TE PITI O TE BUKA O TE MAU ARII

1 I muri aˈe i te poheraa o Ahaba, orure hau aˈera to Moabi+ ia Iseraela.

2 Tei to ˈna aorai te arii Ahazia i Samaria. Marua ihora oia na te opea o to ˈna piha i nia i te tafare e pepe atura. Tono ihora ïa oia i te vea e na ô atura ia ratou: “A haere, a ui ia Baala-zebuba te atua o Ekerona+ no te ite e ora anei au i teie pepe.”+ 3 Na ô maira râ te melahi a Iehova ia Elia*+ no Tisebi: “A haere e farerei i te mau vea a te arii o Samaria e a parau atu ia ratou: ‘No te mea anei aita e Atua i Iseraela e haere ai outou e ui ia Baala-zebuba te atua o Ekerona?+ 4 Teie ïa ta Iehova e parau ra: “Eita oe e tia faahou mai mai te roˈi e tarava ˈi oe, no te mea e pohe oe.”’” I reira, haere atura Elia.

5 I to te mau vea hoˈiraa i ǒ te arii, ui atura oia ia ratou: “Eaha outou i hoˈi oioi mai ai?” 6 Pahono maira ratou ia ˈna: “E taata tei haere mai e farerei ia matou. Na ô maira oia ia matou: ‘A haere, a hoˈi i te arii ra o tei tono mai ia outou e a parau atu ia ˈna: “Teie ta Iehova e parau ra: ‘No te mea anei aita e Atua i Iseraela e tono ai oe i te taata e ui ia Baala-zebuba te atua o Ekerona? No reira, eita oe e tia faahou mai mai te roˈi e tarava ˈi oe, no te mea e pohe oe.’”’”+ 7 Ui atura ïa te arii ia ratou: “Mai te aha te hohoˈa o te taata tei haere mai e farerei ia outou e o tei faaite i taua mau parau ra ia outou?” 8 Na ô maira ïa ratou ia ˈna: “E ahu huruhuru+ to taua taata ra e e hatua iri animara to nia i to ˈna tauupu.”+ Na ô ihora te arii: “O Elia no Tisebi taua taata ra.”

9 Tono aˈera te arii i te hoê raatira e ta ˈna 50 faehau no te tii ia ˈna. Te parahi ra Elia i nia i te tupuai mouˈa. Pauma ˈtura te raatira ia Elia ra e na ô atura: “Taata no te Atua mau,+ te parau mai ra te arii ia oe ia pou mai.” 10 Pahono maira râ Elia i te raatira: “Inaha e taata vau no te Atua, ia topa mai te auahi mai te raˈi mai+ e ia pau oe e ta oe 50 faehau i taua auahi ra.” Topa maira te auahi mai te raˈi mai e pau ihora oia e ta ˈna 50 faehau i taua auahi ra.

11 Tono faahou aˈera ïa te arii i te tahi raatira e ta ˈna 50 faehau. Haere atura te raatira e parau i te peropheta: “Taata no te Atua mau, te parau mai ra te arii ia oe ia pou haaviti mai.” 12 Pahono maira râ Elia: “Inaha e taata vau no te Atua mau, ia topa mai te auahi mai te raˈi mai e ia pau oe e ta oe 50 faehau i taua auahi ra.” Topa maira te auahi o te Atua mai te raˈi mai e pau ihora oia e ta ˈna 50 faehau i taua auahi ra.

13 Tono faahou aˈera te arii i te toru o te raatira e ta ˈna 50 faehau. Pauma ˈtura te toru o te raatira ia Elia ra e tipapa ihora i mua ia ˈna. Taparu atura oia ia Elia: “E te taata no te Atua mau, eiaha oe e haafaufaa ore i to ˈu ora e te ora o teie na 50 tavini. 14 Ua topa aˈena mai te auahi no te raˈi mai e ua pau na raatira e piti na mua ˈtu e ta raua pǔpǔ 50 i taua auahi ra. Tera râ, a haafaufaa i to ˈu ora.”

15 Na ô maira ïa te melahi a Iehova ia Elia: “A pou na muri ia ˈna. Eiaha e mǎtaˈu ia ˈna.” Tia aˈera ïa Elia e pou ihora na muri ia ˈna no te haere e farerei i te arii. 16 Na ô atura Elia i te arii: “Teie ta Iehova e parau ra: ‘Ua tono oe i te vea no te ui ia Baala-zebuba te atua o Ekerona.+ No te mea anei aita e Atua i Iseraela?+ Eaha oe i ore ai i ui ia ˈna? No reira, eita oe e tia faahou mai mai te roˈi e tarava ˈi oe, no te mea e pohe oe.’” 17 Pohe ihora ïa oia, mai ta Iehova i faaite na roto ia Elia. E no te mea aita ta Ahazia e tamaiti, riro maira Iehorama*+ ei arii ei mono ia ˈna. Tei te piti ïa o te matahiti te faatereraa Iehorama+ no Iuda, te tamaiti a Iehosaphata.

18 Te toea o te aamu o Ahazia,+ ta ˈna i rave, ua papaihia ïa i roto i te buka o te aamu o te tau o te mau arii o Iseraela.

2 A fatata ˈi Iehova i te rave ia Elia+ i te raˈi na roto i te hoê mataˈi vero,+ faarue ihora Elia raua Elisaia+ ia Gilagala.+ 2 Na ô atura Elia ia Elisaia: “A faaea na i ǒ nei, ua faaue hoi Iehova ia ˈu ia haere i Betela.” Na ô maira râ Elisaia: “Te ora ra Iehova e te ora ra oe, eita vau e faarue ia oe.” Haere atura ïa raua i Betela.+ 3 Haere maira te mau tamaiti a te mau peropheta* o te parahi ra i Betela e farerei ia Elisaia e na ô maira ia ˈna: “Ua ite anei oe e rave Iehova i to oe fatu i teie mahana e eita faahou oe i raro aˈe i ta ˈna aratairaa?”+ Parau atura ïa oia: “Ua ite aˈena vau. A mamû.”

4 Na ô atura Elia ia ˈna: “Elisaia, a faaea na i ǒ nei, ua faaue hoi Iehova ia ˈu ia haere i Ieriko.”+ Na ô maira râ oia: “Te ora ra Iehova e te ora ra oe, eita vau e faarue ia oe.” Haere atura ïa raua i Ieriko. 5 Haere maira te mau tamaiti a te mau peropheta o te parahi ra i Ieriko e farerei ia Elisaia e na ô maira ia ˈna: “Ua ite anei oe e rave Iehova i to oe fatu i teie mahana e eita faahou oe i raro aˈe i ta ˈna aratairaa?” Parau atura ïa oia: “Ua ite aˈena vau. A mamû.”

6 Na ô atura Elia ia ˈna: “A faaea na i ǒ nei, ua faaue hoi Iehova ia ˈu ia haere i te hiti pape o Ioridana.” Na ô maira râ oia: “Te ora ra Iehova e te ora ra oe, eita vau e faarue ia oe.” Haere atura ïa raua e piti. 7 Haere atoa ˈtura 50 tamaiti a te mau peropheta e mataitai noa ˈtura na te atea ê a tia noa ˈi raua e piti i te hiti pape o Ioridana. 8 Rave ihora Elia i to ˈna ahu peropheta,+ taviriviri ihora i te reira e tairi ihora i te pape. Taa ê atura te pape i te pae aui e i te pae atau. Haere atura ïa raua e piti i te tahi atu pae na nia i te repo mǎrô.+

9 I to raua taeraa ˈtu i te tahi atu pae, na ô atura Elia ia Elisaia: “A ani mai eaha ta oe e hinaaro ia rave au no oe hou te Atua a rave ai ia ˈu.” Na ô maira ïa Elisaia: “E nehenehe anei ta ˈu e fanaˈo e piti tuhaa+ o to oe varua?”+ 10 Pahono atura Elia: “Te ani ra oe i te hoê mea fifi. Ia ite oe ia ˈu i te taime e ravehia ˈi au, e fanaˈo oe i ta oe i ani. Aita anaˈe, eita oe e fanaˈo i te reira.”

11 Te paraparau ra raua a haere noa ˈi. I tera taime, faataa ê ihora te hoê pereoo auahi e te puaahorofenua auahi+ ia raua, e reva ˈtura Elia i te raˈi na roto i te mataˈi vero.+ 12 A mataitai ai Elisaia, pii noa ˈtura oia: “To ˈu metua tane, to ˈu metua tane! Te pereoo o Iseraela e to ˈna feia faahoro puaahorofenua!”+ I te moˈeraa Elia, hahae ihora Elisaia i to ˈna ahu.+ 13 Ua topa te ahu+ o Elia i raro. Ohi ihora ïa Elisaia i te reira e hoˈi atura i te hiti pape o Ioridana. 14 Tairi ihora oia i te pape i te ahu o Elia a parau ai: “Teihea o Iehova, te Atua o Elia?” I to ˈna tairiraa i te pape, taa ê atura te pape i te pae aui e i te pae atau. Haere atura ïa Elisaia i te tahi atu pae o te anavai.+

15 I to te mau tamaiti a te mau peropheta i Ieriko iteraa ia ˈna na te atea ê, na ô aˈera ratou: “Ua tau te varua o Elia i nia ia Elisaia.”+ Haere maira ïa ratou e farerei ia ˈna e tipapa ihora i mua ia ˈna. 16 Na ô maira ratou ia ˈna: “E 50 tane itoito to rotopu ia matou. A vaiiho na ia haere ratou e imi i to fatu. Peneiaˈe ua amo te varua* o Iehova ia ˈna e ua taue atu ia ˈna i nia i te hoê mouˈa aore ra i roto i te hoê peho.”+ Na ô atura râ oia: “Eiaha e tono i te taata e imi ia ˈna.” 17 Tera râ, onoono noa ˈtura ratou ia ˈna e haama roa ˈtu oia. Na ô atura ïa oia: “A tono ia ratou.” Tono atura ratou i na 50 taata, e imi ihora ratou ia Elia e toru mahana i te maoro. Aita râ oia i itehia mai. 18 I to ratou hoˈiraa mai ia Elisaia ra, te faaea noa ra oia i Ieriko.+ Na ô atura oia ia ratou: “Ua parau vau ia outou eiaha e tono i te taata e imi ia ˈna.”

19 I muri aˈe, na ô maira to te oire ia Elisaia: “Mai ta oe e ite nei, mea au maitai te vahi i reira to matou oire i te haamauraahia.+ E ere râ te pape i te mea mâ, e mea hotu ore* teie fenua.” 20 Na ô atura ïa oia: “A afai mai i te hoê auˈa iti apî e a tuu maa miti papaa i roto.” Afai maira ïa ratou i te reira ia ˈna ra. 21 Haere atura oia i te pape pihaa ra e hue atura i te miti papaa i roto i te pape+ ma te parau: “Teie ta Iehova e parau ra: ‘Ua haamaitai au i teie pape. Eita te reira e haapohe faahou e e tapea i te hoturaa.’”* 22 Maitai noa ˈtura te pape e tae roa mai i teie mahana, mai ta Elisaia i faaite.

23 Haere aˈera Elisaia i Betela. Te haere noa ra oia, faura maira te tahi mau tamaroa mai roto mai i te oire e haamata aˈera i te faaooo ia ˈna.+ Te parau noa ra ratou ia ˈna: “A haere i nia, e upoo pahure! A haere i nia, e upoo pahure!” 24 Fariu aˈera oia, hiˈo atura ia ratou e faaino atura ia ratou i te iˈoa o Iehova. Haere maira e piti daba ufa+ mai roto mai i te uru raau e haapohe ihora 42 o taua mau tamarii ra.+ 25 Haere atura oia mai reira ˈtu i te mouˈa Karemela,+ e hoˈi ihora i Samaria.

3 Riro maira Iehorama+ te tamaiti a Ahaba ei arii no Iseraela i te 18 o te matahiti te faatereraa te arii Iehosaphata no Iuda, e 12 matahiti to ˈna faatereraa i Samaria. 2 Ua rave noa oia i te mea ino i mua ia Iehova, aita râ i tae roa i te faito o to ˈna metua tane e o to ˈna metua vahine, ua faaore hoi oia i te pou haamoriraa a Baala ta to ˈna metua tane i hamani.+ 3 Tera râ, ua rave oia i te mau hara ta Ieroboama te tamaiti a Nebata i turai ia Iseraela ia rave.+ Aita oia i faaea i te rave i tera mau hara.

4 E taata faaamu mamoe râ o Mesa te arii o Moabi, e i hopoi noa na oia 100 000 fanauˈa mamoe e 100 000 mamoe oni aita i paotihia te huruhuru ei ô titauhia na te arii o Iseraela. 5 I te poheraa Ahaba,+ orure hau ihora te arii o Moabi i te arii o Iseraela.+ 6 Haere ihora ïa te arii Iehorama mai Samaria ˈtu i tera mahana e titau ihora i te mau faehau ati Iseraela taatoa. 7 Faatae atoa aˈera oia i teie poroi i te arii Iehosaphata no Iuda: “Ua orure hau te arii o Moabi ia ˈu. E haere mai anei oe na muri ia ˈu e aro ia Moabi?” Pahono maira ïa oia: “E haere atoa ˈtu vau.+ Hoê â vau e oe. Hoê â to ˈu mau taata e to oe mau taata. Hoê â ta ˈu mau puaahorofenua e ta oe mau puaahorofenua.”+ 8 Ui maira oia: “Nahea tatou ia haere?” Pahono atura Iehorama: “Na te medebara o Edoma.”

9 Reva ˈtura te arii o Iseraela, te arii o Iuda e te arii o Edoma.+ E hitu mahana to ratou haereraa, ere aˈera ratou i te pape no te nuu e no te mau animara ta ratou i aratai na muri mai ia ratou. 10 Na ô aˈera te arii o Iseraela: “Auê hoi e! Ua haaputuputu Iehova ia tatou, na arii e toru, no te tuu ia tatou i te rima o te ati Moabi!” 11 Na ô aˈera ïa Iehosaphata: “Aita anei ta Iehova e peropheta i ǒ nei ia ui tatou ia Iehova na roto ia ˈna?”+ Pahono maira ïa hoê tavini a te arii o Iseraela: “Te vai ra o Elisaia+ te tamaiti a Saphata, tei manii na i te pape i roto i te rima o Elia.”*+ 12 Na ô maira Iehosaphata: “Na ˈna e parau mai eaha ta Iehova e hinaaro ia rave tatou.” Haere ihora ïa te arii o Iseraela, o Iehosaphata e te arii o Edoma e farerei ia Elisaia.

13 Na ô maira Elisaia i te arii o Iseraela: “Eaha ta ˈu ia oe?+ A haere e ui i te mau peropheta a to metua tane e te mau peropheta a to metua vahine.”+ Na ô atura râ te arii o Iseraela ia ˈna: “Eiaha, na Iehova hoi i haaputuputu ia matou, na arii e toru, no te tuu ia matou i te rima o te ati Moabi.” 14 Na ô maira ïa Elisaia: “Te ora ra Iehova o te mau nuu* ta ˈu e tavini ra,* ahani aita to ˈu e faatura no te arii Iehosaphata+ no Iuda, eita vau e tâuˈa ia oe e eita vau e haapao atu ia oe.+ 15 I teie nei a aratai mai i te hoê taata faataˈi kinura.”*+ I te haamataraa te taata faataˈi kinura i te hauti, haere maira te rima o Iehova i nia ia Elisaia.+ 16 Na ô aˈera oia: “Teie ta Iehova e parau ra: ‘A ô i te apoo i roto i teie peho, 17 teie hoi ta Iehova e parau ra: “Eita outou e ite i te mataˈi e eita outou e ite i te ûa. E î râ teie peho i te pape+ e e inu outou i tera pape, outou, ta outou mau nǎnǎ e te tahi atu mau animara ta outou.”’ 18 E ohipa ohie râ te reira no Iehova,+ e tuu atoa hoi oia i te ati Moabi i to outou rima.+ 19 E haamou outou i te mau oire rahi e te mau oire auahia i te patu.+ E tâpû outou i te mau tumu raau maitatai atoa, e tapea outou i te mau pape pihaa atoa, e e tuino outou i te mau faaapu maitai atoa ma te hue atu i te ofai.”+

20 Poipoi aˈe, i te taime e pûpûhia ˈi te tusia huero maa o te poipoi,+ tahe maira te pape na Edoma mai, e î roa aˈera te peho i te pape.

21 Faaroo aˈera te ati Moabi e ua haere mai na arii e toru e aro ia ratou. Haaputuputu aˈera ïa ratou i te mau tane atoa o te nehenehe e amo i te mauhaa tamaˈi,* e tia ˈtura ratou i te otia fenua. 22 I to ratou tiaraa mai i te poipoi roa, te anaana ra te mahana i nia i te pape. E no te mea tei te tahi atu pae te ati Moabi, no ratou, e au te pape i te toto i te uteute. 23 Na ô aˈera ratou: “E toto teie! Eita e ore e ua taparahi te mau arii te tahi i te tahi i te ˈoˈe. Haere anaˈe! Na tatou te faufaa,+ e Moabi!” 24 I to ratou haereraa mai i te puhapa o Iseraela, tia aˈera te ati Iseraela e taparahi ihora i te ati Moabi. Horo ê atura ïa ratou.+ Nuu noa ˈtura te ati Iseraela e tae roa ˈtu i te fenua o Moabi a taparahi noa ˈi ia ratou. 25 Haamou aˈera ratou i te mau oire, taora ihora te taata tataitahi i ta ˈna ofai i roto i te mau faaapu maitai atoa ia poˈi roa i te ofai. Tapea aˈera ratou i te mau pape pihaa atoa,+ e tâpû ihora i te mau tumu raau maitai atoa.+ O te aua ofai o Kira-haraseta+ anaˈe tei vai mai. Haaati aˈera te feia taora ofai i taua oire ra e tairi ihora ia ˈna.

26 I to te arii o Moabi iteraa e ua pau ratou i te tamaˈi, rave ihora oia 700 tane e ˈoˈe ta ratou no te haere atu i te arii ra o Edoma.+ Aita râ ratou i tae. 27 Rave maira ïa oia i ta ˈna tamaiti matahiapo o te faatere ei mono ia ˈna e pûpû ihora ia ˈna ei tusia taauahi+ i nia i te aua. Tupu aˈera te inoino rahi ia Iseraela. Faarue aˈera ïa te mau pǔpǔ faehau i te fenua o te arii o Moabi e hoˈi ihora i to ratou fenua.

4 I te hoê mahana, pii maira hoê o te mau vahine faaipoipo a te mau tamaiti a te mau peropheta+ ia Elisaia. Parau maira oia: “Ua pohe to tavini ta ˈu tane faaipoipo. Ua ite oe i mǎtaˈu noa na oia ia Iehova.+ I teie nei, ua haere mai te hoê taata titau tarahu no te rave i ta ˈu na tamarii e piti ei tîtî na ˈna.” 2 Na ô atura ïa Elisaia ia ˈna: “Eaha ta ˈu e nehenehe e rave no oe? A parau mai, eaha ta oe i te fare?” Pahono maira oia: “Aita e ohipa ta ˈu i te fare maori râ te hoê farii hinu.”+ 3 Na ô atura oia: “A haere e farerei pauroa to oe taata tapiri e a ani ia ratou i te farii, te farii pau. A rave mai i te mau farii atoa e noaa mai ia oe. 4 I muri iho, a hoˈi i ǒ oe e a tapiri i te opani i muri ia oe e ta oe na tamaiti. A faaî i tera mau farii atoa, e a tuu i tei î i te hiti.” 5 Haere atura ïa te vahine.

Hoˈi maira te vahine i ǒ ˈna e tapiri maira i te opani i muri ia ˈna e ta ˈna na tamaiti. Horoa maira raua i te mau farii ia ˈna ra, e na ˈna i faaî i te reira.+ 6 I te îraa te mau farii, na ô atura oia i hoê o ta ˈna na tamaiti: “A afai mai i te tahi farii ia ˈu ra.”+ Na ô maira râ oia ia ˈna: “Aita e farii faahou.” I reira, mau aˈera te hinu.+ 7 Haere maira te vahine e faaite i tera parau i te taata no te Atua mau. Pahono atura ïa oia: “A haere e hoo i tera hinu e a aufau i ta oe mau tarahu. I muri iho, e ora oe e ta oe na tamaiti i te mea e toe mai.”

8 I te hoê mahana, haere aˈera Elisaia i Sunema.+ E vahine faaturahia to tera oire. Ua onoono taua vahine ra ia Elisaia ia tamaa i ǒ ˈna.+ Mai tera mahana, ua tapea noa Elisaia i reira no te tamaa i te mau taime atoa i haere ai oia na Sunema. 9 Na ô atura ïa oia i ta ˈna tane faaipoipo: “Ua ite au e e taata moˈa no te Atua te haere noa mai ra i ǒ tâua. 10 E hamani anaˈe ïa i te hoê piha iti i nia i te tafare+ a tuu atu ai i te hoê roˈi no ˈna, te hoê amuraa maa, te hoê parahiraa, e te hoê vairaa mori. Ia haere mai oia i ǒ tâua, e nehenehe oia e faaea i ǒ nei.”+

11 I te hoê mahana, haere maira oia i reira, e pauma aˈera oia no te tarava i roto i te piha i nia i te tafare. 12 Na ô atura oia ia Gehazi+ ta ˈna tavini: “A pii mai i te vahine Sunema.”+ Pii maira ïa oia ia ˈna, e tia aˈera te vahine i mua ia ˈna. 13 Na ô atura Elisaia ia Gehazi: “A parau na ia ˈna: ‘Ua haapeapea rahi oe no mâua.+ Eaha ta ˈu e nehenehe e rave no oe?+ Te hinaaro ra anei oe ia paraparau vau no oe i te arii+ aore ra i te raatira o te nuu?’” Pahono maira râ oia: “Aita. E oraraa hau to ˈu i rotopu i to ˈu nunaa.” 14 Na ô atura ïa Elisaia: “Eaha ïa te nehenehe e rave no ˈna?” Na ô maira Gehazi: “Aita ta ˈna e tamaiti,+ e mea paari ta ˈna tane faaipoipo.” 15 Parau atura Elisaia: “A pii mai ia ˈna.” Pii maira Gehazi ia ˈna e tia maira te vahine i te uputa. 16 Faaite atura Elisaia ia ˈna: “I teie matahiti i mua, i teie â taime o te matahiti, e tauahi oe i te hoê tamaiti.”+ Na ô maira râ te vahine: “Eiaha, to ˈu fatu, te taata no te Atua mau! Eiaha e haavare ia ˈu.”

