i te Atua ma te hinaaro mau, e ua vaiiho oia ia itehia oia e ratou.+ E horoa noa ˈtura Iehova i te faafaaearaa no ratou ati aˈe.+
16 Ua faaere atoa te arii Asa ia Maaka+ to ˈna mama ruau i to ˈna tiaraa arii vahine,* no te mea ua hamani oia i te hoê idolo faufau no te haamoriraa o te raau haamoriraa.*+ Ua tâpû Asa i tera idolo faufau, ua tuparari e ua tutui oia i te reira i te peho o Kiderona.+ 17 Aita râ te mau vahi teitei i faaorehia+ i Iseraela.+ Noa ˈtu râ, ua tia te aau o Asa i to ˈna oraraa taatoa.*+ 18 Ua hopoi mai Asa i roto i te hiero* o te Atua mau i te mau mea ta ˈna e ta to ˈna metua tane i faataa no te haamoriraa:* te ario, te auro e te taihaa e rave rau.+ 19 Aita e tamaˈi i tupu e tae roa i te 35 o te matahiti faatereraa a te arii Asa.+
16 I te 36 o te matahiti te faatereraa Asa, haere maira te arii Baasa+ no Iseraela e aa ia Iuda. Haapaari* ihora oia i te oire o Rama+ ia ore te taata ia haere i rapae aore ra ia haere mai i* te arii Asa ra no Iuda.+ 2 Rave ihora ïa Asa i te ario e te auro i roto i te mau piha vairaa taoˈa o te hiero* o Iehova+ e te aorai* o te arii e faatae atura i te reira ia Bene-hada te arii o Suria,+ o te parahi ra i Damaseko a na ô ai: 3 “E parau faaau* ta tâua, e ta to ˈu metua tane e to oe metua tane. Te faatae atu nei au i te ario e te auro na oe. A faaore na i ta oe parau faaau* i te arii Baasa no Iseraela, ia faarue oia i to ˈu fenua.”
4 Faaroo atura Bene-hada i te arii Asa e tono atura i te mau raatira o ta ˈna nuu e aro i te mau oire o Iseraela. Rave aˈera ratou ia Îona,+ Dana,+ Abela-maima e te mau vairaa taoˈa atoa o te mau oire o Naphatali.+ 5 I to Baasa faarooraa i te reira, faaea ihora oia i te haapaari* ia Rama. Ua vaiiho roa oia i ta ˈna ohipa. 6 Rave maira ïa te arii Asa i to Iuda taatoa no te amo i te mau ofai e te mau raau ta Baasa i faaohipa no te paturaa+ i Rama.+ Faaohipa ˈtura oia i te reira no te haapaari* ia Geba+ e ia Mizepa.+
7 I reira to Hanani+ te taata tatara orama haereraa mai i te arii Asa no Iuda e na ôraa mai ia ˈna: “No te mea ua tiaturi oe* i te arii o Suria e aita oe i tiaturi* ia Iehova to Atua, ua ora te nuu a te arii o Suria i to rima.+ 8 E nuu rahi to Etiopia e to Libia, mea rahi pereoo to ratou e te feia faahoro puaahorofenua, e ere anei? No te mea râ ua tiaturi oe ia Iehova, ua tuu oia ia ratou i to rima.+ 9 Te hiˈo haere ra hoi to Iehova mata i te fenua taatoa+ no te faaite i to ˈna puai no* te feia ua tia te aau ia ˈna.+ Ua rave oe i te mea maamaa i roto i teie tupuraa. I teie nei, e û oe i te tamaˈi.”+
10 Tera râ, inoino ihora Asa i te taata tatara orama e tuu atura ia ˈna i roto i te fare tapearaa, no te mea ua riri oia ia ˈna no taua parau ra. E i tera atoa taime, ua haamata Asa i te hamani ino i te taata i rotopu i te nunaa. 11 Te aamu o Asa, mai te omuaraa e tae atu i te hopea, ua papaihia ïa i roto i te Buka o te mau arii o Iuda e o Iseraela.+
12 I te 39 o te matahiti Asa i te faatereraa, roohia ihora oia i te maˈi i nia i to ˈna avae e uˈana roa ˈtura to ˈna maˈi. E i roto i to ˈna maˈi, ua fariu oia, eiaha i nia ia Iehova, i nia râ i te feia rapaau maˈi. 13 Taoto ihora Asa i roto i te pohe e to ˈna mau tupuna.+ Ua pohe oia i te 41 o ta ˈna matahiti faatereraa. 14 Hunahia ihora ïa oia i roto i te menema rahi ta ˈna i pao no ˈna iho i te Oire o Davida.+ Ua faataotohia oia i nia i te hoê roˈi ua maniihia i nia iho te monoˈi zuri e te monoˈi hamanihia i te raau e rave rau.+ Hau atu â, ua tahuhia te hoê tiapai auahi hunaraa no ˈna.*
17 Riro maira ta ˈna tamaiti o Iehosaphata+ ei arii ei mono ia ˈna, e haapapu ihora oia i to ˈna tiaraa i nia ia Iseraela. 2 Tuu ihora oia i te pǔpǔ faehau i te mau oire atoa o Iuda o tei auahia i te patu, e tuu ihora oia i te puhapa faehau i te fenua o Iuda e i te mau oire o Epheraima ta Asa to ˈna metua tane i haru mai.+ 3 Aita Iehova i faarue ia Iehosaphata, ua pee hoi oia i te haerea o to ˈna tupuna ra o Davida+ e aita i imi i te mau Baala. 4 Ua imi hoi oia i te Atua o to ˈna metua tane+ e ua haapao* i ta ˈna faaueraa, aita oia i rave i te mau peu a Iseraela.+ 5 Ua haamau papu Iehova i te faatereraa arii i te rima o Iehosaphata.+ E ua pûpû noa to Iuda taatoa i te ô na Iehosaphata, e ua rahi roa ta ˈna faufaa e to ˈna hanahana.+ 6 Ua rave oia i ta Iehova i faaue ma te itoito rahi,* e ua faaore atoa oia i te mau vahi teitei+ e te mau raau haamoriraa*+ i Iuda.
7 I te toru o te matahiti o ta ˈna faatereraa, faaue ihora oia ia tiihia mai ta ˈna huiarii, o Bene-haila, Obadia, Zekaria, Netanela e Mikaia, no te haapii atu na te mau oire o Iuda. 8 E ati Levi tei na muri ia ratou: Semaia, Netania, Zebadia, Asahela, Semiramota, Iehonatana, Adonia, Tôbia e Toba-adonia, e na tahuˈa o Elisama raua Iehorama.+ 9 Ua rave ratou i te buka o te Ture a Iehova+ ia ratou ra e haapii aˈera i roto ia Iuda. Ua haaati ïa ratou i te mau oire atoa o Iuda no te haapii i te nunaa.
10 E ua mǎtaˈu te mau faatereraa arii atoa o te mau fenua ati aˈe ia Iuda ia Iehova, e aita ratou i aro ia Iehosaphata. 11 E ua hopoi te mau Philiseti i te ô e te moni ia Iehosaphata ra ei ô titauhia. Ua hopoi te mau Arabia na ˈna 7 700 mamoe oni e 7 700 puaaniho oni no roto mai i ta ratou mau nǎnǎ.
12 Ua haere noa Iehosaphata i te puairaa,+ e ua tamau oia i te patu i te mau vahi paruru-maitai-hia+ e te mau oire vairaa taoˈa+ i Iuda. 13 Mea rahi te ohipa ta ˈna i rave i roto i te mau oire o Iuda. E faehau ta ˈna, e aito puai, i Ierusalema. 14 Ua faanahohia ratou ia au i to ratou mau opu fetii. No roto mai ia Iuda, te mau raatira tausani: o Atana te raatira, e na muri ia ˈna e 300 000 aito puai.+ 15 I raro aˈe i ta ˈna aratairaa, o Iehohanana te raatira, e 280 000 tane na muri ia ˈna. 16 O Amasia atoa, te tamaiti a Zikeri, to raro aˈe i ta ˈna aratairaa. O ˈna tei pûpû ia ˈna no te tavini ia Iehova. E 200 000 aito puai tei na muri ia ˈna. 17 No roto mai ia Beniamina,+ o Eliada, te hoê aito puai, e na muri ia ˈna, e 200 000 tane e fana e e paruru ta ratou.+ 18 I raro aˈe i ta ˈna aratairaa, o Iehozabada, e na muri ia ˈna, 180 000 tane tei faaineinehia no te tamaˈi. 19 Ua tavini tera mau faehau i te arii, taa ê atu i te feia ta te arii i tuu i roto i te mau oire auahia i te patu, i te fenua taatoa o Iuda.+
18 Ua rahi roa te faufaa a Iehosaphata e to ˈna hanahana.+ Ua taati râ oia ia Ahaba na roto i te faaipoiporaa.+ 2 Tau matahiti i muri aˈe, pou maira oia ia Ahaba ra i Samaria,+ e pûpû atura Ahaba e rave rahi mamoe e puaatoro ei tusia no ˈna e no te mau taata i pee mai ia ˈna. Onoono atura oia ia ˈna ia haere raua e aro ia Ramota-gileada.+ 3 Na ô atura te arii Ahaba no Iseraela i te arii Iehosaphata no Iuda: “E haere mai anei oe na muri ia ˈu i Ramota-gileada?” Pahono maira oia ia ˈna: “Hoê â vau e oe, e hoê â to ˈu mau taata e to oe mau taata. E aro matou na muri ia oe.”
4 Na ô maira râ Iehosaphata i te arii o Iseraela: “A ui na na mua ia Iehova.”+ 5 Haaputuputu ihora ïa te arii o Iseraela i te mau peropheta, e 400 tane, e na ô atura ia ratou: “Ia haere anei matou e aro ia Ramota-gileada, aore ra eiaha?” Pahono maira ratou: “A haere, e tuu te Atua mau i tera oire i to rima, e te arii e.”
6 Na ô aˈera Iehosaphata: “Aita anei e peropheta ta Iehova i ǒ nei?+ E ui atoa anaˈe i te Atua na roto ia ˈna.”+ 7 Parau atura te arii o Iseraela ia Iehosaphata: “Te vai faahou ra hoê taata+ o te nehenehe e ui ia Iehova no tatou. Mea hae râ na ˈu ia ˈna, eita hoi o ˈna e tohu i te mea maitai no ˈu, e mea ino noa râ.+ O Mikaia te tamaiti a Imela taua taata ra.” Tera râ, na ô maira Iehosaphata: “Eiaha te arii e na reira i te parau.”
8 Pii atura ïa te arii o Iseraela i te tahi tia mana e na ô atura: “A haaviti i te aratai mai ia Mikaia te tamaiti a Imela.”+ 9 Te parahi noa ra te arii o Iseraela e o Iehosaphata te arii o Iuda i nia i to raua terono e to raua ahu arii, tei te vahi tairiiriraa huero maa* raua i te tomoraa o te uputa o Samaria, e te tohu ra te mau peropheta atoa i mua ia raua. 10 Hamani ihora Zedekia te tamaiti a Kenaana i te tara auri no ˈna e na ô ihora: “Teie ta Iehova e parau ra: ‘I teie mau tara, e tui* oe i to Suria e pau noa ˈtu ratou ia oe i te haapohehia.’” 11 Tera atoa ta te taatoaraa o te mau peropheta i tohu ma te parau: “A pauma i Ramota-gileada. E upootia oe.+ E tuu Iehova i tera oire i to rima, e te arii e.”
12 Na ô atura te vea o tei haere e tii ia Mikaia ia ˈna: “A hiˈo na! Mea maitai anaˈe te parau ta te mau peropheta i faaite no te arii. A tohu atoa i te parau mai ta ratou i tohu.+ A faaite i te tahi ohipa maitai.”+ 13 Na ô maira râ Mikaia: “Te horeo nei au i te ora o Iehova, ta to ˈu Atua e parau, tera ta ˈu e faaite.”+ 14 Haere maira oia i te arii ra, e ui atura te arii ia ˈna: “Mikaia, ia haere anei matou e aro ia Ramota-gileada, aore ra eiaha?” Pahono maira oia: “A haere, e upootia oe. E tuuhia ˈtu ratou i to outou rima.” 15 Parau atura ïa te arii ia ˈna: “Ehia taime au e faahoreo ai ia oe ei parau mau anaˈe ta oe e faaite mai ia ˈu i te iˈoa o Iehova?” 16 Na ô maira ïa oia: “Te ite ra vau i te ati Iseraela taatoa ua purara ê i nia i te mau mouˈa, mai te mamoe aita e tiai.+ Parau maira Iehova: ‘Aita to ratou e fatu. Ia hoˈi te taata tataitahi i to ˈna fare ma te hau.’”
17 Na ô atura te arii o Iseraela ia Iehosaphata: “Aita anei au i parau ia oe: ‘Eita o ˈna e tohu i te mea maitai no ˈu, e mea ino anaˈe râ’?”+
18 Na ô maira Mikaia: “A faaroo mai ïa i te parau a Iehova: Ua ite au ia Iehova te parahi ra i nia i to ˈna terono+ e te nuu taatoa o te raˈi+ e tia ra i to ˈna pae atau e to ˈna pae aui.+ 19 Na ô atura Iehova: ‘Na vai e haavarevare i te arii Ahaba no Iseraela ia haere o ˈna i Ramota-gileada a pohe atu ai?’ E te parau ra te tahi melahi i te hoê mea, a parau ai te tahi atu melahi i te hoê mea ê atu. 20 Haere maira te hoê melahi*+ i mua ia Iehova e na ô maira: ‘Na ˈu e haavarevare ia ˈna.’ Ui atura Iehova ia ˈna: ‘E nafea oe?’ 21 Pahono maira oia: ‘E haere au i ǒ e e turai au i ta ˈna mau peropheta atoa ia haavare.’* Na ô atura ïa te Atua: ‘E, e haavarevare oe ia ˈna, e e manuïa atoa oe. A haere e a rave mai ta oe i parau.’ 22 Mea na reira to Iehova turairaa i ta oe mau peropheta atoa ia haavare.*+ Te parau mau râ, ua faaoti Iehova e roohia oe i te ati.”
23 Haere maira Zedekia+ te tamaiti a Kenaana, poara ˈtura+ ia Mikaia+ e na ô atura: “Te parau ra oe ua faarue te varua o Iehova ia ˈu no te paraparau ia oe. Mea nahea oia i te haereraa ˈtu?”+ 24 Pahono maira Mikaia: “E ite oe mea nahea oia i te haereraa ˈtu i te mahana e haere ai oe i roto i te piha moˈemoˈe roa ˈˈe o te hoê fare no te tapuni.” 25 Faaue atura te arii o Iseraela: “A rave ia Mikaia e a tuu atu ia ˈna ia Amôna ra te raatira o te oire e ia Ioasa ra te tamaiti a te arii. 26 A parau ia raua: ‘Teie ta te arii e faaue ra: “A tuu i teie taata i roto i te fare tapearaa+ e a horoa ˈtu i te hoê faito maa e pape o tei faaitihia e ia hoˈi roa mai au ma te hau.”’” 27 Na ô maira râ Mikaia: “Ia hoˈi mai oe ma te hau, aita ïa Iehova i paraparau ia ˈu.”+ Na ô faahou aˈera oia: “A haamanaˈo i teie parau, outou paatoa.”
28 Haere aˈera ïa te arii o Iseraela e o Iehosaphata te arii o Iuda i Ramota-gileada.+ 29 Na ô atura te arii o Iseraela ia Iehosaphata: “E taui au i to ˈu ahu ia ore au ia itehia mai, a haere atu ai i te aroraa, e oomo mai râ oe i to oe ahu arii.” Taui ihora ïa te arii o Iseraela i to ˈna ahu e haere atura raua i te aroraa. 30 Ua faaue râ te arii o Suria i ta ˈna mau raatira pereoo: “Eiaha e aro i te mau faehau e te mau raatira. O te arii o Iseraela anaˈe râ ta outou e aro.” 31 I te iteraa iho â te mau raatira pereoo ia Iehosaphata, manaˈo aˈera ratou e o te arii o Iseraela tera. Tapapa ˈtura ratou ia ˈna no te aro ia ˈna. Pii ihora Iehosaphata ia tauturu ia ˈna+ e tauturu maira Iehova ia ˈna. Ua faafariu ê te Atua ia ratou ia ˈna. 32 I to te mau raatira pereoo iteraa e e ere te arii o Iseraela tera, faaea ihora ratou i te aˈuaˈu ia ˈna.
