TE BUKA MATAMUA A SAMUELA
1 O Elikana+ te iˈoa o te hoê tane no Ramataima-zophima*+ i te tuhaa fenua mouˈa o Epheraima,+ e tamaiti o ˈna na Ierohama, te tamaiti a Elihu, te tamaiti a Tohu, te tamaiti a Zuphe, e ati Epheraima. 2 E piti vahine faaipoipo ta ˈna, o Hana hoê e o Penina te tahi atu. E tamarii ta Penina, aita râ ta Hana. 3 I haere na taua tane ra i Silo mai to ˈna oire atu i te mau matahiti atoa no te haamori* e no te pûpû i te tusia ia Iehova o te mau nuu.*+ I reira na tamaiti e piti a Eli, Hophini raua Phinehasa,+ i te taviniraa ei tahuˈa na Iehova.+
4 I te hoê mahana a pûpû ai Elikana i te hoê tusia, horoa ˈtura oia i te tahi mau tuhaa na Penina ta ˈna vahine faaipoipo e na ta ˈna mau tamaroa e tamahine atoa.+ 5 Area na Hana, ua horoa oia i te hoê tuhaa taa ê, o ˈna hoi ta Elikana i here roa ˈˈe. Aita râ Iehova i horoa i te tamarii na Hana.* 6 Hau atu â, i haamauiui noa na Penina* ia ˈna. I faaooo noa na oia ia Hana i te mea aita Iehova i horoa i te tamarii na ˈna. 7 Tera ta ˈna e rave i te mau matahiti atoa. Ia haere Hana i te fare o Iehova,+ e faaooo te tahi atu vahine faaipoipo ia ˈna a taˈi roa ˈtu ai Hana, a ore atu ai e tamaa faahou. 8 Tera râ, parau atura Elikana ia ˈna: “Hana, eaha oe e taˈi ai? Eaha oe e ore ai e tamaa? Eaha oe e oto ai?* E ere anei au i te mea maitai aˈe i te tamaiti e ahuru?”
9 Tia ihora Hana i to ratou paiaraa i te tamaa i Silo. I tera taime, te parahi noa ra Eli te tahuˈa i te uputa o te hiero*+ o Iehova. 10 Ua rahi roa to Hana mauiui, haamata ˈtura oia i te pure ia Iehova+ e aita ˈtura i faaea i te taˈi. 11 Euhe ihora oia: “E Iehova o te mau nuu, mai te peu e hiˈo mai oe i te mauiui rahi o to tavini vahine a haamanaˈo atu ai ia ˈu, e mai te peu eita oe e haamoˈe i to tavini vahine a horoa mai ai i te hoê tamaroa,+ e horoa vau ia ˈna ia oe, e Iehova, i te mau mahana atoa o to ˈna oraraa, eita te reta e tae i nia i to ˈna upoo.”+
12 A pure maoro noa ˈi oia ia Iehova, te hiˈo noa ra Eli i to ˈna vaha. 13 Te paraparau noa ra Hana i roto i to ˈna aau, to ˈna noa vaha te hautiuti ra, area to ˈna reo, aita ïa e faaroohia ra. Manaˈo ihora ïa Eli e ua taero o Hana. 14 Parau atura Eli ia ˈna: “Afea to oe taero e pee ai? A faaea i te inu i ta oe uaina.” 15 Pahono maira Hana: “Aita, ta ˈu fatu! E vahine aau hepohepo rahi au.* Aita vau i inu i te uaina aore ra i te tahi atu ava, te faaite nei râ vau i to ˈu mau huru aau atoa ia Iehova.+ 16 Eiaha e parau e vahine haapaoraa ore to tavini, no to ˈu hoi ahoaho e hepohepo rahi i paraparau ai au.” 17 Na ô atura ïa Eli: “A haere ma te hau, e ia farii te Atua o Iseraela i te mea ta oe i ani ia ˈna.”+ 18 Pahono maira oia: “Ia noaa i to tavini to oe farii maitai.” Haere ihora te vahine e amu ihora i te maa, e aita ˈtura te oto i ite-faahou-hia i nia i to ˈna hohoˈa.
19 Tia aˈera Elikana e to ˈna utuafare* i te poipoi roa, tipapa ihora i mua ia Iehova e hoˈi atura i to ratou fare i Rama.+ Taoto atura Elikana ia Hana ta ˈna vahine faaipoipo, e haapao* ihora Iehova ia Hana.+ 20 I roto i te area hoê matahiti,* hapû maira Hana e fanau maira i te hoê tamaiti. Topa aˈera oia ia ˈna i te iˈoa+ Samuela,* inaha ua parau oia: “Ua ani au ia ˈna ia Iehova.”
21 I muri aˈe, haere atura Elikana e to ˈna utuafare taatoa no te pûpû i te tusia matahiti ia Iehova,+ e no te pûpû i ta ˈna tusia no te euhe. 22 Aita râ Hana i haere,+ ua parau hoi oia i ta ˈna tane faaipoipo: “Ia mairi ta te tamaiti û, i tera taime au e afai atu ai ia ˈna, e haere oia i roto i te fare* o Iehova e e faaea roa oia i reira.”+ 23 Pahono atura Elikana ta ˈna tane faaipoipo ia ˈna: “A rave mai ta oe e manaˈo ra e mea maitai roa ˈˈe.* A faaea i te fare e mairi noa ˈtu ta ˈna û. Ia faatupu Iehova i ta oe i parau.” Faaea ihora ïa te vahine i te fare e aupuru ihora i ta ˈna tamaiti e mairi noa ˈtu ta ˈna û.
24 I te mairiraa ta te tamaiti û, afai aˈera oia ia ˈna i Silo, e te hoê puaatoro oni toru matahiti, hoê epha* faraoa ota, e te hoê farii uaina rahi,+ haere atura i te fare o Iehova i Silo+ e afai maira i te tamaroa na muri ia ˈna. 25 Tupaihia ihora te puaatoro oni e afaihia aˈera te tamaroa ia Eli ra. 26 Parau maira Hana: “Ta ˈu fatu! Te horeo nei au ia oe, e ta ˈu fatu, o vau te vahine tei tia i pihai iho ia oe i teie vahi no te pure ia Iehova.+ 27 No teie tamaroa vau i pure ai, e ua farii Iehova i te mea ta ˈu i ani ia ˈna.+ 28 I teie taime, te horoa nei au ia ˈna ia Iehova. Inaha, i te mau mahana atoa o to ˈna oraraa, e horoahia oia ia Iehova.”
Tipapa ihora oia* i reira i mua ia Iehova.
2 Pure aˈera Hana:
Te hamǎmǎ nei to ˈu vaha no te pahono i to ˈu mau enemi,
Te oaoa ra hoi au i ta oe mau ohipa faaoraraa.
3 Eiaha e paraparau faahou ma te teoteo,
Eiaha te tahi parau teoteo ia matara mai na roto i to outou vaha,
E Atua ite hoi o Iehova,+
E mea na roto ia ˈna te mau ohipa e faitohia ˈi ma te tano.
5 E imi te feia e paia maitai ra i te ohipa ia noaa mai maa faraoa,
Te feia râ e poia ra, eita e poia faahou.+
Te vahine eita ta ˈna tamarii e noaa, ua fanau mai e hitu,+
Te vahine râ mea rahi ta ˈna tamaroa, ua toe noa mai o ˈna anaˈe.*
8 E faatia oia i te taata riirii mai raro mai i te repo.
E faatia oia i tei veve mai roto mai i te haapueraa rehu,*+
No te haaparahi ia ratou e te huiarii,
Ma te horoa ˈtu i te hoê parahiraa hanahana.
Na Iehova te niu o te fenua,+
E e haamau oia i te fenua ruperupe i nia i te reira.
9 E tiai oia i te taahiraa avae o to ˈna mau taata taiva ore,+
E haamamûhia râ te feia ino i roto i te poiri,+
E ere hoi i to ˈna iho puai te hoê taata e upootia ˈi.+
10 E haamou Iehova i te feia e aro ia ˈna.*+
E faaharuru oia i te patiri i nia ia ratou mai te raˈi mai.+
11 Hoˈi ihora Elikana i to ˈna fare i Rama. Ua riro râ te tamaroa ei tavini na* Iehova+ i mua i te tahuˈa Eli.
12 E taata ino na tamaiti a Eli,+ aita raua i faatura noa ˈˈe ia Iehova. 13 Teie ta raua i rave na nia i to raua tiaraa tahuˈa i nia i te nunaa:+ Ia pûpû te hoê taata i te tusia, e haere mai te hoê tavini a te tahuˈa e te hoê patia rahi i roto i to ˈna rima a tunuhia ˈi te iˈo animara, 14 e e patia oia i te reira i roto i te farii, te pani e piti tapearaa, te pani rahi, aore ra te pani hoê noa tapearaa. Te mea e mau i nia i te patia, ta te tahuˈa ïa e rave na ˈna. Tera ta ratou e rave i Silo i nia i te ati Iseraela taatoa e haere mai i reira. 15 Oia atoa, hou a tutuihia ˈi te mii o te tusia ta te taata e pûpû ra,+ e haere mai te hoê tavini a te tahuˈa a parau mai ai: “A horoa i te iˈo na te tahuˈa no te tunu paa. Eita o ˈna e rave mai ia oe ra i te iˈo tunu-pape-hia, te iˈo ota noa râ.” 16 Ia parau te taata ia ˈna: “Ia tutuihia na mua te mii,+ i muri iho oe e rave ai i ta oe e hinaaro,”* e pahono oia: “Eiaha, a horoa mai i teie nei, aita anaˈe, e haru vau i te reira!” 17 Rahi roa aˈera te hara a te mau tavini i mua ia Iehova,+ aita hoi taua mau taata ra i faatura i te ô pûpûhia ia Iehova.
18 Te tavini ra Samuela+ i mua ia Iehova ma te tiputa lino+ i nia ia ˈna, e tamarii noa â ïa oia. 19 E hamani atoa to ˈna metua vahine i te hoê ahu aita e rima no ˈna, e e afai oia i te reira ia ˈna ra i te mau matahiti atoa ia haere oia na muri i ta ˈna tane faaipoipo no te pûpû i te tusia matahiti.+ 20 Haamaitai ihora Eli ia Elikana e ta ˈna vahine faaipoipo e parau atura: “Ia horoa Iehova i te hoê tamarii na oe i teie vahine faaipoipo ei mono i tei horoahia ia Iehova.”+ E hoˈi aˈera raua i te fare. 21 Aroha ihora Iehova ia Hana, e hapû maira oia.+ Fanau maira oia e toru â tamaiti e e piti tamahine. E paari noa ˈtura te tamaroa ra o Samuela i mua ia Iehova.+
22 I taua taime ra, ua ruau roa Eli, ua faaroo râ oia i te mau mea atoa i ravehia e ta ˈna na tamaiti+ i nia i to Iseraela taatoa e to raua taotoraa i te mau vahine o te tavini ra i te tomoraa o te tiahapa o te amuiraa.+ 23 I parau noa na oia ia raua: “No te aha orua e rave noa ˈi i teie mau mea? Mea ino hoi te mau mea ta ˈu e faaroo nei i te nunaa taatoa no nia ia orua. 24 A faaea, ta ˈu na tamaiti, e ere mea maitai te parau ta ˈu e faaroo nei i rotopu i te nunaa o Iehova. 25 Ia hara te hoê taata i te tahi atu, e nehenehe te tahi e taparuparu ia Iehova* no ˈna. Ia hara râ te hoê taata ia Iehova,+ o vai te nehenehe e pure no ˈna?” Aita râ raua i faaroo i to raua metua tane, ua faaoti hoi Iehova i te haapohe ia raua.+ 26 A paari noa mai ai te tamaroa ra o Samuela, rahi noa atoa maira Iehova e te nunaa i te farii maitai ia ˈna.+
27 Haere maira te hoê taata o te Atua ia Eli ra e na ô maira: “Teie ta Iehova e parau ra: ‘Aita anei au i faaite roa ˈtu ia ˈu i te utuafare o to oe tupuna, a ora ˈi ratou i Aiphiti ei tîtî no te utuafare o Pharao?+ 28 E ua maitihia to oe tupuna i rotopu i te mau opu atoa o Iseraela+ no te tavini ei tahuˈa na ˈu e no te haere i nia i ta ˈu fata+ no te pûpû i te tusia, no te pûpû i te mea noˈanoˈa,* e no te oomo i te hoê tiputa i mua ia ˈu. No reira vau i farii ai ia rave oia e to ˈna huaai i te tahi tuhaa o te iˈo ta te ati Iseraela* e hopoi mai no te pûpû ei tusia taauahi ia ˈu.+ 29 No te aha outou e vahavaha ˈi* i ta ˈu tusia e ta ˈu ô ta ˈu i faaue e pûpû i roto i to ˈu fare?+ No te aha oe e faatura ˈi i ta oe na tamaiti hau aˈe ia ˈu ma te haaporia ia outou i te tuhaa maitai roa ˈˈe o te mau ô atoa a to ˈu nunaa o Iseraela?+
30 “‘No reira Iehova te Atua o Iseraela e na ô ai: “Ua parau iho â vau e tavini to utuafare e te utuafare o to oe tupuna ia ˈu e a muri noa ˈtu.”+ I teie nei râ, te na ô mai ra Iehova: “Eita vau e farii faahou i te reira. No te mea te feia e faatura ia ˈu, e faatura vau,+ te feia râ e vahavaha ia ˈu, e vahavahahia ratou.” 31 Inaha, te fatata mai ra te mau mahana e faaere ai au ia outou i to outou puai,* o oe e te utuafare o to oe tupuna, ia ore hoê no roto i to oe utuafare ia ora maoro.+ 32 E maitai noa o Iseraela, area oe, e ite oe i te enemi i roto i to ˈu fare,+ e eita roa e ite-faahou-hia te ruau i roto i to oe utuafare. 33 E vaiiho vau hoê o to oe huaai ia tavini i ta ˈu fata. No ˈna, e rohirohi to oe mata e e oto oe. E pohe râ te rahiraa o to oe utuafare i te ˈoˈe.+ 34 E tapao no oe te mea e roohia ˈi ta oe na tamaiti, o Hophini raua Phinehasa: E pohe raua i te hoê â mahana.+ 35 I muri iho, e faatoroa vau i te hoê tahuˈa haapao maitai na ˈu.+ E rave oia mai ta to ˈu aau e hinaaro ra.* E haamau vau no ˈna i te hoê utuafare o te vai noa, e e tavini noa oia ei tahuˈa i mua i tei faatavaihia e au. 36 E haere mai te mau mero atoa o to utuafare o te toe mai e piˈo i mua ia ˈna ia noaa mai maa moni e maa faraoa e e ani ratou: “A tuu na ia ˈu i te tahi tuhaa ohipa autahuˈa ia noaa mai ta ˈu maa faraoa no te amu.”’”+
3 I taua taime ra, i tavini na te tamaroa ra o Samuela+ ia Iehova i mua ia Eli. Tera râ, ua varavara te parau no ǒ mai ia Iehova i taua mau mahana ra. Mea varavara roa te mau orama.+
2 I te hoê mahana, te tarava noa ra Eli i te vahi matauhia e ana, e ua mohimohi to ˈna mata. Aita oia i ite maitai faahou.+ 3 Aita â te mori a te Atua+ i pohe atura, e te taoto noa ra Samuela i roto i te hiero*+ o Iehova, i reira te Afata a te Atua i te vairaa. 4 Pii ihora Iehova ia Samuela. Pahono atura oia: “Teie au.” 5 Horo atura oia ia Eli ra e parau atura: “Teie au, ua pii oe ia ˈu?” Parau maira râ oia: “Aita vau i pii ia oe. A hoˈi e taoto.” Hoˈi ihora ïa oia e taoto. 6 Pii faahou ihora Iehova: “Samuela!” Tia aˈera Samuela, haere atura ia Eli ra e na ô atura: “Teie au, ua pii oe ia ˈu?” Parau maira râ oia: “Aita vau i pii ia oe, ta ˈu tamaiti. A hoˈi e taoto.” 7 (Aita â Samuela i ite maitai atura ia Iehova, e aita â te parau a Iehova i faaitehia mai ia ˈna.)+ 8 Pii faahou ihora ïa Iehova i te toru o te taime: “Samuela!” Tia aˈera oia, haere atura ia Eli ra e na ô atura: “Teie au, ua pii oe ia ˈu?”
Taa ihora ia Eli e o Iehova tera e pii ra i te tamaroa. 9 Parau maira Eli ia Samuela: “A haere, a taoto, e ia pii faahou oia ia oe, a na ô atu: ‘A parau mai, Iehova, te faaroo nei hoi to tavini.’” Haere ihora Samuela e taoto atura.
10 Haere maira Iehova, tia aˈera i reira e pii maira mai i te mau taime matamua: “Samuela, Samuela!” Pahono atura Samuela: “A parau mai, te faaroo nei hoi to tavini.” 11 Na ô maira Iehova ia Samuela: “Inaha, e rave au i te tahi mea i Iseraela e taˈi atu ai te tariˈa o te mau taata atoa o te faaroo i te reira.+ 12 I tera mahana, e rave au i nia ia Eli pauroa ta ˈu i parau no nia i to ˈna utuafare, mai te haamataraa e tae roa ˈtu i te hopea.+ 13 E parau oe ia ˈna e te faautua nei au i to ˈna utuafare e a muri noa ˈtu no te hape a ta ˈna na tamaiti.+ Te faaino ra hoi ta ˈna na tamaiti i te Atua,+ aita râ oia i tamaˈi ia raua.+ 14 No reira vau i horeo ai i te utuafare o Eli e eita roa te hape a to ˈna utuafare e faaorehia i te mau tusia e te mau ô.”+
15 Taoto ihora Samuela e poipoi noa ˈtu. Iriti ihora oia i te mau uputa o te fare o Iehova. Ua taiâ Samuela i te faaite ia Eli i te orama. 16 Pii maira râ Eli ia Samuela: “Samuela, ta ˈu tamaiti!” Pahono atura oia: “Teie au.” 17 Ani maira oia: “Eaha te poroi ta ˈna i faaite ia oe? Eiaha oe e huna i te reira ia ˈu. Ia faautua rahi mai te Atua ia oe mai te peu e huna oe hoê noa ˈˈe parau ta ˈna i faaite ia oe.” 18 Faaite atura ïa Samuela ia ˈna pauroa ta ˈna i parau, e aita oia i huna i te tahi noa ˈˈe mea ia ˈna. Parau maira Eli: “O te hinaaro o Iehova tera. Ia rave oia i te mea maitai i ta ˈna hiˈoraa.”
19 Paari noa ˈtura Samuela, tei pihai iho noa Iehova ia ˈna+ e aita hoê o ta ˈna mau parau i ore i tupu.* 20 Ite aˈera Iseraela taatoa mai Dana e tae atu i Beere-seba e ua maitihia Samuela ei peropheta na Iehova. 21 Fa noa ˈtura Iehova i Silo. I reira hoi Iehova i faaite ai ia ˈna ia Samuela, i reira Iehova i paraparau ai ia ˈna.+
4 Tae atura te parau a Samuela ia Iseraela taatoa.
Haere aˈera Iseraela e aro i te mau Philiseti. Haamau ihora ratou i to ratou puhapa i pihai iho ia Ebenezera. Area te mau Philiseti, tei Apheka ratou i te haamauraa i to ratou puhapa. 2 Faanaho aˈera te mau Philiseti ia ratou no te aro ia Iseraela. Haamata ihora râ Iseraela i te pau e pau roa ˈtura ratou i te mau Philiseti. Ua haapohe te mau Philiseti e 4 000 tane i nia i te tahua aroraa. 3 I to te mau faehau hoˈiraa i te puhapa, parau aˈera te mau matahiapo o Iseraela: “No te aha Iehova i farii ai ia pau tatou i teie mahana i te mau Philiseti?+ E rave anaˈe i te afata o te faufaa a Iehova na muri ia tatou mai Silo atu,+ ia vai noa te reira i pihai iho ia tatou e ia faaora te reira ia tatou i te rima o to tatou mau enemi.” 4 Tono atura te mau faehau i te tahi mau tane i Silo, e amo aˈera ratou mai reira ˈtu i te afata o te faufaa a Iehova o te mau nuu,* tei parahi i nia i te terono i nia ˈˈe* i te mau kerubi.+ Tei reira atoa na tamaiti a Eli, Hophini raua Phinehasa,+ e te afata o te faufaa a te Atua mau.
5 I te taime a afaihia ˈi te afata o te faufaa a Iehova i roto i te puhapa, tutuô aˈera te ati Iseraela taatoa, e aueue ihora te fenua. 6 I to te mau Philiseti faarooraa i te tutuô, parau aˈera ratou: “Eaha hoi teie tutuô i roto i te puhapa o te mau Hebera?” Ite aˈera ratou e ua afaihia te Afata a Iehova i roto i te puhapa. 7 Mǎtaˈu aˈera te mau Philiseti, ua parau hoi ratou: “Ua tomo te Atua i roto i te puhapa!”+ Na ô aˈera ratou: “Auê hoi tatou e, aita e ohipa mai teie i tupu aˈenei! 8 Auê hoi tatou e! O vai te faaora ia tatou i te rima o teie Atua teitei? O te Atua teie tei tairi ia Aiphiti i te mau ati atoa e rave rau i roto i te medebara.+ 9 Ia itoito e ia haa outou mai te tane, e te mau Philiseti, eiaha outou ia tavini i te mau Hebera mai ia ratou i tavini na ia outou.+ A haa mai te tane e a aro!” 10 No reira, aro aˈera te mau Philiseti, pau ihora Iseraela,+ e horo ihora te taata tataitahi i ǒ ˈna. Mea rahi roa tei haapohehia. I te pae o Iseraela, e 30 000 faehau haere avae tei pohe. 11 Hau atu â, ua haruhia te Afata a te Atua e ua pohe na tamaiti a Eli, Hophini raua Phinehasa.+
12 Horo maira te hoê taata no te opu o Beniamina mai te tahua aroraa ˈtu e tae maira i Silo i taua mahana ra ma te ahu mahae e te repo i nia i te upoo.+ 13 I to tera taata taeraa mai, te parahi noa ra Eli i nia i te parahiraa i te pae purumu a tiai noa ˈi, te haapeapea rahi ra hoi oia no te Afata a te Atua mau.+ Tomo ihora taua taata ra i roto i te oire no te faaite i te parau apî, e haamata aˈera te oire taatoa i te auê. 14 I to Eli faarooraa i te auê, ui ihora oia: “Eaha hoi teie arepurepuraa?” Horo maira taua taata ra ia Eli ra e faaite ihora i te parau apî. 15 (E 98 matahiti to Eli i taua taime ra, aita to ˈna mata i hauti faahou. Aita oia i ite faahou.)+ 16 Parau maira taua taata ra ia Eli: “O vau tei haere mai na te tahua aroraa mai! No teie mahana vau i horo mai ai mai te tahua aroraa mai.” Ui atura Eli: “Eaha tei tupu, ta ˈu tamaiti?” 17 Faatia maira ïa te hopoi parau apî: “Ua horo ê to Iseraela i te mau Philiseti, e e pau rahi tei itehia i rotopu i te nunaa.+ Ua pohe atoa ta oe na tamaiti, o Hophini raua Phinehasa,+ e ua haruhia te Afata a te Atua mau.”+
18 I to ˈna faahitiraa i te parau o te Afata a te Atua mau, topa ofera ihora Eli mai nia mai i to ˈna parahiraa i pihai iho i te uputa, fati ihora to ˈna aˈî e pohe ihora oia, ua ruau hoi oia e te teiaha. Ua haava oia ia Iseraela e 40 matahiti te maoro. 19 E hapû to ta ˈna hunoa vahine, ta Phinehasa vahine faaipoipo, e ua fatata oia i te fanau. I to ˈna faarooraa i te parau e ua haruhia te Afata a te Atua mau, e ua pohe to ˈna metua tane hoovai e ta ˈna tane faaipoipo, haafefe ihora oia, mauiui aˈera e fanau ihora. 20 A fatata ˈi oia i te pohe, parau aˈera te mau vahine e tia ra i pihai iho ia ˈna: “Eiaha e mǎtaˈu, ua fanau hoi oe i te hoê tamaroa.” Aita râ oia i haapao atu i te reira e aita oia i pahono atu. 21 Ua topa oia i te tamaroa i te iˈoa Ikaboda,*+ ma te parau: “Ua hopoi-ê-hia te hanahana mai Iseraela ˈtu.”+ I faahiti ai oia i teie parau, no te haruraahia ïa te Afata a te Atua mau e to ˈna iteraa eaha tei tupu no to ˈna metua tane hoovai e no ta ˈna tane faaipoipo.+ 22 Ua parau oia: “Ua hopoi-ê-hia te hanahana mai Iseraela ˈtu, inaha hoi ua haruhia te Afata a te Atua mau.”+
5 I to te mau Philiseti haruraa i te Afata+ a te Atua mau, ua hopoi ratou i te reira i Asadoda mai Ebenezera ˈtu. 2 Rave aˈera te mau Philiseti i te Afata a te Atua mau, afai ihora i te reira i roto i te hiero* o Dagona e tuu aˈera i pihai iho ia Dagona.+ 3 I te mahana i muri iho, i te tiaraa mai to Asadoda i te poipoi roa, ua topa Dagona te hohoˈa i raro i mua i te Afata a Iehova.+ Rave ihora ïa ratou ia Dagona e faahoˈi ihora ia ˈna i to ˈna vairaa.+ 4 I te mahana i muri mai, i te tiaraa mai ratou i te poipoi roa, ua topa faahou Dagona te hohoˈa i raro i mua i te Afata a Iehova. Ua taa to Dagona upoo e to ˈna na apu rima e ua vai noa i raro i te pae uputa. O te tino e au i te iˈa* noa tei ore i ino. 5 No reira ïa te mau tahuˈa a Dagona e te feia atoa e tomo i roto i te hiero o Dagona e ore ai e taahi i te tomoraa o te uputa o te hiero o Dagona i Asadoda e tae roa mai i teie mahana.