17 Tera râ, hapû maira te vahine e fanau maira i te hoê tamaiti i te hoê â taime o te matahiti i to mua ˈtu, mai ta Elisaia i parau ia ˈna. 18 Paari aˈera te tamarii, e i te hoê mahana, haere aˈera oia i to ˈna metua tane ra. Tei ǒ oia i te feia ooti ra. 19 Parau noa ˈtura oia i to ˈna metua tane: “To ˈu upoo, auê to ˈu upoo!” Faaue atura te metua tane i te hoê tavini: “A amo ia ˈna i to ˈna metua vahine ra.” 20 Amo atura ïa te tavini ia ˈna i to ˈna metua vahine ra. Parahi noa ˈtura teie tamarii i nia i te turi avae o to ˈna metua vahine e avatea noa ˈtu. I reira, pohe ihora oia.+ 21 I muri iho, pauma ihora te metua vahine e tuu atura ia ˈna i nia i te roˈi o te taata no te Atua mau.+ Tapiri atura oia i te opani i muri ia ˈna e haere atura. 22 Pii atura oia i ta ˈna tane faaipoipo e na ô atura: “A tuu mai na i te hoê tavini ia ˈu ra e hoê asini. E haere au i te taata no te Atua mau ra a hoˈi mai ai.” 23 Na ô maira râ oia: “Eaha oe e haere ai e hiˈo ia ˈna i teie mahana? E ere teie i te avaˈe apî,+ e ere atoa i te Sabati.” Tera râ, na ô atura oia: “Eiaha e haapeapea, aita e fifi.” 24 Faaineine atura ïa oia i te asini e parau atura i ta ˈna tavini: “A faahaere haavitiviti ia ˈna. Eiaha e haere mǎrû no ˈu, na ˈu iho â e parau atu ia oe.”

25 Haere atura ïa oia i te taata no te Atua mau i nia i te mouˈa Karemela. I to te taata no te Atua mau iteraa ia ˈna i te atea ê, na ô aˈera oia ia Gehazi ta ˈna tavini: “A hiˈo na! Era te vahine Sunema. 26 A horo na e a ui atu: ‘Mea maitai anei oe? E ta oe tane faaipoipo? E ta oe tamarii?’” Parau maira oia: “Mea maitai.” 27 I to ˈna haereraa mai i te taata no te Atua mau i nia i te mouˈa, haru ihora oia i to ˈna na avae.+ Haere maira Gehazi no te faaatea ia ˈna. Na ô aˈera râ te taata no te Atua mau: “A vaiiho ia ˈna, e hepohepo rahi hoi to ˈna. Aita râ vau i ite no te aha, aita hoi Iehova i faaite mai.” 28 Parau maira oia: “Ua ani anei au ia oe i te hoê tamaiti? Aita anei au i parau ia oe: ‘Eiaha oe e haavare mai ia ˈu’?”+

29 Na ô ihora Elisaia ia Gehazi: “A taamu to oe ahu i nia i to oe tauupu,+ a rave i ta ˈu raau e a haere. Ia farerei oe i te hoê taata, eiaha e aroha ˈtu. E ia aroha mai te tahi taata, eiaha e pahono atu. A haere e a tuu i ta ˈu raau i nia i te hohoˈa o te tamaroa.” 30 Na ô maira te metua vahine o te tamaroa: “Te ora ra Iehova e te ora ra oe, eita vau e hoˈi aita oe.”+ Tia aˈera ïa Elisaia e haere atura na muri ia ˈna. 31 Haere atura Gehazi na mua ˈtu ia raua. I te taeraa oia i te fare, tuu atura oia i te raau i nia i te hohoˈa o te tamaroa, aita râ e ohipa i tupu.+ Hoˈi maira oia e hiˈo ia Elisaia e na ô maira ia ˈna: “Aita te tamaroa i ara mai.”

32 I to Elisaia tomoraa ˈtu i roto i te fare, te tarava noa ra te tamaroa i nia i to ˈna roˈi,+ ua pohe. 33 Haere atura oia i roto i te piha e tapiri atura i te opani. O raua anaˈe te tamaroa i roto i te piha. Pure atura oia ia Iehova.+ 34 Haere atura oia i nia i te roˈi e tarava ihora i nia i te tino o te tamarii. Tuu atura oia i to ˈna vaha i nia i te vaha o te tamaroa, to ˈna mata i nia i to ˈna mata, e to ˈna na apu rima i nia i to ˈna na apu rima. Tarava noa ˈtura oia i nia ia ˈna e haamata maira te tino o te tamarii i te mahanahana.+ 35 Hahaere atura oia na roto i te fare. Hoˈi atura oia i nia i te roˈi e tarava faahou ihora i nia i te tino o te tamaroa. Maˈitihe ihora te tamaroa e hitu taime, e araara maira to ˈna mata.+ 36 Pii atura Elisaia ia Gehazi e na ô atura: “A pii mai i te vahine Sunema.” Pii maira ïa oia ia ˈna e haere maira te vahine. Na ô atura oia: “A rave i ta oe tamaiti.”+ 37 Tomo maira te vahine, piˈo ihora i to ˈna pae avae e tipapa ihora i mua ia ˈna. Rave ihora oia i ta ˈna tamaiti e haere atura.

38 I to Elisaia hoˈiraa i Gilagala, e oˈe to taua fenua ra.+ Te parahi ra te mau tamaiti a te mau peropheta+ i mua ia ˈna. Na ô atura oia i ta ˈna tavini:+ “A rave i te pani rahi e a tunu i te tihopu na te mau tamaiti a te mau peropheta.” 39 Haere atura ïa hoê o ratou i rapae i te oire e ohi i te tahi mau aihere. Itea maira ia ˈna te hoê huru pohue oviri. Pofai ihora oia i to ˈna mau maa e î aˈera to ˈna ahu i te reira. Hoˈi maira oia e tâpûpû ihora i tera mau maa i roto i te pani. Aita râ oia i ite eaha te reira. 40 I muri aˈe, taipuhia ihora te maa na te mau tamaiti a te mau peropheta. I to ratou râ amuraa ˈtu i te tihopu, tutuô aˈera ratou: “E pohe to roto i te pani, e te taata no te Atua mau.” Aita ˈtura ratou i amu i te reira. 41 Na ô atura ïa oia: “A afai mai maa faraoa ota.” I muri aˈe i to ˈna tuuraa i te reira i roto i te pani, na ô atura oia: “A taipu râ.” Aita faahou e mea ino to roto i taua pani ra.+

42 Haere maira te hoê taata mai Baala-salisa+ mai. Afai maira oia i te taata no te Atua mau ra e 20 faraoa kerite+ faaineinehia i te mau maa matamua i ootihia, e te hoê pute huero maa apî.+ Na ô atura Elisaia: “A horoa ˈtu na te mau tane ia amu ratou.” 43 Tera râ, na ô maira ta ˈna tavini: “Aita e navai no te faatamaa 100 taata!”+ Parau faahou atura ïa Elisaia: “A horoa ˈtu na te mau tane ia amu ratou, teie hoi ta Iehova e parau ra: ‘E amu ratou e e toe faahou mai.’”+ 44 Tuu ihora ïa te tavini i te reira i mua ia ratou, amu ihora ratou e toe faahou maira,+ mai ta Iehova i faaite.

5 E taata faaturahia o Naamana te raatira o te nuu a te arii o Suria. Mea here na te arii* ia ˈna no te mea na roto ia ˈna Iehova i faaupootia ˈi* ia Suria. Ua roohia râ teie aito puai i te lepera.* 2 I roto i te hoê aroraa ta ratou, haru maira to Suria i te hoê tamahine iti i te fenua o Iseraela, e riro maira oia ei tavini na te vahine faaipoipo a Naamana. 3 I te hoê mahana, na ô atura te tamahine i to ˈna fatu vahine: “Ahani to ˈu fatu e haere e hiˈo i te peropheta+ i Samaria! E faaora ïa oia ia ˈna i to ˈna lepera.”+ 4 Haere ihora ïa oia* e faaite i te reira i to ˈna fatu e faatia ˈtura i ta te tamahine no Iseraela i parau.

5 Na ô maira te arii o Suria: “A haere i teie nei! E horoa ˈtu vau ia oe i te hoê rata na te arii o Iseraela.” Haere atura ïa oia, e hopoi atura na muri ia ˈna hoê ahuru taleni* ario, 6 000 moni auro, e hoê ahuru ahu taui. 6 Afai atura oia i te rata i te arii o Iseraela ra. Teie tei papaihia: “I teie rata tei faataehia ˈtu ia oe ra, te tono atoa ra vau i ta ˈu tavini ra o Naamana ia faaora oe ia ˈna i to ˈna lepera.” 7 I to te arii o Iseraela taioraa i te rata, hahae ihora oia i to ˈna ahu e na ô aˈera: “O vau anei te Atua no te haapohe e no te faaora?+ Te tono mai ra hoi oia i teie taata ia ˈu nei ma te parau mai ia faaora ia ˈna i to ˈna lepera! Te ite ra outou e te imi peapea ra oia ia ˈu.”

8 I to Elisaia râ, te taata no te Atua mau, faarooraa e ua hahae te arii o Iseraela i to ˈna ahu, faatae ihora oia i teie poroi i te arii: “Eaha oe i hahae ai i to oe ahu? A tono mai na i tera taata ia ˈu nei ia ite oia e te vai ra te peropheta i Iseraela.”+ 9 Haere maira ïa Naamana i mua i te fare o Elisaia, e ta ˈna mau puaahorofenua e to ˈna mau pereoo. 10 Tera râ, tono aˈera Elisaia i te hoê vea no te parau ia ˈna: “A haere e hopu ia oe e hitu taime+ i roto i te anavai Ioridana,+ e ora ïa to oe iri* e e mâ oe.” 11 Riri aˈera Naamana e haere atura a na ô ai: “Ua manaˈo vau: ‘E haere mai oia ia ˈu nei i rapae a tia ˈtu ai i mua ia ˈu. E pure oia ia Iehova to ˈna Atua ma te faahaere i to ˈna rima na nia i te lepera no te faaora i te reira.’ 12 E ere anei o Abana e o Pharapara, na anavai o Damaseko,+ i te mea maitai aˈe i te mau pape atoa o Iseraela? Aita anei ta ˈu e nehenehe e hopu i roto i taua na anavai ra a mâ ˈtu ai?” I reira, fariu aˈera oia e haere atura ma te riri rahi.

13 Faafatata maira ta ˈna mau tavini ia ˈna e na ô maira: “Fatu e,* ahani te peropheta i faaue ia oe ia rave i te hoê ohipa fifi, e rave oe, e ere anei? Eaha ïa oe e ore e faaroo ia ˈna? Ua parau noa hoi o ˈna ia oe: ‘A hopu ia oe e ia mâ oe’!” 14 Haere ihora ïa oia e hopu atura i roto i te anavai Ioridana e hitu taime, mai ta te taata no te Atua mau i parau.+ I reira, riro faahou maira to ˈna iri* mai te iri* o te hoê tamaiti apî,+ e mâ aˈera oia.+

15 I muri aˈe, hoˈi maira oia i te taata no te Atua mau ra,+ o ˈna e to ˈna mau taata* atoa. Tia maira oia i mua ia ˈna e na ô maira: “I teie nei, ua ite atura vau e aita e Atua i nia i te fenua maori râ i Iseraela.+ I teie nei, a farii na i te hoê ô* ia ˈu nei.” 16 Tera râ, na ô atura Elisaia: “Mai ia Iehova e ora nei, te Atua ta ˈu e tavini ra,* eita vau e farii i te reira.”+ Ua onoono Naamana, aita iho â râ Elisaia i farii. 17 Na ô maira ïa Naamana: “Aita anaˈe, a farii ïa ia horoahia mai na ˈu i te faito repo no teie nei fenua ta e piti pheradi e nehenehe e amo, eita hoi au e pûpû faahou i te tusia taauahi e te tahi atu tusia i te tahi atu mau atua maori râ ia Iehova. 18 Ia faaore râ Iehova i teie hara ta ˈu i rave: Ia haere to ˈu fatu i roto i te hiero* o Rimona no te tipapa, e turui o ˈna i nia i to ˈu rima, e titauhia ïa ia tipapa vau i roto i te hiero o Rimona. Ia tipapa vau i roto i te hiero o Rimona, ia faaore mai Iehova i ta ˈu hara.” 19 Na ô atura ïa Elisaia ia ˈna: “A haere ma te hau.” Hoˈi aˈera ïa Naamana. Ua atea rii oia, 20 manaˈo aˈera Gehazi+ te tavini a Elisaia te taata no te Atua mau:+ ‘Ua tuu to ˈu fatu ia Naamana teie taata no Suria+ ma te ore e farii i te mea ta ˈna i afai mai. Te ora ra Iehova, e tapapa vau ia ˈna a rave atu ai i te tahi taoˈa ia ˈna ra.’ 21 Tapapa ˈtura ïa Gehazi ia Naamana. I to Naamana iteraa e taata tera e horo ra na muri ia ˈna, pou ihora oia mai nia mai i to ˈna pereoo no te farerei ia ˈna e na ô maira: “Mea maitai anei outou?” 22 Pahono atura ïa oia: “Mea maitai. Ua tono to ˈu fatu ia ˈu no te parau: ‘E piti feia apî teie no te tuhaa fenua mouˈa o Epheraima tei tae mai i ǒ ˈu. No roto mai raua i te mau tamaiti a te mau peropheta. A horoa ˈtu na na raua hoê taleni ario e e piti ahu taui.’”+ 23 Na ô maira Naamana: “Era e piti taleni, a rave.” Onoono maira oia ia ˈna+ e puohu ihora e piti taleni ario i roto e piti pute, e e piti ahu taui. Horoa ˈtura oia i te reira i e piti o ta ˈna mau tavini no te amo atu i mua ia Gehazi.

24 I to Gehazi taeraa ˈtu i Ophela,* rave maira oia i na pute ia raua ra, vaiiho atura i te reira i roto i to ˈna fare e tuu atura ia raua ia hoˈi. I to raua hoˈiraa, 25 haere ihora oia i ǒ to ˈna fatu. Ui maira Elisaia ia ˈna: “Mai hea mai ra oe, Gehazi?” Na ô atura râ oia: “Aita vau i haere, to ˈu fatu.”+ 26 Na ô maira Elisaia ia ˈna: “Aita anei to ˈu aau i na muri atu ia oe a pou ai taua taata ra mai nia mai i to ˈna pereoo no te farerei ia oe? E taime anei teie no te farii i te ario, te ahu, te faaapu olive e te faaapu vine, te mamoe e te puaatoro, te tavini tane e te tavini vahine?+ 27 I teie nei e piri atu te lepera o Naamana+ i nia ia oe e to oe huaai e a muri noa ˈtu.” Haere maira Gehazi i rapae e te lepera, ua uouo roa mai te hiona.+

6 Na ô maira te mau tamaiti a te mau peropheta+ ia Elisaia: “A hiˈo na i teie vahi ta matou e faaea ra e o oe, mea pirihao roa no matou. 2 Ia farii oe, e haere matou i Ioridana. I ǒ, e rave matou tataitahi hoê pou raau a hamani atu ai i te hoê faaearaa no matou.” Na ô atura Elisaia: “A haere.” 3 Na ô maira hoê o ratou: “O tatou te haere?” Pahono atura Elisaia: “E, na reira.” 4 Haere atura ïa oia na muri ia ratou. I to ratou taeraa ˈtu i Ioridana, haamata ˈtura ratou i te tâpû i te mau tumu raau. 5 A tâpû ai hoê o ratou i te hoê tumu raau, marua ihora te auri o ta ˈna opahi i roto i te pape. Tuô ihora oia: “Auê hoi e to ˈu fatu e, ua tipeehia hoi na ˈu teie opahi!” 6 Na ô atura te taata no te Atua mau: “Ihea te reira i te maruaraa?” Faaite maira ïa oia i te vahi. Tâpû ihora Elisaia i te hoê raau iti, taora ihora i tera vahi e maraa aˈera te auri opahi. 7 Na ô atura oia: “A rave mai râ.” Toro ihora ïa oia i to ˈna rima e rave maira i te auri opahi.

8 Haere atura te arii o Suria e aro ia Iseraela.+ Paraparau atura oia i to ˈna mau taata e na ô atura: “E haamau vau i ta ˈu puhapa i tera vahi. E na muri atoa outou ia ˈu.” 9 Faatae maira te taata no te Atua mau+ i teie poroi i te arii o Iseraela: “A haapao maitai, eiaha e haere na tera vahi, i reira hoi to Suria e haamau ai i to ratou puhapa.” 10 Faatae atura ïa te arii o Iseraela i te hoê poroi faaara i te feia i tera vahi. Tamau noa ˈtura Elisaia i te faaara i te arii, o tei faaea i te atea ê i te mau vahi ta ˈna i faaara ˈtu e rave rahi taime.*+

11 Hae roa aˈera te arii* o Suria i te reira. Titau ihora ïa oia i to ˈna mau taata e na ô atura ia ratou: “A faaite mai na! O vai i rotopu ia outou tei te pae o te arii o Iseraela?” 12 Na ô maira hoê o to ˈna mau taata: “To ˈu fatu te arii, e ere o matou! O Elisaia te peropheta i Iseraela. Na ˈna e faaite ra i te arii o Iseraela i te mau mea ta oe e parau ra, i roto atoa i to oe piha.”+ 13 Na ô atura te arii: “A haere e imi teihea o ˈna. E tono vau i te taata no te haru mai ia ˈna.” I muri aˈe, faaitehia maira oia: “Era o ˈna i Dotana.”+ 14 Tono ihora te arii i te puaahorofenua, te pereoo tamaˈi e te hoê nuu rahi i ǒ. Tae maira ratou i te maororaa po e haaati aˈera i te oire.

15 I te poipoi, tia maira te tavini a te taata no te Atua mau e haere atura i rapae. Ite atura oia i te hoê nuu e te puaahorofenua e te pereoo tamaˈi e haaati ra i te oire. Na ô atura te tavini ia ˈna: “Auê hoi e to ˈu fatu e! Eaha ta tatou e rave?” 16 Na ô maira râ Elisaia: “Eiaha e mǎtaˈu!+ Mea rahi aˈe i to tatou nei pae i to ratou.”+ 17 Pure aˈera Elisaia e na ô aˈera: “E Iehova, a faaaraara na i to ˈna mata, ia ite o ˈna.”+ Faaaraara ihora Iehova i te mata o te tavini e ite atura oia: inaha, ati aˈe ia Elisaia,+ ua î te tuhaa fenua mouˈa i te puaahorofenua e te pereoo tamaˈi auahi.+

18 I te faafatataraa mai to Suria, pure aˈera Elisaia ia Iehova: “A haapo i te mata o tera mau taata.”+ Haapo ihora ïa oia i to ratou mata, mai ta Elisaia i ani. 19 Na ô aˈera Elisaia ia ratou: “Te hape ra outou i te purumu. E ere teie te oire ta outou e imi ra. A pee mai ia ˈu, e aratai au ia outou i te taata ta outou e imi ra.” Tera râ, aratai ihora oia ia ratou i Samaria.+

20 I to ratou taeraa ˈtu i Samaria, na ô aˈera Elisaia: “E Iehova, a faaaraara na i to ratou mata ia ite ratou.” Faaaraara aˈera ïa Iehova i to ratou mata e ite aˈera ratou e tei ropu ratou ia Samaria. 21 I to te arii o Iseraela iteraa ˈtu ia ratou, na ô atura oia ia Elisaia: “E haapohe au ia ratou, to ˈu metua tane? E haapohe au ia ratou?” 22 Na ô maira râ oia: “Eiaha oe e haapohe ia ratou. Te haapohe ra anei oe i te feia ta oe i rave tîtî i ta oe ˈoˈe e ta oe fana? A horoa i te faraoa e te pape na ratou ia tamaa e ia inu ratou+ a hoˈi atu ai i to ratou fatu ra.” 23 Faatupu ihora ïa te arii i te hoê tamaaraa rahi no ratou. Tamaa ihora ratou e inu ihora, e tuu aˈera te arii ia ratou ia hoˈi i to ratou fatu ra. E aita te mau pǔpǔ eiâ a to Suria+ i haere faahou mai i te fenua o Iseraela.

24 I muri aˈe, haaputuputu aˈera Bene-hada te arii o Suria i ta ˈna nuu* e haere aˈera e haaati ia Samaria.+ 25 Tupu aˈera ïa te hoê oˈe rahi+ i Samaria. Ua haaati noa to Suria ia Samaria e raea noa ˈtu te afii asini+ i te faito 80 moni ario, e maa vahi iti tutae uupa,* e 5 moni ario. 26 I te hoê mahana, haere atura te arii o Iseraela na nia i te aua. Pii maira te hoê vahine ia ˈna: “A tauturu mai na ia ˈu, to ˈu fatu te arii!” 27 Na ô atura ïa oia: “Aita hoi Iehova i tauturu ia oe, ihea ïa vau e ite mai ai i te tauturu no oe? I te vahi tairiiriraa huero maa?* I te vahi taataahiraa vine? I te vahi taataahiraa olive?” 28 Ui atura te arii ia ˈna: “Eaha to oe fifi?” Pahono maira oia: “Ua na ô mai teie vahine ia ˈu: ‘A horoa mai i ta oe tamaiti ia amu tatou ia ˈna i teie mahana. E ananahi tatou e amu ai i ta ˈu tamaiti.’+ 29 Tunu ihora ïa matou i ta ˈu tamaiti e amu ihora ia ˈna.+ I te mahana i muri iho, na ô atura vau ia ˈna: ‘A horoa mai i ta oe tamaiti ia amu tatou ia ˈna.’ Ua tapuni râ oia i ta ˈna tamaiti.”

30 I to te arii faarooraa i te parau a taua vahine ra, hahae ihora oia i to ˈna ahu.+ I to ˈna haereraa na nia i te aua, ite aˈera te nunaa e e ahu oto to ˈna na raro aˈe i to ˈna ahu.* 31 Na ô aˈera oia: “Ia faautua rahi mai te Atua ia ˈu ia ore te upoo o Elisaia te tamaiti a Saphata ia tâpûhia i teie mahana!”+

32 Te parahi noa ra Elisaia i to ˈna fare. Te parahi noa atoa ra te mau matahiapo i pihai iho. Tono aˈera te arii i te hoê faehau na mua ia ˈna. Hou râ tera taata a tae mai ai, na ô ihora Elisaia i te mau matahiapo: “A hiˈo na, ua tono teie tamaiti a te taparahi taata+ i te hoê faehau no te tâpû i to ˈu upoo! Ia ite outou i tera faehau ia haere mai, a tapiri i te opani, e ia vai piri noa, eiaha oia ia tomo mai. Aita anei outou e faaroo ra i te ahehe avae o to ˈna fatu e na muri ra ia ˈna?” 33 Te paraparau ra oia ia ratou e tae maira te faehau. Na ô aˈera te arii: “No ǒ mai ia Iehova ra teie ati. Eaha vau e tiaturi faahou ai ia Iehova?”

7 Na ô aˈera Elisaia: “A faaroo mai i te parau a Iehova. Teie ta Iehova e parau ra: ‘Ananahi piri i teie hora, i te uputa* o Samaria, e hoohia hoê sea* faraoa ota oro-maitai-hia hoê sekela,* e e piti sea kerite, hoê sekela.’”+ 2 Parau maira ïa te tavini tiaturihia e te arii i te taata no te Atua mau: “Noa ˈtu e iriti Iehova i te mau uputa pape o te raˈi, e nafea te reira* e tupu ai?”+ Pahono atura ïa Elisaia: “E ite mata oe i te reira,+ eita râ oe e amu.”+

3 E maha lepera te parahi ra i te tomoraa o te uputa o te oire.+ Na ô aˈera ratou te tahi i te tahi: “Eaha tatou e parahi ai i ǒ nei a tiai noa ˈtu ai ia pohe tatou? 4 Ia tomo tatou i roto i te oire, e pohe noa iho â tatou, inaha aita e maa.+ E ia parahi noa tatou i ǒ nei, e pohe atoa tatou. Mea au aˈe ïa ia haere tatou i te puhapa a to Suria. Ia vaiiho ratou ia tatou ia ora, e ora tatou, ia haapohe râ ratou ia tatou, e pohe ïa tatou.” 5 Haere aˈera ïa ratou i te ahiahi e tomo aˈera i roto i te puhapa a to Suria. I to ratou taeraa ˈtu i pihai iho i te puhapa, aita e taata to reira.

