GENESE

1 I te haamataraa, poiete ihora te Atua i te raˈi e te fenua.+

2 Tera râ, te vai ano ra te fenua, e poiri to nia i te iriatai o te pape hohonu,*+ e te haa ra te puai ohipa*+ o te Atua na nia i te iriatai o te mau pape.+

3 Na ô ihora te Atua: “Ia anaana te maramarama.” Anaana ihora te maramarama.+ 4 Ite ihora te Atua e mea maitai te maramarama, e haamata ihora te Atua i te faataa ê i te maramarama i te poiri. 5 Parau ihora te Atua no te maramarama e Ao, area no te poiri, parau ihora oia e Po.+ E ahiahi ihora e poipoi aˈera, a tahi ïa mahana.

6 Na ô ihora te Atua: “Ei reva+ i rotopu i te mau pape, e ia taa ê te mau pape i te mau pape.”+ 7 Hamani atura te Atua i te reva e faataa ê atura i te mau pape i raro aˈe i te reva i te mau pape i nia ˈˈe i te reva.+ E mai te reira ˈtura. 8 Parau ihora te Atua no te reva e Raˈi. E ahiahi ihora e poipoi aˈera, a piti ïa mahana.

9 Na ô ihora te Atua: “Ia haapuehia te mau pape i raro aˈe i te raˈi i te hoê noa vahi, e ia faura mai te fenua mǎrô.”+ E mai te reira ˈtura. 10 Parau ihora te Atua no te fenua mǎrô e Fenua,+ area no te haapueraa pape, parau ihora oia e Miti.+ E ite ihora te Atua e mea maitai.+ 11 Na ô ihora te Atua: “Ia faatupu te fenua i te aihere, te raau rii huero maa e te mau tumu maa hotu ia au i to ratou huru e rave rau, a horoa mai ai i te maa hotu e huero to roto i nia i te fenua.” E mai te reira ˈtura. 12 Haamata ihora te fenua i te faatupu i te aihere, te raau rii huero maa+ e te mau tumu raau o te horoa mai i te maa hotu e huero to roto, ia au i to ratou huru e rave rau. E ite ihora te Atua e mea maitai. 13 E ahiahi ihora e poipoi aˈera, a toru ïa mahana.

14 Na ô ihora te Atua: “Ei tiarama*+ tei te reva o te raˈi ia taa ê te ao i te po,+ e ia riro te reira ei tapao no te mau tau* e te mau mahana e te mau matahiti.+ 15 Ei tiarama te reira i roto i te reva o te raˈi no te turama i te fenua.” E mai te reira ˈtura. 16 Hamani atura te Atua i na tiarama rahi e piti, te tiarama rahi aˈe no te turama i te ao+ e te tiarama nainai aˈe no te turama i te po, e te mau fetia atoa.+ 17 Tuu ihora te Atua i te reira i roto i te reva o te raˈi no te turama i te fenua 18 e no te turama i te ao e i te po e no te faataa ê i te maramarama i te poiri.+ E ite ihora te Atua e mea maitai. 19 E ahiahi ihora e poipoi aˈera, a maha ïa mahana.

20 Na ô ihora te Atua: “Ia aere te mau animara* ora i roto i te mau pape e ia rere te mau animara e rere na nia ˈˈe i te fenua na te reva o te raˈi.”+ 21 Poiete atura te Atua i te mau animara* rarahi o te miti e te mau animara* ora atoa o te ˈau e te aere i roto i te mau pape ia au i to ratou huru e rave rau, e te mau animara pererau atoa e rere ia au i to ratou huru e rave rau. E ite ihora te Atua e mea maitai. 22 Haamaitai ihora te Atua ia ratou, a na ô atu ai: “Ia fanauˈahia e ia rahi outou e ia î te miti ia outou,+ e ia rahi te mau animara rere i nia i te fenua.” 23 E ahiahi ihora e poipoi aˈera, a pae ïa mahana.

24 Na ô ihora te Atua: “Ei animara* ora ia au i to ratou huru e rave rau tei te fenua, te mau animara rata e te mau animara nee haere e te mau animara oviri o te fenua ia au i to ratou huru e rave rau.”+ E mai te reira ˈtura. 25 Hamani atura te Atua i te mau animara oviri o te fenua ia au i to ratou huru e rave rau, e te mau animara rata ia au i to ratou huru e rave rau, e te mau animara atoa e nee haere na raro ia au i to ratou huru e rave rau. E ite ihora te Atua e mea maitai.

26 Na ô ihora te Atua: “Hamani anaˈe+ i te taata i to tâua hohoˈa,+ ia au i to tâua huru,+ e ia haapao ratou i te iˈa o te miti e te mau animara rere o te raˈi, e te mau animara rata, e te fenua taatoa, e te mau animara atoa e nee haere i nia i te fenua.”+ 27 Poiete atura te Atua i te taata i to ˈna huru, i to te Atua huru to ˈna poieteraa ia ˈna, tane e vahine to ˈna poieteraa ia raua.+ 28 Hau atu â, haamaitai ihora te Atua ia raua, e na ô atura te Atua: “Ia tamariihia orua e ia rahi, a faaî i te fenua+ e a haapao atu,+ e a haapao+ i te iˈa o te miti e te mau animara rere o te raˈi e te mau animara atoa e ora ra i nia i te fenua.”

29 Na ô atura te Atua: “Ua horoa ˈtu vau na orua i te mau raau rii huero maa atoa i nia i te fenua taatoa e te mau tumu maa hotu e huero to roto. Ei maa te reira na orua.+ 30 E ua horoa ˈtu vau i te mau raau tupu atoa ei maa+ na te mau animara oviri atoa o te fenua, e na te mau animara rere atoa o te raˈi, e na te mau animara atoa i nia i te fenua e ora* to roto ia ratou.” E mai te reira ˈtura.

31 E ite ihora te Atua i te mau mea atoa ta ˈna i hamani, e inaha, mea maitai roa.+ E ahiahi ihora e poipoi aˈera, a ono ïa mahana.

2 Oti roa aˈera te raˈi e te fenua e pauroa to reira.*+ 2 E i te hitu o te mahana, ua oti i te Atua te ohipa ta ˈna i rave, e haamata ihora oia i te faafaaea i ta ˈna mau ohipa atoa i rave i te hitu o te mahana.+ 3 Haamaitai atura te Atua i te hitu o te mahana e parau atura e mea moˈa te reira, i taua hoi mahana ra i faafaaea ˈi oia i te mau ohipa atoa ta ˈna i poiete, te mau mea atoa ta ˈna i opua e hamani.

4 O te aamu ïa teie o te raˈi e te fenua i te tau i poietehia ˈi te reira, i te mahana i hamani ai te Atua ra o Iehova* i te fenua e te raˈi.+

5 Aita â e tumu raau haehaa i nia i te fenua e aita e raau tupu i oteo maira, no te mea aita te Atua ra o Iehova i faatopa mai i te ûa i nia i te fenua e aita e taata no te faaapu. 6 Tera râ, e mâhu* te na raro mai i te fenua, a faararirari atu ai i te fenua taatoa.

7 Hamani atura te Atua ra o Iehova i te tane i te repo+ fenua e puhi atura i te aho ora+ i roto i to ˈna apoo ihu, e riro maira te tane ei taata ora.*+ 8 Hau atu â, faaineine ihora te Atua ra o Iehova i te hoê ô i Edene,+ i te pae hitia o te râ, e tuu ihora oia i te tane ta ˈna i hamani i reira.+ 9 Faatupu ihora te Atua ra o Iehova mai raro mai i te repo i te mau tumu raau atoa mea au ia hiˈo e maa hotu maitatai to nia iho, oia atoa te tumu raau o te ora+ i ropu i te ô e te tumu raau e ite ai i te maitai e te ino.+

10 E anavai te tahe ra no roto mai i Edene no te faararirari i te ô, e i reira e amaha ˈi ei maha anavai. 11 O Pisona te iˈoa o te anavai matamua, o te haaati ra i te fenua taatoa o Havila, e auro to reira. 12 E auro maitai to taua fenua ra. E tapau noˈanoˈa e e ofai maitai roa* atoa to reira. 13 O Gihona te iˈoa o te piti o te anavai, o te haaati ra i te fenua taatoa o Kusa. 14 O Hidekela+ te iˈoa o te toru o te anavai, o te tahe atu ra i hitia o te râ o Asura.+ E o Eupharate+ te maha o te anavai.

15 Rave ihora te Atua ra o Iehova i te tane e tuu atura ia ˈna i roto i te ô i Edene no te faaapu e no te haapao atu.+ 16 Horoa atoa ˈtura te Atua ra o Iehova i teie faaueraa i te tane: “E nehenehe oe e amu i to te mau tumu raau atoa o te ô e paia noa ˈtu oe.+ 17 Area i to te tumu raau e ite ai i te maitai e te ino, eiaha roa oe e amu, i te mahana hoi e amu ai oe i te reira, e pohe mau â oe.”+

18 Parau ihora te Atua ra o Iehova: “E ere mea maitai ia faaea noa te tane o ˈna anaˈe. E hamani au i te tahi tauturu no ˈna, ei apiti e tano no ˈna.”+ 19 I te repo fenua to te Atua ra o Iehova hamaniraa i te mau animara oviri atoa e te mau animara rere atoa o te raˈi. Aratai atura oia ia ratou i te tane ia imi oia i te iˈoa no ratou tataitahi. E te iˈoa ta te tane e horoa no te animara* ora tataitahi, o to ratou ïa iˈoa.+ 20 Mairi ihora ïa te tane i te iˈoa o te mau animara rata atoa e te mau animara rere o te raˈi e te mau animara oviri atoa, area to te tane, aita ïa e tauturu ei apiti e tano no ˈna. 21 No reira, faataoto ihora te Atua ra o Iehova i te tane, e a taoto noa ˈi te tane, rave maira oia hoê ivi aoao to ˈna e tapiri atura i te iˈo i to ˈna vairaa. 22 Hamani ihora te Atua ra o Iehova i te hoê vahine i te ivi aoao ta ˈna i rave no roto mai i te tane, e aratai atura ia ˈna i te tane ra.+

23 Na ô ihora te tane:

24 No reira te hoê tane e faarue ai i to ˈna metua tane e to ˈna metua vahine, a ati atu ai* i ta ˈna vahine faaipoipo, e e riro raua ei hoê.+ 25 Mea vai tahaa noa raua,+ te tane e ta ˈna vahine faaipoipo, aita râ raua i haama.

3 O te ophi+ te animara maramarama* roa ˈˈe o te mau animara oviri atoa ta te Atua ra o Iehova i hamani. Na ô atura ïa te ophi i te vahine: “Ua parau iho â anei te Atua eiaha roa orua e amu i te maa hotu o te mau tumu raau atoa o te ô?”+ 2 Pahono maira te vahine i te ophi: “E nehenehe mâua e amu i te maa hotu o te mau tumu raau o te ô.+ 3 Area no te maa hotu o te tumu raau i ropu i te ô,+ ua parau te Atua: ‘Eiaha roa orua e amu, eiaha e tapea noa ˈtu. Aita anaˈe, e pohe orua.’” 4 Na ô atura te ophi i te vahine: “Eita roa orua e pohe.+ 5 Ua ite hoi te Atua e i te mahana iho â e amu ai orua i te reira maa hotu, e araara to orua mata e e riro orua mai te Atua, i te iteraa i te maitai e te ino.”+

6 Ite atura te vahine e maa hotu maitatai to te tumu raau e mea au ia hiˈo atu. Mea nehenehe iho â te tumu raau. Pofai ihora oia i te maa hotu e amu atura.+ I muri iho, horoa atoa ˈtura oia i te tahi na ta ˈna tane faaipoipo o raua i taua taime ra, e amu ihora te tane.+ 7 Araara aˈera to raua mata, e taa ihora ia raua e te vai tahaa noa ra raua. Tui aˈera raua i te rauere suke ei tapoˈi ia raua i te tauupu.+

8 Faaroo aˈera raua i te reo o te Atua ra o Iehova a hahaere ai oia na roto i te ô i te taime o te mahana mea puvaivai, e tapuni aˈera te tane e ta ˈna vahine faaipoipo i te aro o te Atua ra o Iehova i roto i te uru raau o te ô. 9 Te pii noa ra te Atua ra o Iehova i te tane, a na ô mai ai: “Teihea oe?” 10 Pahono atura te tane: “Ua faaroo vau i to reo i roto i te ô, tera râ, ua riaria vau no te mea te vai tahaa noa ra vau, tapuni ihora ïa vau.” 11 Parau maira te Atua: “Na vai i faaite ia oe te vai tahaa noa ra oe?+ Ua amu anei oe i te maa hotu o te tumu raau ta ˈu i faaue ia oe eiaha e amu?”+ 12 Pahono atura te tane: “Te vahine ta oe i horoa mai, na ˈna i horoa mai i te maa hotu o te tumu raau, amu ihora ïa vau.” 13 Parau maira te Atua ra o Iehova i te vahine: “Eaha oe i na reira ˈi?” Pahono atura te vahine: “Ua haavare te ophi ia ˈu, amu ihora ïa vau.”+

14 Parau maira te Atua ra o Iehova i te ophi:+ “I rotopu i te mau animara rata atoa e i rotopu i te mau animara oviri atoa, i nia ia oe e vai ai te ino, no te mea ua na reira oe. E nee oe, e e amu oe i te repo i te mau mahana atoa o to oe oraraa. 15 E tuu vau i te enemiraa*+ i rotopu ia oe+ e te vahine,+ e i rotopu i to oe huaai+ e to ˈna huaai.+ E haaperehu oia i to oe afii,+ e e haapepe oe ia ˈna i te poro avae.”+

16 Parau maira te Atua i te vahine: “E faarahi au i te mauiui o to oe hapûraa, i roto i te mauiui e fanau ai oe i te tamarii, e e uˈana to oe hinaaro i ta oe tane faaipoipo, e na ˈna e faatere ia oe.”

17 E parau maira oia ia Adamu:* “No te mea ua faaroo oe i te reo o ta oe vahine faaipoipo e ua amu oe i te maa hotu o te tumu raau i horoa ˈtu ai hoi au i teie faaueraa:+ ‘Eiaha roa oe e amu,’ e ino te fenua no ta oe i rave.+ Ma te mauiui e amu ai oe i te mau mahana atoa o to oe oraraa i ta te fenua e faatupu.+ 18 E tupu mai te mau raau taratara, e e amu oe i te maa o te fenua. 19 Ma te hou o to rae e amu ai oe i te maa* e hoˈi noa ˈtu oe i te repo, no reira mai hoi oe i te raveraahia mai.+ E repo hoi oe, e i te repo e hoˈi ai oe.”+

20 Mairi ihora Adamu i ta ˈna vahine faaipoipo i te iˈoa o Eva,* no te mea e riro oia ei metua vahine no te mau taata ora atoa.+ 21 Hamani ihora te Atua ra o Iehova i te ahu roa iri animara no Adamu e no ta ˈna vahine faaipoipo, no te faaahu ia raua.+ 22 Parau atura te Atua ra o Iehova: “Inaha, ua riro te taata mai ia tâua i te iteraa i te maitai e te ino.+ Teie râ, ia ore oia e toro i to ˈna rima, a rave atoa mai ai i te maa hotu i te tumu raau o te ora,+ a amu atu ai e a ora ˈtu ai e a muri noa ˈtu, . . . ” 23 Tiavaru ihora ïa te Atua ra o Iehova i te tane i rapae i te ô i Edene+ no te faaapu i te fenua no reira oia i te raveraahia mai.+ 24 Tiahi atura ïa oia i te tane i rapae, e tuu ihora i hitia o te râ o te ô i Edene i na kerubi+ e te hoê ˈoˈe ura e ohu noa ra no te tiai i te eˈa e tae atu ai i te tumu raau o te ora.

4 Taoto ihora Adamu ia Eva ta ˈna vahine faaipoipo, e hapû maira oia.+ I to ˈna fanauraa ia Kaina,+ ua parau oia: “Ua noaa mai ia ˈu* te hoê tamarii tamaroa maoti te tauturu a Iehova.” 2 Fanau faahou maira oia i te teina, o Abela.+

Riro maira Abela ei tiai mamoe, area Kaina, riro maira ïa ei taata faaapu. 3 I muri aˈe, hopoi atura Kaina i te tahi mau maa hotu o te fenua ei ô na Iehova. 4 O Abela râ, hopoi atura ïa i te tahi mau fanauˈa mamoe matamua,+ tae noa ˈtu to ratou mii. A farii ai Iehova ia Abela e ta ˈna ô,+ 5 aita roa oia i farii ia Kaina e ta ˈna ô. Riri roa ihora Kaina e inoino ihora. 6 Parau maira Iehova ia Kaina: “No te aha oe i riri roa ˈi e i inoino ai? 7 Ia fariu mai oe a rave atu ai i te maitai, e ore anei oe e farii-faahou-hia?* Ia ore râ oe e fariu mai a rave atu ai i te maitai, te tiai noa ra te hara i te uputa, e te hinaaro ra e haavî ia oe, tera râ e haavî anei oe i te reira?”

8 I muri iho, parau atura Kaina ia Abela to ˈna teina: “Mai, haere anaˈe i te uru raau.” Tae atura raua i te uru raau, taparahi ihora Kaina ia Abela to ˈna teina e haapohe atura ia ˈna.+ 9 I muri aˈe, parau maira Iehova ia Kaina: “Teihea to teina o Abela?” e pahono atura oia: “Aita vau i ite. O vau anei te tiai o to ˈu teina?” 10 Parau maira te Atua: “Eaha oe i na reira ˈi? A faaroo na! Te pii mai ra te toto o to teina ia ˈu mai te repo mai.+ 11 I teie nei, e vai te ino i nia ia oe, e e tiahihia oe mai teie fenua o tei hamǎmǎ i to ˈna vaha no te farii i te toto o to teina ta to rima i haamanii.+ 12 Ia faaapu oe, eita te fenua e horoa mai i to ˈna maa.* E overe haere e e horo ê oe na te fenua.” 13 Parau atura Kaina ia Iehova: “Mea teimaha roa te utua no ta ˈu hara ia amo. 14 I teie mahana te tiahi nei oe ia ˈu mai teie fenua,* e eita vau e tia faahou i mua i to aro, e overe haere au e e horo ê au na te fenua, e papu roa e pohe au i te taata e farerei noa mai ia ˈu.” 15 Parau maira Iehova: “No reira, te taata e haapohe noa ˈtu ia Kaina, e faaruru ïa i te tahooraa e hitu taime.”

Haamau atura Iehova i te hoê tapao no Kaina ia ore te taata o te farerei noa mai ia ˈna e tairi ia ˈna. 16 Haere ê atura Kaina mai mua ˈtu i te aro o Iehova, e parahi ihora i te fenua o te Hopoi-ê-raa,* i hitia o te râ i Edene.+

17 I muri aˈe, taoto ihora Kaina i ta ˈna vahine faaipoipo,+ e hapû maira oia e fanau maira ia Enoha. Patu atura oia i te hoê oire e mairi atura i te iˈoa o ta ˈna tamaiti o Enoha. 18 I muri aˈe, fanau maira ta Enoha o Irada. E fanau maira ta Irada o Mehuiaela, e fanau maira ta Mehuiaela o Metusaela, e fanau maira ta Metusaela o Lameha.

19 Rave ihora Lameha e piti vahine faaipoipo na ˈna. O Ada te iˈoa o te vahine faaipoipo matamua, e o Zila te iˈoa o te piti. 20 Fanau maira Ada ia Iabala. O Iabala te taata matamua tei ora i roto i te fare ie, e nǎnǎ animara atoa ta ˈna. 21 O Iubala te iˈoa o to ˈna taeae. O ˈna te taata matamua tei hauti i te kinura e te vivo. 22 Fanau maira Zila ia Tubala-kaina, tei hamani i te mau huru taihaa veo e auri atoa. E o Naama te tuahine o Tubala-kaina. 23 Papai ihora Lameha i teie mau parau no ta ˈna na vahine faaipoipo Ada raua Zila:

25 Taoto faahou ihora Adamu i ta ˈna vahine faaipoipo, e fanau maira oia i te hoê tamaroa. Mairi ihora Eva ia ˈna i te iˈoa Seta*+ no te mea, mai ta ˈna i parau: “Ua horoa mai te Atua no ˈu i te tahi atu huaai ei mono ia Abela, no te mea ua haapohe Kaina ia ˈna.”+ 26 Fanau atoa maira ta Seta hoê tamaiti, e mairi ihora ia ˈna i te iˈoa Enosa.+ I taua tau ra, haamata aˈera te taata i te tiaoro i te iˈoa o Iehova.

5 Teie te buka o te aamu o Adamu. I te mahana i poiete ai te Atua ia Adamu, ua hamani oia ia ˈna ia au i to te Atua huru.+ 2 Tane e vahine to ˈna poieteraa ia raua.+ I te mahana i poietehia ˈi raua,+ ua haamaitai oia ia raua e ua mairi ia raua i te iˈoa Taata.*

3 Ua ora Adamu 130 matahiti e fanau maira ta ˈna hoê tamaiti ia au i to ˈna huru, ia au i to ˈna hohoˈa, e mairi ihora oia ia ˈna i te iˈoa Seta.+ 4 I muri iho i te fanauraa mai ta ˈna o Seta, ua ora â Adamu e 800 matahiti, a fanau mai ai ta ˈna e tamaiti e e tamahine. 5 Te mau matahiti atoa i ora ˈi Adamu, e 930 matahiti, e pohe atura oia.+

6 Ua ora Seta 105 matahiti e fanau maira ta ˈna o Enosa.+ 7 I muri iho i te fanauraa mai ta ˈna o Enosa, ua ora â Seta e 807 matahiti, a fanau mai ai ta ˈna e tamaiti e e tamahine. 8 Te mau matahiti atoa i ora ˈi Seta, e 912 matahiti, e pohe atura oia.

9 Ua ora Enosa e 90 matahiti e fanau maira ta ˈna o Kenana. 10 I muri iho i te fanauraa mai ta ˈna o Kenana, ua ora â Enosa e 815 matahiti, a fanau mai ai ta ˈna e tamaiti e e tamahine. 11 Te mau matahiti atoa i ora ˈi Enosa, e 905 matahiti, e pohe atura oia.

12 Ua ora Kenana e 70 matahiti e fanau maira ta ˈna o Mahalalela.+ 13 I muri iho i te fanauraa mai ta ˈna o Mahalalela, ua ora â Kenana e 840 matahiti, a fanau mai ai ta ˈna e tamaiti e e tamahine. 14 Te mau matahiti atoa i ora ˈi Kenana, e 910 matahiti, e pohe atura oia.

15 Ua ora Mahalalela e 65 matahiti e fanau maira ta ˈna o Iareda.+ 16 I muri iho i te fanauraa mai ta ˈna o Iareda, ua ora â Mahalalela e 830 matahiti, a fanau mai ai ta ˈna e tamaiti e e tamahine. 17 Te mau matahiti atoa i ora ˈi Mahalalela, e 895 matahiti, e pohe atura oia.

18 Ua ora Iareda 162 matahiti e fanau maira ta ˈna o Enoha.+ 19 I muri iho i te fanauraa mai ta ˈna o Enoha, ua ora â Iareda e 800 matahiti, a fanau mai ai ta ˈna e tamaiti e e tamahine. 20 Te mau matahiti atoa i ora ˈi Iareda, e 962 matahiti, e pohe atura oia.

21 Ua ora Enoha e 65 matahiti e fanau maira ta ˈna o Metusela.+ 22 I muri iho i te fanauraa mai ta ˈna o Metusela, ua tamau Enoha i te haere e te Atua mau* e 300 matahiti, a fanau mai ai ta ˈna e tamaiti e e tamahine. 23 Te mau matahiti atoa i ora ˈi Enoha, e 365 ïa. 24 Ua haere noa Enoha e te Atua mau.+ Aita faahou oia i muri iho, ua rave hoi te Atua ia ˈna.+

25 Ua ora Metusela 187 matahiti e fanau maira ta ˈna o Lameha.+ 26 I muri iho i te fanauraa mai ta ˈna o Lameha, ua ora â Metusela e 782 matahiti, a fanau mai ai ta ˈna e tamaiti e e tamahine. 27 Te mau matahiti atoa i ora ˈi Metusela, e 969 matahiti, e pohe atura oia.

28 Ua ora Lameha 182 matahiti e fanau maira ta ˈna hoê tamaiti. 29 Topa ihora oia ia ˈna i te iˈoa Noa,*+ a na ô ai: “E hopoi mai teie tamaiti i te tamahanahanaraa* i roto i ta tatou ohipa e rohiraa mauiui a to tatou rima no te fenua ta Iehova i faaino.”+ 30 I muri iho i te fanauraa mai ta ˈna o Noa, ua ora â Lameha e 595 matahiti, a fanau mai ai ta ˈna e tamaiti e e tamahine. 31 Te mau matahiti atoa i ora ˈi Lameha, e 777 matahiti, e pohe atura oia.

32 I te raearaa ia Noa e 500 matahiti, ua fanau mai ta ˈna o Sema,+ Hama+ e Iapheta.+

6 A rahi mai ai te taata i nia i te fenua e a fanau mai ai ta ratou e tamahine, 2 ite maira te mau tamaiti* a te Atua mau+ e mea haviti te mau tamahine a te taata. Rave aˈera ïa ratou ei vahine faaipoipo na ratou i te mau vahine atoa ta ratou i maiti. 3 Na ô ihora Iehova: “E ore au* e faaoromai i te taata e a muri noa ˈtu,+ no te mea e taata hara ratou.* No reira, e ora â ratou 120 matahiti.”+

4 E Nephilimi* tei te fenua i taua mau mahana ra e i muri aˈe. I taua tau ra, te taoto noa ra te mau tamaiti a te Atua mau i te mau tamahine a te taata, e fanau maira ratou i te mau tamarii tamaroa. O ratou te mau aito i tahito ra, te mau tane tuiroo.

5 Ite ihora ïa Iehova e ua rahi te ino o te taata i te fenua nei e mea ino noa to ratou mau manaˈo e te mau hinaaro o to ratou aau.+ 6 Tatarahapa* ihora Iehova i te hamaniraa i te taata i nia i te fenua, e peapea* ihora to ˈna aau.+ 7 No reira, na ô ihora Iehova: “E haamou vau mai nia i te fenua i te taata ta ˈu i poiete, te taata e te mau animara rata, te mau animara nee haere, e te mau animara rere o te raˈi, te tatarahapa nei hoi au i te hamaniraa ia ratou.” 8 O Noa râ, ua fariihia ïa e Iehova.

9 Teie te aamu o Noa.

E taata parau-tia Noa.+ E taata hapa ore oia i rotopu i te feia o to ˈna tau.* Ua haere Noa e te Atua mau.+ 10 I muri aˈe, fanau maira ta Noa e toru tamaiti, Sema, Hama e Iapheta.+ 11 Tera râ, ua ino roa te fenua i mua i te aro o te Atua mau, e ua î te fenua i te haavîraa uˈana. 12 Hiˈo maira iho â te Atua i te fenua, e ua ino roa.+ Ua ino roa te haerea o te taata atoa i nia i te fenua.+

13 Na ô maira te Atua ia Noa: “Ua faaoti au e haamou i te taata atoa, no te mea ua î te fenua i te haavîraa uˈana o ratou te tumu, no reira e faatae au i te haamouraa i nia ia ratou e te fenua atoa.+ 14 A hamani no oe i te tahi araka* i te raau maitai.*+ E tapiha oe i te araka e e parai oe i te tâ+ na rapaeau e na roto. 15 Mai teie ia hamani oe i te araka: 300 kubiti* te roa, 50 kubiti te aano e 30 kubiti te teitei. 16 E hamani oe i te hoê haamaramarama ia ô te maramarama* i roto i te araka, hoê kubiti raro aˈe mai i te tafare. E tuu oe i te uputa i te pae roa o te araka,+ e e faatahua oe i te reira, te tahua raro, te tahua matamua e te tahua piti.

17 “O vau nei râ, e hopoi atu vau i te diluvi+ i nia i te fenua no te haamou i raro aˈe i te raˈi i te taata e te animara atoa e huti ra i te aho ora.* E mou to te fenua atoa.+ 18 E te haamau nei au i ta ˈu faufaa e o oe, e e tomo oe i roto i te araka e tia ˈi, oe, ta oe mau tamaiti, ta oe vahine faaipoipo, e na vahine faaipoipo a ta oe mau tamaiti.+ 19 A faahaere i roto i te araka e piti o te mau huru animara atoa+ ia ora noa ratou e oe, te oni e te ufa,+ 20 to te mau animara rere ia au i to ratou huru e rave rau, te mau animara rata ia au i to ratou huru e rave rau, e te mau animara nee haere atoa ia au i to ratou huru e rave rau, e piti o te mau animara atoa te tomo i roto i te araka ia oe ra ia ora noa ratou.+ 21 O oe râ, e haaputu e e rave oe i te mau huru maa atoa,+ ei maa na outou e na te mau animara.”

22 E rave ihora Noa i te mau mea atoa mai ta te Atua i faaue ia ˈna. Ua na reira iho â oia.+

7 I muri aˈe, na ô maira Iehova ia Noa: “A tomo i roto i te araka, oe e to utuafare taatoa, no te mea ua ite au e taata parau-tia oe i mua i to ˈu aro i rotopu i teie nei uˈi.+ 2 To te mau huru animara viivii ore atoa, e rave oe e hitu,+ te oni e te ufa,* e piti noa to te mau huru animara viivii atoa, te oni e te ufa, 3 oia atoa to te mau animara rere o te raˈi, e hitu, te oni e te ufa,* ia ora noa ta ratou mau fanauˈa i nia i te fenua taatoa.+ 4 I roto noa hoi e hitu mahana, e faatopa mai au i te ûa+ i nia i te fenua e 40 ao e 40 po,+ e e haamou vau mai nia i te fenua i te taata e te animara ora atoa ta ˈu i hamani.”+ 5 Rave ihora Noa i te mau mea atoa ta Iehova i faaue ia ˈna.

6 E 600 matahiti to Noa i te taeraa mai te diluvi i nia i te fenua.+ 7 Tomo aˈera Noa, e ta ˈna mau tamaiti, ta ˈna vahine faaipoipo, e na vahine faaipoipo a ta ˈna mau tamaiti, i roto i te araka hou te diluvi.+ 8 To te mau animara viivii ore atoa, to te mau animara viivii atoa, to te mau animara rere e to te tahi atu mau animara atoa o te fenua,+ 9 tomo tataipiti aˈera ïa i roto i te araka ia Noa ra, te oni e te ufa, mai ta te Atua i faaue ia Noa. 10 E hitu mahana i muri iho, tae maira te diluvi i nia i te fenua.

11 I te 600raa o to Noa matahiti, i te 17 o te mahana o te piti o te avaˈe, i taua mahana ra i parari mai ai te mau pape atoa mai nia mai e i matara ˈi te mau uputa pape o te raˈi.+ 12 E manii maira te ûa i nia i te fenua e 40 ao e 40 po. 13 I taua iho â mahana ra, tomo ihora Noa i roto i te araka e ta ˈna mau tamaiti Sema, Hama e Iapheta,+ e ta ˈna vahine faaipoipo e na toru vahine faaipoipo a ta ˈna na tamaiti.+ 14 Tomo aˈera ratou i roto e te mau animara oviri atoa ia au i to ratou huru e rave rau, e te mau animara rata atoa ia au i to ratou huru e rave rau, e te mau animara nee haere atoa o te fenua ia au i to ratou huru e rave rau, e te mau animara rere atoa ia au i to ratou huru e rave rau, te mau manu atoa, te mau animara pererau atoa. 15 Tataipiti ratou i te haere-noa-raa ia Noa ra i roto i te araka, te mau huru animara atoa e huti ra i te aho ora.* 16 Te oni e te ufa o te mau huru animara atoa tei tomo i roto, mai ta te Atua i faaue ia Noa. I muri iho, tapiri ihora Iehova i te opani.

17 Tamau noa ihora te diluvi e 40 mahana i nia i te fenua, e rahi noa maira te mau pape, a maraa ˈtu ai te araka, e a painu atu ai na nia roa ˈˈe i te fenua. 18 Poˈi roa ihora te fenua i te mau pape o te rahi noa mai ra, area te araka, te painu ra ïa na nia i te iriatai o te mau pape. 19 Ua poˈi roa ino te fenua i te mau pape, a moˈe roa ˈtu ai te mau mouˈa teitei atoa i nia i te fenua taatoa.+ 20 Te teitei o te mau pape i nia ˈˈe i te mau mouˈa, 15 ïa kubiti.*

21 Mou aˈera te mau taata e animara ora atoa o te fenua:+ te mau animara rere, te mau animara rata, te mau animara oviri, te aere animara nainai, e te huitaata taatoa.+ 22 Pohe aˈera to te fenua mǎrô atoa e huti ra i te aho.*+ 23 Haamou ihora te Atua mai nia i te fenua i te mau mea ora atoa: te taata, te animara, te animara nee, e te animara rere o te raˈi. Mou roa aˈera ratou i nia i te fenua.+ O Noa e to roto i te araka anaˈe tei ora mai.+ 24 Poˈi noa ˈtura te fenua i te mau pape 150 mahana.+

8 Tera râ, haapao maira* te Atua ia Noa e te mau animara oviri e animara rata atoa i roto i te araka,+ haafarara maira oia i te mataˈi na nia i te fenua, e haamata aˈera te mau pape i te iti mai. 2 Tamauhia aˈera te mau pape atoa mai nia mai e te mau uputa pape o te raˈi, e mau atura* te ûa no te raˈi mai.+ 3 Haamata aˈera te mau pape i te iti noa mai mai nia i te fenua. I te hoperaa na 150 mahana, ua iti mai te mau pape. 4 I te 17 o te mahana o te hitu o te avaˈe, iri ihora te araka i nia i te mau mouˈa o Ararata. 5 Iti noa maira te mau pape tae roa i te ahuru o te avaˈe. I te mahana matamua o te ahuru o te avaˈe, itehia aˈera te tupuai o te mau mouˈa.+

6 E 40 mahana i muri aˈe, tatara ihora Noa i te haamaramarama+ o te araka, 7 e tuu ihora i te hoê oreba. Rere noa ihora te manu na rapae e hoˈi noa maira, e mǎrô noa ˈtu ai te fenua.

8 I muri aˈe, tuu ihora oia i te hoê uupa no te ite e ua iti mai anei te mau pape mai nia i te fenua. 9 Aita i itehia mai e te uupa te tahi vahi e tau ai,* hoˈi maira ïa te manu ia Noa ra i roto i te araka, no te mea e pape â to nia i te fenua taatoa.+ Toro ihora ïa Noa i to ˈna rima e faahoˈi maira i te manu i roto i te araka. 10 Tiai ihora oia e hitu â mahana e tuu faahou ihora i te uupa. 11 I te hoˈiraa mai te uupa ia ˈna ra i te ahiahi, ite ihora oia e rauere olive ofati-apî-hia tei te utu o te manu! Taa ihora ia Noa e ua iti mai te mau pape mai nia i te fenua.+ 12 Tiai ihora oia e hitu â mahana. Tuu ihora oia i te uupa, aita râ te manu i hoˈi faahou mai ia ˈna ra.

13 I te 601raa o to Noa matahiti,+ i te mahana matamua o te avaˈe matamua, aita e pape faahou i nia i te fenua. Tatara ihora Noa i te tapoˈi o te araka e ite atura e te mǎrô ra te repo fenua. 14 I te 27 o te mahana o te piti o te avaˈe, ua mǎrô te fenua.

15 Na ô maira te Atua ia Noa: 16 “A haere i rapae i te araka, oe, ta oe vahine faaipoipo, ta oe mau tamaiti, e na vahine faaipoipo a ta oe na tamaiti.+ 17 A aratai i te mau animara ora atoa ua rau te huru i rapae,+ to te mau animara rere e to te mau animara avae maha e to te mau animara nee haere atoa o te fenua, ia aere ratou, ia fanauˈahia e ia rahi i nia i te fenua.”+

18 Haere ihora Noa i rapae, e ta ˈna mau tamaiti,+ ta ˈna vahine faaipoipo e na vahine faaipoipo a ta ˈna na tamaiti. 19 Haere aˈera i rapae i te araka te mau animara ora atoa, te mau animara nee haere atoa e te mau animara rere atoa, e te tahi atu mau animara atoa o te fenua, ia au i to ratou huru e rave rau.+ 20 Hamani ihora Noa i te hoê fata+ na Iehova, rave ihora i te tahi mau animara viivii ore e te tahi mau animara rere viivii ore,+ e pûpû aˈera ei tusia taauahi i nia i te fata.+ 21 Hauˈa ihora Iehova i te hoê hauˈa noˈanoˈa ta ˈna i mauruuru roa.* Na ô ihora Iehova i roto i to ˈna aau: “E ore roa vau e faaino faahou* i te fenua+ no ta te taata e rave, mea ino hoi te hinaaro o te aau o te taata mai to ratou apîraa mai â.+ E ore roa atoa vau e tairi faahou i te mau taata e animara ora atoa mai ta ˈu i rave.+ 22 Mai teie atu nei, e vai noa i te fenua nei te tau ueueraa huero maa e te tau ootiraa, te toˈetoˈe e te mahanahana, te tau veavea e te tau toˈetoˈe, e te ao e te po.”+

9 Haamaitai ihora te Atua ia Noa e ta ˈna mau tamaiti e parau maira: “Ia tamariihia outou, ia rahi e ia faaî i te fenua.+ 2 E vai noa te mǎtaˈu e te riaria ia outou i nia i te mau animara ora atoa o te fenua, te mau animara rere atoa o te raˈi, te tahi atu mau animara atoa o te fenua e te mau iˈa atoa o te miti. Tei to outou rima* ratou i teie nei.+ 3 E nehenehe outou e amu i te mau animara ora atoa.+ E horoa ˈtu vau ia ratou pauroa na outou, mai ia ˈu i horoa ˈtu i te mau raau tupu.+ 4 O te iˈo anaˈe e ora, oia hoi e toto,+ to roto, eiaha roa outou e amu.+ 5 Hau atu â, e titau atu vau i to outou toto, oia hoi to outou ora. O ta ˈu ïa e titau atu i te mau animara ora atoa. O ta ˈu atoa e titau atu i te taata tataitahi no te ora o to ˈna taeae.+ 6 O te haamanii i to te taata toto, na te taata atoa to ˈna iho toto e haamanii,+ i te hohoˈa hoi o te Atua i hamani ai Oia i te taata.+ 7 Outou râ, ia tamariihia e ia rahi, e ia parare roa e ia faaî i te fenua.”+

8 Parau maira te Atua ia Noa e ta ˈna atoa mau tamaiti: 9 “Te haamau nei au i teie nei i ta ˈu faufaa e o outou+ e to outou huaai i muri mai ia outou, 10 e te mau animara ora atoa ia outou ra, te mau manu, te mau animara avae maha, e te tahi atu mau animara ora ia outou ra, pauroa tei haere mai i rapae i te araka, oia hoi te mau animara ora atoa o te fenua.+ 11 E haamau iho â vau i ta ˈu faufaa e o outou: E ore te taata e te animara atoa e mou faahou i te mau pape o te hoê diluvi, e ore atoa te hoê diluvi e tuino faahou i te fenua.”+

12 Parau atoa maira te Atua: “Teie te tapao o te faufaa ta ˈu e haamau nei i rotopu ia ˈu e ia outou e te mau animara ora atoa ia outou ra, no te mau uˈi atoa a muri aˈe. 13 E tuu vau i ta ˈu anuanua i roto i te ata, ei tapao o te faufaa i rotopu ia ˈu e te fenua. 14 I te mau taime atoa e faatupu ai au i te ata i nia ˈˈe i te fenua, e itehia mau â te anuanua i roto i te ata. 15 E haamanaˈo iho â vau i ta ˈu faufaa ta ˈu i haamau i rotopu ia ˈu e ia outou e te mau animara ora atoa ua rau te huru, e e ore te mau pape e riro faahou ei diluvi no te haamou i te taata e te animara atoa.+ 16 E itehia te anuanua i roto i te ata. E ite iho â vau i te reira, a haamanaˈo atu ai i te faufaa mure ore i rotopu i te Atua e te mau taata e animara ora atoa ua rau te huru i nia i te fenua.”

