Samuela 1

TE AAU O IONATANA I TE RIRO-ROA-RAA IA DAVIDA, FEIIHIA AˈERA E SAULA.

18 E ia faaoti aˈera oia i taua parauraa ia Saula ra ati roa aˈera te aau o Ionatana i te aau o Davida, oto atura Ionatana ia Davida mai to ˈna atoa ra aroha ia ˈna ihora. 2 Ua rave maira Saula ia ˈna i taua mahana ra, aore aˈera i tuu ia ˈna ia haere noa na i te utuafare o tana metua ra. 3 Ua fafau ihora Ionatana raua o Davida i ta raua ra faufaa, no te mea, ua au roa ˈtura tana aau ia ˈna, mai te mea e oia iho. 4 Ua tatara aˈera oia i tana ahu i nia ia ˈna iho e ua hopoi atura ia Davida, te mau ahu atoa no ˈna, e te ˈoˈe, e te fana, e te tatua. 5 E ua haere anaˈe ihora Davida i te mau vahi atoa ia tonohia e Saula ra, haapao maite atura oia: ua tuu aˈera Saula ia ˈna i nia i te mau taata tamaˈi ra, e itehia maira oia e te taata, e te mau tavini atoa o Saula ra. 6 E tei to ratou haereraa mai a hoˈi mai ai Davida mai te taparahiraa i te Philiseti ra, haere maira hoi te mau vahine mai roto mai i te mau oire atoa no Iseraela e farerei i te arii ra, ia Saula ma te pehe, e te upaupa, e te oaoa, e te tophe, e te selese. 7 I faaoto hoi te mau vahine ma te pehe atoa, i te pehe-pu-pitiraahia, na ô aˈera, Ua pohe ta Saula e ua tausani, ua ahuru râ te tausani i ta Davida. 8 Riri roa aˈera Saula, e mea ino ia ˈna taua parau ra; e ua na ô aˈera oia, Ua faaahuru ratou i ta Davida tausani; e ta ˈu ra o te tausani noa anaˈe ra ïa: eaha ˈtu â te toe maori râ o te basileia nei? 9 Mai taua mahana mai â Saula i te hiˈohiˈoraa ia Davida. 10 E ao aˈera, tei nia maira te hoê varua ino no ǒ mai i te Atua ra ia Saula, ua tohu ihora oia i roto i taua fare ra: ua faaoto ihora te rima o Davida mai tei mutaaihora: e hoto hoi tei te rima o Saula. 11 Ua maˈoa maira Saula i taua hoto ra; ua na ô aˈera hoi oia, E maˈoa vau e piri noa ˈtu Davida i nia i te pae fare. Ape aˈera râ Davida e a piti aˈera aperaa. 12 Mǎtaˈu aˈera Saula ia Davida, i te mea tei ia ˈna Iehova, e ua faarue maira ia Saula. 13 No reira Saula i tuu ê atu ai ia ˈna, e ua faariro atura ia ˈna ei raatira i nia iho i na taata hoê tausani ra, o ta ˈna ïa i aratai i rapae e i roto. 14 E ua haapao maitai atura Davida i tana mau haerea atoa; e te ati maira Iehova ia ˈna. 15 E ia hiˈo mai Saula ia ˈna e te haapao maitai ra; rahi atura to ˈna mǎtaˈu ia ˈna. 16 Area Iseraela e Iuda atoa ra, te here maira ratou ia Davida, no te mea na ˈna ratou i aratai i rapae e i roto. 17 Ua parau maira Saula ia Davida, Inaha, o tau tamahine matahiapo ra o Meraba, oia ta ˈu e horoa ˈtu na oe ei vahine: ia itoito râ oe ia ˈu nei, e aro i te tamaˈi a Iehova ra. I parau na hoi Saula e, eiaha tau rima e rave ia ˈna, na te rima râ o te Philiseti e rave ia ˈna. 18 Ua parau atura Davida ia Saula, O vai hoi au nei, e eaha to ˈu nei ora, e te fetii o tau metua i Iseraela nei, i faarirohia ˈi au nei ei hunoa na te arii? 19 Ia tae râ te mahana e horoahia ˈi te tamahine a Saula ra o Meraba ia Davida ra, horoahia ˈtura ïa ei vahine na Aderiela i Meholati ra. 20 E ua hinaaro hoi te tamahine a Saula ra o Mikala ia Davida; e ua faaite atura ratou ia Saula, e e mea maitai atura ia ˈna. 21 E ua na ô aˈera Saula, E horoa vau ia ˈna ei vahine na ˈna, ia riro oia ei marei ia ˈna, ia rave mai te rima o te Philiseti ia ˈna, e ua na ô aˈera Saula ia Davida, e riro oe ei hunoa no ˈu i teie nei mahana i te hoê o taua na tamahine toopiti na ˈu nei. 22 Ua parau atura Saula i tana mau tavini, na ô atura, E paraparau huna ˈtu outou ia Davida, e na ô atu outou ia ˈna, Inaha, te au maira te arii ia oe, e te here maira tana mau taata atoa ia oe ra; e teie nei, ei hunoa oe no te arii nei. 23 Ua parau atura taua mau tavini o Saula ra i taua parau ra ia Davida: ua na ô maira râ Davida, E mea tia noa anei ia outou, o te taata iti haehaa mai ia ˈu nei, ia riro ei hunoa no te arii? 24 Ua faaite maira te mau tavini o Saula ia ˈna, na ô maira, Teie ta Davida ra parau. 25 Ua parau atura Saula, E na ô atu outou ia Davida, Aore te arii e hinaaro i te hoo, area e iri i mua no te Philiseti ia hoê hanere, ei tahooraa ˈtu i te enemi o te arii ra: hinaaro hoi Saula ia pohe Davida i te rima o te Philiseti ra. 26 E tei te faaiteraa tana mau tavini ra ia Davida i te reira parau, tia ˈtura ia Davida ia faarirohia oia ei hunoa no te arii ra; e mahemo aˈera e fanu pue mahana. 27 Ua tia aˈera Davida haere atura, oia e tana mau taata, e ua taparahi atura i to te Philiseti e piti hanere atura i te taata; e ua hopoi maira Davida i to ratou iri i mua, e ua tuu atoa ˈtura ratou i te arii ra, ia riro hoi oia ei hunoa no te arii. E ua horoa maira Saula i ta ˈna tamahine ia Mikala na ˈna, ei vahine. 28 Te ite ra Saula e, te ati maira Iehova ia Davida, e te hinaaro ra ta ˈna tamahine ra o Mikala ia ˈna, 29 rahi atura o Saula mǎtaˈu ia Davida; riro atura Saula ei enemi mau no Davida, 30 ia tae anaˈe mai râ te mau tavana o te Philiseti i rapae, e ravea paari rahi ta Davida i ta te mau taata atoa o Saula ra; parare rahi roa ˈtura to ˈna roo.