6 Na Iehova hoi i faatupu i te haruru o te pereoo tamaˈi e te puaahorofenua, te haruru o te hoê nuu rahi,+ ia faaroo te puhapa a to Suria. Na ô aˈera ïa ratou te tahi i te tahi: “Te faaroo ra outou? Ua titau te arii o Iseraela i te mau arii o te ati Heta e te mau arii o Aiphiti no te aro ia tatou!” 7 Tia haavitiviti aˈera ïa ratou e horo aˈera. Tei te ahiahi te reira i te tupuraa. Ua faarue ratou i to ratou mau fare ie, ta ratou mau puaahorofenua e asini, te puhapa taatoa, e ua horo ia ore ratou ia haapohehia.

8 I to teie mau lepera taeraa ˈtu i pihai iho i te puhapa, tomo aˈera ratou i roto i te tahi fare ie, tamaa ihora ratou e inu ihora. Rave maira ratou i te ario, te auro, e te ahu mai reira ˈtu e haere atura e tapuni i te reira. I muri iho, hoˈi maira ratou, tomo aˈera i roto i te hoê fare ie ê atu, rave maira i te taoˈa e haere atura e tapuni i te reira.

9 I te pae hopea, na ô aˈera ratou te tahi i te tahi: “E ere mea maitai ta tatou e rave ra. E parau apî oaoa hoi teie e tia ia faaite! Ia mamû tatou e aahiata noa ˈtu, e tano ïa ia faautuahia tatou. E haere anaˈe i teie nei e faaite i te reira i te aorai o te arii.” 10 Haere atura ïa ratou, pii aˈera i te mau tiai uputa o te oire e faaite atura ia ratou: “Ua tomo matou i roto i te puhapa a to Suria, aita râ matou i ite i te taata, aita atoa matou i faaroo hoê noa ˈˈe taata. O te mau puaahorofenua anaˈe to ǒ e te mau asini tei taamuhia. E ua vaiiho-noa-hia te mau fare ie mai tera.” 11 Tuô ihora te mau tiai uputa no te faaite i tera parau apî i te aorai o te arii.

12 Tia aˈera ïa te arii i te po e na ô aˈera i ta ˈna mau tavini: “E faaite atu vau ia outou eaha ta to Suria e opua ra. Ua ite ratou e te pohe ra tatou i te poia.+ Ua faarue ïa ratou i te puhapa no te tapuni na rapaeau ma te parau: ‘E haere mai ratou i rapae i te oire. E haru ora tatou ia ratou e e tomo tatou i roto i te oire.’”+ 13 Na ô atura hoê o ta ˈna mau tavini: “A vaiiho na ia rave te tahi mau tane e pae puaahorofenua e toe ra i roto i te oire, e ia haere ratou e hiˈo eaha te tupu ra. Ia haapohehia ratou i ǒ, hoê â ïa huru ia faaea mai ratou i ǒ nei a pohe atu ai e te toea o matou te ati Iseraela.” 14 Rave ihora ïa ratou e piti pereoo e te puaahorofenua, e tono aˈera te arii ia ratou i te puhapa a to Suria ma te parau: “A haere e hiˈo eaha te tupu ra.” 15 Tapapa ˈtura ratou i to Suria e tae roa ˈtu i Ioridana. I nia i te purumu, ua apǎpǎ noa te ahu e te taihaa ta to Suria i faarue a horo ai ratou ma te ru. Hoˈi maira te mau tane e faaite i te arii i ta ratou i ite.

16 Haere atura te nunaa e eiâ i roto i te puhapa a to Suria. Mea na reira hoê sea faraoa ota oro-maitai-hia i hoohia ˈi hoê sekela, e e piti sea kerite, hoê sekela, mai ta Iehova i faaite.+ 17 I rave na te arii i te tavini tiaturihia e ana no te tiai i te uputa o te oire. Ua taataahi râ te nunaa ia ˈna i reira e pohe aˈera oia, mai ta te taata no te Atua mau i parau i te arii i to ˈna haereraa mai e farerei ia ˈna. 18 Ua tupu te reira mai ta te taata no te Atua mau i parau i te arii: “Ananahi piri i teie hora, i te uputa o Samaria, e hoohia e piti sea kerite hoê sekela, e hoê sea faraoa ota oro-maitai-hia, hoê sekela.”+ 19 Ua parau râ te tavini i te taata no te Atua mau: “Noa ˈtu e iriti Iehova i te mau uputa pape o te raˈi, e nafea te reira* e tupu ai?” Pahono atura ïa Elisaia: “E ite mata oe i te reira, eita râ oe e amu.” 20 Tera iho â tei tupu no ˈna, ua taataahi hoi te nunaa ia ˈna i te uputa o te oire e pohe aˈera oia.

8 Na ô aˈera Elisaia i te vahine ta ˈna i faahoˈi mai i te tamaiti i te ora:+ “A faarue i teie vahi, oe e to oe utuafare, e a haere i te fenua ê e ora ˈtu ai, i te vahi e nehenehe ai oe e ora. E faatupu hoi Iehova i te hoê oˈe+ e hitu matahiti i teie tuhaa fenua.” 2 Rave ihora ïa te vahine i ta te taata no te Atua mau i parau. Haere atura oia e to ˈna utuafare i te fenua o te mau Philiseti+ e parahi ihora i reira e hitu matahiti.

3 I te hopea o na hitu matahiti, hoˈi maira taua vahine ra mai te fenua mai o te mau Philiseti e haere ihora i te arii ra e ani mai i to ˈna fare e ta ˈna faaapu. 4 Te paraparau ra te arii ia Gehazi te tavini a te taata no te Atua mau. Teie ta ˈna i parau atu: “A faaite mai na i te mau ohipa faahiahia atoa ta Elisaia i rave.”+ 5 Te faaite ra Gehazi i te arii mea nafea Elisaia i te faahoˈiraa mai i te tamaiti o tei pohe i te ora,+ haere maira te metua vahine o taua tamaiti ra e ani i te arii ia faahoˈihia mai to ˈna fare e ta ˈna faaapu.+ Na ô maira Gehazi: “To ˈu fatu te arii, o ˈna taua vahine ra, e teie ta ˈna tamaiti ta Elisaia i faahoˈi mai i te ora.” 6 Uiui atura ïa te arii i te vahine. Faatia maira oia i taua ohipa ra i te arii. Faaue ihora te arii i te hoê tia mana ia haapao i te ohipa a taua vahine ra ma te parau: “A faahoˈi pauroa ta ˈna faufaa e te mau maa atoa o ta ˈna faaapu tei tupu, mai te mahana i faarue ai oia i te fenua e tae roa i teie nei.”

7 Haere maira Elisaia i Damaseko.+ Ua roohia Bene-hada+ te arii o Suria i te maˈi i taua taime ra. Faaitehia ˈtura ïa i te arii tei Damaseko te taata no te Atua mau.+ 8 Na ô atura ïa te arii ia Hazaela:+ “A afai i te hoê ô na te taata no te Atua mau.+ A ui ia Iehova na roto ia ˈna, a ui atu e ora anei to ˈu maˈi.” 9 Haere atura Hazaela e farerei ia Elisaia e te tahi ô: e rave rau taoˈa maitai no Damaseko, te faito faautahia i nia e 40 kamela. Haere maira oia i mua ia Elisaia e na ô maira: “Ua tono mai ta oe tamaiti, te arii Bene-hada no Suria, ia ˈu ia oe ra no te ui atu e ora anei to ˈna maˈi.” 10 Pahono atura Elisaia ia ˈna: “A haere e parau ia ˈna: ‘E ora to oe maˈi.’ Ua faaite râ Iehova ia ˈu e pohe oia.”+ 11 Hiˈo noa maira Elisaia ia ˈna e haama aˈera Hazaela. Taˈi ihora te taata no te Atua mau. 12 Ui maira Hazaela: “To ˈu fatu, eaha oe e taˈi ai?” Pahono atura oia: “No te mea ua ite au i te ino ta oe e rave i nia i te nunaa o Iseraela.+ E tutui oe i to ratou mau oire auahia i te patu, e haapohe oe i ta ratou mau aito puai i te ˈoˈe, e taparahi oe i ta ratou mau tamarii e e atore oe i ta ratou mau vahine hapû.”+ 13 Na ô maira Hazaela: “To ˈu fatu, e nafea vau e rave ai i te hoê ohipa mai teie? E urî noa hoi au.” Na ô atura râ Elisaia: “Ua faaite mai Iehova e riro mai oe ei arii no Suria.”+

14 Vaiiho maira oia ia Elisaia e hoˈi atura i ǒ to ˈna fatu, o tei ani mai ia ˈna: “Eaha ta Elisaia i parau ia oe?” Pahono atura oia: “Ua parau o ˈna ia ˈu e e ora to oe maˈi.”+ 15 I te mahana râ i muri iho, rave ihora Hazaela i te hoê ahu taoto, tapuru ihora i roto i te pape, e taumi* ihora i nia i te hohoˈa o to ˈna fatu e pohe atura oia.+ E riro maira Hazaela ei arii ei mono ia ˈna.+

16 I te pae o te matahiti te faatereraa te arii Iehorama+ no Iseraela, te tamaiti a Ahaba, a faatere ai Iehosaphata te arii o Iuda, riro maira Iehorama+ te tamaiti a te arii Iehosaphata no Iuda ei arii. 17 E 32 matahiti to ˈna i to ˈna riroraa mai ei arii, e e vaˈu matahiti to ˈna faatereraa i Ierusalema. 18 Ua pee oia i te eˈa o te mau arii o Iseraela,+ mai te feia o te utuafare o Ahaba,+ ua faaipoipo hoi oia i te tamahine a Ahaba.+ Ua rave oia i te mea ino i mua ia Iehova.+ 19 Tera râ, no Davida ta ˈna tavini,+ aita Iehova i hinaaro e haamou i te faatereraa o Iuda, ua fafau hoi oia ia ˈna e horoa oia i te hoê mori* no ˈna+ e no ta ˈna mau tamaiti e a muri noa ˈtu.

20 I te tau o Iehorama, orure hau ihora Edoma ia Iuda+ e haamau ihora i te hoê arii no ratou.+ 21 Haere atura ïa Iehorama e to ˈna mau pereoo atoa na Zaira. I reira, haaati aˈera te ati Edoma ia ˈna e to ˈna mau raatira pereoo. Tia aˈera râ oia i te po e tairi ihora ia ratou. Horo aˈera ïa te mau faehau i ǒ ratou. 22 Ua orure hau noa râ Edoma ia Iuda e tae roa mai i teie mahana. Ua orure hau atoa Libena+ i taua tau ra.

23 Te toea o te aamu o Iehorama, te mau mea atoa ta ˈna i rave, ua papaihia ïa i roto i te buka o te aamu o te tau o te mau arii o Iuda. 24 Taoto ihora Iehorama i roto i te pohe e to ˈna mau tupuna e hunahia ihora oia i te Oire o Davida.+ E riro maira ta ˈna tamaiti o Ahazia+ ei arii ei mono ia ˈna.

25 I te 12 o te matahiti te faatereraa te arii Iehorama no Iseraela, te tamaiti a Ahaba, riro maira Ahazia te tamaiti a te arii Iehorama no Iuda ei arii.+ 26 E 22 matahiti to Ahazia i to ˈna riroraa mai ei arii, e hoê matahiti to ˈna faatereraa i Ierusalema. O Atalia+ te iˈoa o to ˈna metua vahine, e mootua* na te arii Omeri+ no Iseraela. 27 Ua pee Ahazia i te haerea o te utuafare o Ahaba.+ Ua rave oia i te mea ino i mua ia Iehova, mai te utuafare o Ahaba, ua taati hoi oia ia ratou na roto i te faaipoiporaa.+ 28 Haere aˈera ïa oia na muri ia Iehorama te tamaiti a Ahaba e aro i te arii Hazaela no Suria i Ramota-gileada.+ Pepe ihora râ Iehorama i to Suria.+ 29 Hoˈi ihora ïa te arii Iehorama i Iezereela+ no te rapaau ia ˈna i to ˈna peperaa i to Suria i Rama, a aro ai oia i te arii Hazaela no Suria.+ Haere ihora te arii Ahazia no Iuda, te tamaiti a Iehorama, i Iezereela e hiˈo ia Iehorama te tamaiti a Ahaba, no te mea ua pepe oia.*

9 Pii atura te peropheta Elisaia hoê o te mau tamaiti a te mau peropheta e na ô atura ia ˈna: “A taamu i to ahu i nia i to tauupu, a rave haavitiviti i teie farii monoˈi e a haere i Ramota-gileada.+ 2 Ia tae oe i ǒ, a imi ia Iehu+ te tamaiti a Iehosaphata te tamaiti a Nimesi. Ei rotopu oia i te tahi atu mau raatira o te nuu. E parau oe ia ˈna ia tia e e haere orua i roto i te hoê piha moˈemoˈe o te fare. 3 I reira, e manii oe i te farii monoˈi i nia i to ˈna upoo e e parau oe: ‘Teie ta Iehova e parau ra: “Te faatavai ra vau ia oe ei arii no Iseraela.”’+ I muri iho, a tatara i te opani e a horo, eiaha e faataere.”

4 Haere atura ïa teie tamaiti a te mau peropheta i Ramota-gileada. 5 I to ˈna taeraa ˈtu, te parahi ra te mau raatira o te nuu i reira. Na ô atura oia: “E poroi ta ˈu no oe, e te raatira e.” Ani maira Iehu: “No vai i rotopu ia matou?” Na ô atura oia: “No oe, e te raatira e.” 6 Tia aˈera ïa Iehu e haere atura i roto i te fare. Manii ihora te tavini i te monoˈi i nia i to ˈna upoo e na ô aˈera ia ˈna: “Teie ta Iehova te Atua o Iseraela e parau ra: ‘Te faatavai ra vau ia oe ei arii i nia i to Iehova nunaa, i nia ia Iseraela.+ 7 E haapohe oe i te utuafare o Ahaba to fatu, e e tahoo vau i te toto o ta ˈu mau tavini te mau peropheta e o te mau tavini atoa a Iehova ta Iezebela i haapohe.+ 8 E pohe te utuafare taatoa o Ahaba. E e haamou vau i te mau tane atoa* o to ˈna utuafare, oia atoa tei haihai roa ˈˈe i Iseraela.+ 9 E mai ta ˈu i rave i te utuafare o Ieroboama+ te tamaiti a Nebata e i te utuafare o Baasa+ te tamaiti a Ahia, e na reira atoa vau i te utuafare o Ahaba. 10 Area o Iezebela, e amu te mau urî ia ˈna i nia i te tâpû fenua i Iezereela,+ e aita e taata e huna ia ˈna.’” I reira, tatara ihora te vea i te opani e horo atura.+

11 I to Iehu haereraa ˈtu i rapae i te fare, ui atura te tahi atu mau raatira o te nuu a te arii ia ˈna: “Mea maitai anei oe? Eaha teie maamaa i haere mai ai ia oe ra?” Pahono maira Iehu ia ratou: “Ua matau outou i tera huru taata e ta ratou huru paraparau.” 12 Na ô atura râ ratou: “Eiaha oe e haavare! A faaite mai eaha tei tupu.” Na ô maira Iehu: “Tera ta ˈna i faaite ia ˈu e ua parau atoa mai oia: ‘Teie ta Iehova e parau ra: “Te faatavai ra vau ia oe ei arii no Iseraela.”’”+ 13 I reira, rave haavitiviti atura ratou i to ratou ahu, tuu ihora i raro i te eˈa paumaraa,+ faaoto ihora ratou i te pu tara e na ô atura: “E arii o Iehu!”+ 14 Opua ihora Iehu+ te tamaiti a Iehosaphata te tamaiti a Nimesi e rave i te tahi ohipa i nia ia Iehorama.

Ua haere Iehorama e te nuu taatoa o Iseraela i Ramota-gileada+ no te paruru ia Iseraela i te arii Hazaela+ no Suria. 15 I muri aˈe, ua hoˈi Iehorama i Iezereela+ no te rapaau ia ˈna, ua pepe hoi oia i to Suria a aro ai oia i te arii Hazaela no Suria.+

Na ô aˈera Iehu: “Ia farii outou, eiaha e vaiiho i te taata ia haere i rapae i te oire a faatia ˈtu ai i teie ohipa i Iezereela.” 16 Pauma aˈera Iehu i nia i to ˈna pereoo e haere atura i Iezereela, tei reira hoi Iehorama, te tarava ra no te mea ua pepe oia. Ua haere mai te arii Ahazia no Iuda e hiˈo ia Iehorama. 17 Te tia noa ra te tiai i nia i te pare i Iezereela, ite atura oia i te pǔpǔ faehau a Iehu te haere mai ra. Na ô aˈera oia: “Te ite ra vau i te hoê pǔpǔ faehau.” Na ô aˈera Iehorama: “A tono i te hoê taata faahoro puaahorofenua ia ratou ra, e ui o ˈna ia ratou: ‘Te haere mai ra anei outou ma te hau?’” 18 Haere atura ïa te hoê taata faahoro puaahorofenua e farerei ia ratou e na ô atura: “Teie ta te arii e ui ra: ‘Te haere mai ra anei outou ma te hau?’” Na ô maira râ Iehu: “Eaha oe e faahiti ai i te parau o te hau? A haere na muri mai ia ˈu e a pee mai ia ˈu!”

Faaite maira te tiai: “Ua tae te vea ia ratou ra, aita râ o ˈna e hoˈi mai ra.” 19 Tono aˈera ïa oia i te piti o te taata faahoro puaahorofenua. I te taeraa oia ia ratou ra, na ô atura oia: “Teie ta te arii e ui ra: ‘Te haere mai ra anei outou ma te hau?’” Na ô maira râ Iehu: “Eaha oe e faahiti ai i te parau o te hau? A haere na muri mai ia ˈu e a pee mai ia ˈu!”

20 Faaite maira te tiai: “Ua tae te vea ia ratou ra, aita râ o ˈna e hoˈi mai ra. E au te huru faahoro a to ratou raatira i te huru faahoro a Iehu te mootua* a Nimesi, e faahoro hoi o ˈna mai te hoê maamaa.” 21 Na ô aˈera Iehorama: “A faaineine i to ˈu pereoo!” Faaineinehia ihora ïa to ˈna pereoo tamaˈi e haere ihora te arii Iehorama no Iseraela e te arii Ahazia+ no Iuda na nia i to raua pereoo tataitahi e farerei ia Iehu. Farerei aˈera ratou i nia i te tâpû fenua o Nabota+ no Iezereela.

22 I to Iehorama iteraa ia Iehu, na ô atura oia: “Te haere mai ra anei oe ma te hau e Iehu?” Pahono maira râ Iehu: “E nafea te hau e tupu ai mai te peu e vai noa mai te taiata a Iezebela+ to oe metua vahine e ta ˈna mau peu tahutahu e rave rahi?”+ 23 Fariu aˈera Iehorama e reva aˈera na nia i to ˈna pereoo. Na ô aˈera oia ia Ahazia: “E marei teie Ahazia!” 24 Rave aˈera Iehu i ta ˈna fana e teˈa ihora ia Iehorama. Reva ihora te teˈa na ropu i to Iehorama na tapono, pipiha maira te teˈa na roto i to ˈna mafatu, e topa ihora oia i roto i to ˈna pereoo tamaˈi. 25 Na ô atura Iehu ia Bidekara ta ˈna tavini: “A rave ia ˈna e a taora ˈtu i roto i te aua a Nabota no Iezereela.+ A haamanaˈo: tei nia oe e o vau i to tâua puaahorofenua* i muri ia Ahaba to ˈna metua tane i to Iehova faaiteraa i teie parau haavaraa no ˈna:+ 26 ‘“Mai ia ˈu i ite inanahi ra i te toto o Nabota+ e te toto o ta ˈna mau tamaiti,” te na reira mai ra Iehova, “e tahoo+ vau ia oe i ǒ nei i ta oe mau ohipa ino, i nia i teie tâpû fenua,” te na reira mai ra Iehova.’ No reira, i teie nei a rave ia ˈna e a taora ˈtu i nia i tera tâpû fenua, mai ta Iehova i parau.”+

27 I to te arii Ahazia+ no Iuda iteraa i te tupu ra, horo aˈera oia na te eˈa o te fare o te ô. (I muri aˈe, tapapa aˈera Iehu ia ˈna e na ô aˈera: “A taparahi atoa ia ˈna!” Teˈa ihora ïa te mau tane ia ˈna i roto i to ˈna pereoo a haere ai oia na te purumu e pauma ra i Gura, i pihai iho ia Ibeleama.+ Horo noa ihora râ oia i Megido e pohe ihora i reira. 28 Hopoi aˈera ta ˈna mau tavini ia ˈna i Ierusalema na nia i te hoê pereoo, e huna ihora ratou ia ˈna i roto i to ˈna menema e to ˈna mau tupuna i te Oire o Davida.+ 29 Tei te 11 o te matahiti te faatereraa Iehorama te tamaiti a Ahaba to Ahazia+ riroraa mai ei arii no Iuda.)

30 I to Iehu taeraa ˈtu i Iezereela,+ faaroo aˈera Iezebela+ i te reira. Parai ihora ïa oia i to ˈna mata i te peni ereere, faanehenehe ihora i to ˈna rouru e hiˈo ihora na te haamaramarama. 31 A tomo ai Iehu na te uputa o te oire, na ô aˈera Iezebela: “Eaha tei tupu no Zimeri, tei taparahi pohe i to ˈna fatu?”+ 32 Ma te hiˈo i te haamaramarama i nia, na ô aˈera Iehu: “O vai tei to ˈu pae? O vai?”+ Hiˈo maira e piti aore ra e toru tia mana ia ˈna na nia mai. 33 Na ô aˈera oia: “A huri mai ia ˈna i raro!” Huri aˈera ïa ratou ia ˈna i raro. Pahi ihora to ˈna toto i nia i te pǎpai e i nia i te mau puaahorofenua. Taataahi ihora ta Iehu mau puaahorofenua ia ˈna. 34 I muri aˈe, tomo aˈera oia i roto i te fare, tamaa e inu aˈera. Na ô aˈera oia: “A haere e rave i tera vahine o tei faautuahia e a huna ia ˈna. E tamahine hoi o ˈna na te hoê arii.”+ 35 I to ratou râ haereraa e huna ia ˈna, o to ˈna upoo anaˈe, to ˈna avae e to ˈna rima ta ratou i ite mai.+ 36 I to ratou hoˈiraa ˈtu e faaite i te reira ia Iehu, na ô maira oia: “Ua tupu ïa te parau ta Iehova+ i faaite na roto i ta ˈna tavini o Elia no Tisebi: ‘E amu te mau urî ia Iezebela i nia i te tâpû fenua i Iezereela.+ 37 E e riro to Iezebela tino mai te pera i roto i te faaapu, i nia i te tâpû fenua i Iezereela, ia ore te taata ia ite o Iezebela tera.’”