17 Parau faahou maira te Atua ia Noa: “Teie te tapao o te faufaa ta ˈu e haamau i rotopu ia ˈu e te mau taata e animara atoa i nia i te fenua.”+

18 O Sema, Hama e Iapheta+ na tamaiti a Noa tei haere mai i rapae i te araka. I muri aˈe, fanau maira ta Hama o Kanaana.+ 19 E tamaiti ratou e toru na Noa, e no roto mai ia ratou te taata atoa o tei parare ati aˈe te fenua.+

20 Haamata ihora Noa i te faaapu i te fenua, e tanu ihora i te vine. 21 Inu ihora oia i te uaina e taero ihora, e taoto tahaa noa ˈtura i roto i to ˈna fare ie. 22 Ite ihora Hama, te metua tane o Kanaana, i te vai-tahaa-noa-raa to ˈna metua tane, e faaite atura i to ˈna na tuaana i rapae. 23 Rave maira Sema raua Iapheta i te tahi ahu e tuu aˈera i nia i to raua tapono e tomo atura i roto ma te huri tua. Tapoˈi ihora raua i to raua metua tane e vai tahaa noa ra, a hiˈo ai i te vahi ê, a ore atu ai raua i ite i te vai-tahaa-noa-raa to raua metua tane.

24 I to Noa araraa mai i to ˈna taeroraa e faarooraa i ta ta ˈna tamaiti hopea i rave, 25 na ô ihora oia:

“Ia vai te ino i nia ia Kanaana.+

Ia riro oia ei tîtî haihai roa ˈˈe na to ˈna na tuaana.”+

26 Na ô faahou ihora oia:

Ia riro atoa Kanaana ei tîtî na ˈna.”

28 Ua ora â Noa e 350 matahiti i muri mai i te diluvi.+ 29 Te mau matahiti atoa i ora ˈi Noa, e 950 matahiti, e pohe atura oia.

10 Teie te aamu o ta Noa na tamaiti, Sema,+ Hama e Iapheta.

Fanau maira ta ratou e tamaiti i muri mai i te diluvi.+ 2 Na tamaiti a Iapheta, o Gomera,+ Magoga,+ Madai, Iavana, Tubala,+ Meteka+ e Tirasa.+

3 Na tamaiti a Gomera, o Asekeneza,+ Riphata e Togarama.+

4 Na tamaiti a Iavana, o Elisa,+ Taresisa,+ Kitima+ e Dodanima.

5 No roto mai ia ratou to te mau motu tei parare i to ratou mau fenua, ia au i to ratou mau reo e to ratou mau utuafare e to ratou mau nunaa.

6 Na tamaiti a Hama, o Kusa, Mizeraima,+ Puta+ e Kanaana.+

7 Na tamaiti a Kusa, o Sipa,+ Havila, Sabata, Raama+ e Sabateka.

Na tamaiti a Raama, o Seba e Dedana.

8 Fanau maira ta Kusa o Nimeroda. O ˈna te matamua tei riro ei taata puai i te fenua. 9 Ua riro oia ei taata aˈuaˈu puai ei patoiraa ia Iehova. No reira i matauhia ˈi i te parau: “Mai ia Nimeroda ei taata aˈuaˈu puai ei patoiraa ia Iehova.” 10 Te haamataraa o ta ˈna faatereraa arii, tei* Babela,+ Ereka,+ Akada e Kalane i te fenua o Sinara.+ 11 Mai taua fenua ra i haere atu ai oia i Asura,+ a patu atu ai ia Nineve,+ Rehobota-ire, Kala 12 e Resena i ropu ia Nineve e ia Kala: Tera te oire rahi.*

13 Fanau maira ta Mizeraima te ati Luta,+ te ati Anami, te ati Lehabi, te ati Naphetuhi,+ 14 te ati Paterusi,+ te ati Kaseluhi (no roto mai ia ratou te mau Philiseti)+ e te ati Kaphatori.+

15 Fanau maira ta Kanaana o Sidona,+ ta ˈna matahiapo, e o Heta,+ 16 oia atoa te ati Iebusi,+ te ati Amori,+ te ati Geregasi, 17 te ati Hevi,+ te ati Araki, te ati Sîni, 18 te ati Aravada,+ te ati Zemari e te ati Hamata.+ I muri aˈe, purara aˈera te mau fetii o te ati Kanaana. 19 Te otia fenua o te ati Kanaana, mai Sidona haere roa i Gerara,+ pihai iho i Gaza,+ haere roa i Sodoma, Gomora,+ Adema e Zeboîma,+ pihai iho i Lasa. 20 Tera te huaai o Hama ia au i to ratou mau utuafare e to ratou mau reo, to ratou mau fenua e to ratou mau nunaa.

21 E tamarii atoa ta Sema, te tupuna o te huaai o Ebera+ e te teina o Iapheta te matahiapo.* 22 Na tamaiti a Sema, o Elama,+ Asuhura,+ Arapakesada,+ Luta e Arama.+

23 Na tamaiti a Arama, o Ûza, Hula, Getera e Masaha.

24 Fanau maira ta Arapakesada o Sela,+ e fanau maira ta Sela o Ebera.

25 E piti tamaiti ta Ebera. O Pelega*+ te iˈoa o te tahi, i to ˈna hoi tau i purara ˈi to te fenua. O Iokatana+ te iˈoa o to ˈna taeae.

26 Fanau maira ta Iokatana o Alemodada, Selepha, Hazaramaveta, Iera,+ 27 Hadorama, Uzala, Dikela, 28 Obala, Abimaela, Seba, 29 Ophira,+ Havila e Iobaba. E tamaiti anaˈe teie na Iokatana.

30 To ratou nohoraa, mai Mesa haere roa i Sephara, te tuhaa fenua mouˈa i hitia o te râ.

31 Tera te huaai o Sema ia au i to ratou mau utuafare e to ratou mau reo, to ratou mau fenua e to ratou mau nunaa.+

32 Tera te huaai o te mau tamaiti a Noa ia au i to ratou mau fetii e to ratou mau nunaa. No roto mai ia ratou te mau nunaa tei parare ati aˈe te fenua i muri mai i te diluvi.+

11 Hoê noa reo to te fenua atoa e hoê â pueraa taˈo ta ratou. 2 A tere ai ratou i te pae hitia o te râ, ite aˈera ratou i te hoê peho rahi i te fenua o Sinara,+ e parahi ihora i reira. 3 Na ô aˈera te tahi i te tahi: “Mai! Hamani anaˈe i te ofai araea, a tahu atu ai i te reira i te auahi.” Faaohipa aˈera ïa ratou i te ofai araea eiaha râ te ofai, e te tâ ei tapiri. 4 Na ô aˈera ratou: “Mai! Patu anaˈe i te hoê oire no tatou iho e te hoê pare o te puta roa ˈtu i roto i te raˈi, e ia tui to tatou roo, a ore atu ai tatou e purara e ati aˈe te fenua.”+

5 Pou maira Iehova e hiˈo i te oire e te pare ta te mau tamarii a te taata i patu. 6 Parau ihora Iehova: “Inaha, hoê noa nunaa ratou ma te hoê noa reo.+ A hiˈo na i ta ratou i haamata i te rave. I teie nei, pauroa ta ratou e opua e rave, e haere iho â ia ratou. 7 Mai! Pou anaˈe+ i ǒ e faahuru ê anaˈe i to ratou reo ia ore ratou e taa i to te tahi e te tahi reo.” 8 Haapurara ihora Iehova ia ratou mai reira e ati aˈe te fenua,+ e faaea ˈtura ratou i te patu i te oire. 9 No reira te oire i mairihia ˈi i te iˈoa Babela,*+ no te mea i reira to Iehova faahuru-ê-raa i te reo o to te fenua atoa, e to Iehova haapurararaa ia ratou mai reira e ati aˈe te fenua.

10 Teie te aamu o Sema.+

I te fanauraa mai ta ˈna o Arapakesada+ e piti matahiti i muri mai i te diluvi, 100 matahiti to Sema. 11 I muri iho i te fanauraa mai ta ˈna o Arapakesada, ua ora â Sema e 500 matahiti, a fanau mai ai ta ˈna e tamaiti e e tamahine.+

12 Ua ora Arapakesada e 35 matahiti e fanau maira ta ˈna o Sela.+ 13 I muri iho i te fanauraa mai ta ˈna o Sela, ua ora â Arapakesada e 403 matahiti, a fanau mai ai ta ˈna e tamaiti e e tamahine.

14 Ua ora Sela e 30 matahiti e fanau maira ta ˈna o Ebera.+ 15 I muri iho i te fanauraa mai ta ˈna o Ebera, ua ora â Sela e 403 matahiti, a fanau mai ai ta ˈna e tamaiti e e tamahine.

16 Ua ora Ebera e 34 matahiti e fanau maira ta ˈna o Pelega.+ 17 I muri iho i te fanauraa mai ta ˈna o Pelega, ua ora â Ebera e 430 matahiti, a fanau mai ai ta ˈna e tamaiti e e tamahine.

18 Ua ora Pelega e 30 matahiti e fanau maira ta ˈna o Reu.+ 19 I muri iho i te fanauraa mai ta ˈna o Reu, ua ora â Pelega e 209 matahiti, a fanau mai ai ta ˈna e tamaiti e e tamahine.

20 Ua ora Reu e 32 matahiti e fanau maira ta ˈna o Seruga. 21 I muri iho i te fanauraa mai ta ˈna o Seruga, ua ora â Reu e 207 matahiti, a fanau mai ai ta ˈna e tamaiti e e tamahine.

22 Ua ora Seruga e 30 matahiti e fanau maira ta ˈna o Nahora. 23 I muri iho i te fanauraa mai ta ˈna o Nahora, ua ora â Seruga e 200 matahiti, a fanau mai ai ta ˈna e tamaiti e e tamahine.

24 Ua ora Nahora e 29 matahiti e fanau maira ta ˈna o Tera.+ 25 I muri iho i te fanauraa mai ta ˈna o Tera, ua ora â Nahora 119 matahiti, a fanau mai ai ta ˈna e tamaiti e e tamahine.

26 Ua ora Tera e 70 matahiti, e fanau maira ta ˈna o Aberama,+ Nahora+ e Harana.

27 Teie te aamu o Tera.

Fanau maira ta Tera o Aberama, Nahora e Harana, e fanau maira ta Harana o Lota.+ 28 Te ora noa ra to ˈna metua tane o Tera i te poheraa Harana i te fenua i fanauhia ˈi oia, i Ura+ i ǒ te Kaladaio.+ 29 Rave aˈera Aberama raua Nahora i te vahine faaipoipo na raua. O Sari+ te iˈoa o te vahine faaipoipo a Aberama, e te iˈoa o te vahine faaipoipo a Nahora, o Mileka+ te tamahine a Harana, te metua tane o Mileka raua Iseka. 30 Tera râ, e vahine fanau ore Sari,+ aita ïa e tamarii ta ˈna.

31 Rave ihora Tera ia Aberama ta ˈna tamaiti e ia Lota ta ˈna mootua,+ te tamaiti a Harana, e ia Sari ta ˈna hunoa, te vahine faaipoipo a Aberama, e faarue maira ratou e o ˈna ia Ura i ǒ te Kaladaio no te haere i te fenua o Kanaana.+ I muri aˈe, tae atura ratou i Harana+ e parahi ihora i reira. 32 Te mau matahiti i ora ˈi Tera, e 205 matahiti. E pohe atura Tera i Harana.

12 E parau maira Iehova ia Aberama: “A vaiiho i to fenua e to fetii e te utuafare o to metua tane no te haere i te fenua ta ˈu e faaite ia oe.+ 2 E faariro vau ia oe ei nunaa rahi, e e haamaitai au ia oe, e e faariro vau i to iˈoa ei iˈoa tuiroo, e e riro oe ei haamaitairaa.+ 3 E haamaitai au i te feia e haamaitai ia oe, e e faaino vau i tei faaino ia oe,+ e e haamaitai-mau-hia te mau fetii atoa o te fenua* na roto ia oe.”+

4 Haere atura Aberama mai ta Iehova i parau ia ˈna, e na muri atura Lota ia ˈna. E 75 matahiti to Aberama i to ˈna faarueraa i Harana.+ 5 Rave ihora Aberama ia Sari+ ta ˈna vahine faaipoipo e ia Lota te tamaiti a to ˈna taeae+ e te mau faufaa atoa ta raua i haapue+ e te feia tei noaa mai ia raua i Harana, e reva ˈtura ratou i te fenua o Kanaana.+ I to ratou taeraa ˈtu i te fenua o Kanaana, 6 na roto atura Aberama i taua fenua ra i te haere e tae roa i te tuhaa fenua o Sekema,+ pihai iho i te mau tumu raau rarahi o More.+ I taua tau ra, o te ati Kanaana te ora ra i taua fenua ra. 7 Fa maira Iehova ia Aberama e parau maira: “I to huaai+ e horoa ˈtu ai au i teie fenua.”+ Hamani ihora oia i te hoê fata i reira na Iehova, tei fa mai ia ˈna. 8 I muri aˈe, faarue maira oia i reira, e haere atura i te tuhaa fenua mouˈa i hitia o te râ o Betela,+ e patia ihora i to ˈna fare ie i taua vahi ra, o Betela tei tooa o te râ e o Ai+ tei hitia o te râ. I reira, hamani ihora oia i te hoê fata na Iehova,+ e tiaoro atura i te iˈoa o Iehova.+ 9 I muri iho, tatara ihora Aberama i te mau fare ie e tamau atura i to ˈna tere i te Negeba,+ a puhapa ˈi i tera e tera vahi.

10 Tera râ, tupu ihora te oˈe i taua fenua ra, e no te mea e oˈe rahi,+ pou ihora Aberama i Aiphiti e faaea i reira maa taime.*+ 11 Hou a tomo ai i Aiphiti, na ô atura oia ia Sari ta ˈna vahine faaipoipo: “A faaroo mai na! Ua ite au e vahine haviti mau â oe.+ 12 Ia ite to Aiphiti ia oe, e na ô iho â ratou: ‘E vahine faaipoipo tera na ˈna.’ E haapohe ratou ia ˈu, e vaiiho râ ratou ia oe ia ora. 13 A parau na e tuahine oe no ˈu, a ore atu ai au e fifi maoti oe, e e ora noa ïa vau.”*+

14 I to Aberama iho â tomoraa i Aiphiti, ite maira to Aiphiti ia Sari e mea haviti roa. 15 E ite atoa maira te huiarii a Pharao ia ˈna, e faaite aˈera ia Pharao mea haviti roa oia, e afaihia ˈtura Sari i te aorai o Pharao. 16 Hamani maitai maira oia ia Aberama no Sari, e noaa maira ia ˈna te mamoe, te puaatoro, te asini oni e asini ufa, te tavini tane e tavini vahine, e te kamela.+ 17 Tairi maira Iehova ia Pharao e to ˈna utuafare e ta ˈna mau tavini i te maˈi rahi no Sari te vahine faaipoipo a Aberama.+ 18 Titau ihora Pharao ia Aberama e parau atura: “Eaha oe i na reira ˈi ia ˈu? Eaha oe i ore ai i faaite mai e vahine faaipoipo oia na oe? 19 Eaha oe i parau ai: ‘E tuahine o ˈna no ˈu,’+ mai rave hoi au ia ˈna ei vahine faaipoipo na ˈu? Teie ta oe vahine faaipoipo. A rave ia ˈna e a haere!” 20 Horoa ˈtura Pharao i ta ˈna mau tavini i te faaueraa no nia ia Aberama, e aratai atura ratou ia ˈna e ta ˈna vahine faaipoipo e ta ˈna mau faufaa atoa i rapae i Aiphiti.+

13 Pauma aˈera Aberama i te Negeba+ mai Aiphiti mai, o ˈna e ta ˈna vahine faaipoipo ma ta ˈna mau faufaa atoa, e o Lota. 2 Mea rahi roa ta Aberama nǎnǎ animara, ario e auro.+ 3 A haere ai oia i Betela mai te Negeba mai, ua puhapa oia i tera e tera vahi tae roa i te vahi i patia ˈi oia i to ˈna fare ie i ropu i Betela e Ai,+ 4 e i hamani ai oia i te hoê fata. I reira Aberama i te tiaororaa i te iˈoa o Iehova.

5 E o Lota, e na muri ra ia Aberama, e nǎnǎ mamoe e puaatoro ta ˈna e e fare ie atoa to ˈna. 6 Aita râ i tia ia ratou pauroa ia faaea i te hoê â vahi, ua rahi roa hoi ta ratou mau faufaa a ore atu ai ratou i nehenehe faahou e ora amui. 7 Ei faahopearaa, tatamaˈi aˈera te mau tiai o ta Aberama mau nǎnǎ e te mau tiai o ta Lota mau nǎnǎ. (I taua tau ra te ora ra te ati Kanaana e te ati Perizi i taua fenua ra.)+ 8 Na ô atura Aberama ia Lota:+ “Eiaha na tâua e ta tâua mau tiai animara e tatamaˈi, e fetii hoi tâua. 9 E ere anei o te fenua taatoa to mua ia oe? E faataa ê anaˈe na ia tâua. Ia haere oe i te pae aui, e haere ïa vau i te pae atau, ia haere râ oe i te pae atau, e haere ïa vau i te pae aui.” 10 Hiˈo haere aˈera Lota e ite ihora i te tuhaa fenua taatoa o Ioridana+ tae roa i Zoara.+ E vahi rarirari maitai (hou Iehova a haamou ai ia Sodoma e Gomora), mai te ô a Iehova,+ mai te fenua o Aiphiti. 11 Maiti ihora Lota no ˈna iho i te tuhaa fenua taatoa o Ioridana, e puhapa ihora Lota i te pae hitia o te râ. Taa ê atura raua te tahi i te tahi. 12 Ora ˈtura Aberama i te fenua o Kanaana, o Lota râ, ora ˈtura ïa na pihai iho i te mau oire o te tuhaa fenua o Ioridana.+ I muri iho, patia ihora oia i to ˈna fare ie i pihai iho ia Sodoma. 13 Mea ino te taata o Sodoma, e feia rave i te hara rahi ratou i mua i te aro o Iehova.+

14 Parau maira Iehova ia Aberama, i muri aˈe i to Lota faataa-ê-raa ˈtu ia ˈna: “A hiˈo haere na, e mai te vahi to reira oe, a hiˈo na i te pae apatoerau e apatoa, i te pae hitia o te râ e tooa o te râ, 15 no te mea te fenua taatoa ta oe e ite ra, e horoa ˈtu vau ei fenua no oe e no to huaai no te hoê tau roa.+ 16 E e faarahi au i to huaai mai te huˈa repo o te fenua, ia taio noa ˈtu te tahi taata pauroa te huˈa repo o te fenua, e nehenehe atoa ïa to huaai e taiohia.+ 17 A tia, a haere na te roa e te aano o te fenua, e horoa ˈtu hoi au i te reira no oe.” 18 Tamau noa ˈtura Aberama i te ora i roto i te fare ie. I muri aˈe, haere maira oia e faaea ihora na pihai iho i te mau tumu raau rarahi o Mamera,+ i Heberona,+ e hamani ihora oia i reira i te hoê fata na Iehova.+

14 I te mau mahana o Ameraphela arii no Sinara,+ o Arioka arii no Elasara, o Kedoralaomera+ arii no Elama,+ e o Tidala arii no Goima, 2 tamaˈi aˈera tera mau arii ia Bera arii no Sodoma,+ ia Biresa arii no Gomora,+ ia Sinaba arii no Adema, ia Semebera arii no Zeboîma+ e i te arii no Bela, oia hoi no Zoara. 3 Haaputu aˈera ratou pauroa i ta ratou mau nuu i te peho no Sidima,+ oia hoi te miti Avaava.*+

4 I raro aˈe na ratou i te faatereraa a Kedoralaomera 12 matahiti, orure hau atura râ ratou i te 13raa o te matahiti. 5 I te 14raa o te matahiti, haere maira Kedoralaomera e te mau arii tei apiti mai ia ˈna, e pau aˈera ia ratou te ati Repha i Aseterota-karenima, te ati Zuzima i Hama, te ati Emima+ i Save-kiriataima, 6 e te ati Hori+ i to ratou mouˈa o Seira+ e i raro roa i Ela-parana, i te medebara. 7 Hoˈi atura ratou e haere atura i Ene-misipata, oia hoi Kadesa,+ e haru aˈera ratou i te tuhaa fenua taatoa o te ati Amaleka+ e te ati Amori+ atoa e ora ra i Hazazona-tamara.+

8 I taua taime ra, haere aˈera te arii no Sodoma i te peho no Sidima, oia atoa te arii no Gomora, te arii no Adema, te arii no Zeboîma e te arii no Bela, oia hoi no Zoara, e faaineine aˈera i te aro ia ratou, 9 ia Kedoralaomera te arii no Elama, ia Tidala arii no Goima, ia Ameraphela arii no Sinara e ia Arioka arii no Elasara:+ e maha arii o te aro e pae arii. 10 Tera râ, mea rahi roa te apoo tâ i te peho no Sidima, e tamata aˈera na arii no Sodoma e Gomora i te imi i te ora e topa ihora i roto i taua mau apoo ra, e horo ê aˈera tei toe mai i te vahi mouˈa. 11 Rave aˈera tei upootia mai pauroa te taoˈa a to Sodoma e Gomora e pauroa ta ratou maa e reva ˈtura.+ 12 Rave atoa aˈera ratou i te tamaiti a te taeae o Aberama o Lota e ora ra i Sodoma,+ ta ˈna atoa mau faufaa, e reva ˈtura ratou.

13 I muri iho, haere maira te hoê tane tei ora mai e faaara ia Aberama te Hebera. Te ora ra oia* na pihai iho i te mau tumu raau rarahi a Mamera, te ati Amori,+ te taeae o Esekola e Anera.+ Ua haamau Aberama i te hoê faufaa e teie mau tane. 14 Ite ihora Aberama e ua haruhia to ˈna fetii.*+ Haaputuputu ihora oia i to ˈna mau taata tei faaineinehia, e 318 tavini tei fanauhia i roto i to ˈna utuafare, e aˈuaˈu aˈera i te feia haru tae roa i Dana.+ 15 I te po, tapǔpǔ ihora oia i to ˈna mau taata, e aro atura oia e ta ˈna mau tavini e pau aˈera te feia haru ia ratou. Aˈuaˈu aˈera oia ia ratou tae roa i Hoba, i te pae apatoerau o Damaseko. 16 Faahoˈi maira oia pauroa te faufaa, e faahoˈi atoa maira oia ia Lota to ˈna fetii, ta ˈna mau faufaa, te mau vahine, e te tahi atu mau taata.

17 I muri iho i to Aberama hoˈiraa mai ma te upootia i nia ia Kedoralaomera e te mau arii tei apiti mai ia ˈna, haere atura te arii no Sodoma e farerei ia Aberama i te peho no Save, oia hoi te peho o te arii.+ 18 E hopoi atura Melehizedeka+ arii no Salema+ i te faraoa e te uaina. E tahuˈa oia na te Atua Teitei Roa ˈˈe.+

19 Haamaitai ihora oia ia Aberama e na ô atura:

E horoa maira Aberama na ˈna i te tuhaa ahuru o te mau mea atoa ta ˈna i haru.+

21 Na ô atura te arii no Sodoma ia Aberama: “A horoa mai i te mau taata, a rave râ i te mau faufaa na oe.” 22 Tera râ, parau maira Aberama i te arii no Sodoma: “Te amo nei au i to ˈu rima ma te horeo ia Iehova te Atua Teitei Roa ˈˈe, tei hamani i te raˈi e te fenua, 23 e ore roa vau e rave i ta oe mau faufaa, e taura iti anei aore ra e taamu tiaa, ia ore hoi oe e parau: ‘Ia ˈu i rahi ai ta Aberama taoˈa.’ 24 E ore au e rave i te tahi mea maori râ ta te mau tane apî i amu aˈena. No te tuhaa râ a te mau tane tei haere mai na muri ia ˈu, o Anera, Esekola e Mamera,+ e rave ïa ratou i ta ratou tuhaa.”

15 I muri iho, tae maira ta Iehova parau ia Aberama na roto i te hoê orama: “Eiaha e mǎtaˈu,+ Aberama. E paruru vau no oe.+ E rahi roa ta oe haamaitairaa.”+ 2 Pahono atura Aberama: “E te Arii hau ê e Fatu ra o Iehova, eaha ta oe e horoa mai, inaha aita â e tamarii ta ˈu, e te taata o te fatu i to ˈu utuafare, e tane ïa no Damaseko, o Eliezera?”+ 3 Na ô faahou atura Aberama: “Aita oe i horoa mai i te huaai no ˈu,+ e na te hoê mero* o to ˈu utuafare e mono ia ˈu ei fatu.” 4 Tera râ, teie ta Iehova parau ei pahonoraa ia Aberama: “E ore teie taata e mono ia oe ei fatu, tera râ, o ta oe iho tamaiti* te mono ia oe ei fatu.”+

5 Parau ihora oia ia Aberama ia haere i rapae e na ô maira: “A hiˈo na i nia i te raˈi e a taio na i te mau fetia, ia haere ia oe ia taio.” E na ô maira oia: “Mai tera atoa te rahi o to huaai.”+ 6 E faatupu ihora oia i te faaroo ia Iehova,+ e hiˈo ihora te Atua ia ˈna ei taata parau-tia.+ 7 E na ô faahou maira oia: “O vau o Iehova tei aratai mai ia oe i rapae ia Ura i ǒ te Kaladaio no te horoa ˈtu i teie fenua ei fenua no oe.”+ 8 Parau atura Aberama: “E te Arii hau ê e Fatu ra o Iehova, e nafea vau e ite ai e fatu vau i teie fenua?” 9 Pahono maira oia: “A rave i te hoê puaatoro ufa e toru matahiti, te hoê puaaniho ufa e toru matahiti, te hoê mamoe oni e toru matahiti, te hoê uupa, e te hoê fanauˈa uuairao.” 10 Rave ihora oia i teie mau animara atoa e tâpû ihora na ropu, e tuu ihora hoê apaapa i te hoê pae e te tahi atu apaapa i te tahi atu pae,* aita râ oia i tâpû i na manu. 11 Haamata aˈera te mau manu rarahi i te tau i nia i taua mau animara pohe ra, ua tiahi noa râ Aberama i taua mau manu ra.

12 A fatata ˈi te mahana i te mairi, varea roa ihora Aberama i te taoto e roohia ihora oia i te poiri rahi e te riaria. 13 Parau maira te Atua ia Aberama: “Ia ite mai oe, e riro iho â to huaai ei taata ěê i te hoê fenua e ere no ratou, e faatîtî e e hamani ino to reira mau taata ia ratou e 400 matahiti.+ 14 Tera râ, e faautua vau i te nunaa o te faatîtî ia ratou,+ e i muri aˈe, e haere ê mai ratou i taua fenua ra ma te faufaa rahi.+ 15 O oe râ, e haere oe i to mau tupuna ma te hau, e hunahia oe ia ruhiruhia roa oe.+ 16 Tera râ, e hoˈi mai ratou i ǒ nei+ i te maha o te uˈi, no te mea aita â te hara a te ati Amori i tâhiti roa ˈtura.”+

17 I te mairiraa te mahana e te haapoiri-roa-raa, faura maira te hoê umu au auahi, e na ropu atura te hoê rama ura i te mau apaapa animara. 18 I taua mahana ra, faaau ihora Iehova i te hoê faufaa ia Aberama,+ a na ô ai: “No to huaai e horoa ˈi au i teie fenua,+ mai te anavai o Aiphiti tae roa i te anavai rahi, oia hoi te anavai Eupharate:+ 19 te fenua o te ati Keni,+ te ati Kenizi, te ati Kadamoni, 20 te ati Heta,+ te ati Perizi,+ te ati Repha,+ 21 te ati Amori, te ati Kanaana, te ati Geregasi e te ati Iebusi.”+

16 Teie râ, aita Sari te vahine faaipoipo a Aberama i fanau mai i te tamarii na ˈna,+ tera râ, e tavini vahine Aiphiti ta ˈna o Hagara+ te iˈoa. 2 Parau atura Sari ia Aberama: “A faaroo mai na! Aita Iehova i farii ia fanau vau i te tamarii. A taoto na i ta ˈu tavini. E noaa paha ïa ta ˈu tamarii na roto ia ˈna.”+ Faaroo ihora Aberama i te parau a Sari. 3 I muri aˈe hoê ahuru matahiti to Aberama oraraa i te fenua o Kanaana, rave ihora Sari te vahine faaipoipo a Aberama i ta ˈna tavini o Hagara, e horoa ˈtura ia ˈna ei vahine faaipoipo na Aberama ta ˈna tane faaipoipo. 4 Taoto ihora Aberama ia Hagara, e hapû ihora oia. I to Hagara iteraa e ua hapû oia, haamata ihora oia i te vahavaha i to ˈna fatu vahine.

5 Na ô atura Sari ia Aberama: “Te ino i ravehia i nia ia ˈu, no oe te hape. Na ˈu i horoa ˈtu i ta ˈu tavini ia oe ra,* i to ˈna râ iteraa e ua hapû oia, haamata ihora oia i te vahavaha ia ˈu. Ia haava mai Iehova ia tâua.” 6 Parau maira Aberama ia Sari: “A faaroo mai! E tavini o ˈna na oe. A rave ia ˈna mai ta oe e manaˈo e mea maitai.” Faahaama ihora Sari ia ˈna, e horo ê ihora Hagara.

7 I muri iho, itehia maira oia e te melahi a Iehova i te hoê pape pihaa i roto i te medebara, te pape pihaa i te eˈa e haere tia ˈtu i Sura.+ 8 E parau maira te melahi: “Hagara, tavini a Sari, nahea mai oe e te haere ra oe ihea?” Pahono atura oia: “Te horo ê nei au i to ˈu fatu o Sari.” 9 Parau maira te melahi a Iehova: “A hoˈi i to fatu ra e a auraro ia ˈna.” 10 E parau maira te melahi a Iehova: “E faarahi roa vau i to huaai, a ore atu ai e haere ia taio.”+ 11 Na ô faahou maira te melahi a Iehova: “Teie oe ua hapû, e fanau mai oe i te hoê tamaiti, e ia mairi oe ia ˈna i te iˈoa o Isemaela,* ua faaroo hoi Iehova i to autâ. 12 E riro oia mai te hoê asini oviri.* E aro oia i te taata atoa, e aro te taata atoa ia ˈna, e e puhapa oia i mua noa mai i* to ˈna mau taeae atoa.”

13 Tiaoro ihora Hagara i te iˈoa o Iehova, e paraparau ra ia ˈna: “E Atua oe o te ite mai ra ia ˈu,”+ ua parau hoi oia: “Ua hiˈo mau â anei au i ǒ nei i tei ite mai ra ia ˈu?” 14 No reira te apoo pape i parauhia ˈi Beere-lahai-roi.* (To ropu ia Kadesa e Bereda.) 15 Fanau maira Hagara i te hoê tamaiti, e mairi ihora Aberama i ta ˈna tamaiti, ta Hagara i fanau mai, o Isemaela.+ 16 E 86 matahiti to Aberama i to Hagara fanauraa mai ia Isemaela.

17 I te 99raa o to Aberama matahiti, fa maira Iehova ia Aberama e na ô maira: “O vau te Atua Manahope. A haere na nia i to ˈu mau eˈa e ei haerea hapa ore to oe. 2 E haamau vau i ta ˈu faufaa i rotopu ia ˈu e ia oe,+ e e horoa vau na oe e rave rahi roa huaai.”+

3 Tipapa ihora Aberama te mata i raro, e paraparau noa maira te Atua ia ˈna, a na ô ai: 4 “O vau râ, ua haamau vau i ta ˈu faufaa e o oe,+ e e riro iho â oe ei metua no te nunaa e rave rahi.+ 5 To iˈoa, e ere faahou Aberama.* O Aberahama* to oe iˈoa i teie nei, e faariro hoi au ia oe ei metua no te nunaa e rave rahi. 6 E faarahi roa vau i ta oe mau tamarii e e faariro vau ia oe ei nunaa e rave rahi, e mea rahi te arii e na roto mai ia oe.+

7 “E haapao iho â vau i ta ˈu faufaa, te hoê faufaa mure ore, i rotopu ia ˈu e ia oe+ e to huaai i muri mai ia oe e hope noa ˈtu to ratou mau uˈi, ia riro vau ei Atua no oe e no to huaai i muri mai ia oe. 8 E e horoa ˈtu vau no oe e to huaai i muri mai ia oe i te fenua i reira oe i te oraraa ei taata ê,+ te fenua taatoa o Kanaana, ei fenua no outou no te hoê tau roa, e e riro vau ei Atua no ratou.”+

9 Na ô faahou maira te Atua ia Aberahama: “O oe râ, ia haapao oe i ta ˈu faufaa, oe e to huaai i muri mai ia oe e hope noa ˈtu to ratou mau uˈi. 10 Teie ta ˈu faufaa i rotopu ia ˈu e ia outou, ta oe e to huaai i muri mai ia oe e haapao: Ia peritomehia te mau tane atoa i rotopu ia outou.+ 11 Ia peritome outou i to outou iri i mua, e e riro te reira ei tapao o te faufaa i rotopu ia ˈu e ia outou.+ 12 E hope noa ˈtu to outou mau uˈi, ia peritomehia te mau tamarii tamaroa atoa e vaˈu mahana,+ pauroa tei fanauhia i roto i to utuafare, e pauroa e ere i te huaai no oe, e te tane i hoohia mai i te moni i te hoê taata ê. 13 Ia peritomehia pauroa te tamarii tamaroa tei fanauhia i roto i to utuafare e pauroa te tane tei hoohia mai i ta oe moni,+ e ia riro ta ˈu faufaa o te peritomeraa* ei faufaa no te hoê tau roa. 14 Ia ore te tane peritome-ore-hia e peritome i to ˈna iri i mua, e haapohehia ïa taua taata ra mai roto mai i to ˈna nunaa. Ua faahapa oia i ta ˈu faufaa.”

15 Na ô maira te Atua ia Aberahama: “No Sari*+ ta oe vahine faaipoipo, eiaha oe e pii ia ˈna Sari, no te mea o Sara* to ˈna iˈoa i teie nei. 16 E haamaitai au ia ˈna e e horoa atoa ˈtu vau i te hoê tamaiti na oe na roto ia ˈna.+ E haamaitai au ia ˈna e e riro oia ei nunaa e rave rahi. Mea rahi te arii o te mau nunaa e na roto mai ia ˈna.” 17 Tipapa ihora Aberahama te mata i raro e ata ihora e na ô ihora i roto i to ˈna aau:+ “E fanau mai anei ta te hoê tane 100 matahiti te hoê tamarii, e e fanau anei Sara, te hoê vahine e 90 matahiti?”+

18 Parau atura Aberahama i te Atua mau: “Ia ora Isemaela ma te haamaitaihia e oe!”+ 19 Na ô maira te Atua: “E fanau mai iho â Sara to vahine faaipoipo i te hoê tamaiti, e e topa oe ia ˈna i te iˈoa o Isaaka.*+ E e faaau vau i ta ˈu faufaa e o Isaaka ei faufaa mure ore no to ˈna huaai i muri mai ia ˈna.+ 20 No Isemaela râ, ua faaroo vau ia oe. Inaha, e haamaitai au ia ˈna e e faarahi au i ta ˈna mau tamarii e e horoa vau no ˈna e rave rahi roa huaai. E fanauhia mai ta ˈna 12 raatira, e e faariro vau ia ˈna ei nunaa rahi.+ 21 Tera râ, e faaau vau i ta ˈu faufaa e o Isaaka,+ ta Sara e fanau mai i teie taime faataahia i teie matahiti i mua.”+

22 I muri iho i to te Atua paraparauraa e o Aberahama, vaiiho maira oia ia ˈna. 23 Rave ihora Aberahama ia Isemaela ta ˈna tamaiti, e pauroa te tamarii tamaroa tei fanauhia i roto i to ˈna utuafare, e pauroa te tane ta ˈna i hoo mai i te moni, pauroa te tane i ǒ Aberahama, e peritome ihora oia i to ratou iri i mua i taua noa mahana ra, mai ta te Atua i parau ia ˈna.+ 24 E 99 matahiti to Aberahama i te peritomeraahia+ to ˈna iri i mua. 25 E to Isemaela ta ˈna tamaiti, 13 ïa matahiti, i te peritomeraahia+ to ˈna iri i mua. 26 I taua noa mahana ra te peritomeraahia Aberahama e ta ˈna atoa tamaiti o Isemaela. 27 Pauroa te tane i ǒ Aberahama, te tamarii tamaroa tei fanauhia i roto i to ˈna utuafare, e te tane tei hoohia mai i te moni i te hoê taata ê, ua peritome-atoa-hia e o ˈna.

18 I muri iho, fa maira Iehova+ na pihai iho i te mau tumu raau rarahi o Mamera+ ia Aberahama, a parahi ai oia i te tomoraa o te fare ie i te taime veavea roa ˈˈe o te mahana. 2 Hiˈo ihora oia e ite atura e toru tane e tia ra i mua ˈtu ia ˈna.+ Horo ihora oia mai te tomoraa o te fare ie e farerei ia ratou, e tipapa ihora i raro i te repo. 3 Parau atura oia: “Iehova, mai te peu e ua fariihia vau e oe, a faaea rii mai na i ǒ to tavini. 4 Ia afaihia mai na maa pape ia horoihia to outou avae,+ e a tarava i raro aˈe i te tumu raau. 5 I te mea ua haere mai outou i ǒ nei i to outou tavini, e tii au i te tahi tâpû faraoa ia itoito mai outou.* Ia oti e nehenehe outou e haere.” Na ô maira ratou: “Na reira ïa. E nehenehe oe e rave mai ta oe i parau.”