33 Teˈa haere ihora râ te hoê faehau i ta ˈna fana. Puta ihora te arii o Iseraela ia ˈna i ropu i te mau puoiraa o to ˈna ahu paruru. Na ô atura ïa te arii i to ˈna taata faahoro pereoo: “A taviri, a faaatea ia ˈu i te tahua aroraa,* ua pepe maitai au.”+ 34 Uˈana roa ˈtura te aroraa i taua mahana ra, e ua titauhia ia faatia te mau faehau i te arii o Iseraela i roto i te pereoo i mua i to Suria e ahiahi noa ˈtu. Pohe atura te arii i te toparaa mahana.+
19 Hoˈi atura te arii Iehosaphata no Iuda ma te hau+ i to ˈna aorai* i Ierusalema. 2 Haere maira Iehu+ te tamaiti a Hanani+ te taata ite orama e farerei ia ˈna e na ô maira: “O te taata ino anei ta oe e tauturu?+ E o te feia anei mea hae na ratou ia Iehova ta oe e here?+ No reira Iehova i riri ai ia oe. 3 Tera râ, e mau mea maitai tei itehia i roto ia oe,+ no te mea ua faaore oe i te mau raau haamoriraa* i teie fenua e ua faaineine oe i to aau no te* imi i te Atua mau.”+
4 Ora noa ˈtura Iehosaphata i Ierusalema, e haere faahou atura oia e farerei i te nunaa mai Beere-seba tae atu i te tuhaa fenua mouˈa o Epheraima,+ no te faahoˈi mai ia ratou ia Iehova ra te Atua o to ratou mau tupuna.+ 5 Faatoroa atoa ˈtura oia i te haava na taua fenua ra, i te mau oire atoa o Iuda o tei auahia i te patu, i tera e tera oire.+ 6 Na ô atura oia i te mau haava: “A haapao maitai i ta outou e rave, aita hoi outou e haava ra no te taata, no Iehova râ, e tei pihai iho oia ia outou ia haava outou.+ 7 I teie nei, ia vai te mǎtaˈu ia Iehova i nia ia outou.+ A ara i ta outou e rave, aita hoi e parau-tia ore+ ia Iehova to tatou Atua, aita e maitiitiraa i te taata,+ aita e petaraa.”+
8 I Ierusalema atoa, faatoroa ˈtura Iehosaphata vetahi ati Levi, te tahi mau tahuˈa e te tahi mau upoo o te mau utuafare o Iseraela ia haava ratou no Iehova e ia faaafaro ratou i te fifi o te feia no Ierusalema.+ 9 Faaue atura oia ia ratou: “Teie ta outou e rave ma te mǎtaˈu ia Iehova, ma te haapao maitai e te aau taatoa: 10 Ia hopoi mai to outou mau taeae e parahi ra i te tahi atu mau oire i te tahi ohipa ia haava outou, no nia i te haamaniiraa i te toto,+ aore ra te tahi uiraa no nia i te hoê ture, te hoê faaueraa, te mau faatureraa aore ra haavaraa, e faaara outou ia ratou ia ore ratou ia hara i mua ia Iehova. Aita anaˈe, e tupu to ˈna riri ia outou e to outou mau taeae. Tera ta outou e rave, ia ore outou ia hara. 11 Teie o Amaria te tahuˈa tiaau i nia ia outou no te mau ohipa atoa a Iehova.+ O Zebadia te tamaiti a Isemaela te aratai o te opu o Iuda no te mau ohipa atoa a te arii. E e ohipa te ati Levi ei tavini apiti na outou. Ia itoito outou e a ohipa, e ei pihai iho Iehova i te feia e rave i te mea maitai.”+
20 I muri aˈe, haere maira te ati Moabi+ e te ati Amona+ e vetahi o te mau Amonima* e aro ia Iehosaphata. 2 Faaitehia ihora ïa ia Iehosaphata: “E nahoa rahi te haere mai ra e aro ia oe mai te fenua mai o te miti,* mai Edoma mai,+ e tei Hazazona-tamara ratou, oia hoi i Ene-gedi.”+ 3 Mǎtaˈu ihora ïa Iehosaphata, e faaoti ihora* e imi ia Iehova.+ Faaite haere ihora ïa oia i te hoê haapaeraa maa no Iuda taatoa. 4 Haaputuputu aˈera te nunaa o Iuda no te ui ia Iehova.+ Ua haere mai ratou mai te mau oire atoa o Iuda no te ui ia Iehova.
5 Tia aˈera Iehosaphata i mua i te amuiraa o Iuda e o Ierusalema i roto i te hiero* o Iehova i mua i te aua apî, 6 e na ô atura:
“E Iehova te Atua o to matou mau tupuna, o oe anaˈe te Atua i nia i te raˈi.+ Aita anei to oe e mana i nia i te mau nunaa atoa?+ Tei roto i to rima te mana e te puai, e aita e taata e nehenehe e aa ia oe.+ 7 E to matou Atua, aita anei oe i tiahi i te feia o teie fenua i mua i to nunaa o Iseraela, a horoa ˈtu ai i te reira ei faufaa vai maoro na te huaai o to oe hoa ra o Aberahama?+ 8 Ua parahi ratou i reira, e ua patu ratou no oe i te hoê nao* no to iˈoa,+ ma te parau: 9 ‘Ia tae mai te ati i nia ia matou, te ˈoˈe anei, te utua, te maˈi pee aore ra te oˈe, e tia matou i mua i teie fare e i mua ia oe (tei roto hoi to iˈoa i teie fare).+ I roto i to matou ati, e tiaoro matou ia oe ia tauturu mai. A faaroo mai e a faaora ia matou.’+ 10 I teie nei, teie te mau tane ati Amona, to Moabi e to te tuhaa fenua mouˈa o Seira,+ no ratou te fenua ta oe i ore i faatia ia Iseraela ia rave i to ratou haereraa mai i rapae i Aiphiti. Ua fariu ê Iseraela ia ratou e aita i haamou ia ratou.+ 11 I teie nei, te tahoo ra ratou ia matou te maitai i te ino ma te haere mai e tiahi ia matou i to oe fenua ta oe i horoa no matou ei tuhaa tutuuhia.+ 12 E to matou Atua, eita anei oe e faautua ia ratou?+ E ere hoi matou i te mea puai i mua i teie nahoa rahi o te haere mai ra e aro ia matou. E aita matou i ite eaha te rave,+ tei nia râ to matou mata ia oe.”+
13 I taua atoa ra taime, te tia noa ra to Iuda taatoa i mua ia Iehova, e ta ratou mau vahine faaipoipo e ta ratou mau tamarii,* oia atoa te mea nainai.
14 E i ropu i te amuiraa, ohipa maira te varua o Iehova i nia ia Iahaziela te tamaiti a Zekaria te tamaiti a Benaia te tamaiti a Ieiela te tamaiti a Matania ati Levi no roto mai i te mau tamaiti a Asapha. 15 Na ô maira Iahaziela: “A faaroo mai, e to Iuda taatoa, e outou, feia no Ierusalema, e te arii Iehosaphata! Teie ta Iehova e parau ra ia outou: ‘Eiaha e mǎtaˈu e eiaha e riaria i teie nahoa rahi, no te mea e ere na outou te aroraa, na te Atua râ.+ 16 Ananahi, a haere e farerei ia ratou. E pauma ratou na te eˈa o Zîza, e e ite outou ia ratou i te hopearaa o te peho i pihai iho i te medebara o Ieruela. 17 Eita outou e aro i roto i teie tamaˈi. A tia noa mai i reira, eiaha e hautiuti+ e a hiˈo e nafea Iehova e faaora ˈi ia outou.+ E Iuda, e Ierusalema, eiaha e mǎtaˈu e eiaha e riaria.+ Ananahi a haere e farerei ia ratou, e ei pihai iho Iehova ia outou.’”+
18 Tipapa ihora Iehosaphata to ˈna hohoˈa i raro i te repo, e tipapa ihora to Iuda taatoa e te feia no Ierusalema i mua ia Iehova no te haamori ia Iehova. 19 Tia aˈera te ati Levi huaai o Kohata+ e o Kora, no te arue ia Iehova te Atua o Iseraela ma te reo puai mau.+
20 Poipoi aˈe, tia oioi aˈera ratou e haere aˈera i te medebara o Tekoa.+ A haere ai ratou, tia aˈera Iehosaphata e na ô atura: “A faaroo mai ia ˈu, e Iuda, e te feia no Ierusalema! A faatupu i te faaroo ia Iehova to outou Atua, e mau papu* ïa outou. A faatupu i te faaroo i ta ˈna mau peropheta,+ e maitai noa ïa outou.”
21 I muri aˈe i to ˈna paraparauraa i te nunaa, maiti atura oia i te tahi mau tane o te haere na mua i te mau tane e mauhaa ta ratou, e ma te ahu moˈa, e himene+ e e arue ratou ia Iehova ma te parau: “A haamauruuru ia Iehova, e vai â hoi to ˈna here taiva ore e a muri noa ˈtu.”+
22 I to ratou haamataraa i te himene i te arueraa ma te oaoa, faaineine ihora Iehova i te hoê aroraa pata huna i te mau tane ati Amona, to Moabi e to te tuhaa fenua mouˈa o Seira o tei haere mai i Iuda, e taparahi pohe ihora ratou ia ratou iho.+ 23 Ua fariu te ati Amona e to Moabi i nia i to te tuhaa fenua mouˈa o Seira+ no te taparahi e no te haapohe ia ratou. I te poheraa pauroa to Seira ia ratou, haapohe ihora ratou te tahi i te tahi.+
24 I te taeraa mai râ to Iuda i te pare tiairaa o te medebara,+ hiˈo aˈera ratou i te nahoa e ite aˈera i to ratou mau tino na raro,+ aita hoê i ora mai. 25 Haere maira ïa Iehosaphata e to ˈna nunaa e rave mai i ta ratou mau taoˈa. Mea rahi roa te taoˈa tei itehia mai i rotopu ia ratou, e te ahu e te mau mea moni rahi, o ta to Iuda i rave mai no ratou e aita te reira i maraa pauroa mai ia ratou.+ No te rahi o te taoˈa, e toru mahana tei titauhia no te ohi pauroa mai i te reira. 26 I te maha o te mahana, haaputuputu maira ratou i te peho o Beraka, e i reira ratou i te arueraa* ia Iehova. No reira tera vahi i parauhia ˈi te peho o Beraka*+ e tae roa mai i teie mahana.
27 Hoˈi maira to Iuda e to Ierusalema taatoa i Ierusalema ma te oaoa, o Iehosaphata to mua ia ratou. Ua horoa hoi Iehova i te upootiaraa ia ratou i nia i to ratou mau enemi.+ 28 Tomo maira ïa ratou i te oire o Ierusalema e te upaupa taura, te kinura+ e te pu,+ e haere aˈera ratou i te hiero o Iehova.+ 29 Roohia ihora to te mau faatereraa arii atoa o te mau fenua ê i te mǎtaˈu i te Atua i to ratou faarooraa e ua aro Iehova i te mau enemi o Iseraela.+ 30 Faaea hau noa ˈtura ïa te faatereraa arii a Iehosaphata e tamau noa ˈtura to ˈna Atua i te horoa i te faafaaearaa no ˈna, ati noa ˈˈe.+
31 Faatere noa ˈtura Iehosaphata ia Iuda. E 35 matahiti to ˈna i te riroraa mai oia ei arii, e e 25 matahiti to ˈna faatereraa i Ierusalema. O Azuba te iˈoa o to ˈna metua vahine, e tamahine na Silehi.+ 32 Ua pee noa oia i te hiˈoraa o to ˈna metua tane ra o Asa,+ aita oia i fariu ê atu. Ua rave oia i te mea maitai i te aro o Iehova.+ 33 Aita râ te mau vahi teitei i faaorehia,+ e aita â te nunaa i faaineine atura i to ratou aau no te imi i te Atua o to ratou mau tupuna.+
34 Te toea o te aamu o Iehosaphata, mai te omuaraa e tae atu i te hopea, ua faatiahia ïa i roto i te mau papai a Iehu+ te tamaiti a Hanani,+ o tei anaihia i roto i te Buka o te mau arii o Iseraela. 35 I muri aˈe, faaau atura te arii Iehosaphata no Iuda i te tahi faufaa i te arii Ahazia no Iseraela, o tei rave i te ohipa ino.+ 36 Amui aˈera ïa raua no te hamani i te pahi no te haere i Taresisa.+ I Eziona-gebera+ raua i te hamaniraa i tera mau pahi. 37 Tera râ, tohu ihora Eliezera te tamaiti a Dodava no Maresa ia Iehosaphata: “No te mea ua faaau oe i te faufaa ia Ahazia, e haamou Iehova i ta oe ohipa.”+ Parari atura ïa te mau pahi,+ e aita i tae i Taresisa.
21 Taoto atura Iehosaphata i roto i te pohe e to ˈna ra mau tupuna e hunahia ˈtura oia i pihai iho i to ˈna mau tupuna i te Oire o Davida. Riro maira ta ˈna tamaiti o Iehorama ei arii ei mono ia ˈna.+ 2 To ˈna mau taeae, ta Iehosaphata mau tamaiti, o Azaria, Iehiela, Zekaria, Azaria, Mihaela e Sephatia. E tamaiti anaˈe tera na te arii Iehosaphata no Iseraela. 3 Ua horoa to ratou metua tane e rave rahi ô ario e auro na ratou, e te taoˈa moni rahi, e te tahi mau oire auahia i te patu i Iuda.+ Ua horoa râ oia i te faatereraa arii ia Iehorama,+ o ˈna hoi te matahiapo.
4 I te riroraa mai ia Iehorama te mana i nia i te faatereraa arii a to ˈna metua tane, haapapu ihora oia i to ˈna tiaraa ma te haapohe i to ˈna mau taeae atoa+ i te ˈoˈe, oia atoa vetahi o te huiarii o Iseraela. 5 E 32 matahiti to Iehorama i to ˈna riroraa mai ei arii, e e vaˈu matahiti to ˈna faatereraa i Ierusalema.+ 6 Ua pee oia i te eˈa o te mau arii o Iseraela,+ mai te feia o te utuafare o Ahaba, ua faaipoipo hoi oia i te tamahine a Ahaba.+ Ua rave oia i te mea ino i mua ia Iehova. 7 No te faufaa râ ta Iehova i faaau e o Davida, aita oia i hinaaro e haamou i te utuafare o Davida.+ Ua fafau hoi oia i te horoa i te hoê mori* no ˈna e no ta ˈna mau tamaiti e a muri noa ˈtu.+
8 I te tau o Iehorama, orure hau ihora Edoma ia Iuda+ e haamau ihora i te hoê arii no ratou.+ 9 Haere atura ïa Iehorama e to ˈna mau raatira i Edoma e to ˈna mau pereoo atoa. Tia aˈera râ oia i te po e tairi ihora i te ati Edoma o tei haaati ia ˈna e to ˈna mau raatira pereoo. 10 Ua orure hau noa râ Edoma ia Iuda e tae roa mai i teie mahana. Ua orure hau atoa Libena+ ia Iehorama i taua tau ra, no te mea ua faarue oia ia Iehova te Atua o to ˈna mau tupuna.+ 11 Ua hamani atoa oia i te vahi teitei+ i nia i te mau mouˈa o Iuda ia taiata to Ierusalema i te pae varua, e ua aratai ê oia ia Iuda i te Atua.
12 Tae maira te hoê poroi papaihia ia ˈna ra no ǒ mai ia Elia+ ra te peropheta e na ô ra: “Teie ta Iehova te Atua o Davida to tupuna e parau ra: ‘Aita oe i pee i te hiˈoraa o to metua tane ra o Iehosaphata+ e te hiˈoraa o te arii Asa+ no Iuda. 13 Te pee nei râ oe i te hiˈoraa o te mau arii o Iseraela+ e te turai ra oe i to Iuda e te feia no Ierusalema ia taiata i te pae varua+ mai te taiata a te utuafare o Ahaba.+ Ua tae roa atoa oe i te taparahi i to oe iho mau taeae,+ te mau tamaiti a to metua tane, o tei hau aˈe ia oe i te maitai. 14 No reira, e ati rahi ta Iehova e hopoi mai ra i nia i to nunaa, ta oe mau tamaiti, ta oe mau vahine faaipoipo e pauroa ta oe faufaa. 15 E e roohia oe i te maˈi e rave rahi, e te hoê maˈi i roto i to oe opu e e purehu roa mai to oe aau i rapae no taua maˈi ra, i te mau mahana atoa.’”
16 I muri iho, turai ihora Iehova+ i* te mau Philiseti+ e te mau Arabia+ e parahi ra i pihai iho i to Etiopia, ia aro ia Iehorama. 17 Haere maira ïa ratou i Iuda, ua tomo ratou i taua fenua ra, e hopoi ê aˈera i te mau taoˈa atoa i itehia mai i te aorai* o te arii.+ Ua hopoi ê atoa ratou i ta ˈna mau tamaiti e ta ˈna mau vahine faaipoipo. O Iehoahaza*+ anaˈe te tamaiti tei toe mai, o ta ˈna tamaiti hopea. 18 I muri aˈe i teie mau mea atoa, tairi ihora Iehova ia ˈna i te hoê maˈi ora ore i roto i to ˈna opu.*+ 19 I muri aˈe, i te mairiraa e piti matahiti, purehu ihora to ˈna aau i rapae no to ˈna maˈi, e pohe ihora oia i roto i te mauiui rahi o to ˈna maˈi. Aita to ˈna nunaa i tutui no ˈna mai i te auahi tutuihia no to ˈna mau tupuna.+ 20 E 32 matahiti to ˈna i te ariiraa mai oia, e e vaˈu matahiti oia i te ariiraa i Ierusalema. Aita e taata i oto i to ˈna poheraa. Hunahia ihora oia i te Oire o Davida,+ eiaha râ i roto i te vahi hunaraa o te mau arii.+
22 Faaarii aˈera to Ierusalema i ta ˈna tamaiti hopea ra o Ahazia ei mono ia ˈna, ua haapohe hoi te pǔpǔ eiâ o tei haere mai e te mau Arabia i te puhapa, i te taatoaraa o te mau tamaiti paari aˈe.+ Haamata ihora ïa Ahazia te tamaiti a Iehorama i te faatere ei arii no Iuda.+ 2 E 22 matahiti to Ahazia i to ˈna riroraa mai ei arii, e hoê matahiti to ˈna faatereraa i Ierusalema. O Atalia+ te iˈoa o to ˈna metua vahine, e mootua* na Omeri.+
3 Ua pee atoa oia i te haerea o te utuafare o Ahaba,+ ua turai hoi te mau aˈoraa a to ˈna metua vahine ia ˈna ia rave i te ohipa ino. 4 Ua rave oia i te mea ino i mua ia Iehova, mai te utuafare o Ahaba, ua riro hoi tera mau taata ei aˈo no ˈna i muri aˈe i te poheraa o to ˈna metua tane, e ua aratai ratou ia ˈna i to ˈna ati. 5 Ua pee oia i ta ratou aˈoraa e ua haere na muri ia Iehorama te tamaiti a te arii Ahaba no Iseraela e aro i te arii Hazaela+ no Suria i Ramota-gileada,+ i reira to Iehorama peperaa i te feia teˈa. 6 Hoˈi ihora Iehorama i Iezereela+ no te rapaau i to ˈna mau pepe i to ˈna aroraa i te arii Hazaela no Suria+ i Rama.
Haere ihora te arii Ahazia* no Iuda, te tamaiti a Iehorama,+ i Iezereela e hiˈo ia Iehorama+ te tamaiti a Ahaba, no te mea ua pepe oia.*+ 7 Faatae maira râ te Atua i te pohe i nia ia Ahazia i to ˈna haereraa mai ia Iehorama ra. I to ˈna taeraa ˈtu i ǒ, haere aˈera raua Iehorama e farerei ia Iehu+ te mootua* a Nimesi, ta Iehova i faatavai no te haamou* i te utuafare o Ahaba.+ 8 I to Iehu faataeraa i te utua i nia i te utuafare o Ahaba, farerei maira oia i te huiarii o Iuda e te mau tamaiti a te mau taeae o Ahazia, te mau tavini a Ahazia, e haapohe ihora oia ia ratou.+ 9 Imi ihora oia ia Ahazia. Haruhia maira oia i Samaria, i reira oia i te tapuniraa. Afaihia ihora oia ia Iehu ra, haapohehia ihora oia e hunahia ˈtura oia,+ teie hoi tei parauhia: “E mootua o ˈna na Iehosaphata, tei imi ia Iehova ma to ˈna aau taatoa.”+ Aita e taata no te utuafare o Ahazia e mana to ˈna no te faatere.