6 Faautua ihora Iehova i to Asadoda e tairi ihora ia ratou ma te faatupu i nia i to Asadoda e to ˈna mau tuhaa fenua te maˈi ô.+ 7 I to te mau taata no Asadoda iteraa eaha te tupu ra, parau aˈera ratou: “Eiaha e vaiiho mai i te Afata a te Atua o Iseraela i ǒ tatou, ua faautua hoi to ratou Atua ia tatou e i to tatou atua o Dagona.” 8 Titau maira ïa ratou i te mau faatere atoa o te mau Philiseti e ui maira ia ratou: “Eaha ta matou e rave i te Afata a te Atua o Iseraela?” Pahono atura ratou: “A afai i te reira i Gata.”+ Afai aˈera ïa ratou i te Afata a te Atua o Iseraela i Gata.
9 I to ratou afairaa i te Afata a te Atua i Gata, tairi ihora Iehova i taua oire ra, e e mǎtaˈu rahi tei itehia. Tairi ihora oia i te mau taata atoa o te oire e roohia ihora ratou i te maˈi ô.+ 10 Afai aˈera ïa ratou i te Afata a te Atua mau i Ekerona.+ Tera râ, i te taeraa ˈtu te Afata a te Atua mau i Ekerona, haamata ihora to Ekerona i te auê: “Ua afai mai ratou i te Afata a te Atua o Iseraela ia tatou ra ia pohe tatou e to tatou nunaa!”+ 11 Titau maira ratou i te mau faatere atoa o te mau Philiseti e parau maira: “A afai ê atu i te Afata a te Atua o Iseraela. Ia hoˈi te reira i to ˈna vahi, eiaha matou e to matou nunaa ia haapohehia.” Te mǎtaˈu ra hoi te mau taata atoa o te oire ia pohe ratou. Ua faautua te Atua mau ia ratou,+ 12 e te mau taata tei ore i pohe, ua tairihia i te maˈi ô. Ua puai roa hoi te auê a te feia o te oire, faaroo-roa-hia ˈtura te reira i te raˈi.
6 E hitu avaˈe te maoro te vairaa te Afata+ a Iehova i te tuhaa fenua o te mau Philiseti. 2 Titau aˈera te mau Philiseti i te mau tahuˈa e te mau tohu haavare+ e ui ihora: “Eaha ta matou e rave i te Afata a Iehova? A faaite mai e nafea ia faahoˈi i te reira i to ˈna vahi.” 3 Pahono aˈera ratou: “Ia faahoˈi outou i te afata o te faufaa a Iehova te Atua o Iseraela, eiaha e faahoˈi i te reira aita hoê aˈe faufaa i roto i te rima. E hopoi râ outou i te tahi ô na ˈna.+ I reira noa outou e ora ˈi i to outou maˈi, e e ite ai no te aha oia i faautua ˈi ia outou mai te reira.” 4 Ui ihora ïa te mau Philiseti: “Eaha te ô e tano ia hopoi matou na ˈna?” Pahono aˈera ratou: “Na nia i te mau faatere o te mau Philiseti,+ a hopoi e pae hohoˈa maˈi ô auro e e pae hohoˈa iore auro, inaha hoi ua tairihia outou pauroa e to outou mau faatere i te hoê â ati. 5 E tarai outou i te hohoˈa o to outou maˈi ô e te hohoˈa o ta outou mau iore+ o te tuino ra i te fenua, e e faahanahana outou i te Atua o Iseraela. Peneiaˈe e tatara oia i ta ˈna utua i nia ia outou e to outou atua e to outou fenua.+ 6 Eaha hoi outou e faaetaeta ˈi i to outou aau mai ia Aiphiti e Pharao i faaetaeta i to ratou aau?+ Ua faatae mai te Atua i te ati i nia ia ratou+ e ua titauhia ia tuu ratou ia Iseraela ia haere.+ 7 I teie nei, a faaineine i te hoê tavere apî e e piti puaatoro ufa e fanauˈa ta raua e aita i tuuhia aˈenei i raro aˈe i te zugo. A tamau i te tavere i nia i na puaatoro ufa, a faahoˈi râ i ta raua fanauˈa. 8 A rave i te Afata a Iehova e a tuu atu i nia i te tavere. A rave atoa i te afata to roto te mau hohoˈa auro ta outou e hopoi ra ei ô na ˈna, e a tuu i pihai iho i te afata a te Atua.+ I muri iho, a tuu i na puaatoro ufa ia haere raua 9 e a hiˈo: Ia reva te afata a te Atua na te purumu e tapae atu ai i Bete-semesa,+ i to ˈna iho fenua, na to ratou Atua ïa i faatae i teie ati rahi i nia ia tatou. Ia ore râ, e ite tatou e ere na ˈna i tairi ia tatou, ua tupu noa mai teie ohipa mai tera.”
10 Na reira ihora taua mau taata ra. Rave ihora ratou e piti puaatoro ufa e fanauˈa ta raua, tamau ihora i te tavere i nia ia raua e faahoˈi ihora ratou i ta raua fanauˈa. 11 Tuu ihora ratou i te Afata a Iehova i nia i te tavere e te afata atoa to roto te mau iore auro e te mau hohoˈa o to ratou maˈi ô. 12 Haere afaro noa ˈtura na puaatoro ufa na te purumu e tapae atu ai i Bete-semesa.+ Ua faaea noa raua i nia i taua purumu ra a haere noa ˈi ma te umo. Aita raua i fariu noa ˈˈe i te pae atau e i te pae aui. Na muri noa ˈtura te mau faatere o te mau Philiseti ia raua e tae roa ˈtu i te otia o Bete-semesa. 13 Te ooti ra to Bete-semesa i te sitona i roto i te hoê peho. I to ratou hiˈoraa e iteraa ˈtu i te Afata, oaoa roa aˈera ratou. 14 Tae maira te tavere i nia i te tâpû fenua a Iosua no Bete-semesa e faaea ihora i reira i pihai iho i te hoê ofai rahi. Tâpûpû ihora ïa ratou i te raau o te tavere e pûpû ihora i na puaatoro ufa+ ei tusia taauahi ia Iehova.
15 Huri ihora te ati Levi+ i raro i te Afata a Iehova e to pihai iho afata e hohoˈa auro to roto, e tuu atura i te reira i nia i te ofai rahi. I taua mahana ra, ua pûpû to Bete-semesa+ i te tusia taauahi e te tahi atu mau tusia animara ia Iehova.
16 I te iteraa na faatere e pae o te mau Philiseti i te reira, hoˈi ihora ratou i Ekerona i taua mahana ra. 17 No te mau hohoˈa maˈi ô auro ta te mau Philiseti i hopoi ei ô na Iehova,+ hoê ïa no Asadoda,+ hoê no Gaza, hoê no Asekelona, hoê no Gata,+ e hoê no Ekerona.+ 18 Ua tuati te numera o te mau iore auro i te numera o te mau oire atoa o te mau Philiseti fatuhia e na faatere e pae, oia hoi, te mau oire auahia i te patu e te mau oire rii o te mataeinaa.
E te ofai rahi i nia i te reira te Afata a Iehova i te tuuraahia, ua riro ïa ei haamanaˈoraa e tae roa mai i teie mahana i nia i te tâpû fenua a Iosua no Bete-semesa. 19 Haapohe ihora râ te Atua i to Bete-semesa, ua hiˈo hoi ratou i te Afata a Iehova. Ua haapohe oia e 50 070 taata,* e oto aˈera te nunaa, mea rahi hoi ta Iehova i haapohe.+ 20 Ui aˈera ïa to Bete-semesa: “O vai te nehenehe e tia ˈtu i mua ia Iehova, teie Atua moˈa?+ E i ǒ vai oia e haere ai ia vaiiho mai oia ia tatou?”+ 21 Tono ihora ratou i te vea i to Kiriata-iearima+ ma te parau: “Ua faahoˈi mai te mau Philiseti i te Afata a Iehova. A pou mai e a hopoi atu i te reira i ǒ outou.”+
7 Haere maira ïa to Kiriata-iearima e afai atura i te Afata a Iehova i te fare o Abinadaba+ i nia i te aivi, e maiti* ihora ratou ia Eleazara ta ˈna tamaiti no te haapao i te Afata a Iehova.
2 E taime roa tei mairi, e 20 matahiti ia amuihia, mai te mahana i tae mai ai te Afata i Kiriata-iearima, e ua haamata te nunaa taatoa o Iseraela i te imi* ia Iehova.+ 3 Parau maira Samuela i te nunaa taatoa o Iseraela: “Ia hoˈi mai outou ia Iehova ra ma to outou aau atoa,+ a haapae i te mau atua ěê+ e te mau hohoˈa o Asetoreta+ i ǒ outou, e a fariu i to outou aau ia Iehova ra a tavini atu ai ia ˈna anaˈe.+ E faaora ïa oia ia outou i te rima o te mau Philiseti.”+ 4 Faarue ihora ïa te ati Iseraela i te mau Baala e te mau hohoˈa o Asetoreta e tavini ihora ratou ia Iehova anaˈe.+
5 Parau maira Samuela: “A haaputuputu ia Iseraela taatoa i Mizepa,+ e e pure au ia Iehova no outou.”+ 6 Haaputuputu ihora ïa ratou i Mizepa, huti ihora i te pape, manii ihora i te reira i mua ia Iehova e haapae ihora ratou i te maa i taua mahana ra.+ I reira, parau atura ratou: “Ua hara matou ia Iehova.”+ Haamata ˈtura Samuela i te haava+ i te ati Iseraela i Mizepa.
7 I to te mau Philiseti faarooraa e ua putuputu te ati Iseraela i Mizepa, haere maira te mau faatere o te mau Philiseti+ e aro ia Iseraela. I to te ati Iseraela faarooraa i te reira, mǎtaˈu ihora ratou i te mau Philiseti. 8 Parau atura ïa te ati Iseraela ia Samuela: “Eiaha e faaea i te tiaoro ia Iehova to tatou Atua ia tauturu+ e ia faaora oia ia tatou i te rima o te mau Philiseti.” 9 Rave ihora Samuela i te hoê fanauˈa mamoe e pûpû ihora i te reira ei tusia taauahi+ ia Iehova. Tiaoro aˈera Samuela ia Iehova ia tauturu oia ia Iseraela e pahono maira Iehova ia ˈna.+ 10 A pûpû ai Samuela i te tusia taauahi, nuu maira te mau Philiseti no te aro ia Iseraela. Faaharuru ihora Iehova i te patiri+ i nia i te mau Philiseti i taua mahana ra, rapu roa ihora ratou i te ohipa ta te Atua i rave+ e pau ihora ratou ia Iseraela.+ 11 Haere aˈera ïa te mau taata o Iseraela e aˈuaˈu i te mau Philiseti mai Mizepa ˈtu, e haapohe aˈera ia ratou e tae roa ˈtu i te pae apatoa o Bete-kara. 12 Rave ihora Samuela i te hoê ofai,+ tuu ihora i te reira i ropu ia Mizepa e Iesana e topa ihora i taua ofai ra i te iˈoa Ebenezera.* Ua parau hoi oia: “Ua tauturu Iehova ia tatou e tae roa mai i teie nei.”+ 13 Inaha ua pau te mau Philiseti, aita ˈtura ratou i haere faahou mai i te fenua o Iseraela.+ Patoi noa ˈtura Iehova i te mau Philiseti i te tau o Samuela.+ 14 Ua faahoˈi-atoa-hia ia Iseraela ra te mau oire ta te mau Philiseti i haru ia Iseraela ra, mai Ekerona e tae atu i Gata, e fatu faahou maira te ati Iseraela i to ratou tuhaa fenua i te mau Philiseti ra.
E hau atoa to rotopu ia Iseraela e te ati Amori.+
15 Haava noa ˈtura Samuela ia Iseraela i te toea o to ˈna oraraa.+ 16 I te mau matahiti atoa, ua ratere oia na Betela,+ Gilagala,+ e Mizepa,+ e ua haava ia Iseraela i tera mau vahi atoa. 17 I muri aˈe, e hoˈi oia i Rama,+ tei reira hoi to ˈna fare, e i reira atoa oia e haava ˈi ia Iseraela. Ua faatia oia i reira i te hoê fata na Iehova.+
8 I te ruhiruhiaraa mai Samuela, faatoroa ˈtura oia i ta ˈna na tamaiti no te haava ia Iseraela. 2 O Ioela te iˈoa o ta ˈna tamaiti matahiapo, e o Abia+ te iˈoa o te piti. E haava raua i Beere-seba. 3 Aita râ ta ˈna na tamaiti i pee i to ˈna haerea. Ua imi raua i te moni ma te ravea piˈo,+ ua farii i te peta+ e ua faahahi ê i te parau-tia.+
4 I muri aˈe, haaputuputu maira te mau matahiapo atoa o Iseraela e haere maira ia Samuela ra i Rama. 5 Na ô maira ratou ia ˈna: “A hiˈo na! Ua paari roa oe, aita râ ta oe na tamaiti e pee ra i to mau haerea. I teie nei, a faatoroa i te tahi arii no matou no te haava ia matou mai te tahi atu mau nunaa.”+ 6 Tera râ, aita Samuela i au i* to ratou parauraa: “A horoa mai i te tahi arii no te haava ia matou.” Pure aˈera Samuela ia Iehova, 7 e na ô ihora Iehova ia Samuela: “A faaroo i te mau mea atoa ta te nunaa e parau ia oe. E ere hoi o oe ta ratou i patoi, o vau râ ta ratou i patoi ei arii no ratou.+ 8 Te rave nei ratou mai ta ratou i rave noa na mai te mahana mai â i aratai ai au ia ratou i rapae ia Aiphiti. Ua faarue noa ratou ia ˈu+ e ua tavini ratou i te tahi atu mau atua,+ e tera ta ratou e rave ra i nia ia oe. 9 I teie nei, a faaroo ia ratou. E faaara maitai râ oe ia ratou, e parau oe ia ratou eaha te tia i te arii o te faatere ia ratou ia titau.”
10 Faaite atura ïa Samuela i te mau parau atoa a Iehova i te nunaa o te ani ra ia ˈna i te tahi arii: 11 “Teie te tia i te arii o te faatere ia outou ia titau:+ E rave oia i ta outou mau tamaroa+ a tuu atu ai ia ratou i roto i to ˈna mau pereoo+ e e faariro o ˈna ia ratou ei taata faahoro pereoo puaahorofenua no ˈna,+ e e titauhia ia horo vetahi na mua ˈtu i to ˈna mau pereoo. 12 E faatoroa oia no ˈna iho i te tahi mau raatira i nia i te pǔpǔ tausani+ e te tahi mau raatira i nia i te pǔpǔ e pae ahuru.+ E arote+ e e ooti+ vetahi no ˈna, e hamani atoa ratou i ta ˈna mau mauhaa tamaˈi e te tahi mau mauhaa no to ˈna mau pereoo.+ 13 E rave oia i ta outou mau tamahine ei hamani monoˈi, eu faraoa+ e ei tûtu maa. 14 E rave oia i te mea maitai roa ˈˈe o ta outou mau faaapu, ta outou mau ô vine, e ta outou mau ô olive,+ e e horoa oia i te reira i ta ˈna mau tavini. 15 E rave oia i te tuhaa ahuru o ta outou mau faaapu huero maa e ta outou mau ô vine, e e horoa oia i te reira i ta ˈna mau tia mana e ta ˈna mau tavini. 16 E rave oia i ta outou mau tavini tane e ta outou mau tavini vahine, ta outou mau nǎnǎ puaatoro maitai roa ˈˈe e ta outou mau asini, e e rave oia ia ratou no ta ˈna ohipa.+ 17 E rave oia i te tuhaa ahuru o ta outou mau nǎnǎ mamoe+ e e riro outou ei tavini na ˈna. 18 E tae te mahana e auê ai outou no te arii ta outou i maiti no outou iho.+ Eita râ Iehova e pahono ia outou i taua mahana ra.”
19 Tera râ, aita te nunaa i hinaaro e faaroo i ta Samuela i parau atu. Na ô maira ratou: “Ua faaoti matou ei arii te faatere ia matou. 20 E riro ïa matou mai te tahi atu mau nunaa. E haava e e aratai to matou arii ia matou, e e aro oia i ta matou mau aroraa.” 21 I muri mai i to Samuela faarooraa i te mau parau atoa a te nunaa, faaite atura oia i taua mau parau ra ia Iehova. 22 Na ô ihora Iehova ia Samuela: “A faaroo ia ratou e a faatoroa i te hoê arii no te faatere ia ratou.”+ Parau atura Samuela i te mau taata o Iseraela: “Ia hoˈi te taata tataitahi i to ˈna iho oire.”
9 O Kisa+ te iˈoa o te hoê tane no Beniamina, e tamaiti o ˈna na Abiela, te tamaiti a Zerora, te tamaiti a Bekorata, te tamaiti a Aiphia, no te opu o Beniamina+ e e taata taoˈa rahi oia. 2 E tamaiti ta ˈna o Saula+ te iˈoa, mea apî o ˈna e mea haviti. Aita e tane haviti aˈe ia ˈna i roto i te ati Iseraela, e mea roa ˈˈe oia i te taata atoa, mai to ˈna upoo e tae atu i to ˈna tapono.
3 I te moˈeraa te mau asini* a Kisa, to Saula metua tane, parau maira oia ia Saula ta ˈna tamaiti: “A rave na i te hoê tavini na muri ia oe e a haere e imi i te mau asini.” 4 Haere aˈera raua na te tuhaa fenua mouˈa o Epheraima e na te fenua o Salisa, e aita raua i ite mai ia ratou. Haere aˈera raua na te fenua o Saalima. Aita râ te mau asini i reira. Haere aˈera raua na te fenua taatoa o te ati Beniamina e aita raua i ite mai ia ratou.
5 Tae aˈera raua i te fenua o Zuphe, e na ô atura Saula i ta ˈna tavini tei na muri ia ˈna: “Mai, e hoˈi anaˈe, e haamata to ˈu metua tane i te haapeapea no tâua, eiaha faahou râ no te mau asini.”+ 6 Pahono maira râ te tavini: “A hiˈo na, te vai ra te hoê taata no te Atua i roto i teie oire, e taata faaturahia o ˈna. Te mau mea atoa ta ˈna e parau, e tupu iho â.+ E haere anaˈe i ǒ i teie nei. Peneiaˈe e parau mai oia teihea eˈa e rave.” 7 Parau atura Saula i ta ˈna tavini: “Ia haere tâua, eaha ta tâua e afai na teie taata? Aita e faraoa i roto i ta tâua pute. Aita e mea ta tâua e nehenehe e pûpû ei ô na te taata no te Atua mau. Eaha ta tâua e nehenehe e horoa na ˈna?” 8 Pahono faahou maira ïa te tavini ia Saula: “A hiˈo na, te vai ra hoê tuata sekela* ario i roto i to ˈu rima. E horoa vau i te reira na te taata no te Atua mau e e faaite mai oia i te eˈa e rave.” 9 (I tahito ra i Iseraela, teie ta te hoê taata e parau ia haere oia e ui i te Atua: “Mai, e haere anaˈe e farerei i te taata tatara orama.”+ E parauhia na hoi te peropheta o teie tau e taata tatara orama i tahito ra.) 10 Na ô atura Saula i ta ˈna tavini: “Mea maitai ta oe i parau. E haere anaˈe.” Haere aˈera ïa raua i te oire tei reira te taata no te Atua mau.
11 A pauma ˈi raua i te oire, farerei aˈera raua i te tahi mau tamahine e haere ra e huti i te pape. Ui ihora ïa raua i taua mau tamahine ra: “To reira anei te taata tatara orama?”+ 12 Pahono maira ratou: “To reira o ˈna. A hiˈo, tei mua noa ˈtu o ˈna ia orua. A haaviti, ua haere mai oia i teie mahana i te oire, te pûpû ra hoi te nunaa i te hoê tusia+ i teie mahana i te vahi teitei.+ 13 Ia tomo orua i roto i te oire, e ite orua ia ˈna hou oia a pauma ˈi i te vahi teitei ra no te tamaa. Eita te taata e tamaa e tae noa mai oia, na ˈna hoi e haamaitai i te tusia. Ia oti te reira e nehenehe ai te mau manihini e tamaa. A pauma ˈtu ïa i teie nei, e ite orua ia ˈna.” 14 Haere aˈera ïa raua i te oire. A haere ai raua i ropu i te oire, haere maira Samuela i rapae e farerei ia raua no te pauma ˈtu i te vahi teitei.
15 Te mahana na mua ˈˈe Saula a haere mai ai, ua parau Iehova ia Samuela: 16 “Ananahi, piri i teie hora, e faatae atu vau ia oe ra te tahi tane no te fenua o Beniamina.+ E faatavai oe ia ˈna ei aratai i nia i to ˈu nunaa o Iseraela,+ e e faaora oia i to ˈu nunaa i te rima o te mau Philiseti. Ua ite hoi au i te mauiui o to ˈu nunaa, e ua tae roa ta ratou auê ia ˈu nei.”+ 17 I to Samuela iteraa ia Saula, na ô ihora Iehova ia ˈna: “Teie te taata ta ˈu i parau ia oe: ‘Na ˈna e faatere i to ˈu nunaa.’”+
18 Haafatata ˈtura Saula ia Samuela i ropu i te uputa e na ô atura: “A parau mai na, teihea roa te fare o te taata tatara orama?” 19 Pahono maira Samuela ia Saula: “O vau taua taata tatara orama ra. A haere na mua ˈtu ia ˈu i te vahi teitei, e e tamaa orua ia ˈu ra i teie mahana.+ E vaiiho vau ia oe ia haere ia poipoi, e e faaite vau ia oe i te mau mea atoa ta oe e hinaaro e ite.* 20 No te mau asini tei moˈe a toru mahana i teie nei,+ eiaha e haapeapea no ratou, ua itehia mai hoi ratou. E na vai te mau mea faufaa rahi a Iseraela? E ere anei na oe e na te utuafare taatoa o to oe metua tane?”+ 21 Pahono atura Saula: “E ere anei au no te opu o Beniamina, te opu iti haihai roa ˈˈe o te mau opu o Iseraela,+ e to ˈu utuafare, te utuafare iti haihai roa ˈˈe o te mau utuafare atoa o te opu o Beniamina? No te aha ïa oe i paraparau mai ai ia ˈu mai tera?”
22 Rave ihora Samuela ia Saula e ta ˈna tavini, afai ihora ia raua i te vahi tamaaraa e horoa ˈtura i te parahiraa maitai roa ˈˈe no raua. Piri i te 30 taata ratou i reira. 23 Parau atura Samuela i te tûtu maa: “A afai mai na i te tuhaa ta ˈu i horoa ia oe e i parau atu: ‘A tuu atu i te hiti.’” 24 Rave aˈera te tûtu maa i te huha e te mea e vai ra i nia iho, e tuu ihora i mua ia Saula. Parau atura Samuela: “Ua tuuhia i mua ia oe te mea i tuuhia i te hiti. A amu, ua tuuhia hoi te reira i te hiti na oe no teie taime. Ua parau hoi au ia ratou: ‘E manihini ta ˈu i titau.’” Tamaa ihora ïa Saula ia Samuela ra i taua mahana ra. 25 Pou ihora ratou mai te vahi teitei+ atu i te oire, e paraparau noa ˈtura Samuela ia Saula i nia i te fare. 26 Tia poipoi aˈera raua, e i te aahiata, tuô atura Samuela ia Saula i nia i te fare ma te parau: “A faaineine, e vaiiho vau ia oe ia haere.” Faaineine ihora Saula e haere atura raua Samuela i rapae. 27 A pou ai ratou i te mau otia o te oire, na ô atura Samuela ia Saula: “A parau i to tavini+ ia haere na mua ˈtu ia tâua.” Haere ihora ïa te tavini na mua ˈtu ia raua. Na ô faahou atura Samuela: “O oe râ, a tia noa mai i reira, ia faaite atu vau ia oe te parau a te Atua.”
10 Rave ihora Samuela i te farii monoˈi e manii ihora i te reira i nia i te upoo o Saula.+ Apa ihora oia ia ˈna e parau atura: “Ua faatavai mau â Iehova ia oe ei aratai+ i nia i to ˈna nunaa.+ 2 Ia vaiiho mai oe ia ˈu i teie mahana, e ite oe e piti taata i pihai iho i te menema o Rahela+ i te tuhaa fenua o Beniamina i Zelaza, e e parau raua ia oe: ‘Ua itehia mai te mau asini ta oe i haere e imi. I teie nei râ, aita to oe metua tane e haapeapea faahou ra no te mau asini,+ te haapeapea nei râ no orua. Te parau ra o ˈna: “Eaha ta ˈu e rave i teie nei, aita hoi ta ˈu tamaiti i hoˈi mai?”’ 3 E haere oe mai reira ˈtu i te tumu raau rahi i Tabora, i reira oe e farerei ai e toru taata e haere ra i Betela+ no te haamori i te Atua mau, hoê e amo ra e toru fanauˈa puaaniho, te tahi e amo ra e toru faraoa, e te tahi atu e amo ra hoê farii uaina rahi. 4 E ani ratou ia oe eaha to oe huru e e horoa ˈtu ratou e piti faraoa na oe. Ia farii oe i na faraoa. 5 I muri mai, e haere oe i te aivi o te Atua mau. Te vai ra i reira te hoê puhapa faehau a te mau Philiseti. Ia tae oe i te oire, e farerei oe i te hoê pǔpǔ peropheta e pou mai ra mai te vahi teitei mai, e e hautihia te upaupa taura, te tariparau, te vivo e te kinura na mua ˈtu ia ratou a tohu noa ˈi ratou. 6 E ohipa to Iehova varua i nia ia oe ma te puai.+ E tohu oe e o ratou e e riro oe mai te hoê taata ê atu.+ 7 Ia tupu teie mau tapao, a rave i te mau mea atoa e tia i to rima ia rave, tei ia oe ra hoi te Atua mau. 8 I muri iho, a haere na mua ia ˈu i Gilagala,+ e e haere atu vau ia oe ra no te pûpû i te tusia taauahi e te tusia no te hau. E tiai oe e hitu mahana ia tae atu vau ia oe ra. I reira vau e faaite atu ai ia oe eaha te rave.”