6 Haere ru ihora ïa Aberahama i te fare ie ia Sara e na ô atura: “Haaviti! A rave e toru faito* faraoa ota oro-maitai-hia, a ôi i te faraoa, e a tunu atu.” 7 I muri iho, horo atura Aberahama i te nǎnǎ puaatoro e maiti ihora i te hoê fanauˈa puaatoro oni maitai. Horoa ˈtura oia i te animara i te tavini, tei ru i te faaineine atu. 8 Rave ihora oia i te pata e te û e te iˈo puaatoro ta ˈna i faaineine e tuu ihora i te maa i mua ia ratou. Tia noa ihora oia i pihai iho ia ratou i raro aˈe i te tumu raau a tamaa noa ˈi ratou.+

9 Parau maira ratou ia ˈna: “Teihea to vahine faaipoipo o Sara?”+ Pahono atura oia: “To ǒ nei i roto i te fare ie.” 10 Parau maira ïa hoê o ratou: “E hoˈi mai iho â vau ia oe i teie matahiti i mua i teie taime, e inaha, e fanau to vahine faaipoipo o Sara i te hoê tamaiti.”+ Te faaroo noa mai ra Sara i te tomoraa o te fare ie, to muri mai hoi i te tane e paraparau ra ia Aberahama. 11 Ua ruau Aberahama raua Sara, ua ruhiruhia roa.+ Ua mairi roa to Sara matahiti no te fanau i te tamarii.*+ 12 Ata ihora Sara i roto ia ˈna, a na ô ai: “Ua ruau hoi au e to ˈu fatu atoa, e ite iho â anei au i taua oaoa ra?”+ 13 Na ô maira Iehova ia Aberahama: “No te aha Sara i ata ˈi e i parau ai: ‘E fanau iho â anei au noa ˈtu ua ruau vau?’ 14 Te vai ra anei te tahi mea e ore e tia ia Iehova?+ E hoˈi mai au ia oe i teie matahiti i mua i teie taime faataahia, e e fanau Sara i te hoê tamaiti.” 15 Tera râ, parau atura Sara: “Aita! Aita vau i ata!,” te mǎtaˈu ra hoi oia. Na ô maira oia: “Oia! Ua ata oe.”

16 I to te mau tane tiaraa no te haere e to ratou hiˈoraa i raro ia Sodoma,+ te haere atoa ra Aberahama no te apee ia ratou. 17 Parau maira Iehova: “E huna noa anei au ia Aberahama i ta ˈu e fatata i te rave?+ 18 E riro mau hoi Aberahama ei nunaa rahi e te puai, e e haamaitaihia te mau nunaa atoa o te fenua* na roto ia ˈna.+ 19 Ua matau maitai hoi au ia ˈna e e faaue iho â oia i ta ˈna mau tamarii e to ˈna utuafare i muri mai ia ˈna ia haapao i to Iehova hinaaro ma te rave i te mea afaro e te mea tia,+ ia faatupu Iehova i ta ˈna i fafau no nia ia Aberahama.”

20 Parau maira Iehova: “Mea uˈana mau â te reo faahapa i to Sodoma e Gomora,+ e mea ino roa ta ratou hara.+ 21 E pou vau e hiˈo e mea tano anei te reo faahapa tei tae roa mai ia ˈu ra e mea ino mau â anei ta ratou mau ohipa. E hinaaro vau e ite.”+

22 Reva ˈtura na tane mai reira mai e haere atura i Sodoma, ua faaea mai râ Iehova+ ia Aberahama ra. 23 Tapiri atura Aberahama e na ô atura: “E haamou iho â anei oe i te taata parau-tia e te taata ino?+ 24 Peneiaˈe e 50 taata parau-tia to roto i te oire. E haamou atoa anei oe ia ratou, a ore atu ai e faaore i te hapa a to te oire no na 50 taata parau-tia i roto? 25 E ore roa e tia ia oe ia na reira, e haapohe atoa i te taata parau-tia e te taata ino, a hoê â ˈtu ai hopea to te taata parau-tia e te taata ino!+ E ore roa e tia ia oe ia na reira.+ E ore anei te Haava o te fenua taatoa e rave i te mea tia?”+ 26 Parau maira Iehova: “Ia itea mai ia ˈu i Sodoma e 50 taata parau-tia i roto i te oire, e faaore au i te hapa a to te oire taatoa no ratou.” 27 Tera râ, na ô faahou atura Aberahama: “A faaroo mai na, e repo e e rehu noa vau, e teie au e paraparau nei ia Iehova. 28 Peneiaˈe i roto i na 50 taata parau-tia, aita faahou e pae. E haamou anei oe i te oire taatoa no tera e pae?” Parau maira oia: “E ore au e haamou i te oire ia itea mai ia ˈu i ǒ e 45.”+

29 Tera râ, paraparau faahou atura oia ia ˈna e na ô atura: “Peneiaˈe e 40 te itehia mai i ǒ.” Pahono maira oia: “E ore au e na reira no na 40.” 30 Tera râ, parau faahou atura oia: “Iehova, eiaha na oe e riri mai ia ˈu,+ a vaiiho na râ ia ˈu ia paraparau â: Peneiaˈe e 30 noa te itehia mai i ǒ.” Pahono maira oia: “E ore au e na reira ia itea mai ia ˈu e 30 i ǒ.” 31 Tera râ, parau faahou atura oia: “A faaroo mai na, teie au e paraparau nei ia Iehova: Peneiaˈe e 20 noa te itehia mai i ǒ.” Pahono maira oia: “E ore au e haamou i te oire no na 20.” 32 I te pae hopea, parau atura oia: “Iehova, eiaha na oe e riri mai ia ˈu, a vaiiho na râ ia ˈu ia paraparau â: Peneiaˈe hoê ahuru noa te itehia mai i ǒ.” Pahono maira oia: “E ore au e haamou i te oire no na hoê ahuru.” 33 I muri iho i to Iehova paraparauraa ia Aberahama, vaiiho maira oia ia ˈna+ e hoˈi atura Aberahama i ǒ ˈna.

19 Tae atura na piti melahi i Sodoma i te ahiahi, e te parahi ra Lota i te uputa o Sodoma. I to Lota iteraa mai ia raua, tia aˈera oia i nia no te farerei ia raua e tipapa ihora i raro i te fenua.+ 2 E parau maira oia: “To ˈu na fatu, a haere mai na i te fare o to orua tavini e taoto ai i teie po e ia horoihia to orua avae. E nehenehe orua e tia oioi i nia a haere atu ai i to orua tere.” Na ô atura raua: “Eita, e taoto mâua i te mahora o te oire.” 3 No to ˈna râ onoono rahi ia raua, haere atura raua na muri ia ˈna i to ˈna fare. Faaineine ihora oia e rave rahi maa na raua, tunu ihora i te faraoa hopue ore, e tamaa ˈtura raua.

4 Aita â raua i tarava ˈtura no te taoto, haaati aˈera pauroa te tane o te oire o Sodoma mai te tamaroa e tae roa i te ruhiruhia, i te fare mai te hoê nahoa huehue. 5 E pii noa maira ratou ia Lota e parau maira: “Teihea na tane tei haere mai i ǒ oe i teie po? A tuu mai ia raua i rapaeau ia matou ra ia taoto matou ia raua.”+

6 Haere atura Lota i rapaeau ia ratou ra i te uputa, e tapiri ihora i te opani. 7 Na ô atura oia: “To ˈu mau taeae, eiaha na e rave i te ohipa ino. 8 Inaha e piti tamahine ta ˈu aita i taoto aˈenei i te hoê tane. A vaiiho na ia ˈu ia aratai mai ia raua i rapaeau ia outou ra, a rave atu ai outou ia raua mai ta outou e hinaaro. Eiaha râ e hauti i teie na tane, ua haere mai hoi raua i raro aˈe i te tamaru* o to ˈu fare.”+ 9 Parau maira ratou: “Faaatea!” e parau faahou maira: “Ua haere mai teie taata ê e ora i ǒ nei, e na ˈna ïa e haava mai ia tatou! I teie nei mea ino roa ˈtu â ta matou e rave ia oe ia raua.” E tapiri roa maira ratou ia Lota no te vavahi i te opani. 10 Toro atura na tane i to raua rima e huti maira ia Lota ia raua ra i roto i te fare, e tapiri aˈera i te opani. 11 Tera râ, haamatapo aˈera raua i te mau tane e tia ra i te uputa o te fare, mai te tamarii e tae noa ˈtu i te ruhiruhia, a rohirohi atu ai ratou i te imiraa i te uputa.

12 Parau maira na tane ia Lota: “E taata faahou anei to oe i ǒ nei? E hunoa, to mau tamaiti, to mau tamahine, e to mau taata atoa i roto i te oire, a aratai ia ratou i rapae i teie vahi! 13 E haamou hoi mâua i teie vahi, no te mea ua rahi roa* mau â te reo faahapa i to te oire i mua ia Iehova,+ no reira Iehova i tono mai ai ia mâua ia haamou i te oire.” 14 Haere atura Lota i rapae, e paraparau atura i ta ˈna na hunoa o te faaipoipo i ta ˈna na tamahine, e te parau noa ra oia: “A tia! A haere i rapae i teie vahi, no te mea e haamou Iehova i te oire!” No ta ˈna râ na hunoa, e au ra te hauti ra o ˈna.+

15 A haamata ˈi i te marama, parau onoono maira na melahi ia Lota: “A tia! A rave i to vahine faaipoipo e to na tamahine nei ia oe ra, ia ore hoi outou ia haamou-atoa-hia e to te oire no ta ratou hara!”+ 16 Te faataere noa ra oia, e no to Iehova aumihi ia ˈna,+ haru maira na tane i to ˈna rima, e te rima o ta ˈna vahine faaipoipo e te rima o ta ˈna na tamahine, e aratai aˈera ia ratou i rapaeau i te oire.+ 17 I to raua iho â aratairaa ia ratou i rapaeau, parau maira hoê o raua: “A horo ia ora outou! Eiaha e hiˈo i muri+ e eiaha e faaea i te tahi noa ˈˈe vahi o te tuhaa fenua taatoa!+ A horo i te tuhaa fenua mouˈa ia ore outou ia haamouhia!”

18 Parau atura Lota ia raua: “Eiaha na i ǒ, Iehova! 19 Ua fariihia to tavini e oe e te hamani maitai rahi nei oe* ia ˈu ma te vaiiho ia ˈu ia ora,+ eita râ e haere ia ˈu ia horo i te tuhaa fenua mouˈa, no te mea te mǎtaˈu nei au e roohia vau i te ati, a pohe atu ai.+ 20 Teie oire i pihai iho mai, e nehenehe au e horo i ǒ. E vahi nainai noa. E nehenehe anei au e horo i ǒ? E vahi nainai noa. E ora ïa vau.” 21 Na ô atura oia: “Na reira ïa, e farii atoa vau i ta oe aniraa+ ma te ore e haamou i te oire ta oe e parau ra.+ 22 Haaviti! A horo i ǒ, no te mea aita e mea ta ˈu e nehenehe e rave hou oe a tae ai i ǒ!”+ No reira mairi ihora oia i taua oire ra i te iˈoa o Zoara.*+

23 Ua hiti te mahana i to Lota taeraa i Zoara. 24 Haamairi maira Iehova i te ofai ura e te auahi i nia ia Sodoma e Gomora, no ǒ mai te reira ia Iehova ra, no te raˈi mai.+ 25 Haamou ihora oia i teie na oire, oia hoi te tuhaa fenua taatoa, tae noa ˈtu te huiraatira taatoa o na oire e te mau raau tupu o te fenua.+ 26 Area ta Lota vahine faaipoipo, i muri mai ia ˈna, hiˈo ihora ïa oia i muri, e riro maira ei pou miti papaa.+

27 Tia aˈera Aberahama i nia i te poipoi roa e haere atura i te vahi i tia ˈi oia i mua ia Iehova.+ 28 I to ˈna hiˈoraa ˈtu i raro ia Sodoma e Gomora e te tuhaa fenua taatoa, ite ihora oia i te hoê mea riaria mau. E au auahi meumeu te pee ra i nia mai taua vahi ra mai te au auahi meumeu o te umu!+ 29 I to te Atua haamouraa i na oire o te tuhaa fenua, ua haamanaˈo oia ia Aberahama ma te faahaere ia Lota i rapae i na oire ta ˈna i haamou, na oire i ora ˈi Lota.+

30 I muri aˈe, haere atura Lota e ta ˈna na piti tamahine mai Zoara ˈtu e ora i te tuhaa fenua mouˈa,+ no te mea te taiâ ra oia i te ora i Zoara.+ Ora ihora oia i roto i te hoê ana e ta ˈna na piti tamahine. 31 Parau atura te matahiapo i te teina: “Ua ruhiruhia to tâua metua tane, e aita e tane i teie fenua no te taoto ia tâua mai tei matauhia e to te fenua taatoa. 32 Mai, faainu anaˈe i to tâua metua tane i te uaina, e taoto anaˈe ia ˈna, a huaaihia ˈtu ai tâua i to tâua metua tane.”

33 I taua po ra, faainu noa ˈtura raua i to raua metua tane i te uaina. Tomo ihora te matahiapo e taoto ihora i to ˈna metua tane, aita râ oia i ite noa ˈˈe i te taravaraa mai te matahiapo e to ˈna tiaraa i nia. 34 Ananahi aˈe, parau atura te matahiapo i te teina: “Ua taoto vau i to ˈu metua tane inapo ra. E faainu anaˈe ia ˈna i te uaina i teie po atoa. Ia oti e tomo oe e e taoto oe ia ˈna, e ia huaaihia tâua i to tâua metua tane.” 35 I taua po atoa ra, faainu noa ˈtura raua i to raua metua tane i te uaina. Haere ihora te teina e taoto ihora ia ˈna, aita râ oia i ite noa ˈˈe i te taravaraa mai te teina e to ˈna tiaraa i nia. 36 Hapû aˈera na piti tamahine a Lota i to raua metua tane. 37 Fanau maira te matahiapo i te hoê tamaiti e mairi ihora ia ˈna i te iˈoa o Moabi.+ O ˈna te metua o te ati Moabi i teie mahana.+ 38 Fanau atoa maira te teina i te hoê tamaiti e mairi ihora ia ˈna i te iˈoa o Beneami. O ˈna te metua o te ati Amona+ i teie mahana.

20 Haere ihora Aberahama mai reira mai e puhapa+ i te fenua o te Negeba, e ora ihora i ropu ia Kadesa+ e Sura.+ A parahi ai oia* i Gerara,+ 2 e parau noa Aberahama no Sara ta ˈna vahine faaipoipo: “E tuahine o ˈna no ˈu.”+ Tono ihora ïa Abimeleka arii no Gerara i ta ˈna mau tavini e tii ia Sara e aratai maira ratou ia ˈna.+ 3 I muri iho, haere maira te Atua i te po ia Abimeleka na roto i te hoê moemoeâ e parau maira: “Inaha e pohe oe no te vahine ta oe i rave,+ mea faaipoipo hoi oia e e vahine oia na te tahi atu tane.”+ 4 Tera râ, aita Abimeleka i tapiri noa ˈtu ia ˈna.* Na ô atura oia: “Iehova, e haapohe mau â anei oe i te hoê nunaa hara ore?* 5 Aita anei oia i parau mai ia ˈu: ‘E tuahine o ˈna no ˈu,’ e aita anei o ˈna atoa i parau: ‘E taeae o ˈna no ˈu’? Ua na reira vau ma te aau tia e te rima hara ore.” 6 Parau maira te Atua mau na roto i te moemoeâ: “Ua ite au e ua na reira oe ma te aau tia, tapea ihora ïa vau ia oe eiaha e hara ia ˈu. No reira vau i ore ai i vaiiho ia oe ia hauti ia ˈna. 7 Teie nei, a faahoˈi i te vahine faaipoipo a taua tane ra, e peropheta hoi oia,+ e na ˈna e taparuparu no oe,+ a tamau noa ˈtu ai oe i te ora. Ia ore râ oe e faahoˈi ia ˈna, ia ite mai oe, e pohe mau â oe, oe e to oe mau taata atoa.”

8 Tia aˈera Abimeleka i nia i te poipoi roa e titau ihora i ta ˈna mau tavini atoa e faatia ˈtura ia ratou i teie mau mea atoa, e riaria roa ihora ratou. 9 Titau ihora Abimeleka ia Aberahama e na ô atura: “Eaha oe i na reira mai ai? Eaha te hara ta ˈu i rave ia oe i hopoi mai ai oe i nia ia ˈu e ta ˈu faatereraa arii i teie hara rahi? E ere mea tano ta oe i rave ia ˈu.” 10 Na ô faahou atura Abimeleka ia Aberahama: “Eaha ta oe mau opuaraa i to oe raveraa i teie ohipa?”+ 11 Parau maira Aberahama: “Ua manaˈo hoi au: ‘Papu roa, aita te mau taata o teie vahi e mǎtaˈu ra i te Atua, e e haapohe ratou ia ˈu no ta ˈu vahine faaipoipo.’+ 12 Hau atu â, e tuahine iho â o ˈna no ˈu, te tamahine a to ˈu metua tane e ere râ te tamahine a to ˈu metua vahine, e ua riro oia ei vahine faaipoipo na ˈu.+ 13 I to te Atua tonoraa ia ˈu mai te utuafare o to ˈu metua tane+ ia ratere na tera e tera vahi, ua parau vau ia ˈna: ‘Mai teie e faaite ai oe i te here taiva ore ia ˈu: Na te mau vahi atoa e haere ai tâua, a parau no ˈu: “E taeae o ˈna no ˈu.”’”+

14 Rave ihora Abimeleka e rave rahi mamoe e te puaatoro e te tavini tane e te tavini vahine e horoa ˈtura na Aberahama, e faahoˈi atura ia Sara ta ˈna vahine faaipoipo ia ˈna. 15 Parau atoa ˈtura Abimeleka: “Teie to ˈu fenua to mua ia oe. A parahi i te mau vahi atoa ta oe e hinaaro.” 16 E parau atura oia ia Sara: “E horoa vau 1 000 moni ario na to taeae.+ E tapao teie aita oe i hara* i mua i to mau taata atoa e te tahi atu mau taata atoa, e aita e tumu e faahapahia ˈi oe.” 17 Taparuparu aˈera Aberahama i te Atua mau, e faaora ihora te Atua i te maˈi o Abimeleka e ta ˈna vahine faaipoipo e ta ˈna mau tavini vahine, e fanau maira ratou i te tamarii, 18 ua rave hoi Iehova e ia ore te mau vahine atoa o te utuafare o Abimeleka ia fanau, no Sara ta Aberahama vahine faaipoipo.+

21 Haapao maira Iehova ia Sara mai ta ˈna i parau, e rave ihora Iehova no Sara i ta ˈna i fafau.+ 2 Hapû maira ïa Sara+ e fanau maira i te hoê tamaiti ia Aberahama i to ˈna ruhiruhiaraa i te taime faataahia ta te Atua i fafau ia ˈna.+ 3 Mairi ihora Aberahama i ta ˈna tamaiti fanau-apî-hia, ta Sara i fanau mai na ˈna, o Isaaka.+ 4 E peritome ihora Aberahama i ta ˈna tamaiti o Isaaka i te vaˈuraa o to ˈna mahana, mai ta te Atua i faaue ia ˈna.+ 5 I to Isaaka ta ˈna tamaiti fanauraahia mai, 100 matahiti to Aberahama. 6 Parau ihora Sara: “Ua faaata te Atua ia ˈu. Te taata atoa o te faaroo i te reira, e ata ïa e o vau.”* 7 E parau faahou ihora oia: “O vai te parau ia Aberahama: ‘E hii iho â Sara i te tamarii’? Ua fanau mai hoi au i te hoê tamaiti na ˈna i to ˈna ruhiruhiaraa.”

8 Paari maira te tamarii e aita ˈtura i amu faahou i te tîtî mama, e faaineine ihora Aberahama i te hoê tamaaraa rahi i te mahana i ore ai Isaaka i amu faahou i te tîtî mama. 9 Tera râ, ite noa ihora Sara i te tamaiti a Hagara+ no Aiphiti, ta ˈna i fanau mai ia Aberahama, e faaooo ra ia Isaaka.+ 10 Parau maira oia ia Aberahama: “A tiahi i teie tavini vahine e ta ˈna tamaiti, e ore hoi te tamaiti a teie tavini vahine e fatu atoa i te faufaa e ta ˈu tamaiti, o Isaaka!”+ 11 Tera râ, aita roa ˈtu Aberahama i au i ta ˈna i parau no ta ˈna tamaiti.+ 12 Parau maira te Atua ia Aberahama: “Eiaha oe e au ore i ta Sara e parau ra ia oe no te tamaroa e no ta oe tavini vahine. A faaroo ia ˈna,* e na roto mai hoi ia Isaaka te parauhia to huaai.+ 13 No te tamaiti a te tavini vahine,+ e faariro atoa vau ia ˈna ei nunaa,+ no te mea e huaai oia no oe.”

14 Tia aˈera Aberahama i nia i te poipoi roa, e rave ihora i te faraoa e te hoê pute pape iri animara e horoa ˈtura ia Hagara. Tuu ihora oia i te reira i nia i to Hagara tapono e vaiiho atura ia ˈna e te tamaroa ia haere.+ Reva ˈtura oia e overe atura na te medebara o Beere-seba.+ 15 I te pae hopea, pau aˈera te pape i roto i te pute iri animara, e vaiiho ihora oia i te tamaroa i raro aˈe hoê o te mau tumu raau haehaa. 16 Haere noa ˈtura oia e parahi ihora o ˈna anaˈe i te atearaa ia teˈahia te hoê teˈa, no te mea ua parau oia: “Eita vau e hinaaro e hiˈo i te tamaroa ia pohe.” Parahi ihora ïa oia i mua ˈtu â e haamata ˈtura i te auê e te taˈi.

17 Faaroo ihora te Atua i te reo o te tamaroa,+ e pii maira te melahi a te Atua ia Hagara mai te raˈi mai, e na ô maira:+ “Eaha teie, Hagara? Eiaha oe e mǎtaˈu, ua faaroo hoi te Atua i te reo o te tamaroa i te vahi to reira oia. 18 A tia i nia, a haere a faatia mai i te tamaroa e a tapea ia ˈna i to rima, e faariro hoi au ia ˈna ei nunaa rahi.”+ 19 Faaaraara ihora te Atua i to ˈna mata e ite atura oia i te hoê apoo pape, e haere atura e faaî ihora i te pute iri animara i te pape e horoa ˈtura i te tamaroa ia inu oia. 20 E tei te tamaroa ra te Atua+ a paari mai ai oia. Ua ora oia i roto i te medebara e ua riro mai ei taata teˈa. 21 Ora noa ihora oia i roto i te medebara o Parana,+ e rave ihora to ˈna metua vahine i te hoê vahine faaipoipo na ˈna no te fenua o Aiphiti.

22 I taua taime ra, parau maira Abimeleka e Phikola te raatira o ta ˈna nuu ia Aberahama: “Tei ia oe te Atua i roto i te mau mea atoa ta oe e rave nei.+ 23 I teie nei, a horeo mai i ǒ nei i te Atua e ore roa oe e haavare ia ˈu e i ta ˈu mau tamaiti e te mau tamaiti a ta ˈu mau tamaiti, e e haa oe i nia ia ˈu e to te fenua i ora ˈi oe ma te here taiva ore, ta ˈu atoa i faaite ia oe.”+ 24 Na ô atura Aberahama: “E horeo vau.”

25 Tera râ, amuamu ihora Aberahama ia Abimeleka no te apoo pape ta te mau tavini a Abimeleka i haru.+ 26 Pahono maira Abimeleka: “Aita vau i ite o vai ma tei na reira. Aita oe i faaite mai ia ˈu, e aita vau i faaroo noa ˈˈe i te reira tae roa mai i teie mahana.” 27 Rave ihora Aberahama i te mamoe e te puaatoro e horoa ˈtura na Abimeleka, e faaau aˈera raua i te hoê faufaa. 28 I to Aberahama faataaraa e hitu fanauˈa mamoe ufa no roto i te nǎnǎ, 29 parau maira Abimeleka ia Aberahama: “No te aha oe i faataa ˈi i teie na fanauˈa mamoe ufa e hitu i ǒ nei?” 30 Na ô atura Aberahama: “Mea titauhia ia farii oe i na fanauˈa mamoe ufa e hitu i to ˈu rima ei haapapuraa e na ˈu i ô i teie apoo pape.” 31 No reira oia i topa ˈi i taua vahi ra i te iˈoa o Beere-seba,*+ no te mea i reira to raua horeoraa. 32 Faaau aˈera raua i te hoê faufaa+ i Beere-seba, i muri iho tia aˈera Abimeleka e Phikola te raatira o ta ˈna nuu, e hoˈi aˈera raua i te fenua o te mau Philiseti.+ 33 I muri iho i te reira, tanu ihora oia i te hoê tumu raau* i Beere-seba, e i reira tiaoro ihora oia i te iˈoa o Iehova,+ te Atua mure ore.+ 34 Faaea ihora Aberahama* i te fenua o te mau Philiseti no te hoê tau roa.*+

22 I muri aˈe i te reira, tamata ihora te Atua mau ia Aberahama,+ e parau maira: “Aberahama!” Pahono atura oia: “Teie au!” 2 Parau maira oia: “A rave na i to tamaiti, to tamaiti otahi mea here roa na oe,+ o Isaaka,+ e a haere i te fenua o Moria+ e a pûpû ia ˈna i reira ei tusia taauahi i nia hoê o te mau mouˈa ta ˈu e faaite ia oe.”

3 Tia aˈera ïa Aberahama i nia i te poipoi roa e faaineine ihora i ta ˈna asini e rave ihora e piti o ta ˈna mau tavini na muri ia ˈna e ta ˈna tamaiti o Isaaka. Vahi ihora oia i te vahie no te tusia taauahi, e reva ˈtura i te vahi ta te Atua mau i faaite ia ˈna. 4 I te toru o te mahana, hiˈo aˈera Aberahama e ite ihora i taua vahi ra i te atea ê. 5 Parau atura Aberahama i ta ˈna na tavini: “E faaea mai orua i ǒ nei e te asini, e haere râ mâua te tamaroa i ǒ e haamori e e hoˈi mai mâua ia orua ra.”

6 Rave ihora Aberahama i te vahie no te tusia taauahi e tuu atura i nia i ta ˈna tamaiti o Isaaka. Rave ihora oia i te auahi e te tipi,* e haere noa ˈtura raua. 7 Na ô atura Isaaka i to ˈna metua tane o Aberahama: “To ˈu metua!” Pahono maira oia: “E, ta ˈu tamaiti!” Na ô faahou atura oia: “Teie te auahi e te vahie, teihea râ te mamoe no te tusia taauahi?” 8 Parau maira Aberahama: “Na te Atua iho e horoa mai i te mamoe no te tusia taauahi,+ ta ˈu tamaiti.” E haere noa ˈtura raua.

9 Tae atura raua i te vahi ta te Atua mau i faaite ia ˈna, hamani ihora Aberahama i te hoê fata i reira, e apǎpǎ ihora i te vahie i nia iho. Taamu ihora oia i te rima e te avae o ta ˈna tamaiti o Isaaka, e tuu atura ia ˈna i nia i te fata, na nia iho i te vahie.+ 10 Toro ihora Aberahama i to ˈna rima e rave maira i te tipi* no te haapohe i ta ˈna tamaiti.+ 11 Tera râ, pii maira te melahi a Iehova ia ˈna mai te raˈi mai a na ô ai: “Aberahama, Aberahama!” Pahono atura oia: “Teie au!” 12 Na ô maira oia: “Eiaha e haapohe i te tamaroa, e eiaha roa ˈtu e hauti ia ˈna, ua ite atura vau i teie nei e te mǎtaˈu ra oe i te Atua, no te mea aita oe i tapea ˈtu i to tamaiti, to tamaiti otahi.”+ 13 Hiˈo aˈera Aberahama, e mamoe oni to mua noa ˈtu ia ˈna ua mau to ˈna na tara i roto i te hoê tumu raau haehaa. Tii ihora Aberahama i te mamoe oni e pûpû atura ei tusia taauahi ei monoraa i ta ˈna tamaiti. 14 Mairi ihora Aberahama i taua vahi ra i te iˈoa o Iehova-irae.* No reira i parau-noa-hia ˈi i teie mahana: “I nia i te mouˈa o Iehova, e horoa mai oia i tei hinaaro-mau-hia.”+

15 E pii maira te melahi a Iehova ia Aberahama no te piti o te taime mai te raˈi mai, 16 a na ô ai: “‘Te horeo nei au ia ˈu iho nei,’ ta Iehova ïa e parau ra,+ ‘no te mea ua na reira oe e aita oe i tapea ˈtu i to tamaiti, to tamaiti otahi,+ 17 e haamaitai iho â vau ia oe e e faarahi mau â vau i to huaai mai te mau fetia o te raˈi e mai te one tahatai,+ e e fatu to huaai i te mau oire o to ratou mau enemi.+ 18 E na roto i to huaai+ e fanaˈo ai te mau nunaa atoa o te fenua i te hoê haamaitairaa no ratou iho, no te mea ua faaroo oe i to ˈu reo.’”+

19 I muri iho i te reira, hoˈi maira Aberahama i ta ˈna na tavini ra, e hoˈi aˈera ratou paatoa i Beere-seba,+ e ora noa ˈtura Aberahama i Beere-seba.

20 I muri aˈe i te reira, parauhia maira Aberahama: “Inaha ua fanau atoa Mileka i te tamaiti na Nahora to oe taeae:+ 21 Ûza ta ˈna matahiapo, Buza to ˈna teina, Kemuela te metua tane o Arama, 22 Keseda, Hazo, Piledasa, Idalapha e Betuela.”+ 23 Fanau maira ta Betuela o Rebeka.+ Ua fanau Mileka i teie na vaˈu tamaiti na Nahora te taeae o Aberahama. 24 Fanau atoa maira ta ˈna vahine faaipoipo tavini,* o Reuma te iˈoa, i te tamaiti: Teba, Gaama, Taasa e Maaka.

23 Ua ora Sara 127 matahiti. Tera ïa te mau matahiti o te oraraa o Sara.+ 2 Pohe ihora Sara i Kiriata-araba,+ oia hoi Heberona,+ i te fenua o Kanaana,+ e oto ihora Aberahama e taˈi ihora ia Sara. 3 Tia aˈera Aberahama i nia mai mua ˈtu i ta ˈna vahine faaipoipo tei pohe e parau atura i te mau tamaiti a Heta:+ 4 “E taata ê au e e purutia i rotopu ia outou.+ A horoa mai na i te tahi fenua no ˈu ei vahi hunaraa i rotopu ia outou, a nehenehe atu ai au e huna i ta ˈu vahine faaipoipo.” 5 Pahono maira te mau tamaiti a Heta ia Aberahama: 6 “A faaroo mai, e to matou fatu. E raatira oe no te Atua* i rotopu ia matou.+ E nehenehe oe e huna i to vahine faaipoipo i te vahi maitai roa ˈˈe o ta matou mau vahi hunaraa. Aita hoê aˈe o matou e pipiri i to ˈna vahi hunaraa ia ore oe e huna i to vahine faaipoipo.”

7 Tipapa ihora Aberahama i mua i te taata o tera fenua, i mua i te mau tamaiti a Heta,+ 8 e parau atura: “Ia farii outou ia huna vau i ta ˈu vahine faaipoipo, a faaroo mai na ïa e a ani ia Epherona te tamaiti a Zohara 9 ia hoo mai ia ˈu i ta ˈna ana o Makapela, tei te hiti o to ˈna fenua. Ia hoo mai oia ia ˈu i mua i to outou aro no te tino moni ario+ o te reira, a riro mai ai ia ˈu te tahi fenua ei vahi hunaraa.”+

10 Te parahi noa ra Epherona i rotopu i te mau tamaiti a Heta. Pahono maira Epherona te ati Heta ia Aberahama i mua i te mau tamaiti a Heta, e i mua i te feia atoa i tomo na te uputa o to ˈna oire,+ a na ô ai: 11 “Eiaha, to ˈu fatu! A faaroo mai. E horoa vau no oe i te fenua e te ana atoa i nia iho. I mua i te aro o te mau tamaiti a to ˈu nunaa, e horoa vau i te reira no oe. A huna i to vahine faaipoipo i reira.” 12 Tipapa ihora Aberahama i mua i te taata o tera fenua 13 e parau atura ia Epherona i mua ia ratou: “A faaroo mai, ia tia ia oe! E horoa ˈtu vau i te tino moni ario no te fenua. A rave na, ia nehenehe hoi au e huna i ta ˈu vahine faaipoipo i reira.”

14 Pahono maira Epherona ia Aberahama: 15 “To ˈu fatu, a faaroo mai. E 400 sekela* ario te tino moni o tera fenua, eaha râ hoi te reira ia tâua nei? A huna i to vahine faaipoipo i reira.” 16 Faaroo ihora Aberahama ia Epherona, e faito atura Aberahama na Epherona i te tino moni ario ta ˈna i faahiti i mua i te mau tamaiti a Heta, e 400 sekela* ario ia au i te faito fariihia e te feia hoo taoˈa.+ 17 Te fenua o Epherona i Makapela i mua ia Mamera, oia hoi te fenua e te ana i nia iho e te mau tumu raau atoa i roto i te mau otia o taua fenua ra, riro atura 18 ei fenua no Aberahama ta ˈna i hoo mai i mua i te aro o te mau tamaiti a Heta, i mua i te feia e tomo ra na te uputa o to ˈna oire. 19 I muri iho i te reira, huna ihora Aberahama i ta ˈna vahine faaipoipo o Sara i roto i te ana o te fenua i Makapela i mua ia Mamera, oia hoi Heberona, i Kanaana. 20 No reira te fenua e te ana i nia iho, ua horoa ïa te mau tamaiti a Heta na Aberahama ei vahi hunaraa.+

24 Ua ruau Aberahama, ua ruhiruhia roa, e ua haamaitai rahi Iehova ia ˈna.+ 2 Parau atura Aberahama i ta ˈna tavini paari roa ˈˈe o to ˈna utuafare, na ˈna e tiaau ra i ta ˈna mau faufaa atoa:+ “A tuu na i to rima i raro aˈe i to ˈu huha, 3 e a horeo i te ora o Iehova, te Atua o te raˈi e te Atua o te fenua, e ore oe e rave i te hoê vahine faaipoipo na ta ˈu tamaiti i rotopu i te mau tamahine a te ati Kanaana, i to ratou fenua e ora ˈi au.+ 4 E haere râ oe i to ˈu fenua e i ǒ to ˈu fetii+ e e rave oe i te hoê vahine faaipoipo na ta ˈu tamaiti, na Isaaka.”

5 Tera râ, na ô maira te tavini: “E ia ore noa ˈtu tera vahine e hinaaro e haere mai na muri ia ˈu i teie fenua? E afai anei ïa vau i to tamaiti i te fenua no reira mai oe?”+ 6 Parau atura Aberahama: “Eiaha roa oe e afai i ta ˈu tamaiti i ǒ.+ 7 Iehova te Atua o te raˈi, tei rave mai ia ˈu mai te utuafare o to ˈu metua tane e mai te fenua o to ˈu mau fetii,+ e tei paraparau mai ia ˈu e tei horeo mai:+ ‘I to huaai+ e horoa ˈi au i teie fenua,’+ na ˈna ïa e tono mai i ta ˈna melahi na mua ia oe,+ e e rave iho â oe i te hoê vahine faaipoipo na ta ˈu tamaiti no reira.+ 8 Ia ore noa ˈtu râ te vahine e hinaaro e haere mai na muri ia oe, e matara oe i teie horeo. Eiaha râ oe e afai i ta ˈu tamaiti i ǒ.” 9 Tuu ihora te tavini i to ˈna rima i raro aˈe i te huha o Aberahama to ˈna fatu e horeo atura ia ˈna no nia i teie ohipa.+

10 Rave ihora ïa te tavini hoê ahuru o te mau kamela a to ˈna fatu e reva ˈtura ma te afai atoa i te mau taoˈa horoa e rave rau a to ˈna fatu. Haere atura oia i to ˈna tere i Mesopotamia, i te oire o Nahora. 11 Faatuturi ihora oia i te mau kamela i raro i pihai iho i te hoê apoo pape i rapae i te oire. E ahiahi, te taime e haere mai ai te mau vahine e huti i te pape. 12 Parau atura oia: “Iehova te Atua o to ˈu fatu o Aberahama, a haamanuïa na i to ˈu tere i teie mahana, e a faaite na i to here taiva ore i to ˈu fatu o Aberahama. 13 Teie au e tia noa nei i te hoê pape pihaa, e te haere mai ra te mau tamahine a to te oire e huti i te pape. 14 Teie hoi te tupu, te vahine apî ta ˈu e parau: ‘A haapou mai na i ta oe farii pape ia nehenehe au e inu,’ e o te pahono mai: ‘A inu, e e faainu atoa vau i ta oe mau kamela,’ o ˈna ïa ta oe e maiti no to tavini o Isaaka, e mea na reira vau e ite ai e ua faaite oe i to here taiva ore i to ˈu fatu.”

15 Aita â i oti atura ta ˈna paraparauraa, haere maira Rebeka, te tamahine a Betuela+ te tamaiti a Mileka+ te vahine faaipoipo a Nahora,+ te taeae o Aberahama, e ta ˈna farii pape i nia i to ˈna tapono. 16 Mea haviti roa taua vahine apî ra. Aita hoê tane i taoto aˈenei ia ˈna. Pou atura oia i te pape pihaa, faaî ihora i ta ˈna farii e haere maira i nia. 17 I reira iho, horo atura te tavini e farerei ia ˈna e parau atura: “A horoa mai na maa pape o ta oe farii.” 18 Na ô maira oia: “A inu, to ˈu fatu.” Haapou oioi maira oia i te farii pape ta ˈna e amo ra e horoa maira maa pape na ˈna. 19 I muri iho i to ˈna faainuraa ia ˈna, parau maira oia: “E huti atoa vau i te pape no ta oe mau kamela e ia mâha to ratou poihâ.” 20 Manii haaviti ihora oia i te pape o ta ˈna farii i roto i te farii pape a te animara, horohoro atura i te apoo pape e huti i te pape, e huti noa maira i te pape na ta ˈna mau kamela atoa. 21 I taua taime ra, te hiˈo noa ra taua taata ra ia ˈna ma te mamû e te maere, a uiui noa ˈi e ua haamanuïa anei Iehova i to ˈna tere aore ra aita.

22 I te mâharaa te poihâ o te mau kamela, horoa ihora taua taata ra na ˈna i te hoê tapea ihu auro afa sekela* te teiaha, e piti tapea auro no te rima hoê ahuru sekela* te teiaha, 23 e parau atura: “A faaite mai na, e tamahine oe na vai? E piha anei tei te fare o to metua tane ia taoto matou i teie po?” 24 Na ô maira oia: “E tamahine au na Betuela+ te tamaiti a Mileka, ta ˈna i fanau na Nahora.”+ 25 E na ô atoa maira oia: “E maa atoa ta matou na te animara e te hoê vahi no te taoto.” 26 Piˈo ihora taua taata ra i raro e tipapa ihora i mua ia Iehova 27 e parau atura: “Ia aruehia Iehova, te Atua o to ˈu fatu o Aberahama, aita hoi oia i faaea i te faaite i to ˈna here taiva ore e to ˈna haapao maitai i to ˈu fatu. Ua aratai Iehova ia ˈu i te utuafare o te mau taeae o to ˈu fatu.”

