Tito

Te Episetole ia Tito ra

I VAIIHOHIA TITO E PAULO I KERETA, E TE MEA I VAIIHOHIA ˈI.

1 Paulo, e tavini no te Atua, e e aposetolo hoi na Iesu Mesia, ia faaroo te feia i maitihia e te Atua ra, e ia farii i te parau mau i au i te paieti ra; 2 ia noaa te tiaturi i te ora mure ore, i ta te Atua ta te ore e tia ia haavare i parau mai hou teie nei ao ra: 3 i faaite hua maira râ i ta ˈna parau i te tau mau nei, i te aˈo i tuuhia mai ia ˈu nei, i te faaue a te Atua a to tatou Ora ra; 4 ia Tito, i tau tamaiti mau i te parau nei, ei ia oe te ite, e te aroha, e te hau no ǒ mai i te Atua Metua ra, e no ǒ hoi i te Fatu ra ia Iesu Mesia, i to tatou Ora ra.

5 Teie te mea i vaiiho ai au ia oe i Kereta na, ia faanehenehe oe i tei toe ra, ia faatoroa i te peresibutero i te mau oire atoa ra, mai ta ˈu i poroi ia oe ra; 6 o te taata hapa ore, vahine hoê ra, e te tamarii faaroo, aore i parihia i te puhura, e te aˈo atâ. 7 Ei taata hapa ore hoi te episekopo e tia ˈi i te tiaau a te Atua ra; eiaha ei taata mârô i to ˈna hinaaro, eiaha te riri noa, eiaha te inu hua i te uaina, eiaha ei taata momoto, eiaha ei nounou taoˈa i te mea tia ore ra. 8 Ei taata ite maitai i te taata ra, e te au atu i te taata maitatai ra, e te haapao maitai, e te parau-tia, e te moˈa, e te hitahita ore; 9 e te tapea maite hoi i te parau mau i haapiihia ˈtu ia ˈna ra, ia tia ia ˈna ia haapii i te parau ora, e ia faaite atu i te hapa a te feia e patoi maira. 10 Rave rahi hoi te taata haapao ore, e te parau faufaa ore, e te haavare, e rahi atu râ i to te peritome: 11 ia haamamûhia ˈtu ïa feia e tia ˈi, e fetii taatoa hoi ta ratou e taihitumu nei, i te haapiiraa i te parau-tia ore, ia noaa te taoˈa i te mea tia ore ra. 12 Te hoê hoi o ratou, e peropheta no ratou iho tei parau e, E haavare â to Kereta eita e faaea, e puaa ino, e arapoa rahi faatau ïa. 13 E parau mau hoi taua parau nei. E tena na, e aˈo uˈana ˈtu oe ia ratou, ia tia to ratou faaroo i te parau nei; 14 e eiaha e haapao i te mau fabula ati Iuda ra, e te parau a te mau taata i faarue i te parau mau nei. 15 E mea viivii ore te mau mea atoa nei i te feia viivii ore; area te feia viivii e te faaroo ore ra, aore roa ïa mea viivii ore; ua viivii atoa hoi to ratou aau e te manaˈo atoa. 16 Te parau nei ratou e ua ite i te Atua, area ta ratou ohipa, te parau nei ïa aore i ite ia ˈna, e feia faufau, e te faaroo ore, e te mau ohipa maitatai nei, aore roa ïa e au i reira.