TE PITI O TE BUKA A SAMUELA

1 Teie tei tupu i muri aˈe i te poheraa o Saula. Ua hoˈi mai Davida i muri iho i to ˈna taparahiraa i te ati Amaleka. A piti mahana to ˈna faaearaa i Zikelaga.+ 2 I te toru o te mahana, haere maira te hoê taata mai te puhapa mai o Saula ma te ahu mahae e te repo i nia i te upoo. Piˈo ihora oia i mua ia Davida e tipapa ihora.

3 Ui atura Davida ia ˈna: “Mai hea roa mai oe?” Pahono maira oia: “Ua horo mai au mai te puhapa mai o Iseraela.” 4 Ani atura Davida ia ˈna: “Eaha tei tupu i ǒ? A faaite mai.” Parau maira oia: “Ua horo ê te mau faehau o Iseraela i te tamaˈi e e rave rahi o ratou tei haapohehia. Ua pohe atoa o Saula e ta ˈna tamaiti o Ionatana.”+ 5 Ani atura Davida i te taurearea o tei hopoi mai i te parau apî: “Mea nafea oe i te iteraa e ua pohe o Saula e ta ˈna tamaiti o Ionatana?” 6 Pahono maira oia: “Tei nia vau i te mouˈa Gilaboa,+ e te turui noa ra Saula i nia i ta ˈna omore. Te piri roa mai ra te mau pereoo e te feia faahoro puaahorofenua ia ˈna.+ 7 I to ˈna huriraa e iteraa mai ia ˈu, pii maira oia, e parau atura vau: ‘Teie au!’ 8 Ui maira oia ia ˈu: ‘O vai oe?’ Pahono atura vau: ‘E taata ati Amaleka+ vau.’ 9 Na ô maira oia: ‘A haere mai na e a haapohe ia ˈu. E mauiui rahi hoi to ˈu. Tera râ, te ora noa ra vau.’ 10 Haere atura ïa vau e haapohe atura ia ˈna,+ ua taa hoi ia ˈu e eita o ˈna e ora mai i muri aˈe i to ˈna pepe-maitai-raa. Rave ihora vau i te hei i nia i to ˈna upoo e te tapea i nia i to ˈna rima, e hopoi maira vau i te reira i ǒ nei i to ˈu fatu ra.”

11 Hahae ihora Davida i to ˈna ahu, e na reira atoa ˈtura te mau taata atoa i pihai iho ia ˈna. 12 Oto, taˈi e haapae aˈera ratou i te maa+ e ahiahi noa ˈtu, no te mea ua haapohehia o Saula i te ˈoˈe, oia atoa ta ˈna tamaiti o Ionatana, e e rave rahi no roto mai i te nunaa o Iehova, no roto mai i te ati Iseraela.+

13 Ani atura Davida i te taurearea o tei hopoi mai i te parau apî: “Nohea mai oe?” Pahono maira oia: “E tamaiti au na te hoê taata ati Amaleka.” 14 Parau atura Davida ia ˈna: “Eaha oe i haapohe ai i te tane ta Iehova i faatavai?”+ 15 Pii atura Davida hoê o ta ˈna mau faehau e parau atura: “A haere mai e a taparahi ia ˈna.” Taparahi ihora ïa oia ia ˈna e pohe atura oia.+ 16 Parau atura Davida ia ˈna: “Tei nia to oe toto i to oe iho upoo, ua faahapa hoi oe ia oe iho ma te parau: ‘Na ˈu i haapohe i te tane ta Iehova i faatavai.’”+

17 Himene atura Davida i teie himene otoraa no nia ia Saula e ta ˈna tamaiti o Ionatana+ 18 e faaue ihora ia haapiihia i to Iuda teie himene otoraa piihia “Te fana,” o tei papaihia i roto i te buka a Iasara:+

19 “E Iseraela, ua haapohehia to oe nehenehe i nia i to oe mau vahi teitei.+

Ua hiˈa te mau aito!

25 Ua hiˈa te mau aito i te tamaˈi!

Ua haapohehia Ionatana i nia i te mau vahi teitei!+

Ua hau aˈe to oe here i te here o te mau vahine.+

2 I muri aˈe, ui atura Davida ia Iehova:+ “E haere anei au e parahi i te hoê o te mau oire o Iuda?” Pahono maira Iehova ia ˈna: “A haere.” Ui atura Davida: “Ihea vau e haere ai?” Pahono maira oia: “I Heberona.”+ 2 Haere atura ïa Davida i reira e ta ˈna na vahine faaipoipo e piti, o Ahinoama+ no Iezereela e o Abigaila+ te vahine ivi a Nabala no Karemela. 3 Afai atoa ˈtura Davida i te mau faehau o tei na muri ia ˈna,+ te taata tataitahi e to ˈna utuafare, e parahi ihora ratou na te mau oire ati aˈe ia Heberona. 4 Haere maira te mau taata no Iuda i Heberona e faatavai ihora ia Davida ei arii no te opu o Iuda.+

Parauhia maira ia Davida: “Na te mau taata no Iabesa-gileada i huna ia Saula.” 5 Tono atura ïa Davida i te vea i te mau taata no Iabesa-gileada no te parau atu: “Ia haamaitaihia outou e Iehova, ua faaite hoi outou i te here taiva ore ia Saula to outou fatu, ma te huna ia ˈna.+ 6 Ia faaite atu Iehova ia outou i te here taiva ore e te haapao maitai. E faaite atoa ˈtu vau i te hamani maitai ia outou no te mea ua rave outou i te reira.+ 7 I teie nei, ia puai to outou rima e ia riro outou ei feia itoito, ua pohe hoi o Saula to outou fatu, e ua faatavai te opu o Iuda ia ˈu ei arii no ratou.”

8 Ua rave râ Abinera+ te tamaiti a Nere, te raatira o te nuu a Saula, ia Isa-boseta+ te tamaiti a Saula e ua afai ia ˈna i Mahanaima.+ 9 Ua faaarii oia ia ˈna i nia ia Gileada,+ i nia i te mau Asuri, i nia ia Iezereela,+ Epheraima,+ Beniamina, e i nia ia Iseraela taatoa. 10 E 40 matahiti to Isa-boseta, te tamaiti a Saula, i to ˈna riroraa mai ei arii no Iseraela, e ua faatere oia e piti matahiti. Area te opu o Iuda, ua turu ratou ia Davida.+ 11 E hitu matahiti e e ono avaˈe to Davida faatereraa i te opu o Iuda i Heberona.+

12 I muri aˈe, haere atura Abinera te tamaiti a Nere e te mau faehau a Isa-boseta, te tamaiti a Saula, i Gibeona+ mai Mahanaima+ ˈtu. 13 Haere atoa ˈtura Ioaba+ te tamaiti a Zeruia+ e te mau faehau a Davida e farerei aˈera ratou i te pape hopu o Gibeona. Parahi ihora hoê pǔpǔ i te hoê pae o te pape hopu, e te tahi pǔpǔ i te tahi atu pae o te pape hopu. 14 Parau atura Abinera ia Ioaba: “E tia e e aro* te mau tane apî i mua ia tâua.” Na ô maira Ioaba: “Ia tia ratou.” 15 Tia aˈera ïa ratou. Taiohia ihora ratou: 12 faehau no te pǔpǔ o Beniamina e o Isa-boseta, te tamaiti a Saula, e 12 faehau no roto mai i to Davida mau taata. 16 Haru ihora te tahi i to te tahi upoo, patia ˈtura i te ˈoˈe i roto i to te tahi atu aoao, e pohe atura ratou paatoa. No reira taua vahi ra i Gibeona i piihia ˈi o Helekata-hazurima.

17 Ua uˈana roa te aroraa i taua mahana ra, e pau ihora Abinera e te mau faehau o Iseraela i te mau faehau a Davida. 18 To reira na tamaiti e toru a Zeruia:+ Ioaba,+ Abisai+ e Asahela.+ Mai to te zabi oviri ra to Asahela avae i te vitiviti. 19 Aˈuaˈu ihora Asahela ia Abinera, aita oia i tioi i te pae atau e i te pae aui. 20 I to Abinera fariuraa i muri, ui aˈera oia: “O oe teie Asahela?” Pahono maira oia: “E, o vau teie.” 21 Na ô atura Abinera ia ˈna: “A taviri atu i to oe pae atau aore ra i to oe pae aui, a haru hoê o na taata apî e a rave atu i to ˈna haana tamaˈi.” Aita râ Asahela i hinaaro e vaiiho ia ˈna. 22 Parau faahou atura ïa Abinera ia Asahela: “A faaea i te tapapa ia ˈu, aita anaˈe e haapohe au ia oe. E nafea vau e hiˈo faahou atu ai i to oe taeae ia Ioaba?” 23 Aita râ oia i hinaaro e faaea. Patia ˈtura ïa Abinera ia Asahela i nia i te opu i te muriraa o te omore+ e faura maira te omore na muri i to ˈna tua. Marua ihora Asahela i reira e pohe atura. Te feia o te haere na te vahi i pohe ai Asahela, e tapea ratou maa taime iti i reira.

24 Aˈuaˈu aˈera Ioaba raua Abisai ia Abinera. I te toparaa te mahana, tae maira ratou i te aivi o Ama, i mua iho ia Gia, i nia i te eˈa e tapae atu ai i te medebara o Gibeona. 25 E haaputuputu aˈera te ati Beniamina i pihai iho ia Abinera, faanaho aˈera ia ratou ei pǔpǔ e tia aˈera i nia i te hoê aivi. 26 Tuô maira Abinera ia Ioaba: “Ehia â maororaa outou e aro ai te tahi i te tahi i te ˈoˈe? Aita anei oe i ite e o te mauiui anaˈe te hopea o teie aroraa? Afea ïa oe e faaue ai i ta oe mau faehau ia faaea i te aˈuaˈu i to ratou mau taeae?” 27 Na ô atura Ioaba: “Te horeo nei au i te ora o te Atua mau, ahani aita oe i paraparau mai, ananahi poipoi noa ïa ta ˈu mau faehau e faaea ˈi i te aˈuaˈu i to ratou mau taeae.” 28 Faaoto ihora Ioaba i te pu, faaea aˈera ta ˈna mau faehau i te aˈuaˈu ia Iseraela, e mau atura te aroraa.

29 Haere atura Abinera e ta ˈna mau faehau na te Araba+ i taua po taatoa ra. Haere atura ratou i te tahi atu pae o Ioridana e pauma ˈtura na te taatoaraa o te afaa,* e tae maira i Mahanaima.+ 30 I muri aˈe i to Ioaba faaearaa i te aˈuaˈu ia Abinera, haaputuputu ihora oia i te mau faehau a Davida. Aita faahou e 19 o ratou, aita atoa o Asahela. 31 Ua upootia râ te mau faehau a Davida i nia i te ati Beniamina e te mau faehau a Abinera. E 360 o ratou tei pohe. 32 Rave ihora ratou ia Asahela+ e huna ihora ia ˈna i roto i te menema o to ˈna metua tane i Betelehema.+ Reva aˈera Ioaba e ta ˈna mau faehau i taua po taatoa ra, e tapae aˈera ratou i Heberona+ i te aahiata.

3 Tamau noa ˈtura te tamaˈi i rotopu i te utuafare o Saula e te utuafare o Davida. Te puai noa ˈtu ra Davida,+ area te utuafare o Saula, te paruparu noa ˈtu ra ïa.+

2 I taua tau ra, fanau maira ta Davida e tamaiti i Heberona.+ O Amanona+ ta ˈna matahiapo, na Ahinoama+ no Iezereela. 3 O Kileaba te piti, na Abigaila+ te vahine ivi a Nabala no Karemela. E te toru, o Abasaloma+ te tamaiti a Maaka, te tamahine a Talamai+ te arii o Gesura. 4 Te maha, o Adonia+ te tamaiti a Hagita, e te pae, o Sephatia te tamaiti a Abitala. 5 O Itereama te ono, na Egela, e vahine faaipoipo atoa na Davida. Tera ta Davida mau tamaiti i fanauhia i Heberona.

6 A tamau ai te tamaˈi i rotopu i te utuafare o Saula e te utuafare o Davida, te haapapu noa ˈtu ra o Abinera+ i to ˈna tiaraa i roto i te utuafare o Saula. 7 Teie râ, e vahine faaipoipo tavini* ta Saula o Rizepa+ te iˈoa, e tamahine o ˈna na Aia. I muri aˈe, na ô atura Isa-boseta+ ia Abinera: “Eaha oe i taoto ai i te vahine faaipoipo tavini a to ˈu metua tane?”+ 8 Riri roa aˈera Abinera i ta Isa-boseta mau parau e na ô aˈera: “E afii urî anei au no Iuda nei? Tae roa mai i teie mahana, ua faaite au i te here taiva ore i te utuafare o to metua tane o Saula, i to ˈna mau taeae e to ˈna mau hoa, e aita vau i tuu ia oe i te rima o Davida. I teie râ mahana, te faahapa nei oe ia ˈu no te hoê hara e te hoê vahine. 9 Ia faautua rahi mai te Atua ia ˈu mai te peu eita vau e rave no Davida i ta Iehova i fafau ia ˈna.+ 10 Ua fafau hoi oia e rave mai i te faatereraa arii i te utuafare o Saula ra a haamau atu ai i te terono o Davida i nia ia Iseraela e ia Iuda, mai Dana e tae atu i Beere-seba.”+ 11 Aita ˈtura Isa-boseta i parau faahou ia Abinera, ua mǎtaˈu hoi oia ia ˈna.+

12 Tono ihora Abinera i te vea no te parau ia Davida: “Na vai te fenua? A faaau i te hoê faufaa ia ˈu, e rave ïa vau i te mau mea atoa ta ˈu e nehenehe e rave* ia fariu Iseraela taatoa i to oe pae.”+ 13 Pahono maira Davida: “Na reira, e faaau vau i te hoê faufaa ia oe. Hoê noa mea ta ˈu e titau ia oe: e afai mai oe ia Mikala,+ te tamahine a Saula. Ia ore, eiaha oe e tamata i te farerei ia ˈu.” 14 Tono atura Davida i te vea e parau ia Isa-boseta,+ te tamaiti a Saula: “A horoa mai ia Mikala ta ˈu vahine faaipoipo, tei momoˈahia ia ˈu no 100 iri i mua o te mau Philiseti.”+ 15 Tono atura ïa Isa-boseta i te taata no te rave mai ia Mikala i ta ˈna tane faaipoipo ra, o Paletiela+ te tamaiti a Laisa. 16 Tera râ, na muri noa maira Paletiela ia ˈna, ma te taˈi a pee noa ˈi ia ˈna e tae noa ˈtura i Bahurima.+ I reira, parau atura Abinera ia ˈna: “A haere râ, a hoˈi!” Hoˈi atura ïa oia.

17 I tera taime, ua faatae atoa Abinera i teie poroi i te mau matahiapo o Iseraela: “Mea maoro to outou hinaaroraa ia Davida ei arii no outou. 18 I teie nei, a ohipa, ua parau hoi Iehova ia Davida: ‘Ta ˈu tavini e Davida,+ mea na roto ia oe vau e faaora ˈi i to ˈu nunaa o Iseraela i te mau Philiseti ra e te taatoaraa o to ratou mau enemi.’” 19 Paraparau atura Abinera i te ati Beniamina.+ I muri iho, haere atura oia i Heberona e paraparau ia Davida no te faaite atu eaha te faaauraa ta ˈna i rave e o Iseraela e te opu taatoa o Beniamina.

20 I to Abinera taeraa mai i Heberona e e 20 taata, faatupu ihora Davida i te hoê tamaaraa no ratou. 21 Na ô atura Abinera ia Davida: “To ˈu fatu te arii, a farii ia haere e ia haaputuputu vau i to Iseraela taatoa ia oe ra, ia faaau ratou i te hoê faufaa ia oe. E riro ïa oe ei arii o te nunaa taatoa o Iseraela.” Vaiiho ihora ïa Davida ia Abinera ia haere ma te hau.

22 Tera râ, hoˈi maira ta Davida mau faehau e o Ioaba mai te hoê tamaˈi, e faahoˈi maira na muri ia ratou i te faufaa e rave rahi. Aita faahou Abinera ia Davida ra i Heberona, ua vaiiho hoi oia ia ˈna ia haere ma te hau. 23 I te taeraa mai o Ioaba+ e te nuu atoa tei na muri ia ˈna, parauhia ˈtura ia Ioaba: “Ua haere mai Abinera+ te tamaiti a Nere+ i te arii ra. Vaiiho aˈera te arii ia ˈna ia haere. Reva ˈtura ïa oia ma te hau.” 24 Haere atura ïa Ioaba i te arii ra e parau atura: “Eaha ta oe i rave? Ua haere mai Abinera ia oe ra. Eaha oe i tuu ai ia ˈna? I teie nei ua haamoˈe o ˈna ia ˈna! 25 Ua matau hoi oe ia Abinera te tamaiti a Nere! Ua haere mai oia i ǒ nei no te haavare ia oe e no te ite i to oe mau haereraa e te mau mea atoa ta oe e rave ra.”

26 Vaiiho maira ïa Ioaba ia Davida e tono ihora i te vea e faahoˈi mai ia Abinera. Noaa maira oia i te mau vea i pihai iho i te apoo pape o Sira. Aita râ Davida i ite i taua ohipa ra. 27 I to Abinera taeraa mai i Heberona,+ aratai ihora Ioaba ia ˈna i te atea, i te pae uputa o te oire, no te paraparau ia ˈna. I reira, patia ihora oia ia ˈna i nia i te opu, e pohe atura oia.+ Mea na reira to Ioaba tahooraa i te pohe* o to ˈna taeae o Asahela.+ 28 I muri aˈe, i to Davida faarooraa i te reira, na ô aˈera oia: “Eiaha roa Iehova e faahapa ia ˈu e ta ˈu faatereraa arii no te pohe+ o Abinera te tamaiti a Nere. 29 Ia hoˈi te reira i nia i te upoo o Ioaba+ e i nia i te taatoaraa o te utuafare o to ˈna metua tane. E ite-noa-hia i roto i te utuafare o Ioaba i te tane roohia i te maˈi o te mero atiraa,+ te lepera,+ te huma mero, te tane o te taparahihia i te ˈoˈe e o te pohe i te poia!”+ 30 Ua haapohe ïa Ioaba raua to ˈna taeae o Abisai+ ia Abinera+ i taua mahana ra, ua haapohe hoi oia ia Asahela to raua taeae i te tamaˈi+ i Gibeona.

31 Na ô atura Davida ia Ioaba e te taata atoa i pihai iho ia ˈna: “A hahae i to outou ahu, a oomo i te ahu oto, e a oto ia Abinera.” Te apee ra te arii Davida na muri i te paˈepaˈe o Abinera. 32 Huna aˈera ratou ia Abinera i Heberona. Auê ihora te arii i nia i te menema o Abinera, e taˈi atoa ˈtura te nunaa taatoa. 33 Himene ihora te arii no Abinera:

“Ua tano anei ia pohe Abinera i te pohe o te hoê maamaa?

Ua pohe oe mai te taata e haapohehia e te feia ohipa ino.”*+

Taˈi faahou ihora ïa te nunaa taatoa ia ˈna.

