Tito
TE FAAITE NEI PAULO IA TITO I TA ˈNA PARAU IA HAAPII.
3 E faaite atu ia ratou, e e auraro maite i te hui arii e te feia mana, e faaroo i te feia haava ra, e faatia i te mau ohipa maitatai atoa ra. 2 Eiaha roa e parau ino i te taata atoa ra, eiaha ei mârôrô, ia mǎrû râ, e te mamahu i te taata atoa ra. 3 Ite ore atoa to tatou i mutaa ihora, e te faaroo ore, e te hapa, e tavini no te mau hinaaro tia ore e te navenave e rave rahi ra, e te parahi hoi ma te tairoiro e te feii, ma te vahiahia mai e te vahia ˈtu, tatou tatou ihora. 4 Ia itea mai nei ra te hamani maitai e te aroha o to tatou Ora o te Atua i te taata nei; 5 ua faaora oia ia tatou, eiaha no te parau-tia i ravehia e tatou nei, no to ˈna ra râ aroha, i te horoi ra i te fanauraa apî, e to faahouraa a te Varua Maitai ra; 6 o ta ˈna i ninii hua mai i nia ia tatou no to tatou Ora no Iesu Mesia ra; 7 ia riro tatou i tiahia nei e to ˈna ra aroha mau, ei feia tufaa i tei tiaihia ra, i te ora mure ore. 8 E parau mau teie, e o ta ˈu teie hinaaro ia faaite hua oe eiaha e faaea, ia faaitoito i te feia i faaroo i te Atua ia rave tamau maite i te mau ohipa maitatai ra. O te mea maitai hoi te reira e maitai ai hoi te taata nei. 9 Area te ui rii maamaa ra, e te aufau fanauraa, e te mârô, e te tamaˈi i te ture ra, eiaha roa ïa, e mea faufaa ore ïa, e te tumu ore hoi. 10 O te taata e faatupu i te hairesi ra, ua oti anaˈe i te aˈohia ˈtu, hoê atura aˈoraa, e e piti hoi, e faataa ê atu ïa. 11 Ua itea hoi e ua piˈo ê te reira, ua hara ïa, ua faahapahia ïa e ana iho.
12 Ia tono atu vau ia Aretema ia oe ra, e aore oia, ia Tuhiko, e haapeepee mai oe i Nikopoli ia ˈu ra: te opua nei hoi au e ei reira vau i teie nei tau vero. 13 E faaitoito i te aratai mai ia Zena haapii ture, e ia Apolo, eiaha raua ia ere i te hoê mea iti i to raua tere. 14 E haapii atoa to tatou i te rave i te mau ohipa maitatai e ia hau atu ïa, i te mau vahi e au ia rave ra, ia ore hoi ratou ia riro mai te raau hotu ore ra. 15 Te aroha ˈtu nei to pihai iho ia ˈu nei ia oe. E aroha ˈtu i tei aroha mai ia tatou i te parau nei. Ei ia outou atoa na te aroha mau. Amene.