Ioane 2
Te Episetole piti a Ioane ra
1 Te peresibutero ra o Ioane i te vahine mana i maitihia ra e ta ˈna atoa ra mau tamarii, o ta ˈu e aroha i te parau mau nei: e ere ra o vau anaˈe, o te feia atoa râ i ite i te parau mau ra; 2 no te parau mau e vai i roto ia tatou nei, e e vai â i roto ia tatou e a muri noa ˈtu. 3 Ei ia outou te aroha mau, e te hamani maitai, e te hau no ǒ mai i te Atua Metua ra, e no te Fatu ra hoi no Iesu Mesia, te Tamaiti a te Metua ra, i te parau mau e te aroha.
4 E oaoa rahi to ˈu i te iteraa ˈtu vau i vetahi tamarii a oe na i te haapaoraa i te parau mau, mai te parau i noaa ia tatou no ǒ mai i te Metua ra. 5 E teie nei, teie ta ˈu parau ia oe, e tera ra vahine, e ere râ mai te mea e te papai atu nei au i te parau apî ia oe na, o te parau râ i noaa mai ia tatou mai te matamua mai â, e e aroha tatou ia tatou iho. 6 Teie hoi taua aroha nei, ia haapao tatou i ta ˈna ra parau. Teie taua parau ra, Mai ta outou i faaroo mai te matamua mai â, e haapao outou i te reira. 7 E rave rahi hoi te haavare i reva ˈtura na te ao nei, o tei ore e parau e ua haere taata mai Iesu Mesia i te ao nei, o taua haavare ra hoi te reira, e anetimesia ïa. 8 E ara ia outou iho, ia ore matou ia ere i tei ravehia e matou ra, ia noaa râ ia tatou te utua mau. 9 O tei rave i te hara ra, aore i tapea tamau i te parau a te Mesia ra, aore ia ˈna te Atua. O tei tapea tamau ra i te parau a te Mesia ra, tei ia ˈna te Metua e te Tamaiti atoa hoi. 10 Ia haere noa mai te hoê taata orometua ia outou na, e ere teie ta ˈna parau i haapii mai, eiaha e farii atu ia ˈna i roto i to outou mau fare, eiaha e parau atu ia ˈna e, Ia ora na i te haerea. 11 O tei parau atu hoi ia ˈna e, Ia ora na i te haerea, ua amui atoa ˈtu ïa ia ˈna i ta ˈna ra parau iino.
12 E rave rahi ta ˈu parau ia papai atu ia outou na, aita râ vau i hinaaro i te papai i taua parau ra i te inita i nia i te pepa; te manaˈo nei râ vau e haere hua ˈtu ia outou na ia farerei hua a paraparau ai, ia tia roa to tatou oaoaraa. 13 Te aroha ˈtu nei te mau tamarii a to taeae maitihia nei ia oe na. Amene.