35 I muri aˈe, a ao noa ˈi, haere maira te nunaa taatoa e horoa na Davida i te faraoa no te tamahanahana ia ˈna.* Horeo ihora râ Davida: “Ia faautua rahi mai te Atua ia ˈu ia amu vau i te faraoa aore ra i te tahi atu maa hou te mahana a topa ˈi!”+ 36 Ite aˈera te nunaa taatoa i tei tupu, e mauruuru aˈera ratou. Mai te mau mea atoa ta te arii i rave, ua mauruuru te nunaa taatoa. 37 I taua mahana ra, taa aˈera i te mau taata o Davida e i to Iseraela taatoa e e ere te arii te tumu i haapohehia ˈi Abinera te tamaiti a Nere.+ 38 Na ô atura te arii i ta ˈna mau faehau: “Aita anei outou i ite e ua pohe te hoê tamaiti huiarii e te hoê taata rahi i teie mahana i Iseraela?+ 39 Ua faatavaihia vau ei arii.+ I teie râ mahana, te paruparu nei au. E teie nau tane, na tamaiti a Zeruia,+ mea ino roa ratou.+ Ia tahoo Iehova i te taata ohipa ino ia au i ta ˈna iho ohipa ino.”+

4 I to te tamaiti a Saula o Isa-boseta+ faarooraa e ua pohe Abinera i Heberona,+ ere ihora oia i te itoito* e peapea aˈera Iseraela taatoa. 2 E piti taata tei faatoroahia i nia i te mau pǔpǔ eiâ a Isa-boseta: o Baanaha te iˈoa o te hoê, e o Rekaba te tahi. E tamaiti raua na Rimona no Beerota, no te opu o Beniamina. (I taio-atoa-hia na hoi Beerota+ i roto ia Beniamina. 3 Ua horo to Beerota i Gitaima,+ e e feia ěê ratou i reira e tae roa mai i teie mahana.)

4 E tamaiti râ ta Ionatana+ te tamaiti a Saula, e avae pirioi+ to ˈna. E pae matahiti to ˈna i te taeraa mai te poroi mai Iezereela+ mai e ua pohe Saula raua Ionatana. E vahine hii to taua tamaiti ra. Rave ihora ïa taua vahine ra ia ˈna e horo ihora. A horo ai râ oia ma te mǎtaˈu, marua ihora te tamarii e pirioihia ˈtura oia. O Mephiboseta+ to ˈna iˈoa.

5 Haere aˈera na tamaiti a Rimona no Beerota, o Rekaba raua Baanaha, i te fare o Isa-boseta i te hoê mahana veavea. Te taotooto ra oia i te avatea. 6 Tomo atura raua i roto i te fare mai te huru ra e te haere mai ra raua e tii i te sitona. Patia ihora raua+ ia ˈna i nia i te opu e horo omoˈe aˈera. 7 I to raua tomoraa ˈtu i roto i te fare, te tarava noa ra oia i nia i to ˈna roˈi i roto i to ˈna piha. Patia haapohe ihora raua ia ˈna e tâpû ihora i to ˈna upoo. Rave atura raua i to ˈna upoo e haere atura i tera po taatoa na te purumu e tae atu ai i te Araba. 8 Hopoi aˈera raua i te upoo o Isa-boseta+ ia Davida ra i Heberona e parau atura i te arii: “Teie te upoo o Isa-boseta te tamaiti a Saula, to oe enemi+ o tei imi i te haapohe ia oe.+ To matou fatu te arii, i teie mahana, ua tuu Iehova i te tahooraa ia oe ra i nia ia Saula e to ˈna huaai.”

9 Pahono atura râ Davida ia Rekaba e to ˈna taeae ia Baanaha, na tamaiti a Rimona no Beerota: “Te horeo nei au i te ora o Iehova, tei faaora mai ia ˈu i te mau ati atoa,+ 10 i to te hoê taata faaiteraa mai ia ˈu e ua pohe Saula,+ ua manaˈo oia e parau oaoa tera ta ˈna e hopoi mai ra. Ua haru e ua haapohe au ia ˈna+ i Zikelaga. Tera tei noaa mai i taua vea ra! 11 Mea ino atu â ïa no te feia ino o te haapohe i te hoê taata parau-tia i roto i to ˈna fare i nia i to ˈna roˈi! Eita anei au e titau i to ˈna toto i to orua rima+ a haamou atu ai ia orua i te fenua nei?” 12 Faaue ihora Davida i ta ˈna mau faehau apî ia haapohe ia raua.+ Tâpû ihora ratou i to raua rima e avae, e faatarere ihora i to raua tino+ i pihai iho i te pape hopu i Heberona. Area te upoo o Isa-boseta, ua huna ratou i te reira i roto i te menema o Abinera i Heberona.

5 I muri aˈe, haere maira te mau opu atoa o Iseraela ia Davida ra i Heberona+ e na ô maira: “E fetii matou no oe.*+ 2 I te tau o Saula to matou arii, na oe i aratai ia Iseraela i te tamaˈi.+ E ua parau Iehova ia oe: ‘E aupuru oe i to ˈu nunaa ia Iseraela, e e riro oe ei aratai no Iseraela.’”+ 3 Haere maira ïa te mau matahiapo atoa o Iseraela i te arii Davida ra i Heberona. Faaau ihora te arii Davida i te hoê faufaa ia ratou+ i mua ia Iehova e faatavai ihora ratou ia Davida ei arii no Iseraela.+

4 E 30 matahiti to Davida i to ˈna riroraa mai ei arii, e ua faatere oia e 40 matahiti.+ 5 I Heberona, ua faatere oia ia Iuda e 7 matahiti e 6 avaˈe, e i Ierusalema,+ ua faatere oia e 33 matahiti ia Iuda e te taatoaraa o Iseraela. 6 Haere atura Davida e ta ˈna mau faehau i Ierusalema no te aro i te ati Iebusi+ o te parahi ra i taua tuhaa fenua ra. Faaooo aˈera ratou ia Davida: “Eita roa oe e tae mai i roto i teie oire! E haere i te matapo e te pirioi ia faaotohe ia oe.” Ua manaˈo ratou e eita e haere ia Davida ia haru i to ratou oire.+ 7 Tera râ, haru ihora Davida i te pare o Ziona, o tei parauhia i teie nei te Oire o Davida.+ 8 I parau na Davida i taua mahana ra: “Ia haere te feia o te aro i te ati Iebusi na roto i te taheraa pape no te tairi i ‘te pirioi e te matapo,’ o ta ˈu e hae ra!” No reira e parauhia ˈi: “Eita roa te matapo e te pirioi e tomo i roto i te fare.” 9 Faaea roa ˈtura Davida i roto i taua pare ra, e parauhia ˈtura taua vahi ra* te Oire o Davida. Haamata ihora Davida i te faatia i te patu e te tahi atu mau paturaa i Milo*+ e i te tahi atu mau vahi o te oire.+ 10 Puai noa ˈtura ïa Davida,+ e tei pihai iho atoa Iehova te Atua o te mau nuu* ia ˈna.+

11 Ua faatae te arii Hirama+ no Turia i te vea ia Davida ra, te raau arezi+ atoa, te feia tarai raau, e te feia tarai ofai no te faatia i te pǎpai. Haamata ihora ratou i te hamani i te hoê aorai* no Davida.+ 12 Ua taa ïa ia Davida e ua haamau papu Iehova i to ˈna tiaraa arii i nia ia Iseraela+ e ua haamaitai oia i ta ˈna faatereraa arii+ no to ˈna nunaa o Iseraela.+

13 Rave maira Davida i te tahi atu mau vahine faaipoipo tavini+ e vahine faaipoipo i Ierusalema, i muri aˈe i to ˈna faarueraa ia Heberona. E fanau aˈera ta Davida te tahi atu mau tamaiti e tamahine.+ 14 Teie te iˈoa o ta ˈna mau tamarii tei fanauhia i Ierusalema: o Samua, Sobaba, Natana,+ Solomona,+ 15 Ibehara, Elisua, Nephega, Iaphia, 16 Elisama, Eliada e o Elipheleta.

17 I to te mau Philiseti faarooraa e ua faatavaihia Davida ei arii no Iseraela,+ haere maira te mau Philiseti atoa e imi ia Davida.+ I to Davida faarooraa i te reira, tapuni ihora oia i roto i te haapuraa.+ 18 Haere maira te mau Philiseti e purara aˈera i roto i te peho o te ati Repha.+ 19 Ui atura Davida ia Iehova:+ “Ia haere anei au e aro i te mau Philiseti? E tuu anei oe ia ratou i to ˈu nei rima?” Pahono maira Iehova ia Davida: “A haere, e tuu mau â vau i te mau Philiseti i to rima.”+ 20 Haere maira ïa Davida i Baala-perazima e tairi ihora Davida ia ratou i reira. Parau atura oia: “Mai te hoê tahora, ua hamani Iehova i te hoê apoo i mua ia ˈu i rotopu i to ˈu mau enemi.”+ No reira oia i parau ai i tera vahi Baala-perazima.*+ 21 Faarue maira te mau Philiseti i ta ratou mau idolo i reira, e hopoi ê aˈera Davida e ta ˈna mau faehau i te reira.

22 I muri aˈe, haere faahou maira te mau Philiseti e purara aˈera i te peho o te ati Repha.+ 23 Ui atura Davida ia Iehova. Pahono maira râ oia i teie taime: “Eiaha e aro ia ratou na mua mai. A haaati râ ia ratou, e a rave ia ratou na muri mai, i mua i te mau raau rii baka. 24 Ia faaroo oe mai te ahehe avae i roto i te mau raau rii baka, a haere haavitiviti, te na mua ˈtu ra hoi Iehova ia oe no te tairi i te nuu Philiseti.” 25 Rave ihora ïa Davida mai ta Iehova i faaue ia ˈna, e tairi ihora oia i te mau Philiseti+ mai Geba+ e tae roa ˈtu i Gezera.+

6 Haaputuputu faahou ihora Davida i te mau faehau itoito roa ˈˈe i Iseraela: 30 000 taata. 2 Haere aˈera Davida e to ˈna mau taata i Baale-iuda no te tii i te Afata a te Atua mau.+ I mua i taua afata ra te nunaa e tiaoro ai i te iˈoa o Iehova o te mau nuu,*+ o te parahi ra i nia i te terono i nia ˈˈe* i te mau kerubi.+ 3 Haere aˈera ratou i te fare o Abinadaba.+ Tei nia i te aivi to ˈna nohoraa. Tuu aˈera râ ratou i te Afata a te Atua mau i nia i te hoê tavere apî+ no te uta i te reira. E na Uza raua Ahio, na tamaiti a Abinadaba, i aratai i taua tavere ra.

4 Rave maira ïa ratou i te Afata a te Atua mau mai te fare mai o Abinadaba i nia i te aivi, e ua na mua ˈtu o Ahio i te Afata i te haereraa. 5 Te arearea ra Davida e te nunaa taatoa o Iseraela i mua ia Iehova e te mau huru upaupa atoa hamanihia i te raau berusi, te kinura, te tahi atu mau upaupa taura,+ te tariparau,+ te maneaima e te sumebalo.+ 6 I to ratou râ taeraa ˈtu i te vahi tairiiriraa huero maa* o Nakona, fatata roa te puaatoro i te faataahuri i te Afata a te Atua mau. Toro atura Uza i to ˈna rima e haru atura i te reira.+ 7 Ura ihora to Iehova riri ia Uza, e tairi ihora te Atua mau ia ˈna+ i reira no to ˈna faatura ore+ i te ture a te Atua. Pohe atura oia i reira i pihai iho i te Afata a te Atua mau. 8 Oto ihora râ Davida no te mea ua ura to Iehova riri rahi ia Uza. Parauhia ˈtura taua vahi ra o Pereza-uza* e tae roa mai i teie mahana. 9 Mǎtaˈu ihora ïa Davida ia Iehova+ i taua mahana ra e feruri ihora: “E nafea e faahaere ai i te Afata a Iehova i to ˈu oire?”+ 10 Aita ˈtura ïa Davida i hinaaro faahou e hopoi i te Afata a Iehova i te Oire o Davida,+ te vahi e noho ai oia. Ua faaue râ oia ia afaihia te reira i te fare o Obeda-edoma+ no Gata.

11 Vai noa ˈtura te Afata a Iehova i roto i te fare o Obeda-edoma no Gata e toru avaˈe, e haamaitai noa ˈtura Iehova ia Obeda-edoma e to ˈna utuafare taatoa.+ 12 Faatiahia maira i te arii Davida e ua haamaitai Iehova i te utuafare o Obeda-edoma e ta ˈna faufaa taatoa no te mea tei i ǒ ˈna te Afata a te Atua mau. Haere ihora ïa Davida e tii mai i te Afata a te Atua mau i te fare o Obeda-edoma e faahaere maira i te reira i te Oire o Davida e oaoa aˈera ratou.+ 13 I to te feia amo+ i te Afata a Iehova taahiraa e ono taahiraa avae, pûpû ihora Davida i te hoê puaatoro e te hoê animara haaporiahia ei tusia.

14 Te ori ra Davida a faaohuohu noa ˈi ma to ˈna puai atoa i mua ia Iehova, e e tiputa lino+ ta ˈna i oomo. 15 Te hopoi mai ra Davida e te nunaa taatoa o Iseraela i te Afata+ a Iehova ma te umere+ e te oto o te pu.+ 16 I te taeraa mai râ te Afata a Iehova i te Oire o Davida, hiˈo maira Mikala+ te tamahine a Saula na roto i te haamaramarama e ite maira i te arii Davida te ori ra ma te faaohuohu i mua ia Iehova. Haamata ˈtura oia i te vahavaha ia ˈna i roto i to ˈna aau.+ 17 Afai maira ïa ratou i te Afata a Iehova e tuu ihora i te reira i te vahi faataahia i roto i te tiahapa ta Davida i faatia no te Afata.+ Pûpû ihora Davida i te tusia taauahi+ e te tusia no te hau+ i mua ia Iehova.+ 18 I te otiraa ta ˈna pûpûraa tusia taauahi e te tusia no te hau, haamaitai ihora Davida i te nunaa i te iˈoa o Iehova o te mau nuu. 19 Opere atoa ˈtura oia na te taata atoa, na te nahoa taatoa o Iseraela, te tane e te vahine tataitahi, hoê faraoa mai te hei ra, hoê faraoa momona tamara e hoê faraoa momona vine mǎrô, e hoˈi aˈera te taata tataitahi i ǒ ˈna.

20 I to Davida hoˈiraa no te haamaitai i to ˈna iho utuafare, haere maira ta Saula tamahine o Mikala+ i rapae e farerei ia ˈna. Na ô maira oia: “Auê te arii o Iseraela tei faahanahana ia ˈna i to ˈna tatararaa i to ˈna ahu i teie mahana i mua i te mata o te mau tavini vahine a ta ˈna mau tavini, mai te hoê taata neneva e tatara ra i to ˈna ahu!”+ 21 Parau atura Davida ia Mikala: “Ua arearea vau i mua ia Iehova, o tei maiti ia ˈu eiaha râ i to oe metua tane e to ˈna utuafare taatoa e o tei faatoroa ia ˈu ei aratai i nia i to Iehova nunaa, o Iseraela.+ No reira, e arearea vau i mua ia Iehova, 22 e e faahaehaa ˈtu â vau ia ˈu a riro atu ai ei taata faufaa ore i to ˈu iho mata. Teie râ mau tavini vahine ta oe i faahiti, e faahanahana ratou ia ˈu.” 23 Aita ˈtura ïa ta te tamahine a Saula o Mikala+ tamarii i noaa e pohe noa ˈtu oia.

7 I teie nei, ua parahi te arii Davida i roto i to ˈna aorai,*+ e ua horoa Iehova i te hau* no ˈna ma te faaora ia ˈna i te mau enemi ati aˈe. 2 Na ô atura te arii ia Natana+ te peropheta: “Te parahi nei au i roto i te hoê fare arezi,+ area te Afata a te Atua mau, tei raro aˈe ïa i te tapoˈi tiahapa i te vairaa.”+ 3 Pahono maira Natana i te arii: “Te mau mea atoa ta oe e hinaaro ra e rave, a rave ïa, tei ia oe hoi Iehova.”+

4 I tera iho â po, na ô maira Iehova ia Natana: 5 “A haere e a parau i ta ˈu tavini ia Davida: ‘Teie ta Iehova e parau ra: “E patu anei oe i te hoê fare ia parahi au i roto?+ 6 Aita hoi au i parahi aˈenei i roto i te hoê fare mai te mahana mai â i aratai mai ai au i te nunaa o Iseraela i rapae i Aiphiti e tae roa mai i teie mahana.+ Ua hahaere noa râ vau mai tera e tera vahi i roto i te hoê tiahapa e i te hoê sekene.+ 7 I te roaraa a haere ai au e te ati Iseraela* taatoa, ua parau aˈena anei au i te mau aratai o te mau opu o Iseraela o ta ˈu i faatoroa no te tiai i to ˈu nunaa o Iseraela: ‘Eaha outou i ore ai i hamani i te hoê fare arezi no ˈu?’”’ 8 I teie nei, a parau i ta ˈu tavini ia Davida: ‘Teie ta Iehova o te mau nuu* e parau ra: “Ua rave mai au ia oe mai te mau vahi aihere mai, i reira oe i te tiairaa i te mau mamoe,+ no te faariro ia oe ei aratai no to ˈu nunaa o Iseraela.+ 9 Ei pihai iho vau ia oe i te mau vahi atoa e haere ai oe,+ e haamou vau* i to oe mau enemi atoa.+ E faarahi au i to iˈoa+ e e riro oe ei taata tuiroo* i te fenua nei. 10 E horoa vau i te hoê vahi no to ˈu nunaa o Iseraela a haaparahi atu ai ia ratou i reira. E ora ratou i reira e eita ratou e haapeapea-faahou-hia. Eita te feia ino e haavî faahou ia ratou mai ta ratou i rave na,+ 11 mai te mahana mai â i faatoroa ˈi au i te tavana+ i nia i to ˈu nunaa o Iseraela. E e horoa vau na oe i te hau* ma te faaora ia oe i to oe mau enemi atoa.+

“‘“E o vau nei, o Iehova, ua parau atu vau ia oe e haamau Iehova i te hoê utuafare huiarii* no oe.+ 12 Ia hope to oe pue mahana+ e ia taoto oe i roto i te pohe e to oe mau tupuna, e faaarii au i to oe huaai i muri aˈe ia oe, ta oe iho tamaiti,* e e haamau papu vau i ta ˈna faatereraa.+ 13 Na ˈna e patu i te hoê fare no to ˈu iˈoa,+ e e haamau papu vau i te terono o ta ˈna faatereraa arii e a muri noa ˈtu.+ 14 E riro vau ei metua no ˈna e e riro oia ei tamaiti na ˈu.+ Ia rave oia i te ohipa ino, e tamaˈi au ia ˈna* e e tairi au ia ˈna mai ta te taata e rave nei.+ 15 Eita vau e iriti ê i to ˈu here taiva ore ia ˈna ra, mai ta ˈu i rave no Saula,+ o ta ˈu i iriti ê atu mai mua mai ia oe. 16 E mau papu to utuafare huiarii e ta oe faatereraa arii e a muri noa ˈtu. E haamau-papu-hia to terono e a muri noa ˈtu.”’”+