28 E horo atura te vahine apî e faatia i teie mau mea atoa i to ˈna metua vahine. 29 E taeae to Rebeka o Labana+ te iˈoa. Horo maira ïa Labana i taua taata ra tei rapae i te oire i te pape pihaa ra. 30 I to ˈna iteraa i te tapea ihu e na tapea i nia i te rima o to ˈna tuahine, e to ˈna faarooraa i te mau parau a to ˈna tuahine o Rebeka: “Mea na ô to taua taata ra paraparauraa mai ia ˈu,” haere atura oia e farerei i taua taata ra, e tia noa ra i ǒ i pihai iho i te mau kamela i te pape pihaa ra. 31 I reira iho, parau atura oia: “A haere mai, oe tei haamaitaihia e Iehova. Eaha oe e tia noa ˈi i rapae i ǒ nei? Ua faanahohia te fare e te hoê vahi no te mau kamela.” 32 Haere maira taua taata ra i te fare, e huri ihora oia* i te mau taihaa i raro mai nia mai i te mau kamela e horoa ˈtura i te maa na te mau kamela e te pape no te horoi i to ˈna avae e te avae o te mau tane tei na muri mai ia ˈna. 33 Teie râ, i te tuuraahia mai te maa i mua ia ˈna, parau maira oia: “Eita vau e tamaa hou a faaite atu ai au i to ˈu tere.” Na ô atura ïa Labana: “A faaite mai!”

34 Parau maira oia: “E tavini au na Aberahama.+ 35 E ua haamaitai rahi roa Iehova i to ˈu fatu, e ua faarahi roa oia i ta ˈna faufaa ma te horoa na ˈna e rave rahi mamoe e puaatoro, ario e auro, tavini tane e tavini vahine, e kamela e asini.+ 36 Hau atu â, ua fanau mai Sara te vahine faaipoipo a to ˈu fatu i to ˈna ruhiruhiaraa i te hoê tamaiti na to ˈu fatu,+ e e horoa to ˈu fatu na ta ˈna tamaiti pauroa ta ˈna faufaa.+ 37 Ua faahoreo ïa to ˈu fatu ia ˈu: ‘Eiaha oe e rave i te hoê vahine faaipoipo na ta ˈu tamaiti i rotopu i te mau tamahine a te ati Kanaana, i to ratou fenua e ora ˈi au.+ 38 E haere râ oe i te utuafare o to ˈu metua tane e i ǒ to ˈu fetii,+ e e rave oe i te hoê vahine faaipoipo na ta ˈu tamaiti.’+ 39 Tera râ, na ô atura vau i to ˈu fatu: ‘E ia ore noa ˈtu tera vahine e hinaaro e haere mai na muri ia ˈu?’+ 40 Parau maira oia: ‘Na Iehova, ta ˈu e tavini nei,+ e tono mai i ta ˈna melahi+ ia oe ra e e haamanuïa mau â i to oe tere, e e rave oe i te hoê vahine faaipoipo na ta ˈu tamaiti no roto mai i to ˈu fetii e no roto mai i te utuafare o to ˈu metua tane.+ 41 E matara oe i ta oe horeo ia ˈu ia haere oe i to ˈu fetii e ia ore ratou e horoa mai ia ˈna. Mea na reira oe e matara ˈi i ta oe horeo.’+

42 “I to ˈu taeraa i te pape pihaa i teie mahana, ua parau vau: ‘Iehova te Atua o to ˈu fatu o Aberahama, e haamanuïa oe i to ˈu tere, 43 teie au e tia noa nei i pihai iho i te hoê pape pihaa. Ia haere mai te hoê vahine apî+ e huti i te pape, e na ô vau: “A horoa mai na maa pape o ta oe farii,” 44 e e parau mai o ˈna: “A inu, e e huti atoa vau i te pape na ta oe mau kamela.” O taua vahine ra ïa ta Iehova i maiti no te tamaiti a to ˈu fatu.’+

45 “Aita â i oti atura to ˈu paraparauraa i roto i to ˈu aau, te haere mai ra Rebeka e ta ˈna farii pape i nia i to ˈna tapono, e pou atura oia i te pape pihaa e huti ihora i te pape. Parau atura vau ia ˈna: ‘A horoa mai na maa pape.’+ 46 Haapou oioi maira oia i ta ˈna farii mai nia mai i to ˈna tapono e na ô maira: ‘A inu,+ e e faainu atoa vau i ta oe mau kamela.’ Inu ihora vau, e faainu atoa ihora oia i te mau kamela. 47 I muri iho i te reira, ui atura vau ia ˈna: ‘E tamahine oe na vai?’ Pahono maira oia: ‘E tamahine na Betuela te tamaiti a Nahora, ta Mileka i fanau na ˈna.’ Tamau ihora ïa vau i te tapea i nia i to ˈna ihu e na tapea i nia i to ˈna rima.+ 48 E piˈo ihora vau i raro, tipapa ihora i mua ia Iehova e arue ihora ia Iehova te Atua o to ˈu fatu o Aberahama,+ tei aratai ia ˈu na te eˈa tia no te rave i te tamahine a te taeae o to ˈu fatu no ta ˈna tamaiti. 49 E i teie nei, a faaite mai na e hinaaro anei outou e faaite i te here taiva ore e te haapao maitai i to ˈu fatu. Aita anaˈe, a faaite atoa mai, ia ite hoi au eaha te rave.”*+

50 Pahono atura Labana e o Betuela: “No ǒ mai ia Iehova teie ohipa. Eita ta mâua e nehenehe e faaoti no te reira.* 51 Teie o Rebeka i mua ia oe. A rave ia ˈna e a haere, e ia riro oia ei vahine faaipoipo na te tamaiti a to fatu, mai ta Iehova i parau.” 52 I to te tavini a Aberahama faarooraa i ta raua mau parau, i reira iho tipapa ihora oia i raro i te repo i mua ia Iehova. 53 E rave maira te tavini i te mau taoˈa ario e auro e te ahu e horoa ˈtura na Rebeka, e horoa ˈtura i te mau taoˈa moni rahi na to ˈna taeae e na to ˈna metua vahine. 54 I muri iho i te reira, tamaa e inu aˈera oia e te mau tane tei na muri mai ia ˈna, e taoto atura ratou i taua po ra i reira.

I to ˈna tiaraa mai i nia i te poipoi, parau maira oia: “A tuu na ia ˈu ia hoˈi i to ˈu fatu ra.” 55 Na ô atura te taeae e te metua vahine o Rebeka: “A vaiiho mai na i te vahine apî ia matou nei hoê ahuru aˈe mahana. I reira ïa oia e nehenehe ai e haere.” 56 Tera râ, parau maira oia: “Eiaha na e faataere ia ˈu, i te mea ua haamanuïa Iehova i to ˈu tere. A tuu na ia ˈu, ia hoˈi au i to ˈu fatu ra.” 57 Na ô atura raua: “E pii anaˈe i te vahine apî e e ani anaˈe ia ˈna.” 58 Pii atura raua ia Rebeka e na ô atura: “E haere anei oe na muri i teie taata?” Pahono maira oia: “E hinaaro vau e haere.”

59 Tuu aˈera ratou ia Rebeka+ to ratou tuahine ia haere, e te vahine tei hii ia ˈna*+ e te tavini a Aberahama e te mau tane tei na muri mai ia ˈna. 60 E haamaitai atura ratou ia Rebeka e na ô atura: “To matou tuahine, ia riro oe ei metua no e rave rahi mirioni tamarii, e ia fatu to huaai i te mau oire* o te feia e hae ra ia ratou.”+ 61 Tia aˈera Rebeka e ta ˈna mau tavini vahine, pauma aˈera i nia i te mau kamela, e pee atura i taua taata ra. Rave ihora ïa te tavini a Aberahama ia Rebeka e haere atura i to ˈna tere.

62 O Isaaka râ, na Beere-lahai-roi+ ïa i te haereraa mai, te ora ra hoi oia i te fenua o te Negeba.+ 63 E te hahaere ra Isaaka na rapae i te ahiahi a feruriruri ai.+ I to ˈna hiˈoraa ˈtu, ite ihora oia e kamela te haere mai ra! 64 I to Rebeka hiˈoraa mai, ite ihora oia ia Isaaka, e pou oioi ihora mai nia mai i te kamela. 65 Ui ihora oia i te tavini: “O vai tera taata e haere ra na rapae no te farerei ia tatou?” Parau atura te tavini: “O to ˈu fatu.” Rave ihora oia i to ˈna puroˈu no te tapoˈi i to ˈna mata. 66 E faatia ˈtura te tavini ia Isaaka i te mau mea atoa ta ˈna i rave. 67 I muri iho i te reira, aratai atura Isaaka ia ˈna i roto i te fare ie o Sara to ˈna metua vahine.+ Mea na reira oia i te raveraa ia Rebeka ei vahine faaipoipo na ˈna, e here roa ˈtura oia ia ˈna,+ e tamahanahanahia ˈtura Isaaka i muri aˈe i te poheraa to ˈna metua vahine.+

25 Rave faahou ihora Aberahama i te hoê vahine faaipoipo na ˈna, o Ketura to ˈna iˈoa. 2 I muri aˈe, fanau maira oia ia Zimerana, Iokasana, Medana, Midiana,+ Isabaka e Tua.+

3 Fanau maira ta Iokasana o Seba raua Dedana.

Na tamaiti a Dedana, o te ati Âsuri, ati Letusi e te ati Leumi.

4 Na tamaiti a Midiana, o Epha, Ephera, Hanoka, Abida e Eledaa.

E tamaiti anaˈe tera na Ketura.

5 I muri aˈe, horoa ˈtura Aberahama pauroa ta ˈna faufaa na Isaaka,+ 6 horoa ˈtura râ Aberahama i te taoˈa na ta ˈna mau tamaiti i ta ˈna na vahine faaipoipo tavini.* A ora noa ˈi oia, tono ihora oia ia ratou i te pae hitia o te râ, i te atea ê ia Isaaka ta ˈna tamaiti,+ i te fenua i hitia o te râ. 7 Te mau matahiti o to Aberahama oraraa, 175 ïa. 8 Puhi ihora Aberahama i to ˈna aho hopea e pohe atura i to ˈna ruhiruhia-roa-raa, ei ruhiruhia tei fanaˈo i te hoê oraraa maitai, e amuihia ˈtura oia i to ˈna mau taata.* 9 Huna aˈera ta ˈna na tamaiti o Isaaka raua Isemaela ia ˈna i roto i te ana o Makapela i te fenua o Epherona te tamaiti a Zohara te ati Heta i mua ia Mamera,+ 10 te fenua ta Aberahama i hoo mai i te mau tamaiti a Heta. I reira Aberahama i te hunaraahia, e ta ˈna vahine faaipoipo o Sara.+ 11 I muri iho i to Aberahama poheraa, haamaitai noa maira te Atua i ta ˈna tamaiti o Isaaka,+ e te ora ra Isaaka i pihai iho i Beere-lahai-roi.+

12 Teie te aamu o Isemaela+ te tamaiti a Aberahama ta Hagara+ no Aiphiti, te tavini a Sara, i fanau na Aberahama.

13 Teie te iˈoa o te mau tamaiti a Isemaela, to ratou iˈoa ia au i to ratou opu: Nebaiota+ ta Isemaela matahiapo, Kedara+ to muri mai, Adabeela, Mibesama,+ 14 Misema, Duma, Masa, 15 Hadada, Têma, Ietura, Naphisa e Kedema. 16 Tera te mau tamaiti a Isemaela, e tera to ratou iˈoa ia au i to ratou vahi nohoraa e ia au i to ratou puhaparaa,* 12 raatira ia au i to ratou opu.+ 17 Ua ora Isemaela 137 matahiti. Puhi ihora oia i to ˈna aho hopea, pohe atura e amuihia ˈtura oia i to ˈna mau taata.* 18 E ora aˈera ratou* mai Havila+ pihai iho i Sura,+ mea fatata i Aiphiti, e tae roa i Asura. Puhapa ihora oia i pihai iho i* to ˈna mau taeae atoa.+

19 E teie te aamu o Isaaka te tamaiti a Aberahama.+

Fanau maira ta Aberahama o Isaaka. 20 E 40 matahiti to Isaaka i to ˈna faaipoiporaa ia Rebeka, te tamahine a Betuela+ te ati Arama no Padana-arama, te tuahine o Labana te ati Arama. 21 E taparuparu noa ihora Isaaka ia Iehova no ta ˈna vahine faaipoipo, no te mea e vahine fanau ore oia, e pahono maira Iehova i ta ˈna taparuparuraa, e hapû ihora o Rebeka. 22 E haamata aˈera na tamaiti i roto i to ˈna opu i te taputô,+ a na ô atu ai oia: “Mai te peu e mai tera te huru, eaha ïa vau e ora noa ˈi?” Uiui ihora ïa oia ia Iehova. 23 E parau maira Iehova ia ˈna: “E piti nunaa to roto i to opu,+ e e piti nunaa te taa ê no roto mai ia oe.+ Hoê nunaa te mea puai aˈe i te tahi atu nunaa,+ e e tavini te tuaana i te teina.”+

24 I te taeraa mai te taime e fanau ai oia, inaha, e maehaa no roto mai i to ˈna opu. 25 Te matahiapo tei haere mai i rapae, mea uteute ïa, e au i te hoê ahu huruhuru,+ mairi atura ïa ratou ia ˈna i te iˈoa o Esau.*+ 26 I muri iho, haere maira to ˈna teina i rapae e te tapea ra to ˈna rima i te poro avae o Esau,+ mairi atura ïa oia ia ˈna i te iˈoa o Iakoba.*+ E 60 matahiti to Isaaka i to Rebeka fanauraa mai ia raua.

27 A paari mai ai na tamaroa, riro maira Esau ei taata aˈuaˈu animara aravihi,+ te hoê taata no rapae, area Iakoba, e taata hapa ore ïa, e ora ra i roto i te fare ie.+ 28 E mea here na Isaaka ia Esau, no te mea mea au na ˈna te iˈo animara ta ˈna e faahoˈi mai, area Rebeka mea here ïa na ˈna ia Iakoba.+ 29 I te hoê mahana, te tunu ra Iakoba i te pǐpǐ i to Esau hoˈiraa mai na te aˈuaˈuraa i te animara e ua rohirohi roa. 30 Parau maira Esau ia Iakoba: “Haaviti, horoa mai na te tahi* o tena pǐpǐ uteute ta oe, ua rohirohi roa* hoi au!” No reira oia i mairihia ˈi i te iˈoa o Edoma.*+ 31 Na ô atura Iakoba: “Na mua, a hoo mai ia ˈu i to tiaraa matahiapo!”+ 32 E parau faahou maira Esau: “Teie au ua fatata i te pohe! Ei aha ïa na ˈu tena tiaraa matahiapo?” 33 Na ô faahou atura Iakoba: “A horeo mai ia ˈu na mua!” Horeo ihora oia ia ˈna e hoo atura i to ˈna tiaraa matahiapo ia Iakoba.+ 34 Horoa ˈtura Iakoba na Esau i te faraoa e te maa pǐpǐ, e tamaa e inu ihora Esau, e tia aˈera e reva ˈtura. Mea na reira ïa Esau i te haafaufaa-ore-raa i te tiaraa matahiapo.

26 E oˈe hoi tei taua fenua ra, hau atu i te oˈe matamua tei tupu i te mau mahana o Aberahama.+ Haere ihora ïa Isaaka ia Abimeleka arii o te mau Philiseti, i Gerara. 2 Fa maira Iehova ia ˈna e parau maira: “Eiaha e pou i Aiphiti. A faaea i te fenua ta ˈu e faaite ia oe. 3 A faaea ei taata ê i taua fenua ra,+ e ei pihai iho noa vau ia oe e e haamaitai au ia oe, no te mea no oe e no to huaai e horoa ˈi au i tera mau fenua atoa,+ e e faatupu vau i ta ˈu i horeo i to metua tane o Aberahama:+ 4 ‘E faarahi au i to huaai mai te mau fetia o te raˈi,+ e e horoa vau no to huaai i teie mau fenua atoa,+ e na roto i to huaai e fanaˈo ai te mau nunaa atoa o te fenua i te hoê haamaitairaa no ratou,’+ 5 no te mea ua faaroo Aberahama i to ˈu reo e ua haapao noa oia i ta ˈu mau titauraa, ta ˈu mau faaueraa, ta ˈu mau faatureraa e ta ˈu mau ture.”+ 6 Ora noa ˈtura ïa Isaaka i Gerara.+

7 A uiui noa ˈi te mau tane o taua vahi ra no nia i ta ˈna vahine faaipoipo, e na ô oia: “E tuahine o ˈna no ˈu.”+ Te mǎtaˈu ra oia i te parau: “E vahine faaipoipo o ˈna na ˈu,” no te mea ua manaˈo oia: “E nehenehe te mau tane o taua vahi ra e haapohe ia ˈu no Rebeka,” mea haviti hoi oia.+ 8 Tau mahana i muri iho, i to Abimeleka arii no te mau Philiseti hiˈoraa na te haamaramarama, ite ihora oia ia Isaaka e tauahi ra ia Rebeka ta ˈna vahine faaipoipo.+ 9 I reira iho, titau maira Abimeleka ia Isaaka e parau maira: “E vahine faaipoipo hoi o ˈna na oe! No te aha oe i parau ai: ‘E tuahine o ˈna no ˈu’?” Na ô atura Isaaka: “Ua parau vau i te reira no to ˈu mǎtaˈu ia pohe au no ˈna.”+ 10 Tera râ, parau faahou maira Abimeleka: “Eaha oe i na reira mai ai?+ E nehenehe noa ta te hoê tane o to ˈu nunaa e taoto i ta oe vahine faaipoipo, a hopoi mai ai oe i te hara i nia ia matou!”+ 11 Faaue ihora Abimeleka i to ˈna nunaa taatoa: “Te taata o te hauti noa ˈtu i teie tane e ta ˈna vahine faaipoipo, e haapohehia mau â!”

12 Haamata ihora Isaaka i te ueue i te huero maa i taua fenua ra, e i taua matahiti ra, tataihanere atura ta ˈna i ooti i ta ˈna i ueue, te haamaitai ra hoi Iehova ia ˈna.+ 13 Rahi maira te faufaa a taua taata ra, e manuïa noa ˈtura ta ˈna mau ohipa a rahi roa mai ai ta ˈna faufaa. 14 Ua noaa mai ia ˈna te nǎnǎ mamoe e te nǎnǎ puaatoro e e rave rahi tavini,+ e haamata aˈera te mau Philiseti i te pohehae ia ˈna.

15 Faaî aˈera te mau Philiseti i te mau apoo pape ta te mau tavini a to ˈna metua tane o Aberahama i ô,+ i te repo. 16 Parau maira Abimeleka ia Isaaka: “A haere ê atu i to matou fenua e na pihai iho mai, mea rahi aˈe hoi oe ia matou.” 17 Haere ê atura Isaaka mai reira e puhapa ihora i te peho no Gerara+ e faaea ihora i reira. 18 Ô faahou ihora Isaaka i te mau apoo pape tei ôhia i te mau mahana o to ˈna metua tane o Aberahama, ta te mau Philiseti râ i faaî i te repo i muri aˈe i to Aberahama poheraa,+ e mairi ihora oia i taua mau apoo pape ra i te mau iˈoa ta to ˈna metua tane i horoa.+

19 I to te mau tavini a Isaaka ôraa i te apoo i te peho, itea maira ia ratou te hoê apoo pape maaro. 20 E imi peapea aˈera te mau tiai mamoe no Gerara i te mau tiai mamoe a Isaaka, a na ô ai: “Na matou te pape!” Mairi ihora ïa oia i te apoo pape i te iˈoa o Êseka,* no te mea ua imi peapea ratou ia ˈna. 21 Ô aˈera ratou i te tahi atu apoo pape, e imi peapea faahou aˈera ratou. Mairi ihora ïa oia i taua apoo pape ra i te iˈoa o Sitina.* 22 I muri aˈe, haere ê atura oia mai reira e ô ihora i te tahi atu apoo pape, aita râ ratou i imi peapea. Mairi ihora ïa oia i taua apoo pape ra i te iˈoa o Rehobota* e na ô ihora: “No te mea i teie nei ua horoa mai Iehova no tatou i te hoê vahi huru rahi e ua faarahi oia i ta tatou mau tamarii i teie fenua.”+

23 Pauma aˈera oia mai reira mai i Beere-seba.+ 24 I taua po ra, fa maira Iehova ia ˈna e parau maira: “O vau te Atua o to metua tane o Aberahama.+ Eiaha oe e mǎtaˈu,+ tei pihai iho hoi au ia oe. E haamaitai au ia oe e e faarahi au i to huaai no Aberahama ta ˈu tavini.”+ 25 Hamani ihora oia i te hoê fata i reira e tiaoro ihora i te iˈoa o Iehova.+ E patia ihora Isaaka i to ˈna fare ie i reira,+ e ô aˈera ta ˈna mau tavini i te hoê apoo pape i reira.

26 I muri aˈe, haere maira Abimeleka ia ˈna mai Gerara mai, ratou Ahuzata to ˈna taata aˈo e Phikola te raatira o ta ˈna nuu.+ 27 Na ô atura Isaaka: “No te aha outou i haere mai ai ia ˈu, mea hae hoi na outou ia ˈu e ua tiahi outou ia ˈu i to outou fenua e na pihai iho mai?” 28 Parau maira ratou: “Ua ite maitai matou e tei ia oe ra Iehova.+ Na ô aˈera ïa matou: ‘Ia tupu na te hau i rotopu ia matou e ia oe, e ia faaau matou i te hoê faufaa ia oe,+ 29 oia hoi e ore oe e rave ino ia matou mai ia matou i ore i rave ino ia oe, inaha e maitai anaˈe ta matou i rave i nia ia oe, ua tiahi hoi matou ia oe ma te hau. O oe i teie nei tei haamaitaihia e Iehova.’” 30 Faatupu ihora oia i te hoê tamaaraa no ratou, e tamaa e e inu aˈera ratou. 31 I te poipoi roa, tia aˈera ratou i nia e horeo aˈera te tahi i te tahi.+ I muri iho, tuu ihora Isaaka ia ratou ia haere, e vaiiho maira ratou ia ˈna ma te hau.

32 I taua mahana ra, haere maira te mau tavini a Isaaka e parau maira ia ˈna no nia i te apoo pape ta ratou i ô,+ e na ô maira: “Ua itea mai ia matou te pape!” 33 Mairi ihora ïa oia i taua apoo pape ra i te iˈoa o Siba. No reira te oire i parauhia ˈi Beere-seba+ tae roa mai i teie mahana.

34 I te 40raa o to Esau matahiti, rave ihora oia ei vahine faaipoipo na ˈna ia Iudita te tamahine a Beeri te ati Heta e ia Basemata atoa te tamahine a Elona te ati Heta.+ 35 Riro ihora te reira ei otoraa* rahi no Isaaka raua Rebeka.+

27 I te ruhiruhiaraa o Isaaka e te mohimohi-roa-raa to ˈna mata, pii ihora oia ia Esau+ ta ˈna tamaiti matahiapo e parau atura: “Ta ˈu tamaiti!” Pahono maira oia: “Teie au!” 2 Parau faahou atura oia: “Ua ruhiruhia roa vau i teie nei. Aita vau i ite i te mahana e pohe ai au. 3 No reira, i teie nei, a rave na i ta oe mau mauhaa, ta oe vairaa teˈa e ta oe fana, e a haere e aˈuaˈu i te tahi animara oviri na ˈu.+ 4 Ia oti, a tunu i te maa mea au roa na ˈu e a hopoi mai. E amu vau i te reira, a nehenehe atu ai au e haamaitai ia oe hou vau a pohe ai.”

5 Tera râ, te faaroo noa ra Rebeka a paraparau ai Isaaka ia Esau ta ˈna tamaiti. E haere atura Esau e aˈuaˈu i te animara oviri no te hopoi mai i to ˈna metua tane.+ 6 Parau atura Rebeka i ta ˈna tamaiti o Iakoba:+ “No faaroo iho nei au i to metua tane i te parauraa i to tuaana o Esau: 7 ‘A hopoi mai i te tahi animara oviri e a tunu mai i te tahi maa au maitai. E e amu vau i te reira, a nehenehe atu ai au e haamaitai ia oe i mua ia Iehova hou vau a pohe ai.’+ 8 E i teie nei, ta ˈu tamaiti, a faaroo maitai mai e a rave i ta ˈu e faaue ia oe.+ 9 A haere na i te nǎnǎ ra e a rave mai e piti o te mau fanauˈa puaaniho maitai roa ˈˈe ia nehenehe au e tunu i te reira ei maa au maitai na to metua tane, mai ta ˈna e au. 10 Ia oti, a hopoi i te reira i to metua tane ia amu oia, ia nehenehe oia e haamaitai ia oe hou oia a pohe ai.”

11 Na ô maira Iakoba i to ˈna metua vahine o Rebeka: “E taata huruhuru+ hoi to ˈu tuaana o Esau, o vau râ, e ere ïa. 12 E ia fafa to ˈu metua tane ia ˈu?+ E riro mau â vau ei taata e faaooo ra ia ˈna, e e faatae mai au i nia ia ˈu i te ino eiaha râ te haamaitairaa.” 13 Parau atura to ˈna metua vahine: “Ei nia ïa ia ˈu taua ino ra, ta ˈu tamaiti. A rave mai ta ˈu i parau e a haere, a tii e a hopoi mai i na fanauˈa puaaniho.”+ 14 Haere ihora oia e tii i te reira e hopoi maira i to ˈna metua vahine, e tunu ihora to ˈna metua vahine i te tahi maa au maitai, mai ta to ˈna metua tane e au. 15 I muri iho, rave ihora Rebeka i te ahu maitai roa ˈˈe o ta ˈna tamaiti matahiapo o Esau, e vai ra i roto i te fare ie, e tuu atura i nia i ta ˈna tamaiti teina o Iakoba.+ 16 Tuu atoa ˈtura oia i te iri o na fanauˈa puaaniho i nia i to ˈna rima e i nia i to ˈna aˈî.+ 17 E horoa ˈtura oia i te maa au maitai e te faraoa ta ˈna i tunu i ta ˈna tamaiti o Iakoba.+

18 Tomo atura oia i roto i te fare ie o to ˈna metua tane e parau atura: “To ˈu metua!” Na ô maira oia: “Teie au! O vai oe, ta ˈu tamaiti?” 19 Parau atura Iakoba i to ˈna metua tane: “O Esau to matahiapo.+ Ua rave au mai ta oe i parau mai. A parahi mai na, e a amu i te tahi iˈo animara ta ˈu i hopoi mai, ia nehenehe oe e haamaitai ia ˈu.”+ 20 Na ô maira Isaaka i ta ˈna tamaiti: “Mea nafea te itea-oioi-raa mai ia oe te reira, ta ˈu tamaiti?” Pahono atura oia: “No te mea na Iehova to Atua i hopoi mai i te reira ia ˈu nei.” 21 Na ô maira Isaaka ia Iakoba: “A tapiri mai na, ia nehenehe au e fafa ia oe, ta ˈu tamaiti, ia ite au o ta ˈu tamaiti o Esau iho â anei oe aore ra e ere.”+ 22 Tapiri atura Iakoba i to ˈna metua tane o Isaaka, e fafa ihora oia ia ˈna, e na ô maira: “Te reo, o te reo ïa o Iakoba, te rima râ, o te rima ïa o Esau.”+ 23 Aita i taa ia ˈna e o Iakoba tera, no te mea e rima huruhuru to ˈna, mai te rima o to ˈna tuaana o Esau. Haamaitai maira ïa oia ia ˈna.+

24 I muri iho, ui maira oia: “O ta ˈu tamaiti o Esau iho â anei oe?” Pahono atura oia: “E, o vau.” 25 Parau maira oia: “A hopoi mai i te tahi iˈo animara oviri ia amu vau, ta ˈu tamaiti, a haamaitai atu ai au ia oe.” Hopoi atura oia i te reira ia ˈna ra e amu ihora oia, e hopoi atura oia i te uaina e inu ihora oia. 26 Parau maira Isaaka to ˈna metua tane: “A tapiri mai na, e a apa mai ia ˈu, ta ˈu tamaiti.”+ 27 Tapiri atura oia e apa ˈtura ia ˈna, e nehenehe ihora oia e hauˈa i te hauˈa o to ˈna ahu.+ E haamaitai maira oia ia ˈna e parau ihora:

“Inaha, te hauˈa o ta ˈu tamaiti, mai te hauˈa ïa o te uru raau ta Iehova i haamaitai. 28 Ia horoa mai te Atua mau na oe i te hupe o te raˈi+ e te repo maitai o te fenua+ e te huero maa e te uaina apî e rave rahi.+ 29 Ia tavini te taata ia oe, e ia piˈo te mau nunaa i raro i mua ia oe. Ei fatu oe i nia i to mau taeae, e ia piˈo te mau tamaiti a to metua vahine i mua ia oe.+ Ia faainohia te taata atoa o te faaino ia oe, e ia haamaitaihia te taata atoa o te haamaitai ia oe.”+

30 No oti noa ˈtura ta Isaaka haamaitairaa ia Iakoba, e no reva noa ˈtura Iakoba mai mua ˈtu i te aro o to ˈna metua tane o Isaaka, i hoˈi mai ai Esau na ta ˈna aˈuaˈuraa animara.+ 31 Tunu atoa ihora oia i te tahi maa au maitai e hopoi maira i te reira i to ˈna metua tane, e parau maira i to ˈna metua tane: “Ia tia mai to ˈu metua e ia amu i te tahi iˈo animara ta ˈu i hopoi mai, ia nehenehe oe e haamaitai ia ˈu.” 32 Na ô atura to ˈna metua tane o Isaaka: “O vai oe?” Parau maira oia: “O vau to tamaiti, to matahiapo, o Esau.”+ 33 Rûrû roa ihora Isaaka, e na ô atura: “O vai ïa tei aˈuaˈu i te animara oviri e tei hopoi mai i te reira? Ua amu aˈena vau i te reira hou oe a tae mai ai, e ua haamaitai au ia ˈna, e e haamaitai-mau-hia oia!”

34 I to ˈna faarooraa i te mau parau a to ˈna metua tane, auê ihora Esau ma te oto rahi e parau maira i to ˈna metua tane: “Haamaitai mai ia ˈu, ia ˈu atoa, to ˈu metua!”+ 35 Tera râ, na ô atura Isaaka: “Ua haere mai to teina ma te haavarevare ia noaa ia ˈna te haamaitairaa faataahia no oe.” 36 Parau maira Esau: “Ua tano oia i te toparaahia i te iˈoa o Iakoba!* E piti hoi taime to ˈna raveraa i to ˈu tiaraa!+ Ua rave aˈena oia i to ˈu tiaraa matahiapo,+ e i teie nei ua rave oia i ta ˈu haamaitairaa!”+ Parau faahou maira oia: “Aita anei oe i faataa i te tahi haamaitairaa no ˈu?” 37 Tera râ, pahono atura Isaaka ia Esau: “Inaha ua faatoroa vau ia ˈna ei fatu i nia ia oe,+ e ua horoa vau na ˈna i to ˈna mau taeae atoa ei tavini, e ua horoa vau i te huero maa e te uaina apî na ˈna.+ Eaha ïa te toe ra ta ˈu e nehenehe e horoa na oe, ta ˈu tamaiti?”

38 Parau maira Esau i to ˈna metua tane: “Hoê noa anei haamaitairaa ta oe, to ˈu metua? Haamaitai mai ia ˈu, ia ˈu atoa, to ˈu metua!” Auê ihora Esau e taˈi ihora.+ 39 Pahono atura to ˈna metua tane o Isaaka:

“Inaha, e ore oe e parahi i nia i te repo maitai o te fenua, e e ore oe e fanaˈo i te hupe o te raˈi.+ 40 E i ta oe ˈoˈe e ora ˈi oe,+ e e tavini oe i to teina.+ Ia tâhiti râ oe, e ofati mau â oe i ta ˈna zugo i nia i to aˈî.”+

41 Tera râ, e inoino rahi to Esau ia Iakoba no te haamaitairaa ta to ˈna metua tane i horoa na ˈna,+ a na ô noa ˈi Esau i roto i to ˈna aau: “Te piri roa mai ra te mau mahana otoraa i to ˈu metua tane.+ I muri iho i te reira, e haapohe au ia Iakoba to ˈu teina.” 42 I te faaiteraahia ia Rebeka te mau parau a ta ˈna tamaiti matahiapo o Esau, tii-oioi-hia ˈtura ta ˈna tamaiti teina o Iakoba e parau atura Rebeka: “Inaha, to tuaana o Esau, te opua nei e tahoo ma te* haapohe ia oe. 43 I teie nei, ta ˈu tamaiti, a rave mai ta ˈu e parau. A tia e a horo i ǒ to ˈu taeae o Labana i Harana.+ 44 A faaea i ǒ ˈna e ia mǎrû mai te riri rahi o to tuaana, 45 ia pee te riri o to tuaana ia oe, e ia moˈe ia ˈna ta oe i rave ia ˈna. I muri iho, e tiihia oe. Eaha hoi au e ere ai ia orua i te hoê â mahana?”

46 I muri iho i te reira, parau noa ˈtura Rebeka ia Isaaka: “Mea au ore roa na ˈu to ˈu oraraa no na tamahine a Heta.+ Ia rave noa ˈtu Iakoba i te hoê vahine faaipoipo na ˈna i rotopu i te mau tamahine a Heta, mai teie na tamahine o teie fenua, eaha ïa te faufaa o to ˈu oraraa?”+

28 Titau atura Isaaka ia Iakoba, e haamaitai ihora ia ˈna e faaue atura: “Eiaha oe e rave i te hoê vahine faaipoipo na oe i rotopu i te mau tamahine no Kanaana.+ 2 A haere i Padana-arama i te utuafare o Betuela, te metua tane o to metua vahine, e i reira a rave i te hoê vahine faaipoipo na oe i rotopu i te mau tamahine a Labana,+ te taeae o to metua vahine. 3 E haamaitai te Atua Manahope ia oe e e faarahi oia i ta oe mau tamarii e e horoa oia na oe e rave rahi huaai, e e riro iho â oe ei nunaa e rave rahi ia amuihia.+ 4 E e horoa oia na oe i te haamaitairaa a Aberahama,+ na oe e na to huaai, ia nehenehe oe e fatu i te fenua i ora ˈi oe ei taata ê, ta te Atua i horoa no Aberahama.”+

5 Tuu atura Isaaka ia Iakoba ia haere, e reva ˈtura Iakoba i Padana-arama i ǒ Labana te tamaiti a Betuela te ati Arama,+ te taeae o Rebeka,+ te metua vahine o Iakoba raua Esau.

6 Ite ihora Esau e ua haamaitai Isaaka ia Iakoba e ua tono ia ˈna i Padana-arama no te rave i te hoê vahine faaipoipo na ˈna i reira, e i to ˈna haamaitairaa ia ˈna, ua faaue atu oia: “Eiaha oe e rave i te hoê vahine faaipoipo na oe i rotopu i te mau tamahine no Kanaana.”+ 7 Ite atoa ihora oia e ua faaroo Iakoba i to ˈna metua tane e to ˈna metua vahine e ua reva i Padana-arama.+ 8 Taa ihora ia Esau e mea au ore na to ˈna metua tane o Isaaka i te mau tamahine no Kanaana,+ 9 haere atura ïa Esau i te utuafare o Isemaela, e hau atu i ta ˈna na vahine faaipoipo matamua, rave atoa ihora oia ei vahine faaipoipo na ˈna ia Mahalata te tamahine a Isemaela te tamaiti a Aberahama, te tuahine o Nebaiota.+

10 Reva ˈtura Iakoba mai Beere-seba e haere noa ˈtura i Harana.+ 11 Tae atura oia i te hoê vahi e faaineine ihora i te taoto i taua po ra i reira, no te mea ua topa ê na te mahana. Rave ihora oia hoê o te mau ofai o taua vahi ra e tuu ihora i raro aˈe i to ˈna upoo e tarava ihora i reira.+ 12 Moemoeâ ihora oia, e inaha, te vai ra te hoê eˈa* tei faatiahia mai nia i te fenua e tae roa i nia i te raˈi, e te pauma ra e te pou mai ra te mau melahi a te Atua na nia i taua eˈa ra.+ 13 E inaha, tei nia ˈˈe Iehova i te reira, e na ô maira oia:

“O vau o Iehova te Atua o Aberahama to metua tane e te Atua o Isaaka.+ E horoa ˈtu vau no oe e no to huaai i te fenua ta oe e tarava ra i nia iho.+ 14 E e riro mau â to huaai mai te huˈa repo o te fenua te rahi,+ e e parare oe e tae roa i tooa o te râ e i hitia o te râ e i apatoerau e i apatoa, e na roto ia oe e na roto i to huaai e haamaitai-mau-hia ˈi te mau nunaa atoa o te fenua.*+ 15 Tei pihai iho vau ia oe, e e paruru vau ia oe i te mau vahi atoa e haere ai oe, e e faahoˈi mai au ia oe i teie fenua.+ E ore au e faarue ia oe e e rave iho â vau i ta ˈu i fafau ia oe.”+

16 Ara maira Iakoba mai to ˈna taotoraa e na ô ihora: “Oia mau, tei teie vahi Iehova, e aita vau i ite.” 17 E mǎtaˈu roa ihora oia e parau faahou ihora: “E vahi mǎtaˈu rahi teie! O te fare o te Atua mau â teie,+ e teie te uputa o te raˈi.”+ 18 Tia aˈera Iakoba i nia i te poipoi roa, e rave ihora i te ofai ta ˈna i tuu i raro aˈe i to ˈna upoo, faatia aˈera i te reira ei pou e ninii ihora i te monoˈi i nia iho.+ 19 Mairi ihora oia i taua vahi ra i te iˈoa o Betela,* o Luza+ râ te iˈoa o taua oire ra na mua ˈˈe.

20 Euhe ihora Iakoba: “Ia vai noa te Atua i pihai iho ia ˈu e ia paruru oia ia ˈu i to ˈu tere e ia horoa mai oia i te maa ia amu vau e te ahu ia oomo vau 21 e ia faahoˈi mai oia ia ˈu ma te hau i ǒ to ˈu metua tane, ua haapapu ïa Iehova e o ˈna iho â to ˈu Atua. 22 E teie ofai ta ˈu i faatia ei pou, e riro ïa ei fare no te Atua,+ e e horoa iho â vau na te Atua i te tuhaa ahuru o te mau mea atoa ta ˈna e horoa mai na ˈu.”

