Samuela 1
O DAVIDA I TE FAAHOˈIRAAHIA E TE NUU O TE PHILISETI RA.
29 Ua haaputuputu maira te Philiseti i ta ratou atoa ra nuu i Apheka; e te puhapa noa ra te ati Iseraela i pihaiiho i te hoê pape pihaa i Iezereela. 2 Te haere noa ra te mau tavana no te Philiseti, ua hanere, e ua tausani hoi, te haere noa ra râ Davida e to ˈna mau taata i na muri mai, ratou e o Akisa atoa. 3 Ua na ô aˈera te feia tavana o te Philiseti, O vai râ teie e haere nei? Ua parau atura Akisa i taua na tavana o te Philiseti ra, E ere anei teie o Davida, te tavini o Saula, te arii o Iseraela, tei ia ˈu nei te parahiraa i na mahana aˈenei, e na matahiti aˈenei; e aita roa aˈenei a ˈna e hapa i itea e au, mai reira mai â e tae roa aˈenei i teie nei mahana? 4 Riri roa aˈera te mau tavana o te Philiseti ra ia ˈna; ua parau atura te mau tavana a te Philiseti ra ia ˈna, E faahoˈi oe ia ˈna; e hoˈi oia i muri i te vahi i vaiihohia e oe no ˈna; eiaha oia e haere atoa e matou i teie nei aroraa, o te riro hoi oia ei enemi no tatou i taua aroraa ra; i nahea hoi oia e au faahou atu ai i to ˈna ra fatu? e ere anei i te upoo o teie nei feia? 5 E ere anei teie o Davida, ta ratou i pehe-pu-piti maira e, Ua taparahi ta Saula e ua tausani, ua ahuru i te tausani i ta Davida.
6 Ua parau atura Akisa ia Davida, na ô atura ia ˈna, Oia ïa, mai ta Iehova e ora ra, ua tia atoa ta oe ra; e to oe haereraa i rapae au, e to oe hoˈi-haere-raa mai i roto i teie nei nuu, e mea tia ïa ia ˈu nei: aita hoi i itea ia ˈu te ino i roto ia oe na, mai te mahana mai â i haere mai ai oe ra, e tae roa aˈenei i teie nei mahana: aita râ te feia tavana ra i faaherehere mai ia oe ra. 7 E teie nei, e hoˈi, e haere ma te hau, eiaha hoi oe ia faariri atu i te mau tavana o te Philiseti nei. 8 Ua parau maira Davida ia Akisa, Eaha na râ vau? eaha tei itea i to tavini nei, mai ia ˈu â i haere mai ia oe na e tae roa aˈenei i teie nei mahana, ia ore hoi au ia haere atoa e ia aro i te mau enemi o tau fatu o tau arii? 9 Ua parau atura Akisa ia Davida, Ua ite au e, e maitai to oe ia ˈu nei, mai te melahi ïa o te Atua ra; ua parau na râ te mau tavana ra e, Eiaha ra oia e haere atoa i teie nei tamaˈi. 10 E tena na, e tia oe i te poipoi roa, o oe e te mau tavini atoa no to oe na fatu i haere atoa maira; e tei te feraoraoraa ra, a haere. 11 Ua tia aˈera Davida e te mau taata atoa no ˈna i te poipoi ra, e hoˈi i te fenua no te Philiseti; haere noa ˈtura râ te Philiseti i Iezereela.