Samuela 1

TE FAAHAPA NEI SAULA I TO ˈNA MAU TAATA; TE PARI NEI DOEGA I TE MAU TAHUˈA.

22 Haere ê atura Davida, haapuora ˈtura i roto i te ana ra o Adulama: e ite aˈera tana mau tuaana, e te utuafare atoa o tana metua ra, haere atoa ˈtura ratou i reira ia ˈna ra. 2 E te mau taata atoa i roohia i te ati ra, e te mau taata amu tarahu, e te feia atoa i inoino te aau ra, amui atoa ˈtura ïa ia ˈna ra, riro aˈera oia ei raatira i nia iho ia ratou: a maha aˈera hanere o te taata i te amuiraa ˈtu ia ˈna ra.

3 Ua haere atura Davida i Mizepe i ǒ Moabi ra, e ua parau atura i te arii o Moabi, E faatia mai oe i ta ˈu nei parau, e parahi tau metua tane e tau metua vahine i ǒ oe nei, ia ite aˈe na vau i ta te Atua ravea ia ˈu nei. 4 Ua aratai atura oia ia raua i mua i te aro o taua arii o Moabi ra; e ua parahi ihora raua i o ˈna i taua tapuni-haere-raa atoa o Davida ra.

5 Ua parau maira te peropheta ra o Gada ia Davida, Eiaha oe e parahi i roto i tena na ana; e haere ê, e haere i te fenua ra o Iuda. Haere atura Davida, e tae atura i te uru raau ra o Harete.

6 Ite aˈera Saula e, ua itea Davida e te mau taata atoa ia ˈna ra, (te parahi noa ra Saula i nia i te aivi i Gibea, i raro aˈe i te hoê raau, ma te maehae i te rima, e tana mau taata atoa i te tia-noa-raa i pihaiiho ia ˈna e ati noa ˈˈe;) 7 ua parau atura Saula i tana mau taata e tia noa mai i pihaiiho ia ˈna ra, A faaroo mai na, e te mau ati Beniamina e! e horoa mai anei te tamaiti a Iese i te fenua, e te ô vine na outou atoa na? e faariro anei oia ia outou ei raatira anaˈe no nia i te tausani e no nia i te hanere? 8 i faaau ai outou i te parau ia ˈu nei; i ore roa ai te hoê o outou nei i faaite mai ai, e ua faaau ta ˈu tamaiti i te parau i te tamaiti a Iese ra: aita râ te hoê o outou i aroha mai ia ˈu, aore hoi i faaite mai, e ua tiarepu ta ˈu tamaiti i tau tavini e moemoe ia ˈu nei, i teie nei mahana?

9 Ua parau maira Doega ati Edoma ra, te tia atoa maira i roto i taua mau taata no Saula ra, na ô maira, Ua ite au i te tamaiti a Iese i te haerea mai i Noba, i te tamaiti a Ahituba ia Ahimeleka ra: 10 e ua ui oia ia Iehova ia ˈna ra, e ua hopoi oia i te maa na ˈna; e ua hopoi atoa hoi i te ˈoˈe a te Philiseti ra a Golia na ˈna. 11 Ua tono atura te arii i te taata e tii i taua tahuˈa ra ia Ahimeleka a Ahituba ra, e te utuafare atoa o tana metua, te mau tahuˈa i Noba ra: e ua haere atoa maira ratou i te arii ra. 12 Ua parau atura Saula, E te tamaiti a Ahituba ra, a faaroo mai na. Ua na ô maira oia, Teie au, e tau fatu. 13 Ua parau atura Saula ia ˈna, Eaha orua i faaau ai i te parau ia ˈu, o oe, e te tamaiti a Iese, ua horoa oe i te maa na ˈna, e te ˈoˈe, e ua ui oe i te Atua ia ˈna, ei faaitoito ia ˈna ia taotooto oia ia ˈu, mai tei teie nei â mahana? 14 Ua parau maira Ahimeleka i te arii, na ô maira, O vai atu hoi te taata haapao maitai i to mau tavini atoa na maori râ o Davida, o te hunoa o te arii ra, o tei faaroo noa hoi ia faaue oe ra, e ua tura hoi i to oe ra utuafare? 15 Tera a itea anei ta ˈu uiraa i te Atua ia ˈna? eiaha roa ïa parau ia ˈu; eiaha te arii e parau e, e hara ta to ˈna tavini, e ta te utuafare atoa a tau metua, aore roa hoi to tavini i ite i tena na mau parau e hoê vahi iti aˈe. 16 Ua parau atura te arii, e pohe mau oe, e Ahimeleka, o oe, e te utuafare atoa o to metua na.

17 Ua parau atura te arii i te mau taata i tia noa mai i pihaiiho ia ˈna ra, A rave, a taparahi i te mau tahuˈa a Iehova; no te mea, ua tauturu ratou ia Davida; e no te mea, ua ite ratou ia ˈna i te hororaa, e aore i faaite mai ia ˈu. Aita aˈera râ taua mau taata o te arii ra i rave noa ˈtu to ratou rima i taua mau tahuˈa a Iehova ra. 18 Ua parau atura te arii ia Doega, A tii oe a rave i taua mau tahuˈa ra. Ua tii atura taua ati Edoma ra o Doega, ua rave atura i taua mau tahuˈa ra, taparahi atura, e a vau aˈera ahuru e pae tiahapa o te taata, o te feia i ahu i te tiputa vavai tei pohe ia ˈna i te reira mahana. 19 E o Noba atoa, te oire o te feia tahuˈa, tei tairihia e ana i te ˈoˈe, o te tane, e te vahine, e te tamarii, e te aiû rii, e te mau puaatoro, e te asini, e te mamoe, ua tairi-atoa-hia ïa e ana i te ˈoˈe.

20 Ua ora ihora te hoê tamaiti a Ahimeleka a Ahituba, o Abiatara te iˈoa, horo atura ia Davida ra. 21 Ua faaite atura Abiatara ia Davida, e ua pau te mau tahuˈa a Iehova i te taparahihia e Saula. 22 Ua parau maira Davida ia Abiatara, Ua ite na vau i taua mahana ra, no te mea i reira atoa taua ati Edoma ra o Doega, e e riro oia i te faaite ia Saula ra. No ˈu i pohe ai te utuafare atoa o to metua na. 23 E parahi mai oe i ǒ nei ia ˈu nei, eiaha e mǎtaˈu: o te titau mai ia oe ia pohe, ua titau mai ïa ia ˈu ia pohe: area ia ˈu nei, e ora ïa oe.