17 Faaite maira Natana ia Davida i tera mau parau atoa e tera orama taatoa.+

18 Parahi atura ïa te arii Davida i raro i mua ia Iehova e parau aˈera: “O vai hoi au, e te Arii hau ê e Fatu ra e Iehova? E o vai to ˈu utuafare i rave ai oe i teie mau mea atoa no ˈu?+ 19 Mai te mea ra e aita i navai te reira, e te Arii hau ê e Fatu ra e Iehova, te faaite atoa mai ra oe e vai â to ˈu utuafare* no te hoê tau maoro, e e faaueraa* teie no te huitaata atoa, e te Arii hau ê e Fatu ra e Iehova. 20 Eaha ˈtu â ta ˈu, ta to tavini o Davida, e nehenehe e parau ia oe, ua matau maitai hoi oe ia ˈu,+ e te Arii hau ê e Fatu ra, e Iehova? 21 Ua rave oe i tera mau mea faahiahia atoa e ua faaite oe i te reira i to tavini no te mea tera to hinaaro e tera ta oe i fafau.+ 22 No reira, e mana rahi mau to oe,+ e te Arii hau ê e Fatu ra e Iehova. Aita ˈtu mai ia oe,+ e aita e Atua maori râ oe.+ Na te mau mea atoa ta matou i faaroo e haapapu ra i te reira. 23 E o vai hoi nunaa i te fenua nei mai to oe nunaa o Iseraela?+ E te Atua e, ua haere oe e hoo mai ia ratou ia riro ratou ei nunaa no oe.+ Ua tui to roo+ i to oe raveraa i te ohipa faahiahia e te mǎtaˈu rahi no ratou.+ Ua tiahi oe i te mau nunaa e to ratou mau atua no to oe nunaa ta oe i hoo faahou mai no oe iho i Aiphiti. 24 Ua faariro oe ia Iseraela ei nunaa no oe e a muri noa ˈtu,+ e ua riro mai oe, e Iehova, ei Atua no ratou.+

25 “I teie nei, e te Atua e Iehova, a tapea i te parau ta oe i fafau no nia i to tavini e to ˈna utuafare e a muri noa ˈtu, e ia rave oe mai ta oe i fafau.+ 26 Ia faateiteihia to iˈoa e a muri noa ˈtu+ e ia parau te taata: ‘O Iehova o te mau nuu te Atua o Iseraela!’ Ia haamau-papu-hia te utuafare o to tavini o Davida i mua ia oe.+ 27 Ua faaite hoi oe, e Iehova o te mau nuu, te Atua o Iseraela, i te hoê parau i to tavini a na ô ai oe: ‘E haamau vau i te hoê utuafare huiarii* no oe.’+ No reira vau, to tavini, e itoito ai no te pure ia oe. 28 E te Arii hau ê e Fatu ra e Iehova, o oe te Atua mau. E parau mau anaˈe ta oe.+ Ua fafau oe i teie mau mea maitatai i to tavini. 29 No reira, ia farii oe, a haamaitai i te utuafare o to tavini, e ia vai â e a muri noa ˈtu i mua ia oe.+ Na oe hoi i fafau i te reira, e te Arii hau ê e Fatu ra e Iehova. Ia fanaˈo to ˈu utuafare i te maitai e a muri noa ˈtu maoti ta oe haamaitairaa.”+

8 Tau taime i muri aˈe, tairi ihora Davida i te mau Philiseti+ e pau ihora ratou.+ Rave maira oia ia Metega-ama i te rima o te mau Philiseti.

2 Upootia atoa ihora oia i nia i te ati Moabi.+ Faatarava ihora oia ia ratou i raro e tufa ihora oia ia ratou na roto e toru pǔpǔ.* E piti pǔpǔ te haapohehia e hoê pǔpǔ te vaiihohia ia ora.+ Riro atura te ati Moabi ei tavini na Davida e aufau maira ratou i te ô titauhia.+

3 Upootia atoa ihora Davida i nia ia Hadadezera te tamaiti a Rehoba te arii o Zoba.+ I tera taime, te haere ra ïa Hadadezera e haapapu faahou i to ˈna mana faatere i te anavai Eupharate.+ 4 Haru maira Davida ta Hadadezera 1 700 taata faahoro puaahorofenua e 20 000 faehau haere avae. Tâpû ihora Davida i te uaua avae o te mau puaahorofenua huti pereoo, ua vaiiho râ oia 100 puaahorofenua.+

5 I te haereraa mai to Suria no Damaseko+ e tauturu i te arii Hadadezera no Zoba, haapohe ihora Davida e 22 000 faehau Suria.+ 6 Haamau ihora Davida i te tahi mau puhapa faehau i rotopu i to Suria no Damaseko. Riro maira to Suria ei tavini na Davida e aufau maira ratou i te ô titauhia. Ua horoa Iehova i te upootiaraa* ia Davida i te mau vahi atoa i haere ai oia.+ 7 Hau atu â, rave maira Davida i te mau paruru auro menemene a te mau faehau a Hadadezera e hopoi ihora i te reira i Ierusalema.+ 8 Mea rahi te veo ta Davida i rave mai i Beta e Berota, na oire o Hadadezera.

9 Faaroo aˈera râ te arii Toi no Hamata+ e ua pau te nuu taatoa a Hadadezera ia Davida.+ 10 Tono aˈera ïa Toi ia Iorama ta ˈna tamaiti i te arii Davida ra no te ani eaha to ˈna huru e no te haapopou ia ˈna no to ˈna aroraa e tairiraa ia Hadadezera (mea pinepine hoi Hadadezera i te aro ia Toi), e hopoi maira Iorama i te taoˈa ario, auro e veo. 11 Faaherehere ihora te arii Davida i te reira no te haamoriraa ia* Iehova, mai ta ˈna i rave i te ario e te auro tei noaa mai i te mau nunaa atoa tei pau ia ˈna:+ 12 Suria, Moabi,+ te ati Amona, te mau Philiseti,+ te ati Amaleka,+ e mai ta ˈna i rave i te faufaa a Hadadezera+ te tamaiti a Rehoba te arii o Zoba. 13 Atutu atura te roo o Davida i to ˈna hoˈiraa mai mai te peho o te Miti papaa, i reira oia i te taparahiraa 18 000 taata ati Edoma.+ 14 Ua haamau oia i te tahi mau puhapa faehau i Edoma, na te tuhaa fenua taatoa, e ua riro mai te ati Edoma taatoa ei tavini na Davida.+ Ua horoa Iehova i te upootiaraa* ia Davida i te mau vahi atoa i haere ai oia.+

15 Faatere noa ˈtura Davida ia Iseraela taatoa,+ e haava noa ˈtura Davida ma te parau-tia+ i to ˈna nunaa taatoa.+ 16 O Ioaba+ te tamaiti a Zeruia te raatira o te nuu e o Iehosaphata+ te tamaiti a Ahiluda te haaputu parau. 17 E tahuˈa o Zadoka+ te tamaiti a Ahituba raua Ahimeleka te tamaiti a Abiatara. Area o Seraia, e papai parau ïa. 18 O Benaia+ te tamaiti a Iehoiada te raatira o te mau Kereti e te mau Peleti.+ E o te mau tamaiti a Davida tei riro mai ei tia mana rahi.*

9 I te hoê mahana, parau atura Davida: “Te vai faahou ra anei te taata no te utuafare o Saula ia faaite au ia ˈna i te here taiva ore no Ionatana?”+ 2 E tavini râ ta te utuafare o Saula, o Ziba+ te iˈoa. Titauhia ˈtura ïa oia ia haere mai i ǒ Davida, e ani atura te arii ia ˈna: “O oe anei o Ziba?” Pahono maira oia: “O vau to tavini.” 3 Ui atura te arii: “Te vai faahou ra anei te taata no te utuafare o Saula ia faaite au ia ˈna i te here taiva ore o te Atua?” Pahono maira Ziba: “Te toe ra hoê tamaiti a Ionatana, ua pirioi to ˈna na avae.”+ 4 Ani atura te arii ia ˈna: “Teihea roa oia?” Pahono maira Ziba i te arii: “Tei te fare oia o Makira+ te tamaiti a Amiela i Lo-debara.”

5 Tono ihora te arii Davida i te taata e tii mai ia ˈna i te fare o Makira te tamaiti a Amiela i Lo-debara. 6 I to Mephiboseta, te tamaiti a Ionatana te tamaiti a Saula, taeraa mai ia Davida ra, piˈo ihora oia i raro e tipapa ihora. Parau atura Davida: “Mephiboseta!” Na ô maira oia: “Teie to tavini.” 7 Parau atura Davida ia ˈna: “Eiaha e mǎtaˈu, e faaite mau â hoi au i te here taiva ore+ ia oe no to oe metua tane o Ionatana. E faahoˈi atu vau ia oe ra te mau fenua atoa o Saula to oe papa ruau, e e tamaa noa oe* i ta ˈu amuraa maa.”+

8 Tipapa faahou ihora ïa oia e parau maira: “O vai hoi au i tâuˈa ˈi oe* i te hoê urî pohe+ mai ia ˈu?” 9 Titau atura te arii ia Ziba, ta Saula tavini, e parau atura ia ˈna: “Pauroa te faufaa a Saula e a to ˈna utuafare taatoa, te horoa ra vau na te mootua a to fatu.+ 10 Na oe, ta oe mau tamaiti e ta oe mau tavini, e faaapu i te fenua no ˈna, e e haaputu outou i tei hotu mai ei maa na te utuafare o te mootua a to fatu. Area Mephiboseta, te mootua a to fatu, e tamaa oia i ta ˈu amuraa maa i te mau mahana atoa.”+

E 15 tamaiti ta Ziba e 20 tavini.+ 11 Parau maira Ziba ia Davida: “To ˈu fatu te arii, e rave au i te mau mea atoa ta oe e faaue mai.” Tamaa ihora ïa Mephiboseta i ta Davida* amuraa maa mai te mea ra e tamaiti oia na te arii. 12 E tamaiti apî atoa râ ta Mephiboseta o Mita+ te iˈoa. E ua riro mai te feia atoa e ora ra i te fare o Ziba ei tavini na Mephiboseta. 13 Faaea ˈtura Mephiboseta i Ierusalema, tei te amuraa maa a te arii hoi oia i te tamaaraa i te mau mahana atoa.+ Ua pirioi to ˈna na avae.+

10 I muri aˈe, pohe atura te arii o te ati Amona,+ e riro maira ta ˈna tamaiti o Hanuna ei arii ei mono ia ˈna.+ 2 Na ô atura Davida: “E faaite au i te hamani maitai* ia Hanuna te tamaiti a Nahasa mai ta to ˈna metua tane i hamani maitai* ia ˈu.” Tono ihora ïa Davida i ta ˈna mau tavini no te haere e tamahanahana ia ˈna i te poheraa o to ˈna metua tane. I te taeraa râ ta Davida mau tavini i te fenua o te ati Amona, 3 parau ihora te huiarii a te ati Amona ia Hanuna to ratou arii: “Te manaˈo ra anei oe e no te haamanaˈo i to oe metua tane i tono mai ai Davida i to ˈna mau taata no te tamahanahana ia oe? E ere anei no te imi haere na roto i te oire, no te hiˈopoa e no te haamou i te oire, i tono ai Davida i to ˈna mau taata ia oe ra?” 4 Rave ihora ïa Hanuna i te mau tavini a Davida, hahu ihora hoê pae o to ratou taa,+ tâpû ihora i to ratou ahu i te faito o te ohure e tuu ihora ia ratou ia haere. 5 I te faaiteraahia tera parau ia Davida, tono ihora oia i te taata e farerei ia ratou, ua faahaama-roa-hia hoi ratou. Teie te poroi ta te arii i faatae atu: “A faaea i Ieriko+ e ia tupu faahou mai to outou huruhuru taa, i reira outou e hoˈi mai ai.”

6 I muri iho, taa aˈera i te ati Amona e ua riro ratou ei faufauraa na Davida. Tono aˈera ïa te ati Amona i te vea no te tihepu i te feia no Suria i Bete-rehoba+ e te feia no Suria i Zoba.+ E 20 000 ïa faehau haere avae, oia atoa te arii o Maaka+ e 1 000 taata. E no Isetoba mai,* 12 000 taata.+ 7 I to Davida faarooraa i te reira, tono ihora oia ia Ioaba, ta ˈna mau aito puai roa ˈˈe+ e te nuu taatoa no te aro ia ratou. 8 Haere maira te ati Amona i rapae e faanaho aˈera ia ratou no te aro, i te tomoraa o te oire a tia noa ˈi to Suria no Zoba e no Rehoba, e te mau faehau o Isetoba* e to Maaka i te hoê vahi ateatea.

9 I to Ioaba iteraa e te haere mai ra te mau enemi e aro ia ˈna na mua mai e na muri mai, maiti ihora oia vetahi o te mau faehau itoito roa ˈˈe o Iseraela e faanaho atura ia ratou no te aro i to Suria.+ 10 Tuu atura oia i te toea o te mau faehau i raro aˈe i te aratairaa* a to ˈna taeae o Abisai+ ia faanaho oia ia ratou no te aro i te ati Amona.+ 11 Na ô atura oia: “Mai te peu mea puai roa to Suria no ˈu, e haere mai oe e tauturu ia ˈu. Mai te peu râ mea puai roa te ati Amona no oe, e haere atu vau e tauturu ia oe. 12 Ia puai e ia itoito tâua+ no to tâua nunaa e no te mau oire o to tâua Atua, e na Iehova e haapao i te toea.”+

13 Haere aˈera Ioaba e ta ˈna mau faehau e aro i to Suria, e horo ê ihora to Suria.+ 14 I to te ati Amona iteraa e ua horo to Suria, horo ihora ratou mai mua ˈtu ia Abisai e tapuni aˈera i roto i te oire. I muri aˈe, faarue aˈera Ioaba i te fenua o te ati Amona e hoˈi maira i Ierusalema.

15 I to Suria pauraa ia Iseraela, faanaho faahou ihora ratou i ta ratou mau pǔpǔ faehau.+ 16 Titau ihora ïa Hadadezera+ i te feia no Suria i te tuhaa fenua o te Anavai,*+ e haere maira ratou i Helama. Na Sobaka te raatira o te nuu a Hadadezera i aratai ia ratou.

17 I te faaiteraahia taua ohipa ra ia Davida, haaputuputu oioi ihora oia i te nuu taatoa o Iseraela, haere atura oia i te tahi atu pae o Ioridana e tae atura oia i Helama. Faanaho aˈera to Suria ia ratou no te farerei ia Davida e aro maira ia ˈna.+ 18 Tera râ, horo ê aˈera to Suria i mua ia Iseraela. Taparahi pohe ihora Davida 700 taata faahoro pereoo e 40 000 taata faahoro puaahorofenua no Suria, e haapohe ihora oia ia Sobaka te raatira o ta ratou nuu.+ 19 I te iteraa te mau arii i raro aˈe i te faatereraa a Hadadezera e ua pau ratou ia Iseraela, faatupu oioi aˈera ratou i te hau e o Iseraela e auraro aˈera ia ratou.+ Mǎtaˈu aˈera to Suria i te tauturu faahou i te ati Amona.

11 I te haamataraa o te matahiti,* i te taime e haere ai te mau arii i te tamaˈi, tono atura Davida ia Ioaba, to ˈna mau taata e te nuu taatoa o Iseraela e haamou i te ati Amona e haaati aˈera ratou ia Raba.+ Area o Davida, ua faaea ïa i Ierusalema.+

2 I te hoê ahiahi, tia aˈera Davida mai to ˈna roˈi mai e hahaere atura na nia i te tafare o to ˈna aorai.* Mai nia mai i te tafare, ite aˈera oia i te hoê vahine e hopu ra i te pape. Mea haviti roa taua vahine ra. 3 Tono aˈera Davida i te tahi taata e uiui no nia i taua vahine ra e faaitehia maira oia e o Bate-seba+ to ˈna iˈoa, e tamahine o ˈna na Eliama+ e e vahine na Uria+ ati Heta.+ 4 Tono aˈera Davida i te vea no te faahaere mai ia ˈna.+ Haere maira ïa Bate-seba i ǒ ˈna e taoto ihora Davida ia ˈna.+ (Ua tupu te reira a tamâ ˈi oia ia ˈna i to ˈna viivii.*)+ I muri iho, hoˈi atura oia i to ˈna fare.

5 Hapû ihora te vahine, e faatae ihora oia i te poroi ia Davida no te faaite atu e hapû to ˈna. 6 Faatae ihora ïa Davida i te hoê poroi ia Ioaba: “A tono mai ia Uria ati Heta ia ˈu nei.” Tono ihora ïa Ioaba ia Uria ia Davida ra. 7 I to Uria taeraa mai ia ˈna ra, ui ihora Davida ia ˈna eaha te huru o Ioaba, eaha te huru o te mau faehau e eaha te huru te tamaˈi. 8 Parau atura Davida ia Uria: “A hoˈi i ǒ oe e a tamǎrû ia oe.”* I to Uria faarueraa i te fare o te arii, horoa ˈtura te arii i te hoê ô* ia ˈna ra. 9 Taoto noa ˈtura râ Uria i te uputa o te aorai e te tahi atu mau faehau a te arii, e aita oia i hoˈi i ǒ ˈna. 10 Faaitehia ˈtura ïa ia Davida: “Aita Uria i hoˈi i ǒ ˈna.” Na ô atura ïa Davida ia Uria: “No hoˈi noa mai nei oe mai te hoê tere roa. Eaha oe i ore ai i hoˈi i ǒ oe?” 11 Pahono maira Uria ia Davida: “Tei raro aˈe i te fare ie te Afata+ e te feia no Iseraela e no Iuda, e te puhapa nei to ˈu fatu o Ioaba e ta ˈna mau faehau i rapae. E hoˈi anei ïa vau i ǒ ˈu e tamaa e e inu, a taoto atu ai i ta ˈu vahine?+ Te horeo nei au ia oe: eita roa ˈtu vau e rave i tera ohipa!”

12 Parau atura ïa Davida ia Uria: “A faaea mai i ǒ nei i teie mahana atoa, e ananahi e tuu vau ia oe ia haere.” Faaea maira ïa Uria i Ierusalema i taua mahana ra e te mahana i muri iho. 13 Titau ihora Davida ia ˈna no te tamaa e no te inu e o ˈna. Faainu atura oia ia ˈna e taero ihora Uria. I te ahiahi râ, haere atura oia e taoto i pihai iho i te mau tavini a te arii, e aita oia i hoˈi i ǒ ˈna. 14 I te poipoi aˈe, papai ihora Davida i te hoê rata ia Ioaba e horoa ˈtura na Uria e hopoi atu. 15 Ua papai oia i roto i te rata: “A rave ia Uria na muri ia oe i nia i te reni aroraa i mua roa, i te vahi mea uˈana roa ˈˈe te tamaˈi. I muri iho, a otohe mai, e a vaiiho atu ia ˈna i reira ia taparahihia o ˈna.”+

16 I hiˈopoa na Ioaba i te oire e ua ite maitai oia i te vahi i tia ˈi te mau aito puai roa ˈˈe. Ua tuu oia ia Uria i mua ia ratou. 17 I to te mau taata o te oire haereraa mai i rapae e aro ia Ioaba, taparahihia ihora vetahi mau faehau a Davida, e tei rotopu atoa Uria ati Heta ia ratou.+ 18 Tono aˈera Ioaba i te vea no te faaite ia Davida eaha tei tupu i nia i te tahua aroraa. 19 Na ô atura oia i te vea: “Ua oti anaˈe oe i te faaite i te arii eaha tei tupu, 20 e riri paha te arii a parau atu ai ia oe: ‘Eaha outou i tapiri roa ˈi i te oire? Aita outou i ite e teˈa mai ratou ia outou mai nia mai i te aua? 21 Na vai i haapohe ia Abimeleka+ te tamaiti a Ierubeseta?+ Na te hoê vahine no Tebesa. Ua taora o ˈna i te hoê ofai oro i nia ia ˈna mai nia mai i te aua. Eaha ïa outou i tapiri roa ˈi i te aua?’ Ia na reira mai te arii i te parau ia oe, a pahono atu: ‘Ua pohe atoa to tavini o Uria ati Heta.’”