9 I te faarueraa iho â Saula ia Samuela, haamata ihora te Atua i te taui i to ˈna aau ia riro te reira mai te aau o te hoê taata ê atu, e tupu aˈera tera mau tapao atoa i taua iho mahana ra. 10 Haere ihora ïa raua i te aivi, e farerei maira te hoê pǔpǔ peropheta ia ˈna. Ohipa ihora te varua o te Atua i nia ia ˈna+ e haamata ihora oia i te tohu+ i rotopu ia ratou. 11 I to te feia tei matau ia Saula iteraa ia ˈna i te tohuraa e te tahi atu mau peropheta, parau ihora ratou te tahi i te tahi: “Eaha tei tupu i nia i te tamaiti a Kisa? Tei rotopu atoa Saula i te mau peropheta?” 12 Na ô aˈera te hoê taata no reira: “O vai râ to ratou metua tane?” Riro aˈera ïa te reira ei parauraa: “Tei rotopu atoa Saula i te mau peropheta?”+
13 I to ˈna faaotiraa i te tohu, haere atura oia i te vahi teitei. 14 I muri aˈe, parau maira te taeae o to ˈna metua tane ia ˈna e i ta ˈna tavini: “Ua haere orua ihea?” Pahono atura Saula: “Ua haere mâua e imi i te mau asini.+ Aita râ mâua i ite mai ia ratou, haere ihora ïa mâua ia Samuela ra.” 15 Ui maira te taeae o te metua tane o Saula: “A parau mai na, eaha ta Samuela i parau ia orua?” 16 Pahono atura Saula ia ˈna: “Ua parau mai oia e ua ite-ê-na-hia mai te mau asini.” Aita râ Saula i faaite atu e ua parau Samuela e riro mai o ˈna ei arii.
17 Haaputuputu aˈera Samuela i te nunaa i mua ia Iehova i Mizepa+ 18 e parau atura oia i te ati Iseraela: “Teie ta Iehova te Atua o Iseraela e parau ra: ‘Na ˈu i aratai ia Iseraela i rapae ia Aiphiti e i faaora ia outou i te rima o Aiphiti+ e i te rima o te mau faatereraa arii atoa tei hamani ino na ia outou. 19 I teie râ mahana, ua patoi outou i to outou Atua,+ tei riro ei Faaora no outou i roto i to outou mau mauiui e ahoaho atoa, e ua parau outou: “A faatoroa i te hoê arii no matou.” I teie nei, a tia i mua ia Iehova ia au i to outou mau opu fetii e to outou mau utuafare.’”*
20 Titau aˈera ïa Samuela i te mau opu atoa o Iseraela ia tapiri mai,+ e maitihia ihora te opu o Beniamina.+ 21 Titau aˈera oia i te opu o Beniamina ia tapiri mai ia au i to ratou mau utuafare, e maitihia ihora te utuafare o Matari. I te pae hopea, maitihia ihora Saula te tamaiti a Kisa.+ I to ratou râ imiraa ia ˈna, aita o ˈna i itehia mai. 22 Ui aˈera ratou ia Iehova:+ “Tei ǒ nei anei taua taata ra?” Pahono ihora Iehova: “Tei ǒ nei o ˈna te tapuni ra i ropu i te mau taihaa.” 23 Horo aˈera ïa ratou e rave ihora ia ˈna mai reira mai. I to ˈna tiaraa i ropu i te nunaa, ua hau aˈe to ˈna roa i to te mau taata atoa, mai to ˈna upoo e tae atu i to ˈna tapono.+ 24 Parau ihora Samuela i te nunaa taatoa: “Te ite ra anei outou i te taata ta Iehova i maiti?+ Aita ˈtu e taata mai ia ˈna i rotopu i te nunaa taatoa.” Umere aˈera te nunaa taatoa: “Ia ora te arii!”
25 Paraparau ihora Samuela i te nunaa no nia i te tiaraa o te mau arii,+ papai ihora i te reira i roto i te hoê buka e vaiiho ihora i taua buka ra i mua ia Iehova. Vaiiho atura Samuela i te nunaa taatoa ia hoˈi i to ratou fare. 26 Hoˈi atoa ˈtura Saula i to ˈna fare i Gibea apeehia e te mau aito tei turaihia te aau e Iehova. 27 Parau aˈera râ te tahi mau taata haapaoraa ore: “E nafea teie taata e faaora ˈi ia tatou?”+ Vahavaha ihora ïa ratou ia ˈna, e aita ratou i hopoi atu i te ô na ˈna.+ Aita râ oia i parau i te tahi mea no nia i te reira.*
11 Haere maira Nahasa ati Amona+ e puhapa ihora i Iabesa+ i Gileada no te aro i taua oire ra. Na ô aˈera te taata atoa no Iabesa ia Nahasa: “A faaau i te hoê faufaa* ia matou, e e tavini matou ia oe.” 2 Parau maira Nahasa ati Amona ia ratou: “E faaau vau i te faufaa ia outou ia farii outou i teie titauraa: ia paarohia to outou mata atau. E rave au i te reira no te faahaama ia Iseraela taatoa.” 3 Pahono atura te mau matahiapo no Iabesa ia ˈna: “A vaiiho mai e hitu mahana ia tono matou i te vea i te mau tuhaa fenua atoa o Iseraela. E mai te peu e aita hoê aˈe no te faaora ia matou, e auraro matou ia oe.” 4 I muri iho, tae maira te mau vea i Gibea,+ i ǒ Saula, e faaite aˈera ratou i taua mau parau ra i te nunaa. Auê aˈera te nunaa taatoa ma te reo puai.
5 Hoˈi maira râ Saula na te mau vahi aihere mai e te nǎnǎ puaatoro. Ui atura oia: “Eaha tera e tupu ra i rotopu i te nunaa? Eaha ratou e auê ai?” Faaite ihora ïa ratou ia ˈna i te mau parau a to Iabesa. 6 Ohipa ihora te varua o te Atua i nia ia Saula+ i to ˈna faarooraa i teie mau parau, e riri roa aˈera Saula. 7 Rave ihora ïa oia e piti puaatoro oni e tâpûpû ihora ia raua. Tono ihora oia i te vea no te hopoi i taua mau paehaa ra na te mau tuhaa fenua atoa o Iseraela. E parau te mau vea i te nunaa: “Te feia atoa o te ore e pee ia Saula raua Samuela, e na reira-atoa-hia ta ratou nǎnǎ puaatoro!” Roohia ihora te nunaa i te mǎtaˈu ia Iehova, e faaoti ihora ratou paatoa i te amui.* 8 Taio ihora oia ia ratou i Bezeka: e 30 000 feia ati Iuda e e 300 000 feia no te tahi atu mau opu. 9 Na ô atura ratou i te mau vea tei haere mai: “Teie ta outou e parau i to Iabesa i Gileada, ‘Ananahi, ia puai te mahana, e faaorahia outou.’” Haere aˈera te mau vea e faaite i tera poroi i to Iabesa, e oaoa roa aˈera ratou. 10 Na ô ihora ïa to Iabesa i te ati Amona: “Ananahi, e auraro matou ia outou e e rave outou ia matou mai ta outou e hinaaro.”+
11 I te mahana i muri iho, vahi ihora Saula i te nunaa e toru pǔpǔ. Haere aˈera ratou i ropu i te puhapa i te araraa poipoi* e haapohe ihora i te ati Amona+ e tae noa ˈtu i te taime a puai ai te mahana. Ua haapurara-ê-hia tei ora mai, ua horo te taata tataitahi i to ˈna pae. 12 Na ô aˈera te nunaa ia Samuela: “Teihea roa tera mau taata tei ore i hinaaro ia Saula ei arii no matou?+ A tuu mai i taua mau taata ra ia haapohe matou ia ratou.” 13 Tera râ, na ô atura Saula: “Eiaha te tahi taata ia haapohehia i teie mahana,+ ua faaora hoi Iehova ia Iseraela i teie mahana.”
14 I muri aˈe, parau aˈera Samuela i te nunaa: “Mai e haere anaˈe i Gilagala+ no te faaite faahou i te tiaraa arii o Saula.”+ 15 Haere aˈera ïa te nunaa taatoa i Gilagala. I reira Saula i te faaariiraahia i mua ia Iehova. Pûpûhia ˈtura te tusia no te hau i reira, i mua ia Iehova,+ e arearea aˈera Saula e to Iseraela taatoa ma te oaoa rahi.+
12 Na ô atura Samuela ia Iseraela taatoa: “Inaha ua rave au* i te mau mea atoa ta outou i ani mai ia ˈu, e ua faatoroa vau i te hoê arii no te faatere ia outou.+ 2 I teie nei, teie te arii o te aratai* ia outou!+ O vau râ, ua paari roa vau e ua hinahinahia, e tei ia outou ra ta ˈu na tamaiti.+ Ua aratai au ia outou mai to ˈu apîraa mai â e tae roa mai i teie mahana.+ 3 Teie au. A faahapa ia ˈu i mua ia Iehova e i mua i ta ˈna i faatavai:+ Ta vai puaatoro oni aore ra ta vai asini ta ˈu i rave?+ O vai ta ˈu i faaere aore ra i haavî? I to vai rima i farii ai au i te peta no te faahuru ê i te haavaraa?+ A parau mai e e faahoˈi atu vau i ta ˈu i rave.”+ 4 Parau maira to Iseraela ia ˈna: “Aita oe i faaere aore ra i haavî ia matou, e aita oe i farii i te tahi noa ˈˈe mea i te rima o te tahi taata.” 5 Na ô atura ïa oia ia ratou: “O Iehova to ˈu ite i teie mahana, e te tane ta ˈna i faatavai: aita e mea e faahapa ˈi outou ia ˈu.”* Parau maira ratou: “E ite oia no oe.”
6 Na ô atura ïa Samuela i te nunaa: “E ite o Iehova, o tei faaohipa ia Mose raua Aarona e o tei aratai i to outou mau tupuna i rapae i te fenua o Aiphiti.+ 7 E i teie nei, a tia mai, e e haava vau ia outou i mua ia Iehova ia au i te mau ohipa parau-tia atoa ta Iehova i rave no outou e no to outou mau tupuna.
8 “I to Iakoba iho â taeraa mai i Aiphiti+ e i te haamataraa to outou mau tupuna i te ani i te tauturu ia Iehova,+ tono ihora Iehova ia Mose+ raua Aarona no te aratai i to outou mau tupuna i rapae i Aiphiti e no te haaparahi ia ratou i teie vahi.+ 9 Ua moˈe râ ia ratou o Iehova to ratou Atua. Tuu ihora oia ia ratou+ i te rima o Sisera+ te raatira o te nuu a Hazora, i te rima o te mau Philiseti+ e i te rima o te arii o Moabi,+ e aro maira to ratou mau enemi ia ratou. 10 Ani aˈera ratou i te tauturu ia Iehova+ e parau atura: ‘Ua hara matou,+ ua faarue hoi matou ia Iehova no te haamori i te mau Baala+ e te mau hohoˈa o Asetoreta.+ I teie nei, a faaora ia matou i te rima o to matou mau enemi ia tavini matou ia oe.’ 11 Tono ihora ïa Iehova ia Ierubaala,+ ia Bedana, ia Iepheta+ e ia ˈu iho.*+ Faaora maira oia ia outou i te rima o te mau enemi ati aˈe ia outou, ia parahi outou ma te hau.+ 12 I to outou iteraa ia Nahasa,+ te arii o te ati Amona, i te haereraa mai e aro ia outou, parau noa maira outou ia ˈu: ‘Ua faaoti matou ei arii te faatere ia matou!’+ noa ˈtu o Iehova to outou Atua to outou Arii.+ 13 I teie nei, teie te arii ta outou i maiti, o ta outou i ani. Inaha! Ua faatoroa Iehova i te hoê arii no outou.+ 14 Ia mǎtaˈu outou ia Iehova,+ ia tavini outou ia ˈna,+ ia faaroo outou i to ˈna reo,+ ia ore outou e patoi i te faaueraa a Iehova e ia pee outou e te arii atoa o te faatere ra ia outou ia Iehova to outou Atua, mea maitai roa ïa. 15 Ia ore râ outou e faaroo i te reo o Iehova e ia patoi outou i te faaueraa a Iehova, e faautua Iehova ia outou e to outou mau metua.+ 16 I teie nei, a tia mai e a hiˈo i teie ohipa faahiahia ta Iehova e rave ra i mua i to outou mata. 17 E ere anei te ootiraa sitona i teie mahana? E ani au ia Iehova ia faaharuru i te patiri e ia faatopa i te ûa. Ia ite e ia taa ia outou i te ohipa ino ta outou i rave i te aro o Iehova i to outou aniraa i te hoê arii no outou.”+
18 Tiaoro aˈera Samuela ia Iehova. Faaharuru ihora Iehova i te patiri e faatopa maira i te ûa i taua mahana ra. Mǎtaˈu roa ihora te nunaa taatoa ia Iehova e ia Samuela. 19 Parau maira te nunaa taatoa ia Samuela: “A pure na ia Iehova to Atua no matou,+ no te mea eita matou e hinaaro e pohe, ua apiti hoi matou i te tahi atu ino i ta matou mau hara i to matou aniraa i te hoê arii.”
20 Na ô atura ïa Samuela i te nunaa: “Eiaha e mǎtaˈu. Ua rave iho â outou i teie mau ohipa ino. Eiaha râ e faaea i te pee ia Iehova.+ A tavini ia Iehova ma to outou aau atoa.+ 21 Eiaha e faarue ia ˈna no te imi i te mau mea faufaa ore,*+ aita hoi e apî+ e eita te reira e nehenehe e faaora mai, no te mea mea faufaa ore te reira.* 22 No to ˈna iˈoa rahi,+ eita Iehova e faarue ia outou,+ ua maiti hoi Iehova i te faariro ia outou ei nunaa no ˈna.+ 23 O vau râ, eita ta ˈu e nehenehe e hara ia Iehova ma te faaea i te pure no outou. E tamau vau i te haapii ia outou i te eˈa maitai e te tia. 24 Area outou, a mǎtaˈu ia Iehova,+ e a tavini ia ˈna ma te haapao maitai* ma to outou aau taatoa, ua rave hoi oia i te mea faahiahia no outou.+ 25 Ia rave râ outou i te mea ino ma te haama ore, e haamouhia outou,+ outou e to outou arii.”+
13 E . . .* matahiti to Saula i to ˈna riroraa mai ei arii+ no Iseraela. I te piti o te matahiti te faatereraa oia, 2 maiti ihora oia 3 000 tane i rotopu i te ati Iseraela: 2 000 ia ˈna ra i Mîkamasa e i te tuhaa fenua mouˈa o Betela e 1 000 ia Ionatana+ ra i Gibea,+ i te tuhaa fenua o Beniamina. Parau ihora oia i te toea o te mau faehau ia hoˈi i to ratou mau fare ie. 3 Tairi ihora Ionatana i te puhapa faehau a te mau Philiseti+ i Geba,+ e faaroo aˈera te mau Philiseti i te reira. Faaue ihora Saula ia faaotohia te pu tara+ na te fenua taatoa a na ô ai: “Ia faaroo te mau Hebera!” 4 Faaroo aˈera Iseraela paatoa i teie parau apî: “Ua tairi Saula i te hoê puhapa faehau a te mau Philiseti, e i teie nei ua riro Iseraela ei faufauraa no te mau Philiseti.” Titauhia ˈtura ïa te nunaa ia apee ia Saula i Gilagala.+
5 Haaputuputu atoa aˈera te mau Philiseti no te aro ia Iseraela e 30 000 pereoo tamaˈi, 6 000 taata faahoro puaahorofenua e te faehau mai te one tahatai te rahi.+ Haere maira ratou e patia i to ratou puhapa i Mîkamasa i hitia o te râ o Bete-avena.+ 6 Ite aˈera te mau tane ati Iseraela i to ratou ati, to roto hoi ratou i te hoê tupuraa ahoaho. Tapuni aˈera te nunaa i roto i te mau ana,+ te mau apoo, te mau mato, te mau apoo i raro aˈe i te fenua, e te mau apoo pape. 7 Haere atoa aˈera te tahi mau Hebera na Ioridana ˈtu i te fenua o Gada e Gileada.+ Tei Gilagala noa râ Saula, e ua mǎtaˈu te feia atoa o tei na muri ia ˈna. 8 Tiai noa ˈtura oia e hitu mahana mai ta Samuela i parau ia ˈna. Aita râ Samuela i tae mai i Gilagala, e haamata ˈtura te taata i te purara ê. 9 Parau atura Saula: “A afai mai i te animara no te tusia taauahi e te mau tusia no te hau.” Pûpû ihora oia i te tusia taauahi.+
10 Tera râ, i te otiraa iho â te tusia taauahi i te pûpûhia e ana, tae maira Samuela. Haere ihora ïa Saula e farerei ia ˈna e haamaitai atura ia ˈna. 11 Na ô maira Samuela: “Eaha ta oe i rave?” Pahono atura Saula: “Ua ite au i te nunaa i te faarueraa ia ˈu,+ aita oe i tae mai i roto i te area taime faataahia e ua haaputuputu te mau Philiseti i Mîkamasa.+ 12 Feruri ihora ïa vau: ‘I teie nei e pou mai te mau Philiseti e aro ia ˈu i Gilagala, e aita vau i imi i te farii maitai a* Iehova.’ Manaˈo atura ïa vau e pûpû i te tusia taauahi.”
13 Parau maira Samuela ia Saula: “E ohipa maamaa ta oe i rave. Aita oe i haapao i te faaueraa ta Iehova to Atua i horoa ia oe.+ Ahani oe i haapao i ta ˈna faaueraa, ua haamau papu ïa Iehova i ta oe faatereraa i nia ia Iseraela e a muri noa ˈtu. 14 I teie nei râ, eita ta oe faatereraa arii e vai maoro.+ E itea mai ia Iehova te tahi taata e au i to ˈna aau,+ e e faatoroa Iehova ia ˈna ei aratai no to ˈna nunaa,+ no te mea aita oe i haapao i ta Iehova i faaue ia oe.”+
15 Faarue aˈera Samuela ia Gilagala e pauma aˈera i Gibea i Beniamina. Taio ihora Saula i te taata tei faaea mai ia ˈna ra: piri i te 600 ratou.+ 16 Te parahi ra Saula, Ionatana ta ˈna tamaiti e te feia tei faaea mai ia raua ra i Geba,+ i te tuhaa fenua o Beniamina. Area te mau Philiseti, ua puhapa ïa i Mîkamasa.+ 17 E haere na te mau faehau haru taoˈa mai roto mai i te puhapa a te mau Philiseti ei toru pǔpǔ. E haere hoê pǔpǔ na te purumu e tae atu ai i Ophera, i te fenua o Suala, 18 e haere te tahi atu pǔpǔ na te purumu o Bete-horona.+ E te toru o te pǔpǔ, e haere ïa ratou na te purumu e tae atu ai i te otia i mua noa mai i te peho o Zeboima, i te pae medebara.
19 Aita râ e taata tupai auri i itehia i te fenua taatoa o Iseraela. I parau na hoi te mau Philiseti: “Eiaha te mau Hebera e hamani i te ˈoˈe aore ra te omore.” 20 E ua titauhia ia pou te ati Iseraela atoa i ǒ te mau Philiseti no te faaoi i ta ratou mau auri arote, toˈi, opahi, aore ra tipi fefe. 21 Hoê pima* te tino moni no te faaoi i te mau auri arote, te mau toˈi, te mau patia e toru niho, te mau opahi, e no te tataî i te patia puaatoro. 22 No reira i te mahana aroraa, aita e ˈoˈe aore ra e omore i roto i te rima o te mau taata tei na muri ia Saula raua Ionatana.+ Ta Saula anaˈe e ta Ionatana ta ˈna tamaiti te mauhaa.
23 I haere na râ te hoê pǔpǔ faehau a te mau Philiseti i te afaa o Mîkamasa.+
14 I te hoê mahana, parau ihora Ionatana+ te tamaiti a Saula i te tavini e amo ra i ta ˈna mau mauhaa: “Mai, haere anaˈe i ǒ mai, i te puhapa faehau Philiseti i te tahi atu pae.” Aita râ oia i faaara i to ˈna metua tane. 2 Te faaea noa ra Saula i te otia o Gibea+ i raro aˈe i te tumu remuna i Migerona, e piri i te 600 taata ia ˈna ra.+ 3 (E o Ahia tei oomo i te tiputa.+ E tamaiti oia na Ahituba,+ te tuaana o Ikaboda,+ te tamaiti a Phinehasa,+ te tamaiti a Eli,+ te tahuˈa a Iehova i Silo.)+ Aita atoa te mau faehau i ite e ua haere o Ionatana. 4 Tera râ, i te pae tataitahi o te eˈa ta Ionatana i tamata i te rave e tae atu ai i te puhapa faehau a te mau Philiseti, te vai ra te tahi mato mai te niho ra te hohoˈa. O Bozeza te iˈoa o te hoê, e o Sene te iˈoa o te tahi atu. 5 Te mato i mua ia Mîkamasa i apatoerau, e pou ïa. E tei apatoa te tahi atu mato i mua ia Geba.+
6 Parau atura ïa Ionatana i ta ˈna tavini amo mauhaa: “Mai, haere anaˈe i te puhapa faehau a tera mau tane aita i peritomehia.+ Peneiaˈe e tauturu Iehova ia tâua, aita hoi e mea e nehenehe e haafifi ia Iehova ia hinaaro oia e horoa i te upootiaraa, mea rahi anei aore ra mea iti tatou.”+ 7 Na ô maira ïa ta ˈna tavini amo mauhaa: “A rave i ta to aau e turai ia oe ia rave. A haere i te vahi ta oe e hinaaro, e pee au ia oe i te vahi ta oe e haere.” 8 Parau atura Ionatana: “E haere tâua i tera mau taata ra, a faaite atu ai ia tâua ia ratou. 9 Ia parau mai ratou: ‘A faaea noa i reira, te haere atu nei matou!,’ e faaea noa ïa tâua i te vahi to reira tâua e eita tâua e pauma ia ratou ra. 10 Ia parau râ ratou: ‘A pauma mai e aro ia matou!,’ e pauma ïa tâua, no te mea e tuu mai Iehova ia ratou i to tâua rima. Tera ta tâua tapao.”+
11 Faaite atura raua e piti ia raua i te puhapa faehau a te mau Philiseti. Na ô aˈera te mau Philiseti: “A hiˈo! Te haere mai ra te mau Hebera i rapae i te mau apoo i reira ratou i te tapuniraa.”+ 12 Na ô maira ïa to te puhapa faehau ia Ionatana e ta ˈna tavini amo mauhaa: “A pauma mai, e ite mai orua ta orua!”+ Parau ihora Ionatana i ta ˈna tavini amo mauhaa: “A pee mai ia ˈu, e tuu hoi Iehova ia ratou i te rima o Iseraela.”+ 13 Pauma aˈera Ionatana ma te nee i nia i to ˈna rima e avae, e to muri mai ta ˈna tavini amo mauhaa ia ˈna. Taparahi ihora Ionatana i te mau Philiseti, e na ta ˈna tavini amo mauhaa i muri mai ia ˈna i haapohe ia ratou. 14 I roto i te taparahiraa matamua a Ionatana raua ta ˈna tavini amo mauhaa, ua haapohe raua piri i te 20 taata i nia i te hoê tuhaa poto.*
15 Riaria aˈera to te puhapa e te mau faehau atoa, ua riaria atoa te mau faehau haru taoˈa.+ Aueue ihora te fenua e faatupu ihora te Atua i te riaria i rotopu i te mau Philiseti. 16 Ite aˈera ta Saula mau tiai i Gibea,+ i te fenua o Beniamina e te rahi noa ˈtu ra te arepurepuraa.+
17 Parau atura Saula i te mau faehau ia ˈna ra: “A taio na ehia tatou e a hiˈo o vai tei faarue mai ia tatou.” I to ratou taioraa, ite aˈera ratou e aita Ionatana e ta ˈna tavini amo mauhaa. 18 Parau atura Saula ia Ahia:+ “A afai mai i te Afata a te Atua mau!” (Tei te ati Iseraela ra hoi te Afata a te Atua mau i taua taime ra.*) 19 A paraparau ai Saula i te tahuˈa, te uˈana noa ˈtu ra te arepurepuraa i te puhapa o te mau Philiseti. Parau atura Saula i te tahuˈa: “A faaea i ta oe e rave ra.” 20 Haaputuputu ihora ïa Saula e pauroa te faehau ia ˈna ra, e reva ˈtura i te aroraa. I reira, ite aˈera ratou i te mau Philiseti te taparahi ra te tahi i te tahi i te ˈoˈe, e mea huehue roa. 21 Area te mau Hebera o tei turu na i te mau Philiseti e o tei haere na muri ia ratou i te puhapa, ua tia ïa i te pae o Iseraela, ia Saula ra raua Ionatana. 22 Faaroo aˈera te mau tane o Iseraela tei tapuni+ i te tuhaa fenua mouˈa o Epheraima e ua horo ê te mau Philiseti. Aˈuaˈu atoa aˈera ratou i te mau Philiseti ma te aro ia ratou. 23 Faaora ihora ïa Iehova ia Iseraela i taua mahana ra,+ e tae roa aˈera te aroraa i Bete-avena.+
24 Tera râ, ua paruparu roa te mau faehau o Iseraela i taua mahana ra, ua horeo hoi Saula no ratou: “Ia vai te ino i nia i te taata o te amu i te maa* hou a topa ˈi te mahana e hou vau a tahoo ai i to ˈu mau enemi!” Aita ïa hoê aˈe o ratou i amu i te maa.+
25 Haere aˈera te mau faehau* atoa i roto i te uru raau, e e meri to raro. 26 I to te mau faehau haereraa na roto i te uru raau, ite aˈera ratou i te meri e topatapata ra, aita râ hoê aˈe i amu i te reira, no to ratou hoi mǎtaˈu i te horeo. 27 Aita râ Ionatana i ite e ua horeo to ˈna metua tane no te mau faehau.+ Toro ihora ïa oia i te muaraa o te raau i roto i to ˈna rima e patia ihora i roto i te meri. I to ˈna amuraa i te reira, itoitohia maira oia.* 28 Parau maira hoê o te mau faehau: “Ua horeo to oe metua tane no te mau faehau ma te parau: ‘Ia vai te ino i nia i te taata o te amu i te maa i teie mahana!’+ No reira te mau faehau i paruparu roa ˈi.” 29 Tera râ, na ô atura Ionatana: “E ati rahi ta to ˈu metua tane i faatae mai i nia i te nunaa. A hiˈo na, ua itoitohia vau i to ˈu amuraa maa meri. 30 Hau atu â ïa te mau faehau ahani ratou i amu noa+ i teie mahana i te maa a to ratou mau enemi tei itea mai ia ratou! Mea rahi atu â ïa te Philiseti tei haapohehia.”