10 E 70 tamaiti ta Ahaba+ i Samaria. Papai e hapono ihora ïa Iehu i te rata i Samaria, i te feia mana o Iezereela, te mau matahiapo,+ e te feia haapao i te mau tamarii a Ahaba,* no te parau: 2 “Te vai ra i ǒ outou te mau tamaiti a to outou fatu ra o Ahaba, oia atoa te pereoo e te puaahorofenua, te hoê oire auahia i te patu e te mauhaa tamaˈi. Ia tae teie rata ia outou, 3 a maiti i te tamaiti maitai e te afaro roa ˈˈe a to outou fatu, a tuu ia ˈna i nia i te terono o to ˈna metua tane e a aro no te utuafare a to outou fatu.”

4 Tera râ, mǎtaˈu roa aˈera ratou e na ô aˈera: “Aita hoi i haere i e piti arii ia patoi ia ˈna,+ e nafea tatou e patoi ai ia ˈna?” 5 Hapono aˈera ïa te tiaau o te aorai,* te tavana o te oire, te mau matahiapo, e te feia haapao i te mau tamarii i teie poroi ia Iehu: “E tavini matou ia oe, e rave matou i te mau mea atoa ta oe e parau mai ia matou. Eita matou e faaarii i te tahi taata. A rave i te mea maitai i to aro.”

6 Papai atura Iehu i te piti o te rata ia ratou no te parau: “Mai te peu tei to ˈu pae outou e ua ineine outou i te auraro ia ˈu, a hopoi mai i te upoo o te mau tamaiti a to outou fatu ananahi i teie hora, i Iezereela.”

Te ora ra na 70 tamaiti a te arii i ǒ te feia faaturahia o te oire, o te haapao ra ia ratou. 7 I te taeraa mai te rata i tera mau taata ra, rave ihora ratou i na 70 tamaiti a te arii e haapohe ihora ia ratou,+ tuu atura i to ratou upoo i roto i te ete e hapono atura i te reira ia Iehu ra i Iezereela. 8 Haere maira te hoê vea e parau ia Iehu: “Ua faataehia mai te upoo o te mau tamaiti a te arii.” Faaue atura ïa Iehu: “A tuu atu i te reira ei piti haapueraa i te tomoraa o te uputa o te oire e poipoi noa ˈtu.” 9 I to ˈna haereraa ˈtu i rapae poipoi aˈe, tia aˈera oia i mua i te nunaa taatoa e na ô aˈera: “Aita outou i hara.* O vau tei orure hau i to ˈu fatu, e ua haapohe au ia ˈna.+ Teie râ feia, na vai i haapohe ia ratou? 10 No reira, ia ite outou: e tupu te mau parau atoa a Iehova, e tupu te mau parau atoa ta Iehova i faaite no nia i te utuafare o Ahaba.+ Ua rave Iehova i ta ˈna i parau na roto i ta ˈna tavini o Elia.”+ 11 Haapohe atoa ihora Iehu i tei toe mai no te utuafare o Ahaba i Iezereela, to ˈna mau hoa, te feia faaturahia e ta ˈna mau tahuˈa.+ Aita oia i faaherehere hoê o ratou.+

12 Haere atura Iehu i Samaria. E fare paotiraa huruhuru na te mau tiai mamoe to nia i te purumu ta ˈna i rave. 13 I reira, farerei aˈera Iehu i te mau taeae o te arii Ahazia+ no Iuda. Ui atura oia ia ratou: “O vai outou?” Parau maira ratou: “E taeae matou no Ahazia, e te haere ra matou e hiˈo mea maitai anei te mau tamaiti a te arii e te mau tamaiti a te metua vahine o te arii.” 14 Faaue aˈera Iehu: “A haru mai ia ratou!” Haru maira ïa te mau faehau ia ratou e taparahi ihora ia ratou i te apoo pape o te fare a te mau tiai mamoe. E 42 rahiraa ratou, e aita Iehu i faaherehere hoê.+

15 I te faarueraa Iehu i tera vahi, ite atura oia ia Iehonadaba+ te tamaiti a Rekaba,+ o te haere mai ra e farerei ia ˈna. Aroha ˈtura* oia ia ˈna e ui atura: “Te turu ra anei oe ia ˈu ma te aau taatoa mai ia ˈu e turu ra ia oe ma te aau taatoa?”

Pahono maira Iehonadaba: “E.”

“A toro mai ïa i to rima.”

Toro maira ïa Iehonadaba i to ˈna rima e huti maira Iehu ia ˈna i nia i to ˈna pereoo. 16 Na ô atura Iehu: “A haere mai na muri ia ˈu, e ite oe eita vau e farii i te taiva ia Iehova.”+ Rave maira ïa Iehu ia ˈna i nia i to ˈna pereoo. 17 Tae maira oia i Samaria e haapohe ihora i tei toe mai no te utuafare o Ahaba i Samaria. Ua haamou oia ia ratou paatoa,+ mai ta Iehova i faaite na roto ia Elia.+

18 Haaputuputu atoa ihora Iehu i te nunaa taatoa e na ô aˈera ia ratou: “Mea iti ta Ahaba haamoriraa ia Baala,+ e rahi aˈe râ ta Iehu haamoriraa ia ˈna. 19 A titau mai ïa i te mau peropheta atoa a Baala,+ to ˈna feia haamori e ta ˈna mau tahuˈa.+ Ia tae paatoa mai ratou, e tusia rahi hoi ta ˈu e haere mai ra e pûpû ia Baala. E haapohehia tei ore i tae mai.” E haavare râ tera ta Iehu, te hinaaro ra hoi oia e haamou i te feia haamori ia Baala.

20 Na ô faahou aˈera Iehu: “A faaite* i te hoê tairururaa taa ê no Baala.” Faaite haere atura ïa ratou i te reira. 21 I muri aˈe, faatae atura Iehu i te poroi ati aˈe Iseraela, e haere maira pauroa te taata haamori ia Baala. Aita hoê o ratou i ore i haere mai. Tomo aˈera ratou i roto i te hiero* o Baala+ e î roa aˈera te hiero, mai te tahi pae i te tahi atu pae. 22 Na ô atura Iehu i te taata e haapao ra i te vairaa ahu: “A afai mai i te ahu no te taatoaraa o te feia haamori ia Baala.” Afai maira ïa oia i te ahu no ratou. 23 Tomo atura Iehu raua Iehonadaba+ te tamaiti a Rekaba i roto i te hiero o Baala. Na ô aˈera oia i te feia haamori ia Baala: “A imi maitai, eiaha ei feia haamori ia Iehova i ǒ nei, ei feia haamori ia Baala anaˈe râ.” 24 Haere maira ratou e pûpû i te tusia taauahi e te tahi atu mau tusia. Ua tuu Iehu e 80 o ta ˈna mau faehau i rapae e ua parau atu: “Ia ora hoê taata ta ˈu e tuu atu nei i to outou rima, o outou te pohe no ratou.”

25 I te otiraa ta ˈna pûpûraa tusia taauahi, na ô aˈera Iehu i te mau tiai* e te mau faehau: “A tomo mai e a taparahi ia ratou! Eiaha hoê ia ora mai!”+ Taparahi ihora ïa te mau tiai e te mau faehau ia ratou i te ˈoˈe e taora aˈera ia ratou i rapae. Ua tae roa ratou i roto mai i te nao* o te hiero o Baala. 26 Hopoi maira ratou i te mau pou haamoriraa+ o te hiero o Baala i rapae e tutui ihora i te reira.+ 27 Vavahi ihora ratou i te pou haamoriraa+ a Baala. Vavahi ihora ratou i te hiero o Baala+ e faariro atura i te reira ei vahi haumitiraa e tae roa mai i teie mahana.

28 Mea na reira ïa Iehu i te faaoreraa i te haamoriraa ia Baala i te fenua o Iseraela. 29 Tera râ, aita Iehu i fariu ê i te mau hara ta Ieroboama te tamaiti a Nebata i turai ia Iseraela ia rave, oia hoi i te haamoriraa i na fanauˈa puaatoro auro i Betela e i Dana.+ 30 Na ô maira ïa Iehova ia Iehu: “No te mea ua rave oe i te mea maitai e ua rave oe i te mea tia i to ˈu aro i to oe raveraa i te mau mea atoa ta ˈu i faaoti e rave i nia i te utuafare o Ahaba,+ e parahi ta oe mau tamaiti i nia i te terono o Iseraela e tae roa ˈtu i te maha o te uˈi.”+ 31 Aita râ Iehu i tamau i te haapao i te Ture a Iehova te Atua o Iseraela ma te aau taatoa.+ Aita oia i fariu ê i te mau hara ta Ieroboama i turai ia Iseraela ia rave.+

32 I taua tau ra, vaiiho aˈera Iehova ia haru-riirii-hia te fenua o Iseraela. Ua tamau Hazaela i te aro ia Iseraela ati aˈe i to ratou tuhaa fenua,+ 33 mai Ioridana mai i te pae hitia o te râ, te tuhaa fenua taatoa o Gileada (oia hoi te tuhaa a te ati Gada, te ati Reubena e te ati Manase),+ e mai Aroera mai, i pihai iho i te peho o Aranona, e tae atu i Gileada e Basana.+

34 Te toea o te aamu o Iehu, te mau mea atoa ta ˈna i rave e to ˈna puai atoa, ua papaihia ïa i roto i te buka o te aamu o te tau o te mau arii o Iseraela. 35 Taoto ihora Iehu i roto i te pohe e to ˈna mau tupuna, e hunahia ihora oia i Samaria. E riro maira ta ˈna tamaiti ra o Iehoahaza+ ei arii ei mono ia ˈna. 36 E 28 matahiti to Iehu faatereraa ia Iseraela i Samaria.

11 I to Atalia,+ te metua vahine o Ahazia, iteraa e ua pohe ta ˈna tamaiti,+ faaue ihora oia ia haapohehia pauroa te huaai o te arii.+ 2 Tera râ, rave huna ihora Iehoseba te tamahine a te arii Iehorama, te tuahine o Ahazia, ia Iehoasa+ te tamaiti a Ahazia. Tei rotopu oia i te tahi atu mau tamaiti a te arii o te haapohehia. Ua faatapuni Iehoseba ia Iehoasa e te vahine tei hii ia ˈna i roto i te hoê piha, eiaha Atalia ia ite i te tamaroa. Mea na reira Iehoasa i te oraraa mai. 3 Tapuni noa ˈtura raua i roto i te hiero* o Iehova e ono matahiti, a faatere ai Atalia i taua fenua ra.

4 I te hitu o te matahiti, tono aˈera Iehoiada i te taata e tii i te mau raatira hanere o te mau faehau a te arii e o te mau faehau* o te aorai.+ Titau maira oia ia ratou ia ˈna ra i te hiero o Iehova. Faaau ihora oia i te hoê faufaa ia ratou e faahoreo ihora ia ratou i roto i te hiero o Iehova. Faaite atura oia ia ratou i te tamaiti a te arii.+ 5 Faaue atura oia ia ratou: “Teie ta outou e rave: i roto i ta outou mau pǔpǔ faehau o te ohipa i te Sabati, e tiai hoê tuhaa i te aorai* o te arii,+ 6 ei te Uputa o te niu te tahi tuhaa, e ei te uputa i muri i te mau faehau o te aorai te toru o te tuhaa. E ohu ta outou mau pǔpǔ no te tiai i te hiero. 7 Ta outou na pǔpǔ e piti o te ore e ohipa i te Sabati, e tiai ratou i te hiero o Iehova no te paruru i te arii. 8 E haaati outou i te arii na te mau pae atoa, te taata tataitahi e ta ˈna mau mauhaa i te rima. E haapohe outou i te taata atoa o te tamata i te tomo i rotopu i te mau anairaa faehau. Ei pihai iho outou i te arii i te mau vahi atoa ta ˈna e haere.”*

9 Ua rave te mau raatira hanere+ mai ta Iehoiada te tahuˈa i faaue. Ua rave te taata tataitahi i ta ˈna pue taata o tei titauhia no te ohipa i te Sabati, oia atoa i tei ore i titauhia no te ohipa i te Sabati, e haere maira ratou ia Iehoiada ra te tahuˈa.+ 10 Horoa ˈtura te tahuˈa i te mau raatira hanere ra i te mau omore e te mau paruru menemene a te arii Davida, no roto mai i te hiero o Iehova. 11 Tia ˈtura te mau faehau o te aorai,+ te taata tataitahi e ta ˈna mau mauhaa i te rima, mai te pae atau o te hiero e tae atu i te pae aui o te hiero, i pihai iho i te fata+ e i pihai iho i te hiero, ati aˈe i te arii. 12 Aratai maira Iehoiada i te tamaiti a te arii+ i rapae e tuu atura i te hei upoo e te Haamanaˈoraa*+ i nia ia ˈna. Faaarii e faatavai ihora ïa ratou ia ˈna. Popou atura ratou ma te tuô: “Ia ora te arii!”+

13 I to Atalia faarooraa i te taata te horo ra, haavitiviti ihora oia i te haere mai e apiti i te nahoa i te hiero o Iehova.+ 14 Ite atura oia i te arii e tia ra i pihai iho i te pou mai tei matauhia.+ Tei pihai iho te mau raatira e te feia faaoto i te pu+ i te arii. Te oaoa ra te nunaa taatoa o taua fenua ra e te faaoto ra i te pu. I reira, hahae ihora Atalia i to ˈna ahu e tuô aˈera: “Orure hau! Orure hau!” 15 Faaue ihora râ Iehoiada te tahuˈa i te mau raatira hanere,+ te feia i tuuhia i nia i te nuu: “A aratai ia ˈna i rapaeau i te mau anairaa faehau. Ia pee hoê ia ˈna, a haapohe atu i te ˈoˈe!” Ua parau hoi te tahuˈa eiaha e haapohe ia ˈna i roto i te hiero o Iehova. 16 Haru aˈera ïa ratou ia ˈna e afai aˈera i te aorai o te arii, i te vahi e tomo mai ai te mau puaahorofenua.+ I reira, haapohehia ihora oia.

17 Faaau ihora Iehoiada i te hoê faufaa i rotopu ia Iehova, te arii e te nunaa,+ oia hoi ei nunaa noa ratou no Iehova. E ua faaau atoa oia i te hoê faufaa i rotopu i te arii e te nunaa.+ 18 I muri aˈe, haere maira te nunaa taatoa o taua fenua ra i te hiero o Baala e vavahi atura i ta ˈna mau fata,+ tuparari ihora i to ˈna mau tii,+ e haapohe atura ia Matatana te tahuˈa a Baala+ i mua i te mau fata.

I muri iho, faatoroa ˈtura te tahuˈa i te tahi mau tiaau no te hiero o Iehova.+ 19 Rave atoa ˈtura oia i te mau raatira hanere,+ te mau faehau a te arii, te mau faehau o te aorai,+ e te taata atoa o taua fenua ra no te aratai i te arii mai te hiero o Iehova i te aorai o te arii. Ua haere ratou na te eˈa o te uputa o te mau faehau o te aorai. I to ratou taeraa ˈtu, parahi ihora Iehoasa i nia i te terono o te mau arii.+ 20 Ua oaoa roa ïa te taata atoa o taua fenua ra e vai hau noa ˈtura te oire no te mea ua haapohehia Atalia* i pihai iho i te aorai o te arii.

21 E hitu matahiti to Iehoasa+ i to ˈna riroraa mai ei arii.+

12 I te hitu o te matahiti te faatereraa Iehu,+ riro maira Iehoasa+ ei arii, e 40 matahiti to ˈna faatereraa i Ierusalema. Te iˈoa o to ˈna metua vahine, o Zibia ïa no Beere-seba.+ 2 Ua rave Iehoasa i te mea maitai i mua ia Iehova i te mau mahana atoa i haapii ai Iehoiada te tahuˈa ia ˈna. 3 Aita râ te mau vahi teitei+ i faaorehia, e te pûpû noa ra te nunaa i te tusia i nia i te mau vahi teitei a faahaere atu ai i te au auahi o te mau tusia i nia.

4 Na ô atura Iehoasa i te mau tahuˈa: “A rave pauroa te moni te hopoihia mai ra i te fare o Iehova no te mau ô moˈa:+ te moni i titauhia i te taata tataitahi ia aufau,+ te moni ta te mau tahuˈa i rave mai i te feia ra o tei euhe, e pauroa te moni ta te taata e pûpû ra ma te aau tae i te fare o Iehova.+ 5 E rave mai te mau tahuˈa i te reira i te rima o te feia horoa* a faaohipa ˈtu ai no te tataî i te fare, i te mau vahi ino* atoa.”+

6 I te 23 o te matahiti to te arii Iehoasa faatereraa, aita â te mau tahuˈa i tataî atura i te mau vahi ino o te hiero.+ 7 Titau maira ïa Iehoasa te arii ia Iehoiada+ te tahuˈa, e te tahi atu mau tahuˈa, e na ô aˈera ia ratou: “Eaha outou e ore ai e tataî i te fare? Eiaha outou e rave faahou i te moni i te rima o te feia horoa maori râ no te tataî i te fare.”+ 8 Faaoti aˈera ïa te mau tahuˈa eiaha e rave faahou i te moni a te nunaa e eiaha e tiaau faahou i te tataîraa o te hiero.

9 Rave aˈera te tahuˈa Iehoiada i te hoê afata,+ faaapoo ihora i to ˈna tapoˈi e tuu atura i te reira i pihai iho i te fata i te pae atau ia tomo te taata i roto i te hiero o Iehova. I reira te mau tahuˈa o te tavini ra ei tiai uputa e tuu ai pauroa te moni i hopoihia mai i te hiero o Iehova.+ 10 Ia ite ratou e mea rahi te moni i roto i te afata, e haere mai te papai parau a te arii e te tahuˈa rahi e ohi* i te moni i hopoihia mai i te hiero o Iehova e e taio ratou i te reira.+ 11 Ia oti te moni i te taiohia, e horoa ratou i te reira i te feia i maitihia no te tiaau i te ohipa e ravehia i roto i te hiero o Iehova. E i tera moni, e aufau teie mau tiaau i te feia tarai raau e te feia patu o te tataî ra i te hiero o Iehova,+ 12 oia atoa i te feia tâpû ofai e te feia tarai ofai. E hoo atoa mai ratou i te raau e te ofai taraihia no te tataî i te hiero o Iehova. E faaohipa atoa ratou i tera moni no te tahi atu mau haamâuˈaraa no te tataîraa o te hiero.

13 Tera râ, aita te moni i hopoihia mai i te hiero o Iehova i faaohipahia no te hamani i te farii pape ario rarahi, te paoti uiti, te auˈa, te pu,+ aore ra i te tahi atu mau huru taoˈa auro aore ra ario no te hiero o Iehova.+ 14 E horoahia tera moni i te feia noa o tei rave i te ohipa, e e faaohipa ratou i te reira no te tataî i te hiero o Iehova. 15 Te feia ta ratou i horoa i te moni no te horoa ˈtu i te feia rave ohipa, eita ratou e uiuihia, e feia tiaturihia hoi ratou.+ 16 Aita râ te moni no te mau tusia no te hapa+ e te moni no te mau tusia no te hara i ravehia no te tataîraa i te hiero o Iehova. Na te mau tahuˈa te reira.+

17 Tei tera ra tau to Hazaela+ te arii o Suria haereraa e aro ia Gata+ e noaa ˈtura ia ˈna tera oire i te haruhia. Opua ˈtura oia i te aro* ia Ierusalema.+ 18 Rave ihora ïa te arii Iehoasa no Iuda pauroa te ô moˈa ta to ˈna mau tupuna ra o Iehosaphata, Iehorama e Ahazia, nau arii o Iuda, i faataa no te haamoriraa.* Rave atoa ihora oia i ta ˈna iho mau ô moˈa e pauroa te auro e vai ra i roto i te mau vairaa taoˈa o te hiero o Iehova e te aorai* o te arii. Hapono ihora oia i te reira ia Hazaela ra te arii o Suria.+ Faarue maira ïa Hazaela ia Ierusalema.

19 Te toea o te aamu o Iehoasa, te mau mea atoa ta ˈna i rave, ua papaihia ïa i roto i te buka o te aamu o te tau o te mau arii o Iuda. 20 I muri aˈe, opua ˈtura ta Iehoasa mau tia mana e rave i te hoê ohipa ino i nia ia ˈna+ e taparahi ihora ia ˈna i te fare o Milo,*+ i nia i te purumu e aratai ra i Tila. 21 Na ta ˈna na tia mana o Iozahara te tamaiti a Simeata raua Iehozabada te tamaiti a Somera i taparahi ia ˈna.+ Hunahia ihora oia i pihai iho i to ˈna mau tupuna i te Oire o Davida, e riro maira ta ˈna tamaiti ra o Amazia ei arii ei mono ia ˈna.+

13 I te 23 o te matahiti te faatereraa te arii Iehoasa+ no Iuda, te tamaiti a Ahazia,+ riro maira Iehoahaza te tamaiti a Iehu+ ei arii no Iseraela i Samaria, e 17 matahiti to ˈna faatereraa. 2 Ua rave noa oia i te mea ino i mua ia Iehova, e ua tamau oia i te rave i te hara ta Ieroboama te tamaiti a Nebata i turai ia Iseraela ia rave.+ Aita oia i fariu ê i te reira. 3 Riri roa aˈera ïa Iehova+ ia Iseraela,+ e tuu atura oia ia ratou i te rima o te arii Hazaela+ no Suria e i te rima o Bene-hada+ te tamaiti a Hazaela no te hoê tau roa.

4 I te hoê taime, taparu ihora Iehoahaza ia Iehova ia hamani maitai mai ia ˈna.* Faaroo maira Iehova ia ˈna, ua ite hoi oia i te haavîraa rahi a te arii o Suria i nia ia Iseraela.+ 5 Horoa maira ïa Iehova i te hoê faaora+ no Iseraela no te faaora ia ratou i te rima o Suria, e ua nehenehe faahou atura ïa te ati Iseraela e parahi i ǒ ratou mai na mua ˈˈe.* 6 (Aita râ ratou i fariu ê i te hara a te utuafare o Ieroboama, o ta ˈna i turai ia Iseraela ia rave.+ Rave noa ˈtura ratou i tera hara, e vai noa ˈtura te raau haamoriraa*+ i Samaria.) 7 Toe noa maira i roto i te nuu a Iehoahaza e 50 taata faahoro puaahorofenua, 10 pereoo, e 10 000 faehau haere avae. Ua haamou hoi te arii o Suria i te tahi atu mau faehau,+ ua taataahi oia ia ratou mai te repo i te vahi tairiiriraa huero maa.*+

8 Te toea o te aamu o Iehoahaza, te mau mea atoa ta ˈna i rave e to ˈna puai, ua papaihia ïa i roto i te buka o te aamu o te tau o te mau arii o Iseraela. 9 Taoto ihora Iehoahaza i roto i te pohe e to ˈna mau tupuna, hunahia ihora oia i Samaria,+ e riro maira ta ˈna tamaiti ra o Iehoasa ei arii ei mono ia ˈna.

