Iosua

TE AMUIRAA A TE MAU ARII, E RAVE I TE ATI ISERAELA RA.

9 E ite aˈera te mau arii i teie pae Ioridana, to nia i te mouˈa, e to te mau peho, e to te pae tahatai atoa i te miti rahi ra i pihaiiho i Lebanona ra; no te ati Heta, e no te ati Amori, e no te ati Kanaana, e no te ati Perezi, e no te ati Hevi, e no te ati Iebusi; 2 ua amui atoa aˈera ratou atoa e aro ia Iosua e Iseraela atoa, i te amuiraa hoê.

3 E ite aˈera to Gibeona i ta Iosua i rave ia Ieriko ra, e ia Ai, 4 ua haapaari atoa, ua haapeu tiatia vea ratou, ua tuu aˈera i te pute tahito i nia iho i ta ratou mau asini, e te mau farii uaina marau e te motumotu, ua putiitiihia ra; 5 e te tamaa marau e te tifaifai tei to ratou avae; e te ahu marau i nia iho ia ratou, e ta ratou maa no te ô, ua mǎrô anaˈe ïa e te puavere. 6 Ua haere maira ratou ia Iosua ra, i te puhapa i Gilagala ra, ua parau maira ratou ia ˈna, e te mau taata atoa no Iseraela, Mai te fenua roa mai matou, e teie nei, e faaau mai outou i te hoê faufaa ia matou nei. 7 Ua parau atura to Iseraela i taua mau ati Hevi ra, Peneiaˈe no ǒ nei outou i ǒ matou nei, eaha matou e tia ˈi ia faaau i te faufaa ia outou na? 8 ua parau maira ratou ia Iosua, Ei tavini matou no oe, ua parau atura Iosua ia ratou; O vai outou, e mai hea mai outou? 9 ua parau maira ratou ia ˈna, Mai te fenua roa mai to mau tavini nei, no te iˈoa o to Atua ra o Iehova: ua faaroo hoi matou i to ˈna roo, e te mau mea atoa ta ˈna i rave i Aiphiti ra, 10 e ta ˈna atoa i rave i na arii o te ati Amori, i te tahi pae Ioridana ra, ia Sihona arii i Hesebona, e ia Oga arii i Basana, i parahi i Asetarota ra. 11 No reira to matou feia tavana, e te taata atoa o to matou fenua, i parau mai ai ia matou, na ô maira e, A rave i te maa ei ô na outou, i to outou tere, e haere outou e farerei atu ia ratou, a na ô atu ai e, E tavini matou no outou, e teie nei, e faaau mai outou i te tahi faufaa ia matou nei. 12 Teie nei pane na matou nei, i hopoi-mahanahana-hia mai e matou mai roto mai i to matou mau fare, i te mahana i haere mai ai matou ra, teie nei râ, ua mǎrô inaha, e ua puavere! 13 E teie nei mau farii uaina, i faaîîhia e matou ra, e mea apî ïa: e inaha, ua motumotu! e to matou nei ahu, e to matou tamaa, ua marau i te maoro o teie nei haerea. 14 Ua rave ihora te mau taata o Iseraela i ta ratou maa ua amu, e aore aˈera i ui i ta Iehova ra parau. 15 Ua hamani maitai atura Iosua ia ratou, e ua faaau ihora i te faufaa ia ratou, e e faaorahia ratou; e ua tǎpǔ ihora hoi te mau tavana o taua amuiraa ra ia ratou.

16 E hope aˈera na mahana e toru, i muri aˈe i ta ratou faaauraa i te faufaa ia ratou ra, ite aˈera ratou e, no reira iho taua feia ra, e tei ǒ ratou iho i te parahiraa. 17 Haere atura te tamarii a Iseraela, e tae atura i to ratou mau oire i te mahana toru ra. Teie te iˈoa o to ratou mau oire, o Gibeona, e o Kephira, e o Beerota, e o Kiriata-iearima. 18 Aita aˈera te tamarii a Iseraela i taparahi ia ratou, no te mea, ua tǎpǔ te mau tavana o te amuiraa i te Atua o Iseraela ia Iehova ia ratou. Ua mutamuta anaˈe ihora te amuiraa atoa i te mau tavana. 19 Ua na ô aˈera râ te mau tavana i taua amuiraa atoa ra, Ua tǎpǔ matou i te Atua o Iseraela ia Iehova ia ratou: e ore hoi e tia ia rave atu tatou ia ratou i teie nei. 20 E na ô ra tatou ia ratou, e vaiiho noa ˈtu tatou ia ora, o te ririhia mai tatou, i te tǎpǔ ta tatou i tǎpǔ atu ia ratou ra. 21 Ua parau atura te mau tavana, Vaiiho noa ˈtu ia ratou ia ora; ei papai vahie râ ratou, e ei tii pape na te amuiraa atoa; i ta te mau tavana i parau atu ia ratou ra.

22 Ua ope maira Iosua ia ratou, e ua parau atura oia ia ratou, na ô atura, Eaha outou i haavare mai ai ia matou, i na ô mai ai e, No te atea ê matou, e tei roto ia matou nei outou i te parahiraa? 23 E tena na, ua katarahia outou, e ore roa outou e toe i te faatavinihia, ei papai vahie e ei tii pape no te fare o tau Atua.

24 Ua parau maira ratou ia Iosua, na ô maira, No te mea, ua faaitehia mai to mau tavini nei e, ua parau mai to Atua ra o Iehova ia Mose e, e horoa i te fenua atoa nei no outou, e e taparahi i te taata atoa e ia pau roa i mua i to outou aro; mǎtaˈu roa aˈera matou ia outou o te pohe roa matou i na reira ˈi hoi matou nei. 25 E teie nei, tei to rima matou inaha; o te tia ia oe ia rave ra, o ta oe ïa e rave ia matou nei. 26 Na reira ˈtura oia ia ratou, faaora ihora ia ratou i te rima o te tamarii a Iseraela, ore aˈera ratou i taparahi. 27 Faariro atura Iosua ia ratou ei papai vahie i taua mahana ra, e ei tii pape na te amuiraa atoa ra, e no te fata a Iehova i te vahi i haapaohia e ana ra, e tae roa aˈenei i teie nei mahana.