10 I to Atalia,+ te metua vahine o Ahazia, iteraa e ua pohe ta ˈna tamaiti, faaue ihora oia ia haapohehia pauroa te huaai o te arii o te utuafare o Iuda.+ 11 Tera râ, rave huna ihora Iehosabeata te tamahine a te arii ia Iehoasa+ te tamaiti a Ahazia. Tei rotopu oia i te tahi atu mau tamaiti a te arii o te haapohehia. Ua faatapuni Iehoseba ia Iehoasa e te vahine tei hii ia ˈna i roto i te hoê piha. E tamahine Iehosabeata na te arii Iehorama.+ E vahine faaipoipo oia na Iehoiada+ te tahuˈa e e tuahine no Ahazia. Ua haere ia ˈna ia faatapuni ia Iehoasa. Aita ïa i haere ia Atalia ia haapohe ia Iehoasa.+ 12 Tapuni noa ˈtura oia ia ratou ra i roto i te hiero* o te Atua mau e ono matahiti, a faatere ai Atalia i taua fenua ra.
23 I te hitu o te matahiti, haa ihora Iehoiada ma te itoito e faaau ihora i te hoê faufaa i te mau raatira hanere,+ oia hoi o Azaria te tamaiti a Ierohama, Isemaela te tamaiti a Iehohanana, Azaria te tamaiti a Obeda, Maaseia te tamaiti a Adaia e Elisaphata te tamaiti a Zikeri. 2 Haere aˈera ratou na roto ia Iuda e haaputuputu aˈera i te ati Levi+ no te mau oire atoa o Iuda e te mau upoo o te mau utuafare o Iseraela. I to ratou taeraa mai i Ierusalema, 3 faaau ihora te amuiraa taatoa i te hoê faufaa+ i te arii i roto i te hiero* o te Atua mau e na ô maira Iehoiada ia ratou:
“Inaha, e faatere te tamaiti a te arii, mai ta Iehova i fafau no nia i te mau tamaiti a Davida.+ 4 Teie ta outou e rave: i rotopu i te mau tahuˈa e te ati Levi o te ohipa+ i te Sabati, e ohipa hoê tuhaa ei tiai uputa.+ 5 Ei te aorai* o te arii+ te tahi tuhaa, ei te Uputa o te niu te toru o te tuhaa, e ei roto i te mau aua o te fare o Iehova+ te nunaa taatoa. 6 Eiaha e vaiiho i te taata ia tomo i roto i te fare o Iehova maori râ te mau tahuˈa e te ati Levi o te rave i ta ratou ohipa.+ E nehenehe ratou e tomo mai no te mea e pǔpǔ moˈa ratou, e e haapao te nunaa taatoa i tei faauehia ia ratou i mua ia Iehova. 7 E haaati te ati Levi i te arii na te mau pae atoa, te taata tataitahi e ta ˈna mau mauhaa i te rima. E haapohe outou i te taata atoa o te tomo i roto i te fare. Ei pihai iho outou i te arii i te mau vahi atoa ta ˈna e haere.”*
8 Ua rave te ati Levi e to Iuda taatoa mai ta Iehoiada te tahuˈa i faaue. Ua rave te taata tataitahi i ta ˈna pue taata o tei titauhia no te ohipa i te Sabati, oia atoa i tei ore i titauhia no te ohipa i te Sabati,+ aita hoi Iehoiada te tahuˈa i faatia ia faaea te mau pǔpǔ+ i ta ratou ohipa. 9 Horoa ˈtura Iehoiada te tahuˈa i te mau raatira hanere ra+ i te mau omore, te mau paruru nainai* e te mau paruru menemene a te arii Davida,+ no roto mai i te hiero o te Atua mau.+ 10 Tuu atura oia ia ratou paatoa i ta ratou tuhaa ohipa, te taata tataitahi e ta ˈna mauhaa i te rima, mai te pae atau o te hiero e tae atu i te pae aui o te hiero, i pihai iho i te fata e i pihai iho i te hiero, ati aˈe i te arii. 11 Aratai maira ratou i te tamaiti a te arii+ i rapae e tuu atura i te hei upoo e te Haamanaˈoraa*+ i nia ia ˈna. Faaarii ihora ïa ratou ia ˈna. Faatavai ihora Iehoiada e ta ˈna mau tamaiti ia ˈna. Tuô atura ratou: “Ia ora te arii!”+
12 I to Atalia faarooraa i te taata te horo ra e te arue ra i te arii, haavitiviti ihora oia i te haere mai e apiti i te nahoa i te hiero o Iehova.+ 13 Ite atura oia i te arii e tia ra i pihai iho i ta ˈna pou i te tomoraa. Tei pihai iho te huiarii+ e te feia faaoto i te pu i te arii. Te oaoa ra te nunaa taatoa o taua fenua ra+ e te faaoto ra i te pu. Te aratai ra te feia himene i te mau himene arueraa e ta ratou mau mauhaa upaupa. I reira, hahae ihora Atalia i to ˈna ahu e tuô aˈera: “Orure hau! Orure hau!” 14 Faahaere ihora râ Iehoiada te tahuˈa i te mau raatira hanere i rapae, te feia i tuuhia i nia i te nuu, e na ô atura ia ratou: “A aratai ia ˈna i rapaeau i te mau anairaa faehau. Ia pee hoê ia ˈna, a haapohe atu i te ˈoˈe!” Ua parau hoi te tahuˈa eiaha e haapohe ia ˈna i roto i te hiero o Iehova. 15 Haru aˈera ïa ratou ia ˈna e afai aˈera i te tomoraa o te Uputa o te puaahorofenua, i te aorai* o te arii. I reira, haapohe atura ratou ia ˈna.
16 Faaau ihora Iehoiada i te hoê faufaa i rotopu ia ˈna, te nunaa taatoa e te arii, oia hoi ei nunaa noa ratou no Iehova.+ 17 I muri aˈe, haere maira te nunaa taatoa i te hiero o Baala e vavahi atura i te reira.+ Faaore atura ratou i ta ˈna mau fata e to ˈna mau tii.+ Haapohe atura ratou ia Matatana te tahuˈa a Baala+ i mua i te mau fata. 18 I muri iho, tuu atura Iehoiada i te tiaauraa o te hiero o Iehova i te rima o te mau tahuˈa e te ati Levi, o ta Davida i faatoroa ei pǔpǔ i te hiero o Iehova no te pûpû i te mau tusia taauahi a Iehova+ ia au i tei papaihia i roto i te Ture a Mose,+ ma te umere e te himene, mai ta Davida i faaue.* 19 Ua tuu atoa oia i te mau tiai uputa+ i te mau uputa o te hiero o Iehova, ia ore te hoê taata viivii ia tomo mai. 20 Rave atura oia i te mau raatira hanere,+ te huimana, te mau faatere o te nunaa e te taata atoa o taua fenua ra e aratai atura i te arii mai te hiero o Iehova i te aorai o te arii. Ua haere ratou na te uputa i nia. I to ratou taeraa ˈtu, haaparahi ihora ratou i te arii i nia i te terono+ o te faatereraa arii.+ 21 Ua oaoa roa ïa te taata atoa o taua fenua ra e vai hau noa ˈtura te oire no te mea ua haapohehia Atalia.*
24 E hitu matahiti to Iehoasa i to ˈna riroraa mai ei arii,+ e e 40 matahiti to ˈna faatereraa i Ierusalema. Te iˈoa o to ˈna metua vahine, o Zibia ïa no Beere-seba.+ 2 Ua rave Iehoasa i te mea maitai i mua ia Iehova i te mau mahana atoa o Iehoiada te tahuˈa.+ 3 Maiti ihora Iehoiada e piti vahine faaipoipo na ˈna, e fanau maira ta ˈna e tamaiti e e tamahine.
4 I muri aˈe, hinaaro ihora Iehoasa e tataî i te hiero* o Iehova.+ 5 Haaputuputu maira ïa oia i te mau tahuˈa e te ati Levi e na ô maira ia ratou: “A haere na te mau oire o Iuda e a rave mai i te moni ia Iseraela taatoa ra no te tataî i te fare o to outou Atua+ i te mau matahiti atoa. E haavitiviti outou i te rave i tera ohipa.” Aita râ te ati Levi i rave haavitiviti i te reira.+ 6 Titau atura ïa te arii ia Iehoiada te tahuˈa tiaau e na ô atura ia ˈna:+ “Eaha oe i ore ai i titau i te ati Levi ia afai mai i te tute moˈa a to Iuda e to Ierusalema, tei faauehia e Mose+ te tavini a Iehova, te tute moˈa a te amuiraa o Iseraela, no te tiahapa o te Haamanaˈoraa?+ 7 Ua tomo mai hoi te mau tamaiti a Atalia,+ taua vahine ino ra, i roto i te fare o te Atua mau+ e ua faaohipa ratou i te mau taihaa moˈa o te fare o Iehova no te haamoriraa o te mau Baala.” 8 Na nia i te faaueraa a te arii, hamanihia ihora hoê afata+ e tuuhia ˈtura te reira i te uputa o te hiero o Iehova, i rapae.+ 9 I muri aˈe i te reira, faaite-haere-hia ihora te hoê poroi na roto ia Iuda e Ierusalema ia hopoihia mai ia Iehova ra te tute moˈa+ ta Mose te tavini a te Atua mau i titau na ia Iseraela i te medebara. 10 Oaoa ihora te huiarii e te nunaa taatoa.+ Hopoi maira ratou i te ô, tuu ihora i roto i te afata e î roa ˈtu te afata.*
11 Ia afai mai te ati Levi i te afata ia tuuhia ˈtu te reira i te arii ra e ia ite ratou e mea rahi te moni i roto, e haere mai te papai parau a te arii e te tavini a te tahuˈa tiaau e huri i te moni i rapae,+ e i muri iho, e faahoˈi raua i te afata i to ˈna vairaa. Tera ta ratou i rave i te mau mahana atoa, e mea rahi te moni ta ratou i ohi mai. 12 I muri iho, e horoa te arii raua Iehoiada i te reira i te feia e tiaau ra i te ohipa i te hiero o Iehova, e e tihepu mai ratou i te feia tarai ofai e te feia rimaî no te faaapî i te hiero o Iehova,+ oia atoa te rave ohipa i nia i te auri e te veo no te tataî i te hiero o Iehova. 13 Haamata ihora tei tiaau i te ohipa i taua ohipa ra e nuu atura te tataîraa i raro aˈe i ta ratou tiaauraa. Riro faahou maira te hiero o te Atua mau mai te omuaraa e haapaari faahou aˈera ratou i te reira. 14 E i te faaotiraa iho â ratou, hopoi maira ratou i te moni i toe mai i te arii e ia Iehoiada ra. Ravehia ˈtura te reira no te hamani i te taihaa no te hiero o Iehova: taihaa no te taviniraa e no te pûpû i te ô, te auˈa e te taihaa auro e ario.+ E e pûpû tamau ratou i te tusia taauahi+ i te hiero o Iehova, i te mau mahana atoa o Iehoiada.
15 I muri aˈe i te hoê oraraa roa e te oaoa, pohe atura Iehoiada. E 130 matahiti to ˈna i te poheraa. 16 Hunahia ihora oia i te Oire o Davida i pihai iho i te mau arii+ no te mau mea maitai atoa ta ˈna i rave no Iseraela,+ no te Atua mau e no to ˈna hiero.
17 I muri aˈe i te poheraa o Iehoiada, haere maira te huiarii o Iuda e tipapa i mua i te arii, e faaroo ihora te arii ia ratou. 18 Faarue aˈera ratou i te hiero o Iehova te Atua o to ratou mau tupuna e haamata aˈera i te haamori i te mau raau haamoriraa* e te mau idolo. No reira te Atua i riri ai ia Iuda e ia Ierusalema, no ta ratou hara. 19 Faatae noa ˈtura oia i te peropheta ia ratou ra no te faahoˈi mai ia ratou ia Iehova ra. Ua faaara noa tera mau peropheta ia ratou, aita râ ratou i hinaaro e faaroo.+
20 Ohipa maira te varua o te Atua i nia ia Zekaria te tamaiti a Iehoiada+ te tahuˈa. Tia aˈera oia i te hoê vahi teitei i mua i te nunaa e na ô maira ia ratou: “Teie ta te Atua mau e parau ra: ‘Eaha outou e ofati ai i te mau faaueraa a Iehova? Eita outou e maitaihia! Ua faarue outou ia Iehova, e faarue atoa mai ïa oia ia outou.’”+ 21 Opua ihora râ ratou e rave i te ohipa ino i nia ia ˈna+ e pehi ihora ratou ia ˈna i te ofai na nia i te faaueraa a te arii, i roto i te aua o te hiero o Iehova.+ 22 Aita ïa te arii Iehoasa i haamanaˈo i te here taiva ore ta to ˈna metua tane,* o Iehoiada, i faaite ia ˈna. Haapohe atura oia i ta ˈna tamaiti, tei parau a pohe ai: “Ia faautua Iehova ia oe no te mau ohipa ta oe i rave.”+
23 I te haamataraa o te matahiti, haere maira te nuu Suria e aro ia Iehoasa e tomo maira ratou i Iuda e Ierusalema.+ Taparahi pohe aˈera ratou i te huiarii taatoa+ o te nunaa, e faatae aˈera ratou i te taatoaraa o te mau taoˈa ta ratou i haru mai, i te arii o Damaseko. 24 Noa ˈtu aita i rahi te faehau a te nuu Suria tei tomo i te fenua o Iuda, ua turu Iehova ia ratou ia upootia i nia i te hoê nuu rahi,+ ua faarue hoi te nunaa ia Iehova te Atua o to ratou mau tupuna. Ua faatae mai ïa ratou* i te utua i nia ia Iehoasa. 25 I to ratou hoˈiraa (ua vaiiho hoi ratou ia ˈna e te pepe rahi*), orure hau aˈera ta ˈna iho na tavini ia ˈna no te mea ua haamanii oia i te toto o te mau tamaiti* a Iehoiada+ te tahuˈa. Haapohe aˈera raua ia ˈna i nia i to ˈna roˈi.+ Mea na reira oia i te poheraa. Hunahia ihora ïa oia i te Oire o Davida,+ eiaha râ i te vahi hunaraa o te mau arii.+
26 Teie na taata orure hau+ ia ˈna: Zabada te tamaiti a Simeata vahine ati Amona raua Iehozabada te tamaiti a Simirita vahine ati Moabi. 27 Te aamu o ta ˈna mau tamaiti, te rahiraa poroi faahapa ia ˈna+ e te faaapîraa o te hiero o te Atua mau,+ ua faatiahia i roto i te mau papai o te Buka o te mau arii. E riro maira ta ˈna tamaiti ra o Amazia ei arii ei mono ia ˈna.
25 E 25 matahiti to Amazia i to ˈna riroraa mai ei arii e e 29 matahiti to ˈna faatereraa i Ierusalema. Te iˈoa o to ˈna metua vahine, o Iehoadana no Ierusalema.+ 2 Ua rave Amazia i te mea maitai i mua ia Iehova, eiaha râ ma te aau taatoa. 3 I te mau-papu-raa te faatereraa arii i to ˈna rima, haapohe ihora Amazia i na tia mana ta ˈna o tei haapohe i to ˈna metua tane te arii.+ 4 Aita râ oia i haapohe i ta raua mau tamaiti, ua rave hoi oia mai tei papaihia i roto i te Ture, i roto i te buka a Mose, i te faaueraa Iehova: “Eiaha te mau metua tane ia pohe no te mau hara a ta ratou mau tamaiti, e eiaha te mau tamaiti ia pohe no te mau hara a to ratou mau metua tane. Ia pohe râ te taata tataitahi no ta ˈna iho hara.”+
5 Haaputuputu maira ïa Amazia i te mau tane o Iuda e faaue aˈera ia tia mai ratou ia au i to ratou mau opu fetii, ia au i te mau raatira tausani e raatira hanere. Ua na reira oia ia Iuda e Beniamina taatoa.+ Tapao atura oia ia ratou mai te 20 matahiti e nia ˈtu,+ e e 300 000 taata tamaˈi faaineinehia* ta ˈna i taio mai no te faaô i roto i te nuu, ua ite i te faaohipa i te omore e te paruru rahi. 6 Hau atu â, tihepu maira oia i Iseraela 100 000 aito puai no 100 taleni* ario. 7 Haere maira râ hoê taata o te Atua mau i te arii ra e na ô maira: “E te arii e, eiaha e vaiiho ia haere te nuu o Iseraela na muri ia oe, aita hoi Iehova ia Iseraela ra,+ aita oia i te ati Epheraima ra. 8 A haere noa ˈtu oe e ia itoito oe no te tamaˈi. E mana to te Atua no te tauturu ia oe.+ Aita anaˈe, e nehenehe te Atua mau e haapau ia oe i to oe enemi.” 9 Na ô atura ïa Amazia i te taata o te Atua mau: “E na 100 taleni ta ˈu i horoa i te mau faehau o Iseraela?” Pahono maira te taata o te Atua mau: “E nehenehe ta Iehova e horoa hau aˈe na oe.”+ 10 Faaue atura ïa Amazia i te mau faehau no Epheraima tei haere mai ia ˈna ra ia hoˈi i ǒ ratou. Tera râ, riri roa ihora ratou i to Iuda. Hoˈi aˈera ïa ratou i ǒ ratou ma te riri rahi.
11 Faaitoito ihora Amazia, aratai ihora i ta ˈna mau faehau i te peho o te Miti papaa+ e tairi ihora 10 000 tane no Seira.+ 12 Haru maira te mau tane no Iuda 10 000 taata ora. Afai aˈera ïa ratou i taua feia ra i nia roa i te mato, huri atura ia ratou i raro e huˈahuˈa aˈera ratou paatoa. 13 Area te mau faehau ta Amazia i faahoˈi ia ore ratou ia apee ia ˈna i te tamaˈi,+ te eiâ haere ra ïa na te mau oire o Iuda, mai Samaria+ e tae atu i Bete-horona.+ Ua taparahi ratou 3 000 taata no Iuda e ua rave mai i te faufaa e rave rahi.