10 I te 37 o te matahiti te faatereraa te arii Iehoasa no Iuda, riro maira Iehoasa+ te tamaiti a Iehoahaza ei arii no Iseraela i Samaria, e 16 matahiti to ˈna faatereraa. 11 Ua rave noa oia i te mea ino i mua ia Iehova, aita i fariu ê i te mau hara atoa ta Ieroboama te tamaiti a Nebata i turai ia Iseraela ia rave.+ Ua tamau oia i te rave i tera mau hara.

12 Te toea o te aamu o Iehoasa, te mau mea atoa ta ˈna i rave, to ˈna puai e to ˈna aroraa i te arii Amazia no Iuda,+ ua papaihia ïa i roto i te buka o te aamu o te tau o te mau arii o Iseraela. 13 Taoto ihora Iehoasa i roto i te pohe e to ˈna mau tupuna, e riro maira Ieroboama*+ ei arii ei mono ia ˈna. Ua hunahia Iehoasa i Samaria i pihai iho i te mau arii o Iseraela.+

14 I te rooraahia Elisaia+ i te maˈi e pohe ai oia, ua haere mai Iehoasa te arii o Iseraela ia ˈna ra e ua taˈi ia ˈna ma te parau: “To ˈu metua tane, to ˈu metua tane! Te pereoo o Iseraela e to ˈna feia faahoro puaahorofenua!”+ 15 Na ô atura Elisaia ia ˈna: “A haere a tii i te hoê fana e te tahi mau teˈa.” Tii aˈera ïa oia i te hoê fana e te tahi mau teˈa. 16 Na ô atura Elisaia i te arii o Iseraela: “A rave i te fana.” Rave ihora ïa oia i te fana. Tuu ihora Elisaia i to ˈna rima i nia i te rima o te arii. 17 Na ô atura oia: “A iriti i te haamaramarama i te pae hitia o te râ.” Iriti ihora ïa oia i te haamaramarama. Na ô atura Elisaia: “A teˈa!” Teˈa ihora ïa oia. Na ô atura Elisaia: “O ta Iehova teˈa o te upootiaraa* teie, te teˈa o te upootiaraa* i nia ia Suria! E tairi oe ia Suria i Apheka+ e e pau ratou ia oe.”

18 Na ô faahou atura oia: “A rave i te mau teˈa.” Rave ihora te arii o Iseraela i te mau teˈa. Na ô atura Elisaia: “A tairi i raro i te repo.” Tairi ihora ïa oia e toru taime i raro i te repo e faaea ihora. 19 Riri aˈera te taata no te Atua mau ia ˈna e na ô atura: “Ahani oe i tairi i te repo e pae aore ra e ono taime, e tairi ïa oe ia Suria e e pau ratou ia oe! I teie nei râ, e tairi oe ia Suria e toru noa taime.”+

20 I muri aˈe, pohe ihora Elisaia e hunahia ihora oia. Tera râ, e pǔpǔ eiâ no Moabi+ tei haere noa mai i taua fenua ra i te mau haamataraa matahiti atoa.* 21 A huna ˈi te tahi mau taata i te hoê taata pohe, ite aˈera ratou i te pǔpǔ eiâ. Taora ihora ïa ratou i taua taata ra i roto i te menema o Elisaia e horo aˈera. I te toparaa te tino i nia i te mau ivi o Elisaia, ora maira tera taata+ e tia aˈera oia.

22 I haavî na te arii Hazaela+ no Suria ia Iseraela+ i te mau mahana atoa o Iehoahaza. 23 Tera râ, hamani maitai faahou maira e aroha ihora Iehova i te ati Iseraela.+ Ua haapeapea oia no ratou no ta ˈna faufaa e o Aberahama,+ Isaaka,+ e Iakoba.+ Aita oia i hinaaro e haamou ia ratou, e tae roa mai i teie mahana aita â oia i faarue aˈenei ia ratou. 24 I to te arii Hazaela no Suria poheraa, riro maira ta ˈna tamaiti o Bene-hada ei arii ei mono ia ˈna. 25 Rave faahou maira Iehoasa te tamaiti a Iehoahaza i te rima ra o Bene-hada te tamaiti a Hazaela i te mau oire ta ˈna i rave i te rima o Iehoahaza i roto i te tamaˈi. Ua tairi Iehoasa ia Bene-hada e toru taime,+ e rave faahou maira oia i tera mau oire o Iseraela.

14 I te piti o te matahiti te faatereraa Iehoasa+ te arii o Iseraela, te tamaiti a Iehoahaza, riro maira Amazia, te tamaiti a te arii Iehoasa no Iuda, ei arii. 2 E 25 matahiti to ˈna i to ˈna riroraa mai ei arii e e 29 matahiti to ˈna faatereraa i Ierusalema. Te iˈoa o to ˈna metua vahine, o Iehoadina no Ierusalema.+ 3 Ua rave Amazia i te mea maitai i mua ia Iehova, eiaha râ mai ia Davida+ to ˈna tupuna. Ua rave oia i te mau mea atoa ta Iehoasa to ˈna metua tane i rave.+ 4 Aita râ te mau vahi teitei i faaorehia,+ e te pûpû noa ra te nunaa i te tusia i nia i te mau vahi teitei a faahaere atu ai i te au auahi o te mau tusia i nia.+ 5 I te mau-papu-raa te faatereraa arii i to ˈna rima, taparahi ihora Amazia i na tia mana ta ˈna o tei taparahi i to ˈna metua tane te arii.+ 6 Aita râ oia i haapohe i te mau tamaiti a na taparahi taata, ia au i te faaueraa a Iehova tei papaihia i roto i te buka o te Ture a Mose: “Eiaha te mau metua tane ia haapohehia no te mau hara a ta ratou mau tamaiti, e eiaha te mau tamaiti ia haapohehia no te mau hara a to ratou mau metua tane. Ia haapohehia râ te taata tataitahi no ta ˈna iho hara.”+ 7 Ua upootia Amazia i nia i te ati Edoma+ i te peho o te Miti papaa:+ 10 000 taata ta ˈna i taparahi. I roto i tera tamaˈi, ua haru mai oia i te oire o Sêla+ e ua tuuhia te iˈoa Ioketeela e tae roa mai i teie mahana.

8 Tono aˈera Amazia i te vea ia Iehoasa ra te tamaiti a Iehoahaza te tamaiti a Iehu te arii o Iseraela no te parau atu: “Haere mai, e aro* anaˈe tâua.”+ 9 Faatae maira ïa te arii Iehoasa no Iseraela i teie poroi i te arii Amazia no Iuda: “Ua faatae te raau taratara no Lebanona i teie poroi i te tumu arezi no Lebanona: ‘A horoa i ta oe tamahine ei vahine faaipoipo na ta ˈu tamaiti.’ Haere maira râ te hoê animara oviri no Lebanona e taataahi ihora i te raau taratara. 10 Parau mau, ua upootia oe i nia ia Edoma,+ no reira to aau i teoteo ai. A oaoa i to oe hanahana, a faaea râ i ǒ oe.* Eaha oe e imi ai i to oe ati a hiˈa ˈtu ai ma te aratai ia Iuda na muri ia oe?” 11 Aita râ Amazia i faaroo ia Iehoasa.+

Haere ihora ïa te arii Iehoasa no Iseraela e aro i te arii Amazia no Iuda i Bete-semesa,+ i te fenua o Iuda.+ 12 Pau ihora Iuda ia Iseraela. Horo aˈera ïa te mau faehau no Iuda i ǒ ratou.* 13 I Bete-semesa, haru maira te arii Iehoasa no Iseraela i te arii Amazia no Iuda, te tamaiti a Iehoasa te tamaiti a Ahazia. Haere maira oia i Ierusalema e vavahi atura hoê tuhaa o te aua e 400 kubiti te aano* mai te Uputa o Epheraima+ e tae atu i te Uputa i te poro.+ 14 Rave ihora oia pauroa te auro, te ario e te mau taoˈa atoa e vai ra i roto i te hiero* o Iehova e i roto i te mau piha vairaa taoˈa o te aorai* o te arii. Haru atoa maira oia i te taata. I muri iho, hoˈi atura oia i Samaria.

15 Te toea o te aamu o Iehoasa, te mau mea atoa ta ˈna i rave, to ˈna puai e to ˈna aroraa i te arii Amazia no Iuda, ua papaihia ïa i roto i te buka o te aamu o te tau o te mau arii o Iseraela. 16 Taoto ihora Iehoasa i roto i te pohe e to ˈna mau tupuna e tanuhia ihora oia i Samaria+ i pihai iho i te mau arii o Iseraela. E riro maira ta ˈna tamaiti ra o Ieroboama*+ ei arii ei mono ia ˈna.

17 I muri aˈe i te poheraa Iehoasa+ te tamaiti a Iehoahaza te arii o Iseraela,+ ua ora â Amazia+ te tamaiti a Iehoasa te arii o Iuda 15 matahiti. 18 Te toea o te aamu o Amazia, ua papaihia ïa i roto i te buka o te aamu o te tau o te mau arii o Iuda. 19 I muri aˈe, tupu aˈera te orureraa hau ia ˈna+ i Ierusalema, e horo ihora oia i Lakisa. Tonohia ˈtura râ te taata no te aˈuaˈu ia ˈna e haapohe ihora ratou ia ˈna i Lakisa. 20 Faahoˈihia ihora to ˈna tino i Ierusalema na nia i te pereoo hutihia e te puaahorofenua, e hunahia ihora oia i pihai iho i to ˈna mau tupuna i te Oire o Davida.+ 21 Faaarii ihora te nunaa taatoa o Iuda ia Azaria*+ ei mono ia Amazia+ to ˈna metua tane. E 16 matahiti+ to Azaria i tera taime. 22 Na ˈna i patu faahou ia Elata+ e na ˈna i faahoˈi atu i tera oire ia Iuda ra i muri aˈe i to te arii* taotoraa i roto i te pohe e to ˈna mau tupuna.+

23 I te 15 o te matahiti te faatereraa Amazia te arii o Iuda, te tamaiti a Iehoasa, riro maira Ieroboama+ te tamaiti a te arii Iehoasa no Iseraela ei arii i Samaria, e e 41 matahiti to ˈna faatereraa. 24 Ua rave noa oia i te mea ino i mua ia Iehova. Aita oia i fariu ê i te mau hara atoa ta Ieroboama te tamaiti a Nebata i turai ia Iseraela ia rave.+ 25 Ua faahoˈi mai oia i te otia o Iseraela mai Lebo-hamata*+ e tae atu i te miti o te Araba,*+ mai ta Iehova te Atua o Iseraela i faaite na roto i te peropheta no Gata-hephera,+ ta ˈna tavini ra o Iona+ te tamaiti a Amitai. 26 Ua ite hoi Iehova i te ahoaho rahi o Iseraela.+ Aita e taata faahou no te tauturu ia Iseraela, aita hoê noa ˈˈe taata haihai. 27 Ua fafau râ Iehova e eita oia e tumâ i te iˈoa o Iseraela i raro aˈe i teie nei raˈi.+ Faaora ihora ïa oia i te ati Iseraela na roto ia Ieroboama te tamaiti a Iehoasa.+

28 Te toea o te aamu o Ieroboama, te mau mea atoa ta ˈna i rave e to ˈna puai, to ˈna aroraa e to ˈna faahoˈiraa ia Damaseko+ e Hamata+ ia Iuda ra i Iseraela, ua papaihia ïa i roto i te buka o te aamu o te tau o te mau arii o Iseraela. 29 Taoto ihora Ieroboama i roto i te pohe e to ˈna mau tupuna, e te mau arii o Iseraela. E riro maira ta ˈna tamaiti o Zekaria+ ei arii ei mono ia ˈna.

15 I te 27 o te matahiti te faatereraa te arii Ieroboama* no Iseraela, riro maira Azaria*+ te tamaiti a te arii Amazia+ no Iuda ei arii.+ 2 E 16 matahiti to ˈna i to ˈna riroraa mai ei arii e e 52 matahiti to ˈna faatereraa i Ierusalema. Te iˈoa o to ˈna metua vahine, o Iekolia no Ierusalema. 3 Ua rave Azaria i te mea maitai i mua ia Iehova, mai ta Amazia to ˈna metua tane i rave na.+ 4 Aita râ te mau vahi teitei i faaorehia,+ e te pûpû noa ra te nunaa i te tusia i nia i te mau vahi teitei a faahaere atu ai i te au auahi o te mau tusia i nia.+ 5 Tairi ihora Iehova i te arii i te hoê maˈi e vai lepera+ noa ˈtura oia e pohe noa ˈtu oia. Ua faaea oia i roto i te hoê fare taa noa.+ Na ta ˈna tamaiti o Iotama+ i haapao i te aorai* e na ˈna i haava i te taata o taua fenua ra.+ 6 Te toea o te aamu o Azaria,+ te mau mea atoa ta ˈna i rave, ua papaihia ïa i roto i te buka o te aamu o te tau o te mau arii o Iuda. 7 Taoto ihora Azaria i roto i te pohe e to ˈna mau tupuna,+ e hunahia ihora oia i pihai iho ia ratou i te Oire o Davida. E riro maira ta ˈna tamaiti o Iotama ei arii ei mono ia ˈna.

8 I te 38 o te matahiti te faatereraa te arii Azaria+ no Iuda, riro maira Zekaria+ te tamaiti a Ieroboama ei arii no Iseraela i Samaria, e e ono avaˈe to ˈna faatereraa. 9 Ua rave oia i te mea ino i mua ia Iehova, mai ta to ˈna mau tupuna i rave na. Aita oia i fariu ê i te mau hara ta Ieroboama te tamaiti a Nebata i turai ia Iseraela ia rave.+ 10 Orure hau ihora Saluma te tamaiti a Iabesa ia Zekaria e taparahi ihora ia ˈna+ i Ibeleama.+ I muri iho, riro maira oia ei arii ei mono ia ˈna. 11 Te toea o te aamu o Zekaria, ua papaihia ïa i roto i te buka o te aamu o te tau o te mau arii o Iseraela. 12 Ua tupu ïa te parau ta Iehova i faaite ia Iehu: “E parahi ta oe mau tamaiti+ i nia i te terono o Iseraela e tae roa ˈtu i te maha o te uˈi.”+ Mea na reira tera parau i te tupuraa.

13 Riro maira Saluma te tamaiti a Iabesa ei arii i te 39 o te matahiti te faatereraa te arii Uzia+ no Iuda, e hoê avaˈe tia to ˈna ariiraa i Samaria. 14 Haere ihora Menahema te tamaiti a Gati i Samaria mai Tireza ˈtu.+ I reira, taparahi ihora oia ia Saluma+ te tamaiti a Iabesa. I muri iho, riro maira oia ei arii ei mono ia ˈna. 15 Te toea o te aamu o Saluma e ta ˈna orureraa hau, ua papaihia ïa i roto i te buka o te aamu o te tau o te mau arii o Iseraela. 16 Tei tera ra tau to Menahema haereraa ˈtu mai Tireza mai e taparahi i to Tiphesa e to ˈna tuhaa fenua. Ua na reira oia no te mea aita te feia o taua vahi ra i tatara i te uputa o to ratou oire ia ˈna. Taparahi ihora oia ia ratou e atore atura i ta ratou mau vahine hapû.

17 I te 39 o te matahiti te faatereraa te arii Azaria no Iuda, riro maira Menahema te tamaiti a Gati ei arii no Iseraela, e hoê ahuru matahiti to ˈna faatereraa i Samaria. 18 Ua rave noa oia i te mea ino i mua ia Iehova. I te roaraa o to ˈna oraraa, aita oia i fariu ê i te mau hara atoa ta Ieroboama te tamaiti a Nebata i turai ia Iseraela ia rave.+ 19 Haere maira te arii Pula+ no Asura i te fenua o Iseraela, e horoa ˈtura Menahema 1 000 taleni* ario na Pula ia turu oia ia ˈna no te haapapuraa i to ˈna rima i nia i te faatereraa arii.+ 20 Ia tia tera faito ario no te horoa ˈtu i te arii o Asura, ua faahepo Menahema i te feia moni+ no Iseraela ia aufau 50 sekela* ario na nia i te taata tataitahi. Hoˈi atura ïa te arii o Asura e aita i faaea mai i taua fenua ra. 21 Te toea o te aamu o Menahema,+ te mau mea atoa ta ˈna i rave, ua papaihia ïa i roto i te buka o te aamu o te tau o te mau arii o Iseraela. 22 Taoto ihora Menahema i roto i te pohe e to ˈna mau tupuna e riro maira ta ˈna tamaiti ra o Pekahia ei arii ei mono ia ˈna.

23 I te 50 o te matahiti te faatereraa te arii Azaria no Iuda, riro maira Pekahia te tamaiti a Menahema ei arii no Iseraela i Samaria, e e piti matahiti to ˈna faatereraa. 24 Ua rave noa oia i te mea ino i mua ia Iehova. Aita oia i fariu ê i te mau hara ta Ieroboama te tamaiti a Nebata i turai ia Iseraela ia rave.+ 25 Orure hau ihora ta ˈna tavini ra o Peka+ te tamaiti a Remalia ia ˈna e taparahi ihora ia ˈna i roto i te pare etaeta o te aorai* o te arii i Samaria, ratou Aragoba e Arie. E 50 taata no Gileada ia ˈna ra. Mea na reira to Peka riroraa mai ei arii ei mono ia Pekahia. 26 Te toea o te aamu o Pekahia, te mau mea atoa ta ˈna i rave, ua papaihia ïa i roto i te buka o te aamu o te tau o te mau arii o Iseraela.

27 I te 52 o te matahiti te faatereraa te arii Azaria no Iuda, riro maira Peka+ te tamaiti a Remalia ei arii no Iseraela i Samaria, e e 20 matahiti to ˈna faatereraa. 28 Ua rave noa oia i te mea ino i mua ia Iehova, e aita oia i fariu ê i te mau hara ta Ieroboama te tamaiti a Nebata i turai ia Iseraela ia rave.+ 29 I te tau o te arii Peka no Iseraela, haere maira te arii Tigelata-pilesera+ no Asura e haru ihora ia Îona, Abela-bete-maaka,+ Ianoa, Kedesa,+ Hazora, Gileada,+ e Galilea, te fenua taatoa ïa o Naphatali.+ Hopoi ê ihora oia i to reira mau taata i Asura.+ 30 Orure hau ihora Hotea+ te tamaiti a Ela ia Peka te tamaiti a Remalia, e haapohe ihora oia ia ˈna. I muri iho, riro maira oia ei arii ei mono ia ˈna i te 20 o te matahiti o Iotama+ te tamaiti a Uzia.* 31 Te toea o te aamu o Peka, te mau mea atoa ta ˈna i rave, ua papaihia ïa i roto i te buka o te aamu o te tau o te mau arii o Iseraela.

32 I te piti o te matahiti te faatereraa Peka te tamaiti a Remalia te arii o Iseraela, riro maira Iotama+ te tamaiti a te arii Uzia+ no Iuda ei arii. 33 E 25 matahiti to ˈna i to ˈna riroraa mai ei arii e 16 matahiti to ˈna faatereraa i Ierusalema. Te iˈoa o to ˈna metua vahine, o Ierusa te tamahine a Zadoka.+ 34 Ua rave oia i te mea maitai i mua ia Iehova, mai ta to ˈna metua tane ra o Uzia i rave na.+ 35 Aita râ te mau vahi teitei i faaorehia, e te pûpû noa ra te nunaa i te tusia i nia i te mau vahi teitei+ a faahaere atu ai i te au auahi o te mau tusia i nia. Na ˈna i hamani i te Uputa i nia o te hiero* o Iehova.+ 36 Te toea o te aamu o Iotama, ta ˈna i rave, ua papaihia ïa i roto i te buka o te aamu o te tau o te mau arii o Iuda. 37 Tei taua tau ra to Iehova haamataraa i te turai ia Rezina te arii o Suria e ia Peka+ te tamaiti a Remalia ia aro ia Iuda.+ 38 Taoto atura Iotama i roto i te pohe e to ˈna mau tupuna e hunahia ihora oia i pihai iho ia ratou i te Oire o Davida to ˈna tupuna. E riro maira ta ˈna tamaiti ra o Ahaza ei arii ei mono ia ˈna.

16 I te 17 o te matahiti te faatereraa Peka te tamaiti a Remalia, riro maira Ahaza+ te tamaiti a te arii Iotama no Iuda ei arii. 2 E 20 matahiti to Ahaza i to ˈna riroraa mai ei arii e 16 matahiti to ˈna faatereraa i Ierusalema. Aita oia i rave i te mea maitai i te aro o Iehova to ˈna Atua mai ta Davida to ˈna tupuna i rave na.+ 3 Ua pee oia i te hiˈoraa ino o te mau arii o Iseraela+ e ua tae roa atoa oia i te tanina i ta ˈna tamaiti.+ Ua pee ïa oia i te mau peu hairiiri a te mau nunaa+ ta Iehova i tiahi mai mua mai i te ati Iseraela. 4 I nia atoa i te mau vahi teitei,+ i nia i te mau aivi e i raro aˈe i te mau tumu raau ruperupe atoa,+ ua pûpû oia i te tusia a faahaere atu ai i te au auahi tusia i nia.

