Ioane 3

Te Episetole toru a Ioane ra

1 Te peresibutero ra o Ioane ia Gaio i herehia ra, o ta ˈu hoi e aroha nei i te parau mau.

2 E tau here e, te hinaaro nei au ia maitai oe i te mau mea atoa ra, e ia ora to tino mai to varua e ora na. 3 E oaoa rahi to ˈu i te haerea mai o te mau taeae ra, o tei faaite mai i te parau mau ia oe na, mai ta oe â hoi e haapao i te parau mau na. 4 Aita ˈtu o ˈu oaoa rahi maori râ ia ite au e te haapao ra tau mau tamarii i te parau mau. 5 E tau here e, e mea tia mau ta oe i rave i te mau taeae ra, e te taata ěê atoa ra: 6 ua faaite mai ratou i taua aroha no oe i mua i te aro o te ekalesia nei; e mea maitai ïa ia oe ia tauturu oe ia ratou i to ratou tere, i tei au i te tavini o te Atua ra: 7 no te mea, no to ˈna ra iˈoa i haere ai ratou, e aore i rave i ta te Etene ra. 8 Ia farii hoi tatou i te reira e tia ˈi, ia riro tatou ei feia rave ohipa atoa i te parau mau nei. 9 I papai na vau i te parau i te ekalesia na; o Dioterephe râ o tei faateitei ia ˈna iho i nia iho ia ratou ra, e ore oia e farii mai ia matou. 10 E teie nei, i tae atu vau ra, eita e moe ia ˈu ta ˈna e rave ra, i te paraparau haereraa ia matou i te parau faaino ra; e ore hoi e faaea noa i reira, e ore atoa oia iho e ite i te mau taeae, e te feia hoi e ite ra, ua faaore oia, e ua tuu i te reira i rapae i te ekalesia ra. 11 E tau here e, eiaha e pee i te parau ino, i te parau maitai râ. O tei rave i te maitai ra, no te Atua ïa: area o tei rave i te ino ra, aore ïa i ite i te Atua. 12 Te haamaitaihia nei Demeterio e te taata atoa, e te parau mau atoa hoi: e te haamaitai atoa nei matou, e ua ite hoi outou e, e parau mau ta matou i faatia nei.

13 E rave rahi ta ˈu parau ia papai atu, eita râ vau e papai atu i te parau ia oe i te peni e te inita: 14 te manaˈo nei râ vau, e ite atu vau ia oe ia roovau iti aˈe, e farerei hua to tâua mata a paraparau ai. Ei hau to oe. Te aroha ˈtu nei te mau taua nei ia oe. E aroha ˈtu oe i te mau taua na ma te faahiti hau i te iˈoa.