22 Haere ihora ïa te vea e faaite atura ia Davida i te mau mea atoa ta Ioaba i parau ia ˈna ia faaite. 23 Na ô atura te vea ia Davida: “Mea puai aˈe to matou mau enemi ia matou, e ua haere mai ratou e aro ia matou i rapae i te oire. Ua haere râ ia matou ia faaotohe ia ratou e tae roa ˈtu i te uputa o te oire. 24 Ua teˈa noa mai te feia teˈa ia matou mai nia mai i te aua, e ua pohe vetahi o ta oe mau faehau, e te arii. Ua pohe atoa to tavini o Uria ati Heta.”+ 25 Na ô maira ïa Davida i te vea: “A parau ia Ioaba: ‘Eiaha oe e haapeapea no tei tupu, e pohe iho â te taata i te tamaˈi. Ia uˈana ˈtu â ta oe aroraa i te oire e a haru ia ˈna.’+ E, o oe, a faaitoito atu ia Ioaba.”

26 I to te vahine a Uria faarooraa e ua pohe ta ˈna tane, oto ihora oia. 27 I te hoperaa te tau otoraa, faahaere maira Davida ia ˈna i to ˈna fare. Riro maira oia ei vahine faaipoipo na ˈna+ e fanau maira ta ˈna hoê tamaiti. Aita roa râ Iehova i au i* te ohipa ta Davida i rave.+

12 Tono aˈera ïa Iehova ia Natana+ ia Davida ra. Haere maira oia ia ˈna ra+ e na ô atura: “E piti taata to roto i te hoê oire. E taata taoˈa hoê e e taata veve te tahi. 2 Mea rahi roa te mamoe e te puaatoro a te taata taoˈa,+ 3 area ta te taata veve, hoê noa ïa fanauˈa mamoe ufa, mea hoohia mai e ana.+ Ua aupuru oia ia ˈna e ua paari mai i pihai iho ia ˈna e ta ˈna mau tamaiti. Aita rea maa ta taua taata veve ra, i horoa noa na râ oia maa vahi iti na ˈna. I inu na ta ˈna fanauˈa mamoe i roto i ta ˈna auˈa a taoto atu ai i nia i to ˈna ouma. Ua riro oia mai te hoê tamahine na ˈna. 4 Hoê mahana, haere maira te hoê ratere i ǒ te taata taoˈa. Faaineine ihora oia i te maa na ˈna. Aita oia i hauti hoê o ta ˈna mau mamoe e puaatoro. Ua rave maira râ oia i te fanauˈa mamoe a te taata veve e tunu atura na ta ˈna manihini.”+

5 Riri roa aˈera ïa Davida i taua taata taoˈa ra, e na ô maira oia ia Natana: “Te horeo nei au i te ora o te Atua ra o Iehova,+ mea tano ia pohe tera taata! 6 E ia tataimaha ta ˈna e faahoˈi no te fanauˈa mamoe,+ ua rave hoi oia i teie ohipa ma te aumihi ore.”

7 Parau atura Natana ia Davida: “O oe taua taata ra! Teie ta Iehova te Atua o Iseraela e parau ra: ‘Ua faatavai au ia oe ei arii no Iseraela,+ e ua faaora vau ia oe i te rima o Saula.+ 8 Ua horoa vau na oe i te faufaa a te arii Saula,+ ta ˈna mau vahine faaipoipo,+ e ua horoa ˈtu vau i te mana faatere i nia i to Iseraela e to Iuda.+ E mai te mea ra e aita te reira i navai, ua ineine au i te rave hau atu â no oe.+ 9 Eaha oe i vahavaha ˈi i te parau a Iehova ma te rave i te mea ino i mua i to ˈna aro? Ua haapohe oe ia Uria ati Heta!+ Ua pohe Uria ia oe i te ˈoˈe a te ati Amona+ e ua rave oe i ta ˈna vahine ei vahine na oe.+ 10 I teie nei, mea rahi te roohia i te pohe ino i roto i to utuafare,*+ no te mea ua vahavaha oe ia ˈu ma te rave i te vahine faaipoipo a Uria ati Heta ei vahine faaipoipo na oe.’ 11 Teie ta Iehova e parau ra: ‘Te faatae mai ra vau i nia ia oe i te ati mai roto mai i to oe iho utuafare.+ I mua i to oe iho mata, e rave au i ta oe mau vahine faaipoipo a horoa ˈtu ai na te hoê tane ê,+ e e taoto oia i ta oe mau vahine faaipoipo i mua i te taata atoa.*+ 12 Ua haa oe ma te huna.+ E haa râ vau ma te huna ore, i mua i to Iseraela taatoa.’”*

13 Na ô maira Davida ia Natana: “Ua hara vau ia Iehova.”+ Pahono atura Natana ia Davida: “Te faaore ra Iehova i ta oe hara.+ Eita oe e pohe.+ 14 Tera râ, no te mea aita oe i faatura noa ˈˈe ia Iehova, e pohe ta oe tamaiti no fanau-noa-hia mai nei.”

15 Hoˈi atura Natana i to ˈna fare.

Tairi ihora Iehova i te tamarii ta te vahine a Uria i fanau ia Davida ra, e roohia ihora oia i te maˈi. 16 Taparu ihora Davida i te Atua mau ia faaora i taua tamaiti ra. Haapae atoa ihora oia i te maa. Ia hoˈi oia i to ˈna fare, e tarava oia i nia i te tahua i te mau po atoa.+ 17 Haere maira ïa te mau matahiapo o to ˈna aorai* e hiˈo ia ˈna e tamata aˈera i te faatia mai ia ˈna. Aita râ oia i hinaaro e tia mai e aita i hinaaro e tamaa ia ratou ra. 18 I te hitu o te mahana, pohe atura te tamarii. Ua mǎtaˈu râ ta Davida mau tavini i te faaite ia ˈna e ua pohe te tamarii. Na ô aˈera ratou: “A ora noa ˈi ta ˈna tamarii, ua paraparau tatou ia ˈna e aita oia i faaroo ia tatou. Ia faaite tatou i teie nei e ua pohe te tamarii, e rahi atu â paha to ˈna mauiui.”

19 I to Davida iteraa i ta ˈna mau tavini e paraparau mǎrû ra, taa ˈtura ia Davida e ua pohe te tamarii. Ani maira Davida i ta ˈna mau tavini: “Ua pohe te tamarii?” Pahono aˈera ratou: “Ua pohe.” 20 Tia maira ïa Davida mai raro mai. Horoi ihora oia ia ˈna, parai ihora ia ˈna i te monoˈi+ e taui aˈera i to ˈna ahu. Haere ihora oia i te tiahapa*+ o Iehova e tipapa ihora. I muri iho, hoˈi aˈera oia i to ˈna fare,* ani atura ia afaihia mai te tahi maa na ˈna e tamaa ihora oia. 21 Ui aˈera ta ˈna mau tavini ia ˈna: “Eaha oe i haa ˈi mai tera? A ora noa ˈi te tamarii, ua haapae oe i te maa a taˈi noa ˈtu ai. I te poheraa râ te tamarii, tia maira oe e amu ihora i te maa.” 22 Pahono maira oia: “A ora noa ˈi te tamarii, ua haapae au i te maa+ a taˈi noa ˈtu ai no te mea ua manaˈo vau: ‘Peneiaˈe e aroha Iehova ia ˈu a vaiiho atu ai i te tamarii ia ora?’+ 23 I teie nei e ua pohe oia, eaha vau e haapae ai i te maa? E nehenehe anei ta ˈu e faahoˈi mai ia ˈna?+ O vau te haere ia ˈna ra,+ e ore râ oia e hoˈi mai ia ˈu nei.”+

24 Tamahanahana ˈtura Davida ia Bate-seba+ ta ˈna vahine faaipoipo. Haere atura oia ia ˈna ra e taoto atura ia ˈna. I muri mai, fanau maira oia i te hoê tamaiti, e piihia ˈtura oia Solomona.*+ Ua here Iehova ia Solomona.+ 25 Tono aˈera ïa oia i te peropheta Natana+ no te topa ˈtu i te tamarii i te iˈoa Iedidia,* no te mea ua here Iehova ia ˈna.

26 Aro noa ˈtura Ioaba i te ati Amona+ no Raba+ e haru maira oia i te oire o te arii.*+ 27 Tono aˈera ïa Ioaba i te vea no te faaite ia Davida: “Ua aro vau ia Raba+ e ua haru vau i te oire o te pape.* 28 I teie nei, a haaputuputu i te toea o te nuu, a haere mai e haaati i te oire e a haru ia ˈna. Aita anaˈe, na ˈu e haru i te oire e o vau te haapopouhia no tera ohipa.”*

29 Haaputuputu ihora ïa Davida i te nuu taatoa e haere atura i Raba. Aro e haru ihora oia i te oire. 30 Rave maira oia i te hei i nia i te upoo o Malakama. Hoê taleni* auro te teiaha e ua faaunaunahia i te ofai maitai roa. Tuuhia ˈtura taua hei ra i nia i to Davida upoo. Rave atoa maira oia i te faufaa e rave rahi+ i tera oire.+ 31 Rave maira oia i te taata no tera oire e faaohipa ˈtura ia ratou no te tarai i te ofai, no te ohipa e te mau mauhaa auri oi e te opahi auri, e no te hamani i te ofai araea. Tera ta ˈna i rave i te mau oire atoa o te ati Amona. I muri iho, hoˈi atura Davida e te nuu taatoa i Ierusalema.

13 E tuahine haviti to Abasaloma te tamaiti a Davida, o Tamara+ te iˈoa. Ua here roa Amanona,+ te tahi atu tamaiti a Davida, ia Tamara. 2 Peapea e hepohepo roa ˈtura Amanona, aita hoi to ˈna tuahine o Tamara i taoto aˈenei i te hoê tane e aita Amanona i taa e nafea o ˈna e noaa ˈi ia ˈna. 3 E hoa râ to Amanona o Iehonadaba+ te iˈoa, e tamaiti na Timea,+ to Davida tuaana. E taata maramarama roa o Iehonadaba. 4 Na ô maira ïa oia ia Amanona: “E tamaiti oe na te arii, eaha ïa oe e oto ai i te mau poipoi atoa? Nehenehe oe e faaite mai ia ˈu.” Pahono atura Amanona ia ˈna: “Te hinaaro ra vau ia Tamara, te tuahine+ o to ˈu teina o Abasaloma.” 5 Pahono maira Iehonadaba ia ˈna: “A tarava i nia i to oe roˈi a haavare maˈi noa ˈi. Ia haere mai to oe metua tane e hiˈo ia oe, a parau atu ia ˈna: ‘A tuu mai na i to ˈu tuahine ia Tamara ia afai mai i te tahi maa na ˈu. Ia faaineine oia i te maa horoahia na te feia maˈi* i mua i to ˈu mata. Na ˈna e hopoi mai i te reira ia ˈu nei, e amu ïa vau.’”

6 Tarava ihora ïa Amanona, haavare maˈi atura, e haere maira te arii Davida e hiˈo ia ˈna. Parau atura Amanona i te arii: “A tuu mai na i to ˈu tuahine ia Tamara ia haere mai e tunu e piti faraoa momona,* e na ˈna e hopoi mai i te reira ia ˈu nei ia amu vau.” 7 Tono aˈera ïa Davida i te tahi taata e parau ia Tamara i te fare: “A haere na i te fare o Amanona to tuaana e a faaineine i te maa* na ˈna.” 8 Haere atura ïa Tamara i te fare o Amanona. Te tarava ra oia i reira. Rave maira Tamara i te faraoa ota, hamani ihora i te faraoa momona i mua i to ˈna mata e tunu ihora i na faraoa momona. 9 Tatara maira Tamara i na faraoa momona e afai ihora i te reira ia Amanona ra. Aita râ oia i hinaaro e amu. Na ô aˈera Amanona: “Haere pauroa outou i rapae!” Haere pauroa aˈera ïa ratou i rapae.

10 Parau atura ïa Amanona ia Tamara: “A afai mai i te maa* i roto i te piha taotoraa, e na oe e horoa roa mai i te reira.” Rave ihora ïa Tamara i na faraoa momona ta ˈna i hamani e afai atura i te reira ia Amanona ra i roto i to ˈna piha taotoraa. 11 I to ˈna afairaa ˈtu i te reira ia ˈna ra, haru maira Amanona ia ˈna e parau atura: “Haere mai e taoto ia ˈu, to ˈu tuahine.” 12 Na ô maira râ Tamara ia ˈna: “Eiaha to ˈu tuaana! Eiaha oe e faahaama ia ˈu, aita hoi teie ohipa e ravehia nei i Iseraela.+ Eiaha e rave i teie ohipa haama.+ 13 E nafea vau e faaruru ai i tera huru haama? E hiˈo-atoa-hia oe mai hoê o te mau taata e au ia vahavahahia i Iseraela nei. A paraparau na i te arii, mea papu hoi e farii oia ia horoa ia ˈu na oe.” 14 Aita râ Amanona i hinaaro e faaroo atu ia Tamara, haavî ihora oia ia ˈna e faahaama ˈtura ia ˈna ma te mafera ia ˈna. 15 Hae roa aˈera Amanona ia ˈna, e rahi roa aˈera to ˈna hae ia ˈna i te here ta ˈna i faatupu no ˈna. Parau atura Amanona ia ˈna: “A tia, a haere!” 16 Na ô maira ïa oia ia ˈna: “Eiaha, to ˈu tuaana, mea ino atu â hoi ia tiahi oe ia ˈu i teie nei i te ohipa ta oe i rave i nia ia ˈu!” Aita râ Amanona i hinaaro e faaroo ia ˈna.

17 Tuô aˈera Amanona i ta ˈna tavini apî e parau atura: “A afai i teie vahine i rapae, e a ponao i te opani i muri ia ˈna.” 18 (E ahu nehenehe* ta Tamara i oomo, tera te ahu o ta te mau tamahine a te arii aita i faaipoipohia* e oomo.) Aratai atura ïa ta ˈna tavini ia ˈna i rapaeau e ponao ihora i te opani i muri ia ˈna. 19 Tuu ihora Tamara i te rehu auahi i nia i to ˈna upoo+ e hahae ihora i te ahu nehenehe ta ˈna i oomo. Haere atura oia e to ˈna rima i nia i to ˈna upoo a auê noa ˈi.

20 Ui maira to ˈna taeae o Abasaloma+ ia ˈna: “Na to oe tuaana o Amanona i rave i tera ohipa i nia ia oe? Eiaha e faaite i te reira to ˈu tuahine. E tuaana o ˈna no oe.+ Eiaha e feruri faahou i tera ohipa.” Ora moˈemoˈe noa ˈtura Tamara i te fare o to ˈna taeae o Abasaloma. 21 I to te arii Davida faarooraa i tei tupu, riri roa ihora oia.+ Aita râ oia i hinaaro e rave i te tahi mea e mauiui ai o Amanona ta ˈna tamaiti, mea here hoi na Davida ia ˈna, o ˈna hoi ta ˈna matahiapo. 22 Aita Abasaloma i paraparau faahou ia Amanona, ua hae roa+ hoi Abasaloma ia Amanona i to ˈna faahaamaraa i to ˈna tuahine ia Tamara.+

23 E piti matahiti i muri iho, i te taime a paotihia ˈi te huruhuru o te mau mamoe a Abasaloma i Baala-hazora, i pihai iho ia Epheraima,+ titau manihini atura Abasaloma i te mau tamaiti atoa a te arii.+ 24 Haere maira ïa Abasaloma i mua i te arii e na ô atura: “Te paotihia ra te huruhuru o ta ˈu mau mamoe. E te arii e, a haere mai na muri ia ˈu, o oe e ta oe mau tia mana.” 25 Na ô maira râ te arii ia ˈna: “Eiaha, ta ˈu tamaiti. Ia haere matou paatoa, e riro matou ei hopoia na oe.” Mârô noa ˈtura Abasaloma, aita râ te arii i farii e haere. Ua haamaitai noa mai oia ia Abasaloma. 26 Parau atura Abasaloma ia ˈna: “Mai te peu eita oe e haere mai, a vaiiho mai na ïa i to ˈu tuaana ia Amanona ia haere na muri ia matou.”+ Pahono maira te arii ia ˈna: “Eaha oia e haere ai na muri ia oe?” 27 Mârô atura Abasaloma. Faahaere atura ïa te arii ia Amanona e ta ˈna mau tamaiti atoa na muri ia Abasaloma.

28 Faaue aˈera Abasaloma i ta ˈna mau tavini: “E hiˈo maitai outou. Ia taero Amanona, e parau vau ia outou: ‘A tairi ia ˈna!’ I reira, e haapohe outou ia ˈna. Eiaha e mǎtaˈu. Na ˈu e faaue ra ia outou. Ia puai e ia itoito outou.” 29 Na reira ihora ïa taua mau tavini ra ia Amanona, mai ta Abasaloma iho â i faaue. I reira, tia aˈera te mau tamaiti atoa a te arii, pauma ˈtura i nia i ta ratou mau pheradi e reva ˈtura. 30 Tei nia â ratou i te purumu, tae maira te parau ia Davida ra: “Ua taparahi Abasaloma pauroa te tamaiti a te arii, e aita hoê noa ˈˈe i ora mai.” 31 Tia aˈera ïa te arii, hahae ihora i to ˈna ahu e tarava ihora i raro. Tia noa ˈtura ta ˈna mau tavini atoa i pihai iho ia ˈna e to ratou ahu mahae.

32 Tera râ, parau atura Iehonadaba+ te tamaiti a Timea,+ to Davida tuaana: “To ˈu arii e, e ere te taatoaraa o ta oe mau tamaiti tei haapohehia. O Amanona noa tei pohe.+ Na Abasaloma i faaue ia haapohehia oia, tera ta ˈna i opua+ i te mahana i faahaama ˈi Amanona i to ˈna tuahine+ ia Tamara.+ 33 To ˈu fatu te arii, eiaha oe e tiaturi i tei faatiahia ˈtu ia oe. E ere te taatoaraa o ta oe mau tamaiti tei haapohehia. O Amanona noa tei pohe.”

34 I tera taime, ua horo Abasaloma.+ I muri aˈe, hiˈo haere aˈera te tiai o te oire e ite aˈera e rave rahi taata te haere mai ra na te purumu i te pae mouˈa. 35 Na ô atura ïa Iehonadaba+ i te arii: “E te arii e, ua hoˈi mai ta oe mau tamaiti, mai ta ˈu iho â i parau.” 36 I te otiraa ta ˈna parau, tomo maira te mau tamaiti a te arii a auê noa ˈi. Taˈi atoa aˈera te arii e ta ˈna mau tavini atoa. 37 Area o Abasaloma, ua horo ïa i ǒ Talamai+ te tamaiti a Amihuda te arii o Gesura. Oto aˈera Davida i ta ˈna tamaiti e rave rahi mahana. 38 Ua horo Abasaloma i Gesura+ e ua faaea oia i reira e toru matahiti.

39 I muri iho, hinaaro roa aˈera te arii Davida e haere e farerei ia Abasaloma, ua mǎrû mai hoi oia* i te poheraa o Amanona.