31 I taua mahana ra, haapohe noa ˈtura ratou i te mau Philiseti mai Mîkamasa e tae atu i Aialona,+ e paruparu roa aˈera te mau faehau. 32 Haamata aˈera ïa te mau faehau i te haru ma te popore i tei noaa mai ia ratou: ua rave ratou i te mamoe, te puaatoro e te fanauˈa puaatoro, ua tupai ratou i te reira i raro i te repo e ua amu ratou i te iˈo e te toto.+ 33 Faatiahia maira ia Saula: “A hiˈo na! Te hara ra te mau faehau ia Iehova ma te amu i te iˈo e te toto.”+ Na ô atura Saula: “Ua taiva outou. A turai haaviti mai i te hoê ofai rahi ia ˈu nei.” 34 Na ô atura oia: “A haere na rotopu i te mau faehau e a parau ia ratou: ‘E afai mai outou tataitahi i ta outou puaatoro oni e ta outou mamoe, e e tupai outou i te reira i nia i teie ofai, a amu atu ai. Eiaha e hara ia Iehova ma te amu i te iˈo e te toto.’”+ Putô maira ïa ratou tataitahi i ta ratou puaatoro oni i taua po ra e tupai aˈera i te reira i taua vahi ra. 35 Hamani ihora ïa Saula i te hoê fata na Iehova.+ Tera te fata matamua ta ˈna i hamani na Iehova.
36 I muri iho, parau atura Saula: “E pou anaˈe e aˈuaˈu i te mau Philiseti i teie po, a haru atu ai i ta ratou mau taoˈa e poipoi noa ˈtu. Eita tatou e vaiiho hoê noa ˈˈe ia ora.” Na ô maira ratou: “A rave i te mau mea atoa ta oe e manaˈo ra e mea maitai.” Na ô ihora te tahuˈa: “E ui anaˈe i te Atua mau i ǒ nei.”+ 37 Ui aˈera Saula i te Atua: “Mea tano anei ia pou vau e aˈuaˈu i te mau Philiseti?+ E tuu anei oe ia ratou i te rima o Iseraela?” Aita râ te Atua i pahono ia ˈna i taua mahana ra. 38 Na ô atura ïa Saula: “A haere mai i ǒ nei, te mau raatira atoa o te mau faehau, e a imi eaha te hara i ravehia i teie mahana. 39 Te horeo nei au i te ora o Iehova, tei faaora ia Iseraela, noa ˈtu e o Ionatana ta ˈu tamaiti tei hara, e pohe oia.” Aita râ hoê aˈe faehau i pahono ia ˈna. 40 Na ô atura oia i te ati Iseraela taatoa: “Ei te hoê pae outou, e ei te tahi atu pae mâua Ionatana ta ˈu tamaiti.” Parau maira ratou ia Saula: “A rave i te mea ta oe e manaˈo ra e mea maitai.”
41 Parau aˈera Saula ia Iehova: “E te Atua o Iseraela, a pahono mai na na roto i te Tumima!”+ O Ionatana raua Saula tei tanohia, e tiamâ aˈera te toea o ratou. 42 Na ô atura Saula: “A tuu i te kelero*+ no te ite o vau anei aore ra o Ionatana ta ˈu tamaiti.” E o Ionatana tei maitihia. 43 Na ô atura Saula ia Ionatana: “A parau mai, eaha ta oe i rave?” Parau maira ïa Ionatana: “Ua amu noa vau maa meri i nia i te muaraa o teie raau e vai ra i roto i to ˈu rima.+ Teie au! Ua ineine au i te pohe!”
44 Na ô atura Saula: “Ia faautua rahi mai te Atua ia ˈu ia ore oe e pohe, Ionatana.”+ 45 Na ô maira râ te mau faehau ia Saula: “Mea tano anei ia pohe Ionatana, tei horoa ia Iseraela i teie upootiaraa rahi?+ Eiaha roa ˈtu! Te horeo nei matou i te ora o Iehova te Atua ora, eita hoê rouru o to ˈna upoo e marua i raro. Maoti hoi te tauturu a te Atua i rave ai oia i tera ohipa i teie mahana.”+ Ora maira ïa Ionatana i te mau faehau, e aita oia i haapohehia.
46 Faaea ihora ïa Saula i te aˈuaˈu i te mau Philiseti, e hoˈi aˈera te mau Philiseti i to ratou iho tuhaa fenua.
47 Haapapu atura Saula i to ˈna tiaraa arii i nia ia Iseraela e aro atura i to ˈna mau enemi atoa ati aˈe ia ˈna: te ati Moabi,+ te ati Amona,+ te ati Edoma,+ te mau arii o Zoba+ e te mau Philiseti.+ E i te mau vahi atoa i haere ai oia, ua pau ratou ia ˈna. 48 Ua aro oia ma te itoito. Upootia ˈtura oia i nia i te ati Amaleka,+ e faaora maira oia ia Iseraela i te rima o to ratou mau enemi.
49 Na tamaiti a Saula, o Ionatana, Isui e Maleki-sua.+ E piti tamahine ta ˈna. O Meraba+ te iˈoa o te matahiapo e o Mikala+ te iˈoa o te piti. 50 O Ahinoama te iˈoa o te vahine faaipoipo a Saula, e tamahine na Ahimaaza. O Abinera+ te iˈoa o te raatira o ta ˈna nuu, e tamaiti na Nere e e teina no te metua tane o Saula. 51 O Kisa+ te metua tane o Saula. E metua tane o Nere+ no Abinera, e e tamaiti na Abiela.
52 E tamaˈi rahi tei tupu e te mau Philiseti i te mau mahana atoa o Saula.+ Ia ite noa ˈtu Saula i te tahi tane puai e te itoito, e rave oia ia ˈna i roto i ta ˈna nuu.+
15 Parau atura Samuela ia Saula: “Ua tono mai Iehova ia ˈu no te faatavai ia oe ei arii i nia i to ˈna nunaa o Iseraela.+ I teie nei, a faaroo i te parau a Iehova.+ 2 Teie ta Iehova o te mau nuu* e parau ra: ‘E tahoo vau i te ati Amaleka no ta ratou i rave ia Iseraela, i to ratou aroraa ia ratou a haere mai ai ratou i rapae i Aiphiti.+ 3 I teie nei a haere, a tairi i te ati Amaleka+ e a faataa ia ratou e ta ratou mau faufaa atoa no te haamouraa.+ Eiaha oe e faaherehere* ia ratou. E haapohe oe ia ratou,+ te tane e te vahine, te tamarii e te aiû, te puaatoro oni e te mamoe, te kamela e te asini.’”+ 4 Haaputuputu ihora Saula i te nuu e taio ihora i te mau tane i Telaima: 10 000 faehau no te opu o Iuda e 200 000 faehau haere avae no te tahi atu mau opu o Iseraela.+
5 Haere roa ˈtura Saula i te oire o Amaleka e tiai ihora ma te tamoemoe i roto i te peho. 6 Na ô atura Saula i te ati Keni:+ “A haere, a faaatea ê ia outou i te ati Amaleka ia ore au e haapohe ia outou e o ratou atoa.+ Ua faaite hoi outou i te here taiva ore i te nunaa taatoa o Iseraela+ i to ratou haereraa mai i rapae i Aiphiti.” Faaatea ê maira ïa te ati Keni i te ati Amaleka. 7 I muri iho, tairi ihora Saula i te ati Amaleka+ mai Havila+ e tae atu i Sura,+ i pihai iho ia Aiphiti. 8 Haru ihora oia ia Agaga+ te arii o Amaleka. Area te toea o te taata, ua haapohehia ïa na ˈna i te ˈoˈe.+ 9 Ua faaherehere* râ Saula e to ˈna mau taata ia Agaga e te mau animara maitai roa ˈˈe o te nǎnǎ mamoe, te nǎnǎ puaatoro, te animara haaporiahia, te mamoe oni, e pauroa te mea maitai.+ Aita ratou i hinaaro e faataa i te reira no te haamouraa. Area te mau mea faufaa ore e te hinaaro-ore-hia, tera ta ratou i haamou.
10 Tae maira te parau a Iehova ia Samuela: 11 “Te tatarahapa* nei au i to ˈu faaariiraa ia Saula, ua faaea hoi oia i te pee ia ˈu e aita oia i haapao i ta ˈu mau parau.”+ Ahoaho roa ihora Samuela, e taparuparu noa ˈtura ia Iehova i taua po taatoa ra.+ 12 I to Samuela tiaraa i te poipoi roa no te farerei ia Saula, parauhia maira ia Samuela: “Ua haere Saula i Karemela,+ e i reira ua faatia oia i te hoê pou ei haamanaˈoraa ia ˈna.+ I muri iho, fariu atura oia e pou atura i Gilagala.” 13 I to Samuela taeraa ˈtu ia Saula ra, na ô maira Saula ia ˈna: “Ia haamaitai Iehova ia oe. Ua rave au i ta Iehova i parau.” 14 Parau atura râ Samuela: “Eaha ïa te umeeraa mamoe e te umoraa puaatoro ta ˈu e faaroo nei?”+ 15 Na ô maira ïa Saula: “Ua ravehia mai te reira i te ati Amaleka ra, ua faaherehere hoi to ˈu mau taata i te mau mamoe e te mau puaatoro maitai roa ˈˈe ei tusia na Iehova to Atua. Area te toea, ua haamouhia ïa.” 16 Parau atura Samuela ia Saula: “Ua navai tera! E faaite au ia oe i ta Iehova i parau mai ia ˈu inapo ra.”+ Na ô maira ïa oia: “A parau mai!”
17 Parau faahou atura Samuela: “Aita anei oe i haafaufaa ore ia oe+ i te faariroraahia oe ei aratai no te mau opu o Iseraela e i to Iehova faatavairaa ia oe ei arii no Iseraela?+ 18 I muri aˈe, tono atura Iehova ia oe no te hoê ohipa e parau atura: ‘A haere e haamou i te ati Amaleka+ rave hara. A aro ia ratou e ia mou roa ˈtu ratou ia oe.’+ 19 No te aha ïa oe i ore ai i faaroo i te parau a Iehova? Ua haru oe ma te popore i te faufaa a to oe mau enemi+ e ua rave oe i te mea ino i te aro o Iehova!”
20 Tera râ, na ô maira Saula ia Samuela: “Ua faaroo hoi au i te parau a Iehova! Ua haere au e rave i te ohipa i tonohia ˈi au e Iehova. Ua faahoˈi mai au ia Agaga te arii o Amaleka, ua haamou râ vau i te ati Amaleka.+ 21 Na to ˈu mau taata i rave i te mamoe e te puaatoro i roto i te faufaa a te mau enemi tei faataahia no te haamouraa, te mau animara maitai roa ˈˈe, no te pûpû ei tusia na Iehova to Atua i Gilagala.”+
22 Parau atura Samuela: “E mauruuru Iehova i te aha? Te tusia animara+ aore ra te auraroraa i te parau a Iehova? Inaha, ia auraro, mea maitai aˈe ïa i te tusia,+ e ia faaroo maite, mea maitai aˈe ïa i te mii+ o te mau mamoe oni. 23 Hoê â hoi te faaroo ore*+ e te hara o te peu hiˈohiˈo,+ e hoê â te teoteo e te faaohiparaa i te mana tahutahu e te haamoriraa idolo.* No te mea aita oe i haapao i te parau a Iehova,+ ua faarue oia ia oe e eita oe e arii faahou.”+
24 Na ô maira Saula ia Samuela: “Ua hara vau, aita vau i faaroo i te faaueraa a Iehova e ta oe mau parau, ua mǎtaˈu hoi au i te taata e ua faaroo vau i ta ratou i parau. 25 I teie nei, a faaore mai na i ta ˈu hara, e e haere anaˈe tâua, ia tipapa vau i mua ia Iehova.”+ 26 Parau atura râ Samuela ia Saula: “Eita vau e haere na muri ia oe, aita hoi oe i haapao i te parau a Iehova, e ua faarue Iehova ia oe. Eita oe e arii faahou i nia ia Iseraela.”+ 27 A fariu ai Samuela no te haere, haru ihora Saula i te hiti o to ˈna ahu aita e rima. Mahae ihora râ te ahu. 28 Parau atura ïa Samuela: “Ua iriti ê Iehova i te faatereraa arii o Iseraela ia oe i teie mahana, e e horoa oia i te reira i te hoê o to oe mau taata tupu mea maitai aˈe ia oe.+ 29 Hau atu â, eita te Atua teitei o Iseraela+ e haavare+ e eita oia e taui i to ˈna manaˈo.* E ere hoi oia i te taata e taui ai oia i to ˈna manaˈo.”*+
30 Na ô maira Saula: “Ua hara vau. Tera râ, a faatura mai na ia ˈu i mua i te mau matahiapo o to ˈu nunaa e i mua ia Iseraela. E haere anaˈe tâua, a tipapa ˈtu ai au i mua ia Iehova to Atua.”+ 31 Haere ihora ïa Samuela na muri ia Saula e tipapa ihora Saula i mua ia Iehova. 32 Parau atura Samuela: “A aratai mai ia Agaga te arii o Amaleka i pihai iho ia ˈu.” Haere maira Agaga ia ˈna ra ma te hinaaro ore,* ua parau hoi Agaga ia ˈna iho: ‘Mea papu eita vau e haapohe-faahou-hia.’* 33 Tera râ, parau ihora Samuela: “Mai ta oe ˈoˈe i faaere i te mau vahine i te tamarii, e riro atoa to metua vahine ei vahine ere roa ˈˈe i te tamarii i rotopu i te mau vahine.” Haapohe ihora Samuela ia Agaga i te ˈoˈe i mua ia Iehova i Gilagala.+
34 Hoˈi atura Samuela i Rama, e pauma aˈera Saula i ǒ ˈna i Gibea. 35 Aita Samuela i ite faahou ia Saula e tae roa i te mahana o to ˈna poheraa. Ua mauiui roa Samuela no Saula.+ E tatarahapa ihora Iehova i to ˈna faaariiraa ia Saula i nia ia Iseraela.+
16 Parau maira Iehova ia Samuela: “Ehia maororaa oe e oto ai no Saula,+ ta ˈu i faarue ia ore oia e faatere faahou ei arii no Iseraela?+ A faaî i ta oe farii* i te monoˈi+ e a haere. E tono vau ia oe ia Iese+ ra no Betelehema, no te mea ua maiti au i te hoê arii na ˈu i rotopu i ta ˈna mau tamaiti.”+ 2 Na ô atura râ Samuela: “Ia haere au i ǒ, e faaroo Saula i te reira e e haapohe oia ia ˈu.”+ Pahono maira Iehova: “A rave i te hoê fanauˈa puaatoro ufa na muri ia oe e a parau: ‘Ua haere mai au e pûpû i te tusia ia Iehova.’ 3 A titau ia Iese i te pûpûraa tusia. I muri iho vau e faaite ai ia oe eaha te rave. E faatavai oe no ˈu i te taata ta ˈu e faaite atu ia oe.”+
4 Rave ihora Samuela i ta Iehova i parau. I to ˈna haereraa i Betelehema,+ rûrû aˈera te mau matahiapo o te oire i te farereiraa ia ˈna, e parau maira ratou: “E tere hau anei teie to oe?” 5 Na ô atura Samuela: “E tere hau teie. Ua haere mai au e pûpû i te tusia ia Iehova. A haamoˈa ia outou, e a haere atoa mai i te pûpûraa tusia.” Haamoˈa ihora oia ia Iese e ta ˈna mau tamaiti e titau ihora oia ia ratou i te pûpûraa tusia. 6 I to ratou taeraa mai e i to ˈna iteraa ia Eliaba,+ na ô ihora oia: “Mea papu teie i mua ia Iehova ta ˈna i faatavai.” 7 Tera râ, na ô maira Iehova ia Samuela: “Eiaha e haapao i to ˈna hohoˈa e to ˈna roa,+ aita hoi au i maiti ia ˈna. E ere hoi te hiˈoraa a te taata mai te hiˈoraa a te Atua, no te mea e hiˈo te taata i ta to ˈna mata e ite ra. E hiˈo râ Iehova i roto i te aau.”+ 8 Pii ihora Iese ia Abinadaba+ e aratai ihora ia ˈna i mua ia Samuela. Na ô atura râ Samuela: “Aita atoa Iehova i maiti i teie.” 9 Faaite maira Iese ia Sama.+ Na ô atura râ Samuela: “Aita atoa Iehova i maiti i teie.” 10 Ua aratai mai ïa Iese e hitu o ta ˈna mau tamaiti i mua ia Samuela. Ua na ô râ Samuela ia Iese: “Aita Iehova i maiti hoê o ratou.”
11 Parau atura Samuela ia Iese: “Tera anaˈe ta oe mau tamaroa?” Na ô maira oia: “Te toe ra te hopea,+ te faaamu ra oia i te mau mamoe.”+ Parau atura Samuela ia Iese: “A tono i te tahi taata e tii ia ˈna, no te mea eita tatou e tamaa e ia tae roa mai o ˈna i ǒ nei.” 12 Tono ihora ïa Iese i te tahi taata e tii ia Davida e aratai maira ia ˈna ia Samuela ra. E taurearea oia mata nehenehe e te haviti.+ Na ô maira Iehova: “A tia, a faatavai ia ˈna, o ˈna hoi ta ˈu i maiti!”+ 13 Rave ihora ïa Samuela i te farii monoˈi*+ e faatavai ihora ia ˈna i mua i to ˈna mau tuaana. E mai taua mahana ra, ohipa ihora te varua o Iehova i nia ia Davida ma te puai.+ I muri iho, tia aˈera Samuela i nia e haere atura i Rama.+
14 Tera râ, ua faarue te varua o Iehova ia Saula,+ e vaiiho ihora Iehova ia haapeapeahia oia i te mau manaˈo* ino.+ 15 Parau maira ta Saula mau tavini ia ˈna: “Fatu, ua vaiiho te Atua ia haapeapeahia oe i te mau manaˈo* ino. 16 Ia faaue to matou fatu i to mau tavini nei ia imi i te hoê taata mea ite i te hauti i te kinura.+ I te mau taime atoa e vaiiho ai te Atua ia haapeapeahia oe i te mau manaˈo* ino, e hauti oia i te kinura, e e maitai mai oe.” 17 Na ô atura ïa Saula i ta ˈna mau tavini: “A imi mai na i te hoê taata mea ite i te hauti i te kinura, e a afai mai ia ˈna ia ˈu nei.”
18 Parau maira hoê o te mau tavini: “Inaha, ua ite au hoê tamaiti a Iese no Betelehema mea ite i te hauti i te kinura, e e taata tamaˈi itoito oia e te puai.+ Mea ite o ˈna i te paraparau. Mea haviti oia,+ e tei ia ˈna ra Iehova.”+ 19 Tono ihora Saula i te vea ia Iese ra a na ô ai: “A tono mai ia ˈu nei i to tamaiti o Davida, te tiai mamoe.”+ 20 Tuu aˈera ïa Iese i nia i te hoê asini i te faraoa, hoê pute uaina,* e hoê fanauˈa puaaniho e faatae atura i te reira e ta ˈna tamaiti atoa o Davida ia Saula. 21 Haere atura Davida ia Saula ra e tavini atura ia ˈna.+ Here roa aˈera Saula ia ˈna, e riro atura oia ei taata amo mauhaa na ˈna. 22 Faatae ihora Saula i te hoê poroi ia Iese: “A vaiiho mai na ia tavini Davida ia ˈu, mea au hoi na ˈu ia ˈna.” 23 I te mau taime atoa e vaiiho ai te Atua ia haapeapeahia Saula i te mau manaˈo ino, e rave Davida i te kinura a hauti atu ai, e e topa te hau o Saula, a maitai mai ai oia, e e pee te mau manaˈo* ino.+
17 Haaputuputu aˈera te mau Philiseti+ i ta ratou mau nuu* no te tamaˈi. Ua haaputuputu ratou i Soko,+ i te fenua o Iuda, e ua puhapa i ropu ia Soko e ia Azeka,+ i Ephese-damima.+ 2 Haaputuputu aˈera Saula e te mau taata o Iseraela, puhapa aˈera i te peho o Ela,+ e faanaho aˈera ia ratou no te aro i te mau Philiseti. 3 Tei nia i te mouˈa te mau Philiseti i te hoê pae, e tei nia i te mouˈa i te tahi atu pae te ati Iseraela, e to ropu te peho ia ratou.
4 Haere maira te hoê aito na te mau puhapa o te mau Philiseti mai. O Golia+ to ˈna iˈoa, no Gata+ o ˈna, e e ono kubiti e hoê tiapana to ˈna roa.* 5 E taupoo veo to nia i to ˈna upoo, e e ahu paruru* ta ˈna i oomo. E 5 000 sekela* te teiaha o to ˈna ahu paruru veo.+ 6 E paruru veo to nia i to ˈna na avae, e e mahae+ veo ta ˈna i muri mai i to ˈna tua. 7 E au te raau o ta ˈna omore i te raau a te feia raraa,+ e 600 sekela* te teiaha o te auri i mua i ta ˈna omore. E na mua ia ˈna e haere ai ta ˈna taata amo paruru. 8 Tia noa ihora oia e tuô maira i te mau pǔpǔ faehau a Iseraela+ i te tahua aroraa e parau maira: “Eaha hoi outou i haere mai ai e faanaho ia outou no te aroraa? E ere anei au i te Philiseti e o outou te mau tavini a Saula? A maiti i te hoê taata no outou, e ia pou mai o ˈna ia ˈu nei. 9 Ia tia ia ˈna ia aro mai ia ˈu a tairi atu ai ia ˈu, e riro ïa matou ei tavini na outou. Mai te peu râ o vau te upootia i nia ia ˈna, a haapohe atu ai ia ˈna, e riro ïa outou ei tavini na matou.” 10 Parau maira taua Philiseti ra: “Te faatihaehae* ra vau i te mau pǔpǔ faehau a Iseraela+ i te tahua aroraa i teie mahana. A horoa mai i te tahi taata, e e aro mâua!”
11 I to Saula e to Iseraela taatoa faarooraa i teie mau parau a taua Philiseti ra, riaria roa ihora ratou.
12 Tera râ, e tamaiti Davida na taua taata ra no Epherata+ no Betelehema,+ i Iuda, o Iese+ to ˈna iˈoa. E vaˈu tamaiti+ ta Iese e ua ruhiruhia ê na o ˈna i te mau mahana a arii ai o Saula. 13 Ua pee na toru tamaiti paari roa ˈˈe a Iese ia Saula i te tamaˈi.+ Te iˈoa o ta ˈna na tamaiti e toru tei haere i te tamaˈi, o Eliaba+ te matahiapo, o Abinadaba+ te piti, e o Sama+ te toru. 14 O Davida te hopea,+ e ua pee na toru tamaiti matahiapo ia Saula.
15 I hoˈi na Davida mai i ǒ Saula ra no te tiai i te mau mamoe+ a to ˈna metua tane i Betelehema. 16 I faafatata atoa mai na taua Philiseti ra a tia ˈtu ai i mua ia ratou i te mau poipoi e ahiahi atoa a 40 mahana te maoro.
