Timoteo 1
TE HURU O TE EPISEKOPO, E TO TE DIAKONO, E TA RATOU MAU VAHINE, I FAAITEHIA RA.
3 E parau mau teie, ia hinaaro uˈana te hoê taata i te toroa episekopo ra, ua hinaaro oia i te ohipa maitai. 2 Ei taata hapa ore râ te episekopo e tia ˈi, ei taata vahine hoê, e te itoito, e te haapao maitai, e te haerea nehenehe, e te ite i te taata ěê, e te au hoi ia haapii; 3 eiaha ei taata inu hua i te uaina, eiaha ei taata momoto, eiaha ei popore taoˈa i te mea tia ore ra, ei taata mǎrû râ, eiaha ei taata marôrô, eiaha ei nounou moni; 4 ei taata aˈo maitai i to ˈna iho utuafare, ma te tura, e ta ˈna tamarii i te auraro-maite-raa ia ˈna. 5 (O te taata hoi aore i ite i te aˈo i to ˈna iho utuafare, eaha e tia ˈi ia ˈna ia tiai i te ekalesia o te Atua?) 6 Eiaha ei tiahou, o te faateiteihia oia e te teoteo, a roohia ˈtu ai i te faahapa i faahapahia ˈi te diabolo ra: 7 Ei roo maitai hoi to ˈna i te feia i rapae au ra e tia ˈi; o te roohia oia i te faaino, e te marei a te diabolo.
8 Oia atoa hoi te mau diakono, ia tura atoa ïa, eiaha ei vaha piti, eiaha te inu hua i te uaina, eiaha ei popore taoˈa i te mea tia ore ra. 9 Ei taata tapea maite i te parau moe ra i te faaroo ma te aau maitai. 10 Ia hiˈo-maitai-atoa-hia ra ratou, e aore e pariraa ra, a rave ai ratou i te toroa diakono ra. 11 Mai te reira atoa te mau vahine i te aoaoa ore e tia ˈi, eiaha ei tihotiho, ei haapao maitai, e te haavare ore i te mau mea atoa ra. 12 Ei taata vahine hoê anaˈe te mau diakono, e te aˈo-maitai-raa hoi i ta ratou tamarii, e to ratou iho utuafare. 13 O te feia hoi i rave maitai na i te toroa diakono ra, e vahi maitai tei noaa ia ratou, e te itoito rahi i te faaroo i te Mesia ra ia Iesu.
14 Te papai nei au i teie nei mau parau ia oe, te manaˈo nei râ ua fatata vau i te tae atu i ǒ na ia oe na; 15 ia maoro râ vau ra, ia ite oe i ta oe haapaoraa tia i roto i te fare o te Atua ra, o te ekalesia o te Atua ora ra, o te pou e te tumu o te parau mau ra. 16 Ua tia paatoa hoi e, e parau moe rahi to te paieti nei, oia hoi te parau ra e, i itea mai te Atua i roto i te taata nei, e i tiahia mai e te Varua, e i hiˈohia e te mau melahi, e i parau-haere-hia i ǒ te Etene, e i faaroohia i te ao nei, e ravehia ˈtura i nia i to ˈna ihora ao.