14 I te hoˈiraa mai râ Amazia i muri aˈe i to ˈna taparahi-pohe-raa i te ati Edoma, hopoi maira oia i te mau atua o te mau taata no Seira e faatia aˈera i te reira ei atua no ˈna iho.+ Haamata ihora oia i te tipapa i mua ia ratou e i te pûpû atu i te au auahi tusia. 15 Riri roa ihora ïa Iehova ia Amazia e tono ihora i te hoê peropheta o tei parau ia ˈna: “Eaha oe e haamori ai i te mau atua o tera nunaa, tera mau atua o tei ore i faaora i to ratou nunaa i to oe rima?”+ 16 A paraparau noa ˈi te peropheta ia ˈna, na ô atura te arii: “Ua faatoroa anei matou ia oe ei aˈo na te arii?+ A faaea!+ E faaue au ia haapohehia oe ia ore oe e mamû.” A faarue ai te peropheta i te arii, ua parau â oia: “Ua ite au e ua faaoti te Atua i te haamou ia oe, no te mea ua rave oe i teie ohipa e aita oe i faaroo i ta ˈu aˈoraa.”+
17 I muri aˈe i to te arii Amazia no Iuda paraparauraa i to ˈna mau taata aˈo, faatae atura oia i te hoê poroi ia Iehoasa te tamaiti a Iehoahaza te tamaiti a Iehu te arii o Iseraela: “Haere mai, e aro* anaˈe tâua.”+ 18 Faatae maira ïa te arii Iehoasa no Iseraela i teie poroi i te arii Amazia no Iuda: “Ua faatae te raau taratara no Lebanona i teie poroi i te tumu arezi no Lebanona: ‘A horoa i ta oe tamahine ei vahine faaipoipo na ta ˈu tamaiti.’ Haere maira râ te hoê animara oviri no Lebanona e taataahi ihora i te raau taratara. 19 Ua parau oe: ‘A hiˈo na! Ua upootia vau* i nia ia Edoma.’+ No reira to aau i teoteo ai a hinaaro atu ai ia faahanahanahia. A faaea noa râ i ǒ oe.* Eaha oe e imi ai i to oe ati a hiˈa ˈtu ai ma te aratai ia Iuda na muri ia oe?”
20 Aita râ Amazia i faaroo,+ no ǒ mai hoi i te Atua mau ra teie tupuraa. Ua hinaaro oia e tuu ia Amazia e to ˈna nunaa i te rima o te enemi+ no te mea ua haamori ratou i te mau atua o Edoma.+ 21 Haere ihora ïa te arii Iehoasa no Iseraela e aro i te arii Amazia no Iuda i Bete-semesa,+ i te fenua o Iuda. 22 Pau ihora Iuda ia Iseraela. Horo aˈera ïa te mau faehau no Iuda i ǒ ratou.* 23 I Bete-semesa, haru maira te arii Iehoasa no Iseraela i te arii Amazia no Iuda, te tamaiti a Iehoasa te tamaiti a Iehoahaza.* Afai maira oia ia ˈna i Ierusalema e vavahi atura hoê tuhaa o te aua. Ua faaapoo oia i te aua 400 kubiti te aano,* mai te Uputa o Epheraima+ e tae atu i te Uputa i te poro.+ 24 Rave ihora oia pauroa te auro, te ario e te mau taoˈa atoa e vai ra i roto i te hiero* o te Atua mau, i ǒ* Obeda-edoma, e i roto i te mau piha vairaa taoˈa o te aorai* o te arii.+ Haru atoa maira oia i te taata. I muri iho, hoˈi atura oia i Samaria.
25 I muri aˈe i te poheraa Iehoasa+ te tamaiti a Iehoahaza te arii o Iseraela,+ ua ora â Amazia+ te tamaiti a Iehoasa te arii o Iuda 15 matahiti. 26 Te toea o te aamu o Amazia, ua papaihia ïa mai te omuaraa e tae atu i te hopea i roto i te Buka o te mau arii o Iuda e o Iseraela. 27 I te faarueraa Amazia ia Iehova, orure hau aˈera te taata+ ia ˈna i Ierusalema. Horo ihora oia i Lakisa. Tonohia ˈtura râ te taata no te aˈuaˈu ia ˈna e haapohe ihora ratou ia ˈna i Lakisa. 28 Faahoˈihia ihora to ˈna tino na nia i te pereoo hutihia e te puaahorofenua, e hunahia ihora oia i pihai iho i to ˈna mau tupuna i te oire o Iuda.
26 Faaarii ihora te nunaa taatoa o Iuda ia Uzia+ ei mono ia Amazia to ˈna metua tane.+ E 16 matahiti to Uzia i tera taime. 2 Na ˈna i patu faahou ia Elota+ e na ˈna i faahoˈi atu i tera oire ia Iuda ra i muri aˈe i to te arii* taotoraa i roto i te pohe e to ˈna mau tupuna.+ 3 E 16 matahiti to Uzia+ i to ˈna riroraa mai ei arii e e 52 matahiti to ˈna faatereraa i Ierusalema. Te iˈoa o to ˈna metua vahine, o Iekolia no Ierusalema.+ 4 Ua rave Uzia i te mea maitai i mua ia Iehova, mai ta Amazia to ˈna metua tane i rave na.+ 5 Ua imi oia i te Atua i te mau mahana o Zekaria, o tei haapii ia ˈna i te mǎtaˈu i te Atua mau. I te tau a imi ai oia ia Iehova, ua haamaitai te Atua mau ia ˈna.+
6 Ua haere oia e aro i te mau Philiseti+ e ua tuparari i te aua o Gata,+ o Iabene+ e o Asadoda.+ I muri iho, ua patu oia i te tahi mau oire i te tuhaa fenua o Asadoda e i ǒ te mau Philiseti. 7 Ua tauturu te Atua mau ia ˈna i mua i te mau Philiseti, i mua i te mau Arabia+ o tei parahi i Gurabaala, e i mua i te mau Meunima. 8 Ua haamata te ati Amona+ i te aufau i te ô titauhia ia Uzia. Parare roa ˈtura to ˈna roo e tae roa ˈtu i Aiphiti, ua riro hoi oia ei taata mana roa. 9 Hau atu â, ua patu Uzia i te tahi mau pare+ i Ierusalema, i pihai iho i te Uputa i te Poro,+ te Uputa o te Peho+ e te Pou turu, e ua haapaari oia i te reira. 10 Ua patu atoa oia i te tahi mau pare+ i te medebara e ua ô oia e rave rahi apoo pape* (mea rahi roa hoi nǎnǎ animara ta ˈna). Ua na reira atoa oia i te Sephela e i te vahi parahurahu. E feia faaapu fenua ta ˈna e te feia faaapu vine i nia i te mau mouˈa e i Karemela, mea au roa hoi na ˈna i te faaapu.
11 Hau atu â, ua faaineine Uzia i te hoê nuu na ˈna no te tamaˈi. E haere ratou i te tamaˈi, faanahohia ei pǔpǔ. Na Ieiela te papai parau+ raua Maaseia te taata toroa i taio e i tapao ia ratou,+ i raro aˈe i te aratairaa a Hanania, hoê no roto i te huiarii a te arii. 12 E 2 600 rahiraa upoo utuafare to nia i tera mau aito puai. 13 E 307 500 faehau ta ratou i raro aˈe i ta ratou aratairaa, e tane faaineinehia no te tamaˈi, e nuu puai mau no te turu i te arii ia aro i to ˈna mau enemi.+ 14 Ua rave Uzia i te paruru, te omore,+ te taupoo, te ahu paruru,+ te fana e te ofai taora,+ ei mauhaa e ei parururaa no te nuu taatoa. 15 I Ierusalema, ua hamani oia i te mauhaa tamaˈi faaineinehia e te tahi feia aravihi. Ua tuuhia te reira i nia i te mau pare+ e te mau poro aua. E pee te teˈa e te ofai rarahi i tera mau mauhaa. Mea na reira to ˈna parau i parare ai na te mau vahi atoa, ua fanaˈo hoi oia i te tauturu faahiahia e ua puai roa mai oia.
16 Tera râ, i te puairaa mai oia, teoteo ihora to ˈna aau e mea na reira oia i te hiˈaraa. Taiva ˈtura oia ia Iehova to ˈna Atua ma te tomo i roto i te hiero o Iehova no te tutui i te mea noˈanoˈa i nia i te fata mea noˈanoˈa.+ 17 Tomo haavitiviti maira Azaria te tahuˈa e 80 tahuˈa itoito a Iehova na muri ia ˈna. 18 Patoi maira ratou i te arii Uzia e na ô maira ia ˈna: “Uzia, aita e tiaraa to oe no te tutui i te mea noˈanoˈa na Iehova!+ O te mau tahuˈa anaˈe te tutui i te mea noˈanoˈa, e huaai ratou no Aarona,+ e feia o tei haamoˈahia. A haere i rapae i te nao,* ua taiva oe e eita oe e fanaˈo i te hanahana no ǒ mai i te Atua o Iehova no teie ohipa.”
19 Riri roa ihora râ Uzia. E farii mea noˈanoˈa to roto i to ˈna rima. E i roto i to ˈna riri+ i te mau tahuˈa, tupu ihora te lepera+ i nia i to ˈna rae i mua i te mau tahuˈa, i roto i te hiero* o Iehova, i pihai iho i te fata mea noˈanoˈa. 20 Hiˈo maira Azaria te tahuˈa tiaau e te mau tahuˈa atoa ia Uzia, ite aˈera ratou e ua roohia oia i te lepera i nia i te rae! Faahaere haavitiviti ihora ïa ratou ia ˈna i rapae, e ua haavitiviti atoa iho â oia i te haere i rapae, no te mea ua faautua Iehova ia ˈna.
21 Vai lepera noa ˈtura te arii Uzia e pohe noa ˈtu oia. Ua faaea oia i roto i te hoê fare taa noa no te mea, ei lepera,+ aita i faatiahia ia haere oia i te hiero o Iehova. Na ta ˈna tamaiti o Iotama i haapao i te aorai* o te arii e na ˈna i haava i te taata o taua fenua ra.+
22 Te toea o te aamu o Uzia, mai te omuaraa e tae atu i te hopea, ua faatiahia ïa e te peropheta Isaia+ te tamaiti a Amoza. 23 Taoto ihora Uzia i roto i te pohe e to ˈna mau tupuna, e hunahia ihora oia i pihai iho ia ratou, i nia râ i te hoê tâpû fenua no te mau arii,* teie hoi tei parauhia: “E lepera oia.” E riro maira ta ˈna tamaiti o Iotama+ ei arii ei mono ia ˈna.
27 E 25 matahiti to Iotama+ i to ˈna riroraa mai ei arii e 16 matahiti to ˈna faatereraa i Ierusalema. Te iˈoa o to ˈna metua vahine, o Ierusa te tamahine a Zadoka.+ 2 Ua rave Iotama i te mea maitai i mua ia Iehova, mai ta to ˈna metua tane ra o Uzia i rave na.+ Aita râ oia i tomo i roto i te hiero o Iehova.+ Tera râ, te rave noa ra te nunaa i te ohipa ino. 3 Ua hamani Iotama i te Uputa i nia o te hiero* o Iehova,+ e mea rahi te paturaa ta ˈna i faatia i te aua o Ophela.+ 4 Ua patu atoa oia i te tahi mau oire+ i te tuhaa fenua mouˈa o Iuda,+ te tahi atoa mau vahi auahia i te patu+ e te pare+ na te mau vahi uru raau. 5 Ua aro oia i te arii o te ati Amona+ e ua upootia i nia ia ratou. No reira te ati Amona i horoa ˈi i taua matahiti ra 100 taleni* ario na ˈna, 10 000 kora* sitona e 10 000 kora kerite. Ua na reira faahou te ati Amona i te piti e te toru o te matahiti.+ 6 Haere noa ˈtura ïa Iotama i te puairaa, no te mea ua faaoti papu oia e pee i te mau eˈa o* Iehova to ˈna Atua.
7 Te toea o te aamu o Iotama, ta ˈna mau tamaˈi atoa e ta ˈna mau ohipa, ua papaihia ïa i roto i te Buka o te mau arii o Iseraela e o Iuda.+ 8 E 25 matahiti to ˈna i to ˈna riroraa mai ei arii e 16 matahiti to ˈna faatereraa i Ierusalema.+ 9 Taoto atura Iotama i roto i te pohe e to ˈna mau tupuna e hunahia ihora oia i te Oire o Davida.+ E riro maira ta ˈna tamaiti ra o Ahaza ei arii ei mono ia ˈna.+
28 E 20 matahiti to Ahaza+ i to ˈna riroraa mai ei arii e 16 matahiti to ˈna faatereraa i Ierusalema. Aita oia i rave i te mea maitai i te aro o Iehova mai ta Davida to ˈna tupuna i rave na.+ 2 Ua pee oia i te hiˈoraa ino o te mau arii o Iseraela+ e ua tae roa atoa oia i te hamani i te tii faatôhia*+ o te mau Baala. 3 Hau atu â, ua pûpû oia i te au auahi tusia i te peho o te Tamaiti a Hinoma* e ua tanina oia i ta ˈna mau tamaiti.+ Ua pee ïa oia i te mau peu hairiiri a te mau nunaa+ ta Iehova i tiahi mai mua mai i te ati Iseraela. 4 I nia i te mau vahi teitei,+ i nia i te mau aivi e i raro aˈe i te mau tumu raau ruperupe atoa,+ ua pûpû oia i te tusia a faahaere atu ai i te au auahi tusia i nia.
5 No reira Iehova to ˈna Atua i tuu ai ia ˈna i te rima o te arii o Suria+ e pau atura oia i to Suria. Ua rave tîtî ratou e rave rahi taata e ua hopoihia ratou i Damaseko.+ Ua tuu-atoa-hia Ahaza i te rima o te arii o Iseraela, o tei tairi ia ˈna i te tahi taparahiraa rahi. 6 Ua haapohe hoi Peka+ te tamaiti a Remalia i Iuda 120 000 taata i te hoê noa mahana, e tane itoito anaˈe, no te mea ua faarue ratou ia Iehova te Atua o to ratou mau tupuna.+ 7 E ua haapohe Zikeri, te hoê taata tamaˈi ati Epheraima, ia Maaseia ta te arii tamaiti, ia Azerikama, tei tiaau i te aorai,* e ia Elikana, te piti o te taata i muri mai i te arii. 8 Hau atu â, ua haru te ati Iseraela e 200 000 vahine, tamaroa e tamahine no Iuda. Ua rave atoa mai ratou i te faufaa e rave rahi e ua hopoi i te reira i Samaria.+
9 Tei reira râ te hoê peropheta a Iehova o Odeda te iˈoa. Haere atura oia e farerei i te nuu o te haere mai ra i Samaria e na ô atura ia ratou: “Inaha, ua riri Iehova te Atua o to outou mau tupuna ia Iuda, no reira oia i tuu ai ia ratou i to outou rima,+ e ua haapohe outou ia ratou ma te hoê riri o tei tae roa i nia i te raˈi. 10 E i teie nei, te opua ra outou e rave i te nunaa o Iuda e o Ierusalema ei tavini tane e ei tavini vahine na outou.+ Tera râ, aita atoa anei outou i hara i mua ia Iehova to outou Atua? 11 A faaroo mai ïa ia ˈu e a tuu i te mau tîtî ta outou i rave mai i ǒ to outou mau taeae, e riri rahi hoi to Iehova ia outou.”
12 I reira, patoi maira te tahi mau raatira o te ati Epheraima (Azaria te tamaiti a Iehohanana, Berekia te tamaiti a Mesilemota, Iehizakia te tamaiti a Saluma e Amasa te tamaiti a Hadalai) i te feia tei hoˈi mai na to ratou tere, 13 e na ô maira taua mau raatira ra ia ratou: “Eiaha e afai mai i te mau tîtî i ǒ nei, aˈunei matou e hara ˈi i mua ia Iehova. E faarahi atu â te mea ta outou e opua ra e rave i ta matou mau hara, ua rahi aˈena hoi ta matou hara e e riri rahi to nia ia Iseraela.” 14 Tuu atura ïa te mau faehau e mauhaa ta ratou, i te mau tîtî e te faufaa i haruhia mai,+ i te huiarii ra e te feia tei putuputu mai. 15 Tia aˈera te mau tane tei maitihia ma to ratou iˈoa, rave aˈera i te mau tîtî e horoa ˈtura i te ahu no roto mai i te faufaa i haruhia mai, no te feia aita e ahu i rotopu ia ratou. Faaoomo atura ïa ratou i te mau tîtî i te ahu e horoa ˈtura i te tiaa, te maa e te mea e inu, e te monoˈi no to ratou iri. Hau atu â, tuu aˈera ratou i tei paruparu na nia i te asini e hopoi aˈera ia ratou i to ratou ra mau taeae i Ieriko, te oire o te mau tumu tamara. I muri aˈe, hoˈi aˈera ratou i Samaria.
16 I taua tau ra, ani atura te arii Ahaza i te tauturu i te mau arii o Asura.+ 17 Haere faahou maira te ati Edoma e aro ia Iuda, tomo maira i to ratou fenua e hopoi tîtî atura i te taata. 18 Aro atoa aˈera te mau Philiseti+ i te mau oire o te Sephela+ e te Negeba o Iuda e haru maira ia Bete-semesa,+ Aialona,+ Gederota, Soko e to ˈna mau oire ati aˈe, Timina+ e to ˈna mau oire ati aˈe, e ia Gimezo e to ˈna mau oire ati aˈe. E parahi ihora ratou i reira. 19 Ua faahaamahia Iuda e Iehova no te arii Ahaza no Iseraela, no te mea ua vaiiho oia ia Iuda ia haa ma te vî ore e taiva ˈtura ratou ia Iehova.
20 Haere atoa maira te arii Tilegata-pilenesera+ no Asura e aro ia ˈna. Ua haapeapea oia ia ˈna,+ aita oia i tauturu atu. 21 Ua rave hoi Ahaza i te mau taoˈa i roto i te hiero* o Iehova, te aorai o te arii+ e te mau fare o te huiarii e ua pûpû oia i te reira na te arii o Asura. Aita râ oia i apî i te reira. 22 E i roto i to ˈna ati, ua taiva ˈtu â te arii Ahaza ia Iehova. 23 Haamata aˈera oia i te pûpû i te tusia i te mau atua o Damaseko+ tei upootia i nia ia ˈna,+ e parau atura oia: “Inaha te tauturu ra te mau atua o te mau arii o Suria ia ratou, e pûpû vau i te tusia ia ratou ia tauturu mai ratou ia ˈu.”+ Tera râ, faaturori aˈera ratou ia ˈna e to Iseraela taatoa. 24 Hau atu â, haaputuputu maira Ahaza i te mau taihaa o te hiero o te Atua mau. Faahuˈahuˈa ihora oia i te mau taihaa o te hiero o te Atua mau,+ tapiri atura i te mau uputa o te hiero o Iehova,+ e faatia aˈera i te fata no ˈna iho i te mau poro atoa o Ierusalema. 25 E i te mau oire atoa o Iuda, hamani ihora oia i te vahi teitei no te pûpû i te au auahi tusia i te mau atua ěê.+ E faainoino ihora oia ia Iehova te Atua o to ˈna mau tupuna.
