Hebera

Te Episetole i te mau Hebera ra

TE MESIA I TE HAEREA MAI MAI Ǒ MAI I TE METUA RA, E ORE E TIA IA FAAAUHIA I TE MAU MELAHI.

1 O te Atua, o tei parau riirii mai i mutaa iho, e rave rahi te huru o te parauraa mai i te feia tupuna i te mau peropheta, 2 o tei parau mai ïa ia tatou i teie nei anotau hopea i te Tamaiti, o tei haapaohia e ana ei Fatu no te mau mea atoa nei, e ua hamani hoi oia i na ao atoa nei ia ˈna; 3 o te anaana hoi oia o to ˈna ra hanahana, e o te hohoˈa mau ïa no ˈna iho, e te mauraa hoi i te mau mea atoa nei i ta ˈna ra parau mana, oti aˈera ta tatou hara i te tamâhia e ana ia ˈna ihora, parahi ihora i raro i te rima atau o te Mana i te vahi teitei ra; 4 e maitai hau ê hoi to ˈna i to te mau melahi, mai te iˈoa i noaa ia ˈna i hau ê i te maitai i to ratou ra.

5 O vai hoi to taua mau melahi ra ta te Atua i parau noa ˈtu mai tahito mai â e, O tau Tamaiti oe, i nauanei oe i fanauhia ˈi e au? E ta ˈna hoi i na ô ra e, Ei Metua vau no ˈna, e ei Tamaiti oia na ˈu? 6 E ia ˈna hoi i faahoˈi faahou mai i te matahiapo i te ao nei, na ô aˈera oia, Ia haamori te mau melahi atoa a te Atua ia ˈna. 7 I te melahi ra, te na ô ra ïa oia, Ua faariro oia i te mau melahi no ˈna mai te mataˈi, e te mau tavini no ˈna mai te auahi ura ra. 8 Area i te Tamaiti ra, te na ô ra ïa, O to oe terono, e te Atua e, e tia ïa i te vai-maite-raa e a muri noa ˈtu, e te sepeta o to oe ra basileia, e sepeta parau-tia ïa. 9 I hinaaro na oe i te parau-tia, e i faufau na oe i te parau ino, no reira te Atua, to Atua i faatahinu rahi hua ˈi ia oe i te monoˈi ra i te oaoa, e hau atura i te feia i amui atoa ia oe ra. 10 E, na oe, e te Fatu, i haamau i te tumu o te fenua i te matamua ra; e te mau raˈi nei hoi, e ohipa ïa na to rima: 11 e mou ratou; e vai â râ oe; e marau anaˈe ratou mai te ahu nei; 12 e na oe ratou e tiafetu mai te ahu ra, e e huru ê atu ïa ratou; hoê râ o oe huru, e to oe ra mau matahiti e ore roa ïa e hope. 13 E o vai to taua mau melahi ra ta ˈna i parau noa ˈtu mai tahito mai â e, A parahi i tau rima atau nei, e ia faariro vau i to mau enemi ei taahiraa avae no oe? 14 E ere anei ratou i te tavini varua anaˈe, i tonohia ei tiai i te feia e noaa ia ratou te aiˈa ra i te ora?