14 Ite aˈera Ioaba te tamaiti a Zeruia+ e te mihi ra te arii ia Abasaloma.+ 2 Titau maira ïa Ioaba i te hoê vahine maramarama no Tekoa,+ e parau atura ia ˈna: “A haa na mai te huru ra e te oto ra oe. A oomo i te ahu oto e eiaha e parai ia oe i te monoˈi,+ ia manaˈo te taata e mea maoro oe i te otoraa. 3 I muri iho, e haere oe i te arii ra e e na ô oe i te parau ia ˈna.” Faaite atura Ioaba i te vahine eaha ta ˈna e parau atu.

4 Haere atura te vahine no Tekoa i te arii ra e tipapa ihora. Na ô atura oia: “A tauturu mai ia ˈu, e te arii e!” 5 Pahono maira te arii ia ˈna: “Eaha teie?” Parau atura oia: “E vahine ivi au. Ua pohe ta ˈu tane faaipoipo. 6 E piti tamaiti ta ˈu, to tavini. Ua taputô raua i rapae i te oire. Aita e taata no te faataa ê ia raua. Taparahi ihora hoê i te tahi atu e haapohe ihora ia ˈna. 7 I teie nei, te mârô mai ra to ˈu fetii taatoa ia ˈu e te parau mai ra: ‘A tuu mai i taua taata ra o tei taparahi i to ˈna taeae, ia haapohe matou ia ˈna no te tahoo i to ˈna taeae.+ Ua oti iho â ïa aita anaˈe e mono no te fatu i te faufaa!’ Ia haapohe râ ratou ia ˈna, e tupohe ratou i te arahu hopea ta ˈu e toe ra.* Aita ˈtu ïa ta ta ˈu tane faaipoipo e iˈoa e e huaai i te fenua nei.”

8 Na ô maira te arii i te vahine: “A hoˈi i ǒ oe, e na ˈu e haapao i tera ohipa.” 9 Parau atura te vahine no Tekoa i te arii: “To ˈu fatu te arii, na ˈu e te utuafare o to ˈu metua tane e amo i te utua a ta ˈu tamaiti. Eita ïa oe e to utuafare huiarii e harahia.” 10 Na ô maira te arii: “Ia paraparau faahou mai te tahi taata ia oe no teie ohipa, a aratai ia ˈna ia ˈu nei, eita ïa oia e haapeapea faahou ia oe.” 11 Parau atura râ oia: “E te arii e, a pure* ia Iehova to Atua ia ore te taata tahoo i te toto+ ia rave i te hoê ohipa ino mau a haapohe atu ai i ta ˈu tamaiti.” Na ô maira ïa oia: “Te horeo nei au i te ora o te Atua ra o Iehova,+ aita e taata e hauti hoê noa ˈˈe rouru o ta oe tamaiti.”* 12 Parau atura te vahine: “To ˈu fatu te arii, a farii na ia parau atu vau hoê parau iti.” Na ô maira ïa oia: “A parau mai!”

13 Na ô atura te vahine: “Eaha ïa oe i manaˈo ai e rave i te tahi ohipa mai teie i te nunaa o te Atua?+ Te faahapa ra oe ia oe iho i te mau parau ta oe e parau ra no te mea ua tiavaru oe i ta oe tamaiti e aita oe i faahoˈi mai ia ˈna.+ 14 Mea papu e pohe tatou paatoa a riro atu ai mai te pape o te maniihia i raro, o te ore e nehenehe e rave faahou mai. Eita râ te Atua e rave i te hoê ora,* e te imi nei oia i te ravea ia ore tei tiavaruhia ia vai tiavaru noa. 15 To ˈu fatu te arii, ua haere mai au e paraparau ia oe no te mea ua haamǎtaˈu mai te tahi mau taata ia ˈu. Manaˈo atura vau: ‘E haere au e paraparau i te arii. Peneiaˈe e haapao mai oia i ta ˈu aniraa. 16 E faaroo paha te arii a faaora ˈtu ai ia ˈu i te rima o te taata o te imi ra i te faaore ia ˈu e i ta ˈu tamaiti otahi i te tuhaa horoahia mai e te Atua.’+ 17 Manaˈo atoa ˈtura vau: ‘E tamǎrû mau â te parau a to ˈu fatu te arii ia ˈu.’ Ua riro hoi oe, to ˈu fatu te arii, mai te hoê melahi a te Atua mau, o te ite i te faataa i te mea maitai i te mea ino. Ei pihai iho Iehova to Atua ia oe.”

18 Pahono maira râ te arii i te vahine: “Eiaha oe e huna ia ˈu hoê noa ˈˈe mea ta ˈu e ui ia oe.” Parau atura te vahine: “To ˈu fatu te arii, te faaroo atu ra vau ia oe.” 19 Ui maira te arii: “Na Ioaba anei i turai ia oe ia faatia mai i teie mau mea?”+ Pahono atura te vahine: “Mai ia oe e ora nei, to ˈu fatu te arii, ua taa ia oe teie ohipa. Na to tavini o Ioaba i faaue ia ˈu ia haere mai e na ˈna i faaite mai eaha te parau ia oe. 20 Ua rave to tavini o Ioaba i teie ohipa ia taui ta oe huru hiˈoraa i teie tupuraa. E paari râ to to ˈu fatu mai to te melahi a te Atua mau e ua ite oia i te mau mea atoa e tupu nei na te fenua taatoa.”

21 I muri iho, na ô maira te arii ia Ioaba: “Ua tano oe, e rave au i ta oe i parau.+ A haere e tii mai ia Abasaloma e a faahoˈi mai ia ˈna.”+ 22 Piˈo ihora Ioaba, tipapa ihora e arue aˈera i te arii. Na ô atura Ioaba: “I teie mahana, ua taa ia ˈu e ua fariihia vau e oe, to ˈu fatu te arii, ua haapao hoi oe i ta ˈu aniraa.” 23 Tia aˈera Ioaba, haere ihora i Gesura+ e faahoˈi maira ia Abasaloma i Ierusalema. 24 Tera râ, parau aˈera te arii: “Ia hoˈi o ˈna i to ˈna fare. Eiaha o ˈna e haere mai i mua ia ˈu.” Hoˈi aˈera ïa Abasaloma i to ˈna fare e aita oia i ite i te arii.

25 Tera râ, i Iseraela, aita e tane nehenehe aˈe e te faatura-roa-aˈe-hia ia Abasaloma. Mai to ˈna tapuae avae e tae roa i te tupuai o to ˈna upoo, aita i itehia i te tahi ino i nia ia ˈna. 26 I te mau matahiti atoa, e titauhia ia hahu oia i to ˈna upoo no te teiaha o to ˈna rouru. E 200 sekela* te teiaha o to ˈna rouru ia au i te faito o te ofai a te arii.* 27 E toru tamaiti+ ta Abasaloma, e hoê tamahine, o Tamara te iˈoa. E vahine haviti mau oia.

28 Parahi noa ˈtura Abasaloma i Ierusalema e piti matahiti, aita râ oia i ite i te arii.+ 29 I te hoê mahana, titau maira Abasaloma ia Ioaba i ǒ ˈna. Ua hinaaro oia ia paraparau Ioaba no ˈna i te arii. Aita râ Ioaba i haere i ǒ ˈna. Titau faahou maira oia ia ˈna i te piti o te taime e patoi faahou atura oia i te haere mai. 30 I te pae hopea, parau maira Abasaloma i ta ˈna mau tavini: “E tâpû fenua to Ioaba i pihai iho i to ˈu, e e maa kerite ta ˈna i reira. A haere e a tutui.” Tutui ihora ïa te mau tavini a Abasaloma i to ˈna tâpû fenua. 31 Haere atura ïa Ioaba i ǒ Abasaloma e na ô atura ia ˈna: “Eaha ta oe mau tavini i tutui ai i to ˈu tâpû fenua?” 32 Pahono atura Abasaloma ia Ioaba: “Inaha, ua titau mai au ia oe. Ua hinaaro vau e tono ia oe i te arii ra no te ani: ‘Eaha oe i faahoˈi mai ai ia ˈu mai Gesura mai?+ Mea maitai aˈe ahani au i faaea noa ˈtu i ǒ. I teie nei, a farii ia haere mai au e hiˈo ia oe, e mai te peu e hara ta ˈu i rave, e haapohe ïa oe ia ˈu.’”

33 Haere maira ïa Ioaba i te arii ra e faaite maira i te poroi a Abasaloma. Titau atura ïa te arii ia Abasaloma. Haere maira Abasaloma i te arii ra, piˈo ihora oia e tipapa ihora i mua ia ˈna. Apa ˈtura ïa te arii ia Abasaloma.+

15 I muri aˈe i teie mau mea atoa, faaau ihora Abasaloma i te hoê pereoo no ˈna e rave maira i te puaahorofenua e e 50 taata no te horo na mua ia ˈna.+ 2 E tia poipoi Abasaloma a faaea noa ˈtu ai i te hiti o te purumu e aratai ra i te uputa o te oire.+ E ohipa anaˈe ta te hoê taata e titauhia ia afaihia i mua i te arii no te haava,+ e pii Abasaloma ia ˈna a parau atu ai: “No teihea oire oe?” E faaite mai ïa tera taata no teihea opu o Iseraela o ˈna. 3 E na ô Abasaloma ia ˈna: “Ua tano oe, aita râ te arii i faanaho i te taata no te faaroo ia oe.” 4 E na ô Abasaloma: “Ahani au i faatoroahia ei haava i teie fenua! E haere mai ïa te feia e ohipa ta ratou e titauhia ia haavahia ia ˈu nei, e na ˈu e haapao ia haavahia te reira ma te parau-tia.”

5 E ia faafatata mai te hoê taata a tipapa ˈtu ai i mua ia ˈna, e faatoro Abasaloma i to ˈna rima no te tapea ia ˈna a apa ˈtu ai ia ˈna.+ 6 E na reira Abasaloma i nia i te ati Iseraela taatoa o te haere mai i te arii ra no te titau i te hoê haavaraa. Mea na reira Abasaloma i te eiâraa i te aau o te mau taata o Iseraela.+

7 I muri aˈe e maha matahiti,* na ô atura Abasaloma i te arii: “A vaiiho na ia ˈu ia haere i Heberona+ no te rave i ta ˈu i euhe ia Iehova. 8 Inaha, a ora ˈi au i Gesura+ i Suria, ua euhe+ au: ‘Ia farii Iehova ia hoˈi au i Ierusalema, e pûpû vau i te hoê tusia* ia Iehova.’” 9 Parau maira ïa te arii ia ˈna: “A haere ma te hau.” Tia aˈera ïa oia e haere aˈera i Heberona.

10 Tono aˈera râ Abasaloma i te mata huna e ati noa ˈˈe te mau opu atoa o Iseraela ma te parau: “Ia faaroo outou i te oto o te pu, a parau: ‘Ua riro Abasaloma ei arii i Heberona!’”+ 11 E 200 taata no Ierusalema tei na muri atu ia Abasaloma. Ua titau Abasaloma ia ratou e ua haere ratou ma te taa ore, ma te ore e ite eaha te ohipa e tupu ra. 12 E a pûpû ai Abasaloma i ta ˈna mau tusia, faaue aˈera oia ia haere i Gilo+ e tii mai i to Davida taata aˈo+ o Ahitophela+ no Gilo. Te rahi noa ˈtu ra taua opuaraa ino ra, e te rahi noa ˈtu ra te taata e turu ra ia Abasaloma.+

13 I muri aˈe, haere maira te hoê vea ia Davida ra e na ô maira: “Te fariu ra to Iseraela i te pae o Abasaloma.” 14 Na ô atura ïa Davida i ta ˈna mau tia mana atoa i pihai iho ia ˈna i Ierusalema: “Mai e horo anaˈe,+ eita tatou e ora ia Abasaloma! E haaviti anaˈe, aˈunei oia e tapapa ˈi ia tatou a faatae mai ai i te ati i nia ia tatou, a tairi atu ai i te oire i te ˈoˈe!”+ 15 Pahono maira ta te arii mau tia mana: “To matou fatu te arii, e rave matou i te mau mea atoa ta oe e parau mai.”+ 16 Haere ihora ïa te arii e to ˈna utuafare taatoa. Ua vaiiho mai râ oia hoê ahuru vahine faaipoipo tavini+ no te haapao i te aorai. 17 Haere noa ˈtura te arii e te feia o tei apee ia ˈna e tapea aˈera ratou i Bete-hameraka.

18 Te hiˈopoa ra Davida i ta ˈna mau tavini tei reva na muri ia ˈna, oia atoa te mau Kereti, te mau Peleti+ e na 600 taata no Gata+ o tei pee ia Itai mai Gata+ mai. 19 Na ô atura te arii ia Itai+ no Gata: “Eaha oe e haere atoa mai ai na muri ia matou? A hoˈi e a faaea i pihai iho i te arii apî, e taata ê hoi oe e ua horo ê atoa mai oe i to oe ra fenua. 20 Aita i maoro to oe taeraa mai. Eita ta ˈu e nehenehe e titau ia oe ia pee mai ia ˈu, aita hoi au i ite ihea vau e haere ai. A hoˈi e a rave i to oe mau taata na muri ia oe, e ia faaite Iehova i te here taiva ore e te haapao maitai+ ia oe!” 21 Pahono maira râ Itai i te arii: “Te horeo nei au i te ora o te Atua ra o Iehova e ia oe, to ˈu fatu te arii, e pee au ia oe i te mau vahi atoa e haere ai oe, no te pohe anei aore ra no te ora.”+ 22 Na ô atura ïa Davida ia Itai:+ “Na reira ïa, a haere i te tahi atu pae.” Haere ihora Itai no Gata i te tahi atu pae, e to ˈna mau taata atoa e to ratou mau utuafare.

23 Te auê noa ra to te tuhaa fenua o Ierusalema a haere noa ˈi te mau taata o Davida na te peho o Kiderona+ i te purumu e aratai ra i te medebara. Area te arii, te tia noa ra ïa i pihai iho i te peho. 24 To reira atoa Zadoka+ e te ati Levi+ e amo ra i te afata+ o te faufaa a te Atua mau.+ Tuu ihora ratou i te Afata a te Atua mau i raro e, i te tapaeraa to Davida mau taata i te tahi atu pae o te peho, tae atoa maira Abiatara.+ 25 Na ô maira râ te arii ia Zadoka: “A faahoˈi i te Afata a te Atua mau i te oire.+ Ia fariihia mai au e Iehova, e faahoˈi atoa oia ia ˈu i ǒ a vaiiho atu ai ia ˈu ia ite faahou i te Afata e to ˈna tiahapa.+ 26 Ia ore râ te Atua e mauruuru ia ˈu, ia rave oia i ta ˈna e manaˈo e mea maitai i nia ia ˈu.” 27 Na ô faahou maira te arii ia Zadoka te tahuˈa: “E ere anei oe i te taata tatara orama?+ A hoˈi orua Abiatara i te oire ma te hau, e a rave i ta orua na tamaiti e piti na muri ia orua: ta oe tamaiti o Ahimaaza e o Ionatana+ te tamaiti a Abiatara. 28 E faaea vau na te mau vahi papaˈu o Ioridana i te medebara e faatae roa mai orua i te tahi poroi ia ˈu nei.”+ 29 Faahoˈi atura ïa Zadoka raua Abiatara i te Afata a te Atua mau i Ierusalema, e faaea aˈera raua i reira.

30 Te taˈi noa ra Davida a pauma ˈi i nia i te mouˈa Oliveta.+ Ua tapoˈi oia i to ˈna upoo e te haere noa ra aita e tiaa. Tapoˈi atoa ˈtura te feia tei na muri ia ˈna i to ratou upoo e taˈi noa ˈtura a pauma ˈi. 31 Faaitehia ˈtura ia Davida: “Tei roto Ahitophela i te feia o tei amui ia Abasaloma+ no te orureraa hau.”+ Na ô ihora ïa Davida: “E Iehova,+ a faariro na i te aˈoraa a Ahitophela mai te aˈoraa a te hoê maamaa.”+

32 I to Davida taeraa i nia i te tupuai mouˈa i reira te taata i matau na i te tipapa i mua i te Atua, te tiai noa ra Husai+ ati Areki+ ia ˈna, ma te ahu mahae e te repo i nia i te upoo. 33 Na ô atura Davida ia ˈna: “Ia haere oe na muri ia ˈu, e riro oe ei hopoia na ˈu. 34 Ia hoˈi râ oe i te oire a parau atu ai ia Abasaloma: ‘E tavini au ia oe, e te arii. I tavini na vau i to metua tane. I teie nei râ e tavini au ia oe,’+ e haere ïa ia oe ia faahape i te aˈoraa a Ahitophela no ˈu.+ 35 Ei pihai iho atoa na tahuˈa ra o Zadoka raua Abiatara ia oe. E faaite oe ia raua i te mau mea ta oe e faaroo i te fare o te arii.+ 36 Inaha, tei ǒ atoa ta raua na tamaiti e piti ia raua ra, o Ahimaaza+ ta Zadoka tamaiti, e o Ionatana+ ta Abiatara tamaiti. A tono mai ia raua no te faaite mai i te mau mea atoa ta oe e faaroo.” 37 Haere ihora ïa to Davida hoa ra*+ o Husai i Ierusalema e tomo atoa maira Abasaloma i reira.

16 Tei muri rii te tupuai mouˈa+ ia Davida i teie nei. Haere maira Ziba+ te tavini a Mephiboseta+ e farerei ia ˈna. Ua afai mai o ˈna e piti asini, 200 faraoa to nia ia raua, 100 faraoa vine mǎrô pâpâhia, 100 faraoa maa hotu o te tau auhune,* e te hoê farii uaina rahi.+ 2 Parau atura te arii ia Ziba: “Eaha oe i afai mai ai i teie mau mea?” Pahono maira Ziba: “E te arii e, ua afai mai au i na asini ia pauma to utuafare na nia iho. Te faraoa e te mau hotu o te tau auhune, na te mau tane apî ïa. E te uaina, na te feia ïa e rohirohi i te medebara.”+ 3 Ui atura Davida: “Teihea roa Mephiboseta, te tamaiti* a to fatu?”+ Pahono maira Ziba: “Tei Ierusalema o ˈna, ua parau hoi o ˈna: ‘I teie mahana, e faahoˈi mai te nunaa o Iseraela i te faatereraa arii a to ˈu metua tane ia ˈu nei.’”+ 4 Na ô atura Davida ia Ziba: “Na reira, pauroa te faufaa a Mephiboseta, na oe ïa.”+ Pahono maira Ziba: “To ˈu fatu te arii, te tipapa nei au i mua ia oe. Mauruuru no te maitai ta oe e faaite mai ra ia ˈu.”+

5 I te tapaeraa te arii Davida i Bahurima, tapiri maira hoê tane no te opu fetii o Saula ia ˈna e tutuô maira i te parau faaino.+ O Simei+ to ˈna iˈoa, e tamaiti o ˈna na Gera. 6 Te taora ra oia i te ofai i nia ia Davida, ta ˈna mau tia mana, i nia atoa i te toea o ta ˈna mau faehau e te mau aito puai i to ˈna atau e to ˈna aui. 7 Faaino noa maira Simei i te arii a parau ai: “A haere, a haere, oe taata taparahi taata! Oe taata haapaoraa ore! 8 Ua faautua Iehova ia oe no te mea ua taparahi oe i te mau fetii o Saula e ua rave mai oe i ta ˈna faatereraa arii. No reira Iehova i horoa ˈi i te faatereraa arii i ta oe tamaiti ia Abasaloma. I teie nei, e ati to nia ia oe no te mea e taparahi taata oe!”+

9 Na ô maira Abisai te tamaiti a Zeruia+ i te arii: “Eaha teie urî pohe+ e faaino ai i to ˈu fatu te arii?+ A tuu na ia ˈu ia haere au e tâpû i to ˈna upoo.”+ 10 Parau atura râ te arii: “Eaha ta ˈu ia outou, e te mau tamaiti a Zeruia?+ A vaiiho ia ˈna ia faaino ia ˈu.+ Mai te peu na Iehova i faaue ia ˈna+ ia faaino ia ˈu, o vai te nehenehe e faahapa ia ˈna?” 11 Na ô atura Davida ia Abisai e i te tahi atu mau tia mana atoa ta ˈna: “Te imi nei ta ˈu tamaiti, ta ˈu iho tamaiti, i te haapohe ia ˈu,+ eaha ˈtu â ïa teie tane ati Beniamina!+ A vaiiho ia ˈna. Mai te peu na Iehova i faaue ia ˈna, a vaiiho atu ïa ia faaino o ˈna ia ˈu! 12 Peneiaˈe e ite mai Iehova i to ˈu ati.+ I teie mahana, te tutuôhia mai ra i te parau faaino ia ˈu. Tera râ, peneiaˈe e haamaitai Iehova ia ˈu i muri iho.”+ 13 Haere noa ˈtura Davida e to ˈna mau taata. Te haere atoa ra Simei na nia i te mouˈa, hoê â haereraa e o ratou. Te faaino+ noa ra oia ia Davida a hue atoa ˈi i te ofai e te repo i nia ia ˈna.

