Hebera

TE AˈO NEI OIA IA TATOU EIAHA IA ORAI TIA I MURI I TE FAAROORAA, E FAAITOITO RÂ, E FAAOROMAI.

6 E teie nei, e vaiiho noa ˈˈe na i te parau matamua o te Mesia ra, e haere â tatou i mua i te paari mau ra; eiaha râ ma te haamau faahou i te tumu ra i te tatarahapa i te ohipa pohe, e te faaroo i te Atua ra, 2 e te parau no te mau bapetizo, e no te tuuraa rima ra, e te tia-faahou-raa o tei pohe ra, e te haavaraa utua raveraa mure ore ra. 3 E e na reira hoi tatou, ia tia i te Atua ra.

4 O te feia hoi i haamaramaramahia, e ua ite i te horoa o te raˈi ra, e ua noaa te Varua Maitai, 5 e ua tamata i te parau maitai a te Atua ra, ua hiˈo hoi i te mana o te ao a muri atu, 6 e taiva ê atu râ, e ore roa ïa e tia ia faatupu faahou i te tatarahapa ia ratou; ua faasatauro faahou hoi ratou i te Tamaiti a te Atua, e ua faariro faaite noa ia ˈna ei faainoraa. 7 O te fenua hoi i horomii i te ûa mairi pinepine i nia ihora, e ua faatupu mai i te maa maitai na te feia i faaapu ra, ua haamaitaihia ïa e te Atua: 8 area tei faatupu mai i te tataramoa, e te mau raau taratara ra, ua faaruehia ïa, e ua fatata i te faainohia; o te auahi hoi to ˈna hopea.

9 Area outou, e au mau here e, te manaˈo nei matou e maitai to outou i to te reira, te maitai i apiti-atoa-hia i te ora ra, parau noa ˈtu ai matou i taua parau nei. 10 E ere te Atua i te Atua parau-tia ore, a haamoe ai oia i ta outou ohipa i rave, e to outou hinaaro i to ˈna ra iˈoa, i faaite-papu-hia e outou na, outou i tauturu i te feia moˈa, e te tauturu noa na hoi outou. 11 E te hinaaro nei matou ia faaite tamau maite â outou atoa i taua itoito na, ia noaa te tiai ite papu e tae noa ˈtu i te hopea ra: 12 ia ore outou ia toaruaru, ei pee râ i te feia i noaa tei parauhia maira i te faaroo e te faaoromai. 13 A parau mai ai hoi te Atua i ta ˈna parau ia Aberahama ra, no te mea aita ˈtu e mea mana ˈtu ia tǎpǔ oia ra, ua tǎpǔ ihora ia ˈna iho, 14 i te na ôraa e, E haamaitai mau â vau i te haamaitairaa ia oe, e faarahi mau â vau i te faarahiraa ia oe. 15 E maoro aˈera oia i te tiairaa ma te faaoromai, noaa ihora ia ˈna tei parauhia maira. 16 E tǎpǔ hoi te taata nei i tei hau i te rahi ra, e te faaotiraa i te mau mârô atoa ra, oia te tǎpǔ haapapu nei. 17 Oia hoi te Atua, hinaaro aˈera oia i te faaite papu mai i te feia tufaa i tei parauhia maira i te hirohirouri ore o ta ˈna ra opua, haapapu atura i te tǎpǔ; 18 ia rahi to tatou mauruuru i taua na parau hirohirouri ore e piti ra, o tei ore e tia i te Atua ia haavare ra, o tatou, o tei horo i te tiaturiraa i tuuhia mai i mua ia tatou ia noaa ei haapuraa. 19 O ta tatou ïa tiataro no te varua, e te mahiti ore, e te mau maitai, no te mea ua haamauhia i te vahi i roto mai i te paruru ra; 20 i te vahi i tomohia e to tatou na mua e Iesu, o tei faarirohia ei tahuˈa rahi e a muri noa ˈtu ia au i te parau ia Melehizedeka.