17 Parau atura ïa Iese ia Davida ta ˈna tamaiti: “A rave na i teie epha* huero maa tunu paa e teie na ahuru faraoa, e a haavitiviti i te hopoi atu i te reira i to oe mau tuaana ra i te puhapa. 18 E a afai i teie na ahuru faito pata paari* na te raatira tausani. Ia ite atoa oe eaha te huru o to oe mau tuaana e ia faahoˈi mai oe i te tahi haapapuraa e mea maitai ratou.” 19 Tei ia Saula ra ratou e te ati Iseraela atoa i roto i te peho o Ela+ e te aro ra i te mau Philiseti.+
20 Tia poipoi aˈera ïa Davida e tuu ihora i te tahi taata no te tiai i te mau mamoe. Faaineine ihora oia e reva ˈtura, mai ta Iese i faaue ia ˈna. I to ˈna taeraa ˈtu i te puhapa, te haere ra te nuu i te tahua aroraa a tutuô ai i te hoê pii aroraa. 21 Faanaho aˈera Iseraela e te mau Philiseti ia ratou, hoê pǔpǔ faehau i mua i te tahi atu pǔpǔ faehau. 22 Vaiiho ihora Davida i ta ˈna mau taihaa i te taata haapao taihaa ra e horo ihora i te tahua aroraa. I to ˈna taeraa ˈtu, ui ihora oia eaha te huru o to ˈna mau tuaana.+
23 A uiui noa ˈi oia, haere maira te aito o Golia+ te iˈoa, te Philiseti no Gata. Haere maira oia mai roto mai i te mau pǔpǔ faehau a te mau Philiseti, faahiti ihora i te hoê â parau ta ˈna i faahiti aˈenei,+ e faaroo ihora Davida ia ˈna. 24 I to Iseraela iteraa i taua taata ra, mǎtaˈu+ ihora ratou e otohe aˈera. 25 Te parau ra to Iseraela: “Ua ite outou i teie taata e haere mai ra? Te haere mai ra o ˈna e faatihaehae* ia Iseraela.+ E horoa te arii i te taoˈa rahi na te taata o te taparahi ia ˈna, e horoa oia i ta ˈna iho tamahine na ˈna,+ e eita e titauhia i te tahi mea i te utuafare o to ˈna metua tane i Iseraela.”
26 Ui ihora Davida i te mau taata e tia ra i pihai iho ia ˈna: “Eaha te ravehia no te taata o te taparahi i taua Philiseti ra, e o te hopoi ê i te haama i nia ia Iseraela? O vai hoi teie Philiseti peritome-ore-hia, no te faatihaehae* i te mau pǔpǔ faehau a te Atua ora?”+ 27 Parau aˈera ïa taua mau taata ra te mea ta ratou i parau aˈenei: “Tera te ravehia no te taata o te taparahi ia ˈna.” 28 I to Eliaba+ to ˈna taeae matahiapo faarooraa ia ˈna e paraparau ra i taua mau taata ra, riri aˈera oia ia Davida e parau maira: “Eaha hoi oe i haere mai ai i ǒ nei? Ia vai ra oe i te vaiihoraa i nau mamoe i roto i te medebara?+ Ua ite maitai au i to oe teoteo e te mau opuaraa iino o to oe aau. Ua haere mai oe i ǒ nei no te mataitai i te aroraa.” 29 Na ô atura Davida: “Eaha faahou â ta ˈu i rave? E uiraa noa hoi tera!” 30 Fariu atura ïa oia i te tahi atu taata, ui atura hoê â uiraa,+ e horoa aˈera taua mau taata ra hoê â pahonoraa.+
31 Faaroohia ihora te mau parau ta Davida i faahiti e faatiahia ˈtura ia Saula. Tono ihora oia i te tahi taata no te afai mai ia ˈna. 32 Na ô atura Davida ia Saula: “Eiaha te tahi ia ere i te itoito no tera noa ˈˈe taata. E haere to tavini e aro i teie Philiseti.”+ 33 Parau maira râ Saula ia Davida: “Aita ta oe e nehenehe e aro i teie Philiseti, e tamaroa noa hoi oe.+ Area o ˈna, e faehau* ïa mai to ˈna apîraa mai â.” 34 Na ô atura Davida ia Saula: “To ˈu arii e, e tiai au i te mamoe i ǒ to ˈu metua tane. Hoê mahana, haere maira te hoê liona+ e haru aˈera i te hoê mamoe o te nǎnǎ. Ua na reira atoa te hoê daba i te hoê mahana ê atu. 35 Aˈuaˈu atura vau ia raua, taparahi ihora vau ia raua e faaora aˈera vau i na mamoe i to raua vaha. I to raua tiaraa mai i mua ia ˈu, haru aˈera vau i to raua huruhuru* e haapohe ihora vau ia raua. 36 Ua taparahi to tavini i te liona e te daba, e e riro teie Philiseti peritome-ore-hia mai ia ratou, no te mea ua faatihaehae* oia i te mau pǔpǔ faehau a te Atua ora+ i te tahua aroraa.” 37 Na ô faahou atura Davida: “O Iehova, o tei faaora ia ˈu i te liona e te daba, o ˈna te faaora ia ˈu i te rima o teie Philiseti.”+ Parau maira ïa Saula ia Davida: “A haere, e ei pihai iho Iehova ia oe.”
38 Faaoomo ihora Saula ia Davida i to ˈna ahu tamaˈi. Tuu ihora oia i te taupoo veo i nia i to ˈna upoo e faaoomo ihora oia ia ˈna i te hoê ahu paruru. 39 Taamu ihora Davida i ta ˈna ˈoˈe e tamata ihora i te haere, aita râ i nehenehe, aita hoi o ˈna i matau i te oomo i te haana tamaˈi. Na ô atura oia ia Saula: “Aita ta ˈu e nehenehe e haere e teie mau mea, aita hoi au i matau i te oomo i te reira.” Tatara aˈera ïa Davida i te haana tamaˈi. 40 Rave ihora oia i ta ˈna raau, maiti ihora e pae ofai manina i roto i te tahora e tuu ihora i te reira i roto i ta ˈna pute tiai mamoe. Faafatata ihora oia i taua Philiseti ra e ta ˈna taora ofai+ i to ˈna rima.
41 Faafatata noa maira taua Philiseti ra ia Davida, e tei mua ta ˈna taata amo paruru ia ˈna. 42 I to taua Philiseti ra hiˈoraa e iteraa ˈtu ia Davida, ata faaooo aˈera oia ia ˈna, e tamaroa apî roa hoi oia e te haviti.+ 43 Na ô maira ïa te Philiseti ia Davida: “E urî+ anei au i haere mai ai oe i mua ia ˈu e te raau?” Faaino ihora ïa taua Philiseti ra ia Davida ma te tiaoro i to ˈna mau atua. 44 Parau maira te Philiseti ia Davida: “A haere mai ia ˈu nei, e horoa vau i to oe iˈo na te mau manu e na te mau animara.”
45 Pahono atura Davida i taua Philiseti ra: “Te haere mai ra oe e aro ia ˈu e te ˈoˈe e te omore e te mahae,+ te haere atu nei râ vau e aro ia oe ma te iˈoa o Iehova o te mau nuu,*+ te Atua o te mau pǔpǔ faehau a Iseraela, ta oe i faatihaehae.*+ 46 I teie mahana, e tuu mai Iehova ia oe i to ˈu nei rima,+ e taparahi au ia oe e e tâpû vau i to oe upoo. E i teie mahana, e tuu vau i te mau tino pohe o te puhapa a te mau Philiseti na te mau manu e na te mau animara oviri. E ite to te ao atoa nei e e Atua to Iseraela.+ 47 E ite te taatoaraa o tei amui mai i ǒ nei* e ere ma te ˈoˈe aore ra ma te omore Iehova e faaora ˈi,+ na Iehova hoi te aroraa,+ e e tuu mai oia ia outou pauroa i to matou nei rima.”+
48 Faafatata maira â te Philiseti ia Davida. Horo haavitiviti atura Davida i te tahua aroraa no te farerei i taua Philiseti ra. 49 Patia ihora Davida i to ˈna rima i roto i ta ˈna pute, rave maira i te hoê ofai i roto e taora aˈera i te reira i ta ˈna taora ofai. Amu ihora i nia i te rae o te Philiseti, mure ihora te ofai i roto i to ˈna rae e marua ihora oia te mata i raro.+ 50 Upootia ihora ïa Davida i nia i te Philiseti i te hoê taora ofai e te hoê ofai. Ua haapohe Davida ia ˈna, aita e ˈoˈe i te rima.+ 51 Horo noa ˈtura Davida e tia aˈera i pihai iho ia ˈna. Huti maira oia i ta te Philiseti ra ˈoˈe+ i rapae i to ˈna vehî, e no te haapapu e ua pohe iho â Golia, tâpû ihora oia i to ˈna upoo. I to te mau Philiseti iteraa e ua pohe to ratou aito puai, horo aˈera ratou.+
52 Tia aˈera ïa to Iseraela e to Iuda, tutuô aˈera e aˈuaˈu aˈera i te mau Philiseti mai te peho+ e tae atu i te mau uputa o Ekerona.+ Tarava noa ˈtura te mau Philiseti i haapohehia i nia i te purumu mai Saaraima+ e tae atu i Gata e Ekerona. 53 I to te ati Iseraela hoˈiraa ˈtu mai to ratou aˈuaˈuraa i te mau Philiseti, haru ihora ratou i te faufaa i roto i te mau puhapa a te mau Philiseti.
54 Rave ihora Davida i te upoo o te Philiseti e hopoi aˈera i Ierusalema. Ua vaiiho râ oia i ta te Philiseti mau mauhaa tamaˈi i roto i to ˈna iho fare ie.+
55 I te taime a ite ai Saula ia Davida i te haereraa e farerei i te Philiseti, ani atura oia ia Abinera,+ te raatira o te nuu: “E tamaiti teie na vai,+ Abinera?” Pahono maira Abinera: “E te arii e, te horeo nei au ia oe, aita vau i ite!” 56 Na ô atura te arii: “E imi oe na vai teie tamaiti.” 57 No reira, i muri iho i to Davida haapoheraa i te Philiseti, rave ihora Abinera ia ˈna e afai maira ia ˈna i mua ia Saula e te upoo o te Philiseti+ i roto i to ˈna rima. 58 Na ô maira Saula ia ˈna: “E tamaiti oe na vai?” Parau atura ïa Davida: “E tamaiti vau na to tavini ra o Iese+ no Betelehema.”+
18 I te otiraa ta Davida aparauraa ia Saula, here atura Ionatana+ ia Davida mai ia ˈna iho, e ati maite aˈera Ionatana raua Davida ei hoa piri.+ 2 Mai tera mahana, tapea maira Saula ia Davida ia ˈna ra, e aita ˈtura oia i vaiiho ia ˈna ia hoˈi i te fare o to ˈna metua tane.+ 3 Faaau ihora Ionatana i te hoê faufaa ia Davida,+ no te mea ua here oia ia ˈna mai ia ˈna iho.+ 4 Tatara aˈera Ionatana i te ahu aita e rima ta ˈna i oomo na, e horoa ˈtura ia Davida ra, oia atoa to ˈna ahu faehau, ta ˈna ˈoˈe, ta ˈna fana e to ˈna hatua. 5 Haamata ˈtura Davida i te haere i te tamaˈi e i te manuïa*+ i te mau vahi atoa ta Saula i tono ia ˈna. Tuu ihora ïa Saula ia ˈna i nia i te mau taata tamaˈi,+ e au roa aˈera Iseraela taatoa e te mau tavini a Saula i te reira.
6 Ia hoˈi mai Davida e te tahi atu mau taata mai te taparahiraa i te mau Philiseti, e haere mai te mau vahine i rapaeau i te mau oire atoa o Iseraela e farerei i te arii Saula. E himene+ ratou a ori ai ma te umere, a hauti ai i te tariparau+ e te upaupa e toru taura. 7 E himene te mau vahine o te faatupu ra i te oroa no te upootiaraa:
“Ua tausani ta Saula i tairi,
E ua ahuru tausani ta Davida.”+
8 Riri roa aˈera Saula,+ e aita o ˈna i au noa ˈˈe i teie himene. Ua parau oia: “Ua himene ratou e ahuru tausani ta Davida i taparahi. Area ta ˈu, e tausani noa ïa. Te mea noa e toe ra i te horoa na ˈna, o te mana arii ïa!”+ 9 Mai taua mahana ra, hiˈo ino noa ˈtura Saula ia Davida.
10 I te mahana i muri iho, vaiiho ihora te Atua ia haapeapeahia Saula i te mau manaˈo* ino,+ e haamata ˈtura oia i te rave i te ohipa huru ê* i roto i te fare, a hauti noa ˈi Davida i te upaupa i te kinura+ mai te tahi atu mau taime. E omore to roto i te rima o Saula,+ 11 e e piti taime to ˈna taoraraa i te omore+ i nia ia Davida ma te parau ia ˈna iho: ‘E mau Davida ia ˈu i nia i te pǎpai!’ Aita râ oia i noaa ia ˈna. 12 Mǎtaˈu ihora Saula ia Davida, no te mea ua faarue Iehova ia ˈna,+ e tei ia Davida ra oia+ i teie nei. 13 No te faaatea ia Davida ia ˈna, faatoroa ˈtura Saula ia ˈna ei raatira tausani. Aratai aˈera ïa Davida i te nuu i roto i te tamaˈi.*+ 14 Manuïa noa ˈtura Davida*+ i roto i te mau mea atoa ta ˈna i rave, e tei pihai iho Iehova ia ˈna.+ 15 E i to Saula iteraa e mea manuïa roa oia, mǎtaˈu ihora oia ia ˈna. 16 Tera râ, mea here na to Iseraela e to Iuda ia Davida, na ˈna hoi e aratai ia ratou i ta ratou mau tamaˈi.
17 I muri aˈe, parau atura Saula ia Davida: “Teie ta ˈu tamahine matahiapo o Meraba.+ E horoa ˈtu vau ia ˈna ei vahine faaipoipo na oe.+ Tera râ, a tamau i te faaite i te itoito no ˈu e a aro i te mau tamaˈi a Iehova.”+ Ua parau hoi Saula ia ˈna iho: ‘Eiaha na to ˈu rima e taparahi ia ˈna. Na te rima o te mau Philiseti râ e taparahi ia ˈna.’+ 18 Pahono maira ïa Davida ia Saula: “O vai hoi au e o vai te utuafare o to ˈu metua tane i Iseraela, ia riro vau ei hunoa na te arii?”+ 19 I te taime râ a horoa ˈi Saula i ta ˈna tamahine o Meraba na Davida, ua horoa-aˈena-hia o ˈna ei vahine faaipoipo na Aderiela+ no Mehola.
20 Ua here roa râ Mikala+ te tahi atu tamahine a Saula ia Davida. Faaitehia ˈtura te reira ia Saula e oaoa roa aˈera oia i tera parau. 21 Na ô aˈera ïa Saula: “E horoa vau ia Mikala na ˈna ia riro oia ei marei no ˈna, a riro atu ai oia i te rima o te mau Philiseti.”+ Na ô faahou atura ïa Saula ia Davida: “E riro oe ei hunoa na ˈu* i teie mahana.” 22 Faaue atura Saula i ta ˈna mau tavini: “A paraparau ia Davida ma te huna e a na ô atu: ‘Inaha! Ua mauruuru roa te arii ia oe e mea au roa na ta ˈna mau tavini ia oe. I teie mahana, a farii ia riro ei hunoa na te arii.’” 23 I to te mau tavini a Saula parauraa ia Davida i teie mau ohipa, na ô maira Davida: “Ia hiˈo mai outou, e nehenehe anei au e riro ei hunoa na te arii? E taata veve hoi au e te faufaa ore.”+ 24 Faatia ˈtura te mau tavini ia Saula eaha ta Davida i pahono.”
25 Parau maira Saula: “Teie ta outou e parau ia Davida: ‘Aita te arii e hinaaro ra i te tahi tino moni no te faaipoiporaa.+ Te iri i mua no 100 Philiseti+ ta ˈna e hinaaro, no te tahoo i te mau enemi o te arii.’” Te opua ra hoi Saula ia pohe Davida i te rima o te mau Philiseti. 26 Faaite atura ïa ta ˈna mau tavini i teie mau parau ia Davida, e au aˈera Davida i te manaˈo e riro ei hunoa na te arii.+ Hou a hope ai te taime faataahia, 27 haere ihora Davida e to ˈna mau taata e haapohe atura 200 tane Philiseti. Hopoi maira Davida i te arii pauroa te iri i mua no te riro ei hunoa na ˈna. Horoa ˈtura ïa Saula i ta ˈna tamahine o Mikala ei vahine faaipoipo na ˈna.+ 28 Taa ihora ia Saula e tei pihai iho Iehova ia Davida+ e mea here na ta ˈna tamahine o Mikala ia ˈna.+ 29 Rahi roa ˈtura to Saula mǎtaˈu ia Davida, e riro maira Saula ei enemi no Davida e pohe noa ˈtu oia.+
30 I haere na te huiarii o te mau Philiseti i te tamaˈi. I te mau taime atoa râ ia haere ratou, o Davida te mea upootia aˈe i te* taatoaraa o te mau tavini a Saula.+ Ua tui to ˈna roo.+
19 I muri aˈe, parau atura Saula ia Ionatana ta ˈna tamaiti e ta ˈna mau tavini atoa e haapohe oia ia Davida.+ 2 No to Ionatana here ia Davida,+ na ô atura Ionatana ia Davida: “Te opua nei Saula to ˈu metua tane e haapohe ia oe. A haapao maitai ia poipoi aˈe, a haere i te hoê vahi moˈe e a tapuni. 3 E haere au na rapae na muri i to ˈu metua tane i te vahi tei reira oe. E paraparau vau i to ˈu metua tane no oe. Ia ite au i te tahi mea, e faaite iho â vau ia oe.”+
4 Parau atura ïa Ionatana i te mea maitai no nia ia Davida+ i to ˈna metua tane ia Saula. Na ô atura oia ia ˈna: “Eiaha te arii e hamani ino* i ta ˈna tavini ia Davida, aita hoi oia i hamani ino* ia oe e ua faufaahia oe i te mau mea ta ˈna i rave no oe. 5 Ua faaruru oia i te pohe no te taparahi ia Golia te Philiseti,+ e ua horoa Iehova i te upootiaraa* rahi no Iseraela taatoa. Ite aˈera oe i te reira e oaoa roa ihora oe. Eaha ïa oe e hamani ino* ai i te hoê taata hara ore? Aita e tumu e haapohe ai oe ia Davida.”+ 6 Faaroo maira Saula ia Ionatana, e horeo maira Saula: “Te horeo nei au i te ora o te Atua ra o Iehova, eita oia e haapohehia.” 7 I muri aˈe, pii atura Ionatana ia Davida, e faatia ˈtura i teie mau mea atoa. Aratai maira ïa Ionatana ia Davida ia Saula ra e tavini noa ˈtura oia ia ˈna mai na mua ˈˈe.+
8 I muri aˈe, tupu faahou aˈera te tamaˈi, haere atura Davida e aro i te mau Philiseti. Taparahi pohe atura oia e rave rahi o ratou e horo ê aˈera ratou ia ˈna.
9 Vaiiho ihora Iehova ia haapeapeahia Saula i te mau manaˈo ino+ a parahi noa ˈi oia i roto i to ˈna fare e ta ˈna omore i te rima, a hauti noa ˈi Davida i te kinura.+ 10 Tamata ihora Saula i te taora i ta ˈna omore i nia ia Davida ia mau atu i nia i te pǎpai. Ape atura râ oia i te reira, reva aˈenei te omore i roto i te pǎpai. Horo ê atura Davida e ora ˈtura oia i tera po. 11 I muri aˈe, tono atura Saula i te vea no te tiai i te fare o Davida a haapohe atu ai ia ˈna ia poipoi aˈe.+ Parau maira râ Mikala ta Davida vahine faaipoipo ia ˈna: “Ia ore oe e horo ê i teie po, ua pohe oe ananahi.” 12 Haapou ihora Mikala ia Davida na roto i te haamaramarama ia nehenehe oia ia horo ê a ora ˈtu ai. 13 Rave ihora Mikala i te tii o te hoê atua o te utuafare* e tuu ihora i roto i te roˈi. Tuu ihora oia i te hoê ahu huruhuru puaaniho i te vahi e tuu ai oia i to ˈna upoo, e tapoˈi aˈera i te tii e te tahi ahu.
14 Na ô atura râ Mikala i te mau vea ta Saula i tono no te rave mai ia Davida: “E maˈi to ˈna.” 15 Tono faahou atura Saula i te vea i ǒ Davida ma te parau atu: “A afai mai ia ˈna ia ˈu nei i nia i to ˈna roˈi ia haapohehia oia.”+ 16 I te haereraa mai te mau vea, ite aˈera ratou i te tii o te hoê atua o te utuafare i nia i te roˈi e te hoê ahu huruhuru puaaniho i te vahi e tuu ai oia i to ˈna upoo. 17 Parau maira Saula ia Mikala: “No te aha oe i haavare ai ia ˈu mai tera a tuu atu ai i to ˈu enemi+ ia horo ê?” Na ô atura Mikala ia Saula: “Ua parau mai oia ia ˈu, ‘E tuu oe ia ˈu aore ra e pohe oe ia ˈu!’”
18 Ua horo ê râ Davida, ora ˈtura oia e haere atura ia Samuela ra i Rama.+ Faatia ˈtura oia ia Samuela i te mau mea atoa ta Saula i rave i nia ia ˈna. Haere aˈera raua Samuela e faaea aˈera i Naiota.+ 19 I muri aˈe, faaitehia maira ia Saula: “Inaha, tei Naiota o Davida, i Rama.” 20 Tono ihora Saula i te vea no te haru mai ia Davida. I to ratou iteraa i te hoê pǔpǔ peropheta paari i te tohuraa e ia Samuela i te tiaraa i reira ei aratai i nia ia ratou, ohipa maira te varua o te Atua i nia i te mau vea a Saula e haa atoa aˈera ratou mai te mau peropheta.
21 I to ratou faatiaraa i te reira ia Saula, tono ihora oia i te tahi atu mau vea, e haa atoa aˈera ratou mai te mau peropheta. Tono faahou ihora Saula i te vea, o te toruraa ïa o te pǔpǔ, e haa atoa aˈera ratou mai te mau peropheta. 22 Haere atoa ˈtura Saula i Rama. I to ˈna taeraa ˈtu i te apoo pape rahi i Seku, ui atura oia: “Teihea o Samuela raua Davida?” Pahono maira ratou: “Tei Naiota+ i Rama.” 23 A haere ai Saula mai reira ˈtu i Naiota i Rama, ohipa atoa maira te varua o te Atua i nia ia ˈna, e haere atura oia ma te haa mai te hoê peropheta e tae noa ˈtu oia i Naiota i Rama. 24 Tatara atoa aˈera oia i to ˈna ahu, haa atoa ˈtura mai te hoê peropheta i mua ia Samuela, e tiraha ihora i reira aita e ahu* i tera mahana e tera po taatoa. No reira ratou e parau ai: “Tei rotopu atoa Saula i te mau peropheta?”+
20 Horo ê atura Davida mai Naiota i Rama. Haere maira oia ia Ionatana ra e parau maira: “Eaha ta ˈu i rave?+ E hara anei ta ˈu i rave? Ua hamani ino anei au i to metua tane i imi ai oia i te haapohe ia ˈu?” 2 Pahono atura Ionatana ia ˈna: “Eita vau e tiaturi i te reira!+ Eita oe e pohe. Inaha, eita to ˈu metua tane e rave i te tahi ohipa ma te ore e faaite mai, e ohipa faufaa anei aore ra aita. Eaha to ˈu metua tane e huna ˈi i te reira ia ˈu? Eita te reira e tupu.” 3 Parau faahou maira râ Davida: “Ua ite to oe metua tane e mea au na oe ia ˈu+ e e parau oia: ‘Eiaha Ionatana ia ite i te reira aˈunei oia e oto ai.’ Tera râ, te horeo nei au i te ora o te Atua ra o Iehova e ia oe, ua fatata roa te pohe ia ˈu nei!”+
4 Parau atura Ionatana ia Davida: “Te mau mea atoa ta oe e parau mai, e rave au no oe.” 5 Pahono maira Davida ia Ionatana: “Ananahi te avaˈe apî,+ eita e ore e titau te arii ia tamaa vau i ta ˈna amuraa maa. E tuu oe ia ˈu ia haere, e e tapuni au i rapae i te oire e tae roa i te ahiahi o te toru o te mahana. 6 Ia ui noa mai to oe metua tane ia ˈu, a parau atu: ‘Ua ani mai Davida ia ˈu e nehenehe anei ta ˈna e haere oioi i to ˈna oire i Betelehema.+ E pûpû hoi to ˈna utuafare taatoa i te tusia matahiti i ǒ.’+ 7 Ia parau oia: ‘Mea maitai,’ ua ora ïa to tavini. Ia riri râ oia, mea papu e ua faaoti oia i te hamani ino ia ˈu. 8 A faaite i te here taiva ore i to tavini,+ ua faaau hoi oe i te hoê faufaa ia ˈu nei i mua ia Iehova.+ Mai te peu râ ua hara vau,+ na oe e haapohe ia ˈu. Eaha oe e afai ai ia ˈu i to metua tane ra?”