26 Te toea o to ˈna aamu, te mau mea atoa ta ˈna i rave mai te omuaraa e tae atu i te hopea, ua papaihia ïa i roto i te Buka o te mau arii o Iuda e o Iseraela.+ 27 Taoto atura Ahaza i roto i te pohe e to ˈna mau tupuna e hunahia ihora oia i roto i te oire, i Ierusalema, aita hoi oia i afaihia i te vahi hunaraa o te mau arii o Iseraela.+ E riro maira ta ˈna tamaiti ra o Hezekia ei arii ei mono ia ˈna.
29 Riro maira Hezekia+ ei arii i te 25 o to ˈna matahiti e e 29 matahiti to ˈna faatereraa i Ierusalema. Te iˈoa o to ˈna metua vahine, o Abia, e tamahine na Zekaria.+ 2 Ua rave oia i te mea maitai i mua ia Iehova,+ mai ta Davida to ˈna tupuna i rave na.+ 3 I te matahiti matamua oia i te ariiraa mai, i te avaˈe matamua, iriti ihora oia i te mau uputa o te hiero* o Iehova e tataî ihora i tera mau uputa.+ 4 Titau maira oia i te mau tahuˈa e te ati Levi e haaputuputu maira ia ratou i te mahora i te pae hitia o te râ. 5 Na ô maira oia ia ratou: “A faaroo mai ia ˈu, e te ati Levi. I teie nei, a haamoˈa ia outou+ e a haamoˈa i te fare o Iehova te Atua o to outou mau tupuna e a tatara i te mea viivii i roto i te vahi moˈa.+ 6 Ua taiva hoi to tatou mau metua e ua rave i te mea ino i te aro o Iehova to tatou Atua.+ Ua faarue ratou ia ˈna, ua fariu ê ratou i to ratou mata i te sekene o Iehova e ua huri tua ratou ia ˈna.+ 7 Ua tapiri atoa ratou i te mau uputa o te taupee+ e ua tupohe i te mau mori.+ Ua faaea ratou i te tutui i te mea noˈanoˈa+ e i te pûpû i te tusia taauahi+ i te Atua o Iseraela i roto i te vahi moˈa. 8 No reira Iehova i inoino ai ia Iuda e Ierusalema,+ a faariro atu ai ia ratou ei riariaraa, ei maereraa e ei faaoooraa,* mai ta outou iho e ite ra.+ 9 No reira to tatou mau tupuna i pohe ai i te ˈoˈe,+ e no reira ta tatou mau tamaiti, ta tatou mau tamahine e ta tatou mau vahine faaipoipo i hopoi-ê-hia ˈi.+ 10 I teie nei, te hinaaro nei au e faaau i te tahi faufaa ia Iehova te Atua o Iseraela,+ ia fariu ê to ˈna riri rahi ia tatou nei. 11 Ta ˈu mau tamaiti, e ere teie i te taime no te haafaufaa ore i ta outou hopoia,* ua maiti hoi Iehova ia outou no te tia i mua ia ˈna, no te ohipa ei tavini na ˈna,+ e no te tutui i ta ˈna mau tusia ia au auahi te reira.”+
12 I reira, tia aˈera te ati Levi: No te ati Kohata,+ o Mahata te tamaiti a Amasai, e Ioela te tamaiti a Azaria. No te ati Merari,+ o Kisa te tamaiti a Abadi, e Azaria te tamaiti a Iehaleleela. No te ati Geresona,+ o Ioa te tamaiti a Zima, raua Edene te tamaiti a Ioa. 13 No roto i te mau tamaiti a Elizaphana, o Simiri raua Ieuela. No roto i te mau tamaiti a Asapha,+ o Zekaria raua Matania. 14 No roto i te mau tamaiti a Hemana,+ o Iehiela raua Simei. No roto i te mau tamaiti a Iedutuna,+ o Semaia raua Uziela. 15 Haaputuputu maira ratou i to ratou mau taeae, haamoˈa aˈera ia ratou iho e haere maira, mai tei faauehia e te arii na nia i te parau a Iehova, no te tamâ i te hiero o Iehova.+ 16 Tomo maira te mau tahuˈa i roto i te hiero o Iehova no te tamâraa. Rave aˈera ratou i te mau mea viivii atoa ta ratou i ite mai i roto i te hiero o Iehova e afai aˈera i roto i te aua+ o te hiero o Iehova. E na te ati Levi i rave i te reira no te hopoi atu i te peho o Kiderona.+ 17 Ua haamata ïa ratou i te haamoˈaraa i te mahana matamua o te avaˈe matamua. I te vaˈu o te mahana o taua avaˈe ra, ua tae ratou i te taupee o Iehova.+ Ua haamoˈa ratou i te fare o Iehova e vaˈu mahana, e i te 16 o te mahana o te avaˈe matamua te otiraa ta ratou ohipa.
18 I muri aˈe i te reira, haere maira ratou i te arii Hezekia ra e na ô maira: “Ua tamâ matou i te taatoaraa o te fare o Iehova, te fata tusia taauahi+ e te mau taihaa atoa no te reira,+ e te amuraa maa o te pane apǎpǎhia*+ e te mau taihaa atoa no te reira. 19 E te mau taihaa atoa ta te arii Ahaza i tuu i te hiti i to ˈna ariiraa, a taiva ˈi oia,+ ua faaineine e ua haamoˈa matou i te reira,+ e tei mua te reira i te fata a Iehova.”
20 Tia aˈera te arii Hezekia i te poipoi roa, haaputuputu maira i te huiarii o te oire, e pauma aˈera ratou i te hiero o Iehova. 21 Hopoi maira ratou e hitu puaatoro oni, e hitu mamoe oni, e hitu fanauˈa mamoe oni e e hitu puaaniho oni ei tusia no te hara no te utuafare o te arii, no te nao* e no Iuda.+ Faaue ihora ïa te arii i te mau tahuˈa, te huaai o Aarona, ia pûpû i taua mau tusia ra i nia i te fata a Iehova. 22 Tupai aˈera ratou i te mau puaatoro,+ rave aˈera te mau tahuˈa i te toto e pîpî aˈera i nia i te fata.+ I muri iho, tupai aˈera ratou i te mau mamoe oni e pîpî aˈera i te toto i nia i te fata, e tupai aˈera ratou i te mau fanauˈa mamoe oni e pîpî aˈera i te toto i nia i te fata. 23 Hopoi maira ratou i te mau puaaniho oni no te tusia no te hara i mua i te arii e te amuiraa e tuu ihora i to ratou rima i nia iho. 24 Tupai aˈera te mau tahuˈa i taua mau puaaniho ra e pûpû atura ei tusia no te hara. Tuu atura ratou i te toto i nia i te fata ei faahauraa* no Iseraela taatoa, no te mea ua faaue te arii ia pûpûhia te tusia taauahi e te tusia no te hara no Iseraela taatoa.
25 I tera atoa taime, ua faaue oia i te ati Levi ia haere i roto i te hiero o Iehova e te sumebalo, te upaupa taura e te kinura,+ ia au i te faaueraa a Davida,+ a Gada+ te taata ite orama a te arii, e a Natana+ te peropheta, mea na roto hoi i ta ˈna mau peropheta te faaueraa Iehova i te reira. 26 Haere maira ïa te ati Levi e te mau upaupa a Davida, e e pu ta te mau tahuˈa.+
27 Faaue ihora Hezekia ia pûpûhia te tusia taauahi i nia i te fata.+ I te haamataraa te pûpûraa o te tusia taauahi, haamata aˈera te himene a Iehova e te mau pu atoa. Ua apee te mau pu i te taˈi o te mau upaupa a te arii Davida no Iseraela. 28 Tipapa ihora te amuiraa taatoa a himenehia ˈi te himene e a faaotohia ˈi te mau pu. Ua tamau te reira e oti noa ˈtu te tusia taauahi. 29 I te otiraa iho â tera tusia taauahi, piˈo ihora te arii e te taata atoa i pihai iho ia ˈna e tipapa ihora. 30 Faaue aˈera te arii Hezekia e te huiarii i te ati Levi ia arue ia Iehova ma te faahiti i te mau parau a Davida+ e a Asapha+ te taata ite orama. Arue ihora ïa ratou ia ˈna ma te oaoa rahi, piˈo ihora ratou e tipapa ihora.
31 Na ô maira Hezekia: “Inaha, ua faataa-ê-hia outou* i teie nei no Iehova, a haere mai e a hopoi mai i te tusia e te tusia haamauruuru i te fare o Iehova.” Haamata ihora ïa te amuiraa i te hopoi mai i te tusia e te tusia haamauruuru, e hopoi maira te feia aau tae i te animara no te tusia taauahi.+ 32 Teie te rahiraa tusia taauahi ta te amuiraa i hopoi mai: 70 puaatoro, 100 mamoe oni, 200 fanauˈa mamoe oni, e tusia taauahi anaˈe te reira na Iehova.+ 33 E no te mau ô moˈa: 600 puaatoro e 3 000 mamoe. 34 Aita râ i navai te tahuˈa no te hohore i te iri o te mau animara atoa o te mau tusia taauahi. Tauturu maira ïa to ratou mau taeae te ati Levi ia ratou+ e oti noa ˈtu te ohipa, e oti noa ˈtu te mau tahuˈa i te haamoˈa ia ratou iho.+ Mea haapao roa hoi na* te ati Levi i te parau o te haamoˈaraa ia ratou iho, hau aˈe i te mau tahuˈa. 35 Mea rahi atoa te tusia taauahi,+ e te mii o te mau tusia no te hau+ e te tusia uaina no te mau tusia taauahi.+ Mea na reira te taviniraa i te hiero o Iehova i te haamau-faahou-raahia.* 36 Oaoa roa ihora ïa Hezekia e te nunaa taatoa no te mau mea i haamauhia e te Atua mau no te nunaa,+ mea vitiviti hoi te reira i te raveraahia.
30 Faatae atura Hezekia i te poroi i to Iseraela+ e to Iuda taatoa, e papai atoa ihora i te tahi mau rata i to Epheraima e Manase,+ ia haere mai ratou i te hiero* o Iehova i Ierusalema e faatupu i te Pasa no Iehova te Atua o Iseraela.+ 2 Tera râ, faaoti ihora te arii, ta ˈna huiarii e te amuiraa taatoa i Ierusalema e faatupu i te Pasa i te piti o te avaˈe,+ 3 aita hoi i tia ia ratou ia faatupu i te reira i te avaˈe matamua,+ no te mea aita i navai te tahuˈa o tei haamoˈa ia ratou iho,+ aita atoa te nunaa i haaputuputu mai i Ierusalema. 4 Ua au te arii e te amuiraa taatoa i teie faanahoraa. 5 Faaoti aˈera ïa ratou e faaite haere i te hoê poroi na roto ia Iseraela, mai Beere-seba e tae atu i Dana,+ ia haere mai te nunaa i Ierusalema e faatupu i te Pasa no Iehova te Atua o Iseraela, no te mea aita ratou i faatupu amui i te reira mai tei titauhia e te Ture.+
6 Mai ta te arii i faaue, haere atura te mau vea* na roto ia Iseraela e Iuda taatoa e te mau rata a te arii e a ta ˈna huiarii, ma te parau: “E te nunaa o Iseraela, a hoˈi mai ia Iehova ra te Atua o Aberahama, Isaaka e Iseraela, ia hoˈi mai oia i te toea o tei ora mai i te rima o te mau arii o Asura.+ 7 Eiaha e riro mai mai to outou mau tupuna e to outou mau taeae o tei taiva ia Iehova te Atua o to ratou mau tupuna, no reira oia i faariro ai ia ratou ei riariaraa, mai ta outou e ite nei.+ 8 I teie nei, eiaha outou e haapaari, mai to outou mau tupuna.+ A auraro ia Iehova e a haere mai i to ˈna nao*+ ta ˈna i haamoˈa e a muri noa ˈtu, e a tavini ia Iehova to outou Atua, ia fariu ê to ˈna riri rahi ia outou.+ 9 No te mea ia hoˈi mai outou ia Iehova ra, e faaite te feia o tei rave tîtî i to outou mau taeae e ta outou mau tamaiti, i te aroha hamani maitai ia ratou,+ e e vaiihohia ratou ia hoˈi mai i teie fenua,+ e Atua aumihi hoi e te aroha hamani maitai o Iehova to outou Atua.+ Eita oia e fariu ê i to ˈna aro ia outou mai te peu e hoˈi mai outou ia ˈna ra.”+
10 Haere aˈera ïa te mau vea* i tera e tera oire na te fenua o Epheraima e o Manase,+ e i Zebuluna atoa. Tera râ, ua ata e ua faaooo te taata ia ratou.+ 11 Faahaehaa ihora râ te tahi mau taata no Asera, Manase e Zebuluna ia ratou iho e haere maira i Ierusalema.+ 12 Tei Iuda atoa te rima o te Atua mau no te tahoê* ia ratou, ia rave ratou i ta te arii e ta te huiarii i faaue ia au i te parau a Iehova.
13 Haaputuputu maira hoê nahoa taata i Ierusalema no te faatupu i te Oroa pane hopue ore+ i te piti o te avaˈe.+ E nahoa rahi mau ratou. 14 Tia aˈera ratou e tatara aˈera i te mau fata i Ierusalema.+ Tatara atoa aˈera ratou i te mau fata mea noˈanoˈa+ e faarue atura i te reira i te peho o Kiderona. 15 Tupai ihora ratou i te tusia no te Pasa i te 14 o te mahana o te piti o te avaˈe. Ua haama hoi te mau tahuˈa e te ati Levi, i haamoˈa ˈi ratou ia ratou e hopoi maira i te tusia taauahi i te hiero o Iehova. 16 Tia maira ratou i te vahi i faataahia no ratou ia au i te Ture a Mose, te taata o te Atua mau. Pîpî atura te mau tahuˈa i te toto+ ta te ati Levi i horoa ˈtu, i nia i te fata. 17 Mea rahi i rotopu i te feia tei putuputu mai o tei ore i haamoˈa ia ratou, e o te ati Levi tei titauhia no te tupai i te mau animara no te Pasa no te feia viivii atoa,+ no te haamoˈa ia ratou i mua ia Iehova. 18 Mea rahi hoi tei ore i tamâ ia ratou, no roto iho â râ i to Epheraima, to Manase,+ to Isakara e to Zebuluna. Ua amu noa râ ratou i te Pasa, aita i haapaohia i tei titauhia e te Ture. Ua pure râ Hezekia no ratou ma te parau: “Ia faaore te Atua maitai+ ra o Iehova i te hara 19 a te taata atoa o tei faaineine i to ratou aau no te imi i te Atua mau,+ ia Iehova, te Atua o to ratou mau tupuna, noa ˈtu aita ratou i tamâhia ia au i te ture o te moˈaraa.”+ 20 E faaroo maira Iehova ia Hezekia e faaore atura i te hara a* te nunaa.
21 Faatupu atura ïa te ati Iseraela i Ierusalema i te Oroa pane hopue ore+ e hitu mahana ma te oaoa rahi.+ Ua arue te ati Levi e te mau tahuˈa ia Iehova i te mau mahana atoa, ma te faaoto haapuai i ta ratou mau upaupa na Iehova.+ 22 Hau atu â, paraparau e faaitoito maira Hezekia pauroa* te ati Levi o tei tavini ia Iehova ma te paari. E tamaa aˈera te nunaa e te ati Levi i te roaraa o te oroa e hitu mahana,+ ma te pûpû i te tusia no te hau+ e ma te haamauruuru ia Iehova te Atua o to ratou mau tupuna.
23 Faaoti aˈera te amuiraa taatoa e faatupu i te oroa e hitu â mahana. Faatupu aˈera ïa ratou i te oroa e hitu â mahana ma te oaoa.+ 24 Pûpû maira te arii Hezekia no Iuda 1 000 puaatoro oni e 7 000 mamoe na te amuiraa. E pûpû atura te huiarii 1 000 puaatoro oni e 10 000 mamoe+ na te amuiraa. E mea rahi te tahuˈa e haamoˈa ra ia ratou.+ 25 Oaoa noa ˈtura te feia atoa no Iuda o tei haaputuputu mai, te mau tahuˈa, te ati Levi, te feia atoa no Iseraela mai,+ e te feia ěê+ o tei haere mai mai te fenua o Iseraela mai, e te feia e ora ra i Iuda. 26 E e oaoa rahi tei Ierusalema, no te mea, mai te mau mahana mai â o Solomona te tamaiti a Davida te arii o Iseraela, aita e ohipa mai teie i tupu i Ierusalema.+ 27 I te pae hopea, tia aˈera te mau tahuˈa ati Levi e haamaitai atura i te nunaa.+ Faaroo maira te Atua i to ratou reo, e tae roa aˈera ta ratou pure i to ˈna nohoraa moˈa, te raˈi.
31 I te otiraa taua mau mea atoa ra, reva aˈera te ati Iseraela taatoa o tei tae mai e haere aˈera i te mau oire o Iuda, e vavahi aˈera i te mau pou haamoriraa,+ tâpû aˈera i te mau raau haamoriraa,*+ tuparari aˈera i te mau vahi teitei+ e te mau fata+ i Iuda e Beniamina taatoa, oia atoa i Epheraima e Manase,+ e pau roa aˈera te reira i te vavahihia e ratou. I muri aˈe, hoˈi aˈera te ati Iseraela taatoa i to ratou mau oire, te taata tataitahi i ǒ ˈna iho.
2 Faatoroa ˈtura Hezekia i te mau tahuˈa i roto i ta ratou mau pǔpǔ,+ e te ati Levi i roto i ta ratou mau pǔpǔ,+ te tahuˈa e te ati Levi tataitahi ia au i ta ˈna tuhaa,+ no te mau tusia taauahi e te mau tusia no te hau, no te tavini, no te haamauruuru e no te arue i te Atua i te mau uputa o te mau aua* a Iehova.+ 3 Horoahia ˈtura hoê tuhaa o te mau taoˈa a te arii no te mau tusia taauahi,+ oia atoa te mau tusia taauahi o te poipoi e to te ahiahi,+ oia atoa te mau tusia taauahi no te mau Sabati,+ te mau avaˈe apî,+ e te mau oroa,+ ia au i tei papaihia i roto i te Ture a Iehova.