29 I muri iho i te reira, haere faahou atura Iakoba i to ˈna tere e tae roa ˈtura i te fenua o to hitia o te râ. 2 Ite ihora oia i te hoê apoo pape i rapae i te oire e e toru nǎnǎ mamoe e taoto ra na pihai iho, no te mea e faainuhia na te mau nǎnǎ i taua apoo pape ra. E ofai rahi to nia iho i te auvaha o te apoo pape. 3 Ua haaputuputu-anaˈe-hia te mau nǎnǎ i reira, e huri te mau tiai mamoe i te ofai mai nia i te auvaha o te apoo pape, e e faainu ratou i te mau nǎnǎ, ia oti e faahoˈi ratou i te ofai i to ˈna vairaa i nia i te auvaha o te apoo pape.

4 Parau atura Iakoba ia ratou: “To ˈu mau taeae, nohea mai outou?” Na ô maira ratou: “No Harana+ mai matou.” 5 Parau atura oia: “Ua matau anei outou ia Labana+ te mootua a Nahora?”+ Na ô maira ratou: “Ua matau matou ia ˈna.” 6 Parau atura oia: “Mea maitai o ˈna?” Pahono maira ratou: “E, mea maitai o ˈna. E teie ta ˈna tamahine o Rahela+ e haere mai ra e te mau mamoe!” 7 Parau atura oia: “O te afaraa noa teie o te mahana. E ere i te taime no te haaputuputu i te mau nǎnǎ. A faainu i te mau mamoe, e a aratai ia ratou i te vahi aihere.” 8 Na ô maira ïa ratou: “Eita matou e faatiahia ia na reira aita â anaˈe i haaputuputuhia ˈtura pauroa te nǎnǎ e i hurihia ˈtura te ofai mai nia i te auvaha o te apoo pape. I muri iho noa e faainu ai matou i te mau mamoe.”

9 A paraparau noa ˈi râ oia e o ratou, haere maira Rahela e te mau mamoe a to ˈna metua tane, e tiai mamoe hoi oia. 10 I to Iakoba iteraa ˈtu ia Rahela, te tamahine a Labana te taeae o to ˈna metua vahine, e te mau mamoe a Labana, haere oioi atura Iakoba i pihai iho e huri ihora i te ofai mai nia i te auvaha o te apoo pape, e faainu ihora i te mau mamoe a Labana te taeae o to ˈna metua vahine. 11 Apa ˈtura Iakoba ia Rahela, e auê ihora. 12 E faaite atura Iakoba ia Rahela e fetii* o ˈna no to ˈna metua tane e e tamaiti o ˈna na Rebeka. Horo atura Rahela e faaite i to ˈna metua tane.

13 I to Labana+ iho â faarooraa i te parau o Iakoba te tamaiti a to ˈna tuahine, horo maira oia e farerei ia ˈna. Tauahi maira oia ia ˈna, apa maira e aratai atura ia ˈna i to ˈna fare ie. E faatia maira Iakoba ia Labana i te mau mea atoa i tupu. 14 Na ô atura Labana ia ˈna: “To ˈu ivi e to ˈu iˈo mau â oe.”* Faaea maira Iakoba i ǒ ˈna hoê avaˈe taatoa.

15 Na ô atura Labana ia Iakoba: “No te mea noa anei e fetii*+ oe no ˈu e tavini ai oe ia ˈu mai tera noa? A faaite mai, ehia te aufau ia oe?”+ 16 E piti hoi tamahine ta Labana. O Lea te iˈoa o te matahiapo, e o Rahela+ te iˈoa o te teina. 17 E mata pohepohe râ to Lea, area o Rahela, ua riro mai ïa ei vahine nehenehe roa e te haviti. 18 No to Iakoba here ia Rahela, parau maira oia: “Ua ineine au i te tavini ia oe e hitu matahiti no to tamahine teina o Rahela.”+ 19 Na ô atura Labana: “Mea maitai aˈe ia horoa vau ia ˈna na oe i te horoa ia ˈna na te tahi atu tane. A faaea noa mai ia ˈu nei.” 20 E tavini ihora Iakoba e hitu matahiti no Rahela,+ no ˈna râ, e au ïa tau mahana noa no to ˈna here ia Rahela.

21 Parau maira Iakoba ia Labana: “A horoa mai i ta ˈu vahine faaipoipo, no te mea ua hope te mau mahana o ta ˈu taviniraa, e ia taoto vau ia ˈna.” 22 Haaputuputu ihora Labana i te mau taata atoa o taua vahi ra e faatupu atura i te hoê tamaaraa. 23 I tera râ po, rave ihora oia i ta ˈna tamahine o Lea e aratai atura ia ˈna ia Iakoba ia taoto oia ia ˈna. 24 Horoa atoa ˈtura Labana i ta ˈna tavini vahine o Zilipa na ta ˈna tamahine o Lea ei tavini.+ 25 Ia poipoi aˈe, ite ihora Iakoba e o Lea! Parau maira oia ia Labana: “Eaha oe i na reira ˈi ia ˈu? E ere anei no Rahela i tavini ai au ia oe? No te aha oe i haavare ai ia ˈu?”+ 26 Na ô atura Labana: “E ere i te peu na matou i ǒ nei ia horoa i te teina hou te matahiapo. 27 A faaea hoê hebedoma taatoa e ta ˈu tamahine matahiapo. I muri iho, e horoa-atoa-hia na oe to ˈna teina, ia tavini râ oe ia ˈu e hitu â matahiti.”+ 28 Na reira ihora Iakoba: faaea ihora oia hoê hebedoma taatoa e te tamahine matahiapo, i muri iho horoa ˈtura Labana i ta ˈna tamahine o Rahela ei vahine faaipoipo na ˈna. 29 Horoa atoa ˈtura Labana i ta ˈna tavini vahine o Bila+ na ta ˈna tamahine o Rahela ei tavini na ˈna.+

30 Taoto ihora Iakoba ia Rahela atoa, e here ihora oia ia Rahela hau aˈe ia Lea, e tavini maira oia ia Labana e hitu â matahiti.+ 31 I to Iehova iteraa e ere o Lea mea herehia,* rave ihora oia e ia hapû oia,+ area Rahela, e vahine fanau ore oia.+ 32 Hapû ihora Lea, fanau maira i te hoê tamaiti e mairi ihora ia ˈna i te iˈoa o Reubena,*+ ua parau hoi oia: “No te mea ua hiˈo mai Iehova i to ˈu ati,+ i teie nei e here ta ˈu tane faaipoipo ia ˈu.” 33 E hapû faahou ihora oia, fanau maira i te hoê tamaiti e parau ihora: “No te mea ua faaroo Iehova, oia hoi e ere au mea herehia, horoa maira ïa oia na ˈu i teie atoa tamaiti.” E mairi ihora oia ia ˈna i te iˈoa o Simeona.*+ 34 E hapû faahou ihora oia, fanau maira i te hoê tamaiti e parau ihora: “I teie nei ïa taime, e here mai ta ˈu tane faaipoipo ia ˈu, no te mea ua fanau mai au e toru tamaiti.” Mairihia ihora oia i te iˈoa o Levi.*+ 35 E hapû faahou ihora oia, fanau maira i te hoê tamaiti e parau ihora: “I teie taime, e arue au ia Iehova.” Mairi ihora ïa oia ia ˈna i te iˈoa o Iuda.*+ I muri iho, faaea ˈtura oia i te fanau.

30 I to Rahela iteraa e aita oia i fanau i te tamarii na Iakoba, pohehae ihora oia i to ˈna tuaana e parau atura ia Iakoba: “A horoa mai i te tamarii na ˈu, aita anaˈe, e pohe au.” 2 Riri ihora Iakoba ia Rahela, e na ô maira: “O vau anei te Atua, tei ore i horoa mai i te tamarii na oe?” 3 Parau atura Rahela: “Teie ta ˈu tavini vahine o Bila.+ A taoto ia ˈna ia nehenehe oia e fanau mai i te tamarii na ˈu, e na roto ia ˈna e noaa atoa ˈi ta ˈu tamarii.” 4 Horoa ˈtura oia i ta ˈna tavini o Bila ei vahine faaipoipo na ˈna, e taoto ihora Iakoba ia ˈna.+ 5 Hapû ihora Bila e fanau maira i muri aˈe i te hoê tamaiti na Iakoba. 6 Parau atura Rahela: “Ua ohipa mai te Atua ei haava no ˈu e ua faaroo atoa i to ˈu reo, a horoa mai ai i te hoê tamaiti na ˈu.” No reira oia i mairi ai ia ˈna i te iˈoa o Dana.*+ 7 Hapû faahou ihora Bila, ta Rahela tavini, e fanau maira i muri aˈe i te piti o ta ˈna tamaiti na Iakoba. 8 Parau atura Rahela: “E taputôraa rahi to ˈu taputôraa i to ˈu tuaana. E ua upootia mai au!” Mairi ihora ïa oia ia ˈna i te iˈoa o Naphatali.*+

9 I to Lea iteraa e ua faaea oia i te fanau i te tamarii, horoa ihora oia i ta ˈna tavini o Zilipa na Iakoba ei vahine faaipoipo na ˈna.+ 10 E fanau maira o Zilipa, ta Lea tavini, i te hoê tamaiti na Iakoba. 11 Parau atura Lea: “Mea fanaˈo vau!” Mairi ihora ïa oia ia ˈna i te iˈoa o Gada.*+ 12 I muri aˈe, fanau maira Zilipa, ta Lea tavini, i te piti o te tamaiti na Iakoba. 13 Parau atura Lea: “Auê au i te oaoa! E parau hoi te mau tamahine e mea oaoa vau.”+ Mairi ihora ïa oia ia ˈna i te iˈoa o Asera.*+

14 A hahaere ai râ Reubena+ i te mau mahana o te ootiraa sitona, itea maira ia ˈna te dudaima* i rapae. Hopoi maira oia i te reira i to ˈna metua vahine o Lea. Parau atura Rahela ia Lea: “A horoa mai na i te tahi dudaima a to tamaiti.” 15 Na ô maira Lea: “Aita i navai to oe raveraa i ta ˈu tane faaipoipo?+ E rave atoa ïa oe i teie nei i te dudaima a ta ˈu tamaiti?” Parau atura Rahela: “Na ô ïa, e taoto Iakoba ia oe i teie po no te dudaima a to tamaiti.”

16 I to Iakoba hoˈiraa mai i taua po ra, haere ihora Lea e farerei ia ˈna e parau atura: “E taoto oe ia ˈu, no te mea ua tarahu iho â vau ia oe i te dudaima a ta ˈu tamaiti.” Taoto ihora ïa oia ia ˈna i taua po ra. 17 E faaroo ihora te Atua ia Lea e pahono maira, e hapû ihora oia e i muri aˈe fanau maira i te pae o te tamaiti na Iakoba. 18 Parau atura Lea: “Ua horoa mai te Atua na ˈu i te hoê haamaitairaa,* no te mea ua horoa vau i ta ˈu tavini na ta ˈu tane faaipoipo.” Mairi ihora ïa oia ia ˈna i te iˈoa o Isakara.*+ 19 E hapû faahou ihora Lea e i muri aˈe fanau maira i te ono o te tamaiti na Iakoba.+ 20 Parau atura Lea: “Ua horoa mai te Atua na ˈu, oia, na ˈu, i te hoê ô nehenehe. I teie nei, e faaoromai ta ˈu tane ia ˈu,+ ua fanau hoi au e ono tamaiti na ˈna.”+ Mairi ihora ïa oia ia ˈna i te iˈoa o Zebuluna.*+ 21 Fanau maira oia i muri aˈe i te hoê tamahine e mairi ihora ia ˈna i te iˈoa o Dina.+

22 I muri aˈe, haamanaˈo maira te Atua ia Rahela, faaroo maira ia ˈna e pahono maira, ma te rave e ia hapû oia.+ 23 E hapû ihora oia e fanau maira i te hoê tamaiti. Parau atura oia: “Ua faaore te Atua i to ˈu haama!”+ 24 Topa ihora ïa oia ia ˈna i te iˈoa o Iosepha,*+ a na ô ai: “Ua horoa faahou mai Iehova i te tamaiti na ˈu.”

25 I te fanauraa mai iho â Rahela ia Iosepha, parau ihora Iakoba ia Labana: “A tuu na ia ˈu ia haere i ǒ ˈu e i to ˈu fenua.+ 26 A horoa mai i ta ˈu na vahine faaipoipo, no raua i tavini ai au ia oe, e ta ˈu mau tamarii ia haere au, ua ite maitai hoi oe mea nafea to ˈu taviniraa ia oe.”+ 27 Na ô maira Labana: “Mai te peu ua fariihia vau e oe, . . . Ua taa ia ˈu na roto i te mau tapao* e te haamaitai nei Iehova ia ˈu no oe.” 28 E na ô faahou maira oia: “A faaite mai ehia ta ˈu e aufau ia oe, e horoa ˈtu vau.”+ 29 Parau atura Iakoba: “Ua ite oe mea nafea to ˈu taviniraa ia oe e ua aupuru maitai au i ta oe mau nǎnǎ.+ 30 Aita i rahi ta oe hou to ˈu haereraa mai, tera râ ua rahi e ua aere ta oe mau nǎnǎ, e ua haamaitai Iehova ia oe mai to ˈu taeraa mai. Afea ïa vau e rave ai i te tahi mea no to ˈu iho utuafare?”+

31 Na ô maira oia: “Eaha ta ˈu e horoa na oe?” Parau atura Iakoba: “Aita hoê aˈe ta oe e horoa mai! E faaamu faahou vau i ta oe nǎnǎ e e tiai faahou vau ia ratou.+ Teie noa râ ta oe e rave no ˈu: 32 E haere au na roto i ta oe nǎnǎ taatoa i teie mahana. E faataa ê oe pauroa te mamoe purepure e te patapata e pauroa te mamoe maereere i rotopu i te mau fanauˈa mamoe oni, e te puaaniho patapata e te purepure i rotopu i te mau puaaniho ufa. Mai teie atu nei, mai tera ta oe e aufau mai ia ˈu.+ 33 E ite iho â oe e mea tia* vau ia haere mai oe i te hoê mahana e hiˈo i ta oe i aufau mai ia ˈu. Pauroa te puaaniho e ere mea purepure e mea patapata i rotopu i te mau puaaniho ufa, e te mamoe e ere mea maereere i rotopu i te mau fanauˈa mamoe oni, mea eiâhia ïa mai te peu tei ia ˈu nei.”

34 Na ô maira Labana: “Na reira ïa! Ia ravehia mai ta oe i parau.”+ 35 I taua mahana ra, faataa ê ihora oia i te mau puaaniho oni toretore e te patapata, e pauroa te puaaniho ufa purepure e te patapata, pauroa te mamoe uouo e pauroa te mamoe maereere i rotopu i te mau fanauˈa mamoe oni, e horoa ˈtura i ta ˈna na tamaiti ia haapao. 36 I muri iho i te reira, haere ihora oia e toru mahana te atea ia Iakoba, e faaamu ihora Iakoba i te toea o te mau nǎnǎ a Labana.

37 Rave ihora Iakoba i te tahi mau amaa lebene, sekadi e aramona apî tei tâpûhia, e panapana ihora i te paa ia itehia te mau vahi uouo o te mau amaa. 38 Tuu ihora oia i taua mau amaa ra ta ˈna i panapana, i mua i te mau animara, i roto i te mau taheraa pape, i roto i te mau farii pape, i reira te mau animara e haere mai ai e inu i te pape, ia ouˈa te paˈe i te ufa i mua i teie mau amaa ia haere mai ratou e inu i te pape.

39 Ouˈa aˈera ïa te paˈe i te ufa i mua i te mau amaa raau, e fanau maira i te mau fanauˈa toretore, purepure e te patapata. 40 Faataa ê ihora Iakoba i te mau fanauˈa mamoe oni e faafariu atura i te mau animara ia hiˈo ratou i te mau animara toretore e pauroa te animara maereere i rotopu i te mau animara a Labana. I muri iho, faataa ê maira oia i ta ˈna iho mau animara, a ore atu ai e amui e ta Labana. 41 E i te mau taime atoa e ouˈa ˈi te paˈe pautuutu i te ufa, e tuu Iakoba i te mau amaa i roto i te mau taheraa pape i mua i te mata o te mau animara, ia ouˈa te paˈe i te ufa i pihai iho i te mau amaa. 42 Mea paruparu anaˈe râ te mau animara, eita ïa oia e tuu i te mau amaa i reira. Na Labana noa ïa te mau animara paruparu, area te mau animara pautuutu, na Iakoba ïa.+

43 E rahi roa maira ta Iakoba faufaa, ua noaa mai hoi ia ˈna te nǎnǎ rahi, te tavini tane, te tavini vahine, te kamela e te asini.+

31 I muri aˈe, faaroo ihora Iakoba i te mau parau a na tamaiti a Labana: “Ua rave Iakoba pauroa te faufaa a to tatou metua tane, e no roto i te faufaa a to tatou metua tane i haapue ai oia pauroa teie faufaa.”+ 2 I to Iakoba hiˈoraa i te hohoˈa mata o Labana, ite ihora oia e ere to ˈna huru i nia ia ˈna mai na mua ˈˈe.+ 3 I muri aˈe, parau maira Iehova ia Iakoba: “A hoˈi i te fenua o to mau tupuna e i to mau fetii,+ e ei pihai iho noa vau ia oe.” 4 Poroi ihora Iakoba ia Rahela e ia Lea ia haere mai i ta ˈna mau nǎnǎ, 5 e na ô atura:

“Te ite ra vau e ua taui te huru o to orua metua tane i nia ia ˈu,+ tei pihai iho noa râ te Atua o to ˈu metua tane ia ˈu.+ 6 Ua ite mau â orua iho e ua tavini au i to orua metua tane ma to ˈu puai atoa.+ 7 E ua tamata to orua metua tane i te punu ia ˈu e ua taui i ta ˈna i aufau mai ia ˈu ahuru taime. Aita râ te Atua i vaiiho ia ˈna ia hamani ino ia ˈu. 8 Ia parau o ˈna: ‘O te mau animara purepure ta ˈu e aufau ia oe,’ e fanau mai ïa te nǎnǎ taatoa i te animara purepure. Ia parau râ oia: ‘O te mau animara toretore ta ˈu e aufau ia oe,’ e fanau mai ïa te nǎnǎ taatoa i te animara toretore.+ 9 Mea na reira ïa te Atua i te rave-noa-raa i te nǎnǎ a to orua metua tane, a horoa mai ai na ˈu. 10 A ouˈa ˈi te paˈe i te ufa, hiˈo aˈera vau e ite atura na roto i te hoê moemoeâ e mea toretore, purepure e patapata te mau puaaniho paˈe e ouˈa ra i te ufa.+ 11 E parau maira te melahi a te Atua mau na roto i te moemoeâ: ‘Iakoba!’ Na ô atura vau: ‘Teie au.’ 12 Parau faahou maira oia: ‘A hiˈo na, mea toretore, purepure e patapata te mau puaaniho paˈe atoa e ouˈa ra i te ufa, ua ite hoi au pauroa ta Labana e rave nei ia oe.+ 13 O vau te Atua mau tei fa ia oe i Betela,+ i reira oe i faatavai ai i te hoê pou e i euhe ai ia ˈu.+ I teie nei, a tia, a faarue mai i teie fenua, e a hoˈi i te fenua i fanauhia ˈi oe.’”+

14 Pahono maira Rahela raua Lea: “E faufaa anei te toe ra ta mâua e fatu i roto i te utuafare o to mâua metua tane? 15 E ere anei mâua i te vahine ěê i ta ˈna hiˈoraa, ua hoo hoi oia ia mâua e ua pau te moni tei horoahia ei hoo ia mâua?+ 16 Pauroa te faufaa ta te Atua i rave i to mâua metua tane, na mâua ïa e na ta mâua mau tamarii.+ No reira, a rave i ta te Atua i faaue ia oe.”+

17 Tuu ihora Iakoba i ta ˈna mau tamarii e ta ˈna na vahine faaipoipo i nia iho i te mau kamela,+ 18 e reva ˈtura e ta ˈna mau nǎnǎ atoa e pauroa te taoˈa ta ˈna i haapue,+ ta ˈna mau animara tei noaa mai ia ˈna i Padana-arama, no te haere ia Isaaka to ˈna metua tane i te fenua o Kanaana.+

19 Tera râ, i haere na Labana e hahu i ta ˈna mau mamoe, e eiâ ihora Rahela i te mau tii o te mau atua o te utuafare*+ a to ˈna metua tane.+ 20 Hau atu â, ua haavarevare Iakoba ia Labana ati Arama, aita hoi oia i faaite ia Labana e te opua ra oia e reva. 21 Reva ˈtura oia, haere atura i tera ˈtu pae o te Anavai,*+ o ˈna e to ˈna utuafare e ta ˈna mau faufaa atoa, e haere tia ˈtura i te tuhaa fenua mouˈa o Gileada.+ 22 I te toru o te mahana i faaitehia ˈi ia Labana e ua reva Iakoba. 23 Rave ihora oia i to ˈna mau taeae* na muri ia ˈna e tapapa ihora ia Iakoba, e hitu mahana i muri iho te noaaraa Iakoba ia ˈna i te tuhaa fenua mouˈa o Gileada. 24 Haere maira te Atua ia Labana te ati Arama+ na roto i te hoê moemoeâ i te po+ e parau maira: “A haapao maitai i ta oe e parau ia Iakoba, mea maitai anei aore ra mea ino.”*+

25 Tapiri maira Labana ia Iakoba, i patia na hoi Iakoba i to ˈna fare ie i nia i te mouˈa e i puhapa na Labana e to ˈna mau taeae i te tuhaa fenua mouˈa o Gileada. 26 Parau maira Labana ia Iakoba: “Eaha oe i na reira ˈi? No te aha oe i haavarevare mai ai ia ˈu e i haru ai i ta ˈu na tamahine mai te mau vahine tei hopoi-tîtî-hia i roto i te hoê aroraa? 27 No te aha oe i reva omoˈe ai e i haavarevare mai ai ia ˈu e i ore ai i faaite mai? Ahiri oe i faaite mai, ua tuu ïa vau ia oe ia haere ma te oaoa e ma te himene, ma te tariparau e ma te kinura. 28 Aita râ oe i vaiiho ia ˈu ia apa i ta ˈu mau mootua* e ta ˈu na tamahine. Ua haa oe ma te maamaa. 29 E nehenehe ta ˈu e hamani ino ia oe, tera râ, ua parau mai te Atua o to metua tane ia ˈu inapo ra: ‘A haapao maitai i ta oe e parau ia Iakoba, mea maitai anei aore ra mea ino.’+ 30 I teie nei, ua reva oe no te mea ua hinaaro noa na oe e hoˈi i te utuafare o to metua tane, teie râ, no te aha oe i eiâ ˈi i to ˈu mau atua?”+

31 Na ô atura Iakoba ia Labana: “No te mea ïa i mǎtaˈu na vau, ua manaˈo hoi au: ‘E nehenehe oe e haru i ta oe na tamahine ia ˈu.’ 32 Ia itea mai ia oe te taata tei ia ˈna ra to oe mau atua, e pohe ïa o ˈna. I mua i to tâua mau taeae, a hiˈopoa i ta ˈu, e a rave i ta oe.” Aita râ Iakoba i ite e na Rahela i eiâ i te reira. 33 Tomo ihora ïa Labana i roto i te fare ie o Iakoba, e i roto i te fare ie o Lea, e i roto i te fare ie o na piti tavini vahine,+ aita râ i itea mai ia ˈna te reira. Haere maira oia i rapae i to Lea fare ie, e tomo ihora i roto i to Rahela fare ie. 34 I rave na râ Rahela i te mau tii o te mau atua o te utuafare e i tuu na i te reira i roto i te parahiraa kamela, e te parahi ra oia i nia iho. Paimi ihora ïa Labana na roto i te fare ie taatoa, aita râ i itea mai ia ˈna. 35 Parau maira oia i to ˈna metua tane: “Eiaha oe e riri, to ˈu fatu, no te mea eita ta ˈu e nehenehe e tia i mua ia oe, e maˈi matauhia o te vahine to ˈu.”+ Paimi maitai ihora ïa Labana, aita râ i itea mai ia ˈna i te mau tii o te mau atua o te utuafare.+

36 Riri ihora Iakoba e faahapa ˈtura ia Labana. Na ô atura Iakoba ia Labana: “Eaha ta ˈu hapa, e no teihea hara e onoono ai oe i te tapapa ia ˈu? 37 I teie nei ua paimi oe na roto i ta ˈu mau taihaa atoa, eaha tei itea mai ia oe e na to oe utuafare? A tuu mai i ǒ nei i mua i to ˈu mau taeae e to oe mau taeae, e na ratou e faaoti i rotopu ia tâua. 38 I tera na 20 matahiti i ora ˈi au i ǒ oe, aita te mau fanauˈa a ta oe mau mamoe e ta oe mau puaaniho i marua aˈenei,+ e aita vau i amu aˈenei i te mau mamoe oni o ta oe nǎnǎ. 39 Aita vau i hopoi atu ia oe i te animara tei hahaehia e te mau animara taehae.+ Na ˈu iho e faahoˈi i te pau o te reira. Ia eiâhia te animara i te ao aore ra i te po, e titau mai oe ia ˈu i te tahi faahoˈiraa. 40 I te ao, ua pohe au i te veavea, e i te toˈetoˈe i te po, e aita i topa to ˈu taoto.+ 41 A 20 atura matahiti i ora ˈi au i ǒ oe. Ua tavini au ia oe 14 matahiti no ta oe na tamahine e 6 matahiti no ta oe mau animara, e ua taui noa oe i ta oe i aufau mai ia ˈu ahuru taime.+ 42 Ahiri aita te Atua o to ˈu metua tane,+ te Atua o Aberahama e te Atua ta Isaaka e mǎtaˈu ra,+ i pihai iho ia ˈu, ua tuu noa ïa oe ia ˈu ia haere aita e faufaa i roto i te rima. Ua ite mai te Atua i to ˈu ati e te rohiraa a to ˈu rima, e no reira oia i tamaˈi ai ia oe inapo ra.”+

43 Pahono maira Labana ia Iakoba: “Na tamahine, e tamahine ïa na ˈu, e te mau tamarii, e tamarii ïa na ˈu, e te mau animara, e animara ïa na ˈu, e te mau mea atoa ta oe e hiˈo nei, na ˈu ïa e na ta ˈu na tamahine. E nahea ïa vau e nehenehe ai e rave ino ia raua aore ra i ta raua mau tamarii ta raua i fanau mai? 44 Mai, faaau anaˈe i te hoê faufaa i teie nei, oe e o vau, e e riro te reira ei ite i rotopu ia tâua.” 45 Rave ihora ïa Iakoba i te hoê ofai e faatia aˈera ei pou.+ 46 Parau atura Iakoba i to ˈna mau taeae: “A ohi i te ofai!” Rave aˈera ratou i te ofai e haapue aˈera. I muri iho, tamaa aˈera ratou i reira i te haapueraa ofai. 47 E mairi ihora Labana i te reira i te iˈoa o Iegara-sahaduta,* area Iakoba, mairi ihora ïa i te reira i te iˈoa o Galeeda.*

48 Na ô maira Labana: “E ite teie haapueraa ofai i rotopu ia oe e ia ˈu i teie mahana.” No reira, mairi ihora oia i te reira i te iˈoa o Galeeda,+ 49 e te Pare tiairaa, ua parau hoi oia: “Ia tiai hoi Iehova i rotopu ia oe e ia ˈu ia atea ê tâua te tahi i te tahi. 50 Ia hamani ino noa ˈtu oe i ta ˈu na tamahine e ia rave noa ˈtu oe i te tahi atu mau vahine faaipoipo na oe hau atu i ta ˈu na tamahine, noa ˈtu aita hoê aˈe taata i pihai iho ia tâua, a haamanaˈo o te Atua te ite i rotopu ia oe e ia ˈu.” 51 Na ô faahou maira Labana ia Iakoba: “Teie te haapueraa ofai, e teie te pou ta ˈu i faatia i rotopu ia oe e ia ˈu. 52 E ite teie haapueraa ofai, e e haapapuraa te pou+ e ore au e na nia ˈˈe i teie haapueraa ofai no te hamani ino ia oe, e ore atoa oe e na nia ˈˈe i teie haapueraa ofai e teie pou no te hamani ino ia ˈu. 53 Na te Atua o Aberahama+ e te Atua o Nahora, te Atua o to raua metua tane, e haava i rotopu ia tâua.” E horeo ihora Iakoba i te ora o te Atua ta to ˈna metua tane o Isaaka e mǎtaˈu ra.+

54 I muri iho, pûpû ihora Iakoba i te hoê tusia i nia i te mouˈa e titau manihini atura i to ˈna mau taeae ia tamaa. Tamaa aˈera ïa ratou e taoto ihora i taua po ra i nia i te mouˈa. 55 Tera râ, tia aˈera Labana i nia i te poipoi roa e apa ihora i ta ˈna mau mootua*+ e ta ˈna na tamahine e haamaitai maira ia ratou.+ E reva ˈtura Labana no te hoˈi i ǒ ˈna.+

32 Haere atura Iakoba i to ˈna tere, e farerei maira te mau melahi a te Atua ia ˈna. 2 I to ˈna iho â iteraa ia ratou, parau ihora Iakoba: “Teie te puhapa o te Atua!” Mairi ihora ïa oia i taua vahi ra i te iˈoa o Mahanaima.*

3 Tono ihora Iakoba i te vea na mua ia ˈna i to ˈna tuaana o Esau i te fenua o Seira,+ te tuhaa fenua o Edoma,+ 4 a faaue ai: “Teie ta outou e parau i to ˈu fatu, ia Esau: ‘Te na ô mai ra to tavini o Iakoba: “Mea maoro to ˈu oraraa* i ǒ Labana.+ 5 E ua noaa mai ia ˈu te puaatoro oni, te asini, te mamoe, te tavini tane e tavini vahine,+ e te faatae atu nei au i teie poroi no te faaara i to ˈu fatu, ia fariihia vau e oe.”’”

6 I muri aˈe, hoˈi maira te mau vea ia Iakoba e na ô maira: “Ua farerei matou i to tuaana o Esau e te haere mai ra o ˈna e farerei ia oe, e 400 tane te na muri mai ra ia ˈna.”+ 7 Riaria roa ihora Iakoba e ahoaho roa ihora.+ Vahi ihora oia ei piti puhapa i te mau taata tei na muri mai ia ˈna, oia atoa te nǎnǎ mamoe e te puaaniho, te nǎnǎ puaatoro, e te kamela. 8 E parau ihora oia: “Ia tairi noa ˈtu Esau hoê puhapa, e nehenehe ïa te tahi atu puhapa e ora ˈtu.”

9 I muri iho, parau aˈera Iakoba: “E te Atua o to ˈu metua o Aberahama e te Atua o to ˈu metua tane o Isaaka, e Iehova e, oe tei parau mai ia ˈu: ‘A hoˈi i to fenua e i to mau fetii, e e hamani maitai au ia oe,’+ 10 eita e au ia ˈu, to tavini, to here taiva ore atoa e to haapao maitai atoa,+ inaha ua haere au i tera ˈtu pae o Ioridana e ta ˈu noa turutootoo, e e piti puhapa vau i teie nei.+ 11 A faaora ia ˈu, ta ˈu ïa e pure nei ia oe,+ i te rima o to ˈu tuaana o Esau, te riaria nei hoi au ia ˈna aˈunei o ˈna e haere mai ai e tairi ia ˈu,+ te mau metua vahine atoa e ta ratou mau tamarii. 12 E ua parau oe: ‘E hamani maitai iho â vau ia oe, e e faarahi au i to huaai mai te one tahatai, mea rahi roa hoi e ore e pau ia taio.’”+

13 E faaea ihora oia i reira i taua po ra. Rave ihora oia vetahi o ta ˈna mau animara ei ô na Esau to ˈna tuaana:+ 14 200 puaaniho ufa, 20 puaaniho oni, 200 mamoe ufa, 20 mamoe oni, 15 30 maiaa kamela e ta ratou mau fanauˈa, 40 puaatoro ufa, 10 puaatoro oni, 20 asini ufa e 10 asini oni.+

16 Horoa ˈtura oia i te reira i ta ˈna mau tavini, hoê nǎnǎ i muri iho i te tahi, e parau atura ia ratou: “A haere i tera ˈtu pae o te anavai na mua ia ˈu, e ia faataa outou i te hoê area i rotopu i tera e tera nǎnǎ.” 17 Faaue atoa ˈtura oia i te tavini matamua: “Ia farerei noa mai Esau to ˈu tuaana ia oe e ia ui mai oia: ‘O vai to oe fatu, e te haere ra oe ihea, e na vai teie mau animara i mua ia oe?,’ 18 e parau ïa oe: ‘Na to tavini, na Iakoba. E ô teie na to ˈu fatu, na Esau,+ e inaha, o ˈna atoa to muri ia matou.’” 19 E faaue atoa ˈtura oia i te piti, te toru e te feia atoa e apee ra i te mau nǎnǎ: “Mai tera outou e paraparau ai ia Esau ia farerei outou ia ˈna. 20 E ia parau atoa outou: ‘Teie to tavini o Iakoba to muri ia matou.’” Ua na ô hoi oia: ‘Ia tamǎrû vau ia ˈna ma te afai i te ô na mua ia ˈu,+ e ia ite au ia ˈna i muri iho, e farii maitai mai paha ïa o ˈna ia ˈu.’ 21 Arataihia aˈera te ô i tera ˈtu pae o te anavai na mua ia ˈna, faaea ihora râ Iakoba i taua po ra i te puhapa.

22 I muri iho i taua po ra, tia aˈera oia i nia e rave ihora i ta ˈna na piti vahine faaipoipo+ e ta ˈna na piti tavini vahine+ e ta ˈna na tamaiti 11, e haere atura i tera ˈtu pae o te tahora o Iaboka na te vahi papaˈu.+ 23 Rave ihora ïa oia ia ratou e aratai atura ia ratou i tera ˈtu pae o te tahora,* e hopoi atoa ˈtura i ta ˈna mau faufaa atoa.

24 I muri aˈe, faaea noa ihora Iakoba o ˈna anaˈe. E taputô maira te hoê tane ia ˈna e ao noa aˈera.+ 25 I to ˈna iteraa eita oia e upootia, taumi ihora oia i te opiraa o to ˈna huha, e taa ihora te huha o Iakoba i to raua taputôraa.+ 26 I muri iho i te reira, parau maira oia: “A tuu ia ˈu ia haere, te ao ra hoi.” Na ô atura Iakoba: “Eita vau e tuu ia oe ia haere ia ore oe e haamaitai ia ˈu.”+ 27 Parau maira oia: “O vai to oe iˈoa?” Na ô atura oia: “O Iakoba.” 28 Parau maira oia: “E ere o Iakoba faahou to iˈoa, o Iseraela*+ râ, ua taputô hoi oe e te Atua+ e te taata atoa, e ua upootia oe.” 29 Ani atura Iakoba: “A faaite mai na i to iˈoa.” Na ô atura râ oia: “Eaha oe e ani mai ai i to ˈu iˈoa?”+ Haamaitai maira oia ia ˈna i reira. 30 Mairi ihora ïa Iakoba i taua vahi ra i te iˈoa o Peniela,*+ ua parau hoi oia: “Ua ite au i te aro o te Atua, ua faahereherehia râ to ˈu ora.”+

31 E hiti maira te mahana a haere ai oia na pihai iho ia Penuela,* mea teˈiteˈi râ oia ia haere no to ˈna huha.+ 32 No reira tae roa mai i teie mahana, e ore te mau tamarii Iseraela e amu i te uaua rahi o te huha o te hoê animara, i te opiraa o te huha, no te mea ua taumihia te opiraa o to Iakoba huha i te uaua rahi o te huha.

33 Tera râ, hiˈo aˈera Iakoba e ite atura ia Esau e haere mai ra, e 400 tane te na muri mai ra ia ˈna.+ Faataa ê ihora oia i te mau tamarii, ta Lea, ta Rahela e ta na piti tavini vahine.+ 2 Tuu ihora oia i na tavini vahine e ta raua mau tamarii i mua,+ ia Lea e ta ˈna mau tamarii i muri mai,+ e ia Rahela+ raua Iosepha i muri roa. 3 Haere ihora oia na mua ia ratou e tipapa ihora i raro i te fenua e hitu taime a piri roa ˈtu ai oia i to ˈna tuaana.

4 Tera râ, horo maira Esau e farerei ia ˈna, e tauahi maira e apa maira ia ˈna, e taˈi aˈera raua. 5 I to ˈna hiˈoraa e iteraa i te mau vahine e te mau tamarii, parau maira Esau: “O vai ma teie tei na muri mai ia oe?” Na ô atura Iakoba: “O te mau tamarii ta te Atua i horoa noa mai na to tavini.”+ 6 Haere maira na tavini vahine e ta raua mau tamarii e tipapa ihora i raro, 7 e haere atoa maira Lea e ta ˈna mau tamarii e tipapa ihora i raro. E haere maira Iosepha e o Rahela e tipapa ihora i raro.+

8 Parau maira Esau: “Eaha oe i tono mai ai i te taata e te animara ta ˈu i farerei?”+ Pahono atura oia: “Ia fariihia vau e to ˈu fatu.”+ 9 Parau maira Esau: “Mea rahi roa ta ˈu faufaa, to ˈu teina.+ A tapea noa i ta oe.” 10 Tera râ, na ô atura Iakoba: “Eiaha na. Ua fariihia vau e oe, e rave ïa oe i ta ˈu ô i to ˈu rima, ua hopoi mai hoi au i te reira ia nehenehe au e ite i to aro. E ua ite au i to aro, mai te huru ra ua ite au i te aro o te Atua, inaha ua farii mai oe ia ˈu ma te oaoa.+ 11 A rave na i te ô ei haamaitairaa na ˈu ia oe, tei hopoihia ˈtu na oe,+ ua hamani maitai hoi te Atua ia ˈu, e pauroa ta ˈu e hinaaro mau ra, te vai ra ta ˈu.”+ E onoono noa ˈtura oia, e rave ihora Esau i te reira.

12 I muri iho, parau maira Esau: “Mai, haere anaˈe, e e na mua vau ia oe i te haere.” 13 Tera râ, na ô atura Iakoba: “Ua ite to ˈu fatu e rohirohi hanoa te mau tamarii,+ e e maiaa mamoe e maiaa puaatoro ta ˈu e ta ratou mau fanauˈa. Ia aratai-vitiviti-roa-hia ratou hoê noa mahana, e pohe te nǎnǎ taatoa. 14 Ia na mua na to ˈu fatu i ta ˈna tavini i te haere, e haere mǎrû noa ˈtu râ vau hoê â haereraa e ta ˈu mau animara e te mau tamarii e tae roa i Seira+ i to ˈu fatu.” 15 Parau maira Esau: “E vaiiho mai au vetahi o to ˈu mau taata ia oe nei.” Na ô atura oia: “No te aha hoi? Ia fariihia vau e to ˈu fatu, ua navai ïa.” 16 I taua mahana ra, haere atura Esau i to ˈna tere no te hoˈi i Seira.