9 Parau atura Ionatana: “Eita roa ˈtu ta ˈu e nehenehe e rave i te reira i nia ia oe! Ia ite au e ua faaoti to ˈu metua tane i te hamani ino ia oe, eita anei au e faaara ia oe?”+ 10 Pahono maira Davida ia Ionatana: “Na vai e faaite mai ia ˈu ia parau iria to metua tane ia oe?” 11 Na ô atura Ionatana ia Davida: “Mai, e haere anaˈe i rapae i te oire.” Haere aˈera ïa raua i rapae i te oire. 12 Na ô atura Ionatana ia Davida: “Ei ite Iehova te Atua o Iseraela. E itea mai ia ˈu te opuaraa a to ˈu metua tane ananahi i teie hora aore ra i te toru o te mahana. Mai te peu e aau farii to ˈna ia oe, e tono vau i te taata no te faaite i te reira ia oe. 13 Mai te peu râ te opua ra to ˈu metua tane i te hamani ino ia oe, e faaite atu vau i te reira ia oe, ia haere oe e tapuni. Ia faautua rahi mai Iehova ia ˈu ia ore au e na reira. Ei pihai iho Iehova ia oe,+ mai ia ˈna i na reira no to ˈu metua tane.+ 14 E oe, eita anei oe e faaite ia ˈu i te here taiva ore mai to Iehova a ora noa ˈi au e ia pohe atoa ˈtu vau?+ 15 Eiaha roa e faaere i to ˈu utuafare i to here taiva ore,+ ia haamou atoa Iehova i to oe mau enemi atoa i nia i te fenua.” 16 Faaau ihora ïa Ionatana i te hoê faufaa i te utuafare o Davida ma te parau: “E tahoo Iehova i to Davida mau enemi.” 17 Ani atura ïa Ionatana ia Davida ia horeo faahou i to Davida here ia ˈna, ua here hoi Ionatana ia Davida mai ia ˈna iho.+
18 Parau atura Ionatana ia ˈna: “Ananahi te avaˈe apî.+ E imi to ˈu metua tane ia oe, e vai noa hoi to oe parahiraa aita e taata. 19 I te toru o te mahana, mea papu e uiui oia no nia ia oe. Mea tia ia haere oe i te vahi i tapuni ai oe i te tahi mahana ra e ia faaea i reira, i pihai iho i te ofai. 20 E teˈa ˈtu vau e toru teˈa i te hoê pae o taua ofai ra, mai te mea ra e te teˈa ra vau i nia i te hoê fa. 21 Ia faaue au i ta ˈu tavini, e parau vau: ‘A haere e imi i te mau teˈa.’ Ia na ô atu vau ia ˈna: ‘A hiˈo! Aita te mau teˈa i atea ia oe, a haere a tii,’ e nehenehe oe e hoˈi mai. Te horeo nei au i te ora o te Atua ra o Iehova, aita e faufaa ia haapeapea faahou oe, aita e fifi faahou. 22 Ia parau râ vau i te taurearea ra: ‘A hiˈo! Mea atea te mau teˈa ia oe,’ a haere ïa, te hinaaro ra hoi Iehova ia haere ê oe. 23 No te faufaa ta tâua i faaau,+ o oe e o vau, ei ropu Iehova ia tâua e a muri noa ˈtu.”+
24 Tapuni ihora ïa Davida i rapae i te oire. I te avaˈe apî, parahi ihora te arii i te amuraa maa no te tamaa.+ 25 Te parahi ra te arii i to ˈna parahiraa matauhia i te pae pǎpai. Tei mua Ionatana ia ˈna, e tei pihai iho Abinera+ ia Saula. Aita râ e taata i nia i te parahiraa o Davida. 26 Aita Saula i parau noa ˈˈe i te tahi mea i taua mahana ra, ua na ô hoi oia ia ˈna iho: ‘Ua tupu paha te tahi ohipa e viivii atura Davida.+ E, te viivii ra paha oia.’ 27 Oia atoa i te mahana i muri iho, ua vai noa te parahiraa o Davida aita e taata. Parau atura Saula ia Ionatana ta ˈna tamaiti: “No te aha aita te tamaiti a Iese+ i haere mai i te tamaaraa inanahi ra e i teie mahana?” 28 Pahono maira Ionatana ia Saula: “Ua ani mai Davida ia ˈu e nehenehe anei ta ˈna e haere i Betelehema.+ 29 Ua ani mai oia: ‘A vaiiho na ia ˈu ia haere. E tusia utuafare hoi ta matou i te oire, e na to ˈu tuaana i titau ia ˈu. No reira, mai te peu e farii oe, a vaiiho mai na ia ˈu ia haere e farerei i to ˈu mau tuaana.’ No reira aita oia i haere mai i te amuraa maa a te arii.” 30 Riri ihora Saula ia Ionatana, e parau atura ia ˈna: “Tamaiti a te hoê vahine orure hau, te manaˈo ra oe e aita vau e ite ra e te maiti ra oe i te apiti i te tamaiti a Iese? Mea haama no oe e mea haama no to metua vahine.* 31 A ora noa ˈi te tamaiti a Iese i nia i te fenua, e ore oe e to oe mana arii e mau papu.+ A tono ïa i teie nei i te tahi taata e afai mai ia ˈna ia ˈu nei, mea tia hoi ia pohe oia.”*+
32 Tera râ, pahono maira Ionatana ia Saula to ˈna metua tane: “Eaha hoi oia e haapohehia ˈi?+ Eaha ta ˈna i rave?” 33 Taora aˈera ïa Saula i te omore i nia ia Ionatana no te haapohe ia ˈna.+ Taa aˈera ïa ia Ionatana e ua faaoti to ˈna metua tane e haapohe ia Davida.+ 34 Tia aˈera Ionatana i te amuraa maa ma te riri rahi, e aita ˈtura oia i amu i te tahi noa ˈˈe maa i te piti o te mahana i muri aˈe i te avaˈe apî. Te oto ra hoi oia no Davida+ e ua faahaama to ˈna iho metua tane ia ˈna.
35 I te poipoi, haere aˈera Ionatana i rapae i te oire i te vahi i faaauhia ia Davida, e te hoê tavini apî na muri ia ˈna.+ 36 Parau atura oia i ta ˈna tavini: “A horo na e imi i te mau teˈa o ta ˈu e teˈa ˈtu.” Horo aˈera te tavini, e teˈa aˈera Ionatana i te atea ê ia ˈna. 37 I te taeraa te tavini i te vahi tei reira te teˈa ta Ionatana i teˈa ˈtu, tuô atura Ionatana i te tavini: “Aita anei te teˈa i te atea ê ia oe?” 38 Tuô faahou atura Ionatana i te tavini: “Haapeepee mai! Haaviti! Eiaha e faataere!” Ohi ihora te tavini a Ionatana i te mau teˈa e hoˈi maira i to ˈna fatu. 39 Aita te tavini i taa i taua ohipa ra. O Ionatana anaˈe raua Davida tei taa i te auraa. 40 I muri iho, horoa ˈtura Ionatana i ta ˈna mau mauhaa tamaˈi i ta ˈna tavini e parau atura ia ˈna: “A afai i te reira i te oire.”
41 Tei pihai iho noa Davida, i te pae apatoa. I te revaraa te tavini, tia aˈera Davida mai te vahi i tapuni ai oia. Tipapa ihora oia i raro e toru taime. Apa e taˈi ihora raua. O Davida râ te mea taˈi aˈe. 42 Parau atura Ionatana ia Davida: “A haere ma te hau, ua horeo hoi tâua+ i te ora o Iehova ma te parau: ‘Ei ropu Iehova ia oe e ia ˈu e ei ropu i to oe huaai e to ˈu huaai e a muri noa ˈtu.’”+
Reva ˈtura Davida e hoˈi aˈera Ionatana i te oire.
21 I muri aˈe, tae maira Davida i Nôba+ i ǒ Ahimeleka te tahuˈa. I te iteraa Ahimeleka ia Davida, rûrû ihora oia no te mǎtaˈu e parau atura ia ˈna: “Eaha oe i haere mai ai o oe anaˈe, aita e taata na muri ia oe?”+ 2 Pahono maira Davida ia Ahimeleka te tahuˈa: “Ua faaue mai te arii ia rave i te tahi ohipa. Ua parau râ oia: ‘Eiaha te taata ia ite i te tahi noa ˈˈe mea no nia i teie tere ta ˈu e tono nei ia oe e no nia i te mau faaueraa ta ˈu i horoa ˈtu.’ E farerei au i to ˈu mau taata i te hoê vahi taa maitai. 3 Teie nei, mai te peu e pae faraoa ta oe, a horoa noa mai ïa i te reira. Aita anaˈe a horoa mai i te tahi atu mea e vai ra.” 4 Pahono atura râ te tahuˈa ia Davida: “Aita e faraoa i ǒ nei, e pane moˈa+ anaˈe râ. E nehenehe to oe mau taata e amu i te reira mai te peu noa aita ratou i taoto i te vahine.”+ 5 Pahono maira Davida i te tahuˈa: “Aita matou i taoto i te vahine a haere ai matou i te mau tamaˈi na mua ˈtu.+ E haapao matou to ˈu mau taata ia vai viivii ore, oia atoa no te mau tere ê atu. Eaha ˈtu â ïa i teie mahana!” 6 Horoa ˈtura ïa te tahuˈa i te pane moˈa+ ia ˈna ra, aita ˈtu hoi e faraoa to reira maori râ te pane pûpûhia. Ua tatarahia te reira mai mua mai i te aro o Iehova i taua mahana ra a monohia ˈtu ai i te pane apî.
7 Tei reira hoê o na tavini a Saula i taua mahana ra. Ua titauhia ia faaea o ˈna i mua ia Iehova. O Doega+ to ˈna iˈoa, e ati Edoma.+ O ˈna te raatira o ta Saula mau tiai mamoe.
8 Ani maira Davida ia Ahimeleka: “Te vai ra anei te tahi omore aore ra ˈoˈe i ǒ nei ia oe ra? Aita vau i rave mai i ta ˈu ˈoˈe aore ra i te tahi atu mauhaa, mea ru hoi te tere i tonohia ˈi au e te arii.” 9 Na ô atura ïa te tahuˈa: “Tei ǒ nei te ˈoˈe a Golia+ te Philiseti, ta oe i taparahi i te peho o Ela,+ ua puohuhia i roto i te hoê ahu i muri mai i te tiputa.+ Mai te peu e hinaaro oe e rave atu, a rave ïa, tera noa hoi te ˈoˈe i ǒ nei.” Parau maira Davida: “Aita ˈtu e ˈoˈe mai teie. A horoa mai.”
10 Tia aˈera Davida i tera mahana, horo ê+ noa ˈtura ia Saula, e haere atura i te arii o Gata+ ra ia Akisa. 11 Na ô aˈera te mau tavini a Akisa ia ˈna: “E ere anei Davida teie, te arii o to ˈna fenua? E ere anei no ˈna i himene ai te nunaa a ori ai ma te parau:
‘Ua tausani ta Saula i tairi,
E ua ahuru tausani ta Davida’?”+
12 Feruri ihora Davida i taua mau parau ra e mǎtaˈu roa+ ihora oia ia Akisa te arii o Gata. 13 Haamaamaa ihora ïa oia ia ˈna+ i mua ia ratou. Ua papaipai o ˈna i nia i te mau opani o te uputa a vaiiho noa ˈi to ˈna haae ia tahe na nia i to ˈna huruhuru taa. 14 Na ô ihora ïa Akisa i ta ˈna mau tavini: “Te ite maitai ra outou e upoo ino to teie taata! Eaha outou e afai mai ai ia ˈna ia ˈu nei? 15 Aita i navai te upoo ino i ǒ nei, afai faahou mai ïa outou i te tahi. Eita vau e hinaaro i tera taata i ǒ ˈu!”
22 Horo atura ïa Davida,+ e haere atura i te ana o Adulama.+ I to to ˈna mau tuaana e te utuafare atoa o to ˈna metua tane faarooraa i te reira, haere ihora ratou i reira ia ˈna ra. 2 Amui aˈera ia ˈna ra te taata atoa e peapea to ratou, e tarahu ta ratou e o tei inoino. Riro maira oia ei raatira no ratou. Piri i te 400 tane tei apiti atu ia ˈna.
3 I muri aˈe, haere atura Davida mai reira ˈtu i Mizepa i Moabi e na ô atura i te arii no Moabi:+ “A farii na ia faaea to ˈu metua tane e to ˈu metua vahine ia outou ra e ia ite roa ˈtu vau eaha ta te Atua e rave no ˈu.” 4 Vaiiho ihora ïa oia ia raua i te arii no Moabi ra, e faaea aˈera raua ia ˈna ra i te taatoaraa o te taime tei roto Davida i te haapuraa.+
5 I muri aˈe, na ô atura te peropheta Gada+ ia Davida: “Eiaha e faaea i to oe vahi haapuraa. A hoˈi i te fenua o Iuda.”+ Faarue atura ïa Davida i taua vahi ra e haere atura i roto i te uru raau no Harete.
6 Faaroo aˈera Saula e ua itehia mai o Davida e te mau taata tei na muri ia ˈna. Te parahi noa ra ïa Saula i Gibea+ i raro aˈe i te hoê tumu raau* i nia i te hoê aivi e ta ˈna omore i te rima. Te tia noa ra ta ˈna mau raatira atoa ati aˈe ia ˈna. 7 Parau atura Saula ia ratou: “A faaroo mai na, e te ati Beniamina. E horoa atoa anei te tamaiti a Iese+ i te tâpû fenua e te faaapu vine na outou paatoa? E faatoroa anei oia ia outou paatoa ei raatira tausani e ei raatira hanere?+ 8 Ua opua outou paatoa i te rave i te mea ino i nia ia ˈu! Aita hoê aˈe i faaite mai e ua faaau ta ˈu tamaiti i te hoê faufaa i te tamaiti a Iese!+ Aita hoê aˈe o outou i aroha ia ˈu e aita outou i faaite mai e ua turai ta ˈu iho tamaiti i ta ˈu tavini ia totoa ia ˈu, mai i teie mahana.”
9 Pahono+ maira Doega+ ati Edoma, o tei tiaau i te mau tavini a Saula: “Ua ite au i te tamaiti a Iese i te haereraa mai i Nôba ia Ahimeleka ra te tamaiti a Ahituba.+ 10 Ui ihora oia ia Iehova no Davida e horoa ihora i te maa na ˈna. Horoa atoa ˈtura oia i te ˈoˈe a Golia te Philiseti.”+ 11 Tono atura te arii i te tahi taata e afai mai ia Ahimeleka te tamaiti a Ahituba te tahuˈa e te mau tahuˈa atoa o te utuafare o to ˈna metua tane e parahi ra i Nôba. Haere maira ïa ratou paatoa i te arii ra.
12 Na ô atura Saula: “E te tamaiti a Ahituba, a faaroo mai na!” Pahono maira oia: “Teie au, ta ˈu fatu.” 13 Parau atura Saula ia ˈna: “Eaha orua i opua ˈi i te rave i te mea ino i nia ia ˈu, oe e te tamaiti a Iese? Ua horoa ˈtu oe i te faraoa e te hoê ˈoˈe e ua ui oe i te Atua no ˈna. Te patoi ra oia ia ˈu e te opua ra i te rave i te mea ino i nia ia ˈu, mai i teie mahana.” 14 Pahono maira Ahimeleka i te arii: “O vai i rotopu i ta oe mau tavini i te mea tiaturihia* mai ia Davida?+ E hunoa+ o ˈna na oe, e raatira oia no ta oe mau tiai e mea faaturahia oia i roto i to utuafare.+ 15 E ere a tahi ra vau e ui ai i te Atua no ˈna.+ Eita ta ˈu e nehenehe e opua e rave i te mea ino i nia ia oe! E te arii e, eiaha oe e faahapa ia ˈu e te utuafare o to ˈu metua tane, aita hoi au i ite i te tahi noa ˈˈe mea no nia i tera ohipa.”+
16 Na ô maira râ te arii: “E pohe oe,+ Ahimeleka, oe e te utuafare taatoa o to metua tane.”+ 17 Faaue ihora te arii i te mau tiai* e tia ra ati aˈe ia ˈna: “A taparahi i te mau tahuˈa a Iehova, ua amui hoi ratou ia Davida! Ua ite ratou e ua horo ê oia, e aita ratou i faaara mai ia ˈu!” Aita râ te mau tiai i hinaaro e amo i te rima no te tairi i te mau tahuˈa a Iehova. 18 Faaue ihora te arii ia Doega:+ “A taparahi i te mau tahuˈa!” I tera iho â taime, haere ihora Doega ati Edoma+ e tairi ihora i te mau tahuˈa. E 85 tahuˈa* ta ˈna i haapohe+ i taua mahana ra. 19 Tairi atoa ˈtura oia ia Nôba,+ te oire o te mau tahuˈa. Haapohe atura oia i te tane e te vahine, te tamarii e te aiû, te puaatoro, te asini, e te mamoe, i te ˈoˈe.
20 Tera râ, ua ora ˈtu Abiatara,+ hoê o na tamaiti a Ahimeleka te tamaiti a Ahituba, e ua horo oia ia Davida ra. 21 Faaite atura Abiatara ia Davida e ua haapohe Saula i te mau tahuˈa a Iehova. 22 Parau maira ïa Davida ia Abiatara: “Ua papu iho â ia ˈu i taua mahana ra,+ to reira Doega ati Edoma, e e faaite iho â oia ia Saula. No ˈu te hape i pohe ai te taatoaraa o te utuafare o to oe metua tane. 23 A faaea i pihai iho ia ˈu. Eiaha e mǎtaˈu, te taata hoi e imi i te haapohe ia oe, te imi ra ïa i te haapohe ia ˈu. E paruru vau ia oe.”+
23 I muri aˈe, parauhia maira ia Davida: “Te aro ra te mau Philiseti ia Keila,+ e te haru ra ratou i te maa i te mau vahi tairiiriraa huero maa.”* 2 Ui atura ïa Davida ia Iehova:+ “Mea maitai anei ia haere au e taparahi i taua mau Philiseti ra?” Na ô maira Iehova ia Davida: “A haere, a tairi i te mau Philiseti e a faaora ia Keila.” 3 Parau maira râ to Davida mau taata ia ˈna: “Inaha, te riaria ra matou i ǒ nei i Iuda,+ eaha ˈtu â ïa ia haere tatou i Keila e aro i te nuu a te mau Philiseti!”+ 4 Ui faahou atura ïa Davida ia Iehova.+ Pahono maira Iehova ia ˈna: “A tia, a pou i Keila, no te mea e tuu vau i te mau Philiseti i to rima.”+ 5 Haere atura ïa Davida e to ˈna mau taata i Keila e aro atura i te mau Philiseti. Taparahi ihora oia e rave rahi Philiseti e rave maira oia i ta ratou mau animara. Mea na reira to Davida faaoraraa i to Keila.+
6 I to Abiatara+ te tamaiti a Ahimeleka hororaa ia Davida ra i Keila, e tiputa ta ˈna i rave mai. 7 Parauhia maira ia Saula: “Ua haere mai Davida i Keila.” Na ô aˈera Saula: “Ua tuu mai te Atua ia ˈna i to ˈu nei rima,+ ua mau hoi o ˈna i roto i te hoê marei i to ˈna tomoraa ˈtu i roto i te hoê oire e te uputa ponaohia.” 8 Titau maira ïa Saula pauroa ta ˈna nuu no te haere i Keila e haaati ia Davida e to ˈna mau taata. 9 I to Davida iteraa e te opua ra Saula i te rave i te mea ino i nia ia ˈna, parau atura oia ia Abiatara te tahuˈa: “A afai mai te tiputa i ǒ nei.”+ 10 Na ô atura Davida: “E Iehova te Atua o Iseraela, ua faaroo hoi au e no ˈu i opua ˈi Saula i te haere mai i Keila e haamou i te oire.+ 11 E tuu anei te mau raatira* o Keila ia ˈu i to ˈna rima? E haere mai anei Saula e aro ia matou mai ta ˈu i faarooroo? E Iehova te Atua o Iseraela, a pahono mai na ia ˈu.” Parau maira ïa Iehova: “E haere mai o ˈna.” 12 Ui atura Davida: “E tuu anei te mau raatira o Keila ia ˈu e to ˈu mau taata i te rima o Saula?” Pahono maira Iehova: “E tuu ratou ia outou i to ˈna rima.”
13 Tia aˈera ïa Davida e to ˈna mau taata, piri i te 600 ratou,+ faarue aˈera ia Keila e haere aˈera i te mau vahi atoa eita ratou e noaahia. I te parauraahia ia Saula e ua horo Davida, aita ˈtura o ˈna i tapapa ia ˈna. 14 Faaea ihora Davida i te medebara no Zipha,+ a tapuni ai i nia i te mouˈa, i te mau vahi fifi ia haere atu. Imi noa ˈtura Saula ia ˈna.+ Aita râ Iehova i tuu ia ˈna i to ˈna rima. 15 A faaea ˈi Davida i Horesa i te medebara no Zipha, ite aˈera oia e* te haere mai ra Saula e haapohe ia ˈna.
16 Haere atura Ionatana te tamaiti a Saula ia Davida ra i Horesa, e tauturu atura ia ˈna ia faarahi i to ˈna tiaturi ia Iehova.+ 17 Na ô atura oia ia ˈna: “Eiaha e mǎtaˈu, eita hoi to ˈu metua tane o Saula e ite ia oe. E riro oe ei arii no Iseraela,+ e ei raro iti aˈe au ia oe. Ua ite maitai atoa to ˈu metua tane i te reira.”+ 18 Faaau ihora raua i te hoê faufaa+ i mua ia Iehova, faaea ihora Davida i Horesa e hoˈi maira Ionatana i ǒ ˈna.
19 I muri aˈe, haere aˈera te mau taata no Zipha e farerei ia Saula i Gibea+ e na ô aˈera: “Te tapuni ra Davida i pihai iho i ǒ matou+ i te mau vahi fifi ia haere atu, i Horesa,+ i nia i te aivi o Hakila,+ i te pae apatoa* o Iesimona.*+ 20 E te arii e, e nehenehe noa oe e haere mai i ǒ matou. E tuu atu matou ia ˈna i to oe rima.”+ 21 Na ô ihora ïa Saula: “Ia haamaitaihia outou e Iehova, ua faaite hoi outou i te aumihi ia ˈu. 22 A haere na e a tamata i te ite teihea mau ra o ˈna e o vai tei ite ia ˈna i reira. Ua parauhia mai hoi e mea maramarama roa o ˈna. 23 A hiˈo maitai teihea te mau vahi atoa e tapuni ai oia e ia itea mai ia outou, a hoˈi mai ia ˈu nei. E haere ïa vau na muri ia outou, e mai te peu tei tera fenua oia, e imi au ia ˈna i rotopu i te mau opu* atoa o Iuda.”
24 Vaiiho aˈera ïa to Zipha+ ia Saula e hoˈi aˈera i ǒ ratou. I tera taime, tei te medebara o Maona+ o Davida e to ˈna mau taata, i te Araba+ i te pae apatoa o Iesimona. 25 Haere maira Saula e to ˈna mau taata no te imi ia ˈna.+ I te faaararaahia Davida, pou ihora o ˈna i te hoê mato+ ra i te medebara o Maona e faaea ihora i reira. I to Saula faarooraa i te reira, tapapa ihora oia ia Davida i roto i taua medebara ra. 26 Tae maira Saula i te hoê pae o te mouˈa. Tei te tahi atu pae o taua mouˈa ra o Davida. Te haavitiviti ra Davida e to ˈna mau taata i te horo ê+ ia Saula. Tera râ, te piri noa ˈtu ra Saula e to ˈna mau taata, no te haru mai ia ratou.+ 27 Haere maira râ te hoê vea ia Saula ra e parau ihora: “A haavitiviti i te hoˈi mai, ua haere mai te mau Philiseti e aro i to tatou fenua!” 28 Faaea ihora ïa Saula i te tapapa ia Davida+ e haere atura e aro i te mau Philiseti. No reira i topahia ˈi te iˈoa o taua vahi ra te Mato o te Amaharaa.
29 Reva aˈera Davida mai reira ˈtu e faaea ihora i te mau vahi fifi ia haere atu i pihai iho ia Ene-gedi.+
24 I to Saula iho â hoˈiraa ˈtu mai to ˈna aˈuaˈuraa i te mau Philiseti, parau ihora ratou ia ˈna: “A hiˈo na, tei te medebara o Ene-gedi o Davida.”+
2 Maiti ihora ïa Saula e 3 000 tane i rotopu i te nuu Iseraela e haere aˈera e imi ia Davida e to ˈna mau taata na te mau mato tarere i reira te mau puaaniho mato e ora ˈi. 3 Tae maira Saula i te mau aua mamoe* na te pae purumu, e ana to reira. Tomo ihora Saula i roto no te haumiti.* Te parahi noa ra Davida e to ˈna mau taata i te mau vahi moˈe i roto i te ana.+ 4 Na ô aˈera to Davida mau taata ia ˈna: “Teie te mahana e parau ai Iehova ia oe: ‘Inaha, te tuu nei au i to oe enemi i to rima,+ e nehenehe oe e rave i ta oe e hinaaro ia ˈna.’” Tia aˈera ïa Davida e tâpû omoˈe ihora i te hiti o to Saula ahu tapoˈi. 5 I muri aˈe râ, faahapa noa ˈtura to Davida aau* ia ˈna+ no te mea ua tâpû oia i te hiti o to Saula ahu tapoˈi. 6 Parau atura oia i to ˈna mau taata: “Eita e tia ia ˈu ia rave i te reira i nia i to ˈu fatu no te mea o ˈna tei faatavaihia e Iehova. Eita roa ˈtu Iehova e farii ia hamani ino vau i ta Iehova i faatavai.”+ 7 I tera mau parau, tapea* ihora ïa Davida i to ˈna mau taata, eiaha ratou ia hamani ino ia Saula. Area Saula, tia aˈera oia, haere atura i rapae i te ana e reva ˈtura.