4 Hau atu â, faaue atura oia i te feia e ora ra i Ierusalema ia horoa i ta te tahuˈa e ta te ati Levi tuhaa,+ ia haapao maite ratou i te ture a Iehova. 5 I te faaiteraahia taua faaueraa ra, horoa maira te ati Iseraela i te huero maa paari matamua e rave rahi, te uaina apî, te hinu,+ te meri, e te mau maa atoa o te faaapu.+ Hopoi maira ratou hoê tuhaa i nia ahuru o taua mau mea atoa ra.+ 6 Hopoi atoa maira te nunaa o Iseraela e o Iuda e ora ra i te mau oire o Iuda hoê tuhaa i nia ahuru o te mau puaatoro e te mau mamoe, e hoê tuhaa i nia ahuru o te mau mea moˈa+ tei faataahia no te haamoriraa ia* Iehova to ratou Atua. Ua hopoi mai ratou i te reira e ua haaputu ratou e rave rahi haapueraa ô. 7 I te toru o te avaˈe+ to ratou haamataraa i te haaputu mai i ta ratou mau ô. E i te hitu o te avaˈe+ i oti ai te reira. 8 A haere mai ai Hezekia e te huiarii e a ite ai i te mau haapueraa ô, arue aˈera ratou ia Iehova e haamaitai aˈera ratou i to ˈna nunaa o Iseraela.
9 Ui atura Hezekia i te mau tahuˈa e te ati Levi no nia i taua mau haapueraa ra, 10 e pahono maira Azaria te tahuˈa tiaau no te utuafare o Zadoka ia ˈna: “Mai te taime mai â a haamata ˈi ratou i te hopoi mai i te ô i te fare o Iehova,+ ua tamaa e ua paia maitai matou. Mea rahi noa iho â râ te maa e toe mai, no te mea ua haamaitai Iehova i to ˈna nunaa, e teie te rahiraa maa e toe ra.”+
11 I reira, faaue ihora Hezekia ia ratou ia faanaho i te tahi mau piha vairaa maa*+ i roto i te hiero o Iehova. Faanaho ihora ïa ratou i te reira. 12 Tamau maite noa ˈtura ratou i te hopoi mai i te mau ô, te mau tuhaa ahuru+ e te mau mea moˈa. Ua tuuhia o Konania ati Levi ei tiaau i teie mau mea atoa. O Simei to ˈna taeae te piti i muri mai ia ˈna. 13 Te mau tavini o tei tauturu ia Konania e ia Simei to ˈna taeae, o Iehiela ïa, Azazia, Nahata, Asahela, Ierimota, Iosabada, Eliela, Isemakia, Mahata e Benaia, mai ta te arii Hezekia i faaue. E o Azaria te tiaau o te hiero o te Atua mau. 14 O Kore te tamaiti a Iemina, te ati Levi tiai uputa i te pae hitia o te râ,+ tei haapao i te mau ô horoa noa+ na te Atua mau, e na ˈna i opere i te mau ô pûpûhia na Iehova+ e te mau mea moˈa roa.+ 15 I raro aˈe i ta ˈna aratairaa, o Edene ïa, Miniamina, Iesua, Semaia, Amaria e Sekania, i roto i te mau oire o te mau tahuˈa,+ i to ratou toroa tiaturihia. Ua titauhia ia tufa ratou i te tuhaa a to ratou mau taeae ia au i ta ratou mau pǔpǔ,+ ia aifaito te tuhaa a te feia paari e ta te feia apî. 16 E opereraa taa ê atu teie i te opereraa ravehia no te ati Levi* i tapaohia i roto i te pǎpǎraa tupuna, o te haere mai i te mau mahana atoa no te tavini i roto i te hiero o Iehova e no te rave i te mau hopoia a ta ratou mau pǔpǔ, oia atoa no ta ratou mau tamaiti mai te toru matahiti e nia ˈtu.
17 Ua tapaohia te mau tahuˈa i roto i te pǎpǎraa tupuna ia au i to ratou utuafare,+ mai to te ati Levi e 20 matahiti e nia ˈtu,+ ia au i te mau hopoia a ta ratou mau pǔpǔ.+ 18 I roto i te pǎpǎraa tupuna, ua tapao-atoa-hia ta ratou mau vahine faaipoipo, ta ratou mau tamaiti e ta ratou mau tamahine, oia atoa te mea apî roa, ta ratou amuiraa taatoa (no to ratou hoi toroa tiaturihia i ara ˈi ratou ia vai moˈa noa ratou no te taviniraa moˈa). 19 O te huaai o Aarona atoa tei tapaohia i roto i te pǎpǎraa tupuna, te mau tahuˈa e ora ra i rapaeau mai i to ratou mau oire.+ I roto i te mau oire atoa, ua maitihia te tahi mau tane ma to ratou iˈoa no te opere i te tuhaa i te mau tane* atoa i rotopu i te mau tahuˈa e i te feia atoa i tapaohia i roto i te pǎpǎraa tupuna o te ati Levi.
20 Ua na reira Hezekia na Iuda taatoa, e tamau noa ˈtura oia i te rave i te mea maitai e te mea tia i mua ia Iehova to ˈna Atua, e aita oia i taiva ia ˈna. 21 E te mau mea atoa ta ˈna i rave no te imi i to ˈna Atua, no te taviniraa anei i te hiero o te Atua mau+ aore ra no te Ture e te mau faaueraa, ua rave oia ma te aau taatoa, e ua manuïa oia.
32 I muri aˈe i to Hezekia raveraa i tera mau mea atoa ma te taiva ore,+ haere maira te arii Senakeriba no Asura e tomo maira i Iuda. Haaati aˈera oia i te mau oire auahia i te patu ma te faaoti papu e tuparari i te mau aua e e haru i taua mau oire ra.+
2 I te iteraa Hezekia e ua haere mai Senakeriba e ua opua i te aro ia Ierusalema, 3 faaoti ihora oia, i muri aˈe i to ˈna paraparauraa i ta ˈna huiarii e to ˈna feia tamaˈi, e tapoˈi i te mau pape pihaa i rapae i te oire i te repo,+ e turu aˈera ratou ia ˈna. 4 Mea rahi te feia tei haaputuputuhia mai. Tapoˈi aˈera ratou i te mau pape pihaa atoa i te repo e tapea aˈera i te tahora e tahe ra na taua fenua ra, ma te parau: “Eiaha te mau arii o Asura ia ite i teie rahiraa pape ia haere mai ratou.”
5 Hau atu â, ma te itoito, patu faahou ihora oia i te aua o tei parari e hamani ihora i te tahi mau pare i nia iho. E i rapae mai, patu ihora oia i te tahi atu aua. Tataî atoa ihora oia ia Milo*+ i te Oire o Davida, e hamani ihora oia e rave rahi mauhaa tamaˈi* e te paruru. 6 Faatoroa ihora oia i te tahi mau raatira faehau i nia i te nunaa, haaputuputu ihora oia i te taata atoa i te mahora o te uputa o te oire e faaitoito ihora ia ratou* ma te parau: 7 “Ia itoito e ia puai outou. Eiaha e mǎtaˈu e eiaha e riaria i te arii o Asura+ e te nahoa na muri ia ˈna, mea rahi aˈe hoi ia tatou nei i te rahiraa ia ˈna ra.+ 8 E rima taata* to ǒ ia ˈna ra. Ia tatou nei râ, o Iehova ïa to tatou Atua, no te tauturu ia tatou e no te aro i ta tatou mau tamaˈi.”+ Itoitohia ihora te nunaa i teie mau parau a te arii Hezekia no Iuda.+
9 I muri aˈe, tei te oire o Lakisa+ te arii Senakeriba no Asura e ta ˈna mau faehau. Tono maira oia i ta ˈna mau tavini i Ierusalema e parau i te arii Hezekia no Iuda e i to Iuda e noho ra i Ierusalema:+
10 “Te parau mai ra te arii Senakeriba no Asura: ‘Te tiaturi ra outou i te aha, a faaea noa ˈi outou i Ierusalema? Ua haaatihia hoi oia.+ 11 Aita anei Hezekia e haavare ra ia outou ia pohe outou i te oˈe e te poihâ, a parau ai oia: “E faaora Iehova to tatou Atua ia tatou i te rima o te arii o Asura”?+ 12 Na teie â taata, o Hezekia, i faaore i te mau vahi teitei+ e te mau fata a to outou Atua,+ a parau atu ai i to Iuda e to Ierusalema: “E tipapa outou i mua hoê noa fata, e i nia i te reira outou e tutui ai i ta outou mau tusia ia au auahi te reira!”+ 13 Aita anei outou i ite eaha ta ˈu e ta to ˈu mau tupuna i rave i te mau nunaa atoa o te tahi atu mau fenua?+ Ua haere anei i te mau atua o te mau nunaa o te tahi atu mau fenua ia faaora i to ratou fenua i to ˈu nei rima?+ 14 O vai i rotopu i te mau atua o teie mau nunaa ta to ˈu mau tupuna i haamou, ua haere ia ˈna ia faaora i to ˈna nunaa i to ˈu nei rima? Te manaˈo ra ïa outou e haere i to outou Atua ia faaora ia outou i to ˈu nei rima?+ 15 Eiaha outou e vare ia Hezekia, eiaha e vaiiho ia ˈna ia haavare ia outou mai tera!+ Eiaha outou e tiaturi ia ˈna, aita hoi i haere i te mau atua o te tahi atu mau nunaa aore ra faatereraa ia faaora i to ratou nunaa i to ˈu nei rima e te rima o to ˈu mau tupuna. E nafea ïa to outou Atua e faaora ˈi ia outou i to ˈu nei rima?’”+
16 Ua tamau noa ta Senakeriba mau tavini i te faaooo ia Iehova te Atua mau e ia Hezekia ta ˈna tavini. 17 Papai atoa maira Senakeriba i te rata+ no te faaino ia Iehova te Atua o Iseraela+ e no te vahavaha ia ˈna. Teie tei papaihia i roto i tera mau rata: “Mai te mau atua o te mau nunaa o te tahi atu mau fenua aita i haere ia ratou ia faaora i to ratou nunaa i to ˈu nei rima,+ eita atoa te Atua o Hezekia e faaora i to ˈna nunaa i to ˈu rima.” 18 Paraparau puai noa maira ta ˈna mau tavini i te nunaa o Ierusalema i nia i te aua na roto i te reo o te ati Iuda ia mǎtaˈu e ia riaria ratou, no te haru mai i te oire.+ 19 Ua vahavaha ratou i te Atua o Ierusalema mai ia ratou i vahavaha i te mau atua o te mau nunaa o te fenua nei, tei hamanihia e te rima taata. 20 Ua tamau noa râ te arii Hezekia e te peropheta Isaia+ te tamaiti a Amoza i te pure no teie ohipa a tiaoro noa ˈi i te raˈi ia tauturu mai.+
21 Tono maira Iehova i te hoê melahi e haapohe ihora i te mau aito puai atoa,+ te mau aratai e te mau raatira o te puhapa a te arii o Asura. Hoˈi atura ïa te arii i to ˈna fenua ma te haama. I muri iho, tomo atura oia i roto i te hiero* o to ˈna atua, e i reira, taparahi ihora vetahi o ta ˈna mau tamaiti ia ˈna i te ˈoˈe.+ 22 Mea na reira Iehova i te faaoraraa ia Hezekia e to Ierusalema i te rima o te arii Senakeriba no Asura e i te rima o te taata atoa, e horoa ihora oia i te faafaaearaa ia ratou ati aˈe. 23 Mea rahi tei hopoi mai i te ô na Iehova i Ierusalema e te taoˈa moni rahi na te arii Hezekia no Iuda,+ e ua faatura-rahi-hia oia e te mau nunaa atoa i muri aˈe i te reira.
24 I taua mau mahana ra, roohia ihora Hezekia i te maˈi e fatata ihora oia i te pohe. Pure aˈera oia ia Iehova,+ o tei pahono mai ia ˈna ma te horoa i te hoê tapao.+ 25 Aita râ Hezekia i faaite i to ˈna mauruuru no te maitai i ravehia i nia ia ˈna. Ua tupu hoi te teoteo i roto i to ˈna aau, e riri ihora te Atua ia ˈna, ia Iuda e Ierusalema. 26 Tera râ, faahaama ihora Hezekia ia ˈna i te teoteo o to ˈna aau,+ o ˈna e te feia no Ierusalema, e aita ˈtura ratou i roohia i to Iehova riri i te mau mahana o Hezekia.+
27 Ua noaa mai ia Hezekia te faufaa e rave rahi e te hanahana.+ Ua hamani oia i te fare vairaa taihaa no ˈna+ no te vaiiho i te ario, te auro, te ofai maitai roa, te monoˈi zuri, te paruru e te mau taoˈa maitai roa atoa. 28 Ua hamani atoa oia i te fare vairaa maa no te huero maa, te uaina apî e te hinu, oia atoa i te vairaa animara no te mau huru nǎnǎ animara atoa e te vairaa mamoe. 29 Ua patu atoa oia i te tahi mau oire, e ua noaa mai ta ˈna e rave rahi animara, te mamoe, e te nǎnǎ animara rarahi, no te mea ua horoa te Atua e rave rahi faufaa na ˈna. 30 Na Hezekia i tapoˈi i te pape pihaa+ i nia o Gihona+ i te repo, a aratai atu ai i taua pape ra i raro, i te pae tooa o te râ o te Oire o Davida.+ Ua manuïa te mau ohipa atoa ta Hezekia i rave. 31 Tera râ, i te tonoraahia te mau auvaha o te huiarii o Babulonia e ui ia ˈna no nia i te tapao+ tei tupu i taua fenua ra,+ vaiiho atura te Atua mau ia ˈna o ˈna anaˈe no te tamata ia ˈna,+ no te ite i te mau mea atoa e vai ra i roto i to ˈna aau.+
32 Te toea o te aamu o Hezekia e te mau ohipa tei faaite i to ˈna here taiva ore,+ ua papaihia ïa i roto i te orama a te peropheta Isaia,+ te tamaiti a Amoza, i roto i te Buka o te mau arii o Iuda e o Iseraela.+ 33 Taoto atura Hezekia i roto i te pohe e to ˈna mau tupuna, e hunahia ihora oia i nia i te paumaraa e tae atu ai i te menema o te mau tamaiti a Davida.+ I to ˈna poheraa, ua faahanahana to Iuda taatoa e te feia no Ierusalema ia ˈna. E riro maira ta ˈna tamaiti o Manase ei arii ei mono ia ˈna.
33 E 12 matahiti to Manase+ i to ˈna riroraa mai ei arii, e e 55 matahiti to ˈna faatereraa i Ierusalema.+
2 Ua rave oia i te mea ino i mua ia Iehova, ma te rave i te mau peu hairiiri a te mau nunaa ta Iehova i tiahi i mua i te nunaa o Iseraela.+ 3 Ua patu faahou oia i te mau vahi teitei ta to ˈna metua tane o Hezekia i vavahi.+ Ua faatia oia i te fata no te mau Baala e ua hamani oia i te raau haamoriraa.* Ua tipapa oia i mua i te nuu taatoa o te raˈi e ua haamori oia ia ratou.+ 4 Ua faatia atoa oia i te fata i roto i te hiero* o Iehova,+ o ta Iehova i parau: “I Ierusalema, to ˈu iˈoa e vai ai e a muri noa ˈtu.”+ 5 E i roto i na aua e piti o te hiero o Iehova,+ ua faatia oia i te fata no te nuu taatoa o te raˈi. 6 Ua tanina oia i ta ˈna iho mau tamaiti+ i roto i te peho o te Tamaiti a Hinoma.+ Ua rave oia i te peu tahutahu,+ te peu hiˈohiˈo, e ua faatoroa i te feia hiˈohiˈo e te feia e demoni hiˈohiˈo to ratou.+ Mea rahi roa te ohipa ino ta ˈna i rave i te aro o Iehova no te faainoino ia ˈna.
7 Ua tuu oia i te tii taraihia ta ˈna i hamani i roto i te hiero o te Atua mau,+ ta te Atua hoi i parau ia Davida e i ta ˈna tamaiti ra ia Solomona: “E tuu vau i to ˈu iˈoa e a muri noa ˈtu+ i roto i teie fare e i Ierusalema, te oire o ta ˈu i maiti i rotopu i te mau opu atoa o Iseraela. 8 Eita roa vau e tiahi faahou i te ati Iseraela i te fenua ta ˈu i horoa no to ratou mau tupuna, mai te peu noa râ e haapao maitai ratou i te mau mea atoa ta ˈu i faaue ia ratou, te Ture taatoa, te mau faaueraa e te mau faaotiraa haavaraa horoahia na roto ia Mose.” 9 Ua faahahi ê noa Manase ia Iuda e te feia no Ierusalema, e ua turai te reira ia ratou ia rave i te ino o tei rahi aˈe i ta te mau nunaa ta Iehova i haamou i mua i te ati Iseraela.+
10 Ua paraparau noa mai Iehova ia Manase e to ˈna nunaa. Aita râ ratou i faaroo.+ 11 Faahaere maira ïa Iehova i te mau raatira o te nuu o te arii o Asura e aro ia ratou. Haru maira ratou ia Manase i te tarou,* tapea aˈera ia ˈna i roto e piti tapea veo e hopoi atura ia ˈna i Babulonia. 12 I roto i to ˈna ati, taparu ihora oia i te farii maitai ia* Iehova to ˈna Atua e faahaehaa roa ˈtura oia ia ˈna iho i mua i te Atua o to ˈna mau tupuna. 13 Pure noa ˈtura oia i te Atua, e putapû ihora te Atua i ta ˈna pure, ua faaroo oia i ta ˈna taparuraa, e faahoˈi ihora te Atua ia ˈna i Ierusalema i to ˈna tiaraa arii.+ Mea na reira to Manase iteraa e o Iehova te Atua mau.+
14 I muri aˈe i te reira, patu atura oia i te hoê aua teitei i rapae no te Oire o Davida+ i te pae tooa o te râ o Gihona,+ i roto i te peho. Ua haere roa tera aua i te Uputa o te iˈa,+ e mai reira ˈtu, ua haaati te aua i te oire e tae noa ˈtu i Ophela.+ Hau atu â, faatoroa ˈtura oia i te tahi mau raatira nuu i roto i te taatoaraa o te mau oire auahia i te patu i Iuda. 15 Faaore atura oia i te mau atua ěê e te idolo i roto i te hiero o Iehova,+ e te mau fata atoa ta ˈna i faatia i nia i te mouˈa o te hiero o Iehova+ e i Ierusalema, e faaue atura oia ia faaruehia te reira i rapaeau i te oire. 16 Faaineine atoa ˈtura oia i te fata a Iehova,+ haamata ˈtura i te pûpû i te tusia no te hau+ e te tusia haamauruuru+ i nia iho, e parau atura ia Iuda ia tavini ia Iehova te Atua o Iseraela. 17 Tera râ, noa ˈtu te pûpû ra te nunaa i te tusia ia Iehova anaˈe, to ratou Atua, tei nia i te mau vahi teitei ratou i te raveraa i te reira.