14 I muri iho, tae maira te arii e te feia o tei na muri ia ˈna i te vahi ta ratou i opua i te haere, ua rohirohi roa. Faafaaea ihora ïa ratou.

15 I tera taime, ua tapae Abasaloma e to Iseraela tei turu ia ˈna, i Ierusalema. Ua na muri atoa mai o Ahitophela+ ia ˈna. 16 I to Husai+ ati Areki,+ to Davida hoa,* haereraa mai ia Abasaloma ra, na ô maira Husai ia Abasaloma: “Ia ora te arii!+ Ia ora te arii!” 17 Ui atura Abasaloma: “Tera to oe here taiva ore i to oe hoa? Eaha oe i ore ai i haere na muri i to oe hoa?” 18 Pahono maira ïa Husai: “Eiaha, e tia vau i te pae o te taata maitihia e Iehova, teie pǔpǔ, e pauroa te toea o te mau taata no Iseraela. E faaea vau i pihai iho ia ˈna. 19 E ere atoa anei oe i te tamaiti a to ˈu hoa? E ere anei ïa o oe ta ˈu e tavini? Mai ia ˈu i tavini i to oe metua tane, e tavini atoa vau ia oe.”+

20 Ui atura Abasaloma ia Ahitophela: “A parau mai,+ eaha ta tatou e rave?” 21 Pahono maira ïa Ahitophela: “A taoto i te mau vahine faaipoipo tavini a to metua tane,+ ta ˈna i vaiiho mai no te haapao i te aorai.*+ Ia faaroo to Iseraela taatoa e ua riro oe ei faufauraa na to oe metua tane, e itoitohia ïa te feia e turu ra ia oe.” 22 Patia ihora ïa ratou i te fare ie na Abasaloma i nia i te tafare,+ e taoto ihora Abasaloma i te mau vahine faaipoipo tavini a to ˈna metua tane+ i mua i te mata o Iseraela taatoa.+

23 I taua mau mahana ra, i peehia na ta Ahitophela+ mau aˈoraa mai te mea ra e no ǒ mai i te Atua mau ra taua mau aˈoraa ra. Mai tera pauroa te aˈoraa a Ahitophela no Davida e no Abasaloma.

17 Na ô maira Ahitophela ia Abasaloma: “A vaiiho mai na ia rave au 12 000 taata na muri ia ˈu a haere atu ai e aˈuaˈu ia Davida i teie po. 2 E haere au ia ˈna ra ia rohirohi e ia paruparu oia,*+ e e faarapu vau i to ˈna puhapa. E horo to ˈna mau taata e o te arii anaˈe ta ˈu e haapohe.+ 3 I muri iho, e faahoˈi mai au i to ˈna mau taata atoa ia oe ra. Mai te peu ua pohe te taata ta oe e imi ra, e hoˈi mai ïa to ˈna mau taata atoa ia oe ra e e tupu te hau.” 4 Ua tano teie manaˈo ia Abasaloma e i te mau matahiapo atoa o Iseraela.

5 Parau atura râ Abasaloma: “E titau atoa anaˈe ia Husai+ ati Areki, e e ui anaˈe i to ˈna manaˈo.” 6 Haere maira ïa Husai ia Abasaloma ra. Na ô atura Abasaloma ia ˈna: “Tera te aˈoraa ta Ahitophela i horoa. Mea maitai anei ia pee tatou i ta ˈna aˈoraa? Aita anaˈe, a parau mai eaha te rave.” 7 Parau maira ïa Husai ia Abasaloma: “Eita e tano te aˈoraa a Ahitophela i teie haereraa.”+

8 Parau faahou maira Husai: “Ua ite maitai oe e mea puai to oe metua tane e to ˈna mau taata,+ e te mauiui ra ratou mai te hoê daba ufa ua moˈe ta ˈna mau fanauˈa.+ Hau atu â, e taata tamaˈi to oe metua tane,+ e eita oia e faaea i to ˈna mau taata ra i te po. 9 I teie taime, te tapuni ra oia i roto i te hoê ana* aore ra i te tahi atu vahi,+ e mai te peu o ˈna na mua te aro mai, e parau te feia i faaroo i te reira: ‘Ua pau te mau taata o Abasaloma!’ 10 I reira, e mǎtaˈu roa te taata itoito e aau to ˈna mai to te liona ra,+ ua ite hoi to Iseraela taatoa e taata puai+ to oe metua tane e mea itoito te mau tane tei na muri ia ˈna. 11 Teie ta ˈu e parau ia oe: A haaputuputu i te ati Iseraela ia oe ra, mai Dana e tae atu i Beere-seba.+ Ia rahi ratou mai te one tahatai i te pae miti ra,+ e na oe e aratai ia ratou i te aroraa. 12 E aro tatou ia Davida i te mau vahi atoa i reira oia. E topa tatou i nia ia ˈna mai te hupe e topa ra i raro i te repo. Eita hoê o ratou e ora mai, o ˈna anei aore ra te tahi o to ˈna mau taata. 13 Ia tapuni oia i roto i te hoê oire, e hopoi to Iseraela taatoa i te taura i reira e e huti tatou i te aua o taua oire ra i roto i te peho. Eita hoê noa ˈˈe ofai iti e toe mai.”

14 Parau aˈera ïa Abasaloma e to Iseraela o tei na muri ia ˈna: “Mea maitai aˈe te aˈoraa a Husai ati Areki+ i te aˈoraa a Ahitophela!” Ua faaoti* hoi Iehova e tapea i te aˈoraa a Ahitophela eiaha ia peehia,+ noa ˈtu mea maitai. Ua hinaaro Iehova e faatae mai i te ati i nia ia Abasaloma.+

15 I muri aˈe, faaite atura Husai i na tahuˈa ra o Zadoka raua Abiatara+ eaha ta Ahitophela i parau ia Abasaloma e te mau matahiapo o Iseraela. Faaite atoa ˈtura Husai eaha ta ˈna iho i parau. 16 Na ô atura oia: “I teie nei, a faaara oioi ia Davida e a parau atu: ‘Eiaha e faaea i te mau vahi papaˈu* o Ioridana i teie po. A haere râ i te tahi atu pae o te anavai, aita anaˈe, e haamouhia* oe e to oe mau taata.’”+

17 Te tiai ra Ionatana+ raua Ahimaaza+ i Ene-rogela+ ia ore raua ia itehia te tomo ra i roto i te oire. Haere maira ïa te hoê tavini vahine e faaite i te parau apî ia raua, e haere aˈera raua e faaara i te arii Davida. 18 Ite maira râ te hoê tane apî ia raua e faaite atura ia Abasaloma. Reva oioi aˈera ïa raua e haere maira i te fare o te hoê taata i Bahurima+ e apoo pape ta ˈna i roto i to ˈna aua. Tapuni atura raua i roto, 19 e hohora ihora te vahine faaipoipo a teie taata i te hoê ahu tapoˈi i nia i te auvaha o te apoo pape e tapoˈi atura i te reira i te huero maa tupaipaihia. Aita e taata i ite i te reira. 20 Tae maira te mau tavini a Abasaloma e ani atura i te vahine: “Teihea Ahimaaza raua Ionatana?” Pahono maira te vahine: “Ua na ǒ nei mai raua e haere atura i te anavai.”+ Imi atura teie mau taata ia raua, aita râ raua i itehia mai. Hoˈi atura ïa ratou i Ierusalema.

21 I te hoˈiraa teie mau taata, haere maira Ionatana raua Ahimaaza i rapae i te apoo pape e reva aˈera e faaara i te arii Davida. Parau maira raua ia ˈna: “A tia e a haere oioi i te tahi atu pae o te anavai!” Faaite maira raua eaha ta Ahitophela i opua i te rave i nia ia ratou.+ 22 Tia oioi aˈera Davida e to ˈna mau taata e haere aˈera i te tahi atu pae o Ioridana. I te aahiata, ua tapae pauroa ratou i te tahi atu pae o Ioridana.

23 I to Ahitophela iteraa e aita ta ˈna aˈoraa i peehia, rave atura oia i te hoê asini e hoˈi atura i ǒ ˈna i to ˈna oire.+ Horoa ˈtura oia i te tahi mau faaueraa i to ˈna utuafare+ e tarî ihora ia ˈna+ i muri iho. Pohe atura ïa oia e hunahia ˈtura i te menema o to ˈna mau tupuna.

24 I tera atoa taime, tae atura Davida i Mahanaima.+ Area o Abasaloma, ua haere ïa i te tahi atu pae o Ioridana e te mau faehau o Iseraela. 25 Tuu atura Abasaloma i te nuu i raro aˈe i te aratairaa a Amasa+ ei mono ia Ioaba.+ E tamaiti o Amasa na Abigaila+ raua te hoê taata piihia Itera ati Iseraela. E tamahine Abigaila na Nahasa e e tuahine no Zeruia, te metua vahine o Ioaba. 26 Puhapa ihora Abasaloma e te mau faehau o Iseraela i te tuhaa fenua o Gileada.+

27 I te taeraa mai Davida i Mahanaima, haere atoa maira Sobi te tamaiti a Nahasa no Raba+ te oire o te ati Amona, Makira+ te tamaiti a Amiela no Lo-debara, e Barazilai+ no Gileada no Rogelima. 28 Ua afai mai ratou i te roˈi, te auˈa, te farii araea, te sitona, te kerite, te faraoa ota, te huero maa tunu-paa-hia, e piti huru pǐpǐ, te huero maa mǎrô, 29 te meri, te pata, te mamoe e te pata paari.* Horoa ˈtura ratou i teie mau mea atoa na Davida e to ˈna mau taata ia amu ratou,+ ua manaˈo hoi ratou: “Te poiâ ra tera mau taata, ua rohirohi ratou e te poihâ ra i te medebara.”+

18 Taio ihora Davida i te mau faehau tei na muri ia ˈna e tuu atura i te raatira tausani e te raatira hanere i nia ia ratou.+ 2 Faataa ihora Davida e toru pǔpǔ: ua tuu oia hoê pǔpǔ i raro aˈe i te aratairaa* a Ioaba,+ hoê pǔpǔ i raro aˈe i te aratairaa a Abisai+ to Ioaba taeae, te tamaiti a Zeruia,+ e hoê pǔpǔ i raro aˈe i te aratairaa a Itai+ no Gata. Na ô atura te arii i te mau faehau: “E haere atoa vau na muri ia outou.” 3 Na ô maira râ ratou: “Eiaha oe e haere mai.+ No te mea ia horo ê matou, aita e taata e tâuˈa mai. E mai te peu e pohe te afaraa o matou, aita e taata e tâuˈa mai, e faufaa rahi aˈe hoi to oe i 10 000 o matou.+ No reira, mea au aˈe ia faaea oe i te oire no te faahaere mai i te tauturu.” 4 Na ô atura te arii ia ratou: “E rave au i ta outou e manaˈo ra e mea maitai.” Tia aˈera ïa te arii i pihai iho i te uputa o te oire e reva aˈera te mau faehau atoa ei pǔpǔ hanere e ei pǔpǔ tausani. 5 Parau atura te arii ia Ioaba, Abisai e Itai: “A haamanaˈo ia ˈu, eiaha outou e hamani ino ia Abasaloma.”+ Ua faaroo te mau faehau atoa i to te arii horoaraa i tera faaueraa i te mau raatira no nia ia Abasaloma.

6 Haere atura te mau pǔpǔ faehau i rapae i te oire e aro ia Iseraela. Tei roto i te uru raau o Epheraima ratou i te aroraa.+ 7 Pau ihora te nuu o Iseraela+ i te mau faehau a Davida,+ e mea rahi tei taparahihia i taua mahana ra: 20 000 taata. 8 Ua haere roa te aroraa e ati noa ˈˈe taua tuhaa fenua ra. E mea rahi aˈe tei pohe i roto i te uru raau i te feia tei taparahihia i te ˈoˈe i taua mahana ra.

9 Farerei maira Abasaloma i te mau faehau a Davida. I te iteraa oia ia ratou, horo ihora oia. To nia Abasaloma i te hoê pheradi. Haere atura te pheradi na raro aˈe i te mau amaa rarahi o te hoê tumu raau rahi e tafifi ihora to ˈna rouru i roto i te mau amaa. Tarere noa ˈtura oia i roto i te aore.* Area te pheradi ta ˈna i pauma, ua reva ïa. 10 Ite aˈera te tahi taata i te reira e faaite atura ia Ioaba:+ “Ua ite au ia Abasaloma te tarere noa ra i nia i te hoê tumu raau.” 11 Pahono maira Ioaba: “Mai te peu e ua ite oe ia ˈna, eaha oe i ore ai i haapohe ia ˈna i tera iho â taime? Ua horoa ˈtu ïa vau na oe hoê ahuru moni ario e te hoê hatua.” 12 Na ô atura râ teie taata ia Ioaba: “Noa ˈtu e horoahia mai* 1 000 moni ario, eita vau e amo i to ˈu rima i nia i te tamaiti a te arii, ua faaroo hoi matou i te arii i te parauraa ia oe, ia Abisai e ia Itai: ‘E ara outou eiaha hoê ia hamani ino i ta ˈu tamaiti o Abasaloma.’+ 13 Ahiri au i ore i auraro i tera faaueraa a haapohe atu ai ia ˈna, e faaroo te arii i taua ohipa ra, e eita oe e paruru ia ˈu.” 14 Na ô maira ïa Ioaba: “Eita vau e haamâuˈa ˈtu â i to ˈu taime ia oe ra!” Rave ihora oia e toru teˈa* e haere atura e patia ia Abasaloma i te ouma* a tarere noa ˈi oia i nia i te tumu raau. Te ora noa ra ïa oia. 15 Haere maira na ahuru tavini amo mauhaa a Ioaba e haapohe ihora ia Abasaloma.+ 16 Faaoto ihora Ioaba i te pu tara ia faaea te mau faehau i te tapapa i te nuu o Iseraela e ia hoˈi mai. 17 Rave maira te mau faehau i to Abasaloma tino, taue atura i roto i te hoê apoo rahi i roto i te uru raau e huri atura e tiapai haapueraa ofai na nia iho.+ Area te mau faehau Iseraela, ua horo ïa i ǒ ratou.

18 A ora noa ˈi Abasaloma, ua faatia oia no ˈna iho i te hoê pou i te peho o te Arii.+ I manaˈo na hoi oia: “Aita ta ˈu e tamaiti no te amo i to ˈu iˈoa.”+ Tuu atura ïa oia i to ˈna iˈoa i nia i taua pou ra, e parau-noa-hia ˈtura tera pou te Haamanaˈoraa ia Abasaloma e tae roa mai i teie mahana.

19 Na ô maira Ahimaaza+ te tamaiti a Zadoka: “A vaiiho na ia ˈu ia horo vau e faaite i teie parau apî i te arii, ua faaora hoi Iehova ia ˈna i te rima o to ˈna mau enemi.”+ 20 Na ô atura râ Ioaba ia ˈna: “Eita! E hopoi oe i te parau apî i te tahi atu taime, eiaha râ i teie mahana. E taata ê te haere e paraparau i te arii i teie mahana, e titauhia hoi ia faaite ia ˈna e ua pohe ta ˈna tamaiti.”+ 21 Na ô atura Ioaba i te hoê tane ati Kusa:+ “A haere e faaite i te arii eaha ta oe i ite.” Piˈo ihora te tane ati Kusa i mua ia Ioaba e horo ihora. 22 Na ô faahou maira Ahimaaza te tamaiti a Zadoka ia Ioaba: “Noa ˈtu eaha te tupu, a vaiiho ia ˈu ia horo na muri i te tane ati Kusa.” Ui atura râ Ioaba: “Eaha oe e horo ai i ǒ, ta ˈu tamaiti? Eaha ˈtu â parau apî ta oe e faaite?” 23 Onoono maira oia: “Noa ˈtu eaha te tupu, a vaiiho ia ˈu ia haere.” Parau atura ïa Ioaba ia ˈna: “A haere!” Horo atura ïa Ahimaaza na te purumu o te tuhaa fenua o Ioridana, e hemo ihora te tane ati Kusa ia ˈna.

24 Te parahi noa ra Davida i ropu i na uputa e piti o te oire.+ Haere ihora te tiai+ i nia i te tafare o te uputa o te aua. Hiˈo aˈera oia e ite aˈera i te hoê taata e horo mai ra o ˈna anaˈe. 25 Tuô atura ïa te tiai no te faaite i te reira i te arii. Na ô maira te arii: “Mai te peu o o ˈna anaˈe, e parau apî ïa ta ˈna e haere mai ra e faaite.” A piri noa mai ai oia, 26 ite aˈera te tiai i te tahi atu taata te horo mai ra. Tuô aˈera te tiai i te tiai uputa: “A hiˈo na! Era te tahi taata e horo atoa mai ra o ˈna anaˈe!” Parau ihora te arii: “Te hopoi atoa mai ra o ˈna i te parau apî.” 27 Na ô atura te tiai: “Ia hiˈo vau i te tane matamua e horo ra, e au ra e o Ahimaaza+ te tamaiti a Zadoka.” Parau maira ïa te arii: “E taata maitai o ˈna, e te haere mai ra oia e te parau apî oaoa.” 28 Pii atura Ahimaaza i te arii: “E parau apî maitai ta ˈu!” I reira, tipapa ihora oia i mua i te arii. Na ô atura oia: “Ia aruehia Iehova to Atua, ua tuu hoi oia i roto i to oe rima te feia o tei orure hau* ia oe!”+

29 Na ô maira râ te arii: “Te maitai noa ra anei ta ˈu tamaiti o Abasaloma?” Pahono atura ïa Ahimaaza: “Ua ite au i te arepurepuraa rahi i to Ioaba tonoraa i te tahi atu tavini e ia ˈu, aita râ vau i ite no te aha.”+ 30 Parau maira ïa te arii: “A faanuu i te hiti e a tia noa i reira.” Faanuu aˈera ïa oia e tiai noa ˈtura.

