Timoteo 1
TE HURU O TE AˈO IA AˈO ATU I TO TE EKALESIA RA, E TE PARAU NO TE MAU VAHINE IVI RA.
5 Eiaha e avau atu i te taata paari; e aˈo atu râ mai te mea e e metua, e te mau taata apî ra, ei taeae ïa. 2 E te mau vahine paari ra mai te metua vahine, e te mau vahine apî ra ei tuahine ïa, ma te haapao maitai. 3 E ite maitai atu i te mau vahine ivi, i te ivi mau ra. 4 O te vahine ivi râ e tamarii ta ˈna e te mootua, e rave na ratou i te paieti i te faaamuraa i to ratou iho fetii, a tahoo ai i te mau metua ra: e mea maitai hoi te reira e te au i te aro o te Atua ra. 5 E teie nei, o te vahine ivi mau ra, e aita a ˈna, te tiaturi ra ïa i te Atua, ma te tamau hoi i te pure, e te aniraa ˈtu i te rui e te ao: 6 area o tei faatia hua i ta te tino ra, ua pohe ïa ora noa ˈi â. 7 E tuu atu oe i teie nei mau parau ia ratou, ia ore ratou ia hapa. 8 O te taata hoi aore i hamani maitai i to ˈna ihora, e rahi atu â i to ˈna ihora utuafare, ua faarue ïa oia i te parau, e e rahi atu ïa to ˈna ino i to te taata mau ore ra. 9 Eiaha ei vahine ivi aore i tae i te ono i te ahuru o to ˈna ra matahiti e maitihia ra, ei vahine i tahoê na i te tane e tia ˈi, 10 e te roo maitai i te parau maitai ra, e i haapii na i ta ˈna tamarii, e i ite maitai na i te taata ěê, e i horoi na i te avae o te feia moˈa, e i tauturu na i te feia ati ra, e i rave maite na hoi i te mau ohipa maitatai atoa ra. 11 Eiaha râ te mau ivi vahine apî ra, ua fiu anaˈe hoi ratou i ta te Mesia ra, ua faaipoipo ïa; 12 e faahaparaa tei ia ratou, no te mea ua haapae ratou i ta ratou haapao matamua ra. 13 E no te faatau, ua haamataro ratou i te ori haere noa i tera fare, i tera fare, e ere râ i te faatau anaˈe ra, e hopoi parau hoi ratou, e te hiˈopoa, e te parauraa hoi i te mau mea au ore ra. 14 E teie nei, teie ta ˈu parau i te mau ivi vahine apî ra, e faaipoipo ratou, e faafanautama, e haapao maitai i te utuafare, e eiaha to te enemi ei faainoraa. 15 Ua ohipa ê aˈenei e tahi pae vahine i te peeraa ˈtu ia Satani. 16 E vahine ivi to te fetii o te hoê taata faaroo, e to te hoê vahine faaroo ra, e tauturu oia i taua ivi ra, e eiaha te ekalesia ia faateimahahia; ia tia i te reira ia tauturu i te mau ivi mau ra.
17 O te mau peresibutero i faaite maitai ra, ia rahi atu ïa i te faatura ˈtu, ia hau atu râ i tei ohipa i te aˈo e te haapii ra. 18 Te na ô maira hoi te parau i papaihia ra e, Eiaha oe e tavaha i te puaatoro ia taataahi i te sitona ra. E, E au i te rave ohipa ta ˈna ra utua. 19 Eiaha e farii i te pari i te peresibutero, maori râ ia toopiti e ia tootoru hoi ite. 20 O tei rave i te hara ra e aˈo atu i mua i te aro o te taata atoa ra, ia mǎtaˈu atoa te tahi pae ra. 21 Te aˈo hua ˈtu nei au ia oe i mua i te aro o te Atua, e te Fatu ra o Iesu Mesia, e te mau melahi i maitihia ra, e e haapao oe i teie nei mau parau, eiaha ei faahapa atea noa, e eiaha te faatia pae tahi.
22 Eiaha e ru i te tuu i te rima i nia i te taata, eiaha e apiti atoa ˈtu i ta vetahi ê ra hara: ia vai maitai â oe. 23 Atira na i te inu noa i te pape, ei maa uaina iti râ ta oe, no to opu hoi, e no te pohe pinepine no oe ra. 24 Te vai iho noa ra te hara a te tahi pae taata, te na mua ra ïa e taa noa ˈtura, area ta te tahi pae na muri ïa i te itea. 25 Oia atoa te parau maitai a te tahi pae, te itea-noa-hia ra ïa na mua, e te ore i itea ra eitâ e moe ia huna.