17 E reva ˈtura Iakoba i Sukota,+ e hamani ihora i te hoê nohoraa no ˈna e faatia aˈera i te tamaru no ta ˈna mau animara. No reira oia i mairi ai i taua vahi ra i te iˈoa o Sukota.*

18 I muri aˈe i to ˈna faarueraa ia Padana-arama,+ tae maitai atura Iakoba i te oire o Sekema+ i te fenua o Kanaana,+ e puhapa ihora i reira i pihai iho i te oire. 19 Noaa maira ia ˈna te tahi tâpû fenua i reira oia i te patiaraa i to ˈna fare ie, i te mau tamaiti a Hamora, te metua tane o Sekema, no 100 kesita.*+ 20 I reira, faatia aˈera oia i te hoê fata e parau ihora i te reira Atua, te Atua o Iseraela.+

34 Tera râ, ua matau Dina te tamahine a Iakoba na Lea,+ i te haere na muri* i te mau potii o taua fenua ra.+ 2 I to Sekema, te tamaiti a Hamora te ati Hevi,+ e raatira o taua fenua ra, iteraa ia ˈna, rave ihora oia ia ˈna, taoto ihora ia ˈna e mafera ihora ia ˈna. 3 E maamaahia ihora oia ia Dina, te tamahine a Iakoba, here ihora i te potii e taparuparu maira ia ˈna.* 4 Parau atura Sekema ia Hamora+ to ˈna metua tane: “A faanaho e ia riro tera potii ei vahine faaipoipo na ˈu.”

5 I to Iakoba faarooraa e ua viivii Dina ta ˈna tamahine ia Sekema, te tiai ra ta ˈna mau tamaiti i ta ˈna mau animara i te vahi aihere. Mamû noa ihora Iakoba e hoˈi noa maira ratou. 6 I muri aˈe, haere atura Hamora, te metua tane o Sekema, e paraparau ia Iakoba. 7 Tera râ, i te faarooraa iho â te mau tamaiti a Iakoba i te reira, hoˈi maira ratou na te vahi aihere. Ua inoino e ua riri roa ratou, no te mea ua faahaama Sekema ia Iseraela i te taotoraa i te tamahine a Iakoba,+ e ohipa ino hoi.+

8 Parau atura Hamora ia ratou: “Te hinaaro roa nei* ta ˈu tamaiti o Sekema i ta outou tamahine. A horoa mai na ia ˈna ei vahine faaipoipo na ˈna, 9 e a taati mai ia matou na roto i te faaipoiporaa.* A horoa mai i ta outou mau tamahine na matou, e a rave i ta matou mau tamahine na outou.+ 10 E nehenehe outou e faaea mai i ǒ matou, e e vata te fenua no outou. A faaea mai e a rave i ta outou ohipa tapihooraa e a noho i ǒ nei.” 11 Parau atura Sekema i te metua tane o Dina e i to ˈna mau tuane: “Ia fariihia vau e outou, e horoa ˈtu vau i te mau mea atoa ta outou e ani mai. 12 E nehenehe outou e ani mai i te hoê tino moni rahi roa no te faaipoiporaa e te hoê ô.+ Ua ineine au i te horoa ˈtu i te mau mea atoa ta outou e parau mai. A horoa noa mai i te potii ei vahine faaipoipo na ˈu.”

13 E pahono maira ta Iakoba mau tamaiti ia Sekema e ia Hamora to ˈna metua tane ma te haavare, no te mea ua viivii Dina to ratou tuahine ia Sekema. 14 Parau maira ratou ia raua: “Eita ta matou e nehenehe e na reira, e horoa i to matou tuahine na te hoê tane aita i peritomehia,*+ e haamaraa hoi te reira no matou. 15 I teie noa titauraa e farii ai matou: ia riro outou mai ia matou ma te peritome pauroa te tane i rotopu ia outou.+ 16 I reira ïa matou e horoa ˈtu ai i ta matou mau tamahine na outou, e e rave matou i ta outou mau tamahine na matou, e e faaea matou i ǒ outou, a riro atu ai tatou ei hoê noa nunaa. 17 Ia ore râ outou e faaroo mai ma te ore e peritome ia outou, e rave ïa matou i to matou tuahine, a haere atu ai.”

18 Au aˈera Hamora+ raua Sekema, ta Hamora tamaiti,+ i taua mau parau ra. 19 Aita te tane apî i faataere i te rave i ta ratou i ani mai,+ no te mea ua au roa oia i ta Iakoba tamahine, e o ˈna te tane faatura-roa-hia o te utuafare taatoa o to ˈna metua tane.

20 Haere aˈera ïa Hamora raua Sekema ta ˈna tamaiti i te uputa o te oire e parau atura i te mau tane o to raua oire:+ 21 “Te hinaaro ra tera mau taata e vai hau noa e o tatou. Ia faaea mai ratou e ia rave i ta ratou ohipa tapihooraa i to tatou fenua, mea huru rahi hoi te fenua eita e apǐ ia ratou. E nehenehe tatou e rave i ta ratou mau tamahine ei vahine faaipoipo na tatou, e e nehenehe tatou e horoa i ta tatou mau tamahine na ratou.+ 22 I teie noa titauraa e farii ai tera mau taata i te faaea mai i ǒ tatou ia riro tatou ei hoê noa nunaa: ia peritomehia pauroa te tane i rotopu ia tatou mai ia ratou tei peritomehia.+ 23 E ore anei ta ratou mau faufaa, ta ratou mau taoˈa, e ta ratou mau animara atoa e mahere ia tatou? E farii anaˈe ïa i ta ratou aniraa, a faaea mai ai ratou i ǒ tatou.” 24 Faaroo aˈera pauroa te taata tei putuputu i te uputa o te oire ia Hamora e ia Sekema ta ˈna tamaiti, e peritomehia ˈtura pauroa te tane, pauroa tei putuputu i te uputa o te oire.

25 Tera râ, i te toru o te mahana, a mauiui noa ˈi ratou, rave ihora e piti tamaiti a Iakoba, Simeona raua Levi, na tuane o Dina,+ i ta raua iho ˈoˈe e tomo aˈera i roto i te oire ma te ore hoê i ite noa ˈˈe i ta raua opuaraa, e haapohe atura pauroa te tane.+ 26 Haapohe aˈera raua ia Hamora e ia Sekema ta ˈna tamaiti i te ˈoˈe, e rave aˈera ia Dina mai roto mai i te fare o Sekema e reva ˈtura. 27 Haere maira te tahi atu mau tamaiti a Iakoba e ite aˈera i te mau tane tei haapohehia e haru aˈera i to taua oire ra, no te mea ua viivii to ratou tuahine ia ratou.+ 28 Rave aˈera ratou i ta ratou mau mamoe e puaaniho, ta ratou mau puaatoro, ta ratou mau asini, e te mau mea atoa i roto i te oire e i rapae. 29 Rave atoa aˈera ratou pauroa ta ratou faufaa, hopoi tîtî aˈera pauroa ta ratou tamarii rii e ta ratou mau vahine faaipoipo, e haru atura i te mau mea atoa i roto i te mau fare.

30 Parau maira Iakoba ia Simeona e ia Levi:+ “Ua hopoi mai orua i te peapea rahi i nia ia ˈu* a faariro ai ia ˈu ei faufauraa na te mau taata o teie fenua, te ati Kanaana e te ati Perizi. Aita vau i rahi, e e amui mau â ratou no te aro ia ˈu, a mou atu ai au, o vau e to ˈu utuafare.” 31 Tera râ, na ô atura raua: “Mea tano anei ïa ia faarirohia to mâua tuahine mai te hoê vahine taiata?”

35 I muri iho i te reira, parau maira te Atua ia Iakoba: “A tia, a pauma i Betela+ e faaea i reira, e a hamani i te hoê fata na te Atua mau i reira, tei fa mai ia oe a horo ê ai oe ia Esau to tuaana.”+

2 Na ô atura Iakoba i to ˈna utuafare e i te feia atoa tei na muri mai ia ˈna: “A tatara i te mau atua ěê i rotopu ia outou,+ a tamâ ia outou e a taui i to outou ahu, 3 e e tia anaˈe, a pauma ˈtu ai i Betela. I reira vau e hamani ai i te hoê fata na te Atua mau, tei pahono mai ia ˈu i te mahana i ahoaho ai au, e tei vai noa i pihai iho ia ˈu i te mau vahi atoa* ta ˈu i haere.”+ 4 Horoa maira ratou ia Iakoba pauroa te atua ěê ia ratou ra e te mau tapea tariˈa i nia i to ratou tariˈa, e huna ihora Iakoba i te reira i raro aˈe i te tumu raau rahi i pihai iho ia Sekema.

5 A reva ˈi ratou i to ratou tere, roohia ihora te mau oire ati aˈe ia ratou i te riaria i te Atua, a ore atu ai ratou e aˈuaˈu i te mau tamarii a Iakoba. 6 I muri aˈe, tae atura Iakoba i Luza,+ oia hoi i Betela, i te fenua o Kanaana, o ˈna e te feia atoa tei na muri mai ia ˈna. 7 I reira, hamani ihora oia i te hoê fata e mairi ihora i taua vahi ra i te iˈoa o Ela-betela,* no te mea i reira to te Atua mau faaiteraa mai ia ˈna ia Iakoba, a horo ê ai oia i to ˈna tuaana.+ 8 I muri aˈe, pohe ihora Debora,+ te vahine tei hii ia Rebeka, e hunahia ihora oia i te tumu mouˈa i Betela i raro aˈe i te hoê tumu alona. Mairi ihora ïa oia i taua tumu raau ra i te iˈoa o Alona-bakuta.*

9 Fa faahou maira te Atua ia Iakoba a haere ai Iakoba mai Padana-arama mai e haamaitai maira ia ˈna. 10 Parau maira te Atua: “O Iakoba+ to iˈoa. E ore oe e pii-faahou-hia Iakoba, o Iseraela râ to iˈoa.” E mairi ihora oia ia ˈna i te iˈoa o Iseraela.+ 11 Parau faahou maira te Atua: “O vau te Atua Manahope.+ Ia tamariihia oe e ia rahi. Mea rahi te nunaa o te na roto mai ia oe,+ e mea rahi te arii e na roto mai ia oe.+ 12 E te fenua ta ˈu i horoa no Aberahama e no Isaaka, e horoa ˈtu vau no oe, no to huaai atoa i muri mai ia oe.”+ 13 E vaiiho maira te Atua ia ˈna i te vahi i paraparau ai oia ia ˈna.

14 Faatia aˈera ïa Iakoba i te hoê pou i te vahi i paraparau ai te Atua ia ˈna, e pou ofai, e ninii ihora i te tusia uaina i nia iho e te monoˈi i muri iho.+ 15 E tamau noa ˈtura Iakoba i te parau i te vahi i paraparau ai te Atua ia ˈna, o Betela.+

16 Reva ˈtura ratou mai Betela. Mea atea â ratou ia Epherata i haamata ˈi Rahela i te fanau, e mea fifi roa no ˈna ia fanau. 17 Tera râ, a tautoo ai oia i te fanau mai i ta ˈna tamarii, parau maira te vahine faafanau: “Eiaha oe e taiâ, e noaa hoi ta oe teie atoa tamaiti.”+ 18 A faarue mai ai oia* (fatata hoi oia i te pohe), mairi ihora oia ia ˈna i te iˈoa o Beni-oni,* mairi ihora râ to ˈna metua tane ia ˈna i te iˈoa o Beniamina.*+ 19 Pohe ihora Rahela e hunahia ihora i te eˈa e haere tia ˈtu i Epherata, oia hoi Betelehema.+ 20 Faatia aˈera Iakoba i te hoê pou i nia i to ˈna menema. O te pou o to Rahela menema tae roa mai i teie mahana.

21 I muri iho i te reira, reva ˈtura Iseraela e patia ihora i to ˈna fare ie i te atea ê i te pare o Edera. 22 A faaea ˈi Iseraela i taua fenua ra, taoto ihora Reubena ia Bila te vahine faaipoipo tavini* a to ˈna metua tane, e faaroo ihora Iseraela i te reira.+

Hoê ahuru ma piti tamaiti ta Iakoba. 23 Na tamaiti a Lea, o Reubena+ te matahiapo a Iakoba, i muri mai o Simeona, Levi, Iuda, Isakara e Zebuluna. 24 Na tamaiti a Rahela, o Iosepha raua Beniamina. 25 Na tamaiti a Bila, ta Rahela tavini vahine, o Dana raua Naphatali. 26 E na tamaiti a Zilipa, ta Lea tavini vahine, o Gada raua Asera. Tera ta Iakoba mau tamaiti, tei fanauhia i Padana-arama.

27 I muri aˈe, tae atura Iakoba i te vahi to reira to ˈna metua tane o Isaaka i Mamera,+ i Kiriata-araba, oia hoi Heberona, i reira Aberahama e Isaaka atoa i faaea ˈi ei taata ěê.+ 28 Ua ora Isaaka 180 matahiti.+ 29 Puhi ihora Isaaka i to ˈna aho hopea, pohe atura e amuihia ˈtura i to ˈna mau taata,* ei ruhiruhia tei fanaˈo i te hoê oraraa maitai.* E huna ihora ta ˈna na tamaiti o Esau raua Iakoba ia ˈna.+

36 Teie te aamu o Esau, oia hoi Edoma.+

2 Rave ihora Esau i ta ˈna na vahine faaipoipo i rotopu i te mau tamahine no Kanaana: Ada+ te tamahine a Elona te ati Heta,+ e Oholibama+ te tamahine a Anaha, te mootua a Zibeona te ati Hevi, 3 e Basemata+ ta Isemaela tamahine, te tuahine o Nebaiota.+

Tera te mau tamaiti a Esau, tei fanauhia mai i te fenua o Kanaana. 6 I muri aˈe, rave ihora Esau i ta ˈna mau vahine faaipoipo, ta ˈna mau tamaiti, ta ˈna mau tamahine, pauroa te taata o to ˈna utuafare, pauroa ta ˈna mamoe e puaaniho e pauroa te tahi atu animara ta ˈna, e pauroa te faufaa ta ˈna i haapue+ i te fenua o Kanaana, e haere atura i te tahi atu fenua i te atea ê ia Iakoba to ˈna teina.+ 7 Ua rahi roa hoi ta raua mau faufaa a ore atu ai raua e nehenehe e ora i te hoê â vahi, e no ta raua mau nǎnǎ animara, aita i navai te maa i te fenua i faaea ˈi raua.* 8 Faaea ˈtura ïa Esau i te tuhaa fenua mouˈa o Seira.+ Esau, o Edoma+ ïa.

9 E tera te aamu o Esau te metua o te ati Edoma i te tuhaa fenua mouˈa o Seira.+

10 Teie te iˈoa o na tamaiti a Esau: Eliphaza te tamaiti a Ada ta Esau vahine faaipoipo, e Reuela te tamaiti a Basemata ta Esau vahine faaipoipo.+

11 Na tamaiti a Eliphaza, o Temana,+ Omara, Zepho, Gatama e Kenaza.+ 12 Riro maira Timena ei vahine faaipoipo tavini na Eliphaza, ta Esau tamaiti. I muri aˈe, fanau maira oia ia Amaleka+ na Eliphaza. E mootua teie na Ada, ta Esau vahine faaipoipo.

13 Teie te mau tamaiti a Reuela: Nahata, Zera, Sama e Miza. E mootua teie na Basemata,+ ta Esau vahine faaipoipo.

14 Teie te mau tamaiti a Oholibama te tamahine a Anaha, te mootua a Zibeona, ta Esau vahine faaipoipo, ta ˈna i fanau na Esau: Ieusa, Ialama e Kora.

15 Teie te mau raatira no roto mai i na tamaiti a Esau:+ Na tamaiti a Eliphaza, ta Esau matahiapo: raatira Temana, raatira Omara, raatira Zepho, raatira Kenaza,+ 16 raatira Kora, raatira Gatama e raatira Amaleka. Tera te mau raatira no roto mai ia Eliphaza+ i te fenua o Edoma. E mootua teie na Ada.

17 Teie te mau tamaiti a Reuela, ta Esau tamaiti: raatira Nahata, raatira Zera, raatira Sama e raatira Miza. Tera te mau raatira no roto mai ia Reuela i te fenua o Edoma.+ E mootua teie na Basemata, ta Esau vahine faaipoipo.

18 E teie te mau tamaiti a Oholibama, ta Esau vahine faaipoipo: raatira Ieusa, raatira Ialama e raatira Kora. Tera te mau raatira no roto mai ia Oholibama te tamahine a Anaha, ta Esau vahine faaipoipo.

19 Tera ïa te mau tamaiti a Esau, pii-atoa-hia Edoma,+ e tera te mau raatira no roto mai ia ratou.

20 Teie te mau tamaiti a Seira te ati Hori, e parahi ra i taua fenua ra:+ Lotana, Sobala, Zibeona, Anaha,+ 21 Disona, Etera e Disana.+ O ratou te mau raatira no roto mai i te ati Hori, na tamaiti a Seira, i te fenua o Edoma.

22 Na tamaiti a Lotana, o Hori raua Hemama, e o Timena+ te tuahine o Lotana.

23 Teie te mau tamaiti a Sobala: Alavana, Manahata, Ebala, Sepho e Onama.

24 Teie na tamaiti a Zibeona:+ Aia e Anaha. Na teie Anaha i ite mai i te mau pape pihaa veavea i te medebara, a tiai ai oia i te mau asini a Zibeona to ˈna metua tane.

25 Teie na tamarii a Anaha: Disona e Oholibama te tamahine a Anaha.

26 Teie te mau tamaiti a Disona: Hemedana, Esebana, Iterana e Kerana.+

27 Teie te mau tamaiti a Etera: Bilihana, Zaavana e Akâna.

28 Teie na tamaiti a Disana: Ûza e Arana.+

29 Teie te mau raatira no roto mai i te ati Hori: raatira Lotana, raatira Sobala, raatira Zibeona, raatira Anaha, 30 raatira Disona, raatira Etera e raatira Disana.+ O ratou te mau raatira no roto mai i te ati Hori i te fenua o Seira.

31 Teie te mau arii tei faatere i te fenua o Edoma+ hou te tahi arii i faatere ai i te ati* Iseraela.+ 32 Na Bela tamaiti a Beora i faatere i Edoma, e o Dinehaba te iˈoa o to ˈna oire. 33 I te poheraa Bela, na Iobaba tamaiti a Zera no Bozara i faatere ei mono ia ˈna. 34 I te poheraa Iobaba, na Husama no te fenua o te ati Temana i faatere ei mono ia ˈna. 35 I te poheraa Husama, na Hadada tamaiti a Bedada, tei upootia i nia i te ati Midiana+ i te tuhaa fenua o Moabi, i faatere ei mono ia ˈna, e o Avite te iˈoa o to ˈna oire. 36 I te poheraa Hadada, na Samala no Masereka i faatere ei mono ia ˈna. 37 I te poheraa Samala, na Saura no Rehobota i te hiti anavai i faatere ei mono ia ˈna. 38 I te poheraa Saura, na Baala-hanana te tamaiti a Akabora i faatere ei mono ia ˈna. 39 I te poheraa Baala-hanana te tamaiti a Akabora, na Hadara i faatere ei mono ia ˈna. O Pau te iˈoa o to ˈna oire, e o Mehetabela te iˈoa o ta ˈna vahine faaipoipo, te tamahine a Matereda te tamahine a Mezahaba.

40 Teie te iˈoa o te mau raatira no roto mai ia Esau ia au i to ratou utuafare, ia au i to ratou vahi, ia au i to ratou iˈoa: raatira Timena, raatira Alava, raatira Ieteta,+ 41 raatira Oholibama, raatira Ela, raatira Pinona, 42 raatira Kenaza, raatira Temana, raatira Mibezara, 43 raatira Magadiela e raatira Irama. Tera te mau raatira no roto mai i te ati Edoma ia au i to ratou nohoraa i te fenua i fatuhia e ratou.+ O Esau ïa teie, te metua o te ati Edoma.+

37 Faaea noa ˈtura Iakoba i te fenua o Kanaana, i reira to ˈna metua tane i te oraraa ei taata ê.+

2 Teie te aamu o Iakoba.

I te 17raa o to Iosepha+ matahiti, te tiai ra te taurearea i te mau mamoe+ e na tamaiti a Bila+ e na tamaiti a Zilipa,+ na vahine faaipoipo a to ˈna metua tane. E faaite ihora Iosepha i ta ratou ohipa ino i to ratou metua tane. 3 Mea here hoi na Iseraela ia Iosepha hau aˈe i te tahi atu mau tamaiti atoa ta ˈna,+ no te mea o ˈna te tamaiti o to ˈna ruhiruhiaraa, e ua faaau oia i te hoê ahu roa nehenehe no ˈna. 4 I to to ˈna mau tuaana iteraa e mea here na to ratou metua tane ia ˈna hau aˈe ia ratou, hae ihora ratou ia ˈna, e aita ˈtura i tia ia ratou ia paraparau ia ˈna ma te mǎrû.

5 I muri aˈe, moemoeâhia ihora Iosepha e faatia ˈtura oia i te reira i to ˈna mau tuaana,+ te tahi atu ïa tumu i hae ai ratou ia ˈna. 6 Parau atura oia: “A faaroo mai na i teie moemoeâ ta ˈu. 7 Te taamu ra tatou i te mau ruru huero maa i ropu i te faaapu i tia mai ai ta ˈu ruru e tia noa ihora, e haaati maira ta outou mau ruru i ta ˈu ruru e tipapa ihora.”+ 8 Na ô maira to ˈna mau tuaana: “E faariro iho â anei oe ia oe ei arii i nia ia matou, a faatere mai ai ia matou?”+ Itea maira ïa ia ratou te tahi atu â tumu e hae ai ia ˈna, no ta ˈna na moemoeâ e no ta ˈna i parau.

9 I muri iho i te reira, moemoeâ-faahou-hia ihora oia, e faatia ˈtura oia i te reira i to ˈna mau tuaana: “Ua moemoeâ-faahou-hia vau. I teie taime, te tipapa ra te mahana e te avaˈe e 11 fetia i mua ia ˈu.”+ 10 I to ˈna faatiaraa i te reira i to ˈna metua tane e to ˈna atoa mau tuaana, tamaˈi maira to ˈna metua tane ia ˈna e na ô maira: “Eaha te auraa o tena moemoeâ ta oe? E haere mai iho â anei au e to oe atoa metua vahine e to oe mau tuaana e tipapa i raro i te fenua i mua ia oe?” 11 E pohehae roa ihora to ˈna mau tuaana ia ˈna,+ area to ˈna metua tane, haapao maite noa ihora ïa oia i taua parau ra.

12 Aratai atura to ˈna mau tuaana i te mau mamoe a to ratou metua tane i te vahi aihere pihai iho ia Sekema.+ 13 I muri iho, na ô maira Iseraela ia Iosepha: “Te tiai ra to mau tuaana i te mau nǎnǎ mamoe pihai iho ia Sekema, e ere anei? A haere mai, e tono vau ia oe ia ratou ra.” Parau atura Iosepha: “Ua ineine au!” 14 Na ô maira oia: “A haere na a hiˈo mea maitai anei to mau tuaana. A hiˈo eaha te huru o te mau mamoe, e a hoˈi mai e faaite ia ˈu.” Tono ihora oia ia ˈna mai te peho o Heberona,+ e haere atura Iosepha i Sekema. 15 I muri iho, farerei maira te hoê tane ia ˈna a haere noa ˈi oia. Ui maira taua tane ra: “Eaha ta oe e imi ra?” 16 Parau atura oia: “Te imi ra vau i to ˈu mau tuaana. A faaite mai na, te tiai ra ratou i te mau nǎnǎ mamoe ihea?” 17 Na ô faahou maira taua tane ra: “Ua reva ratou mai ǒ nei atu. Ua faaroo vau ia ratou i te parauraa: ‘Haere anaˈe i Dotana.’” Tapapa ihora ïa Iosepha i to ˈna mau tuaana e itehia maira ratou i Dotana.

18 Tera râ, ite maira ratou ia ˈna i te atea ê, e hou oia a piri atu ai ia ratou, opua ihora ratou e haapohe ia ˈna. 19 Na ô aˈera ratou te tahi i te tahi: “A hiˈo! Te haere mai ra tera taata moemoeâ.+ 20 Mai, haapohe anaˈe ia ˈna i teie nei, a taora ˈtu ai ia ˈna i roto hoê o na apoo pape. E parau tatou e ua amu te hoê animara taehae ia ˈna. Ei reira tatou e ite ai eaha ˈtura no ta ˈna na moemoeâ.” 21 I to Reubena+ faarooraa i te reira, tamata ihora oia i te faaora ia Iosepha. Parau atura oia: “Eiaha tatou e haapohe ia ˈna.”+ 22 Parau faahou atura oia: “Eiaha e haamanii i te toto.+ A taora ia ˈna i roto i teie apoo pape i roto i te medebara, eiaha râ e rave ino* ia ˈna.”+ Te opua ra oia e faaora ia ˈna no te faahoˈi ia ˈna i to ˈna metua tane.

23 I to Iosepha iho â taeraa ˈtu i to ˈna mau tuaana, huti aˈera ratou i to Iosepha ahu roa, te ahu roa nehenehe i nia iho ia ˈna,+ 24 rave aˈera ia ˈna e huri ihora ia ˈna i roto i te apoo pape. I taua taime ra, aita e pape i roto i te apoo.

25 Parahi ihora ratou no te tamaa. I to ratou hiˈoraa ˈtu, e pǔpǔ ratere ati Isemaela+ te haere mai ra na Gileada mai. Te uta ra ta ratou mau kamela i te tapau nakata, te zuri e te paa raau noˈanoˈa,+ e te pou ra ratou i Aiphiti. 26 Parau atura Iuda i to ˈna mau taeae: “Eaha te apî ia haapohe tatou i to tatou teina, a tapoˈi atu ai i to ˈna toto?+ 27 Mai, hoo anaˈe ia ˈna+ i teie nei i te ati Isemaela, e eiaha tatou e taparahi ia ˈna. E teina hoi o ˈna no tatou, to tatou iˈo.” Faaroo aˈera ratou i to ratou taeae. 28 E i te haereraa mai taua feia hoohoo ra no Midiana,+ huti maira to ˈna mau tuaana ia Iosepha i rapae i te apoo pape, e hoo atura ia ˈna i te ati Isemaela no 20 moni ario.+ Afai aˈera taua mau tane ra ia Iosepha i Aiphiti.

29 I muri iho, i to Reubena hoˈiraa ˈtu i te apoo pape, e to ˈna iteraa e aita Iosepha i roto i te apoo, hahae ihora oia i to ˈna ahu. 30 I to ˈna hoˈiraa mai i to ˈna mau teina, tuô ihora oia: “Aita faahou te tamarii! E o vau, e nahea ïa vau?”

31 Rave aˈera ïa ratou i to Iosepha ahu roa, tupai atura i te hoê puaaniho oni e tutau ihora i te ahu roa i roto i te toto. 32 I muri iho i te reira, faatae atura ratou i te ahu roa nehenehe i to ratou metua tane ma teie poroi: “Teie tei itea mai ia matou. A hiˈopoa na e no to tamaiti anei teie ahu roa aore ra e ere.”+ 33 Hiˈopoa ihora oia i te reira e tuô ihora: “No ta ˈu tamaiti teie ahu roa! Eita e ore e ua amuhia o ˈna e te hoê animara taehae! Papu roa, ua huˈahuˈa roa Iosepha!” 34 Hahae ihora Iakoba i to ˈna ahu, hatua ihora ia ˈna i te ahu oto e oto ihora i ta ˈna tamaiti e rave rahi mahana. 35 E tamata noa ˈtura ta ˈna mau tamaiti atoa e ta ˈna mau tamahine atoa i te tamahanahana ia ˈna, patoi noa maira râ oia i ta ratou tamahanahanaraa, a na ô ai: “E oto vau i ta ˈu tamaiti e pou noa ˈtu vau i te Apoo!”*+ E taˈi noa ˈtura to ˈna metua tane ia ˈna.

36 Tera râ, hoo atura te mau ati Midiana ia Iosepha i Aiphiti ia Potiphara, e tia mana na Pharao+ e raatira atoa o te mau tiai a te arii.+

38 I tera taime, faarue atura Iuda i to ˈna mau taeae e patia ihora i to ˈna fare ie i pihai iho i te faaearaa o te hoê tane ati Adulama o Hira te iˈoa. 2 Ite atura Iuda i te tamahine a te tahi ati Kanaana+ o Sua te iˈoa. Rave ihora oia ia ˈna ei vahine faaipoipo na ˈna, taoto ihora ia ˈna, 3 e hapû maira oia. I muri aˈe, fanau maira oia i te hoê tamaiti, e mairi ihora Iuda ia ˈna i te iˈoa o Era.+ 4 Hapû faahou maira oia, fanau maira i te hoê tamaiti e mairi ihora ia ˈna i te iˈoa o Onana. 5 Fanau faahou maira oia i te hoê tamaiti e mairi ihora oia ia ˈna i te iˈoa o Sela. Tei Akaziba+ o Iuda i te fanauraa mai oia ia ˈna.

6 I muri aˈe, rave ihora Iuda i te hoê vahine, o Tamara+ te iˈoa, ei vahine faaipoipo na Era ta ˈna matahiapo. 7 Mea au ore râ na Iehova ia Era, ta Iuda matahiapo. Haapohe ihora Iehova ia ˈna. 8 No reira, parau atura Iuda ia Onana: “A taoto i te vahine faaipoipo a to tuaana a haapao atu ai i ta oe hopoia ia ˈna ei taeae no ta ˈna tane faaipoipo tei pohe e ia huaaihia to tuaana.”+ 9 Tera râ, ua ite Onana eita taua huaai ra e riro no ˈna.+ No reira, ia taoto oia i te vahine faaipoipo a to ˈna tuaana, e faarue oia i to ˈna pape tane i raro i te repo ia ore to ˈna tuaana ia huaaihia.+ 10 Mea ino ta ˈna i rave i te aro o Iehova, haapohe atoa ihora ïa oia ia ˈna.+ 11 Parau atura Iuda ia Tamara ta ˈna hunoa: “A parahi ei vahine ivi i te fare o to metua tane e ia paari noa mai ta ˈu tamaiti o Sela,” ua manaˈo hoi oia: ‘Aˈunei o ˈna e pohe atoa ˈi mai to ˈna na tuaana.’+ Haere atura Tamara e faaea ihora i te fare o to ˈna metua tane.

12 I muri aˈe, pohe ihora ta Iuda vahine faaipoipo, te tamahine a Sua.+ I te hoperaa to Iuda otoraa, haere atura oia e to ˈna hoa o Hira te ati Adulama+ i to ˈna feia paoti huruhuru mamoe i Timina.+ 13 Parauhia maira Tamara: “Teie to oe metua tane hoovai e pauma mai ra i Timina no te paotiraa huruhuru mamoe.” 14 Tatara ihora ïa oia i to ˈna ahu vahine ivi, puroˈu ihora i to ˈna mata e tuu maira i te hoê ahu tapoˈi i nia ia ˈna. Parahi ihora oia i te tomoraa o Enaima, i te purumu e haere tia ˈtu i Timina, ua ite hoi oia e ua paari mai o Sela, aita râ oia i horoahia ei vahine faaipoipo na ˈna.+

15 I te iteraa ˈtu Iuda ia ˈna, manaˈo ihora oia e vahine taiata, no te mea ua puroˈu oia i to ˈna mata. 16 Tioi atura oia ia ˈna ra i te pae purumu e parau atura: “A faatia na ia taoto vau ia oe,” aita hoi oia i ite o ta ˈna hunoa tera.+ Parau maira râ oia: “Eaha ta oe e horoa mai na ˈu ia taoto oe ia ˈu?” 17 Parau atura oia: “E faatae atu vau i te hoê fanauˈa puaaniho o ta ˈu nǎnǎ.” Tera râ, parau maira oia: “E horoa mai anei oe i te tahi piri taoˈa e ia tae roa mai te reira?” 18 Parau atura oia: “Eaha te piri taoˈa ta ˈu e horoa ˈtu?” Parau maira oia: “To oe tapea rima titiro,+ ta oe taura e ta oe raau i to rima.” Horoa ˈtura oia i te reira ia ˈna e taoto ihora ia ˈna, e hapû maira oia. 19 Tia aˈera oia i nia e reva ˈtura, e tatara ihora oia i to ˈna ahu tapoˈi e oomo maira i to ˈna ahu vahine ivi.

20 Tono atura Iuda i to ˈna hoa ati Adulama+ no te faatae atu i te fanauˈa puaaniho, a rave faahou mai ai i te piri taoˈa i te rima o taua vahine ra, aita râ oia i itea mai ia ˈna. 21 Ua uiui haere oia i te mau tane o taua vahi ra: “Teihea tera vahine taiata* i te pae purumu i Enaima?” Tera râ, ua parau mai ratou: “Aita roa e vahine taiata i ǒ nei.” 22 Hoˈi maira oia ia Iuda ra e parau maira: “Aita roa oia i itea mai ia ˈu, e ua na ô mai hoi to reira mau tane: ‘Aita roa e vahine taiata i ǒ nei.’” 23 Parau atura ïa Iuda: “Ia tapea noa ˈtu oia i te reira na ˈna, ia ore tâua ia faahaamahia i te imi-noa-raa ia ˈna. Ua faatae iho â vau i teie fanauˈa puaaniho, aita râ oia i itea mai ia oe.”

24 Tera râ, piri i te toru avaˈe i muri mai, parauhia maira ia Iuda: “Ua taiata o Tamara ta oe hunoa, e ua hapû atoa oia i ta ˈna taiataraa.” Parau atura ïa Iuda: “Afai atu ia ˈna i rapae e ia taninahia oia.”+ 25 A afaihia ˈtu ai oia i rapae, poroi ihora oia i to ˈna metua tane hoovai: “Ua hapû vau i te tane na ˈna teie mau taoˈa.” Na ô faahou atura oia: “A hiˈopoa na na vai teie tapea rima titiro, teie taura e teie raau.”+ 26 Hiˈopoa atura ïa Iuda i te reira e parau atura: “Mea tia aˈe o ˈna ia ˈu, no te mea aita vau i horoa ia Sela ta ˈu tamaiti ei tane faaipoipo na ˈna.”+ E aita oia i taoto faahou ia ˈna i muri iho.

27 I te taeraa te taime e fanau mai ai oia, e maehaa to roto i to ˈna opu. 28 A fanau mai ai oia, tuu atura hoê i to ˈna rima i rapae, e rave oioi ihora te vahine faafanau i te tahi taura uteute e taamu ihora i nia i to ˈna rima, a na ô ai: “O ˈna na mua tei haere mai i rapae.” 29 Tera râ, i te faahoˈiraa iho â oia i to ˈna rima i roto, o to ˈna ïa taeae tei haere mai i rapae, e tuô atura te vahine faafanau: “E mutu rahi ta oe i faatupu no oe iho!” Mairihia ihora oia i te iˈoa o Pereza.*+ 30 I muri iho, haere maira to ˈna taeae i rapae, to ˈna te rima tei taamuhia i te taura uteute, e mairihia ihora oia i te iˈoa o Zera.+

39 Haapouhia ˈtura Iosepha i Aiphiti,+ e na te hoê tane Aiphiti o Potiphara+ te iˈoa, te hoê tia mana na Pharao e raatira atoa o te mau tiai a te arii, i hoo mai ia ˈna i te ati Isemaela+ tei haapou ia ˈna i reira. 2 Tera râ, tei pihai iho Iehova ia Iosepha.+ No reira, manuïa ihora te mau mea atoa ta ˈna i rave e noaa maira ia ˈna te tahi mau hopoia i te fare o to ˈna fatu no Aiphiti. 3 Ite ihora to ˈna fatu e tei pihai iho Iehova ia ˈna, e te haamanuïa ra Iehova i te mau mea atoa ta ˈna e rave ra.

4 Au-noa-hia ˈtura Iosepha e ana, e riro maira oia ei tiaau tiaturihia na ˈna. Faatoroa ˈtura Potiphara ia ˈna i nia i to ˈna utuafare, e horoa ˈtura e na ˈna e haapao i ta ˈna mau faufaa atoa. 5 Mai te taime i faatoroa ˈi oia ia ˈna i nia i to ˈna utuafare, e i horoa ˈi e na ˈna e haapao i ta ˈna mau faufaa atoa, tamau atura Iehova i te haamaitai i te utuafare o te tane Aiphiti no Iosepha. Ua haamaitai Iehova i ta ˈna mau faufaa atoa i roto i te fare e i rapae.+ 6 I muri aˈe, tuu pauroa ˈtura oia i ta ˈna faufaa e na Iosepha e haapao, e aita ta ˈna e haapeapearaa maori râ no te maa ta ˈna e amu ra. Hau atu â, riro maira Iosepha ei tane pautuutu e te purotu.

7 I muri aˈe i te reira, hiˈo faahinaaro noa maira te vahine faaipoipo a to ˈna fatu ia Iosepha e parau maira: “A taoto ia ˈu.” 8 Tera râ, patoi atura oia e parau atura i te vahine faaipoipo a to ˈna fatu: “Aita to ˈu fatu e haapeapea ra no te mau mea o te fare, e ua tuu pauroa mai i ta ˈna faufaa atoa e na ˈu e haapao. 9 Aita e taata rahi aˈe i roto i teie fare ia ˈu, e aita oia i tapea noa ˈˈe i te tahi mea ia ˈu o oe anaˈe râ, no te mea e vahine faaipoipo oe na ˈna. E nahea ïa vau e nehenehe ai e rave i teie ino rahi, a hara ˈtu ai hoi i te Atua?”+

10 I tera e tera mahana, taparuparu noa maira oia ia Iosepha, aita râ oia i farii noa ˈˈe e taoto ia ˈna aore ra e faaea i pihai iho ia ˈna. 11 I te hoê râ mahana ua haere oia i roto i te fare no te rave i ta ˈna ohipa, aita hoê aˈe tavini i roto i te fare. 12 Haru maira oia ia ˈna i to ˈna ahu e parau maira: “A taoto ia ˈu!” Tera râ, faarue ihora oia i to ˈna ahu i roto i to ˈna rima e horo atura i rapae. 13 I te iteraa iho â o ˈna ua faarue Iosepha i to ˈna ahu i roto i to ˈna rima a horo atu ai i rapae, 14 tuô ihora oia i ta ˈna mau tavini tane e parau atura: “A hiˈo na! Ua afai mai ta ˈu tane i teie tane Hebera i ǒ nei no te faariro ia tatou ei faaoooraa. Ua haere mai oia ia ˈu no te taoto ia ˈu, tera râ tuô haapuai ihora vau. 15 I te faarooraa iho â oia ia ˈu i te faateiteiraa i to ˈu reo e te tuôraa, faarue ihora oia i to ˈna ahu i pihai iho ia ˈu e horo atura i rapae.” 16 I muri iho, vaiiho noa ihora taua vahine ra i to Iosepha ahu i pihai iho ia ˈna e hoˈi noa maira to ˈna fatu i te fare.