31 Tae maira te tane ati Kusa+ e parau maira oia: “To ˈu fatu te arii, e parau apî ta ˈu no oe: I teie mahana, ua hopoi Iehova i te parau-tia ma te faatiamâ ia oe i te rima o te mau taata atoa o tei orure hau ia oe.”+ 32 Na ô atura râ te arii ia ˈna: “Te maitai noa ra anei ta ˈu tamaiti o Abasaloma?” Pahono maira ïa oia: “To ˈu fatu te arii, to oe mau enemi e te feia o tei orure hau ia oe no te hamani ino ia oe, ia riro ratou mai taua taata apî ra!”+

33 Horuhoru ihora te arii i taua parau ra. Haere atura oia i roto i te piha i nia i te uputa o te oire e taˈi atura, ma te parau a haere noa ˈi: “Ta ˈu tamaiti Abasaloma, ta ˈu tamaiti, ta ˈu tamaiti Abasaloma! Ahani o vau tei pohe, eiaha oe, Abasaloma ta ˈu tamaiti, ta ˈu tamaiti!”+

19 Faaitehia ˈtura ia Ioaba: “Te taˈi e te oto ra te arii ia Abasaloma.”+ 2 I te faarooraa te mau faehau e te oto ra te arii i te poheraa o ta ˈna tamaiti, riro atura te upootiaraa* i taua mahana ra ei otoraa no te nuu taatoa. 3 Hoˈi atura ratou i te oire+ i taua mahana ra aita e maniania, mai te feia e haama ra no to ratou hororaa i mua i te enemi. 4 Tapoˈi ihora te arii i to ˈna hohoˈa e auê noa ˈtura ma te reo puai: “Ta ˈu tamaiti Abasaloma! Abasaloma ta ˈu tamaiti, ta ˈu tamaiti!”+

5 Haere atura Ioaba i te arii ra i roto i te fare e na ô atura ia ˈna: “I teie mahana, ua faahaama oe i ta oe mau faehau atoa o tei faaora ia oe e ta oe mau tamaiti,+ ta oe mau tamahine,+ ta oe mau vahine faaipoipo, e ta oe mau vahine faaipoipo tavini.+ 6 Mea here na oe i tei riri ia oe, e mea riri na oe i tei here ia oe. Ua faaite roa mai oe i teie mahana e ere ta oe mau raatira e ta oe mau faehau i te mea faufaa no oe. Ua papu ia ˈu e ahani te ora noa ra Abasaloma i teie mahana e o matou tei pohe, eita oe e haapeapea. 7 A tia ïa i teie nei, a haere i rapae e tamahanahana* i ta oe mau faehau. Aita anaˈe, te horeo nei au i te ora o Iehova, aita e taata faahou i pihai iho ia oe i teie po. E riro te reira ei mea ino atu â no oe i te mau ati atoa i tae mai i nia ia oe mai to oe apîraa e tae roa mai i teie nei.” 8 Haere atura ïa te arii e parahi i te uputa o te oire. Faaitehia ˈtura i te taatoaraa o te mau faehau: “Te parahi ra te arii i te uputa i teie nei.” Haere maira ïa ratou paatoa i mua i te arii.

Area te tahi atu feia ati Iseraela,* ua horo ïa e ua hoˈi i ǒ ratou.+ 9 Te tatamaˈi ra te feia no te mau opu atoa o Iseraela ma te parau: “Ua faaora mai te arii Davida ia tatou i to tatou mau enemi,+ e ua faaora mai oia ia tatou i te mau Philiseti. I teie nei râ, no Abasaloma, ua horo ê oia i te fenua.+ 10 Area o Abasaloma, ta tatou i faaarii* i nia ia tatou,+ ua pohe ïa i te aroraa.+ Eaha ïa outou e ore ai e rave i te tahi mea no te faahoˈi mai i te arii Davida?”

11 Faatae atura te arii Davida i teie poroi i na tahuˈa ra o Zadoka+ raua Abiatara:+ “A parau i te mau matahiapo o Iuda:+ ‘Eaha outou e faataere ai i te faahoˈi mai i te arii i to ˈna aorai? Ua tae mai hoi te parau a to Iseraela taatoa i te arii ra, i ǒ nei i ǒ ˈna. 12 E taeae outou no ˈu. E fetii piri tatou.* Eaha outou e faataere ai i te faahoˈi mai i te arii?’ 13 E e parau orua ia Amasa:+ ‘E ere anei tâua i te fetii piri?* Ia faautua rahi mai te Atua ia ˈu ia ore au ia tuu ia oe ei raatira i nia i ta ˈu nuu i teie mahana ei mono ia Ioaba.’”+

14 Farii aˈera ïa te mau taata atoa o Iuda, e faatae aˈera ratou i te parau i te arii: “A hoˈi mai, o oe e to oe mau taata atoa.”

15 Hoˈi maira te arii na te eˈa e tapae atu ai i Ioridana. Haere aˈera to Iuda i Gilagala+ e farerei i te arii no te aratai ia ˈna ia haere oia i te tahi pae o Ioridana. 16 Pou haavitiviti ihora te tamaiti a Gera o Simei,+ taua taata ati Beniamina ra no Bahurima. Haere atura oia na muri i to Iuda e farerei i te arii Davida. 17 E 1 000 taata ati Beniamina tei na muri ia Simei. Haavitiviti atoa ˈtura Ziba,+ te tavini o te utuafare o Saula, e ta ˈna 15 tamaiti e 20 tavini, i te pou i Ioridana no te farii i te arii. 18 Na te vahi papaˈu oia* i te haereraa no te faahaere mai i te utuafare o te arii na roto i te anavai e no te rave i te mau mea atoa ta te arii i hinaaro. A faaineine ai râ te arii i te haere i te tahi atu pae o Ioridana, tipapa ihora Simei te tamaiti a Gera i mua ia ˈna. 19 Na ô atura oia i te arii: “To ˈu fatu te arii, eiaha e faahapa ia ˈu, eiaha e haamanaˈo i te ino ta ˈu i rave+ i te mahana i faarue ai oe ia Ierusalema. Eiaha oe e haapao i te reira, 20 ua ite maitai hoi au e ua hara vau. No reira, i teie mahana, o vau te taata matamua no te utuafare taatoa o Iosepha tei haere mai e farerei ia oe, to ˈu fatu te arii.”

21 Na ô ihora Abisai+ te tamaiti a Zeruia:+ “Eiaha anei Simei ia haapohehia no to ˈna faainoraa i te tane ta Iehova i faatavai?”+ 22 Parau atura râ Davida: “Eaha ta outou, e te mau tamaiti a Zeruia?+ Eaha outou e hinaaro ai e rave i te mea ta ˈu e ore e hinaaro? Eiaha te tahi taata ia haapohehia i Iseraela i teie mahana. Ua riro faahou mai au ei arii o Iseraela i teie mahana. Te manaˈo ra anei outou e aita vau i ite i te reira?” 23 Na ô atura te arii ia Simei: “Eita oe e pohe.” Horeo atura te arii ia ˈna.+

24 Haere atoa maira Mephiboseta+ te mootua a Saula, no te farerei i te arii. Aita oia i atuatu i to ˈna avae, aita i paotioti i to ˈna huruhuru taa e aita i papuˈa i to ˈna ahu mai te mahana i reva ˈi te arii e tae roa mai i te mahana i hoˈi mai ai oia ma te hau. 25 I to ˈna taeraa mai i Ierusalema* no te farerei i te arii, na ô atura te arii ia ˈna: “Mephiboseta, eaha oe i ore ai i haere mai na muri ia ˈu?” 26 Pahono maira ïa Mephiboseta: “To ˈu fatu te arii, ua haavare ta ˈu tavini+ ia ˈu. No to ˈu pirioi,+ ua faaue au: ‘Ia tamauhia te parahiraa i nia i ta ˈu asini ia nehenehe au e haere na muri i te arii.’ 27 Tera râ, ua pari haavare oia ia ˈu i mua ia oe, to ˈu fatu te arii.+ E au râ oe i te hoê melahi a te Atua mau. A rave ïa i ta oe e manaˈo ra e mea maitai. 28 To ˈu fatu te arii, ua nehenehe ta oe e haapohe i te utuafare taatoa o to ˈu metua tane. Ua horoa mai râ oe i te hoê parahiraa i rotopu i te feia e tamaa ra i ta oe amuraa maa.+ Aita ïa ta ˈu e parau i mua ia oe, e te arii e.”

29 Tera râ, parau atura te arii ia ˈna: “Ua oti, a faaea râ. Ua faaoti au e vahi orua Ziba i te fenua.”+ 30 I reira, na ô maira Mephiboseta i te arii: “E nehenehe o ˈna e rave pauroa ˈtu, e ere i te mea faufaa faahou i teie nei e ua hoˈi mai to ˈu fatu te arii i to ˈna aorai ma te hau.”

31 Area o Barazilai+ no Gileada, ua haere mai oia mai Rogelima mai no te aratai i te arii i te anavai Ioridana. 32 Ua paari roa o Barazilai, e 80 matahiti to ˈna. I hopoi na oia i te maa na te arii a faaea ˈi oia i Mahanaima,+ e taata taoˈa rahi hoi Barazilai. 33 Na ô atura ïa te arii ia Barazilai: “A haere mai na muri ia ˈu i te tahi atu pae. E tamaa oe i ta ˈu amuraa maa i Ierusalema.”+ 34 Na ô maira râ Barazilai i te arii: “Ehia mahana to ˈu e toe ra ia haere au na muri i te arii i Ierusalema? 35 E 80 matahiti to ˈu i teie mahana.+ E nehenehe faahou anei ta ˈu e ite i te maitai e te ino? E momona faahou anei te mea ta to tavini e amu e e inu? E nehenehe faahou anei ta ˈu e faaroo i te reo o te feia himene?+ Eita vau e hinaaro e riro ei hopoia na oe, to ˈu fatu te arii. 36 Ua aratai au ia oe i Ioridana, ua navai tera. Eaha te arii e faafanaˈo ai ia ˈu i tera haamaitairaa? 37 A vaiiho na ia ˈu ia hoˈi i ǒ ˈu. Mea au aˈe na ˈu ia pohe i roto i to ˈu oire i pihai iho i te vahi hunaraa o to ˈu metua tane e to ˈu metua vahine.+ Teie râ o Kemehama.+ A rave ia ˈna no te tavini ia oe. E haere oia i te tahi atu pae na muri ia oe, to ˈu fatu te arii. E nehenehe oe e hamani maitai ia ˈna mai ta oe e hinaaro.”

38 Na ô atura ïa te arii: “E haere Kemehama i te tahi atu pae na muri ia ˈu, e e rave au no ˈna i te mea ta oe e manaˈo ra e mea maitai. Te mau mea atoa ta oe e ani ia ˈu, e rave au no oe.” 39 Haere aˈera te nahoa i te tahi atu pae o Ioridana. Hou a haere ai, apa ihora te arii ia Barazilai,+ haamaitai ihora ia ˈna e hoˈi ihora Barazilai i ǒ ˈna. 40 I to te arii haereraa ˈtu i te tahi atu pae o te anavai i Gilagala,+ apee atura Kemehama ia ˈna. Ua aratai pauroa to Iuda e te afaraa o Iseraela i te arii i te tahi atu pae o te anavai.+

41 Ui maira te tahi atu mau taata no Iseraela i te arii: “Eaha to matou mau taeae, te mau taata no Iuda, i eiâ ˈi i to matou arii a afai atu ai ia ˈna, to ˈna utuafare e to ˈna mau taata i te tahi atu pae o Ioridana?”+ 42 Parau atura to Iuda i to Iseraela: “No te mea e auraa fetii to te arii ia matou.+ Eaha outou e riri ai? Aita te arii i faatamaa ia matou. Aita oia i horoa mai i te ô na matou.”

43 Pahono maira râ to Iseraela i to Iuda: “Hoê ahuru opu matou, e mana rahi aˈe ïa to matou i nia ia Davida i to outou. Eaha ïa outou i vahavaha ˈi ia matou? Te tanoraa, na matou e faahoˈi mai i te arii.” Ua upootia râ to Iuda i nia i to Iseraela i roto i tera tatamaˈiraa.

20 E taata faahuehue râ to reira, o Seba+ te iˈoa, e tamaiti na Bikeri, e ati Beniamina. Faaoto ihora oia i te pu+ e parau atura: “Aita e tuhaa ta tatou ia Davida ra. Eita atoa tatou e fatu i te faufaa i te tamaiti a Iese.+ Ia hoˈi te taata tataitahi i to ˈna mau atua,* e Iseraela!”+ 2 Faaea aˈera ïa to Iseraela taatoa i te pee ia Davida e haere aˈera na muri ia Seba te tamaiti a Bikeri.+ Area to Iuda, aratai noa ˈtura ratou i to ratou arii mai Ioridana e tae roa ˈtu i Ierusalema.+

3 I to Davida taeraa ˈtu i to ˈna aorai* i Ierusalema,+ rave ihora te arii i na ahuru vahine faaipoipo tavini ta ˈna i vaiiho no te haapao i te aorai+ e tuu ihora ia ratou i roto i te hoê fare o tei tiaihia. Faaea noa ˈtura ratou i reira e pohe noa ˈtu ratou. Ua tamau Davida i te hopoi atu i te maa na ratou, aita râ oia i taoto faahou ia ratou.+ Ua ora ratou mai te vahine ivi, noa ˈtu te ora noa ra ta ratou tane faaipoipo.

4 Parau atura te arii ia Amasa:+ “E titau oe i te mau tane no Iuda ia tae mai ratou i roto i te area toru mahana. Ei ǒ nei atoa oe.” 5 Haere atura ïa Amasa e titau mai i te mau tane no Iuda, aita râ oia i hoˈi mai i roto i te area mahana i faaauhia. 6 Parau atura Davida ia Abisai:+ “Mea rahi aˈe te ino ta Seba+ te tamaiti a Bikeri e rave i nia ia tatou i ta Abasaloma.+ A rave i ta ˈu mau faehau e a tapapa ia ˈna. Aˈunei oia e haere ai e tapuni i roto i te hoê oire auahia i te patu teitei a ore atu ai o ˈna e noaa faahou ia tatou.” 7 Haere atura ïa to Ioaba+ mau taata na muri ia ˈna, te mau Kereti, te mau Peleti,+ e te mau aito puai atoa. Faarue aˈera ratou ia Ierusalema no te tapapa ia Seba te tamaiti a Bikeri. 8 I te taeraa ratou i pihai iho i te ofai rahi i Gibeona,+ haere maira Amasa+ e farerei ia ratou. Ua oomo râ o Ioaba i to ˈna ahu tamaˈi e e ˈoˈe ta ˈna i roto i te vehî o tei taamuhia i nia i to ˈna hatua. I to ˈna faafatataraa ˈtu ia Amasa, topa ihora te ˈoˈe.

9 Parau maira Ioaba ia Amasa: “Mea maitai anei oe, to ˈu taeae?” I to ˈna rima atau, tapea aˈera Ioaba i te huruhuru taa o Amasa mai te mea ra e apa oia ia ˈna. 10 Aita o Amasa i haapao i te ˈoˈe i roto i te rima o Ioaba. Patia ihora Ioaba i to ˈna opu i te ˈoˈe,+ e purehu ihora te aau i rapae. Aita e faufaa ia tapiti Ioaba i te patiaraa, ua navai noa hoê no te haapohe ia ˈna. Tapapa ˈtura Ioaba e to ˈna taeae o Abisai ia Seba te tamaiti a Bikeri.

11 Te tia noa ra te hoê faehau apî a Ioaba i pihai iho ia Amasa a parau ai: “Te feia i te pae o Ioaba e te feia na Davida, ia pee ratou ia Ioaba!” 12 Tei raro Amasa i roto i to ˈna toto i ropu i te purumu. I te iteraa teie faehau apî e te tapea ra te tahi atu mau faehau ia tae ratou i pihai iho ia Amasa, faaatea ihora oia ia ˈna i te purumu e taue ihora oia i te hoê ahu i nia ia ˈna. 13 I muri aˈe i to ˈna faaatearaa ia Amasa i te purumu, pee aˈera te mau faehau atoa ia Ioaba no te tapapa ia Seba+ te tamaiti a Bikeri.

14 Haere atura Seba na roto i te mau opu atoa o Iseraela e tae roa ˈtura i Abela no Bete-maaka.+ Haaputuputu maira te ati Bikeri e pee atoa aˈera ia ˈna i roto i te oire.

15 Haere maira Ioaba e to ˈna mau taata* e haaati ihora ia Abela no Bete-maaka no te haru mai ia Seba. Faatia aˈera ratou i te haapueraa repo piri i te aua o te oire e haamata aˈera i te tuparari i te aua ia marua te reira. 16 Tuô maira te hoê vahine feruriraa paari mai roto mai i te oire: “A faaroo mai na outou, a faaroo mai na! A parau na ia Ioaba ia haere mai i ǒ nei, e ohipa ta ˈu e hinaaro ra e parau ia ˈna.” 17 Faafatata maira ïa Ioaba e ui atura te vahine: “O Ioaba oe?” Pahono maira oia: “E, o vau teie.” Na ô atura oia ia ˈna: “A faaroo na i te parau a to tavini.” Pahono maira oia: “Te faaroo atu nei au.” 18 Na ô atura te vahine: “I parauhia na i mutaa ihora: ‘A ani i te aratairaa i te oire o Abela,’ e afaro ïa te ohipa. 19 O vau te tia no te feia hau e te haapao maitai o Iseraela. Te imi nei oe i te haamou i te hoê oire e au i te hoê metua vahine i Iseraela. Eaha oe e haamou* ai i te tuhaa ta Iehova i tutuu mai?”+ 20 Pahono maira Ioaba: “Aita roa ˈtu vau e opua ra i te haamou i te reira. 21 E ere roa ˈtu tera. Te vai ra i to outou oire hoê taata o tei orure hau* i te arii Davida. O Seba+ to ˈna iˈoa, e tamaiti na Bikeri no te tuhaa fenua mouˈa o Epheraima.+ Ia afai mai outou i taua taata ra, e hoˈi matou.” Parau atura te vahine ia Ioaba: “E taorahia ˈtu ïa to ˈna upoo na nia i te aua!”

22 Haere ihora te vahine e paraparau i te nahoa taata ma te paari. Tâpûhia ihora te upoo o Seba te tamaiti a Bikeri e taorahia ihora ia Ioaba ra. Faaoto ihora Ioaba i te pu e hoˈi atura to ˈna mau taata i to ratou fare.+ Area o Ioaba, ua hoˈi mai ïa i Ierusalema i te arii ra.

23 Na Ioaba i haapao i te nuu taatoa o Iseraela.+ O Benaia+ te tamaiti a Iehoiada+ te raatira o te mau Kereti e te mau Peleti.+ 24 O Adorama+ tei tiaau i te feia o tei titauhia no te ohipa a te arii, o Iehosaphata+ te tamaiti a Ahiluda te taata haaputu parau. 25 O Seva te papai parau. E tahuˈa o Zadoka+ raua Abiatara.+ 26 E ua riro atoa mai o Ira no Iaira ei tia mana rahi* na Davida.