5 Haere maira te arii Rezina no Suria e te arii Peka no Iseraela, te tamaiti a Remalia, e aro ia Ierusalema,+ te vahi to reira Ahaza. Haaati aˈera raua i te oire, aita râ i haere ia raua ia haru i te oire. 6 I taua tau ra, faahoˈi atura te arii Rezina no Suria ia Elata+ i te ati Edoma, e tiahi atura oia i te ati Iuda* e ora ra i tera oire. Hoˈi maira te ati Edoma i Elata e parahi ihora i reira e tae roa mai i teie mahana. 7 Tono aˈera ïa Ahaza i te vea ia Tigelata-pilesera+ ra te arii o Asura no te parau: “E tavini e e tamaiti au na oe. A haere mai na e faaora ia ˈu i te rima o te arii o Suria e i te rima o te arii o Iseraela, o te aro mai ra ia ˈu.” 8 Rave aˈera Ahaza i te ario e te auro e vai ra i roto i te hiero* o Iehova e i roto i te mau vairaa taoˈa o te aorai* o te arii e faatae atura i te reira i te arii o Asura ei petaraa ia ˈna.+ 9 Faaroo maira te arii o Asura i ta ˈna aniraa e haere atura e haru ia Damaseko. Hopoi ê ihora oia i to reira nunaa i Kira+ e haapohe ihora ia Rezina.+

10 I muri aˈe, haere atura te arii Ahaza e farerei i te arii Tigelata-pilesera no Asura i Damaseko. I to ˈna iteraa i te fata e vai ra i Damaseko, faatae aˈera te arii Ahaza ia Urîa ra te tahuˈa te hoê hohoˈa o taua fata ra, o te faaite ra i to ˈna mau tuhaa rii atoa e te huru hamaniraa.+ 11 Hamani aˈera Urîa+ te tahuˈa i te hoê fata+ ia au i te mau aratairaa atoa ta te arii Ahaza i faatae mai mai Damaseko mai. Ua oti to ˈna hamaniraa ia Urîa te tahuˈa hou te arii Ahaza a hoˈi mai ai mai Damaseko mai. 12 I to te arii hoˈiraa mai mai Damaseko mai e i to ˈna iteraa i te fata, faafatata maira oia i te fata e pûpû atura i te tusia i nia iho.+ 13 Tutui noa ˈtura oia i ta ˈna mau tusia taauahi e ta ˈna mau tusia huero maa i nia i tera fata a au auahi atu ai te reira. Ua manii atoa oia i ta ˈna mau tusia uaina e ua pîpî i te toto o ta ˈna mau tusia no te hau i nia i taua fata ra. 14 Area te fata veo+ i mua ia Iehova, i mua i te hiero o Iehova, i ropu i te fata a Ahaza e te hiero, ua fanuu Ahaza i te reira e ua tuu atu i te pae apatoerau o ta ˈna iho fata. 15 Faaue aˈera te arii Ahaza ia Urîa+ te tahuˈa: “A tutui i te tusia taauahi o te poipoi i nia i te fata rahi+ ia au auahi te reira, te tusia huero maa atoa o te ahiahi,+ ta te arii tusia taauahi e ta ˈna tusia huero maa, oia atoa te mau tusia taauahi, te mau tusia huero maa e te mau tusia uaina a te nunaa taatoa. I nia i tera fata, e pîpî atoa oe pauroa te toto o te mau tusia taauahi e pauroa te toto o te tahi atu mau tusia. Area te fata veo, e faaoti au eaha te rave i te reira.” 16 Rave ihora ïa Urîa te tahuˈa i te mau mea atoa ta te arii Ahaza i faaue.+

17 Tâpûpû atoa ˈtura te arii Ahaza i te mau apa i te hiti o te mau pereoo turairai+ e tatara ˈtura i te mau farii pape rarahi e vai ra i nia iho.+ Tatara ˈtura oia i te Miti i nia i te mau puaatoro oni veo+ e tuu atura i te reira i nia i te hoê tahua ofai.+ 18 E te vahi faataupeehia no te Sabati o tei faatiahia i roto i te fare e te uputa tomoraa o te mau arii, ua iriti-ê-hia ïa e ana i te hiero o Iehova. Ua na reira oia no te arii o Asura.

19 Te toea o te aamu o Ahaza, ta ˈna i rave, ua papaihia ïa i roto i te buka o te aamu o te tau o te mau arii o Iuda.+ 20 Taoto atura Ahaza i roto i te pohe e to ˈna mau tupuna e hunahia ihora oia i pihai iho ia ratou i te Oire o Davida. E riro maira ta ˈna tamaiti ra o Hezekia*+ ei arii ei mono ia ˈna.

17 I te 12 o te matahiti te faatereraa te arii Ahaza no Iuda, riro maira Hotea+ te tamaiti a Ela ei arii no Iseraela i Samaria. E iva matahiti to ˈna faatereraa. 2 Ua rave noa oia i te mea ino i mua ia Iehova, eiaha roa râ mai te mau arii o Iseraela na mua ˈtu ia ˈna. 3 Haere maira te arii Salamanesera no Asura e aro ia ˈna,+ e riro atura Hotea ei tavini na ˈna e haamata ˈtura i te aufau atu i te ô titauhia.+ 4 Tera râ, faaroo aˈera te arii o Asura e tei roto Hotea i te hoê orureraa hau. Ua tono hoi Hotea i te vea i te arii So ra no Aiphiti+ e aita i aufau atu i te ô titauhia mai i te mau matahiti na mua ˈtu. No reira te arii o Asura i tapea ˈi e i ponao ai ia ˈna i roto i te fare tapearaa.

5 Tomo ihora te arii o Asura i te fenua taatoa, e haaati aˈera oia ia Samaria e toru matahiti. 6 I te iva o te matahiti te faatereraa Hotea, haru aˈera te arii o Asura ia Samaria.+ Hopoi ê+ aˈera oia i te nunaa o Iseraela i Asura e haaparahi ihora ia ratou i Hala e i Habora, i pihai iho i te anavai Gozana+ e i te mau oire o te mau Medai.+

7 Ua tupu te reira no te mea ua hara te ati Iseraela ia Iehova to ratou Atua, o tei faahaere mai ia ratou i rapae i te fenua o Aiphiti e o tei faatiamâ ia ratou i te rima o Pharao te arii o Aiphiti.+ Ua haamori* ratou i te atua ěê,+ 8 ua haapao ratou i te mau peu a te mau nunaa ta Iehova i tiahi mai mua mai ia ratou, oia atoa te mau peu ta te mau arii o Iseraela i haamau.

9 Ua rave te ati Iseraela i te mau mea ta Iehova to ratou Atua i ore i farii. Ua faatia ratou i te vahi teitei i roto i to ratou mau oire atoa,+ mai te pare tiairaa e te oire auahia.* 10 Ua faatia ratou i te pou haamoriraa e te raau haamoriraa*+ i nia i te mau aivi atoa e i raro aˈe i te mau tumu raau ruperupe atoa.+ 11 I nia i te mau vahi teitei atoa, ua pûpû ratou i te au auahi tusia mai te mau nunaa ta Iehova i tiahi mai mua mai ia ratou.+ Ua rave ratou i te mea ino no te faainoino ia Iehova.

12 Ua haamori ratou i te idolo faufau,*+ ta Iehova i parau ia ratou: “Eiaha outou e rave i te reira!”+ 13 Ua faaara noa Iehova ia Iseraela e Iuda na roto i ta ˈna mau peropheta e ta ˈna feia ite orama+ ma te parau: “A fariu ê mai i ta outou mau peu ino!+ A haapao i ta ˈu mau faaueraa e ta ˈu mau faatureraa ia au i te mau ture atoa ta ˈu i tuu atu i to outou mau tupuna ra e o ta ˈu i faatae atu ia outou ra na roto i ta ˈu mau tavini te mau peropheta.” 14 Aita râ ratou i faaroo. Ua onoono noa ratou i te rave i te mea ino mai* to ratou mau tupuna o tei ore i faatupu i te faaroo ia Iehova to ratou Atua.+ 15 Ua patoi ratou i ta ˈna mau ture, te faufaa+ ta ˈna i faaau i to ratou mau tupuna e te mau haamanaˈoraa ta ˈna i horoa no te faaara ia ratou.+ Ua haamori noa ratou i te mau idolo faufaa ore+ e ua riro ratou iho ei mea faufaa ore,+ a rave noa ˈi mai te mau nunaa ati aˈe ia ratou, o ta Iehova i faaue eiaha e pee atu.+

16 Ua faarue ratou i te mau faaueraa atoa a Iehova to ratou Atua, ua hamani ratou e piti tii fanauˈa puaatoro faatôhia*+ e hoê raau haamoriraa. + Ua tipapa ratou i mua i te nuu taatoa o te raˈi+ e ua tavini ratou ia Baala.+ 17 Ua tanina atoa ratou i ta ratou mau tamaiti e ta ratou mau tamahine,+ ua rave ratou i te peu hiˈohiˈo,+ ua imi ratou i te tapao, e ua rave noa ratou i te mea ino* i mua ia Iehova, no te faainoino ia ˈna.

18 Riri roa aˈera ïa Iehova ia Iseraela, faaatea ˈtura oia ia ratou mai mua mai ia ˈna.+ O te opu o Iuda anaˈe ta ˈna i vaiiho mai i taua fenua ra.

19 Aita atoa Iuda i haapao i te mau faaueraa a Iehova to ratou Atua.+ Ua rave ratou i te mau peu ta Iseraela i rave.+ 20 Patoi ihora Iehova pauroa te huaai o Iseraela. Faahaama ihora oia ia ratou, tuu atura ia ratou i te rima o te feia haru taoˈa e faaatea roa ˈtura oia ia ratou mai mua mai ia ˈna. 21 Ua iriti ê oia ia Iseraela i te utuafare o Davida, e ua faaarii Iseraela ia Ieroboama te tamaiti a Nebata.+ Aratai atura râ Ieroboama i te ati Iseraela ia ore e tavini faahou ia Iehova, e turai atura oia ia ratou ia rave i te hoê hara rahi. 22 Rave atura to Iseraela i te mau hara atoa ta Ieroboama i rave.+ Aita ratou i fariu ê i te reira 23 e faaatea roa ˈtura Iehova i te ati Iseraela mai mua mai ia ˈna, mai ta ˈna i faaite na roto i ta ˈna mau tavini te mau peropheta.+ Hopoi-ê-hia ˈtura ïa te ati Iseraela i Asura+ e to reira ratou e tae roa mai i teie mahana.

24 Rave maira te arii o Asura i te taata no Babulonia, Kuta, Ava, Hamata, e Sepharavaima+ e haaparahi atura ia ratou i te mau oire o Samaria ei mono i te ati Iseraela. Riro atura Samaria ia ratou e ora ˈtura ratou i to reira mau oire. 25 I te omuaraa, i to ratou parahiraa i Samaria, aita ratou i mǎtaˈu* ia Iehova. Tuu atura ïa Iehova i te liona i rotopu ia ratou,+ e haapohe ihora tera mau liona e rave rahi o ratou. 26 Faaitehia ˈtura i te arii o Asura: “Te feia ta oe i hopoi ê e i haaparahi i te mau oire o Samaria, aita i ite i te haapaoraa* a te Atua o taua fenua ra. No reira oia e tuu noa ˈi i te liona i rotopu ia ratou o te haapohe ia ratou, aita hoi ratou i ite i te haapaoraa a te Atua o taua fenua ra.”

27 Faaue aˈera ïa te arii o Asura: “A faahoˈi hoê o te mau tahuˈa ta outou i hopoi ê mai, ia ora oia i ǒ a haapii atu ai ia ratou i te haapaoraa a te Atua o taua fenua ra.” 28 Hoˈi aˈera ïa hoê o te mau tahuˈa tei hopoi-ê-hia mai Samaria mai no te ora i Betela,+ e haamata ˈtura oia i te haapii atu ia ratou e nafea ia mǎtaˈu* ia Iehova.+

29 Tera râ, hamani ihora te mau nunaa tataitahi i to ratou iho atua,* e tuu atura i te reira i roto i te mau fare haamoriraa i nia i te mau vahi teitei ta to Samaria i faatia. Ua na reira te mau nunaa tataitahi i roto i te mau oire e ora ˈi ratou. 30 Ua hamani to Babulonia i te hoê tii o Sukota-benota, to Kuta i te hoê tii o Neregala, to Hamata+ i te hoê tii o Asima, 31 e to Ava i te hoê tii o Nibehaza e te hoê tii o Tarataka. Ua tanina to Sepharavaima i ta ratou mau tamaiti no Adarameleka raua Anameleka, na atua no Sepharavaima.+ 32 Noa ˈtu ua mǎtaˈu ratou ia Iehova, ua faatoroa ratou i te taata rii atoa ei tahuˈa no te mau vahi teitei, e na teie mau tahuˈa i ohipa no ratou i roto i te mau fare haamoriraa o te mau vahi teitei.+ 33 Ua mǎtaˈu iho â ratou ia Iehova, ua haamori râ ratou i to ratou iho mau atua ia au i te mau haapaoraa* a to ratou fenua tumu.+

34 E tae roa mai i teie mahana te pee ra ratou i ta ratou mau haapaoraa* na mua ˈtu. Aita hoê o ratou e haamori* ra ia Iehova, e aita hoê e haapao ra i ta ˈna mau faatureraa, ta ˈna mau faaotiraa haavaraa, te Ture, e te mau faaueraa ta Iehova i horoa i te mau tamaiti a Iakoba, o ta ˈna i topa i te iˈoa o Iseraela.+ 35 I to Iehova faaauraa i te hoê faufaa i te nunaa o Iseraela,+ ua faaue oia ia ratou: “Eiaha outou e mǎtaˈu i te tahi atu mau atua, eiaha e tipapa i mua ia ratou, eiaha outou e tavini e e pûpû i te tusia ia ratou.+ 36 O Iehova râ ta outou e mǎtaˈu,+ na ˈna i aratai mai ia outou i rapae i te fenua o Aiphiti ma te mana rahi e te rima puai.*+ I mua ia ˈna outou e tipapa ˈi, e ia ˈna outou e pûpû ai i te tusia. 37 Te mau ture, te mau faaotiraa haavaraa, te Ture, e te mau faaueraa ta ˈna i papai no outou,+ e haapao maite outou i te reira, e eiaha outou e mǎtaˈu i te tahi atu mau atua. 38 Eiaha ia moˈe ia outou te faufaa ta ˈu i faaau ia outou,+ e eiaha outou e mǎtaˈu i te tahi atu mau atua. 39 O Iehova râ to outou Atua ta outou e mǎtaˈu, na ˈna hoi e faaora ia outou i to outou mau enemi atoa ra.”

40 Aita râ ratou i faaroo, e ua pee noa ratou i ta ratou haapaoraa* na mua ˈtu.+ 41 Ua mǎtaˈu ïa teie mau nunaa ia Iehova,+ ua tavini noa atoa râ ratou i te mau tii o to ratou iho mau atua. Ua rave ta ratou mau tamaiti e ta ratou mau mootua mai ta to ratou mau tupuna i rave, e tae roa mai i teie mahana.

18 I te toru o te matahiti te faatereraa te arii Hotea+ no Iseraela, te tamaiti a Ela, riro maira Hezekia+ te tamaiti a te arii Ahaza+ no Iuda ei arii. 2 E 25 matahiti to ˈna i to ˈna riroraa mai ei arii e e 29 matahiti to ˈna faatereraa i Ierusalema. Te iˈoa o to ˈna metua vahine, o Abi,* e tamahine na Zekaria.+ 3 Ua rave oia i te mea maitai i mua ia Iehova,+ mai ta Davida to ˈna tupuna i rave na.+ 4 Na ˈna i faaore i te mau vahi teitei,+ i tuparari i te mau pou haamoriraa, e i tâpû i te raau haamoriraa.*+ Ua vavahi atoa oia i te ophi veo ta Mose i hamani,+ ua tamau hoi te nunaa o Iseraela i te pûpû i te tusia* i mua i tera ophi e tae roa mai i taua tau ra. I piihia na tera ophi te ophi-idolo veo.* 5 Ua tiaturi Hezekia ia Iehova+ te Atua o Iseraela. Aita e arii mai ia ˈna i rotopu i te mau arii atoa o Iuda i muri aˈe ia ˈna e na mua ˈtu ia ˈna. 6 Ua ati maite oia ia Iehova.+ Aita oia i fariu ê atu ia ˈna. Ua haapao noa oia i te mau faaueraa ta Iehova i horoa ia Mose. 7 E tei pihai iho Iehova ia ˈna. Ua ohipa oia ma te paari i roto i te mau mea atoa ta ˈna i rave. Ua orure hau oia i te arii o Asura e ua patoi oia i te tavini ia ˈna.+ 8 Ua pau atoa te mau Philiseti+ ia ˈna e tae roa ˈtu i Gaza e to ˈna mau tuhaa fenua, i roto i te pare tiairaa e tae noa ˈtu i te oire auahia.*

9 I te maha o te matahiti te faatereraa te arii Hezekia, oia hoi i te hitu o te matahiti te faatereraa te arii Hotea+ no Iseraela, te tamaiti a Ela, haere maira te arii Salamanesera no Asura e haaati ia Samaria.+ 10 Haru ihora to Asura i taua oire ra+ i te hopea o te toru o te matahiti, tei te ono ïa o te matahiti te faatereraa Hezekia, i te iva o te matahiti te faatereraa te arii Hotea no Iseraela. 11 Hopoi ê ihora te arii o Asura i to Iseraela+ i Asura e haaparahi ihora ia ratou i Hala e i Habora, i pihai iho i te anavai Gozana e i te mau oire o te mau Medai.+ 12 Aita hoi to Iseraela i faaroo ia Iehova to ratou Atua. Ua ofati noa ratou i ta ˈna faufaa, te mau mea atoa ta Mose te tavini a Iehova i faaue.+ Aita ratou i faaroo, aita atoa i auraro.

13 I te 14 o te matahiti faatereraa a te arii Hezekia, haere maira Senakeriba te arii o Asura+ e aro i te mau oire atoa o Iuda tei auahia i te patu e haru ihora i te reira.+ 14 Faatae atura ïa te arii Hezekia no Iuda i teie poroi i te arii o Asura i Lakisa: “Ua hapa vau. Ia faarue oe i to ˈu fenua, e horoa ˈtu vau i te mau mea atoa ta oe e ani mai.” Titau aˈera te arii o Asura i te arii Hezekia no Iuda ia aufau e 300 taleni* ario e 30 taleni auro. 15 Horoa ˈtura ïa Hezekia pauroa te ario e vai ra i roto i te hiero* o Iehova e i roto i te mau vairaa taoˈa o te aorai* o te arii.+ 16 I reira to Hezekia tatararaa* i te mau uputa o te hiero+ o Iehova e te mau pou uputa ta ˈna i tapiri i te auro.+ Horoa ˈtura oia i te reira i te arii o Asura.

17 Tono ihora te arii o Asura i te Taratana,* te Rabasarisa* e te Rabasake* mai Lakisa ˈtu+ no te haere i Ierusalema+ e te hoê nuu rahi e farerei i te arii Hezekia. Haere aˈera ïa ratou i Ierusalema e tia aˈera i pihai iho i te faahororaa pape o te pape hopu i nia, i pihai iho i te purumu rahi o te vahi raveraa ohipa a te taata puˈa ahu.+ 18 I to ratou titauraa ia haere mai te arii i rapae, haere maira Eliakima+ te tamaiti a Hilikia, o te tiaau ra i te aorai, Sebena+ te papai parau, e Ioa te tamaiti a Asapha te haaputu parau.

19 Na ô atura ïa te Rabasake ia ratou: “A parau na ia Hezekia: ‘Teie ta te arii rahi, te arii o Asura, e parau ra: “O vai ta oe e tiaturi ra?+ 20 Te manaˈo ra oe: ‘E ravea ta ˈu e e mana to ˈu no te aro i te tamaˈi.’ E parau faufaa ore râ tena. Ua tuu oe i to oe tiaturiraa ia vai, e tamata ˈi oe i te orure hau ia ˈu?+ 21 Inaha, te tiaturi ra oe i te turu a tera aeho fati, o Aiphiti.+ Ia turui te hoê taata i nia i tera aeho, e puta pipiha roa to ˈna apu rima i te reira. Tera te huru o Pharao te arii o Aiphiti i nia i te feia atoa o te tiaturi ra ia ˈna. 22 E ia parau mai outou ia ˈu: ‘Te tiaturi nei matou ia Iehova to matou Atua,’+ e ere anei na ˈna te mau vahi teitei e te mau fata ta Hezekia i faaore+ a parau ai oia ia Iuda e Ierusalema: ‘E tipapa outou i mua i teie fata i Ierusalema’?”’+ 23 I teie nei ïa, a faaau na i te parau e to ˈu fatu te arii o Asura: E horoa ˈtu vau na oe 2 000 puaahorofenua mai te peu e itea mai ia oe te feia faahoro puaahorofenua e navai.+ 24 E nafea ïa oe e nehenehe ai e fariu ê i te hoê tavana o ˈna te tavini haihai roa ˈˈe a to ˈu fatu, a tuu ai oe i to oe tiaturiraa ia Aiphiti no te pereoo e te feia faahoro puaahorofenua? 25 I teie nei, ua haere mai anei au i teie vahi no te haamou ia ˈna aita e parau faatia no ǒ mai ia Iehova ra? Na Iehova iho i parau ia ˈu: ‘A haere e aro i tera fenua e a haamou atu.’”

26 Na ô maira ïa Eliakima te tamaiti a Hilikia, Sebena+ e Ioa i te Rabasake:+ “A paraparau mai na na roto i te reo Arama,*+ mea taa ia matou tera reo. Eiaha e paraparau ia matou na roto i te reo o te ati Iuda, te faaroo mai ra hoi te feia i nia i te patu.”+ 27 Na ô atura râ te Rabasake ia ratou: “No to outou fatu e no outou noa anei i tono ai to ˈu fatu ia ˈu no te faaite i teie mau parau? E ere atoa anei no te feia e parahi ra i nia i te patu, o te amu i to ratou iho tutae e o te inu i to ratou iho omaha e o outou?”

28 Tia noa ihora te Rabasake e tuô haapuai atura na roto i te reo o te ati Iuda: “A faaroo i te parau a te arii rahi, te arii o Asura.+ 29 Teie ta te arii e parau ra: ‘Eiaha Hezekia ia haavare ia outou, eita hoi e haere ia ˈna ia faaora ia outou i to ˈu nei rima.+ 30 E eiaha Hezekia ia turai ia outou ia tiaturi ia Iehova a parau ai: “E faaora mau â Iehova ia tatou, e eita teie oire e tuuhia i te rima o te arii o Asura.”+ 31 Eiaha e faaroo ia Hezekia, teie hoi ta te arii o Asura e parau ra: “A faatupu i te hau e o vau e a auraro ia ˈu,* e e amu outou tataitahi i te hotu o ta outou vine e ta outou tumu suke e e inu outou i te pape o ta outou apoo pape, 32 e ia tae roa mai au e ia hopoi ia outou i te tahi fenua mai to outou fenua,+ te tahi fenua o te huero maa e te uaina apî, te tahi fenua o te faraoa e te faaapu vine, te tahi fenua o te tumu olive e te meri. E ora ïa outou, eita outou e pohe. Eiaha e faaroo ia Hezekia, te haavare ra hoi o ˈna ia outou a parau ai: ‘E faaora Iehova ia tatou.’ 33 Ua faaora aˈena anei hoê o te mau atua o te mau nunaa i to ratou fenua i te rima o te arii o Asura? 34 Teihea te mau atua o Hamata+ e o Arapada? Teihea te mau atua o Sepharavaima,+ Henâ, e o Iva? Ua faaora anei ratou ia Samaria i to ˈu nei rima?+ 35 O vai i rotopu i te mau atua atoa o te mau fenua tei faaora i to ratou fenua i to ˈu nei rima? E nafea ïa Iehova ia faaora ia Ierusalema i to ˈu nei rima?”’”+

36 Mamû noa aˈera râ te taata i reira e aita i pahono ia ˈna no te faaueraa a te arii Hezekia: “Eiaha outou e pahono ia ˈna.”+ 37 Haere maira râ Eliakima te tamaiti a Hilikia, o te tiaau ra i te aorai, Sebena te papai parau, e Ioa te tamaiti a Asapha te haaputu parau ia Hezekia ra ma te ahu hahae e faaite maira ia ˈna i te mau parau a te Rabasake.