17 Faatia ˈtura oia ia ˈna i taua noa parau ra: “Te tavini Hebera ta oe i afai mai i ǒ nei, ua haere mai ia ˈu no te faariro ia ˈu ei faaoooraa. 18 Tera râ, i te faateiteiraa iho â vau i to ˈu reo e te tuôraa vau, faarue ihora oia i to ˈna ahu i pihai iho ia ˈu e horo atura i rapae.” 19 I te faarooraa iho â to ˈna fatu i ta ta ˈna vahine faaipoipo i parau mai ia ˈna: “Ua na ô ta oe tavini ia ˈu,” ura ihora o ˈna i te riri. 20 Rave ihora ïa to Iosepha fatu ia ˈna e tuu atura i roto i te fare tapearaa to reira te feia i tapeahia e te arii, e faaea ihora oia i reira, i te fare tapearaa.+

21 Tera râ, vai noa ˈtura Iehova i pihai iho ia Iosepha, e tamau atura oia i te faaite ia ˈna i te here taiva ore e te haamaitai ia ˈna ia fariihia oia e te raatira o te fare tapearaa.+ 22 Horoa ˈtura te raatira o te fare tapearaa e na Iosepha e tiaau i te feia atoa i tapeahia, e pauroa te ohipa ta ratou e rave ra i roto, na ˈna ïa i faaue.+ 23 Aita roa ˈtu te raatira o te fare tapearaa i haapeapea noa ˈˈe no tei horoahia e na Iosepha e haapao, tei pihai iho hoi Iehova ia Iosepha e ua haamanuïa Iehova i te mau mea atoa ta ˈna e rave ra.+

40 I muri aˈe i te reira, hara ˈtura te raatira hopoi auˈa uaina+ a te arii o Aiphiti e te raatira eu faraoa i to raua fatu, te arii o Aiphiti. 2 Riri roa ihora Pharao i to ˈna na taata toroa e piti, te raatira hopoi auˈa uaina e te raatira eu faraoa,+ 3 e huri atura oia ia raua i roto i te fare tapearaa a te raatira o te mau tiai,+ i reira Iosepha i te tapearaahia.+ 4 Faaue atura te raatira o te mau tiai ia Iosepha ia faaea i pihai iho ia raua e ia haapao ia raua,+ e mau ihora raua i te fare tapearaa maa taime.*

5 Moemoeâhia ˈtura te hopoi auˈa uaina e te eu faraoa a te arii o Aiphiti a mau ai raua i te fare tapearaa i te hoê â po, e e tatararaa to na moemoeâ tataitahi. 6 I te poipoi aˈe, i te haereraa mai Iosepha e to ˈna iteraa ia raua, e au ra e te ahoaho ra raua. 7 Ui maira ïa oia ia raua: “No te aha e mata peapea ˈi to orua?” 8 Parau aˈera raua: “Ua moemoeâhia mâua tataitahi, aita râ e taata no te tatara mai i te auraa.” Parau maira Iosepha ia raua: “E ere anei na te Atua e tatara i te auraa o te moemoeâ?+ Faatia mai na.”

9 Faatia ˈtura ïa te raatira hopoi auˈa uaina i ta ˈna moemoeâ ia Iosepha: “I roto i ta ˈu moemoeâ, e tumu vine to mua ia ˈu. 10 E toru amaa apî to taua tumu vine ra, e a oteo ai, itehia maira te tiare, e horoa maira i te peenave vine para. 11 E te tapea ra vau i te auˈa a Pharao, rave maira vau i te peenave vine e umu ihora vau i roto i te auˈa a Pharao. I muri iho, tuu atura vau i te auˈa i roto i te rima o Pharao.” 12 Parau maira ïa Iosepha: “Teie to ˈna tatararaa: na toru amaa apî, e toru ïa mahana. 13 I roto e toru mahana, e tuu Pharao ia oe,* a faahoˈi ai ia oe i to oe toroa,+ e e hopoi oe i te auˈa a Pharao i to ˈna rima mai ta oe i rave na mua ˈˈe ei hopoi auˈa uaina na ˈna.+ 14 Tera râ, ia haamanaˈo oe ia ˈu ia maitai mai to oe tupuraa. A hamani maitai mai na ia ˈu e a faaite i to ˈu parau ia Pharao, ia tuu oia ia ˈu i rapae i teie vahi. 15 Ua haruhia hoi au i te fenua o te Hebera,+ e aita vau i rave i te tahi noa ˈˈe ohipa i tano ai ratou i te huri ia ˈu i roto i te fare tapearaa.”*+

16 I te iteraa te raatira eu faraoa e ohipa maitai ta Iosepha i faahiti i roto i ta ˈna tatararaa, parau atura oia ia Iosepha: “E moemoeâ atoa ta ˈu, e toru farii faraoa uouo to nia iho i to ˈu upoo, 17 e i roto i te farii i nia roa, ua rau te huru maa maitatai euhia na Pharao, e e manu te amu ra i te reira i roto i te farii i nia iho i to ˈu upoo.” 18 Parau maira ïa Iosepha: “Teie to ˈna tatararaa: na toru farii, e toru ïa mahana. 19 I roto e toru mahana, e tâpû Pharao i to oe upoo a tarî atu ai ia oe i nia i te hoê pou, e e amu te mau manu i te iˈo o to oe tino.”+

20 E toru mahana i muri iho, o te mahana fanauraa ïa o Pharao.+ Faatupu ihora oia i te hoê tamaaraa no ta ˈna mau tavini atoa, e tuu maira oia i* te raatira hopoi auˈa uaina raua te raatira eu faraoa i mua i ta ˈna mau tavini. 21 Faahoˈi ihora Pharao i te raatira hopoi auˈa uaina i to ˈna toroa, e tamau atura oia i te hopoi i te auˈa uaina i te rima o Pharao. 22 Tera râ, tarî atura oia i te raatira eu faraoa mai ta Iosepha iho â i tatara i te auraa ia raua.+ 23 Aita râ te raatira hopoi auˈa uaina i haamanaˈo ia Iosepha, ua moˈe roa oia ia ˈna.+

41 Mairi atura e piti matahiti, e moemoeâhia ihora Pharao+ e te tia ra oia i te hiti anavai Nile. 2 I reira, haere maira e hitu puaatoro nehenehe e te poria mai roto mai i te anavai, e amu ihora i te aihere na te hiti Nile.+ 3 I muri iho, haere atoa maira e hitu puaatoro hairiiri e te iviivi mai roto mai i te anavai Nile, e tia noa ihora i pihai iho i te mau puaatoro poria i te hiti Nile. 4 Amu aˈera te mau puaatoro hairiiri e te iviivi i na hitu puaatoro nehenehe e te poria. E ara maira Pharao.

5 Varea faahou atura oia i te taoto, e moemoeâhia ihora oia i te piti o te taime. E hitu peenave huero maa îî e te maitai roa tei tupu i nia hoê noa tumu.+ 6 I muri iho, tupu atoa maira e hitu peenave huero maa rairai e tei oriorio i te mataˈi no hitia o te râ. 7 E horomii aˈera te mau peenave huero maa rairai i na hitu peenave huero maa îî e te maitai roa. E ara maira Pharao e taa ihora ia ˈna e e moemoeâ.

8 I te poipoi aˈe râ, peapea ihora to ˈna feruriraa. Faaue ihora oia ia tiihia pauroa te tahuˈa manamana o Aiphiti e pauroa to reira taata paari. Faatia ˈtura Pharao ia ratou i ta ˈna na moemoeâ, aita râ hoê aˈe i nehenehe e tatara i te reira ia Pharao.

9 E parau maira te raatira hopoi auˈa uaina ia Pharao: “Te faˈi nei au i ta ˈu mau hara i teie mahana. 10 Ua riri Pharao i ta ˈna na tavini. Huri ihora oia ia ˈu i te fare tapearaa a te raatira o te mau tiai, mâua te raatira eu faraoa.+ 11 I muri iho, moemoeâhia ihora mâua i te hoê â po e e tatararaa to na moemoeâ tataitahi.+ 12 Tei ia mâua ra te hoê tane apî Hebera, e tavini na te raatira o te mau tiai.+ I to mâua faatiaraa ˈtu ia ˈna,+ tatara maira oia i te auraa o na moemoeâ tataitahi. 13 Tupu ihora mai ta ˈna iho â i tatara ia mâua. Ua faahoˈihia vau i to ˈu toroa, ua tarîhia râ te tahi atu tane.”+

14 Faaue atura Pharao ia tiihia Iosepha,+ e aratai oioi maira ratou ia ˈna mai te fare tapearaa*+ mai. Hahu ihora oia ia ˈna, taui ihora i to ˈna ahu e haere maira i mua ia Pharao. 15 Parau atura ïa Pharao ia Iosepha: “Ua moemoeâhia vau, aita râ e taata no te tatara i te reira. Tera râ, ua faaroo vau i to oe parau, e nehenehe oe e tatara i te hoê moemoeâ o te faatiahia ia oe.”+ 16 Pahono maira Iosepha ia Pharao: “E ere na ˈu! Na te Atua râ e faaite i te poroi oaoa ia Pharao.”+

17 Parau faahou atura Pharao ia Iosepha: “I roto i ta ˈu moemoeâ, te tia ra vau i te hiti anavai Nile. 18 I reira, haere maira e hitu puaatoro nehenehe e te poria mai roto mai i te anavai Nile, e amu aˈera i te aihere na te hiti Nile.+ 19 I muri iho, haere atoa maira e hitu puaatoro maˈimaˈi, hairiiri e te iviivi. Aita vau i ite aˈenei i te puaatoro mai tera te hairiiri na te fenua atoa o Aiphiti. 20 Amu aˈera te mau puaatoro piaoao e te hairiiri i na hitu puaatoro poria. 21 Tera râ i to ratou amu-pauroa-raa i te reira, eita e manaˈohia ua na reira iho â ratou, te hairiiri â hoi te hairiiri. E ara maira vau.

22 “I muri iho i te reira, ite ihora vau i roto i ta ˈu moemoeâ e hitu peenave huero maa îî e te maitai roa tei tupu i nia hoê noa tumu.+ 23 I muri iho, tupu atoa maira e hitu peenave huero maa mǎrô, rairai e tei oriorio i te mataˈi no hitia o te râ. 24 Horomii aˈera te mau peenave huero maa rairai i na hitu peenave huero maa maitai roa. Faatia ˈtura vau i te reira i te mau tahuˈa manamana,+ aita râ hoê aˈe i nehenehe e faataa mai i te reira.”+

25 Parau maira ïa Iosepha ia Pharao: “Hoê â auraa to na moemoeâ a Pharao. Ta te Atua mau e rave, o ta ˈna ïa i faaite ia Pharao.+ 26 Na hitu puaatoro maitai, e hitu ïa matahiti. Oia atoa na hitu peenave huero maa maitai, e hitu ïa matahiti. Hoê â auraa to na moemoeâ. 27 Na hitu puaatoro piaoao e te hairiiri tei haere mai i muri iho, e hitu ïa matahiti, e na hitu peenave huero maa rairai e tei oriorio i te mataˈi no hitia o te râ, e hitu ïa matahiti oˈe. 28 Mai ta ˈu iho â i parau ia Pharao: Ua faaite te Atua mau ia Pharao eaha ta ˈna e rave.

29 “E tae mai iho â e hitu matahiti auhune rahi na te fenua taatoa o Aiphiti. 30 I muri iho râ, e tupu iho â te oˈe e hitu matahiti, a moˈehia ˈtu ai te auhune rahi i te fenua o Aiphiti, e e tupu te oˈe rahi i te fenua.+ 31 E eita e haamanaˈohia to na mua ˈtu auhune rahi i te fenua no te oˈe i muri mai, e oˈe ino mau â hoi. 32 Ua faaitehia te moemoeâ ia Pharao e piti taime, no te mea ua faaoti papu te Atua mau e na reira, e fatata te Atua mau i te faatupu i te reira.

33 “I teie nei, e imi Pharao i te hoê tane haapao maitai e te paari e e faatoroa oia ia ˈna i nia i te fenua o Aiphiti. 34 E faatoroa oia i te tahi mau tiaau i nia i teie fenua no te rave hoê tuhaa i nia e pae o te mau maa atoa i Aiphiti i te roaraa o na hitu matahiti auhune.+ 35 E e rave ratou pauroa te maa i te roaraa o teie mau matahiti auhune e haere mai ra, e e haaputu ratou i te mau huero maa i raro aˈe i te mana o Pharao ei maa te haapuehia e te tiai-maitai-hia i roto i te mau oire.+ 36 Ei maa te reira no to te fenua no na hitu matahiti oˈe te tupu i te fenua o Aiphiti, ia ore to te fenua ia mou i te oˈe.”+

37 Au aˈera Pharao e ta ˈna mau tavini atoa i teie manaˈo. 38 Parau atura ïa Pharao i ta ˈna mau tavini: “E itea mai anei te tahi atu tane mai ia ˈna tei ia ˈna ra te varua o te Atua?” 39 Parau atura ïa Pharao ia Iosepha: “I te mea ua rave te Atua e ia ite oe i teie mau mea atoa, aita roa e taata haapao maitai e te paari mai ia oe. 40 Na oe e haapao i to ˈu utuafare, e e faaroo to ˈu mau taata atoa i ta oe mau parau atoa.+ I to ˈu noa tiaraa arii* e hau ai au ia oe.” 41 E parau faahou atura Pharao ia Iosepha: “Inaha, te faatoroa nei au ia oe i nia i te fenua taatoa o Aiphiti.”+ 42 Iriti ihora ïa Pharao i to ˈna tapea rima titiro mai nia i to ˈna rima, tuu atura i nia i to Iosepha rima, faaahu atura ia ˈna i te mau ahu lino maitai roa e tuu ihora i te hoê fifi arapoa auro i nia i to ˈna aˈî. 43 Hau atu â, ua faaue oia ia faautahia Iosepha i nia i te piti o to ˈna pereoo hanahana, e e tuôhia na mua ia ˈna: “Avereka!”* Ua faatoroa ïa oia ia ˈna i nia i te fenua taatoa o Aiphiti.

44 Parau faahou atura Pharao ia Iosepha: “O vau o Pharao. Aita anaˈe ta oe parau faatia, aita e taata e nehenehe e rave i te tahi noa ˈˈe mea* na te fenua taatoa o Aiphiti.”+ 45 I muri iho i te reira, mairi ihora Pharao ia Iosepha i te iˈoa o Zaphenate-panea e horoa ˈtura ia Asenata+ te tamahine a Potiphera te tahuˈa no Ono* ei vahine faaipoipo na ˈna. E tiaau ihora Iosepha i* te fenua o Aiphiti.+ 46 E 30 matahiti+ to Iosepha i to ˈna tiaraa i mua* ia Pharao te arii o Aiphiti.

Vaiiho atura Iosepha ia Pharao e tere ihora na te fenua taatoa o Aiphiti. 47 E i te roaraa o na hitu matahiti auhune, hotu rahi noa maira te maa i te fenua. 48 Rave noa ihora oia pauroa te maa o te fenua o Aiphiti i na hitu matahiti, e haapue noa ihora oia i te maa i roto i te mau oire. I roto i te mau oire atoa, e haapue oia i te maa o te mau faaapu na pihai iho mai. 49 Tamau atura Iosepha i te haapue i te huero maa mea rahi roa mai te one tahatai, a ore atu ai e faito-faahou-hia no te mea eita e noaa ia faito.

50 Hou te matahiti oˈe a tae mai ai, fanau maira ta Iosepha e piti tamaiti,+ ta Asenata te tamahine a Potiphera te tahuˈa no Ono* i fanau na ˈna. 51 Mairi ihora Iosepha i te iˈoa o te matahiapo o Manase,*+ ua na ô hoi oia: “Na te Atua i rave ia moˈe ia ˈu to ˈu mau ati atoa e pauroa te utuafare o to ˈu metua tane.” 52 E mairi ihora oia i te teina i te iˈoa o Epheraima,*+ ua na ô hoi oia: “Na te Atua i rave ia tamariihia vau i te fenua i ahoaho ai au.”+

53 Hope ihora na hitu matahiti auhune i te fenua o Aiphiti,+ 54 e haamata ihora na hitu matahiti oˈe, mai ta Iosepha i parau.+ Rahi ihora te oˈe na te mau fenua atoa, tera râ e maa tei te fenua taatoa o Aiphiti.+ 55 I muri aˈe, roohia ihora te fenua taatoa o Aiphiti i te oˈe, e taparu aˈera te nunaa ia Pharao i te maa.+ Parau atura Pharao i to Aiphiti atoa: “A haere ia Iosepha ra, e a rave i ta ˈna atoa e parau ia outou.”+ 56 Tamau ihora te oˈe ati aˈe te fenua nei.+ Iriti ihora ïa Iosepha pauroa te fare haapueraa maa, e hoo atura i te huero maa i to Aiphiti,+ a uˈana ˈi te oˈe i te fenua o Aiphiti. 57 Hau atu â, haere maira to te fenua atoa nei i Aiphiti ia Iosepha ra e hoo mai i te maa, no te mea ua uˈana te oˈe i te fenua atoa nei.+

42 I to Iakoba iteraa e huero maa tei Aiphiti,+ parau maira oia i ta ˈna mau tamaiti: “Eaha outou e hiˈo noa ˈi te tahi i te tahi?” 2 Parau faahou maira oia: “Ua faaroo vau e huero maa tei Aiphiti. A pou i ǒ e a hoo mai i te tahi na tatou, a ora noa ˈtu ai tatou, eiaha râ ia pohe.”+ 3 Pou atura ïa hoê ahuru o to Iosepha mau taeae+ i Aiphiti e hoo mai i te huero maa. 4 Tera râ, aita Iakoba i tono ia Beniamina,+ to Iosepha teina, na muri i to ˈna mau tuaana, ua parau hoi oia: “Aˈunei oia e roohia ˈi i te hoê ati pohe.”+

5 Tae atura ïa na tamaiti a Iseraela e te tahi atu mau taata tei haere e hoo mai i te maa i Aiphiti, no te mea ua tae roa te oˈe i te fenua o Kanaana.+ 6 O Iosepha te tiaau ra i nia i te fenua o Aiphiti,+ e na ˈna e hoo i te huero maa i te mau taata atoa o te fenua nei.+ Haere maira ïa to Iosepha mau tuaana i mua ia ˈna, e tipapa ihora i raro i te repo te mata i raro.+ 7 I to Iosepha iteraa ˈtu i to ˈna mau tuaana, taa oioi ihora ia ˈna o vai ratou, aita râ oia i faaite atu o vai o ˈna.+ No reira, paraparau iria ˈtura oia ia ratou e ui atura: “Nohea mai outou?” Parau maira ratou: “No te fenua o Kanaana mai, ua haere mai matou no te hoo mai i te maa.”+

8 Ua taa ia Iosepha o to ˈna mau taeae ratou, aita râ ratou i ite o Iosepha o ˈna. 9 Haamanaˈo ihora Iosepha i to ˈna moemoeâraa ia ratou,+ e parau atura: “E mata huna outou! Ua haere mai outou e hiˈo i te mau vahi tiai-ore-hia o teie fenua!” 10 Na ô maira ratou: “E ere, to matou fatu, ua haere mai râ to mau tavini e hoo mai i te maa. 11 E tamaiti matou pauroa na te hoê noa tane. E taata afaro matou. E ere to mau tavini i te mata huna.” 12 Tera râ, parau atura oia: “E ere! Ua haere mai outou e hiˈo i te mau vahi tiai-ore-hia o teie fenua!” 13 Na ô maira ratou: “To mau tavini nei, 12 taeae ratou.+ E tamaiti matou pauroa na te hoê noa tane+ i te fenua o Kanaana, e tei to matou metua tane ra te hopea i teie taime,+ area te tahi atu, aita faahou ïa.”+

14 Tera râ, parau atura Iosepha: “Mai ta ˈu iho â i parau ia outou: ‘E mata huna outou!’ 15 E tamatahia outou mai teie: Te horeo nei au i te ora o Pharao eita outou e faarue i teie vahi a haere roa mai ai to outou teina hopea i ǒ nei.+ 16 A tono hoê o outou e aratai mai i to outou hopea, a faaea noa ˈi outou i roto i te fare tapearaa. Mea na reira ïa vau e ite ai e parau mau anei ta outou e parau ra. Aita anaˈe, te horeo nei au i te ora o Pharao, e mata huna outou.” 17 Tuu ihora oia ia ratou pauroa i roto i te fare tapearaa e toru mahana.

18 Parau atura Iosepha ia ratou i te toru o te mahana: “Te mǎtaˈu ra vau i te Atua. Ia ora outou, a na ô ïa: 19 Mai te peu e taata afaro outou, ia tapea-noa-hia ïa hoê o to outou mau taeae i roto i te fare i tapeahia ˈi outou, area te toea, e nehenehe ïa e haere, a rave atu ai i te huero maa no to outou mau utuafare+ e pohe ra i te poia. 20 I muri iho, a aratai mai i to outou teina hopea ia ˈu nei. E tiaturi ïa vau i ta outou parau, a ore atu ai outou e pohe.” E na reira ˈtura ratou.

21 Na ô aˈera ratou te tahi i te tahi: “Papu roa te faautuahia ra tatou no to tatou teina,+ no te mea ua ite atu tatou i to ˈna ahoaho i to ˈna taparuparuraa mai ia faatupu tatou i te aumihi, aita râ tatou i faaroo. No reira tatou i roohia ˈi i teie ahoaho.” 22 Pahono maira Reubena: “Aita anei au i parau ia outou eiaha e rave ino i tera tamarii? Aita râ outou i faaroo.+ I teie nei, te titauhia mai ra to ˈna toto.”+ 23 Tera râ, aita ratou i ite e te taa ra ia Iosepha ta ratou parau, e auvaha hoi to rotopu ia ratou. 24 Faaatea ˈtura oia e taˈi atura.+ I to ˈna hoˈiraa mai e paraparau-faahou-raa ia ratou, rave ihora oia ia Simeona+ e taamu ihora i to ˈna rima i mua ia ratou.+ 25 Faaue atura Iosepha ia faaîhia ta ratou mau pute i te huero maa e ia faahoˈihia ta ratou moni i roto i ta ratou mau pute tataitahi e ia horoahia te maa na ratou no to ratou tere. Na reirahia ˈtura.

26 Faauta aˈera ratou i ta ratou mau huero maa i nia i ta ratou mau asini e reva ˈtura. 27 Tatara ihora hoê o ratou i ta ˈna pute no te horoa i te aihere na ta ˈna asini i te vahi nohoraa, e ite ihora oia i ta ˈna moni tei te auvaha o ta ˈna pute. 28 Parau atura oia i to ˈna mau taeae: “Ua faahoˈihia mai ta ˈu moni, to ǒ nei to roto i ta ˈu pute!” Horuhoru ihora to ratou aau, e a rûrû noa ˈi, fariu aˈera te tahi i te tahi e na ô aˈera: “Eaha teie ta te Atua i rave mai ia tatou?”

29 I to ratou taeraa ˈtu ia Iakoba to ratou metua tane i te fenua o Kanaana, faatia ˈtura ratou i te mau mea atoa i roohia ˈi ratou, a na ô ai: 30 “Ua paraparau iria mai te tane o ˈna te fatu o tera fenua,+ e ua pari ia matou i te hiˈo i te fenua ei mata huna. 31 Ua na ô râ matou ia ˈna: ‘E taata afaro matou. E ere matou i te mata huna.+ 32 Hoê ahuru ma piti matou taeae,+ na tamaiti a to matou metua tane. Aita faahou hoê,+ e tei to matou metua tane i te fenua o Kanaana te hopea i teie taime.’+ 33 Tera râ, ua parau mai te tane o ˈna te fatu o tera fenua: ‘Mai teie e ite ai au e taata afaro outou: A vaiiho mai hoê o to outou mau taeae ia ˈu nei.+ E a rave i te huero maa no to outou mau utuafare e pohe ra i te poia e a haere.+ 34 E a aratai mai i to outou teina hopea ia ˈu nei, ia ite hoi au e ere outou i te mata huna, e taata afaro râ. I reira vau e faahoˈi atu ai i to outou taeae ia outou ra, a nehenehe atu ai outou e hoo mai i te huero maa i to matou fenua.’”

35 A tatara mai ai ratou i te huero maa mai roto mai i ta ratou mau pute, inaha to roto ta ratou puohu moni i ta ratou pute tataitahi. I te iteraa ratou e to ratou metua tane i ta ratou mau puohu moni, riaria ihora ratou. 36 Tuô atura Iakoba to ratou metua tane: “Te faaere nei outou ia ˈu i ta ˈu mau tamarii!+ Aita faahou Iosepha,+ e aita faahou Simeona,+ e e rave outou ia Beniamina! I nia ia ˈu teie mau mea atoa i tupu ai!” 37 Tera râ, parau atura Reubena i to ˈna metua tane: “E nehenehe oe e haapohe i ta ˈu iho na tamaiti e piti ia ore au e faahoˈi mai ia ˈna ia oe.+ A tuu mai ia ˈna na ˈu e haapao, e na ˈu e faahoˈi mai ia ˈna ia oe.”+ 38 Na ô maira râ oia: “Eita ta ˈu tamaiti e pou na muri ia oe, no te mea ua pohe to ˈna tuaana e o ˈna anaˈe tei toe mai.+ Ia roo-noa-hia ˈtu oia i te hoê ati pohe i to orua tere, e haapou mau â oe ia ˈu tei hinahina te rouru i te Apoo*+ no te oto.”+

43 Teie râ, mea uˈana te oˈe i te fenua.+ 2 No reira, i te pauraa ia ratou i te amu i te huero maa ta ratou i hopoi mai na Aiphiti mai,+ parau atura to ratou metua tane ia ratou: “A hoˈi e hoo mai i te tahi maa na tatou.” 3 Na ô maira Iuda: “Ua faaara maitai mai tera tane: ‘Eiaha outou e tia faahou mai i mua i to ˈu aro aita anaˈe to outou teina ia outou ra.’+ 4 Ia tuu mai oe i to matou teina ia matou nei, e pou ïa matou e hoo mai i te maa na oe. 5 Ia ore râ oe e tuu mai ia ˈna, e ore ïa matou e pou, ua parau mai hoi tera tane: ‘Eiaha outou e tia faahou mai i mua i to ˈu aro aita anaˈe to outou teina ia outou ra.’”+ 6 Ui atura Iseraela:+ “Eaha hoi outou i faatae mai ai i teie ati i nia ia ˈu, ma te faaite i tera tane e taeae â to outou?” 7 Pahono maira ratou: “Na tera tane i uiui mai no matou e no to matou mau fetii, a na ô mai ai: ‘Te ora noa ra anei to outou metua tane? E taeae â anei to outou?’ e ua faaite matou ia ˈna i taua mau parau ra.+ E nahea hoi matou e nehenehe ai e ite e parau mai o ˈna: ‘A haapou mai i to outou teina’?”+

8 Ani onoono maira Iuda ia Iseraela to ˈna metua tane: “A tuu mai i te tamaroa ia ˈu nei,+ a haere atu ai matou i to matou tere ia ora hoi tatou, eiaha râ ia pohe,+ matou e o oe e ta matou mau tamarii.+ 9 Ei roto te ora o te tamaroa i to ˈu rima.*+ Ia roohia oia i te tahi ati, o vau ta oe e faautua. Ia ore au e faahoˈi mai ia ˈna ia oe, a tuu atu ai ia ˈna i mua ia oe, ua hara ïa vau ia oe e a muri noa ˈtu. 10 Ahiri hoi matou i ore i faataere, ua tae ïa matou i ǒ e ua hoˈi mai a piti atura taime i teie nei.”

11 Parau atura ïa Iseraela to ratou metua tane ia ratou: “Mai te peu tei reira iho â, a na ô ïa: A tuu i te mau hotu maitai roa ˈˈe o te fenua i roto i ta outou mau pute, e a haapou atu ei ô na tera tane:+ te tahi zuri,+ te tahi meri, nakata, paa raau noˈanoˈa,+ huero pîtâ e te sekadi. 12 Ia tataipiti te moni ta outou e rave, e a faahoˈi atoa i te moni tei tuuhia i te auvaha o ta outou mau pute.+ Peneiaˈe e hape. 13 A rave i to outou teina e a haere, a hoˈi i tera tane ra. 14 Ia rave hoi te Atua Manahope e ia aroha tera tane ia outou, a tuu mai ai oia ia Simeona e ia Beniamina ia outou ra. Area o vau nei, mai te peu e faaerehia vau i ta ˈu mau tamarii,+ ia na reirahia ïa vau!”

15 Rave aˈera ïa te mau tamaiti a Iseraela i taua ô ra e te moni tataipiti e ia Beniamina. E pou atura i to ratou tere i Aiphiti, e tia faahou aˈera i mua ia Iosepha.+ 16 I to Iosepha iteraa ˈtu ia Beniamina ia ratou ra, parau ihora oia i te tiaau o to ˈna fare: “A aratai i tera mau tane i te fare, a tupai i te animara e a faaineine i te maa, e tamaa hoi matou tera mau tane i teie avatea.” 17 Rave oioi ihora te tiaau mai ta Iosepha i parau,+ e aratai ihora ia ratou i to Iosepha fare. 18 Tera râ, mǎtaˈu ihora na tamaiti a Iseraela a arataihia ˈi ratou i to Iosepha fare, e na ô aˈera: “No te moni tei faahoˈihia i roto i ta tatou mau pute i arataihia ˈi tatou i ǒ. I teie nei, e haru ratou ia tatou, e faariro ratou ia tatou ei tîtî e e rave ratou i ta tatou mau asini!”+

19 Tapiri maira ïa ratou i te tiaau o to Iosepha fare e paraparau maira ia ˈna i te tomoraa o te fare. 20 Na ô maira ratou: “Eiaha na oe e inoino mai, to matou fatu! I pou mai na matou i te taime matamua no te hoo mai i te maa.+ 21 I to matou râ taeraa i to matou vahi nohoraa e iritiraa i ta matou mau pute, inaha tei te auvaha o ta matou mau pute ta matou tataitahi moni, pauroa ta matou moni.+ Te hinaaro nei ïa matou e faahoˈi roa ˈtu i te reira. 22 E ua rave â matou i te moni no te hoo mai i te maa. Aita matou i ite na vai i tuu i ta matou moni i roto i ta matou mau pute.”+ 23 Parau atura oia: “Aita e fifi. Eiaha outou e mǎtaˈu. Na to outou Atua e te Atua o to outou metua tane i tuu i te moni* i roto i ta outou mau pute. Ua tae mai ta outou moni ia ˈu na mua.” I muri iho i te reira, tuu maira oia ia Simeona ia ratou ra.+

24 Faatomo atura te tiaau ia ratou i roto i to Iosepha fare, horoa ˈtura i te pape ia horoi ratou i to ratou avae, e horoa ˈtura i te aihere na ta ratou mau asini. 25 E faaineine aˈera ratou i te ô+ na Iosepha ia tae mai oia i te avatea, ua faaroo hoi ratou e e tamaa ratou i reira.+ 26 I to Iosepha tomoraa i roto i te fare, hopoi maira ratou i ta ratou ô ia ˈna ra i roto i te fare, e tipapa ihora ratou i mua ia ˈna.+ 27 I muri iho i te reira, ui atura oia eaha to ratou huru e parau atura: “Eaha te huru o to outou metua tane ruhiruhia ta outou i parau mai? Te ora noa ra anei oia?”+ 28 Na ô maira ratou: “Mea maitai to tavini, to matou metua tane. Te ora noa ra oia.” E tuturi ihora ratou e tipapa ihora.+

29 I to ˈna iteraa ˈtu ia Beniamina to ˈna teina, te tamaiti a to ˈna metua vahine,+ parau atura oia: “O to outou teina hopea teie ta outou i parau mai ia ˈu?”+ Parau faahou atura oia: “Ia farii maitai te Atua ia oe, ta ˈu tamaiti.” 30 No te mea te horuhoru ra to ˈna aau, ru ihora Iosepha i te imi i te hoê vahi no te taˈi. Tomo ihora ïa oia i roto i te hoê piha o ˈna anaˈe e taˈi atura i reira.+ 31 I muri iho, horoi ihora oia i to ˈna mata e haere maira i rapaeau, a haavî ai ia ˈna iho, e parau atura i ta ˈna mau tavini: “A hopoi mai i te maa.” 32 Hopoi maira ratou i ta ˈna maa o ˈna anaˈe, e ta to ˈna mau taeae maa o ratou anaˈe, e to Aiphiti na muri ia ˈna o ratou anaˈe ta ratou tamaaraa, eita hoi to Aiphiti e tamaa e te mau Hebera, no te mea mea au ore roa na to Aiphiti te reira.+

33 Te parahi ra te mau taeae* i mua ia ˈna, mai te matahiapo mai ia au i to ˈna tiaraa matahiapo+ e tae roa i te hopea ia au i to ˈna apî, e hiˈo noa aˈera te tahi i te tahi ma te maere. 34 Faahaere noa maira oia i te maa mai ta ˈna airaa maa mai i ta ratou airaa maa, ua tataipae râ oia i te tuhaa maa a Beniamina eiaha râ ta to ˈna mau tuaana.+ Tamau noa ˈtura ratou e o ˈna i te tamaa e te inu a paia maitai atu ai.

44 I muri aˈe, faaue atura oia i te tiaau o to ˈna fare: “A faaî maitai i te mau pute a taua mau tane ra i te maa e maraa ia ratou ia amo, e a tuu i ta ratou tataitahi moni i te auvaha o ta ratou mau pute.+ 2 Ia tuu râ oe i ta ˈu auˈa, te auˈa ario, i te auvaha o te pute a te hopea, e te moni atoa no ta ˈna huero maa.” Rave ihora ïa oia mai ta Iosepha i faaue.

3 I te poipoi aˈe, ua ao hoi, tuuhia ˈtura taua mau tane ra ia haere e ta ratou mau asini. 4 Aita ratou i atea ˈtu i te oire i parau ai Iosepha i te tiaau o to ˈna fare: “A tia! A tapapa i tera mau tane! Ia noaahia ratou e oe, a parau atu: ‘No te aha outou i faahoˈi ai i te maitai na roto i te ino? 5 E ere anei i roto i teie auˈa e inu ai to ˈu fatu, e ta ˈna atoa e faaohipa no te tatara ma te papu i te mau tapao? E ohipa ino ta outou i rave.’”

6 Noaahia ˈtura ïa ratou e ana e parau atura i tera mau parau ia ratou. 7 Tera râ, na ô maira ratou: “No te aha to matou fatu e parau ai i te reira? E ore roa e tia i to mau tavini ia rave i te hoê ohipa mai tera. 8 Inaha, te moni tei itea mai ia matou i te auvaha o ta matou mau pute, ua faahoˈi matou ia oe ra na te fenua o Kanaana mai.+ E nafea ïa matou e nehenehe ai e eiâ i te ario aore ra te auro i roto i te fare o to fatu? 9 Ia itea mai te auˈa i roto i te pute a te hoê o to mau tavini, ia pohe ïa oia, e e riro atoa te toea o matou ei tîtî na to matou fatu.” 10 Parau atura oia: “Na reira ïa mai ta outou i parau: te taata e itehia te auˈa i roto i ta ˈna pute, e riro ïa ei tîtî na ˈu, area te toea o outou, aita ïa ta outou e hara.” 11 Huri oioi ihora ratou tataitahi i ta ratou mau pute i raro e tatara aˈera i te reira. 12 Paheru maitai ihora oia i ta te matahiapo pute na mua e tae roa ˈtu i ta te hopea. E itehia maira te auˈa i roto i ta Beniamina pute.+

13 Hahae ihora ratou i to ratou ahu. E faauta faahou aˈera ratou tataitahi i ta ratou mau pute i nia i ta ratou mau asini, e hoˈi maira i te oire. 14 I to Iuda+ e to ˈna mau taeae tomoraa i roto i to Iosepha fare, to reira â oia. Tipapa ihora ratou i raro roa i mua ia ˈna.+ 15 Parau atura Iosepha: “Eaha teie ohipa ta outou i rave? Aita outou i ite e nehenehe te hoê taata mai ia ˈu e tatara ma te papu i te mau tapao?”+ 16 Pahono maira Iuda: “Eaha ta matou e nehenehe e parau i to matou fatu? E nafea matou e nehenehe ai e faataa i te reira? E nafea atoa matou e nehenehe ai e haapapu e feia tia matou? Ua itea mai e te Atua mau te hara a to mau tavini.+ E tîtî matou i teie nei na to matou fatu, matou e te taata ua itehia te auˈa i roto i ta ˈna pute!” 17 Tera râ, parau atura Iosepha: “E ore roa e tia ia ˈu ia na reira! Te taata ua itehia mai te auˈa i roto i ta ˈna pute, o ˈna te riro ei tîtî na ˈu.+ No te toea râ o outou, a pauma ma te hau i to outou metua tane.”

18 Tapiri maira ïa Iuda ia ˈna e na ô maira: “Te taparu nei au ia oe, to ˈu fatu, a vaiiho na i to tavini ia paraparau i to ˈu fatu, e eiaha na oe e riri i to tavini, mai ia Pharao hoi oe.+ 19 Ua ui mai to ˈu fatu i ta ˈna mau tavini: ‘E metua tane anei to outou aore ra e taeae?’ 20 Na ô atura matou i to ˈu fatu: ‘E, e metua tane ruhiruhia to matou e te tahi atu taeae, te hopea,+ e tamaiti no to ˈna ruhiruhiaraa. Ua pohe râ to ˈna tuaana,+ o ˈna anaˈe ïa te tamaiti e toe ra a to ˈna metua vahine,+ e mea here na to ˈna metua tane ia ˈna.’ 21 I muri iho i te reira, ua parau oe i to mau tavini: ‘A haapou mai ia ˈna ia ˈu nei ia ite hoi au ia ˈna.’+ 22 Tera râ, ua parau matou i to ˈu fatu: ‘Eita ta te tamaroa e nehenehe e vaiiho i to ˈna metua tane. Ia vaiiho oia ia ˈna, e pohe mau â to ˈna metua tane.’+ 23 E ua parau oe i to mau tavini: ‘Ia ore to outou teina hopea e pou mai na muri ia outou, eita outou e tia faahou mai i mua i to ˈu aro.’+

24 “Ua pauma ïa matou i to tavini ra, to ˈu metua tane, e ua parau ia ˈna i te mau parau a to ˈu fatu. 25 I muri aˈe, ua parau mai to matou metua tane: ‘A hoˈi e hoo mai i te tahi maa na tatou.’+ 26 Tera râ, ua na ô matou: ‘Eita ta matou e nehenehe e pou. Ia haere mai to matou teina hopea na muri ia matou, e pou ïa matou, eita hoi ta matou e nehenehe e tia faahou i mua i te aro o tera tane aita anaˈe to matou teina hopea ia matou ra.’+ 27 E ua parau mai to tavini to ˈu metua tane: ‘Ua ite maitai outou e e piti anaˈe tamaiti ta ta ˈu vahine faaipoipo i fanau mai na ˈu.+ 28 Ua faarue mai râ hoê o raua e ua parau vau: “Papu roa, ua huˈahuˈa roa oia!”+ e aita vau i ite faahou ia ˈna e tae roa mai i teie mahana. 29 Ia rave atoa outou i teie mai mua ˈtu i to ˈu aro e ia roohia oia i te hoê ati pohe, e haapou mau â outou ia ˈu tei hinahina te rouru i te Apoo*+ ma te mauiui.’+

30 “E teie nei, ia hoˈi au i to tavini to ˈu metua tane aita te tamaroa ia matou ra, i te mea mea here roa na ˈna ia ˈna,* 31 e pohe oia i to ˈna iho â iteraa e aita te tamaroa, e e haapou mau â to mau tavini i to tavini, to matou metua tane, tei hinahina te rouru i te Apoo* ma te oto. 32 Ua parau to tavini i to ˈu metua tane e ei roto te ora o te tamaroa i to ˈu rima, a na ô atu ai: ‘Ia ore au e faahoˈi mai ia ˈna ia oe, ua hara ïa vau i to ˈu metua tane e a muri noa ˈtu.’+ 33 No reira, i teie nei, a vaiiho na i to tavini ia faaea mai ei tîtî na to ˈu fatu eiaha râ te tamaroa, ia nehenehe hoi oia e hoˈi na muri i to ˈna mau tuaana. 34 E nahea hoi e tia ˈi ia ˈu ia hoˈi i to ˈu metua tane e aita te tamaroa ia ˈu nei? Eita ta ˈu e nehenehe e hiˈo noa ˈtu i to ˈu metua tane ia roohia i teie mauiui!”

