Apokalupo

E VAHINE VEHÎHIA I TE MAHANA, ROOHIA I TE MAUIUI FANAU.

12 E tapao rahi tei itea i nia i te raˈi, e vahine i vehîhia i te mahana, e te marama i raro aˈe i tana avae, e e korona fetia tei nia i tana upoo hoê ahuru e ma piti. 2 E ua hapu oia, e ua auê ihora i te mauiui, autâ ˈtura ia fanau vave. 3 E ua itea maira hoi te tahi tapao i nia i te raˈi; inaha e teni rahi uteute, e hitu omii, auahuru hoi tara, e hitu hoi korona i nia iho i taua mau omii no ˈna ra. 4 E paooa mai te toru o te tufaa o te mau fetia o te raˈi e te itere o taua teni ra, e tiria mai i raro i te fenua nei. Ua faanahonaho ihora taua teni ra ia ˈna iho i mua i te aro o te vahine i fatata i te fanau ra, ia pau te tamaiti ia ˈna i fanau ra. 5 Ua fanau maira ta ˈna e tamaroa, o te riro ia ˈna te tavana i te mau fenua atoa ma te sepeta auri ra: e i haruhia mai ta ˈna tamaiti e hopoihia i nia i te Atua ra i to ˈna ra terono. 6 Reva ˈtura taua vahine ra i te medebara, i te vahi i haapaohia e te Atua no ˈna, ia utuutuhia oia i reira, e ia hoê tausani ia piti hanere e ia ono ahuru i te mahana.

7 E e tamaˈi tei nia i te raˈi: O Mihaela e ta ˈna ra mau melahi tamaˈi atura i te teni; e ua tamaˈi maira te teni e ta ˈna ra mau melahi. 8 Aore râ i riro te re ia ratou; e aore roa ˈtura o ratou e parahiraa i nia i te raˈi. 9 Hurihia ˈtura hoi te teni rahi i rapae, o taua ophi tahito ra ïa, o tei parauhia o te diabolo ra, e o Satani hoi, o tei haavare i to te ao atoa nei; i hurihia oia i rapae i nia iho i te fenua nei, e ta ˈna mau melahi atoa ua huri-atoa-hia i rapae. 10 E faaroo atura vau i te hoê reo rahi i nia i te raˈi, i te na ôraa e, Teie mai nei te ora, e te puai, e te basileia o to tatou Atua, e te mana o ta ˈna ra Mesia: ua hurihia hoi te tihotiho i to tatou mau taeae i raro, o tei tihotiho ia ratou i mua i te aro o to tatou Atua i te rui e te ao. 11 Pohe atura râ oia ia ratou i te toto o te Arenio, e i te parau ta ratou i faaite ra, aore hoi ratou i nounou i to ratou iho ora ua faaoromai râ e tae noa ˈtu i te pohe. 12 E teie nei, a oaoa, e te mau raˈi ra e, e o outou atoa hoi o tei parahi i reira ra. E ati ra hoi to te fenua e to te tai, tei raro atu na hoi te diabolo ia outou na; e riri rahi hoi to ˈna, no te mea ua ite oia e maa taime poto to ˈna e toe nei. 13 E ite aˈera te teni e ua hurihia oia i raro i te fenua nei, ua titau atura oia i te vahine i fanau i te tamaiti ra. 14 E e pue pererau e piti no te hoê aeto rahi ra tei horoahia mai no taua vahine ra, ia maue oia i te medebara, i to ˈna vahi, e faaamuhia ˈi oia ra, e ia hope te hoê tau, e ia hope hoi o e piti atu tau, e e maa tau vaehaa e tahi, ia moe te mata o te ophi ra. 15 Ua haapuai atura te ophi i te pape no roto i to ˈna vaha mai te vai pue ra, na muri iho i taua vahine ra, ia riro oia i taua vai pue ra. 16 Ua tauturu ra te fenua nei i taua vahine ra, ua hamǎmǎ aˈera te fenua i tana vaha, e ua horomii i taua vai pue ra ta te teni i haapuai atu no roto i tana vaha ra. 17 Riri roa aˈera te teni i taua vahine ra, haere atura e tamaˈi atu i te toea o to ˈna ra huaai, o tei haapao i te parau a te Atua ra, o tei mau maite i te parau a Iesu Mesia i faaite maira.