19 I te faarooraa iho â te arii Hezekia i te reira, hahae ihora oia i to ˈna ahu, tapoˈi ihora ia ˈna i te ahu oto e tomo atura i roto i te hiero* o Iehova.+ 2 Tono ihora oia ia Eliakima, o te tiaau ra i te aorai,* ia Sebena te papai parau e te mau matahiapo o te mau tahuˈa, ma te ahu oto, i te peropheta Isaia+ te tamaiti a Amoza. 3 Na ô atura ratou ia ˈna: “Teie ta Hezekia e parau ra: ‘E mahana teie no te ahoaho, no te faahapa,* e no te haama. Ua fatata hoi te mau tamarii i te fanauhia mai,* aita râ e puai no te fanau.+ 4 Peneiaˈe e faaroo Iehova to Atua i te mau parau atoa a te Rabasake, ta te arii o Asura to ˈna fatu i tono no te faatihaehae i te Atua ora,+ e e faautua oia ia ˈna no te mau parau ta Iehova to Atua i faaroo. A pure+ ïa no te toea o tei ora mai.’”

5 I muri aˈe i to te mau tavini a te arii Hezekia faaiteraa i te poroi ia Isaia,+ 6 na ô maira Isaia ia ratou: “Teie ta outou e parau i to outou fatu: ‘Teie ta Iehova e parau ra: “Eiaha e mǎtaˈu+ no te mau parau ta oe i faaroo, te mau parau i faaino ai te mau tavini a te arii o Asura ia ˈu.+ 7 E tuu vau i te hoê manaˈo i roto i to ˈna feruriraa. E faaroo o ˈna i te hoê parau e e hoˈi o ˈna i to ˈna fenua. E pohe o ˈna ia ˈu i te ˈoˈe i to ˈna fenua.”’”+

8 I muri aˈe i to te Rabasake faarooraa e ua faarue te arii o Asura ia Lakisa,+ hoˈi atura oia ia ˈna ra e ite ihora ia ˈna e aro ra ia Libena.+ 9 Faaroo ihora te arii i te parau o Tirahaka te arii o Etiopia: “Ua haere mai o ˈna e aro ia oe.” Tono faahou ihora ïa oia i te vea+ ia Hezekia ra no te parau atu: 10 “Teie ta outou e parau ia Hezekia te arii o Iuda: ‘Eiaha to Atua ta oe e tiaturi ra ia haavare ia oe a parau ai: “Eita Ierusalema e tuuhia i te rima o te arii o Asura.”+ 11 Inaha, ua faaroo oe eaha ta te mau arii o Asura i rave i te mau fenua atoa ma te haamou ia ratou.+ O oe anaˈe ïa te faaorahia? 12 Te mau nunaa ta to ˈu mau tupuna i haamou, ua faaora anei to ratou mau atua ia ratou? Teihea o Gozana, Harana,+ Rezepha, e te mau taata o Edene tei faaea i Teli-asara? 13 Teihea te arii o Hamata, te arii o Arapada, e te arii o te mau oire o Sepharavaima, o Henâ, e o Iva?’”+

14 Rave maira Hezekia i te mau rata i te rima o te mau vea e taio ihora i te reira. Pauma ˈtura Hezekia i te hiero o Iehova e hohora ihora i te reira i mua ia Iehova.+ 15 Pure ihora Hezekia+ i mua ia Iehova: “E Iehova te Atua o Iseraela, o te parahi ra i nia i te terono i nia ˈˈe* i te mau kerubi,+ o oe anaˈe te Atua mau o te mau faatereraa arii atoa o te fenua nei.+ Na oe i hamani i te raˈi e te fenua. 16 A fariu mai i to tariˈa, e Iehova, e a faaroo mai!+ Ia araara to mata,+ e Iehova, e ia ite oe! A faaroo mai i te mau parau ta Senakeriba i faatae mai no te faatihaehae i te Atua ora. 17 E parau mau iho â, e Iehova, ua haamou te mau arii o Asura i te mau nunaa e to ratou mau fenua.+ 18 E ua huri ratou i to ratou mau atua i roto i te auahi, no te mea e ere ratou i te atua,+ e ohipa râ a te rima taata,+ e raau e e ofai. No reira ratou i nehenehe ai e haamou i te reira. 19 I teie nei râ, e Iehova to matou Atua, a faaora mai ia matou i to ˈna rima, e ite ïa te mau faatereraa arii atoa o te fenua nei o oe anaˈe te Atua, e Iehova.”+

20 Faatae atura Isaia te tamaiti a Amoza i teie poroi ia Hezekia: “Teie ta Iehova te Atua o Iseraela e parau ra: ‘Ua faaroo vau i ta oe i pure+ ia ˈu no nia ia Senakeriba te arii o Asura.+ 21 Teie te parau ta Iehova i parau no ˈna:

“Te vahavaha ra te tamahine apî* o Ziona ia oe, te faaooo ra o ˈna ia oe.

Te tairiiri ra te tamahine o Ierusalema i to ˈna upoo ma te vahavaha ia oe.

22 O vai ta oe i faatihaehae e i faaino?+

I Tei Moˈa o Iseraela!+

E tâpû vau i ta ˈna mau tumu arezi teitei, ta ˈna mau tumu berusi maitai roa.

E tomo vau i roto i to ˈna mau haapuraa moˈemoˈe roa ˈˈe, to ˈna mau uru raau ruperupe roa ˈˈe.

25 Aita anei oe i faaroo? Ua faaotihia* te reira mea maoro i teie nei.+

Mai tahito mai â vau i faaineine ai* i te reira.+

I teie nei e faatupu vau i te reira.+

E faariro oe i te mau oire auahia i te patu ei pueraa huˈahuˈa.+

29 “‘E teie te tapao no oe:* I teie matahiti e amu outou i te huero maa o te tupu noa mai mai tera.* I te piti o te matahiti, e amu outou i te huero maa o te oteo noa mai mai tera.+ I te toru râ o te matahiti, e ueue e e ooti outou, e tanu outou i te vine a amu atu ai i to ˈna maa.+ 30 Te feia o te nunaa o Iuda o te ora mai, te feia o te toe mai,+ e toro to ratou aˈa i raro a faahotu mai ai i te maa i nia. 31 E haere hoi te tahi toea i rapae ia Ierusalema e tei ora mai, mai te mouˈa Ziona ˈtu. Na te itoito rahi o Iehova o te mau nuu* e rave i te reira.+

32 “‘No reira, teie ta Iehova e parau ra no nia i te arii o Asura:+

35 I taua po ra, haere maira te melahi a Iehova e tairi ihora 185 000 faehau i roto i te puhapa a to Asura.+ I te tiaraa mai te taata i te poipoi roa, ite aˈera ratou i te mau tino pohe atoa.+ 36 Reva ˈtura ïa Senakeriba te arii o Asura, hoˈi atura i Nineve+ e faaea ihora i reira.+ 37 A tipapa ˈi oia i roto i te hiero* o to ˈna atua o Niseroka, tairi aˈera ta ˈna iho na tamaiti o Adarameleka raua Sarezera ia ˈna i te ˈoˈe+ e horo atura i te fenua o Ararata.+ E riro maira ta ˈna tamaiti o Esarahadona+ ei arii ei mono ia ˈna.

20 I taua mau mahana ra, roohia ihora Hezekia i te maˈi e fatata ihora oia i te pohe.+ Haere maira te peropheta Isaia te tamaiti a Amoza ia ˈna ra e na ô maira: “Teie ta Iehova e parau ra: ‘A faaite i to oe utuafare i to oe mau hinaaro hopea, e pohe hoi oe. Eita oe e maitai mai.’”+ 2 Fariu ihora oia i to ˈna hohoˈa mata i te pǎpai e haamata ˈtura i te pure ia Iehova: 3 “Te taparu nei au ia oe, e Iehova, a haamanaˈo na i to ˈu haereraa i mua ia oe ma te haapao maitai e te aau taatoa, e ua rave au i te mea maitai i to aro.”+ Taˈi roa ihora Hezekia.

4 Aita â Isaia i tae atura i te aua i roto o te aorai, parau maira Iehova ia ˈna:+ 5 “A hoˈi i muri e a parau ia Hezekia, te raatira o to ˈu nunaa: ‘Teie ta Iehova te Atua o Davida to tupuna e parau ra: “Ua faaroo vau i ta oe pure. Ua ite au i to oe roimata.+ E faaora ïa vau ia oe.+ I te toru o te mahana e pauma oe i te fare o Iehova.+ 6 E faaroa vau i to oe ora* 15 â matahiti, e na ˈu e faaora ia oe e teie oire i te rima o te arii o Asura,+ e na ˈu e paruru i teie oire no to ˈu iˈoa e no Davida ta ˈu tavini.”’”+

7 Na ô maira Isaia: “A afai mai i te tahi suke mǎrô pâpâhia.” Afaihia maira ïa te reira, tuuhia ˈtura i nia i te fêfê o te arii, e maitai mǎrû noa maira oia.+

8 I ui na Hezekia ia Isaia: “Eaha te tapao+ e faaite e faaora mai Iehova ia ˈu e e pauma vau i te toru o te mahana i te fare o Iehova?” 9 Ua pahono atu Isaia: “Teie te tapao no ǒ mai ia Iehova no te faaite ia oe e faatupu Iehova i ta ˈna i parau: Te hinaaro ra anei oe ia haere te marumaru i nia i te eˈa paumaraa* hoê ahuru taahiraa i mua aore ra hoê ahuru taahiraa i muri?”+ 10 Ua pahono mai Hezekia: “E haere iho â tera marumaru hoê ahuru taahiraa i mua, eita râ e nehenehe e haere hoê ahuru taahiraa i muri.” 11 Ua pure ïa te peropheta Isaia ia Iehova, e ua faahaere mai te Atua i te marumaru i nia i te eˈa paumaraa a Ahaza hoê ahuru taahiraa i muri.+

12 I taua mau mahana ra, faatae maira te arii o Babulonia Berodaka-baladana te tamaiti a Baladana i te rata e te ô na Hezekia, ua faaroo hoi oia ua maˈihia na Hezekia.+ 13 Farii* atura Hezekia i te mau vea e faaite atura ia ratou i ta ˈna fare vairaa taoˈa taatoa:+ te ario, te auro, te monoˈi zuri e te tahi atu monoˈi maitai roa, ta ˈna mau mauhaa tamaˈi, e pauroa te mea e vai ra i roto i ta ˈna vairaa taoˈa. Aita hoê ohipa ta Hezekia i ore i faaite ia ratou i roto i to ˈna aorai* e i te vahi taatoa ta ˈna e faatere ra.

14 I muri iho i te reira, haere maira Isaia te peropheta i te arii Hezekia e ui maira: “Eaha ta teie mau taata i parau, e nohea mai ratou?” Pahono atura ïa Hezekia: “No te tahi fenua atea mai ratou, no Babulonia mai.”+ 15 Ui maira Isaia: “Eaha ta ratou i ite i roto i to oe aorai?” Pahono atura Hezekia: “Ua ite ratou i te mau mea atoa i roto i to ˈu aorai. Aita hoê ohipa ta ˈu i ore i faaite ia ratou i roto i ta ˈu vairaa taoˈa.”

16 Parau ihora Isaia ia Hezekia: “A faaroo mai i te parau a Iehova,+ 17 ‘Te fatata mai ra te mau mahana e hopoihia ˈi i Babulonia pauroa te mea i roto i to oe aorai e pauroa ta to oe mau tupuna i haaputu tae roa mai i teie mahana.+ Eita hoê ohipa e toe mai,’ te parau ra Iehova. 18 ‘E hopoi-ê-hia vetahi o to oe huaai o te fanauhia mai+ e e riro ratou ei tia mana i te aorai o te arii o Babulonia.’”+

19 Parau atura Hezekia ia Isaia: “Mea maitai te parau a Iehova ta oe i parau.”+ Parau faahou atura oia: “Mea maitai ia itehia te hau e te ati ore* i te roaraa o to ˈu oraraa.”*+

20 Te toea o te aamu o Hezekia, to ˈna puai atoa, to ˈna hamaniraa i te tahi pape hopu+ e te tahi faahororaa pape no te hopoi mai i te pape i roto i te oire,+ ua papaihia ïa i roto i te buka o te aamu o te tau o te mau arii o Iuda. 21 Taoto atura Hezekia i roto i te pohe e to ˈna mau tupuna.+ E riro maira ta ˈna tamaiti o Manase+ ei arii ei mono ia ˈna.+

21 E 12 matahiti to Manase+ i to ˈna riroraa mai ei arii, e e 55 matahiti to ˈna faatereraa i Ierusalema.+ Te iˈoa o to ˈna metua vahine, o Hepheziba. 2 Ua rave oia i te mea ino i mua ia Iehova, ma te rave i te mau peu hairiiri a te mau nunaa+ ta Iehova i tiahi i mua i te nunaa o Iseraela.+ 3 Ua patu faahou oia i te mau vahi teitei ta to ˈna metua tane o Hezekia i vavahi.+ Ua faatia oia i te fata no Baala e ua hamani i te hoê raau haamoriraa,*+ mai ta Ahaba te arii o Iseraela i rave na.+ Ua tipapa oia i mua i te nuu taatoa o te raˈi e ua haamori oia ia ratou.+ 4 Ua faatia atoa oia i te fata i roto i te hiero* o Iehova,+ o ta Iehova i parau: “E tuu vau i to ˈu iˈoa i Ierusalema.”+ 5 E i roto i na aua e piti o te hiero o Iehova,+ ua faatia oia i te fata no te nuu taatoa o te raˈi.+ 6 Ua tanina oia i ta ˈna iho tamaiti, ua rave i te peu manamana, ua imi i te tapao+ e ua faatoroa i te feia hiˈohiˈo e te feia e demoni hiˈohiˈo to ratou.+ E ino rahi mau â ta ˈna i rave i mua ia Iehova, no te faainoino ia ˈna.

7 Te tii taraihia, te raau haamoriraa+ ta ˈna i hamani, ua tuu oia i te reira i roto i te hiero, o ta Iehova i parau ia Davida e i ta ˈna tamaiti o Solomona: “E tuu vau i to ˈu iˈoa e a muri noa ˈtu i roto i teie fare e i Ierusalema, te oire ta ˈu i maiti i rotopu i te mau tuhaa fenua atoa o te mau opu o Iseraela.+ 8 Eita roa vau e faahaere ê faahou i te ati Iseraela mai te fenua ta ˈu i horoa no to ratou mau tupuna,+ mai te peu noa râ e haapao maitai ratou i te mau mea atoa ta ˈu i faaue ia ratou,+ te Ture taatoa ta ta ˈu tavini ra o Mose i faaue ia ratou ia haapao.” 9 Aita râ ratou i faaroo. E ua turai Manase ia ratou ia rave i te ino o tei rahi aˈe i ta te mau nunaa ta Iehova i haamou i mua i te ati Iseraela.+

10 Na roto i ta ˈna mau tavini te mau peropheta,+ ua parau Iehova: 11 “Ua rave Manase te arii o Iuda i tera mau ohipa hairiiri. Ua hau aˈe te ino ta ˈna i rave i ta te ati Amori atoa+ na mua ˈtu ia ˈna,+ e i ta ˈna mau idolo faufau,* ua turai oia ia Iuda ia hara. 12 No reira, teie ta ˈu e parau nei, o vau o Iehova te Atua o Iseraela: ‘Te faatae mai ra vau i te hoê ati rahi i nia ia Ierusalema+ e Iuda, e taˈi te tariˈa o te taata atoa o te faaroo i te reira.+ 13 I nia ia Ierusalema, e huti au i te taura faito+ faaohipahia no Samaria+ e e faaohipa vau i te mauhaa faaafaro reni faaohipahia no te utuafare o Ahaba.+ E e tamâ vau ia Ierusalema mai te tahi auˈa ia horoihia e ia hurihia te niaraa i raro.+ 14 E faarue au i te toea o to ˈu nunaa*+ a tuu atu ai ia ratou i te rima o to ratou mau enemi. E rave-tîtî-hia ratou e e haruhia ta ratou mau taoˈa e to ratou mau enemi,+ 15 no te mea ua rave ratou i te mea ino i to ˈu aro e ua tamau ratou i te faainoino ia ˈu mai te mahana mai â i haere mai ai to ratou mau tupuna i rapae ia Aiphiti.’”+

16 Mea rahi atoa te toto hara ore ta Manase i haamanii, ua î roa Ierusalema ia ˈna i te toto mai te tahi pae i te tahi atu pae,+ taa ê noa ˈtu i te hara ta ˈna i rave a turai ai oia ia Iuda ia hara ma te rave i te mea ino i mua ia Iehova. 17 Te toea o te aamu o Manase, te mau mea atoa ta ˈna i rave e te mau hara ta ˈna i rave, ua papaihia ïa i roto i te buka o te aamu o te tau o te mau arii o Iuda. 18 Taoto ihora Manase i roto i te pohe e to ˈna mau tupuna e hunahia ihora oia i roto i te aua o to ˈna fare, i roto i te aua o Uta,+ e riro maira ta ˈna tamaiti o Amôna ei arii ei mono ia ˈna.

19 E 22 matahiti to Amôna+ i to ˈna riroraa mai ei arii, e e piti matahiti to ˈna faatereraa i Ierusalema.+ Te iˈoa o to ˈna metua vahine, o Mesulemeta ïa, e tamahine na Haruza no Iotaba. 20 Ua rave noa oia i te mea ino i mua ia Iehova, mai ta to ˈna metua tane o Manase i rave na.+ 21 Ua pee oia i te hiˈoraa ino o to ˈna metua tane. Ua tavini noa oia i te mau idolo faufau ta to ˈna metua tane i tavini na e ua tipapa oia i mua i te reira.+ 22 Mea na reira oia i te faarueraa ia Iehova te Atua o to ˈna mau tupuna, e aita oia i rave i ta Iehova i faaue.+ 23 I te hoê mahana, opua ihora te mau tavini a Amôna e rave i te tahi ohipa ino i nia ia ˈna e haapohe atura ia ˈna i roto i to ˈna fare. 24 Taparahi aˈera râ te feia no taua fenua ra i te taata atoa o tei opua e haapohe i te arii Amôna e faaarii aˈera ratou ia Iosia ta ˈna tamaiti ei mono ia ˈna.+ 25 Te toea o te aamu o Amôna, ta ˈna i rave, ua papaihia ïa i roto i te buka o te aamu o te tau o te mau arii o Iuda. 26 Hunahia ihora ïa oia i roto i to ˈna menema i roto i te aua o Uta,+ e riro maira ta ˈna tamaiti ra o Iosia+ ei arii ei mono ia ˈna.

22 E vaˈu matahiti to Iosia+ i to ˈna riroraa mai ei arii, e e 31 matahiti to ˈna faatereraa i Ierusalema.+ Te iˈoa o to ˈna metua vahine, o Iedida ïa, e tamahine na Adaia no Bozekata.+ 2 Ua rave Iosia i te mea maitai i mua ia Iehova. Ua pee oia i te hiˈoraa o Davida to ˈna tupuna,+ e aita oia i fariu i te pae atau e i te pae aui.

3 I te 18 o te matahiti te faatereraa te arii Iosia, tono aˈera oia ia Saphana te papai parau, te tamaiti a Azalia te tamaiti a Mesulama, i te hiero* o Iehova,+ a na ô ai: 4 “A haere ia Hilikia+ ra te tahuˈa rahi, e a parau ia ˈna ia haere e tii pauroa te moni tei hopoihia i te fare o Iehova,+ tei noaa mai i te mau tiai uputa i te nunaa ra.+ 5 Ia horoahia te reira i te feia i faatoroahia no te haapao i te mau tataîraa i te fare o Iehova. E i tera moni, e aufau ratou i te mau rave ohipa o te tataî i te mau vahi ino* o te fare o Iehova.+ 6 E aufau ratou i te feia rimaî, te feia patu e te feia tâpû ofai. E hoo mai ratou i te raau e te ofai taraihia no te tataî i te fare.+ 7 Aita râ e faufaa ia uiuihia te feia e horoahia ˈtu te moni, e feia tiaturihia hoi ratou.”+

8 I muri aˈe, faaite maira Hilikia te tahuˈa rahi ia Saphana te papai parau:+ “Ua itea mai ia ˈu te buka o te Ture+ i roto i te fare o Iehova.” Horoa maira ïa Hilikia i te buka ia Saphana ra, e taio ihora Saphana i te reira.+ 9 Haere maira Saphana te papai parau i te arii ra e na ô maira ia ˈna: “Ua haere ta oe mau tavini e ohi i te moni ta ratou i ite mai i roto i te fare, e ua horoa ratou i te reira i te feia o tei maitihia no te tiaau i te ohipa i roto i te fare o Iehova.”+ 10 Na ô atoa maira Saphana te papai parau i te arii: “E buka+ ta Hilikia te tahuˈa i horoa mai.” Haamata ihora Saphana i te taio i taua buka ra i mua i te arii.

11 I te faarooraa iho â te arii i te mau parau o te buka o te Ture, hahae ihora oia i to ˈna ahu.+ 12 Faaue ihora te arii ia Hilikia te tahuˈa, ia Ahikama+ te tamaiti a Saphana, ia Akabora te tamaiti a Mikaia, ia Saphana te papai parau e ia Asaia te tavini a te arii: 13 “A haere e ui ia Iehova no ˈu, no te nunaa, e no Iuda taatoa no nia i te mau parau o teie buka tei itehia mai. Mea uˈana hoi te riri o Iehova ia tatou,+ no te mea aita to tatou mau tupuna i auraro i te mau parau o teie buka. Aita ratou i rave i te mau mea i papaihia no tatou.”

14 Haere aˈera ïa Hilikia te tahuˈa, Ahikama, Akabora, Saphana e Asaia ia Hulada ra te peropheta vahine.+ E vahine faaipoipo o ˈna na te taata haapao ahu ra o Saluma te tamaiti a Tikava te tamaiti a Harahasa. Te noho ra oia i roto i te tuhaa apî o te oire o Ierusalema. I reira ratou i te paraparauraa ia ˈna.+ 15 Na ô maira oia ia ratou: “Teie ta Iehova te Atua o Iseraela e parau ra: ‘A faaite i te taata o tei tono ia outou ia ˈu nei: 16 “Teie ta Iehova e parau ra: ‘E faatae mai au i te ati i teie vahi e i nia i to reira mau taata, te mau parau atoa o te buka ta te arii o Iuda i taio.+ 17 No te mea ua faarue ratou ia ˈu e te faahaere ra ratou i te au auahi tusia i nia na te tahi atu mau atua+ no te faainoino ia ˈu i te ohipa a to ratou rima,+ e ura to ˈu riri rahi i teie vahi e eita te reira e pohe.’”+ 18 A parau atoa ˈtu râ i te arii o Iuda o tei tono ia outou no te ui ia Iehova: “Teie ta Iehova te Atua o Iseraela e parau ra: ‘No te mau parau ta oe i faaroo, 19 no te mea ua putapû* to aau e ua faahaehaa oe ia oe+ i mua ia Iehova i to oe faarooraa i ta ˈu i parau no nia i teie vahi e to reira mau taata, ua faaite hoi au e roohia ratou i te ati e e riaria te taata ia ite ratou i te mea e roohia ˈi ratou, ua hahae oe i to oe ahu+ e ua taˈi oe i mua ia ˈu, ua faaroo atoa vau ia oe, te parau mai ra Iehova. 20 No reira vau e amui ai ia oe i to oe mau tupuna,* e tuuhia oe i roto i to oe menema na roto i te hau, e eita to mata e ite i te ati o ta ˈu e faatae mai i teie vahi.’”’” Hopoi aˈera ratou i tera poroi i te arii.