45 Aita ˈtura Iosepha i nehenehe faahou e haavî ia ˈna iho i mua i ta ˈna mau tavini atoa.+ Tuô ihora ïa oia: “Haere pauroa i rapae!” Aita ˈtu e taata i pihai iho ia Iosepha a faaite ai oia i to ˈna mau taeae o vai o ˈna.+

2 Taˈi ihora oia ma te auê rahi, a faaroo atu ai to Aiphiti e to te utuafare o Pharao. 3 Parau roa ˈtura Iosepha i to ˈna mau taeae: “O vau o Iosepha. Te ora noa ra to ˈu metua tane?” Aita roa râ to ˈna mau taeae i nehenehe e pahono mai no to ratou maere. 4 Parau atura ïa Iosepha i to ˈna mau taeae: “A tapiri mai na.” E tapiri maira ratou ia ˈna.

E parau atura oia: “O vau o Iosepha to outou taeae, ta outou i hoo i Aiphiti.+ 5 I teie nei râ, eiaha outou e hepohepo e eiaha e faahapa te tahi i te tahi no to outou hooraa ˈtu ia ˈu. No te mea na te Atua i tono ia ˈu i ǒ nei na mua ia outou ia ora noa tatou.+ 6 A piti atura matahiti oˈe i te fenua,+ e e pae â matahiti eita te taata e arote e e ooti. 7 Na te Atua râ i tono ia ˈu na mua ia outou no te faaherehere no outou i te hoê toea+ i te fenua, e ia ora noa outou na roto i te hoê faaoraraa faahiahia. 8 No reira, e ere na outou i tono ia ˈu i ǒ nei, na te Atua mau râ, no te faatoroa ia ˈu ei taata mana rahi* no Pharao, ei fatu i nia i to ˈna utuafare atoa, e ei faatere i te fenua taatoa o Aiphiti.+

9 “Haavitiviti i te hoˈi i to ˈu metua tane, e ia parau outou ia ˈna: ‘Teie ta Iosepha ta oe tamaiti i parau: “Ua faatoroa te Atua ia ˈu ei fatu i nia i to Aiphiti taatoa.+ A pou mai ia ˈu nei. Eiaha e faataere.+ 10 E parahi oe i te fenua o Gosena,+ ei pihai iho ïa oe ia ˈu, o oe, ta oe mau tamarii, ta oe mau mootua, ta oe mau mamoe, ta oe mau animara, e pauroa ta oe. 11 E horoa vau i te maa na oe, e pae â hoi matahiti oˈe.+ Aita anaˈe, e roohia oe i te veve, e to utuafare e pauroa ta oe.”’ 12 Te ite mata nei outou e to ˈu atoa teina o Beniamina, o vau iho â teie e paraparau nei ia outou.+ 13 E faatia ïa outou i to ˈu metua tane pauroa to ˈu hanahana i Aiphiti e te mau mea atoa ta outou i ite. Haavitiviti ïa, a haapou mai i to ˈu metua tane i ǒ nei.”

14 E tauahi ihora oia i to ˈna teina o Beniamina e taˈi ihora, e taˈi ihora Beniamina i roto ia ˈna.+ 15 E apa ˈtura oia i to ˈna mau taeae atoa e taˈi ihora i nia ia ratou. I muri iho paraparau aˈera to ˈna mau taeae e o ˈna.

16 Faarooroo atura te utuafare o Pharao i te parau apî: “Ua tae mai to Iosepha mau taeae!” E parau maitai te reira i te aro o Pharao e ta ˈna mau tavini. 17 Parau atura ïa Pharao ia Iosepha: “A parau i to oe mau taeae: ‘A faauta i te maa i nia i ta outou mau animara e a haere i te fenua no Kanaana, 18 e a aratai mai i to outou metua tane e to outou mau utuafare e a haere mai ia ˈu nei. E horoa vau na outou i te mau maitai o te fenua o Aiphiti, e e amu* outou i te mau hotu maitatai o te fenua.’+ 19 A parau atoa ia ratou:+ ‘A rave i te tahi mau pereoo+ no Aiphiti no ta outou mau tamarii e vahine faaipoipo, a faahoro mai i to outou metua tane na nia i te hoê o taua mau pereoo ra, e a haere mai i ǒ nei.+ 20 Eiaha e haapeapea no ta outou mau taoˈa,+ na outou hoi te mea maitai roa ˈˈe o te fenua o Aiphiti.’”

21 Na reira ˈtura te mau tamaiti a Iseraela. E horoa ˈtura Iosepha i te tahi mau pereoo no ratou ia au i te mau faaueraa a Pharao, e te maa na ratou no to ratou tere. 22 Horoa ˈtura oia ia ratou tataitahi i te hoê ahu apî, ia Beniamina râ, horoa ˈtura oia e 300 moni ario e e pae ahu apî.+ 23 E faatae atura oia i to ˈna metua tane: ahuru asini oni e uta ra i te mau taoˈa maitatai o Aiphiti, e ahuru asini ufa e uta ra i te huero maa, te faraoa e te maa na to ˈna metua tane no te tere. 24 Tuu atura ïa oia i to ˈna mau taeae ia haere, e a faareva ˈi ratou, parau atura oia: “Eiaha outou e riri te tahi i te tahi na te eˈa.”+

25 Pauma aˈera ratou mai Aiphiti mai i te fenua o Kanaana i to ratou metua tane ra o Iakoba. 26 Faatia ˈtura ratou ia ˈna: “Te ora noa ra Iosepha, e o ˈna te faatere i te fenua taatoa o Aiphiti!”+ Aita râ to ˈna aau i oaoa noa ˈˈe, no to ˈna tiaturi ore ia ratou.+ 27 I te faatia-noa-raa ratou ia ˈna pauroa ta Iosepha i parau ia ratou e to ˈna iteraa i te mau pereoo ta Iosepha i faatae mai no te faahoro ia ˈna, haamata ihora to ratou metua tane o Iakoba i te maitai faahou mai. 28 Tuô ihora Iseraela: “Ua navai! Te ora noa ra ta ˈu tamaiti o Iosepha! E haere au e hiˈo ia ˈna hou vau a pohe ai!”+

46 Rave ihora ïa Iseraela i to ˈna utuafare atoa e pauroa ta ˈna faufaa e reva ˈtura. I to ˈna taeraa i Beere-seba,+ pûpû aˈera oia i te tahi mau tusia i te Atua o to ˈna metua tane o Isaaka.+ 2 Paraparau maira te Atua ia Iseraela na roto i te hoê orama i te po e na ô maira: “Iakoba, Iakoba!” Parau atura oia: “Teie au!” 3 Parau maira oia: “O vau te Atua mau, te Atua o to metua tane.+ Eiaha e mǎtaˈu i te pou i Aiphiti, i reira hoi au e faariro ai ia oe ei nunaa rahi.+ 4 O vau te pou i Aiphiti na muri ia oe, e o vau atoa te faahoˈi ia oe mai reira mai,+ e o Iosepha te tuu i to ˈna rima i nia i to oe mata.”*+

5 I muri iho i te reira, reva ˈtura Iakoba mai Beere-seba ˈtu, e faahoro atura te mau tamaiti a Iseraela i to ratou metua tane o Iakoba, ta ratou atoa mau tamarii e ta ratou mau vahine faaipoipo na nia i te mau pereoo ta Pharao i faatae no te faahoro mai ia ˈna. 6 Ua rave mai ratou i ta ratou mau nǎnǎ animara e ta ratou mau faufaa, ta ratou i haapue i te fenua o Kanaana. E haere maira ratou i Aiphiti, o Iakoba e to ˈna huaai atoa. 7 Ua aratai mai oia na muri ia ˈna i Aiphiti i ta ˈna mau tamaiti e ta ˈna mau mootua tamaroa, ta ˈna mau tamahine e ta ˈna mau mootua tamahine, oia hoi to ˈna huaai taatoa.

8 E teie te iˈoa o te mau tamaiti a Iseraela tei haere mai i Aiphiti,+ o Iakoba e ta ˈna mau tamaiti: ta Iakoba matahiapo, o Reubena.+

9 Na tamaiti a Reubena, o Hanoka, Palu, Hezerona e Karemi.+

10 Na tamaiti a Simeona,+ o Iemuela, Iamina, Ohada, Iakina, Zohara e Saura+ te tamaiti a te hoê vahine Kanaana.

11 Na tamaiti a Levi,+ o Geresona, Kohata e Merari.+

12 Na tamaiti a Iuda,+ o Era, Onana, Sela,+ Pereza+ e Zera.+ Tera râ, ua pohe Era e Onana i te fenua o Kanaana.+

Na tamaiti a Pereza, o Hezerona raua Hamula.+

13 Na tamaiti a Isakara, o Tola, Puva, Iôba e Simirona.+

14 Na tamaiti a Zebuluna,+ o Sereda, Elona e Ialeela.+

15 Tera te huaai o Lea ta ˈna i fanau na Iakoba i Padana-arama, oia atoa Dina+ ta Iakoba tamahine. Te rahiraa o to ˈna huaai tamaiti e tamahine, e 33 ïa.

16 Na tamaiti a Gada,+ o Ziphiona, Hagi, Suni, Ezebona, Eri, Arodi e Areli.+

17 Na tamaiti a Asera,+ o Iemina, Isua, Isui e Beria, e to ratou tuahine o Sera.

Na tamaiti a Beria, o Hebere raua Malakiela.+

18 Tera te huaai o Zilipa,+ ta Labana i horoa na ta ˈna tamahine o Lea. Te rahiraa huaai ta ˈna i fanau na Iakoba: 16 taata.

19 Na tamaiti a Rahela ta Iakoba vahine faaipoipo, o Iosepha+ raua Beniamina.+

20 Ua fanau mai ta Iosepha o Manase+ raua Epheraima+ i te fenua o Aiphiti, ta Asenata+ te tamahine a Potiphera te tahuˈa no Ono* i fanau na ˈna.

21 Na tamaiti a Beniamina,+ o Bela, Bekera, Asebela, Gera,+ Naamana, Ehi, Rosi, Mupima, Hupima+ e Aradi.+

22 Te rahiraa huaai o Rahela ta ˈna i fanau na Iakoba: 14 taata.

23 Te tamaiti* a Dana,+ o Husima.+

24 Na tamaiti a Naphatali,+ o Iazeela, Guni, Iezerâ e Silema.+

25 Tera te huaai o Bila, ta Labana i horoa na ta ˈna tamahine o Rahela. Te rahiraa ta ˈna i fanau na Iakoba: e hitu taata.

26 Te rahiraa taata atoa no roto mai ia Iakoba tei haere i Aiphiti na muri ia ˈna, e 66 taata,+ aita i taiohia ta Iakoba mau hunoa vahine. 27 E piti tamaiti tei fanauhia na Iosepha i Aiphiti. Te rahiraa taata o te utuafare o Iakoba tei haere mai i Aiphiti, e 70 ïa.+

28 Ua tono Iakoba ia Iuda+ na mua ia ˈna no te parau ia Iosepha e te haere ra oia i Gosena. I to ratou taeraa ˈtu i te fenua o Gosena,+ 29 faaue atura Iosepha ia faaineinehia to ˈna pereoo e haere aˈera oia e farerei ia Iseraela to ˈna metua tane i Gosena. I to ˈna taeraa i mua ia Iseraela, tauahi ihora Iosepha ia ˈna e taˈi ihora maa taime.* 30 Parau maira Iseraela ia Iosepha: “E nehenehe au e pohe i teie nei. Ua ite hoi au i to mata, e ua ite au e te ora noa ra oe.”

31 Parau atura Iosepha i to ˈna mau taeae e te utuafare o to ˈna metua tane: “E haere au i nia ia Pharao+ ra e e faatia vau i te reira ia ˈna a parau ai: ‘Ua tae mai ia ˈu nei to ˈu mau taeae e te utuafare o to ˈu metua tane mai te fenua o Kanaana mai.+ 32 E tiai mamoe+ te mau tane, e e faaamu ratou i te nǎnǎ animara,+ e ua afai mai ratou i ta ratou mau nǎnǎ mamoe e puaaniho e nǎnǎ puaatoro e pauroa ta ratou faufaa.’+ 33 Ia titau mai Pharao ia outou e ia ani atu: ‘Eaha to outou toroa?,’ 34 a parau: ‘Ua faaamu to mau tavini i te animara mai to ratou apîraa e tae roa mai i teie nei, matou e to matou atoa mau tupuna.’+ E nehenehe ïa outou e parahi i te fenua o Gosena,+ mea au ore roa hoi na to Aiphiti te tiai mamoe.”+

47 Haere atura ïa Iosepha ia Pharao ra e faatia ˈtura:+ “Ua tae mai to ˈu metua tane e to ˈu mau taeae e ta ratou mau nǎnǎ mamoe e puaaniho e nǎnǎ puaatoro e pauroa ta ratou faufaa mai te fenua ra o Kanaana, e tei te fenua o Gosena+ ratou.” 2 Ua rave oia e pae taeae to ˈna ia farerei ratou ia Pharao.+

3 Parau maira Pharao i to Iosepha mau taeae: “Eaha to outou toroa?” Pahono atura ratou ia Pharao: “E tiai mamoe ta oe mau tavini nei, matou e to matou atoa mau tupuna.”+ 4 E parau atura ratou ia Pharao: “Ua haere mai matou e parahi ei taata ěê i teie fenua+ no te mea aita faahou e vahi aihere no te mau nǎnǎ animara a ta oe mau tavini nei, ua uˈana roa hoi te oˈe i te fenua o Kanaana.+ No reira, a faatia na i ta oe mau tavini nei ia parahi i te fenua o Gosena.”+ 5 Parau maira Pharao ia Iosepha: “Ua tae mai to metua tane e to mau taeae ia oe nei. 6 Tei ia oe ra te fenua o Aiphiti. A haaparahi i to metua tane e to mau taeae i te tuhaa maitai roa ˈˈe o te fenua.+ Ia parahi ratou i te fenua o Gosena, e ia ite noa ˈtu oe i rotopu ia ratou i te tahi mau tane mea aravihi i to oe manaˈo, a faatoroa ia ratou ei tiai no ta ˈu mau animara.”

7 E aratai maira Iosepha ia Iakoba to ˈna metua tane e farerei ia Pharao, e haamaitai atura Iakoba ia Pharao. 8 Ani maira Pharao ia Iakoba: “Ehia matahiti to oe?” 9 Parau atura Iakoba ia Pharao: “Te matahiti o to ˈu haere-noa-raa ei taata ê, 130 ïa. Mea iti e mea ahoaho te mau matahiti o to ˈu oraraa,+ e aita i aifaito i te matahiti i ora ˈi to ˈu mau tupuna i to ratou haere-noa-raa ei taata ěê.”+ 10 I muri iho i te reira, haamaitai atura Iakoba ia Pharao e haere ê atura mai mua ˈtu ia ˈna.

11 Haaparahi ihora ïa Iosepha i to ˈna metua tane e to ˈna mau taeae, e horoa ˈtura no ratou i te hoê tuhaa o te fenua o Aiphiti, te tuhaa maitai roa ˈˈe o te fenua, i te fenua o Ramese,+ mai ta Pharao i faaue. 12 E horoa noa ˈtura Iosepha i te maa* na to ˈna metua tane e to ˈna mau taeae e te utuafare taatoa o to ˈna metua tane ia au i te rahiraa o ta ratou mau tamarii.

13 E aita roa e maa* e ati aˈe te fenua, no te mea ua uˈana roa te oˈe, e ua paruparu roa to te fenua o Aiphiti e to te fenua o Kanaana no te oˈe.+ 14 Te haapue noa ra Iosepha i te moni e vai ra i Aiphiti e i Kanaana no te huero maa ta te taata e hoo mai ra,+ e hopoi noa ˈtura oia i te moni i te aorai o Pharao. 15 E aita faahou aˈera e moni i Aiphiti e i Kanaana, e haere pauroa maira to Aiphiti ia Iosepha ra, a na ô mai ai: “Horoa mai i te maa! Eaha hoi matou e pohe ai i mua i to oe mata no te mea ua pau ta matou moni?” 16 Parau atura Iosepha: “I te mea ua pau ta outou moni, a horoa mai ïa i ta outou mau animara ei hoo, e horoa ˈtu ïa vau i te maa na outou.” 17 Aratai maira ïa ratou i ta ratou mau animara ia Iosepha ra, e horoa noa ˈtura Iosepha i te maa na ratou ei hoo no ta ratou mau puaahorofenua, nǎnǎ mamoe, nǎnǎ puaaniho, nǎnǎ puaatoro e te asini. Ua horoa noa oia i te maa na ratou ei hoo no ta ratou mau animara atoa i te roaraa o taua matahiti ra.

18 I te hoperaa taua matahiti ra, haere maira ratou i to muri mai matahiti e na ô maira: “Ia ite mai to matou fatu e ua horoa-aˈena-hia te moni e te nǎnǎ animara rata na to matou fatu. Aita roa e mea e toe ra ia matou no to matou fatu, maori râ to matou anaˈe tino e to matou fenua. 19 Eaha hoi matou e pohe ai i mua i to oe mata, e to matou fenua e vai ano ai? A hoo mai ia matou e i to matou fenua ei hoo no te maa, e e riro matou ei tîtî na Pharao, e to matou fenua, e riro ïa ia ˈna. A horoa mai i te huero maa na matou ia ora matou eiaha ia pohe, e ia ore to matou fenua ia ano.” 20 Hoo maira ïa Iosepha i te mau fenua atoa o to Aiphiti no Pharao no te mea ua hoo atu te taata Aiphiti tataitahi i to ˈna tuhaa fenua, ua uˈana roa hoi te oˈe. E riro maira te fenua ia Pharao.

21 E faaue atura oia i te nunaa, mai te tahi otia e tae noa ˈtu i te tahi otia o te fenua Aiphiti,+ ia parahi i roto i te mau oire. 22 Te fenua anaˈe o te mau tahuˈa aita oia i hoo mai,+ no te mea i ora na ratou i te maa ta Pharao i horoa na ratou. No reira aita ratou i hoo atu i to ratou fenua. 23 E parau atura Iosepha i te nunaa: “Inaha i teie mahana, ua hoo mai au ia outou e i to outou fenua no Pharao. Teie te huero maa na outou, e ia ueue outou i te reira i nia i te fenua. 24 E ia hotu mai, a horoa hoê tuhaa i nia e pae na Pharao.+ Na outou e maha tuhaa o te huero maa no te faaapu e ei maa na outou e na te feia i roto i to outou mau fare e na ta outou mau tamarii.” 25 Parau maira ïa ratou: “Ua faaherehere oe i to matou ora.+ Ia fariihia matou i te aro o to matou fatu, e e riro matou ei tîtî na Pharao.”+ 26 Faariro atura Iosepha i te reira ei faaueraa mana, o te vai noa ra e tae roa mai i teie mahana i Aiphiti, oia hoi na Pharao hoê tuhaa i nia e pae. O te fenua anaˈe o te mau tahuˈa aita i riro ia Pharao.+

27 E parahi noa ihora Iseraela e to ˈna utuafare i Aiphiti, i te fenua o Gosena,+ e noho ihora ratou i reira, e fanau maira i te tamarii a rahi roa mai ai ratou.+ 28 Ua ora â Iakoba 17 matahiti i Aiphiti, no reira te mau mahana atoa o to Iakoba oraraa, 147 matahiti.+

29 A piri mai ai te taime e pohe ai Iseraela,+ titau maira oia i ta ˈna tamaiti o Iosepha e parau atura: “I teie nei, ia fariihia vau i mua i to aro, a tuu na i to rima i raro aˈe i to ˈu huha, e a faaite mai i te here taiva ore e te haapao maitai ia ˈu. Eiaha na e huna ia ˈu i Aiphiti.+ 30 Ia pohe au,* e afai ê oe ia ˈu mai Aiphiti mai e e huna oe ia ˈu i roto i te menema o to ˈu mau tupuna.”+ Parau maira ïa Iosepha: “E rave au mai ta oe e parau ra.” 31 Parau atura oia: “A horeo mai.” Horeo maira Iosepha ia ˈna.+ Piˈo ihora ïa Iseraela ma te fariu i to ˈna upoo i te muaraa o to ˈna roˈi.+

48 I muri aˈe i te reira, parauhia ˈtura Iosepha: “Inaha, te paruparu noa ˈtu ra to metua tane.” Rave maira ïa oia i ta ˈna na tamaiti o Manase raua Epheraima ia ˈna ra.+ 2 Parauhia maira Iakoba: “Teie to tamaiti o Iosepha ua tae mai.” Faaitoito ihora ïa oia* i te parahi mai i nia i to ˈna roˈi. 3 E parau atura Iakoba ia Iosepha:

“Ua fa mai te Atua Manahope ia ˈu i Luza i te fenua o Kanaana e ua haamaitai mai ia ˈu.+ 4 Parau maira oia ia ˈu: ‘Na ˈu e rave ia tamariihia oe e ia rahi. E faariro vau ia oe ei nunaa e rave rahi ia amuihia.+ E horoa ˈtu vau no oe e no to huaai i muri mai ia oe i teie fenua no te hoê tau roa.’+ 5 I teie nei, e riro ta oe nau tamaiti tei fanauhia na oe i Aiphiti hou a tae mai ai au i Aiphiti ei tamaiti na ˈu.+ E riro Epheraima raua Manase ei tamaiti atoa na ˈu mai ia Reubena raua Simeona.+ 6 Area te mau tamarii te fanauhia na oe i muri mai ia raua, na oe ïa. E topahia ratou i te iˈoa o to ratou nau tuaana e e fanaˈo ratou i te hoê tuhaa o ta raua tufaa.+ 7 O vau râ, i to ˈu haereraa na Padana mai, pohe ihora Rahela+ i pihai iho ia ˈu i te fenua o Kanaana, e mea atea â hou a tae atu ai i Epherata.+ Huna ihora vau ia ˈna i reira i te eˈa e tae atu ai i Epherata, oia hoi Betelehema.”+

8 E ite atura Iseraela i na tamaiti a Iosepha e ui atura: “O vai ma teie?” 9 Parau maira ïa Iosepha i to ˈna metua tane: “O ta ˈu na tamaiti ta te Atua i horoa mai na ˈu i teie nei vahi.”+ Parau atura oia: “A tuu mai na ia raua ia ˈu nei, ia haamaitai au ia raua.”+ 10 Ua mohimohi râ to Iseraela mata no te ruhiruhiaraa, e aita oia i nehenehe e ite atu. Tuu maira ïa Iosepha ia raua i pihai iho ia ˈna, apa ˈtura Iseraela ia raua e tauahi atura ia raua. 11 Parau maira Iseraela ia Iosepha: “Aita vau i manaˈo e ite au i to oe mata,+ i teie nei râ ua faatia te Atua ia ˈu ia ite i to huaai.” 12 Faaatea maira Iosepha ia raua mai te turi avae o Iseraela, e tuturi ihora oia te mata i raro.

13 Rave maira Iosepha ia raua, ia Epheraima+ i to ˈna rima atau i te pae aui o Iseraela, e ia Manase+ i to ˈna rima aui i te pae atau o Iseraela, e tuu maira ia raua i pihai iho ia ˈna. 14 Tera râ, toro atura Iseraela i to ˈna rima atau e tuu ihora i nia i te upoo o Epheraima, noa ˈtu o ˈna te teina, e tuu ihora oia i to ˈna rima aui i nia i te upoo o Manase. Ua opua iho â oia e na reira i te tuu i to ˈna rima, noa ˈtu o Manase te matahiapo.+ 15 E haamaitai ihora oia ia Iosepha a na ô ai:+

17 I to Iosepha iteraa e ua vaiiho noa to ˈna metua tane i to ˈna rima atau i nia i te upoo o Epheraima, aita o ˈna i au, tamata ˈtura ïa oia i te rave i te rima o to ˈna metua tane mai nia mai i te upoo o Epheraima no te tuu i nia i te upoo o Manase. 18 Parau maira Iosepha i to ˈna metua tane: “Eiaha e na ô, to ˈu metua tane, teie hoi te matahiapo.+ A tuu i to oe rima atau i nia i to ˈna upoo.” 19 Aita râ to ˈna metua tane i farii noa ˈˈe, e parau atura oia: “Ua ite au, ta ˈu tamaiti, ua ite au. E riro atoa oia ei nunaa, e e rahi atoa mai oia. Tera râ, e rahi aˈe to ˈna teina ia ˈna,+ e to ˈna te huaai te rahi roa mai a riro ai ei nunaa e rave rahi.”+ 20 E haamaitai noa ihora oia ia raua i taua mahana ra,+ a parau ai:

Tamau noa ˈtura ïa oia i te tuu ia Epheraima na mua ˈˈe ia Manase.

21 E parau atura Iseraela ia Iosepha: “Inaha, te pohe nei au,+ tera râ mea papu e vai noa te Atua i pihai iho ia outou e e faahoˈi oia ia outou i te fenua o to outou mau tupuna.+ 22 Area o vau nei, e horoa iho â vau no oe i te hoê tuhaa fenua* hau atu i ta to oe mau taeae, ta ˈu hoi i rave i te rima o te ati Amori i ta ˈu ˈoˈe e ta ˈu fana.”

49 E titau maira Iakoba i ta ˈna mau tamaiti e parau atura: “Ia putuputu mai outou ia nehenehe au e faaite atu eaha te tupu no outou a muri aˈe. 2 A putuputu mai e a faaroo, outou te mau tamaiti a Iakoba, oia mau a faaroo i to outou metua tane ia Iseraela.

3 “Reubena,+ o oe ta ˈu matahiapo,+ to ˈu itoito e te haamataraa o to ˈu puai faafanau, te tura hau ê e te puai hau ê. 4 Mai te pape arepurepu mau ore oe, eiaha oe ia hau ê, no te mea ua pauma oe i nia iho i te roˈi o to metua tane.+ Ua haaviivii* oe i to ˈu roˈi. Ua pauma iho â o ˈna i nia iho!

5 “E taeae Simeona raua Levi.+ Ua rave raua i ta raua mauhaa tamaˈi no te taparahi i te taata.+ 6 Eiaha roa vau* e amuimui ia raua. Eiaha roa to ˈu hanahana e apiti i to raua tahoêraa, no to raua riri hoi i haapohe ai raua i te taata,+ e ua tâpû raua i te uaua avae o te puaatoro oni ei ohipa hauti. 7 Ia vai te ino i nia i to raua riri, mea taehae hoi, e i nia i to raua iria, mea etaeta hoi.+ Ia haapurara vau ia raua i te fenua o Iakoba, e ia haapuehu vau ia raua i Iseraela.+

8 “Area oe Iuda,+ e haapopou to oe mau taeae ia oe.+ Ei nia to oe rima i te aˈî o to oe mau enemi.+ E piˈo te mau tamaiti a to metua tane i raro i mua ia oe.+ 9 E fanauˈa liona o Iuda.+ E tia mai iho â oe, ta ˈu tamaiti, mai nia mai i te animara i aˈuaˈuhia. Ua taoto oia i raro e ua tiraha mai te liona ra, e mai te liona, o vai hoi te tae e faatia ia ˈna i nia? 10 Eita te sepeta e atea ê ia Iuda,+ e te raau a te raatira mai ropu mai i to ˈna na avae, e ia tae roa mai Silo,*+ e e auraro te mau nunaa atoa ia ˈna.+ 11 E taamu oia i ta ˈna asini i nia i te hoê tumu vine e ta ˈna fanauˈa asini i nia i te hoê tumu vine maitai roa. E horoi oia i to ˈna ahu i roto i te uaina e te pape vine.* 12 E mata uteute paˈo to ˈna i te uaina, e niho uouo to ˈna i te û.

13 “E parahi Zebuluna+ na tatahi, na te pae miti i reira te mau pahi i tutau ai,+ e tei Sidona to ˈna otia atea roa ˈˈe.+

14 “E asini ivi paari o Isakara,+ o te taoto i ropu e piti hopoia. 15 E ite oia e mea maitai te vahi faafaaearaa e mea au te fenua. E piˈo oia i raro no te amo i te hopoia i nia i to ˈna tapono, e e farii oia e rave i te ohipa faahepohia.

16 “E haava o Dana,+ te hoê opu o Iseraela,+ i to ˈna mau taata. 17 Ia riro Dana mai te hoê ophi na te hiti purumu, te hoê ophi e piti tara na te eˈa, o te hohoni i te poro avae o te puaahorofenua, a topa ofera mai ai te taata faahoro.+ 18 E tiai au i te faaoraraa no ǒ mai ia oe, e Iehova.

19 “Area o Gada,+ e aˈuaˈu te tahi pǔpǔ eiâ ia ˈna, tera râ e aˈuaˈu oia ia ratou na muri mai.+

20 “E pue ta Asera+ maa,* e horoa oia i te maa e tano no te arii.+

21 “E aili ufa vitiviti o Naphatali.+ E faahiti oia i te mau parau faahiahia.+

22 “E amaa o Iosepha+ no te hoê tumu raau hotu, e tumu raau na te pape pihaa, e e toro to ˈna mau amaa na nia ˈˈe i te aua. 23 Tera râ e aro noa te feia teˈa ia ˈna, e teˈa ratou ia ˈna, e e inoino noa ratou ia ˈna.+ 24 E vai noa râ ta ˈna fana i to ˈna vairaa,+ e vai puai noa to ˈna rima e te vitiviti.+ No ǒ mai te reira i te rima o te puai o Iakoba, i te tiai mamoe, te ofai a Iseraela. 25 No ǒ mai oia* i te Atua o to metua tane, e na te Atua e tauturu ia oe, e tei pihai iho oia i te Manahope, e e haamaitai te Atua ia oe i te haamaitairaa o te raˈi i nia, i te haamaitairaa o te hohonuraa i raro,+ e i te haamaitairaa o te û e te opu. 26 E hau aˈe te haamaitairaa a to metua tane i te haamaitairaa a te mau mouˈa mure ore, e te mau mea nehenehe o te aivi vai maoro.+ E vai noa te reira i nia i te upoo o Iosepha, i nia i te hei upoo o tei taa ê i to ˈna mau taeae.+

27 “E hahae noa o Beniamina+ mai te hoê luko i te animara aˈuaˈuhia.+ I te poipoi e amu oia i te reira, e i te ahiahi e tufa oia i tei haruhia mai e ana.”+

28 No roto mai ia ratou pauroa na 12 opu o Iseraela, e tera ta to ratou metua tane i parau ia ratou a haamaitai ai oia ia ratou. Ua horoa oia i te haamaitairaa e tano no ratou tataitahi.+

29 I muri iho, faaue atura oia ia ratou: “Fatata vau i te amuihia i to ˈu mau taata.*+ A huna ia ˈu i roto i te ana i te fenua o Epherona te ati Heta,+ to reira te hunaraahia to ˈu mau metua 30 te ana i te fenua o Makapela i mua ia Mamera i te fenua o Kanaana, te tuhaa fenua ta Aberahama i hoo mai ia Epherona te ati Heta ei vahi hunaraa. 31 I reira te hunaraahia Aberahama raua ta ˈna vahine faaipoipo o Sara.+ I reira te hunaraahia Isaaka+ raua ta ˈna vahine faaipoipo o Rebeka, e i reira to ˈu hunaraa ia Lea. 32 Ua hoohia mai te fenua e te ana i nia iho i te mau tamaiti a Heta.”+

33 E oti aˈera ia Iakoba i te horoa i teie mau faaueraa i ta ˈna mau tamaiti. Faahoˈi maira oia i to ˈna avae i nia i to ˈna roˈi, puhi ihora i to ˈna aho hopea e amuihia ˈtura i to ˈna mau taata.*+

50 Piˈo ihora Iosepha i nia i to ˈna metua tane,+ taˈi ihora e apa ˈtura ia ˈna. 2 I muri iho, faaue atura Iosepha i ta ˈna mau tavini, te mau taote, ia rapaau i te tino pohe+ o to ˈna metua tane. Rapaau aˈera ïa te mau taote i to Iseraela tino, 3 e na reira ˈtura ratou ia ˈna e 40 mahana, o te maororaa hoi e rapaauhia ˈi te hoê tino, e taˈi noa ihora to Aiphiti no ˈna e 70 mahana.

4 I te mairiraa te mau mahana otoraa no ˈna, parau atura Iosepha i te mau tia mana* o Pharao: “Ia fariihia vau i mua i to outou aro, a faatae na i teie poroi ia Pharao: 5 ‘Ua ani to ˈu metua tane ia ˈu ia horeo,+ a na ô mai ai: “Inaha, te pohe nei au.+ E huna oe ia ˈu i to ˈu vahi hunaraa+ ta ˈu i pao i te fenua o Kanaana.”+ A faatia na ia pauma vau e huna i to ˈu metua tane, a hoˈi mai ai au.’” 6 Pahono maira Pharao: “A haere a huna i to metua tane mai ta ˈna i ani ia oe ia horeo.”+

7 Pauma aˈera ïa Iosepha e huna i to ˈna metua tane. Haere aˈera pauroa ta Pharao tavini na muri ia ˈna, oia hoi te mau matahiapo+ i rotopu i to ˈna mau tia mana e pauroa te matahiapo o te fenua o Aiphiti, 8 e pauroa te utuafare o Iosepha, ta ˈna mau tavini, to ˈna mau taeae e te utuafare o to ˈna metua tane.+ O ta ratou anaˈe mau tamarii rii e ta ratou mau nǎnǎ mamoe e animara ta ratou i vaiiho i te fenua o Gosena. 9 Pauma atoa ˈtura te tahi mau pereoo+ e feia faahoro puaahorofenua na muri ia ˈna, e mea rahi roa ratou. 10 E tae atura ratou i te vahi tairiiriraa huero maa* i Atada, i te tuhaa fenua o Ioridana, e oto noa ˈtura ratou i reira ma te auê rahi, e oto noa ˈtura ratou no to ˈna metua tane e hitu mahana. 11 Ite ihora to reira mau taata, to Kanaana, i te otoraa ratou i te vahi tairiiriraa huero maa i Atada, e na ô aˈera ratou: “E otoraa rahi tera no to Aiphiti!” Mairi ihora ïa ratou i taua vahi ra i te iˈoa o Abela-miziraima,* i te tuhaa fenua o Ioridana.

12 Rave ihora ïa ta Iakoba mau tamaiti mai ta ˈna iho â i faaue ia ratou.+ 13 Hopoi aˈera ta ˈna mau tamaiti ia ˈna i Kanaana e huna ihora ia ˈna i te ana i te fenua o Makapela, te tuhaa fenua i mua ia Mamera ta Aberahama i hoo mai ia Epherona te ati Heta ei vahi hunaraa na ˈna.+ 14 I muri iho i to ˈna hunaraa i to ˈna metua tane, hoˈi maira Iosepha i Aiphiti e to ˈna mau taeae e pauroa te taata tei na muri ia ˈna no te huna i to ˈna metua tane.

15 I muri aˈe i te poheraa to ratou metua tane, parau aˈera to Iosepha mau tuaana te tahi i te tahi: “Peneiaˈe te inoino noa ra Iosepha ia tatou e e tahoo paha oia no te ino atoa ta tatou i rave ia ˈna.”+ 16 Poroi aˈera ïa ratou ia Iosepha e na ô aˈera: “Teie ta to metua tane i faaue mai hou oia a pohe ai: 17 ‘Teie ta outou e parau ia Iosepha: “Te taparu nei au, a faaore na i te hapa rahi a to mau tuaana e ta ratou hara i rave i te hamani-ino-raa ia oe.”’ No reira, a faaore mai na i te hapa rahi a te mau tavini a te Atua o to metua tane.” E taˈi ihora Iosepha i te paraparauraa mai ratou. 18 E tapiri maira to ˈna mau tuaana e tipapa ihora i mua ia ˈna, e na ô maira: “Teie matou ta oe mau tîtî!”+ 19 Na ô atura Iosepha ia ratou: “Eiaha e mǎtaˈu. O vau anei te Atua no te haava ia outou? 20 Noa ˈtu ua hinaaro outou e hamani ino ia ˈu,+ na te Atua i opua i te reira ei maitai e no te faaherehere i te ora o te taata e rave rahi, mai ta ˈna e rave ra i teie mahana.+ 21 E teie nei, eiaha e mǎtaˈu. E tamau â vau i te horoa i te maa na outou e na ta outou mau tamarii rii.”+ E tamahanahana ihora oia ia ratou e paraparau atura ia ratou ma te mǎrû.

22 E parahi noa ihora Iosepha i Aiphiti, o ˈna e te utuafare o to ˈna metua tane. Ua ora Iosepha 110 matahiti. 23 Ua ite Iosepha i te mau mootua a Epheraima,*+ oia atoa te mau tamarii a Makira+ te tamaiti a Manase. Ua fanauhia ratou i nia i te turi o Iosepha.* 24 I muri aˈe, parau atura Iosepha i to ˈna mau taeae: “Te pohe nei au, tera râ e haapao mai iho â te Atua ia outou,+ e e haapauma oia ia outou na teie fenua ˈtu i te fenua ta ˈna i horeo ia Aberahama, Isaaka e Iakoba.”+ 25 Ani atura ïa Iosepha i te mau tamaiti a Iseraela ia horeo, a na ô ai: “E haapao mai iho â te Atua ia outou. E hopoi outou i to ˈu mau ivi i rapae i teie vahi.”+ 26 Pohe atura Iosepha i te 110raa o to ˈna matahiti, rapaauhia ihora to ˈna tino,+ e tuuhia ihora oia i roto i te hoê afata taata pohe i Aiphiti.