8 Haere atoa ˈtura Davida i rapaeau i te ana e pii atura ia Saula: “To ˈu fatu te arii!”+ I to Saula hiˈoraa ˈtu i muri ia ˈna, piˈo ihora Davida i raro e tipapa ihora. 9 Na ô aˈera Davida ia Saula: “Eaha oe e faaroo ai i te mau parau a te mau taata e na ô ra ‘A hiˈo na, te imi ra Davida i te hamani ino ia oe’?+ 10 I teie mahana, ua ite oe ia Iehova i te tuuraa mai ia oe i to ˈu nei rima i roto i te ana. I te parauraa mai râ hoê o to ˈu mau taata ia haapohe ia oe,+ ua aroha vau ia oe e na ô atura vau: ‘Eita vau e amo i to ˈu rima i nia i to ˈu fatu, o ˈna hoi tei faatavaihia e Iehova.’+ 11 A hiˈo na, e to ˈu metua tane, a hiˈo mai na i teie tuhaa o to oe ahu tapoˈi i roto i to ˈu rima. I to ˈu tâpûraa i te hiti o to oe ahu tapoˈi, aita vau i haapohe ia oe. Te taa ra ïa ia oe i teie nei e aita vau e opua ra i te hamani ino ia oe aore ra i te orure hau, e aita vau i hara ia oe.+ O oe râ, te aˈuaˈu noa mai ra oe ia ˈu no te haapohe ia ˈu.+ 12 Ia haava Iehova i rotopu ia oe e ia ˈu,+ e ia tahoo Iehova ia oe no ta oe i rave i nia ia ˈu.+ Eita râ vau e hamani ino ia oe.+ 13 Mai ta te hoê parau paari e faaite ra: ‘No ǒ mai i te feia ino ra te ino.’ Eita râ vau e hamani ino ia oe. 14 Ua haere te arii o Iseraela e aro ia vai? O vai ta oe e aˈuaˈu ra? Te hoê urî pohe? Te hoê utu animara?+ 15 Ia riro Iehova ei haava, e e haava oia i rotopu ia oe e ia ˈu, e hiˈopoa oia i te tupuraa a paruru atu ai ia ˈu.+ E haava oia ia ˈu a faaora ˈtu ai ia ˈu i to rima.”
16 I te otiraa ta Davida parau ia ˈna, na ô ihora Saula: “O to oe anei reo teie ta ˈu tamaiti e Davida?”+ Auê ihora Saula. 17 Na ô ihora oia ia Davida: “E taata parau-tia aˈe oe ia ˈu, ua hamani maitai hoi oe ia ˈu e ua tahoo vau ia oe i te ino.+ 18 Oia mau, i teie mahana, ua faaite mai oe i to maitai ia ˈu. Ua tuu Iehova ia ˈu i to rima, aita râ oe i haapohe ia ˈu.+ 19 Ia ite te hoê taata i to ˈna enemi, eita o ˈna e vaiiho ia ˈna ia haere ma te ore e hamani ino atu. No ta oe i rave no ˈu i teie mahana, e haamaitai Iehova ia oe.+ 20 I teie nei, a faaroo mai! Ua ite au e faatere iho â oe ei arii+ e i roto i to rima te faatereraa arii o Iseraela e vai ai. 21 I teie nei, a horeo mai i te ora o Iehova+ e eita oe e haamou i to ˈu huaai i muri mai ia ˈu e eita oe e faaore i to ˈu iˈoa i roto i te utuafare o to ˈu metua tane.”+ 22 Horeo ihora ïa Davida ia Saula, e hoˈi atura Saula i ǒ ˈna.+ Area Davida e to ˈna mau taata, ua hoˈi ïa i to ratou haapuraa.+
25 I muri aˈe, pohe ihora Samuela.+ Haaputuputu maira Iseraela taatoa, oto ihora ia ˈna e huna ihora ia ˈna i to ˈna fare i Rama.+ I muri iho, haere ihora Davida i te medebara no Parana.
2 E taata râ te parahi ra i Maona,+ tei Karemela*+ ta ˈna faufaa. E taata taoˈa rahi roa oia, e 3 000 mamoe e 1 000 puaaniho ta ˈna, e te paoti ra oia i te huruhuru o ta ˈna mau mamoe i Karemela. 3 O Nabala+ te iˈoa o taua taata ra, no te opu o Kaleba+ o ˈna. O Abigaila+ te iˈoa o ta ˈna vahine faaipoipo, mea maramarama e mea haviti o ˈna. Area Nabala, mea etaeta ïa e te haerea ino atoa.+ 4 Faaroo aˈera Davida i roto i te medebara e te paoti ra Nabala i te huruhuru o ta ˈna mau mamoe. 5 Tono ihora ïa Davida ahuru tane apî ia Nabala ra a parau ai ia ratou: “A pauma i Karemela, e ia tapae outou ia Nabala ra, a ani ia ˈna eaha to ˈna huru i to ˈu nei iˈoa. 6 I muri iho, a parau: ‘Ia rahi to oe pue mahana, ia maitai oe* e ia maitai to oe utuafare e te mau mea atoa ta oe e fatu nei. 7 Ua faaroo vau e te paoti ra oe i te huruhuru o ta oe mau mamoe. Ia farerei matou i ta oe mau tiai mamoe, aita matou i hamani ino ia ratou,+ e aita hoê aˈe mea ta ratou i eiâhia i te taime taatoa ratou i Karemela. 8 A ui ia ratou, e faatia ˈtu ratou ia oe. E taime oaoa* teie, a hamani maitai mai ïa i te mau tane ta ˈu i tono atu. Mai te peu te toe ra ta oe maa, a horoa ˈtu na i te tahi na ratou e na to tamaiti o Davida.’”+
9 Haere atura ïa ta Davida mau tane apî e faaite atura pauroa te parau ia Nabala i te iˈoa o Davida. I te otiraa ta ratou parau, 10 pahono maira Nabala ia ratou: “O vai o Davida, o vai taua tamaiti ra a Iese? Mea rahi hoi te tavini i teie mahana o te horo ê ra i to ratou mau fatu.+ 11 E rave anei au i ta ˈu faraoa, ta ˈu pape e te iˈo animara ta ˈu i tâpûpû no ta ˈu feia paoti huruhuru mamoe, a horoa ˈtu ai i te reira na te feia aita vau i ite nohea mai ratou?”
12 Hoˈi maira ïa ta Davida mau tane apî e faatia maira i teie mau parau atoa ia ˈna. 13 Na ô ihora ïa Davida i to ˈna mau taata: “Outou paatoa, a rave i ta outou ˈoˈe!”+ Tamau ihora ïa ratou paatoa i ta ratou ˈoˈe i nia i to ratou hatua, e na reira atoa ihora Davida. Piri i te 400 taata tei haere na muri ia Davida e 200 taata tei faaea mai no te tiai i te mau taihaa.
14 I taua atoa taime ra, faatia ˈtura hoê tavini ia Abigaila, ta Nabala vahine faaipoipo: “Inaha, ua tono Davida i te vea mai te medebara mai no te faatae atu i te poroi hamani maitai i to matou fatu. Ua tuhi râ oia ia ratou.+ 15 Ua hamani maitai rahi mai taua mau taata ra ia matou. Aita ratou i hamani ino noa ˈˈe ia matou, e aita hoê aˈe mea ta matou i eiâhia i te taime taatoa tei pihai iho ratou ia matou na te mau vahi aihere ra.+ 16 Ua riro ratou mai te hoê patu ati aˈe ia matou. Ua paruru ratou ia matou i te po e te ao, i te taime taatoa matou i te tiairaa i te mau mamoe i pihai iho ia ratou. 17 I teie nei, a feruri eaha ta oe e rave, mea papu hoi e roohia to matou fatu e to ˈna utuafare taatoa i te ati.+ E taata haapaoraa ore+ râ hoi o ˈna, aita e taata e nehenehe e paraparau ia ˈna.”
18 Haavitiviti ihora ïa Abigaila+ i te rave e 200 faraoa, e piti farii uaina rarahi, e pae mamoe ua ineine no te tunuraa, e pae sea* huero maa tunu paa, 100 faraoa vine mǎrô pâpâhia, e 200 faraoa suke mǎrô pâpâhia. Tuu aˈera oia i tera mau mea atoa i nia i te mau asini.+ 19 Parau maira oia i ta ˈna mau tavini: “A haere atu. E na muri atu vau ia outou.” Aita râ oia i faaite i te tahi noa ˈˈe mea ia Nabala ta ˈna tane faaipoipo.
20 Pou maira Abigaila i raro i te mouˈa na nia i te asini. Te haere mai ra Davida e to ˈna mau taata na mua mai. Aita râ ratou i ite ia Abigaila, ua tapuni hoi te mouˈa ia ˈna. Farerei aˈera ratou i muri iho. 21 Tera râ, i parau na Davida: “Mâuˈa noa to ˈu parururaa i te faufaa a teie taata i te medebara. Aita hoê aˈe mea ta ˈna i eiâhia.+ Tera râ, te tahoo mai ra o ˈna i te maitai i te ino.+ 22 Ia faautua rahi te Atua i to ˈu mau enemi* mai te peu ananahi poipoi aita to ˈna mau taata* i pohe ia ˈu.”
23 I to Abigaila iteraa ia Davida, haaviti ihora oia i te pou na nia mai i te asini e tipapa ihora i mua ia Davida. 24 Tipapa ihora oia i to ˈna pae avae e parau atura: “To ˈu fatu, ei nia ia ˈu te utua no te ohipa o tei tupu, a farii ia paraparau vau ia oe, e a faaroo i to tavini vahine. 25 Eiaha to ˈu fatu e haapao atu i tera taata haapaoraa ore ra o Nabala.*+ Mai ta to ˈna iˈoa e faaite ra, e taata maamaa oia. O vau râ, to tavini vahine, aita vau i ite i te mau tane apî ta oe i tono mai. 26 I teie nei, to ˈu fatu, te horeo nei au i te ora o te Atua ra o Iehova e ia oe, na Iehova i tapea ia oe+ ia ore oe ia haamanii i te toto+ e ia ore oe ia tahoo ia oe iho.* Ia riro to oe mau enemi e te taata atoa o te imi i te hamani ino ia oe mai ia Nabala. 27 I teie nei, to ˈu fatu, a horoa na te mau tane apî o te apee ra ia oe+ i teie ô*+ ta ˈu i afai mai. 28 To ˈu fatu, a faaore na i ta ˈu hara. E rave Iehova i to huaai no te faatere ei arii no te hoê tau roa,+ te aro nei hoi oe i te mau tamaˈi a Iehova+ e aita oe i rave aˈenei i te mea ino mai to oe fanauraahia mai â.+ 29 Ia imi te tahi taata ia oe no te haapohe ia oe, e paruru Iehova to Atua i to oe ora mai te mea ra ua puohuhia i roto i te hoê pute. Area te ora o to oe mau enemi, e taora oia i te reira i te atea roa, mai te ofai e taorahia i te taora ofai. 30 Ia rave Iehova i te mau mea maitai atoa ta ˈna i fafau ia oe e ia faatoroa o ˈna ia oe ei aratai no Iseraela,+ 31 eita oe e faahapa ia oe iho e eita oe e tatarahapa,* no te mea aita oe i haamanii faufaa ore noa i te toto e aita oe i tahoo ia oe iho.+ To ˈu fatu, ia haamaitai Iehova ia oe, a haamanaˈo mai ia ˈu, to tavini vahine.”
32 Na ô maira Davida ia Abigaila: “Ia aruehia Iehova te Atua o Iseraela, o tei tono mai ia oe i teie mahana no te farerei ia ˈu! 33 E ia haamaitaihia oe no to feruriraa paari! Ia haamaitaihia oe no to oe tapearaa ia ˈu i teie mahana ia ore au ia haamanii i te toto+ e ia ore au ia tahoo ia ˈu iho. 34 Te horeo nei au i te ora o Iehova te Atua o Iseraela o tei tapea ia ˈu ia ore au e hamani ino ia oe,+ ahani aita oe i haere oioi mai e farerei ia ˈu,+ ua poipoi anaˈe, ua pohe ïa te mau tane* e tavini ra ia Nabala.”+ 35 Farii maira ïa Davida i te mea ta ˈna i afai mai ia ˈna ra e na ô maira: “A hoˈi i to oe fare ma te hau. Inaha, ua faaroo vau ia oe. E farii au i ta oe e ani.”
36 I muri aˈe, hoˈi maira Abigaila i ǒ ˈna. Te tamaa ra Nabala mai te hoê arii i to ˈna fare. Mea oaoa oia e ua taero roa. Aita Abigaila i faatia i te tahi noa ˈˈe mea ia ˈna e ao noa aˈera. 37 I te peeraa to Nabala taero i poipoi aˈe, faatia ˈtura ta ˈna vahine faaipoipo ia ˈna i tera mau mea. Riro aˈera te mafatu o Nabala mai to te hoê taata pohe, e faaea noa ˈtura o ˈna mai te hoê ofai, aita oia i hautiuti faahou. 38 Piri i te ahuru mahana i muri aˈe, tairi ihora Iehova ia Nabala e pohe aˈera oia.
39 I to Davida faarooraa e ua pohe o Nabala, na ô ihora oia: “Ia aruehia Iehova! Ua paruru oia ia ˈu+ ia Nabala, te taata o tei tuhi ia ˈu.+ E ua tapea oia ia ˈu ia ore au ia rave i te tahi mea ino.+ Ua faahoˈi Iehova i te ino o Nabala i nia i to ˈna iho upoo!” Tono aˈera Davida i te vea no te parau ia Abigaila e te hinaaro ra o ˈna e faaipoipo ia ˈna. 40 Haere maira ïa ta Davida mau vea e farerei ia Abigaila i Karemela e parau maira ratou ia ˈna: “Ua tono mai Davida ia matou no te mea te hinaaro ra o ˈna e faaipoipo ia oe.” 41 Tipapa ihora ïa oia e na ô atura: “A parau i to ˈu fatu: Teie to tavini vahine. Ua ineine au i te horoi i te avae+ o te mau tavini a to ˈu fatu.” 42 Tia aˈera Abigaila+ e pauma faahou aˈera i nia i ta ˈna asini. Apee atura oia i te mau vea a Davida. E pae o ta ˈna mau tavini vahine tei na muri ia ˈna. Riro atura Abigaila ei vahine faaipoipo na Davida.
43 Ua faaipoipo atoa Davida ia Ahinoama+ no Iezereela,+ e riro atura na vahine e piti ei vahine faaipoipo na ˈna.+
44 Area Mikala,+ ta Davida vahine faaipoipo matamua, ua horoa Saula ia ˈna ei vahine faaipoipo na Paleti+ te tamaiti a Laisa, no Galima.
26 I muri aˈe, haere maira te mau taata no Zipha+ ia Saula ra i Gibea+ ma te parau: “Te tapuni ra Davida i nia i te aivi o Hakila i mua iho ia Iesimona.”*+ 2 Haere atura ïa Saula e 3 000 taata maitihia no Iseraela no te imi ia Davida i te medebara no Zipha.+ 3 Puhapa ihora Saula i nia i te aivi o Hakila i mua iho ia Iesimona, i te pae purumu. Te parahi noa ra ïa Davida i te medebara, e faaroo aˈera oia e ua haere mai Saula i te medebara no te imi ia ˈna. 4 Tono ihora ïa Davida i te mata huna e hiˈo e ua tae mai iho â anei Saula. 5 I muri aˈe, haere aˈera Davida i te vahi i reira Saula i te puhaparaa, e itea maira ia Davida te vahi taotoraa o Saula raua Abinera+ te tamaiti a Nere, te raatira o ta ˈna nuu. Te taoto ra Saula i roto i te puhapa e te mau faehau ati aˈe ia ˈna. 6 Na ô atura Davida ia Ahimeleka ati Heta+ e ia Abisai+ te tamaiti a Zeruia,+ te taeae o Ioaba: “O vai te haere na muri ia ˈu i roto i te puhapa ia Saula ra?” Pahono maira Abisai: “E haere au na muri ia oe.” 7 Faafatata aˈera ïa Davida raua Abisai i te puhapa i te po. Itea maira ia raua o Saula te taoto ra e ta ˈna omore o tei patiahia i roto i te repo i pihai iho i to ˈna upoo. Te tarava noa ra Abinera e te mau faehau ati aˈe ia ˈna.
8 Na ô maira Abisai ia Davida: “I teie mahana, te tuu nei te Atua i to oe enemi i roto i to rima.+ I teie nei, a vaiiho na ia ˈu ia patia ia ˈna i te omore i raro i te repo, hoê noa taime, aita e faufaa ia tapiti te patiaraa.” 9 Tera râ, parau atura Davida ia Abisai: “Eiaha e hamani ino ia ˈna, o vai hoi taata e ore e hara+ ia amo oia i to ˈna rima i nia i te tane ta Iehova i faatavai?”+ 10 Na ô atura Davida: “Te horeo nei au i te ora o te Atua ra o Iehova e na Iehova iho e tairi ia ˈna,+ aore ra e tae mai te mahana+ e pohe ai o ˈna, aore ra e haere o ˈna i te tamaˈi a pohe atu ai.+ 11 I mua ia Iehova, eita ta ˈu e nehenehe e amo i te rima i nia i tei faatavaihia e Iehova!+ E rave anaˈe i te omore i pihai iho i to ˈna upoo e te farii pape, e e hoˈi anaˈe.” 12 Rave ihora ïa Davida i te omore e te farii pape i pihai iho i to Saula upoo, e haere atura. Aita hoê aˈe i ite+ aore ra i haapao aˈe ia raua, aita i ara mai, ua roohia hoi ratou i te varea taoto rahi no ǒ mai ia Iehova ra. 13 Haere atura Davida i te tahi atu pae o te peho e tia aˈera i nia i te tupuai o te mouˈa, i te atea i te vahi to reira Saula.
14 Tuô atura Davida i te mau faehau e ia Abinera+ te tamaiti a Nere: “Abinera, te faaroo mai ra anei oe?” Pahono maira Abinera: “O vai tera e tuô ra i te arii?” 15 Na ô atura Davida ia Abinera: “E ere anei oe i te aito? O vai hoi taata mai ia oe i Iseraela? Eaha ïa oe i ore ai i tiai i to fatu te arii? Ua tomo atu hoi hoê faehau i roto i te puhapa no te haapohe i to fatu te arii.+ 16 Aita oe i rave i tei titauhia ia oe. Te horeo nei au i te ora o te Atua ra o Iehova, mea tano ia pohe outou, aita hoi outou i tiai i to outou fatu, te tane ta Iehova i faatavai.+ A hiˈo na râ i teie nei! Teihea te omore e te farii pape+ a te arii i vai na i pihai iho i to ˈna upoo?”
17 Taa aˈera ia Saula i te reo o Davida e na ô atura: “No oe teie reo ta ˈu tamaiti, e Davida?”+ Pahono maira Davida: “To ˈu reo teie, e to ˈu fatu te arii.” 18 Na ô maira â oia: “Eaha to ˈu fatu e aˈuaˈu ai ia ˈu?+ Eaha ta ˈu i rave? E eaha ta ˈu hara?+ 19 To ˈu fatu te arii, a faaroo mai na ia ˈu: Mai te peu na Iehova i turai ia oe ia riri ia ˈu, ia farii mai ïa oia ia pûpû vau i te tusia huero maa.* Mai te peu râ na te taata i turai ia oe ia riri ia ˈu,+ ia faautuahia ratou e Iehova. Ua tiavaru hoi ratou ia ˈu i teie mahana ia ore au ia amui faahou i te nunaa* o Iehova,+ mai te mea ra e te parau mai ra ratou: ‘A haere, a tavini i te tahi atu mau atua!’ 20 Eita râ vau e hinaaro e pohe i te atea ê ia Iehova. E te arii o Iseraela e, eaha oe e imi ai i te hoê utu iti haihai,+ mai te mea ra e te aˈuaˈu ra oe i te hoê kerâ* na nia i te mau mouˈa?”
21 Na ô atura ïa Saula ia ˈna: “Ua hara vau.+ A hoˈi mai, e ta ˈu tamaiti, e Davida, eita vau e hamani ino faahou ia oe, ua haafaufaa rahi hoi oe i to ˈu ora+ i teie mahana. E ohipa maamaa e e hape rahi ta ˈu i rave.” 22 Pahono maira Davida: “E te arii e, teie ta oe omore. A tuu mai hoê o na taata apî e tii mai. 23 Na Iehova e haamaitai i te taata parau-tia+ e te haapao maitai. Ua tuu mai Iehova ia oe i teie mahana i to ˈu nei rima, aita râ vau i hinaaro e hamani ino i te tane ta Iehova i faatavai.+ 24 Inaha, ua haafaufaa rahi au i to oe ora i teie mahana. Ia haafaufaa atoa Iehova i to ˈu ora, e ia faaora oia ia ˈu i te mau ati atoa.”+ 25 Pahono atura Saula ia Davida: “Ia haamaitaihia oe, e ta ˈu tamaiti e Davida. E rave mau â oe i te ohipa faahiahia e e manuïa oe.”+ Reva aˈera Davida e hoˈi maira Saula i ǒ ˈna.+
27 Tera râ, feruri ihora Davida: “Ia tae i te hoê mahana, e pohe au i te rima o Saula. Mea maitai aˈe no ˈu ia horo+ i te fenua o te mau Philiseti. E faaea ïa Saula i te imi ia ˈu i te mau tuhaa fenua o Iseraela+ e e ora vau.” 2 Haere atura ïa Davida e na 600 taata+ tei na muri ia ˈna ia Akisa+ ra te arii o Gata, te tamaiti a Maoka. 3 Faaea ihora Davida e to ˈna mau taata i Gata, i pihai iho ia Akisa. Ua apeehia mai ratou tataitahi e to ratou utuafare. Ua na muri mai na vahine faaipoipo e piti a Davida ia ˈna: o Ahinoama+ no Iezereela raua Abigaila+ no Karemela, te vahine ivi a Nabala. 4 I te faaiteraahia ia Saula e ua horo Davida i Gata, faaea ihora oia i te imi ia ˈna.+
5 Na ô atura Davida ia Akisa: “Mai te peu e farii oe, a horoa mai na i te tahi vahi no ˈu i roto i te hoê oire i te mataeinaa, ia ora vau i ǒ. Eaha to tavini e ora ˈi i pihai iho ia oe i te oire o te arii?” 6 Horoa maira ïa Akisa ia Zikelaga+ na ˈna i taua mahana ra. Mea na reira te mau arii o Iuda i fatu ai ia Zikelaga e tae roa mai i teie mahana.
7 Hoê matahiti e maha avaˈe+ te maoro* to Davida oraraa i te mataeinaa Philiseti. 8 E haere na Davida e to ˈna mau taata e aro i to Gesura,+ te mau Girize, e te ati Amaleka,+ no te mea i ora na ratou i te tuhaa fenua mai Telama e tae atu i Sura+ e haere roa ˈtu i apatoa i te otia fenua o Aiphiti. 9 Ia aro Davida i taua tuhaa fenua ra, eita oia e vaiiho ia ora hoê noa ˈˈe tane aore ra vahine.+ E rave râ oia i te mau mamoe, te mau puaatoro, te mau asini, te mau kamela, e te ahu, a hoˈi atu ai ia Akisa ra. 10 E ani ïa Akisa: “Ihea outou i te aroraa i teie mahana?” E pahono Davida: “I te pae apatoa* o Iuda”+ aore ra “I te pae apatoa o te fenua o te ati Ierameela”+ aore ra “I te pae apatoa o te fenua o te ati Keni.”+ 11 Aita Davida i faaherehere i te tahi noa ˈˈe tane e vahine, ia ore ratou ia afaihia i Gata a faatia ˈtu ai: “Tera ta Davida i rave.” (Tera ta ˈna i rave noa na a ora ˈi oia i te mataeinaa Philiseti.) 12 Ua tiaturi ïa Akisa ia Davida. I manaˈo na oia: ‘Mea papu ua riro oia ei mea neoneo i rotopu i to ˈna nunaa o Iseraela. E tavini noa ïa oia ia ˈu i to ˈna oraraa taatoa.’
28 I taua mau mahana ra, haaputuputu aˈera te mau Philiseti i ta ratou mau nuu no te aro ia Iseraela.+ Na ô atura ïa Akisa ia Davida: “Ua ite iho â ïa oe e haere oe e to oe mau taata na muri ia ˈu i te tamaˈi.”+ 2 Parau maira ïa Davida ia Akisa: “Ua ite mau â oe eaha ta to tavini e rave.” Na ô atura Akisa ia Davida: “No reira e faatoroa vau ia oe ei tiai no ˈu.”*+
3 Ua pohe râ Samuela, ua oto Iseraela taatoa ia ˈna e ua huna ratou ia ˈna i Rama, to ˈna oire.+ Ua tiavaru atoa Saula i te feia e demoni hiˈohiˈo to ratou e te feia hiˈohiˈo i taua fenua ra.+
4 Haaputuputu aˈera te mau Philiseti e haere maira e puhapa i Sunema.+ Titau maira ïa Saula i te mau faehau atoa o Iseraela, e puhapa ihora ratou i Gilaboa.+ 5 I to Saula iteraa i te puhapa a te mau Philiseti, mǎtaˈu roa ihora oia.+ 6 Noa ˈtu e ui Saula ia Iehova,+ eita roa ˈtu Iehova e pahono ia ˈna, na roto i te moemoeâ anei, na roto i te Urima+ aore ra na roto i te arai o te mau peropheta. 7 Na ô atura Saula i ta ˈna mau tavini: “A imi mai i te hoê vahine e demoni hiˈohiˈo to ˈna,+ e haere au e farerei ia ˈna.” Pahono maira ta ˈna mau tavini: “Te vai ra hoê vahine e demoni hiˈohiˈo to ˈna i Ene-dora.”+
8 Taui ihora ïa Saula i to ˈna ahu eiaha te taata ia taa o vai tera, e haere atura e e piti o to ˈna mau taata i ǒ taua vahine ra i te po. Na ô atura oia: “A faaite mai na eaha to a muri aˈe na roto i to oe mana hiˈohiˈo,+ e a pii i te taata ta ˈu e parau atu ia oe.” 9 Parau maira râ te vahine ia ˈna: “Ua ite maitai oe e ua tiavaru Saula i te feia e demoni hiˈohiˈo to ratou i teie fenua, oia atoa te feia hiˈohiˈo.+ Eaha ïa oe e tamata ˈi i te tuu mai i te marei ia haapohehia vau?”+ 10 Horeo ihora ïa Saula ia ˈna ia Iehova ra: “Te horeo nei au i te ora o te Atua ra o Iehova, eita roa oe e faahapehia i roto i teie ohipa!” 11 Na ô maira ïa te vahine: “O vai ta ˈu e pii no oe?” Pahono atura oia: “A pii ia Samuela.” 12 I to te vahine iteraa ia “Samuela,”*+ tuô ihora oia ma te reo puai e na ô maira ia Saula: “Eaha oe i punu ai ia ˈu? O oe hoi Saula!” 13 Na ô atura te arii Saula ia ˈna: “Eiaha e mǎtaˈu! Eaha ta oe e ite ra?” Pahono maira te vahine: “Te ite nei au i te hoê taata e au i te atua e haere mai ra mai raro mai i te fenua.” 14 Ui atura oia ia ˈna: “Mai te aha to ˈna hohoˈa?” Pahono maira ïa oia: “E taata paari, e ahu aita e rima+ to nia ia ˈna.” Taa ihora ia Saula e o “Samuela” taua taata ra. Piˈo ihora oia i raro e tipapa ihora.
