Hebera

TEI TE FAAROO E NOAA ˈI TE ORA IA TATOU, IA FAAROO I TE MESIA RA.

4 E teie nei, ia mǎtaˈu tatou e tia ˈi, o te parau hoi i vaiihohia nei e, e ô i te faaearaa o te Atua ra, o te huru mairi noa ˈtu hoi vetahi o outou i muri. 2 Te parauhia nei hoi taua evanelia ra ia tatou nei, o tei parauhia ˈtu ia ratou ra; aita râ ratou i faufaahia i taua parau i parauhia ˈtu ia ratou ra, no te mea aore i anoihia i te faaroo e te feia i ite ra. 3 O tatou hoi e faaroo nei, e ô â ïa i te faaearaa o te Atua, ta ˈna hoi i parau ra e, Tǎpǔ ihora vau i tau ririraa ra e, E ore roa ratou e ô i to ˈu ra faaearaa, oti noa ˈi te mau ohipa mai te matamua mai â o teie nei ao. 4 Te na ô maira hoi Mose i te hoê vahi, i te parau i te mahana hitu ra e, Faaea ihora te Atua i te mahana hitu i ta ˈna atoa ra mau ohipa. 5 E i teie nei â hoi Salamo, E ore roa ratou e ô i to ˈu ra faaearaa. 6 E teie nei, ia ô â te hoê pae i roto e tia ˈi, e aore taua feia i parauhia ˈtu te evanelia i mutaa ihora i ô i te faaroo ore: 7 (ua haapao â te Atua i te hoê mahana, i te na ôraa mai i te vaha o Davida ra e, I teie nei mahana, e taime maoro hoi tei mairi: mai te parauhia ra e, I teie nei â mahana, ia tia ia outou i te faaroo i tana reo, eiaha e faaîta i to outou aau. 8 Ahiri hoi Iosua i horoa i te faaearaa no ratou, e ore hoi te Atua e na muri i te faaite mai i te tahi â mahana. 9 E teie nei, te vai râ maori te faaearaa no te taata no te Atua. 10 O tei ô hoi i te faaearaa o te Atua ra, ua faaea ïa oia i ta ˈna atoa ohipa, mai te Atua hoi i faaea i ta ˈna ra.) 11 E teie nei, e rohi ïa tatou i te faaô i taua faaearaa ra, o te mairi noa ˈtu te hoê mai ia ratou i mairi i te faaroo ore ra. 12 E mea ora hoi te parau a te Atua, e te puai rahi, e te ooi rahi hoi to te reira i to te ˈoˈe mata piti ra, i te putapupû-roa-raa hoi e taa ê noa ˈtu te varua e te aau, e te tiaatiraa e te puo ivi aa, e te hiˈopoa hoi i te manaˈo e te opua o te aau ra. 13 Aore roa hoi e mea i moe ia ˈna; te vai noa nei râ te mau mea atoa ma te maheu roa i mua i to ˈna mata, to tei haava mai ia tatou nei. 14 E teie nei, e tahuˈa rahi hau ê to tatou i reva aˈenei i nia i te raˈi, o te Tamaiti a te Atua ra o Iesu, e tapea maite â tatou i ta tatou parau. 15 E ere hoi to tatou i te tahuˈa rahi e ore e tia ia aroha mai ia tatou i to tatou mau paruparu nei; i ati atoa hoi oia i te mau mea atoa mai ia tatou atoa nei, aita roa râ e hara. 16 E teie nei, e faafatata noa ˈtu tatou i te terono o te aroha mau ra, ia arohahia mai tatou nei, e ia noaa te maitai ei turu mai ia tatou i te tau e au ai ra.