23 Titau ihora te arii i te mau matahiapo atoa o Iuda e Ierusalema.+ 2 Pauma aˈera te arii i te hiero* o Iehova e te mau tane atoa o Iuda, pauroa te feia o Ierusalema, te mau tahuˈa e te mau peropheta, oia hoi te nunaa taatoa, mai te feia apî e tae atu i te feia paari. Taio ihora oia no ratou i te mau parau atoa o te buka+ o te faufaa+ tei itehia mai i roto i te hiero o Iehova.+ 3 Ua tia noa te arii i pihai iho i te pou e faaau aˈera oia i te hoê faufaa* i mua ia Iehova:+ ua faaau oia e faaroo ia Iehova e e haapao i ta ˈna mau faaueraa, ta ˈna mau haamanaˈoraa e ta ˈna mau faatureraa ma te aau taatoa e te ora* taatoa, ma te haapao i te mau parau o te faufaa tei papaihia i roto i tera buka. Farii atura te nunaa taatoa i taua faufaa ra.+

4 Faaue atura te arii ia Hilikia+ te tahuˈa rahi, te tahi atu mau tahuˈa, e te mau tiai uputa ia afai i rapae i te hiero o Iehova pauroa te taihaa hamanihia no Baala, no te raau haamoriraa,*+ e no te nuu taatoa o te raˈi. Tutui ihora oia i te reira i rapae ia Ierusalema, i roto i te mau faaapu o te peho o Kiderona, e afai atura oia i te mau rehu i Betela.+ 5 Tatara ˈtura oia i te mau tahuˈa a te mau atua ěê ta te mau arii o Iuda i faatoroa no te pûpû i te tusia* i nia i te mau vahi teitei i te mau oire o Iuda e na pihai iho ia Ierusalema. Ua tatara atoa oia i te feia e pûpû ra i te tusia* ia Baala, i te mahana, i te avaˈe, i te mau pue fetia, e i te nuu taatoa o te raˈi.+ 6 Tuu atura oia i te raau haamoriraa+ i rapae i te hiero o Iehova e afai atura i te otia o Ierusalema, i te peho o Kiderona. Tutui ihora oia i te reira+ i te peho o Kiderona, faahuˈahuˈa ihora e hue ihora oia i te mau huˈa repo i nia i te mau menema o te mau taata rii atoa.+ 7 I roto i te hiero o Iehova, vavahi atoa ihora oia i te mau fare o te mau tane taiata,*+ i te vahi e raraa ˈi te mau vahine i te tapoˈi no te raau haamoriraa.

8 Aratai ihora oia i te mau tahuˈa atoa i rapae i te mau oire o Iuda. Rave ihora oia ia ore te mau vahi teitei i pûpû ai te mau tahuˈa i te tusia* ia faaohipa-faahou-hia, mai Geba+ e tae atu i Beere-seba.+ Vavahi atoa ihora oia i te mau vahi teitei i te tomoraa o te uputa o Iosua te raatira o te oire. Tei te pae aui tera mau vahi teitei ia tomo te taata na te uputa o te oire. 9 Aita te mau tahuˈa o te mau vahi teitei i fariihia ia pauma i te fata a Iehova i Ierusalema,+ ua fariihia râ ia amu ratou i te pane hopue ore na muri i to ratou mau taeae. 10 Haaviivii atoa ihora oia ia Topheta,+ i te peho o te mau Tamaiti a Hinoma,*+ ia ore te tahi taata ia tanina faahou i ta ˈna tamaiti aore ra tamahine na Moleha.+ 11 Te mau puaahorofenua ta te mau arii o Iuda i pûpû* i te mahana, ua opani oia ia ratou ia tomo i roto i te hiero o Iehova na* te piha o* Natana-meleka te tia mana. Tei te vahi faataupeehia tera piha. Ua tutui atoa oia i te mau pereoo o te mahana.+ 12 Vavahi atoa ihora te arii i te mau fata ta te mau arii o Iuda i faatia i nia ˈˈe i te piha o Ahaza i nia i te fare,+ oia atoa te mau fata ta Manase i faatia i roto i na aua e piti o te hiero o Iehova.+ Ua faahuˈahuˈa oia i te reira e ua hue i te mau huˈa repo i te peho o Kiderona. 13 Haaviivii ihora te arii i te mau vahi teitei i mua ia Ierusalema, i te pae apatoa* o te mouˈa o te Pau,* te mau vahi teitei ta Solomona te arii o Iseraela i patu no Asetoreta te ruahine faufau o Sidona, no Kemosa te atua faufau o Moabi, e no Milekoma+ te atua hairiiri o te ati Amona.+ 14 Tuparari ihora oia i te mau pou haamoriraa, tâpû ihora i te mau raau haamoriraa+ e tapoˈi ihora i taua mau vahi ra i te ivi taata. 15 Vavahi ihora oia i te fata i Betela, oia atoa te vahi teitei ta Ieroboama te tamaiti a Nebata i hamani, o tei aratai ia Iseraela i te hara.+ I muri aˈe i to ˈna vavahiraa i tera fata e te vahi teitei, tutui ihora oia i te vahi teitei, faahuˈahuˈa ihora oia i te reira, e tutui ihora oia i te raau haamoriraa.+

16 I to Iosia fariuraa, ite atura oia i te mau menema i nia i te mouˈa. Faaue ihora ïa oia ia ravehia te mau ivi i roto i te mau menema e ia tutuihia i nia i te fata, no te haaviivii i te fata. Mea na reira i tupu ai ta Iehova i faaite na roto i te taata no te Atua mau o tei tohu i tera mau ohipa.+ 17 Na ô atura oia: “Te ite ra vau i te hoê ofai menema i ǒ. No vai tera menema?” Pahono maira te mau taata o te oire ia ˈna: “O te menema tera o te taata no te Atua mau no Iuda+ mai o tei tohu i teie mau mea ta oe i rave i te fata o Betela.” 18 Parau atura ïa oia: “A vaiiho noa ia ˈna i reira. Eiaha e hauti i to ˈna mau ivi.” Aita ïa ratou i hauti i to ˈna mau ivi, oia atoa te mau ivi o te peropheta o tei haere mai mai Samaria mai.+

19 Faaore atoa ihora Iosia i te mau fare haamoriraa atoa i nia i te mau vahi teitei i te mau oire o Samaria,+ ta te mau arii o Iseraela i hamani no te faainoino i te Atua. E mai ta ˈna i rave i Betela, ua na reira atoa oia no taua mau fare ra.+ 20 Haapohe ihora ïa oia i nia i te mau fata te mau tahuˈa atoa o te mau vahi teitei i reira, tutui ihora oia i te ivi taata i nia i taua mau fata ra,+ e hoˈi atura oia i Ierusalema.

21 Faaue ihora te arii i te nunaa taatoa: “A faatupu i te oroa Pasa+ no Iehova to outou Atua mai tei papaihia i roto i teie buka o te faufaa.”+ 22 Aita e Pasa mai teie i faatupuhia aˈenei mai te tau a haava ˈi te mau tavana ia Iseraela e i te roaraa o te tau o te mau arii o Iseraela e te mau arii o Iuda.+ 23 Ua faatupuhia tera oroa Pasa no Iehova i Ierusalema i te 18 o te matahiti te faatereraa te arii Iosia.

24 Iriti ê atoa ˈtura Iosia i te feia e demoni hiˈohiˈo to ratou, te feia hiˈohiˈo,+ te mau tii o te mau atua o te utuafare,*+ te mau idolo faufau,* e te mau mea faufau atoa o tei itehia i te fenua o Iuda e i Ierusalema. Ua na reira oia ei haapaoraa i te mau titauraa o te Ture+ o tei papaihia i roto i te buka ta Hilikia te tahuˈa i ite mai i roto i te hiero o Iehova.+ 25 I rotopu i te mau arii na mua ˈtu ia ˈna, aita hoê mai ia ˈna o tei hoˈi mai ia Iehova ra ma to ˈna aau taatoa, to ˈna ora* taatoa+ e to ˈna puai taatoa, ia au i te Ture taatoa a Mose. E aita atoa hoê mai ia ˈna i tia mai i muri aˈe ia ˈna.

26 Aita râ to Iehova riri ia Iuda i mǎrû mai. Ua uˈana to ˈna riri no te mau ohipa atoa ta Manase i rave no te faainoino ia ˈna.+ 27 Na ô aˈera Iehova: “E iriti ê atoa vau ia Iuda mai mua mai i to ˈu nei aro,+ mai ia ˈu i iriti ê ia Iseraela.+ E e faarue au ia Ierusalema te oire ta ˈu i maiti, e te fare i parau ai au: ‘Ei reira to ˈu iˈoa e vai ai.’”+

28 Te toea o te aamu o Iosia, te mau mea atoa ta ˈna i rave, ua papaihia ïa i roto i te buka o te aamu o te tau o te mau arii o Iuda. 29 I te tau o Iosia, ua haere Pharao Neko te arii o Aiphiti e farerei i te arii o Asura i pihai iho i te anavai Eupharate. Haere aˈera te arii Iosia e aro ia ˈna. I to Neko râ iteraa ˈtu ia ˈna i pihai iho i te oire o Megido, haapohe ihora oia ia ˈna.+ 30 Faauta ihora ïa ta ˈna mau tavini i to ˈna tino i roto i te hoê pereoo mai Megido mai, faahoˈi maira ia ˈna i Ierusalema e huna ihora ratou ia ˈna i roto i to ˈna menema. Faatavai ihora ïa te nunaa o taua fenua ra ia Iehoahaza te tamaiti a Iosia e faaarii ihora ia ˈna ei mono i to ˈna metua tane.+

31 E 23 matahiti to Iehoahaza+ i to ˈna riroraa mai ei arii, e e toru avaˈe to ˈna faatereraa i Ierusalema. O Hamutala+ te iˈoa o to ˈna metua vahine, e tamahine na Ieremia no Libena. 32 Ua rave oia i te mea ino i mua ia Iehova, te mau ohipa ino atoa ta to ˈna mau tupuna i rave.+ 33 Ua tapea Pharao Neko+ ia ˈna i Ribela+ i te fenua o Hamata, ia ore oia ia faatere i Ierusalema, e ua titau oia i taua fenua ra ia aufau 100 taleni* ario e hoê taleni auro.+ 34 Hau atu â, ua faaarii Pharao Neko ia Eliakima, tamaiti na Iosia, ei mono i to ˈna metua tane, e ua topa oia ia ˈna i te iˈoa Iehoiakima. Area o Iehoahaza, ua hopoi oia ia ˈna i Aiphiti,+ e i reira oia i te poheraa.+ 35 Ua horoa Iehoiakima ia Pharao i te ario e te auro ta ˈna i titau. Tera râ, ua titauhia ia faaaufau oia i te nunaa i te tute ia nehenehe oia e aufau ia Pharao. Ua rave mai oia i te taata tataitahi o taua fenua ra hoê faito ario e auro faataahia no te horoa ˈtu na Pharao Neko.

36 E 25 matahiti to Iehoiakima+ i to ˈna riroraa mai ei arii, e 11 matahiti to ˈna faatereraa i Ierusalema.+ Te iˈoa o to ˈna metua vahine, o Zebida ïa, e tamahine na Pedaia no Ruma. 37 Ua rave noa oia i te mea ino i mua ia Iehova,+ te mau ohipa ino atoa ta to ˈna mau tupuna i rave.+

24 I te tau o Iehoiakima, haere maira Nebukanesa+ te arii o Babulonia e aro i ta ˈna faatereraa arii, e riro atura Iehoiakima ei tavini na ˈna e toru matahiti. I muri iho râ, orure hau atura oia ia ˈna. 2 Faahaere maira Iehova i te pǔpǔ eiâ Kaladaio,+ Suria, ati Moabi, e ati Amona ia Iehoiakima ra. Faahaere noa maira oia ia ratou i te faatereraa arii o Iuda no te haamou atu, mai ta Iehova i faaite+ na roto i ta ˈna mau tavini te mau peropheta. 3 Na Iehova iho â i faaoti ia tupu te reira no Iuda, no te iriti ê i to Iuda mai mua mai ia ˈna+ no te mau hara atoa ta Manase i rave,+ 4 e te toto hara ore atoa ta ˈna i haamanii.+ Ua î roa hoi Ierusalema ia Manase i te toto hara ore e aita Iehova i hinaaro e faaore i te hara a Iuda.+

5 Te toea o te aamu o Iehoiakima, te mau mea atoa ta ˈna i rave, ua papaihia ïa i roto i te buka o te aamu o te tau o te mau arii o Iuda.+ 6 Taoto ihora Iehoiakima i roto i te pohe e to ˈna mau tupuna+ e riro maira ta ˈna tamaiti ra o Iehoiakina ei arii ei mono ia ˈna.

7 Aita te arii o Aiphiti i hahaere faahou na rapaeau i to ˈna fenua, ua haru hoi te arii o Babulonia pauroa ta ˈna faufaa,+ mai te tahora o Aiphiti+ e tae atu i te anavai Eupharate.+

8 E 18 matahiti to Iehoiakina+ i to ˈna riroraa mai ei arii, e e toru avaˈe to ˈna faatereraa i Ierusalema.+ Te iˈoa o to ˈna metua vahine, o Nehuseta ïa, e tamahine na Elenatana no Ierusalema. 9 Ua rave noa oia i te mea ino i mua ia Iehova, mai ta to ˈna metua tane i rave. 10 Tei tera ra tau to te mau faehau a te arii Nebukanesa no Babulonia haereraa mai e haaati ia Ierusalema.+ 11 A haaatihia ˈi Ierusalema, haere maira Nebukanesa i taua oire ra.

12 Haere atura te arii Iehoiakina no Iuda i te arii o Babulonia ra,+ oia atoa to ˈna metua vahine, ta ˈna mau tavini, to ˈna feia toroa* e to ˈna mau tia mana.+ Hopoi ê ihora te arii o Babulonia ia ˈna. Ua tupu tera ohipa i te vaˈu o te matahiti te faatereraa te arii o Babulonia.+ 13 Hopoi ê atura oia i te mau taoˈa atoa o te hiero* o Iehova e te mau taoˈa o te aorai* o te arii o Iuda.+ Faahuˈahuˈa ihora oia i te mau taihaa auro atoa ta Solomona te arii o Iseraela i hamani no te hiero o Iehova.+ Ua tupu tera mau ohipa mai ta Iehova iho â i tohu. 14 Hopoi ê ihora oia i to Ierusalema taatoa, te feia toroa taatoa,*+ te mau aito puai atoa, te feia rimaî e te feia tupai auri* atoa:+ 10 000 rahiraa taata ta ˈna i hopoi ê. O te feia veve roa ˈˈe ta ˈna i vaiiho mai i taua fenua ra.+ 15 Mea na reira oia i te hopoi-ê-raa mai ia Iehoiakina+ i Babulonia.+ Ua rave atoa mai oia i to te arii metua vahine, ta te arii mau vahine faaipoipo, to ˈna mau tia mana, e te feia rahi o taua fenua ra. Ua rave oia ia ratou mai Ierusalema ˈtu no te hopoi ê atu i Babulonia. 16 Ua hopoi ê atoa te arii o Babulonia pauroa te taata tamaˈi: 7 000 rahiraa ratou, oia atoa 1 000 feia rimaî e feia tupai auri.* E feia puai anaˈe ratou e tei faaineinehia no te tamaˈi. 17 Faaarii ihora te arii o Babulonia ia Matania, te teina o te metua tane o Iehoiakina,+ ei mono ia Iehoiakina, e horoa ˈtura i te iˈoa Zedekia.+

18 E 21 matahiti to Zedekia i to ˈna riroraa mai ei arii, e 11 matahiti to ˈna faatereraa i Ierusalema. O Hamutala+ te iˈoa o to ˈna metua vahine, e tamahine na Ieremia no Libena. 19 Ua rave noa oia i te mea ino i mua ia Iehova, mai ta Iehoiakima i rave.+ 20 No to Iehova riri i tupu ai taua mau mea ra i Ierusalema e i Iuda, e tiahi roa ˈtu ai oia ia ratou mai mua i to ˈna mata.+ E orure hau atura Zedekia i te arii o Babulonia.+

25 I te iva o te matahiti faatereraa a Zedekia, i te ahuru o te mahana o te ahuru o te avaˈe, haere maira Nebukanesa+ te arii o Babulonia e ta ˈna nuu taatoa e aro ia Ierusalema.+ Puhapa ihora oia ati aˈe i te oire e faatia ihora i te hoê aua haaatiraa.+ 2 Haaatihia ihora te oire e tae roa i te 11 o te matahiti faatereraa a te arii Zedekia. 3 I te iva o te mahana o te maha o te avaˈe, mea ino te oˈe+ i roto i te oire, e aita e maa faahou no te taata o taua fenua ra.+ 4 Faaapoohia ˈtura te patu o te oire,+ e horo ê aˈera te mau faehau atoa i te po na te uputa i ropu i na patu e piti i pihai iho i te ô o te arii, a haaati noa ˈi te mau Kaladaio i te oire. E haere atura te arii Zedekia na te eˈa e tae atu ai i te Araba.+ 5 Tapapa ihora râ te nuu Kaladaio i te arii, e noaa maira o ˈna ia ratou i te mau vahi papu pâpâmǎrô o Ieriko. Purara ê ihora ta ˈna mau faehau atoa mai pihai iho ia ˈna. 6 Haruhia ˈtura te arii,+ arataihia maira oia i Ribela i te arii o Babulonia ra, e faautuahia ˈtura oia. 7 Haapohehia ˈtura ta Zedekia mau tamaiti i mua i to ˈna mata. Haapo ihora Nebukanesa i te mata o Zedekia, ponao ihora ia ˈna i te tapea veo, e hopoi atura ia ˈna i Babulonia.+

8 I te hitu o te mahana o te pae o te avaˈe, oia hoi i te 19 o te matahiti faatereraa a te arii Nebukanesa no Babulonia, tae maira Nebuzaradana+ te raatira o te mau tiai i Ierusalema.+ E tavini o ˈna na te arii o Babulonia. 9 Tutui ihora oia i te hiero* o Iehova,+ te aorai* o te arii,+ e te mau fare atoa o Ierusalema.+ Ua tutui atoa oia i te mau fare o te feia tiaraa teitei.+ 10 Vavahi aˈera te nuu Kaladaio o tei na muri mai i te raatira o te mau tiai i te mau patu e haaati ra ia Ierusalema.+ 11 Hopoi ê atura Nebuzaradana te raatira o te mau tiai i te feia i roto â i te oire, te feia tei horo i te arii ra o Babulonia, e te toea o te nunaa.+ 12 Vaiiho maira râ te raatira o te mau tiai vetahi o te mau taata veve roa ˈˈe o taua fenua ra no te tavini ei feia faaapu vine e ei feia rave i te ohipa titauhia.+ 13 Vavahi ihora te mau Kaladaio i na pou veo+ o te hiero o Iehova, te mau pereoo turairai+ e te Miti veo+ i roto i te hiero o Iehova, e hopoi aˈera ratou i te veo i Babulonia.+ 14 Rave atoa aˈera ratou i te mau farii rehu, te mau ope, te mau paoti uiti, te mau hapaina e te mau taihaa veo atoa o tei faaohipahia no te taviniraa i te hiero. 15 Rave aˈera te raatira o te mau tiai i te mau farii auahi e te mau auˈa hamanihia i te auro+ e te ario mau.+ 16 No na pou e piti, te Miti, e te mau pereoo turairai ta Solomona i hamani no te hiero o Iehova, aita i tia ia faito i te teiaha o te veo o teie mau taoˈa.+ 17 E 18 kubiti* te teitei o te pou tataitahi,+ e e veo te tapoˈi i nia iho. E toru kubiti te teitei o na tapoˈi, e ua hamanihia te upeˈa e te mau remuna ati aˈe i te tapoˈi i te veo.+ Hoê â hohoˈa o na pou e piti.

18 Hopoi tîtî atoa maira te raatira o te mau tiai ia Seraia+ te tahuˈa tiaau, ia Zephania+ te tahuˈa tauturu, e na toru tiai uputa.+ 19 Rave maira oia mai roto mai i te oire hoê tia mana o tei tuuhia i nia i te mau faehau, e pae taata aˈo piri roa i te arii, oia atoa te papai parau o te raatira o te nuu, o te titau i te mau faehau o taua fenua ra, e 60 taata rii atoa o taua fenua ra o tei itehia mai i roto i te oire. 20 Hopoi tîtî maira Nebuzaradana+ te raatira o te mau tiai ia ratou e afai aˈera ia ratou i te arii ra o Babulonia i Ribela.+ 21 Haapohe ihora te arii o Babulonia ia ratou i Ribela i te fenua o Hamata.+ Mea na reira to Iuda i te hopoi-ê-raahia mai to ˈna fenua mai.+

22 Tuu atura te arii Nebukanesa no Babulonia ia Gedalia+ te tamaiti a Ahikama+ te tamaiti a Saphana+ i nia i te feia ta ˈna i vaiiho i te fenua o Iuda.+ 23 I te faarooraa te mau raatira e ta ratou mau faehau ua faatoroa te arii o Babulonia ia Gedalia, haere oioi maira ratou ia Gedalia ra i Mizepa. Taua mau taata ra, o Isemaela ïa te tamaiti a Netania, o Iohanana te tamaiti a Karea, o Seraia te tamaiti a Tanahumeta te taata Netopha, e o Iaazania te tamaiti a te taata Maakata, e ta ratou mau faehau.+ 24 Horeo atura Gedalia ia ratou e ta ratou mau faehau e na ô atura ia ratou: “Eiaha e mǎtaˈu i te tavini i te mau Kaladaio. A ora i teie fenua e a tavini i te arii o Babulonia, e maitai ïa outou.”+

25 Tera râ, i te hitu o te avaˈe, haere maira Isemaela+ te tamaiti a Netania te tamaiti a Elisama, e huaai o te arii, e hoê ahuru tane, e haapohe ihora ratou ia Gedalia, oia atoa te ati Iuda e te mau Kaladaio ia ˈna ra i Mizepa.+ 26 I muri aˈe, tia aˈera te nunaa taatoa, ratou paatoa, oia atoa te mau raatira o te nuu, e haere aˈera i Aiphiti,+ ua mǎtaˈu hoi ratou i te mau Kaladaio.+

27 E i te 37 o te matahiti i hopoi-ê-hia ˈi Iehoiakina+ te arii o Iuda, i te 27 o te mahana o te 12 o te avaˈe, tuu maira Evile-merodaka te arii o Babulonia ia* Iehoiakina te arii o Iuda e faahaere maira ia ˈna i rapae i te fare tapearaa.+ Tei te matahiti ïa i riro ai Evile-merodaka ei arii. 28 Paraparau maira oia ia ˈna ma te hamani maitai e faateitei ihora i to ˈna terono i nia ˈˈe i to te tahi atu mau arii i pihai iho ia ˈna i Babulonia. 29 Tatara ihora ïa Iehoiakina i to ˈna ahu tapearaa, e tamaa noa ˈtura oia i te amuraa maa a te arii i te roaraa o to ˈna oraraa. 30 I te mau mahana atoa o to ˈna oraraa, e tuhaa maa no ǒ mai i te arii ra tei horoahia na ˈna i te mahana tataitahi.