18 Te toea o te aamu o Manase, ta ˈna pure i to ˈna Atua e te mau parau a te feia ite orama tei paraparau ia ˈna i te iˈoa o Iehova te Atua o Iseraela, ua faatiahia ïa i roto i te aamu o te mau arii o Iseraela. 19 Ta ˈna atoa pure+ e te fariiraahia ta ˈna taparuraa, ta ˈna mau hara atoa e to ˈna taivaraa,+ te mau vahi i patu ai oia i te mau vahi teitei e i faatia ˈi oia i te mau raau haamoriraa+ e te mau tii, te mau mea atoa ta ˈna i rave hou oia a faahaehaa ˈi ia ˈna, ua faatiahia ïa i roto i te mau papai a ta ˈna feia ite orama. 20 Taoto atura Manase i roto i te pohe e to ˈna mau tupuna, e hunahia ihora oia i pihai iho i to ˈna fare. E riro maira ta ˈna tamaiti ra o Amôna ei arii ei mono ia ˈna.+
21 E 22 matahiti to Amôna+ i to ˈna riroraa mai ei arii, e e piti matahiti to ˈna faatereraa i Ierusalema.+ 22 Ua rave noa oia i te mea ino i mua ia Iehova, mai ta to ˈna metua tane o Manase i rave na.+ Ua pûpû Amôna i te tusia i te mau tii nanaˈohia atoa ta to ˈna metua tane o Manase i hamani,+ e ua tavini ia ratou. 23 Aita râ oia i faahaehaa ia ˈna i mua ia Iehova+ mai ia Manase to ˈna metua tane i faahaehaa ia ˈna.+ Ua faarahi atu â râ Amôna i ta ˈna hara. 24 I te hoê mahana, opua ihora ta ˈna mau tavini e rave i te tahi ohipa ino i nia ia ˈna+ e haapohe atura ia ˈna i roto i to ˈna fare. 25 Taparahi aˈera râ te feia no taua fenua ra i te taata atoa o tei opua e haapohe i te arii Amôna+ e faaarii aˈera ratou ia Iosia+ ta ˈna tamaiti ei mono ia ˈna.
34 E vaˈu matahiti to Iosia+ i to ˈna riroraa mai ei arii, e e 31 matahiti to ˈna faatereraa i Ierusalema.+ 2 Ua rave oia i te mea maitai i mua ia Iehova. Ua pee oia i te hiˈoraa o Davida to ˈna tupuna e aita oia i fariu i te pae atau e i te pae aui.
3 I te vaˈu o te matahiti te faatereraa oia, mea apî noa â oia, haamata ihora oia i te imi i te Atua o Davida to ˈna tupuna.+ E i te 12 o te matahiti te faatereraa oia, haamata ihora oia i te tamâ ia Iuda e ia Ierusalema+ i te mau vahi teitei+ e te mau raau haamoriraa,* i te mau tii nanaˈohia+ e te mau tii faatôhia.* 4 Hau atu â, vavahihia ihora te mau fata a te mau Baala i mua ia ˈna, e vavahi ihora oia i te mau fata mea noˈanoˈa e vai ra i nia iho. Tuparari atoa ihora oia i te mau raau haamoriraa, te mau tii nanaˈohia e te mau tii faatôhia, faahuˈahuˈa roa aˈera oia i te reira e ueue atura i taua huˈa repo ra i nia i te mau vahi hunaraa o te feia tei pûpû noa na i te tusia ia ratou.+ 5 E tutui ihora oia i te mau ivi o te mau tahuˈa i nia i ta ratou mau fata.+ Mea na reira oia i te tamâraa ia Iuda e ia Ierusalema.
6 I roto i te mau oire o Manase, Epheraima,+ Simeona e tae roa ˈtu i Naphatali, e na te mau vahi ano ati aˈe, 7 vavahi ihora oia i te mau fata e tuparari ihora i te mau raau haamoriraa e te mau tii nanaˈohia+ e faahuˈahuˈa roa ˈtura i te reira. Vavahi ihora oia i te mau fata mea noˈanoˈa atoa na te fenua taatoa o Iseraela,+ e hoˈi atura i Ierusalema i muri iho.
8 I te 18 o te matahiti te faatereraa oia, i muri aˈe i to ˈna tamâraa i te fenua e te hiero,* tono atura oia ia Saphana+ te tamaiti a Azalia, te tavana o te oire ra o Maaseia e te taata haaputu parau ra o Ioa te tamaiti a Ioahaza, e tataî i te hiero o Iehova to ˈna Atua.+ 9 Haere maira ratou ia Hilikia ra te tahuˈa rahi e horoa maira ia ˈna ra te moni tei hopoihia mai i te hiero o te Atua, o ta te ati Levi o te tavini ra ei tiai uputa i haaputu mai no ǒ i te feia no Manase, no Epheraima e te toea o Iseraela,+ oia atoa no ǒ i to Iuda ra, to Beniamina e te feia no Ierusalema. 10 Tuuhia ˈtura te moni i te feia i faatoroahia no te haapao i te mau tataîraa i te hiero o Iehova. Faaohipa aˈera te mau rave ohipa i tera moni no te tataî e no te faaapî i te hiero o Iehova. 11 Horoahia ˈtura te moni i te feia rimaî e te feia patu no te hoo mai i te ofai taraihia e te raau no te mau teˈa, e no te taui i te mau pou o te mau fare ta te mau arii o Iuda i vaiiho ma te ore e haapao.+
12 Rave maite atura taua mau taata ra i ta ratou ohipa.+ Ua faatoroahia i nia ia ratou na ati Levi ra ei tiaau: o Iahata raua Obadia no te ati Merari,+ e o Zekaria raua Mesulama no te ati Kohata.+ E no te ati Levi, te feia atoa o tei ite maitai i te hauti i te upaupa,+ 13 na ratou i haapao i te mau rave ohipa,* e o ratou te mau tiaau o te taatoaraa o te feia e rave ra i te ohipa i roto i te mau tuhaa taviniraa atoa. E papai parau, e feia toroa, e e tiai uputa vetahi no roto i te ati Levi.+
14 A tiihia ˈi te moni tei hopoihia mai i te hiero o Iehova,+ ite maira te tahuˈa Hilikia i te buka o te Ture a Iehova+ tei horoahia mai na roto ia* Mose.+ 15 Na ô atura ïa Hilikia ia Saphana te papai parau: “Ua itea mai ia ˈu te buka o te Ture i roto i te fare o Iehova.” Horoa ˈtura Hilikia i te buka ia Saphana ra. 16 Hopoi atura Saphana i te buka i te arii ra e na ô atura ia ˈna: “Te rave ra ta oe mau tavini i te mau mea atoa tei faauehia ia ratou. 17 Ua ohi ratou i te moni ta ratou i ite mai i roto i te fare o Iehova, e ua horoa ˈtu i te mau tiaau e te feia e rave ra i te ohipa.” 18 Na ô atoa ˈtura Saphana te papai parau i te arii: “E buka ta Hilikia te tahuˈa i horoa mai.”+ Haamata ihora Saphana i te taio i taua buka ra i mua i te arii.+
19 I te faarooraa iho â te arii i te mau parau o te Ture, hahae ihora oia i to ˈna ahu.+ 20 Faaue ihora te arii ia Hilikia, ia Ahikama+ te tamaiti a Saphana, ia Abadona te tamaiti a Mika, ia Saphana te papai parau e ia Asaia te tavini a te arii: 21 “A haere e ui ia Iehova no ˈu e no te feia atoa e toe ra i Iseraela e i Iuda no nia i te mau parau o te buka tei itehia mai. Mea uˈana te riri o Iehova ta ˈna e manii i nia ia tatou, no te mea aita to tatou mau tupuna i haapao i te parau a Iehova. Aita ratou i rave i tei papaihia i roto i teie buka.”+
22 Haere aˈera ïa Hilikia e te feia o tei tonohia e te arii ia Hulada ra te peropheta vahine.+ E vahine faaipoipo o ˈna na te taata haapao ahu ra o Saluma te tamaiti a Tikava te tamaiti a Harahasa. Te noho ra oia i roto i te tuhaa apî o te oire o Ierusalema. I reira ratou i te paraparauraa ia ˈna.+ 23 Na ô maira oia ia ratou: “Teie ta Iehova te Atua o Iseraela e parau ra: ‘A faaite i te taata o tei tono ia outou ia ˈu nei: 24 “Teie ta Iehova e parau ra: ‘E faatae mai au i te ati i teie vahi e i nia i to reira mau taata,+ te mau ati atoa i papaihia i roto i te buka+ i taiohia i mua i te arii o Iuda. 25 No te mea ua faarue ratou ia ˈu+ e te faahaere ra ratou i te au auahi tusia i nia na te tahi atu mau atua no te faainoino ia ˈu+ i te mau ohipa atoa a to ratou rima, e manii to ˈu riri rahi i nia i teie vahi e eita te reira e pohe.’”+ 26 A parau atoa ˈtu râ i te arii o Iuda o tei tono ia outou no te ui ia Iehova: “Teie ta Iehova te Atua o Iseraela e parau ra: ‘No te mau parau ta oe i faaroo,+ 27 no te mea ua putapû* to aau e ua faahaehaa oe ia oe i mua i te Atua i to oe faarooraa i ta ˈu i parau no nia i teie vahi e to reira mau taata, ua faahaehaa oe ia oe i mua ia ˈu, ua hahae oe i to oe ahu e ua taˈi oe i mua ia ˈu, ua faaroo atoa vau ia oe,+ te parau mai ra Iehova. 28 No reira vau e amui ai ia oe i to oe mau tupuna, e tuuhia oe i roto i to oe menema na roto i te hau, e eita to mata e ite i te ati o ta ˈu e faatae mai i teie vahi e i nia i to reira mau taata.’”’”+
Hopoi aˈera ratou i tera poroi i te arii ra. 29 Titau ihora te arii i te mau matahiapo atoa o Iuda e Ierusalema.+ 30 Pauma aˈera te arii i te hiero o Iehova e te mau tane atoa o Iuda, te feia o Ierusalema, te mau tahuˈa, te ati Levi, oia hoi te nunaa taatoa, te feia paari mai te feia apî. Taio ihora oia no ratou i te mau parau atoa o te buka o te faufaa tei itehia mai i roto i te hiero o Iehova.+ 31 Tia aˈera te arii mai to ˈna vahi e faaau ihora i te hoê faufaa*+ i mua ia Iehova: ua faaau oia e faaroo ia Iehova e e haapao i ta ˈna mau ture, ta ˈna mau haamanaˈoraa, e ta ˈna mau faaueraa ma te aau taatoa e te ora* taatoa,+ ma te haapao i te mau parau o te faufaa tei papaihia i roto i tera buka.+ 32 Hau atu â, faaitoito ihora oia i te feia atoa i Ierusalema e Beniamina ia farii i taua faufaa ra. E haapao atura te feia no Ierusalema i te faufaa a te Atua, te Atua o to ratou mau tupuna.+ 33 Faaore ihora ïa Iosia pauroa te mea* hairiiri i te mau tuhaa fenua o te ati Iseraela,+ e faaitoito ihora oia i te taata atoa i Iseraela ia tavini ia Iehova to ratou Atua. I te roaraa o te oraraa* o Iosia, aita ratou i fariu ê atu ia Iehova te Atua o to ratou mau tupuna.
35 Faatupu atura Iosia i te hoê Pasa+ na Iehova i Ierusalema. Tupaihia ˈtura te mau animara no te tusia o te Pasa+ i te 14 o te mahana o te avaˈe matamua.+ 2 Tuu atura oia i te mau tahuˈa i ta ratou tuhaa taviniraa e faaitoito atura ia ratou ia rave i ta ratou ohipa i te hiero* o Iehova.+ 3 Na ô atura oia i te ati Levi, te mau orometua haapii o Iseraela taatoa,+ te feia moˈa no Iehova: “A tuu i te Afata moˈa i roto i te fare ta Solomona te tamaiti a Davida te arii o Iseraela i patu.+ Eita outou e amo faahou i te reira i nia i to outou tapono.+ I teie nei, a tavini ia Iehova to outou Atua e to ˈna nunaa o Iseraela. 4 E a faaineine ia outou ia au i to outou mau utuafare, ia au i ta outou mau pǔpǔ, ia au i ta te arii Davida+ no Iseraela e ta ˈna tamaiti ra o Solomona+ i papai. 5 A haere i roto i te vahi moˈa e a haaputuputu ia outou i roto i ta outou iho pǔpǔ, ia tavini outou i te nunaa a rave atu ai i te ohipa i tuuhia ˈtu i te ati Levi ra i roto i te mau opu fetii o to outou tupuna. 6 A tupai i te mau animara no te tusia o te Pasa,+ a haamoˈa ia outou e a rave i te tahi mau faanahoraa no to outou mau taeae, no te haapao i te parau a Iehova ta ˈna i faaite na roto ia Mose.”
7 Rave atura Iosia no roto i ta ˈna mau nǎnǎ i te fanauˈa mamoe oni e te puaaniho oni apî ei tusia no te Pasa no te nunaa, no te feia atoa i tae mai: e 30 000 ia amuihia, oia atoa 3 000 rahiraa puaatoro. No roto i te faufaa a te arii tera mau animara.+ 8 Ua horoa atoa ta ˈna huiarii i te ô horoa noa no te nunaa, te mau tahuˈa e te ati Levi. Area Hilikia,+ Zekaria e Iehiela, te mau aratai o te hiero o te Atua mau, ua horoa ïa i te mau tahuˈa ra 2 600 fanauˈa mamoe e puaaniho apî ei tusia no te Pasa e 300 puaatoro. 9 E ei ô no te ati Levi, ua horoa Konania e Semaia raua Netanela to ˈna na taeae, o Hasabia, Ieiela e Iosabada, te mau raatira o te ati Levi, 5 000 fanauˈa mamoe e puaaniho apî ei tusia no te Pasa e 500 puaatoro.
10 I te otiraa tera mau faanahoraa i te ravehia, tia maira te mau tahuˈa i to ratou vahi e te ati Levi ia au i ta ratou mau pǔpǔ,+ mai ta te arii i faaue. 11 Tupai aˈera ratou i te mau animara no te tusia o te Pasa.+ Pîpî aˈera te mau tahuˈa i te toto i horoahia ia ratou ra i nia i te fata,+ a hohore ai te ati Levi i te iri o te mau animara.+ 12 I muri iho, faaineine aˈera ratou i te mau tusia taauahi no te opere i te reira i te toea o te nunaa, o tei haaputuputuhia ia au i to ratou mau opu fetii, ia pûpûhia ˈtu te reira ia Iehova mai tei papaihia i roto i te buka a Mose. E ua na reira atoa ratou no te mau puaatoro. 13 Tunu* aˈera ratou i te mau animara no te Pasa i nia i te auahi mai tei matauhia.+ Tunu aˈera ratou i te mau ô moˈa i roto i te pani, te pani rahi e te farai pani, e haavitiviti maira ratou i te hopoi i te reira i te nunaa taatoa ra. 14 Faaineine aˈera ratou i te Pasa no ratou iho e no te mau tahuˈa, ua pûpû hoi te mau tahuˈa, te huaai o Aarona, i te mau tusia taauahi e te mii e po noa ˈtu. Mea na reira te ati Levi i te faaineineraa i te Pasa no ratou iho e no te mau tahuˈa, te huaai o Aarona.
15 Tei ta ratou tuhaa taviniraa te feia himene, te huaai o Asapha,+ ia au i te faaueraa a Davida,+ Asapha,+ Hemana e Iedutuna+ te taata ite orama a te arii. Tei te mau uputa atoa te mau tiai uputa.+ Aita i titauhia ia vaiiho ratou i ta ratou tuhaa taviniraa, na to ratou mau taeae hoi, te ati Levi, i faaineine i te Pasa no ratou. 16 I tera ïa mahana i faaineinehia ˈi te mau mea atoa i faauehia e Iehova no te faatupu i te Pasa+ e no te pûpû i te mau tusia taauahi i nia i te fata a Iehova, ia au i te faaueraa a te arii Iosia.+
17 Faatupu aˈera te ati Iseraela o tei haaputuputu mai i Ierusalema i te Pasa i taua taime ra, e te Oroa pane hopue ore e hitu mahana i te maoro.+ 18 Aita te hoê Pasa mai teie i faatupuhia aˈenei i Iseraela mai te mau mahana mai â o te peropheta Samuela. Aita atoa te tahi atu mau arii o Iseraela i faatupu aˈenei i te hoê Pasa mai teie i faatupuhia e Iosia,+ te mau tahuˈa, te ati Levi, to Iuda e to Iseraela tei haaputuputu mai, e te feia no Ierusalema. 19 Ua faatupuhia teie Pasa i te 18 o te matahiti te faatereraa Iosia.
20 I muri aˈe i te reira, i te otiraa ia Iosia te tataîraa o te hiero, haere maira te arii Neko+ no Aiphiti e aro i Karekemisa i te anavai Eupharate. Haere atura Iosia e aro ia ˈna.+ 21 Tono ihora ïa Neko i te vea e parau ia ˈna: “E te arii o Iuda, eaha oe i haere mai ai e aro ia ˈu? E ere oe ta ˈu e haere mai ra e aro i teie mahana. E nunaa ê ta ˈu e aro nei, e te parau mai ra te Atua ia ˈu ia haavitiviti. Eiaha oe e patoi i te Atua, a pohe oe ia ˈna, tei ia ˈu nei hoi oia.” 22 Aita râ Iosia i fariu ê atu ia ˈna. Taui ihora ïa oia i to ˈna ahu ia ore oia ia itehia mai+ no te aro ia Neko. Aita oia i faaroo i te parau a Neko, no ǒ i te Atua ra hoi taua parau ra. Haere maira ïa oia e aro i te peho o Megido.+
23 Teˈa maira te feia teˈa i te arii Iosia, e na ô atura te arii i ta ˈna mau tavini: “A afai ia ˈu vahi ê, ua pepe maitai au.” 24 Tatara maira ïa ta ˈna mau tavini ia ˈna i rapae i te pereoo, tuu atura ia ˈna i roto i te piti o to ˈna pereoo tamaˈi e afai atura ia ˈna i Ierusalema. Mea na reira oia i te poheraa. Hunahia ˈtura oia i roto i te menema o to ˈna mau tupuna,+ e oto aˈera Iuda e Ierusalema taatoa i to ˈna poheraa. 25 Himene atura Ieremia+ i te tahi himene oto no Iosia, e himene noa ˈtura te mau tane e vahine himene+ no nia ia Iosia i roto i ta ratou mau himene oto e tae roa mai i teie mahana. Faaotihia ihora e himenehia tera mau himene i Iseraela, e ua papaihia te reira i roto i te anairaa himene oto.
