Tesalonia 2

TE TITAU NEI PAULO I TA RATOU PURE IA ˈNA IHO, E TE FAAITE RA I TO ˈNA TIATURIRAA IA RATOU.

3 E teie nei, e te mau taeae, e pure no matou, ia horo noa te parau a te Fatu, e ia haamaitaihia, mai tei ǒ outou atoa na, 2 e ia faaorahia matou i te taata iino e te haapao ore, aore hoi i ati paatoa te taata i te faaroo. 3 E parau mau râ ta te Fatu, na ˈna outou e haapapu, e e faaora hoi ia outou i te ino 4 E te tiaturi nei matou i te Fatu ia outou, e te rave na outou, e e rave â outou, i ta matou e parau atu ia outou na. 5 E ia faatae hoi te Fatu i to outou aau i te aroha o te Atua, e i te faaoromai o te Mesia ra.

6 Te aˈo atu nei hoi matou ia outou, e te mau taeae, i te iˈoa o to tatou Fatu o Iesu Mesia ra, e faataa ê mai outou i te mau taeae haerea tia ore atoa ra, aore i au i te parau i tuuhia ta ˈna i ite ia matou nei. 7 Ua ite hoi outou iho na, e ia pee mai outou ia matou e tia ˈi, e ere hoi to matou i te haerea tia ore i roto ia outou na; 8 aore hoi matou i amu noa i ta vetahi ê ra maa; ua rave râ matou i te ohipa ma te rohirohi, i te rui e te ao, ia ore roa te hoê o outou ia teimaha ia matou nei: 9 e ere râ mai te mea e eita e au ia matou; ia riro râ matou ei hiˈoraa no outou, ia pee mai outou ia matou nei. 10 E ua parau atu hoi matou ia outou ia matou â i ǒ na ia outou na, e te taata e ore e rave i te ohipa ra, eiaha atoa oia e amu i te maa. 11 Te faaroo nei hoi matou e, e haerea tia ore to te hoê pae o outou na; aore i rave i te ohipa, e hiˈopoa râ i ta vetahi ê ra haapaoraa. 12 O te feia râ e na reira ra, te parau atu nei matou, te aˈo atu nei, i te iˈoa o to tatou Fatu o Iesu Mesia, e e rave maite ratou i te ohipa, a amu ai i ta ratou iho maa. 13 Area outou, e te mau taeae, eiaha e toaruaru i te raveraa i te parau maitai. 14 E te taata e ore e faaroo i ta matou parau i teie nei episetole, tapao atu i te reira taata, e eiaha e amui atu ia ˈna, ia haama oia. 15 Eiaha râ e parau e enemi, e aˈo atu râ ei taeae. 16 E teie nei, ia horoa mai te Fatu hau iho i te hau no outou i te mau mea atoa nei, eiaha ia mure. Ei pihai atoa iho te Fatu ia outou atoa na.

17 O to ˈu teie aroharaa ˈtu to Paulo na to ˈu iho rima i papai, o te tapao ïa i te mau episetole atoa ra, e na reira vau ia papai. 18 Ei ia outou atoa na te aroha mau o to tatou Fatu, o Iesu Mesia ra. Amene.