21 E oˈe+ râ tei tupu i te mau mahana o Davida e toru matahiti te maoro. Ui atura ïa Davida ia Iehova, e parau maira Iehova: “Ua hara o Saula e to ˈna utuafare i te taparahiraa i te taata, ua haapohe hoi oia i to Gibeona.”+ 2 Titau atura ïa te arii i to Gibeona+ no te paraparau ia ratou. (E ere to Gibeona i te ati Iseraela, e toea ati Amori+ râ. Ua horeo te ati Iseraela eita ratou e hauti ia ratou.+ No to ˈna râ itoito rahi no te nunaa o Iseraela e o Iuda, imi atura Saula i te haamou ia ratou.) 3 Na ô atura Davida i to Gibeona: “Eaha ta ˈu e rave no outou? Eaha ta ˈu e rave no te iriti ê i teie hara, ia haamaitai outou i te nunaa o* Iehova?” 4 Pahono maira to Gibeona: “Eita matou e ani i te ario e te auro+ no ta Saula e to ˈna utuafare i rave i nia ia matou. Eita atoa e tano ia haapohe matou i te tahi taata ati Iseraela.” Parau atura ïa Davida: “E rave au i te mau mea atoa ta outou e parau mai.” 5 Na ô maira ratou ia ˈna: “Te tane o tei tamata i te taparahi e i te haamou ia matou i te mau tuhaa fenua atoa o Iseraela,+ 6 ia tuuhia mai ia matou ra e hitu o ta ˈna mau tamaiti. E faatarere matou i to ratou tino pohe*+ i mua ia Iehova i Gibea,+ te oire o Saula, te tane ta Iehova i maiti.”+ Na ô atura te arii: “E tuu atu vau ia ratou ia outou ra.”

7 Ua aroha râ te arii ia Mephiboseta,+ te tamaiti a Ionatana, te mootua a Saula, no te parau ta Davida raua Ionatana, te tamaiti a Saula, i horeo i mua ia Iehova.+ 8 Rave atura ïa te arii ia Aramoni raua Mephiboseta, na tamaiti e piti a Rizepa,+ te tamahine a Aia, ta ˈna i fanau ia Saula ra. Rave atoa ˈtura oia i na tamaiti e pae a Mikala,*+ te tamahine a Saula, ta ˈna i fanau ia Aderiela+ ra te tamaiti a Barazilai no Mehola. 9 Tuu atura oia ia ratou i to Gibeona ra, e faatarere atura ratou i to ratou tino pohe i nia i te mouˈa i mua ia Iehova.+ Ua pohe ratou e hitu atoa, ua haapohehia ratou i te mau mahana matamua o te tau ootiraa, i te haamataraa te ootiraa kerite. 10 Rave aˈera Rizepa+ te tamahine a Aia i te ahu oto e vauvau ihora i nia i te mato mai te haamataraa o te tau ootiraa e tae roa ˈtu i te taime i topa ˈi te ûa i nia i te mau tino. Aita oia i vaiiho i te mau manu o te raˈi ia tau mai i nia ia ratou i te ao, aita atoa oia i vaiiho i te mau animara oviri ia tapiri mai i te po.

11 Faaitehia aˈera ia Davida te ohipa i ravehia e te vahine faaipoipo tavini a Saula, o Rizepa, te tamahine a Aia. 12 Haere atura ïa Davida e ani i te mau aratai* o Iabesa-gileada+ i te mau ivi o Saula e to ta ˈna tamaiti o Ionatana. I te tau i taparahi ai te mau Philiseti ia Saula i Gilaboa,+ ua haere taua mau aratai ra e eiâ mai i te tino o Saula e o Ionatana i te mahora o te oire o Bete-sana, i reira te mau Philiseti i te faatarereraa ia raua. 13 Rave maira ïa Davida i te mau ivi o Saula e o Ionatana ta ˈna tamaiti. Rave-atoa-hia maira te mau ivi o te mau tane tei haapohehia.*+ 14 Hunahia ihora te mau ivi o Saula e to Ionatana ta ˈna tamaiti i te tuhaa fenua o Beniamina, i Zela,+ i roto i te menema o Kisa+ to ˈna metua tane. Ua rave-pauroa-hia ta te arii Davida i faaue. I muri aˈe, faaroo atura te Atua i ta ratou mau taparuraa no nia i taua fenua ra.+

15 Tupu faahou aˈera te tamaˈi i rotopu i te mau Philiseti e to Iseraela.+ Pou atura ïa Davida e ta ˈna mau faehau e aro i te mau Philiseti. Rohirohi ihora râ Davida. 16 Tamata ihora te hoê Philiseti i te haapohe ia Davida. O Isebi-benoba to ˈna iˈoa, e huaai a te ati Repha.+ E 300 sekela*+ te teiaha o ta ˈna omore veo e e ˈoˈe apî ta ˈna. 17 Haere maira Abisai+ te tamaiti a Zeruia e tauturu+ ia Davida e taparahi ihora i taua Philiseti ra. I tera taime, horeo ihora te mau taata o Davida ia ˈna: “Eiaha oe e haere faahou mai na muri ia matou i te tamaˈi!+ Eiaha oe ia tupohe i te mori o Iseraela!”+

18 I muri aˈe, tupu faahou aˈera te tamaˈi e te mau Philiseti+ i Goba. I reira, taparahi pohe atura Sibekai+ ati Husa ia Sapha, e huaai o te ati Repha.+

19 Tupu faahou aˈera te tamaˈi e te mau Philiseti+ i Goba, e taparahi pohe atura Elehanana te tamaiti a Iaare-oregima no Betelehema ia Golia no Gata. E au te raau o te omore a taua Philiseti ra i te raau a te feia raraa.+

20 Tupu faahou aˈera te tamaˈi i Gata, tei reira te hoê tiapai taata, e 6 manimani rima to ˈna i nia i te rima tataitahi e 6 manimani avae i nia i te avae tataitahi, e 24 ia amuihia. E huaai no te ati Repha+ atoa oia. 21 Te aa noa mai ra oia ia Iseraela.+ Taparahi-pohe-hia ihora ïa oia e Ionatana te tamaiti a Simei,+ to Davida tuaana.

22 E huaai no te ati Repha na tane e maha. I ora na ratou i Gata. Na Davida e ta ˈna mau faehau i haapohe ia ratou.+

22 Ua faaora Iehova ia Davida i te rima o to ˈna mau enemi atoa+ e i te rima o Saula.+ Himene atura ïa Davida i teie himene+ ia Iehova:

 2 “O Iehova to ˈu mato e to ˈu haapuraa+ e na ˈna e faaora ia ˈu.+

11 Ua parahi oia i nia i te hoê kerubi+ e mea rere i te haereraa mai.

Ua itehia oia na nia i te pererau o te hoê melahi.*+

13 Mai roto mai i te anaana i mua ia ˈna, ama aˈera te arahu ura.

E paruru oia no te feia e haapu ra ia ˈna ra.+

32 O vai hoi te Atua maori râ o Iehova?+

E o vai te mato maori râ o to tatou Atua?+

44 E faaora oe ia ˈu i te mau faahaparaa a to ˈu nunaa.+

47 E Atua ora o Iehova! Ia aruehia to ˈu Mato!+

Ia faateiteihia te Atua, te Mato o te faaora ia ˈu.+

23 Teie te mau parau hopea a Davida:+

 5 Mai tera to ˈu utuafare i mua i te Atua.

8 Teie te iˈoa o na aito puai roa ˈˈe+ e toru a Davida: Ioseba-basebeta ati Hakemoni, te raatira o na aito e toru.+ I te hoê mahana, ua haapohe oia 800 taata i ta ˈna omore. 9 I muri aˈe ia ˈna, o Eleazara+ ïa te tamaiti a Dodo+ te tamaiti a Ahohi, o ˈna hoê o na toru aito puai roa ˈˈe. O ratou Davida ma tei aa i te mau Philiseti, o tei haaputuputu ia ratou no te aro i to Iseraela. I tera mahana, ua otohe te mau faehau Iseraela. 10 Aro noa ˈtura râ Eleazara i te mau Philiseti e tairi ihora ia ratou e rohirohi noa ˈtu to ˈna rima a paruparu roa ˈtu ai i te tapearaa i te ˈoˈe.+ E upootiaraa* rahi ïa ta Iehova i tera mahana.+ Hoˈi maira te mau faehau na muri ia Eleazara no te eiâ i te mau taoˈa a te feia i haapohehia.

11 Te toru, o Sama ïa te tamaiti a Age te ati Harari. Ua haaputuputu te mau Philiseti i Lehi i te hoê tâpû fenua ua î i te pǐpǐ. Ua horo ê te mau faehau no te mau Philiseti. 12 Tia ihora râ oia i ropu i te faaapu e paruru ihora i taua faaapu ra. Tairi ihora oia i te mau Philiseti e faatupu ihora Iehova i te hoê upootiaraa* rahi.+

13 I te tau ootiraa, pou atura e toru no roto mai i na 30 raatira ia Davida ra i te ana o Adulama.+ Te puhapa ra ïa te hoê pǔpǔ faehau Philiseti i te peho o te ati Repha.+ 14 Tei roto ïa Davida i to ˈna haapuraa,+ e tei Betelehema te hoê puhapa faehau a te mau Philiseti. 15 Faaite atura Davida i to ˈna hinaaro: “Ahani ta ˈu e nehenehe e inu i te pape no ǒ mai i te apoo pape i pihai iho i te uputa o Betelehema!” 16 I reira, tomo ihora na toru aito puai roa ˈˈe i roto i te puhapa a te mau Philiseti, huti ihora i te pape no roto mai i te apoo i pihai iho i te uputa o Betelehema e hopoi maira i te reira ia Davida ra. Aita râ oia i farii i te inu e manii ihora oia i taua pape ra i raro i mua ia Iehova.+ 17 Na ô aˈera oia: “E Iehova, eita roa ˈtu ta ˈu e nehenehe e inu i teie pape. Mai te mea ra ïa e te inu ra vau i te toto+ o te mau tane o tei faaû i te pohe no te tii mai i teie pape.” Aita aˈera ïa oia i inu i te reira. Tera te mau ohipa ta ta ˈna e toru aito puai roa ˈˈe i rave.

18 E raatira atoa o Abisai+ te taeae o Ioaba te tamaiti a Zeruia+ i nia e toru aito puai ê atu. I te hoê mahana, ua haapohe oia 300 taata i ta ˈna omore. Tui atura to ˈna roo mai to na aito puai roa ˈˈe e toru+ a Davida. 19 Noa ˈtu o ˈna tei matau-roa-hia i roto ia ratou e toru e o ˈna to ratou raatira, aita oia i tapae i te faito o na aito puai roa ˈˈe e toru a Davida.

20 E tane itoito* o Benaia+ te tamaiti a Iehoiada, mea rahi te ohipa ta ˈna i rave i Kabezeela.+ Ua taparahi oia i na tamaiti e piti a Ariela no Moabi. Ua pou atoa oia i roto i te hoê apoo pape i te hoê mahana hiona no te taparahi i te hoê liona.+ 21 Ua taparahi atoa oia i te hoê tiapai taata Aiphiti. Ua aro Benaia ia ˈna i te hoê raau, area ta taua taata Aiphiti ra, e omore ïa. Haru maira oia i te omore i te rima o te taata Aiphiti e haapohe ihora ia ˈna i tera omore. 22 Tera te mau ohipa ta Benaia te tamaiti a Iehoiada i rave. Tui atura to ˈna roo mai no na aito puai roa ˈˈe e toru a Davida. 23 Noa ˈtu mea matauhia oia hau aˈe i na 30 taata, aita oia i tapae i te faito o na aito puai roa ˈˈe e toru a Davida. Tera râ, ua faatoroa Davida ia ˈna ei raatira no to ˈna feia tiai.

24 Tei rotopu o Asahela+ te taeae o Ioaba i na 30 taata. Teie te iˈoa o taua feia tamaˈi ra: Elehanana te tamaiti a Dodo no Betelehema,+ 25 Sama no Haroda, Elika no Haroda, 26 Heleza+ no Bete-paleta, Ira+ te tamaiti a Ikesa no Tekoa, 27 Abi-ezera+ no Anatota,+ Mebunai ati Husa, 28 Zalamona ati Ahohi, Maharai+ no Netopha, 29 Heleba te tamaiti a Baanaha no Netopha, Itai te tamaiti a Ribai no Gibea a te ati Beniamina, 30 Benaia+ no Piratona, Hidai no te mau tahora i Gaasa,+ 31 Abi-alabona no Bete-araba, Azamaveta no Bahurima, 32 Eliahaba no Saalabima, na tamaiti a Iasena, Ionatana, 33 Sama ati Harari, Ahiama te tamaiti a Sarara ati Harari, 34 Elipheleta te tamaiti a Ahasebai te tamaiti a te hoê taata no Maakata, Eliama te tamaiti a Ahitophela+ no Gilo, 35 Hezero no Karemela, Paarai no Araba, 36 Igala te tamaiti a Natana no Zoba, Bani ati Gada, 37 Zeleka ati Amona, Naharai no Beerota, te amo mauhaa a Ioaba te tamaiti a Zeruia, 38 Ira ati Ituri, Gareba ati Ituri,+ 39 e Uria+ ati Heta, e 37 ia amuihia.

24 Riri faahou aˈera Iehova ia Iseraela+ i te turairaa te tahi ia Davida ia haere e taio+ ia Iseraela e ia Iuda,+ e ere hoi no te maitai o te nunaa. 2 Parau atura ïa te arii ia Ioaba+ te raatira o ta ˈna nuu: “A haere na i roto i te mau opu atoa o Iseraela, mai Dana e tae atu i Beere-seba,+ e a taio i te taata,* ia ite au ehia rahiraa ratou.” 3 Na ô maira râ Ioaba i te arii: “To ˈu fatu te arii, ia faarahi Iehova to Atua i te nunaa e ia tataihanere noa ˈtu, e ia ite to mata i te reira. No te aha râ to ˈu fatu te arii e hinaaro ai e rave i teie ohipa?”

4 Ua faahepo râ te arii ia Ioaba e te mau raatira o te nuu. Vaiiho maira ïa Ioaba e te mau raatira i te arii e haere aˈera e taio i te nunaa o Iseraela.+ 5 Haere aˈera ratou i te tahi atu pae o Ioridana e puhapa aˈera i Aroera,+ i te pae apatoa* o te oire i ropu i te peho,* e haere aˈera ratou na te tuhaa fenua o te ati Gada e na Iazera.+ 6 Haere aˈera ratou i Gileada+ e i te fenua o Tatima-hodesi, nuu aˈera i Dana-iaana e tipuu aˈera i Sidona.+ 7 Haere aˈera ratou i te pare o Turia+ e na te mau oire atoa o te ati Hevi+ e te ati Kanaana, e tapae aˈera ratou i Beere-seba+ i te Negeba+ i te fenua o Iuda. 8 Ati aˈera ïa ia ratou taua fenua taatoa ra e hoˈi maira ratou i Ierusalema i muri aˈe e iva avaˈe e 20 mahana. 9 Faaite maira Ioaba i te arii te rahiraa taata o tei tapaohia. To Iseraela, 800 000 aito e ˈoˈe ta ratou, e 500 000 taata to Iuda.+

10 Faahapa maira râ to Davida aau* ia ˈna+ i muri aˈe i to ˈna taioraa i te taata. Na ô atura Davida ia Iehova: “E hara rahi ta ˈu i rave+ i to ˈu na reiraraa. E Iehova, a faaore mai na i ta ˈu hara,+ e ohipa maamaa roa hoi ta ˈu i rave.”+ 11 I to Davida tiaraa i te poipoi, tae maira te parau a Iehova ia Gada+ ra te peropheta, ta Davida taata ite orama, na ô maira: 12 “A haere e parau ia Davida: ‘Teie ta Iehova e parau ra: “E toru huru faautuaraa ta ˈu e tuu nei i mua ia oe. A maiti hoê ta ˈu e faatae mai i nia ia oe.”’”+ 13 Haere maira ïa Gada ia Davida ra e na ô maira ia ˈna: “Eaha ta oe e hinaaro? Ia roohia to oe fenua i te oˈe e hitu matahiti i te maoro?+ Ia horo oe e toru avaˈe i te maoro i to oe mau enemi o te aˈuaˈu ia oe?+ Aore ra ia parare te maˈi pee i nia i to oe fenua e toru mahana i te maoro?+ A feruri e a parau mai eaha ta ˈu e pahono i tei tono mai ia ˈu.” 14 Na ô atura ïa Davida ia Gada: “E ahoaho rahi to ˈu. Mea au aˈe na ˈu ia topa tatou i roto i te rima o Iehova,+ e aroha hamani maitai rahi hoi to ˈna.+ Eiaha râ vau ia topa i roto i te rima o te taata.”+

15 Tuu maira ïa Iehova i te maˈi pee+ i nia ia Iseraela mai te poipoi e tae atu i te taime faaotihia, e pohe aˈera 70 000 taata+ mai Dana e tae atu i Beere-seba.+ 16 I to te melahi faatororaa i to ˈna rima i nia ia Ierusalema no te haamou atu, tatarahapa* ihora Iehova i taua ati ra.+ Parau atura oia i te melahi o te haapohe ra i te nunaa: “Ua navai tera! A tuu i to rima i raro.” Tei pihai iho te melahi a Iehova i te vahi tairiiriraa huero maa* a Arauna+ ati Iebusi.+

17 I to Davida iteraa i te melahi o te haapohe ra i te nunaa, na ô atura oia ia Iehova: “Na ˈu i rave i te hara, e na ˈu te hape. Teie râ mau mamoe+ iti, eaha ta ratou i rave? O vau ta oe e faautua, vau e te utuafare o to ˈu metua tane.”+

18 Haere maira ïa Gada ia Davida ra i taua mahana ra e na ô maira ia ˈna: “A pauma i te vahi tairiiriraa huero maa a Arauna ati Iebusi e a faatia i te hoê fata na Iehova.”+ 19 Pauma ihora ïa Davida mai ta Gada i parau ia ˈna i nia i te faaueraa a Iehova. 20 I to Arauna iteraa i te arii e ta ˈna mau tavini te haere mai ra ia ˈna ra, haere ihora Arauna e farerei ia ratou e tipapa ihora i mua i te arii. 21 Ui maira Arauna: “To ˈu fatu te arii, eaha oe e haere mai ai i ǒ ˈu?” Pahono atura Davida: “No te hoo mai i ta oe vahi tairiiriraa huero maa. Te hinaaro ra vau e faatia i te hoê fata na Iehova, ia faaea te ati o te tairi ra i te nunaa.”+ 22 Na ô maira râ Arauna ia Davida: “To ˈu fatu te arii, a rave noa ˈtu i ta ˈu tâpû fenua e a pûpû i te mea ta oe e hinaaro.* Teie te tahi puaatoro no te tusia taauahi. E no te vahie, teie te iri taataahiraa huero maa e te mau mauhaa no te puaatoro. 23 Teie mau mea atoa, e te arii e, te horoa ˈtu nei au na oe.” Na ô faahou maira Arauna: “Ia haamaitai Iehova to Atua ia oe.”

24 Tera râ, parau atura te arii ia Arauna: “Eiaha! E aufau iho â vau ia oe i to ˈna tino moni. Eita vau e pûpû na Iehova to ˈu Atua i te tusia taauahi ta ˈu i ore i aufau.” Hoo maira ïa Davida i te vahi tairiiriraa huero maa e na puaatoro no e 50 sekela* ario.+ 25 Faatia ihora Davida i te hoê fata+ na Iehova e pûpû ihora i te tusia taauahi e te tusia no te hau. Faaroo aˈera ïa Iehova i te mau taparuraa no nia i taua fenua ra,+ e faaea aˈera te ati o tei tairi ia Iseraela.