26 Te toea o te aamu o Iosia, te here taiva ore ta ˈna i faaite i te haapaoraa oia i tei papaihia i roto i te Ture a Iehova, 27 e te mau mea ta ˈna i rave, mai te omuaraa e tae atu i te hopea, ua papaihia ïa i roto i te Buka o te mau arii o Iseraela e o Iuda.+
36 Faaarii atura te nunaa o taua fenua ra ia Iehoahaza+ i Ierusalema ei mono ia Iosia to ˈna metua tane.+ 2 E 23 matahiti to Iehoahaza i to ˈna riroraa mai ei arii, e e toru avaˈe to ˈna faatereraa i Ierusalema. 3 Ua faaere râ te arii Neko no Aiphiti ia Iehoahaza i to ˈna tiaraa i Ierusalema e ua faaaufau oia i taua fenua ra 100 taleni* ario e hoê taleni auro.+ 4 Hau atu â, ua faaarii te arii o Aiphiti i to Iehoahaza taeae ra o Eliakima i nia ia Iuda e Ierusalema, e ua topa oia ia ˈna i te iˈoa Iehoiakima. Area o Iehoahaza, ua hopoi Neko+ ia ˈna i Aiphiti.+
5 E 25 matahiti to Iehoiakima+ i to ˈna riroraa mai ei arii, e 11 matahiti to ˈna faatereraa i Ierusalema. Ua rave noa oia i te mea ino i mua ia Iehova to ˈna Atua.+ 6 Haere maira te arii Nebukanesa+ no Babulonia e aro ia ˈna no te hopoi tîtî ia ˈna i Babulonia,+ tapeahia i roto e piti tapea veo. 7 Afai ihora Nebukanesa i te tahi mau taihaa o te hiero* o Iehova i Babulonia e tuu atura i te reira i roto i to ˈna aorai i Babulonia.+ 8 Te toea o te aamu o Iehoiakima, te mau mea hairiiri ta ˈna i rave e te mau mea ino atoa no nia ia ˈna, ua papaihia ïa i roto i te Buka o te mau arii o Iseraela e o Iuda. E riro maira ta ˈna tamaiti ra o Iehoiakina ei arii ei mono ia ˈna.+
9 E 18 matahiti to Iehoiakina+ i to ˈna riroraa mai ei arii, e e toru avaˈe e hoê ahuru mahana to ˈna faatereraa i Ierusalema. Ua rave noa oia i te mea ino i mua ia Iehova.+ 10 I te haamataraa o te matahiti,* tono ihora te arii Nebukanesa i to ˈna mau taata e tii ia Iehoiakina no te hopoi ia ˈna i Babulonia,+ e no te rave mai i te mau taoˈa moni rahi o te hiero o Iehova.+ Faaarii ihora oia ia Zedekia, te taeae o te metua tane o Iehoiakina, i nia ia Iuda e Ierusalema.+
11 E 21 matahiti to Zedekia+ i to ˈna riroraa mai ei arii, e 11 matahiti to ˈna faatereraa i Ierusalema.+ 12 Ua rave noa oia i te mea ino i mua ia Iehova to ˈna Atua. Aita oia i faahaehaa ia ˈna i mua i te peropheta Ieremia,+ tei paraparau ia au i te faaueraa a Iehova. 13 Ua orure hau atoa oia i te arii Nebukanesa,+ o tei faahoreo ia ˈna i te ora o te Atua. Ua haapaari oia,* ua faaetaeta oia i to ˈna aau e aita i farii e fariu ia Iehova ra te Atua o Iseraela. 14 Ua taiva rahi te mau tiaau o te mau tahuˈa e te nunaa ma te rave i te mau peu hairiiri atoa a te mau nunaa, e ua haaviivii ratou i te hiero o Iehova+ ta ˈna i haamoˈa i Ierusalema.
15 No to ˈna aumihi i to ˈna nunaa e te vahi e parahi ai oia, ua faaara noa mai Iehova te Atua o to ratou mau tupuna ia ratou na roto i ta ˈna mau vea, aita oia i faaea i te faaara ia ratou. 16 Ua haamaau noa râ ratou i te mau vea a te Atua mau,+ ua vahavaha i ta ˈna mau parau+ e ua faaooo i ta ˈna mau peropheta+ e tupu noa ˈtu te riri o Iehova i to ˈna nunaa+ e eita faahou e nehenehe e tauturu ia ratou.
17 Turai atura ïa te Atua i te arii o te mau Kaladaio+ ia aro ia ratou, e haapohe ihora taua arii ra i ta ratou mau taurearea i te ˈoˈe+ i roto i te nao.*+ Aita oia i aroha i te mau tane apî e te mau tamahine apî, te ruhiruhia e te huma.+ Ua tuu te Atua i te mau mea atoa i to ˈna rima.+ 18 Hopoi atura oia i Babulonia te mau taihaa atoa o te hiero o te Atua mau, te mea rahi e te mea nainai, oia atoa te mau taoˈa o te hiero o Iehova e te mau taoˈa a te arii e a ta ˈna huiarii.+ 19 Tanina ihora oia i te hiero o te Atua mau,+ tuparari ihora i te aua o Ierusalema,+ tutui ihora i to ˈna mau pare etaeta e haamou ihora i te mau taoˈa moni rahi atoa i reira.+ 20 Hopoi tîtî atura oia i te feia o tei ore i pohe i te ˈoˈe i Babulonia,+ e riro maira ratou ei tavini na ˈna+ e na ta ˈna mau tamaiti e tae roa i te taime a haamata ˈi te hau Peresia i te faatere,+ 21 ia tupu te parau a Iehova i faaitehia na roto ia Ieremia,+ e oti noa ˈtu te fenua i te haapao i ta ˈna mau Sabati.+ I te mau mahana atoa a vai ano ai te fenua, ua faafaaea te fenua,* e hope noa ˈtu 70 matahiti.+
22 I te matahiti matamua o te faatereraa a Kuro+ te arii no Peresia, ia tupu te parau ta Iehova i faahiti na roto ia Ieremia,+ faaaraara ihora Iehova i te aau o Kuro te arii no Peresia ia faatae oia i te tahi poroi na ta ˈna faatereraa arii atoa, ta ˈna atoa i haapapai,+ a na ô ai: 23 “Teie ta Kuro te arii no Peresia i parau: ‘Ua horoa mai Iehova te Atua o te raˈi i te mau faatereraa arii atoa o te fenua na ˈu,+ e ua faaue oia ia ˈu e hamani i te hoê fare no ˈna i Ierusalema i Iuda.+ Te taata no ˈna i rotopu ia outou, ei ia ˈna ra Iehova to ˈna Atua, e ia pauma oia i Ierusalema.’”+
“Te mau mea vaiihohia i te hiti” na roto i te reo Heleni.
Aore ra “E ui Solomona e te amuiraa ia ˈna i reira.”
Heb: “no te haere i rapae e i roto i mua.”
Heb: “ia ora oe e rave rahi mahana.”
Aore ra “feia faahoro puaahorofenua.”
Aore ra “feia faahoro puaahorofenua.”
Heb: “fare.”
Heb: “fare no ta ˈna faatereraa arii.”
Aore ra “feia amo hopoia.”
Heb: “fare.”
Oia hoi te pane pûpûhia.
1 kora: 220 L. Hiˈo i te tuhaa hau B14.
1 bato: 22 L. Hiˈo i te tuhaa hau B14.
Heb: “fare no ta ˈna faatereraa arii.”
Aore ra “feia amo hopoia.”
Heb: “fare.”
Hiˈo i te titionare.
O te fare rahi ïa o te hiero i roto i te pene taatoa.
44,5 cm te kubiti matauhia. To vetahi râ manaˈo, e kubiti roa teie “faito i mutaa iho,” oia hoi 51,8 cm. Hiˈo i te tuhaa hau B14.
Te faahiti ra te tahi o te mau papai tahito “120” area te tahi atu mau papai tahito e te tahi mau huriraa e “20 kubiti” ïa.
1 taleni: 34,2 kg. Hiˈo i te tuhaa hau B14.
1 sekela: 11,4 g. Hiˈo i te tuhaa hau B14.
Oia hoi i nia i te Vahi Moˈa.
Aore ra “apatoa.”
Aore ra “apatoerau.”
“Ia haamau papu oia [oia hoi Iehova]” te auraa.
“Na roto i te puai” paha te auraa.
Aore ra “tura rahi.”
Piri i te 7,4 cm. Hiˈo i te tuhaa hau B14.
1 bato: 22 L. Hiˈo i te tuhaa hau B14.
Heb: “fare.”
Heb: “te piha i roto roa.”
Heb: “fare.”
Heb: “i haamoˈa.”
Oia hoi te Oroa patiaraa tiahapa.
Aore ra “te mau tahuˈa ati Levi.”
Heb: “te piha i roto roa.”
Heb: “ta oe tamaiti no roto mai i to oe tauupu.”
1 kubiti: 44,5 cm. Hiˈo i te tuhaa hau B14.
Heb: “ta to tavini.”
E horeo teie e ati to roto ei utua no tei horeo mai te peu ua haavare oia aore ra aita i tapea i ta ˈna parau.
Heb: “ati.”
Heb: “mea tia.”
Aore ra “haamauiui.”
Heb: “i te fenua o to ˈna mau uputa.”
Aore ra “roo.”
Hebera nephe. Hiˈo i te titionare.
Heb: “eiaha e fariu ê i te aro o.”
Heb: “fare.”
Peneiaˈe te ati Levi.
Aore ra “te tomoraa o Hamata.”
Te mahana i muri iho i te oroa aore ra te 15 o te mahana.
Heb: “fare.”
Heb: “ia haere oe na mua ia ˈu mai to metua tane o Davida i haere.”
Heb: “parau paari.”
Heb: “fare.”
Heb: “fare.”
Heb: “te mau tamaiti a Iseraela.”
Aore ra “patu faahou.”
Aore ra “tamaru no tau mahana noa.”
1 taleni: 34,2 kg. Hiˈo i te tuhaa hau B14.
Aore ra “te tahi mau piri.”
Heb: “mea i hunahia ia.”
Heb: “fare.”
Heb: “fare.”
Heb: “aita ˈtura e aho faahou i roto ia ˈna.” Hebera rua. Hiˈo i te titionare.
Aore ra “mau parau.”
1 taleni: 34,2 kg. Hiˈo i te tuhaa hau B14.
1 sekela: 11,4 g. Hiˈo i te tuhaa hau B14.
E paruru pinepine na te feia teˈa e rave.
I roto i te mau Papai Hebera, 1 mina: 570 g. Hiˈo i te tuhaa hau B14.
Heb: “i te aro o.”
Aore ra “feia faahoro puaahorofenua.”
Oia hoi Eupharate.
Aore ra “matahiapo.”
Aore ra “matahiapo.”
Aore ra “matahiapo.”
Heb: “to ratou fare ie.”
Aore ra “maitihia.”
Aore ra “haapaari.”
Heb: “no te mau puaaniho.”
Heb: “haereraa na te mau eˈa.”
Aore ra “faahaere.”
Heb: “faatereraa arii a.”
Heb: “fare.”
Heb: “fare.”
Heb: “feia horo.”
Heb: “maitihia.”
Heb: “maitihia.”
Oia hoi e faufaa vai tamau e te taui ore.
Heb: “o tei haere mai e faaî i to ˈna rima i.”
Oia hoi te pane pûpûhia.
Heb: “maitihia.”
Heb: “turui ratou i nia.”
Hiˈo i te titionare.
E paruru pinepine na te feia teˈa e rave.
Heb: “taahi.”
Heb: “turui nei hoi matou i nia.”
Heb: “E rave rahi mahana.”
Heb: “aita e hau to tei haere i rapae e to tei haere i roto.”
Heb: “eiaha e faatopa i to outou rima.”
Hiˈo i te titionare.
Aore ra “tiaraa vahine rahi.”
Hiˈo i te titionare.
Heb: “mau mahana atoa.”
Heb: “fare.”
Heb: “haamoˈa.”
Aore ra “patu faahou.”
Aore ra “ia ore te taata ia faarue aore ra ia tomo i te tuhaa fenua o.”
Heb: “fare.”
Heb: “fare.”
Aore ra “faufaa.”
Aore ra “faufaa.”
Aore ra “patu faahou.”
Aore ra “patu faahou.”
Heb: “turui oe i nia.”
Heb: “turui i nia.”
Aore ra “no te turu i.”
E ere i te tutuiraa o to Asa tino, e tutuiraa raau noˈanoˈa râ.
Heb: “haere na roto.”
Heb: “Ua itoito to ˈna aau i nia i te mau eˈa o Iehova.”
Hiˈo i te titionare.
Hiˈo i te titionare.
Aore ra “turai.”
Heb: “varua.”
Hebera rua. Hiˈo i te titionare.
Hebera rua. Hiˈo i te titionare.
Heb: “puhapa.”
Heb: “fare.”
Hiˈo i te titionare.
Aore ra “ua faaoti to aau e.”
Huri-atoa-hia “Meuni.”
Oia hoi te miti Pohe.
Heb: “fariu ihora i to ˈna hohoˈa.”
Heb: “fare.”
Hiˈo i te titionare.
Heb: “tamaiti.”
Aore ra “faaoromai.”
Heb: “haamaitairaa.”
“Haamaitairaa” te auraa.
Oia hoi te tahi huaai.
Heb: “faaaraara ihora Iehova i te aau o.”
Heb: “fare.”
Piihia Ahazia.
Aore ra “aau.”
Heb: “tamahine.”
“Azaria” i roto i te tahi mau papai Hebera.
Aore ra “e maˈi to ˈna.”
Heb: “tamaiti.”
Heb: “iriti ê.”
Heb: “fare.”
Heb: “fare.”
Heb: “fare.”
Heb: “ia haere oia i rapae e ia haere mai oia i roto.”
E paruru pinepine na te feia teˈa e rave.
E otaro paha teie ua papaihia te Ture a te Atua i nia iho.
Heb: “fare.”
Heb: “ma te rima o Davida.”
Heb: “haapohe ratou ia Atalia i te ˈoˈe.”
Heb: “fare.”
Huri-atoa-hia “e hope roa ratou paatoa i te horoa.”
Hiˈo i te titionare.
Oia hoi te metua tane o Zekaria.
Oia hoi te nuu Suria.
Aore ra “e te maˈi e rave rahi.”
Aore ra “te tamaiti.” Peneiaˈe e faarahihia to ˈna parau no te faaite i te huru faahiahia o taua taata ra.
Heb: “maitihia.”
1 taleni: 34,2 kg. Hiˈo i te tuhaa hau B14.
Aore ra “farerei.”
Heb: “oe.”
Aore ra “to oe aorai.”
Heb: “to ratou fare ie.”
Piihia Ahazia.
Piri i te 178 m. Hiˈo i te tuhaa hau B14.
Heb: “fare.”
Aore ra “tiaihia e.”
Heb: “fare.”
Oia hoi Amazia to ˈna metua tane.
E au ra e i raro i te pǎpǎ.
Hiˈo i te titionare.
Heb: “fare.”
Heb: “fare.”
E au ra e tei pihai iho teie tâpû fenua i te menema o te mau arii.
Heb: “fare.”
1 taleni: 34,2 kg. Hiˈo i te tuhaa hau B14.
1 kora: 220 L. Hiˈo i te tuhaa hau B14.
Aore ra “ua faaineine oia i to ˈna mau eˈa i mua ia.”
Aore ra “faatahehia.”
Hiˈo i te titionare (Gehena).
Heb: “fare.”
Heb: “fare.”
Heb: “fare.”
Heb: “hioraa.”
Aore ra “no te faafaaea.”
Oia hoi te pane pûpûhia.
Hiˈo i te titionare.
Aore ra “taraehara.” Hiˈo i te titionare.
Heb: “ua faaî outou i to outou rima.”
Heb: “Mea tia roa hoi te aau o.”
Aore ra “faaineineraahia.”
Heb: “fare.”
Heb: “feia horo.”
Hiˈo i te titionare.
Heb: “feia horo.”
Heb: “no te horoa i te aau hoê.”
Heb: “rapaau atura i.”
Heb: “paraparau maira Hezekia i te aau o.”
Hiˈo i te titionare.
Heb: “puhapa.”
Heb: “haamoˈahia no.”
Aore ra “piha tamaaraa.”
Heb: “te mau tane.”
Heb: “tane,” oia atoa te mau tamaroa.
Heb: “te Faaîraa.” Peneiaˈe e paturaa teie e au i te pare.
Aore ra “mauhaa tamaˈi mea taora.”
Heb: “paraparau ihora oia i to ratou aau.”
Aore ra “puai taata.”
Heb: “fare.”
Hiˈo i te titionare.
Heb: “fare.”
Huri-atoa-hia “i roto i te mau apoo.”
Aore ra “tamǎrû ihora oia i te aro o.”
Hiˈo i te titionare.
Aore ra “faatahehia.”
Heb: “fare.”
Aore ra “feia amo hopoia.”
Heb: “i te rima o.”
Heb: “mǎrû.”
Aore ra “faaapî ihora i taua faufaa ra.”
Hebera nephe. Hiˈo i te titionare.
Aore ra “idolo.”
Heb: “I te mau mahana atoa.”
Heb: “fare.”
Huri-atoa-hia “Tunu paa.”
1 taleni: 34,2 kg. Hiˈo i te tuhaa hau B14.
Heb: “fare.”
Peneiaˈe i te tau uaaraa tiare.
Heb: “faaetaeta oia i to ˈna aˈî.”
Hiˈo i te titionare.
Aore ra “ua haapao te fenua i te Sabati.”