15 Parau atura “Samuela” ia Saula: “Eaha oe i titau ai ia ˈu? Eaha oe i faaue ai ia piihia vau?” Pahono maira Saula: “E ahoaho rahi to ˈu. Te aro nei te mau Philiseti ia ˈu, ua faarue te Atua ia ˈu e aita oia e pahono faahou ra ia ˈu, na roto i te arai o te mau peropheta anei aore ra na roto i te moemoeâ.+ No reira vau i pii ai ia oe, ia faaite mai oe eaha ta ˈu e rave.”+
16 Parau atura “Samuela”: “I teie nei ua faarue Iehova ia oe+ e ua riro oia ei enemi no oe, eaha oe e ui ai ia ˈu? 17 E rave Iehova i te mea ta ˈna i tohu na roto ia ˈu: e tatara Iehova i te faatereraa arii i to oe rima a horoa ˈtu ai i te reira i te tahi atu taata, ia Davida.+ 18 No te mea aita oe i faaroo i te reo o Iehova e aita oe i taparahi i te ati Amaleka.+ No ratou hoi i riri roa ˈi oia. No reira Iehova e rave ai i te reira i nia ia oe i teie mahana. 19 E tuu atoa Iehova ia Iseraela e ia oe i te rima o te mau Philiseti,+ e ananahi, e amuihia oe+ e ta oe mau tamaiti+ ia ˈu nei. E tuu atoa Iehova i te nuu o Iseraela i te rima o te mau Philiseti.”+
20 Mǎtaˈu roa ihora Saula i ta “Samuela” mau parau e marua ihora oia i raro. Aita e puai faahou to ˈna, aita hoi oia i amu i te maa i taua mahana e po taatoa ra. 21 I to te vahine faafatataraa mai ia Saula e i to ˈna iteraa e ua ahoaho roa oia, na ô maira te vahine ia ˈna: “Ua faaroo vau ia oe e ua fatata roa vau i te pohe+ no te rave i te mea ta oe i faaue mai ia ˈu. 22 I teie nei, a faaroo na i ta ˈu e parau atu. E horoa ˈtu vau maa faraoa na oe. Hou a haere ai, e amu oe i te reira, ia itoitohia oe.” 23 Aita râ oia i farii e na ô atura: “Eita vau e amu i te maa.” Faahepo noa maira râ ta ˈna mau tavini e teie atoa vahine ia ˈna. Faaroo atura ïa oia, tia maira oia e parahi ihora i nia i te roˈi. 24 Tupai ihora ïa teie vahine i te fanauˈa puaatoro* ta ˈna i faaamu. Rave ihora oia i te faraoa ota, ôi ihora i te reira e eu ihora i te faraoa hopue ore. 25 Tuu ihora oia i te reira i mua ia Saula e ta ˈna mau tavini, e amu aˈera ratou. I muri iho, tia aˈera ratou e reva ˈtura i tera iho â po.+
29 Haaputuputu maira te mau Philiseti+ i ta ratou mau nuu atoa i Apheka a puhapa ˈi te ati Iseraela i pihai iho i te pape pihaa i Iezereela.+ 2 Reva aˈera te mau faatere a te mau Philiseti e ta ratou mau faehau ei pǔpǔ hanere e te tausani, e na muri noa maira Davida e to ˈna mau taata i pihai iho ia Akisa.+ 3 Na ô aˈera râ te mau raatira a te mau Philiseti: “Eaha ta teie mau Hebera ohipa i ǒ nei?” Pahono atura Akisa ia ratou: “O Davida teie, te tavini a te arii Saula no Iseraela, hoê matahiti i te maoro aore ra hau aˈe+ o ˈna i te faaearaa i pihai iho ia ˈu. Mai te mahana i haere mai ai o ˈna i ǒ ˈu e tae roa mai i teie nei, aita â i itea mai ia ˈu te tahi mea e faahapa ˈi au ia ˈna.” 4 Riri aˈera râ te mau raatira a te mau Philiseti ia ˈna e parau aˈera: “A faahoˈi i tera taata.+ Ia hoˈi o ˈna i te vahi ta oe i faataa no ˈna. Eiaha o ˈna ia haere na muri ia tatou i te tamaˈi, aˈunei o ˈna e aro ai ia tatou.+ Inaha, ia farii faahou to ˈna fatu ia ˈna, hoê noa mea e titauhia ia ˈna: ia hopoi oia i te upoo o to tatou mau taata ia ˈna ra. 5 E ere anei Davida teie, ta te nunaa i himene a ori ai ma te parau:
‘Ua tausani ta Saula i tairi,
E ua ahuru tausani ta Davida’?”+
6 Titau atura ïa Akisa+ ia Davida e parau atura: “Te horeo nei au i te ora o te Atua ra o Iehova, e taata afaro oe, e te oaoa nei au i to oe haereraa mai i te tamaˈi e ta ˈu nuu.+ E mai te mahana i haere mai ai oe i ǒ ˈu e tae roa mai i teie nei, aita â i itea mai ia ˈu te tahi mea e faahapa ˈi au ia oe.+ Aita râ te mau faatere e tiaturi ra ia oe.+ 7 A hoˈi ïa ma te hau, e eiaha e rave i te tahi mea e riri ai ratou.” 8 Parau maira râ Davida ia Akisa: “No te aha? Eaha ta ˈu i rave? Eaha te mea e faahapa ˈi oe ia ˈu mai te mahana i haere mai ai au i ǒ oe e tae roa mai i teie nei? No te aha e ore ai au e nehenehe e haere na muri ia oe e aro i to oe mau enemi, to ˈu fatu te arii?” 9 Pahono atura Akisa ia Davida: “No ˈu, e au to oe maitai i to te hoê melahi a te Atua.+ Ua parau mai râ te mau raatira a te mau Philiseti: ‘Eiaha o ˈna ia haere na muri ia tatou i te tamaˈi.’ 10 E tia poipoi ïa oe e to oe mau taata, e faaineine outou a hoˈi atu ai i te aoraa iho â.”
11 Tia poipoi aˈera ïa Davida e to ˈna mau taata e hoˈi aˈera i te fenua o te mau Philiseti. Area te mau Philiseti, pauma aˈera ratou i Iezereela.+
30 E toru mahana te maoro i tapae ai Davida e to ˈna mau taata i Zikelaga.+ I tera râ taime, ua tomo atu te ati Amaleka+ i te Negeba* e i Zikelaga. Ua aro ratou ia Zikelaga e ua tanina ia ˈna. 2 Ua rave tîtî ratou i te mau vahine+ e te mau taata atoa no reira. Aita râ ratou i haapohe hoê noa ˈˈe. Ua haru ratou i taua feia ra e ua haere. 3 I to Davida e to ˈna mau taata taeraa mai i Zikelaga, ite aˈera ratou e ua taninahia te oire, e ua rave-tîtî-hia ta ratou mau vahine, ta ratou mau tamaiti e ta ratou mau tamahine. 4 Auê aˈera ïa Davida e to ˈna mau taata e rohirohi noa ˈtu ratou i te auêraa. 5 Ua haru-atoa-hia na vahine faaipoipo e piti a Davida, o Ahinoama no Iezereela e o Abigaila te vahine ivi a Nabala no Karemela.+ 6 Ahoaho roa ihora Davida, ua hinaaro hoi to ˈna mau taata e pehi ia ˈna i te ofai. Ua riri roa hoi ratou e aita faahou ta ratou mau tamaiti e tamahine. Itoitohia ihora râ Davida ia Iehova to ˈna Atua.+
7 Parau atura Davida ia Abiatara+ te tahuˈa, te tamaiti a Ahimeleka: “A afai mai na i te tiputa i ǒ nei.”+ Afai maira ïa Abiatara i te tiputa ia Davida ra. 8 Ui atura Davida ia Iehova:+ “E tia anei ia ˈu ia tapapa i tera pǔpǔ eiâ? E noaa anei ratou ia ˈu?” Pahono maira te Atua ia ˈna: “A tapapa ˈtu, e noaa hoi ratou ia oe, e e faaora oe i tei hopoi-tîtî-hia.”+
9 Reva ihora Davida e to ˈna na 600 taata,+ haere aˈera ratou e tapae aˈera i te tahora o Besora. Faaea maira vetahi i reira. 10 Haere noa ˈtura Davida e e 400 taata. Area te tahi atu 200, ua faaea ïa i muri no te mea ua rohirohi roa i te haere i te tahi atu pae o te tahora.+
11 Ite maira ratou i te hoê taata no Aiphiti i te mataeinaa e afai maira ia ˈna ia Davida ra. Horoa ˈtura ratou na ˈna i te maa e te pape, 12 te tahi tâpû faraoa suke mǎrô pâpâhia e e piti faraoa vine mǎrô pâpâhia. Amu atura oia i te reira e itoitohia ˈtura,* aita hoi oia i amu i te maa e aita i inu i te pape a toru mahana e a toru po i te maoro. 13 Ui atura ïa Davida ia ˈna: “E tavini oe na vai, e nohea mai oe?” Pahono maira oia: “E tavini Aiphiti au, e tîtî na te hoê taata ati Amaleka. Ua faarue râ to ˈu fatu ia ˈu no te mea ua maˈihia vau a toru mahana i teie nei. 14 Ua haere matou e aro i te pae apatoa* o te tuhaa fenua o te mau Kereti,+ te tuhaa fenua o Iuda e te pae apatoa* o te tuhaa fenua a Kaleba.+ E ua tanina matou ia Zikelaga.” 15 Ani atura ïa Davida ia ˈna: “E aratai oe ia ˈu i taua pǔpǔ eiâ ra?” Pahono maira oia: “Mai te peu e horeo oe ia ˈu i te ora o te Atua e eita oe e haapohe ia ˈu e eita oe e tuu ia ˈu i te rima o to ˈu fatu, e aratai au ia oe ia ratou ra.”
16 Aratai ihora ïa oia ia Davida i taua pǔpǔ eiâ ra o tei purara na taua fenua ra. Te tamaa ra, te inu ra e te arearea ra ratou no te faufaa rahi ta ratou i haru mai i te fenua o te mau Philiseti e i te fenua o Iuda. 17 Tairi ihora Davida ia ratou mai te aahiata e ahiahi noa ˈtu. Aita hoê aˈe i ora mai+ maori râ e 400 o tei horo na nia i te kamela. 18 Rave faahou maira Davida pauroa ta te ati Amaleka i eiâ,+ e faaora maira Davida i ta ˈna na vahine e piti. 19 Tei reira te taatoaraa o ratou, mai te mea apî e tae atu i te mea paari. Noaa faahou maira ia ratou ta ratou mau tamaiti e tamahine e te faufaa.+ Noaa faahou maira ia Davida te mau mea atoa ta ratou i haru. 20 Rave maira ïa Davida i te mau mamoe e puaatoro atoa a te pǔpǔ eiâ, e aratai maira to ˈna mau taata i te reira na muri i ta ratou iho mau animara. Na ô aˈera ratou: “Na Davida teie faufaa.”
21 I muri iho, tae maira Davida i te tahora o Besora e te taatoaraa o te hoˈi mai na muri ia ˈna. Haere maira ïa na 200 taata o tei rohirohi roa+ e farerei ia ratou. Tapiri atura Davida i taua mau taata ra e ani atura eaha to ratou huru. 22 Te vai ra râ te tahi mau taata ino e te haapaoraa ore i rotopu i te mau faehau tei haere na muri ia Davida. Na ô aˈera ratou ia ˈna: “Inaha aita ratou i haere mai na muri ia tatou, eita tatou e horoa ˈtu i te tahi tuhaa o te faufaa tei noaa mai ia tatou. A rave noa ˈtu ratou i ta ratou vahine faaipoipo e ta ratou mau tamarii e a haere ê atu.” 23 Parau atura râ Davida: “To ˈu mau taeae, eiaha outou e na reira i te mau mea ta Iehova i horoa na tatou. Ua paruru oia ia tatou e ua tuu oia i te pǔpǔ eiâ o tei haere mai e aro i to tatou oire i to tatou nei rima.+ 24 Aita e tano te mea ta outou e parau ra! Te tuhaa a te taata o tei haere i te tamaˈi, hoê â ïa tuhaa e ta te taata o tei faaea i pihai iho i te mau taihaa.+ E fanaˈo te taatoaraa i te hoê â tuhaa.”+ 25 E mai taua mahana ra, haamauhia ˈtura teie faaotiraa a Davida ei faatureraa, e e ture tera i Iseraela e tae roa mai i teie mahana.
26 I to Davida hoˈiraa i Zikelaga, faatae atura oia i te tahi tuhaa o te faufaa i noaa mai na to ˈna mau hoa matahiapo no Iuda, ma te parau: “E ô* teie na outou no roto mai i te faufaa ta matou i rave mai i te mau enemi o Iehova.” 27 Faatae atura oia i te ô na te feia i Betela,+ i Ramota no te Negeba,* i Iatira,+ 28 i Aroera, i Siphumota, i Esetemoa,+ 29 i Rakala, e na te feia i te mau oire o te ati Ierameela+ e i te mau oire o te ati Keni,+ 30 na te feia i Horamâ,+ i Borasana, i Ataka, 31 i Heberona,+ e na te mau vahi atoa ta Davida e to ˈna mau taata i matau i te haere.
31 Aro maira râ te mau Philiseti ia Iseraela.+ Horo ê atura te mau faehau o Iseraela i mua i te mau Philiseti, e mea rahi tei taparahihia i nia i te mouˈa Gilaboa.+ 2 Tapapa maira te mau Philiseti ia Saula e ta ˈna mau tamaiti, e tairi aˈera te mau Philiseti ia Ionatana,+ Abinadaba e Maleki-sua, ta Saula mau tamaiti.+ 3 Uˈana roa ˈtura te aroraa i nia ia Saula, ite aˈera te feia teˈa ia ˈna, e pepe maitai ihora oia i te feia teˈa.+ 4 Na ô atura Saula i ta ˈna tavini amo mauhaa: “A huti i ta oe ˈoˈe e a patia ia ˈu, aˈunei teie mau tane peritome-ore-hia+ e hamani ino* ai ia ˈu a patia ˈtu ai ia ˈu i te ˈoˈe.” Aita râ ta ˈna tavini amo mauhaa i hinaaro, ua mǎtaˈu roa hoi oia. Rave ihora ïa Saula i te ˈoˈe e faatopa ihora oia ia ˈna i nia iho.+ 5 I te iteraa te tavini amo mauhaa e ua pohe o Saula,+ faatopa atoa ihora oia ia ˈna i nia i ta ˈna iho ˈoˈe e pohe ihora i pihai iho ia ˈna. 6 Ua pohe ïa Saula, ta ˈna e toru tamaiti, ta ˈna tavini amo mauhaa e to ˈna mau taata atoa i taua mahana ra. Hoê â ratou i te poheraa.+ 7 I te iteraa te ati Iseraela o te ora ra i roto i te peho e i te tuhaa fenua o Ioridana e ua horo ê te mau faehau Iseraela e ua pohe Saula e ta ˈna mau tamaiti, faarue aˈera ratou i te mau oire e horo ê atura.+ Haere maira te mau Philiseti e parahi ihora i tera mau oire.
8 I te mahana i muri iho, i to te mau Philiseti haereraa mai e eiâ i te mau taoˈa i nia i te mau tino pohe, ite aˈera ratou i te tino o Saula e ta ˈna na toru tamaiti i nia i te mouˈa Gilaboa.+ 9 Tâpû ihora ïa ratou i to ˈna upoo e rave aˈera i ta ˈna mau mauhaa tamaˈi. Tono atura ratou i te vea na te fenua o te mau Philiseti no te faaite i te parau apî+ i roto i te mau hiero o ta ratou mau idolo+ e i rotopu i te nunaa. 10 Vaiiho atura ratou i ta ˈna mau mauhaa tamaˈi i roto i te hiero o Asetoreta e patiti ihora i to ˈna tino i nia i te patu o Bete-sana.+ 11 I te faarooraa to Iabesa-gileada+ i te mea ta te mau Philiseti i rave ia Saula, 12 tia aˈera te mau taata tamaˈi atoa, reva ˈtura i taua po taatoa ra e tatara maira i te tino o Saula e to ta ˈna mau tamaiti mai nia mai i te patu o Bete-sana. Hopoi maira ratou i taua mau tino ra i Iabesa e tutui atura i te auahi. 13 Rave ihora ratou i to ratou mau ivi,+ huna ihora i te reira i raro aˈe i te tumu raau* i Iabesa,+ e haapae atura ratou i te maa e hitu mahana.
Aore ra “no Rama, e ati Zuphe.”
Aore ra “tipapa.”
Aore ra “sabaota.”
Heb: “Ua tapiri Iehova i to ˈna vairaa tamarii.”
Aore ra “te tahi atu vahine faaipoipo.”
Aore ra “to oe aau e mauiui ai?”
Oia hoi te sekene.
Aore ra “aau teimaha vau.”
Heb: “ratou.”
Heb: “haamanaˈo.”
Huri-atoa-hia “I te taime tano.”
“Iˈoa o te Atua” te auraa.
Heb: “mua i te aro.”
Heb: “i te mea maitai i to oe hiˈoraa.”
Piri i te 22 L. Hiˈo i te tuhaa hau B14.
Oia hoi Elikana.
Aore ra “faarahihia ra to ˈu puai.” Hiˈo i te titionare.
Heb: “maemae o ˈna.”
Aore ra “horoa.”
Oia hoi te menema o te huitaata. Hiˈo i te titionare.
Huri-atoa-hia “faarueraa pehu.”
Huri-atoa-hia “E riaria te feia e aa ia Iehova.”
Aore ra “faarahi oia i te puai.” Hiˈo i te titionare.
Aore ra “Te tavini ra râ te tamaroa ia.”
Aore ra “hiaai.”
Huri-atoa-hia “na te Atua e haava.”
Huri-atoa-hia “no te faahaere i te tusia au auahi i nia.”
Heb: “te mau tamaiti a Iseraela.”
Heb: “tue ai.”
Heb: “rima.”
Aore ra “i te mea e vai ra i roto i to ˈu aau.”
Oia hoi te sekene.
Heb: “topa i raro i te repo.”
Aore ra “sabaota.”
Huri-atoa-hia “ropu.”
“Teihea te hanahana?” te auraa.
Heb: “fare.”
Heb: “O Dagona.”
Heb: “70 taata, 50 000 taata.”
Heb: “haamoˈa.”
Aore ra “i te oto i mua.”
“Ofai o te tauturu” te auraa.
Heb: “mea ino i te hiˈoraa o Samuela.”
Heb: “asini ufa.”
1 sekela: 11,4 g. Hiˈo i te tuhaa hau B14.
Heb: “e vai ra i roto i to aau.”
Aore ra “ta outou mau pǔpǔ tausani taata.”
Heb: “Riro atura oia mai te vava ra te huru.”
Aore ra “parau faaau.”
Heb: “haere ihora ratou paatoa mai te taata hoê ra.”
Oia hoi te area hora 2 i te aahiata tae roa i te hora 6 i te poipoi.
Heb: “ua faaroo vau i to outou reo no nia.”
Heb: “haere na mua.”
Heb: “aita e mea i itehia mai i roto i to ˈu rima.”
Heb: “Samuela.”
Aore ra “e ere mea mau.”
Aore ra “e ere mea mau.”
Aore ra “parau mau.”
Aita te numera i roto i te papai Hebera.
Aore ra “tamǎrû i te aro o.”
E faito tahito teie, piri i te piti i nia e toru o te teiaha o te hoê sekela.
Aore ra “i nia i te afaraa o te hoê tâpû fenua e nehenehe e piti puaatoro oni e arote hoê mahana.”
Heb: “i taua mahana ra.”
Heb: “faraoa.”
Heb: “to te fenua.”
Heb: “Anaana maira to ˈna mata.”
Hiˈo i te titionare.
Aore ra “sabaota.”
Aore ra “aroha.”
Aore ra “aroha.”
Aore ra “oto.”
Aore ra “orure hau.”
Heb: “te tii teraphima,” oia hoi te mau atua o te utuafare aore ra idolo.
Aore ra “tatarahapa.”
Aore ra “a tatarahapa ˈi oia.”
Huri-atoa-hia “taiâ ore.”
Heb: “faaruru i te mauiui o te pohe.”
Aore ra “tara animara.”
Aore ra “tara animara farii monoˈi.”
Heb: “varua.” Hebera rua. Hiˈo i te titionare.
Heb: “varua.” Hebera rua. Hiˈo i te titionare.
Heb: “varua.” Hebera rua. Hiˈo i te titionare.
Pute uaina iri animara.
Heb: “varua.” Hebera rua. Hiˈo i te titionare.
Heb: “puhapa.”
Piri i te 2,9 m. Hiˈo i te tuhaa hau B14.
Teie ahu paruru, ua hamanihia i te ahu aore ra iri animara e e metara to nia iho, apǎpǎhia mai te poa iˈa.
Piri i te 57 kg. Hiˈo i te tuhaa hau B14.
Piri i te 6,84 kg. Hiˈo i te tuhaa hau B14.
Aore ra “aa.”
Piri i te 22 L. Hiˈo i te tuhaa hau B14.
Heb: “û.”
Aore ra “aa.”
Aore ra “aa.”
Aore ra “taata tamaˈi.”
Aore ra “taa.” Heb: “huruhuru taa.”
Aore ra “aa.”
Aore ra “sabaota.”
Aore ra “aa.”
Heb: “teie amuiraa taatoa.”
Aore ra “ohipa ma te paari.”
Heb: “varua.” Hebera rua. Hiˈo i te titionare.
Aore ra “haa ˈtura oia mai te hoê peropheta.”
Heb: “haere aˈera oia i rapae e tomo maira i mua i te nunaa.”
Aore ra “Ohipa noa ˈtura Davida ma te paari.”
Aore ra “taati na roto i te faaipoiporaa.”
Aore ra “mea hau aˈe to Davida paari ia ohipa oia i to te.”
Heb: “hara.”
Heb: “hara.”
Aore ra “faaoraraa.”
Heb: “hara.”
Heb: “te teraphima.”
Aore ra “aita rea ahu i nia ia ˈna.”
Heb: “no te vai-tahaa-raa o to metua vahine.”
Heb: “e tamaiti hoi oia na te pohe.”
Mai to te tumu aito to ˈna rauere e mea tarona aore ra mea uouo to ˈna mau tiare.
Aore ra “haapao maitai.”
Aore ra “feia horo.”
Heb: “tane o tei oomo i te tiputa lino.”
Hiˈo i te titionare.
Huri-atoa-hia “fatu fenua.”
Huri-atoa-hia “mǎtaˈu aˈera oia no te mea.”
Heb: “atau.”
Huri-atoa-hia “te medebara.”
Heb: “te mau tausani,” oia hoi e pǔpǔ tausani.
E aua teie patuhia i te ofai.
Heb: “no te tapoˈi i to ˈna na avae.”
Aore ra “manaˈo haava.”
Huri-atoa-hia “haapurara.”
E oire teie i Iuda, e ere hoê â e te mouˈa Karemela.
Aore ra “ei ia oe na te hau.”
Heb: “mahana maitai.”
1 sea: 7,33 L. Hiˈo i te tuhaa hau B14.
Heb: “Ia faautua rahi te Atua i te mau enemi o Davida.” Huri-atoa-hia “ia Davida.”
Heb: “taata atoa o te omaha i nia i te hoê patu.” E parau vahavaha Hebera teie parauhia no te mau tane.
“Aoaoa,” “Maamaa” te auraa.
Heb: “faaohipa i to rima no te faaora ia oe.”
Heb: “haamaitairaa.”
Aore ra “aita e ohipa i roto i to aau e peretete aore ra e turori atu ai oe.”
Heb: “te taata atoa o te omaha i nia i te hoê patu.” E parau vahavaha Hebera teie parauhia no te mau tane.
Huri-atoa-hia “te medebara.”
Heb: “hauˈa ïa oia i ta ˈu tusia huero maa.”
Heb: “tuhaa tutuuhia,” e nehenehe e parauhia no te nunaa e te fenua i tutuuhia na ratou.
E manu teie e au i te moa.
Heb: “rahiraa mahana.”
Aore ra “te Negeba.”
Heb: “ei tiai o to ˈu upoo i te mau mahana atoa.”
Aore ra “i te mea e hohoˈa ra ia Samuela.”
Heb: “fanauˈa puaatoro haaporiahia.”
Aore ra “te pae apatoa,” oia hoi te pae apatoa o Iuda.
Heb: “hoˈi maira to ˈna hiroa ia ˈna ra.”
Aore ra “te Negeba.”
Aore ra “te Negeba.”
Heb: “haamaitairaa.”
Aore ra “te pae apatoa.”
Aore ra “faaooo.”
Mai to te tumu aito to ˈna rauere e mea tarona aore ra mea uouo to ˈna mau tiare.